੧੩. ਸਮਣਕਪ੍ਪਨਿਦ੍ਦੇਸਵਣ੍ਣਨਾ

੧੨੫. ਸਮਣਕਪ੍ਪਾਤਿ ਸਮਣਵੋਹਾਰਾ. ਭਵਨ੍ਤਿ, ਅਹੇਸੁਨ੍ਤਿ ਵਾ ਭੂਤਾ, ਵਤ੍ਤਮਾਨੇ, ਭੂਤੇ ਵਾ ਤਪ੍ਪਚ੍ਚਯੋ. ਵਿਰੁਲ਼੍ਹਮੂਲਾਦਿਭਾਵਂ ਆਪਜ੍ਜਿਤ੍ਵਾ ਵਡ੍ਢਮਾਨਕਾਨਂ, ਵਡ੍ਢਿਤ੍ਵਾ ਮਹਨ੍ਤਭਾਵਂ ਪਤ੍ਤਾਨਞ੍ਚ ਰੁਕ੍ਖਲਤਾਦਿਸਙ੍ਖਾਤਾਨਂ ਭੂਤਾਨਂ ਗਾਮੋ, ਭੂਤਾ ਏਵ ਵਾ ਗਾਮੋ ਸਮੂਹੋ ਭੂਤਗਾਮੋ. ਤਸ੍ਸ ਸਮਾਰਮ੍ਭੋ ਛੇਦਨਫਾਲਨਾਦਿ, ਤਸ੍ਮਿਂ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਂ, ਤਂਹੇਤੁ ਪਾਚਿਤ੍ਤਿਯਂ ਹੋਤੀਤਿ ਅਤ੍ਥੋ. ਕਤਕਪ੍ਪਿਯਂ ਸਮਣਕਪ੍ਪਿਯਂ ਭਵੇਤਿ ਸਮ੍ਬਨ੍ਧੋ. ਤਤ੍ਥ ਕਤਂ ਕਪ੍ਪਿਯਂ ਯਸ੍ਸਾਤਿ ਬਹੁਬ੍ਬੀਹਿ. ਕੇਨਾਤਿ ਆਹ ‘‘ਨਖੇਨਾ’’ਤਿਆਦਿ.

੧੨੬. ਇਦਾਨਿ ਯਸ੍ਸ ਸਮਾਰਮ੍ਭੋ, ਤਂ ਭੂਤਗਾਮਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਸ ਮੂਲਾ’’ਤਿਆਦਿ ਆਰਦ੍ਧਂ. ਸੋਤਿ ਭੂਤਗਾਮੋ. ਭਵਿਤੁਂ ਉਪ੍ਪਜ੍ਜਿਤੁਂ ਪਯੋਜੇਤੀਤਿ ਕਾਰਿਤਨ੍ਤਾ ਤਪ੍ਪਚ੍ਚਯੋ, ਪਭਾਵਿਤੋ ਉਪ੍ਪਾਦਿਤੋਤਿ ਅਤ੍ਥੋ. ਅਥ ਵਾ ਪਭਵਨਂ ਪਭਵੋ, ਉਪ੍ਪਤ੍ਤਿ, ਸੋਵ ਪਭਵੋ, ਪਭਾਵਂ ਕਰੋਤੀਤਿ ਨਾਮਧਾਤੁਤੋ ਕਤ੍ਤਰਿ ਤਪ੍ਪਚ੍ਚਯੋ, ਪਭਾਵਿਤੋ ਉਪ੍ਪਨ੍ਨੋਤਿ ਅਤ੍ਥੋ. ਮੂਲਞ੍ਚ ਖਨ੍ਧੋ ਚ ਬੀਜਞ੍ਚ ਅਗ੍ਗਞ੍ਚ ਫਲ਼ੁ ਚ ਮੂਲ…ਪੇ… ਫਲ਼ੂਨਿ. ਫਲ਼ੁ ਨਾਮ ਪਬ੍ਬਂ. ਤਾਨਿਯੇਵ ਬੀਜਾਨਿ, ਤੇਹਿ ਪਭਾਵਿਤੋ ਉਪ੍ਪਾਦਿਤੋ, ਅਥ ਵਾ ਤੇਹਿ ਅਵਧਿਭੂਤੇਹਿ, ਕਾਰਣਭੂਤੇਹਿ ਵਾ ਪਭਾਵਿਤੋ ਉਪ੍ਪਨ੍ਨੋਤਿ ਕਮੇਨ ਵਿਕਪ੍ਪਦ੍ਵਯੇ ਸਮਾਸਦ੍ਵਯਂ ਵੇਦਿਤਬ੍ਬਂ. ਤਤ੍ਥ ਮੂਲਬੀਜਂ ਨਾਮ ਹਲਿਦ੍ਦਿਸਿਙ੍ਗਿਵੇਰਾਦਿ.

