੪੩. ਛਨ੍ਦਦਾਨਨਿਦ੍ਦੇਸਵਣ੍ਣਨਾ

੩੯੯. ਕਮ੍ਮਪ੍ਪਤ੍ਤੇਤਿ ਉਪੋਸਥਾਦਿਨੋ ਕਮ੍ਮਸ੍ਸ ਪਤ੍ਤੇ ਯੁਤ੍ਤੇ ਅਨੁਰੂਪੇ. ਸਙ੍ਘੇ ਸਮਾਗਤੇਤਿ ਚਤੁਵਗ੍ਗਾਦਿਕੇ ਸਙ੍ਘੇ ਏਕਤ੍ਥ ਸਨ੍ਨਿਪਤਿਤੇ. ਏਤ੍ਥ ਚ ਛਨ੍ਦਹਾਰਕੇਨਾਪਿ ਸਦ੍ਧਿਂ ਚਤੁਵਗ੍ਗਾਦਿਕੋ ਵੇਦਿਤਬ੍ਬੋ.

੪੦੦. ਛਨ੍ਦਦਾਨਾਦਿਵਿਧਿਂ ਦਸ੍ਸੇਤੁਂ ‘‘ਏਕ’’ਨ੍ਤਿਆਦਿਮਾਹ. ਉਪਾਗਮ੍ਮਾਤਿ ਸਨ੍ਤਿਂ ਆਪਤ੍ਤਿਂ ਪਕਾਸੇਤ੍ਵਾ ਤਤੋ ਪਚ੍ਛਾ ਉਪਗਨ੍ਤ੍ਵਾ. ਛਨ੍ਦਂ ਦਦੇਤਿ ਵਕ੍ਖਮਾਨੇਸੁ ਤੀਸੁ ਏਕੇਨਪਿ ਬਹਿ ਉਪੋਸਥਂ ਕਤ੍ਵਾ ਆਗਤੋ ਛਨ੍ਦਂ ਦਦੇਯ੍ਯ, ਕੇਨਚਿ ਕਰਣੀਯੇਨ ਸਨ੍ਨਿਪਾਤਟ੍ਠਾਨਂ ਗਨ੍ਤ੍ਵਾ ਕਾਯਸਾਮਗ੍ਗਿਂ ਅਦੇਨ੍ਤੋ ਪਨ ਪਾਰਿਸੁਦ੍ਧਿਂ ਦੇਨ੍ਤੋ ਛਨ੍ਦਂ ਦਦੇਯ੍ਯ.

੪੦੨. ਉਭਿਨ੍ਨਂ ਦਾਨੇ ਕਿਂਪਯੋਜਨਨ੍ਤਿ ਆਹ ‘‘ਪਾਰਿਸੁਦ੍ਧੀ’’ਤਿਆਦਿ. ਪਾਰਿਸੁਦ੍ਧਿਪ੍ਪਦਾਨੇਨ ਸਙ੍ਘਸ੍ਸ ਅਤ੍ਤਨੋ ਚਾਪਿ ਉਪੋਸਥਂ ਸਮ੍ਪਾਦੇਤੀਤਿ ਸਮ੍ਬਨ੍ਧੋ. ਪਰਿਸੁਦ੍ਧਿ ਏਵ ਪਾਰਿਸੁਦ੍ਧਿ, ਤਸ੍ਸ ਪਦਾਨਂ, ਤੇਨ. ਨਨੁ ਚ ਪਾਰਿਸੁਦ੍ਧਿਤਾਪਦਾਨਮਤ੍ਤਮੇਵ ਉਪੋਸਥਕਮ੍ਮਂ ਨਾਮਾਤਿ ਪਾਰਿਸੁਦ੍ਧਿਪ੍ਪਦਾਨਂ ਅਤ੍ਤਨੋ ਉਪੋਸਥਂ ਸਮ੍ਪਾਦੇਤੁ, ਕਥਂ ਸਙ੍ਘਸ੍ਸਾਤਿ? ਵੁਚ੍ਚਤੇ – ਪਾਰਿਸੁਦ੍ਧਿਦਾਨਸ੍ਸ ਧਮ੍ਮਕਮ੍ਮਤਾਸਮ੍ਪਾਦਨੇਨ ਸਙ੍ਘਸ੍ਸਾਪਿ ਉਪੋਸਥਂ ਸਮ੍ਪਾਦੇਤੀਤਿ.

ਏਤ੍ਥ ਪਨ ਚਤੂਸੁ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤੀਸੁ ਵਾ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੇ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ. ਚਤ੍ਤਾਰੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤਯੋ ਵਾ ਦ੍ਵੇ ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਸਮਗ੍ਗਂ. ਚਤੂਸੁ ਏਕਸ੍ਸ ਆਹਰਿਤ੍ਵਾ ਤਯੋ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤੀਸੁ ਵਾ ਏਕਸ੍ਸ ਆਹਰਿਤ੍ਵਾ ਦ੍ਵੇ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਵਗ੍ਗਂ. ਸਚੇ ਪਨ ਚਤ੍ਤਾਰੋ ਸਨ੍ਨਿਪਤਿਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤਯੋ ਪਾਰਿਸੁਦ੍ਧਿਉਪੋਸਥਂ, ਦ੍ਵੇ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਸਮਗ੍ਗਂ. ਪਵਾਰਣਕਮ੍ਮੇਸੁਪਿ ਪਞ੍ਚਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਚਤ੍ਤਾਰੋ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤੂਸੁ ਤੀਸੁ ਵਾ ਏਕਸ੍ਸ ਆਹਰਿਤ੍ਵਾ ਤਯੋ ਦ੍ਵੇ ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਅਧਮ੍ਮੇਨ ਵਗ੍ਗਂ ਪਵਾਰਣਕਮ੍ਮਨ੍ਤਿਆਦਿ ਵੁਤ੍ਤਨਯਮੇਵ. ਸੇਸਕਮ੍ਮਂ ਵਿਬਾਧਤੀਤਿ ਅਵਸੇਸਸਙ੍ਘਕਿਚ੍ਚਂ ਵਿਬਾਧੇਤਿ ਅਲਦ੍ਧਾਧਿਪ੍ਪਾਯਤ੍ਤਾਤਿ ਅਧਿਪ੍ਪਾਯੋ.

੪੦੩. ਦ੍ਵਯਨ੍ਤਿ ਉਪੋਸਥਕਰਣਞ੍ਚੇਵ ਅਵਸੇਸਕਿਚ੍ਚਞ੍ਚ. ਅਤ੍ਤਨੋ ਨ ਸਾਧੇਤੀਤਿ ਸਮ੍ਬਨ੍ਧਨੀਯਂ.

੪੦੪. ਹਰੇਯ੍ਯਾਤਿ ਪੁਬ੍ਬੇ ਵੁਤ੍ਤਂ ਸੁਦ੍ਧਿਕਛਨ੍ਦਂ ਵਾ ਇਮਂ ਵਾ ਛਨ੍ਦਪਾਰਿਸੁਦ੍ਧਿਂ ਹਰੇਯ੍ਯ. ਪਰਮ੍ਪਰਾ ਨ ਹਾਰਯੇਤਿ ਪਰਮ੍ਪਰਾ ਨ ਆਹਰੇਯ੍ਯ. ਕਸ੍ਮਾਤਿ ਆਹ ‘‘ਪਰਮ੍ਪਰਾਹਟਾ’’ਤਿਆਦਿ. ਤੇਨਾਤਿ ਪਠਮਤੋ ਗਹਿਤਛਨ੍ਦਪਾਰਿਸੁਦ੍ਧਿਕੇਨ. ਪਰਮ੍ਪਰਾਹਟਾਤਿ ਯਥਾ ਬਿਲ਼ਾਲਸਙ੍ਖਲਿਕਾਯ ਪਠਮਂ ਵਲਯਂ ਦੁਤਿਯਂ ਪਾਪੁਣਾਤਿ, ਤਤਿਯਂ ਨ ਪਾਪੁਣਾਤਿ, ਏਵਂ ਦੁਤਿਯਸ੍ਸ ਆਗਚ੍ਛਤਿ, ਤਤਿਯਸ੍ਸ ਨ ਆਗਚ੍ਛਤਿ. ‘‘ਪਰਿਮ੍ਪਰਾਹਟਾ ਛਨ੍ਦ-ਪਾਰਿਸੁਦ੍ਧਿ ਨ ਗਚ੍ਛਤੀ’’ਤਿ ਵਾ ਪਾਠੋ.

੪੦੫. ਸਬ੍ਬੂਪਚਾਰਨ੍ਤਿ ‘‘ਏਕਂਸਂ ਚੀਵਰਂ ਕਤ੍ਵਾ’’ ਤਿਆਦਿ ਸਬ੍ਬਂ ਉਪਚਾਰਂ.

੪੦੬. ਸੋ ਆਗਤੋ ਆਰੋਚੇਤ੍ਵਾ ਸਙ੍ਘਂ ਪਵਾਰੇਯ੍ਯਾਤਿ ਯੋਜਨਾ. ਅਥਾਤਿ ਅਨਨ੍ਤਰਤ੍ਥੇ. ਆਗਤੋਤਿ ਪਵਾਰਣਂ ਗਹੇਤ੍ਵਾ ਆਗਤੋ ਭਿਕ੍ਖੁ. ਆਰੋਚੇਤ੍ਵਾਤਿ ਭਿਕ੍ਖੁਸਙ੍ਘਸ੍ਸ ਆਰੋਚੇਤ੍ਵਾ. ਏਵਨ੍ਤਿ ਵਕ੍ਖਮਾਨਕ੍ਕਮੇਨ.

੪੦੭-੮. ਗਹੇਤ੍ਵਾ ਹਾਰਕੋਤਿ ਸਮ੍ਬਨ੍ਧੋ. ਨਾਹਟਾਤਿ ਆਹਟਾਵ ਨ ਹੋਤੀਤਿ ਅਤ੍ਥੋ. ਹਾਰਕੋ ਸਙ੍ਘਂ ਪਤ੍ਵਾ ਤਥਾ ਹੇਯ੍ਯ, ਆਹਟਾ ਹੋਤੀਤਿ ਯੋਜਨਾ. ਤਥਾ ਹੇਯ੍ਯਾਤਿ ਵਿਬ੍ਭਨ੍ਤਾਦਿਕੋ ਭਵੇਯ੍ਯ.

੪੦੯. ਸਙ੍ਘਂ ਪਤ੍ਤੋ ਪਮਤ੍ਤੋ ਵਾ ਸੁਤ੍ਤੋ ਵਾ ਨਾਰੋਚਯੇਯ੍ਯ ਅਨਾਪਤ੍ਤਿ ਚਾਤਿ ਸਮ੍ਬਨ੍ਧੋ. ਚ-ਸਦ੍ਦੋ ਛਨ੍ਦਪਾਰਿਸੁਦ੍ਧਿਹਰਣਂ ਸਮ੍ਪਿਣ੍ਡੇਤੀਤਿ.

ਛਨ੍ਦਦਾਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੪. ਉਪੋਸਥਨਿਦ੍ਦੇਸਵਣ੍ਣਨਾ

੪੧੦. ਦੁਵੇ ਉਪੋਸਥਾਤਿ ਸੁਲਭਪ੍ਪਵਤ੍ਤਿਵਸੇਨ ਵੁਤ੍ਤਂ. ਤਯੋ ਪਨ ਦਿਵਸਵਸੇਨੇਵ ਉਪੋਸਥਾ ਚਾਤੁਦ੍ਦਸਿਕੋ ਪਨ੍ਨਰਸਿਕੋ ਸਾਮਗ੍ਗਿਕੋਤਿ. ਤਤ੍ਥ ਹੇਮਨ੍ਤਗਿਮ੍ਹਵਸ੍ਸਾਨਾਨਂ ਤਿਣ੍ਣਂ ਉਤੂਨਂ ਤਤਿਯਸਤ੍ਤਮਪਕ੍ਖੇਸੁ ਦ੍ਵੇ ਦ੍ਵੇ ਕਤ੍ਵਾ ਛ ਚਾਤੁਦ੍ਦਸਿਕਾ, ਸੇਸਾ ਪਨ੍ਨਰਸਿਕਾਤਿ ਏਵਂ ਏਕਸਂਵਚ੍ਛਰੇ ਚਤੁਵੀਸਤਿਉਪੋਸਥਾ. ਇਦਂ ਤਾਵ ਲੋਕਸ੍ਸ ਪਕਤਿਚਾਰਿਤ੍ਤਂ. ‘‘ਆਗਨ੍ਤੁਕੇਹਿ ਆਵਾਸਿਕਾਨਂ ਅਨੁਵਤ੍ਤਿਤਬ੍ਬ’’ਨ੍ਤਿਆਦਿਵਚਨਤੋ (ਮਹਾਵ. ੧੭੮) ਪਨ ਤਥਾਰੂਪਪਚ੍ਚਯੇ ਸਤਿ ਅਞ੍ਞਸ੍ਮਿਮ੍ਪਿ ਚਾਤੁਦ੍ਦਸੇ ਉਪੋਸਥਂ ਕਾਤੁਂ ਵਟ੍ਟਤਿ.

੪੧੧. ਸੁਤ੍ਤੁਦ੍ਦੇਸੋ ਸਙ੍ਘਸ੍ਸੇਵਾਤਿ ਯੋਜਨਾ. ਅਧਿਟ੍ਠਾਨਞ੍ਚ ਤਂ ਉਪੋਸਥੋ ਚਾਤਿ ਕਮ੍ਮਧਾਰਯੋ. ਸੇਸਾਨਨ੍ਤਿ ਦ੍ਵਿਨ੍ਨਂ ਤਿਣ੍ਣਂ ਵਾ. ‘‘ਦੁਵੇ’’ਤਿਆਦਿਨਾ ਚ ਚਾਤੁਦ੍ਦਸੋ ਪਨ੍ਨਰਸੋ ਸਾਮਗ੍ਗੀਤਿ ਦਿਵਸਵਸੇਨ, ਸੁਤ੍ਤੁਦ੍ਦੇਸੋ ਅਧਿਟ੍ਠਾਨਂ ਪਾਰਿਸੁਦ੍ਧੀਤਿ ਕਰਣਪ੍ਪਕਾਰੇਨ, ਸਙ੍ਘੁਪੋਸਥੋ ਗਣੁਪੋਸਥੋ ਪੁਗ੍ਗਲੁਪੋਸਥੋਤਿ ਪੁਗ੍ਗਲਵਸੇਨ ਚਾਤਿ ਨਵ ਉਪੋਸਥਾ ਦੀਪਿਤਾ ਹੋਨ੍ਤਿ.

੪੧੨. ਪੁਬ੍ਬਕਿਚ੍ਚੇਤਿ –

‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੬੮) –

ਏਵਂ ਅਟ੍ਠਕਥਾਚਰਿਯੇਹਿ ਵੁਤ੍ਤੇ ਪੁਬ੍ਬਕਰਣਾਨਨ੍ਤਰਂ ਕਤ੍ਤਬ੍ਬੇ ਪੁਬ੍ਬਕਿਚ੍ਚੇ.

ਪੁਬ੍ਬਕਰਣੇਤਿ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਰਣਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੬੮) –

ਏਵਂ ਅਟ੍ਠਕਥਾਚਰਿਯੇਹੇਵ ਵੁਤ੍ਤੇ ਸਬ੍ਬਪਠਮਂ ਕਤ੍ਤਬ੍ਬੇ ਪੁਬ੍ਬਕਰਣੇ. ਪਤ੍ਤਕਲ੍ਲੇਤਿ ਉਪੋਸਥਾਦੀਨਂ ਚਤੁਨ੍ਨਂ ਅਙ੍ਗਾਨਂ ਸਮ੍ਭਵੇਨ ਪਤ੍ਤੋ ਕਾਲੋ ਇਮਸ੍ਸਾਤਿ ਪਤ੍ਤਕਾਲਂ, ਪਤ੍ਤਕਾਲਮੇਵ ਪਤ੍ਤਕਲ੍ਲਂ. ਕਿਂ ਤਂ? ਉਪੋਸਥਾਦਿਕਮ੍ਮਂ. ਤਂ ਪਨ ਚਤੂਹਿ ਅਙ੍ਗੇਹਿ ਸਙ੍ਗਹਿਤਂ. ਯਥਾਹੁ ਅਟ੍ਠਕਥਾਚਰਿਯਾ –

‘‘ਉਪੋਸਥੋ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

ਪਤ੍ਤਕਲ੍ਲਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੬੮);

ਸਮਾਨਿਤੇਤਿ ਸਮ੍ਮਾ ਆਨੀਤੇ ਪਵਤ੍ਤਿਤੇਤਿ ਅਤ੍ਥੋ. ਸੋਤਿ ਸੁਤ੍ਤੁਦ੍ਦੇਸੋ. ਪਞ੍ਚਧਾਤਿ ਨਿਦਾਨੁਦ੍ਦੇਸੋ ਪਾਰਾਜਿਕੁਦ੍ਦੇਸੋ ਸਙ੍ਘਾਦਿਸੇਸੁਦ੍ਦੇਸੋ ਅਨਿਯਤੁਦ੍ਦੇਸੋ ਵਿਤ੍ਥਾਰੁਦ੍ਦੇਸੋਤਿ ਏਵਂ ਪਞ੍ਚਧਾ.

੪੧੩. ਵਿਨਾਨ੍ਤਰਾਯਨ੍ਤਿ ਰਾਜਨ੍ਤਰਾਯੋ ਚੋਰਨ੍ਤਰਾਯੋ ਅਗ੍ਯਨ੍ਤਰਾਯੋ ਉਦਕਨ੍ਤਰਾਯੋ ਮਨੁਸ੍ਸਨ੍ਤਰਾਯੋ ਅਮਨੁਸ੍ਸਨ੍ਤਰਾਯੋ ਵਾਲ਼ਨ੍ਤਰਾਯੋ ਸਰੀਸਪਨ੍ਤਰਾਯੋ ਜੀਵਿਤਨ੍ਤਰਾਯੋ ਬ੍ਰਹ੍ਮਚਰਿਯਨ੍ਤਰਾਯੋਤਿ (ਮਹਾਵ. ੧੫੦) ਵੁਤ੍ਤੇਸੁ ਦਸਸੁ ਯਂ ਕਿਞ੍ਚਿ ਅਨ੍ਤਰਾਯਂ ਵਿਨਾ. ਸਙ੍ਖੇਪੇਨਾਤਿ ਵਿਨਾ ਵਿਤ੍ਥਾਰਂ. ‘‘ਏਤ੍ਥ ਦ੍ਵੀਸੁ ਤੀਸੁ ਵਾ ਉਦ੍ਦੇਸੇਸੁ ਵਿਸਦੇਸੁ ਥੇਰੋਵ ਇਸ੍ਸਰੋ’’ਤਿ ਵੁਤ੍ਤਤ੍ਤਾ ਅਵਤ੍ਤਨ੍ਤੇਪਿ ਵਟ੍ਟਤੀਤਿ ਯੋਜਨਾ. ਏਤ੍ਥਾਤਿ ਪਞ੍ਚਸੁ ਉਦ੍ਦੇਸੇਸੁ. ਅਵਤ੍ਤਨ੍ਤੇਤਿ ਥੇਰਸ੍ਸ ਵਿਤ੍ਥਾਰੇਨ ਅਵਤ੍ਤਮਾਨੇ ਅਪ੍ਪਗੁਣੇ. ਵਟ੍ਟਤੀਤਿ ਸਂਖਿਤ੍ਤੇਨ ਉਦ੍ਦਿਸਿਤੁਮ੍ਪਿ ਵਟ੍ਟਤਿ. ਇਮਿਨਾਵ ਯਸ੍ਸ ਕਸ੍ਸਚਿ ਉਦ੍ਦੇਸਕਸ੍ਸ ਅਵਤ੍ਤਨ੍ਤੇਪਿ ਵਟ੍ਟਤੀਤਿ ਵਿਞ੍ਞਾਯਤਿ. ਦ੍ਵੀਸੁ ਵਤ੍ਤਮਾਨੇਸੁ ਇਸ੍ਸਰਤ੍ਤੇ ਅਧਿਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸਨਤ੍ਥਂ ‘‘ਤੀਸੂ’’ਤਿ ਵੁਤ੍ਤਂ. ‘‘ਥੇਰੋਵ ਇਸ੍ਸਰੋ’’ਤਿਆਦਿਨਾ ਇਦਂ ਪਰਿਦੀਪੇਤਿ – ਦ੍ਵੇ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ, ਥੇਰਾਧੇਯ੍ਯਂ ਪਾਤਿਮੋਕ੍ਖਂ, ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਤਂ ਹੋਤਿ, ਤਸ੍ਮਾ ਸਯਂ ਉਦ੍ਦਿਸਿਤਬ੍ਬਂ, ਅਞ੍ਞਾ ਵਾ ਅਜ੍ਝੇਸਿਤਬ੍ਬੋਤਿ.

੪੧੪. ਉਦ੍ਦਿਸਨ੍ਤੇ ਸਮਾ ਵਾ ਅਥ ਥੋਕਿਕਾ ਵਾ ਯਦਿ ਆਗਚ੍ਛੇਯ੍ਯੁਨ੍ਤਿ ਸਮ੍ਬਨ੍ਧਨੀਯਂ. ਉਦ੍ਦਿਸਨ੍ਤੇ ਆਵਾਸਿਕੇਹਿ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ. ਸਮਾ ਵਾ ਥੋਕਿਕਾ ਵਾਤਿ ਆਵਾਸਿਕੇਹਿ ਸਮਾ ਵਾ ਥੋਕਿਕਾ ਵਾ ਆਗਨ੍ਤੁਕਾ ਭਿਕ੍ਖੂ. ਅਵਸੇਸਕਂ ਸੋਤਬ੍ਬਨ੍ਤਿ ਇਮਿਨਾ ਏਤ੍ਤਾਵਤਾਪਿ ਉਪੋਸਥੋ ਕਤੋਯੇਵ ਨਾਮਾਤਿ ਦੀਪੇਤਿ.

੪੧੫. ਉਦ੍ਦਿਟ੍ਠਮਤ੍ਤੇਤਿ ਉਦ੍ਦਿਟ੍ਠਂਯੇਵ ਉਦ੍ਦਿਟ੍ਠਮਤ੍ਤਂ. ਮਤ੍ਤ-ਸਦ੍ਦੋ ਅਵਧਾਰਣੇ. ਸਕਲਾਯ ਏਕਚ੍ਚਾਯ ਵਾ ਉਟ੍ਠਿਤਾਯ ਸਮਾ ਵਾ ਥੋਕਿਕਾ ਵਾ ਯਦਿ ਆਗਚ੍ਛੇਯ੍ਯੁਨ੍ਤਿ ਯੋਜਨਾ. ਸਕਲਾਯਾਤਿ ਸਬ੍ਬਾਯ ਪਰਿਸਾਯ. ਏਸਂ ਸਨ੍ਤਿਕੇ ਪਾਰਿਸੁਦ੍ਧਿਂ ਕਰੇਯ੍ਯੁਨ੍ਤਿ ਏਸਂ ਆਵਾਸਿਕਾਨਂ ਸਮੀਪੇ ਤੇ ਆਗਨ੍ਤੁਕਾ ਭਿਕ੍ਖੂ ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯੁਨ੍ਤਿ ਅਤ੍ਥੋ. ਅਥ ਬਹੁਕਾ ਚੇ, ਸਬ੍ਬਵਿਕਪ੍ਪੇਸੁ ਪੁਬ੍ਬਕਿਚ੍ਚਂ ਕਤ੍ਵਾਤਿ ਯੋਜਨੀਯਂ. ਵਿਕਪ੍ਪੀਯਨ੍ਤਿ ਪਰਿਕਪ੍ਪੀਯਨ੍ਤੀਤਿ ਵਿਕਪ੍ਪਾ, ਅਵਸੇਸਸਵਨਪਾਰਿਸੁਦ੍ਧਿਉਪੋਸਥਵਿਧਾਨਾ ਸਬ੍ਬੇ ਚ ਤੇ ਵਿਕਪ੍ਪਾ ਚੇਤਿ ਸਬ੍ਬਵਿਕਪ੍ਪਾ. ਤੇਸੁ. ਪੁਨੁਦ੍ਦਿਸੇਤਿ ਪੁਨ ਪਾਤਿਮੋਕ੍ਖਂ ਉਦ੍ਦਿਸੇਯ੍ਯ.

੪੧੬. ਇਤਰਾਨਨ੍ਤਿ ਆਗਨ੍ਤੁਕਾਨਂ. ਇਤਰੋਤਿ ਚਾਤੁਦ੍ਦਸੋ. ਏਤ੍ਥ ਪਨ ਯੇਸਂ ਪਨ੍ਨਰਸੋ, ਤੇ ਅਤੀਤਂ ਉਪੋਸਥਂ ਚਾਤੁਦ੍ਦਸਿਕਂ ਅਕਂਸੂਤਿ ਵੇਦਿਤਬ੍ਬਾ. ਅਯਮੇਤ੍ਥਾਧਿਪ੍ਪਾਯੋ – ਤਾਦਿਸੇ ਪਚ੍ਚਯੇ ਸਤਿ ਚਾਤੁਦ੍ਦਸਿਕਸ੍ਸ ਕਤਤ੍ਤਾ ਤੇਸਂ ਯਥਾਵੁਤ੍ਤਤਤਿਯਸਤ੍ਤਮਪਕ੍ਖਸਙ੍ਖਾਤਚਾਤੁਦ੍ਦਸਿਕੇ ਸਮ੍ਪਤ੍ਤੇ ਤੇਰਸੀਚਾਤੁਦ੍ਦਸੀਕਤ੍ਤਬ੍ਬਤ੍ਤਾ ਅਨੁਪੋਸਥਤ੍ਤਾ ਪਨ ਤਤ੍ਥ ਉਪੋਸਥੋ ਨ ਕਤੋਤਿ ਚਾਤੁਦ੍ਦਸੋਯੇਵ ਪਨ੍ਨਰਸੋ ਜਾਤੋ. ਸਮਾਨੇਤਰੇਤਿ ਸਮਾ ਊਨਾ ਇਤਰੇਤਿ ਪਦਚ੍ਛੇਦੋ. ਇਤਰੇਤਿ ਆਗਨ੍ਤੁਕਾ. ਪੁਰਿਮਾਨਂ ਅਨੁਵਤ੍ਤਨ੍ਤੂਤਿ ਆਵਾਸਿਕੇਹਿ ‘‘ਅਜ੍ਜੁਪੋਸਥੋ ਪਨ੍ਨਰਸੋ’’ਤਿ ਪੁਬ੍ਬਕਿਚ੍ਚੇ ਕਯਿਰਮਾਨੇ ਪੁਰਿਮਾਨਂ ਆਵਾਸਿਕਾਨਂ ਅਨੁਵਤ੍ਤਨ੍ਤੂਤਿ ਅਤ੍ਥੋ. ਸਚੇਧਿਕਾਤਿ ਯਦਿ ਆਗਨ੍ਤੁਕਾ ਬਹੁਕਾ ਹੋਨ੍ਤਿ. ਪੁਰਿਮਾਤਿ ਆਵਾਸਿਕਾ. ਤੇਸਂ ਅਨੁਵਤ੍ਤਨ੍ਤੂਤਿ ਤੇਸਂ ਆਗਨ੍ਤੁਕਾਨਂ ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ ਪੁਬ੍ਬਕਿਚ੍ਚੇ ਕਯਿਰਮਾਨੇ ਅਨੁਵਤ੍ਤਨ੍ਤੁ. ਸੇਸੇਪੀਤਿ ਆਗਨ੍ਤੁਕਾਨਂ ਪਨ੍ਨਰਸਵਾਰੇਪਿ. ਅਯਂ ਨਯੋਤਿ ‘‘ਆਗਨ੍ਤੁਕਾਨਂ ਪਨ੍ਨਰਸੋ ਇਤਰਾਨਂ ਸਚੇਤਰੋ’’ਤਿਆਦਿਕੋ ਅਯਮੇਵ ਨਯੋ. ਏਤ੍ਥ ਪਨ ਯੇਸਂ ਪਨ੍ਨਰਸੋ, ਤੇ ਤਿਰੋਰਟ੍ਠਤੋ ਵਾ ਆਗਤਾ ਅਤੀਤਂ ਵਾ ਉਪੋਸਥਂ ਚਾਤੁਦ੍ਦਸਿਕਂ ਅਕਂਸੂਤਿ ਵੇਦਿਤਬ੍ਬੋ.

੪੧੭. ਅਤੀਤੁਪੋਸਥਸ੍ਸ ਚਾਤੁਦ੍ਦਸਿਯਂ ਕਤਤ੍ਤਾ ਚਾਤੁਦ੍ਦਸਿਯਂ ਪਨ੍ਨਰਸੁਪੋਸਥੋ ਕਤੋਤਿ ਪਨ੍ਨਰਸੀ ਆਵਾਸਿਕਾਨਂ ਪਾਟਿਪਦੋ ਜਾਤੋਤਿ ਆਹ ‘‘ਆਵਾਸਿਕਾਨਂ ਪਾਟਿਪਦੋ’’ਤਿ. ਇਤਰਾਨਨ੍ਤਿ ਆਗਨ੍ਤੁਕਾਨਂ. ਉਪੋਸਥੋਤਿ ਪਨ੍ਨਰਸੋ ਉਪੋਸਥੋ. ਸਮਥੋਕਾਨਨ੍ਤਿ ਅਤ੍ਤਨਾ ਸਮਾਨਂ ਵਾ ਥੋਕਾਨਂ ਵਾ ਆਗਨ੍ਤੁਕਾਨਂ. ਮੂਲਟ੍ਠਾਤਿ ਆਵਾਸਿਕਾ. ਕਾਮਤੋ ਦੇਨ੍ਤੂਤਿ ਅਤ੍ਤਨੋ ਇਚ੍ਛਾਯ ਦੇਨ੍ਤੁ.

੪੧੮. ਨੋ ਚੇ ਦੇਨ੍ਤੀਤਿ ਯਦਿ ਆਵਾਸਿਕਾ ਕਾਯਸਾਮਗ੍ਗਿਂ ਨ ਦੇਨ੍ਤਿ, ਤੇਸਂ ਪਨ ਆਵਾਸਿਕਾਨਂ ਹਿਯ੍ਯੋ ਉਪੋਸਥਸ੍ਸ ਕਤਤ੍ਤਾ ਅਜ੍ਜ ਉਪੋਸਥਕਰਣਂ ਨਤ੍ਥਿ. ਬਹੂਸੁ ਅਨਿਚ੍ਛਾਯ ਕਾਯਸਾਮਗ੍ਗਿਂ ਦਦੇਯ੍ਯਾਤਿ ਯੋਜਨਾ. ਬਹੂਸੂਤਿ ਆਗਨ੍ਤੁਕੇਸੁ ਬਹੁਕੇਸੁ. ਬਹਿ ਵਾ ਵਜੇਤਿ ਆਵਾਸਿਕਭਿਕ੍ਖੁਪਰਿਸਾ ਨਿਸ੍ਸੀਮਂ ਵਾ ਵਜੇਯ੍ਯਾਤਿ ਅਤ੍ਥੋ.

੪੧੯. ਸਾਵੇਯ੍ਯ ਸੁਤ੍ਤਨ੍ਤਿ ਪਾਤਿਮੋਕ੍ਖਸਙ੍ਖਾਤਂ ਸੁਤ੍ਤਂ ਵਾਯਮਿਤ੍ਵਾ ਸਾਵੇਯ੍ਯ.

੪੨੦. ਸਮ੍ਮਜ੍ਜਿਤੁਂ …ਪੇ… ਉਦਕਾਸਨਂ ਪਞ੍ਞਪੇਤੁਞ੍ਚ ਮਹਾਥੇਰੇਨ ਪੇਸਿਤੋ ਕਲ੍ਲੋ ਨ ਕਰੇਯ੍ਯ ਤਥਾਤਿ ਸਮ੍ਬਨ੍ਧੋ. ਕਲ੍ਲੋਤਿ ਅਗਿਲਾਨੋ. ਤਥਾਤਿ ਦੁਕ੍ਕਟਂ ਅਤਿਦਿਸਤਿ. ਆਸਨੇਸੁ ਅਸਤਿ ਅਨ੍ਤਮਸੋ ਸਾਖਾਭਙ੍ਗਮ੍ਪਿ ਕਪ੍ਪਿਯਂ ਕਾਰਾਪੇਤ੍ਵਾ ਪਞ੍ਞਪੇਤਬ੍ਬਂ. ਤੇਲੇ ਅਸਤਿ ਕਪਲ੍ਲੇ ਅਗ੍ਗਿਪਿ ਜਾਲੇਤਬ੍ਬੋ.

੪੨੧-੩. ਪਟ੍ਠਪੇਤ੍ਵਾ ਦਕਾਸਨਨ੍ਤਿ ਪਰਿਭੋਜਨੀਯਪਾਨੀਯੋਦਕਞ੍ਚ ਆਸਨਞ੍ਚ ਸਨ੍ਨਿਹਿਤਂ ਕਤ੍ਵਾ. ਗਣਞਤ੍ਤਿਨ੍ਤਿ ਇਦਾਨਿ ਵਕ੍ਖਮਾਨਂ ਗਣੇਨ ਠਪੇਤਬ੍ਬਂ ਞਤ੍ਤਿਂ. ਤੇਤਿ ਅਞ੍ਞੇ ਦੁਵੇ ਭਿਕ੍ਖੂ. ਸਮਤ੍ਤਪੁਬ੍ਬਾਰਮ੍ਭੇਨਾਤਿ ਸਮਤ੍ਤੋ ਨਿਟ੍ਠਿਤੋ ਪੁਬ੍ਬੇਸੁ ਉਤ੍ਤਰਾਸਙ੍ਗਏਕਂਸਕਰਣਾਦੀਸੁ ਆਰਮ੍ਭੋ ਯਸ੍ਸਾਤਿ ਤਿਪਦਬਹੁਬ੍ਬੀਹਿ. ਨਵੇਨ ਤੇ ਏਵਮੀਰਿਯਾਤਿ ਸਮ੍ਬਨ੍ਧੋ. ਤੇਤਿ ਇਤਰੇ ਦ੍ਵੇ.

