੧. ਪਾਰਾਜਿਕਨਿਦ੍ਦੇਸਵਣ੍ਣਨਾ

੧-੨. ਇਦਾਨਿ ਤੇ ਦਸ੍ਸੇਤੁਂ ‘‘ਮਗ੍ਗਤ੍ਤਯੇ’’ਤਿਆਦਿ ਆਰਦ੍ਧਂ. ਏਵਮੁਪਰਿਪਿ ਯਥਾਯੋਗਂ ਯੋਜੇਤਬ੍ਬਂ. ਤਤ੍ਥ ਮਗ੍ਗਤ੍ਤਯੇਤਿ ਏਤ੍ਥ ਮਗ੍ਗਾ ਚ ਨਾਮ ਤਿਂਸ ਮਗ੍ਗਾ. ਮਨੁਸ੍ਸਾਮਨੁਸ੍ਸਤਿਰਚ੍ਛਾਨਗਤਵਸੇਨ ਹਿ ਤਿਸ੍ਸੋ ਇਤ੍ਥਿਯੋ. ਤਤ੍ਥ ਤਿਰਚ੍ਛਾਨਗਤਾਯ ਅਯਂ ਪਰਿਚ੍ਛੇਦੋ –

‘‘ਅਪਦਾਨਂ ਅਹੀ ਮਚ੍ਛਾ, ਦ੍ਵਿਪਦਾਨਞ੍ਚ ਕੁਕ੍ਕੁਟੀ;

ਚਤੁਪ੍ਪਦਾਨਂ ਮਜ੍ਜਾਰੀ, ਵਤ੍ਥੁ ਪਾਰਾਜਿਕਸ੍ਸਿਮਾ’’ਤਿ. (ਪਾਰਾ. ਅਟ੍ਠ. ੧.੫੫);

ਤਾਸਂ ਵਚ੍ਚਪਸ੍ਸਾਵਮੁਖਮਗ੍ਗਵਸੇਨ ਤਯੋ ਤਯੋ ਕਤ੍ਵਾ ਨਵ ਮਗ੍ਗਾ, ਤਥਾ ਉਭਤੋਬ੍ਯਞ੍ਜਨਕਾਨਂ, ਪੁਰਿਸਾਨਂ ਪਨ ਵਚ੍ਚਮੁਖਮਗ੍ਗਵਸੇਨ ਦ੍ਵੇ ਦ੍ਵੇ ਕਤ੍ਵਾ ਛ, ਤਥਾ ਪਣ੍ਡਕਾਨਨ੍ਤਿ ਤਿਂਸ. ਤੇਸਂ ਤਯੇ. ਕੀਦਿਸੇਤਿ ਆਹ ‘‘ਸਨ੍ਥਤਸਨ੍ਥਤੇ’’ਤਿ. ਸਨ੍ਥਤੇ ਅਸਨ੍ਥਤੇਤਿ ਪਦਚ੍ਛੇਦੋ. ਨ ਸਨ੍ਥਤਂ ਅਸਨ੍ਥਤਂ. ਤਸ੍ਮਿਂ ਅਸਨ੍ਥਤੇ. ਨ-ਕਾਰੋ ਏਤ੍ਥ ‘‘ਅਬ੍ਰਾਹ੍ਮਣੋ’’ਤਿਆਦੀਸੁ ਵਿਯ ਪਯਿਰੁਦਾਸੇ, ਤਂ ਕਿਰਿਯਾਯੁਤ੍ਤਸ੍ਸ ਤਾਦਿਸਸ੍ਸ ਅਞ੍ਞਸ੍ਸ ਵਤ੍ਥੁਨੋ ਵਿਧਾਨੇਨ ਸਨ੍ਥਤਸ੍ਸ ਵਤ੍ਥੁਨੋ ਪਯਿਰੁਦਾਸਨਂ ਪਰਿਚ੍ਚਜਨਂ ਪਯਿਰੁਦਾਸੋਤਿ. ਨ ਪਸਜ੍ਜਪ੍ਪਟਿਸੇਧੇ, ਸਨ੍ਥਤਂ ਪਸਜ੍ਜ ਪਤ੍ਵਾ ਤਸ੍ਸ ‘‘ਬ੍ਰਾਹ੍ਮਣੋ ਨ ਭਵਿਸ੍ਸਤੀ’’ਤਿਆਦੀਸੁ ਵਿਯ ਨ ਨਿਸੇਧੋਤਿ. ਵਾ-ਸਦ੍ਦੋ ਪਨੇਤ੍ਥ ਵਚਨਯੁਤ੍ਤਿਬਲੇਨੇਵ ਲਬ੍ਭਤਿ, ਤਸ੍ਸ ਪਲਿਵੇਠੇਤ੍ਵਾ, ਅਨ੍ਤੋ ਵਾ ਪਵੇਸੇਤ੍ਵਾ ਵਤ੍ਥਾਦਿਨਾ ਕੇਨਚਿ ਪਟਿਚ੍ਛਨ੍ਨੇ ਵਾ ਅਪ੍ਪਟਿਚ੍ਛਨ੍ਨੇ ਵਾਤਿ ਅਤ੍ਥੋ. ਤਥਾਭੂਤੇ ਅਲ੍ਲੋਕਾਸੇ ਪਕਤਿਵਾਤੇਨ ਅਸਮ੍ਫੁਟ੍ਠੇ ਤਿਨ੍ਤਪ੍ਪਦੇਸੇ. ਨਿਮਿਤ੍ਤਨ੍ਤਿ ਅਙ੍ਗਜਾਤਂ. ਸਨ੍ਤਿਆਦਿ ਤਬ੍ਬਿਸੇਸਨਂ. ਸਨ੍ਤਿ ਅਤ੍ਤਨਿਯਂ. ਸਂ-ਸਦ੍ਦੋ ਹਿ ਅਤ੍ਤਨਿ ਅਤ੍ਤਨਿਯੇ ਚ ਵਤ੍ਤਤਿ. ਸਨ੍ਥਤਂ ਅਸਨ੍ਥਤਨ੍ਤਿ ਯਥਾਵੁਤ੍ਤਨਯੇਨ ਪਟਿਚ੍ਛਨ੍ਨਂ ਵਾ ਅਪ੍ਪਟਿਚ੍ਛਨ੍ਨਂ ਵਾ. ਉਪਾਦਿਣ੍ਣਨ੍ਤਿ ਅਨਟ੍ਠਕਾਯਪ੍ਪਸਾਦਂ. ਕਿਤ੍ਤਕਨ੍ਤਿ ਆਹ ‘‘ਤਿਲਮਤ੍ਤਮ੍ਪੀ’’ਤਿ. ਤਿਲਸ੍ਸ ਮਤ੍ਤਂ ਸਾਕਲ੍ਲਂ ਯਸ੍ਸ ਤਂ ਤਿਲਮਤ੍ਤਂ. ‘‘ਮਤ੍ਤਂ ਸਾਕਲ੍ਲਂ ਨਿਚ੍ਛਯੇ’’ਤਿ ਹਿ ਨਿਘਣ੍ਡੁ. ਏਤ੍ਥਾਪਿ ਅਵਯਵੇਨ ਵਿਗ੍ਗਹੋ ਸਮੁਦਾਯੋ ਸਮਾਸਤ੍ਥੋ, ਤਿਲਬੀਜਪ੍ਪਮਾਣਮ੍ਪੀਤਿ ਵੁਤ੍ਤਂ ਹੋਤਿ. ਕਿਂ ਤਂ? ਨਿਮਿਤ੍ਤਂ, ਪਵੇਸਨਂ ਵਾ. ਅਪਿ-ਸਦ੍ਦੋ ਸਮ੍ਭਾਵਨੇ, ‘‘ਤਿਲਬੀਜਮਤ੍ਤਮ੍ਪੀ’’ਤਿ ਸਮ੍ਭਾਵੀਯਤਿ, ਅਧਿਕੇ ਕਾ ਨਾਮ ਕਥਾਤਿ ਇਦਮੇਤ੍ਥ ਸਮ੍ਭਾਵਨਂ, ਏਵਂਭੂਤਂ ਸਂ ਅਙ੍ਗਜਾਤਂ ਯਥਾਵੁਤ੍ਤੇ ਮਗ੍ਗਤ੍ਤਯੇ ਤਿਲਮਤ੍ਤਮ੍ਪਿ ਪਵੇਸਨ੍ਤੋ ਭਿਕ੍ਖੁ ਚੁਤੋ ਪਰਿਭਟ੍ਠੋ, ਪਾਰਾਜਿਕੋ ਨਾਮ ਹੋਤਿ ਸਾਸਨਤੋਤਿ ਵਿਞ੍ਞਾਯਤਿ ਗਮ੍ਮਮਾਨਤ੍ਥਸ੍ਸ ਸਦ੍ਦਸ੍ਸ ਪਯੋਗਂ ਪਤਿ ਕਾਮਾਚਾਰਤ੍ਤਾ. ਕੀਦਿਸੋਤਿ ਆਹ ‘‘ਅਨਿਕ੍ਖਿਤ੍ਤਸਿਕ੍ਖੋ’’ਤਿ. ਨਿਕ੍ਖਿਤ੍ਤਸਿਕ੍ਖੋ ਪਨ ਅਭਿਕ੍ਖੁਕਤ੍ਤਾ ਪਰਿਚ੍ਚਤ੍ਤੋ. ਤਤ੍ਥ ਨਿਕ੍ਖਿਤ੍ਤਾ ਓਹਿਤਾ ਪਰਿਚ੍ਚਤ੍ਤਾ ਪਚ੍ਚਕ੍ਖਾਤਾ ਸਿਕ੍ਖਾ ਏਤੇਨਾਤਿ ਵਿਗ੍ਗਹੋ. ਯਥਾਲਕ੍ਖਣਂ ਨ ਨਿਕ੍ਖਿਤ੍ਤਸਿਕ੍ਖੋ ਅਨਿਕ੍ਖਿਤ੍ਤਸਿਕ੍ਖੋ. ਤਤ੍ਥ ਚਿਤ੍ਤਖੇਤ੍ਤਕਾਲਪ੍ਪਯੋਗਪੁਗ੍ਗਲਵਿਜਾਨਨਵਸੇਨ ਸਿਕ੍ਖਾਪਚ੍ਚਕ੍ਖਾਨਂ ਞਤ੍ਵਾ ਤਦਭਾਵੇਨ ਅਪਚ੍ਚਕ੍ਖਾਨਂ ਵੇਦਿਤਬ੍ਬਂ.

