੩੯. ਵਸ੍ਸੂਪਨਾਯਿਕਨਿਦ੍ਦੇਸਵਣ੍ਣਨਾ

੩੦੯-੩੧੦. ਪੁਰਿਮਿਕਾ ਪਚ੍ਛਿਮਿਕਾ ਇਤਿ ਵਸ੍ਸੂਪਨਾਯਿਕਾ ਦੁਵੇਤਿ ਸਮ੍ਬਨ੍ਧੋ. ਆਸਾਲ਼੍ਹਿਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ ਉਪਗਨ੍ਤਬ੍ਬਾ ਪਚ੍ਛਿਮਿਕਾਯ ਪੁਰੇ ਭਵਾਤਿ ਪੁਰਿਮਾ, ਸਾ ਏਵ ਪੁਰਿਮਿਕਾ. ਤਤੋ ਪਚ੍ਛਾ ਭਵਾ ਅਪਰਾਯ ਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ ਉਪਗਨ੍ਤਬ੍ਬਾ ਪਚ੍ਛਿਮਿਕਾ. ਉਪਨਯਨਂ ਪਾਪੁਣਨਂ ਉਪਗਮਨਂ ਉਪਨਾਯਿਕਾ, ਵਸ੍ਸਨ੍ਤਿ ਵੁਟ੍ਠਿ, ਇਧ ਪਨ ਵਸ੍ਸਕਾਲਂ ‘‘ਵਸ੍ਸ’’ਨ੍ਤਿ ਉਪਚਾਰੇਨ ਗਹੇਤ੍ਵਾ ਤਤ੍ਥ ਵਾਸੋ ਉਪਚਾਰੇਨੇਵ ‘‘ਵਸ੍ਸ’’ਨ੍ਤਿ ਵੁਚ੍ਚਤਿ, ਵਸ੍ਸਸ੍ਸ ਵਸ੍ਸਾਵਾਸਸ੍ਸ ਉਪਨਾਯਿਕਾ ਵਚੀਭੇਦਵਸੇਨ ਵਾ ਆਲਯਕਰਣਵਸੇਨ ਵਾ ਉਪਗਮਨਂ ਵਸ੍ਸੂਪਨਾਯਿਕਾ. ਤਤ੍ਥ ਆਲਯਪਰਿਗ੍ਗਾਹੋ ਚ ਵਚੀਭੇਦੋ ਚਾਤਿ ਪੁਰਿਮਿਕਾ ਵਸ੍ਸੂਪਨਾਯਿਕਾ ਦੁਵੇ, ਆਲਯਪਰਿਗ੍ਗਾਹੋ ਚ ਵਚੀਭੇਦੋ ਚਾਤਿ ਪਚ੍ਛਿਮਿਕਾ ਵਸ੍ਸੂਪਨਾਯਿਕਾ ਦੁਵੇਭਿ ਸਮ੍ਬਨ੍ਧਿਤਬ੍ਬਂ. ਤਤ੍ਥਾਤਿ ਤਾਸੁ ਦ੍ਵੀਸੁ. ਤਦੁਭਯਂ ਦਸ੍ਸੇਤੁਂ ‘‘ਏਦਿਸੋ’’ਤਿਆਦਿ ਵੁਤ੍ਤਂ. ਸੋ ਆਲਯਪਰਿਗ੍ਗਾਹੋ ਚ ਵਚੀਭੇਦੋ ਚ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮਿ, ਇਧ ਵਸ੍ਸਂ ਉਪੇਮੀ’’ਤਿ ਏਦਿਸੋ, ਏਤਾਦਿਸੋਤਿ ਅਤ੍ਥੋ. ਏਤ੍ਥ ਚ ਕਮੁਪ੍ਪਤ੍ਤਿਅਨਾਦਰਾ ਵਚੀਭੇਦੋ ਪਠਮਂ ਵੁਤ੍ਤੋ. ਉਭਯਥਾ ਵਸ੍ਸਂ ਉਪਗਨ੍ਤੁਂ ਵਟ੍ਟਤਿ. ਤੇਨੇਵ ਅਟ੍ਠਕਥਾਯਂ (ਵਿ. ਸਙ੍ਗ. ਅਟ੍ਠ. ੧੭੯; ਮਹਾਵ. ਅਟ੍ਠ. ੨੦੭) ‘‘ਸਚੇਪਿ ‘ਇਧ ਵਸ੍ਸਂ ਵਸਿਸ੍ਸਾਮੀ’ਤਿ ਆਲਯੋ ਅਤ੍ਥਿ, ਅਸਤਿਯਾ ਪਨ ਵਸ੍ਸਂ ਨ ਉਪੇਤਿ, ਗਹਿਤਸੇਨਾਸਨਂ ਸੁਗ੍ਗਹਿਤਂ, ਛਿਨ੍ਨਵਸ੍ਸੋ ਨ ਹੋਤਿ, ਪਵਾਰੇਤੁਂ ਲਭਤਿਯੇਵ, ਵਿਨਾਪਿ ਹਿ ਵਚੀਭੇਦਂ ਆਲਯਕਰਣਮਤ੍ਤੇਨਪਿ ਵਸ੍ਸਂ ਉਪਗਤਮੇਵ ਹੋਤੀ’’ਤਿ ਵੁਤ੍ਤਂ. ਨਾਵਾਸਤ੍ਥਵਜੇਸੁ ਪਨ ਪਰਿਯੇਸਿਤ੍ਵਾ ਸੇਨਾਸਨਂ ਅਲਭਨ੍ਤੇਨ ਆਲਯਕਰਣਮਤ੍ਤੇਨੇਵ ਉਪਗਨ੍ਤਬ੍ਬਂ. ਉਪਗਚ੍ਛਨ੍ਤੇਨ ਚ ਵਿਹਾਰਂ ਪਟਿਜਗ੍ਗਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ਸਬ੍ਬਂ ਚੇਤਿਯਵਨ੍ਦਨਾਦਿਸਾਮੀਚਿਕਮ੍ਮਂ ਨਿਟ੍ਠਾਪੇਤ੍ਵਾ ਉਪਗਨ੍ਤਬ੍ਬਂ. ਆਲਯਪਰਿਗ੍ਗਹੇ ਆਲਯਂ ਦਸ੍ਸੇਤੁਂ ‘‘ਚਿਤ੍ਤੁਪ੍ਪਾਦੇਤ੍ਥ ਆਲਯੋ’’ਤਿ ਆਹ. ਏਤ੍ਥਾਤਿ ਦ੍ਵੀਸੁ.

੩੧੧. ਤਦਹੂਤਿ ਤਸ੍ਮਿਂ ਵਸ੍ਸੂਪਨਾਯਿਕਦਿਵਸੇ. ਜਾਨਨ੍ਤਿ ‘‘ਅਜ੍ਜ ਵਸ੍ਸੂਪਨਾਯਿਕਾ’’ਤਿ ਜਾਨਨ੍ਤੋ, ਅਨੁਪਗਚ੍ਛਤੋਤਿਮਸ੍ਸ ਵਿਸੇਸਨਂ.

੩੧੨. ਦੁਤਿਯਨ੍ਤਿ ਪਚ੍ਛਿਮਿਕਂ. ਅਨੁਪਗਤੋਤਿ ਕੇਨਚਿ ਅਨ੍ਤਰਾਯੇਨ ਪੁਰਿਮਿਕਂ ਅਨੁਪਗਤੋ. ਤੇਮਾਸਨ੍ਤਿ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ. ਵਸ੍ਸਂ ਉਪਗਨ੍ਤ੍ਵਾ ਪਨ ਅਰੁਣਂ ਅਨੁਟ੍ਠਾਪੇਤ੍ਵਾਪਿ ਤਦਹੇਵ ਸਤ੍ਤਾਹਕਰਣੀਯੇਨ ਪਕ੍ਕਮਨ੍ਤਸ੍ਸਾਪਿ ਅਨ੍ਤੋਸਤ੍ਤਾਹੇ ਨਿਵਤ੍ਤੇਨ੍ਤਸ੍ਸਾਪਿ ਅਨਾਪਤ੍ਤਿ.

