੩੫. ਪਰਿਕ੍ਖਾਰਨਿਦ੍ਦੇਸਵਣ੍ਣਨਾ
੨੫੯-੬੦. ਛਤ੍ਤੇ ਅਨ੍ਤੋ ਬਹਿ ਚ ਪਞ੍ਚਵਣ੍ਣੇਹਿ ਸੁਤ੍ਤੇਹਿ ਸਿਬ੍ਬਿਤੁਞ੍ਚ ਪਣ੍ਣੇ ਗਿਰਿਕੂਟਅਡ੍ਢਚਨ੍ਦਾਦਿਂ ਛਿਨ੍ਦਿਤੁਞ੍ਚ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਛਤ੍ਤੇਤਿ ਤਾਲਪਣ੍ਣੇ ਛਤ੍ਤੇ. ਗਿਰਿਕੂਟਂ ਨਾਮ ਮਕਰਦਨ੍ਤਕਂ, ਆਦਿ-ਸਦ੍ਦੇਨ ਤਾਦਿਸਂ ਅਞ੍ਞਂ ਵਿਕਾਰਰੂਪਂ ਸਙ੍ਗਹਿਤਂ. ਘਟਕਨ੍ਤਿ ਗੇਹਤ੍ਥਮ੍ਭੇਸੁ ਵਿਯ ਕਯਿਰਮਾਨਂ ਘਟਕਂ. ਦਣ੍ਡੇਤਿ ਛਤ੍ਤਦਣ੍ਡੇ. ਲੇਖਾਤਿ ਤਹਿਂ ਤਹਿਂ ਦਿਨ੍ਨਾ ਲੇਖਾ. ਸਾਦਿਸਨ੍ਤਿ ਦੀਘੇਨ ਨਿਦ੍ਦਿਟ੍ਠਂ. ਬੁਨ੍ਦਮ੍ਹਿ ਮੂਲੇ.
੨੬੧. ਥਿਰਤ੍ਥਂ ਛਤ੍ਤੇ ਏਕਵਣ੍ਣੇਨ ਸਿਬ੍ਬਿਤੁਂ ਵਾ ਪਞ੍ਜਰਂ ਵਿਨਨ੍ਧਿਤੁਂ ਵਾ ਵਟ੍ਟਤੀਤਿ ਸਮ੍ਬਨ੍ਧੋ. ਸਿਬ੍ਬਿਤੁਨ੍ਤਿ ਅਨ੍ਤੋ ਬਹਿ ਚ ਸਿਬ੍ਬਿਤੁਂ. ਏਕਵਣ੍ਣੇਨਾਤਿ ਨੀਲਾਦਿਨਾ ਏਕਵਣ੍ਣੇਨ. ਪਞ੍ਜਰਨ੍ਤਿ ਛਤ੍ਤਦਣ੍ਡਗਾਹਕਸਲਾਕਪਞ੍ਜਰਂ. ਥਿਰਤ੍ਥਨ੍ਤਿ ਇਮਿਨਾ ਨ ਵਣ੍ਣਮਟ੍ਠਤ੍ਥਾਯਾਤਿ ਦਸ੍ਸੇਤਿ. ਬਨ੍ਧਿਤੁਂ ਦਣ੍ਡੇ ਲੇਖਾ ਵਟ੍ਟਤੀਤਿ ਸਮ੍ਬਨ੍ਧੋ. ਬਨ੍ਧਿਤੁਨ੍ਤਿ ਵਾਤਪ੍ਪਹਾਰੇਨ ਅਚਲਨਤ੍ਥਂ ਛਤ੍ਤਮਣ੍ਡਲਿਕਂ ਰਜ੍ਜੁਕੇਹਿ ਗਹੇਤ੍ਵਾ ਬਨ੍ਧਨਤ੍ਥਾਯ. ਲੇਖਾਵਾਤਿ ਵਲਯਮਿਵ ਉਕ੍ਕਿਰਿਤ੍ਵਾ ਕਤਾ ਲੇਖਾ ਏਵ. ਵਟ੍ਟਤੀਤਿ ਯਦਿਪਿ ਨ ਬਨ੍ਧਤਿ, ਰਜ੍ਜੁਕੇਹਿ ਬਨ੍ਧਿਤੁਂ ਯੁਤ੍ਤਟ੍ਠਾਨਤ੍ਤਾ ਵਟ੍ਟਤਿ.