ਤਤ੍ਥ ਉਪਸਮ੍ਪਨ੍ਨਭਾਵਤੋ ਚਵਿਤੁਕਾਮਤਾਚਿਤ੍ਤਂ ਚਿਤ੍ਤਂ ਨਾਮ. ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦੀਨਿ ‘‘ਗਿਹੀਤਿ ਮਂ ਧਾਰੇਹਿ, ਉਪਾਸਕੋ, ਆਰਾਮਿਕੋ, ਸਾਮਣੇਰੋਤਿ ਮਂ ਧਾਰੇਹੀ’’ਤਿ ‘‘ਅਲਂ ਮੇ ਬੁਦ੍ਧੇਨਾ’’ਤਿਆਦੀਨਿ ਛ ਖੇਤ੍ਤਪਦਾਨਿ ਖੇਤ੍ਤਂ ਨਾਮ. ‘‘ਪਚ੍ਚਕ੍ਖਾਮੀ’’ਤਿਆਦਿਨਾ ਵੁਤ੍ਤੋ ਵਤ੍ਤਮਾਨਕਾਲੋਯੇਵ ਕਾਲੋ ਨਾਮ. ਯਾਯ ਕਾਯਚਿ ਭਾਸਾਯ ਵਸੇਨ ਵਾਚਸਿਕਪ੍ਪਯੋਗੋਵ ਪਯੋਗੋ ਨਾਮ. ਅਨੁਮ੍ਮਤ੍ਤਾਦਿਕੋ ਪਚ੍ਚਕ੍ਖਾਤੋ ਚ ਮਨੁਸ੍ਸਜਾਤਿਕੋ ਸੋਵ ਪੁਗ੍ਗਲੋ ਨਾਮ. ਪਚ੍ਚਕ੍ਖਾਤਕਸ੍ਸ ਵਚਨਸਮਨਨ੍ਤਰਮੇਵ ‘‘ਅਯਂ ਉਕ੍ਕਣ੍ਠਿਤੋ’’ਤਿ ਵਾ ‘‘ਗਿਹਿਭਾਵਂ ਪਤ੍ਥਯਤੀ’’ਤਿ ਵਾ ਸੋਤੁਨੋ ਜਾਨਨਂ ਵਿਜਾਨਨਂ ਨਾਮਾਤਿ ਵੇਦਿਤਬ੍ਬਂ.

