੪੨. ਦੇਸਨਾਨਿਦ੍ਦੇਸਵਣ੍ਣਨਾ

੩੮੨. ਇਦਾਨਿ ਦੇਸਨਾਨਿਦਸ੍ਸਨਬ੍ਯਾਸੇਨ ਹੇਟ੍ਠਾ ਅਵੁਤ੍ਤਾਨਿ ਕਾਨਿਚਿ ਸਿਕ੍ਖਾਪਦਾਨਿ ਉਪਦਿਸਿਤੁਂ ‘‘ਚਾਗੋ’’ਤਿਆਦਿਮਾਹ. ਭਿਕ੍ਖੁਭਾਵਸ੍ਸ ਯੋ ਚਾਗੋ, ਸਾ ਪਾਰਾਜਿਕਦੇਸਨਾਤਿ ਸਮ੍ਬਨ੍ਧੋ. ਭਵਤਿ ਅਨੇਨਾਤਿ ਭਾਵੋ, ਸਦ੍ਦਪ੍ਪਵਤ੍ਤਿਨਿਮਿਤ੍ਤਂ, ਭਿਕ੍ਖੁਨੋ ਭਾਵੋ ਭਿਕ੍ਖੁ-ਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤਂ ਭਿਕ੍ਖੁਕਿਚ੍ਚਂ ਭਿਕ੍ਖੁਭਾਵੋ, ਤਸ੍ਸ. ਦਿਸੀ ਉਚ੍ਚਾਰਣੇ, ਉਚ੍ਚਾਰਣਾ ਪਕਾਸਨਾ ਦੇਸਨਾ. ‘‘ਛਨ੍ਨਮਤਿਵਸ੍ਸਤਿ, ਵਿਵਟ੍ਟਂ ਨਾਤਿਵਸ੍ਸਤੀ’’ਤਿ (ਉਦਾ. ੪੫) ਹਿ ਵੁਤ੍ਤਂ. ਇਧ ਪਨ ਭਿਕ੍ਖੁਭਾਵਪਰਿਚ੍ਚਾਗੋਯੇਵ ਪਾਰਾਜਿਕਾਯ ਪਕਾਸਨਾ ਨਾਮ ਪਾਰਾਜਿਕਾਯ ਦੇਸਨਾ. ‘‘ਯੋ’’ਤਿ ਵੁਤ੍ਤਤ੍ਤਾ ‘‘ਸੋ’’ਤਿ ਵਤ੍ਤੁਂ ਯੁਤ੍ਤਂ, ਤਥਾਪਿ ਸਬ੍ਬਾਦੀਹਿ ਵੁਤ੍ਤਸ੍ਸ ਵਾ ਲਿਙ੍ਗਮਾਦਿਯ੍ਯਤੇ ਵਕ੍ਖਮਾਨਸ੍ਸ ਵਾਤਿ ਵਕ੍ਖਮਾਨਦੇਸਨਾਪੇਕ੍ਖਾਯ ‘‘ਸੋ’’ਤਿ ਵੁਤ੍ਤਂ. ਯਥਾ ਯੇਨ ਪਕਾਰੇਨ ‘‘ਛਾਦੇਤਿ ਜਾਨਮਾਪਨ੍ਨ’’ਨ੍ਤਿਆਦਿਨਾ ਵੁਤ੍ਤਂ ਯਥਾਵੁਤ੍ਤਂ, ਤੇਨ. ਵੁਤ੍ਤਮਨਤਿਕ੍ਕਮ੍ਮਾਤਿ ਅਬ੍ਯਯੀਭਾਵਵਸੇਨ ਵਾ ਅਤ੍ਥੋ ਵੇਦਿਤਬ੍ਬੋ. ਇਧਾਪਿ ਗਰੁਕਾਪਤ੍ਤਿਯਾ ਵੁਟ੍ਠਾਨਾਨਤਿਕ੍ਕਮੇਨੇਵ ਪਕਾਸਨਾ ਦੇਸਨਾ ਸਿਯਾਤਿ ‘‘ਵੁਟ੍ਠਾਨਂ ਗਰੁਕਾਪਤ੍ਤਿਦੇਸਨਾ’’ਤਿ ਵੁਚ੍ਚਤਿ.

੩੮੩. ਇਦਾਨਿ ਵਤ੍ਤਬ੍ਬਂ ਸਨ੍ਧਾਯ ‘‘ਏਵ’’ਨ੍ਤਿ ਵੁਤ੍ਤਂ. ਏਕਸ੍ਸਾਤਿ ਏਕਸ੍ਸ ਭਿਕ੍ਖੁਨੋ.

੩੮੪. ਤੁਮ੍ਹਮੂਲੇਤਿ ਤੁਮ੍ਹਾਕਂ ਮੂਲੇ ਸਮੀਪੇ. ਪਟਿਦੇਸੇਮੀਤਿ ਪਕਾਸੇਮਿ. ਸਂਵਰੇਯ੍ਯਾਸੀਤਿ ਸਂਯਮੇਯ੍ਯਾਸਿ, ਸਂਵਰੇ ਪਤਿਟ੍ਠੇਯ੍ਯਾਸੀਤਿ ਅਤ੍ਥੋ.