੩੧੩-੫. ਮਾਤਾਪਿਤੂਨਂ ਪਞ੍ਚਨ੍ਨਂ ਸਹਧਮ੍ਮਿਕਾਨਞ੍ਚ ਅਤ੍ਥਾਯ ਗਿਲਾਨਤਦੁਪਟ੍ਠਾਕਭਤ੍ਤਂ ਓਸਧਞ੍ਚ ਏਸਿਸ੍ਸਂ ਵਾ ਪੁਚ੍ਛਿਸ੍ਸਾਮਿ ਵਾ ਉਪਟ੍ਠਿਸ੍ਸਂ ਵਾ ਗਨ੍ਤ੍ਵਾ ਅਹਂ ਨਾਭਿਰਤਂ ਵੂਪਕਾਸੇਸ੍ਸਂ ਵਾ ਕੁਕ੍ਕੁਚ੍ਚਂ ਵਿਨੋਦਨਞ੍ਚ ਦਿਟ੍ਠਿਂ ਵਿਵੇਚਨਞ੍ਚ ਗਰੁਕਾਦਿਕਂ ਵੁਟ੍ਠਾਨਂ ਵਾਪਿ ਉਸ੍ਸੁਕ੍ਕਂ ਵਾਪਿ ਕਰਿਸ੍ਸਂ ਵਾਪਿ ਕਾਰੇਸ੍ਸਂ ਵਾਪੀਤਿ ਏਵਮਾਦਿਨਾ ਸਤ੍ਤਾਹਕਿਚ੍ਚੇਨ ਪਹਿਤੇਪਿ ਵਾ ਅਪਹਿਤੇਪਿ ਵਾ ਗਨ੍ਤੁਂ ਲਬ੍ਭਨ੍ਤਿ ਯੋਜਨਾ.

ਏਤ੍ਥ ਪਨ ਲਬ੍ਭਮਾਨਕਵਸੇਨ ਯੋਜੇਤ੍ਵਾ ਵਕ੍ਖਮਾਨਨਯੇਨ ਅਤ੍ਥੋ ਵੇਦਿਤਬ੍ਬੋ. ਮਾਤਾਦਿਸੁਤਿਯਾ ਤੇਯੇਵ ਗਿਲਾਨ-ਸਦ੍ਦੇਨ ਗਯ੍ਹਨ੍ਤਿ, ਤੇਸਂ ਉਪਟ੍ਠਾਕਾ ਤਦੁਪਟ੍ਠਾਕਾ, ਗਿਲਾਨਾ ਚ ਤਦੁਪਟ੍ਠਾਕਾ ਚ, ਤੇਸਂ ਭਤ੍ਤਨ੍ਤਿ ਸਮਾਸੋ. ਓਸਧਨ੍ਤਿ ਤੇਸਂਯੇਵ ਗਿਲਾਨਾਨਂ ਭੇਸਜ੍ਜਂ. ਏਸਿਸ੍ਸਨ੍ਤਿ ਪਰਿਯੇਸਿਸ੍ਸਾਮਿ. ਪੁਚ੍ਛਿਸ੍ਸਾਮੀਤਿ ਤੇਯੇਵ ਸਤ੍ਤਜਨੇ ਗਿਲਾਨੇ ਪੁਚ੍ਛਿਸ੍ਸਂ. ਉਪਟ੍ਠਿਸ੍ਸਨ੍ਤਿ ਤੇਯੇਵ ਗਿਲਾਨੇ ਉਪਟ੍ਠਹਿਸ੍ਸਾਮਿ. ਅਭਿਰਮਤੀਤਿ ਅਭਿਰਤੋ, ਵਿਸਭਾਗਰੂਪਾਦਿਦਸ੍ਸਨੇਨ ਸਾਸਨੇ ਨ ਅਭਿਰਤੋ ਨਾਭਿਰਤੋ. ਅਭਿਰਮਣਂ ਵਾ ਅਭਿਰਤਂ, ਨਤ੍ਥਿ ਅਭਿਰਤਮਸ੍ਸਾਤਿ ਨਾਭਿਰਤੋ, ਤਂ. ਸਹਧਮ੍ਮਿਕੇਸੁ ਯੋ ਨਾਭਿਰਤੋ, ਤਂ ਵੂਪਕਾਸੇਸ੍ਸਂ ਵਿਕ੍ਖੇਪਹਰਣਤ੍ਥਂ ਅਞ੍ਞਤ੍ਥ ਨਯਿਸ੍ਸਾਮਿ. ਕੁਕ੍ਕੁਚ੍ਚਨ੍ਤਿ ਪਞ੍ਚਨ੍ਨਂਯੇਵ ਉਪ੍ਪਨ੍ਨਂ ਵਿਨਯਕੁਕ੍ਕੁਚ੍ਚਂ. ਕਿਤਕਯੋਗੇ ਵਿਕਪ੍ਪੇਨ ਦੁਤਿਯਾ. ਦਿਟ੍ਠਿਨ੍ਤਿ ਤੇਸਂਯੇਵ ਮਿਚ੍ਛਾਦਿਟ੍ਠਿਯਾ. ਗਰੁਕਮਾਦਿਕਨ੍ਤਿ ਗਰੁਕਂ ਆਦਿ ਯਸ੍ਸਾਤਿ ਵਿਗ੍ਗਹੋ. ਆਦਿ-ਸਦ੍ਦੇਨ ਸਾਮਣੇਰਾਨਂ ਵਸ੍ਸਪੁਚ੍ਛਨਂ, ਸਿਕ੍ਖਾਸਮਾਦਯਿਤੁਕਾਮਤਾ, ਤਜ੍ਜਨੀਯਾਦਿਕਮ੍ਮਕਰਣਂ ਸਙ੍ਗਹਿਤਂ. ਵੁਟ੍ਠਾਨਨ੍ਤਿ ਭਿਕ੍ਖੁਨੋ ਗਰੁਕਾਪਤ੍ਤਿਯਾ ਪਰਿਵਾਸਮਾਨਤ੍ਤਦਾਨਾਦੀਹਿ ਵੁਟ੍ਠਾਨਂ. ਉਸ੍ਸੁਕ੍ਕਨ੍ਤਿ ਵਸ੍ਸਪੁਚ੍ਛਨਾਦਿਉਸ੍ਸੁਕ੍ਕਂ. ਏਵਮਾਦਿਨਾਤਿ ਏਤ੍ਥ ਆਦਿ-ਸਦ੍ਦੇਨ ਦਿਟ੍ਠਿਗਤਾਦੀਨਂ ਧਮ੍ਮਕਥਾਕਰਣਾਦਿਂ ਸਙ੍ਗਣ੍ਹਾਤਿ. ਗਨ੍ਤੁਂ ਲਬ੍ਭਨ੍ਤਿ ਏਤ੍ਥ ਗਚ੍ਛਨ੍ਤੇਨ ਅਨ੍ਤੋਉਪਚਾਰਸੀਮਾਯਂ ਠਿਤੇਨੇਵ ‘‘ਅਨ੍ਤੋਸਤ੍ਤਾਹੇ ਆਗਚ੍ਛਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਗਨ੍ਤਬ੍ਬਂ. ਸਚੇ ਆਭੋਗਂ ਅਕਤ੍ਵਾ ਉਪਚਾਰਸੀਮਂ ਅਤਿਕ੍ਕਮਤਿ, ਛਿਨ੍ਨਵਸ੍ਸੋ ਹੋਤੀਤਿ ਵਦਨ੍ਤਿ. ਸਤ੍ਤਾਹਕਿਚ੍ਚੇਨਾਤਿ ਸਤ੍ਤਾਹਸ੍ਸ ਲਬ੍ਭਮਾਨਕਂ ਵੁਤ੍ਤਂ ਵਕ੍ਖਮਾਨਞ੍ਚ ਸਙ੍ਘਕਮ੍ਮਾਦਿ ਕਿਚ੍ਚਂ ਸਤ੍ਤਾਹਕਿਚ੍ਚਂ. ਸਤ੍ਤਮਅਰੁਣਮਤ੍ਤਸ੍ਸੇਵ ਵਿਹਾਰੇ ਉਟ੍ਠਾਪਨੀਯਤ੍ਤਾ ਸਤ੍ਤਾਹਸ੍ਸ ਸਾਕਲ੍ਲੇਨ ਗਹਣਂ.

