੩੨. ਨਿਸ੍ਸਯਨਿਦ੍ਦੇਸਵਣ੍ਣਨਾ

੨੩੦. ਬ੍ਯਤ੍ਤਸ੍ਸਾਤਿ ‘‘ਕਾਰਿਯ’’ਨ੍ਤਿ ਕਿਤਕਯੋਗੇ ਕਤ੍ਤਰਿ ਛਟ੍ਠੀ. ਬ੍ਯਤ੍ਤੋ ਚ ਨਾਮ ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ, ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬ’’ਨ੍ਤਿ (ਮਹਾਵ. ੧੦੩) ਏਵਂ ਵੁਤ੍ਤਬ੍ਯਤ੍ਤੋ ਚ ਬਹੁਸ੍ਸੁਤਬ੍ਯਤ੍ਤੋ ਚ ਵੇਦਿਤਬ੍ਬੋ.

ਤਤ੍ਥ ਸੁਵਿਭਤ੍ਤਾਨੀਤਿ ਸੁਟ੍ਠੁ ਵਿਭਤ੍ਤਾਨਿ ਪਦਪਚ੍ਚਾਭਟ੍ਠਸਙ੍ਕਰਦੋਸਵਿਰਹਿਤਾਨਿ. ਸੁਪ੍ਪਵਤ੍ਤੀਨੀਤਿ ਪਗੁਣਾਨਿ ਵਾਚੁਗ੍ਗਤਾਨਿ. ਸੁਵਿਨਿਚ੍ਛਿਤਾਨਿ ਸੁਤ੍ਤਸੋਤਿ ਖਨ੍ਧਕਪਰਿਵਾਰਤੋ ਆਹਰਿਤਬ੍ਬਸੁਤ੍ਤਵਸੇਨ ਸੁਟ੍ਠੁ ਵਿਨਿਚ੍ਛਿਤਾਨਿ. ਅਨੁਬ੍ਯਞ੍ਜਨਸੋਤਿ ਅਕ੍ਖਰਪਦਪਾਰਿਪੂਰਿਯਾ ਸੁਵਿਨਿਚ੍ਛਿਤਾਨਿ ਅਕ੍ਖਣ੍ਡਾਨਿ ਅਵਿਪਰੀਤਕ੍ਖਰਾਨਿ. ਏਤੇਨ ਅਟ੍ਠਕਥਾ ਦੀਪਿਤਾ. ਅਟ੍ਠਕਥਾਤੋ ਹਿ ਏਸ ਵਿਨਿਚ੍ਛਯੋ ਹੋਤੀਤਿ. ਬਹੁਸ੍ਸੁਤਬ੍ਯਤ੍ਤੋ ਪਨ ਯੇਨ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਦ੍ਵੇ ਮਾਤਿਕਾ ਪਗੁਣਾ ਵਾਚੁਗ੍ਗਤਾ, ਪਕ੍ਖਦਿਵਸੇਸੁ ਧਮ੍ਮਸਵਨਤ੍ਥਾਯ ਸੁਤ੍ਤਨ੍ਤਤੋ ਚਤ੍ਤਾਰੋ ਭਾਣਵਾਰਾ, ਸਮ੍ਪਤ੍ਤਾਨਂ ਪਰਿਸਾਨਂ ਪਰਿਕਥਨਤ੍ਥਾਯ ਅਨ੍ਧਕਵਿਨ੍ਦਮਹਾਰਾਹੁਲੋਵਾਦਅਮ੍ਬਟ੍ਠਸਦਿਸੋ ਏਕੋ ਕਥਾਮਗ੍ਗੋ, ਸਙ੍ਘਭਤ੍ਤਮਙ੍ਗਲਾਮਙ੍ਗਲੇਸੁ ਅਨੁਮੋਦਨਤ੍ਥਾਯ ਤਿਸ੍ਸੋ ਅਨੁਮੋਦਨਾ, ਉਪੋਸਥਪ੍ਪਵਾਰਣਾਦਿਜਾਨਨਤ੍ਥਂ ਕਮ੍ਮਾਕਮ੍ਮਵਿਨਿਚ੍ਛਯੋ, ਸਮਣਧਮ੍ਮਕਰਣਤ੍ਥਂ ਸਮਾਧਿਵਸੇਨ ਵਿਪਸ੍ਸਨਾਵਸੇਨ ਵਾ ਅਰਹਤ੍ਤਮਗ੍ਗਪਰਿਯੋਸਾਨਮੇਕਂ ਕਮ੍ਮਟ੍ਠਾਨਂ ਏਤ੍ਤਕਂ ਉਗ੍ਗਹਿਤਂ, ਸ੍ਵਾਯਂ ਵੁਚ੍ਚਤਿ. ਨਤ੍ਥਿ ਨਿਸ੍ਸਾਯ ਕਾਰਿਯਨ੍ਤਿ ਆਚਰਿਯਾਦਿਂ ਨਿਸ੍ਸਾਯ ਵਾਸੇਨ ਕਤ੍ਤਬ੍ਬਂ ਨਤ੍ਥਿ. ‘‘ਨਿਸ੍ਸਯਕਾਰਿਯ’’ਨ੍ਤਿ ਵਾ ਪਾਠੋ, ਨਿਸ੍ਸਯੇਨ ਕਾਰਿਯਨ੍ਤਿ ਸਮਾਸੋ. ਜੀਵਸ੍ਸ ਯਤ੍ਤਕੋ ਪਰਿਚ੍ਛੇਦੋ ਯਾਵਜੀਵਂ.