੩੮੫. ਨਿਸ੍ਸਜ੍ਜਿਤ੍ਵਾਨਾਤਿ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਂ ਞਤ੍ਵਾ ‘‘ਇਦਂ ਮੇ, ਭਨ੍ਤੇ, ਚੀਵਰ’’ਨ੍ਤਿਆਦਿਨਾ ਨਿਸ੍ਸਜ੍ਜਿਤ੍ਵਾ. ਤੇਨਾਤਿ ਯਸ੍ਸ ਚੀਵਰਂ ਨਿਸ੍ਸਟ੍ਠਂ, ਤੇਨ. ‘‘ਇਮਂ…ਪੇ… ਦਮ੍ਮੀ’’ਤਿ ਨਿਸ੍ਸਟ੍ਠਚੀਵਰਂ ਦੇਯ੍ਯਨ੍ਤਿ ਸਮ੍ਬਨ੍ਧਿਤਬ੍ਬਂ. ‘‘ਇਮਂ ਚੀਵਰਂ ਦਸਾਹਾਤਿਕ੍ਕਨ੍ਤ’’ਨ੍ਤਿਆਦਿਨਾ ਯੋਜੇਤਬ੍ਬਂ.

੩੮੬. (ਕ) ਚੀਵਰਨ੍ਤਿ ਤਿਚੀਵਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ ਸਙ੍ਘਾਟਿਆਦੀਸੁ ਯਂ ਕਿਞ੍ਚਿ ਚੀਵਰਂ. ਵਿਪ੍ਪਵੁਤ੍ਥਨ੍ਤਿ ਵਿਪ੍ਪਯੁਤ੍ਤੇਨ ਵੁਤ੍ਥਂ.

(ਖ) ਅਕਾਲਚੀਵਰਨ੍ਤਿ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮਮਾਸਂ ਠਪੇਤ੍ਵਾ ਸੇਸੇ ਏਕਾਦਸਮਾਸੇ, ਅਤ੍ਥਤੇ ਕਥਿਨੇ ਤਞ੍ਚ ਮਾਸਂ ਹੇਮਨ੍ਤਿਕੇ ਚਤ੍ਤਾਰੋ ਮਾਸੇ ਚ ਠਪੇਤ੍ਵਾ ਸੇਸੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਸਙ੍ਘਸ੍ਸ ਵਾ ‘‘ਇਦਂ ਅਕਾਲਚੀਵਰ’’ਨ੍ਤਿ ਏਕਪੁਗ੍ਗਲਸ੍ਸ ਵਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਉਦ੍ਦਿਸਿਤ੍ਵਾ ਦਿਨ੍ਨਂ. ਇਤਰਂ ਪਨ ਕਾਲਚੀਵਰਂ. ਮਾਸਾਤਿਕ੍ਕਨ੍ਤਨ੍ਤਿ ਅਕਾਲਚੀਵਰੇ ਉਪ੍ਪਨ੍ਨੇ ਊਨਸ੍ਸ ਪਾਰਿਪੂਰਿਯਾ ਸਙ੍ਘਗਣਾਦਿਤੋ ਸਤਿਯਾ ਪਚ੍ਚਾਸਾਯ ਮਾਸਮੇਕਂ ਪਰਿਹਾਰੋ ਲਬ੍ਭਤਿ, ਤਂ ਮਾਸਂ ਅਤਿਕ੍ਕਨ੍ਤਂ.

(ਗ) ਪੁਰਾਣਚੀਵਰਨ੍ਤਿ ਯਂ ਅਨ੍ਤਮਸੋ ਉਸ੍ਸੀਸਕਂ ਕਤ੍ਵਾ ਨਿਪਨ੍ਨੋ. ਚੀਵਰਂ ਨਾਮ ਛਨ੍ਨਂ ਅਞ੍ਞਤਰਂ ਵਿਕਪ੍ਪਨੂਪਗਂ. ਏਸੇਵ ਨਯੋ ਸਬ੍ਬੇਸੁ ਵਕ੍ਖਮਾਨਚੀਵਰਪ੍ਪਟਿਸਂਯੁਤ੍ਤਸਿਕ੍ਖਾਪਦੇਸੁ.

(ਘ) ਅਞ੍ਞਤ੍ਰ ਪਾਰਿਵਤ੍ਤਕਾਤਿ ਅਨ੍ਤਮਸੋ ਹਰੀਤਕੀਖਣ੍ਡੇਨਪਿ ਪਾਰਿਵਤ੍ਤਕਂ ਵਿਨਾ.

