੧੫. ਉਪਜ੍ਝਾਚਰਿਯਵਤ੍ਤਨਿਦ੍ਦੇਸਵਣ੍ਣਨਾ

੧੪੫. ‘‘ਇਦਂ ਤਯਾ ਦੁਕ੍ਕਤਂ, ਦੁਬ੍ਭਾਸਿਤ’’ਨ੍ਤਿਆਦੀਨਿ ਵਤ੍ਵਾ ਚੋਦਨਤੋ, ਅਤ੍ਤਨੋ ਵਜ੍ਜਂ ਅਸ੍ਸਰਨ੍ਤਸ੍ਸ ਸਤੁਪ੍ਪਾਦਵਸੇਨ ਸਾਰਣਤੋ, ਸਮ੍ਮਾ ਪਟਿਪਤ੍ਤਿਯਂ ਸਾਰਣਤੋ ਪਵਤ੍ਤਾਪਨਤੋ ਵਾ ਵਜ੍ਜਾਵਜ੍ਜਂ ਉਪਨਿਜ੍ਝਾਯਤਿ ਭੁਸਂ ਚਿਨ੍ਤੇਤੀਤਿ ਉਪਜ੍ਝਾ. ਉਪਜ੍ਝਾ ਏਵ ਉਪਜ੍ਝਾਯੋ. ‘‘ਏਵਂ ਤਯਾ ਬੁਦ੍ਧਵਚਨਂ ਸਜ੍ਝਾਯਿਤਬ੍ਬਂ, ਏਵਂ ਅਤਿਕ੍ਕਮਿਤਬ੍ਬਂ, ਏਵਂ ਪਟਿਕ੍ਕਮਿਤਬ੍ਬ’’ਨ੍ਤਿਆਦਿਨਾ ਆਚਾਰਸਿਕ੍ਖਾਪਨੇ ਆਚਰਤਿ ਪਵਤ੍ਤਤੀਤਿ ਆਚਰਿਯੋ. ਸੋ ਚ ਨਿਸ੍ਸਯਪਬ੍ਬਜ੍ਜਾਉਪਸਮ੍ਪਦਾਧਮ੍ਮਾਚਰਿਯਵਸੇਨ ਚਤੁਬ੍ਬਿਧੋ. ਉਪਜ੍ਝਾ ਚ ਆਚਰਿਯੋ ਚ ਉਪਜ੍ਝਾਚਰਿਯਾ, ਤੇ. ਨਿਸ੍ਸਾਯ ਵਸਮਾਨੋਤਿ ਇਮਿਨਾ ਨਿਸ੍ਸਯਪਬ੍ਬਜ੍ਜਾਉਪਸਮ੍ਪਦਾਧਮ੍ਮਨ੍ਤੇਵਾਸਿਕੇਸੁ ਯੋ ਨਿਸ੍ਸਾਯ ਵਸਤਿ, ਤਂ ਦਸ੍ਸੇਤਿ. ਚਤੂਸੁ ਹਿ ਤੇਸੁ ਨਿਸ੍ਸਯਨ੍ਤੇਵਾਸਿਕੇਨ ਯਾਵ ਆਚਰਿਯਂ ਨਿਸ੍ਸਾਯ ਵਸਤਿ, ਤਾਵਸਬ੍ਬਂ ਆਚਰਿਯਵਤ੍ਤਂ ਕਾਤਬ੍ਬਂ, ਨੇਤਰੇਹਿ. ਇਤਰੇਹਿ, ਨਿਸ੍ਸਯਮੁਤ੍ਤਕੇਹਿਪਿ ਯਾਵ ਚੀਵਰਰਜਨਂ, ਤਾਵ ਚ ਅਰਤਿਵਿਨੋਦਨਾਦਿਕਞ੍ਚ ਵਤ੍ਤਂ ਕਾਤਬ੍ਬਂ. ਅਨਾਪੁਚ੍ਛਿਤ੍ਵਾ ਪਤ੍ਤਚੀਵਰਦਾਨਾਦਿਮ੍ਹਿ ਪਨ ਏਤੇਸਂ ਅਨਾਪਤ੍ਤਿ. ਸਦ੍ਧਿਵਿਹਾਰਿਕਸ੍ਸ ਪਨ ਉਪਜ੍ਝਾਯਾਨਂ ਯਾਵ ਚੀਵਰਰਜਨਂ, ਤਾਵ ਚ ਅਰਤਿਵਿਨੋਦਨਾਦਿਕਞ੍ਚ ਅਕਰੋਨ੍ਤਸ੍ਸ ਨਿਸ੍ਸਯਮੁਤ੍ਤਕਸ੍ਸਾਪਿ ਅਮੁਤ੍ਤਕਸ੍ਸਾਪਿ ਆਪਤ੍ਤਿਯੇਵ. ਏਕਚ੍ਚਸ੍ਸ ਪਤ੍ਤਦਾਨਾਦਿਤੋ ਪਟ੍ਠਾਯ ਅਮੁਤ੍ਤਨਿਸ੍ਸਯਸ੍ਸੇਵ ਆਪਤ੍ਤਿ. ਤੇਸੁ ਮਜ੍ਝੇ ਦ੍ਵੇ ਆਚਰਿਯਸ੍ਸ ਯਾਵਜੀਵਂ ਭਾਰਾ. ਇਤਰੇ ਪਨ ਯਾਵ ਸਮੀਪੇ ਵਸਨ੍ਤਿ, ਤਾਵਦੇਵ, ਤਸ੍ਮਾ ਆਚਰਿਯੇਨਾਪਿ ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕੇਸੁ ਵਤ੍ਤਬ੍ਬਮੇਵ ਨਤ੍ਥਿ. ਸੁਪੇਸਲੋਤਿ ਪਿਯਂ ਸੀਲਮਸ੍ਸਾਤਿ ਪੇਸਲੋ, ਵੁਦ੍ਧਿ, ਯ-ਲੋਪੇਨ ਈ-ਕਾਰਸ੍ਸ ਅਤ੍ਤਕਰਣੇਨ, ਸੁਟ੍ਠੁ ਪੇਸਲੋ ਸੁਪੇਸਲੋ, ਸਿਕ੍ਖਾਕਾਮੋਤਿ ਅਤ੍ਥੋ. ‘‘ਦਨ੍ਤਕਟ੍ਠ’’ਨ੍ਤਿਆਦਿ ‘‘ਦਦੇ’’ਤਿਮਸ੍ਸ ਕਮ੍ਮਂ. ਦਦੇਤਿ ਸਮ੍ਮਾ ਆਦਰੇਨ ਯਥਾਧਿਪ੍ਪਾਯਂ ਦਦੇਯ੍ਯਾਤਿ ਅਤ੍ਥੋ. ਕਾਲੇਤਿ ਤਦਨੁਰੂਪੇ ਕਾਲੇ.

੧੪੬. ਪਤ੍ਤੇ ਚ…ਪੇ… ਚੀਵਰੇ ਚ ਵਤ੍ਤਂ ਚਰੇਤਿ ਸਮ੍ਬਨ੍ਧੋ. ਚਰੇਤਿ ਕਰੇਯ੍ਯ. ਤਤ੍ਥ ਨੀਚਂ ਕਤ੍ਵਾ ਸਾਧੁਕਂ ਅਪਰਿਘਂਸਨ੍ਤੇਨ ਧੋਵਨਂ, ਮੁਹੁਤ੍ਤਂ ਉਣ੍ਹੇ ਓਤਾਪਨਂ, ਠਪਨਟ੍ਠਾਨਂ ਉਪਪਰਿਕ੍ਖਿਤ੍ਵਾ ਚਮ੍ਮਾਦਿਨਾ ਕੇਨਚਿ ਅਨ੍ਤਰਹਿਤਾਯ ਨਿਕ੍ਖਿਪਨਂ ਪਤ੍ਤੇ ਵਤ੍ਤਂ. ਗਾਮਂ ਪਵਿਸਨ੍ਤਾਨਂ ਨਿਵਾਸਨਕਾਯਬਨ੍ਧਨਸਙ੍ਘਾਟਿਦਾਨਂ, ਧੋਵਿਤ੍ਵਾ ਸੋਦਕਪਤ੍ਤਸ੍ਸ ਦਾਨਂ ਗਾਮਪ੍ਪਵੇਸੇ ਵਤ੍ਤਂ. ਯਦਿ ਆਕਙ੍ਖਨ੍ਤਿ, ਪਰਿਮਣ੍ਡਲਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਨਾਤਿਦੂਰਨਚ੍ਚਾਸਨ੍ਨੇ ਗਮਨਂ, ਪਤ੍ਤਪਰਿਯਾਪਨ੍ਨਗ੍ਗਹਣਞ੍ਚ ਗਮਨੇ ਵਤ੍ਤਂ. ਨਿਵਤ੍ਤੇਨ੍ਤੇ ਪਨ ਪਠਮਤਰਂ ਆਗਨ੍ਤ੍ਵਾ ਆਸਨਪਞ੍ਞਾਪਨਂ, ਪਾਦੋਦਕਾਦਿਉਪਨਿਕ੍ਖਿਪਨਂ, ਪਤ੍ਤਚੀਵਰਪ੍ਪਟਿਗ੍ਗਹਣਂ ਆਗਮੇ ਆਗਮਨੇ ਵਤ੍ਤਂ. ਭਣਨ੍ਤਾਨਂ ਅਨ੍ਤਰਾ ਕਥਾਅਨੋਪਾਤਨਂ ਸਬ੍ਬਤ੍ਥ ਵਤ੍ਤਂ. ਆਸਨਪਞ੍ਞਾਪਨਂ, ਉਟ੍ਠਿਤੇਸੁ ਆਸਨਉਦ੍ਧਰਣਂ, ਪਾਦਪੀਠਕਥਲਾਨਂ ਉਪਨਿਕ੍ਖਿਪਨਂ, ਪਟਿਸਾਮਨਞ੍ਚ ਆਸਨੇ ਪਾਦਪੀਠੇ ਪਾਦਕਥਲੇ ਚ ਵਤ੍ਤਂ. ਧੋਤਪਾਦਟ੍ਠਪਨਕਂ ਪਾਦਪੀਠਂ. ਅਞ੍ਞਂ ਕਥਲਂ. ਉਪਾਹਨਾ ਚ ਚੀਵਰਞ੍ਚਾਤਿ ਦ੍ਵਨ੍ਦੋ, ਤਸ੍ਮਿਂ. ਸੁਕ੍ਖਅਲ੍ਲਚੋਲ਼ੇਹਿ ਪੁਞ੍ਛਨਂ ਉਪਾਹਨਾਯ ਵਤ੍ਤਂ. ਸਿਨ੍ਨਚੀਵਰਸ੍ਸ ਮੁਹੁਤ੍ਤਂ ਓਤਾਪਨਂ, ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਸਂਹਰਣਞ੍ਚ ਚੀਵਰੇ ਵਤ੍ਤਂ.

੧੪੭. ਪਰਿਭੋਜਨੀਯ…ਪੇ… ਪਸ੍ਸਾਵਟ੍ਠਾਨਿਸੁ ਚ ਵਿਹਾਰਸੋਧਨੇ ਚ ਪੁਨ ਪਞ੍ਞਾਪਨੇ ਚ ਵਤ੍ਤਂ ਤਥਾਤਿ ਸਮ੍ਬਨ੍ਧੋ. ਵਚ੍ਚਞ੍ਚ ਪਸ੍ਸਾਵੋ ਚ ਵਚ੍ਚਪਸ੍ਸਾਵਾ. ਤਿਟ੍ਠਤਿ ਏਤ੍ਥਾਤਿ ਠਾਨੀ, ਕੁਟਿ. ਵਚ੍ਚਪਸ੍ਸਾਵਾਨਂ ਠਾਨੀਤਿ ਤਪ੍ਪੁਰਿਸੋ. ਅਥ ਵਾ ਤਿਟ੍ਠਤਿ ਏਤ੍ਥਾਤਿ ਠਾਨਂ, ਸੋਯੇਵ ਸਮਾਸੋ, ਵਚ੍ਚਪਸ੍ਸਾਵਸ੍ਸ ਚ ਪਤਨਟ੍ਠਾਨਂ, ਤਂ ਅਸ੍ਸ ਅਤ੍ਥੀਤਿ ਇਟ੍ਠਗੇਹਾਦਿ. ਪਰਿਭੋਜਨੀਯਞ੍ਚ ਪਾਨੀਯਞ੍ਚ ਵਚ੍ਚਪਸ੍ਸਾਵਟ੍ਠਾਨੀ ਚ ਪਰਿ…ਪੇ… ਟ੍ਠਾਨੀ. ਤਾਸੁ ਤੇਸੁ ਵਾ. ਪਾਦੋਦਕਉਣ੍ਹਸੀਤਨਹਾਨੋਦਕਪ੍ਪਟਿਯਾਦਾਪਨਂ ਪਰਿਭੋਜਨੀਯੇ ਵਤ੍ਤਂ. ਪਾਤਬ੍ਬਪਾਨੀਯੇਨ ਪੁਚ੍ਛਨਂ ਉਪਟ੍ਠਾਪਨਞ੍ਚ ਪਾਨੀਯੇ ਵਤ੍ਤਂ. ਸਮ੍ਮਜ੍ਜਨਪਾਨੀਯਉਪਟ੍ਠਾਪਨਂ ਵਚ੍ਚਪਸ੍ਸਾਵਟ੍ਠਾਨੀਸੁ ਵਤ੍ਤਂ. ਪਠਮਂ ਪਤ੍ਤਚੀਵਰਾਦੀਨਿ ਹਰਾਪੇਤ੍ਵਾ ਏਕਮਨ੍ਤੇ ਨਿਕ੍ਖਿਪਨਾਦਿ, ਉਲ੍ਲੋਕਤੋ ਪਟ੍ਠਾਯ ਮਕ੍ਕਟਸਨ੍ਤਾਨਂ ਓਹਾਰੇਤ੍ਵਾ ਸਮ੍ਮਜ੍ਜਨਞ੍ਚ ਵਿਹਾਰਸੋਧਨੇ ਵਤ੍ਤਂ. ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਭੂਮਤ੍ਥਰਣਾਦਿਪਞ੍ਞਾਪਨਂ ਪੁਨ ਪਞ੍ਞਾਪਨੇ ਵਤ੍ਤਂ. ਤਥਾਤਿ ਇਮਿਨਾ ‘‘ਚਰੇ’’ਤਿ ਇਦਂ ਅਤਿਦਿਸਤਿ.

੧੪੮. ਵਿਹਾਰਂ ਸੋਧੇਨ੍ਤੋ ਭਿਕ੍ਖੁ ਪਟਿਵਾਤੇ ਵਾ ਸਙ੍ਗਣੇ ਵਾ ਪਾਨੀਯਸਾਮਨ੍ਤਾ ਵਾ ਸਯਨਾਸਨਂ ਨ ਪਪ੍ਫੋਟੇਯ੍ਯਾਤਿ ਸਮ੍ਬਨ੍ਧੋ. ਪਾਨੀਯ-ਸਦ੍ਦੇਨ ਪਰਿਭੋਜਨੀਯਞ੍ਚ ਸਙ੍ਗਹਿਤਂ. ਪਟਿਵਾਤੇਤਿ ਉਪਰਿਵਾਤੇ. ਸਙ੍ਗਣੇਤਿ ਬਹੂਨਂ ਸਮੋਸਰਣੇ ਵਿਵਟਪ੍ਪਦੇਸੇ. ਸਯਨਾਸਨਂ ਨਾਮ ਭੂਮਤ੍ਥਰਣਮਞ੍ਚਾਦਿ.