੩੧੬. ਸਙ੍ਘਕਮ੍ਮੇ ਵਜੇਤਿ ਸਙ੍ਘਸ੍ਸ ਕਿਚ੍ਚੇ ਉਪੋਸਥਾਗਾਰਾਦੀਸੁ ਸੇਨਾਸਨੇਸੁ ਵਾ ਚੇਤਿਯਛਤ੍ਤਵੇਦਿਕਾਦੀਸੁ ਵਾ ਅਨ੍ਤਮਸੋ ਪੁਗ੍ਗਲਿਕਸੇਨਾਸਨੇਸੁ ਵਾਪਿ ਕਤ੍ਤਬ੍ਬਨਿਮਿਤ੍ਤੇ ਵਜੇਯ੍ਯਾਤਿ ਅਤ੍ਥੋ. ਧਮ੍ਮਸਵਨਤ੍ਥਂ ਨਿਮਨ੍ਤਿਤੋ ਵਾਪਿ ਵਜੇ, ਗਰੂਹਿ ਪੇਸਿਤੋ ਵਾਪਿ ਵਜੇ, ਗਰੂਨਂ ਪਸ੍ਸਿਤੁਂ ਵਾਪਿ ਵਜੇਤਿ ਯੋਜੇਤਬ੍ਬਂ. ਨਿਮਨ੍ਤਿਤੋਤਿ ਏਤ੍ਥ ਸਚੇ ਪਠਮਂਯੇਵ ਕਤਿਕਾ ਕਤਾ ਹੋਤਿ, ‘‘ਅਸੁਕਦਿਵਸਂ ਨਾਮ ਸਨ੍ਨਿਪਤਿਤਬ੍ਬ’’ਨ੍ਤਿ ਨਿਮਨ੍ਤਿਤੋਯੇਵ ਨਾਮ ਹੋਤਿ. ਗਰੂਹੀਤਿ ਆਚਰਿਯੁਪਜ੍ਝਾਯੇਹਿ. ਪਹਿਤੋਤਿ ਭਣ੍ਡਧੋਵਨਾਦਿਅਤ੍ਥਾਯ ਪੇਸਿਤੋ. ਪਸ੍ਸਿਤੁਨ੍ਤਿ ਅਗਿਲਾਨੇਪਿ.

੩੧੭. ਭਣ੍ਡ…ਪੇ… ਦਸ੍ਸਨੇ ਨ ਵਜੇਤਿ ਯੋਜਨੀਯਂ. ਏਤ੍ਥਾਪਿ ਨਿਮਿਤ੍ਤਤ੍ਥੇ ਸਤ੍ਤਮੀ. ਭਣ੍ਡਂ ਨਾਮ ਚੀਵਰਂ. ਞਾਤੀ ਮਾਤਾਪਿਤੂਹਿ ਅਞ੍ਞੇ. ਉਪਟ੍ਠਾਕਾ ਉਪਾਸਕਾ. ‘‘ਅਜ੍ਜੇਵ ਆਗਮਿਸ੍ਸ’’ਨ੍ਤਿ ਅਦੂਰਗੋ ਨ ਪਾਪੁਣੇਯ੍ਯ, ਲਬ੍ਭਨ੍ਤਿ ਸਮ੍ਬਨ੍ਧੋ. ਲਬ੍ਭਨ੍ਤਿ ਇਮਸ੍ਸ ਅਪਾਪੁਣਨਂ ਵੁਤ੍ਤਕਮ੍ਮਂ. ਅਜ੍ਜੇਵਾਗਮਿਸ੍ਸਨ੍ਤਿ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਪੁਨ ਆਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਸਚੇ ਅਰੁਣੁਗ੍ਗਮਨਂ ਹੋਤਿ, ਵਸ੍ਸਚ੍ਛੇਦੋਪਿ ਨ ਹੋਤਿ, ਰਤ੍ਤਿਚ੍ਛੇਦਦੁਕ੍ਕਟਞ੍ਚ ਨਤ੍ਥੀਤਿ ਵਦਨ੍ਤਿ.