੨੬੨. ਚੀਵਰੇ ਅਨ੍ਤੇ ਵਾਪਿ ਪਟ੍ਟਮੁਖੇ ਵਾਪਿ ਵੇਣਿਪਿ ਵਾ ਸਙ੍ਖਲਿਕਾਪਿ ਵਾ ਅਞ੍ਞਂ ਸੂਚਿਵਿਕਾਰਂ ਵਾ ਪਾਲ਼ਿਕਣ੍ਣਿਕਆਦਿਕਂ ਕਪ੍ਪਬਿਨ੍ਦੁਵਿਕਾਰਮ੍ਪਿ ਵਾ ਨ ਚ ਕਪ੍ਪਤੀਤਿ ਸਮ੍ਬਨ੍ਧੋ. ਅਨ੍ਤੇਤਿ ਚੀਵਰਪਰਿਯਨ੍ਤੇ, ਅਨੁਵਾਤੇਤਿ ਵੁਤ੍ਤਂ ਹੋਤਿ. ਪਟ੍ਟਮੁਖੇਤਿ ਪਟ੍ਟਕੋਟਿਯਂ, ਦ੍ਵਿਨ੍ਨਂ ਪਟ੍ਟਾਨਂ ਸਙ੍ਘਟਿਤਟ੍ਠਾਨਂ ਸਨ੍ਧਾਯੇਤਂ ਵੁਤ੍ਤਂ. ਵੇਣੀਤਿ ਵਰਕਸੀਸਾਕਾਰੇਨ ਸਿਬ੍ਬਨਂ. ਸਙ੍ਖਲਿਕਾਤਿ ਬਿਲ਼ਾਲਬਨ੍ਧਨਾਕਾਰੇਨ ਸਿਬ੍ਬਨਂ. ਅਞ੍ਞਂ ਸੂਚਿਵਿਕਾਰਂ ਵਾਤਿ ਚੀਵਰਮਣ੍ਡਨਤ੍ਥਾਯ ਕਯਿਰਮਾਨਂ ਅਞ੍ਞਂ ਯਂ ਕਿਞ੍ਚਿ ਸੂਚਿਕਮ੍ਮਵਿਕਾਰਂ ਵਾ. ਟੀਕਾਯਂ ਪਨ ‘‘ਸਤਪਦਿਸਦਿਸਂ ਅਞ੍ਞਂ ਵਾ ਸੂਚਿਵਿਕਾਰਂ ਨ ਕਪ੍ਪਤੀ’’ਤਿ ਸਾਮਞ੍ਞੇਨ ਵੁਤ੍ਤਂ. ‘‘ਚੀਵਰਮਣ੍ਡਨਤ੍ਥਾਯ ਨਾਨਾਸੁਤ੍ਤਕੇਹਿ ਸਤਪਦਿਸਦਿਸਂ ਸਿਬ੍ਬਨ੍ਤਾ ਆਗਨ੍ਤੁਕਪਟ੍ਟਂ ਠਪੇਨ੍ਤਿ, ਅਞ੍ਞਮ੍ਪਿ ਯਂ ਕਿਞ੍ਚਿ ਸੂਚਿਕਮ੍ਮਵਿਕਾਰਂ ਕਰੋਨ੍ਤਿ, ਸਬ੍ਬਂ ਨ ਵਟ੍ਟਤੀ’’ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਪਨ ਨਾਨਾਵਣ੍ਣੇਹਿ ਵਾ ਹੋਤੁ, ਏਕਵਣ੍ਣੇਨ ਵਾ ਹੋਤੁ, ਚੀਵਰਮਣ੍ਡਨਤ੍ਥਾਯ ਸਂਸਿਬ੍ਬਨ੍ਤਾਨਂ ਸੂਚਿਕਮ੍ਮਵਿਕਾਰਂ ਸਨ੍ਧਾਯ ਵੁਤ੍ਤਨ੍ਤਿ ਚੀਵਰੇਸੁ ਫਾਲਿਤਟ੍ਠਾਨਸ੍ਸ ਥਿਰਭਾਵਤ੍ਥਂ ਸਤਪਦਿਸਦਿਸਮ੍ਪਿ ਸਿਬ੍ਬਿਤੁਂ ਵਟ੍ਟਤੀਤਿ ਅਮ੍ਹਾਕਂ ਖਨ੍ਤਿ. ਪਾਲ਼ਿ-ਸਦ੍ਦੇਨ, ਕਣ੍ਣਿਕ-ਸਦ੍ਦੇਨ ਚ ਕਪ੍ਪ-ਸਦ੍ਦਲੋਪੇਨ ਵਾ ਉਪਚਾਰੇਨ ਵਾ ਪਾਲ਼ਿਕਪ੍ਪਾਦਯੋਵ ਗਹਿਤਾ. ਪਾਲ਼ਿ ਚ ਕਣ੍ਣਿਕਾ ਚ ਪਾਲ਼ਿਕਣ੍ਣਿਕਾਯੋ, ਤਾ ਆਦਿ ਯਸ੍ਸ ਅਞ੍ਞਸ੍ਸ ਤਾਦਿਸਸ੍ਸਾਤਿ ਵਿਗ੍ਗਹੋ. ਤਤ੍ਥ ਨੀਲਾਵਲ਼ਿਆਦਿਸਣ੍ਠਾਨਾਯ ਬਿਨ੍ਦੁਪਨ੍ਤਿਯਾ ਯਥਾ ਸੋਭਤਿ, ਤਥਾ ਕਯਿਰਮਾਨੋ ਪਾਲ਼ਿਕਪ੍ਪੋ. ਤਥੇਵ ਬਿਨ੍ਦੁਸਮੂਹੇ ਕਤ੍ਥਚਿ ਦਸ੍ਸੇਤ੍ਵਾ ਕਯਿਰਮਾਨੋ ਕਣ੍ਣਿਕਕਪ੍ਪੋ.
੨੬੩. ਗਣ੍ਠਿਪਾਸਕਪਟ੍ਟਾਤਿ ਗਣ੍ਠਿਨੋ ਚ ਪਾਸਕਸ੍ਸ ਚ ਪਤਿਟ੍ਠਾਨਟ੍ਠਾਨੇ ਠਪੇਤਬ੍ਬਾ ਪਟ੍ਟਾ. ਵਟ੍ਟਤੀਤਿ ਏਤ੍ਥ ‘‘ਗਣ੍ਠਿਪਾਸਕਾ’’ਤਿ ਕਤ੍ਵਾ ‘‘ਚਤੁਕੋਣਾਵ ਵਟ੍ਟਨ੍ਤੀ’’ਤਿ ਅਤ੍ਥਤੋ ਵਚਨਂ ਵਿਪਲ੍ਲਾਸੇਤ੍ਵਾ ਯੋਜੇਤਬ੍ਬਂ. ਅਗ੍ਘਿਯਨ੍ਤਿ ਚੇਤਿਯਸਣ੍ਠਾਨੇਨ ਸਿਬ੍ਬਨਂ. ਮੂਲੇ ਚ ਅਗ੍ਗੇ ਚ ਏਕਸਦਿਸਂ ਕਤ੍ਵਾ ਮੁਗ੍ਗਰਾਕਾਰੇਨ ਸਿਬ੍ਬਨਂ ਮੁਗ੍ਗਰੋ. ਵਿਕਾਰਨ੍ਤਿ ਵਿਕਾਰੋ, ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਏਤ੍ਥਾਤਿ ਗਣ੍ਠਿਪਾਸਕਪਟ੍ਟੇਸੁ.
੨੬੪. ਕੋਣਸੁਤ੍ਤਾਤਿ ਨਪੁਂਸਕਨਿਦ੍ਦੇਸੋ, ਗਣ੍ਠਿਪਾਸਕਪਟ੍ਟਾਨਂ ਕੋਣੇਹਿ ਨੀਹਟਸੁਤ੍ਤਕੋਟਿਯੋ. ਪੀਲ਼ਕਾਤਿ ਤਾਨਿਯੇਵ ਨਿਵਤ੍ਤੇਤ੍ਵਾ ਪੀਲ਼ਕਾਕਾਰੇਨ ਕਤਾਨਿ. ਦੁਵਿਞ੍ਞੇਯ੍ਯਾਵਾਤਿ ਤੇਸਂ ਅਨ੍ਤੇਸੁ ਏਕਵਾਰਂ ਗਣ੍ਠਿਕਰਣੇਨ ਵਾ ਪੁਨ ਨਿਵਤ੍ਤੇਤ੍ਵਾ ਸਿਬ੍ਬਨੇਨ ਵਾ ਦੁਵਿਞ੍ਞੇਯ੍ਯਾ ਏਵ. ਗਨ੍ਧਂ ਤੇਲਂ ਵਾਤਿ ਗਨ੍ਧਂ ਵਾ ਤੇਲਂ ਵਾ. ਕਞ੍ਚਿਕਪਿਟ੍ਠਖਲਿਕਆਦੀਨਿਪਿ ਵਟ੍ਟਨ੍ਤਿ.