੧੪੯. ਨ੍ਹਾਨੇ ਵਤ੍ਤਂ ਚਰੇ, ਨ੍ਹਾਤਸ੍ਸ ਕਾਤਬ੍ਬੇ ਚਰੇਤਿ ਸਮ੍ਬਨ੍ਧਸ੍ਸ ਪੁਰਿਸਾਧੀਨਤਾਯ ਸਮ੍ਬਨ੍ਧੋ ਵੇਦਿਤਬ੍ਬੋ. ਚੀਵਰਪ੍ਪਟਿਗ੍ਗਹਣਗਤ੍ਤਪਰਿਕਮ੍ਮਕਰਣਂ ਨਹਾਨੇ ਵਤ੍ਤਂ. ਕਾਤਬ੍ਬੇ ਚਰੇਤਿ ਗਤ੍ਤਤੋ ਉਦਕਸਮ੍ਮਜ੍ਜਨਨਿਵਾਸਨਦਾਨਾਦਿਕਿਚ੍ਚੇ ਪਵਤ੍ਤੇਯ੍ਯਾਤਿ ਅਤ੍ਥੋ. ‘‘ਵਨਪ੍ਪਗੁਮ੍ਬੇ’’ਤਿਆਦੀਸੁ ਵਿਯ ਸਿਸ੍ਸ ਏ-ਕਾਰਾਦੇਸਂ ਰੂਪਂ, ਤਸ੍ਮਾ ਕਾਤਬ੍ਬਂ ਵਤ੍ਤਂ ਚਰੇਯ੍ਯਾਤਿ ਯੋਜੇਤ੍ਵਾ ਵੇਦਿਤਬ੍ਬਂ. ਬੁਧਾ ਪਨ ‘‘ਨ੍ਹਾਨੇ ਨ੍ਹਾਤਸ੍ਸ ਕਾਤਬ੍ਬੇ ਵਤ੍ਤਂ ਚਰੇ’’ਤਿ ਯੋਜੇਤ੍ਵਾ ਅਤ੍ਥਂ ਵਦਨ੍ਤਿ. ਏਵਂ ਸਤਿ ਕਾਤਬ੍ਬ-ਸਦ੍ਦਸ੍ਸ ਕਮ੍ਮਸਾਧਨਤ੍ਤਾ ਵਤ੍ਤਮੇਵ ਕਾਤਬ੍ਬਂ ਨਾਮਾਤਿ ‘‘ਵਤ੍ਤੇ ਵਤ੍ਤਂ ਚਰੇ’’ਤਿ ਵੁਤ੍ਤਂ ਵਿਯ ਹੋਤੀਤਿ ਵਿਰੁਜ੍ਝਤਿ. ‘‘ਨਹਾਤੇਨ ਨਹਾਤਸ੍ਸਾ’’ਤਿ ਵਾ ਪਾਠੋ, ਉਦਕੇ ਗਤ੍ਤਪਰਿਕਮ੍ਮੇਨ ਥੇਰਂ ਪਠਮਂ ਨਹਾਪੇਤ੍ਵਾ ਸਯਮ੍ਪਿ ਨਹਾਤੇਨਾਤਿ ਅਤ੍ਥੋ. ਪਾਲ਼ਿਯਮ੍ਪਿ ‘‘ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ’’ਤਿ (ਮਹਾਵ. ੬੭) ਅਤ੍ਥਿ. ਅਥ ਰਙ੍ਗਪਾਕੇ ਧੋਵਨੇ ਸਿਬ੍ਬਨੇ ਚ ਵਤ੍ਤਂ ਚਰੇਤਿ ਸਮ੍ਬਨ੍ਧੋ, ਰਜਨਪਾਕੇ ਚੀਵਰਧੋਵਨੇ ਚੀਵਰਸਿਬ੍ਬਨੇ ਚਾਤਿ ਅਤ੍ਥੋ. ਰਜਨ੍ਤੋ ਚੀਵਰੇ ਥੇਵੇ ਠਿਤੇ ਨ ਵਜੇਤਿ ਸਮ੍ਬਨ੍ਧੋ. ਰਜਨ੍ਤੋਤਿ ਚੀਵਰਂ ਰਜਨ੍ਤੋ. ਥੇਵੇਤਿ ਰਜਨਬਿਨ੍ਦੁਮ੍ਹਿ.

੧੫੦. ਏਕਚ੍ਚਸ੍ਸਾਤਿ ਆਚਰਿਯੁਪਜ੍ਝਾਯਾਨਂ ਵੇਰਿਨੋ ਪੁਗ੍ਗਲਸ੍ਸ ਪਤ੍ਤਂ ਵਾ ਚੀਵਰਾਨਿ ਵਾ ਕਿਞ੍ਚਨਂ ਪਰਿਕ੍ਖਾਰਂ ਵਾ ਨ ਦਦੇਯ੍ਯ ਨ ਗਣ੍ਹੇਯ੍ਯ ਵਾਤਿ ਸਮ੍ਬਨ੍ਧੋ. ਤਤ੍ਥ ਨ ਦਦੇਯ੍ਯ ਨ ਗਣ੍ਹੇਯ੍ਯਾਤਿ ਪਟਿਸਾਮਨਤ੍ਥਾਯਪਿ ਨ ਦਦੇਯ੍ਯ, ਨ ਗਣ੍ਹੇਯ੍ਯ ਵਾਤਿ ਅਤ੍ਥੋ. ‘‘ਆਕਿਞ੍ਚਨ’’ਨ੍ਤਿਆਦੀਸੁ ਵਿਯ ਕਿਞ੍ਚਨ-ਸਦ੍ਦੋ ਦਟ੍ਠਬ੍ਬੋ, ਤਸ੍ਸ ਕਿਞ੍ਚੀਤਿ ਅਤ੍ਥੋ. ਕਿਞ੍ਚਿਨਨ੍ਤਿ ਵਾ ਪਾਠੋ, ਕਿਞ੍ਚਿ ਨਂ ਪਰਿਕ੍ਖਾਰਨ੍ਤਿ ਯੋਜਨਾ. ਪਦਸਿਦ੍ਧਿਵਸੇਨੇਤ੍ਥ ਨਨ੍ਤਿ ਤ-ਸਦ੍ਦਪ੍ਪਯੋਗੋ ਕਤੋ.