(ਙ) ਗਹਪਤਿਕਨ੍ਤਿ ਭਿਕ੍ਖੂਸੁ ਅਪਬ੍ਬਜਿਤਕਂ. ਅਞ੍ਞਤ੍ਰ ਸਮਯਾਤਿ ਅਚ੍ਛਿਨ੍ਨਚੀਵਰਨਟ੍ਠਚੀਵਰਸਮਯਂ ਵਿਨਾ, ਅਚ੍ਛਿਨ੍ਨਚੀਵਰੇਹਿ ਪਨ ਸਾਖਾਪਲਾਸਂ ਅਤ੍ਤਨਾ ਭਞ੍ਜਿਤ੍ਵਾਪਿ ਵਾਕਾਦੀਨਿ ਗਣ੍ਹਿਤ੍ਵਾਪਿ ਨਿਵਾਸੇਤੁਂ ਵਟ੍ਟਤਿ, ਪਗੇਵ ਵਿਞ੍ਞਤ੍ਤਿ. ਚੀਵਰਂ ਵਿਞ੍ਞਾਪਿਤਨ੍ਤਿ ਸਮ੍ਬਨ੍ਧੋ. ਕਨ੍ਤਿ ਆਹ ‘‘ਅਞ੍ਞਾਤਕ’’ਨ੍ਤਿਆਦਿ.

(ਚ) ਤਦੁਤ੍ਤਰੀਤਿ ਤਤੋ ਵੁਤ੍ਤਪ੍ਪਮਾਣਤੋ ਉਤ੍ਤਰਿ, ਅਚ੍ਛਿਨ੍ਨਚੀਵਰੇਨ ਭਿਕ੍ਖੁਨਾ ਕਾਯੇਨ ਵਾ ਵਾਚਾਯ ਵਾ ਅਭਿਹਰਿਤ੍ਵਾ ਪਵਾਰਿਤਚੀਵਰਤੋ ਤੀਸੁ ਨਟ੍ਠੇਸੁ ਦ੍ਵੇ ਸਾਦਿਤਬ੍ਬਾਨਿ, ਦ੍ਵੀਸੁ ਨਟ੍ਠੇਸੁ ਏਕਂ ਸਾਦਿਤਬ੍ਬਂ. ਪਕਤਿਯਾ ਸਨ੍ਤਰੁਤ੍ਤਰੇਨ ਚਰਨ੍ਤੇਨ ਦ੍ਵੀਸੁ ਨਟ੍ਠੇਸੁ ਦ੍ਵੇਯੇਵ ਸਾਦਿਤਬ੍ਬਾਨਿ, ਏਕਸ੍ਮਿਂ ਨਟ੍ਠੇ ਏਕਂਯੇਵ ਸਾਦਿਤਬ੍ਬਂ. ਯਸ੍ਸ ਏਕਂਯੇਵ ਹੋਤਿ, ਤਸ੍ਮਿਂ ਨਟ੍ਠੇ ਦ੍ਵੇ ਸਾਦਿਤਬ੍ਬਾਨਿ.

(ਛ) ਅਪ੍ਪਵਾਰਿਤੋਤਿ ਗਹਪਤਿਨਾ ਵਾ ਗਹਪਤਾਨਿਯਾ ਵਾ. ਵਿਕਪ੍ਪਨ੍ਤਿ ਪਠਮਅਧਿਪ੍ਪੇਤਤੋ ਮੂਲਂ ਵਡ੍ਢਾਪੇਨ੍ਤੋ ਸੁਨ੍ਦਰਕਾਮਤਾਯ ‘‘ਆਯਤਂ ਵਾ’’ਤਿਆਦਿਨਾ ਵਿਸਿਟ੍ਠਕਪ੍ਪਂ ਅਧਿਕਵਿਧਾਨਂ.

(ਜ) ਅਞ੍ਞਾਤਕੇ ਗਹਪਤਿਕੇਤਿ ਬਹੂਨਂ ਵਸੇਨ ਵੁਤ੍ਤਮਤ੍ਤਮੇਵ ਪੁਰਿਮਤੋ ਵਿਸੇਸੋ.

(ਝ) ਚੋਦਨਾਯਾਤਿ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ ਚੋਦਨਾਯ. ਠਾਨੇਨਾਤਿ ਕਾਯਚੋਦਨਮਾਹ. ਰਾਜਾਦੀਹਿ ਪੇਸਿਤੇਨ ਹਿ ਦੂਤੇਨ ਵੇਯ੍ਯਾਵਚ੍ਚਕਰਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨੇ ਨਿਕ੍ਖਿਤ੍ਤੇ ਤਿਸ੍ਸੋ ਚੋਦਨਾ ਅਨੁਞ੍ਞਾਤਾ, ਚੋਦਨਾਯ ਦਿਗੁਣਂ ਠਾਨਂ, ਤਸ੍ਮਾ ਸਚੇ ਚੋਦੇਤਿਯੇਵ, ਨ ਤਿਟ੍ਠਤਿ, ਛ ਚੋਦਨਾ ਲਬ੍ਭਨ੍ਤਿ. ਸਚੇ ਤਿਟ੍ਠਤਿਯੇਵ, ਨ ਚੋਦੇਤਿ, ਦ੍ਵਾਦਸ ਠਾਨਾਨਿ ਲਬ੍ਭਨ੍ਤਿ. ਸਚੇ ਉਭਯਂ ਕਰੋਤਿ, ਏਕਾਯ ਚੋਦਨਾਯ ਦ੍ਵੇ ਠਾਨਾਨਿ ਹਾਪੇਤਬ੍ਬਾਨਿ.

