੧੪. ਭੂਮਿਨਿਦ੍ਦੇਸਵਣ੍ਣਨਾ

੧੩੬. ਯਾਸੁ ਵੁਤ੍ਥਂ ਪਕ੍ਕਞ੍ਚ ਕਪ੍ਪਤਿ, ਤਾ ਕਪ੍ਪਿਯਾ ਭੂਮਿਯੋ ਸਮ੍ਮੁਤਿ ਚ ਸਮ੍ਮੁਤਿਕੁਟਿ ਚ…ਪੇ… ਗਹਪਤਿ ਚ ਗਹਪਤਿਕੁਟਿ ਚਾਤਿ ਇਮਾ ਚਤਸ੍ਸੋ ਹੋਨ੍ਤੀਤਿ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਤਤ੍ਥ ਭੇਸਜ੍ਜਕ੍ਖਨ੍ਧਕੇ (ਮਹਾਵ. ੨੯੫) ਵੁਤ੍ਤਾਯ ਉਤ੍ਤਿਦੁਤਿਯਕਮ੍ਮਵਾਚਾਯ, ਅਪਲੋਕਨਕਮ੍ਮਵਸੇਨ ਵਾ ਸਾਵੇਤ੍ਵਾ ਸਮ੍ਮਾ ਉਤ੍ਤਿਸਮ੍ਪਨ੍ਨਂ ਕਰੀਯਤੀਤਿ ਸਮ੍ਮੁਤਿ, ਥਮ੍ਭਾਨਂ ਭਿਤ੍ਤਿਪਾਦਾਨਂ ਵਾ ਉਗ੍ਗਮਨਂ ਉਦ੍ਧਂ ਕਤ੍ਵਾ ਠਪਨਂ, ‘‘ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਾਚਾਯ ਸਾਵਨਞ੍ਚ ਅਨ੍ਤਂ ਯਸ੍ਸਾ ਸਾ ਉਸ੍ਸਾਵਨਨ੍ਤਾ. ਤਥਾ ਚ ਵੁਤ੍ਤਂ ‘‘ਥਮ੍ਭਪ੍ਪਤਿਟ੍ਠਾਨਞ੍ਚ ਵਚਨਪਰਿਯੋਸਾਨਞ੍ਚ ਸਮਕਾਲਂ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੯੫). ਨਿਸਾਦਨਂ ਪਵਿਸਨਂ ਸਨ੍ਨਿਵੇਸਨਂ ਨਿਸਾਦੋ, ਗੁਨ੍ਨਂ ਵਿਯ ਨਿਸਾਦੋ ਏਤਿਸ੍ਸਾਤਿ ਗੋਨਿਸਾਦਿ. ਭਿਕ੍ਖੁਂ ਠਪੇਤ੍ਵਾ ਸੇਸਸਹਧਮ੍ਮਿਕਾ ਸਬ੍ਬੇ ਚ ਦੇਵਮਨੁਸ੍ਸਾ ਇਧ ਗਹਪਤੀਤਿ ਸਾਮਞ੍ਞੇਨ ਅਧਿਪ੍ਪੇਤਾ. ਏਤ੍ਥ ਪਨ ਗਹਪਤਿਸਮ੍ਬਨ੍ਧਿਨੀ ਕੁਟਿ ਦੀਘੇਨ ਗਹਪਤੀ.

‘‘ਯਂ ਪਨ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਵੁਤ੍ਥ’’ਨ੍ਤਿ (ਮਹਾਵ. ਅਟ੍ਠ. ੨੯੫) ਅਟ੍ਠਕਥਾਵਚਨਤੋ ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ ਲੇਣਾਦਿਂ ਵਾ, ਤੇਸਮ੍ਪਿ ਸਾਮਞ੍ਞਵਚਨਂ ਵਿਞ੍ਞਾਯਤੀਤਿ ਤਂਤਂਲਕ੍ਖਣਪ੍ਪਤ੍ਤਾ ਸਹਸੇਯ੍ਯਪ੍ਪਹੋਨਕਾ ਲੇਣਾਦਯੋ ਚਤੂਸ੍ਵੇਵ ਕੁਟੀਸੁ ਅਨ੍ਤੋਗਧਾਤਿ ਵੇਦਿਤਬ੍ਬਂ. ਇਮਾਸੁ ਚਤੂਸੁ ਸਹਸੇਯ੍ਯਪ੍ਪਹੋਨਕੇ ਪਦੇਸੇ ਯਂ ਸਙ੍ਘਿਕਂ ਪੁਗ੍ਗਲਿਕਂ ਵਾ ਭਿਕ੍ਖੁਸਨ੍ਤਕਂ ਏਕਰਤ੍ਤਮ੍ਪਿ ਅਨ੍ਤੋਵੁਤ੍ਥਂ ਅਨੁਪਸਮ੍ਪਨ੍ਨੇਨ ਪਕ੍ਕਞ੍ਚ ਯਾਵਕਾਲਿਕਂ ਯਾਮਕਾਲਿਕਞ੍ਚ ਅਨ੍ਤੋਵੁਤ੍ਥਅਨ੍ਤੋਪਕ੍ਕਸਙ੍ਖਂ ਨ ਗਚ੍ਛਤਿ, ਕੋ ਪਨ ਵਾਦੋ ਇਤਰਦ੍ਵਯੇ. ਤਂ ਪਨ ਅਕਪ੍ਪਿਯਭੂਮਿਯਮ੍ਪਿ ਵੁਤ੍ਥਂ ਪਕ੍ਕਞ੍ਚ ਵਟ੍ਟਤਿ. ਤੇਨ ਵੁਤ੍ਤਂ ‘‘ਯਾਸੁ ਵੁਤ੍ਥਂ ਪਕ੍ਕਞ੍ਚ ਕਪ੍ਪਤੀ’’ਤਿ.

੧੩੭. ਵਾਸਤ੍ਥਾਯ ਕਤੇ ਸਙ੍ਘਿਕੇ ਵਾ ਏਕਸਨ੍ਤਕੇ ਵਾ ਸਹਸੇਯ੍ਯਪ੍ਪਹੋਨਕੇ ਗੇਹੇ ਕਪ੍ਪਿਯਾਕੁਟਿ ਲਦ੍ਧਬ੍ਬਾਤਿ ਸਮ੍ਬਨ੍ਧੋ. ਤਤ੍ਥ ਵਾਸਤ੍ਥਾਯਾਤਿ ਇਮਿਨਾ ਅਵਾਸਤ੍ਥਾਯ ਕਤਂ ਨਿਵਤ੍ਤੇਤਿ. ਏਕਸਨ੍ਤਕੇਤਿ ਏਕਸ੍ਸ ਭਿਕ੍ਖੁਨੋ ਸਨ੍ਤਕੇ. ਕਪ੍ਪਿਯਾਕੁਟੀਤਿ ਭਾਵਪ੍ਪਧਾਨੋਯਂ ਨਿਦ੍ਦੇਸੋ, ਨ ਹਿ ਗੇਹੇ ਗੇਹਂ ਲਦ੍ਧੁਂ ਯੁਜ੍ਜਤੀਤਿ ਕਪ੍ਪਿਯਕੁਟਿਤਾਤਿ ਅਤ੍ਥੋ. ਦੀਘੋ ਪਨ ਗਾਥਾਵਸੇਨ, ਕਪ੍ਪਿਯਾ ਕੁਟਿਤਾਤਿ ਵਾ ਵਿਸੇਸਨਵਸੇਨ ਦਟ੍ਠਬ੍ਬਂ. ਸਹਸੇਯ੍ਯਪ੍ਪਹੋਨਕੇਤਿ ਏਤ੍ਥ ਸਹਸੇਯ੍ਯਪ੍ਪਹੋਨਕਂ ਵਾਸਾਗਾਰਲਕ੍ਖਣੇ ਵੁਤ੍ਤਲਕ੍ਖਣਂ ਸੇਨਾਸਨਂ.

੧੩੮. ਇਦਾਨਿ ਤਾ ਕੁਟਿਯੋ ਕਮੇਨ ਦਸ੍ਸੇਤ੍ਵਾ ਤਤ੍ਥ ਪਟਿਪਜ੍ਜਿਤਬ੍ਬਵਿਧਿਂ, ਤਾਸਂ ਸਬ੍ਬਥਾਪਗਮਞ੍ਚ ਦਸ੍ਸੇਤੁਂ ‘‘ਗੇਹੇ’’ਤਿਆਦਿਮਾਹ. ਤਤ੍ਥ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਏਵਮੀਰਯਨ੍ਤਿ ਸਮ੍ਬਨ੍ਧੋ. ਇਟ੍ਠਕਾ ਚ ਥਮ੍ਭਾ ਚ ‘‘ਇਟ੍ਠਕਾਥਮ੍ਭਾ’’ਤਿ ਵਤ੍ਤਬ੍ਬੇ ਰਸ੍ਸੋ. ਇਟ੍ਠਕਥਮ੍ਭਾ ਆਦਿ ਯਸ੍ਸ ਭਿਤ੍ਤਿਪਾਸਾਦਸ੍ਸਾਤਿ ਬਹੁਬ੍ਬੀਹਿ. ਪਚ੍ਛਾ ਪਠਮਸਦ੍ਦੇਨ ਕਮ੍ਮਧਾਰਯੋ. ‘‘ਠਪੇਯ੍ਯ ਚੇ, ਸਾ ਉਸ੍ਸਾਵਨਨ੍ਤਿਕਾ’’ਤਿ ਏਵਂ ਚੇ-ਸਾ-ਸਦ੍ਦੇ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ.

