੩੪. ਪਥਵੀਨਿਦ੍ਦੇਸਵਣ੍ਣਨਾ

੨੪੨. ਜਾਤਾਜਾਤਾਤਿ ਦੁਵਿਧਾਤਿ ਜਾਤਾ ਪਥਵੀ ਅਜਾਤਾ ਪਥਵੀਤਿ ਪਥਵੀ ਦੁਵਿਧਾਤਿ ਅਤ੍ਥੋ. ਇਮਿਨਾ ਜਾਤਪਥਵਿਞ੍ਚ ਅਜਾਤਪਥਵਿਞ੍ਚ ਦਸ੍ਸੇਤਿ. ਤਾਸਂ ਵਿਭਾਗਂ ਦਸ੍ਸੇਤਿ ‘‘ਸੁਦ੍ਧਾ’’ਤਿਆਦਿਨਾ. ਸੁਦ੍ਧਮਤ੍ਤਿਕਪਂਸੁਕਾ ਚ ਅਦਡ੍ਢਾ ਚ ਬਹੁਮਤ੍ਤਿਕਪਂਸੁਕਾ ਚ ਚਾਤੁਮਾਸਾਧਿਕੋਵਟ੍ਠਪਂਸੁਮਤ੍ਤਿਕਰਾਸਿ ਚ ਜਾਤਾ ਪਥਵੀਤਿ ਸਮ੍ਬਨ੍ਧੋ. ਮਤ੍ਤਿਕਾ ਚ ਪਂਸੁ ਚਾਤਿ ਦ੍ਵਨ੍ਦੋ. ਸੁਦ੍ਧਾ ਅਪ੍ਪਸਕ੍ਖਰਾਦਿਤਾਯ ਮਤ੍ਤਿਕਾ ਪਂਸਵੋ ਯਸ੍ਸਾਤਿ ਬਾਹਿਰਤ੍ਥੋ. ਅਦਡ੍ਢਾਤਿ ਉਦ੍ਧਨਪਚਨਾਦਿਵਸੇਨ ਤਥਾ ਤਥਾ ਅਦਡ੍ਢਾ. ਸਾ ਪਨ ਵਿਸੁਂ ਨਤ੍ਥਿ, ਸੁਦ੍ਧਮਤ੍ਤਿਕਾਦੀਸੁ ਅਞ੍ਞਤਰਾਵ ਵੇਦਿਤਬ੍ਬਾ. ਚਤ੍ਤਾਰੋ ਮਾਸਾ, ਤੇਹਿ ਸਹਿਤੋ ਅਤਿਰੇਕੋ ਕਾਲੋ, ਤਸ੍ਮਿਂ ਓਵਟ੍ਠੋਤਿ ਸਮਾਸੋ. ਓਵਟ੍ਠੋਤਿ ਯੇਨ ਕੇਨਚਿ ਉਦਕੇਨ ਓਵਟ੍ਠੋ. ਬੁਧਾ ਪਨ ‘‘ਆਕਾਸਤੋ ਵੁਟ੍ਠਉਦਕੇਨੇਵ, ਨ ਅਞ੍ਞਤ੍ਥ ਪਹਰਿਤ੍ਵਾ ਪਤਿਤਬਿਨ੍ਦੁਨਾ’’ਤਿ ਵਦਨ੍ਤਿ, ‘‘ਓਵਟ੍ਠੋ’’ਤਿ ਸਾਮਞ੍ਞੇਨ ਵੁਤ੍ਤਤ੍ਤਾ ਚ ‘‘ਪੋਕ੍ਖਰਣਿਯਾ ਠਿਤਤਨੁਕਦ੍ਦਮੋ ਵਟ੍ਟਤਿ, ਬਹਲੋ ਤੁ ਨ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੮੬) ਵੁਤ੍ਤਤ੍ਤਾ ਚ ‘‘ਵਿਨਯਵਿਨਿਚ੍ਛਯੇ ਸਮ੍ਪਤ੍ਤੇ ਗਰੁਕੇ ਠਾਤਬ੍ਬ’’ਨ੍ਤਿ ਵਿਨਯਲਕ੍ਖਣਤੋ ਚ ਨ ਤਂ ਯੁਜ੍ਜਤੀਤਿ ਅਮ੍ਹਾਕਂ ਖਨ੍ਤਿ. ਪਂਸੁਮਤ੍ਤਿਕਾਨਂ ਰਾਸਿ ਪਂਸੁਮਤ੍ਤਿਕਰਾਸਿ. ਚਤੁ…ਪੇ… ਵਟ੍ਠੋ ਪਂਸੁਮਤ੍ਤਿਕਰਾਸਿ ਯਸ੍ਸਾਤਿ ਅਞ੍ਞਪਦਤ੍ਥੋ, ਕਮ੍ਮਧਾਰਯੋ ਵਾ.