੪੨੪. ਕਤ੍ਤਬ੍ਬਂ ਕਤ੍ਵਾ ਪੁਬ੍ਬਕਿਚ੍ਚਾਦਿਕਂ ਸਮ੍ਪਾਦੇਤ੍ਵਾ ਨਵੋ ਏਵਂ ਈਰਿਯੋਤਿ ਯੋਜਨਾ.

੪੨੭. ਯਤ੍ਥਾਤਿ ਯਸ੍ਮਿਂ ਵਿਹਾਰੇ ਏਕੇਕਸ੍ਸ ਪਾਰਿਸੁਦ੍ਧਿਂ ਹਰਿਤ੍ਵਾਨਾਤਿ ਸਮ੍ਬਨ੍ਧੋ. ਏਕੇਕਸ੍ਸਾਤਿ ਏਤ੍ਥ ਵਿਚ੍ਛਾਯਂ ਦ੍ਵਿਤ੍ਤਂ. ਕਿਰਿਯਾਯ ਗੁਣੇਨ ਦਬ੍ਬੇਨ ਵਾ ਭਿਨ੍ਨੇ ਅਤ੍ਥੇ ਬ੍ਯਾਪਿਤੁਂ ਇਚ੍ਛਾ ਵਿਚ੍ਛਾ. ਏਤ੍ਥ ਪਨ ਛਨ੍ਦਪਾਰਿਸੁਦ੍ਧਿਹਰਣਸਙ੍ਖਾਤਾਯ ਕਿਰਿਯਾਯ ਚਤੂਸੁ ਚ ਤੀਸੁ ਚ ਦ੍ਵੀਸੁ ਚ ਭਿਨ੍ਨਮੇਕੇਕਂ ਬ੍ਯਾਪਿਤੁਂ ਸਮ੍ਬਨ੍ਧਿਤੁਂ ਇਚ੍ਛਾਤਿ ਵਿਚ੍ਛਾ. ਇਤਰੀਤਰੇਤਿ ਏਤ੍ਥਾਪਿ ਕਰਣਕਿਰਿਯਾਵਸੇਨ ਵੇਦਿਤਬ੍ਬਂ. ਤਯੋ ਦ੍ਵੇ ਏਕੋ ਵਾ ਤਂ ਤਂ ਸਙ੍ਘੁਪੋਸਥਂ ਗਣੁਪੋਸਥਂ ਪੁਗ੍ਗਲੁਪੋਸਥਂ ਵਾਤਿ ਵੁਤ੍ਤਂ ਹੋਤਿ. ਅਯਮੇਤ੍ਥਾਧਿਪ੍ਪਾਯੋ – ਚਤੂਸੁ ਏਕਸ੍ਸ ਆਹਰਿਤ੍ਵਾ ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤੀਸੁ ਵਾ ਏਕਸ੍ਸ ਆਹਰਿਤ੍ਵਾ ਦ੍ਵੇ ਸਙ੍ਘੁਪੋਸਥਂ ਕਰੋਨ੍ਤਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ. ਅਥ ਪਨ ਏਕਸ੍ਸ ਆਹਰਿਤ੍ਵਾ ਤਯੋ ਸਙ੍ਘੁਪੋਸਥਂ ਕਰੋਨ੍ਤਿ, ਏਕਸ੍ਸ ਆਹਰਿਤ੍ਵਾ ਦ੍ਵੇ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਅਧਮ੍ਮੇਨ ਵਗ੍ਗਂ ਨਾਮ ਹੋਤਿ. ਯਦਿ ਪਨ ਚਤ੍ਤਾਰੋਪਿ ਸਨ੍ਨਿਪਤਿਤ੍ਵਾ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤਯੋ ਵਾ ਦ੍ਵੇ ਵਾ ਸਙ੍ਘੁਪੋਸਥਂ ਕਰੋਨ੍ਤਿ, ਅਧਮ੍ਮੇਨ ਸਮਗ੍ਗਂ ਨਾਮ ਹੋਤੀਤਿ. ਤਬ੍ਬਿਪਰਿਯਾਯੇਨ ਧਮ੍ਮੇਨ ਸਮਗ੍ਗਂ ਵੇਦਿਤਬ੍ਬਂ.

੪੨੮. ਵਗ੍ਗੇ ਸਮਗ੍ਗੇ ਵਾ ‘‘ਵਗ੍ਗੋ’’ਤਿ ਸਞ੍ਞਿਨੋ ਵਿਮਤਿਸ੍ਸ ਵਾ ਕਰੋਤੋ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਵਗ੍ਗੇਤਿ ਵਗ੍ਗਸਙ੍ਘੇ. ਵਿਮਤਿਸ੍ਸਾਤਿ ‘‘ਵਗ੍ਗੋ ਨੁ ਖੋ, ਸਮਗ੍ਗੋ’’ਤਿ ਏਵਂ ਵੇਮਤਿਕਸ੍ਸ. ਇਮਿਨਾਵ ਕੁਕ੍ਕੁਚ੍ਚਪਕਤਵਾਰੋਪਿ ਉਪਲਕ੍ਖਿਤੋ. ਕਰੋਤੋਤਿ ਉਪੋਸਥਂ ਕਰੋਨ੍ਤਸ੍ਸ. ਭੇਦਾਧਿਪ੍ਪਾਯੇਨ ਕਰੋਤੋਤਿ ਯੋਜਨਾ. ਏਤ੍ਥ ਪਨ ਪਾਪਸ੍ਸ ਬਲਵਤਾਯ ਥੁਲ੍ਲਚ੍ਚਯਂ ਵੁਤ੍ਤਂ. ਸਞ੍ਞਿਨੋਤਿ ਸਞ੍ਞਾਸੀਸੇਨ ਚਿਤ੍ਤਂ ਵੁਤ੍ਤਂ, ਚਿਤ੍ਤਵਤੋਤਿ ਅਤ੍ਥੋ.

੪੨੯-੩੦. ‘‘ਉਕ੍ਖਿਤ੍ਤਸ੍ਸਾ’’ਤਿਆਦਿਨਾ ਵਜ੍ਜਨੀਯਪੁਗ੍ਗਲੇ ਦਸ੍ਸੇਤਿ. ਉਕ੍ਖਿਤ੍ਤਸ੍ਸਾਤਿ ਕਤ੍ਤੁਅਤ੍ਥੇ ਸਾਮਿਵਚਨਂ. ਨਿਸਿਨ੍ਨਸਦ੍ਦਸ੍ਸ ਕਮ੍ਮਸਾਧਨਤ੍ਤਾ ਉਕ੍ਖਿਤ੍ਤਾਦੀਹਿ ਕਤ੍ਤੂਹਿ ਭਵਿਤਬ੍ਬਨ੍ਤਿ. ‘‘ਸੇਸਾਨ’’ਨ੍ਤਿ ਵਿਸੇਸਨਸ੍ਸ ਭਿਕ੍ਖੂਨਂ ਬ੍ਯਭਿਚਾਰੇਨ ਸਾਤ੍ਥਕਤਾ. ਅਭਬ੍ਬਸ੍ਸ ਪਣ੍ਡਕਾਦਿਏਕਾਦਸਵਿਧਸ੍ਸ ਅਭਬ੍ਬਸ੍ਸ. ਨਿਸਿਨ੍ਨਪਰਿਸਾਯਞ੍ਚ ਪਾਤਿਮੋਕ੍ਖਂ ਨ ਉਦ੍ਦਿਸੇਤਿ ਸਮ੍ਬਨ੍ਧੋ. ਸਭਾਗਾਪਤ੍ਤਿਕੋ ਤਥਾ ਨ ਉਦ੍ਦਿਸੇਤਿ ਯੋਜੇਤਬ੍ਬਂ. ਵਿਕਾਲਭੋਜਨਾਦਿਵਤ੍ਥੁਤੋ ਸਮਾਨੋ ਭਾਗੋ ਕੋਟ੍ਠਾਸੋ ਏਤਿਸ੍ਸਾਤਿ ਸਭਾਗਾ, ਸਾ ਆਪਤ੍ਤਿ ਅਸ੍ਸਾਤਿ ਬਹੁਬ੍ਬੀਹਿ.

ਛਨ੍ਦੇਨ ਪਰਿਵੁਤ੍ਥੇਨਾਤਿ ਏਤ੍ਥ ਚਤੁਬ੍ਬਿਧਂ ਪਾਰਿਵਾਸਿਯਂ ਪਰਿਸਪਾਰਿਵਾਸਿਯਂ ਰਤ੍ਤਿਪਾਰਿਵਾਸਿਯਂ ਛਨ੍ਦਪਾਰਿਵਾਸਿਯਂ ਅਜ੍ਝਾਸਯਪਾਰਿਵਾਸਿਯਨ੍ਤਿ. ਤਤ੍ਥ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਹੋਨ੍ਤਿ, ਅਥ ਮੇਘੁਟ੍ਠਾਨਾਦਿਨਾ ਕੇਨਚਿਦੇਵ ਕਰਣੀਯੇਨ ਅਨੋਕਾਸੋ, ਅਥ ‘‘ਅਞ੍ਞਤ੍ਥ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜਿਤ੍ਵਾਵ ਉਟ੍ਠਹਨ੍ਤਿ, ਇਦਂ ਪਰਿਸਪਾਰਿਵਾਸਿਯਂ ਨਾਮ ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

‘‘ਯਾਵ ਪਨ ਸਬ੍ਬੇ ਸਨ੍ਨਿਪਤਨ੍ਤਿ, ਤਾਵ ਧਮ੍ਮਂ ਸੁਣਿਸ੍ਸਾਮਾ’’ਤਿ ਏਕਂ ਅਜ੍ਝੇਸਨ੍ਤਿ, ਤਸ੍ਮਿਂ ਧਮ੍ਮਕਥਂ ਕਥੇਨ੍ਤੇਯੇਵ ਅਰੁਣੋ ਉਗ੍ਗਚ੍ਛਤਿ, ਸਚੇ ਚਾਤੁਦ੍ਦਸਿਕਂ ਕਾਤੁਂ ਨਿਸਿਨ੍ਨਾ, ਪਨ੍ਨਰਸੋਤਿ ਕਾਤੁਂ ਵਟ੍ਟਤਿ, ਸਚੇ ਪਨ੍ਨਰਸਿਕਂ ਕਾਤੁਂ ਨਿਸਿਨ੍ਨਾ, ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ, ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ, ਇਦਂ ਰਤ੍ਤਿਪਾਰਿਵਾਸਿਯਂ ਨਾਮ.

ਏਵਂ ਪਨ ਨਿਸਿਨ੍ਨੇ ਕੋਚਿ ਨਕ੍ਖਤ੍ਤਪਾਠਕੋ ਭਿਕ੍ਖੁ ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣਂ, ਇਮਂ ਕਮ੍ਮਂ ਮਾ ਕਰੋਥਾ’’ਤਿ ਵਦਤਿ, ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ, ਅਥਞ੍ਞੋ ਆਗਨ੍ਤ੍ਵਾ ‘‘ਨਕ੍ਖਤ੍ਤਂ ਪਟਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਚ੍ਚਗਾ’’ਤਿ (ਜਾ. ੧.੧.੪੯) ਵਤ੍ਵਾ ‘‘ਕਿਂ ਨਕ੍ਖਤ੍ਤੇਨ, ਕਰੋਥਾ’’ਤਿ ਵਦਤਿ, ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਏਕਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਆਨੇਤ੍ਵਾ ਕਮ੍ਮਂ ਕਾਤੁਂ ਵਟ੍ਟਤਿ.

੪੩੧. ਆਪਨ੍ਨਞ੍ਚ ਵੇਮਤਿਕਞ੍ਚ ਅਦੇਸਯਿਤ੍ਵਾ ਵਾ ਨਾਵਿਕਤ੍ਵਾ ਵਾ ਉਪੋਸਥਂ ਕਾਤੁਂ ਨ ਚ ਕਪ੍ਪਤੀਤਿ ਸਮ੍ਬਨ੍ਧੋ. ਨਾਵਿਕਤ੍ਵਾਤਿ ਗਰੁਕਾਪਤ੍ਤਿਂ ਅਨਾਵਿਕਤ੍ਵਾ. ਨ ਚਾਤਿ ਨੇਵ.

੪੩੨. ਅਟ੍ਠਿਤੋਪੋਸਥਾਤਿ ਅਟ੍ਠਿਤੋ ਅਵਿਸ੍ਸਟ੍ਠੋ ਉਪੋਸਥੋ ਯਸ੍ਮਿਨ੍ਤਿ ਬਹੁਬ੍ਬੀਹਿ. ਤਦਹੂਤਿ ਤਸ੍ਮਿਂ ਉਪੋਸਥਦਿਵਸੇ. ਅਨ੍ਤਰਾਯਂ ਵਾ ਸਙ੍ਘਂ ਵਾ ਵਿਨਾ ਅਧਿਟ੍ਠਾਤੁਂ ਸੀਮਮੇਵ ਵਾ ਨ ਵਜੇਤਿ ਯੋਜਨਾ. ਅਧਿਟ੍ਠਾਤੁਨ੍ਤਿ ਇਮਿਨਾ ਗਣੁਪੋਸਥਮ੍ਪਿ ਉਪਲਕ੍ਖੇਤਿ. ਸੀਮਨ੍ਤਿ ਇਮਿਨਾ ਨਦਿਮ੍ਪਿ.

ਉਪੋਸਥਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੫. ਪਵਾਰਣਾਨਿਦ੍ਦੇਸਵਣ੍ਣਨਾ

੪੩੩. ‘‘ਅਞ੍ਞਮਞ੍ਞਪ੍ਪਵਾਰਣਾ’’ਤ੍ਯਾਦੀਨਂ ਅਞ੍ਞਮਞ੍ਞੇਹਿ ਕਾਤਬ੍ਬਾ ਪਵਾਰਣਾ. ਤਤ੍ਥ ਤਿਣ੍ਣਂ ਚਤੁਨ੍ਨਞ੍ਚ ਗਣਞਤ੍ਤਿਂ ਠਪੇਤ੍ਵਾ ਅਞ੍ਞਮਞ੍ਞਪ੍ਪਵਾਰਣਾ, ਦ੍ਵਿਨ੍ਨਂ ਪਨ ਅਟ੍ਠਪੇਤ੍ਵਾਵ. ਅਧਿਟ੍ਠਾਨਨ੍ਤਿ ਅਧਿਟ੍ਠਾਨਪ੍ਪਵਾਰਣਾ, ਯੁਪਚ੍ਚਯਨ੍ਤਾਨਂ ਭਾਵੇ ਨਿਯਤਨਪੁਂਸਕਤ੍ਤਾ ‘‘ਅਧਿਟ੍ਠਾਨ’’ਨ੍ਤਿ ਵੁਤ੍ਤਂ. ਸੇਸਾ ਪਞ੍ਚਾਦੀਹਿ ਕਾਤਬ੍ਬਾ ਅਵਸੇਸਾ ਸਙ੍ਘਪ੍ਪਵਾਰਣਾ ਸਙ੍ਘਵਸੇਨ ਞਤ੍ਤਿਂ ਠਪੇਤ੍ਵਾ ਕਾਤਬ੍ਬਾ. ਏਤੇਨ ਨਵਸੁ ਸਙ੍ਘਪ੍ਪਵਾਰਣਾਦਯੋ ਤਿਸ੍ਸੋ ਦਸ੍ਸਿਤਾ. ਨਵ ਹਿ ਪਵਾਰਣਾ ਚਾਤੁਦ੍ਦਸੀ ਪਨ੍ਨਰਸੀ ਸਾਮਗ੍ਗੀਤਿ ਦਿਵਸਵਸੇਨ, ਤੇਵਾਚੀ ਦ੍ਵੇਵਾਚੀ ਏਕਵਾਚੀਤਿ ਕਤ੍ਤਬ੍ਬਾਕਾਰਵਸੇਨ, ਸਙ੍ਘੇ ਪਵਾਰਣਾ, ਗਣੇ ਪਵਾਰਣਾ, ਪੁਗ੍ਗਲੇ ਪਵਾਰਣਾਤਿ ਕਾਰਕਵਸੇਨ ਚ. ਤਤ੍ਥ ਪੁਰਿਮਵਸ੍ਸਂਵੁਤ੍ਥਾਨਂ ਪੁਬ੍ਬਕਤ੍ਤਿਕਪੁਣ੍ਣਮਾ ਵਾ ਤੇਸਂਯੇਵ ਸਚੇ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਪਵਾਰਣਂ ਪਚ੍ਚੁਕ੍ਕਡ੍ਢਨ੍ਤਿ, ਅਥ ਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਚਾਤੁਦ੍ਦਸੋ ਵਾ ਪਚ੍ਛਿਮਕਤ੍ਤਿਕਪੁਣ੍ਣਮਾ ਵਾ ਪਚ੍ਛਿਮਵਸ੍ਸਂਵੁਤ੍ਥਾਨਞ੍ਚ ਪਚ੍ਛਿਮਕਤ੍ਤਿਕਪੁਣ੍ਣਮਾ ਏਵ ਵਾ ਪਵਾਰਣਾਦਿਵਸਾ ਹੋਨ੍ਤਿ. ਇਦਂ ਪਨ ਪਕਤਿਚਾਰਿਤ੍ਤਂ. ਤਥਾਰੂਪਪ੍ਪਚ੍ਚਯੇ ਸਤਿ ਦ੍ਵਿਨ੍ਨਂ ਕਤ੍ਤਿਕਪੁਣ੍ਣਮਾਨਂ ਪੁਰਿਮੇਸੁ ਚਾਤੁਦ੍ਦਸੇਸੁਪਿ ਪਵਾਰਣਂ ਕਾਤੁਂ ਵਟ੍ਟਤਿ. ਭਿਨ੍ਨਸ੍ਸ ਪਨ ਸਙ੍ਘਸ੍ਸ ਸਾਮਗ੍ਗਿਯਂ ਯੋ ਕੋਚਿ ਦਿਵਸੋ ਪਵਾਰਣਾਦਿਵਸੋ ਹੋਤਿ. ਇਮਾ ਦਿਵਸਵਸੇਨ ਤਿਸ੍ਸੋ ਪਵਾਰਣਾ. ਕਤ੍ਤਬ੍ਬਾਕਾਰਵਸੇਨ ਪਨ ਵਕ੍ਖਮਾਨਨਯੇਨ ਵਿਞ੍ਞਾਤਬ੍ਬਾ.