ਖਨ੍ਧਬੀਜਂ ਨਾਮ ਅਸ੍ਸਤ੍ਥਨਿਗ੍ਰੋਧਾਦਿ. ਬੀਜਬੀਜਂ ਨਾਮ ਪੁਬ੍ਬਣ੍ਣਾਪਰਣ੍ਣਾਦਿ. ਅਗ੍ਗਬੀਜਂ ਨਾਮ ਹਿਰਿਵੇਰਾਦਿ. ਫਲ਼ੁਬੀਜਂ ਨਾਮ ਉਚ੍ਛੁਨਲ਼ਾਦਿ. ਤਤ੍ਥ ਮੂਲਬੀਜਾਦੀਨਿ ਪਞ੍ਚ ਬੀਜਗਾਮੋ. ਤਨ੍ਨਿਬ੍ਬਤ੍ਤੋ ਰੁਕ੍ਖਲਤਾਦਿ ਭੂਤਗਾਮੋ.

ਇਦਾਨਿ ਤੇਸੁ ਬੀਜਗਾਮਸਮਾਰਮ੍ਭੇ ਦੁਕ੍ਕਟਂ ਦਸ੍ਸੇਤਿ ਅਪਰਦ੍ਧੇਨ. ਭੂਤਗਾਮਵਿਯੋਜਿਤਂ ਬੀਜਂ ਆਰਮ੍ਭੇ ਦੁਕ੍ਕਟਨ੍ਤਿ ਸਮ੍ਬਨ੍ਧੋ. ਭੂਤਗਾਮਤੋ ਵਿਯੋਜਿਤਨ੍ਤਿ ਤਪ੍ਪੁਰਿਸੋ. ਬੀਜਨ੍ਤਿ ਭੂਮਿਯਂ ਰੋਪਿਤਮਰੋਪਿਤਮ੍ਪਿ ਨਿਗ੍ਗਤਵਿਦਤ੍ਥਿਮਤ੍ਤਪਤ੍ਤਵਟ੍ਟਿਪਿ ਮੂਲਬੀਜਾਨਿ. ‘‘ਆਰਮ੍ਭੇ’’ਤਿ ਕਿਤਕਪਚ੍ਚਯਸ੍ਸ ਯੋਗੇ ਅਵੁਤ੍ਤੇ ਕਮ੍ਮਨਿ ਛਟ੍ਠੁਪ੍ਪਤ੍ਤਿਯਂ ਵਿਕਪ੍ਪੇਨ ਉਭਯਤ੍ਥ ਦੁਤਿਯਾ. ਆਰਮ੍ਭੇਤਿ ਸਮਾਰਮ੍ਭੇ. ਤਸ੍ਮਾ ‘‘ਇਮਂ ਪੁਪ੍ਫਂ ਫਲਂ ਵਾ ਜਾਨ, ਇਮਂ ਕਪ੍ਪਿਯਂ ਕਰੋਹੀ’’ਤਿਆਦਿਨਾ ਕਪ੍ਪਿਯਵਚਨੇਨ ਭੂਤਗਾਮਤੋ ਵਿਯੋਜਿਤਂ ਬੀਜਜਾਤਂ ਬੀਜਗਾਮਪਰਿਮੋਚਨਤ੍ਥਂ ਪੁਨ ਕਪ੍ਪਿਯਂ ਕਾਰਾਪੇਤ੍ਵਾ ਪਰਿਭੁਞ੍ਜਿਭਬ੍ਬਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁਂ ਅਗ੍ਗਿਪਰਿਜਿਤਂ ਸਤ੍ਥਪਰਿਜਿਤਂ ਨਖਪਰਿਜਿਤਂ ਅਬੀਜਂ ਨਿਬ੍ਬਤ੍ਤਬੀਜਞ੍ਞੇਵ ਪਞ੍ਚਮ’’ਨ੍ਤਿ (ਚੂਲ਼ਵ. ੨੫੦) ਵੁਤ੍ਤੇਸੁ ਪਞ੍ਚਸੁ ਨਖਪਰਿਜਿਤਾਦੀਨਿ ਤੀਣਿ ਦਸ੍ਸਿਤਾਨਿ.

੧੨੭. ਇਦਾਨਿ ਅਵਸਿਟ੍ਠਾਨਿ ਦ੍ਵੇ ਦਸ੍ਸੇਤੁਂ ‘‘ਨਿਬ੍ਬਤ੍ਤਬੀਜ’’ਨ੍ਤਿਆਦਿਕਂ ਪਠਮਦ੍ਧਂ ਆਹ. ਤਤ੍ਥ ਨਿਬ੍ਬਤ੍ਤਬੀਜਨ੍ਤਿ ਨਿਬ੍ਬਤ੍ਤਨਿਯਨ੍ਤਿ ਨਿਬ੍ਬਤ੍ਤਂ, ਨਿਪੁਬ੍ਬ ਵਤੁ ਵਤ੍ਤਨੇਤਿਮਸ੍ਮਾ ਤਪ੍ਪਚ੍ਚਯੋ, ਨਿਬ੍ਬਤ੍ਤਂ ਬੀਜਂ ਯਸ੍ਸ ਤਂ ਨਿਬ੍ਬਤ੍ਤਬੀਜਂ, ਬੀਜਂ ਨਿਬ੍ਬਤ੍ਤੇਤ੍ਵਾ ਵਿਸੁਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ ਅਮ੍ਬਪਨਸਾਦਿ. ਨੋਬੀਜਂ ਨਾਮ ਤਰੁਣਮ੍ਬਫਲਾਦਿ. ਇਦਾਨਿ ਬੀਜਗਾਮਭੂਤਗਾਮੇਸੁ ਕਪ੍ਪਿਯਕਰਣਪ੍ਪਕਾਰਾਦਿਵਿਸੇਸਂ ਦਸ੍ਸੇਨ੍ਤੋ ‘‘ਕਟਾਹਾ’’ਤਿਆਦਿਮਾਹ. ਤਤ੍ਥ ਕਟਾਹੇਨ ਬਦ੍ਧਂ ਬੀਜਂ ਯੇਸਨ੍ਤਿ ਬਾਹਿਰਤ੍ਥੋ.

੧੨੮. ਭਾਜਨੇ ਭੂਮਿਯਮ੍ਪਿ ਵਾ ਏਕਾਬਦ੍ਧੇਸੁ ਬੀਜੇਸੁ ਏਕਸ੍ਮਿਞ੍ਚ ਕਪ੍ਪਿਯੇ ਕਤੇਤਿ ਯੋਜਨਾ. ਬੀਜੇਸੂਤਿ ਬੀਜਗਾਮਭੂਤਗਾਮੇਸੁ. ਭੂਤਗਾਮੋਪਿ ਹਿ ਇਧ ‘‘ਬੀਜ’’ਨ੍ਤਿ ਰੁਲ਼੍ਹੀਵਸੇਨ ਵੁਚ੍ਚਤਿ.