੨੪੩. ਵਾਲੁਕਾ ਚ ਦਡ੍ਢਾ ਚ ਯੇਭੁਯ੍ਯਸਕ੍ਖਰਾਦਿਮਹੀਪਿ ਚ ਚਾਤੁਮਾਸੋਮਵਟ੍ਠਕੋ ਵੁਤ੍ਤਰਾਸਿ ਚ ਦੁਤਿਯਾ ਭੂਮੀਤਿ ਸਮ੍ਬਨ੍ਧੋ ਸਕ੍ਖਰਾ ਚ ਪਾਸਾਣਾ ਚ ਮਰੁਮ੍ਬਾ ਚ ਕਥਲਾ ਚ ਵਾਲੁਕਾ ਚਾਤਿ ਦ੍ਵਨ੍ਦੋ. ਸੁਦ੍ਧਾ ਸਕ੍ਖਰ…ਪੇ… ਵਾਲੁਕਾ ਯਸ੍ਸਾਤਿ ਵਿਗ੍ਗਹੋ. ਹਤ੍ਥਮੁਟ੍ਠਿਨਾ ਗਹੇਤਬ੍ਬਪ੍ਪਮਾਣਾ ਸਕ੍ਖਰਾ, ਤਤੋ ਉਪਰਿ ਪਾਸਾਣਾ, ਕਟਸਕ੍ਖਰਾ ਮਰੁਮ੍ਬਾ, ਕਪਾਲਖਣ੍ਡਾਨਿ ਕਥਲਾਤਿ ਵੇਦਿਤਬ੍ਬਾ. ਦੁਤਿਯਾਤਿ ਅਜਾਤਾ. ਵੁਤ੍ਤਰਾਸੀਤਿ ਵੁਤ੍ਤੋ ਮਤ੍ਤਿਕਪਂਸੁਸਿਰਾ.

੨੪੪. ਕੀਦਿਸੀ ਯੇਭੁਯੁਮਤ੍ਤਿਕਾਦੀਤਿ ਆਹ ‘‘ਦ੍ਵੇ ਭਾਗਾ’’ਤਿਆਦਿ. ਯਸ੍ਸ ਭੂਮਿਯਾਤਿ ਯਸ੍ਸਾ ਭੂਮਿਯਾ. ਸੇਸੇਸੁਪੀਤਿ ਯੇਭੁਯ੍ਯਪਂਸੁਯੇਭੁਯ੍ਯਸਕ੍ਖਰਯੇਭੁਯ੍ਯਪਾਸਾਣਾਦੀਸੁ.

