੩. ਚੀਵਰਨਿਦ੍ਦੇਸਵਣ੍ਣਨਾ

੩੦. ‘‘ਖੋਮਞ੍ਚ ਕੋਸੇਯ੍ਯਞ੍ਚਾ’’ਤਿਆਦਿਨਾ ਨਪੁਂਸਕਵਿਗ੍ਗਹੇਨ ਦ੍ਵਨ੍ਦੇ ਕਤੇ ਖੋਮ…ਪੇ… ਭਙ੍ਗਾਨਿ. ਤਤ੍ਥ ਖੋਮਨ੍ਤਿ ਗਚ੍ਛਜਾਤਿ. ਉਪਚਾਰਤੋ ਪਨ ਖੋਮੇਨ ਖੋਮਸੁਤ੍ਤੇਨ ਵਾਯਿਤਨ੍ਤਿ ਤਦ੍ਧਿਤੇਨ ਉਪਚਾਰੇਨ ਵਾ ਖੋਮਂ ਖੋਮਪਟਚੀਵਰਂ, ਤਥਾ ਅਵਸੇਸਾਨਿ. ਸਾਣਂ ਸਾਣਵਾਕਸੁਤ੍ਤੇਹਿ ਵਾਯਿਤਂ ਚੀਵਰਂ. ਭਙ੍ਗਂ ਖੋਮਸੁਤ੍ਤਾਦੀਨਿ ਸਬ੍ਬਾਨਿ ਏਕਚ੍ਚਾਨਿ ਵਾ ਵੋਮਿਸ੍ਸੇਤ੍ਵਾ ਵਾਯਿਤਚੀਵਰਂ. ਵਾਕਮਯਮੇਵ ਵਾਤਿ ਕੇਚਿ. ਕਮ੍ਬਲਨ੍ਤਿ ਮਨੁਸ੍ਸਲੋਮਂ ਵਾਲ਼ਲੋਮਞ੍ਚ ਠਪੇਤ੍ਵਾ ਸੇਸਲੋਮੇਹਿ ਵਾਯਿਤਂ. ਏਤਾਨੀਤਿ ਖੋਮਾਦੀਨਿ ਯਥਾਵੁਤ੍ਤਾਨਿ. ਸਹ ਅਨੁਲੋਮੇਹੀਤਿ ਸਾਨੁਲੋਮਾਨਿ. ਜਾਤਿਤੋ ਕਪ੍ਪਿਯਾਨਿ ਛ ਚੀਵਰਾਨਿ ਭਵਨ੍ਤਿ.

੩੧. ਇਦਾਨਿ ‘‘ਦੁਕੂਲ’’ਨ੍ਤਿਆਦਿਨਾ ਤੇਸਂ ਅਨੁਲੋਮਾਨਿ ਦਸ੍ਸੇਤਿ. ਤਤ੍ਥ ਦੁਕੂਲਨ੍ਤਿ ਦੁਕੂਲਸਙ੍ਖਾਤੇਨ ਕੇਨਚਿ ਵਾਕਵਿਸੇਸੇਨ ਵਾਯਿਤਂ ਚੀਵਰਂ. ਚੇਵਾਤਿ ਸਮੁਚ੍ਚਯੇ, ਸੋ ਉਪਰਿ ਆਕਡ੍ਢਿਤਬ੍ਬੋ. ਪਟ੍ਟੁਣ੍ਣਨ੍ਤਿ ਪਟ੍ਟੁਣ੍ਣੇਸੁ ਜਾਤਂ ਪਟ੍ਟੁਣ੍ਣਂ. ਦੇਸਵਾਚਿਨੋ ਬਹੁਵਚਨਨ੍ਤਾਤਿ ਬਹੁਵਚਨੇਨ ਵਿਗ੍ਗਹੋ. ਤਥਾ ਸੋਮਾਰਾ ਚ ਚੀਨਾ ਚ, ਤੇਸੁ ਜਾਤਂ ਸੋਮਾਰਚੀਨਜਂ. ਇਮਾਨਿ ਤੀਣਿ ਪਾਣਕੇਹਿ ਕਤਸੁਤ੍ਤਮਯਾਨਿ. ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਜਾਤਂ ਇਦ੍ਧਿਜਂ, ਤਂ ਪਨ ਖੋਮਾਦੀਨਂ ਅਞ੍ਞਤਰਂ. ਦੇਵਦਿਨ੍ਨਨ੍ਤਿ ਦੇਵੇਹਿ ਦਿਨ੍ਨਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਚੀਵਰਂ. ਤਦੇਤਂ ਦੁਕੂਲਾਦਿ ਤਸ੍ਸ ਤਸ੍ਸ ਯਥਾਵੁਤ੍ਤਸ੍ਸ ਖੋਮਾਦਿਨੋ ਅਨੁਲੋਮਿਕਂ ਹੋਤਿ. ਤਤ੍ਥ ਲੋਮਾਨਿ ਅਨੁਗਤਂ ਅਨੁਲੋਮਂ, ਯਥਾ ਸੇਸਲੋਮਾਨਿ ਅਨੁਗਤਂ ਲੋਮਂ ਤਦਨੁਕੂਲਤ੍ਤਾ ‘‘ਅਨੁਲੋਮ’’ਨ੍ਤਿ ਵੁਚ੍ਚਤਿ, ਤਥਾ ਤਂਜਾਤਿਯਕਂ ਯੇਸਂ ਕੇਸਞ੍ਚਿ ਅਨੁਕੂਲਂ ਸਬ੍ਬਮ੍ਪਿ ਰੁਲ਼੍ਹੀਵਸੇਨ ‘‘ਅਨੁਲੋਮ’’ਨ੍ਤਿ ਵੁਚ੍ਚਤਿ. ਤਮੇਵ ਅਨੁਲੋਮਿਕਂ, ਅਨੁਕੂਲਨ੍ਤਿ ਅਤ੍ਥੋ. ਕਥਂ? ਦੁਕੂਲਂ ਸਾਣਸ੍ਸ ਅਨੁਲੋਮਂ, ਪਟ੍ਟੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ, ਇਦ੍ਧਿਜਂ ਦੇਵਦਿਨ੍ਨਞ੍ਚ ਖੋਮਾਦੀਨਮਨੁਲੋਮਨ੍ਤਿ.

੩੨-੩. ਏਵਂ ਸਾਨੁਲੋਮਾਨਿ ਚੀਵਰਾਨਿ ਦਸ੍ਸੇਤ੍ਵਾ ਇਦਾਨਿ ਅਧਿਟ੍ਠਾਨਾਦਿਕਂ ਦਸ੍ਸੇਤੁਂ ‘‘ਤਿਚੀਵਰ’’ਨ੍ਤਿਆਦਿਮਾਹ. ਤਤ੍ਥ ਅਵੁਤ੍ਤੇਪਿ ਅਵਸ੍ਸਂ ਵਤ੍ਤਬ੍ਬਤਾਯ ਸਬ੍ਬਤ੍ਥ ਚ-ਸਦ੍ਦੋ ਅਜ੍ਝਾਹਰਿਤਬ੍ਬੋ, ਤਿਚੀਵਰਞ੍ਚ…ਪੇ… ਕਣ੍ਡੁਚ੍ਛਾਦਿਞ੍ਚ ਅਧਿਟ੍ਠੇਯ੍ਯ ਨ ਵਿਕਪ੍ਪੇਯ੍ਯਾਤਿ ਸਮ੍ਬਨ੍ਧੋ. ਤਤ੍ਥ ਤਿਣ੍ਣਂ ਚੀਵਰਾਨਂ ਸਮਾਹਾਰੋ ਤਿਚੀਵਰਂ. ਪਰਿਕ੍ਖਾਰਞ੍ਚ ਤਂ ਚੋਲ਼ਞ੍ਚਾਤਿ ਪਰਿਕ੍ਖਾਰਚੋਲ਼ਂ. ਵਸ੍ਸਸ੍ਸ ਯੋਗ੍ਗਾ ਵਸ੍ਸਿਕਾ, ਸਾਵ ਸਾਟਿਕਾ ਵਸ੍ਸਿਕਸਾਟਿਕਾ. ਪੁਞ੍ਛਤਿ ਅਨੇਨਾਤਿ ਪੁਞ੍ਛਨਂ, ਮੁਖਸ੍ਸ ਪੁਞ੍ਛਨਂ ਮੁਖਪੁਞ੍ਛਨਂ. ਨਿਸੀਦਨ੍ਤਿ ਏਤ੍ਥਾਤਿ ਨਿਸੀਦਨਂ, ਮੁਖਪੁਞ੍ਛਨਞ੍ਚ ਨਿਸੀਦਨਞ੍ਚ ਮੁਖਪੁਞ੍ਛਨਨਿਸੀਦਨਂ. ਸਯਨਸੁਖਾਦਿਂ ਪਟਿਚ੍ਚ ਅਤ੍ਥਰੀਯਤੀਤਿ ਪਚ੍ਚਤ੍ਥਰਣਂ, ਤਦੇਵ ਪਚ੍ਚਤ੍ਥਰਣਕਂ. ਕਣ੍ਡੁਂ ਛਾਦੇਤੀਤਿ ਕਣ੍ਡੁਚ੍ਛਾਦਿ. ਅਧਿਟ੍ਠਹੇਤਿ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿਆਦਿਨਾ ਨਵਨ੍ਨਂ ਨਾਮਂ ਗਹੇਤ੍ਵਾ ਅਧਿਟ੍ਠੇਯ੍ਯ. ਨ ਵਿਕਪ੍ਪੇਯ੍ਯਾਤਿ ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ਨ ਵਿਕਪ੍ਪੇਯ੍ਯ, ਤਸ੍ਸ ਤਸ੍ਸ ਪਨ ਨਾਮਂ ਅਗ੍ਗਹੇਤ੍ਵਾ ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਿਕਪ੍ਪੇਯ੍ਯਾਤਿ ਅਧਿਪ੍ਪਾਯੋ. ਏਤ੍ਥਾਤਿ ਇਮੇਸੁ ਨਵਸੁ ਚੀਵਰੇਸੁ. ਤਿਚੀਵਰਨ੍ਤਿ ਤਿਚੀਵਰਨਾਮੇਨ ਅਧਿਟ੍ਠਿਤਂ. ਤਥਾ ਹਿ ਅਧਿਟ੍ਠਾਨਤੋ ਪੁਬ੍ਬੇ ਵਿਸੁਂ ਤਿਚੀਵਰਂ ਨਾਮ ਨਤ੍ਥਿ ਸਙ੍ਘਾਟਿਆਦਿਪ੍ਪਹੋਨਕਸ੍ਸ ਪਚ੍ਚਤ੍ਥਰਣਾਦਿਵਸੇਨਾਪਿ ਅਧਿਟ੍ਠਾਤੁਂ ਅਨੁਞ੍ਞਾਤਤ੍ਤਾ. ਤਂ ਵਿਨਾ ਏਕਾਹਂ ਏਕਦਿਵਸਮ੍ਪਿ. ਨ ਵਸੇਯ੍ਯਾਤਿ ਅਲਦ੍ਧਸਮ੍ਮੁਤਿਕੋ ਭਿਕ੍ਖੁ ਅਵਿਪ੍ਪਵਾਸਸੀਮਤੋ ਅਞ੍ਞਤ੍ਥ ਵਾਸਂ ਨ ਕਰੇਯ੍ਯਾਤਿ ਅਤ੍ਥੋ. ਏਵਂ ਸਤਿ ਤਿਚੀਵਰਞ੍ਚ ਨਿਸ੍ਸਜ੍ਜਿਤਬ੍ਬਂ ਹੋਤਿ, ਪਾਚਿਤ੍ਤਿਯਞ੍ਚ ਆਪਤ੍ਤਿਂ ਆਪਜ੍ਜਤੀਤਿ ਦੀਪੇਤਿ. ਨਿਸੀਦਨਂ ਵਿਨਾ ਚਾਤੁਮਾਸਂ ਨ ਵਸੇਯ੍ਯਾਤਿ ਸਮ੍ਬਨ੍ਧੋ. ਚਤੁਨ੍ਨਂ ਮਾਸਾਨਂ ਸਮਾਹਾਰੋ ਚਤੁਮਾਸਂ, ਤਮੇਵ ਚਾਤੁਮਾਸਂ. ਤਂ ਅਚ੍ਚਨ੍ਤਸਂਯੋਗਵਸੇਨ.