ਤਤ੍ਥ ਨਟ੍ਠਕਾਯਪ੍ਪਸਾਦਂ ਪਨ ਪਿਲ਼ਕਂ ਵਾ ਚਮ੍ਮਖਿਲਂ ਵਾ ਲੋਮਂ ਵਾ ਪਵੇਸਨ੍ਤਸ੍ਸ ਦੁਕ੍ਕਟਂ. ਅਕ੍ਖਿਨਾਸਕਣ੍ਣਚ੍ਛਿਦ੍ਦਵਤ੍ਥਿਕੋਸੇਸੁ, ਸਤ੍ਥਕਾਦੀਹਿ ਕਤਵਣੇ ਵਾ ਮੇਥੁਨਰਾਗੇਨ ਨਿਮਿਤ੍ਤਂ ਪਵੇਸਨ੍ਤਸ੍ਸ ਥੁਲ੍ਲਚ੍ਚਯਂ. ਅਵਸੇਸਸਰੀਰੇਸੁ ਉਪਕਚ੍ਛਕਾਦੀਸੁ ਦੁਕ੍ਕਟਂ. ਤਿਰਚ੍ਛਾਨਗਤਾਨਂ ਹਤ੍ਥਿਅਸ੍ਸਗੋਗਦ੍ਰਭਓਟ੍ਠਮਹਿਂਸਾਦੀਨਂ ਨਾਸਾਯ ਥੁਲ੍ਲਚ੍ਚਯਂ, ਵਤ੍ਥਿਕੋਸੇ ਥੁਲ੍ਲਚ੍ਚਯਮੇਵ. ਸਬ੍ਬੇਸਮ੍ਪਿ ਤਿਰਚ੍ਛਾਨਗਤਾਨਂ ਅਕ੍ਖਿਕਣ੍ਣਵਣੇਸੁ ਦੁਕ੍ਕਟਂ. ਤਥਾ ਅਵਸੇਸਸਰੀਰੇ ਕਾਯਸਂਸਗ੍ਗਰਾਗੇਨ, ਮੇਥੁਨਰਾਗੇਨ ਵਾ ਜੀਵਮਾਨਕਪੁਰਿਸਸ੍ਸ ਵਤ੍ਥਿਕੋਸਂ ਅਪ੍ਪਵੇਸਨ੍ਤੋ ਨਿਮਿਤ੍ਤੇਨ ਨਿਮਿਤ੍ਤਂ ਛੁਪਤਿ, ਦੁਕ੍ਕਟਂ. ਬਹਿ ਨਿਕ੍ਖਨ੍ਤਦਨ੍ਤੇਸੁ ਵਾਯਮਨ੍ਤਸ੍ਸ ਪਨ ਥੁਲ੍ਲਚ੍ਚਯਨ੍ਤਿ ਅਯਮੇਤ੍ਥ ਸਵਿਨਿਚ੍ਛਯੋ ਅਤ੍ਥਵਣ੍ਣਨਕ੍ਕਮੋ.

ਇਦਾਨਿ ਪਵੇਸਨਂ ਨਾਮ ਨ ਕੇਵਲਂ ਅਤ੍ਤੁਪਕ੍ਕਮੇਨੇਵ, ਪਰੂਪਕ੍ਕਮੇਨਾਪਿ ਹੋਤਿ, ਤਤ੍ਰਾਪਿ ਸਾਦਿਯਨ੍ਤੋਵ ਚੁਤੋ ਹੋਤੀਤਿ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਥ ਵਾਤਿ ਅਯਂ ਨਿਪਾਤੋ, ਨਿਪਾਤਸਮੁਦਾਯੋ ਵਾ ਪਕ੍ਖਨ੍ਤਰਾਰਮ੍ਭੇ. ਪਵੇਸਨਞ੍ਚ ਠਿਤਞ੍ਚ ਉਦ੍ਧਾਰੋ ਚ ਪਵਿਟ੍ਠਞ੍ਚ ਪਵੇਸਨ…ਪੇ… ਪਵਿਟ੍ਠਾਨਿ, ਇਤਰੀਤਰਯੋਗਦ੍ਵਨ੍ਦੋ. ਇਤਰੀਤਰਯੋਗੋ ਨਾਮ ਅਞ੍ਞਮਞ੍ਞਤ੍ਥੋਪਾਦਾਨਤਾਤਿ ਪਵੇਸਨਾਦੀਨਿ ਠਿਤਾਦਿਅਤ੍ਥਾਨਿਪਿ ਹੋਨ੍ਤੀਤਿ ਪਵਿਟ੍ਠ-ਸਦ੍ਦੋਪਿ ਪਵੇਸਨਾਦਿਅਤ੍ਥੋ ਹੋਤਿ, ਤਤੋਯੇਵੇਤ੍ਥ ਤਸ੍ਮਾ ਬਹੁਵਚਨਸਮ੍ਭਵੋ. ਅਞ੍ਞਥਾ ਦ੍ਵਨ੍ਦੇ ਅਵਯਵਤ੍ਥਪਧਾਨਤ੍ਤਾ ਏਕਤ੍ਥਵਾਚਕਾਪਿ ਪਵਿਟ੍ਠ-ਸਦ੍ਦਾ ਕਥਂ ਬਹੁਵਚਨਪ੍ਪਸਙ੍ਗੋ. ਸਮਾਹਾਰੇ ਵਾ ਦ੍ਵਨ੍ਦੋ. ਖਣੋਤਿ ਕਾਲਵਿਸੇਸੋ. ਸੋ ਚ ਯੋਗਵਨ੍ਤਾਨਂ ਖਣਨ੍ਤਰਵਿਨਿਮੁਤ੍ਤੋ ਨਤ੍ਥੀਤਿ ਪਵੇਸਨ…ਪੇ…ਪਵਿਟ੍ਠਾਨਿਯੇਵ ਖਣੋਤਿ ਕਮ੍ਮਧਾਰਯੋ, ਅਭੇਦੇ ਭੇਦਪਰਿਕਪ੍ਪਨਾਯ ਵਾ ਪਵੇਸਨ…ਪੇ… ਪਵਿਟ੍ਠਾਨਂ ਖਣੋਤਿ ਛਟ੍ਠੀਤਪ੍ਪੁਰਿਸੋ. ਤਸ੍ਸ ਸਾਦਕੋ, ਤਸ੍ਮਿਂ ਵਾ ਸਾਦਕੋ ਪਵੇਸਨ…ਪੇ… ਸਾਦਕੋ. ਖਣ-ਸਦ੍ਦੋ ਪਨੇਤ੍ਥ ਪਚ੍ਚੇਕਂ ਯੋਜੇਤਬ੍ਬੋ ਦ੍ਵਨ੍ਦਸਮਾਸਤ੍ਤਾ, ਪਵੇਸਨਕਾਲਂ ਠਿਤਕਾਲਂ ਉਦ੍ਧਾਰਕਾਲਂ ਪਵਿਟ੍ਠਕਾਲਂ, ਤਸ੍ਮਿਂ ਵਾ ਸਾਦਿਯਨ੍ਤੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਂ ਸੇਵਨਚਿਤ੍ਤਪਚ੍ਚੁਪਟ੍ਠਾਨੇਨ ਸਾਦਕੋ ਭਿਕ੍ਖੁ ਚੁਤੋਤਿ ਯੋਜੇਤਬ੍ਬਂ. ਤਤ੍ਥ ਯਥਾਵੁਤ੍ਤਪ੍ਪਦੇਸਸ੍ਸ ਅਨ੍ਤੋਕਰਣਂ ਪਵੇਸਨਂ ਨਾਮ. ਯਾਵ ਉਦ੍ਧਰਣਾਰਮ੍ਭਾ ਨਿਵਤ੍ਤਂ ਠਿਤਂ ਨਾਮ. ਅਟ੍ਠਕਥਾਯਂ (ਪਾਰਾ. ਅਟ੍ਠ. ੧.੫੮) ਪਨ ਮਾਤੁਗਾਮਸ੍ਸ ਸੁਕ੍ਕਵਿਸ੍ਸਟ੍ਠਿਂ ਪਤ੍ਵਾ ਸਬ੍ਬਥਾ ਵਾਯਮਤੋ ਓਰਮਿਤ੍ਵਾ ਠਿਤਕਾਲਂ ਸਨ੍ਧਾਯ ‘‘ਸੁਕ੍ਕਵਿਸ੍ਸਟ੍ਠਿਸਮਯੇ’’ਤਿ ਵੁਤ੍ਤਂ. ਯਾਵ ਅਗ੍ਗਾ ਨੀਹਰਣਂ ਉਦ੍ਧਾਰੋ ਨਾਮ. ਯਾਵ ਪਵੇਸਨਾਰਹਟ੍ਠਾਨਾ ਅਨ੍ਤੋਕਤਂ ਪਵਿਟ੍ਠਂ ਨਾਮ.