੨੪੫. ‘‘ਪਾਚਿਤ੍ਤੀ’’ਤਿਆਦਿਨਾ ਤਤ੍ਥ ਵਿਨਿਚ੍ਛਯਂ ਦਸ੍ਸੇਤਿ. ਜਾਤੇ ਜਾਤਸਞ੍ਞਿਸ੍ਸ ਖਣਨੇ ਪਾਚਿਤ੍ਤੀਤਿ ਸਮ੍ਬਨ੍ਧੋ. ਜਾਤੇਤਿ ਜਾਤੇ ਭੂਮਿਭਾਗੇ, ਲਿਙ੍ਗਵਿਪਲ੍ਲਾਸੋ ਵਾ, ਜਾਤਾਯਾਤਿ ਵੁਤ੍ਤਂ ਹੋਤਿ. ਜਾਤੇ ਦ੍ਵੇਲ਼੍ਹਸ੍ਸ ਵਿਮਤਿਸ੍ਸ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਜਾਤੇ ਅਜਾਤਸਞ੍ਞਿਸ੍ਸ ਅਨਾਪਤ੍ਤਿ. ਤਥਾ ਆਣਾਪਨੇ ਅਨਾਪਤ੍ਤੀਤਿ ਯੋਜਨਾ. ਅਜਾਤਸਞ੍ਞਿਸ੍ਸਾਤਿ ਅਜਾਤਾਤਿ ਸਞ੍ਞਾ ਅਜਾਤਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਅਜਾਤਸਞ੍ਞੀ, ਤਸ੍ਸ.

੨੪੬. ਏਕਾਯਾਣਤ੍ਤਿਯਾ ਏਕਾਤਿ ਸਚੇ ਸਕਿਂ ਆਣਤ੍ਤੋ ਦਿਵਸਮ੍ਪਿ ਖਣਤਿ, ਆਣਾਪਕਸ੍ਸ ਏਕਾ ਏਵ ਆਪਤ੍ਤੀਤਿ ਅਤ੍ਥੋ. ਵਾਚਸੋ ਆਪਤ੍ਤੀਤਿ ਸਮ੍ਬਨ੍ਧੋ. ਵਾਚਸੋਤਿ ਵਿਚ੍ਛਾਯਂ ਸੋ, ਵਾਚਾਯ ਵਾਚਾਯਾਤਿ ਅਤ੍ਥੋ.

੨੪੭. ‘‘ਇਮਂ ਠਾਨਂ ਖਣ ਵਾ’’ਤਿਆਦਿਨਾ ਯੋਜੇਤਬ੍ਬਂ. ‘‘ਏਤ੍ਥ ਅਗ੍ਗਿਂ ਜਾਲੇਹਿ ਵਾ’’ਤਿ ਯੋਜਨਾ. ‘‘ਵਤ੍ਤੁ’’ਨ੍ਤਿ ਇਦਂ ‘‘ਨ ਵਟ੍ਟਤੀ’’ਤਿ ਇਮਸ੍ਸ ਕਤ੍ਤੁਪਦਵਚਨਨ੍ਤਿ ਅਤ੍ਥੋ. ਅਥ ਵਾ ‘‘ਇਮਂ ਠਾਨਂ ਖਣਾ’’ਤਿਆਦਿਪ੍ਪਕਾਰੋ ਵਚਨਾਯ ਨ ਵਟ੍ਟਤੀਤਿ ਅਤ੍ਥੋ. ਨਿਯਮੇਤ੍ਵਾਤਿ ਇਮਿਨਾ ‘‘ਆਵਾਟਂ ਖਣ, ਕਨ੍ਦਂ ਖਣਾ’’ਤਿਆਦਿਨਾ ਅਨਿਯਮੇਤ੍ਵਾ ਵਤ੍ਤੁਂ ਵਟ੍ਟਤੀਤਿ ਦੀਪੇਤਿ.