੪੩੪. ‘‘ਪੁਬ੍ਬਕਿਚ੍ਚੇ’’ਤਿਆਦੀਸੁ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਪਵਾਰਣਾਯ ਏਤਾਨਿ, ਪੁਬ੍ਬਕਰਣਨ੍ਤਿ ਵੁਚ੍ਚਤਿ.

‘‘ਛਨ੍ਦਪ੍ਪਵਾਰਣਾ ਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ;

ਪਵਾਰਣਾਯ ਏਤਾਨਿ, ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤਿ.

‘‘ਪਵਾਰਣਾ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

ਪਤ੍ਤਕਲ੍ਲਨ੍ਤਿ ਵੁਚ੍ਚਤੀ’’ਤਿ. –

ਏਵਂ ਅਟ੍ਠਕਥਾਯਂ ਵੁਤ੍ਤਾ ਪੁਬ੍ਬਕਿਚ੍ਚਾਦਯੋ ਵੇਦਿਤਬ੍ਬਾ. ਞਤ੍ਤਿਨ੍ਤਿ ਇਦਾਨਿ ਵਕ੍ਖਮਾਨਂ ਸਾਮਞ੍ਞਂ ਸਙ੍ਘਞਤ੍ਤਿਂ. ਏਵਂ ਪਨ ਞਤ੍ਤਿਯਾ ਠਪਿਤਾਯ ਕਾਰਣੇ ਸਤਿ ਤੇਵਾਚਿਕਦ੍ਵੇਵਾਚਿਕਏਕਵਾਚਿਕਸਮਾਨਵਸ੍ਸਿਕਵਸੇਨਪਿ ਪਵਾਰੇਤੁਂ ਵਟ੍ਟਤਿ. ਅਯਮੇਵ ਪਨ ਞਤ੍ਤਿ ‘‘ਸਙ੍ਘੋ ਪਵਾਰੇਯ੍ਯਾ’’ਤਿ ਏਤ੍ਥ ‘‘ਸਙ੍ਘੋ ਤੇਵਾਚਿਕਂ ਪਵਾਰੇਯ੍ਯ, ਸਙ੍ਘੋ ਦ੍ਵੇਵਾਚਿਕਂ ਪਵਾਰੇਯ੍ਯ, ਸਙ੍ਘੋ ਏਕਵਾਚਿਕਂ ਪਵਾਰੇਯ੍ਯ, ਸਙ੍ਘੋ ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿਪਿ ਠਪੇਤੁਂ ਵਟ੍ਟਤਿ. ਚਾਤੁਦ੍ਦਸਿਯਂ ਪਨ ਸਾਮਗ੍ਗਿਯਞ੍ਚ ‘‘ਚਾਤੁਦ੍ਦਸੀ ਸਾਮਗ੍ਗੀ’’ਤਿ ਵਤ੍ਤਬ੍ਬਂ.

੪੩੭. ਥੇਰੇਸੁ ਉਕ੍ਕੁਟਿਕਂ ਨਿਸਜ੍ਜ ਪਵਾਰੇਨ੍ਤੇਸੁ ਨਵੋ ਯਾਵ ਸਯਂ ਪਵਾਰੇਤਿ, ਤਾਵ ਉਕ੍ਕੁਟਿਕੋ ਏਵ ਅਚ੍ਛਤੂਤਿ ਯੋਜਨਾ. ਅਚ੍ਛਤੂਤਿ ਨਿਸੀਦੇਯ੍ਯ.

੪੪੦-੨. ਧਮ੍ਮਸਾਕਚ੍ਛਾ ਚ ਕਲਹੋ ਚਾਤਿ ਦ੍ਵਨ੍ਦੋ. ਰਤ੍ਤਿਯਾ ਖੇਪਿਤਭਾਵਤੋ ਤੇਵਾਚਿਕਾਯ ਓਕਾਸੇ ਅਸਤਿ ਦਸਵਿਧੇ ਵਾ ਅਨ੍ਤਰਾਯੇ ਸਤਿ ‘‘ਸੁਣਾਤੁ ਮੇ…ਪੇ… ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ ਅਨੁਰੂਪਤੋ ਞਤ੍ਤਿਂ ਵਤ੍ਵਾ ਯਥਾਠਪਿਤਞਤ੍ਤਿਯਾ ਅਨੁਰੂਪੇਨ ਪਵਾਰੇਯ੍ਯਾਤਿ ਸਮ੍ਬਨ੍ਧੋ ਵੇਦਿਤਬ੍ਬੋ. ਅਨੁਰੂਪਤੋਤਿ ‘‘ਸੁਣਾਤੁ ਮੇ…ਪੇ… ਦਾਨਂ ਦੇਨ੍ਤੇਹਿ ਰਤ੍ਤਿ ਖੇਪਿਤਾ, ਸਚੇ…ਪੇ… ਰਤ੍ਤਿ ਵਿਭਾਯਿਸ੍ਸਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲ’’ਨ੍ਤਿਆਦਿਨਾ ਤੇਨ ਖੇਪਿਤਰਤ੍ਤਿਯਾ ਅਨੁਰੂਪੇਨ. ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਰਾਜਨ੍ਤਰਾਯੋ, ਸਚੇ ਸਙ੍ਘੋ ਤੇਵਾਚਿਕਂ…ਪੇ… ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਾਜਨ੍ਤਰਾਯੋ ਭਵਿਸ੍ਸਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲ’’ਨ੍ਤਿਆਦਿਨਾ ਰਾਜਨ੍ਤਰਾਯਾਦੀਨਂ ਅਨੁਰੂਪੇਨ ਵਾਤਿ ਅਤ੍ਥੋ. ‘‘ਅਥਾਯਂ ਬ੍ਰਹ੍ਮਚਰਿਯਨ੍ਤਰਾਯੋ ਭਵਿਸ੍ਸਤੀ’’ਤਿ ਪਨ ਪੇਯ੍ਯਾਲਵਸੇਨ ਅਨ੍ਤੇ ਵੁਤ੍ਤਂ ਬ੍ਰਹ੍ਮਚਰਿਯਨ੍ਤਰਾਯਂ ਗਹੇਤ੍ਵਾ ਵੁਤ੍ਤਂ. ‘‘ਦ੍ਵੇਵਾਚਿਕ’’ਨ੍ਤਿਆਦਿਕਂ ਪਨ ਵਿਸੁਂ ਵਿਸੁਂ ਵਤ੍ਤਬ੍ਬਮ੍ਪਿ ਲਙ੍ਘਨਕ੍ਕਮੇਨ ਸਮ੍ਪਿਣ੍ਡੇਤ੍ਵਾ ਵੁਤ੍ਤਂ. ਵਚਨਸਮਯੇ ਪਨ ‘‘ਦ੍ਵੇਵਾਚਿਕਂ ਪਵਾਰੇਯ੍ਯ’’ਇਚ੍ਚਾਦਿਨਾ ਵਤ੍ਤਬ੍ਬਂ. ਆਗਚ੍ਛੇਯ੍ਯੁਂ ਯਦਿ ਸਮਾਆਦਿਕਾ ਚਾਤਿ ‘‘ਆਗਚ੍ਛੇਯ੍ਯੁਂ ਯਦਿ ਸਮਾ’’ਇਚ੍ਚਾਦਯੋ ਉਪੋਸਥੇ ਵੁਤ੍ਤਾ ਗਾਥਾਯੋ ਚ. ਏਤ੍ਥਾਤਿ ਏਤਿਸ੍ਸਂ ਪਵਾਰਣਾਯਂ. ਅਯਮੇਵ ਚ ਆਹਰਣਕ੍ਕਮੋ –

ਆਗਚ੍ਛੇਯ੍ਯੁਂ ਯਦਿ ਸਮਾ, ਪਵਾਰੇਨ੍ਤੇਵ ਥੋਕਿਕਾ;

ਪਵਾਰਿਤਾ ਤੇ ਸੁਪ੍ਪਵਾਰਿਤਾ, ਅਞ੍ਞੇਹਿ ਚ ਪਵਾਰਿਯਂ;

ਪਵਾਰਿਤੇਸੁ ਸਕਲਾ-ਯੇਕਚ੍ਚਾਯੁਟ੍ਠਿਤਾਯ ਵਾ.

ਪਵਾਰੇਯ੍ਯੁਞ੍ਚ ਤੇ ਤੇਸਂ, ਸਨ੍ਤਿਕੇ ਬਹੁਕਾ ਸਚੇ;

ਕਤ੍ਵਾ ਸਬ੍ਬਵਿਕਪ੍ਪੇਸੁ, ਪੁਬ੍ਬਕਿਚ੍ਚਂ ਪੁਨੁਦ੍ਦਿਸੇਤਿ.

‘‘ਆਵਾਸਿਕਾਨਂ ਪਨ੍ਨਰਸੋ’’ਤਿਆਦਿਕਾ ਗਾਥਾਯੋ ਪਨ ਏਤ੍ਥਾਪਿ ਸਮਾਨਾ.

੪੪੩. ਞਤ੍ਤਿਂ ਵਤ੍ਵਾਤਿ ਵਕ੍ਖਮਾਨਗਣਞਤ੍ਤਿਂ ਵਤ੍ਵਾ.

੪੪੪. ਸਮੁਦੀਰਿਯਾਤਿ ਅਞ੍ਞੇ ਦ੍ਵੇ ਤਯੋ ਵਾ ਵਕ੍ਖਮਾਨਕ੍ਕਮੇਨ ਵਤ੍ਤਬ੍ਬਾ.

੪੪੬-੮. ਕਤ੍ਤਬ੍ਬਂ ਕਤ੍ਵਾਤਿ ਯੋਜੇਤਬ੍ਬਂ. ਕਤ੍ਤਬ੍ਬਨ੍ਤਿ ਪੁਬ੍ਬਕਿਚ੍ਚਾਦਿਕਂ. ਨਵੇਨਪਿ ‘‘ਅਹਂ ਭਨ੍ਤੇ…ਪੇ… ਪਟਿਕਰਿਸ੍ਸਾਮੀ’’ਤਿ ਥੇਰੋ ਈਰਿਯੋਤਿ ਯੋਜੇਤਬ੍ਬਂ. ਏਵਨ੍ਤਿ ਇਦਾਨਿ ਵਕ੍ਖਮਾਨਂ ਪਰਾਮਸਤਿ.

੪੪੯. ‘‘ਯਸ੍ਮਿ’’ਨ੍ਤਿਆਦਿ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

੪੫੦. ਗਾਥਾਯੋਤਿ ‘‘ਵਗ੍ਗੇ ਸਮਗ੍ਗੇ ਵਗ੍ਗੋਤਿ, ਸਞ੍ਞਿਨੋ’’ਤਿਆਦਿਕਾ ਹੇਟ੍ਠਾ ਵੁਤ੍ਤਗਾਥਾਯੋ ਵਾ. ਅਯਂ ਪਨੇਤ੍ਥ ਵਿਸੇਸੋ – ਕਰੋਤੋਤਿ ਏਤ੍ਥ ਪਵਾਰਣਂ ਕਰੋਤੋਤਿ ਅਤ੍ਥੋ ਗਹੇਤਬ੍ਬੋ. ਤਤਿਯ ਗਾਥਾਯ ‘‘ਪਾਤਿਮੋਕ੍ਖਂ ਨ ਉਦ੍ਦਿਸੇ’’ਤਿ ਅਪਨੇਤ੍ਵਾ ‘‘ਨੋ ਕਰੇਯ੍ਯ ਪਵਾਰਣ’’ਨ੍ਤਿ ਪਦਂ ਪਕ੍ਖਿਪਿਤਬ੍ਬਂ. ਚਤੁਤ੍ਥਗਾਥਾਯ ‘‘ਅਨੁਪੋਸਥੇ’’ਤਿਆਦਿਗਾਥਾਬਨ੍ਧਂ ਅਪਨੇਤ੍ਵਾ ‘‘ਨੇਵ ਪਵਾਰਣੇ ਕਾਤੁਂ, ਸਾ ਕਪ੍ਪਤਿ ਪਵਾਰਣਾ’’ਤਿ ਪਕ੍ਖਿਪਿਤਬ੍ਬਂ. ਪਞ੍ਚਮਗਾਥਾਯ ‘‘ਅਟ੍ਠਿਤੋਪੋਸਥਾਵਾਸਾ’’ਤਿ ਅਪਨੇਤ੍ਵਾ ‘‘ਪਵਾਰਣਾਠਿਤਾਵਾਸਾ’’ਤਿ ਪਕ੍ਖਿਪਿਤਬ੍ਬਂ.

੪੫੧. ਸਙ੍ਘਮ੍ਹਿ ਪਵਾਰਿਤੇਵਾਤਿ ਪੁਰਿਮਵਸ੍ਸੂਪਗਤੇ ਸਙ੍ਘਮ੍ਹਿ ਪਵਾਰਿਤੇ ਏਵ. ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਤਿ ਨ ਏਕਸ੍ਮਿਂ ਉਪੋਸਥਗ੍ਗੇ ਦ੍ਵੇ ਞਤ੍ਤਿਯੋ ਠਪੇਤਬ੍ਬਾਤਿ ਅਧਿਪ੍ਪਾਯੋ. ਪਚ੍ਛਿਮਿਕਾਯ ਉਪਗਨ੍ਤ੍ਵਾ ਅਪਰਿਨਿਟ੍ਠਿਤਵਸ੍ਸੋ ਅਵੁਤ੍ਥੋ. ਅਨੁਪਾਗਤੋਤਿ ਵਸ੍ਸਂ ਅਨੁਪਾਗਤੋ. ਅਯਮੇਤ੍ਥਾਧਿਪ੍ਪਾਯੋ – ਪੁਰਿਮਿਕਾਯ ਵਸ੍ਸਂ ਉਪਗਤਾ ਪਞ੍ਚ ਵਾ ਅਤਿਰੇਕਾ ਵਾ ਪਚ੍ਛਿਮਿਕਾਯ ਉਪਗਤਾ ਤੇਹਿ ਸਮਾ ਵਾ ਊਨਤਰਾ ਵਾ ਪੁਰਿਮਿਕਾਯ ਵਾ ਉਪਗਤੇਹਿ ਪਚ੍ਛਿਮਿਕਾਯ ਉਪਗਤਾ ਥੋਕਤਰਾ ਚੇਵ ਹੋਨ੍ਤਿ, ਸਙ੍ਘਪ੍ਪਵਾਰਣਾਯ ਗਣਂ ਪੂਰੇਨ੍ਤਿ ਸਙ੍ਘਪ੍ਪਵਾਰਣਾਵਸੇਨ ਞਤ੍ਤਿਂ ਠਪੇਤ੍ਵਾ, ਅਥ ਚ ਉਭੋਪਿ ਏਕਤੋ ਹੁਤ੍ਵਾ ਸਙ੍ਘਂ ਨ ਪੂਰੇਨ੍ਤਿ, ਗਣਂ ਪਨ ਪੂਰੇਨ੍ਤਿ, ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਤਬ੍ਬਂ, ਪਚ੍ਛਾ ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਯਦਿ ਪਨ ਪੁਰਿਮਿਕਾਯ ਏਕੋ, ਪਚ੍ਛਿਮਿਕਾਯ ਏਕੋ, ਏਕੇਨ ਏਕਸ੍ਸ ਸਨ੍ਤਿਕੇ ਪਵਾਰੇਤਬ੍ਬਂ, ਏਕੇਨ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਸਚੇ ਪੁਰਿਮੇਹਿ ਵਸ੍ਸੂਪਗਤੇਹਿ ਪਚ੍ਛਾ ਵਸ੍ਸੂਪਗਤਾ ਏਕੇਨਪਿ ਅਧਿਕਾ ਸਙ੍ਘਂ ਪੂਰੇਨ੍ਤਿ, ਪਠਮਂ ਪਾਤਿਮੋਕ੍ਖਂ ਉਦ੍ਦਿਸਿਤ੍ਵਾ ਪਚ੍ਛਾ ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਨ੍ਤਿ. ਗਣੇਪਿ ਏਸੇਵ ਨਯੋ. ਏਵਮੁਪਰਿਪਿ ਯਥਾਯੋਗਂ ਚਿਨ੍ਤਨੀਯਂ.