੩੧੮. ਸੇਸਞਾਤੀਹੀਤਿ ਮਾਤਾਪਿਤੂਹਿ ਅਵਸੇਸਞਾਤੀਹਿ. ਨਿਦ੍ਦਿਸਿਤ੍ਵਾਵਾਤਿ ਦਾਨਧਮ੍ਮਸਵਨਾਦੀਨਿ. ‘‘ਪਹਿਤੇ ਪੇਸਿਤੇ’’ਤਿ ਚੇਤ੍ਥ ‘‘ਲਬ੍ਭ’’ਨ੍ਤਿ ਅਨੁਵਤ੍ਤਨੀਯਂ.

੩੧੯. ਅਤ੍ਤਨੋ ਅਨ੍ਤਰਾਯੇ ਸਤੀਤਿ ਚੋਰਸਰੀਸਪਵਾਲ਼ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇ, ਅਨ੍ਤਮਸੋ ਭੇਸਜ੍ਜਾਲਾਭਪਤਿਰੂਪਉਪਟ੍ਠਾਕਾਲਾਭੇਪਿ. ‘‘ਵਸ੍ਸਚ੍ਛੇਦਕਾਰਣਮ੍ਪਿ ਸਤ੍ਤਾਹਕਰਣੀਯਂ ਸਿਯਾ’’ਤਿ ਕੇਚਿ ਪੋਰਾਣਾ ਵਦਨ੍ਤਿ, ਤਂ ਯੁਤ੍ਤਂ ਵਿਯ ਦਿਸ੍ਸਤਿ, ਸਬ੍ਬਥਾ ਵਸ੍ਸਚ੍ਛੇਦੇਨ ਬਹਿ ਵਾਸਾਯ ਅਨੁਞ੍ਞਾਤਕਾਰਣਂ ਸਤ੍ਤਾਹਮਤ੍ਤਂ ਬਹਿ ਵੀਤਿਨਾਮੇਤ੍ਵਾ ਅਨ੍ਤੋਵਿਹਾਰੇਯੇਵ ਵਾਸੇਨ ਵਸ੍ਸਚ੍ਛੇਦਾਕਾਰਣਂ ਕਥਂ ਨਾਮ ਨ ਸਿਯਾਤਿ. ਛਿਨ੍ਨਵਸ੍ਸੋ ਨੋ ਪਵਾਰਯੇਤਿ ਸਮ੍ਬਨ੍ਧੋ.

੩੨੦. ‘‘ਅਸੇਨਾਸਨਿਕੇਨਾ’’ਤਿ ਇਮਿਨਾਵ ਵਿਞ੍ਞਾਯਮਾਨਤ੍ਥਤ੍ਤੇਪਿ ‘‘ਅਜ੍ਝੋਕਾਸੇ ਚਾ’’ਤਿ ਵਚਨਂ ‘‘ਅਹਂ ਅਬ੍ਭੋਕਾਸਿਕੋ, ਕਿਂ ਮੇ ਸੇਨਾਸਨੇਨਾ’’ਤਿ ਵਾਸਾਨਿਵਤ੍ਤਨਤ੍ਥਂ ਵੁਤ੍ਤਂ. ਰੁਕ੍ਖਸ੍ਸ ਸੁਸਿਰੇਤਿ ਸੁਦ੍ਧੇ ਰੁਕ੍ਖਸੁਸਿਰੇ. ਮਹਨ੍ਤਸ੍ਸ ਪਨ ਸੁਸਿਰਸ੍ਸ ਅਨ੍ਤੋ ਪਦਰਚ੍ਛਦਨਕੁਟਿਕਂ ਕਤ੍ਵਾ ਪਵਿਸਨਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ. ‘‘ਵਿਟਪੇਪਿ ਅਟ੍ਟਕਂ ਬਨ੍ਧਿਤ੍ਵਾ’’ਤਿਆਦਿ ਵੁਤ੍ਤਨਯਮੇਵ. ਤਥਾ ਛਤ੍ਤਚਾਟੀਸੁਪਿ ਤਦਨੁਰੂਪੇਨ ਵੇਦਿਤਬ੍ਬਂ. ਛਵਕੁਟਿ ਨਾਮ ਟਙ੍ਕਿਤਮਞ੍ਚਾਦਿਭੇਦਾ ਕੁਟਿ. ਤਤ੍ਥ ਟਙ੍ਕਿਤਮਞ੍ਚੋ ਨਾਮ ਦੀਘੇ ਮਞ੍ਚਪਾਦੇ ਮਜ੍ਝੇ ਵਿਜ੍ਝਿਤ੍ਵਾ ਅਟਨਿਯੋ ਪਵੇਸੇਤ੍ਵਾ ਕਤੋ, ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਂ ਅਤ੍ਥਰਿਤ੍ਵਾ ਕਤਮ੍ਪਿ ਟਙ੍ਕਿਤਮਞ੍ਚੋ.