੨੪੮. ‘‘ਇਮਸ੍ਸ ਥਮ੍ਭਸ੍ਸ ਆਵਾਟਂ ਜਾਨ ਵਾ, ਕਪ੍ਪਿਯਂ ਕਰੋਹਿ ਵਾ’’ਤਿ ਚ ‘‘ਮਤ੍ਤਿਕਂ ਜਾਨ ਵਾ, ਮਤ੍ਤਿਕਂ ਆਹਰ ਵਾ, ਮਤ੍ਤਿਕਂ ਕਪ੍ਪਿਯਂ ਕਰੋਹਿ ਵਾ’’ਤਿ ਚ ਏਦਿਸਂ ਵਚਨਂ ਵਟ੍ਟਤੀਤਿ ਸਮ੍ਬਨ੍ਧੋ. ਏਤਂ ਵਿਯ ਦਿਸ੍ਸਤੀਤਿ ਏਦਿਸਂ, ਕਿਂ ਤਂ? ‘‘ਮਤ੍ਤਿਕਂ ਦੇਹੀ’’ਤਿਆਦਿਕਂ ਉਪਮੇਯ੍ਯਂ. ‘‘ਮਤ੍ਤਿਕਂ ਜਾਨਾ’’ਤਿਆਦਿਕਂ ਪਨ ਉਪਮਾਨਂ, ਤੇਸਂ ਉਪਮਾਨੋਪਮੇਯ੍ਯਾਨਂ ਯਾ ਕਪ੍ਪਿਯਸਙ੍ਖਾਤਾ ਸਮਾਨਧਮ੍ਮਤਾ, ਸਾ ਉਪਮਾ. ਤਥਾ ਚ ਵੁਤ੍ਤਂ ਅਮ੍ਹੇਹਿ ਸੁਬੋਧਾਲਙ੍ਕਾਰੇ ‘‘ਉਪਮਾਨੋਪਮੇਯ੍ਯਾਨਂ, ਸਧਮ੍ਮਤ੍ਤਂ ਸਿਯੋਪਮਾ’’ਤਿ. ਅਞ੍ਞਥਾ ਉਪਮਾਨਭੂਤਅਕ੍ਖਰਾਵਲ਼ਿਸਦਿਸੀਯੇਵ, ਅਕ੍ਖਰਾਵਲ਼ਿ ਉਪਮੇਯ੍ਯਂ ਸਿਯਾ. ਵਾਕ੍ਯੇ ਵਿਯ-ਸਦ੍ਦੋਯੇਵ ਪਨ ਉਪਮਾਨਂ ਜੋਤੇਤੀਤਿ ਵੇਦਿਤਬ੍ਬਂ.

੨੪੯. ਪਥਵਿਯਾ ਅਸਮ੍ਬਦ੍ਧਂ ਸੁਕ੍ਖਕਦ੍ਦਮਆਦਿਕਞ੍ਚ ਤਨੁਕਂ ਉਸ੍ਸਿਞ੍ਚਨੀਯਕਦ੍ਦਮਞ੍ਚ ਕੋਪੇਤੁਂ ਲਬ੍ਭਨ੍ਤਿ ਸਮ੍ਬਨ੍ਧੋ. ਕਦ੍ਦਮਆਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਉਦਕੇਨ ਗਤਟ੍ਠਾਨੇ ਉਦਕਪਪ੍ਪਟਕੋ ਨਾਮ ਹੋਤਿ, ਯਂ ਵਾਤਪ੍ਪਹਾਰੇਨ ਚਲਤਿ, ਤਂ ਸਙ੍ਗਣ੍ਹਾਤਿ. ਉਸ੍ਸਿਞ੍ਚਨੀਯਕਦ੍ਦਮਨ੍ਤਿ ਘਟੇਹਿ ਉਸ੍ਸਿਞ੍ਚਿਤੁਂ ਸਕ੍ਕੁਣੇਯ੍ਯਕਦ੍ਦਮਂ.