ਪਠਮਂ.

੩-੪. ਇਦਾਨਿ ਦੁਤਿਯਂ ਦਸ੍ਸੇਤੁਂ ‘‘ਆਦਿਯੇਯ੍ਯਾ’’ਤਿਆਦਿਮਾਹ. ਤਤ੍ਥ ਅਦਿਨ੍ਨਂ ਥੇਯ੍ਯਚਿਤ੍ਤੇਨ ਆਦਿਯੇਯ੍ਯ…ਪੇ… ਸਙ੍ਕੇਤਂ ਵੀਤਿਨਾਮਯੇ, ਪਾਰਾਜਿਕੋ ਭਵੇਤਿ ਸਮ੍ਬਨ੍ਧੋ. ਅਦਿਨ੍ਨਨ੍ਤਿ ਮਨੁਸ੍ਸਸਾਮਿਕੇਹਿ ਕਾਯਵਾਚਾਹਿ ਨ ਦਿਨ੍ਨਂ. ਥੇਯ੍ਯਚਿਤ੍ਤੇਨਾਤਿ ਥੇਨੋਤਿ ਚੋਰੋ, ਤਸ੍ਸ ਭਾਵੋ ਥੇਯ੍ਯਂ ਨ-ਕਾਰਸ੍ਸ ਯ-ਕਾਰਂ ਕਤ੍ਵਾ ਦ੍ਵਿਤ੍ਤੇਨ. ਭਵਨ੍ਤਿ ਏਤਸ੍ਮਾ ਅਭਿਧਾਨਬੁਦ੍ਧੀਤਿ ਭਾਵੋ, ਸਦ੍ਦਪ੍ਪਵਤ੍ਤਿਨਿਮਿਤ੍ਤਂ ਜਾਤਿਗੁਣਾਦਿ. ਇਧ ਪਨ ਅਵਹਰਣਚਿਤ੍ਤਸਙ੍ਖਾਤਂ ਦਬ੍ਬਂ ਥੇਯ੍ਯਂ. ਥੇਯ੍ਯਞ੍ਚ ਤਂ ਚਿਤ੍ਤਞ੍ਚਾਤਿ ਥੇਯ੍ਯਚਿਤ੍ਤਂ, ਤੇਨ. ਆਦਿਯੇਯ੍ਯਾਤਿ ਆਰਾਮਾਦਿਂ ਅਭਿਯੁਞ੍ਜਿਤ੍ਵਾ ਗਣ੍ਹੇਯ੍ਯ. ਹਰੇਯ੍ਯਾਤਿ ਹਰਨ੍ਤੋ ਗਣ੍ਹੇਯ੍ਯ. ਅਵਹਰੇਯ੍ਯਾਤਿ ਉਪਨਿਕ੍ਖਿਤ੍ਤਂ ਭਣ੍ਡਂ ‘‘ਦੇਹਿ ਮੇ ਭਣ੍ਡ’’ਨ੍ਤਿ ਵੁਚ੍ਚਮਾਨੋ ‘‘ਨ ਮਯਾ ਗਹਿਤ’’ਨ੍ਤਿਆਦੀਨਿ ਵਦਨ੍ਤੋ ਗਣ੍ਹੇਯ੍ਯ. ਇਰਿਯਾਪਥਂ ਕੋਪੇਯ੍ਯਾਤਿ ਭਣ੍ਡਹਾਰਕਸ੍ਸ ਗਮਨਾਦਿਇਰਿਯਾਪਥਂ ਵਿਚ੍ਛਿਨ੍ਦਿਤ੍ਵਾ ਗਣ੍ਹੇਯ੍ਯ. ਕੋਪਂ ਕਤ੍ਵਾ ਗਣ੍ਹਾਤੀਤਿ ਹਿ ਏਤਸ੍ਮਿਂ ਅਤ੍ਥੇ ‘‘ਕੋਪੀ’’ਤਿ ਨਾਮਧਾਤੁ. ਠਾਨਾ ਚਾਵੇਯ੍ਯਾਤਿ ਠਪਿਤਟ੍ਠਾਨਤੋ ਚਾਵੇਯ੍ਯ. ਸਙ੍ਕੇਤਂ ਵੀਤਿਨਾਮਯੇਤਿ ਪਰਿਕਪ੍ਪਿਤਟ੍ਠਾਨਂ ਵਾ ਸੁਙ੍ਕਘਾਤਂ ਵਾ ਅਤਿਕ੍ਕਾਮੇਯ੍ਯ.