੨੩੧. ਤੇਨ ਨਿਸ੍ਸਾਯ ਵਸਨ੍ਤੇਨ ਏਵਂ ਨਿਸ੍ਸਯੋ ਗਹੇਤਬ੍ਬੋਤਿ ਦਸ੍ਸੇਤੁਂ ‘‘ਏਕਂਸ’’ਨ੍ਤਿਆਦਿ ਵੁਤ੍ਤਂ. ਏਕਂਸਨ੍ਤਿ ਏਕੋ ਅਂਸੋ ਅਸ੍ਸ ਚੀਵਰਸ੍ਸਾਤਿ ਵਿਗ੍ਗਹੋ. ਕਿਰਿਯਾਵਿਸੇਸਨਂ ਵਾ ਭੁਮ੍ਮਤ੍ਥੇ ਵਾ ਉਪਯੋਗਵਚਨਂ, ਏਕਸ੍ਮਿਂ ਅਂਸੇਤਿ ਅਤ੍ਥੋ. ਅਞ੍ਜਲਿ ਕਰਪੁਟੋ. ਯਾਵਤਤਿਯਕਂ ਵਦੇਤਿ ਉਪਸਮ੍ਪਦਾਯ ਸਟ੍ਠਿਵਸ੍ਸੇਨ ਸਤ੍ਤਤਿਵਸ੍ਸੇਨ ਵਾਪਿ ਬ੍ਯਤ੍ਤਸ੍ਸ ਨਵਕਸ੍ਸ ਸਨ੍ਤਿਕੇ ਯਾਵਤਤਿਯਕਂ ਵਚਨਂ ਕਰੇਯ੍ਯ. ਯਾਵਤਤਿਯੋ ਵਾਰੋ ਅਸ੍ਸਾਤਿ ਕਿਰਿਯਾਵਿਸੇਸਨਸਮਾਸੋ. ਆਯਸ੍ਮਤੋਤਿ ਆਯਸ੍ਮਨ੍ਤਂ. ਵਚ੍ਛਾਮੀਤਿ ਵਸਾਮਿ. ਉਪਜ੍ਝਂ ਗਣ੍ਹਨ੍ਤੇਨਾਪਿ ‘‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’’ਤਿ ਗਹੇਤਬ੍ਬਂ. ਤਂ ਪਨ ‘‘ਆਚਰਿਯੋ’’ਤਿ ਏਤ੍ਥ ‘‘ਉਪਜ੍ਝਾਯੋ’’ਤਿ ਵਚਨਂ ਵਿਸੇਸੋਤਿ ਏਤ੍ਥ ਵਾਚਾਭੇਦਤੋ ਨ ਵਿਸੁਂ ਵੁਤ੍ਤਂ. ਨ ਕੇਵਲਮੇਤ੍ਥ ਨਿਸ੍ਸਯੁਪਜ੍ਝਾਯਗਹਣੇ, ਗਾਮਪ੍ਪਵੇਸਨਾਦੀਸੁਪਿ ਏਵਮੇਵ ਕਤ੍ਵਾ ‘‘ਅਹਂ ਆਵੁਸੋ’’ਤਿ ਵਾ ‘‘ਭਨ੍ਤੇ’’ਤਿ ਵਾ ਵਤ੍ਵਾ ‘‘ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿਆਦਿਨਾ ਵਤ੍ਤਬ੍ਬਂ.

੨੩੨. ਨਿਸ੍ਸਯਪਟਿਪ੍ਪਸ੍ਸਦ੍ਧਿਂ ਦਸ੍ਸੇਤਿ ‘‘ਪਕ੍ਕਨ੍ਤੇ’’ਤਿਆਦਿਨਾ. ਪਕ੍ਕਨ੍ਤੇਤਿ ਉਪਜ੍ਝਾਯੇ ਆਚਰਿਯੇ ਸਦ੍ਧਿਵਿਹਾਰਿਕੇ ਅਨ੍ਤੇਵਾਸਿਕੇ ਚ ਗਾਮਾਦੀਸੁ ਯਤ੍ਥ ਕਤ੍ਥਚਿ ਆਪੁਚ੍ਛਿਤ੍ਵਾ ਵਾ ਅਨਾਪੁਚ੍ਛਿਤ੍ਵਾ ਵਾ ਗਤੇ. ਤੇਸੁ ਯੇਨ ਕੇਨਚਿ ‘‘ਅਸੁਕਂ ਨਾਮ ਗਾਮਂ ਗਚ੍ਛਾਮੀ’’ਤਿ ਵੁਤ੍ਤੇ ਤੇਸੁਯੇਵ ਯੇਨ ਕੇਨਚਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੇਪਿ ਤਂ ਤਂ ਨਿਯਮਂ ਅਤਿਕ੍ਕਮਿਤ੍ਵਾ ਪਕ੍ਕਨ੍ਤੇਪਿ ਅਨਾਪੁਚ੍ਛਾ ਪਨ ਉਪਚਾਰਸੀਮਾਤਿਕ੍ਕਮੇਨ ਪਕ੍ਕਨ੍ਤੇਪਿ ਨਿਸ੍ਸਯੋ ਸਮ੍ਮਤਿ ਪਟਿਪ੍ਪਸ੍ਸਮ੍ਭਤਿ. ਪਕ੍ਖਸਙ੍ਕਨ੍ਤੇਤਿ ਤਿਤ੍ਥਿਯਪਕ੍ਖਸਙ੍ਕਨ੍ਤੇ ਚਾਪਿ ਵਿਬ੍ਭਨ੍ਤੇ ਚਾਪਿ ਮਰਣੇਨ ਚ ਤਙ੍ਖਣਞ੍ਞੇਵ ਪਟਿਪ੍ਪਸ੍ਸਮ੍ਭਤਿ. ਆਣਤ੍ਤਿ ਨਾਮ ‘‘ਪਣਾਮੇਮਿ ਤ’’ਨ੍ਤਿ ਵਾ ‘‘ਮਾ ਇਧ ਪਵਿਸਾ’’ਤਿਆਦਿਕਾ ਨਿਸ੍ਸਯਪ੍ਪਣਾਮਨਾ. ਤਾਯ ਪਣਾਮਿਤੇਨ ਆਚਰਿਯੁਪਜ੍ਝਾਯਾ ਖਮਾਪੇਤਬ੍ਬਾ. ਅਖਮਨ੍ਤੇਸੁ ਦਣ੍ਡਕਮ੍ਮਂ ਕਤ੍ਵਾ ਤਸ੍ਮਿਂ ਵਿਹਾਰੇ ਮਹਾਥੇਰੇ ਗਹੇਤ੍ਵਾਪਿ ਸਾਮਨ੍ਤਵਿਹਾਰੇ ਭਿਕ੍ਖੂ ਗਹੇਤ੍ਵਾਪਿ ਖਮਾਪੇਤਬ੍ਬਾ. ਨ ਖਮਨ੍ਤਿ ਚੇ, ਆਚਰਿਯੁਪਜ੍ਝਾਯਾਨਂ ਸਭਾਗਾਨਂ ਸਨ੍ਤਿਕੇ ਵਸਿਤਬ੍ਬਂ. ਯੇਨ ਕੇਨਚਿ ਕਾਰਣੇਨ ਨ ਸਕ੍ਕਾ ਹੋਤਿ ਤਤ੍ਰ ਆਚਰਿਯੁਪਜ੍ਝਾਯਾਨਂ ਸਭਾਗਾਨਂ ਸਨ੍ਤਿਕੇ ਵਸਿਤੁਂ, ਤਂਯੇਵ ਵਿਹਾਰਂ ਆਗਨ੍ਤ੍ਵਾ ਅਞ੍ਞਸ੍ਸ ਸਨ੍ਤਿਕੇ ਨਿਸ੍ਸਯਂ ਗਹੇਤ੍ਵਾ ਵਸਿਤਬ੍ਬਂ. ਤਤ੍ਥ ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਸਦ੍ਧਿਵਿਹਾਰਿਕਂ ਅਪ੍ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤਿ, ਪਣਾਮੇਨ੍ਤੋ ਅਨਤਿਸਾਰੋ ਹੋਤਿ. ਉਪਜ੍ਝਾਯਮ੍ਹਿ ਨਾਧਿਮਤ੍ਤਂ ਪੇਮਂ ਹੋਤਿ, ਨਾਧਿਮਤ੍ਤੋ ਪਸਾਦੋ ਹੋਤਿ, ਨਾਧਿਮਤ੍ਤਾ ਹਿਰੀ ਹੋਤਿ, ਨਾਧਿਮਤ੍ਤੋ ਗਾਰਵੋ ਹੋਤਿ, ਨਾਧਿਮਤ੍ਤਾ ਭਾਵਨਾ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ…ਪੇ… ਹੋਤਿ (ਮਹਾਵ. ੬੮). ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਅਨ੍ਤੇਵਾਸਿਕਂ ਅਪ੍ਪਣਾਮੇਨ੍ਤੋ ਆਚਰਿਯੋ…ਪੇ… ਹੋਤੀ’’ਤਿ (ਮਹਾਵ. ੮੧) ਵੁਤ੍ਤਤ੍ਤਾ ਪਨ ਅਸਮ੍ਮਾਵਤ੍ਤਨ੍ਤੇ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕੇ ਅਪ੍ਪਣਾਮੇਨ੍ਤਾ ਆਚਰਿਯੁਪਜ੍ਝਾਯਾ ਦੁਕ੍ਕਟਂ ਆਪਜ੍ਜਨ੍ਤੀਤਿ ਵੇਦਿਤਬ੍ਬਂ. ਭਾਵਨਾਤਿ ਮੇਤ੍ਤਾਭਾਵਨਾ. ਉਪਜ੍ਝਾਯਸਮੋਧਾਨਂ ਪਨ ਤਸ੍ਸ ਦਸ੍ਸਨਸਵਨਵਸੇਨ ਵੇਦਿਤਬ੍ਬਂ.

੨੩੩. ਅਲਜ੍ਜਿਨ੍ਤਿ –

‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ;

ਆਪਤ੍ਤਿਂ ਪਰਿਗੂਹਤਿ;

ਅਗਤਿਗਮਨਞ੍ਚ ਗਚ੍ਛਤਿ;

ਏਦਿਸੋ ਵੁਚ੍ਚਤਿ ਅਲਜ੍ਜਿਪੁਗ੍ਗਲੋ’’ਤਿ. (ਪਰਿ. ੩੫੯) –

ਏਵਂ ਵੁਤ੍ਤਲਕ੍ਖਣਂ ਅਲਜ੍ਜਿਂ. ਨਿਸ੍ਸਯਂ ਦੇਨ੍ਤੇਨਾਪਿ ਲਜ੍ਜਿਨੋਯੇਵ ਦਾਤਬ੍ਬਂ. ‘‘ਨ ਭਿਕ੍ਖਵੇ ਅਲਜ੍ਜੀਨਂ ਨਿਸ੍ਸਯੋ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੨੦) ਹਿ ਵੁਤ੍ਤਂ. ਅਦਿਟ੍ਠਪੁਬ੍ਬਸ੍ਸ ਕਤਿਪਾਹਂ ਆਚਾਰਂ ਉਪਪਰਿਕ੍ਖਿਤ੍ਵਾ ਦਾਤਬ੍ਬਂ. ਅਪੁਬ੍ਬਨ੍ਤਿ ਏਤ੍ਥ ਸਮ੍ਬਨ੍ਧਿਸਦ੍ਦਤ੍ਤਾ ਪੁਬ੍ਬ-ਸਦ੍ਦੇਨ ਪੁਬ੍ਬਵਾਸੋ ਗਹਿਤੋ, ਨਤ੍ਥਿ ਪੁਬ੍ਬੋ ਅਸ੍ਸਾਤਿ ਅਪੁਬ੍ਬਂ, ਨਵਨ੍ਤਿ ਵੁਤ੍ਤਂ ਹੋਤਿ. ਚਤ੍ਤਾਰਿ ਪਞ੍ਚ ਵਾ ਪਰਿਮਾਣਮੇਤੇਸਨ੍ਤਿ ਵਿਗ੍ਗਹੋ. ਏਤ੍ਥ ਪਨ ਪਰਿਮਾਣ-ਸਦ੍ਦਸਨ੍ਨਿਧਾਨੇਨ ਸਙ੍ਖ੍ਯੇਯ੍ਯਵਾਚਿਨੋਪਿਤੇ ਸਙ੍ਖ੍ਯਾਮਤ੍ਤਵਾਚਿਨੋ ਹੋਨ੍ਤੀਤਿ ਚਤੁਪਞ੍ਚਸਙ੍ਖ੍ਯਾਪਰਿਮਾਣਮੇਵ ਸਙ੍ਖ੍ਯੇਯ੍ਯਮਾਹ, ਤਸ੍ਮਾ ਵਿਗ੍ਗਹਪਦਤ੍ਥੇਹਿ ਭਿਨ੍ਨੋ ਅਞ੍ਞਪਦਤ੍ਥੋ ਸਮ੍ਭਵਤੀਤਿ ਸਮਾਸੋ. ਵਾ-ਸਦ੍ਦਸ੍ਸ ਯੋ ਵਿਕਪ੍ਪਤ੍ਥੋ, ਤਤ੍ਥ ਚਾਯਂ ਸਮਾਸੋ, ਚਤ੍ਤਾਰਿ ਵਾ ਪਞ੍ਚ ਵਾ, ਚਤੁਪਞ੍ਚ ਅਹਾਨਿ, ਤੇਸਂ ਅਹਾਨਂ ਸਮਾਹਾਰੋ ਚਤੁਪਞ੍ਚਾਹਂ. ਭਿਕ੍ਖੁਸਭਾਗਤਨ੍ਤਿ ਸਮਾਨੋ ਭਾਗੋ ਲਜ੍ਜਿਤਾਸਙ੍ਖਾਤੋ ਕੋਟ੍ਠਾਸੋ ਯੇਸਂ, ਭਿਕ੍ਖੂਹਿ ਸਭਾਗਾ, ਤੇਸਂ ਭਾਵੋ ਭਿਕ੍ਖੁਸਭਾਗਤਾ, ਤਂ, ਪੇਸਲਭਾਵਨ੍ਤਿ ਅਤ੍ਥੋ. ‘‘ਥੇਰੋ ਲਜ੍ਜੀ’’ਤਿ ਜਾਨਨ੍ਤੇਨ ਪਨ ਪਕਤਿਯਾ ਨਿਸ੍ਸਯਦਾਨਟ੍ਠਾਨਂ ਗਤੇਨ ਚ ਤਦਹੇਵ ਗਹੇਤਬ੍ਬੋ, ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥਿ. ਸਚੇ ‘‘ਓਕਾਸੇ ਅਲਭਨ੍ਤੇ ਪਚ੍ਚੂਸਸਮਯੇ ਗਹੇਸ੍ਸਾਮੀ’’ਤਿ ਸਯਤਿ, ਅਰੁਣਂ ਉਗ੍ਗਤਮ੍ਪਿ ਨ ਜਾਨਾਤਿ, ਅਨਾਪਤ੍ਤਿ. ਲਦ੍ਧਪਰਿਹਾਰੇਨਾਪਿ ਵਸਿਤੁਂ ਵਟ੍ਟਤੀਤਿ.

੨੩੪. ‘‘ਲਬ੍ਭਤੀ’’ਤਿ ਕਮ੍ਮਨਿ ਨਿਪ੍ਫਨ੍ਨਤ੍ਤਾ ਅਵੁਤ੍ਤਕਤ੍ਤਾਤਿ ‘‘ਅਦ੍ਧਿਕਸ੍ਸਾ’’ਤਿਆਦੀਸੁ ਕਤ੍ਤਰਿ ਸਾਮਿਵਚਨਂ, ‘‘ਅਦ੍ਧਿਕੇਨਾ’’ ਤਿਆਦਿ ਵੁਤ੍ਤਂ ਹੋਤਿ. ‘‘ਸਲ੍ਲਕ੍ਖੇਨ੍ਤੇਨਾ’’ਤਿ ਪਨ ਸਰੂਪੇਨੇਵ ਨਿਦ੍ਦਿਟ੍ਠਂ. ਵਸਿਤੁਨ੍ਤਿ ਵੁਤ੍ਤਕਮ੍ਮਂ. ਭਾਵੇ ਹਿ ਤੁਂ-ਪਚ੍ਚਯੋ, ਵਾਸੋਤਿ ਅਤ੍ਥੋ. ਯਾਚਿਤਸ੍ਸਾਤਿ ‘‘ਗਿਲਾਨੁਪਟ੍ਠਾਕਸ੍ਸ ਚਾ’’ਤਿ ਏਤ੍ਥ ਵਿਸੇਸਨਂ. ਸਚੇ ਪਨ ‘‘ਯਾਚਾਹਿ ਮ’’ਨ੍ਤਿ ਵੁਚ੍ਚਮਾਨੋਪਿ ਗਿਲਾਨੋ ਮਾਨੇਨ ਨ ਯਾਚਤਿ, ਗਨ੍ਤਬ੍ਬਂ. ਅਰਞ੍ਞੇ ਵਾ ਸਲ੍ਲਕ੍ਖੇਨ੍ਤੇਨ ਫਾਸੁਕਨ੍ਤਿ ਯਤ੍ਥ ਵਸਨ੍ਤਸ੍ਸ ਪਟਿਲਦ੍ਧਤਰੁਣਸਮਥਵਿਪਸ੍ਸਨਾਵਿਸੇਸਭਾਗਿਤਾਵਸੇਨ ਫਾਸੁ ਹੋਤਿ, ਤਸ੍ਮਿਂ ਅਰਞ੍ਞੇ ਤਾਦਿਸਂ ਫਾਸੁਵਿਹਾਰਂ ਸਲ੍ਲਕ੍ਖੇਨ੍ਤੇਨ ਆਰਞ੍ਞਕੇਨ. ਦਾਯਕੇ ਅਸਨ੍ਤੇਤਿ ਪਦਚ੍ਛੇਦੋ. ਤਾਵਾਤਿ ਅਵਧਿਮ੍ਹਿ, ਅਦ੍ਧਿਕਾਦੀਹਿ ਯਾਵ ਨਿਸ੍ਸਯਦਾਯਕੋ ਲਬ੍ਭਤਿ, ਤਾਵ, ਆਰਞ੍ਞਕੇਨ ਪਨ ‘‘ਪਟਿਰੂਪੇ ਨਿਸ੍ਸਯਦਾਯਕੇ ਸਤਿ ਨਿਸ੍ਸਾਯ ਵਸਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਯਾਵ ਆਸਾਲ਼੍ਹਿਪੁਣ੍ਣਮਾ, ਤਾਵਾਤਿ ਅਤ੍ਥੋ. ‘‘ਸਚੇ ਪਨ ਆਸਾਲ਼੍ਹਿਮਾਸੇ ਆਚਰਿਯੋ ਨਾਗਚ੍ਛਤਿ, ਯਤ੍ਥ ਨਿਸ੍ਸਯੋ ਲਬ੍ਭਤਿ, ਤਤ੍ਥ ਗਨ੍ਤਬ੍ਬਂ (ਮਹਾਵ. ਅਟ੍ਠ. ੧੨੧). ਅਨ੍ਤੋਵਸ੍ਸੇ ਪਨ ਨਿਬਦ੍ਧਵਾਸਂ ਵਸਿਤਬ੍ਬਂ, ਨਿਸ੍ਸਯੋ ਚ ਗਹੇਤਬ੍ਬੋ’’ਤਿ (ਮਹਾਵ. ਅਟ੍ਠ. ੧੨੧) ਹਿ ਅਟ੍ਠਕਥਾਯਂ ਵੁਤ੍ਤਂ.

ਅਮ੍ਹਾਕਂ ਪਨ ਕੇਚਿ ਅਨ੍ਤੇਵਾਸਿਕਤ੍ਥੇਰਾ ‘‘ਨ ਭਿਕ੍ਖਵੇ ਵਸ੍ਸਂ ਨ ਉਪਗਨ੍ਤਬ੍ਬਂ. ਯੋ ਨ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ (ਮਹਾਵ. ੧੮੬) ਚ ‘ਨ ਭਿਕ੍ਖਵੇ ਤਦਹੁ ਵਸ੍ਸੂਪਨਾਯਿਕਾਯ ਵਸ੍ਸਂ ਅਨੁਪਗਨ੍ਤੁਕਾਮੇਨ ਸਞ੍ਚਿਚ੍ਚ ਆਵਾਸੋ ਅਤਿਕ੍ਕਮਿਤਬ੍ਬੋ. ਯੋ ਅਤਿਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ (ਮਹਾਵ. ੧੮੬) ਪਾਲ਼ਿਵਚਨਤੋ ਕੇਨਚਿ ਕਾਰਣੇਨ ਨਿਸ੍ਸਯਂ ਅਲਭਮਾਨੇਨਪਿ ਨ ਸਕ੍ਕਾ ਅਨ੍ਤੋਵਸ੍ਸੇ ਵਸ੍ਸਂ ਅਨੁਪਗਨ੍ਤੁਂ. ‘ਅਨ੍ਤੋਵਸ੍ਸੇ ਪਨਾ’ਤਿਆਦੀਸੁ ਪਨ ਚ-ਸਦ੍ਦੋ ਅਨ੍ਵਾਚਯਤ੍ਥੋ, ਤਸ੍ਮਾ ਤੇਨਾਪਿ ਵਸ੍ਸਂ ਉਪਗਨ੍ਤਬ੍ਬਮੇਵਾ’’ਤਿ ਵਦਿਂਸੁ.

ਮਯਂ ਪਨੇਤ੍ਥ ਏਵਮਵੋਚੁਮ੍ਹ ‘‘ਭਗਵਤਾ ਅਨੁਪਗਮਨੇ ਦੁਕ੍ਕਟਂ ਅਨਨ੍ਤਰਾਯਿਕਸ੍ਸੇਵ ਵੁਤ੍ਤਂ, ਤੇਨੇਵ ‘ਕੇਨਚਿ ਅਨ੍ਤਰਾਯੇਨ ਪੁਰਿਮਿਕਂ ਅਨੁਪਗਤੇਨ ਪਚ੍ਛਿਮਿਕਾ ਉਪਗਨ੍ਤਬ੍ਬਾ’ਤਿ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੧੮੫) ਵੁਤ੍ਤਂ. ਅਨ੍ਤਰਾਯੋ ਚ ਨਾਮ ਅਨ੍ਤਰਾ ਵੇਮਜ੍ਝੇ ਏਤੀਤਿ ਅਨ੍ਤਰਾਯੋ, ਯੋ ਕੋਚਿ ਬਾਧਕਪ੍ਪਚ੍ਚਯਤਾਯ ਅਧਿਪ੍ਪੇਤੋ ਵੁਚ੍ਚਤਿ ‘ਨ ਲਭਨ੍ਤਿ ਪਤਿਰੂਪਂ ਉਪਟ੍ਠਾਕਂ, ਏਸੇਵ ਅਨ੍ਤਰਾਯੋਤਿ ਪਕ੍ਕਮਿਤਬ੍ਬ’ਨ੍ਤਿਆਦੀਸੁ (ਮਹਾਵ. ੨੦੧) ਵਿਯ, ਤਸ੍ਮਾ ਬਾਧਕਪ੍ਪਚ੍ਚਯਤਾ ਅਧਿਪ੍ਪੇਤਾ. ਨਿਸ੍ਸਯਾਲਾਭੋਪਿ ਅਨ੍ਤਰਾਯੋਤ੍ਵੇਵ ਵਿਞ੍ਞਾਯਤਿ. ਸਕ੍ਕਾ ਹਿ ਵਤ੍ਤੁਂ ‘ਅਨ੍ਤਰਾਯੋ ਵਸ੍ਸੂਪਗਮੋ ਸਨ੍ਨਿਸ੍ਸਯਤ੍ਤਾ ਤਰੁਣਸਮਥਵਿਪਸ੍ਸਨਾਲਾਭੀਨਂ ਕਤੋਕਾਸੋ ਵਿਯਾ’ਤਿ. ਤਰੁਣਸਮਥਵਿਪਸ੍ਸਨਾਲਾਭੀਨਮ੍ਪਿ ਹਿ ਕਤੋਕਾਸੇਪਿ ‘ਸਚੇ ਪਨ ਆਸਾਲ਼੍ਹਿਮਾਸੇ ਆਚਰਿਯੋ ਨਾਗਚ੍ਛਤਿ, ਯਤ੍ਥ ਨਿਸ੍ਸਯੋ ਲਬ੍ਭਤਿ, ਤਤ੍ਥ ਗਨ੍ਤਬ੍ਬ’ਨ੍ਤਿ ਦਲ਼੍ਹਂ ਕਤ੍ਵਾ ਅਟ੍ਠਕਥਾਯਂ (ਮਹਾਵ. ਅਟ੍ਠ. ੧੨੧) ਵੁਤ੍ਤਂ. ਅਮ੍ਹਾਕਂ ਗਰੂਹਿ ਚ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੨੧) ‘ਆਚਰਿਯਂ ਆਗਮੇਨ੍ਤਸ੍ਸੇਵ ਚੇ ਵਸ੍ਸੂਪਨਾਯਿਕਦਿਵਸੋ ਹੋਤਿ, ਹੋਤੁ, ਗਨ੍ਤਬ੍ਬਂ ਤਤ੍ਥ, ਯਤ੍ਥ ਨਿਸ੍ਸਯਦਾਯਕਂ ਲਭਤੀ’ਤਿ ਵਸ੍ਸੂਪਨਾਯਿਕਦਿਵਸੇਪਿ ਨਿਸ੍ਸਯਤ੍ਥਾਯ ਗਮਨਮੇਵ ਵੁਤ੍ਤਂ. ਅਥ ਚ ਪਨ ਮਹਾਕਾਰੁਣਿਕੋਪਿ ਭਗਵਾ ‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੁਪਟ੍ਠਾਕੇਨ ਭਿਕ੍ਖੁਨਾ ਨਿਸ੍ਸਯਂ ਅਲਭਮਾਨੇਨ ਯਾਚਿਯਮਾਨੇਨ ਅਨਿਸ੍ਸਿਤਕੇਨ ਵਤ੍ਥੁ’ਨ੍ਤਿ (ਮਹਾਵ. ੧੨੧) ਗਿਲਾਨਵਿਸਯੇਪਿ ਨਿਸ੍ਸਯਂ ਗਰੁਕਂ ਕਤ੍ਵਾ ਪਟ੍ਠਪੇਸਿ. ਯਂ ਪਨ ਅਨਿਸ੍ਸਯਂ, ਤਂ ਅਨਨ੍ਤਰਾਯਂ ਨਿਸ੍ਸਯਮੁਤ੍ਤਕਸ੍ਸ ਵਸ੍ਸੂਪਗਮਨਂ ਵਿਯ. ਅਪਿਚ ਨਾਵਾਯ ਗਚ੍ਛਨ੍ਤਸ੍ਸ ਪਨ ਵਸ੍ਸਾਨੇ ਆਗਤੇਪਿ ਨਿਸ੍ਸਯਂ ਅਲਭਨ੍ਤਸ੍ਸ ਅਨਾਪਤ੍ਤੀਤਿ ਨਾਵਾਯ ਗਚ੍ਛਤੋਯੇਵ ਆਵੇਣਿਕਾ ਅਨਾਪਤ੍ਤਿਕਤਾ ਵੁਤ੍ਤਾ. ਤਸ੍ਮਾ ਨਿਸ੍ਸਯਾਲਾਭੋ ਬਾਧਕਪ੍ਪਚ੍ਚਯੋ ਵਸ੍ਸੂਪਗਮਨਸ੍ਸ, ਨ ਵਸ੍ਸੂਪਗਮਨਂ ਨਿਸ੍ਸਯਸ੍ਸਾਤਿ ਅਨ੍ਤਰਾਯੋਯੇਵ ਨਿਸ੍ਸਯਾਲਾਭੋ. ਤਤੋਯੇਵ ਟੀਕਾਯਂ ‘ਅਨ੍ਤੋਵਸ੍ਸੇ ਪਨ ਅਨਿਸ੍ਸਿਤੇਨ ਵਤ੍ਥੁਂ ਨ ਵਟ੍ਟਤੀ’ਤਿ ਵੁਤ੍ਤਂ. ਤਸ੍ਮਾਯੇਵ ਚ ‘ਅਨ੍ਤੋਵਸ੍ਸੇ ਪਨਾ’ਤਿਆਦੀਸੁ ਨਿਸ੍ਸਯਦਾਯਕੇ ਸਤਿ ਨਿਬਦ੍ਧਵਾਸਂ ਵਸਿਤਬ੍ਬਞ੍ਚ ਨਿਸ੍ਸਯੋ ਗਹੇਤਬ੍ਬੋ ਚ ਹੋਤੀਤਿ ਗਮਨਕਿਰਿਯਾਯ ਖੀਯਮਾਨਤਾਵਸੇਨ ਚ-ਸਦ੍ਦੋ ਸਮੁਚ੍ਚਯੋ ਗਹੇਤਬ੍ਬੋ’’ਤਿ.

ਨਿਸ੍ਸਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.