੧੩੯. ਸਕਲੋ ਅਪਰਿਕ੍ਖਿਤ੍ਤੋ ਆਰਾਮੋਪਿ ਵਾਤਿ ਸਮ੍ਬਨ੍ਧੋ. ਸੇਨਾਸਨਂ ਪਰਿਕ੍ਖਿਤ੍ਤਂ ਵਾ ਹੋਤੁ, ਅਪਰਿਕ੍ਖਿਤ੍ਤਂ ਵਾ, ਨ ਤਂ ਪਮਾਣਂ.

੧੪੦. ਅਞ੍ਞੇਹਿ ਕਪ੍ਪਿਯਕੁਟਿਯਾ ਅਤ੍ਥਾਯ ਦਿਨ੍ਨੋ ਵਾ ਤੇਸਂ ਸਨ੍ਤਕੋ ਵਾਤਿ ਯੋਜਨਾ.

੧੪੧. ਅਵਿਰੋਧਭਾਵੇਨ ਕਪ੍ਪਨੀਯਾ ਕਪ੍ਪਾ, ਕਪ੍ਪ ਸਾਮਤ੍ਥਿਯਮਿਚ੍ਚੇਤਸ੍ਮਾ ਇਤ੍ਥਿਯਂ ਆਪਚ੍ਚਯੇ ਰੂਪਂ, ਨ ਕਪ੍ਪਾ ਅਕਪ੍ਪਾ, ਅਕਪ੍ਪਾ ਚ ਸਾ ਕੁਟਿ ਚੇਤਿ ਅਕਪ੍ਪਕੁਟਿ, ਤਾਯ. ਸਪ੍ਪਿਆਦੀਤਿ ਇਮਿਨਾ ਸਤ੍ਤਾਹਕਾਲਿਕਂ ਯਾਵਜੀਵਿਕਞ੍ਚ ਗਹਿਤਂ.

੧੪੨. ਤੇਹੇਵਾਤਿ ਅਕਪ੍ਪਕੁਟਿਯਂ ਵੁਤ੍ਥਸਪ੍ਪਿਆਦੀਹਿ ਏਵ ਸਦ੍ਧਿਂ ਸਤ੍ਤਾਹਕਾਲਿਕਸਂਸਟ੍ਠਤਾਯ ‘‘ਸਤ੍ਤਾਹਂ ਕਪ੍ਪਤੇ’’ਤਿ ਵੁਤ੍ਤਂ. ਸਾਮਿਸੇਤਿ ਆਮਿਸਸਙ੍ਖਾਤੇਨ ਪੁਰਿਮਦ੍ਵਯੇਨ ਸਹਿਤੇ. ਸਾਮਪਾਕਤਾਤਿ ਸਾਮਂ ਅਤ੍ਤਨਾ ਪਾਕੋ ਏਤਸ੍ਸਾਤਿ ਸਾਮਪਾਕਂ, ਸਤ੍ਤਾਹਕਾਲਿਕੇਨ ਸਹ ਪਕ੍ਕਂ ਸਾਮਿਸਂ ਯਾਵਜੀਵਿਕਂ, ਤਸ੍ਸ ਭਾਵੋ ਸਾਮਪਾਕਤਾ. ਸਯਂ ਪਕ੍ਕਂ ਤਂ ਅਤ੍ਤਨਾ ਸਂਸਟ੍ਠਤਾਯ ਤਮ੍ਪਿ ਆਮਿਸਂ ਸਾਮਪਾਕਗਤਿਕਂ ਕਰੋਤੀਤਿ ਤਸ੍ਸ ਸਾਮਪਾਕਤਾ ਹੋਤੀਤਿ ਅਧਿਪ੍ਪਾਯੋ.

੧੪੩. ਅਧਿਟ੍ਠਿਤਾਤਿ ਪਤਿਟ੍ਠਿਤਾ. ਏਵ-ਸਦ੍ਦੋ ਤਿਟ੍ਠਤਿਸਦ੍ਦਸ੍ਸ ਅਨ੍ਤੇ ਦਟ੍ਠਬ੍ਬੋ.

੧੪੪. ਸਬ੍ਬੇਸੂਤਿ ਥਮ੍ਭਾਦੀਸੁ ਸਕਲੇਸੁ. ਜਹਿਤਂ ਵਤ੍ਥੁ ਕੁਟਿਭੂਮਿ ਯਸ੍ਸਾ ਜਹਿਤਵਤ੍ਥੁਕਾ. ਪਰਿਕ੍ਖਿਤ੍ਤੇ ਜਹਿਤਵਤ੍ਥੁਕਾਤਿ ਸਮ੍ਬਨ੍ਧੋ. ਸੇਸਾਤਿ ਇਤਰਾ ਦ੍ਵੇ ਕੁਟਿਯੋ. ਛਦਨਵਿਬ੍ਭਮਾਤਿ ਛਦਨਸ੍ਸ ਵਿਨਾਸਾ. ਏਤ੍ਥਾਪਿ ‘‘ਜਹਿਤਵਤ੍ਥੁਕਾ’’ਤਿ ਆਨੇਤਬ੍ਬਨ੍ਤਿ.

ਭੂਮਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.