(ਟ) ਸੁਦ੍ਧਾਨਿ ਚ ਤਾਨਿ ਕਾਲ਼ਕਾਨਿ ਚ ਜਾਤਿਯਾ ਰਜਨੇਨ ਵਾ.

(ਠ) ਤੁਲਨ੍ਤਿ ਚਤੂਹਿ ਤੁਲਾਹਿ ਕਾਰੇਤੁਕਾਮਤਂ ਸਨ੍ਧਾਯ ਵੁਤ੍ਤਂ. ਅਤ੍ਥਤੋ ਪਨ ਯਤ੍ਤਕੇਹਿ ਏਲ਼ਕਲੋਮੇਹਿ ਕਾਤੁਕਾਮੋ ਹੋਤਿ, ਤੇਸੁ ਦ੍ਵੇ ਕੋਟ੍ਠਾਸਾ ਕਾਲ਼ਕਾਨਂ, ਏਕੋ ਓਦਾਤਾਨਂ, ਏਕੋ ਗੋਚਰਿਯਾਨਂ ਗਹੇਤਬ੍ਬੋ. ਤੁਲਾ ਨਾਮ ਪਲਸਤਂ. ਗੋਚਰਿਯਾ ਨਾਮ ਕਪਿਲਵਣ੍ਣਾ. ਇਦਂ ਮੇ ਸਨ੍ਥਤਂ ਕਾਰਾਪਿਤਨ੍ਤਿ ਯੋਜਨਾ.

(ਣ) ਤਿਯੋਜਨਪਰਮਨ੍ਤਿ ਗਹਿਤਟ੍ਠਾਨਤੋ ਤੀਣਿ ਯੋਜਨਾਨਿ ਪਰਮੋ ਅਸ੍ਸ ਅਤਿਕ੍ਕਮਨਸ੍ਸਾਤਿ ਭਾਵਨਪੁਂਸਕਵਸੇਨ ਅਤ੍ਥੋ ਵੇਦਿਤਬ੍ਬੋ. ਅਤਿਕ੍ਕਾਮਿਤਾਨੀਤਿ ਅਨ੍ਤਮਸੋ ਸੁਤ੍ਤਕੇਨਪਿ ਭਣ੍ਡਕਤਭਣ੍ਡਹਰਣਂ ਵਿਨਾ ਅਨ੍ਤਮਸੋ ਵਾਤਾਬਾਧਪ੍ਪਟਿਕਾਰਤ੍ਥਂ ਕਣ੍ਣਚ੍ਛਿਦ੍ਦੇ ਪਕ੍ਖਿਤ੍ਤਾਨਿ ਅਤਿਕ੍ਕਾਮਿਤਾਨਿ.

੩੮੭-੯. ਨਿਸ੍ਸਜ੍ਜਿਤ੍ਵਾਨਾਤਿ ਵੁਤ੍ਤਨਯੇਨ ਵਤ੍ਥੂਨਿ ਨਿਸ੍ਸਜ੍ਜਿਤ੍ਵਾ. ਅਥਾਤਿ ਦੇਸਿਤਾਨਨ੍ਤਰਂ. ‘‘ਇਮਂ ਜਾਨਾਹੀ’’ਤਿ ਗਿਹਿਂ ਵਦੇਤਿ ਯੋਜਨਾ. ਸੋਤਿ ਆਰਾਮਿਕਾਦਿਕੋ ਗਿਹੀ. ‘‘ਇਮਿਨਾ ਕਿਂ ਆਹਰਾਮੀ’’ਤਿ ਵਦੇਯ੍ਯਾਤਿ ਸਮ੍ਬਨ੍ਧੋ. ਵਦੇਯ੍ਯਾਤਿ ਯਦਿ ਵਦਤਿ. ਇਮਨ੍ਤਿ ਅਵਤ੍ਵਾਤਿ ‘‘ਇਮਂ ਆਹਰਾ’’ਤਿ ਅਵਤ੍ਵਾ ਭਿਕ੍ਖੂਨਂ ਕਪ੍ਪਿਯਂ ਤੇਲਾਦਿਨ੍ਤਿ ਵਦੇਤਿ ਸਮ੍ਬਨ੍ਧੋ. ਆਦਿਨ੍ਤਿ ਸਨ੍ਧਿਵਸੇਨ ਨਿਗ੍ਗਹਿਤਂ. ਤੇਨ ਪਰਿਵਤ੍ਤੇਤ੍ਵਾਨ ਸੋ ਯਂ ਕਪ੍ਪਿਯਂ ਆਹਰਤੀਤਿ ਯੋਜਨਾ. ਤੇਨਾਤਿ ਨਿਸ੍ਸਗ੍ਗਿਯਵਤ੍ਥੁਨਾ. ਦ੍ਵੇਪੇਤੇ ਠਪੇਤ੍ਵਾਤਿ ਏਤੇ ਰੂਪਿਯਪ੍ਪਟਿਗ੍ਗਾਹਕਰੂਪਿਯਸਂਵੋਹਾਰਕੇ ਦ੍ਵੇ ਠਪੇਤ੍ਵਾ ਸੇਸੇਹਿ ਪਰਿਭੁਞ੍ਜਿਤੁਂ ਲਬ੍ਭਨ੍ਤਿ ਸਮ੍ਬਨ੍ਧੋ. ਪਰਿਭੁਞ੍ਜਿਤੁਨ੍ਤਿ ਤਂ ਭੁਞ੍ਜਿਤੁਂ. ਤਤੋਤਿ ਪਰਿਵਤ੍ਤਿਤਕਪ੍ਪਿਯਤੋ. ਅਞ੍ਞੇਨਾਤਿ ਅਨ੍ਤਮਸੋ ਆਰਾਮਿਕੇਨਾਪਿ. ਤੇਸਨ੍ਤਿ ਵੁਤ੍ਤਾਨਂ ਦ੍ਵਿਨ੍ਨਂ.