੨੫੦. ‘‘ਚਾਤੁਮਾਸਾਧਿਕੋਵਟ੍ਠਂ ਗਣ੍ਡੁਪ੍ਪਾਦ’’ਨ੍ਤਿਆਦਿਨਾ ਸਮ੍ਬਨ੍ਧਿਤਬ੍ਬਂ. ਗਣ੍ਡਂ ਪਥਵਿਯਾ ਗਣ੍ਡਸਦਿਸਂ ਮਤ੍ਤਿਕਰਾਸਿਂ ਉਪ੍ਪਾਦੇਨ੍ਤੀਤਿ ਗਣ੍ਡੁਪ੍ਪਾਦਾ. ਇਧ ਪਨ ਤੇਹਿ ਉਟ੍ਠਾਪਿਤੋ ਗੂਥੋ ‘‘ਗਣ੍ਡੁਪ੍ਪਾਦ’’ਨ੍ਤਿ ਨਿਦ੍ਦਿਟ੍ਠੋ. ਪੋਤ੍ਥਕੇਸੁ ਪਨ ‘‘ਗਣ੍ਡੁਪ੍ਪਾਦੋ’’ਤਿ ਪਾਠੋ ਦਿਸ੍ਸਤਿ. ਤਂ ‘‘ਨ ਕੋਪਯੇ’’ਤਿ ਏਤ੍ਥ ਕਮ੍ਮੇਨ ਭਵਿਤਬ੍ਬਨ੍ਤਿ ਨ ਯੁਜ੍ਜਤਿ. ਮੂਸਿਕੁਕ੍ਕਿਰਨ੍ਤਿ ਮੂਸਿਕਾਨਂ ਉਕ੍ਕਿਰੋ ਖਣਿਤ੍ਵਾ ਬਹਿ ਕਤਂ ਪਂਸੁਰਾਸਿ ਮੂਸਿਕੁਕ੍ਕਿਰੋਤਿ. ਲੇਡ੍ਡਾਦਿਨ੍ਤਿ ਏਤ੍ਥ ਲੇਡ੍ਡੁਨ੍ਤਿ ਕਸਿਤਟ੍ਠਾਨੇ ਨਙ੍ਗਲਚ੍ਛਿਨ੍ਨਮਤ੍ਤਿਕਾਪਿਣ੍ਡਂ. ਆਦਿ-ਸਦ੍ਦੇਨ ਗਾਵੀਨਂ ਖੁਰਚ੍ਛਿਨ੍ਨਂ ਕਦ੍ਦਮਂ ਸਙ੍ਗਣ੍ਹਾਤਿ.

੨੫੧-੨. ਉਦਕਸਨ੍ਤਿਕੇ ਪਤਿਤੇ ਵਾਪਿਆਦੀਨਂ ਕੂਲੇ ਚ ਪਾਸਾਣੇ ਲਗ੍ਗੇ ਰਜੇ ਚ ਨਵਸੋਣ੍ਡਿਯਾ ਪਤਿਤੇ ਰਜੇ ਚ ਅਬ੍ਭੋਕਾਸੁਟ੍ਠਿਤੇ ਵਮ੍ਮਿਕੇ ਚ ਮਤ੍ਤਿਕਾਕੁਟ੍ਟੇ ਚ ਤਥਾਤਿ ਸਮ੍ਬਨ੍ਧੋ. ਤਥਾਤਿ ਇਮਿਨਾ ਕੂਲਾਦਿਕੇ ਚਾਤੁਮਾਸਾਧਿਕੋਵਟ੍ਠਂ ਵਾ ਸਬ੍ਬਂ ਨ ਕੋਪਯੇਤਿ ਇਦਂ ਅਤਿਦਿਸਤਿ. ਇਟ੍ਠਕਕੁਟ੍ਟਕੋ ਵਟ੍ਟਤੀਤਿ ਆਹ ‘‘ਯੇਭੁਯ੍ਯਾ’’ਤਿਆਦਿ. ਯੇਭੁਯ੍ਯੇਨ ਕਥਲਾ ਏਤ੍ਥਾਤਿ ਯੇਭੁਯ੍ਯਕਥਲਾ, ਭੂਮਿ, ਤਿਟ੍ਠਤਿ ਏਤ੍ਥਾਤਿ ਠਾਨਂ, ਯੇਭੁਯ੍ਯਕਥਲਾਯ ਠਾਨਂ, ਤਸ੍ਮਿਂ. ਇਟ੍ਠਕਕੁਟ੍ਟਕੋ ਯੇਭੁਯ੍ਯਕਥਲਾ ਵਿਯ ਹੋਤੀਤਿ ਅਧਿਪ੍ਪਾਯੋ. ਕੁਟ੍ਟਕਂ ਕੋਪੇਨ੍ਤਸ੍ਸ ਅਨਾਪਤ੍ਤੀਤਿ ਅਧਿਪ੍ਪਾਯੋ. ਇਟ੍ਠਕਾਯ ਕਤੋ ਕੁਟ੍ਟਕੋਤਿ ਸਮਾਸੋ.