੧੨੯. ਨਿਕ੍ਖਿਤ੍ਤੇਤਿ ਠਪਿਤੇ. ਕਪ੍ਪਿਯਂ ਪੁਨ ਕਰੇਯ੍ਯਾਤਿ ਜਾਤਮੂਲਪਣ੍ਣਭਾਵਤੋ ਭੂਤਗਾਮਤ੍ਤਾ ਭੂਤਗਾਮਤੋ ਪਰਿਮੋਚਿਤਂ ਬੀਜਗਾਮਪਰਿਮੋਚਨਤ੍ਥਂ ਪੁਨ ਕਪ੍ਪਿਯਂ ਕਾਰੇਯ੍ਯਾਤਿ ਅਤ੍ਥੋ. ਤੇਨਾਹ ‘‘ਭੂਤਗਾਮੋ ਹਿ ਸੋ ਤਦਾ’’ਤਿ. ਹਿ-ਸਦ੍ਦੋ ਹੇਤੁਮ੍ਹਿ. ਤਦਾਤਿ ਮੂਲੇ ਚ ਪਣ੍ਣੇ ਚ ਜਾਤਕਾਲੇ ਸਚੇ ਮੂਲਮਤ੍ਤਂ ਸਞ੍ਜਾਯਤਿ, ਉਪਰਿਭਾਗੇ ਸਚੇ ਅਙ੍ਕੁਰੋ ਜਾਯਤਿ, ਹੇਟ੍ਠਾਭਾਗੇ ਛਿਨ੍ਦਿਤੁਂ ਵਟ੍ਟਤਿ. ਮੂਲਮਤ੍ਤੇਸੁ ਵਾ ਪਨ ਪਣ੍ਣਮਤ੍ਤੇਸੁ ਵਾ ਨਿਗ੍ਗਤੇਸੁ ਸਚੇਪਿ ਰਤਨਪ੍ਪਮਾਣਾਪਿ ਸਾਖਾ ਨਿਕ੍ਖਮਨ੍ਤਿ, ਬੀਜਗਾਮਸਙ੍ਗਹਿਤਾ ਹੋਨ੍ਤਿ.

੧੩੦. ਉਦਕਸਮ੍ਭਵੋ ਸੇਵਾਲੋ ਚ ਚੇਤਿਯਾਦੀਸੁ ਸੇਵਾਲੋ ਚ ਭੂਤਗਾਮੋਵਾਤਿ ਸਮ੍ਬਨ੍ਧੋ. ਆਦਿ-ਸਦ੍ਦੇਨ ਪਾਕਾਰਾਦਿਗ੍ਗਹਣਂ. ਯਦਿ ਦ੍ਵੇ ਤੀਣਿ ਪਣ੍ਣਾਨਿ ਨ ਜਾਯਨ੍ਤਿ, ਅਗ੍ਗਬੀਜਸਙ੍ਗਹਂ ਗਚ੍ਛਤਿ. ਸੁਕ੍ਖੋ ਪਨ ਸਮ੍ਮਜ੍ਜਿਤਬ੍ਬੋ. ਮੂਲਪਣ੍ਣੇ ਵਿਨਿਗ੍ਗਤੇ ਬੀਜੋਪਿ ਭੂਤਗਾਮੋਵਾਤਿ ਸਮ੍ਬਨ੍ਧੋ. ਪਣ੍ਣੇਤਿ ਇਮਿਨਾ ਅਙ੍ਕੁਰਮਤ੍ਤਂ ਪਟਿਕ੍ਖਿਪਤਿ.

੧੩੧. ਘਟਾਦਿਪਿਟ੍ਠੇ ਸੇਵਾਲੋ ਚ ਅਹਿਛਤ੍ਤਕਮਕੁਲ਼ਞ੍ਚ ਦੁਕ੍ਕਟਸ੍ਸੇਵ ਵਤ੍ਥੂਨੀਤਿ ਸਮ੍ਬਨ੍ਧੋ. ਪਿਟ੍ਠੇਤਿ ਇਮਿਨਾ ਅਨ੍ਤੋ ਅਬ੍ਬੋਹਾਰਿਕੋਤਿ ਦਸ੍ਸੇਤਿ. ਫੁਲ੍ਲਨ੍ਤਿ ਫੁਲ੍ਲਿਤਂ ਅਹਿਛਤ੍ਤਕਂ. ਅਬ੍ਯਵਹਾਰਿਕਨ੍ਤਿ ਆਪਤ੍ਤਿਵੋਹਾਰਯੋਗ੍ਗਂ ਨ ਹੋਤੀਤਿ ਅਤ੍ਥੋ.