੪੫੨. ਚਾਤੁਮਾਸਿਨਿਯਾਤਿ ਅਪਰਕਤ੍ਤਿਕਪੁਣ੍ਣਮਾਯਂ. ਸਙ੍ਘੇਨਾਤਿ ਪਠਮਂ ਵਸ੍ਸੂਪਗਤੇਨ ਸਙ੍ਘੇਨ. ਵੁਤ੍ਥਾ ਵਸ੍ਸਾ ਯੇਹਿ ਤੇ ਵੁਤ੍ਥਵਸ੍ਸਾ, ਪਚ੍ਛਿਮਵਸ੍ਸੂਪਗਤਾ. ਸਚੇ ਅਪ੍ਪਤਰਾ ਸਿਯੁਨ੍ਤਿ ਇਮਿਨਾ ਯਦਿ ਅਧਿਕਤਰਾ ਵਾ ਸਮਸਮਾ ਵਾ ਹੋਨ੍ਤਿ, ਪਵਾਰਣਾਞਤ੍ਤਿਂ ਠਪੇਤ੍ਵਾ ਪਚ੍ਛਿਮਵਸ੍ਸੂਪਗਤੇਹਿ ਪਠਮਂ ਪਵਾਰਿਤੇ ਪਚ੍ਛਾ ਇਤਰੇਹਿ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋਤਿ ਦੀਪੇਤੀਤਿ.

ਪਵਾਰਣਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੬. ਸਂਵਰਨਿਦ੍ਦੇਸਵਣ੍ਣਨਾ

੪੫੩. ਸਂਵਰਣਂ ਚਕ੍ਖੁਦ੍ਵਾਰਾਦੀਨਂ ਸਤਿਕਵਾਟੇਨ ਪਿਦਹਨਂ ਸਂਵਰੋ. ਤਤ੍ਥ ਕਿਞ੍ਚਾਪਿ ਚਕ੍ਖੁਨ੍ਦ੍ਰਿਯੇ ਸਂਵਰੋ ਨਤ੍ਥਿ, ਨ ਹਿ ਚਕ੍ਖੁਪਸਾਦਂ ਨਿਸ੍ਸਾਯ ਸਤਿ ਉਪ੍ਪਜ੍ਜਤਿ, ਨੇਵ ਭਵਙ੍ਗਸਮਯੇ ਆਵਜ੍ਜਨਾਦੀਨਂ ਅਞ੍ਞਤਰਸਮਯੇ, ਜਵਨਕ੍ਖਣੇ ਪਨ ਉਪ੍ਪਜ੍ਜਤੀਤਿ ਤਦਾ ਸਂਵਰੋ ਹੋਤਿ, ਏਵਂ ਹੋਨ੍ਤੇ ਪਨ ਸੋ ਚਕ੍ਖੁਦ੍ਵਾਰਾਦੀਨਂ ਸਂਵਰੋਤਿ ਵੁਚ੍ਚਤਿ. ਚਕ੍ਖੁਸੋਤਾਦਿਭੇਦੇਹੀਤਿ ਚਕ੍ਖੁ ਚ ਸੋਤਞ੍ਚ, ਤਾਨਿ ਆਦਿ ਯੇਸਂ, ਤੇਵ ਭੇਦਾ ਚਾਤਿ ਸਮਾਸੋ, ਤੇਹਿ ਦ੍ਵਾਰੇਹਿ. ਅਭਿਜ੍ਝਾਦਿਪ੍ਪਵਤ੍ਤਿਯਾ ਅਚ੍ਚਨ੍ਤੋਪਕਾਰਕਤ੍ਤਾ ਕਰਣਤ੍ਥੇ ਚੇਤ੍ਥ ਤਤਿਯਾ. ਏਤੇਨ ਚਕ੍ਖੁਸੋਤਘਾਨਜਿਵ੍ਹਾਕਾਯਮਨਸਙ੍ਖਾਤਾਨਿ ਦ੍ਵਾਰਾਨਿ ਵੁਤ੍ਤਾਨਿ. ਰੂਪਸਦ੍ਦਾਦਿਗੋਚਰੇਤਿ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਧਮ੍ਮਸਙ੍ਖਾਤੇ ਵਿਸਯੇ. ਅਭਿਜ੍ਝਾਦੋਮਨਸ੍ਸਾਦਿਪ੍ਪਵਤ੍ਤਿਨ੍ਤਿ ਏਤ੍ਥ ਪਰਸਮ੍ਪਤ੍ਤਿਂ ਅਭਿਮੁਖਂ ਝਾਯਤੀਤਿ ਅਭਿਜ੍ਝਾ, ਬਲਵਤਣ੍ਹਾ. ਆਦਿ-ਸਦ੍ਦੇਨ ਮਿਚ੍ਛਾਦਿਟ੍ਠਿਆਦਯੋ ਅਨੇਕੇ ਅਕੁਸਲਾ ਧਮ੍ਮਾ ਸਙ੍ਗਹਿਤਾ.

੪੫੪. ਸਕਂ ਚਿਤ੍ਤਂ ਕਿਟ੍ਠਾਦਿਂ ਦੁਪ੍ਪਸੁਂ ਵਿਯ ਨਿਗ੍ਗਣ੍ਹੇਯ੍ਯਾਤਿ ਸਮ੍ਬਨ੍ਧੋ. ਕਿਟ੍ਠਨ੍ਤਿ ਕਿਟ੍ਠਟ੍ਠਾਨੇ ਉਪ੍ਪਨ੍ਨਂ ਸਸ੍ਸਂ ਗਹਿਤਂ. ਕਿਟ੍ਠਂ ਅਦਤੀਤਿ ਕਿਟ੍ਠਾਦਿ, ਤਂ. ਸਮ੍ਪਜਾਨੋਤਿ ਸਾਤ੍ਥਕਸਪ੍ਪਾਯਗੋਚਰਅਸਮ੍ਮੋਹਸਙ੍ਖਾਤੇਨ ਚਤੁਸਮ੍ਪਜਞ੍ਞੇਨ ਸਮ੍ਮਾ ਪਜਾਨੋ. ਇਮਿਨਾ ਇਨ੍ਦ੍ਰਿਯਸਂਵਰਸੀਲਂ ਕਥਿਤਂ.

ਸਂਵਰਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੭. ਸੁਦ੍ਧਿਨਿਦ੍ਦੇਸਵਣ੍ਣਨਾ

੪੫੫. ਦੇਸਨਾ ਸਂਵਰੋ ਏਟ੍ਠਿ ਪਚ੍ਚਵੇਕ੍ਖਣਨ੍ਤਿ ਭੇਦਤੋ ਸੁਦ੍ਧਿ ਚਤੁਬ੍ਬਿਧਾਤਿ ਸਮ੍ਬਨ੍ਧੋ. ‘‘ਪਚ੍ਚਵੇਕ੍ਖਣਂ ਭੇਦਤੋ’’ਤਿ ਵਤ੍ਤਬ੍ਬੇ ਨਿਗ੍ਗਹਿਤਲੋਪੋ ਦਟ੍ਠਬ੍ਬੋ, ਦੇਸਨਾਸੁਦ੍ਧਿ ਸਂਵਰਸੁਦ੍ਧਿ ਪਰਿਯੇਟ੍ਠਿਸੁਦ੍ਧਿ ਪਚ੍ਚਵੇਕ੍ਖਣਸੁਦ੍ਧੀਤਿ ਚਤੁਬ੍ਬਿਧਾਤਿ ਵੁਤ੍ਤਂ ਹੋਤਿ. ਤਤ੍ਥ ਸੁਜ੍ਝਤੀਤਿ ਸੁਦ੍ਧਿ, ਯਥਾਧਮ੍ਮਂ ਦੇਸਨਾਯ ਸੁਦ੍ਧਿ ਦੇਸਨਾਸੁਦ੍ਧਿ. ਵੁਟ੍ਠਾਨਸ੍ਸਾਪਿ ਚੇਤ੍ਥ ਦੇਸਨਾਯ ਏਵ ਸਙ੍ਗਹੋ ਦਟ੍ਠਬ੍ਬੋ. ਮੂਲਾਪਤ੍ਤੀਨਂ ਪਨ ਅਭਿਕ੍ਖੁਤਾਪਟਿਞ੍ਞਾਵ ਦੇਸਨਾਤਿ ਹੇਟ੍ਠਾ ਵੁਤ੍ਤਾ, ਸਾਵਸ੍ਸ ਪਾਰਾਜਿਕਾਪਨ੍ਨਸ੍ਸ ਵਿਸੁਦ੍ਧਿ ਨਾਮ ਹੋਤਿ. ਅਯਞ੍ਹਿ ਯਸ੍ਮਾ ਪਾਰਾਜਿਕਂ ਆਪਨ੍ਨੋ, ਤਸ੍ਮਾ ਭਿਕ੍ਖੁਭਾਵੇ ਠਤ੍ਵਾ ਅਭਬ੍ਬੋ ਝਾਨਾਦੀਨਿ ਅਧਿਗਨ੍ਤੁਂ. ਭਿਕ੍ਖੁਭਾਵੋ ਹਿਸ੍ਸ ਸਗ੍ਗਨ੍ਤਰਾਯੋ ਚੇਵ ਹੋਤਿ, ਮਗ੍ਗਨ੍ਤਰਾਯੋ ਚ. ਵੁਤ੍ਤਞ੍ਹੇਤਂ –

‘‘ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾਯੂਪਕਡ੍ਢਤੀ’’ਤਿ. (ਧ. ਪ. ੩੧੧);

ਅਪਰਮ੍ਪਿ ਵੁਤ੍ਤਂ –

‘‘ਸਿਥਿਲੋ ਹਿ ਪਰਿਬ੍ਬਜੋ, ਭਿਯ੍ਯੋ ਆਕਿਰਤੇ ਰਜ’’ਨ੍ਤਿ. (ਧ. ਪ. ੩੧੩);

ਇਚ੍ਚਸ੍ਸ ਭਿਕ੍ਖੁਭਾਵੋ ਵਿਸੁਦ੍ਧਿ ਨਾਮ ਨ ਹੋਤਿ. ਯਸ੍ਮਾ ਪਨ ਗਿਹਿਆਦਿਕੋ ਹੁਤ੍ਵਾ ਦਾਨਸਰਣਸੀਲਸਂਵਰਾਦੀਹਿ ਸਗ੍ਗਮਗ੍ਗਂ ਵਾ ਝਾਨਵਿਮੋਕ੍ਖਮਗ੍ਗਂ ਵਾ ਆਰਾਧੇਤੁਂ ਭਬ੍ਬੋ ਹੋਤਿ, ਤਸ੍ਮਾਸ੍ਸ ਗਿਹਿਆਦਿਭਾਵੋ ਵਿਸੁਦ੍ਧਿ ਨਾਮ ਹੋਤਿ. ਅਧਿਟ੍ਠਾਨਵਿਸਿਟ੍ਠੇਨ ਸਂਵਰੇਨ ਵਿਸੁਦ੍ਧਿ ਸਂਵਰਵਿਸੁਦ੍ਧਿ. ਧਮ੍ਮੇਨ ਸਮੇਨ ਪਚ੍ਚਯਾਨਂ ਏਟ੍ਠਿਯਾ ਸੁਦ੍ਧਿ ਏਟ੍ਠਿਸੁਦ੍ਧਿ. ਚਤੂਸੁ ਪਚ੍ਚਯੇਸੁ ਪਚ੍ਚਵੇਕ੍ਖਣੇਨ ਸੁਦ੍ਧਿ ਪਚ੍ਚਵੇਕ੍ਖਣਸੁਦ੍ਧਿ. ‘‘ਚਤੁਬ੍ਬਿਧਾ ਪਾਤੀ’’ਤਿਆਦੀਸੁ ਪਾਤਿਮੋਕ੍ਖਸਂਵਰਸਮ੍ਮਤਨ੍ਤਿ ‘‘ਪਾਤਿਮੋਕ੍ਖਸਂਵਰੋ’’ਤਿ ਸਮ੍ਮਤਂ ਸੀਲਂ.

੪੫੬. ਚਿਤ੍ਤਾਧਿਟ੍ਠਾਨਸਂਵਰਾ ਸੁਜ੍ਝਤੀਤਿ ਇਨ੍ਦ੍ਰਿਯਸਂਵਰੋ ਸਂਵਰਸੁਦ੍ਧੀਤਿ ਵੁਤ੍ਤੋਤਿ ਯੋਜਨਾ.

੪੫੭. ਅਨੇਸਨਂ ਪਹਾਯ ਧਮ੍ਮੇਨ ਉਪ੍ਪਾਦੇਨ੍ਤਸ੍ਸ ਏਟ੍ਠਿਯਾ ਸੁਦ੍ਧਤ੍ਤਾ ਆਜੀਵਨਿਸ੍ਸਿਤਂ ਏਟ੍ਠਿਸੁਦ੍ਧੀਤਿ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਉਪ੍ਪਾਦੇਨ੍ਤਸ੍ਸਾਤਿ ਪਚ੍ਚਯੇ ਉਪ੍ਪਾਦੇਨ੍ਤਸ੍ਸ.

੪੫੮. ਪਚ੍ਚਵੇਕ੍ਖਣਸੁਜ੍ਝਨਾਤਿ ਹੇਤੁਮ੍ਹਿ ਪਞ੍ਚਮੀਤਿ.

ਸੁਦ੍ਧਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੮. ਸਨ੍ਤੋਸਨਿਦ੍ਦੇਸਵਣ੍ਣਨਾ

੪੫੯. ਪਂਸੁਕੂਲਂ ਪਿਣ੍ਡਿਯਾਲੋਪੋ ਰੁਕ੍ਖਮੂਲਂ ਪੂਤਿਮੁਤ੍ਤਭੇਸਜ੍ਜਨ੍ਤਿ ਇਮੇ ਚਤ੍ਤਾਰੋ ਪਚ੍ਚਯਾ ਅਪ੍ਪਗ੍ਘਨਕਤਾਯ ਅਪ੍ਪਾ ਚੇਵ ਕਸ੍ਸਚਿਪਿ ਆਲਯਾਭਾਵੇਨ ਅਨਵਜ੍ਜਾ ਚ ਗਤਗਤਟ੍ਠਾਨੇ ਲਬ੍ਭਮਾਨਤਾਯ ਸੁਲਭਾ ਚਾਤਿ ਵੁਚ੍ਚਨ੍ਤਿ, ਤੇਨਾਹ ‘‘ਅਪ੍ਪੇਨਾ’’ਤਿਆਦਿ. ਮਤ੍ਤਞ੍ਞੂਤਿ ਪਰਿਯੇਸਨਪ੍ਪਟਿਗ੍ਗਹਣਪਰਿਭੋਗਵਿਸ੍ਸਜ੍ਜਨੇਸੁ ਚਤੂਸੁ ਮਤ੍ਤਞ੍ਞੁਤਾਵਸੇਨ ਪਮਾਣਞ੍ਞੂ.

੪੬੦. ਕਥਂ ਸਨ੍ਤੁਟ੍ਠੋਤਿ ਆਹ ‘‘ਅਤੀਤ’’ਨ੍ਤਿਆਦਿ. ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤੋਤਿ ਯਥਾਲਾਭਯਥਾਬਲਯਥਾਸਾਰੁਪ੍ਪਵਸੇਨ ਪਚ੍ਚੁਪ੍ਪਨ੍ਨੇਨ ਯਥਾਵੁਤ੍ਤਚਤੁਬ੍ਬਿਧਪਚ੍ਚਯੇਨ ਯਾਪੇਨ੍ਤੋਤਿ.