੨੬੫. ਮਣਿਨਾਤਿ ਮਸਾਰਗਲ੍ਲਾਦਿਪਾਸਾਣੇਨ. ਨ ਚ ਘਟ੍ਟੇਯ੍ਯਾਤਿ ਨੇਵ ਘਟ੍ਟੇਯ੍ਯ. ਅਞ੍ਞੇਨ ਵਾਤਿ ਮੁਗ੍ਗਰਮੁਸਲਾਦਿਨਾ. ਅਂਸਬਦ੍ਧਕਕਾਯਬਨ੍ਧਨਾਨਿ ਪਨ ਤਥਾ ਕਾਤੁਂ ਵਟ੍ਟਤਿ. ਦੋਣਿਯਂ ਕਤ੍ਵਾ ਨ ਚ ਘਂਸੇਯ੍ਯਾਤਿ ਪਕ੍ਕਰਜਨਾਕਿਰਣਦੋਣਿਯਂ ਠਪੇਤ੍ਵਾ ਭੂਮਿਯਂ ਜਣ੍ਣੁਕਾਨਿ ਨਿਹਨ੍ਤ੍ਵਾ ਇਤੋ ਚਿਤੋ ਚ ਆਵਿਜ੍ਝਿਤ੍ਵਾ ਨੇਵ ਘਂਸੇਯ੍ਯਾਤਿ ਅਤ੍ਥੋ.
੨੬੬-੭. ਕਣ੍ਣਕੋਣਕਸੁਤ੍ਤਾਨੀਤਿ ਚੀਵਰਰਜਨਕਾਲੇ ਲਗ੍ਗਨਤ੍ਥਾਯ ਅਨੁਵਾਤੇ ਚਤੂਸੁ ਕੋਣੇਸੁ ਚ ਪਾਸਕਂ ਕਤ੍ਵਾ ਬਨ੍ਧਿਤਾਨਿ ਸੁਤ੍ਤਾਨਿ, ਯਾਨਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕ’’ਨ੍ਤਿ (ਮਹਾਵ. ੩੪੪) ਏਵਂ ਅਨੁਞ੍ਞਾਤਾਨਿ. ਕਣ੍ਣਸਙ੍ਖਾਤਾ ਕੋਣਾ ਕਣ੍ਣਕੋਣਕਾ, ਤੇਸੁ ਸੁਤ੍ਤਾਨਿ. ਗਣ੍ਠਿਕਪਾਸਕਪਟ੍ਟੇਸੁ ਪਨ ਕਣ੍ਣਕੋਣਕਸੁਤ੍ਤਾਨਂ ਦੁਵਿਞ੍ਞੇਯ੍ਯਾਨਮੇਵ ਕਪ੍ਪਿਯਤਾ ਹੇਟ੍ਠਾ ਵੁਤ੍ਤਾਤਿ ਚੀਵਰੇ ਰਤ੍ਤੇਯੇਵ ਤੇਸਂ ਛਿਨ੍ਦਿਤਬ੍ਬਤਾ ਨਤ੍ਥਿ, ਕਣ੍ਣਕੋਣਕਸੁਤ੍ਤਾਨਂ ਛਿਨ੍ਦਿਤਬ੍ਬਤਾਯ ਵੁਤ੍ਤਤ੍ਤਾ ਅਨੁਵਾਤੇਹਿ ਨਿਕ੍ਖਮਿਤਸੁਤ੍ਤਾਨਿਪਿ ਛਿਨ੍ਦਿਤਬ੍ਬਾਨੀਤਿ ਵੇਦਿਤਬ੍ਬਂ. ਧਮ੍ਮਕਰਣੇ ਛਤ੍ਤਵਟ੍ਟਿਯਂ ਲੇਖਂ ਠਪੇਤ੍ਵਾ ਲੇਖਾ ਨ ਵਟ੍ਟਤੀਤਿ ਯੋਜਨਾ. ਛਤ੍ਤਵਟ੍ਟਿਯਨ੍ਤਿ ਛਤ੍ਤਸ੍ਸ ਮੁਖਵਟ੍ਟਿਯਂ. ਲੇਖਾਤਿ ਉਪਰਿ ਵਾ ਹੇਟ੍ਠਾ ਵਾ ਕੁਚ੍ਛਿਯਂ ਵਾ ਅਞ੍ਞਾ ਲੇਖਾ. ਕੁਞ੍ਚਿਕਾਯ ਚ ਪਿਪ੍ਫਲੇ ਚ ਮਣਿਕਾ ਚ ਪੀਲ਼ਕਾ ਚ ਨ ਵਟ੍ਟਨ੍ਤੀਤਿ ਸਮ੍ਬਨ੍ਧੋ. ਮਣਿਕਾਤਿ ਏਕਾ ਵਟ੍ਟਮਣਿ. ਪੀਲ਼ਕਾਤਿ ਸਾਸਪਮਤ੍ਤਿਕਾ ਮੁਤ੍ਤਰਾਜਿਸਦਿਸਾ ਬਹੁਵਟ੍ਟਲੇਖਾ. ਦਣ੍ਡਮ੍ਹੀਤਿ ਪਿਪ੍ਫਲਦਣ੍ਡਕੇ.