੧੩੨. ਅਲ੍ਲਰੁਕ੍ਖੇ ਲਾਖਾਨਿਯ੍ਯਾਸਛਤ੍ਤਾਨਿ ਵਿਕੋਪਿਯ ਗਣ੍ਹਤੋ ਤਤ੍ਥ ਅਕ੍ਖਰਂ ਛਿਨ੍ਦਤੋ ਵਾਪਿ ਪਾਚਿਤ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਅਲ੍ਲਰੁਕ੍ਖੇ. ‘‘ਵਿਕੋਪਯ’’ਨ੍ਤਿ ਪੋਤ੍ਥਕੇਸੁ ਪਾਠੋ ਦਿਸ੍ਸਤਿ, ਸੋ ਅਪਾਠੋ ਪਠਮਨ੍ਤਤਾਯ ਕਾਰਣਾਭਾਵਤੋ. ‘‘ਵਿਕੋਪਿਯਾ’’ਤਿ ਪਨ ਪਾਠੋ ਗਹੇਤਬ੍ਬੋ. ਵਿਕੋਪਿਯਾਤਿ ਇਮਿਨਾ ਅਵਿਕੋਪੇਤ੍ਵਾ ਗਹਣੇ ਅਨਾਪਤ੍ਤੀਤਿ ਦੀਪੇਤਿ.

੧੩੩. ਦਾਰੁਮਕ੍ਕਟਕਾਦਿਨਾਤਿ ਆਣਿਂ ਕੋਟ੍ਟੇਤ੍ਵਾ ਦਾਰੁਯਨ੍ਤਂ ਕਤ੍ਵਾ ਤਤ੍ਥ ਕਣ੍ਟਕਂ ਓਲਮ੍ਬੇਨ੍ਤਿ, ਏਤਂ ਦਾਰੁਮਕ੍ਕਟਕਂ ਨਾਮ. ਆਦਿ-ਸਦ੍ਦੇਨ ਕਣ੍ਟਕਬਨ੍ਧਨਾਦੀਨਂ ਗਹਣਂ. ਤਿਣਾਦਿਂ ਛਿਨ੍ਦਿਤੁਂ, ਗਣ੍ਠਿਕਂ ਕਾਤੁਞ੍ਚ ਨ ਕਪ੍ਪਤੀਤਿ ਯੋਜਨਾ. ਛਿਨ੍ਦਿਤੁਨ੍ਤਿ ਛਿਨ੍ਦਨਂ.

੧੩੪. ਭੂਤਗਾਮਂ ਵਾਤਿ ਭੂਤਗਾਮਂ ਵਾ. ਬੀਜਂ ਵਾਤਿ ਬੀਜਗਾਮਂ ਵਾ. ‘‘ਛਿਨ੍ਦ ਵਾ’’ਤਿਆਦਿਨਾ ਸਬ੍ਬਤ੍ਥ ਵਾ-ਸਦ੍ਦੋ ਯੋਜੇਤਬ੍ਬੋ. ਪਚ ਵਾਤਿ ਪਚਨਂ ਕਰੋਹੀਤਿ ਵਾ. ‘‘ਪਟ’’ ਇਤਿ ਵਾ ਪਾਠੋ, ਤਸ੍ਸ ਉਪ੍ਪਾਦੇਹੀਤਿ ਅਤ੍ਥੋ. ‘‘ਇਮਂ ਰੁਕ੍ਖਂ ਛਿਨ੍ਦਾਹੀ’’ਤਿਆਦਿਨਾ ਪਨ ਅਵਤ੍ਵਾ ‘‘ਰੁਕ੍ਖਂ ਛਿਨ੍ਦਾ’’ਤਿਆਦਿਨਾ ਅਨਿਯਮੇਤ੍ਵਾ ਵਤ੍ਤੁਂ ਵਟ੍ਟਤਿ.

੧੩੫. ਇਮਨ੍ਤਿ ਏਤਂ ਰੁਕ੍ਖਾਦਿਂ. ਇਮਂ ਸੋਧੇਹੀਤਿ ਏਤ੍ਥ ਇਤਿ-ਸਦ੍ਦਂ ਕਤ੍ਵਾ ਅਤ੍ਥੋ ਵਤ੍ਤਬ੍ਬੋਤਿ.

ਸਮਣਕਪ੍ਪਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.