੩੯੦. ਅਨ੍ਤਮਸੋ ਤਨ੍ਨਿਬ੍ਬਤ੍ਤਾ ਰੁਕ੍ਖਚ੍ਛਾਯਾਪੀਤਿ ਸਮ੍ਬਨ੍ਧੋ. ਤਨ੍ਨਿਬ੍ਬਤ੍ਤਾਤਿ ਨਿਸ੍ਸਟ੍ਠਵਤ੍ਥੁਨਾ ਕਿਣਿਤ੍ਵਾ ਗਹਿਤਆਰਾਮੇ ਰੁਕ੍ਖਚ੍ਛਾਯਾ ਤਨ੍ਨਿਬ੍ਬਤ੍ਤਾ ਹੋਤੀਤਿ ਤਤੋ ਨਿਬ੍ਬਤ੍ਤਾਤਿ ਸਮਾਸੋ. ਆਦਿਤੋ ਸਨ੍ਥਤਤ੍ਤਯਨ੍ਤਿ ਆਦਿਮ੍ਹਿ ਕੋਸਿਯਸੁਦ੍ਧਕਾਲ਼ਕਦ੍ਵੇਭਾਗਸਨ੍ਥਤਤ੍ਤਯਂ.

੩੯੧. ਏਵਂ ਚੇ ਨੋ ਲਭੇਥਾਤਿ ਏਵਂ ਪਰਿਵਤ੍ਤੇਤ੍ਵਾ ਕਪ੍ਪਿਯਕਾਰਕੋ ਨੋ ਚੇ ਲਭੇਯ੍ਯ, ਸੋ ਗਿਹੀ ‘‘ਇਮਂ ਛਡ੍ਡੇਹੀ’’ਤਿ ਸਂਸਿਯੋ ਵਤ੍ਤਬ੍ਬੋ, ਏਵਂ ਰੂਪਿਯਛਡ੍ਡਕੋ ਗਿਹੀ ਨੋ ਚੇ ਲਭੇਯ੍ਯ, ਸਮ੍ਮਤੋ ਭਿਕ੍ਖੁ ਛਡ੍ਡੇਯ੍ਯਾਤਿ ਸਮ੍ਬਨ੍ਧੋ. ਸਮ੍ਮਤੋਤਿ ‘‘ਯੋ ਛਨ੍ਦਾਗਤਿਂ ਨ ਗਚ੍ਛੇਯ੍ਯਾ’’ਤਿਆਦਿਨਾ (ਪਾਰਾ. ੫੮੪) ਵੁਤ੍ਤਪਞ੍ਚਙ੍ਗਸਮਨ੍ਨਾਗਤੋ ਰੂਪਿਯਛਡ੍ਡਕਸਮ੍ਮੁਤਿਯਾ ਸਮ੍ਮਤੋ ਭਿਕ੍ਖੁ.

੩੯੨. ਏਤਾਨੀਤਿ ਪਟਿਗ੍ਗਹਿਤਰੂਪਿਯਾਨਿ. ਦੁਤਿਯਂ ਪਤ੍ਤਨ੍ਤਿ ਊਨਪਞ੍ਚਬਨ੍ਧਨੇ ਸਤਿ ਵਿਞ੍ਞਾਪਿਤਪਤ੍ਤਂ ਸਙ੍ਘੇ ਵਤ੍ਤੁਂ ਲਬ੍ਭਰੇਤਿ ਪਦਸਮ੍ਬਨ੍ਧੋ. ਵਤ੍ਤੁਨ੍ਤਿ ‘‘ਅਹਂ ਭਨ੍ਤੇ ਰੂਪਿਯਂ ਪਟਿਗ੍ਗਹੇਸਿ’’ਨ੍ਤਿਆਦਿਨਾ ਵਤ੍ਤੁਂ. ਸੇਸਾਨਿ ਅਵਸੇਸਨਿਸ੍ਸਗ੍ਗਿਯਵਤ੍ਥੂਨਿ ਸਙ੍ਘੇ ਏਕਸ੍ਮਿਂ ਗਣੇ ਚ ਵਤ੍ਤੁਂ ਲਬ੍ਭਰੇਤਿ ਯੋਜਨਾ. ਭਾਸਨ੍ਤਰੇਨਪਿ ਵਤ੍ਤੁਂ ਲਬ੍ਭਨ੍ਤਿ ਨ ਕੇਵਲਂ ਪਾਲ਼ਿਭਾਸਾਯਮੇਵ, ਸੀਹਲ਼ਾਦਿਭਾਸਾਯਪਿ ਨਿਸ੍ਸਜ੍ਜਿਤੁਂ ਲਬ੍ਭਤੀਤਿ ਅਤ੍ਥੋ.