੩੪. ਇਦਾਨਿ ‘‘ਇਮ’’ਨ੍ਤਿਆਦਿਨਾ ‘‘ਅਧਿਟ੍ਠੇਯ੍ਯਾ’’ਤਿ ਵੁਤ੍ਤਮਧਿਟ੍ਠਾਨਂ ਦਸ੍ਸੇਤਿ. ਸਙ੍ਘਾਟਿਂ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਅਧਿਟ੍ਠਹੇਤਿ ਸਮ੍ਬਨ੍ਧੋ. ਤਤ੍ਥ ਅਧਿਟ੍ਠਹੇਤਿ ਹਤ੍ਥਪਾਸੇ ਠਿਤਂ ਏਵਂ ਅਧਿਟ੍ਠੇਯ੍ਯ. ਅਹਤ੍ਥਪਾਸਨ੍ਤਿ ਹਤ੍ਥਸ੍ਸ ਪਾਸੋ ਸਮੀਪੋ ਹਤ੍ਥਪਾਸੋ, ਅਡ੍ਢਤੇਯ੍ਯਹਤ੍ਥਬ੍ਭਨ੍ਤਰੋ. ਦ੍ਵਾਦਸਹਤ੍ਥਬ੍ਭਨ੍ਤਰੋਤਿਪਿ ਵਦਨ੍ਤਿ. ਨਤ੍ਥਿ ਹਤ੍ਥਪਾਸੋ ਏਤਿਸ੍ਸਾਤਿ ਅਹਤ੍ਥਪਾਸਾ, ਤਂ ਏਤਨ੍ਤਿ ਅਧਿਟ੍ਠਹੇਤਿ ਸਮ੍ਬਨ੍ਧੋ. ਕਿਂ ਵੁਤ੍ਤਂ ਹੋਤਿ? ਅਨ੍ਤੋਗਬ੍ਭੇ ਵਾ ਉਪਰਿਪਾਸਾਦੇ ਵਾ ਤਦਹੇਵ ਗਨ੍ਤ੍ਵਾ ਨਿਵਤ੍ਤਨਯੋਗ੍ਗੇ ਪਦੇਸੇ ਵਾ ਠਿਤਂ ਚੀਵਰਂ ਸਲ੍ਲਕ੍ਖੇਤ੍ਵਾ ‘‘ਏਤਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਅਧਿਟ੍ਠੇਯ੍ਯਾਤਿ ਵੁਤ੍ਤਂ ਹੋਤਿ. ਤਤੋ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬਨ੍ਤਿਪਿ ਵਦਨ੍ਤਿ. ਸੇਸੇਸੁਪੀਤਿ ਉਤ੍ਤਰਾਸਙ੍ਗਾਦਿਕਣ੍ਡੁਪ੍ਪਟਿਚ੍ਛਾਦਿਪਰਿਯਨ੍ਤੇਸੁਪਿ ਅਵਸੇਸਚੀਵਰੇਸੁ. ਅਯਂ ਨਯੋਤਿ ਅਯਮੇਵ ਨਯੋ. ਯਥਾ ਸਙ੍ਘਾਟਿਯਾ, ਏਵਂ ‘‘ਇਮਂ ਉਤ੍ਤਰਾਸਙ੍ਗਂ ਅਧਿਟ੍ਠਾਮੀ’’ਤਿਆਦਿ ਵੁਤ੍ਤਨਯੋਵਾਤਿ ਵੁਤ੍ਤਂ ਹੋਤਿ. ਅਧਿਟ੍ਠਹਨ੍ਤੇਨ ਪਨ ਹਤ੍ਥੇਨ ਗਹੇਤ੍ਵਾ ਕਾਯਵਿਕਾਰਂ ਕਰੋਨ੍ਤੇਨ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍ਵਾ ਕਾਯੇਨ ਵਾ ਅਧਿਟ੍ਠਾਤਬ੍ਬਂ, ਵਚੀਭੇਦਮਤ੍ਤਂ ਕਤ੍ਵਾ ਵਾਚਾਯ ਵਾ. ਪਰਿਕ੍ਖਾਰਚੋਲ਼ਂ ਨਾਮ ਪਾਟੇਕ੍ਕਂ ਨਿਧਾਨਮੁਖਨ੍ਤਿ ਤਿਚੀਵਰਂ ਪਰਿਕ੍ਖਾਰਚੋਲ਼ਮ੍ਪਿ ਅਧਿਟ੍ਠਾਤੁਂ ਵਟ੍ਟਤੀਤਿ.

੩੫. ਇਦਾਨਿ ਏਵਂ ਅਧਿਟ੍ਠਹਤੋ ਅਞ੍ਞਂ ਲਦ੍ਧਾ ਅਧਿਟ੍ਠਾਤੁਕਾਮੇਨ ਪਚ੍ਚੁਦ੍ਧਰਿਤ੍ਵਾ ਅਧਿਟ੍ਠਾਤਬ੍ਬਨ੍ਤਿ ਦਸ੍ਸੇਤੁਂ ‘‘ਅਧਿਟ੍ਠਹਨ੍ਤੋ’’ਤਿਆਦਿਮਾਹ. ਤਤ੍ਥ ਸਙ੍ਘਾਟਿ ਪਭੁਤਿ ਆਦਿ ਯਸ੍ਸ ਤਂ ਸਙ੍ਘਾਟਿਪ੍ਪਭੁਤਿ. ਏਤਂ ‘‘ਅਧਿਟ੍ਠਹਨ੍ਤੋ’’ਤਿ ਏਤ੍ਥਾਪਿ ‘‘ਅਧਿਟ੍ਠੇਯ੍ਯਾ’’ਤਿ ਏਤ੍ਥਾਪਿ ਕਮ੍ਮਪਦਂ, ‘‘ਪੁਬ੍ਬਚੀਵਰ’’ਨ੍ਤਿ ਏਤ੍ਥ ਪਨ ਵਿਸੇਸਨਂ ਹੁਤ੍ਵਾ ਤਿਟ੍ਠਤਿ. ਪਚ੍ਚੁਦ੍ਧਰਿਤ੍ਵਾਤਿ ਪਰਿਚ੍ਚਜਿਤ੍ਵਾ. ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ ਸਙ੍ਘਾਟਿਆਦੀਨਿ ਕਰੋਤਿ, ਨਿਟ੍ਠਿਤੇ ਰਜਨੇ ਚ ਕਪ੍ਪੇ ਚ ਇਮਂ ਪਰਿਕ੍ਖਾਰਚੋਲ਼ਂ ਪਚ੍ਚੁਦ੍ਧਰਿਤ੍ਵਾ ਪੁਨ ਅਧਿਟ੍ਠਾਤਬ੍ਬਾਨਿ. ਪਤ੍ਤਾਧਿਟ੍ਠਹਨੇਤਿ ਪਤ੍ਤਸ੍ਸ ਅਧਿਟ੍ਠਾਨੇ. ਤਥਾਤਿ ਚ ਯਥਾ ਚੀਵਰੇ, ਤਥਾ ਪਤ੍ਤੇਪਿ ਅਧਿਟ੍ਠਾਨਾਦਿਕਂ ਸਬ੍ਬਨ੍ਤਿ ਅਤ੍ਥੋ. ਏਤ੍ਥ ਪਨ ‘‘ਇਮਂ ਪਤ੍ਤਂ, ਏਤਂ ਪਤ੍ਤ’’ਨ੍ਤਿ ਵਾ ਵਿਸੇਸੋ.

੩੬. ਇਦਾਨਿ ਪਚ੍ਚੁਦ੍ਧਾਰਵਿਧਿਂ ਦਸ੍ਸੇਤੁਂ ‘‘ਏਤ’’ਨ੍ਤਿਆਦਿਮਾਹ. ਤਤ੍ਥ ਇਮਂ ਵ ਇਤਿ ਵਾ-ਸਦ੍ਦੋ ਰਸ੍ਸਂ ਕਤ੍ਵਾ ਨਿਦ੍ਦਿਟ੍ਠੋ, ਸੋ ਇਤਿ-ਸਦ੍ਦਤੋ ਪਰਂ ਯੋਜੇਤਬ੍ਬੋ, ਤਸ੍ਮਾ ‘‘ਏਤਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਵਾ ‘‘ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਵਾ ਸਂਸੇਤਿ ਸਮ੍ਬਨ੍ਧੋ ਵੇਦਿਤਬ੍ਬੋ. ਸਂਸੇਤਿ ਵਦੇਯ੍ਯ. ਏਵਨ੍ਤਿ ਯਥਾ ਨਾਮੇਨ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਤਥਾ ਉਤ੍ਤਰਾਸਙ੍ਗਾਦੀਨੀਤਿ ਅਤ੍ਥੋ. ਵਿਦੂਤਿ ਪਚ੍ਚੁਦ੍ਧਰੇਤਿਮਸ੍ਸ ਕਤ੍ਤੁਪਦਂ, ਪਞ੍ਞਵਾਤਿ ਅਤ੍ਥੋ. ਸਬ੍ਬਤ੍ਥਾਪਿ ਦੂਰਾਸਨ੍ਨਤਾਦੀ ਵੁਤ੍ਤਨਯੇਨ ਵੇਦਿਤਬ੍ਬਾ.

੩੭-੮. ਇਦਾਨਿ ਸਙ੍ਘਾਟਿਆਦੀਨਂ ਛਨ੍ਨਂ ਪਮਾਣਪਰਿਚ੍ਛੇਦਂ ਦਸ੍ਸੇਤਿ ‘‘ਸਙ੍ਘਾਟੀ’’ਤਿਆਦਿਨਾ. ਪਚ੍ਛਿਮੋ ਅਨ੍ਤੋ ਪਚ੍ਛਿਮਨ੍ਤੋ, ਤੇਨ, ਪਚ੍ਛਿਮਕੋਟਿਯਾਤਿ ਅਤ੍ਥੋ. ਦੀਘਸੋਤਿ ਦੀਘਤੋ. ਮੁਟ੍ਠਿਯਾ ਸਹਿਤਂ ਪਞ੍ਚਕਂ ਯਸ੍ਸਾ ਸਾ ਮੁਟ੍ਠਿਪਞ੍ਚਕਾ, ਲਿਙ੍ਗਵਿਪਲ੍ਲਾਸਵਸੇਨ ਪਨ ਮੁਟ੍ਠਿਪਞ੍ਚਕੋ. ਮੁਟ੍ਠਿ-ਸਦ੍ਦੇਨੇਤ੍ਥ ਉਪਚਾਰਵਸੇਨ ਕਤਮੁਟ੍ਠਿਕੋ ਹਤ੍ਥੋਵ ਵੁਤ੍ਤੋ. ਸੁਗਤਸ੍ਸ ਚੀਵਰਤੋ ਊਨਾਤਿ ਸਮਾਸੋ. ਅਪੀਤਿ ਵੁਤ੍ਤਸਮੁਚ੍ਚਯੇ, ਤੇਨ ਯਥਾਵੁਤ੍ਤਪਚ੍ਛਿਮਪ੍ਪਮਾਣਾ ਚ ਅਯਞ੍ਚ ਉਤ੍ਤਮਪ੍ਪਮਾਣਾਤਿ ਅਤ੍ਥੋ. ‘‘ਪਚ੍ਛਿਮਨ੍ਤੇਨਾ’’ਤਿ ਇਦਂ ਮੁਟ੍ਠਿਤ੍ਤਿਕਞ੍ਚ ਤਿਰਿਯਨ੍ਤਿ ਏਤ੍ਥਾਪਿ ਅਨੁਵਤ੍ਤੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਚ-ਸਦ੍ਦੋ ‘‘ਉਤ੍ਤਮਨ੍ਤੇਨ ਸੁਗਤਚੀਵਰੂਨਾਪਿ ਵਟ੍ਟਤੀ’’ਤਿ ਇਦਂ ਸਮੁਚ੍ਚਿਨੋਤਿ. ਤਤ੍ਥ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ ਏਕਾ ਸੁਗਤਵਿਦਤ੍ਥਿ, ਤਾਯ ਵਿਦਤ੍ਥਿਯਾ ਨਵ ਵਿਦਤ੍ਥਿਯੋ ਦੀਘਤੋ ਸੁਗਤਚੀਵਰਪ੍ਪਮਾਣਂ, ਤਿਰਿਯਂ ਛ ਵਿਦਤ੍ਥਿਯੋ, ਤਂ ਪਨ ਵਡ੍ਢਕਿਹਤ੍ਥੇਨ ਦੀਘਤੋ ਤੇਰਸ ਹਤ੍ਥਾ ਏਕਾ ਚ ਵਿਦਤ੍ਥਿ, ਤਿਰਿਯਤੋ ਨਵ ਹਤ੍ਥਾ ਹੋਨ੍ਤਿ. ਤਂਵਸੇਨ ਉਭਯਤ੍ਥ ਊਨਤਾ ਵਿਞ੍ਞਾਤਬ੍ਬਾ.

ਉਤ੍ਤਰਾਸਙ੍ਗੋਪਿ ਤਤ੍ਤਕੋਵਾਤਿ ਦਸ੍ਸੇਤੁਂ ‘‘ਤਥਾ ਏਕਂਸਿਕਸ੍ਸਪੀ’’ਤਿ ਆਹ. ਏਕੋ ਅਂਸੋ ਏਕਂਸੋ, ਤਤ੍ਥ ਕਾਤਬ੍ਬਨ੍ਤਿ ਤਦ੍ਧਿਤੇ ਏਕਂਸਿਕਂ. ‘‘ਅਨ੍ਤਰਵਾਸਕੋ’’ਚ੍ਚਾਦਿਨਾ ਨਿਵਾਸਨਂ ਦਸ੍ਸੇਤਿ. ਤਤ੍ਥ ਅਨ੍ਤਰਂ ਮਜ੍ਝਪਦੇਸੋ, ਅਨ੍ਤਰੇ ਮਜ੍ਝੇ ਕਟਿਪ੍ਪਦੇਸੇ ਵਾਸੋ ਵਤ੍ਥਂ ਅਨ੍ਤਰਵਾਸੋ, ਸੋਯੇਵ ਅਨ੍ਤਰਵਾਸਕੋ. ਚਾਪੀਤਿ ਸਮੁਦਾਯੋ, ਏਕੋ ਵਾ ਸਮੁਚ੍ਚਯੋ. ਅਡ੍ਢੇਨ ਤਤਿਯੋ ਭਾਗੋ ਅਡ੍ਢਤੇਯ੍ਯੋ. ਏਤ੍ਥ ਦ੍ਵਿਨ੍ਨਂ ਹਤ੍ਥਕੋਟ੍ਠਾਸਾਨਂ ਸਮ੍ਪੁਣ੍ਣਾਨਂ ਤਤਿਯਕੋਟ੍ਠਾਸਸਂਸਿਜ੍ਝਨੇ ਕਰਣਭੂਤਾ ਅਡ੍ਢ-ਸਦ੍ਦਨਿਦ੍ਦਿਟ੍ਠਾ ਯਾ ਵਿਦਤ੍ਥਿ, ਸਾਵ ਤਤਿਯੋਤਿ ਨਿਦ੍ਦਿਟ੍ਠੋਤਿ ਉਪਡ੍ਢਹਤ੍ਥਸਙ੍ਖਾਤੋ ਤਤਿਯੋ ਭਾਗੋ ਅਡ੍ਢਤੇਯ੍ਯੋ. ਸੋ ਚ ਨਾਨਨ੍ਤਰੇਨ ਦ੍ਵਿਹਤ੍ਥਤਤਿਯਤਾ ਲਬ੍ਭਤੀਤਿ ਦ੍ਵੇ ਹਤ੍ਥਾ, ਏਕਾ ਚ ਵਿਦਤ੍ਥਿ ਅਡ੍ਢਤੇਯ੍ਯੋ. ਤਂਸਨ੍ਨਿਯੋਗੇਨ ਪਨੇਤ੍ਥ ਅਨ੍ਤਰਵਾਸਕੋਵ ਅਡ੍ਢਤੇਯ੍ਯੋਤਿ ਵੇਦਿਤਬ੍ਬੋ. ਦ੍ਵੇ ਹਤ੍ਥਾ ਯਸ੍ਸਾਤਿ ਬਾਹਿਰਤ੍ਥਸਮਾਸੋ. ਪਾਰੁਪਨੇਨਾਪਿ ਸਕ੍ਕਾ ਨਾਭਿਂ ਪਟਿਚ੍ਛਾਦੇਤੁਨ੍ਤਿ ‘‘ਦ੍ਵਿਹਤ੍ਥੋ’’ਤਿ ਵੁਤ੍ਤਂ. ਵਾ-ਸਦ੍ਦੋ ਅਡ੍ਢਤੇਯ੍ਯਂ ਵਿਕਪ੍ਪੇਤਿ. ਤਿਰਿਯਸ੍ਸ ਅਨ੍ਤੋਤਿ ਛਟ੍ਠੀਤਪ੍ਪੁਰਿਸੋ, ਤਿਰਿਯਮੇਵ ਅਨ੍ਤੋਤਿ ਵਾ ਕਮ੍ਮਧਾਰਯੋ ‘‘ਗਾਮਨ੍ਤੋ’’ਤਿਆਦੀਸੁ ਵਿਯ.

੩੯. ‘‘ਨਿਸੀਦਨਸ੍ਸਾ’’ਤਿਆਦਿਨਾ ਨਿਸੀਦਨਚੀਵਰਂ ਦਸ੍ਸੇਤਿ. ਏਤ੍ਥ ਨਿਸੀਦਨਂ ਨਾਮ ਸਮੇ ਭੂਮਿਭਾਗੇ ਏਲ਼ਕਲੋਮਾਨਿ ਉਪਰੂਪਰਿ ਸਨ੍ਥਰਿਤ੍ਵਾ ਕਞ੍ਜਿਕਾਦੀਹਿ ਸਿਞ੍ਚਿਤ੍ਵਾ ਕਤੋ ਦ੍ਵੀਸੁ ਠਾਨੇਸੁ ਫਾਲਿਤਤ੍ਤਾ ਤੀਹਿ ਦਸਾਹਿ ਯੁਤ੍ਤੋ ਪਰਿਕ੍ਖਾਰਵਿਸੇਸੋ. ਵਿਦਤ੍ਥੀ ਦ੍ਵੇਤਿ ਦ੍ਵੇ ਵਿਦਤ੍ਥੀ. ਵਿਸਾਲਤੋ ਪੁਥੁਲਤੋ.

੪੦. ‘‘ਕਣ੍ਡੁਪ੍ਪਟਿਚ੍ਛਾਦੀ’’ਤਿਆਦਿਨਾ ਕਣ੍ਡੁਪ੍ਪਟਿਚ੍ਛਾਦਿਂ ਦਸ੍ਸੇਤਿ. ਤਤ੍ਥ ਕਣ੍ਡੂਤਿ ਹਿ ਨ ਅਤ੍ਥਤੋ ਨਾਨਂ, ਤਗ੍ਗਹਣੇਨ ਪਨੇਤ੍ਥ ਪਿਲ਼ਕਸ੍ਸਾਵਥੁਲ੍ਲਕਚ੍ਛਾਬਾਧਂ ਗਯ੍ਹਤਿ. ਕਣ੍ਡੁਂ ਯਥਾਵੁਤ੍ਤਂ ਪਿਲ਼ਕਾਦਿਂ ਪਟਿਚ੍ਛਾਦੇਤੀਤਿ ਕਣ੍ਡੁਪ੍ਪਟਿਚ੍ਛਾਦਿ. ਪਟਿਚ੍ਛਦਨਂ ਵਾ ਪਟਿਚ੍ਛਾਦੋ, ਯਥਾਵੁਤ੍ਤਕਣ੍ਡੁਯਾ ਪਟਿਚ੍ਛਾਦੋ ਕਣ੍ਡੁਪ੍ਪਟਿਚ੍ਛਾਦੋ, ਸੋ ਅਸ੍ਸ ਅਤ੍ਥੀਤਿ ਕਣ੍ਡੁਪ੍ਪਟਿਚ੍ਛਾਦੀ, ਤਸ੍ਸ. ਤਿਰਿਯਨ੍ਤਿ ਤਿਰਿਯਤੋ.

੪੧. ‘‘ਵਸ੍ਸਿਕਾ’’ਤਿਆਦਿਨਾ ਵਸ੍ਸਿਕਸਾਟਿਕਂ ਦਸ੍ਸੇਤਿ, ਤਂ ਸੁਵਿਞ੍ਞੇਯ੍ਯਂ.

੪੨. ਏਵਂ ਪਮਾਣਵਨ੍ਤਾਨਂ ਪਮਾਣਂ ਦਸ੍ਸੇਤ੍ਵਾ ਵੁਤ੍ਤਪ੍ਪਮਾਣਾਤਿਕ੍ਕਮੇ ਦੋਸਂ, ਕੇਸਞ੍ਚਿ ਪਮਾਣਾਭਾਵਗਣਨਾਭਾਵਞ੍ਚ ਦਸ੍ਸੇਤੁਂ ‘‘ਏਤ੍ਥਾ’’ਤਿਆਦਿਮਾਹ. ਤਤ੍ਥ ਏਤ੍ਥਾਤਿ ਵੁਤ੍ਤਪ੍ਪਮਾਣਵਨ੍ਤੇਸੁ ਚੀਵਰੇਸੁ. ਤਦੁਤ੍ਤਰਿ ਤਤੋ ਵੁਤ੍ਤਪ੍ਪਮਾਣਤੋ ਉਤ੍ਤਰਿ ਨਿਪਾਤੇਨ ਉਤ੍ਤਰਿ-ਸਦ੍ਦੇਨ ਤਪ੍ਪੁਰਿਸੋ. ਕਰੋਨ੍ਤਸ੍ਸ ਸਮ੍ਪਾਦੇਨ੍ਤਸ੍ਸ. ਛੇਦਨਪਾਚਿਤ੍ਤੀਤਿ ਛੇਦਨੇਨ ਸਹਿਤਾ ਪਾਚਿਤ੍ਤਿ, ਅਤਿਰੇਕਂ ਛਿਨ੍ਦਿਤ੍ਵਾ ਪਾਚਿਤ੍ਤਿਯਂ ਦੇਸੇਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਵੁਤ੍ਤਪ੍ਪਮਾਣਤੋ ਪਨ ਅਤਿਰੇਕਞ੍ਚ ਊਨਕਞ੍ਚ ‘‘ਪਰਿਕ੍ਖਾਰਚੋਲ਼’’ਨ੍ਤਿ ਅਧਿਟ੍ਠਾਤਬ੍ਬਂ. ਯੇਨ ਮੁਖਂ ਪੁਞ੍ਛਨ੍ਤਿ, ਤਂ ਮੁਖਸਮ੍ਬਨ੍ਧੀਤਿ ਮੁਖਸ੍ਸ ਚੋਲ਼ਨ੍ਤਿ ਸਮਾਸੇ ਦ੍ਵਨ੍ਦੋ. ਆਕਙ੍ਖਿਤਂ ਇਚ੍ਛਿਤਂ ਪਮਾਣਨ੍ਤਿ ਕਮ੍ਮਧਾਰਯੋ. ਤਮੇਤੇਸਮਤ੍ਥੀਤਿ ਆਕਙ੍ਖਿਤਪ੍ਪਮਾਣਿਕਾ. ਏਤ੍ਥ ਚ ਤਿਚੀਵਰਾਦੀਸੁ ਅਵੁਤ੍ਤੇਪਿ ਗਣਨਵਿਭਾਗੇ ਪਚ੍ਚਤ੍ਥਰਣਮੁਖਪੁਞ੍ਛਨਪਰਿਕ੍ਖਾਰਚੋਲ਼ੇ ਠਪੇਤ੍ਵਾ ਆਦਿਤੋ ਪਟ੍ਠਾਯ ਛਕ੍ਕਮੇਕੇਕਮੇਵ ਵਟ੍ਟਤਿ. ਮੁਖਪੁਞ੍ਛਨਚੋਲ਼ਾਨਿ ਪਚ੍ਚਤ੍ਥਰਣਾਨਿ ਚ ਬਹੂਨਿਪੀਤਿ ਵਿਞ੍ਞਾਤਬ੍ਬਂ.