ਏਤ੍ਥ ਚ ਆਰਾਮਾਦਿਅਭਿਯੁਞ੍ਜਨੇ, ਸਾਮਿਕਸ੍ਸ ਵਿਮਤੁਪ੍ਪਾਦਨਧੁਰਨਿਕ੍ਖੇਪੇ, ਭਣ੍ਡਹਾਰਕਸ੍ਸ ਸੀਸਭਾਰਾਮਸਨਫਨ੍ਦਾਪਨਖਨ੍ਧੋਰੋਪਨੇ, ਉਪਨਿਕ੍ਖਿਤ੍ਤੇ ‘‘ਦੇਹਿ ਮੇ ਭਣ੍ਡ’’ਨ੍ਤਿ ਚੋਦਿਯਮਾਨਸ੍ਸ ‘‘ਨਾਹਂ ਗਣ੍ਹਾਮੀ’’ਤਿ ਭਣਨਵਿਮਤੁਪ੍ਪਾਦਨਧੁਰਨਿਕ੍ਖੇਪੇ, ਥਲਟ੍ਠਸ੍ਸ ਥੇਯ੍ਯਚਿਤ੍ਤੇਨਾਮਸਨਫਨ੍ਦਾਪਨਠਾਨਾਚਾਵਨੇ ਚਾਤਿ ਚਤੂਸੁ ਪਚ੍ਚੇਕਂ ਯਥਾਕ੍ਕਮਂ ਦੁਕ੍ਕਟਥੁਲ੍ਲਚ੍ਚਯਪਾਰਾਜਿਕਾਯੋ ਵੇਦਿਤਬ੍ਬਾ. ‘‘ਸਹਭਣ੍ਡਹਾਰਕਂ ਨੇਸ੍ਸਾਮੀ’’ਤਿ ਪਠਮਦੁਤਿਯਪਾਦਸਙ੍ਕਾਮਨੇ, ਪਰਿਕਪ੍ਪਿਤਸੁਙ੍ਕਘਾਤਟ੍ਠਾਨਤੋ ਪਠਮਦੁਤਿਯਪਾਦਾਤਿਕ੍ਕਾਮੇ ਚਾਤਿ ਦ੍ਵੀਸੁ ਪਚ੍ਚੇਕਂ ਕਮੇਨ ਥੁਲ੍ਲਚ੍ਚਯਪਾਰਾਜਿਕਾਯੋ ਵੇਦਿਤਬ੍ਬਾ. ਅਯਮੇਤ੍ਥ ਸਵਿਞ੍ਞਾਣਕਾਵਿਞ੍ਞਾਣਕਮਿਸ੍ਸਕਤ੍ਤਾ ਨਾਨਾਭਣ੍ਡਵਸੇਨ ਯੋਜਨਾ. ਏਕਭਣ੍ਡਵਸੇਨ ਪਨ ਸਸ੍ਸਾਮਿਕਸ੍ਸ ਦਾਸਸ੍ਸ ਵਾ ਤਿਰਚ੍ਛਾਨਗਤਸ੍ਸ ਵਾ ਯਥਾਵੁਤ੍ਤੇਨ ਅਭਿਯੋਗਾਦਿਨਾ ਨਯੇਨ ਆਦਿਯਨਹਰਣਾਦਿਵਸੇਨ ਯੋਜਨਾ ਦਟ੍ਠਬ੍ਬਾ.

ਅਪਿਚ ਇਮਾਨਿ ਛ ਪਦਾਨਿ ਵਣ੍ਣਯਨ੍ਤੇਨ ਨਾਨਾਭਣ੍ਡਏਕਭਣ੍ਡਸਾਹਤ੍ਥਿਕਪੁਬ੍ਬਪ੍ਪਯੋਗਥੇਯ੍ਯਾਵਹਾਰਸਙ੍ਖਾਤੇ ਪਞ੍ਚਪਞ੍ਚਕੇ ਸਮੋਧਾਨੇਤ੍ਵਾ ਪਞ੍ਚਵੀਸਤਿ ਅਵਹਾਰਾ ਦਸ੍ਸੇਤਬ੍ਬਾ ਛਪ੍ਪਦਨ੍ਤੋਗਧਤ੍ਤਾ ਸਬ੍ਬੇਸਮ੍ਪਿ ਅਵਹਾਰਾਨਂ. ਤੇ ਪਨ ਅਵਹਾਰਾ ਯੇਨ ਕੇਨਚਿ ਅਭਿਯੋਗਾਦਿਆਕਾਰਨਾਨਤ੍ਤਮਤ੍ਤੇਨ ਭਿਨ੍ਨਾਤਿ ਤਂਵਸੇਨ ਪਞ੍ਚਪਞ੍ਚਕਂ ਨਾਮ ਜਾਤਂ. ਏਵਂ ਸਂਵਣ੍ਣਿਤਞ੍ਹਿ ਇਦਂ ਅਦਿਨ੍ਨਾਦਾਨਪਾਰਾਜਿਕਂ ਸੁਵਣ੍ਣਿਤਂ ਨਾਮ ਹੋਤੀਤਿ ਦਟ੍ਠਬ੍ਬਂ. ਤਤ੍ਥ ਪੁਰਿਮਾਨਿ ਦ੍ਵੇ ਪਞ੍ਚਕਾਨਿ ‘‘ਆਦਿਯੇਯ੍ਯਾ’’ਤਿਆਦੀਨਂ ਪਞ੍ਚਨ੍ਨਂ ਪਦਾਨਂ ਵਸੇਨ ਲਬ੍ਭਨ੍ਤਿ. ਯਂ ਪਨੇਤਂ ‘‘ਸਙ੍ਕੇਤਂ ਵੀਤਿਨਾਮਯੇ’’ਤਿ ਛਟ੍ਠਂ ਪਦਂ, ਤਂ ਤਤਿਯਪਞ੍ਚਮੇਸੁ ਪਞ੍ਚਕੇਸੁ ਨਿਸ੍ਸਗ੍ਗਿਯਪਰਿਕਪ੍ਪਾਵਹਾਰਵਸੇਨ ਯੋਜੇਤਬ੍ਬਂ.

ਤਤ੍ਥ ਸਾਹਤ੍ਥਿਕ-ਸਦ੍ਦੇਨ ਉਪਚਾਰਤੋ ਤਂਸਹਚਰਿਤਪਞ੍ਚਕਂ ਗਹੇਤ੍ਵਾ ‘‘ਸਾਹਤ੍ਥਿਕਞ੍ਚ ਤਂ ਪਞ੍ਚਕਞ੍ਚਾ’’ਤਿ ਵਾ ‘‘ਸਾਹਤ੍ਥਿਕਾਦਿ ਪਞ੍ਚਕ’’ਨ੍ਤਿ ਮਜ੍ਝੇਪਦਲੋਪਵਸੇਨ ਵਾ ਸਾਹਤ੍ਥਿਕਪਞ੍ਚਕਂ. ਏਵਮੁਪਰਿਪਿ. ਤਂ ਪਨ ਸਾਹਤ੍ਥਿਕੋ ਆਣਤ੍ਤਿਕੋ ਨਿਸ੍ਸਗ੍ਗਿਯੋ ਅਤ੍ਥਸਾਧਕੋ ਧੁਰਨਿਕ੍ਖੇਪੋ ਚਾਤਿ. ਤਤ੍ਥ ਸਕੋ ਹਤ੍ਥੋ ਸਹਤ੍ਥੋ, ਸਹਤ੍ਥੇਨ ਨਿਬ੍ਬਤ੍ਤੋ ਸਾਹਤ੍ਥਿਕੋ. ਏਵਂ ਆਣਤ੍ਤਿਕੋ. ਸੁਙ੍ਕਘਾਤਪਰਿਕਪ੍ਪਿਤੋਕਾਸਾਨਂ ਅਨ੍ਤੋ ਠਤ੍ਵਾ ਬਹਿ ਨਿਸ੍ਸਜ੍ਜਨਂ ਨਿਸ੍ਸਗ੍ਗੋ, ਸੋ ਏਵ ਨਿਸ੍ਸਗ੍ਗਿਯੋ. ਕਾਲਂ ਅਨਿਯਮੇਤ੍ਵਾ ਆਣਤ੍ਤਸ੍ਸ ਭਣ੍ਡਗ੍ਗਹਣਤੋ ਚ ਪਰਸ੍ਸ ਤੇਲਕੁਮ੍ਭਿਯਾ ਪਾਦਗ੍ਘਨਕਂ ਤੇਲਂ ਅਵਸ੍ਸਂ ਪਿਵਨਕਾਨਂ ਉਪਾਹਨਾਦੀਨਂ ਨਿਕ੍ਖਿਤ੍ਤਾਨਂ ਤੇਲਪਾਤਨਤੋ ਚ ਪੁਰੇਤਰਮੇਵ ਪਾਰਾਜਿਕਸਙ੍ਖਾਤਂ ਅਤ੍ਥਂ ਸਾਧੇਤੀਤਿ ਅਤ੍ਥਸਾਧਕੋ. ਸੋ ਪਨ ਆਣਾਪਨਪ੍ਪਯੋਗੋ, ਉਪਾਹਨਾਦੀਨਂ ਨਿਕ੍ਖੇਪਪ੍ਪਯੋਗੋ ਚ. ਆਰਾਮਾਭਿਯੋਗੇ ਚ ਉਪਨਿਕ੍ਖਿਤ੍ਤਭਣ੍ਡੇ ਚ ਤਾਵਕਾਲਿਕਭਣ੍ਡਦੇਯ੍ਯਾਨਮਦਾਨੇ ਚ ਧੁਰਸ੍ਸ ਨਿਕ੍ਖੇਪੋ ਧੁਰਨਿਕ੍ਖੇਪੋ.