੩੯੩. (ਕ) ਨਾਨਪ੍ਪਕਾਰਨ੍ਤਿ ਚੀਵਰਾਦੀਨਂ ਕਪ੍ਪਿਯਭਣ੍ਡਾਨਂ ਵਸੇਨ ਅਨੇਕਵਿਧਂ. ਕਯੋ ਗਹਣਂ, ਵਿਕ੍ਕਯੋ ਦਾਨਂ. ਕਯੋ ਚ ਵਿਕ੍ਕਯੋ ਚ ਕਯਵਿਕ੍ਕਯਂ.

(ਗ) ਊਨਪਞ੍ਚਬਨ੍ਧਨੇਨਾਤਿ ਊਨਾਨਿ ਪਞ੍ਚ ਬਨ੍ਧਨਾਨਿ ਯਸ੍ਸ, ਤੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਯਥਾਕਥਞ੍ਚਿ ਪਨ ਪਞ੍ਚਬਨ੍ਧਨੋ ਪਤ੍ਤੋ, ਪਞ੍ਚਬਨ੍ਧਨੋਕਾਸੋ ਵਾ, ਸੋ ਅਪਤ੍ਤੋ, ਅਞ੍ਞਂ ਵਿਞ੍ਞਾਪੇਤੁਂ ਵਟ੍ਟਤਿ.

੩੯੪. ਸਮ੍ਮਨ੍ਨਿਤ੍ਵਾਨਾਤਿ ਪਦਭਾਜਨੀਯੇ ਵੁਤ੍ਤਞਤ੍ਤਿਦੁਤਿਯਕਮ੍ਮੇਨ ਸਮ੍ਮਨ੍ਨਿਤ੍ਵਾ. ਸਙ੍ਘਸ੍ਸ ਪਤ੍ਤਨ੍ਤਨ੍ਤਿ ਅਨ੍ਤ-ਸਦ੍ਦੇਨ ਪਤ੍ਤਾਨਂ ਅਨ੍ਤੇ ਭਵੋ ਲਾਮਕੋ ਪਤ੍ਤੋਯੇਵ ਗਹਿਤੋ, ਨਿਸ੍ਸਟ੍ਠਪਤ੍ਤਸ੍ਸ ਵਿਜ੍ਜਮਾਨਗੁਣਂ ਵਤ੍ਵਾ ਥੇਰਂ, ਥੇਰਸ੍ਸ ਪਤ੍ਤਂ ਦੁਤਿਯਤ੍ਥੇਰਂ ਗਾਹਾਪੇਤ੍ਵਾ ਏਤੇਨੇਵ ਉਪਾਯੇਨ ਯਾਵਸਙ੍ਘਨਵਕਂ ਗਾਹਾਪੇਤ੍ਵਾ ਯੋ ਤਤ੍ਥ ਸਨ੍ਨਿਪਤਿਤਸਙ੍ਘਸ੍ਸ ਪਤ੍ਤੇਸੁ ਪਰਿਯਨ੍ਤੋ ਪਤ੍ਤੋ, ਤਂ ਪਤ੍ਤਨ੍ਤਿ. ਤਸ੍ਸਾਤਿ ਕਤਨਿਸ੍ਸਜ੍ਜਨਸ੍ਸ ਭਿਕ੍ਖੁਨੋ. ਦਾਪਯੇਤਿ ਸਮ੍ਮਤੇਨ ਪਤ੍ਤਗਾਹਾਪਕੇਨ ਦਾਪੇਯ੍ਯ.

੩੯੫. (ਕ) ਭੇਸਜ੍ਜਨ੍ਤਿ ਭੇਸਜ੍ਜਕਿਚ੍ਚਂ ਕਰੋਤੁ ਵਾ, ਮਾ ਵਾ, ਏਵਂ ਲਦ੍ਧਵੋਹਾਰਂ ਸਪ੍ਪਿਆਦਿਕਂ ਸਤ੍ਤਾਹਕਾਲਿਕਂ.