੪੩. ਗਣਨਾਤਿ ਏਤ੍ਥ ਨਪੁਂਸਕਸ੍ਸ ਇਤ੍ਥਿਵਚਨੇਨ ਯੋਗਾਭਾਵਾ ‘‘ਨ ਦੀਪਿਤਾ’’ਤਿ ਲਿਙ੍ਗਂ ਵਿਪਰਿਣਾਮੇਤ੍ਵਾ ਸਮ੍ਬਨ੍ਧਿਤਬ੍ਬਂ, ਅਟ੍ਠਕਥਾਯਂ ਨ ਪਕਾਸਿਤਾਤਿ ਅਤ੍ਥੋ. ਤਿਣ੍ਣਂ ਪਨੇਤੇਸਂ ਉਕ੍ਕਟ੍ਠਪਰਿਚ੍ਛੇਦਵਸੇਨੇਵ ਵੁਤ੍ਤਂ, ਵਿਕਪ੍ਪਨੂਪਗਪਚ੍ਛਿਮੇਨ ਪਚ੍ਛਿਮਪ੍ਪਮਾਣਂ ਅਤ੍ਥਿਯੇਵ. ਇਦਾਨਿ ਯਸ੍ਮਾ ਤਤ੍ਥ ਤਂ ਸਬ੍ਬਂ ਨ ਦੀਪਿਤਂ, ਤਸ੍ਮਾ ਵਿਕਪ੍ਪਨੂਪਗਥਵਿਕਾਦਿ ਸਬ੍ਬਂ ਏਕਂ ‘‘ਪਰਿਕ੍ਖਾਰਚੋਲ਼’’ਨ੍ਤਿ, ਬਹੂਨਿ ਏਕਤੋ ਕਤ੍ਵਾ ‘‘ਪਰਿਕ੍ਖਾਰਚੋਲ਼ਾਨੀ’’ਤਿਪਿ ਵਤ੍ਵਾ ਅਧਿਟ੍ਠਾਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਤਥਾ’’ਤਿਆਦਿਮਾਹ. ਇਮਿਨਾ ਪਰਿਕ੍ਖਾਰਚੋਲ਼ਂ ਨਾਮ ਪਾਟੇਕ੍ਕਂ ਨਿਧਾਨਮੁਖਨ੍ਤਿ ਦਸ੍ਸੇਤਿ. ਥਵਿਕਾਦਿਂ ਥਵਿਕਾ ਆਦਿ ਯਸ੍ਸ ਪਰਿਸ੍ਸਾਵਨਾਦਿਨੋਤਿ ਸਮਾਸੋ. ਵਿਕਪ੍ਪਸ੍ਸ ਉਪਗਂ ਵਿਕਪ੍ਪਿਯਂ, ਤਞ੍ਚ ਉਪਰਿ ਵਕ੍ਖਤਿ.

੪੪. ਇਦਾਨਿ ਤਿਣ੍ਣਂ ਚੀਵਰਾਨਂ ਪਟਿਭਾਗਂ ਦਸ੍ਸੇਤੁਂ ‘‘ਅਹਤਾ’’ਤਿਆਦਿ ਆਰਦ੍ਧਂ. ਤਤ੍ਥ ਅਹਤੇਨ ਨਵੇਨ ਅਧੋਤੇਨ ਕਪ੍ਪਂ ਸਦਿਸਂ ਅਹਤਕਪ੍ਪਂ, ਏਕਵਾਰਧੋਤਂ. ਅਹਤਞ੍ਚ ਅਹਤਕਪ੍ਪਞ੍ਚ ਅਹਤਾਹਤਕਪ੍ਪਾਨਿ, ਵਤ੍ਥਾਨਿ, ਤੇਸਂ. ਦ੍ਵੇ ਗੁਣਾ ਪਟਲਾਨਿ ਯਸ੍ਸ ਸਾਤਿ ਦੁਗੁਣਾ. ‘‘ਗੁਣੋ ਪਟਲਰਾਸੀਸੂ’’ਤਿ ਹਿ ਅਭਿਧਾਨਪ੍ਪਦੀਪਿਕਾ. ਦੁਗੁਣਾ ਦੁਪਟ੍ਟਾ, ਉਤ੍ਤਰਸ੍ਮਿਂ ਦੇਹਭਾਗੇ ਆਸਞ੍ਜੀਯਤੀਤਿ ਉਕ੍ਕਰਾਸਙ੍ਗੋ. ਏਕਚ੍ਚਂ ਏਕਪਟ੍ਟਂ ਅਸ੍ਸ ਅਤ੍ਥੀਤਿ ਏਕਚ੍ਚੀ, ਏਕਪਟ੍ਟੋਤਿ ਅਤ੍ਥੋ. ਨਿਪਾਤੋ ਵਾ ਏਕਚ੍ਚੀਤਿ. ਤਥਾਤਿ ਸਮੁਚ੍ਚਯੇ, ਅਨ੍ਤਰਵਾਸਕੋ ਚਾਤਿ ਵੁਤ੍ਤਂ ਹੋਤਿ. ਉਪਮਾਯਂ ਵਾ, ਯਥਾ ਉਤ੍ਤਰਾਸਙ੍ਗੋ ਏਕਚ੍ਚਿਯੋ, ਏਵਂ ਅਨ੍ਤਰਵਾਸਕੋਤਿ ਅਤ੍ਥੋ.

੪੫. ‘‘ਉਤੂ’’ਤਿ ਅਨੇਕਉਤੁ ਗਹਿਤਾਤਿ ਉਤੁਤੋ ਦੀਘਕਾਲਤੋ ਉਦ੍ਧਟਾ ਉਤੁਦ੍ਧਟਾ, ਤੇਸਂ ਪਿਲੋਤਿਕਾਨਨ੍ਤਿ ਅਤ੍ਥੋ. ਸੇਸਾਤਿ ਉਤ੍ਤਰਾਸਙ੍ਗਅਨ੍ਤਰਵਾਸਕਾ. ਪਂਸੁ ਵਿਯ ਕੁਚ੍ਛਿਤਂ ਉਲਤਿ ਪਵਤ੍ਤਤੀਤਿ ਪਂਸੁਕੂਲਂ, ਰਥਿਕਾਸੁਸਾਨਸਙ੍ਕਾਰਕੂਟਾਦੀਨਂ ਯਤ੍ਥ ਕਤ੍ਥਚਿ ਠਿਤਂ ਚੋਲ਼ਖਣ੍ਡਂ, ਤਸ੍ਮਿਂ. ਯਾ ਯਾ ਰੁਚੀਤਿ ਅਬ੍ਯਯੀਭਾਵੇ ਯਥਾਰੁਚਿ, ਯਾਵਦਤ੍ਥਂ ਸਤਪਟ੍ਟਮ੍ਪਿ ਵਟ੍ਟਤੀਤਿ ਅਧਿਪ੍ਪਾਯੋ.

੪੬. ਇਦਾਨਿ ਤੀਸੁ ਛਿਨ੍ਦਿਤ੍ਵਾ ਕਾਤੁਂ ਅਪ੍ਪਹੋਨ੍ਤੇਸੁ ਕਾਤਬ੍ਬਵਿਧਿਂ ਦਸ੍ਸੇਤੁਂ ‘‘ਤੀਸੂ’’ਤਿਆਦਿਮਾਹ. ਤਤ੍ਥ ਤਿਚੀਵਰਸਮੁਦਾਯਤੋ ਏਕਦੇਸਭੂਤਾਨਂ ਦ੍ਵਿਨ੍ਨਮੇਕਸ੍ਸ ਚ ਸਙ੍ਖਾਗੁਣੇਨ ਨਿਦ੍ਧਾਰਿਯਮਾਨਤ੍ਤਾ ਤੀਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਏਕਵਚਨਸ੍ਸ ਬਹ੍ਵਤ੍ਥੇਨ ਯੋਗਾਭਾਵਤੋ ਦ੍ਵਿਚੀਵਰਸਙ੍ਖਾਤਬਹ੍ਵਤ੍ਥਵਸੇਨ ਵਚਨਂ ਵਿਪਰਿਣਾਮੇਤ੍ਵਾ ਯਾਨਿ ਪਹੋਨ੍ਤਿ, ਤਾਨਿ ਦ੍ਵੇ ਵਾਪਿ ਛਿਨ੍ਦਿਤਬ੍ਬਾਨਿ, ਯਂ ਪਹੋਤਿ, ਤਂ ਏਕਂ ਵਾ ਛਿਨ੍ਦਿਤਬ੍ਬਨ੍ਤਿ ਯੋਜੇਤਬ੍ਬਂ. ਪਹੋਨ੍ਤੀਤਿ ਪਚ੍ਛਿਮਚੀਵਰਪ੍ਪਮਾਣਛਿਨ੍ਨਕਾਨਿ ਪਹੋਨ੍ਤਿ. ਅਪੀਤਿ ਸਮ੍ਭਾਵਨੇ, ਤੀਸੁ ਕਾ ਕਥਾਤਿ ਅਤ੍ਥੋ. ਅਨ੍ਵਾਧਿਨ੍ਤਿ ਆਗਨ੍ਤੁਕਪਤ੍ਤਂ. ਅਨੁ ਪਚ੍ਛਾ ਆਧੀਯਤੀਤਿ ਅਨ੍ਵਾਧਿ, ਯਂ ਚੀਵਰਸ੍ਸੋਪਰਿ ਸਙ੍ਘਾਟਿਆਕਾਰੇਨ ਆਰੋਪੇਤਬ੍ਬਂ. ਅਨਾਦਿਣ੍ਣਨ੍ਤਿ ਅਨਾਰੋਪਿਤਂ ਅਨ੍ਵਾਧਿਕਂ. ਨ ਧਾਰੇਯ੍ਯਾਤਿ ਇਮਿਨਾ ਯਦਿ ਧਾਰੇਯ੍ਯ, ਦੁਕ੍ਕਟਨ੍ਤਿ ਦੀਪੇਤਿ.

੪੭-੮. ਇਦਾਨਿ ‘‘ਤਿਚੀਵਰਂ ਨ ਵਸੇਯ੍ਯ ਵਿਨੇਕਾਹ’’ਨ੍ਤਿ ਵੁਤ੍ਤਾਨਂ ਤਿਣ੍ਣਂ ਅਵਿਪ੍ਪਵਾਸਲਕ੍ਖਣਂ ਦਸ੍ਸੇਤੁਂ ‘‘ਗਾਮੇ’’ਤਿਆਦਿਨਾ ਉਦੋਸਿਤਸਿਕ੍ਖਾਪਦੇ (ਪਾਰਾ. ੪੭੧ ਆਦਯੋ) ਵੁਤ੍ਤਪਰਿਹਾਰਮਾਹ. ਤਤ੍ਥ ਗਾਮੇ ਵਾ…ਪੇ… ਵਿਹਾਰੇ ਵਾ ਤਿਚੀਵਰਂ ਨਿਕ੍ਖਿਪਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥ ‘‘ਪਟੋ ਦਡ੍ਢੋ’’ਤਿਆਦੀਸੁ ਵਿਯ ਅਵਯਵੇਪਿ ਸਮੁਦਾਯਵੋਹਾਰਵਸੇਨ ਤੀਸੁ ਏਕਮ੍ਪਿ ‘‘ਤਿਚੀਵਰ’’ਨ੍ਤਿ ਵੁਤ੍ਤਂ. ਭਿਕ੍ਖੁਸਮ੍ਮੁਤਿਯਞ੍ਞਤ੍ਰਾਤਿ ਸਙ੍ਘੇਨ ਗਿਲਾਨਸ੍ਸ ਭਿਕ੍ਖੁਨੋ ਦੀਯਮਾਨਂ ਚੀਵਰੇਨ ਵਿਪ੍ਪਵਾਸਸਮ੍ਮੁਤਿਂ ਵਿਨਾ. ਵਿਪ੍ਪਵਤ੍ਥੁਨ੍ਤਿ ਏਕੂਪਚਾਰਨਾਨੂਪਚਾਰਗਾਮਾਦਿਤੋ ਬਹਿ, ਅਥ ਵਾ ਨਿਵੇਸਨਾਦੀਨਂ, ਤਤ੍ਥ ਚ ਗਬ੍ਭੋਵਰਕਾਨਂ ਚੀਵਰਸ੍ਸ ਵਾ ਹਤ੍ਥਪਾਸਂ ਅਤਿਕ੍ਕਮ੍ਮ ਚੀਵਰੇਨ ਵਿਪ੍ਪਯੁਤ੍ਤੋ ਹੁਤ੍ਵਾ ਵਸਿਤੁਂ. ਏਤ੍ਥ ਚ ਗਾਮਾਦੀਨਂ ਏਕੂਪਚਾਰਨਾਨੂਪਚਾਰਤਾ ਏਕਕੁਲਨਾਨਾਕੁਲਸਨ੍ਤਕਸ੍ਸ ਗਾਮਾਦਿਨੋ ਪਰਿਕ੍ਖੇਪਸ੍ਸ, ਪਰਿਕ੍ਖੇਪੋਕਾਸਸ੍ਸ ਚ ਵਸੇਨ ਸਤ੍ਥਅਬ੍ਭੋਕਾਸਾਨਂ ਸਤ੍ਤਬ੍ਭਨ੍ਤਰਵਸੇਨ ਚ ਵੇਦਿਤਬ੍ਬਾ. ਤਤ੍ਥ ਏਕੋ ਅਬ੍ਭਨ੍ਤਰੋ ਅਟ੍ਠਵੀਸਤਿਹਤ੍ਥੋ ਹੋਤਿ. ਏਤ੍ਥ ਚ ਨਿਵੇਸਨਾਦੀਨਿ ਗਾਮਤੋ ਬਹਿ ਸਨ੍ਨਿਵਿਟ੍ਠਾਨੀਤਿ ਦਟ੍ਠਬ੍ਬਂ ਵਿਸੁਂ ਗਾਮਸ੍ਸ ਗਹਿਤਤ੍ਤਾ, ਤਥਾ ਉਦੋਸਿਤਾਦੀਹਿ ਅਞ੍ਞਂ ਨਿਵੇਸਨਂ.

ਤਤ੍ਥ ਉਦੋਸਿਤੋ ਨਾਮ ਯਾਨਾਦੀਨਂ ਭਣ੍ਡਾਨਂ ਸਾਲਾ. ਪਾਸਾਦੋ ਦੀਘਪਾਸਾਦੋ. ਹਮ੍ਮਿਯਂ ਮੁਣ੍ਡਚ੍ਛਦਨਪਾਸਾਦੋ. ਨਾਵਾ ਚ ਅਟ੍ਟੋ ਚ ਮਾਲ਼ੋ ਚ ਆਰਾਮੋ ਚ ਨਾਵਾ…ਪੇ… ਆਰਾਮਂ, ਤਸ੍ਮਿਂ. ਅਟ੍ਟੋ ਨਾਮ ਪਟਿਰਾਜਾਦੀਨਂ ਪਟਿਬਾਹਨਤ੍ਥਂ ਇਟ੍ਠਕਾਹਿ ਕਤੋ ਬਹਲਭਿਤ੍ਤਿਕੋ ਚਤੁਪਞ੍ਚਭੂਮਿਕੋ ਪਤਿਸ੍ਸਯਵਿਸੇਸੋ. ਮਾਲ਼ੋ ਏਕਕੂਟਸਙ੍ਗਹਿਤੋ ਚਤੁਰਸ੍ਸਪਾਸਾਦੋ. ਆਰਾਮੋ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਸਤ੍ਥੋ ਚ ਖੇਤ੍ਤਞ੍ਚ ਖਲਞ੍ਚਾਤਿ ਦ੍ਵਨ੍ਦੋ. ਸਤ੍ਥੋ ਨਾਮ ਜਙ੍ਘਸਤ੍ਥੋ ਵਾ ਸਕਟਸਤ੍ਥੋ ਵਾ. ਖਲਂ ਵੁਚ੍ਚਤਿ ਧਞ੍ਞਕਰਣਂ. ਦੁਮੋ ਨਾਮ ਦੁਮਮੂਲਂ ਛਾਯਾਯ ਫੁਟ੍ਠੋਕਾਸੋ ਉਪਚਾਰਵਸੇਨ. ਅਬ੍ਭੋਕਾਸੋ ਪਨ ਅਗਾਮਕੇ ਅਰਞ੍ਞੇਵ ਅਧਿਪ੍ਪੇਤੋ.

੪੯. ਇਦਾਨਿ ‘‘ਏਤਂ…ਪੇ… ਸਙ੍ਘਾਟਿ’’ਨ੍ਤਿਆਦਿਨਾ ਨਵਨ੍ਨਮੇਵ ਪਚ੍ਚੁਦ੍ਧਾਰੋ ਵੁਤ੍ਤੋ, ਨ ਪਨ ਤੇਸਂ ਕਾਲਪਰਿਚ੍ਛੇਦੋਤਿ ਤਂ ਦਸ੍ਸੇਤੁਂ ‘‘ਰੋਗਾ’’ਤਿਆਦਿ ਆਰਦ੍ਧਂ. ਤਤ੍ਥ ਦੇਵਦਤ੍ਤੋ ਦਤ੍ਤੋਤਿ ਨਾਮੇਕਦੇਸੇਨਾਪਿ ਨਾਮਵੋਹਾਰਤੋ ਵਸ੍ਸਿਕਸਾਟਿਕਾਵ ‘‘ਸਾਟਿਕਾ’’ਤਿ ਪਕਰਣਵਸੇਨ ਗਮ੍ਮਮਾਨਤ੍ਥਤ੍ਤਾ ਵੁਤ੍ਤਾ. ਕਣ੍ਡੁਪ੍ਪਟਿਚ੍ਛਾਦਿਕਾ ਚ ਰੋਗਵਸ੍ਸਾਨਪਰਿਯਨ੍ਤਾ. ਰੋਗਾ ਚ ਵਸ੍ਸਾਨਾ ਚ ਮਾਸਾ ਰੋਗਵਸ੍ਸਾਨਾ, ਤੇ ਤਦਤਿਕ੍ਕਮੇਨ ਪਚ੍ਚੁਦ੍ਧਰਿਤਬ੍ਬਤਾਯ ਪਰਿਯਨ੍ਤਾ ਯਾਸਨ੍ਤਿ ਵਿਗ੍ਗਹੋ.

ਕਿਂ ਵੁਤ੍ਤਂ ਹੋਤਿ? ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇ ਕਤ੍ਤਿਕਪੁਣ੍ਣਮਾਯ ਏਵ ਪਚ੍ਚੁਦ੍ਧਰਿਤਬ੍ਬਾ. ਤਥਾ ਕਣ੍ਡੁਪ੍ਪਟਿਚ੍ਛਾਦਿਕਾ ਆਬਾਧੇਸੁ ਵੂਪਸਨ੍ਤੇਸੂਤਿ ਵੁਤ੍ਤਂ ਹੋਤਿ. ‘‘ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ’’ਤਿ ਹਿ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੪੬੯) ਵੁਤ੍ਤਂ. ਏਤ੍ਥ ਪਨ ਕੇਚਿ ਆਚਰਿਯਾ ‘‘ਪਚ੍ਚੁਦ੍ਧਰਿਤ੍ਵਾਤਿ ਵਸ੍ਸਿਕਸਾਟਿਕਭਾਵਤੋ ਅਪਨੇਤ੍ਵਾ’’ਤਿ ਵਦਿਂਸੁ, ਤਂ ਨ ਯੁਜ੍ਜਤਿ. ਪਚ੍ਚੁਦ੍ਧਾਰਵਿਨਯਕਮ੍ਮਵਿਸਯੇਯੇਵ ਪਚ੍ਚੁਦ੍ਧਾਰ-ਸਦ੍ਦਸ੍ਸ ਦਿਟ੍ਠਤ੍ਤਾ, ‘‘ਚਾਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਪਾਲ਼ਿਵਚਨਤੋ ਚ. ‘‘ਚਾਤੁਮਾਸਂ ਅਧਿਟ੍ਠਾਤੁ’’ਨ੍ਤਿ ਚ ਚਤੁਨ੍ਨਂ ਮਾਸਾਨਂ ਅਧਿਟ੍ਠਾਨੇਨ ਸਹ ਅਚ੍ਚਨ੍ਤਸਂਯੋਗੋ ਦਸ੍ਸਿਤੋਤਿ ਨ ਤੇਨ ਅਧਿਟ੍ਠਾਨਭੇਦੋ ਵਿਞ੍ਞਾਯਤਿ. ਤੇਨੇਵ ਕੁਰੁਨ੍ਦਟ੍ਠਕਥਾਯਮ੍ਪਿ ‘‘ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਵਚਨਤੋ ਕਤ੍ਤਿਕਪੁਣ੍ਣਮਾਯ ਏਵ ਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਵਿਕਪ੍ਪੇਤਬ੍ਬਾਤਿ ਵੁਤ੍ਤਂ. ਤਸ੍ਮਾ ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਾਪਿ ਕਣ੍ਡੁਪ੍ਪਟਿਚ੍ਛਾਦਿ ਆਬਾਧਵੂਪਸਮੇਨਾਪਿ ਅਧਿਟ੍ਠਾਨਂ ਵਿਜਹਤੀ’’ਤਿ (ਕਙ੍ਕਾ. ਅਟ੍ਠ. ਕਥਿਨਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ. ਮਾਤਿਕਾਟ੍ਠਕਥਾਯਮ੍ਪਿ ਪਚ੍ਚੁਦ੍ਧਾਰਵਸੇਨਾਪਿ ਅਧਿਟ੍ਠਾਨਂ ਵਿਜਹਤੀਤਿ ਏਵਮਤ੍ਥੋ ਗਹੇਤਬ੍ਬੋ. ਏਵਞ੍ਹਿ ਸਤਿ ਸਬ੍ਬਟ੍ਠਕਥਾਯੋ ਸਮੇਨ੍ਤਿ, ਯੁਤ੍ਤਿ ਚ ਅਵਿਰੁਦ੍ਧਾ ਹੋਨ੍ਤੀਤਿ. ਤਤੋ ਪਰਨ੍ਤਿ ਪਚ੍ਚੁਦ੍ਧਾਰਤੋ ਉਪਰਿ. ਵਿਕਪ੍ਪੇਯ੍ਯਾਤਿ ਕਣ੍ਡੁਪ੍ਪਟਿਚ੍ਛਾਦਿਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਯ੍ਯ. ਵਸ੍ਸਿਕਸਾਟਿਕਂ ਕਤ੍ਤਿਕਪੁਣ੍ਣਮਾਯਂ ਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤਸ੍ਸ ਪਠਮਦਿਵਸੇ ਵਿਕਪ੍ਪੇਯ੍ਯ, ਏਵਂ ਅਸਤਿ ਦੁਕ੍ਕਟਨ੍ਤਿ ਅਧਿਪ੍ਪਾਯੋ. ਸੇਸਾਤਿ ਅਪਰੇ ਸਤ੍ਤ ਚੀਵਰਾਨਿ ਸੇਸਾ. ਨਤ੍ਥਿ ਪਰਿਯਨ੍ਤਂ ਵੁਤ੍ਤਸਦਿਸੋ ਕਾਲਪਰਿਚ੍ਛੇਦੋ ਏਤੇਸਨ੍ਤਿ ਅਪਰਿਯਨ੍ਤਿਕਾ.

੫੦. ਇਦਾਨਿ ਪਚ੍ਚਤ੍ਥਰਣਾਦਿਕਂ ਚੀਵਰਚਤੁਕ੍ਕਂ ਸਦਸਾਦਿਕਂ ਵਟ੍ਟਤਿ, ਨਾਪਰਨ੍ਤਿ ਦਸ੍ਸੇਤੁਂ ‘‘ਪਚ੍ਚਤ੍ਥਰਣਾ’’ਤਿਆਦਿਮਾਹ. ਤਤ੍ਥ ਪਰਿਕ੍ਖਾਰੋ ਚ ਮੁਖਪੁਞ੍ਛਨਞ੍ਚਾਤਿ ਦ੍ਵਨ੍ਦੋ. ਪਰਿਕ੍ਖਾਰਮੁਖਪੁਞ੍ਛਨਮੇਵ ਚੋਲ਼ਕਨ੍ਤਿ ਕਮ੍ਮਧਾਰਯੋ. ਦ੍ਵਨ੍ਦਸਮਾਸਨ੍ਤੇ ਸੁਯ੍ਯਮਾਨਤ੍ਤਾ ਪਨ ਚੋਲ਼ਕ-ਸਦ੍ਦੋ ਪਰਿਕ੍ਖਾਰ-ਸਦ੍ਦਤੋ ਚ ਪਰਂ ਦਟ੍ਠਬ੍ਬੋ ‘‘ਪਰਿਕ੍ਖਾਰਚੋਲ਼ਕ’’ਨ੍ਤਿ. ਤਂ ਪਨ ਸਾਮਞ੍ਞਜੋਤਨਾਯ ਵਿਸੇਸੇਪਿ ਅਵਟ੍ਠਾਨਤੋ ਠਪੇਤ੍ਵਾ ਪਞ੍ਚ ਚੀਵਰਾਨਿ ਪਰਿਕ੍ਖਾਰਚੋਲ਼ਨਾਮੇਨਾਧਿਟ੍ਠਿਤਾਨਿ ਅਵਸੇਸਂ ਦਟ੍ਠਬ੍ਬਂ. ਪਚ੍ਚਤ੍ਥਰਣਞ੍ਚ ਪਰਿਕ੍ਖਾਰਮੁਖਪੁਞ੍ਛਨਚੋਲ਼ਕਞ੍ਚ ਪਚ੍ਚਤ੍ਥਰਣ…ਪੇ… ਚੋਲ਼ਕਞ੍ਚ ਨਿਸੀਦਨਞ੍ਚਾਤਿ ਏਤਂ ਚੀਵਰਚਤੁਕ੍ਕਂ ਸਦਸਮ੍ਪਿ ਅਰਤ੍ਤਮ੍ਪਿ ਅਨਾਦਿਣ੍ਣਕਪ੍ਪਮ੍ਪਿ ਲਬ੍ਭਨ੍ਤਿ ਸਮ੍ਬਨ੍ਧੋ. ਸਦਸਨ੍ਤਿ ਸਹ ਯਾਹਿ ਕਾਹਿਚਿ ਦਸਾਹੀਤਿ ਸਦਸਂ. ਸਦਸਕੇ ਲਬ੍ਭਮਾਨੇ ਅਦਸਮ੍ਪਿ ਲਬ੍ਭਤੇਵਾਤਿ ਸਦਸਮ੍ਪਿ ਅਦਸਮ੍ਪਿ ਪੁਪ੍ਫਦਸਮ੍ਪੀਤਿ ਏਤ੍ਥ ਅਤ੍ਥੋ. ਪਿ-ਸਦ੍ਦੋ ਵੁਤ੍ਤਾਵੁਤ੍ਤਸਮ੍ਪਿਣ੍ਡਨਤ੍ਥੋ. ਅਰਤ੍ਤਨ੍ਤਿ ਨੀਲਪੀਤਾਦਿਰਜਨੇਨ ਅਰਞ੍ਜਿਤਮ੍ਪਿ. ਪਿ-ਸਦ੍ਦੇਨ ਰਞ੍ਜਿਤਨੀਲਪੀਤਾਦਿਕਮ੍ਪਿ ਅਨਾਦਿਣ੍ਣਕਪ੍ਪਮ੍ਪੀਤਿ. ਆਦਿਣ੍ਣੋ ਕਪ੍ਪੋ ਯਸ੍ਸ ਨਤ੍ਥੀਤਿ ਤਂ ਅਨਾਦਿਣ੍ਣਕਪ੍ਪਮ੍ਪਿ. ਪਿ-ਸਦ੍ਦੇਨ ਆਦਿਣ੍ਣਕਪ੍ਪਮ੍ਪਿ.

ਨਨੁ ਚ ‘‘ਨ ਭਿਕ੍ਖਵੇ ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਤਬ੍ਬਾਨੀ’’ਤਿਆਦਿਨਾ (ਮਹਾਵ. ੩੭੨) ਸਬ੍ਬਨੀਲਕਸਬ੍ਬਪੀਤਕਸਬ੍ਬਲੋਹਿਤਕਚੀਵਰਾਨਿ ਸਾਮਞ੍ਞੇਨ ਪਟਿਕ੍ਖਿਤ੍ਤਾਨੀਤਿ ਕਥਮਿਦਂ ਚੀਵਰਚਤੁਕ੍ਕਂ ਸਦਸਾਦਿਕਂ ਵਟ੍ਟਤਿ, ਕਥਞ੍ਚ ਅਨਾਦਿਣ੍ਣਕਪ੍ਪਮ੍ਪਿ ਵਟ੍ਟਤੀਤਿ? ਵੁਚ੍ਚਤੇ – ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕੁਸਚੀਰਂ ਨਿਵਾਸੇਤ੍ਵਾ’’ਤਿਆਦਿਨਾ ਉਪ੍ਪਨ੍ਨਵਤ੍ਥੂਸੁ (ਮਹਾਵ. ੩੭੧) ‘‘ਨ ਭਿਕ੍ਖਵੇ ਕੁਸਚੀਰਂ…ਪੇ… ਤਿਤ੍ਥਿਯਦ੍ਧਜੋ ਧਾਰੇਤਬ੍ਬੋ. ਯੋ ਧਾਰੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿਆਦਿਨਾ (ਮਹਾਵ. ੩੭੧) ਉਪ੍ਪਨ੍ਨਵਤ੍ਥੁਵਸੇਨੇਵ ਨਿਵਾਸਨਪਾਰੁਪਨਸਙ੍ਖਾਤਧਾਰਣਸ੍ਸ ਪਟਿਕ੍ਖਿਤ੍ਤਤ੍ਤਾ ਚ ਤਤ੍ਥੇਵ ਅਟ੍ਠਕਥਾਯਞ੍ਚ (ਮਹਾਵ. ਅਟ੍ਠ. ੩੭੨) ‘‘ਸਬ੍ਬਨੀਲਕਾਦੀਨਿ ਰਜਨਂ ਧੋਵਿਤ੍ਵਾ ਪੁਨ ਰਜਿਤ੍ਵਾ ਧਾਰੇਤਬ੍ਬਾਨਿ, ਨ ਸਕ੍ਕਾ ਚੇ ਹੋਨ੍ਤਿ ਧੋਵਿਤੁਂ, ਪਚ੍ਚਤ੍ਥਰਣਾਨਿ ਵਾ ਕਾਤਬ੍ਬਾਨਿ, ਦੁਪਟ੍ਟਚੀਵਰਸ੍ਸ ਵਾ ਮਜ੍ਝੇ ਦਾਤਬ੍ਬਾਨਿ, ਅਚ੍ਛਿਨ੍ਨਦਸਦੀਘਦਸਾਨਿ ਦਸਾ ਛਿਨ੍ਦਿਤ੍ਵਾ ਧਾਰੇਤਬ੍ਬਾਨਿ, ਕਞ੍ਚੁਕਂ ਲਭਿਤ੍ਵਾ ਫਾਲੇਤ੍ਵਾ ਰਜਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ, ਵੇਠਨੇਪਿ ਏਸੇਵ ਨਯੋ’’ਤਿ ਨਿਵਾਸਨਪਾਰੁਪਨਵਸੇਨੇਵ ਧਾਰਣਪਰਿਭੋਗਾਨਂ ਵੁਤ੍ਤਤ੍ਤਾ ਚ ਦੁਬ੍ਬਣ੍ਣਕਰਣਸਿਕ੍ਖਾਪਦੇ (ਪਾਚਿ. ਅਟ੍ਠ. ੩੬੮) ‘‘ਯਂ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਸਕ੍ਕਾ ਹੋਤਿ, ਤਦੇਵ ਚੀਵਰਨ੍ਤਿ ਵੇਦਿਤਬ੍ਬ’’ਨ੍ਤਿ ਪਞ੍ਚਨ੍ਨਂਯੇਵ ਕਪ੍ਪਬਿਨ੍ਦੁਨੋ ਅਨੁਞ੍ਞਾਤਤ੍ਤਾ ਚ ਤਿਚੀਵਰਕਣ੍ਡੁਪ੍ਪਟਿਚ੍ਛਾਦਿਵਸ੍ਸਿਕਸਾਟਿਕਸਙ੍ਖਾਤਾਨਿ ਪਞ੍ਚ ਚੀਵਰਾਨਿ ਕਾਯਪਰਿਹਾਰਿਯਾਨੇਵ ਅਦਸਾਨਿ ਅਸਬ੍ਬਨੀਲਕਾਦੀਨਿ ਕਪ੍ਪਿਯਰਜਨਰਜਿਤਾਨਿ ਆਦਿਣ੍ਣਕਪ੍ਪਾਨਿਯੇਵ ਹੋਨ੍ਤਿ, ਨ ਨਿਯਮੇਨ ਨਿਵਤ੍ਤਿਤਾਨਿ ਪਰਾਨਿ ਚਤ੍ਤਾਰੀਤਿ ਚੀਵਰਚਤੁਕ੍ਕਮੇਵ ਸਦਸਾਦਿਕਂ ਅਨਾਦਿਣ੍ਣਕਪ੍ਪਮ੍ਪਿ ਵਟ੍ਟਤੀਤਿ.

੫੧. ਸੇਸਚੀਵਰਪਞ੍ਚਕਂ ਅਦਸਂਯੇਵ ਰਜਿਤਂਯੇਵ ਆਦਿਣ੍ਣਕਪ੍ਪਂਵ ਕਪ੍ਪਤੀਤਿ ਯੋਜਨਾ. ਰਜਿਤਨ੍ਤਿ ਕਪ੍ਪਿਯਰਜਨੇਨ ਰਜਿਤਂ. ਨਿਸੀਦਨਸ੍ਸ ਯਥਾਵੁਤ੍ਤੇਨਤ੍ਥੇਨ ਸਬ੍ਬਤ੍ਥ ਅਦਸਤ੍ਥਂ ਨਿਸੇਧੇਤੁਂ ‘‘ਸਦਸਂਵ ਨਿਸੀਦਨ’’ਨ੍ਤਿ ਵੁਤ੍ਤਂ. ਸਤਿ ਹਿ ਸਮ੍ਭਵੇ ਬ੍ਯਭਿਚਾਰੇ ਚ ਵਿਸੇਸਨਂ ਸਾਤ੍ਥਕਂ ਹੋਤਿ.

੫੨. ਇਦਾਨਿ ਅਨਧਿਟ੍ਠਿਤੇ ਅਨਿਸ੍ਸਟ੍ਠੇ ਚ ਕਾ ਪਵਤ੍ਤੀਤਿ ਤਂ ਦਸ੍ਸੇਤੁਂ ‘‘ਅਨਧਿਟ੍ਠਿਤ’’ਨ੍ਤਿਆਦਿਮਾਹ. ਤਤ੍ਥ ਅਨਧਿਟ੍ਠਿਤਨ੍ਤਿ ਤਿਚੀਵਰਾਦਿਵਸੇਨ ਅਨਧਿਟ੍ਠਿਤਂ. ਅਨਿਸ੍ਸਟ੍ਠਨ੍ਤਿ ਯਸ੍ਸ ਕਸ੍ਸਚਿ ਦਾਨਲਕ੍ਖਣੇਨ ਅਦਿਨ੍ਨਂ. ਵਿਕਪ੍ਪੇਤ੍ਵਾ ਪਰਿਭੁਞ੍ਜਯੇਤਿ ਵਕ੍ਖਮਾਨਨਯੇਨ ਏਕਬਹੁਭਾਵਂ, ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਸਲ੍ਲਕ੍ਖੇਤ੍ਵਾ ਵਿਕਪ੍ਪੇਤ੍ਵਾ ਪਚ੍ਚੁਦ੍ਧਰਿਤ੍ਵਾ ਪਰਿਭੁਞ੍ਜੇਯ੍ਯ. ਵਕ੍ਖਮਾਨਨਯੇਨ ਪਨ ਵਿਞ੍ਞਾਯਤੀਤਿ ‘‘ਪਚ੍ਚੁਦ੍ਧਰਿਤ੍ਵਾ’’ਤਿ ਨ ਵੁਤ੍ਤਂ.

ਇਦਾਨਿ ‘‘ਵਿਕਪ੍ਪੇਤ੍ਵਾ’’ਤਿ ਵੁਤ੍ਤਂ ਕੀਦਿਸਂ ਤਂ ਹੇਟ੍ਠਿਮਨ੍ਤੇਨ ਵਿਕਪ੍ਪਿਯਨ੍ਤਿ ਆਹ ‘‘ਹਤ੍ਥਾ’’ਤਿਆਦਿ. ਤਤ੍ਥ ਹਤ੍ਥੋ ਦੀਘੇਨ ਯਸ੍ਸ ਤਂ ਹਤ੍ਥਦੀਘਂ. ਤਤੋਤਿ ਤਸ੍ਮਾ ਹਤ੍ਥਤੋ. ਉਪਡ੍ਢੋ ਹਤ੍ਥਸ੍ਸ ਦੁਤਿਯੋ ਭਾਗੋ ਵਿਦਤ੍ਥਿਸਙ੍ਖਾਤੋ ਵਿਤ੍ਥਾਰੇਨ ਯਸ੍ਸ ਤਂ ਉਪਡ੍ਢਵਿਤ੍ਥਾਰਂ.

੫੩. ਇਦਾਨਿ ਯਥਾਵੁਤ੍ਤਵਿਧਾਨਂ ਤੇਚੀਵਰਿਕਸ੍ਸੇਵ ਵਸੇਨ, ਅਪਰੋ ਪਨ ਅਞ੍ਞਥਾ ਪਟਿਪਜ੍ਜਤੀਤਿ ਤਂ ਦਸ੍ਸੇਤੁਂ ‘‘ਤਿਚੀਵਰਸ੍ਸਾ’’ਤਿਆਦਿਮਾਹ. ਤਤ੍ਥ ਨਾਮੇਨਾਧਿਟ੍ਠਿਤਾਨਿ ਤੀਣਿ ਚੀਵਰਾਨਿ ਏਤਸ੍ਸਾਤਿ ਤਿਚੀਵਰੋ. ਤਸ੍ਸ ਵਿਨਯਤੇਚੀਵਰਿਕਸ੍ਸਾਤਿ ਅਤ੍ਥੋ, ਨ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਿਤਚੀਵਰਸ੍ਸ. ਵਿਨਯਤੇਚੀਵਰਿਕਸ੍ਸ ਪਨ ਉਦੋਸਿਤਸਿਕ੍ਖਾਪਦੇ ਵੁਤ੍ਤਪਰਿਹਾਰੋ ਨਤ੍ਥਿ. ਪਰਿਕ੍ਖਾਰਚੋਲ਼ਿਯੋਤਿ ਪਰਿਕ੍ਖਾਰਚੋਲ਼ਮਸ੍ਸ ਅਤ੍ਥੀਤਿ ਣਿਕੇਨ ਯ-ਕਾਰੋ. ਸਬ੍ਬਨ੍ਤਿ ਸਕਲਂ ਨਵਵਿਧਮ੍ਪਿ ਚੀਵਰਂ. ਤਥਾ ਵਤ੍ਵਾਤਿ ਏਕਬਹੁਭਾਵਂ, ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘‘ਇਮਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਮੀ’’ਤਿਆਦਿਨਾ ਵਤ੍ਵਾ. ਅਧਿਟ੍ਠਤੀਤਿ ਅਧਿਟ੍ਠਾਤਿ.

੫੪. ਅਧਿਟ੍ਠਿਤਚੀਵਰਂ ਪਨ ਪਰਿਭੁਞ੍ਜਤੋ ਕਥਂ ਅਧਿਟ੍ਠਾਨਂ ਵਿਜਹਤੀਤਿ ਤਂ ਦਸ੍ਸੇਨ੍ਤੋ ‘‘ਅਚ੍ਛੇਦਾ’’ਤਿਆਦਿਮਾਹ. ਤਤ੍ਥ ਅਚ੍ਛੇਦੋ ਚ ਵਿਸ੍ਸਜ੍ਜਨਞ੍ਚ ਗਾਹੋ ਚ ਵਿਬ੍ਭਮੋ ਚਾਤਿ ਦ੍ਵਨ੍ਦੋ. ਅਚ੍ਛੇਦੋ ਨਾਮ ਚੋਰਾਦੀਹਿ ਅਚ੍ਛਿਨ੍ਦਿਤ੍ਵਾ ਗਹਣਂ. ਵਿਸ੍ਸਜ੍ਜਨਂ ਪਰੇਸਂ ਦਾਨਂ. ਗਾਹੋ ਵਿਸ੍ਸਾਸੇਨ ਗਹਣਂ. ਵਿਬ੍ਭਮੋ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਗਿਹਿਭਾਵੂਪਗਮਨਂ. ਤਦਾਪਿ ਤਸ੍ਸ ਅਞ੍ਞਸ੍ਸ ਦਾਨੇ ਵਿਯ ਚੀਵਰਸ੍ਸ ਨਿਰਾਲਯਭਾਵੇਨ ਪਨ ਪਰਿਚ੍ਚਾਗੋਤਿ. ਟੀਕਾਯਂ ਪਨ ਭਾਦਿਸੋ ਭਿਕ੍ਖੁਯੇਵਾਤਿ ਅਧਿਟ੍ਠਾਨਂ ਨ ਵਿਜਹਤੀਤਿ ਅਤ੍ਥਂ ਵਿਕਪ੍ਪੇਤ੍ਵਾ ਭਿਕ੍ਖੁਨਿਯਾ ਗਿਹਿਭਾਵੂਪਗਮਨਂ ਵੁਤ੍ਤਂ, ਤਂ ਨ ਗਹੇਤਬ੍ਬਂ, ਕਾਰਣਂ ਪਨੇਤ੍ਥ ਅਮ੍ਹਾਕਂ ਗਰੂਹਿਯੇਵ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ‘‘ਭਿਕ੍ਖੁਨਿਯਾ ‘ਹੀਨਾਯਾਵਤ੍ਤਨੇਨਾ’ਤਿ ਵਿਸੇਸੇਤ੍ਵਾ ਅਵੁਤ੍ਤਤ੍ਤਾ ਭਿਕ੍ਖੁਨਿਯਾ ਹਿ ਗਿਹਿਭਾਵੂਪਗਮਨੇ ਅਧਿਟ੍ਠਾਨਵਿਜਹਨਂ ਵਿਸੁਂ ਵਤ੍ਤਬ੍ਬਂ ਨਤ੍ਥਿ ਤਸ੍ਸਾ ਵਿਬ੍ਭਮਨੇਨੇਵ ਅਸ੍ਸਮਣੀਭਾਵਤੋ’’ਤਿ ਵੁਤ੍ਤਂ. ਨਨੁ ਚ ਭਿਕ੍ਖੁਨੋ ਅਪ੍ਪਚ੍ਚਕ੍ਖਾਤਸਿਕ੍ਖਸ੍ਸ ਗਿਹਿਭਾਵੂਪਗਮਨੇਨ ਅਧਿਟ੍ਠਾਨਵਿਜਹਨੇਨ ਨਿਰਾਲਯਭਾਵੋ ਕਾਰਣਭਾਵੇਨ ਵੁਤ੍ਤੋ, ਏਵਂ ਸਤਿ ਪਰਿਵਤ੍ਤਲਿਙ੍ਗਸ੍ਸ ਨਤ੍ਥਿ ਨਿਰਾਲਯਭਾਵੋਤਿ ਕਥਮਸ੍ਸ ਅਧਿਟ੍ਠਾਨਂ ਵਿਜਹਤੀਤਿ? ਸਚ੍ਚਮੇਤਂ, ਤਥਾਪਿ ਬੁਦ੍ਧਮਤਞ੍ਞੂਹਿ ਅਟ੍ਠਕਥਾਚਰਿਯੇਹਿ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੧.੬੯) ‘‘ਯਂ ਪਨਸ੍ਸ ਭਿਕ੍ਖੁਭਾਵੇ ਅਧਿਟ੍ਠਿਤਂ ਤਿਚੀਵਰਞ੍ਚ ਪਤ੍ਤੋ ਚ, ਤਂ ਅਧਿਟ੍ਠਾਨਂ ਵਿਜਹਤਿ, ਪੁਨ ਅਧਿਟ੍ਠਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਨਤ੍ਥੇਤ੍ਥ ਦੋਸੋਤਿ.

