੪੦. ਅਵੇਭਙ੍ਗਿਯਨਿਦ੍ਦੇਸਵਣ੍ਣਨਾ
੩੨੨-੫. ਆਰਾਮਾ…ਪੇ… ਮਤ੍ਤਿਕਭਣ੍ਡਾਨੀਤਿ ਏਤੇ ਪਞ੍ਚ ਅਵਿਭਾਜਿਯਾਤਿ ਸਮ੍ਬਨ੍ਧਿਤਬ੍ਬਂ. ਪਞ੍ਚਾਤਿ ‘‘ਆਰਾਮਾਰਾਮਵਤ੍ਥੂਨਿ ਏਕ’’ਨ੍ਤਿਆਦਿਨਾ ਰਾਸਿਵਸੇਨ ਪਞ੍ਚ, ਸਰੂਪਵਸੇਨ ਪਨੇਤਾਨਿ ਪਣ੍ਣਂ ਤਿਣੇ ਪਕ੍ਖਿਪਿਤ੍ਵਾ ਪਞ੍ਚਵੀਸਤਿਵਿਧਾਨਿ ਹੋਨ੍ਤਿ. ਤਥਾ ਚਾਹ –
‘‘ਦ੍ਵਿਸਙ੍ਗਹਾਨਿ ਦ੍ਵੇ ਹੋਨ੍ਤਿ, ਤਤਿਯਂ ਚਤੁਸਙ੍ਗਹਂ;
ਚਤੁਤ੍ਥਂ ਨਵਕੋਟ੍ਠਾਸਂ, ਪਞ੍ਚਮਂ ਅਟ੍ਠਭੇਦਨਂ.
‘‘ਇਤਿ ਪਞ੍ਚਹਿ ਰਾਸੀਹਿ, ਪਞ੍ਚਨਿਮ੍ਮਲਲੋਚਨੋ;
ਪਞ੍ਚਵੀਸਵਿਧਂ ਨਾਥੋ, ਗਰੁਭਣ੍ਡਂ ਪਕਾਸਯੀ’’ਤਿ. (ਚੂਲ਼ਵ. ਅਟ੍ਠ. ੩੨੧);
ਤਤ੍ਥ ਆਰਾਮੋ ਨਾਮ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਆਰਾਮਵਤ੍ਥੁ ਨਾਮ ਤੇਸਂਯੇਵ ਪਤਿਟ੍ਠਾਨੋਕਾਸੋ, ਵਿਨਟ੍ਠੇਸੁ ਵਾ ਤੇਸੁ ਪੋਰਾਣਕਭੂਮਿਭਾਗੋ. ਵਿਹਾਰੋ ਨਾਮ ਪਾਸਾਦਾਦਿ ਯਂ ਕਿਞ੍ਚਿ ਸੇਨਾਸਨਂ. ਲੋਹਕੁਮ੍ਭੀ ਨਾਮ ਕਾਲ਼ਲੋਹੇਨ ਵਾ ਤਮ੍ਬਲੋਹੇਨ ਵਾ ਕਤਕੁਮ੍ਭੀ. ਕਟਾਹਾਦੀਸੁਪਿ ਏਸੇਵ ਨਯੋ. ਏਤ੍ਥ ਭਾਣਕਨ੍ਤਿ ਅਰਞ੍ਜਰੋ ਵੁਚ੍ਚਤਿ. ਵਾਰਕੋਤਿ ਘਟੋ. ਰਾਸਿਂ ਅਪੇਕ੍ਖਿਤ੍ਵਾ ਏਤੇਤਿ ਪੁਲ੍ਲਿਙ੍ਗਨਿਦ੍ਦੇਸੋ. ਅਵਿਭਾਜਿਯਾਤਿ ਮੂਲਚ੍ਛੇਜ੍ਜਵਸੇਨ ਅਵੇਭਙ੍ਗਿਯਾ. ਪਰਿਵਤ੍ਤਨਵਸੇਨ ਪਨ ਪਰਿਭੁਞ੍ਜਨ੍ਤਸ੍ਸ ਵਿਸ੍ਸਜ੍ਜੇਨ੍ਤਸ੍ਸ ਚ ਅਨਾਪਤ੍ਤਿ. ਅਵਿਸ੍ਸਜ੍ਜਿਯਾਨਿ ਚਾਤਿ ਚ-ਸਦ੍ਦੇਨ ਅਵੇਭਙ੍ਗਿਯਾਨਿ ਚਾਤਿ ਅਵੁਤ੍ਤਂ ਸਮ੍ਪਿਣ੍ਡੇਤਿ.