(ਖ) ਗਿਮ੍ਹਾਨਸ੍ਸ ਪਚ੍ਛਿਮਮਾਸੇ ਪੁਰਿਮੋ ਅਦ੍ਧਮਾਸੋ ਪਰਿਯੇਸਨਕਰਣਾਨਂ ਖੇਤ੍ਤਂ, ਪਚ੍ਛਿਮਦ੍ਧਮਾਸੋ ਪਰਿਯੇਸਨਕਰਣਨਿਵਾਸਨਾਨਂ ਖੇਤ੍ਤਂ, ਵਸ੍ਸਿਕਮਾਸਾ ਚਤ੍ਤਾਰੋਪਿ ਅਧਿਟ੍ਠਾਨੇਨ ਸਹ ਚਤੁਨ੍ਨਮ੍ਪਿ ਖੇਤ੍ਤਂ, ਇਮੇਯੇਵ ਪਞ੍ਚਮਾਸਾ ਕੁਚ੍ਛਿਸਮਯੋ, ਇਤਰਸਤ੍ਤਮਾਸਾ ਪਿਟ੍ਠਿਸਮਯੋ. ਪਿਟ੍ਠਿਸਮਯੇ ਪਰਿਯੇਸਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਕੁਚ੍ਛਿਸਮਯੇ ਚ ਅਤਿਰੇਕਦ੍ਧਮਾਸੇ ਕਤ੍ਵਾ ਪਰਿਦਹਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤੇਨ ਵੁਤ੍ਤਂ ‘‘ਅਤਿਰੇਕਮਾਸੇ ਸੇਸੇ’’ਤਿ.

(ਗ) ਸਾਮਂ ਦਤ੍ਵਾਤਿ ਵੇਯ੍ਯਾਵਚ੍ਚਾਦੀਨਿ ਪਚ੍ਚਾਸੀਸਮਾਨੋ ਸਯਮੇਵ ਦਤ੍ਵਾ. ਅਚ੍ਛਿਨ੍ਨਨ੍ਤਿ ਤਂ ਅਕਰੋਨ੍ਤਂ ਦਿਸ੍ਵਾ ਸਕਸਞ੍ਞਾਯ ਅਚ੍ਛਿਨ੍ਨਂ. ਭਿਕ੍ਖੁਨੋਪਿ ਚੀਵਰਂ ਠਪੇਤ੍ਵਾ ਅਞ੍ਞਂ ਪਰਿਕ੍ਖਾਰਂ, ਅਨੁਪਸਮ੍ਪਨ੍ਨਸ੍ਸ ਚ ਯਂ ਕਿਞ੍ਚਿ ਪਰਿਕ੍ਖਾਰਂ ਅਚ੍ਛਿਨ੍ਦਤੋ ਦੁਕ੍ਕਟਂ. ਪਰਿਚ੍ਚਜਿਤ੍ਵਾ ਦਿਨ੍ਨਂ ਸਕਸਞ੍ਞਂ ਵਿਨਾ ਅਚ੍ਛਿਨ੍ਦਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ.

(ਙ) ਵਿਕਪ੍ਪਨ੍ਤਿ ‘‘ਆਯਤਞ੍ਚ ਕਰੋਹਿ ਵਿਤ੍ਥਤਞ੍ਚਾ’’ਤਿਆਦਿਕਂ ਅਧਿਕਵਿਧਾਨਂ.

(ਚ) ਅਚ੍ਚੇਕਚੀਵਰਨ੍ਤਿ ਗਮਿਕਗਿਲਾਨਗਬ੍ਭਿਨਿਅਭਿਨਵੁਪ੍ਪਨ੍ਨਸਦ੍ਧਾਨਂ ਅਞ੍ਞਤਰੇਨ ਪਵਾਰਣਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ‘‘ਵਸ੍ਸਾਵਾਸਿਕਂ ਦਸ੍ਸਾਮੀ’’ਤਿ ਦਿਨ੍ਨਂ ਅਚ੍ਚਾਯਿਕਚੀਵਰਂ. ਅਚ੍ਚੇਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚ ਮਾਸਾ ਚੀਵਰਕਾਲਸਮਯੋ, ਤਂ ਅਤਿਕ੍ਕਾਮੇਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤੇਨ ਵੁਤ੍ਤਂ ‘‘ਚੀਵਰਕਾਲਸਮਯਂ ਅਤਿਕ੍ਕਾਮਿਤ’’ਨ੍ਤਿ. ਕਾਲੋ ਚ ਸੋ ਸਮਯੋ ਚ ਚੀਵਰਸ੍ਸ ਕਾਲਸਮਯੋ, ਤਂ.

(ਛ) ਸਪ੍ਪਟਿਭਯੇ ਆਰਞ੍ਞਕਸੇਨਾਸਨੇ ਵਸ੍ਸਂ ਉਪਗਨ੍ਤ੍ਵਾ ਵਿਹਰਨ੍ਤੇਨ ਭਿਕ੍ਖੁਨਾ ਤਿਣ੍ਣਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਪੁਰਿਮਿਕਾਯ ਉਪਗਨ੍ਤ੍ਵਾ ਮਹਾਪਵਾਰਣਾਯ ਪਵਾਰਿਤਤਾ, ਕਤ੍ਤਿਕਮਾਸਤਾ, ਪਞ੍ਚਧਨੁਸਤਿਕਪਚ੍ਛਿ ਮਪ੍ਪਮਾਣਯੁਤ੍ਤਸੇਨਾਸਨਤਾ, ਸਾਸਙ੍ਕਸਪ੍ਪਟਿਭਯਤਾਤਿ ਏਵਂ ਵੁਤ੍ਤਚਤੁਰਙ੍ਗਸਮ੍ਪਤ੍ਤਿਯਾਅਨ੍ਤਰਘਰੇ ਨਿਕ੍ਖਿਪਿਤ੍ਵਾ ਸਤਿ ਪਚ੍ਚਯੇ ਛਾਰਤ੍ਤਪਰਮਂ ਤੇਨ ਚੀਵਰੇਨ ਵਿਪ੍ਪਵਸਿਤਬ੍ਬਂ. ਤਤੋ ਚੇ ਉਤ੍ਤਰਿ ਵਿਪ੍ਪਵਸੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤੇਨ ਵੁਤ੍ਤਂ ‘‘ਅਤਿਰੇਕਛਾਰਤ੍ਤ’’ਨ੍ਤਿਆਦਿ.

