੨੨. ਉਪਾਹਨਨਿਦ੍ਦੇਸਵਣ੍ਣਨਾ

੧੭੫. ਨਵਾ ਗੁਣਙ੍ਗੁਣੂਪਾਹਨਾ ਮਜ੍ਝਦੇਸੇ ਨ ਕਪ੍ਪਨ੍ਤੀਤਿ ਸਮ੍ਬਨ੍ਧੋ. ਨਵਾਤਿ ਏਕਵਾਰਮ੍ਪਿ ਅਪ੍ਪਟਿਮੁਕ੍ਕਾ. ਤਤ੍ਥ ਗੁਣਙ੍ਗੁਣੂਪਾਹਨਾ ਚਤੁਪਟਲਤੋ ਪਟ੍ਠਾਯ ਵੁਚ੍ਚਨ੍ਤਿ. ਸਮ੍ਭਵੇ ਬ੍ਯਭਿਚਾਰੇ ਚ ਵਿਸੇਸਨਂ ਸਾਤ੍ਥਕਂ ਭਵਤੀਤਿ ‘‘ਮਜ੍ਝਦੇਸੇ’’ਤਿ ਵਿਸੇਸਨਂ ਅਮਜ੍ਝਦੇਸਂ ਬ੍ਯਭਿਚਰਤੀਤਿ ਅਮਜ੍ਝਦੇਸੇ ਗੁਣਙ੍ਗੁਣੂਪਾਹਨਾ ਕਪ੍ਪਨ੍ਤੀਤਿ ਵੇਦਿਤਬ੍ਬਂ. ਤਥਾ ਨਵਾਤਿ ਇਮਿਨਾ ਅਨਵਾ ਮਜ੍ਝਦੇਸੇਪਿ. ਇਮਿਨਾ ਪਨ ਵਾਕ੍ਯੇਨ ਮਜ੍ਝਦੇਸੇਪਿ ਏਕਵਾਰਮ੍ਪਿ ਪਟਿਮੁਕ੍ਕਾ, ਅਞ੍ਞਤ੍ਥ ਤੁ ਸਬ੍ਬਾਪਿ ਗੁਣਙ੍ਗੁਣੂਪਾਹਨਾ ਵਟ੍ਟਨ੍ਤਿ, ਨ ਸੇਸਾਤਿ ਆਪਨ੍ਨਂ, ਤਥਾਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਪਲਾਸਿਕਂ ਉਪਾਹਨ’’ਨ੍ਤਿ (ਮਹਾਵ. ੨੪੫) ਵੁਤ੍ਤਤ੍ਤਾ ਏਕਪਟਲਿਕਾਪਿ ਵਟ੍ਟਤੀਤਿ ਵੇਦਿਤਬ੍ਬਂ. ਸਬ੍ਬਸ੍ਸਾਤਿ ਮਜ੍ਝਦੇਸੇ ਪਚ੍ਚਨ੍ਤਿਮੇਪਿ ਗਿਲਾਨਾਗਿਲਾਨਸ੍ਸ ਸਬ੍ਬਸ੍ਸ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਜ੍ਝਾਰਾਮੇ ਉਪਾਹਨਂ ਧਾਰੇਤੁ’’ਨ੍ਤਿ (ਮਹਾਵ. ੨੪੯) ਹਿ ਸਾਮਞ੍ਞੇਨ ਅਨੁਞ੍ਞਾਤਂ. ਸਬ੍ਬਤ੍ਥਾਤਿ ਗਾਮੇ ਵਾ ਅਰਞ੍ਞੇ ਵਾ ਆਰਾਮਤੋ ਅਞ੍ਞਤ੍ਰ. ਅਕਲ੍ਲਕਸ੍ਸ ਚਾਤਿ ਗਿਲਾਨਸ੍ਸੇਵ.

੧੭੬-੯. ਸਬ੍ਬ…ਪੇ… ਰਤ੍ਤਾ ਚ ਉਪਾਹਨਾ ਸਬ੍ਬ…ਪੇ… ਵਿਚ੍ਛਿਕਾਲ਼ਿਕਾ ਚ…ਪੇ… ਦੀਪੀਨਂ ਚਮ੍ਮੇਹਿ ਚ ਮਜ੍ਜਾਰ…ਪੇ… ਚਮ੍ਮੇਹਿ ਚ ਪਰਿਕ੍ਖਟਾ ਚ ਉਪਾਹਨਾ ਸਙ੍ਕਮਨੀਯਾ ਪਾਦੁਕਾ ਚ ਕੋਚਿ ਧਾਰੇਯ੍ਯ, ਦੁਕ੍ਕਟਨ੍ਤਿ ਯੋਜਨਾ. ਓਦਾਤਾਯ ਪਾਲ਼ਿਯਾ ਅਟ੍ਠਕਥਾਯ ਚ ਅਭਾਵੇਪਿ ਅਨੁਲੋਮਵਸੇਨੇਤ੍ਥ ਵੁਤ੍ਤਂ ਵਿਯ ਦਿਸ੍ਸਤਿ. ਨੀਲਕੋ ਚ ਓਦਾਤੋ ਚਾਤਿਆਦਿਨਾ ਦ੍ਵਨ੍ਦੋ. ਸਬ੍ਬੇਵ ਨੀਲਕ…ਪੇ… ਕਣ੍ਹਕਾ ਯਾਸਨ੍ਤਿ ਸਮਾਸੋ. ‘‘ਮਹਾਰਙ੍ਗਾ’’ਤਿਆਦੀਸੁ ਅਪ੍ਪਯੁਤ੍ਤੇਪਿ ਸਬ੍ਬ-ਸਦ੍ਦੇ ਪਕਰਣਵਸੇਨ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ.