ਸਨ੍ਤੋਸਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪੯. ਚਤੁਰਾਰਕ੍ਖਨਿਦ੍ਦੇਸਵਣ੍ਣਨਾ

੪੬੧-੨. ਬੁਦ੍ਧਾਨੁਸ੍ਸਤਿ …ਪੇ… ਮਰਣਸ੍ਸਤੀਤਿ ਇਮਾ ਚਤੁਰਾਰਕ੍ਖਾ ਨਾਮਾਤਿ ਸੇਸੋ. ਆਰਕਤ੍ਤਾਦਿਨਾਤਿ ਆਰਕਭਾਵੋ ਆਰਕਤ੍ਤਂ, ਤਂ ਆਦਿ ਯਸ੍ਸ ‘‘ਅਰੀਨਂ ਹਤਤ੍ਤਾ’’ਤਿਆਦਿਕਸ੍ਸ ਤਂ ਆਰਕਤ੍ਤਾਦਿ. ਤੇਨ ਤੇਨ ਮਗ੍ਗੇਨ ਸਵਾਸਨਾਨਂ ਅਰਾਨਂ ਹਤਤ੍ਤਾ ਆਰਕਾ ਸਬ੍ਬਕਿਲੇਸੇਹਿ ਸੁਵਿਦੂਰਵਿਦੂਰੇ ਠਿਤੋਤਿ ਆ-ਕਾਰਸ੍ਸ ਰਸ੍ਸਤ੍ਤਂ, ਕ-ਕਾਰਸ੍ਸ ਹ-ਕਾਰਂ ਸਾਨੁਨਾਸਿਕਂ ਕਤ੍ਵਾ ‘‘ਅਰਹ’’ਨ੍ਤਿ ਪਦਸਿਦ੍ਧਿ ਵੇਦਿਤਬ੍ਬਾ. ‘‘ਆਰਕਾ’’ਤਿ ਚ ਵੁਤ੍ਤੇ ਸਾਮਞ੍ਞਜੋਤਨਾਯ ਵਿਸੇਸੇ ਅਵਟ੍ਠਾਨਤੋ, ਵਿਸੇਸਤ੍ਥਿਨਾ ਚ ਵਿਸੇਸਸ੍ਸ ਅਨੁਪ੍ਪਯੋਜਿਤਬ੍ਬਤ੍ਤਾ ‘‘ਕਿਲੇਸੇਹੀ’’ਤਿ ਲਬ੍ਭਤਿ.

ਸਮ੍ਮਾਤਿ ਅਵਿਪਰੀਤਂ. ਸਾਮਨ੍ਤਿ ਸਯਮੇਵ, ਅਪਰਨੇਯ੍ਯੋ ਹੁਤ੍ਵਾਤਿ ਅਤ੍ਥੋ. ‘‘ਸਮ੍ਬੁਦ੍ਧੋ’’ਤਿ ਹਿ ਏਤ੍ਥ ਸਂ-ਸਦ੍ਦੋ ‘‘ਸਯ’’ਨ੍ਤਿ ਏਤਸ੍ਸ ਅਤ੍ਥਸ੍ਸ ਬੋਧਕੋ ਦਟ੍ਠਬ੍ਬੋ. ਬੁਦ੍ਧਤੋਤਿ ਭਾਵਪ੍ਪਧਾਨੋਯਂ ਨਿਦ੍ਦੇਸੋ, ਬੁਦ੍ਧਤ੍ਤਾਤਿ ਅਤ੍ਥੋ. ‘‘ਅਰਹਂ’’ ਇਤਿ ਵਾ ‘‘ਸਮ੍ਮਾਸਮ੍ਬੁਦ੍ਧੋ’’ ਇਤਿ ਵਾ ਭਗਵਤੋ ਨਵਭੇਦੇ ਗੁਣੇ ਯਾ ਪੁਨਪ੍ਪੁਨਂ ਅਨੁਸ੍ਸਤਿ, ਸਾ ਬੁਦ੍ਧਾਨੁਸ੍ਸਤੀਤਿ ਯੋਜਨਾ. ‘‘ਸਮ੍ਮਾਸਮ੍ਬੁਦ੍ਧੋ ਇਤੀ’’ਤਿ ਵਤ੍ਤਬ੍ਬੇ ਅ-ਕਾਰੋ ਸਨ੍ਧਿਵਸੇਨ ਆਗਤੋ. ਇਤਿ-ਸਦ੍ਦੋ ਪਨੇਤ੍ਥ ਆਦਿਅਤ੍ਥੋ, ਇਚ੍ਚਾਦੀਤਿ ਅਤ੍ਥੋ. ਨਵਭੇਦੇਤਿ ‘‘ਅਨੁਤ੍ਤਰੋ ਪੁਰਿਸਦਮ੍ਮਸਾਰਥੀ’’ਤਿ ਏਕਤੋ ਗਹੇਤ੍ਵਾ. ਏਤ੍ਥ ਪਨ ਉਪਚਾਰੋ ਉਪ੍ਪਜ੍ਜਤਿ, ਨ ਅਪ੍ਪਨਾ, ਤਥਾ ਮਰਣਸ੍ਸਤਿਯਂ. ਇਤਰੇਸੁ ਪਨ ਉਭਯਮ੍ਪਿ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ. ਬੁਦ੍ਧਾਨੁਸ੍ਸਤਿ.

੪੬੩-੪. ‘‘ਸੀਮਟ੍ਠਾ’’ਤਿਆਦਿਨਾ ਮੇਤ੍ਤਾਭਾਵਨਂ ਦਸ੍ਸੇਤਿ. ਸੀਮਟ੍ਠਸਙ੍ਘੇਤਿ ਸੀਮਾਯਂ ਤਿਟ੍ਠਤੀਤਿ ਸੀਮਟ੍ਠੋ, ਸੋਵ ਸਙ੍ਘੋ. ਗੋਚਰਗਾਮਮ੍ਹਿ ਇਸ੍ਸਰੇ ਜਨੇਤਿ ਸਮ੍ਬਨ੍ਧੋ. ਤਤ੍ਥ ਮਾਨੁਸੇ ਉਪਾਦਾਯ ਸਬ੍ਬਸਤ੍ਤੇਸੂਤਿ ਯੋਜੇਤਬ੍ਬਂ. ਤਤ੍ਥਾਤਿ ਤਸ੍ਮਿਂ ਗਾਮੇ. ਸੁਖਿਤਾ ਹੋਨ੍ਤੁ ਅਵੇਰਾਤਿ ਪਦਚ੍ਛੇਦੋ. ਆਦਿਨਾਤਿ ‘‘ਅਬ੍ਯਾਪਜ੍ਜਾ ਹੋਨ੍ਤੁ, ਅਨੀਘਾ ਹੋਨ੍ਤੁ, ਸੁਖੀ ਅਤ੍ਤਾਨਂ ਪਰਿਹਰਨ੍ਤੂ’’ਤਿ ਇਮਿਨਾ. ਪਰਿਚ੍ਛਿਜ੍ਜ ਪਰਿਚ੍ਛਿਜ੍ਜਾਤਿ ‘‘ਇਮਸ੍ਮਿਂ ਵਿਹਾਰੇ ਸਬ੍ਬੇ ਭਿਕ੍ਖੂ’’ਤਿਆਦਿਨਾ ਏਵਮ੍ਪਿ ਪਰਿਚ੍ਛਿਨ੍ਦਿਤ੍ਵਾ ਪਰਿਚ੍ਛਿਨ੍ਦਿਤ੍ਵਾ. ਮੇਤ੍ਤਾਭਾਵਨਾ.

੪੬੫-੬. ਇਦਾਨਿ ਅਸੁਭਂ ਨਿਦ੍ਦਿਸਨ੍ਤੋ ਸਬ੍ਬਪਠਮਂ ਸਾਧੇਤਬ੍ਬਂ ਸਤ੍ਤਵਿਧਮੁਗ੍ਗਹਕੋਸਲ੍ਲਂ ‘‘ਵਣ੍ਣੇ’’ਚ੍ਚਾਦਿਨਾ ਦਸ੍ਸੇਤਿ. ਸਤ੍ਤਵਿਧਞ੍ਹਿ ਤਂ ਨਯਤੋ ਆਗਤਂ ਵਾਚਾਸਜ੍ਝਾਯਮਨਸਾਸਜ੍ਝਾਯੇਹਿ ਸਦ੍ਧਿਂ. ਤਤ੍ਥ ਪਠਮਂ ਵਾਚਾਯ ਸਜ੍ਝਾਯਨ੍ਤੇਨ ਚਤ੍ਤਾਰਿ ਤਚਪਞ੍ਚਕਾਦੀਨਿ ਪਰਿਚ੍ਛਿਨ੍ਦਿਤ੍ਵਾ ਅਨੁਲੋਮਪ੍ਪਟਿਲੋਮਵਸੇਨ ਕਾਤਬ੍ਬਂ. ਯਥਾ ਪਨ ਵਚਸਾ, ਤਥੇਵ ਮਨਸਾਪਿ ਸਜ੍ਝਾਯੋ ਕਾਤਬ੍ਬੋ. ਵਚਸਾ ਸਜ੍ਝਾਯੋ ਹਿ ਮਨਸਾ ਸਜ੍ਝਾਯਸ੍ਸ ਪਚ੍ਚਯੋ. ਸੋ ਪਨ ਲਕ੍ਖਣਪ੍ਪਟਿਵੇਧਸ੍ਸ ਪਚ੍ਚਯੋ. ਤਤ੍ਥ ਵਣ੍ਣੋ ਨਾਮ ਕੇਸਾਦੀਨਂ ਵਣ੍ਣੋ. ਸਣ੍ਠਾਨਂ ਤੇਸਂਯੇਵ ਸਣ੍ਠਾਨਂ. ਓਕਾਸੋ ਤੇਸਂਯੇਵ ਪਤਿਟ੍ਠੋਕਾਸੋ. ਦਿਸਾ ਨਾਭਿਤੋ ਉਦ੍ਧਂ ਉਪਰਿਮਦਿਸਾ, ਅਧੋ ਹੇਟ੍ਠਿਮਾ. ਪਰਿਚ੍ਛੇਦੋ ਨਾਮ ‘‘ਅਯਂ ਕੋਟ੍ਠਾਸੋ ਹੇਟ੍ਠਾ ਚ ਉਪਰਿ ਚ ਤਿਰਿਯਞ੍ਚ ਇਮਿਨਾ ਨਾਮ ਪਰਿਚ੍ਛਿਨ੍ਨੋ’’ਤਿ ਏਵਂ ਸਭਾਗਪਰਿਚ੍ਛੇਦੋ ਚੇਵ ‘‘ਕੇਸਾ ਨ ਲੋਮਾ, ਲੋਮਾ ਨ ਕੇਸਾ’’ਤਿ ਏਵਂ ਅਮਿਸ੍ਸਕਤਾਵਸੇਨ ਵਿਸਭਾਗਪਰਿਚ੍ਛੇਦੋ ਚ. ਕੇਸਾਦਿਕੋਟ੍ਠਾਸੇ ਵਵਤ੍ਥਪੇਤ੍ਵਾਤਿ ਸਮ੍ਬਨ੍ਧੋ. ਵਵਤ੍ਥਪੇਤ੍ਵਾਤਿ ਵੁਤ੍ਤਨਯੇਨ ਵਵਤ੍ਥਪੇਤ੍ਵਾ.

ਏਵਂ ਵਵਤ੍ਥਪੇਨ੍ਤੇਨ ਯਥਾਵੁਤ੍ਤਂ ਸਤ੍ਤਵਿਧਂ ਉਗ੍ਗਹਕੋਸਲ੍ਲਂ ਸਮ੍ਪਾਦੇਤ੍ਵਾ ਅਟ੍ਠਾਰਸਵਿਧਂ ਮਨਸਿਕਾਰਕੋਸਲ੍ਲਂ ਸਮ੍ਪਾਦੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਅਨੁਪੁਬ੍ਬਤੋ’’ਤਿਆਦਿਮਾਹ. ਤਤ੍ਥ ਅਪ੍ਪਨਾਤੋ ਤਯੋ ਚ ਸੁਤ੍ਤਨ੍ਤਾਤਿ ਇਮੇ ਚਤ੍ਤਾਰੋਪਿ ਨਯਤੋਵਾਗਤੇ ਨਾਤਿਸੀਘਾਦੀਸੁ ਪਕ੍ਖਿਪਿਤ੍ਵਾ ਦਸਵਿਧਤਾ ਵੇਦਿਤਬ੍ਬਾ. ਅਨੁਪੁਬ੍ਬਤੋਤਿ ਸਜ੍ਝਾਯਕਰਣਤੋ ਪਟ੍ਠਾਯ ਅਨੁਪਟਿਪਾਟਿਯਾ. ਨਾਤਿਸੀਘਂ ਨਾਤਿਸਣਿਕਂ ਕਤ੍ਵਾਤਿ ਕਿਰਿਯਾਵਿਸੇਸਨਂ. ਵਿਕ੍ਖੇਪਂ ਪਟਿਬਾਹਯਨ੍ਤਿ ਕਮ੍ਮਟ੍ਠਾਨਂ ਵਿਸ੍ਸਜ੍ਜੇਤ੍ਵਾ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇ ਚੇਤਸੋ ਵਿਕ੍ਖੇਪਂ ਪਟਿਬਾਹਨ੍ਤੋ. ਪਣ੍ਣਤ੍ਤਿਂ ਸਮਤਿਕ੍ਕਮ੍ਮਾਤਿ ਯਾਯਂ ‘‘ਕੇਸਾ ਲੋਮਾ’’ਤਿ ਪਣ੍ਣਤ੍ਤਿ, ਤਂ ਅਤਿਕ੍ਕਮਿਤ੍ਵਾ, ‘‘ਪਟਿਕ੍ਕੂਲ’’ਨ੍ਤਿ ਚਿਤ੍ਤਂ ਠਪੇਤ੍ਵਾਤਿ ਅਧਿਪ੍ਪਾਯੋ. ਅਨੁਪੁਬ੍ਬਤੋ ਮੁਞ੍ਚਨ੍ਤਸ੍ਸਾਤਿ ਯੋ ਯੋ ਕੋਟ੍ਠਾਸੋ ਨ ਉਪਟ੍ਠਾਤਿ, ਤਂ ਤਂ ਅਨੁਕ੍ਕਮੇਨ ਮੁਞ੍ਚਤੋ, ਤਸ੍ਸ ‘‘ਭਾਵਨਾ’’ਤਿ ਇਮਿਨਾ ਸਮ੍ਬਨ੍ਧੋ ਵੇਦਿਤਬ੍ਬੋ.

੪੬੭. ਏਵਂ ਉਭਯਕੋਸਲ੍ਲਂ ਸਮ੍ਪਾਦੇਤ੍ਵਾ ਸਬ੍ਬਕੋਟ੍ਠਾਸੇ ਵਣ੍ਣਾਦਿਵਸੇਨ ਵਵਤ੍ਥਪੇਤ੍ਵਾ ਵਣ੍ਣਾਦਿਵਸੇਨੇਵ ਪਞ੍ਚਧਾ ਪਟਿਕ੍ਕੂਲਤਾ ਵਵਤ੍ਥਪੇਤਬ੍ਬਾਤਿ ਦਸ੍ਸੇਤੁਂ ‘‘ਵਣ੍ਣਾ’’ਤਿਆਦਿਮਾਹ. ਵਣ੍ਣ…ਪੇ… ਓਕਾਸੇਹਿ ਕੋਟ੍ਠਾਸੇ ਪਟਿਕ੍ਕੂਲਾਤਿ ਭਾਵਨਾ ਅਸੁਭਨ੍ਤਿ ਯੋਜਨਾ. ਤਤ੍ਰ ਕੇਸਾ ਤਾਵ ਪਕਤਿਵਣ੍ਣੇਨ ਕਾਲ਼ਕਾ ਅਦ੍ਦਾਰਿਟ੍ਠਕਵਣ੍ਣਾ, ਸਣ੍ਠਾਨਤੋ ਦੀਘਵਟ੍ਟਤੁਲਾਦਣ੍ਡਸਣ੍ਠਾਨਾ, ਦਿਸਤੋ ਉਪਰਿਮਦਿਸਾਯ ਜਾਤਾ, ਓਕਾਸਤੋ ਉਭੋਸੁ ਪਸ੍ਸੇਸੁ ਕਣ੍ਣਚੂਲ਼ਿਕਾਹਿ, ਪੁਰਤੋ ਨਲ਼ਾਟਨ੍ਤੇਨ, ਪਚ੍ਛਤੋ ਗਲ਼ਵਾਟਕੇਨ ਪਰਿਚ੍ਛਿਨ੍ਨਾ, ਸੀਸਕਟਾਹਵੇਠਨਅਲ੍ਲਚਮ੍ਮਂ ਕੇਸਾਨਂ ਓਕਾਸੋ. ਪਰਿਚ੍ਛੇਦਤੋ ਕੇਸਾ ਸੀਸਵੇਠਨਚਮ੍ਮੇ ਵੀਹਗ੍ਗਮਤ੍ਤਂ ਪਵਿਸਿਤ੍ਵਾ ਪਤਿਟ੍ਠਿਤੇਨ ਹੇਟ੍ਠਾ ਅਤ੍ਤਨੋ ਮੂਲਤਲੇਨ, ਉਪਰਿ ਆਕਾਸੇਨ, ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾ. ਦ੍ਵੇ ਕੇਸਾ ਏਕਤੋ ਨਤ੍ਥੀਤਿ ਅਯਂ ਸਭਾਗਪਰਿਚ੍ਛੇਦੋ. ‘‘ਕੇਸਾ ਨ ਲੋਮਾ, ਲੋਮਾ ਨ ਕੇਸਾ’’ਤਿ ਏਵਂ ਅਵਸੇਸਏਕਤਿਂ ਸਕੋਟ੍ਠਾਸੇਹਿ ਅਮਿਸ੍ਸੀਕਤਾ ਕੇਸਾ ਨਾਮ ਪਾਟਿਯੇਕ੍ਕੋ ਏਕੋ ਕੋਟ੍ਠਾਸੋਤਿ ਅਯਂ ਵਿਸਭਾਗਪਰਿਚ੍ਛੇਦੋ. ਇਦਂ ਕੇਸਾਨਂ ਵਣ੍ਣਾਦਿਤੋ ਨਿਚ੍ਛਯਨਂ. ਇਦਂ ਪਨ ਨੇਸਂ ਵਣ੍ਣਾਦਿਵਸੇਨ ਪਞ੍ਚਧਾ ਪਟਿਕ੍ਕੂਲਤੋ ਨਿਚ੍ਛਯਨਂ – ਕੇਸਾ ਨਾਮੇਤੇ ਵਣ੍ਣਤੋਪਿ ਪਟਿਕ੍ਕੂਲਾ ਆਸਯਤੋਪਿ ਸਣ੍ਠਾਨਤੋਪਿ ਗਨ੍ਧਤੋਪਿ ਓਕਾਸਤੋਪਿ ਪਟਿਕ੍ਕੂਲਾਤਿ ਏਵਂ ਸੇਸਕੋਟ੍ਠਾਸਾਨਮ੍ਪਿ ਯਥਾਯੋਗਂ ਵੇਦਿਤਬ੍ਬਂ.