ਪੁਬ੍ਬਪ੍ਪਯੋਗਪਞ੍ਚਕਂ ਨਾਮ ਪੁਬ੍ਬਪ੍ਪਯੋਗੋ ਸਹਪ੍ਪਯੋਗੋ ਸਂਵਿਧਾਵਹਾਰੋ ਸਙ੍ਕੇਤਕਮ੍ਮਂ ਨਿਮਿਤ੍ਤਕਮ੍ਮਨ੍ਤਿ. ਤਤ੍ਥ ਆਣਾਪਨਂ ਭਣ੍ਡਗ੍ਗਹਣਤੋ ਪੁਬ੍ਬਤ੍ਤਾ ਪੁਬ੍ਬਪ੍ਪਯੋਗੋ ਨਾਮ. ਠਾਨਾਚਾਵਨਖਿਲਸਙ੍ਕਾਮਨਪ੍ਪਯੋਗੇਨ ਸਹ ਵਤ੍ਤਮਾਨੋ ਸਹਪ੍ਪਯੋਗੋ. ਸਂਵਿਧਾਯ ਸਮ੍ਮਨ੍ਤਯਿਤ੍ਵਾ ਗਤੇਸੁ ਏਕੇਨਾਪਿ ਭਣ੍ਡੇ ਠਾਨਾ ਚਾਵਿਤੇ ਸਬ੍ਬੇਸਂ ਅਵਹਾਰੋ ਸਂਵਿਧਾਵਹਾਰੋ. ਸਙ੍ਕੇਤਕਮ੍ਮਨ੍ਤਿ ਪੁਬ੍ਬਣ੍ਹਾਦਿਕਾਲਪਰਿਚ੍ਛੇਦਵਸੇਨ ਸਞ੍ਜਾਨਨਕਰਣਂ. ਨਿਮਿਤ੍ਤਕਮ੍ਮਂ ਨਾਮ ਸਞ੍ਞੁਪ੍ਪਾਦਨਤ੍ਥਂ ਅਕ੍ਖਿਨਿਖਣਨਾਦਿਕਰਣਂ.

ਥੇਯ੍ਯਾਵਹਾਰਪਞ੍ਚਕਂ ਪਨ ਸਯਮੇਵ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿਮਾਹ. ਨਨੁ ਚ ਛਪ੍ਪਦਨ੍ਤੋਗਧਤ੍ਤਾ ‘‘ਸਬ੍ਬੇਸਮ੍ਪਿ ਅਵਹਾਰਾਨ’’ਨ੍ਤਿ ਵੁਤ੍ਤਂ, ਏਵਂ ਸਤਿ ‘‘ਅਥ ਵਾ’’ਤਿ ਪਕ੍ਖਨ੍ਤਰਵਸੇਨ ਵਿਸੁਂ ਵਿਯ ਇਦਂ ਪਞ੍ਚਕਂ ਕਸ੍ਮਾ ਵੁਤ੍ਤਨ੍ਤਿ? ਨਨੁ ਅਵੋਚੁਮ੍ਹਾ ‘‘ਯੇਨ ਕੇਨਚਿ ਅਭਿਯੋਗਾਦਿਆਕਾਰਨਾਨਤ੍ਤਮਤ੍ਤੇਨ ਭਿਨ੍ਨਾ’’ਤਿ, ਏਤਾਦਿਸਸ੍ਸ ਭੇਦਸ੍ਸ ਸਮ੍ਭਵਤੋ ਪਕ੍ਖਨ੍ਤਰਵਸੇਨਾਪਿ ਯੁਜ੍ਜਤੀਤਿ ਏਵਂ ਵੁਤ੍ਤਂ. ਇਮਸ੍ਸ ਪਞ੍ਚਕਸ੍ਸ ਵਿਸੁਂ ਉਦ੍ਧਰਿਤ੍ਵਾ ਵਚਨਂ ਪਨ ਪਸਿਦ੍ਧਿਵਸੇਨਾਤਿ ਦਟ੍ਠਬ੍ਬਂ, ਕੁਸ-ਸਦ੍ਦੇਨ ਕੁਸਸਙ੍ਕਾਮਨਮਧਿਪ੍ਪੇਤਂ ਅਭੇਦੋਪਚਾਰੇਨ. ਥੇਯ੍ਯਞ੍ਚ ਬਲਞ੍ਚ ਕੁਸੋ ਚ ਛਨ੍ਨਞ੍ਚ ਪਰਿਕਪ੍ਪੋ ਚ ਥੇਯ੍ਯਾ…ਪੇ… ਪਰਿਕਪ੍ਪਂ, ਦੀਘੋ ਸਨ੍ਧਿਵਸੇਨ. ਤੇਨ ਅਵਹਾਰਕੋ ਪਾਰਾਜਿਕੋ ਭਵੇਤਿ ਸਮ੍ਬਨ੍ਧੋ. ਯੋ ਪਨ ਪਟਿਚ੍ਛਨ੍ਨੇਨ ਅਵਹਾਰਕੋ, ਸੋ ਅਤ੍ਥਤੋ ਪਟਿਚ੍ਛਨ੍ਨਸ੍ਸ ਅਵਹਾਰਕੋ ਹੋਤੀਤਿ ਦ੍ਵਨ੍ਦਸਮਾਸਨ੍ਤੋਗਧਤ੍ਤੇਪਿਚਸ੍ਸ ਵਿਰੋਧਾਭਾਵੋਭਾਵਸਾਧਨੋ ਚਾਯਂ ਛਨ੍ਨ-ਸਦ੍ਦੋ ਦਟ੍ਠਬ੍ਬੋ. ਤਤ੍ਥ ਸਨ੍ਧਿਚ੍ਛੇਦਨਾਦੀਨਿ ਕਤ੍ਵਾ ਵਾ ਤੁਲਾਕੂਟਮਾਨਕੂਟਕਹਾਪਣਕੂਟਾਦੀਹਿ ਵਞ੍ਚੇਤ੍ਵਾ ਵਾ ਗਣ੍ਹਨ੍ਤੋ ਥੇਯ੍ਯਾਵਹਾਰਕੋ. ਬਲਕ੍ਕਾਰੇਨ ਪਰਸਨ੍ਤਕਂ ਗਣ੍ਹਨ੍ਤੋ ਬਲਾਵਹਾਰਕੋ. ਕੁਸਂ ਸਙ੍ਕਾਮੇਤ੍ਵਾ ਗਣ੍ਹਨ੍ਤੋ ਕੁਸਾਵਹਾਰਕੋ. ਤਿਣਪਣ੍ਣਾਦੀਹਿ ਯਂ ਕਿਞ੍ਚਿ ਪਟਿਚ੍ਛਾਦੇਤ੍ਵਾ ਪਚ੍ਛਾ ਕਸ੍ਸ ਪਟਿਚ੍ਛਨ੍ਨਸ੍ਸ ਅਵਹਾਰਕੋ ਪਟਿਚ੍ਛਨ੍ਨਾਵਹਾਰਕੋ. ਸਾਟਕਾਦਿਭਣ੍ਡਵਸੇਨ, ਗਬ੍ਭਦ੍ਵਾਰਾਦਿਓਕਾਸਵਸੇਨ ਵਾ ਪਰਿਕਪ੍ਪੇਤ੍ਵਾ ਗਣ੍ਹਨ੍ਤੋ ਪਰਿਕਪ੍ਪਾਵਹਾਰਕੋ. ਏਤ੍ਥ ਪਨ ਪਰਿਕਪ੍ਪਿਤਭਣ੍ਡਗ੍ਗਹਣੇ ਪਰਿਕਪ੍ਪਿਤਪਰਿਚ੍ਛੇਦਾਤਿਕ੍ਕਮੇ ਚ ਪਾਰਾਜਿਕਂ ਵੇਦਿਤਬ੍ਬਂ.