‘‘ਅਤ੍ਥਾ ਪਕਰਣਾ ਲਿਙ੍ਗਾ, ਓਚਿਤ੍ਯਾ ਕਾਲਦੇਸਤੋ;

ਸਦ੍ਦਤ੍ਥਾ ਵਿਭਜੀਯਨ੍ਤਿ, ਨ ਸਦ੍ਦਾਯੇਵ ਕੇਵਲਾ’’ਤਿ. –

ਹਿ ਵੁਤ੍ਤਂ. ਚਿਤ੍ਰਾਤਿ ਵਿਚਿਤ੍ਰਾ. ਨੀਲਪੀਤਾਦੀ ਵਦ੍ਧਾਯੇਵ ਯਾਸਨ੍ਤਿ ਸਮਾਸੋ. ਆਦਿ-ਸਦ੍ਦੇਨ ਓਦਾਤਾਦੀਨਂ ਗਹਣਂ. ਤਿਤ੍ਤਿਰਪਤ੍ਤਸਦਿਸੋ ਵਿਚਿਤ੍ਤੋ ਵਣ੍ਣੋ ਤਿਤ੍ਤਿਰਪਤ੍ਤ-ਸਦ੍ਦੇਨ ਗਹਿਤੋ. ਤਮੇਤੇਸਮਤ੍ਥੀਤਿ ਤਿਤ੍ਤਿਰਪਤ੍ਤਿਕਾ. ਮੇਣ੍ਡਸ੍ਸ ਚ ਅਜਸ੍ਸ ਚ ਵਿਸਾਣਸਦਿਸਾ ਵਦ੍ਧਾ ਯਾਸਨ੍ਤਿ ਬਾਹਿਰਤ੍ਥੋ. ਤਾ ਪਨ ਕਣ੍ਣਿਕਟ੍ਠਾਨੇ ਮੇਣ੍ਡਕਅਜਵਿਸਾਣਸਣ੍ਠਾਨੇ ਵਦ੍ਧੇ ਯੋਜੇਤ੍ਵਾ ਕਤਾ. ਏਸ ਨਯੋ ਵਿਚ੍ਛਿਕਾਲ਼ਿਕਾਦੀਸੁ. ਪਣ੍ਹਿਪਿਧਾਨਤ੍ਥਂ ਤਲੇ ਖਲ੍ਲਂ ਬਦ੍ਧਂ ਯਾਸਨ੍ਤਿ ਵਿਗ੍ਗਹੋ. ਜਙ੍ਘਤੋ ਸਬ੍ਬਪਾਦਪ੍ਪਟਿਚ੍ਛਾਦਨਕਂ ਪੁਟਂ ਬਦ੍ਧਂ ਯਾਸਨ੍ਤਿ ਬਹੁਬ੍ਬੀਹਿ. ਤੂਲਂ ਪਿਚੁ ਪੁਣ੍ਣਂ ਯਾਸਨ੍ਤਿ ਅਞ੍ਞਪਦਤ੍ਥੋ. ਪਲਿਗੁਣ੍ਠੇਤੀਤਿ ਪਲਿਗੁਣ੍ਠੋ, ਉਪਰਿਪਾਦਤਲਮਤ੍ਤਪ੍ਪਟਿਚ੍ਛਾਦਕਬਨ੍ਧੋ, ਤੇਨ ਯੋਜੇਤ੍ਵਾ ਕਤਾ ਪਾਲਿਗੁਣ੍ਠਿਮਾ, ਵਿਚਿਤ੍ਰਾ ਹਿ ਤਦ੍ਧਿਤਵੁਤ੍ਤਿ. ਵਿਚ੍ਛਿਕਾਨਂ ਅਲ਼ਸਦਿਸਂ ਨਙ੍ਗੁਟ੍ਠਸਦਿਸਂ ਬਦ੍ਧਮੇਤਾਸਨ੍ਤਿ ਵਿਚ੍ਛਿਕਾਲ਼ਿਕਾ. ਸੀਹਬ੍ਯਗ੍ਘੁਦ੍ਦਾਜਿਨਦੀਪੀਨਂ ਚਮ੍ਮੇਹਿ ਚਾਤਿ ਪਕਰਣਤੋ ਅਜਿਨਾ ਨਾਮ ਮਿਗਾ. ਉਲੂਕਾ ਪਕ੍ਖਿਬਿਲ਼ਾਰਾ. ਸਙ੍ਕਮਨ੍ਤਿ ਗਚ੍ਛਨ੍ਤਿ ਏਤਾਹੀਤਿ ਸਙ੍ਕਮਨੀਯਾ. ਤਾ ਪਨ ਤਾਲਪਣ੍ਣਾਦੀਹਿ ਕਤਾ ਸਂਹਾਰਿਯਾ.

੧੮੦. ਸਕਲਂ ਏਕਦੇਸਂ ਵਾ ਪੁਞ੍ਛਿਤ੍ਵਾਵਾਤਿ ਯੋਜਨਾ. ਖਲ੍ਲਕਾਦਿਕਨ੍ਤਿ ਆਦਿ-ਸਦ੍ਦੇਨ ਮੇਣ੍ਡਵਿਸਾਣਵਦ੍ਧਿਕਾਦਿਕਂ ਸਬ੍ਬਂ ਸਙ੍ਗਣ੍ਹਾਤੀਤਿ.

ਉਪਾਹਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.