੨੫੩-੫. ਸਞ੍ਚਾਲੇਤ੍ਵਾ ਭੂਮਿਂ ਵਿਕੋਪਯਂ ਥਮ੍ਭਾਦਿਂ ਗਣ੍ਹਿਤੁਂ ਵਾਤਿ ਸਮ੍ਬਨ੍ਧੋ. ਤਤ੍ਥ ਵਿਕੋਪਯਨ੍ਤਿ ਕਰਣਤ੍ਥੇ ਪਚ੍ਚਤ੍ਤਵਚਨਂ, ਵਿਕੋਪਯਤਾਤਿ ਅਤ੍ਥੋ. ਅਞ੍ਞਥਾ ਕਥਮੇਤ੍ਥ ਪਠਮਾਪਸਙ੍ਗੋ. ਪਠਮਾ ਹਿ ‘‘ਭਵ’’ਨ੍ਤਿ ਵੁਤ੍ਤੇ ਸਿਯਾ, ਨ ਚ ‘‘ਗਣ੍ਹਿਤੁ’’ਨ੍ਤਿਆਦੀਸੁ ਤੁਂ-ਪਚ੍ਚਯੇਹਿ ਵੁਤ੍ਤੋ ਕੋਚਿ ਅਤ੍ਥਿ, ਯਦਾ ਭਾਵੇ ਤੁਂ-ਪਚ੍ਚਯੋ, ਤਦਾ ਨ ਕਿਞ੍ਚਿ ਵੁਤ੍ਤਂ ਹੋਤੀਤਿ, ‘‘ਨ ਕਪ੍ਪਤੀ’’ਤਿ ਪਧਾਨਕਿਰਿਯਾਯਪਿ ਹੇਟ੍ਠਾ ਵੁਤ੍ਤਨਯੇਨ ਕਤ੍ਤਾ ਅਞ੍ਞੋਯੇਵਾਤਿ ਏਵਂ ਸਬ੍ਬਤ੍ਥ. ਤਤਿਯਤ੍ਥੇ ਤੁ ਸਤਿ ਇਤੋ ਚਿਤੋ ਸਞ੍ਚਾਲੇਤ੍ਵਾ ਭੂਮਿਂ ਵਿਕੋਪਯਤਾ ਥਮ੍ਭਾਦਿਂ ਗਣ੍ਹਿਤੁਂ ਨ ਕਪ੍ਪਤੀਤਿ ਅਤੀਵ ਯੁਜ੍ਜਤਿ. ਧਾਰਾਯਾਤਿ ਪਸ੍ਸਾਵਧਾਰਾਯ. ਵਿਸਮਂ ਸਮਂ ਕਾਤੁਂ ਸਮ੍ਮੁਞ੍ਜਨੀਹਿ ਘਂਸਿਤੁਂ ਵਾਤਿ ਯੋਜਨਾ. ਵਿਸਮਨ੍ਤਿ ਵਿਸਮਟ੍ਠਾਨਂ. ‘‘ਪਦਂ ਦਸ੍ਸੇਸ੍ਸਾਮੀ’’ਤਿ ਭੂਮਿਂ ਭਿਨ੍ਦਨ੍ਤੋ ਚਙ੍ਕਮਿਤੁਂ ਵਾਤਿ ਸਮ੍ਬਨ੍ਧੋ. ਭਿਨ੍ਦਨ੍ਤੋਤਿ ਭਿਨ੍ਦਤਾ. ਕਣ੍ਡੁਰੋਗੀ ਵਾ ਤਟਾਦੀਸੁ ਅਙ੍ਗਪਚ੍ਚਙ੍ਗਂ ਘਂਸਿਤੁਨ੍ਤਿ ਯੋਜਨਾ. ਕਣ੍ਡੁਰੋਗੀਤਿ ਕਣ੍ਡੁਰੋਗਿਨਾ. ਚ-ਸਦ੍ਦੋ ਅਵਧਾਰਣੇ.