ਇਦਾਨਿ ਪਨੇਤ੍ਥ ਵਿਨਿਚ੍ਛਯਂ ਦਸ੍ਸੇਤੁਂ ‘‘ਭਣ੍ਡਕਾਲਗ੍ਘਦੇਸੇਹੀ’’ਤਿਆਦਿ ਵੁਤ੍ਤਂ. ਏਤ੍ਥ ਅਦਿਨ੍ਨਾਦਾਨੇ ਭਣ੍ਡਞ੍ਚ ਕਾਲੋ ਚ ਅਗ੍ਘੋ ਚ ਦੇਸੋ ਚ ਤੇਹਿ ਚ ਪਰਿਭੋਗੇਨ ਚ ਵਿਨਿਚ੍ਛਯੋ ਕਾਤਬ੍ਬੋਤਿ ਅਤ੍ਥੋ. ਤਤ੍ਥ ਅਵਹਟਭਣ੍ਡਸ੍ਸ ਸਸ੍ਸਾਮਿਕਸ੍ਸਾਮਿਕਭਾਵਂ ਸਸ੍ਸਾਮਿਕੇਪਿ ਸਾਮਿਕਾਨਂ ਸਾਲਯਨਿਰਾਲਯਭਾਵਞ੍ਚ ਉਪਪਰਿਕ੍ਖਿਤ੍ਵਾ ਸਾਲਯਕਾਲੇ ਚੇ ਅਵਹਟਂ, ਭਣ੍ਡਂ ਅਗ੍ਘਾਪੇਤ੍ਵਾ ਕਾਤਬ੍ਬੋ ਵਿਨਿਚ੍ਛਯੋ ਭਣ੍ਡੇਨ ਵਿਨਿਚ੍ਛਯੋ. ਨਿਰਾਲਯਕਾਲੇ ਚੇ ਅਵਹਟਂ, ਪਾਰਾਜਿਕਂ ਨਤ੍ਥਿ, ਸਾਮਿਕੇਸੁ ਪੁਨ ਆਹਰਾਪੇਨ੍ਤੇਸੁ ਦਾਤਬ੍ਬਂ. ਤਦੇਵ ਹਿ ਭਣ੍ਡਂ ਕਦਾਚਿ ਮਹਗ੍ਘਂ, ਕਦਾਚਿ ਅਪ੍ਪਗ੍ਘਂ, ਤਸ੍ਮਾ ਯਸ੍ਮਿਂ ਕਾਲੇ ਭਣ੍ਡਂ ਅਵਹਟਂ, ਤਸ੍ਮਿਂਯੇਵ ਕਾਲੇ ਯੋ ਤਸ੍ਸ ਅਗ੍ਘੋ, ਤੇਨ ਕਾਤਬ੍ਬੋ ਵਿਨਿਚ੍ਛਯੋ ਕਾਲੇਨ ਵਿਨਿਚ੍ਛਯੋ. ਨਵਭਣ੍ਡਸ੍ਸ ਯੋ ਅਗ੍ਘੋ, ਸੋ ਪਚ੍ਛਾ ਪਰਿਹਾਯਤਿ, ਤਸ੍ਮਾ ਸਬ੍ਬਦਾ ਪਕਤਿਅਗ੍ਘਵਸੇਨ ਅਕਤ੍ਵਾ ਕਾਤਬ੍ਬੋ ਵਿਨਿਚ੍ਛਯੋ ਅਗ੍ਘੇਨ ਵਿਨਿਚ੍ਛਯੋ. ਭਣ੍ਡੁਟ੍ਠਾਨਦੇਸੇ ਭਣ੍ਡਂ ਅਪ੍ਪਗ੍ਘਂ ਹੋਤਿ, ਅਞ੍ਞਤ੍ਥ ਮਹਗ੍ਘਂ, ਤਸ੍ਮਾ ਯਸ੍ਮਿਂ ਦੇਸੇ ਭਣ੍ਡਂ ਅਵਹਟਂ, ਤਸ੍ਮਿਂਯੇਵ ਦੇਸੇ ਅਗ੍ਘੇਨ ਕਾਤਬ੍ਬੋ ਵਿਨਿਚ੍ਛਯੋ ਦੇਸੇਨ ਵਿਨਿਚ੍ਛਯੋ. ਪਰਿਭੋਗੇਨ ਸਾਟਕਾਦਿਨੋ ਭਣ੍ਡਸ੍ਸ ਅਗ੍ਘੋ ਪਰਿਹਾਯਤਿ, ਤਸ੍ਮਾ ਤਸ੍ਸ ਪਰਿਭੋਗਵਸੇਨ ਪਰਿਹੀਨਾਪਰਿਹੀਨਭਾਵਂ ਉਪਪਰਿਕ੍ਖਿਤ੍ਵਾ ਕਾਤਬ੍ਬੋ ਵਿਨਿਚ੍ਛਯੋ ਪਰਿਭੋਗੇਨ ਵਿਨਿਚ੍ਛਯੋ.

ਦੁਤਿਯਂ.

੫-੭. ਇਦਾਨਿ ਤਤਿਯਂ ਦਸ੍ਸੇਤੁਂ ‘‘ਮਨੁਸ੍ਸਵਿਗ੍ਗਹ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਮਨੁਸ੍ਸਵਿਗ੍ਗਹਂ ਕਲਲਤੋ ਪਟ੍ਠਾਯ ਜੀਵਮਾਨਕਮਨੁਸ੍ਸਜਾਤਿਕਾਨਂ ਸਰੀਰਂ. ਚਿਚ੍ਚ ਪਾਣੋਤਿ ਸਞ੍ਞਾਯ ਸਦ੍ਧਿਂਯੇਵ ‘‘ਵਧਾਮਿ ਨ’’ਨ੍ਤਿ ਵਧਕਚੇਤਨਾਯ ਚੇਤੇਤ੍ਵਾ ਪਕਪ੍ਪੇਤ੍ਵਾ. ਜੀਵਿਤਾ ਵਾ ਵਿਯੋਜਯੇਤਿ ਯੋ ਭਿਕ੍ਖੁ ਜਾਤਿਉਣ੍ਣਂਸੁਨਾ ਸਮੁਦ੍ਧਟਤੇਲਬਿਨ੍ਦੁਮਤ੍ਤਂ ਕਲਲਰੂਪਕਾਲੇ ਤਾਪਨਾਦੀਹਿ ਵਾ ਤਤੋ ਵਾ ਉਦ੍ਧਮਪਿ ਤਦਨੁਰੂਪੇਨ ਉਪਕ੍ਕਮੇਨ ਰੂਪਜੀਵਿਤਿਨ੍ਦ੍ਰਿਯੋਪਕ੍ਕਮੇ ਸਤਿ ਤਦਾਯਤ੍ਤਵੁਤ੍ਤਿਨੋ ਅਰੂਪਜੀਵਿਤਸ੍ਸਾਪਿ ਵੋਰੋਪਨਸਮ੍ਭਵਤੋ ਉਭਯਜੀਵਿਤਾ ਵੋਰੋਪੇਯ੍ਯ. ਵਾ-ਸਦ੍ਦੋ ਵਿਕਪ੍ਪੇ. ਮਰਣਚੇਤਨੋਤਿ ਮਰਣੇ ਚੇਤਨਾ ਯਸ੍ਸ ਸੋ ਮਰਣਾਧਿਪ੍ਪਾਯੋ. ਸਤ੍ਥਹਾਰਕਨ੍ਤਿ ਜੀਵਿਤਂ ਹਰਤੀਤਿ ਹਾਰਕਂ, ਸਤ੍ਥਞ੍ਚ ਤਂ ਹਾਰਕਞ੍ਚਾਤਿ ਸਤ੍ਥਹਾਰਕਂ, ਤਂ. ਅਸ੍ਸ ਮਨੁਸ੍ਸਵਿਗ੍ਗਹਸ੍ਸ. ਉਪਨਿਕ੍ਖਿਪੇਤਿ ਸਮੀਪੇ ਨਿਕ੍ਖਿਪੇਯ੍ਯ ਵਾ. ਏਤੇਨ ਥਾਵਰਪ੍ਪਯੋਗਂ ਦਸ੍ਸੇਤਿ. ਗਾਹੇਯ੍ਯ ਮਰਣੂਪਾਯਨ੍ਤਿ ‘‘ਸਤ੍ਥਂ ਵਾ ਆਹਰ, ਵਿਸਂ ਵਾ ਖਾਦਾ’’ਤਿਆਦਿਨਾ ਨਯੇਨ ਮਰਣਤ੍ਥਾਯ ਉਪਾਯਂ ਗਾਹਾਪੇਯ੍ਯ ਵਾ. ਏਤੇਨ ਆਣਤ੍ਤਿਪ੍ਪਯੋਗੋ ਦਸ੍ਸਿਤੋ. ਵਦੇਯ੍ਯ ਮਰਣੇ ਗੁਣਨ੍ਤਿ ਕਾਯਵਾਚਾਦੂਤਲੇਖਾਹਿ ‘‘ਯੋ ਏਵਂ ਮਰਤਿ, ਸੋ ਧਨਂ ਵਾ ਲਭਤੀ’’ਤਿਆਦਿਨਾ ਨਯੇਨ ਮਰਣੇ ਗੁਣਂ ਪਕਾਸੇਯ੍ਯ ਵਾ. ਉਭਯਤ੍ਥ ਅਧਿਕਾਰਵਸੇਨ ਵਾ-ਸਦ੍ਦੋ ਆਹਰਿਤਬ੍ਬੋ. ਸੋ ਭਿਕ੍ਖੁ ਚੁਤੋਤਿ ਸਮ੍ਬਨ੍ਧੋ, ਸਾਸਨਤੋਤਿ ਵਿਞ੍ਞਾਯਤਿ.

ਇਦਾਨਿ ਪਨਸ੍ਸ ਛਬ੍ਬਿਧੇ ਪਯੋਗੇਦਸ੍ਸੇਤੁਂ ‘‘ਪਯੋਗਾ’’ਤਿਆਦਿਮਾਹ. ਤਤ੍ਥ ਸਾਹਤ੍ਥਿ…ਪੇ… ਇਦ੍ਧਿਵਿਜ੍ਜਾਮਯਾ ਪਯੋਗਾਤਿ ਇਮੇ ਛ ਪਯੋਗਾਤਿ ਸਮ੍ਬਨ੍ਧੋ. ਕ-ਕਾਰਲੋਪੇਨ ਪਨੇਤ੍ਥ ‘‘ਸਾਹਤ੍ਥੀ’’ਤਿ ਵੁਤ੍ਤਂ. ਅਥ ਵਾ ਅਨੇਕਤ੍ਥੇ ਅਨੇਕਤਦ੍ਧਿਤਸਮ੍ਭਵੇਨ ਸਹਤ੍ਥਸ੍ਸਾਯਂ ਪਯੋਗੋ ਸਾਹਤ੍ਥੀਤਿ ਪਦਸਿਦ੍ਧਿ ਵੇਦਿਤਬ੍ਬਾ. ਸਾਹਤ੍ਥਿ ਚ ਨਿਸ੍ਸਗ੍ਗੋ ਚ ