੨. ਸਙ੍ਘਾਦਿਸੇਸਨਿਦ੍ਦੇਸਵਣ੍ਣਨਾ

੧੯. ਵੁਟ੍ਠਾਨਸ੍ਸ ਗਰੁਕਤ੍ਤਾ ਗਰੁਕਾਤਿ ਸਙ੍ਘਾਦਿਸੇਸਾ ਵੁਚ੍ਚਨ੍ਤਿ. ਨਵਾਤਿ ਤੇਸਂ ਗਣਨਪਰਿਚ੍ਛੇਦੋ. ਨਨੁ ‘‘ਨਵਾ’’ਤਿ ਕਸ੍ਮਾ ਵੁਤ੍ਤਂ, ‘‘ਤੇਰਸਾ’’ਤਿ ਵਤ੍ਤਬ੍ਬਨ੍ਤਿ? ਨਾਯਂ ਦੋਸੋ, ਚਿਰੇਨਾਪਜ੍ਜਿਤਬ੍ਬੇ ਚਤ੍ਤਾਰੋ ਯਾਵਤਤਿਯਕੇ ਠਪੇਤ੍ਵਾ ਵੀਤਿਕ੍ਕਮਕ੍ਖਣੇਯੇਵ ਆਪਜ੍ਜਿਤਬ੍ਬਾ ਪਠਮਾਪਤ੍ਤਿਕਾ ਵੁਚ੍ਚਨ੍ਤੀਤਿ. ਇਦਾਨਿ ਤੇ ਦਸ੍ਸੇਤੁਂ ‘‘ਮੋਚੇਤੁਕਾਮਤਾ’’ਤਿਆਦਿ ਆਰਦ੍ਧਂ. ਤਤ੍ਥ ਸੁਕ੍ਕਸ੍ਸਾਤਿ ਆਸਯਧਾਤੁਨਾਨਤ੍ਤਤੋ ਨੀਲਾਦਿਵਸੇਨ ਦਸਵਿਧੇ ਸੁਕ੍ਕੇ ਯਸ੍ਸ ਕਸ੍ਸਚਿ ਸੁਕ੍ਕਸ੍ਸ. ਮੋਚੇਤੁਕਾਮਤਾਤਿ ਮੋਚੇਤੁਕਾਮਤਾਯ, ਯ-ਕਾਰੋ ਲੁਤ੍ਤਨਿਦ੍ਦਿਟ੍ਠੋ. ਇਮਿਨਾ ਪਨ ਵਚਨੇਨ ਮੋਚਨਸ੍ਸਾਦ ਮੁਚ੍ਚਨਸ੍ਸਾਦ ਮੁਤ੍ਤਸ੍ਸਾਦਮੇਥੁਨਸ੍ਸਾਦ ਫਸ੍ਸਸ੍ਸਾਦ ਕਣ੍ਡੁਵਨਸ੍ਸਾਦ ਦਸ੍ਸਨਸ੍ਸਾਦ ਨਿਸਜ੍ਜਨਸ੍ਸਾਦ ਵਾਚਸ੍ਸਾਦ ਗੇਹਸਿਤਪੇਮ ਵਨਭਙ੍ਗਿਯ ਸਙ੍ਖਾਤੇਸੁ ਏਕਾਦਸਸ੍ਸਾਦੇਸੁ ਏਕਂਯੇਵ ਮੋਚਨਸ੍ਸਾਦਂ ਦਸ੍ਸੇਤਿ.

ਤਤ੍ਥ ਮੋਚਨਾਯ ਅਸ੍ਸਾਦੋ ਸੁਖਵੇਦਨਾ ਮੋਚਨਸ੍ਸਾਦੋ. ਮੁਚ੍ਚਨੇ ਅਤ੍ਤਨੋ ਧਮ੍ਮਤਾਯ ਮੁਚ੍ਚਨੇ ਅਸ੍ਸਾਦੋ ਮੁਚ੍ਚਨਸ੍ਸਾਦੋ. ਏਵਂ ਸਬ੍ਬਤ੍ਥ ਸਤ੍ਤਮੀਤਪ੍ਪੁਰਿਸੇਨ ਅਤ੍ਥੋ ਦਟ੍ਠਬ੍ਬੋ. ਇਮੇਹਿ ਪਨ ਨਵਹਿ ਪਦੇਹਿ ਸਮ੍ਪਯੁਤ੍ਤਅਸ੍ਸਾਦਸੀਸੇਨ ਰਾਗੋ ਵੁਤ੍ਤੋ. ਗੇਹਨਿਸ੍ਸਿਤੇਸੁ ਮਾਤਾਦੀਸੁ ਪੇਮਂ ਗੇਹੇ ਸਿਤਂ ਪੇਮਨ੍ਤਿ ਗੇਹਸਿਤਪੇਮਂ, ਇਮਿਨਾ ਸਰੂਪੇਨੇਵ ਰਾਗੋ ਵੁਤ੍ਤੋ. ਸਨ੍ਥਵਕਰਣਤ੍ਥਾਯ ਇਤ੍ਥਿਯਾ ਪੇਸਿਤਪੁਪ੍ਫਾਦਿ ਵਨਭਙ੍ਗਿਯਂ, ਇਮਿਨਾ ਚ ਵਤ੍ਥੁਵਸੇਨ ਰਾਗੋ ਵੁਤ੍ਤੋ. ਮੇਥੁਨਸ੍ਸਾਦੋਪਿ ਇਤ੍ਥਿਯਾ ਗਹਣਪ੍ਪਯੋਗੇਨ ਵੇਦਿਤਬ੍ਬੋ. ਸਬ੍ਬਤ੍ਥੇਵ ਚ ਪਨ ਚੇਤਨਾਨਿਮਿਤ੍ਤੁਪਕ੍ਕਮਮੋਚਨੇ ਸਤਿ ਵਿਸਙ੍ਕੇਤਾਭਾਵੋ ਵੇਦਿਤਬ੍ਬੋ. ਉਪਕ੍ਕਮ੍ਮ ਹਤ੍ਥਾਦਿਨਾ ਨਿਮਿਤ੍ਤੇ ਉਪਕ੍ਕਮਿਤ੍ਵਾ. ਅਞ੍ਞਤ੍ਰ ਸੁਪਿਨਨ੍ਤੇਨਾਤਿ ਸੁਪਿਨੋਯੇਵ ਸੁਪਿਨਨ੍ਤੋ ‘‘ਕਮ੍ਮਮੇਵ ਕਮ੍ਮਨ੍ਤੋ’’ਤਿਆਦੀਸੁ ਵਿਯ ਅਨ੍ਤ-ਸਦ੍ਦਸ੍ਸ ਤਬ੍ਭਾਵਵੁਤ੍ਤਿਤ੍ਤਾ. ਤਂ ਸੁਪਿਨਨ੍ਤਂ ਵਿਨਾ ਵਿਮੋਚਯਂ ਸੁਕ੍ਕਂ ਵਿਮੋਚੇਨ੍ਤੋ ਸਮਣੋ ਯੋ ਕੋਚਿ ਭਿਕ੍ਖੁ ਗਰੁਕਂ ਗਰੁਕਾਪਤ੍ਤਿਸਙ੍ਖਾਤਂ ਸਙ੍ਘਾਦਿਸੇਸਂ ਫੁਸੇ ਫੁਸੇਯ੍ਯ, ਆਪਜ੍ਜੇਯ੍ਯਾਤਿ ਵੁਤ੍ਤਂ ਹੋਤਿ. ਏਤ੍ਥ ਚ ਅਜ੍ਝਤ੍ਤਰੂਪਬਹਿਦ੍ਧਾਰੂਪਉਭਯਰੂਪਆਕਾਸੇਕਟਿਕਮ੍ਪਨਸਙ੍ਖਾਤੇਸੁ ਚਤੂਸੁ ਉਪਾਯੇਸੁ ਸਤਿ ਰਾਗੂਪਤ੍ਥਮ੍ਭਾਦੀਸੁ ਚ ਕਾਲੇਸੁ ਯੇਨ ਕੇਨਚਿ ਅਙ੍ਗਜਾਤੇ ਕਮ੍ਮਞ੍ਞਤਂ ਪਤ੍ਤੇ ‘‘ਆਰੋਗ੍ਯਤ੍ਥਾਯਾ’’ਤਿਆਦੀਸੁ ਯੇਨ ਕੇਨਚਿ ਅਧਿਪ੍ਪਾਯੇਨ ਅਧਿਪ੍ਪਾਯਵਤ੍ਥੁਭੂਤਂ ਯਂ ਕਿਞ੍ਚਿ ਸੁਕ੍ਕਂ ਮੋਚਨਸ੍ਸਾਦਚੇਤਨਾਯ ਏਵ ਨਿਮਿਤ੍ਤੇ ਉਪਕ੍ਕਮ੍ਮ ਮੋਚੇਨ੍ਤੋ ਸਙ੍ਘਾਦਿਸੇਸਂ ਆਪਜ੍ਜਤੀਤਿ ਸਬ੍ਬਥਾ ਅਧਿਪ੍ਪਾਯੋ ਦਟ੍ਠਬ੍ਬੋ.

ਪਠਮੋ.

੨੦. ਕਾਯਸਂਸਗ੍ਗਰਾਗਵਾਤਿ ਕਾਯੇ ਸਂਸਗ੍ਗੋ, ਤਸ੍ਮਿਂ ਰਾਗੋ, ਸੋ ਅਸ੍ਸ ਅਤ੍ਥੀਤਿ ਵਨ੍ਤੁ, ਕਾਯਸਂਸਗ੍ਗਰਾਗਸਮਙ੍ਗੀਤਿ ਅਤ੍ਥੋ. ਸਮਣੋ ਇਤ੍ਥਿਸਞ੍ਞੀਤਿ ਸਮ੍ਬਨ੍ਧੋ. ਉਪਕ੍ਕਮ੍ਮਾਤਿ ਕਾਯੇਨ ਵਾਯਮਿਤ੍ਵਾ. ਮਨੁਸ੍ਸਿਤ੍ਥਿਂ ਸਮ੍ਫੁਸਨ੍ਤੋਤਿ ਅਨ੍ਤਮਸੋ ਲੋਮੇਨਪਿ ਪਰਾਮਸਨ੍ਤੋ ਗਰੁਕਂ ਫੁਸੇਤਿ ਯੋਜਨਾ. ਮਨੁਸ੍ਸਭੂਤਾ ਅਮਤਾ ਇਤ੍ਥੀ ਮਨੁਸ੍ਸਿਤ੍ਥੀ. ਤਤ੍ਥ ‘‘ਕਾਯਸਂਸਗ੍ਗਰਾਗਵਾ’’ਤਿ ਇਮਿਨਾ ਮਾਤੁਪੇਮਾਦਿਂ, ਇਤ੍ਥਿਯਾ ਗਹਿਤਮੋਕ੍ਖਾਧਿਪ੍ਪਾਯਞ੍ਚ ਪਟਿਕ੍ਖਿਪਤਿ. ਇਤ੍ਥਿਯਾ ਵੇਮਤਿਕਸ੍ਸ, ਪਣ੍ਡਕਪੁਰਿਸਤਿਰਚ੍ਛਾਨਗਤਸਞ੍ਞਿਸ੍ਸ ਚ ਥੁਲ੍ਲਚ੍ਚਯਂ. ਇਤ੍ਥਿਯਾ ਪਨ ਕਾਯੇਨ ਕਾਯਪ੍ਪਟਿਬਦ੍ਧਾਮਸਨੇ, ਕਾਯਪ੍ਪਟਿਬਦ੍ਧੇਨ ਕਾਯਾਮਸਨੇ ਚ ਯਕ੍ਖੀਪੇਤੀਪਣ੍ਡਕਾਨਂ ਕਾਯੇਨ ਕਾਯਾਮਸਨੇ ਚ ਪੁਰਿਸਤਿਰਚ੍ਛਾਨਗਤਿਤ੍ਥੀਨਂ ਕਾਯੇਨ ਕਾਯਾਮਸਨੇਪਿ ਦੁਕ੍ਕਟਂ, ਤਥਾਯਕ੍ਖੀਆਦੀਨਂ ਕਾਯੇਨ ਕਾਯਪ੍ਪਟਿਬਦ੍ਧਾਦੀਸੁ ਚ. ਮਤਿਤ੍ਥਿਯਾ ਪਨ ਥੁਲ੍ਲਚ੍ਚਯਂ. ਇਤ੍ਥਿਯਾ ਪਨ ਫੁਸਿਯਮਾਨੋ ਸੇਵਨਾਧਿਪ੍ਪਾਯੋਪਿ ਸਚੇ ਕਾਯੇਨ ਨ ਵਾਯਮਤਿ, ਅਨਾਪਤ੍ਤਿ.

ਦੁਤਿਯੋ.

੨੧. ਤਥਾਤਿ ਇਤ੍ਥਿਸਞ੍ਞੀ. ਸੁਣਨ੍ਤਿਨ੍ਤਿ ਵਿਞ੍ਞਤ੍ਤਿਪਥੇ ਠਤ੍ਵਾ ਅਤ੍ਤਨੋ ਵਚਨਂ ਸੁਣਨ੍ਤਿਞ੍ਚ. ਵਿਞ੍ਞੁਞ੍ਚਾਤਿ ਦੁਟ੍ਠੁਲ੍ਲਾਦੁਟ੍ਠੁਲ੍ਲਸਲ੍ਲਕ੍ਖਣਸਮਤ੍ਥਞ੍ਚ ਮਨੁਸ੍ਸਿਤ੍ਥਿਂ. ਮਗ੍ਗਂ ਵਾਤਿ ਵਚ੍ਚਮਗ੍ਗਪਸ੍ਸਾਵਮਗ੍ਗਾਨਂ ਵਸੇਨ ਮਗ੍ਗਂ ਵਾ ਮੇਥੁਨਂ ਵਾ ਆਰਬ੍ਭਾਤਿ ਸਮ੍ਬਨ੍ਧੋ. ਦੁਟ੍ਠੁਲ੍ਲਵਾਚਾਰਾਗੇਨਾਤਿ ਦੁਟ੍ਠਾ ਚ ਸਾ ਅਸਦ੍ਧਮ੍ਮਪ੍ਪਟਿਸਂਯੁਤ੍ਤਤਾਯ ਥੂਲਾ ਚ ਲਾਮਕਜਨਸਾਧਾਰਣਤਾਯਾਤਿ ਦੁਟ੍ਠੁਲ੍ਲਾ. ਸਾਵ ਪੁਨ ਵਾਚਾ ਦੁਟ੍ਠੁਲ੍ਲਵਾਚਾ. ਤਸ੍ਸਂ ਅਸ੍ਸਾਦਸਮ੍ਪਯੁਤ੍ਤੋ ਰਾਗੋਤਿ ਸਮਾਸੋ, ਤੇਨ. ਓਭਾਸਿਤ੍ਵਾਤਿ ਵਣ੍ਣਾਵਣ੍ਣਯਾਚਨਾਦਿਵਸੇਨ ਅਸਦ੍ਧਮ੍ਮਵਚਨਂ ਵਤ੍ਵਾ. ਅਸੁਣਨ੍ਤਿਯਾ ਪਨ ਦੂਤੇਨ ਵਾ ਪਣ੍ਣੇਨ ਵਾ ਆਰੋਚਿਤੇ ਅਨਾਪਤ੍ਤਿ. ਤਤ੍ਥ ਦ੍ਵਿਨ੍ਨਂ ਮਗ੍ਗਾਨਂ ਵਸੇਨ ਵਣ੍ਣਾਵਣ੍ਣੇਹਿ, ਮੇਥੁਨਯਾਚਨਾਦੀਹਿ ਵਾ ‘‘ਸਿਖਰਣੀਸਿ, ਸਮ੍ਭਿਨ੍ਨਾਸਿ, ਉਭਤੋਬ੍ਯਞ੍ਜਨਕਾਸੀ’’ਤਿ ਇਮੇਸੁ ਤੀਸੁ ਅਞ੍ਞਤਰੇਨ ਅਕ੍ਕੋਸਵਚਨੇਨ ਵਾ ਓਭਾਸਨ੍ਤਸ੍ਸ ਸਙ੍ਘਾਦਿਸੇਸੋ, ਅਧਕ੍ਖਕਉਬ੍ਭਜਾਣੁਮਣ੍ਡਲਂ ਆਦਿਸ੍ਸ ਵਣ੍ਣਾਦਿਭਣਨੇ ਥੁਲ੍ਲਚ੍ਚਯਂ, ਤਥਾ ਯਕ੍ਖੀਪੇਤੀਪਣ੍ਡਕਾਨਂ ਵਚ੍ਚਮਗ੍ਗਪਸ੍ਸਾਵਮਗ੍ਗੇ ਆਦਿਸ੍ਸ ਵਣ੍ਣਾਦਿਭਣਨੇ ਮੇਥੁਨਯਾਚਨਾਦੀਸੁਪਿ. ਤੇਸਂ ਪਨ ਅਧਕ੍ਖਕਾਦਿਕੇ ਦੁਕ੍ਕਟਂ, ਤਥਾ ਮਨੁਸ੍ਸਿਤ੍ਥੀਨਂ ਉਬ੍ਭਕ੍ਖਕੇ ਅਧੋਜਾਣੁਮਣ੍ਡਲੇ ਕਾਯਪ੍ਪਟਿਬਦ੍ਧੇ ਚ.

ਤਤਿਯੋ.

੨੨. ਅਤ੍ਤਕਾਮੁਪਟ੍ਠਾਨਨ੍ਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਉਪਟ੍ਠਾਨਂ ਕਾਮੁਪਟ੍ਠਾਨਂ. ਅਤ੍ਤਨੋ ਅਤ੍ਥਾਯ ਕਾਮੁਪਟ੍ਠਾਨਂ ਅਤ੍ਤਕਾਮੁਪਟ੍ਠਾਨਂ. ਅਥ ਵਾ ਕਾਮੀਯਤੀਤਿ ਕਾਮਂ, ਅਤ੍ਤਨੋ ਕਾਮਂ ਅਤ੍ਤਕਾਮਂ, ਸਯਂ ਮੇਥੁਨਰਾਗਵਸੇਨ ਪਤ੍ਥਿਤਨ੍ਤਿ ਅਤ੍ਥੋ. ਅਤ੍ਤਕਾਮਞ੍ਚ ਤਂ ਉਪਟ੍ਠਾਨਞ੍ਚਾਤਿ ਅਤ੍ਤਕਾਮੁਪਟ੍ਠਾਨਂ. ਤਸ੍ਸ ਵਣ੍ਣੋ ਗੁਣੋ, ਤਂ. ਵਤ੍ਵਾਤਿ ‘‘ਯਦਿਦਂ ਕਾਮੁਪਟ੍ਠਾਨਂ ਨਾਮ, ਏਤਦਗ੍ਗਂ ਉਪਟ੍ਠਾਨਾਨ’’ਨ੍ਤਿ ਕਾਮੁਪਟ੍ਠਾਨੇ ਵਣ੍ਣਂ ਅਨ੍ਤਮਸੋ ਹਤ੍ਥਮੁਦ੍ਦਾਯਪਿ ਇਤ੍ਥੀਤਿ ਸਞ੍ਞੀ ਪਕਾਸੇਤ੍ਵਾਤਿ ਅਤ੍ਥੋ. ਵਾਚਾਤਿ ਵਾਚਾਯ ਯਕਾਰਲੋਪਵਸੇਨ. ਮੇਥੁਨਯੁਤ੍ਤੇਨਾਤਿ ਮੇਥੁਨਯੁਤ੍ਤਾਯ, ਲਿਙ੍ਗਵਿਪਲ੍ਲਾਸਵਸੇਨ ਤਾਯ ‘‘ਅਰਹਸਿ ਤ੍ਵਂ ਮਯ੍ਹਂ ਮੇਥੁਨਂ ਧਮ੍ਮਂ ਦਾਤੁ’’ਨ੍ਤਿਆਦਿਕਾਯ ਮੇਥੁਨਧਮ੍ਮਪ੍ਪਟਿਸਂਯੁਤ੍ਤਾਯ ਵਾਚਾਯ ਮੇਥੁਨਯਾਚਨੇ ਮੇਥੁਨਰਾਗਿਨੋਤਿ ਸਮ੍ਬਨ੍ਧੋ. ਮੇਥੁਨੇਰਾਗੋ, ਸੋ ਅਸ੍ਸ ਅਤ੍ਥੀਤਿ ਮੇਥੁਨਰਾਗੀ, ਤਸ੍ਸ. ਗਰੁ ਹੋਤੀਤਿ ਗਰੁਕਾਪਤ੍ਤਿ ਹੋਤੀਤਿ ਅਤ੍ਥੋ. ਮ-ਕਾਰੋ ਪਦਸਨ੍ਧਿਕਰੋ. ਏਤ੍ਥ ਪਨ ਪਣ੍ਡਕੇ ਪਣ੍ਡਕਸਞ੍ਞਿਨੋ ਥੁਲ੍ਲਚ੍ਚਯਂ, ਤਸ੍ਮਿਂਯੇਵ ਇਤ੍ਥਿਸਞ੍ਞਿਨੋ ਦੁਕ੍ਕਟਂ.

ਚਤੁਤ੍ਥੋ.

੨੩. ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਸਨ੍ਦੇਸਂ ਪਟਿਗ੍ਗਹੇਤ੍ਵਾਤਿ ਸਮ੍ਬਨ੍ਧੋ. ਇਤ੍ਥਿਯਾ ਵਾਤਿ ‘‘ਦਸ ਇਤ੍ਥਿਯੋ ਮਾਤੁਰਕ੍ਖਿਤਾ ਪਿਤੁਰਕ੍ਖਿਤਾ’’ਤਿਆਦਿਨਾ (ਪਾਰਾ. ੩੦੩) ਚ ‘‘ਦਸ ਭਰਿਯਾਯੋ ਧਨਕ੍ਕੀਤਾ ਛਨ੍ਦਵਾਸਿਨੀ’’ਤਿਆਦਿਨਾ (ਪਾਰਾ. ੩੦੩) ਚ ਵੁਤ੍ਤਾਯ ਵੀਸਤਿਵਿਧਾਯ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਤਂਸਮ੍ਬਨ੍ਧਵਸੇਨ ਤੇਸਂ ਮਾਤਾਦੀਨਂ ਵਾ. ਸਨ੍ਦੇਸਨ੍ਤਿ ਇਤ੍ਥਿਯਾ ਵਾ ਪੁਰਿਸੇਨ ਵਾ ਉਭਿਨ੍ਨਂ ਮਾਤਾਦੀਹਿ ਵਾ ‘‘ਏਹਿ, ਭਨ੍ਤੇ, ਇਤ੍ਥਨ੍ਨਾਮਂ ਇਤ੍ਥਿਂ ਵਾ ਪੁਰਿਸਂ ਵਾ ਏਵਂ ਭਣਾਹੀ’’ਤਿ ਵੁਤ੍ਤਂ ਜਾਯਮ੍ਪਤਿਭਾਵਸਨ੍ਨਿਸ੍ਸਿਤਂ ਸਨ੍ਦੇਸਵਚਨਂ. ਪਟਿਗ੍ਗਹੇਤ੍ਵਾਤਿ ‘‘ਸਾਧੂ’’ਤਿ ਕਾਯੇਨ ਵਾ ਵਾਚਾਯ ਵਾ ਸਮ੍ਪਟਿਚ੍ਛਿਤ੍ਵਾ. ਵੀਮਂਸਿਤ੍ਵਾਤਿ ਯਤ੍ਥ ਪੇਸਿਤੋ, ਤੇਸਂ ਅਧਿਪ੍ਪਾਯਂ ਉਪਪਰਿਕ੍ਖਿਤ੍ਵਾ ਵਾ ਉਪਪਰਿਕ੍ਖਾਪੇਤ੍ਵਾ ਵਾ. ਹਰਂ ਪਚ੍ਚਾਤਿ ਇਤ੍ਥੀ ਵਾ ਪੁਰਿਸੋ ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਤੁ ਵਾ, ਮਾ ਵਾ, ਯੇਹਿ ਪੇਸਿਤੋ, ਤੇਸਂ ਪਚ੍ਚਾਹਰਨ੍ਤੋ ਵਾ ਹਰਾਪੇਨ੍ਤੋ ਵਾ, ਜਾਯਮ੍ਪਤਿਭਾਵੋ ਹੋਤੁ ਵਾ, ਮਾ ਵਾ, ਅਕਾਰਣਮੇਤਂ. ਇਮਾਯ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ ਚ, ਦ੍ਵੀਹਿ ਅਙ੍ਗੇਹਿ ਪਣ੍ਡਕੇ ਚ ਅਙ੍ਗਤ੍ਤਯੇਨਾਪਿ ਥੁਲ੍ਲਚ੍ਚਯਂ, ਏਕੇਨ ਦੁਕ੍ਕਟਂ. ਕੇਚਿ ਪਨ ‘‘ਹਰਂ ਪਚ੍ਛਾ’’ਤਿ ਵਿਪਾਠਂ ਪਰਿਕਪ੍ਪੇਤ੍ਵਾ ‘‘ਪਚ੍ਛਾ ਹਰ’’ਨ੍ਤਿ ਯੋਜੇਨ੍ਤਿ, ਤਂ ਨ ਸੁਨ੍ਦਰਂ ਪਚ੍ਚਾਤਿ ਉਪਸਗ੍ਗਤ੍ਤਾ. ਪਦਸ੍ਸ ਉਪਰਿ ਅਤ੍ਥੇ ਸਜ੍ਜੇਨ੍ਤੋ ਪਕਾਸੇਨ੍ਤੋ ਗਚ੍ਛਤੀਤਿ ਹਿ ਉਪਸਗ੍ਗੋ ਨਾਮ, ਤਸ੍ਮਾ ‘‘ਪਤਿ ਆ’’ਤਿ ਉਪਸਗ੍ਗਾਨਂ ‘‘ਹਰ’’ਨ੍ਤਿਮਸ੍ਸ ਪਦਸ੍ਸ ਉਪਰਿ ਭਵਿਤਬ੍ਬਨ੍ਤਿ.

ਪਞ੍ਚਮੋ.

੨੪. ਸਂਯਾਚਿਤਪਰਿਕ੍ਖਾਰਨ੍ਤਿ ਸਂ ਅਤ੍ਤਨਾ ਯਾਚਿਤੋ ਵਾਸਿਆਦਿਕੋ ਪਰਿਕ੍ਖਾਰੋ ਯਸ੍ਸਾ, ਤਂ. ਅਦੇਸਿਤਵਤ੍ਥੁਕਨ੍ਤਿ ਉਤ੍ਤਿਦੁਤਿਯਕਮ੍ਮੇਨ ਅਦੇਸਿਤਂ ਵਤ੍ਥੁ ਕੁਟਿਕਰਣਪ੍ਪਦੇਸੋ ਯਸ੍ਸਾਤਿ ਵਿਗ੍ਗਹੋ, ਤਂ. ਪਮਾਣਾਤਿਕ੍ਕਨ੍ਤਨ੍ਤਿ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ ਸੁਗਤਵਿਦਤ੍ਥਿ ਨਾਮ, ਤਾਯ ‘‘ਦੀਘਸੋ ਦ੍ਵਾਦਸ ਵਿਦਤ੍ਥਿਯੋ ਸੁਗਤਸ੍ਸ ਵਿਦਤ੍ਥਿਯਾ ਤਿਰਿਯਂ ਸਤ੍ਤਨ੍ਤਰਾ’’ਤਿ (ਪਾਰਾ. ੩੪੮) ਏਵਂ ਵੁਤ੍ਤਪ੍ਪਮਾਣਂ ਏਕਤੋਭਾਗੇਨਾਪਿ ਅਤਿਕ੍ਕਨ੍ਤਾ ਪਮਾਣਾਤਿਕ੍ਕਨ੍ਤਾਤਿ ਤਂ ਤਿਰਿਯਂ ਚਤੁਹਤ੍ਥਸਙ੍ਖਾਤਹੇਟ੍ਠਿਮਪ੍ਪਮਾਣੇ ਸਤਿ ਦੀਘਤੋ ਵੁਤ੍ਤਪ੍ਪਮਾਣਤੋ ਕੇਸਗ੍ਗਮਤ੍ਤਮ੍ਪਿ ਵਡ੍ਢੇਤੁਂ ਨ ਵਟ੍ਟਤਿ. ਤਤੋ ਊਨਕੇ, ਦੀਘਤੋ ਚ ਵਡ੍ਢਿਤੇ ਅਯਂ ਕੁਟਿਸਙ੍ਖਂ ਨ ਗਚ੍ਛਤੀਤਿ. ‘‘ਮਯ੍ਹਂ ਵਾਸਾਗਾਰਂ ਏਤ’’ਨ੍ਤਿ ਏਵਂ ਅਤ੍ਤਾ ਉਦ੍ਦੇਸੋ ਏਤਿਸ੍ਸਾਤਿ ਅਤ੍ਤੁਦ੍ਦੇਸਾ. ਕੁਟਿਨ੍ਤਿ ਉਲ੍ਲਿਤ੍ਤਾਦਿਕਂ ਕੁਟਿਂ ਕਤ੍ਵਾਤਿ ਸਮ੍ਬਨ੍ਧੋ. ਤਤ੍ਥ ਉਲ੍ਲਿਤ੍ਤਾ ਨਾਮ ਅਨ੍ਤੋ ਉਦ੍ਧਂਮੁਖਂ ਲਿਤ੍ਤਾ. ਅਵਲਿਤ੍ਤਾ ਨਾਮ ਬਹਿ ਅਧੋਮੁਖਂ ਲਿਤ੍ਤਾ. ਉਭਯਥਾ ਉਲ੍ਲਿਤ੍ਤਾਵਲਿਤ੍ਤਾ. ਕਤ੍ਵਾਤਿ ਅਨ੍ਤੋਭੂਤਕਾਰਿਤਤ੍ਥਵਸੇਨ ਕਾਰਾਪੇਤ੍ਵਾ ਵਾ.

ਤਤ੍ਥਾਯਂ ਵਤ੍ਥੁਦੇਸਨਕ੍ਕਮੋ – ਤੇਨ ਕੁਟਿਕਾਰਕੇਨ ਭਿਕ੍ਖੁਨਾ ਕੁਟਿਵਤ੍ਥੁਂ ਸੋਧੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਣਾਮੇਤ੍ਵਾ ਪਦਭਾਜਨੇ (ਪਾਰਾ. ੩੪੯) ਵੁਤ੍ਤਨਯੇਨ ਸਙ੍ਘਂ ਤਿਕ੍ਖਤ੍ਤੁਂ ਯਾਚਿਤ੍ਵਾ ਸਬ੍ਬੇ ਵਾ ਸਙ੍ਘਪਰਿਯਾਪਨ੍ਨਾ, ਸਙ੍ਘੇਨ ਵਾ ਸਮ੍ਮਤਾ ਦ੍ਵੇ ਤਯੋ ਭਿਕ੍ਖੂ ਤਤ੍ਥ ਨੇਤਬ੍ਬਾ. ਤੇਹਿ ਚ ਕਿਪਿਲ੍ਲਿਕਾਦੀਹਿ ਸੋਲ਼ਸਹਿ ਉਪਦ੍ਦਵੇਹਿ ਵਿਰਹਿਤਤ੍ਤਾ ਅਨਾਰਮ੍ਭਂ ਅਨੁਪਦ੍ਦਵਂ ਦ੍ਵੀਹਿ ਚਤੂਹਿ ਵਾ ਬਲਿਬਦ੍ਦੇਹਿ ਯੁਤ੍ਤੇਨ ਸਕਟੇਨ ਏਕਚਕ੍ਕਂ ਨਿਬ੍ਬੋਦਕਪਤਨਟ੍ਠਾਨੇ ਏਕਂ ਬਹਿ ਕਤ੍ਵਾ ਆਵਿਞ੍ਛਿਤੁਂ ਸਕ੍ਕੁਣੇਯ੍ਯਤਾਯ ‘‘ਸਪਰਿਕ੍ਕਮਨ’’ਨ੍ਤਿ ਸਲ੍ਲਕ੍ਖੇਤ੍ਵਾ ਸਚੇਪਿ ਸਙ੍ਘਪ੍ਪਹੋਨਕਾ ਹੋਨ੍ਤਿ, ਤਤ੍ਥੇਵ, ਨੋ ਚੇ, ਸਙ੍ਘਮਜ੍ਝਂ ਗਨ੍ਤ੍ਵਾ ਤੇਨ ਭਿਕ੍ਖੁਨਾ ਯਾਚਿਤੇਹਿ ਪਦਭਾਜਨੇ (ਪਾਰਾ. ੫੦, ੫੧) ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਵਤ੍ਥੁ ਦੇਸੇਤਬ੍ਬਨ੍ਤਿ. ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਕੁਟਿਂ ਕਰਿਸ੍ਸਾਮੀਤਿ ਸਬ੍ਬਪ੍ਪਯੋਗੇ ਦੁਕ੍ਕਟਂ, ਇਦਾਨਿ ਦ੍ਵੀਹਿ ਪਿਣ੍ਡੇਹਿ ਨਿਟ੍ਠਾਨਂ ਗਮਿਸ੍ਸਤੀਤਿ ਪਠਮਪਿਣ੍ਡਦਾਨੇ ਥੁਲ੍ਲਚ੍ਚਯਂ, ਦੁਤਿਯਦਾਨੇਨ ਲੇਪੇ ਸਙ੍ਘਟਿਤੇ ਸਚੇ ਅਦੇਸਿਤਵਤ੍ਥੁਕਾ ਏਵ ਵਾ ਹੋਤਿ, ਪਮਾਣਾਤਿਕ੍ਕਨ੍ਤਾ ਏਵ ਵਾ, ਏਕੋ ਸਙ੍ਘਾਦਿਸੇਸੋ, ਸਾਰਮ੍ਭਅਪਰਿਕ੍ਕਮਨਤਾਯ ਦ੍ਵੇ ਚ ਦੁਕ੍ਕਟਾਨੀਤਿ ਸਚੇ ਉਭਯਵਿਪਨ੍ਨਾ, ਦ੍ਵੇ ਚ ਸਙ੍ਘਾਦਿਸੇਸਾ ਦ੍ਵੇ ਚ ਦੁਕ੍ਕਟਾਨੀਤਿ ਸਬ੍ਬਂ ਞੇਯ੍ਯਂ.

ਛਟ੍ਠੋ.

੨੫. ਮਹਲ੍ਲਕਨ੍ਤਿ ਸਸ੍ਸਾਮਿਕਭਾਵੇਨ ਸਂਯਾਚਿਤਕੁਟਿਤੋ ਮਹਨ੍ਤਭਾਵੇਨ, ਵਤ੍ਥੁਂ ਦੇਸਾਪੇਤ੍ਵਾ ਪਮਾਣਾਤਿਕ੍ਕਮੇਨਾਪਿ ਕਾਤਬ੍ਬਭਾਵੇਨ ਚ ਮਹਨ੍ਤਤਾਯ ਮਹਤ੍ਤਂ ਲਾਤਿ ਆਦਦਾਤੀਤਿ ਮਹਲ੍ਲਕੋ. ਮਹਤ੍ਤਲਕ ਇਤਿ ਠਿਤੇ ਤ੍ਤਸ੍ਸ ਲੋਪੋ ਲਸ੍ਸ ਚ ਦ੍ਵਿਤ੍ਤਂ, ਤਂ. ਵਸਨਂ ਅਤ੍ਥੋ ਪਯੋਜਨਂ ਵਸਨਤ੍ਥੋ, ਤਾਯ. ਏਤ੍ਥ ਪਨ ਅਦੇਸਿਤਵਤ੍ਥੁਭਾਵੇ ਏਕੋ ਸਙ੍ਘਾਦਿਸੇਸੋ. ਸੇਸਂ ਅਨਨ੍ਤਰਸਦਿਸਮੇਵ. ਇਧ ਚ ਤਤ੍ਥ ਚ ਲੇਣਗੁਹਾਤਿਣਕੁਟਿਪਣ੍ਣਚ੍ਛਦਨਗੇਹੇਸੁ ਅਞ੍ਞਤਰਂ ਕਾਰੇਨ੍ਤਸ੍ਸ ਚ ਕੁਟਿਮ੍ਪਿ ਅਞ੍ਞਸ੍ਸ ਵਾਸਤ੍ਥਾਯ ਵਾਸਾਗਾਰਂ ਵਾ ਠਪੇਤ੍ਵਾ ਉਪੋਸਥਾਗਾਰਾਦੀਸੁ ਅਞ੍ਞਤਰਤ੍ਥਾਯ ਕਰੋਨ੍ਤਸ੍ਸ ਚ ਅਨਾਪਤ੍ਤਿ.

ਸਤ੍ਤਮੋ.

੨੬. ਅਮੂਲਕੇਨ ਅਨ੍ਤਿਮੇਨ ਵਤ੍ਥੁਨਾਤਿ ਸਮ੍ਬਨ੍ਧੋ. ਅਮੂਲਕੇਨਾਤਿ ਦਸ੍ਸਨਸਙ੍ਖਾਤਸ੍ਸ, ਸਵਨਸਙ੍ਖਾਤਸ੍ਸ, ਦਿਟ੍ਠਸੁਤਮੁਤਵਸੇਨ ਪਵਤ੍ਤਪਰਿਸਙ੍ਕਾਸਙ੍ਖਾਤਸ੍ਸ ਚ ਮੂਲਸ੍ਸ ਅਭਾਵੇਨ ਨਤ੍ਥਿ ਮੂਲਮੇਤਸ੍ਸਾਤਿ ਅਮੂਲਕਂ, ਤੇਨ. ਤਂ ਪਨ ਸੋ ਆਪਨ੍ਨੋ ਵਾ ਹੋਤੁ, ਨੋ ਵਾ, ਏਤਂ ਇਧ ਅਪ੍ਪਮਾਣਂ. ਤਤ੍ਥ ਭਿਕ੍ਖੁਞ੍ਚ ਮਾਤੁਗਾਮਞ੍ਚ ਤਥਾਰੂਪੇ ਠਾਨੇ ਦਿਸ੍ਵਾ ਪਰਿਸਙ੍ਕਤਿ, ਅਯਂ ਦਿਟ੍ਠਪਰਿਸਙ੍ਕਾ. ਅਨ੍ਧਕਾਰੇ ਵਾ ਪਟਿਚ੍ਛਨ੍ਨੇ ਵਾ ਭਿਕ੍ਖੁਸ੍ਸ ਚ ਮਾਤੁਗਾਮਸ੍ਸ ਚ ਵਚਨਂ ਸੁਤ੍ਵਾ ਅਞ੍ਞਸ੍ਸ ਅਤ੍ਥਿਭਾਵਂ ਅਜਾਨਨ੍ਤੋ ਪਰਿਸਙ੍ਕਤਿ, ਅਯਂ ਸੁਤਪਰਿਸਙ੍ਕਾ. ਧੁਤ੍ਤਾਨਂ ਇਤ੍ਥੀਹਿ ਸਦ੍ਧਿਂ ਪਚ੍ਚਨ੍ਤਵਿਹਾਰੇਸੁ ਪੁਪ੍ਫਗਨ੍ਧਸੁਰਾਦੀਹਿ ਅਨੁਭਵਿਤ੍ਵਾ ਗਤਟ੍ਠਾਨਂ ਦਿਸ੍ਵਾ ‘‘ਕੇਨ ਨੁ ਖੋ ਇਦਂ ਕਤ’’ਨ੍ਤਿ ਵੀਮਂਸਨ੍ਤੋ ਤਤ੍ਥ ਕੇਨਚਿ ਭਿਕ੍ਖੁਨਾ ਗਨ੍ਧਾਦੀਹਿ ਪੂਜਾ ਕਤਾ ਹੋਤਿ, ਭੇਸਜ੍ਜਤ੍ਥਾਯ ਅਰਿਟ੍ਠਂ ਵਾ ਪੀਤਂ, ਸੋ ਤਸ੍ਸ ਗਨ੍ਧਂ ਘਾਯਿਤ੍ਵਾ ‘‘ਅਯਂ ਸੋ ਭਵਿਸ੍ਸਤੀ’’ਤਿ ਪਰਿਸਙ੍ਕਤਿ. ਅਯਂ ਮੁਤਪਰਿਸਙ੍ਕਾ ਨਾਮ. ਅਨ੍ਤਿਮੇਨ ਚਾਤਿ ਤਤੋ ਪਰਂ ਵਜ੍ਜਾਭਾਵੇਨ ਅਨ੍ਤੇ ਭਵਤ੍ਤਾ ਅਨ੍ਤਿਮੇਨੇਵ. ਵਤ੍ਥੁਨਾਤਿ ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਪਾਰਾਜਿਕੇਸੁ ਧਮ੍ਮੇਸੁ ਅਞ੍ਞਤਰੇਨ ਪਾਰਾਜਿਕੇਨ ਧਮ੍ਮੇਨ. ਚ-ਕਾਰੋ ਪਨੇਤ੍ਥ ਅਵਧਾਰਣੇ, ਤੇਨ ਸਙ੍ਘਾਦਿਸੇਸਾਦਿਂ ਨਿਵਤ੍ਤੇਤਿ. ਅਥ ਵਾ ਚ-ਕਾਰੋ ਅਟ੍ਠਾਨਪ੍ਪਯੁਤ੍ਤੋ.

ਚੋਦੇਨ੍ਤੋ ਵਾ ਚੋਦਾਪੇਨ੍ਤੋਵਾਚਾਤਿ ਯੋਜੇਤਬ੍ਬੋ. ਚਾਵੇਤੁਨ੍ਤਿ ਬ੍ਰਹ੍ਮਚਰਿਯਾ ਚਾਵਨਤ੍ਥਾਯ. ਏਤੇਨ ਏਕਂ ਚਾਵਨਾਧਿਪ੍ਪਾਯਂ ਗਹੇਤ੍ਵਾ ਅਵਸੇਸੇ ਅਕ੍ਕੋਸਾਧਿਪ੍ਪਾਯਵੁਟ੍ਠਾਪਨਾਧਿਪ੍ਪਾਯਾਦਿਕੇ ਸਤ੍ਤਾਧਿਪ੍ਪਾਯੇ ਪਟਿਕ੍ਖਿਪਤਿ. ਸੁਣਮਾਨਨ੍ਤਿ ਇਦਂ ‘‘ਚੋਦੇਨ੍ਤੋ’’ਤਿਆਦੀਨਂ ਕਮ੍ਮਪਦਂ, ਇਮਿਨਾ ਪਰਮ੍ਮੁਖਾ ਚੋਦਨਂ ਪਟਿਕ੍ਖਿਪਤਿ. ਪਰਮ੍ਮੁਖਾ ਪਨ ਸਤ੍ਤਹਿ ਆਪਤ੍ਤਿਕ੍ਖਨ੍ਧੇਹਿ ਵਦਨ੍ਤਸ੍ਸ ਦੁਕ੍ਕਟਂ. ਚੋਦੇਨ੍ਤੋਤਿ ‘‘ਵਤ੍ਥੁਸਨ੍ਦਸ੍ਸਨਾ ਆਪਤ੍ਤਿਸਨ੍ਦਸ੍ਸਨਾ ਸਂਵਾਸਪ੍ਪਟਿਕ੍ਖੇਪੋ ਸਾਮੀਚਿਪ੍ਪਟਿਕ੍ਖੇਪੋ’’ਤਿ (ਪਾਰਾ. ਅਟ੍ਠ. ੨.੩੮੫-੩੮੬) ਸਙ੍ਖੇਪਤੋ ਵੁਤ੍ਤਾਨਂ ਚਤੁਨ੍ਨਂ ਚੋਦਨਾਨਂ ਵਸੇਨ ਸਯਂ ਚੋਦੇਨ੍ਤੋ ਵਾ. ਚੋਦਾਪੇਨ੍ਤੋ ਵਾਤਿ ਪਰੇਨ ਯੇਨ ਕੇਨਚਿ ਚੋਦਾਪੇਨ੍ਤੋ ਵਾ. ਤਸ੍ਮਾ ਯੋ ਭਿਕ੍ਖੁਸ੍ਸ ਸਮੀਪੇ ਠਤ੍ਵਾ ‘‘ਤ੍ਵਂ ਮੇਥੁਨਂ ਧਮ੍ਮਂ ਸੇਵਿ, ਅਸ੍ਸਮਣੋਸੀ’’ਤਿਆਦਿਨਾ ਵਤ੍ਥੁਸਨ੍ਦਸ੍ਸਨਵਸੇਨ ਵਾ ‘‘ਤ੍ਵਂ ਮੇਥੁਨਧਮ੍ਮਾਪਤ੍ਤਿਂ ਆਪਨ੍ਨੋਸੀ’’ਤਿਆਦਿਨਾ ਆਪਤ੍ਤਿਸਨ੍ਦਸ੍ਸਨਵਸੇਨ ਵਾ ‘‘ਅਸ੍ਸਮਣੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ, ਅਸ੍ਸਮਣੋਸੀ’’ਤਿਆਦਿਨਾ ਸਂਵਾਸਪ੍ਪਟਿਕ੍ਖੇਪਵਸੇਨ ਵਾ ਅਭਿਵਾਦਨਾਦਿਸਂਵਾਸੇ ਪਟਿਕ੍ਖਿਤ੍ਤੇ ਅਸ੍ਸਮਣੋਤਿ ਕਸ੍ਮਾਤਿ ਪੁਟ੍ਠਸ੍ਸ ‘‘ਅਸ੍ਸਮਣੋਸੀ’’ਤਿਆਦਿਵਚਨੇਹਿ ਸਾਮੀਚਿਪ੍ਪਟਿਕ੍ਖੇਪਵਸੇਨ ਵਾ ਅਨ੍ਤਮਸੋ ਹਤ੍ਥਮੁਦ੍ਦਾਯ ਏਵ ਵਾਪਿ ਏਤਮਤ੍ਥਂ ਦੀਪਯਤੋ ‘‘ਕਰੋਤੁ ਮੇ ਆਯਸ੍ਮਾ ਓਕਾਸਂ, ਅਹਂ ਤਂ ਵਤ੍ਤੁਕਾਮੋ’’ਤਿ ਏਵਂ ਓਕਾਸੇ ਅਕਾਰਿਤੇ ਵਾਚਾਯ ਸਙ੍ਘਾਦਿਸੇਸੋ ਚੇਵ ਦੁਕ੍ਕਟਞ੍ਚ, ਓਕਾਸਂ ਕਾਰੇਤ੍ਵਾ ਚੋਦੇਨ੍ਤਸ੍ਸ ਪਨ ਸਙ੍ਘਾਦਿਸੇਸੋਵ ਦਟ੍ਠਬ੍ਬੋ.

ਅਟ੍ਠਮੋ.

੨੭. ਅਞ੍ਞਸ੍ਸਾਤਿ ਖਤ੍ਤਿਯਾਦਿਜਾਤਿਕਸ੍ਸ ਪਰਸ੍ਸ. ਕਿਰਿਯਨ੍ਤਿ ਮੇਥੁਨਵੀਤਿਕ੍ਕਮਸਙ੍ਖਾਤਂ ਕਿਰਿਯਂ. ਤੇਨਾਤਿ ਅਞ੍ਞਸ੍ਸ ਵੀਤਿਕ੍ਕਮਸਙ੍ਖਾਤਸ੍ਸ ਮੇਥੁਨਵੀਤਿਕ੍ਕਮਸਨ੍ਦਸ੍ਸਨੇਨ ਕਰਣਭੂਤੇਨ. ਲੇਸੇਨਾਤਿ ਯਸ੍ਸ ਜਾਤਿਆਦਯੋ ਤਤੋ ਅਞ੍ਞਮ੍ਪਿ ਵਤ੍ਥੁਂ ਲਿਸ੍ਸਤਿ ਉਦ੍ਦਿਟ੍ਠੇ ਵਿਤ੍ਥਾਰਂ ਸਿਲਿਸ੍ਸਤਿ ਵੋਹਾਰਮਤ੍ਤੇਨੇਵਾਤਿ ਜਾਤਿਆਦਯੋਵ ‘‘ਲੇਸਾ’’ਤਿ ਵੁਚ੍ਚਨ੍ਤਿ, ਤੇਨ ਜਾਤਿਲੇਸਨਾਮਲੇਸਾਦਿਨਾ ਲੇਸੇਨ. ਅਞ੍ਞਨ੍ਤਿ ਯੋ ਵੀਤਿਕ੍ਕਮਨ੍ਤੋ ਦਿਟ੍ਠੋ, ਤਤੋ ਅਪਰਮ੍ਪਿ ਭਿਕ੍ਖੁਂ ਚਾਵੇਤੁਂ ਅਨ੍ਤਿਮੇਨ ਵਤ੍ਥੁਨਾ ਚੋਦਯਨ੍ਤਿ ਸਮ੍ਬਨ੍ਧੋ. ਕਥਂ? ਕੋਚਿ ਖਤ੍ਤਿਯਜਾਤਿਯੋ ਵੀਤਿਕ੍ਕਮਨ੍ਤੋ ਦਿਟ੍ਠੋ, ਤਤੋ ਅਞ੍ਞਂ ਅਤ੍ਤਨੋ ਵੇਰਿਂ ਖਤ੍ਤਿਯਜਾਤਿਕਂ ਭਿਕ੍ਖੁਂ ਪਸ੍ਸਿਤ੍ਵਾ ਤਂ ਖਤ੍ਤਿਯਂ ਜਾਤਿਲੇਸਂ ਗਹੇਤ੍ਵਾ ‘‘ਖਤ੍ਤਿਯੋ ਮਯਾ ਦਿਟ੍ਠੋ ਵੀਤਿਕ੍ਕਮਨ੍ਤੋ, ਤ੍ਵਂ ਖਤ੍ਤਿਯੋ ਪਾਰਾਜਿਕਂ ਧਮ੍ਮਂ ਆਪਨ੍ਨੋਸੀ’’ਤਿ ਚੋਦੇਤਿ ਚੋਦਾਪੇਤਿ ਵਾ. ਏਵਂ ਨਾਮਲੇਸਾਦਯੋਪਿ ਵੇਦਿਤਬ੍ਬਾ. ਸੇਸਾ ਵਿਨਿਚ੍ਛਯਕਥਾ ਅਟ੍ਠਮੇ ਵੁਤ੍ਤਸਦਿਸਾਯੇਵ.

ਨਵਮੋ.

੨੮. ਏਤ੍ਤਾਵਤਾ ‘‘ਗਰੁਕਾ ਨਵਾ’’ਤਿ ਉਦ੍ਦਿਟ੍ਠੇ ਵਿਤ੍ਥਾਰਤੋ ਦਸ੍ਸੇਤ੍ਵਾ ਇਦਾਨਿ ਤੇਸੁ ਆਪਨ੍ਨੇਸੁ ਪਟਿਪਜ੍ਜਿਤਬ੍ਬਾਕਾਰਂ ਦਸ੍ਸੇਤੁਂ ‘‘ਛਾਦੇਤਿ ਜਾਨਮਾਪਨ੍ਨ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਯੋ ਭਿਕ੍ਖੁ ਅਤ੍ਤਨਾ ਆਪਨ੍ਨਂ ਸਙ੍ਘਾਦਿਸੇਸਾਪਤ੍ਤਿਂ ਆਪਤ੍ਤਿਵਸੇਨ ਵਾ ਵਤ੍ਥੁਵਸੇਨ ਵਾ ਜਾਨਂ ਜਾਨਨ੍ਤੋ ਯਾਵਤਾ ਯਤ੍ਤਕਾਨਿ ਅਹਾਨਿ ਛਾਦੇਤਿ ਪਟਿਚ੍ਛਾਦੇਤਿ, ਤਾਵਤਾ ਤਤ੍ਤਕਾਨਿ ਅਹਾਨਿ ਤਸ੍ਸ ਪਰਿਵਾਸੋ ਹੋਤੀਤਿ ਏਵਂ ਪਦਸਨ੍ਧਿਵਸੇਨ ਅਤ੍ਥੋ ਵੇਦਿਤਬ੍ਬੋ. ਤਤ੍ਥ ਪਟਿਚ੍ਛਨ੍ਨਪਰਿਵਾਸੋ ਸੁਦ੍ਧਨ੍ਤਪਰਿਵਾਸੋ ਸਮੋਧਾਨਪਰਿਵਾਸੋਤਿ ਤਿਵਿਧੋ ਪਰਿਵਾਸੋ. ਤੇਸਂ ਪਨ ਅਤਿਸਙ੍ਖੇਪਨਯੇਨ ਮੁਖਮਤ੍ਤੇਪਿ ਦਸ੍ਸਿਤੇ ਵਿਤ੍ਥਾਰਵਿਨਿਚ੍ਛਯਪਵੇਸੋਪਾਯਸਮ੍ਭਵੋ ਸਿਯਾਤਿ ਮੁਖਮਤ੍ਤਂ ਦਸ੍ਸਯਿਸ੍ਸਾਮ.

ਤਤ੍ਥ ਪਟਿਚ੍ਛਨ੍ਨਪਰਿਵਾਸੋ ਨਾਮ ਯਥਾਪਟਿਚ੍ਛਨ੍ਨਾਯ ਆਪਤ੍ਤਿਯਾ ਦਾਤਬ੍ਬੋ, ਤਸ੍ਮਾ ਪਟਿਚ੍ਛਨ੍ਨਦਿਵਸੇ ਚ ਆਪਤ੍ਤਿਯੋ ਚ ਸਲ੍ਲਕ੍ਖੇਤ੍ਵਾ ਸਚੇ ਏਕਾਹਪ੍ਪਟਿਚ੍ਛਨ੍ਨਾ ਹੋਤਿ, ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿਆਦਿਨਾ ਖਨ੍ਧਕੇ (ਚੂਲ਼ਵ. ੯੮-੯੯) ਆਗਤਨਯੇਨ ਯਾਚਾਪੇਤ੍ਵਾ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਿ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿਆਦਿਨਾ ਖਨ੍ਧਕੇ ਆਗਤਨਯੇਨੇਵ ਕਮ੍ਮਵਾਚਂ ਵਤ੍ਵਾ ਪਰਿਵਾਸੋ ਦਾਤਬ੍ਬੋ. ਏਕਂ ਆਪਜ੍ਜਿਤ੍ਵਾ ‘‘ਸਮ੍ਬਹੁਲਾ’’ਤਿ ਵਿਨਯਕਮ੍ਮਂ ਕਰੋਨ੍ਤਸ੍ਸਾਪਿ ਵੁਟ੍ਠਾਤੀਤਿ ‘‘ਸਮ੍ਬਹੁਲਾ’’ਤਿ ਵੁਤ੍ਤਂ. ਨਾਨਾਵਤ੍ਥੁਕਾਸੁਪਿ ਏਸੇਵ ਨਯੋ. ਅਥ ਦ੍ਵੀਹਾਦਿਪ੍ਪਟਿਚ੍ਛਨ੍ਨਾ ਹੋਨ੍ਤਿ, ਪਕ੍ਖਅਤਿਰੇਕਪਕ੍ਖਮਾਸਅਤਿਰੇਕਮਾਸਸਂਵਚ੍ਛਰਅਤਿਰੇਕਸਂਵਚ੍ਛਰਪ੍ਪਟਿਚ੍ਛਨ੍ਨਾ ਵਾ, ‘‘ਦ੍ਵੀਹਪ੍ਪਟਿਚ੍ਛਨ੍ਨਾਯੋ ਵਾ’’ਤਿਆਦਿਨਾ ਵਤ੍ਵਾ ਯੋ ਯੋ ਆਪਨ੍ਨੋ ਹੋਤਿ, ਤਸ੍ਸ ਤਸ੍ਸ ਨਾਮਞ੍ਚ ਗਹੇਤ੍ਵਾ ਯੋਜਨਾ ਕਾਤਬ੍ਬਾ.

ਕਮ੍ਮਵਾਚਾਪਰਿਯੋਸਾਨੇ ਚ ਸਚੇ ਅਪ੍ਪਭਿਕ੍ਖੁਕੋ ਆਵਾਸੋ ਹੋਤਿ, ਸਕ੍ਕਾ ਰਤ੍ਤਿਚ੍ਛੇਦਂ ਅਨਾਪਜ੍ਜਨ੍ਤੇਨ ਵਸਿਤੁਂ, ਤਤ੍ਥੇਵ ‘‘ਪਰਿਵਾਸਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’ਤਿ ਵਤ੍ਤਂ ਸਮਾਦਾਯ ਤਤ੍ਥੇਵ ਸਙ੍ਘਸ੍ਸ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਾਹਪ੍ਪਟਿਚ੍ਛਨ੍ਨਾਯੋ’’ਤਿਆਦਿਨਾ ਆਰੋਚੇਤ੍ਵਾ ਪੁਨ ਆਗਤਾਗਤਾਨਂ ਭਿਕ੍ਖੂਨਂ ਆਰੋਚੇਨ੍ਤੇਨ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਸਹਵਾਸੋ, ਤੇਨ ਚ ਵਿਨਾਵਾਸੋ, ਆਗਨ੍ਤੁਕਾਦੀਨਂ ਉਪਚਾਰਗਤਾਨਂ ਅਨਾਰੋਚਨਾਤਿ ਏਤੇਸੁ ਏਕੇਨਾਪਿ ਰਤ੍ਤਿਚ੍ਛੇਦਞ੍ਚ ਵਤ੍ਤਭੇਦਞ੍ਚ ਅਕਤ੍ਵਾ ਪਰਿਵਤ੍ਥਬ੍ਬਂ.

ਸਚੇ ਨ ਸਕ੍ਕਾ ਹੋਤਿ ਪਰਿਵਾਸਂ ਸੋਧੇਤੁਂ, ਨਿਕ੍ਖਿਤ੍ਤਵਤ੍ਤੇਨ ਵਸਿਤੁਕਾਮੋ ਹੋਤਿ, ਤਤ੍ਥੇਵ ਸਙ੍ਘਮਜ੍ਝੇ ਵਾ ਏਕਸ੍ਸ ਪੁਗ੍ਗਲਸ੍ਸ ਵਾ ਸਨ੍ਤਿਕੇ ‘‘ਪਰਿਵਾਸਂ ਨਿਕ੍ਖਿਪਾਮਿ, ਵਤ੍ਤਂ ਨਿਕ੍ਖਿਪਾਮੀ’’ਤਿ ਪਰਿਵਾਸੋ ਨਿਕ੍ਖਿਪਿਤਬ੍ਬੋ. ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ. ਅਥਾਨੇਨ ਪਚ੍ਚੂਸਸਮਯੇ ਏਕੇਨ ਭਿਕ੍ਖੁਨਾ ਸਦ੍ਧਿਂ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਤੋ ਓਕ੍ਕਮ੍ਮ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤ੍ਵਾ ਅਨ੍ਤੋਅਰੁਣੇਯੇਵ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਂ. ਸਚੇ ਬਹਿ ਠਿਤਾਨਮ੍ਪਿ ਸਦ੍ਦਂ ਸੁਣਾਤਿ, ਪਸ੍ਸਤਿ ਵਾ, ਦੂਰਂ ਗਨ੍ਤ੍ਵਾਪਿ ਆਰੋਚੇਤਬ੍ਬਂ, ਅਨਾਰੋਚੇਨ੍ਤੇ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇ ਅਜਾਨਨ੍ਤਸ੍ਸੇਵ ਉਪਚਾਰਸੀਮਂ ਪਵਿਸਿਤ੍ਵਾ ਗਚ੍ਛਨ੍ਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦੋ. ਅਰੁਣੇ ਉਟ੍ਠਿਤੇ ਤਸ੍ਸ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤ੍ਵਾ ਵਿਹਾਰਂ ਗਨ੍ਤਬ੍ਬਂ. ਏਵਂ ਯਾਵ ਰਤ੍ਤਿਯੋ ਪੂਰੇਨ੍ਤਿ, ਤਾਵ ਪਰਿਵਤ੍ਥਬ੍ਬਂ. ਅਯਂ ਤਾਵ ਪਟਿਚ੍ਛਨ੍ਨਪਰਿਵਾਸੋ.

ਸੁਦ੍ਧਨ੍ਤੋ ਦੁਵਿਧੋ ਚੂਲ਼ਸੁਦ੍ਧਨ੍ਤੋ ਮਹਾਸੁਦ੍ਧਨ੍ਤੋਤਿ. ਤਤ੍ਥ ਯੋ ‘‘ਉਪਸਮ੍ਪਦਤੋ ਪਟ੍ਠਾਯ ਯਤ੍ਤਕਂ ਨਾਮ ਕਾਲਂ ਅਹਂ ਸੁਦ੍ਧੋ’’ਤਿ ਜਾਨਾਤਿ, ਤਤ੍ਤਕਂ ਅਪਨੇਤ੍ਵਾ ਤਤੋ ਅਵਸੇਸੇ ਰਤ੍ਤਿਪਰਿਚ੍ਛੇਦੇ ਏਕਤੋ ਕਤ੍ਵਾ ਦਾਤਬ੍ਬਪਰਿਵਾਸੋ ਚੂਲ਼ਸੁਦ੍ਧਨ੍ਤੋ. ਯੋ ਪਨ ਸਬ੍ਬਸੋ ਰਤ੍ਤਿਪਰਿਯਨ੍ਤਂ ਨ ਜਾਨਾਤਿ ਨਸ੍ਸਰਤਿ, ਤਤ੍ਥ ਚ ਵੇਮਤਿਕੋ, ਤਸ੍ਸ ਦਾਤਬ੍ਬੋ ਮਹਾਸੁਦ੍ਧਨ੍ਤੋ. ਆਪਤ੍ਤਿਪਰਿਯਨ੍ਤਂ ਜਾਨਾਤੁ ਵਾ, ਮਾ ਵਾ, ਅਕਾਰਣਮੇਤਂ.

ਸਮੋਧਾਨਪਰਿਵਾਸੋ ਨਾਮ ਤਿਵਿਧੋ ਓਧਾਨਸਮੋਧਾਨੋ ਅਗ੍ਘਸਮੋਧਾਨੋ ਮਿਸ੍ਸਕਸਮੋਧਾਨੋਤਿ. ਤਤ੍ਥ ਯੋ ਨਿਟ੍ਠਿਤਪਰਿਵਾਸੋਪਿ ਵਾ ਨਿਟ੍ਠਿਤਮਾਨਤ੍ਤੋਪਿ ਵਾ ਅਨਿਕ੍ਖਿਤ੍ਤਵਤ੍ਤੋ ਅਞ੍ਞਂ ਆਪਤ੍ਤਿਂ ਆਪਜ੍ਜਿਤ੍ਵਾ ਪੁਰਿਮਾਪਤ੍ਤਿਯਾ ਸਮਾ ਵਾ ਊਨਤਰਾ ਵਾ ਰਤ੍ਤਿਯੋ ਪਟਿਚ੍ਛਾਦੇਤਿ, ਤਸ੍ਸ ਮੂਲਾਯ ਪਟਿਕਸ੍ਸਨੇਨ ਤੇ ਪਰਿਵੁਤ੍ਥਦਿਵਸੇ ਚ ਮਾਨਤ੍ਤਚਿਣ੍ਣਦਿਵਸੇ ਚ ਓਧੁਨਿਤ੍ਵਾ ਮਕ੍ਖੇਤ੍ਵਾ ਪੁਰਿਮਾਯ ਆਪਤ੍ਤਿਯਾ ਮੂਲਦਿਵਸਪਰਿਚ੍ਛੇਦੇ ਪਚ੍ਛਾ ਆਪਨ੍ਨਂ ਆਪਤ੍ਤਿਂ ਸਮੋਦਹਿਤ੍ਵਾ ਪੁਨ ਆਦਿਤੋ ਪਟ੍ਠਾਯ ਦਾਤਬ੍ਬਪਰਿਵਾਸੋ ਓਧਾਨਸਮੋਧਾਨੋ ਨਾਮ. ਸਚੇ ਕਸ੍ਸਚਿ ਏਕਾਪਤ੍ਤਿ ਏਕਾਹਪ੍ਪਟਿਚ੍ਛਨ੍ਨਾ, ਦ੍ਵੀਹਪ੍ਪਟਿਚ੍ਛਨ੍ਨਾ, ਏਵਂ ਯਾਵ ਦਸਾਹਪ੍ਪਟਿਚ੍ਛਨ੍ਨਾ, ਤਾਸਂ ਅਗ੍ਘੇਨ ਸਮੋਧਾਯ ਤਾਸਂ ਦਸਾਹਪ੍ਪਟਿਚ੍ਛਨ੍ਨਵਸੇਨ ਅਵਸੇਸਾਨਂ ਏਕਾਹਪ੍ਪਟਿਚ੍ਛਨ੍ਨਾਦੀਨਮ੍ਪਿ ਦਾਤਬ੍ਬਪਰਿਵਾਸੋ ਅਗ੍ਘਸਮੋਧਾਨੋ ਨਾਮ. ਯੋ ਪਨ ਨਾਨਾਵਤ੍ਥੁਕਾ ਆਪਤ੍ਤਿਯੋ ਏਕਤੋ ਕਤ੍ਵਾ ਦਾਤਬ੍ਬਪਰਿਵਾਸੋ ਮਿਸ੍ਸਕਸਮੋਧਾਨੋ ਨਾਮ. ਦਾਨਵਿਧਿ ਪਨ ਸਬ੍ਬਤ੍ਥ ਖਨ੍ਧਕੇ (ਚੂਲ਼ਵ. ੧੩੪ ਆਦਯੋ) ਆਗਤਨਯੇਨੇਵ ਵੇਦਿਤਬ੍ਬੋ.

