੩੩. ਕਾਯਬਨ੍ਧਨਨਿਦ੍ਦੇਸਵਣ੍ਣਨਾ

੨੩੫. ਬਨ੍ਧੀਯਤਿ ਅਨੇਨਾਤਿ ਬਨ੍ਧਨਂ, ਕਾਯਸ੍ਸ ਬਨ੍ਧਨਂ ਕਾਯਬਨ੍ਧਨਂ, ਨਤ੍ਥਿ ਕਾਯਬਨ੍ਧਨਮੇਤਸ੍ਸਾਤਿ ਅਕਾਯਬਨ੍ਧਨੋ. ਦੁਕ੍ਕਟਨ੍ਤਿ ਸਞ੍ਚਿਚ੍ਚ ਵਾ ਅਸਞ੍ਚਿਚ੍ਚ ਵਾ ਪਵਿਸੇਯ੍ਯ ਚੇ, ਦੁਕ੍ਕਟਂ. ਅਸਤਿਯਾ ਗਤੋ ਯਤ੍ਥ ਸਰਤਿ, ਤਤ੍ਥੇਵ ਬਨ੍ਧੇਯ੍ਯਾਤਿ ਸਮ੍ਬਨ੍ਧੋ. ਗਤੋਤਿ ਅਨ੍ਤੋਗਾਮਂ ਗਤੋ. ਸਰਿਤ੍ਵਾ ਯਾਵ ਨ ਬਨ੍ਧਤਿ, ਨ ਤਾਵ ਪਿਣ੍ਡਾਯ ਚਰਿਤਬ੍ਬਂ.

੨੩੬. ‘‘ਪਟ੍ਟਿਕਾ’’ਤਿਆਦਿਨਾ ਸਬ੍ਬਸਙ੍ਗਾਹਕਂ ਕਾਯਬਨ੍ਧਨਂ ਨਿਦ੍ਦਿਸਤਿ. ਪਟ੍ਟਿਕਾਤਿ ਪਕਤਿਵੀਤਾ ਵਾ ਮਚ੍ਛਕਣ੍ਟਕਖਜ੍ਜੂਰਿਪਤ੍ਤਵਾਯਿਮਾ ਵਾ. ਸੂਕਰਾਨਂ ਅਨ੍ਤਂ ਸੂਕਰਨ੍ਤਂ. ਇਧ ਪਨ ਤਂਸਦਿਸਂ ਵੁਚ੍ਚਤਿ. ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤਂ ਮੁਦ੍ਦਿਕਕਾਯਬਨ੍ਧਨਮ੍ਪਿ ਸਙ੍ਗਹੇਤ੍ਵਾ ‘‘ਏਕਾ ਰਜ੍ਜੂ’’ਤਿ ਵੁਤ੍ਤਂ. ਤਂ ਪਨ ਰਜ੍ਜੁਕਂ ਬਨ੍ਧਨ੍ਤੇਨ ਏਕਗੁਣਮੇਵ ਕਤ੍ਵਾ ਬਨ੍ਧਿਤੁਂ ਵਟ੍ਟਤਿ, ਮਜ੍ਝੇ ਭਿਨ੍ਦਿਤ੍ਵਾ ਦਿਗੁਣਂ ਕਤ੍ਵਾ ਬਨ੍ਧਿਤੁਂ ਨ ਵਟ੍ਟਤਿ. ਦਿਗੁਣਂ ਪਨ ਅਕਤ੍ਵਾ ਸਤਵਾਰਮ੍ਪਿ ਪੁਨਪ੍ਪੁਨਂ ਆਵਿਜ੍ਝਿਤ੍ਵਾ ਬਨ੍ਧਿਤੁਂ ਵਟ੍ਟਤਿ, ਪਾਮਙ੍ਗਸਣ੍ਠਾਨਂ ਪਨ ਏਕਮ੍ਪਿ ਨ ਵਟ੍ਟਤਿ. ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ‘‘ਬਹੁਰਜ੍ਜੁਕ’’ਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤਿ. ਤਦਨੁਲੋਮਿਕਾਤਿ ਤੇਸਂ ਪਟ੍ਟਿਕਾਸੂਕਰਨ੍ਤਾਨਂ ਦ੍ਵਿਨ੍ਨਂ ਦ੍ਵੇ ਇਮੇ ਯਥਾਕ੍ਕਮਮਨੁਲੋਮਿਕਾ.

੨੩੭-੮. ਪਟ੍ਟਿਕਾ ਕੀਦਿਸੀ ਵਟ੍ਟਤੀਤਿ ਆਹ ‘‘ਮਚ੍ਛਾ’’ਤਿਆਦਿ. ਪਟ੍ਟਿਕਾ ਮਚ੍ਛਕਣ੍ਟਕਖਜ੍ਜੂਰਿਪਤ੍ਤਾ ਵਾ ਮਟ੍ਠਾ ਵਾ ਲਬ੍ਭਾਤਿ ਸਮ੍ਬਨ੍ਧੋ. ਕਣ੍ਟਕ-ਸਦ੍ਦੇਨ ਪਤ੍ਤ-ਸਦ੍ਦੇਨ ਚ ਤਦਾਕਾਰੋ ਵੁਚ੍ਚਤਿ, ਉਪਚਾਰਤੋ ਹਿ ਮਚ੍ਛਾਨਂ ਕਣ੍ਟਕਾਕਾਰੋ ਚ ਖਜ੍ਜੂਰੀਨਂ ਪਤ੍ਤਾਕਾਰੋ ਚ ਏਤਿਸ੍ਸਾਤਿ ਸਮਾਸੋ. ਮਟ੍ਠਾਤਿ ਪਕਤਿਵੀਤਾ. ਟੀਕਾਯਂ ਪਨ ‘‘ਏਤੇ ਮਚ੍ਛਕਣ੍ਟਕਾਦਯੋ ਮਟ੍ਠਾ ਵਿਕਾਰਰਹਿਤਾ ਪਟ੍ਟਿਕਾ ਚ ਤਦਨ੍ਤੋਗਧਾਤਿ ਅਧਿਪ੍ਪਾਯੋ’’ਤਿ ਵੁਤ੍ਤਂ. ਕਥਂ ਤੇਸਮਨ੍ਤੋਗਧਤਾ? ਯਤੋ ਤਾਨਿਯੇਵ ਪਟ੍ਟਿਕਾ ਨਾਮਾਤਿ. ਤਥਾ ਚ ਵੁਤ੍ਤਂ ਅਟ੍ਠਕਥਾਯਂ ‘‘ਪਕਤਿਵੀਤਾ ਵਾ ਮਚ੍ਛਕਣ੍ਟਕਵਾਯਿਮਾ ਵਾ ਪਟ੍ਟਿਕਾ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੨੭੮). ਏਤ੍ਥ ਪਨ ਮਚ੍ਛਕਣ੍ਟਕੇਯੇਵ ਖਜ੍ਜੂਰਿਪਤ੍ਤਂ ਪਵਿਟ੍ਠਂ. ਚਤਸ੍ਸੋਪਿ ਦਸਾ ਲਬ੍ਭਾਤਿ ਸਮ੍ਬਨ੍ਧੋ. ਚਤਸ੍ਸੋਤਿ ਉਕ੍ਕਟ੍ਠਪਰਿਚ੍ਛੇਦੇਨ ਵੁਤ੍ਤਂ, ਤਸ੍ਮਾ ਤਤੋ ਊਨਾਪਿ ਵਟ੍ਟਨ੍ਤਿ. ਅਨ੍ਤੇਤਿ ਕਾਯਬਨ੍ਧਨਸ੍ਸ ਉਭਯਨ੍ਤੇ ਦਿਗੁਣਸੁਤ੍ਤਕਂ ਲਬ੍ਭਨ੍ਤਿ ਸਮ੍ਬਨ੍ਧੋ. ਗੁਣੋ ਬਨ੍ਧਨਭੂਤਂ ਸੁਤ੍ਤਕਂ ਗੁਣਸੁਤ੍ਤਕਂ. ‘‘ਗੁਣੋ ਪਟਲਰਾਸੀਸੁ, ਆਨਿਸਂਸੇ ਚ ਬਨ੍ਧਨੇ’’ਤਿ ਹਿ ਅਭਿਧਾਨਪ੍ਪਦੀਪਿਕਾ. ਦ੍ਵਿਨ੍ਨਂ ਗੁਣਸੁਤ੍ਤਕਾਨਂ ਸਮਾਹਾਰੋ ਦਿਗੁਣਸੁਤ੍ਤਕਂ. ਤਂ ਦਸਾਮੁਖਸ੍ਸ ਥਿਰਭਾਵਾਯ ਕੋਟ੍ਟੇਤੁਂ ਵਟ੍ਟਤਿ, ਨ ਸੋਭਨਤ੍ਥਂ. ਤੇਨਾਹ ‘‘ਮਾਲਾਦਿ’’ਨ੍ਤਿਆਦਿ.

ਮਾਲਾਦਿਂ ਕਕ੍ਕਟਚ੍ਛਾਦਿਂ ਕੁਞ੍ਜਰਚ੍ਛਾਦਿਞ੍ਚ ਦਸ੍ਸੇਤ੍ਵਾ ਗੁਣਸੁਤ੍ਤਕਕੋਟ੍ਟਿਤਾ ਪਟ੍ਟਿਕਾ ਨ ਕਪ੍ਪਤੀਤਿ ਸਮ੍ਬਨ੍ਧੋ. ‘‘ਮਾਲਾਦਿ’’ਨ੍ਤਿਆਦੀਸੁ ਆਦਿ-ਸਦ੍ਦੇਨ ਤਾਦਿਸਂ ਯਂ ਕਿਞ੍ਚਿ ਵਿਕਾਰਰੂਪਂ ਗਯ੍ਹਤਿ. ਕਕ੍ਕਟਾਨਂ ਵਿਯ ਅਚ੍ਛੀਨਿ, ਤਾਨਿ ਆਦੀਨਿ ਯਸ੍ਸਾਤਿ ਸਮਾਸੋ. ਤਥਾ ਕੁਞ੍ਜਰਚ੍ਛਾਦਿਨ੍ਤਿ.

੨੩੯. ਘਟਕਨ੍ਤਿ ਘਟਕਾਕਾਰਵਟ੍ਟਲੇਖਾਰੂਪਂ. ਮਕਰਮੁਖਾਦਿਨ੍ਤਿ ਏਤ੍ਥ ਮਕਰਮੁਖਂ ਨਾਮ ਮਕਰਮੁਖਸਣ੍ਠਾਨਂ. ਬਿਨ੍ਦੁ ਪਨ ਆਗਮਵਸੇਨ ਵੁਤ੍ਤੋ. ਆਦਿ-ਸਦ੍ਦੇਨ ਦੇਡ੍ਡੁਭਸੀਸਾਦਿਵਿਕਾਰਰੂਪਂ ਯਂ ਕਿਞ੍ਚਿ ਸਙ੍ਗਯ੍ਹਤਿ. ਦਸਾਮੁਖੇਤਿ ਦਸਾਨਂ ਮੁਖਭੂਤੇ ਅਨ੍ਤੇ ਏਤਾਨਿ ਨ ਕਪ੍ਪਨ੍ਤੀਤਿ ਸਮ੍ਬਨ੍ਧੋ. ਵਿਧੇ ਉਭਨ੍ਤੇ ਘਟਕਾ ਲੇਖਾ ਅਞ੍ਞਂ ਚਿਤ੍ਤਕਞ੍ਚ ਨ ਕਪ੍ਪਨ੍ਤੀਤਿ ਸਮ੍ਬਨ੍ਧੋ. ਘਟਕਾਤਿ ਘਟਕਤੋ. ਲੇਖਾਤਿ ਲੇਖਾਯ. ਪਞ੍ਚਮਿਯਾ ਲੋਪੋ. ਵਿਧੇਤਿ ਕਾਯਬਨ੍ਧਨਸ੍ਸ ਪਾਸਨ੍ਤੇ ਦਸਾਮੂਲੇ ਤਸ੍ਸ ਥਿਰਭਾਵਤ੍ਥਂ ਕਤ੍ਤਬ੍ਬੇ ਦਨ੍ਤਵਿਸਾਣਾਦਿਮਯੇ ਵਿਧੇ.

੨੪੦. ਦੇਡ੍ਡੁਭਕਨ੍ਤਿ ਉਦਕਸਪ੍ਪਸੀਸਸਦਿਸਂ. ਮੁਰਜਨ੍ਤਿ ਨਾਨਾਵਣ੍ਣੇਹਿ ਸੁਤ੍ਤੇਹਿ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ. ਟੀਕਾਯਂ ਪਨ ‘‘ਮੁਰਜਨ੍ਤਿ ਬਹੁਰਜ੍ਜੁਕੇ ਏਕਤੋ ਸਙ੍ਕਡ੍ਢਿਤ੍ਵਾ ਏਕਾਯ ਰਜ੍ਜੁਯਾ ਪਲਿਵੇਠੇਤ੍ਵਾ ਕਤਰਜ੍ਜੂ’’ਤਿ ਵੁਤ੍ਤਂ, ਤਂ ‘‘ਬਹੁਰਜ੍ਜੁਕੇ ਏਕਤੋ ਕਤ੍ਵਾ’’ਤਿਆਦਿਨਾ ਹੇਟ੍ਠਾ ਵੁਤ੍ਤਅਟ੍ਠਕਥਾਵਚਨੇਨ ਵਿਰੁਜ੍ਝਤਿ. ਮਦ੍ਦਵੀਣਨ੍ਤਿ ਪਾਮਙ੍ਗਸਣ੍ਠਾਨਂ. ਕਲਾਬੁਕਨ੍ਤਿ ਬਹੁਰਜ੍ਜੁਕਂ. ਤੇਸਂ ‘‘ਨ ਕਪ੍ਪਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਦ੍ਵੇ ਮਜ੍ਝਿਮਾਤਿ ਮਜ੍ਝੇ ਭਵਾ ਮੁਰਜਮਦ੍ਦਵੀਣਸਙ੍ਖਾਤਾ ਦ੍ਵੇ.

੨੪੧. ਗਣ੍ਠਿਯੋ ਚਾਪੀਤਿ ਚੀਵਰਸ੍ਸ ਗਣ੍ਠਿਯੋ ਚਾਪਿ. ਤਮ੍ਮਯਾਤਿ ਤੇਹਿ ਵੇਲ਼ੁਆਦੀਹਿ ਨਿਬ੍ਬਤ੍ਤਾ. ਪਸਙ੍ਗੇਨ ਪਨੇਤਂ ਵੁਤ੍ਤਨ੍ਤਿ.

ਕਾਯਬਨ੍ਧਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਸੁਮਙ੍ਗਲਪ੍ਪਸਾਦਨਿਯਾ ਨਾਮ ਟੀਕਾਯ

ਪਠਮਭਾਣਵਾਰਵਣ੍ਣਨਾ ਨਿਟ੍ਠਿਤਾ.