(ਜ) ਜਾਨਨ੍ਤਿ ਜਾਨਨ੍ਤੋ.

੩੯੬. ਆਦਿਮ੍ਹਿ ਵਿਯਾਤਿ ਪਠਮਨਿਸ੍ਸਗ੍ਗਿਯੇ ਵਿਯ.

੩੯੭. (ਖ) ਅਨ੍ਤਰਘਰਂ ਪਵਿਟ੍ਠਾਯ ਭਿਕ੍ਖੁਨਿਯਾ ਹਤ੍ਥਤੋ ਖਾਦਨੀਯਾਦਿਪ੍ਪਟਿਗ੍ਗਹਣੇ ਚ ਭਿਕ੍ਖੂਸੁ ਕੁਲੇਸੁ ਭੁਞ੍ਜਨ੍ਤੇਸੁ ‘‘ਇਧ ਪੂਵਂ, ਸੂਪਂ ਦੇਥਾ’’ਤਿਆਦਿਨਾ ਨਯੇਨ ਵੋਸਾਸਮਾਨਾਯ ਭਿਕ੍ਖੁਨਿਯਾ ਅਨਪਸਾਦਨੇਨ ਚ ਸੇਖਸਮ੍ਮਤੇਸੁ ਕੁਲੇਸੁ ਪੁਬ੍ਬੇ ਅਨਿਮਨ੍ਤਿਤਸ੍ਸ ਖਾਦਨੀਯਾਦੀਨਂ ਪਟਿਗ੍ਗਹਣੇ ਚ ਸਪ੍ਪਟਿਭਯੇ ਆਰਞ੍ਞਕਸੇਨਾਸਨੇ ਵਿਹਰਨ੍ਤਸ੍ਸ ਪੁਬ੍ਬੇ ਅਪ੍ਪਟਿਸਂਵਿਦਿਤਖਾਦਨੀਯਾਦਿਪ੍ਪਟਿਗ੍ਗਹਣੇ ਚ ਪਾਟਿਦੇਸਨੀਯਂ ਨਾਮ ਆਪਤ੍ਤਿਨਿਕਾਯੋ ਵੁਤ੍ਤੋ. ਤੇਨ ਵੁਤ੍ਤਂ ‘‘ਗਾਰਯ੍ਹ’’ਨ੍ਤਿਆਦਿ.

੩੯੮. ‘‘ਅਦੇਸਨਾਗਾਮਿਨਿਯ’’ਨ੍ਤਿਆਦਿ ‘‘ਨ ਦੇਸਯੇ’’ਤਿ ਏਤ੍ਥ ਕਮ੍ਮਂ. ਪਾਰਾਜਿਕਾ ਸਙ੍ਘਾਦਿਸੇਸਾ ਚ ਅਦੇਸਨਾਗਾਮਿਨਿਯੋ ਨਾਮ. ਨ ਆਪਤ੍ਤਿ ਅਨਾਪਤ੍ਤਿ, ਤਂ. ਕਤਦੇਸਨਂ ਦੇਸਿਤਂ. ਨਾਨਾਸਂਵਾਸਨਿਸ੍ਸੀਮਟ੍ਠਿਤਾਨਂ ਨ ਦੇਸਯੇਤਿ ਸਮ੍ਬਨ੍ਧੋ. ਏਵਂ ਚਤੁਪਞ੍ਚਹਿ ਨ ਦੇਸਯੇ, ਮਨਸਾ ਨ ਦੇਸਯੇ, ਅਪਕਤਤ੍ਤਾਨਂ ਨ ਦੇਸਯੇ, ਨਾਨਾ ‘‘ਏਕਾ’’ਤਿ ਨ ਦੇਸਯੇਤਿ. ਮਨਸਾਤਿ ਕੇਵਲਂ ਚਿਤ੍ਤੇਨੇਵ. ਨਾਨਾਤਿ ਸਮ੍ਬਹੁਲਾ ਆਪਤ੍ਤਿਯੋ ‘‘ਏਕਾ’’ਤਿ ਵਤ੍ਵਾ. ਏਕਂ ਪਨ ਆਪਤ੍ਤਿਂ ‘‘ਸਮ੍ਬਹੁਲਾ’’ਤਿ ਦੇਸੇਤੁਂ ਵਟ੍ਟਤੀਤਿ.

ਦੇਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.