੧੫੧-੨. ਪਚ੍ਛਤੋ ਕਾਤੁਨ੍ਤਿ ਪਚ੍ਛਾਸਮਣਂ ਕਾਤੁਂ. ਤਸ੍ਸਾਤਿ ਏਕਚ੍ਚਸ੍ਸ. ਪਚ੍ਛਤੋਤਿ ਪਚ੍ਛਾਸਮਣੋ ਹੁਤ੍ਵਾ. ਨਿਨ੍ਨੇਤੁਨ੍ਤਿ ਏਕਚ੍ਚਸ੍ਸ ਨੀਹਰਿਤੁਂ. ਸਬ੍ਬਤ੍ਥ ਅਨਾਪੁਚ੍ਛਾ ਨ ਵਟ੍ਟਤੀਤਿ ਯੋਜੇਤਬ੍ਬਂ. ਕਿਚ੍ਚਯਂ ਵਾਤਿ ਵੇਯ੍ਯਾਵਚ੍ਚਾਦਿ ਯਂ ਕਿਞ੍ਚਿ ਕਿਚ੍ਚਂ ਵਾ. ਕਿਚ੍ਚਮੇਵ ਕਿਚ੍ਚਯਂ, ਕਸ੍ਸ ਯੋ ‘‘ਸੇਨਿਯੋ’’ਤਿਆਦੀਸੁ ਵਿਯ. ਪਰਿਕਮ੍ਮਂ ਵਾਤਿ ਪਿਟ੍ਠਿਪਰਿਕਮ੍ਮਾਦਿਪਰਿਕਮ੍ਮਂ. ਅਤ੍ਤਨੋ ਕਾਰਾਪੇਤੁਂ ਵਾਤਿ ਏਕਚ੍ਚੇਨ ਅਤ੍ਤਨੋ ਕਾਰਾਪੇਤੁਂ ਵਾ. ਕਾਤੁਂ ਵਾਤਿ ਤਸ੍ਸ ਅਤ੍ਤਨਾ ਕਾਤੁਂ ਵਾ.

੧੫੩. ਸੀਮਤੋ ਨਿਗ੍ਗਤਾ ਬਹਿਭੂਤਾ ਨਿਸ੍ਸੀਮਾ, ਤਂ. ਆਚਰਿਯੁਪਜ੍ਝਾਯੇਸੁ ਅਵਤ੍ਵਾ ਦੂਰਂ ਭਿਕ੍ਖਾਚਾਰਂ ਗਤੇਸੁਪਿ ਅਪਸ੍ਸਨ੍ਤੇਨ ਗਾਮੋ ਪਵਿਸਿਤਬ੍ਬੋ. ਦਿਟ੍ਠਟ੍ਠਾਨਤੋ ਪਟ੍ਠਾਯ ਪਨ ਆਪੁਚ੍ਛਿਤੁਂਯੇਵ ਵਟ੍ਟਤਿ. ਅਤ੍ਤਨੋ ਕਿਚ੍ਚਯਂ ਵਾਪੀਤਿ ਅਤ੍ਤਨੋ ਸੀਮਾਯਪਿ ਪਤ੍ਤਪਚਨਚੀਵਰਰਜਨਾਦਿਕਂ ਸਕਂ ਕਰਣੀਯਂ ਵਾਪਿ ਕਾਤੁਂ.

੧੫੪. ਅਰਤਿਨ੍ਤਿ ਸਾਸਨੇ ਅਨਭਿਰਤਿਂ. ਸਙ੍ਘਾਯਤ੍ਤੇਸੁ ਕਮ੍ਮੇਸੂਤਿ ਪਰਿਵਾਸਾਦਿਤਜ੍ਜਨੀਯਾਦੀਸੁ ਸਙ੍ਘਪ੍ਪਟਿਬਦ੍ਧੇਸੁ ਕਮ੍ਮੇਸੁ. ਉਸ੍ਸੁਕ੍ਕਂ ਵਾਪੀਤਿ ਆਚਰਿਯੁਪਜ੍ਝਾਯੇਸੁ ਗਰੁਧਮ੍ਮਂ ਅਜ੍ਝਾਪਨ੍ਨੇਸੁ, ਕਮ੍ਮਾਰਹੇਸੁ ਚ ‘‘ਕਿਨ੍ਤਿ ਨੁ ਖੋ ਸਙ੍ਘੋ ਪਰਿਵਾਸਂ ਦਦੇਯ੍ਯਾ’’ਤਿਆਦਿਨਾ ਉਸ੍ਸਾਹਂ ਵਾਪਿ.

੧੫੫. ਗਿਲਾਨੇਸੁ ਉਪਟ੍ਠੇਯ੍ਯਾਤਿ ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਂ, ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਜਾਨਾਤਿ, ਅਸਪ੍ਪਾਯਂ ਅਪਨਾਮੇਤਿ, ਸਪ੍ਪਾਯਂ ਉਪਨਾਮੇਤਿ, ਮੇਤ੍ਤਚਿਤ੍ਤੋ ਗਿਲਾਨਂ ਉਪਟ੍ਠਾਤਿ ਨੋ ਆਮਿਸਨ੍ਤਰੋ, ਅਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁ’’ਨ੍ਤਿ (ਮਹਾਵ. ੩੬੬) ਏਵਂ ਵੁਤ੍ਤਪਞ੍ਚਙ੍ਗਸਮਨ੍ਨਾਗਤੇਨ ਹੁਤ੍ਵਾ ਗਿਲਾਨੇਸੁ ਉਪਟ੍ਠਹੇਯ੍ਯਾਤਿ ਅਤ੍ਥੋ. ਇਮਿਨਾ ਸਬ੍ਬੇਹਿਪਿ ਆਚਰਿਤਬ੍ਬਂ ਗਿਲਾਨਵਤ੍ਤਂ ਉਪਦਿਸਤਿ. ਵੁਟ੍ਠਾਨਨ੍ਤਿ ਗੇਲਞ੍ਞਾ ਵੁਟ੍ਠਿਤਂ. ਆਗਮੇਤਿ ਆਗਮੇਯ੍ਯ, ਓਲੋਕੇਯ੍ਯਾਤਿ ਅਤ੍ਥੋ. ਉਪਜ੍ਝਾਚਰਿਯੇਹਿ ਚ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕੇਸੁ ਯਦਿ ਤੇ ਗਿਲਾਨਾ ਹੋਨ੍ਤਿ, ਆਦਿਤੋ ਪਟ੍ਠਾਯ ਚੀਵਰੇ ਰਜਨਪਰਿਯੋਸਾਨਞ੍ਚ ਅਰਤਿਵਿਨੋਦਨਾਦਿਕਞ੍ਚ ਵਤ੍ਤਂ, ਅਗਿਲਾਨੇਸੁ ਪਨ ਉਦ੍ਦੇਸਪਰਿਪੁਚ੍ਛਾ ਓਵਾਦਾਨੁਸਾਸਨਿਯਾ ਅਨੁਗ੍ਗਹੋਪਤ੍ਤਚੀਵਰਾਦਿਦਾਨਞ੍ਚਾਤਿ ਸਬ੍ਬਂ ਕਾਤਬ੍ਬਂ. ਤੇਨੇਵ ਹੇਟ੍ਠਾ ਵੁਤ੍ਤਂ ‘‘ਤਸ੍ਮਾ ਆਚਰਿਯੇਨਾਪਿ ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕੇਸੁ ਵਤ੍ਤਬ੍ਬਮੇਵ ਨਤ੍ਥੀ’’ਤਿ.

ਉਪਜ੍ਝਾਚਰਿਯਵਤ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.