ਉਦ੍ਧੁਮਾਤਾਦਿਵਤ੍ਥੂਸੂਤਿ ਉਦ੍ਧੁਮਾਤਕਵਿਨੀਲਕਵਿਪੁਬ੍ਬਕਵਿਚ੍ਛਿਦ੍ਦਕਵਿਕ੍ਖਾਯਿਤਕਵਿਕ੍ਖਿਤ੍ਤਕਹਤਵਿ- ਕ੍ਖਿਤ੍ਤਕਲੋਹਿਤਕਪੁਲ਼ਵਕਅਟ੍ਠਿਕਸਙ੍ਖਾਤੇਸੁ ਦਸੇਸੁ ਅਵਿਞ੍ਞਾਣਕਅਸੁਭਵਤ੍ਥੂਸੁ ਅਸੁਭਾਕਾਰਂ ਗਹੇਤ੍ਵਾ ਪਵਤ੍ਤਾ ਭਾਵਨਾ ਵਾ ਅਸੁਭਨ੍ਤਿ ਸਮ੍ਬਨ੍ਧੋ. ਅਸੁਭਭਾਵਨਾ.

੪੬੮. ‘‘ਮਰਣਂ ਮੇ ਭਵਿਸ੍ਸਤੀ’’ਤਿ ਵਾ ‘‘ਜੀਵਿਤਂ ਮੇ ਉਪਰੁਜ੍ਝਤੀ’’ਤਿ ਵਾ ‘‘ਮਰਣਂ ਮਰਣ’’ਨ੍ਤਿ ਵਾ ਯੋਨਿਸੋ ਭਾਵਯਿਤ੍ਵਾਨਾਤਿ ਯੋਜਨਾ. ਜੀਵਿਤਨ੍ਤਿ ਰੂਪਜੀਵਿਤਿਨ੍ਦ੍ਰਿਯਞ੍ਚ ਅਰੂਪਜੀਵਿਤਿਨ੍ਦ੍ਰਿਯਞ੍ਚ. ਯੋਨਿਸੋਤਿ ਉਪਾਯੇਨ. ਏਵਂ ਪਵਤ੍ਤਯਤੋਯੇਵ ਹਿ ਏਕਚ੍ਚਸ੍ਸ ਨੀਵਰਣਾਨਿ ਵਿਕ੍ਖਮ੍ਭਨ੍ਤਿ, ਮਰਣਾਰਮ੍ਮਣਾ ਸਤਿ ਸਣ੍ਠਾਤਿ, ਉਪਚਾਰਪ੍ਪਤ੍ਤਮੇਵ ਕਮ੍ਮਟ੍ਠਾਨਂ ਹੋਤਿ.

੪੬੯-੪੭੦. ਯਸ੍ਸ ਪਨ ਏਤ੍ਤਾਵਤਾ ਨ ਹੋਤਿ, ਤੇਨ ਵਧਕਪਚ੍ਚੂਪਟ੍ਠਾਨਾਦੀਹਿ ਅਟ੍ਠਹਾਕਾਰੇਹਿ ਮਰਣਂ ਅਨੁਸ੍ਸਰਿਤਬ੍ਬਨ੍ਤਿ ਦਸ੍ਸੇਤੁਂ ‘‘ਵਧਕਸ੍ਸੇਵਾ’’ਤਿਆਦਿਮਾਹ. ਵਧਕਸ੍ਸ ਇਵ ਉਪਟ੍ਠਾਨਾਤਿ ‘‘ਇਮਸ੍ਸ ਸੀਸਂ ਛਿਨ੍ਦਿਸ੍ਸਾਮੀ’’ਤਿ ਅਸਿਂ ਗਹੇਤ੍ਵਾ ਗੀਵਾਯ ਸਞ੍ਚਾਰਯਮਾਨਸ੍ਸ ਵਧਕਸ੍ਸ ਵਿਯ ਮਰਣਸ੍ਸ ਉਪਟ੍ਠਾਨਤੋ. ਸਮ੍ਪਤ੍ਤੀਨਂ ਵਿਪਤ੍ਤਿਤੋਤਿ ਭੋਗਸਮ੍ਪਤ੍ਤਿਯਾ ਜੀਵਿਤਸਮ੍ਪਤ੍ਤਿਯਾ ਚ ਵਿਨਾਸਮਰਣਸਙ੍ਖਾਤਵਿਪਤ੍ਤਿਤੋ. ਉਪਸਂਹਰਤੋਤਿ ਯਸਮਹਤ੍ਤਤੋ ਪੁਞ੍ਞਮਹਤ੍ਤਤੋ ਥਾਮਮਹਤ੍ਤਤੋ ਇਦ੍ਧਿਮਹਤ੍ਤਤੋ ਪਞ੍ਞਾਮਹਤ੍ਤਤੋ ਪਚ੍ਚੇਕਬੁਦ੍ਧਤੋ ਸਮ੍ਮਾਸਮ੍ਬੁਦ੍ਧਤੋਤਿ ਇਮੇਹਿ ਸਤ੍ਤਹਾਕਾਰੇਹਿ ਅਤ੍ਤਨੋ ਉਪਸਂਹਰਣਤੋ. ਕਾਯਬਹੁਸਾਧਾਰਣਾਤਿ ਅਸੀਤਿਯਾ ਕਿਮਿਕੁਲਾਨਂ, ਅਨੇਕਸਤਾਨਂ ਰੋਗਾਨਂ, ਬਾਹਿਰਾਨਞ੍ਚ ਅਹਿਵਿਚ੍ਛਿਕਾਦੀਨਂ ਮਰਣਸ੍ਸ ਪਚ੍ਚਯਾਨਂ ਸਾਧਾਰਣਤੋ. ਆਯੁਦੁਬ੍ਬਲਤੋਤਿ ਅਸ੍ਸਾਸਪਸ੍ਸਾਸੂਪਨਿਬਦ੍ਧਤ੍ਤਇਰਿਯਾਪਥੂਪਨਿਬਦ੍ਧਤ੍ਤਾਦਿਨਾ ਆਯੁਨੋ ਦੁਬ੍ਬਲਤੋ. ਕਾਲਵਵਤ੍ਥਾਨਸ੍ਸ ਅਭਾਵਤੋਤਿ ‘‘ਇਮਸ੍ਮਿਂਯੇਵ ਕਾਲੇ ਮਰਿਤਬ੍ਬਂ, ਨ ਅਞ੍ਞਸ੍ਮਿ’’ਨ੍ਤਿ ਏਵਂ ਕਾਲਵਵਤ੍ਥਾਨਸ੍ਸ ਅਭਾਵਤੋ. ਅਦ੍ਧਾਨਸ੍ਸ ਪਰਿਚ੍ਛੇਦਾਤਿ ‘‘ਮਨੁਸ੍ਸਾਨਂ ਜੀਵਿਤਸ੍ਸ ਪਰਿਚ੍ਛੇਦੋ ਨਾਮ ਏਤਰਹਿ ਪਰਿਤ੍ਤੋ, ਅਦ੍ਧਾ ਯੋ ਚਿਰਂ ਜੀਵਤਿ, ਸੋ ਵਸ੍ਸਸਤਂ ਜੀਵਤੀ’’ਤਿ ਏਵਂ ਅਦ੍ਧਾਨਸ੍ਸ ਕਾਲਸ੍ਸ ਪਰਿਚ੍ਛੇਦਤੋ.

ਏਤ੍ਥ ਪਨ ਕਮ੍ਮਟ੍ਠਾਨਂ ਭਾਵੇਤ੍ਵਾ ਵਿਪਸ੍ਸਨਾਯ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਤੁਕਾਮੇਨ ਬੁਦ੍ਧਪੁਤ੍ਤੇਨ ਯਂ ਕਾਤਬ੍ਬਂ, ਤਂ ਆਦਿਕਮ੍ਮਿਕਸ੍ਸ ਕੁਲਪੁਤ੍ਤਸ੍ਸ ਵਸੇਨ ਆਦਿਤੋ ਪਟ੍ਠਾਯ ਸਙ੍ਖੇਪੇਨੋਪਦਿਸ੍ਸਾਮ. ਚਤੁਬ੍ਬਿਧਂ ਤਾਵ ਸੀਲਂ ਸੋਧੇਤਬ੍ਬਂ. ਤਤ੍ਥ ਤਿਵਿਧਾ ਵਿਸੁਜ੍ਝਨਾ ਅਨਾਪਜ੍ਜਨਂ, ਆਪਨ੍ਨਵੁਟ੍ਠਾਨਂ, ਕਿਲੇਸੇਹਿ ਚ ਅਪ੍ਪਟਿਪੀਲ਼ਨਂ. ਏਵਂ ਵਿਸੁਦ੍ਧਸੀਲਸ੍ਸ ਹਿ ਭਾਵਨਾ ਸਮ੍ਪਜ੍ਜਤਿ. ਯਮ੍ਪਿਦਂ ਚੇਤਿਯਙ੍ਗਣਵਤ੍ਤਾਦੀਨਂ ਵਸੇਨ ਆਭਿਸਮਾਚਾਰਿਕਸੀਲਂ ਵੁਚ੍ਚਤਿ, ਤਮ੍ਪਿ ਸਾਧੁਕਂ ਪਰਿਪੂਰੇਤਬ੍ਬਂ. ਤਤੋ –

‘‘ਆਵਾਸੋ ਚ ਕੁਲਂ ਲਾਭੋ, ਗਣੋ ਕਮ੍ਮਞ੍ਚ ਪਞ੍ਚਮਂ;

ਅਦ੍ਧਾਨਂ ਞਾਤਿ ਆਬਾਧੋ, ਗਨ੍ਥੋ ਇਦ੍ਧੀਤਿ ਤੇ ਦਸਾ’’ਤਿ. (ਵਿਸੁਦ੍ਧਿ. ੧.੪੧) –

ਏਵਂ ਵੁਤ੍ਤੇਸੁ ਦਸਸੁ ਪਲਿਬੋਧੇਸੁ ਯੋ ਪਲਿਬੋਧੋ, ਯੋ ਉਪਚ੍ਛਿਨ੍ਦਿਤਬ੍ਬੋ. ਏਵਂ ਉਪਚ੍ਛਿਨ੍ਨਪਲਿਬੋਧੇਨ –

‘‘ਪਿਯੋ ਗਰੁ ਭਾਵਨੀਯੋ, ਵਤ੍ਤਾ ਚ ਵਚਨਕ੍ਖਮੋ;

ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋ ਚਾਟ੍ਠਾਨੇ ਨਿਯੋਜਕੋ’’ਤਿ. (ਅ. ਨਿ. ੭.੩੭) –

ਏਵਂ ਵੁਤ੍ਤਲਕ੍ਖਣਂ ਆਚਰਿਯਂ ਉਪਸਙ੍ਕਮਿਤ੍ਵਾ ਕਮ੍ਮਟ੍ਠਾਨਂ ਉਗ੍ਗਹੇਤਬ੍ਬਂ. ਤਂ ਦੁਵਿਧਂ ਹੋਤਿ ਸਬ੍ਬਤ੍ਥਕਕਮ੍ਮਟ੍ਠਾਨਞ੍ਚ ਪਾਰਿਹਾਰਿਯਕਮ੍ਮਟ੍ਠਾਨਞ੍ਚ. ਤਤ੍ਥ ਸਬ੍ਬਤ੍ਥਕਕਮ੍ਮਟ੍ਠਾਨਂ ਨਾਮ ਭਿਕ੍ਖੁਸਙ੍ਘਾਦੀਸੁ ਮੇਤ੍ਤਾ, ਮਰਣਸ੍ਸਤਿ ਚ, ‘‘ਅਸੁਭਸਞ੍ਞਾ’’ਤਿਪਿ ਏਕੇ. ਏਤਂ ਪਨ ਤਯਂ ਸਬ੍ਬਤ੍ਥ ਅਤ੍ਥਯਿਤਬ੍ਬਂ ਇਚ੍ਛਿਤਬ੍ਬਨ੍ਤਿ ਕਤ੍ਵਾ, ਅਧਿਪ੍ਪੇਤਸ੍ਸ ਚ ਯੋਗਾਨੁਯੋਗਕਮ੍ਮਸ੍ਸ ਪਦਟ੍ਠਾਨਤ੍ਤਾ ‘‘ਸਬ੍ਬਤ੍ਥਕਕਮ੍ਮਟ੍ਠਾਨ’’ਨ੍ਤਿ ਵੁਚ੍ਚਤਿ. ਅਟ੍ਠਤਿਂਸਾਰਮ੍ਮਣੇਸੁ ਪਨ ਯਂ ਯਸ੍ਸ ਚਰਿਤਾਨੁਕੂਲਂ, ਤਂ ਤਸ੍ਸ ਨਿਚ੍ਚਂ ਪਰਿਹਰਿਤਬ੍ਬਤ੍ਤਾ ਯਥਾਵੁਤ੍ਤੇਨੇਵ ਨਯੇਨ ‘‘ਪਾਰਿਹਾਰਿਯਕਮ੍ਮਟ੍ਠਾਨ’’ਨ੍ਤਿ ਵੁਚ੍ਚਤਿ, ਤਤੋ –

‘‘ਮਹਾਵਾਸਂ ਨਵਾਵਾਸਂ, ਜਰਾਵਾਸਞ੍ਚ ਪਨ੍ਥਨਿਂ;

ਸੋਣ੍ਡਿਂ ਪਣ੍ਣਞ੍ਚ ਪੁਪ੍ਫਞ੍ਚ, ਫਲਂ ਪਤ੍ਥਿਤਮੇਵ ਚ.

‘‘ਨਗਰਂ ਦਾਰੁਨਾ ਖੇਤ੍ਤਂ, ਵਿਸਭਾਗੇਨ ਪਟ੍ਟਨਂ;

ਪਚ੍ਚਨ੍ਤਸੀਮਾਸਪ੍ਪਾਯਂ, ਯਤ੍ਥ ਮਿਤ੍ਤੋ ਨ ਲਬ੍ਭਤਿ.