੩੨੬-੮. ਏਕਨ੍ਤਗਰੁਭਣ੍ਡਤ੍ਤਾ ਆਦਿਤੋ ਤਯੋ ਰਾਸੀ ਠਪੇਤ੍ਵਾ ਚਤੁਤ੍ਥਰਾਸਿਤੋ ਪਟ੍ਠਾਯ ਗਰੁਭਣ੍ਡਾਗਰੁਭਣ੍ਡੇ ਵਿਭਜਿਤੁਂ ‘‘ਵਲ੍ਲੀ’’ਤਿਆਦਿ ਆਰਦ੍ਧਂ. ਅਡ੍ਢਬਾਹੁਮਤ੍ਤਾਪਿ ਵਲ੍ਲਿ ਚ ਅਟ੍ਠਙ੍ਗੁਲਾਯਤੋ ਵੇਲ਼ੁ ਚ ਮੁਟ੍ਠਿਮਤ੍ਤਮ੍ਪਿ ਤਿਣਾਦਿ ਚ ਏਕਮ੍ਪਿ ਪਣ੍ਣਞ੍ਚ ਪਾਕਤਾ ਵਾ ਪਞ੍ਚਵਣ੍ਣਾ ਵਾ ਤਾਲਪਕ੍ਕਪ੍ਪਮਾਣਾਪਿ ਮਤ੍ਤਿਕਾ ਚ ਤਾਲਪਕ੍ਕਪ੍ਪਮਾਣਾਪਿ ਸੁਧਾ ਚ ਤਾਲਪਕ੍ਕਪ੍ਪਮਾਣਾਪਿ ਕਙ੍ਗੁਟ੍ਠਆਦਿਕਾ ਚ ਦਿਨ੍ਨਾ ਵਾ ਤਤ੍ਥਜਾਤਕਾ ਵਾ ਸਙ੍ਘਿਕਾ ਰਕ੍ਖਿਤਾ ਅਭਾਜਿਯਾ, ਰਜ੍ਜੁਯੋਤ੍ਤਾਦਿ ਚ ਦਿਨ੍ਨਾ ਸਙ੍ਘਿਕਾ ਅਭਾਜਿਯਾਤਿ ਯੋਜਨਾ. ਵੇਲ਼ੁ ਪਰਿਣਾਹਤੋ ਪਣ੍ਣਸੂਚਿਦਣ੍ਡਮਤ੍ਤੋ ਗਹੇਤਬ੍ਬੋ. ਤਿਣਂ ਮੁਞ੍ਜਂ ਪਬ੍ਬਜਞ੍ਚ ਆਦਿਸਦ੍ਦਸਙ੍ਗਹਿਤਂ ਠਪੇਤ੍ਵਾ ਅਵਸੇਸਂ ਯਂ ਕਿਞ੍ਚਿ ਤਿਣਂ. ਪਣ੍ਣੋ ਅਟ੍ਠਙ੍ਗੁਲਪ੍ਪਮਾਣੋ ਰਿਤ੍ਤਪੋਤ੍ਥਕੋ ਗਰੁਭਣ੍ਡਮੇਵ. ਪਾਕਤਾਤਿ ਪਕਤਿਯਾ ਜਾਤਾ. ਪਞ੍ਚਵਣ੍ਣਾਤਿ ਰਤ੍ਤਸੇਤਾਦਿਪਞ੍ਚਵਣ੍ਣਾ. ਸੁਧਾਕਙ੍ਗੁਟ੍ਠਾਦਯੋ ਮਤ੍ਤਿਕਗ੍ਗਹਣੇਨ ਗਹਿਤਾ. ਕਙ੍ਗੁਟ੍ਠਆਦਿਕਾਤਿ ਆਦਿ-ਸਦ੍ਦੇਨ ਸਜ੍ਜੁਰਸਜਾਤਿਹਿਙ੍ਗੁਲਕਾਦੀਨਂ ਗਹਣਂ. ਦਿਨ੍ਨਾਤਿ ਸਙ੍ਘਸ੍ਸ ਦਿਨ੍ਨਾ. ਤਤ੍ਥਜਾਤਾਤਿ ਸਙ੍ਘਿਕਭੂਮਿਯਂ ਜਾਤਾ. ਰਜ੍ਜੁਯੋਤ੍ਤਾਦੀਤਿ ਸੁਤ੍ਤਮਕਚਿਵਾਕਨਾਲ਼ਿਕੇਰਹੀਰਚਮ੍ਮਮਯਾ ਰਜ੍ਜੁ ਚ ਯੋਤ੍ਤਾਦਿ ਚ. ਆਦਿ-ਸਦ੍ਦੇਨ ਮਕਚਿਵਾਕਾਦਿਕੇ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾ ਗਹਿਤਾ. ਬ੍ਯਤਿਰੇਕਵਸੇਨ ਪਨੇਤ੍ਥ ਚਤੁਤ੍ਥਰਾਸਿਮ੍ਹਿ ਇਤਰੇ ਭਾਜਿਯਾਤਿ ਵੇਦਿਤਬ੍ਬਾ. ਸਙ੍ਘਿਕੇ ਕਮ੍ਮੇ, ਚੇਤਿਯਸ੍ਸ ਵਾ ਕਮ੍ਮੇ ਨਿਟ੍ਠਿਤੇ ਭਾਜਿਯਾਤਿ ਯੋਜਨੀਯਂ.
੩੨੯. ਲੋਹਭਣ੍ਡੇਸੁ ਭਿਕ੍ਖੁਸਾਰੁਪ੍ਪਂ ਪਤ੍ਤਾਦਿ ਵਾ ਤਥਾ ਵਿਪ੍ਪਕਤਾਕਤਂ ਲੋਹਭਣ੍ਡਂ ਤਥਾ ਪਾਦਗਣ੍ਹਕਂ ਵਾਰਕਂ ਭਾਜਿਯਨ੍ਤਿ ਯੋਜਨਾ. ਪਤ੍ਤਾਦੀਤਿ ਅਯੋਪਤ੍ਤੋ ਅਯਥਾਲਕਂ ਤਮ੍ਬਲੋਹਥਾਲਕਂ ਅਞ੍ਜਨਿਸਲਾਕਾ ਕਣ੍ਣਮਲਹਰਣੀ ਸੂਚਿ ਪਣ੍ਣਸੂਚਿ ਖੁਦ੍ਦਕੋ ਪਿਪ੍ਫਲਕੋ ਖੁਦ੍ਦਕਂ ਆਰਕਣ੍ਡਕਂ ਕੁਞ੍ਚਿਕਾ ਤਾਲ਼ਾਦਿ. ਵਿਪ੍ਪਕਤਨ੍ਤਿ ਅਪਰਿਨਿਟ੍ਠਿਤਂ. ਅਕਤਨ੍ਤਿ ਸਬ੍ਬਸੋ ਅਕਤਂ. ਪਾਦਗਣ੍ਹਕਨ੍ਤਿ ਸੀਹਲ਼ਦੀਪੇ ਪਾਦਗਣ੍ਹਨਕਂ. ਪਾਦੋ ਨਾਮ ਚਤੁਤ੍ਥਂਸੋ, ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਾ. ਮਗਧਨਾਲ਼ਿ ਚ ਨਾਮੇਸਾ ਊਨਪਞ੍ਚਪਸਤਾ ਵੇਦਿਤਬ੍ਬਾ. ਤਥਾ ਘਟਕੋ ਤੇਲਭਾਜਨਞ੍ਚ. ਯਾਯ ਵਾਸਿਯਾ ਠਪੇਤ੍ਵਾ ਦਨ੍ਤਕਟ੍ਠਚ੍ਛੇਦਨਂ ਵਾ ਉਚ੍ਛੁਤਚ੍ਛਨਂ ਵਾ ਅਞ੍ਞਂ ਮਹਾਕਮ੍ਮਂ ਕਾਤੁਂ ਨ ਸਕ੍ਕਾ, ਅਯਂ ਭਾਜਿਯਾ. ਸਮ੍ਮੁਞ੍ਜਨਿਦਣ੍ਡਖਣਨਕਂ ਪਨ ਅਦਣ੍ਡਕਂ ਫਲਮਤ੍ਤਮੇਵ, ਯਂ ਸਕ੍ਕਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤੁਂ, ਅਯਂ ਭਾਜਨੀਯਾ. ਤਿਪੁਕੋਟ੍ਟਕਉਪਕਰਣੇਸੁ ਤਿਪੁਚ੍ਛੇਦਨਕਸਤ੍ਥਕਂ ਸੁਵਣ੍ਣਕਾਰੂਪਕਰਣੇਸੁ ਸੁਵਣ੍ਣਚ੍ਛੇਦਨਕਸਤ੍ਥਕਂ ਚਮ੍ਮਕਾਰਉਪਕਰਣੇਸੁ ਚਮ੍ਮਛਿਨ੍ਦਨਕਂ ਖੁਦ੍ਦਕਸਤ੍ਥਂ ਨਹਾਪਿਤਤੁਣ੍ਣਕਾਰਉਪਕਰਣੇਸੁ ਠਪੇਤ੍ਵਾ ਮਹਾਕਤ੍ਤਰਿਂ ਮਹਾਸਣ੍ਡਾਸਞ੍ਚ ਮਹਾਪਿਪ੍ਫਲਕਞ੍ਚ ਸਬ੍ਬਾਨਿ ਭਾਜਨੀਯਭਣ੍ਡਾਨਿ. ਤਥਾ ਕੁਞ੍ਚਿਕਾ. ਵੁਤ੍ਤਵਿਪਲ੍ਲਾਸੇਨ ਪਨ ਲੋਹਭਣ੍ਡੇ ਅਭਾਜਿਯਾਤਿ ਵੇਦਿਤਬ੍ਬਾ.
੩੩੦. ‘‘ਵੇਲ਼ੁਮ੍ਹੀ’’ਤਿਆਦਿਨਾ ਦਾਰੁਭਣ੍ਡਾਨਿ ਦਸ੍ਸੇਤਿ. ਦਾਰੁਭਣ੍ਡੇਨ ਪਨ ਸਙ੍ਗਹੇਤ੍ਵਾ ਸਬ੍ਬਾਪਿ ਦਾਰੁਵੇਲ਼ੁਚਮ੍ਮੁਪਾਹਨਾਦਿਵਿਕਤਿ ਵੇਦਿਤਬ੍ਬਾ. ਛਤ੍ਤਦਣ੍ਡੋ ਚ ਸਲਾਕਾ ਚਾਤਿ ਦ੍ਵਨ੍ਦੋ. ਉਪਾਹਨਾਯ ਦਣ੍ਡਕੋ ਉਪਾਹਨਦਣ੍ਡਕੋ.
੩੩੧. ਅਨੁਞ੍ਞਾਤਵਾਸਿਦਣ੍ਡੋਤਿ ਅਨੁਞ੍ਞਾਤਵਾਸਿਯਾ ਦਣ੍ਡੋ. ਅਰਣਞ੍ਜਨਿਸਿਙ੍ਗਾਦੀਤਿ ਆਦਿ-ਸਦ੍ਦੇਨ ਅਞ੍ਜਨਿਸਲਾਕਾ ਛਤ੍ਤਂ ਮੁਟ੍ਠਿਪਣ੍ਣਂ ਉਪਾਹਨਾ ਧਮ੍ਮਕਰਣੋ ਪਾਦਗਣ੍ਹਨਕਤੋ ਅਨਤਿਰਿਤ੍ਤਂ ਆਮਲਕਤੁਮ੍ਬਂ ਆਮਲਕਘਟੋ ਲਾਬੁਕਤੁਮ੍ਬਂ ਲਾਬੁਕਘਟੋ ਵਿਸਾਣਤੁਮ੍ਬਨ੍ਤਿ ਇਦਂ ਸਙ੍ਗਣ੍ਹਾਤਿ.
੩੩੨. ਯਥਾਵੁਤ੍ਤਤੋ ਅਞ੍ਞਂ ਦਾਰੁਭਣ੍ਡੇਸੁ ਗਰੁਭਣ੍ਡਂ. ਮਤ੍ਤਿਕਾਮਯੋ ਪਾਦਘਟਕੋ ਭਾਜਿਯੋਤਿ ਯੋਜਨਾ. ਪਾਦਘਟਕੋਤਿ ਪਾਦਸ੍ਸ ਪਹੋਨਕੋ ਘਟਕੋ. ਇਮਿਨਾ ਮਤ੍ਤਿਕਾਭਣ੍ਡਂ ਉਪਲਕ੍ਖੇਤਿ, ਤਸ੍ਮਾ ਪਤ੍ਤੋ ਥਾਲਕਂ ਕੁਣ੍ਡਿਕਾਤਿ ਇਮਾਨਿ ਭਾਜਨੀਯਾਨਿ, ਵੁਤ੍ਤਾਵਸੇਸਾ ਅਭਾਜਿਯਾ.
੩੩੩-੪. ਗਰੁਨਾ ਗਰੁਭਣ੍ਡਞ੍ਚ ਥਾਵਰਞ੍ਚ ਪਰਿਵਤ੍ਤੇਯ੍ਯ, ਥਾਵਰੇਨ ਚ ਥਾਵਰਮ੍ਪਿ ਪਰਿਵਤ੍ਤੇਯ੍ਯਾਤਿ ਯੋਜੇਤਬ੍ਬਂ. ਗਰੁਨਾ ਮਞ੍ਚਪੀਠਾਦਿਨਾ. ਥਾਵਰਨ੍ਤਿ ਆਰਾਮਾਦਿ ਪਠਮਰਾਸਿਦ੍ਵਯਂ. ਤਥਾ ਕਤ੍ਵਾ ਚ ਭੁਞ੍ਜਿਤੁਨ੍ਤਿ ਏਵਞ੍ਚ ਪਰਿਵਤ੍ਤੇਤ੍ਵਾ ਤਤੋ ਆਭਤਂ ਕਪ੍ਪਿਯਭਣ੍ਡਂ ਪਰਿਭੁਞ੍ਜੇਯ੍ਯਾਤਿ ਅਤ੍ਥੋ, ਵਿਧਿਮ੍ਹਿ ਅਯਂ ਤੁਂਪਚ੍ਚਯੋ. ਫਾਤਿਕਮ੍ਮੇਨ ਵਲ੍ਲਾਦਿਂ ਗਣ੍ਹੇਤਿ ਸਮ੍ਬਨ੍ਧਨੀਯਂ. ਫਾਤਿਕਮ੍ਮਂ ਨਾਮ ਸਮਕਂ ਵਾ ਅਤਿਰੇਕਂ ਵਾ ਤਦਗ੍ਘਨਕਂ ਵਾ ਵਡ੍ਢਿਕਮ੍ਮਂ. ਸੇਸਨ੍ਤਿ ਪਠਮਰਾਸਿਤ੍ਤਿਕਨ੍ਤਿ.
ਅਵੇਭਙ੍ਗਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.