੨੫੬-੭. ਸੁਦ੍ਧਚਿਤ੍ਤਸ੍ਸਾਤਿ ਪਥਵਿਭੇਦਾਧਿਪ੍ਪਾਯਵਿਰਹੇਨ ਪਰਿਸੁਦ੍ਧਚਿਤ੍ਤਸ੍ਸ.

੨੫੮. ਅਗ੍ਗਿਸ੍ਸ ਅਨੁਪਾਦਾਨੇ ਕਪਾਲੇ ਵਾ ਅਨੁਪਾਦਾਨਾਯ ਇਟ੍ਠਕਾਯ ਵਾ ਅਗ੍ਗਿਂ ਪਾਤੇਤੁਂ ਵਾ ਅਵਸੇ ਸਤਿ ਭੂਮਿਯਂ ਪਾਤੇਤੁਂ ਵਾ ਲਬ੍ਭਤੇਤਿ ਸਮ੍ਬਨ੍ਧੋ. ਉਪਾਦਾਨਂ ਇਨ੍ਧਨਂ, ਨ ਉਪਾਦਾਨਂ ਅਨੁਪਾਦਾਨਂ, ਤਸ੍ਮਿਂ. ਵਸੋ ਪਭੁਤ੍ਤਂ. ‘‘ਵਸੋ ਪਭੁਤ੍ਤੇ ਆਯਤ੍ਤੇ’’ਤਿ ਹਿ ਨਿਘਣ੍ਡੁ. ਨ ਵਸੋ ਅਵਸੋ, ਤਸ੍ਮਿਂ ਅਪਭੁਤ੍ਤੇਤਿ ਅਤ੍ਥੋ. ਪਤਿਤਟ੍ਠਾਨੇਯੇਵ ਉਪਾਦਾਨਂ ਦਤ੍ਵਾ ਅਗ੍ਗਿਂ ਕਾਤੁਂ ਵਟ੍ਟਤਿ. ਸੁਕ੍ਖਖਾਣੁਕਸੁਕ੍ਖਰੁਕ੍ਖਾਦੀਸੁ ਚ ਅਗ੍ਗਿਂ ਦਾਤੁਂ ਨ ਵਟ੍ਟਤਿ. ਸਚੇ ਪਨ ‘‘ਪਥਵਿਂ ਅਪ੍ਪਤ੍ਤਮੇਵ ਨਿਬ੍ਬਾਪੇਤ੍ਵਾ ਗਮਿਸ੍ਸਾਮੀ’’ਤਿ ਦੇਤਿ, ਵਟ੍ਟਤਿ, ਪਚ੍ਛਾ ਨਿਬ੍ਬਾਪੇਤੁਂ ਨ ਸਕ੍ਕੋਤਿ, ਅਵਿਸਯਤ੍ਤਾ ਅਨਾਪਤ੍ਤਿ. ‘‘ਭੂਮਿਯਂ ਪਾਤੇਹੀ’’ਤਿ ਏਵਮ੍ਪਿ ਵਤ੍ਤੁਂ ਨ ਵਟ੍ਟਤੀਤਿ.

ਪਥਵੀਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.