‘‘ਅਟ੍ਠਾਰਸੇਤਾਨਿ ਠਾਨਾਨਿ, ਇਤਿ ਵਿਞ੍ਞਾਯ ਪਣ੍ਡਿਤੋ;

ਆਰਕਾ ਪਰਿਵਜ੍ਜੇਯ੍ਯ, ਮਗ੍ਗਂ ਸਪ੍ਪਟਿਭਯਂ ਯਥਾ’’ਤਿ. (ਵਿਸੁਦ੍ਧਿ. ੧.੫੨) –

ਵੁਤ੍ਤਅਟ੍ਠਾਰਸਸੇਨਾਸਨਦੋਸਵਜ੍ਜਿਤਂ ‘‘ਇਧ, ਭਿਕ੍ਖਵੇ, ਸੇਨਾਸਨਂ ਨਾਤਿਦੂਰਂ ਹੋਤਿ ਨਚ੍ਚਾਸਨ੍ਨਂ ਗਮਨਾਗਮਨਸਮ੍ਪਨ੍ਨਂ ਦਿਵਾ ਅਪ੍ਪਾਕਿਣ੍ਣਂ ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਂ ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਂ. ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ ਅਪ੍ਪਕਸਿਰੇਨੇਵ ਉਪ੍ਪਜ੍ਜਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ. ਤਸ੍ਮਿਂ ਖੋ ਪਨ ਸੇਨਾਸਨੇ ਥੇਰਾ ਭਿਕ੍ਖੂ ਵਿਹਰਨ੍ਤਿ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਵਿਨਯਧਰਾ ਮਾਤਿਕਾਧਰਾ. ਤੇ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਪਰਿਪੁਚ੍ਛਤਿ ਪਰਿਪਞ੍ਹਤਿ ‘ਇਦਂ ਭਨ੍ਤੇ ਕਥਂ, ਇਮਸ੍ਸ ਕੋ ਅਤ੍ਥੋ’ਤਿ. ਤਸ੍ਸ ਤੇ ਆਯਸ੍ਮਨ੍ਤੋ ਅਵਿਵਟਞ੍ਚੇਵ ਵਿਵਰਨ੍ਤਿ, ਅਨੁਤ੍ਤਾਨੀਕਤਞ੍ਚ ਉਤ੍ਤਾਨਿਂ ਕਰੋਨ੍ਤਿ, ਅਨੇਕਵਿਹਿਤੇਸੁ ਚ ਕਙ੍ਖਾਠਾਨੀਯੇਸੁ ਧਮ੍ਮੇਸੁ ਕਙ੍ਖਂ ਪਟਿਵਿਨੋਦੇਨ੍ਤਿ. ਏਵਂ ਖੋ, ਭਿਕ੍ਖਵੇ, ਸੇਨਾਸਨਂ ਪਞ੍ਚਙ੍ਗਸਮਨ੍ਨਾਗਤਂ ਹੋਤੀ’’ਤਿ (ਅ. ਨਿ. ੧੦.੧੧) ਵੁਤ੍ਤਪਞ੍ਚਙ੍ਗਸਮਨ੍ਨਾਗਤਂ ਸੇਨਾਸਨਂ ਉਪਗਮ੍ਮ ਤਤ੍ਥ ਵਸਨ੍ਤੇਨ ‘‘ਦੀਘਾਨਿ ਕੇਸਲੋਮਨਖਾਨਿ ਛਿਨ੍ਦਿਤਬ੍ਬਾਨਿ, ਜਿਣ੍ਣਚੀਵਰੇਸੁ ਅਗ੍ਗਲ਼ਅਨੁਵਾਤਪਰਿਭਣ੍ਡਦਾਨਾਦਿਨਾ ਦਲ਼੍ਹੀਕਮ੍ਮਂ ਵਾ ਤਨ੍ਤਚ੍ਛੇਦਾਦੀਸੁ ਤੁਨ੍ਨਕਮ੍ਮਂ ਵਾ ਕਾਤਬ੍ਬਂ, ਕਿਲਿਟ੍ਠਾਨਿ ਰਜਿਤਬ੍ਬਾਨਿ, ਸਚੇ ਪਤ੍ਤੇ ਮਲਂ ਹੋਤਿ, ਪਤ੍ਤੋ ਪਚਿਤਬ੍ਬੋ, ਮਞ੍ਚਪੀਠਾਦੀਨਿ ਸੋਧੇਤਬ੍ਬਾਨੀ’’ਤਿ ਏਵਂ ਵੁਤ੍ਤਉਪਚ੍ਛਿਨ੍ਨਖੁਦ੍ਦਕਪਲਿਬੋਧੇਨ ਕਤਭਤ੍ਤਕਿਚ੍ਚੇਨ ਭਤ੍ਤਸਮ੍ਮਦਂ ਵਿਨੋਦੇਤ੍ਵਾ ਰਤਨਤ੍ਤਯਗੁਣਾਨੁਸ੍ਸਰਣੇਨ ਚਿਤ੍ਤਂ ਸਮ੍ਪਹਂਸੇਤ੍ਵਾ ਆਚਰਿਯੁਗ੍ਗਹਤੋ ਏਕਪਦਮ੍ਪਿ ਅਸਮ੍ਮੁਯ੍ਹਨ੍ਤੇਨ ਮਨਸਿ ਕਾਤਬ੍ਬਨ੍ਤਿ.

ਚਤੁਰਾਰਕ੍ਖਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੫੦. ਵਿਪਸ੍ਸਨਾਨਿਦ੍ਦੇਸਵਣ੍ਣਨਾ

੪੭੧-੨. ਨਾਮਰੂਪਨ੍ਤਿ ਚਿਤ੍ਤਚੇਤਸਿਕਸਙ੍ਖਾਤਂ ਨਾਮਞ੍ਚ ਅਟ੍ਠਵੀਸਤਿਵਿਧਂ ਰੂਪਞ੍ਚ. ‘‘ਨਮਨਲਕ੍ਖਣਂ ਨਾਮਂ, ਰੁਪ੍ਪਨਲਕ੍ਖਣਂ ਰੂਪਂ, ਨਾਮਰੂਪਤੋ ਨ ਅਞ੍ਞੋ ਅਤ੍ਤਾਦਿਕੋ ਕੋਚਿ ਅਤ੍ਥੀ’’ਤਿ ਏਵਂ ਝਾਨਲਾਭੀ ਚੇ, ਝਾਨਤੋ ਵੁਟ੍ਠਾਯ ਝਾਨਗਤਂ ਵਾ ਵਿਪਸ੍ਸਨਾਯਾਨਿਕੋ ਚੇ, ਪਕਿਣ੍ਣਕਭੂਤਂ ਨਾਮਰੂਪਂ ਪਰਿਗ੍ਗਹੇਤ੍ਵਾ. ਪਾਤਿਮੋਕ੍ਖਸਂਵਰਾਦਿ ਸੀਲਵਿਸੁਦ੍ਧਿ, ਚਤੁਰਾਰਕ੍ਖਵਸੇਨ ਦੀਪਿਤਾ ਸੋਪਚਾਰਸਮਾਧਿਸਙ੍ਖਾਤਾ ਚਿਤ੍ਤਵਿਸੁਦ੍ਧਿ ਚ ਵੁਤ੍ਤਾਵ ਨਾਮਾਤਿ ਇਮਿਨਾ ਦਿਟ੍ਠਿਵਿਸੁਦ੍ਧਿ ਕਥਿਤਾ. ਤਤੋ ਤਸ੍ਸ ਪਚ੍ਚਯਞ੍ਚ ਪਰਿਗ੍ਗਹੇਤ੍ਵਾਤਿ ਸਮ੍ਬਨ੍ਧੋ. ਤਸ੍ਸ ਪਚ੍ਚਯਨ੍ਤਿ ‘‘ਪਟਿਸਨ੍ਧਿਕ੍ਖਣੇ ਨਾਮਰੂਪਦ੍ਵਯਮੇਵ ਅਵਿਜ੍ਜਾਤਣ੍ਹਾਉਪਾਦਾਨਕਮ੍ਮੇਹਿ ਉਪ੍ਪਜ੍ਜਤਿ, ਨ ਇਸ੍ਸਰਾਦਿਕਾਰਣੇਨਾ’’ਤਿਆਦਿਨਾ ਤਸ੍ਸ ਕਾਰਣਂ, ਇਮਿਨਾ ਕਙ੍ਖਾਵਿਤਰਣਵਿਸੁਦ੍ਧਿ ਦਸ੍ਸਿਤਾ.

ਹੁਤ੍ਵਾ ਅਭਾਵਤੋ ਅਨਿਚ੍ਚਾਤਿ ਸਬ੍ਬੇਪਿ ਨਾਮਰੂਪਸਙ੍ਖਾਰਾ ਉਪ੍ਪਜ੍ਜਿਤ੍ਵਾ ਅਭਾਵਾਪਜ੍ਜਨਤੋ ਅਨਿਚ੍ਚਾ. ਉਦਯਬ੍ਬਯਪੀਲ਼ਨਾ ਦੁਕ੍ਖਾਤਿ ਉਪ੍ਪਾਦਨਿਰੋਧਵਸੇਨ ਪੀਲ਼ਨਤੋ ਦੁਕ੍ਖਾ. ਅਵਸਵਤ੍ਤਿਤ੍ਤਾ ਅਨਤ੍ਤਾਤਿ ਅਤ੍ਤਨੋ ਵਸੇ ਅਵਤ੍ਤਨਤੋ ਅਨਤ੍ਤਾਤਿ ਏਵਂ ਸਙ੍ਖਾਰੇਹਿ ਸਦ੍ਧਿਂ ਤਿਲਕ੍ਖਣਂ ਆਰੋਪੇਤ੍ਵਾ. ਪੁਨਪ੍ਪੁਨਂ ਸਮ੍ਮਸਨ੍ਤੋਤਿ ਯਥਾਵੁਤ੍ਤਨਯੇਨ ਸਮ੍ਮਸਨ੍ਤੋ ਸਮਥਯਾਨਿਕੋ ਵਿਪਸ੍ਸਨਾਯਾਨਿਕੋ ਚ ਯੋਗਾਵਚਰੋ. ਇਮਿਨਾ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿ, ਪਟਿਪਦਾਞਾਣਦਸ੍ਸਨਵਿਸੁਦ੍ਧਿ ਚ ਦਸ੍ਸਿਤਾ. ਸਙ੍ਖਾਰਾਨਮੇਵ ਹਿ ਉਦਯਬ੍ਬਯਾਦਿਨਾਨੁਪਸ੍ਸਨਤੋ ਉਦਯਬ੍ਬਯਭਙ੍ਗਭਯਆਦੀਨਵਨਿਬ੍ਬਿਦਾਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਨੁਪਸ੍ਸਨਾਸ- ਙ੍ਖਾਰੁਪੇਕ੍ਖਾਞਾਣਸਙ੍ਖਾਤਸ੍ਸ ਅਟ੍ਠਵਿਧਸ੍ਸ ਞਾਣਸ੍ਸ ਵਸੇਨ ਸਿਖਾਪ੍ਪਤ੍ਤਂ ਵਿਪਸ੍ਸਨਾਞਾਣਂ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿ ਨਾਮ. ਅਨੁਪੁਬ੍ਬੇਨ ਸਬ੍ਬਸਂਯੋਜਨਕ੍ਖਯਂ ਪਾਪੁਣੇਯ੍ਯਾਤਿ ਇਮਿਨਾ ਞਾਣਦਸ੍ਸਨਵਿਸੁਦ੍ਧਿ ਦਸ੍ਸਿਤਾ. ਸਬ੍ਬਸਂਯੋਜਨਕ੍ਖਯਨ੍ਤਿ ਓਰਮ੍ਭਾਗਿਯਾਨਂ ਪਞ੍ਚਨ੍ਨਂ ਸਂਯੋਜਨਾਨਂ ਹੇਟ੍ਠਾ ਮਗ੍ਗਤ੍ਤਯੇਨ ਖੇਪਿਤਤ੍ਤਾ, ਇਤਰੇਸਂ ਉਦ੍ਧਮ੍ਭਾਗਿਯਾਨਂ ਸਂਯੋਜਨਾਨਂ ਖੇਪਿਤਤ੍ਤਾ ਚ ਸਬ੍ਬੇਸਂ ਸਂਯੋਜਨਾਨਂ ਖਯਨ੍ਤੇ ਜਾਤਂ ਅਰਹਤ੍ਤਮਗ੍ਗਂ.

ਨਿਗਮਨਕਥਾਵਣ੍ਣਨਾ

੪੭੩. ਯਸ੍ਮਾ ਕਾਰਣਾ ਯਾ ਸਿਕ੍ਖਨਾ, ਅਯਂ ਭਿਕ੍ਖੁਕਿਚ੍ਚਂ, ਅਤੋ ਤਸ੍ਮਾ ਕਾਰਣਾਤਿ ਅਤ੍ਥੋ.

੪੭੪. ਨਿਚ੍ਚਸੋ ਲੋਕਵਿਚਾਰਿਨੋਤਿ ਨਿਚ੍ਚਂ ਲੋਕੇ ਵਿਚਰਤੋ. ਮਾਲੁਤਸ੍ਸੇਵ ਪਰਿਸ੍ਸਮੋ ਨ ਸਮ੍ਭੋਤੀਤਿ ਯੋਜਨਾ. ਮਾਲੁਤਸ੍ਸੇਵਾਤਿ ਵਾਤਸ੍ਸ ਇਵ. ਨ ਸਮ੍ਭੋਤੀਤਿ ਨ ਹੋਤਿ.

੪੭੫-੬. ਤਮ੍ਬਪਣ੍ਣਿ ਏਵ ਤਮ੍ਬਪਣ੍ਣਿਯੋ, ਕੇਤੁ ਵਿਯ ਕੇਤੁ, ਤਮ੍ਬਪਣ੍ਣਿਯੇ ਕੇਤੂਤਿ ਤਪ੍ਪੁਰਿਸੋ. ਤੇਨ ਰਚਿਤਾ ਧਮ੍ਮਵਿਨਯਞ੍ਞੁਪਸਂਸਿਤਾ ਅਯਂ ਖੁਦ੍ਦਸਿਕ੍ਖਾ ਪਰਿਮਾਣਤੋ ਗਾਥਾਨਂ ਪਞ੍ਚਮਤ੍ਤੇਹਿ ਸਤੇਹਿ ਏਤ੍ਤਾਵਤਾ ਨਿਟ੍ਠਾਨਮੁਪਾਗਤਾਤਿ ਸਮ੍ਬਨ੍ਧੋ.

ਨਿਗਮਨਕਥਾਵਣ੍ਣਨਾ ਨਿਟ੍ਠਿਤਾ.

ਨਿਗਮਨਕਥਾ

ਕਾਰਾਪਿਤੇਤਿਰੁਚਿਰੇ ਪਵਰੇ ਵਿਹਾਰੇ;

ਮਾਨਾਧਿਕਾਰਿਪੁਰਿਨਾ ਗਰੁਨਾ ਗੁਣੇਨ;

ਵਸ੍ਸਂ ਵਸਂ ਦਮਿਲ਼ਸੋ ਵਿਧਹਂ ਅਕਾਸਿਂ;

ਆਕਙ੍ਖਟੀਕ ਜਿਨਸਾਸਨਸਮ੍ਪਵੁਦ੍ਧਿਂ.

ਪੁਞ੍ਞੇਨ ਸਤ੍ਥਰਚਨਾਜਨਿਤੇਨ ਤੇਨ;

ਸਮ੍ਬੁਦ੍ਧਸਾਸਨਵਰੋਦਯਕਾਰਣੇਨ;

ਲੋਕਾਮਿਸੇਸੁ ਪਨ ਮੇ ਸਮਯਂ ਅਲਗ੍ਗੋ;

ਸਮ੍ਬੁਦ੍ਧਸਾਸਨਵਰੋਦਯਮਾਚਰੇਯ੍ਯਂ.

ਅਤ੍ਥੇਸੁ ਅਕ੍ਖਰਪਦੇਸੁ ਵਿਨਿਚ੍ਛਯੇਸੁ;

ਪੁਬ੍ਬਾਪਰੇਸੁ ਲਿਖਿਤਂ ਖਲਿਤਂ ਯਦਤ੍ਥਿ;

ਓਹਾਯ ਖਨ੍ਤੁਮਰਹਨ੍ਤਿ ਵਦਨ੍ਤੁ ਸਨ੍ਤਾ;

ਦਿਟ੍ਠਾਪਰਾਧਮਥ ਵਾ ਕਿਮੁਲਾਲਨੇਨ.

ਯੇਨਨ੍ਤਤਨ੍ਤਰਤਨਾਕਰਮਨ੍ਥਨੇਨ;

ਮਨ੍ਥਾਚਲੋਲ੍ਲਸਿਤਞਾਣਵਰੇਨ ਲਦ੍ਧਾ;

ਸਾਰਾਮਤਾਤਿਸੁਖਿਤਾ ਸੁਖਯਨ੍ਤਿ ਚਞ੍ਞੇ;

ਤੇ ਮੇ ਜਯਨ੍ਤਿ ਗਰਵੋ ਗਰਵੋ ਗੁਣੇਹਿ.

ਪਰਤ੍ਥਸਮ੍ਪਾਦਨਤੋ, ਪੁਞ੍ਞੇਨਾਧਿਗਤੇਨਹਂ;

ਪਰਤ੍ਥਸਮ੍ਪਾਦਨਕੋ, ਭਵੇਯ੍ਯਂ ਜਾਤਿਜਾਤਿਯਂ.

ਸਿਸ੍ਸੋ ਆਹ –

ਪਰਮਪ੍ਪਿਚ੍ਛਤਾਨੇਕਸਨ੍ਤੋਸੋਪਸਮੇਸਿਨਂ;

ਸੁਚਿਸਲ੍ਲੇਖਵੁਤ੍ਤੀਨਂ, ਸਦਾਰਞ੍ਞਨਿਵਾਸਿਨਂ.

ਸਾਸਨੁਜ੍ਜੋਤਕਾਰੀਨਂ, ਆਚੇਰਤ੍ਤਮੁਪਾਗਤਂ;

ਉਦੁਮ੍ਬਰਗਿਰਿਖ੍ਯਾਤਯਤੀਨਂ ਯਤਿਪੁਙ੍ਗਵਂ.