੨੬੮-੯. ਅਰਣਿਯਂ ਮਾਲਾਦਿ ਚ ਪਤ੍ਤਮਣ੍ਡਲੇ ਭਿਤ੍ਤਿਕਮ੍ਮਞ੍ਚ ਨ ਵਟ੍ਟਤੀਤਿ ਸਮ੍ਬਨ੍ਧਿਤਬ੍ਬਂ. ਅਰਣਿਯਨ੍ਤਿ ਉਤ੍ਤਰਾਰਣਿ ਅਧਰਾਰਣਿ ਅਰਣਿਧਨੁਕਞ੍ਚ ਸਾਮਞ੍ਞੇਨ ਗਹਿਤਂ. ਪਤ੍ਤਮਣ੍ਡਲੇਤਿ ਤਿਪੁਸੀਸਾਦਿਮਯੇ ਪਤ੍ਤਮਣ੍ਡਲੇ. ਏਤ੍ਥ ਪਨ ਮਕਰਦਣ੍ਡਕਂ ਵਟ੍ਟਤਿ. ਹੇਟ੍ਠਾਤਿ ਕਤ੍ਤਰਯਟ੍ਠਿਯਾ ਹੇਟ੍ਠਾ. ਉਦ੍ਧਨ੍ਤਿ ਤਸ੍ਸਾਯੇਵ ਉਪਰਿ.
੨੭੦-੩. ਸਮ੍ਮੁਞ੍ਜਨਿਮ੍ਹੀਤਿ ਸਮ੍ਮੁਞ੍ਜਨਿਯਾ ਲਿਙ੍ਗਵਿਪਲ੍ਲਾਸੋ. ਅਵਾਰਿਤਨ੍ਤਿ ਇਤ੍ਥਿਰੂਪਂ ਪਨ ਵਾਰਿਤਂ. ਸੋਵਣ੍ਣਮਯਮ੍ਪੀਤਿ ਸੁਵਣ੍ਣਮਯਮ੍ਪਿ. ਵਿਸਾਣਨਾਲ਼ਿ ਨਾਮ ਵਿਸਾਣਮਯਾ ਨਾਲ਼ਿ. ਏਤ੍ਥ ਪਨ ਅਵੁਤ੍ਤਾਨਿਪਿ ਯਾਨਿ ਕਾਨਿਚਿ ਆਰਕਣ੍ਡਕਦਨ੍ਤਕਟ੍ਠਛੇਦਨਪਾਨੀਯਘਟਪਾਨੀਯਉਲ਼ੁਙ੍ਕਚੁਣ੍ਣਭਾਜਨਾਦੀਨਿ ਵੁਤ੍ਤਾਨਂ ਅਨੁਲੋਮਾਨੀਤਿ ਵੇਦਿਤਬ੍ਬਾਨਿ. ਯੋ ਪਨੇਤ੍ਥ ਵਿਨਯਞ੍ਞੂ ਤਾਦਿਸਂ ਪਰਿਕ੍ਖਾਰਂ ਦਿਸ੍ਵਾ ਛਿਨ੍ਦੇਯ੍ਯ ਵਾ ਛਿਨ੍ਦਾਪੇਯ੍ਯ ਵਾ, ਅਨੁਪਵਜ੍ਜੋ ਸੋਤਿ ਵੇਦਿਤਬ੍ਬਨ੍ਤਿ.
ਪਰਿਕ੍ਖਾਰਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.