ਮਾਰਣਲਿਙ੍ਗਸਿਕ੍ਖਾਤਿ ਉਤ੍ਤਰਪਦਲੋਪੇਨ ਉਪਚਾਰੇਨ ਵਾ ਲਿਙ੍ਗਪਰਿਵਤ੍ਤਨਂ ਸਿਕ੍ਖਾਪਚ੍ਚਕ੍ਖਾਨਞ੍ਚ ‘‘ਲਿਙ੍ਗਸਿਕ੍ਖਾ’’ਤਿ ਚ ਵੁਤ੍ਤਂ. ਇਤਿ ਏਤੇ ਅਟ੍ਠ ਸਬ੍ਬੇਸੁ ਨਵਸੁ ਚੀਵਰੇਸੁ ਅਧਿਟ੍ਠਾਨਸ੍ਸ ਵਿਯੋਗੋ ਵਿਪ੍ਪਵਾਸੋ, ਤਸ੍ਸ ਕਾਰਣਾ ਹੋਨ੍ਤੀਤਿ ਪਾਠਸੇਸੋ. ਤਿਚੀਵਰਸ੍ਸ ਪਨ ਨ ਕੇਵਲਂ ਇਮੇਯੇਵ ਅਟ੍ਠ, ਵਿਨਿਵਿਦ੍ਧਛਿਦ੍ਦਞ੍ਚ ਅਧਿਟ੍ਠਾਨਵਿਯੋਗਕਾਰਣਨ੍ਤਿ ਲਿਙ੍ਗਵਚਨਞ੍ਚ ਪਰਿਵਤ੍ਤੇਤ੍ਵਾ ਯੋਜੇਤਬ੍ਬਂ. ਤਤ੍ਥ ਅਬ੍ਭਨ੍ਤਰੇ ਏਕਸ੍ਸਪਿ ਤਨ੍ਤੁਨੋ ਅਭਾਵੇਨ ਵਿਨਿਵਿਦ੍ਧਂ ਵਿਨਿਵਿਜ੍ਝਿਤ੍ਵਾ ਗਤਛਿਦ੍ਦਂਕਨਿਟ੍ਠਙ੍ਗੁਲਿਨਖਪਿਟ੍ਠਿਪ੍ਪਮਾਣਂ ਵਿਨਿਵਿਦ੍ਧਛਿਦ੍ਦਂ. ਤਤ੍ਥ ਸਙ੍ਘਾਟਿਯਾ ਚ ਉਤ੍ਤਰਾਸਙ੍ਗਸ੍ਸ ਚ ਦੀਘਨ੍ਤਤੋ ਵਿਦਤ੍ਥਿਪ੍ਪਮਾਣਸ੍ਸ, ਤਿਰਿਯਨ੍ਤਤੋ ਅਟ੍ਠਙ੍ਗੁਲਪ੍ਪਮਾਣਸ੍ਸ, ਅਨ੍ਤਰਵਾਸਕਸ੍ਸ ਪਨ ਦੀਘਨ੍ਤਤੋ ਵਿਦਤ੍ਥਿਪ੍ਪਮਾਣਸ੍ਸੇਵ ਤਿਰਿਯਨ੍ਤਤੋ ਚਤੁਰਙ੍ਗੁਲਪ੍ਪਮਾਣਸ੍ਸ ਪਦੇਸਸ੍ਸ ਓਰਤੋ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਸੂਚਿਕਮ੍ਮਂ ਕਤ੍ਵਾ ਪੁਨ ਅਧਿਟ੍ਠਾਤਬ੍ਬਂ. ਸੂਚਿਕਮ੍ਮਂ ਕਰੋਨ੍ਤੇਨ ਚ ਛਿਨ੍ਦਿਤ੍ਵਾ ਦੁਬ੍ਬਲਟ੍ਠਾਨਾਪਨਯਨੇਨ ਛਿਦ੍ਦਂ ਅਦਸ੍ਸੇਤ੍ਵਾ ਕਾਤਬ੍ਬਂ.

੫੫. ਇਦਾਨਿ ਅਕਪ੍ਪਿਯਾਨਿ ਦਸ੍ਸੇਤੁਂ ‘‘ਕੁਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਕੁਸਾ ਚ ਵਾਕਾ ਚ ਫਲਕਾਨਿ ਚ, ਤੇਸਂ ਚੀਰਾਨਿ ਕੁਸ…ਪੇ… ਚੀਰਾਨਿ. ਤਤ੍ਥ ਕੁਸੇਨ ਗਨ੍ਥੇਤ੍ਵਾ ਕਤਂ ਕੁਸਚੀਰਂ. ਤਥਾ ਵਾਕੇਨ ਗਨ੍ਥੇਤ੍ਵਾ ਕਤਂ ਵਾਕਚੀਰਂ, ਤਾਪਸਾਨਂ ਵਕ੍ਕਲਂ. ਫਲਕਸਣ੍ਠਾਨਾਨਿ ਫਲਕਾਨਿ ਸਿਬ੍ਬਿਤ੍ਵਾ ਕਤਂ ਫਲਕਚੀਰਂ. ਕੇਸਵਾਲਜਨ੍ਤਿ ਕੇਸੇਹਿ ਚ ਵਾਲੇਹਿ ਚ ਜਾਤਂ ਵਾਯਿਤਂ ਕਮ੍ਬਲਨ੍ਤਿ ਸਮ੍ਬਨ੍ਧੋ. ਉਲੂਕਪਕ੍ਖਾਜਿਨਕ੍ਖਿਪੇਤਿ ਉਲੂਕਾਨਂ ਕੋਸਿਯਸਕੁਣਾਨਂ ਪਕ੍ਖਂ ਪਕ੍ਖੇਨ ਕਤਂ ਨਿਵਾਸਨਞ੍ਚ ਅਜਿਨਕ੍ਖਿਪਂ ਸਲੋਮਂ ਸਖੁਰਂ ਅਜਿਨਮਿਗਾਨਂ ਚਮ੍ਮਞ੍ਚ ਧਾਰਯਤੋ ਥੁਲ੍ਲਚ੍ਚਯਨ੍ਤਿ ਸਮ੍ਬਨ੍ਧੋ.

੫੬. ਕਦਲੇਰਕਕ੍ਕਦੁਸ੍ਸੇਸੂਤਿ ਕਦਲਿਯੋ ਚ ਏਰਕੋ ਚ ਅਕ੍ਕੋ ਚ, ਤੇਸਂ ਦੁਸ੍ਸਾਨਿ ਵਤ੍ਥਾਨਿ, ਤੇਸੁ ਚੇਵ ਮਕਚਿਵਾਕੇਹਿ ਕਤੇ ਪੋਤ੍ਥਕੇ ਚਾਪਿ ਦੁਕ੍ਕਟਂ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਂ. ਕਦਲਿਦੁਸ੍ਸਾਦਿਸਦ੍ਦੇਨ ਤਂਧਾਰਣਮਧਿਪ੍ਪੇਤਂ, ਤਸ੍ਮਾ ਤਂਧਾਰਣਨਿਮਿਤ੍ਤਂ ਦੁਕ੍ਕਟਂ ਹੋਤੀਤਿ ਅਤ੍ਥੋ. ਏਵਂ ਸਬ੍ਬਤ੍ਥ. ‘‘ਨੀਲਕੋ ਚਾ’’ਤਿਆਦਿਨਾ ਦ੍ਵਨ੍ਦੋ. ਸਬ੍ਬਾ ਨੀਲਕ…ਪੇ… ਕਣ੍ਹਕਾਤਿ ਕਮ੍ਮਧਾਰਯੋ. ਨੀਲਾਦਿਵਣ੍ਣਯੋਗੇਨ ਵਤ੍ਥਂ ਨੀਲਾਦਿ. ਨੀਲਕਂ ਉਮਾਪੁਪ੍ਫਵਣ੍ਣਂ. ਮਞ੍ਜੇਟ੍ਠਂ ਮਞ੍ਜੇਟ੍ਠਿਕਵਣ੍ਣਂ. ਪੀਤਂ ਕਣਿਕਾਰਪੁਪ੍ਫਵਣ੍ਣਂ. ਲੋਹਿਤਂ ਜਯਸੁਮਨਪੁਪ੍ਫਵਣ੍ਣਂ. ਕਣ੍ਹਕਂ ਅਦ੍ਦਾਰਿਟ੍ਠਕਵਣ੍ਣਂ. ਸਬ੍ਬ-ਸਦ੍ਦੋ ਪਨੇਤ੍ਥ ਪਚ੍ਚੇਕਂ ਯੋਜੇਤਬ੍ਬੋ.

੫੭. ਮਹਾ…ਪੇ… ਰਤ੍ਤੇਤਿ ਮਹਾਰਙ੍ਗੋ ਚ ਮਹਾਨਾਮਰਙ੍ਗੋ ਚ, ਤੇਹਿ ਰਤ੍ਤੇ. ਏਤ੍ਥਾਪਿ ਪੁਨ ਸੁਯ੍ਯਮਾਨਂ ਸਬ੍ਬਸਦ੍ਦਮਨੁਵਤ੍ਤਿਯਂ, ‘‘ਸਬ੍ਬਮਹਾਰਙ੍ਗਰਤ੍ਤੇ’’ਤਿਆਦਿਨਾ ਅਤ੍ਥੋ ਵੇਦਿਤਬ੍ਬੋ. ਇਮਿਨਾ ਚ ਅਸਬ੍ਬਨੀਲਕਾਦਿ ਕਪ੍ਪਿਯਰਜਨਰਜਿਤਂ ਪਰਿਭੁਞ੍ਜਨ੍ਤਸ੍ਸ ਨਤ੍ਥਿ ਦੋਸੋਤਿ ਦੀਪੇਤਿ. ਤਤ੍ਥ ਮਹਾਰਙ੍ਗੋ ਸਤਪਦਿਪਿਟ੍ਠਿਵਣ੍ਣੋ. ਮਹਾਨਾਮਰਙ੍ਗੋ ਸਮ੍ਭਿਨ੍ਨਵਣ੍ਣੋ, ਸੋ ਪਨ ਪਣ੍ਡੁਪਲਾਸਵਣ੍ਣੋ ਹੋਤਿ, ਪਦੁਮਵਣ੍ਣੋਤਿਪਿ ਵਦਨ੍ਤਿ. ਤਿਰੀਟਕੇਤਿ ਤਂ ਨਾਮਕ ਰੁਕ੍ਖਤਚੇ. ਅਚ੍ਛਿਨ੍ਨਦੀਘਦਸਕੇਤਿ ਸਬ੍ਬਸੋ ਅਚ੍ਛਿਨ੍ਨਤ੍ਤਾ ਅਚ੍ਛਿਨ੍ਨਾ ਚ ਮਜ੍ਝੇ ਛਿਨ੍ਨਤ੍ਤਾ ਦੀਘਾ ਚ ਸਾ ਦਸਾ ਚ ਵਤ੍ਥਕੋਟਿ ਯਸ੍ਸਾਤਿ ਅਞ੍ਞਪਦਤ੍ਥਸਮਾਸੋ. ਫਲਪੁਪ੍ਫਦਸੇਤਿ ਅਞ੍ਞਮਞ੍ਞਂ ਸਂਸਿਬ੍ਬਿਤ੍ਵਾ ਕਤਾ ਫਲਸਦਿਸਾ ਦਸਾ ‘‘ਫਲਾ’’ਤਿ ਵੁਚ੍ਚਨ੍ਤਿ, ਕੇਤਕਾਦਿ ਪੁਪ੍ਫਸਦਿਸਾਨਿ ‘‘ਪੁਪ੍ਫਾਨੀ’’ਤਿ ਚ, ਫਲਾ ਚ ਪੁਪ੍ਫਾ ਚ ਦਸਾ ਯਸ੍ਸ, ਫਲਸਦਿਸੇ ਦਸੇ, ਪੁਪ੍ਫਸਦਿਸੇ ਦਸੇ ਚਾਤਿ ਅਤ੍ਥੋ. ਵੇਠਨੇਤਿ ਸੀਸਵੇਠਨੇ. ਤਥਾਤਿ ਇਮਿਨਾ ਸਬ੍ਬਨੀਲਕਾਦੀਸੁ ਦੁਕ੍ਕਟਂ ਅਤਿਦਿਸਤਿ. ਸਬ੍ਬਨ੍ਤਿ ਕੁਸਚੀਰਾਦਿਕਂ ਸਕਲਂ. ਅਚ੍ਛਿਨ੍ਨਂ ਚੀਵਰਂ ਯਸ੍ਸ ਸੋ ਲਭਤੀਤਿ ਸਮ੍ਬਨ੍ਧੋ.

ਚੀਵਰਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.