ਏਵਂ ਪਰਿਵੁਤ੍ਥਪਰਿਵਾਸੋ ਭਿਕ੍ਖੁ ਮਾਨਤ੍ਤਂ ਭਿਕ੍ਖੂਨਂ ਮਾਨਨਭਾਵਂ ਛ ਰਤ੍ਤਿਯੋ ਅਖਣ੍ਡਂ ਕਤ੍ਵਾ ਚਰੇਯ੍ਯ ਕਰੇਯ੍ਯ, ਸਮ੍ਪਾਦੇਯ੍ਯਾਤਿ ਵੁਤ੍ਤਂ ਹੋਤਿ. ਤਤ੍ਥ ਸਙ੍ਘੇਨ ਗਣੇਨ ਪੁਗ੍ਗਲੇਨ ਕਤਂ ਤੇਨ ਭਿਕ੍ਖੁਨਾ ਸਙ੍ਘਮਜ੍ਝੇ ਵਤ੍ਤਂ ਸਮਾਦਾਪੇਤ੍ਵਾ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਆਪਤ੍ਤਿਯੋ ਆਪਜ੍ਜਿ’’ਨ੍ਤਿਆਦਿਨਾ ਖਨ੍ਧਕੇ ਵੁਤ੍ਤਨਯੇਨ ਯਾਚਾਪੇਤ੍ਵਾ ਤਤ੍ਥੇਵ ਵੁਤ੍ਤਨਯੇਨ ਮਾਨਤ੍ਤਦਾਨਾਦਯੋਪਿ ਵੇਦਿਤਬ੍ਬਾ. ਇਮਿਨਾਪਿ ਵਤ੍ਤਂ ਨਿਕ੍ਖਿਪਿਤੁਕਾਮੇਨ ਚੇ ਵਤ੍ਤਂ ਨਿਕ੍ਖਿਪਿਤ੍ਵਾ ਚਤੂਹਿ ਪਞ੍ਚਹਿ ਸਦ੍ਧਿਂ ਪਰਿਵਾਸੇ ਵੁਤ੍ਤਪ੍ਪਕਾਰਂ ਪਦੇਸਂ ਗਨ੍ਤ੍ਵਾ ਪੁਰਿਮਨਯੇਨੇਵ ਹੇਟ੍ਠਾ ਵੁਤ੍ਤਂ ਸਹਵਾਸਾਦਿਂ ਅਨ੍ਤਮਸੋ ਚਤੂਹਿ ਊਨਤ੍ਤਾ ਊਨੇ ਗਣੇ ਚਰਣਦੋਸਞ੍ਚ ਵਜ੍ਜੇਤ੍ਵਾ ਪਟਿਪਜ੍ਜਿਤਬ੍ਬਂ. ਅਪ੍ਪਟਿਚ੍ਛਨ੍ਨਾਪਤ੍ਤਿਕਸ੍ਸ ਪਨ ਪਰਿਵਾਸਂ ਅਦਤ੍ਵਾ ਮਾਨਤ੍ਤਮੇਵ ਦਾਤਬ੍ਬਂ. ਏਵਂ ਚਿਣ੍ਣਂ ਕਤਂ ਪਰਿਨਿਟ੍ਠਾਪਿਤਂ ਮਾਨਤ੍ਤਂ ਯੇਨ, ਤਂ ਭਿਕ੍ਖੁਂ. ਵੀਸਤਿ ਸਙ੍ਘੋ ਗਣੋ ਅਸ੍ਸਾਤਿ ਵੀਸਤੀਗਣੋ ਦੀਘਂ ਕਤ੍ਵਾ, ਸੋ ਸਙ੍ਘੋ ਅਬ੍ਭੇਯ੍ਯ ਸਮ੍ਪਟਿਚ੍ਛੇਯ੍ਯ, ਅਬ੍ਭਾਨਕਮ੍ਮਵਸੇਨ ਓਸਾਰੇਯ੍ਯਾਤਿ ਵੁਤ੍ਤਂ ਹੋਤਿ, ਅਵ੍ਹੇਯ੍ਯਾਤਿ ਵਾ ਅਤ੍ਥੋ. ਏਤ੍ਥਾਪਿ ਸਮਾਦਾਨਆਰੋਚਨਯਾਚਨਾਨਿ, ਕਮ੍ਮਵਾਚਾ ਚ ਖਨ੍ਧਕੇ ਵੁਤ੍ਤਨਯੇਨ ਵੇਦਿਤਬ੍ਬਾ.

੨੯. ਏਵਂ ਤੇਸੁ ਪਟਿਪਜ੍ਜਿਤਬ੍ਬਾਕਾਰਂ ਦਸ੍ਸੇਤ੍ਵਾ ਇਦਾਨਿ ਛਾਦਨਸ੍ਸ ਅਙ੍ਗਾਨਿ ਦਸ੍ਸੇਤੁਂ ‘‘ਆਪਤ੍ਤੀ’’ਤਿਆਦਿਮਾਹ. ਤਤ੍ਥ ਨ ਉਕ੍ਖਿਤ੍ਤੋ ਅਨੁਕ੍ਖਿਤ੍ਤੋ, ਨਤ੍ਥਿ ਅਨ੍ਤਰਾਯੋ ਅਸ੍ਸਾਤਿ ਅਨਨ੍ਤਰਾਯੋ. ਸਕਤ੍ਥੇ ਤ੍ਤਪਚ੍ਚਯਵਸੇਨ ਵਾ, ਪਹੁਨੋ ਭਾਵੋ ਪਹੁਤ੍ਤਂ, ਤਂ ਅਸ੍ਸਤ੍ਥੀਤਿ ਸਦ੍ਧਾਦਿਵਸੇਨ ਵਾ ਪਹੁਤ੍ਤੋ. ਅਨੁਕ੍ਖਿਤ੍ਤੋ ਚ ਅਨਨ੍ਤਰਾਯੋ ਚ ਪਹੁਤ੍ਤੋ ਚਾਤਿ ਦ੍ਵਨ੍ਦੋ, ਤੇਸਂ ਭਾਵੋ ਅਨੁਕ੍ਖਿਤ੍ਤਾਦਿਗੁਣੋ ਅਨੁਕ੍ਖਿਤ੍ਤ…ਪੇ… ਪਹੁਤ੍ਤਤਾ. ਆਪਤ੍ਤਿ ਚ ਅਨੁਕ੍ਖਿਤ੍ਤ…ਪੇ… ਪਹੁਤ੍ਤਤਾ ਚ ਆਪਤ੍ਤਿ…ਪੇ… ਪਹੁਤ੍ਤਤਾਯੋ. ਮ-ਕਾਰੋ ਪਦਸਨ੍ਧਿਜੋ. ਤਥਾ ਤੇਨ ਪਕਾਰੇਨ ਆਪਤ੍ਤਿਆਦੀਸੁ ਚਤੂਸੁ ਆਪਤ੍ਤਾਦਿਪਕਾਰੇਨ ਸਞ੍ਞੀ ਤਥਸਞ੍ਞੀ ਰਸ੍ਸਵਸੇਨ. ਤਸ੍ਸ ਭਾਵੋ ਤਥਸਞ੍ਞਿਤਾ, ਯਥਾਵੁਤ੍ਤਆਪਤ੍ਤਾਦਿਸਞ੍ਞਿਤਾਤਿ ਵੁਤ੍ਤਂ ਹੋਤਿ. ਚ-ਕਾਰੋ ਵੁਤ੍ਤਸਮੁਚ੍ਚਯਤ੍ਥੋ. ਕਮਨਂ ਪਤ੍ਥਨਂ ਕਾਮੋ, ਛਾਦੇਤੁਂ ਕਾਮੋ ਛਾਦੇਤੁਕਾਮੋ. ਇਤਿ ਯਥਾਵੁਤ੍ਤਾ ਨਵ, ਅਥ ਛਾਦਨਾ ਚਾਤਿ ਏਵਂ ਦਸ ਚ ਤਾਨਿ ਅਙ੍ਗਾਨਿ ਚਾਤਿ, ਤੇਹਿ. ਅਰੁਣੁਗ੍ਗਮਮ੍ਹਿ ਅਰੁਣਸਙ੍ਖਾਤਸ੍ਸ ਪਠਮਬਾਲਸੂਰਿਯਰਂਸਿਨੋ ਉਗ੍ਗਮਨੇ ਸਤਿ ਛਨ੍ਨਾ ਹੋਤਿ, ਆਪਤ੍ਤੀਤਿ ਸੇਸੋ.

ਤਤ੍ਥਾਯਮਧਿਪ੍ਪਾਯੋ – ਯੋ ਭਿਕ੍ਖੁ ਰਾਜਚੋਰਅਗ੍ਗਿਉਦਕਮਨੁਸ੍ਸਅਮਨੁਸ੍ਸਵਾਲ਼ਸਰੀਸਪਜੀਵਿਤਬ੍ਰਹ੍ਮਚਰਿਯਨ੍ਤਰਾਯਾਨਂ ਦਸਨ੍ਨਮੇਕਸ੍ਸਾਪਿ ਨਤ੍ਥਿਤਾਯ ਅਨਨ੍ਤਰਾਯਿਕੋ ਸਮਾਨੋ ਅਨਨ੍ਤਰਾਯਿਕਸਞ੍ਞੀ ਹੁਤ੍ਵਾ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤੁਞ੍ਚੇਵ ਆਰੋਚੇਤੁਞ੍ਚ ਸਕ੍ਕੁਣੇਯ੍ਯਤਾਯ ਪਹੁ ਸਮਾਨੋ ਪਹੁਸਞ੍ਞੀ ਹੁਤ੍ਵਾ ਤਿਵਿਧਉਕ੍ਖੇਪਨੀਯਕਮ੍ਮਾਕਰਣੇਨ ਅਨੁਕ੍ਖਿਤ੍ਤੋ ਸਮਾਨੋ ਅਨੁਕ੍ਖਿਤ੍ਤਸਞ੍ਞੀ ਹੁਤ੍ਵਾ ਗਰੁਕਾਪਤ੍ਤੀਤਿ ਸਞ੍ਞੀ ਗਰੁਕਂਯੇਵ ਆਪਤ੍ਤਿਂ ਛਾਦੇਤੁਕਾਮੋ ਹੁਤ੍ਵਾ ਛਾਦੇਤਿ, ਤਸ੍ਸਾਯਂ ਆਪਤ੍ਤਿ ਚ ਛਨ੍ਨਾ ਹੋਤੀਤਿ. ਸਚੇ ਪਨੇਤ੍ਥ ਅਨਾਪਤ੍ਤਿਸਞ੍ਞੀ ਵਾ ਹੋਤਿ ਅਞ੍ਞਾਪਤ੍ਤਿਕ੍ਖਨ੍ਧਸਞ੍ਞੀ ਵਾ ਵੇਮਤਿਕੋ ਵਾ, ਅਚ੍ਛਨ੍ਨਾ ਹੋਨ੍ਤਿ. ਆਰੋਚੇਨ੍ਤੇਨ ਪਨ ‘‘ਮਮ ਏਕਾਪਤ੍ਤਿਂ ਆਪਨ੍ਨਭਾਵਂ ਜਾਨਾਹੀ’’ਤਿਆਦਿਨਾ ਨਯੇਨ ਆਰੋਚੇਤਬ੍ਬਂ. ਸਚੇ ਪਨ ਵਤ੍ਥੁਸਭਾਗਾਪਤ੍ਤਿਕਸ੍ਸ ਆਰੋਚੇਤਿ, ਤਾਵ ਤਪ੍ਪਚ੍ਚਯਾ ਦੁਕ੍ਕਟਂ ਆਪਜ੍ਜਤਿ.

ਸਙ੍ਘਾਦਿਸੇਸਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.