੩੨੧. ਅਸੇਨਾਸਨਿਕੇਨਾਤਿ ਯਸ੍ਸ ਤਿਣਪਣ੍ਣਇਟ੍ਠਕਸਿਲਾਸੁਧਾਸਙ੍ਖਾਤਾਨਂ ਪਞ੍ਚਨ੍ਨਂ ਛਦਨਾਨਂ ਅਞ੍ਞਤਰੇਨ ਛਨ੍ਨਂ ਯੋਜਿਤਦ੍ਵਾਰਬਨ੍ਧਨਂ ਸੇਨਾਸਨਂ ਨਤ੍ਥਿ, ਤੇਨ. ਇਦਂ ਪਨ ਵਚੀਭੇਦਂ ਕਤ੍ਵਾ ਅਧਿਟ੍ਠਾਨਂ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ, ਤਦਯੁਤ੍ਤਂ, ਤਥਾ ਚ ਸਤਿ ਨਾਵਾਦੀਸੁ ਵਿਯ ਵਿਸੁਂ ਵਿਧਾਨੇਨ ਭਵਿਤਬ੍ਬਨ੍ਤਿ. ਨਾਵਾਸਤ੍ਥਵਜੂਪਗੋਤਿ ਇਮਿਨਾ ਅਸੇਨਾਸਨਿਕੇਨ ਨਾਵਾਦੀਸੁ ਵਸ੍ਸਂ ਉਪਗਨ੍ਤੁਂ ਵਟ੍ਟਤੀਤਿ ਦੀਪੇਤਿ. ਤਤ੍ਥ ਚ ਕੁਟਿਕਂ ਪਰਿਯੇਸਿਤ੍ਵਾ ਲਭਨ੍ਤੇਨ ਤਤ੍ਥ ਪਵਿਸਿਤ੍ਵਾ ਵਿਹਾਰਾਭਾਵਤੋ ‘‘ਵਿਹਾਰੇ’’ਤਿ ਅਵਤ੍ਵਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ, ਅਲਭਨ੍ਤੇਨ ਆਲਯੋ ਕਾਤਬ੍ਬੋ. ਪਵਾਰੇਤੁਞ੍ਚਾਤਿ ਚ-ਸਦ੍ਦੇਨ ਵਸ੍ਸਚ੍ਛੇਦਨਿਮਿਤ੍ਤਾਯ ਆਪਤ੍ਤਿਯਾ ਅਭਾਵਂ ਸਮ੍ਪਿਣ੍ਡੇਤਿ. ‘‘ਵਜੇ ਸਤ੍ਥੇ ਨਾਵਾਯਨ੍ਤਿ ਤੀਸੁ ਠਾਨੇਸੁ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ, ਪਵਾਰੇਤੁਞ੍ਚ ਲਬ੍ਭਤੀ’’ਤਿ (ਮਹਾਵ. ਅਟ੍ਠ. ੨੦੩) ਅਟ੍ਠਕਥਾਯਂ ਵੁਤ੍ਤਂ. ਵਸ੍ਸਚ੍ਛੇਦੇਤਿ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਵਜੋ ਤੇਨ ਗਨ੍ਤੁ’’ਨ੍ਤਿ (ਮਹਾਵ. ੨੦੩) ਵੁਤ੍ਤਤ੍ਤਾ, ਸਤ੍ਥਸ੍ਸ ਨਾਵਾਯ ਚ ਗਮਨਸਭਾਵੇਨੇਵ ਠਿਤਤ੍ਤਾ ਚ ਵਸ੍ਸੂਪਗਤਟ੍ਠਾਨੇ ਅਵਸਿਤ੍ਵਾ ਅਞ੍ਞਤ੍ਥ ਗਮਨਮਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਵਸ੍ਸੂਪਨਾਯਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.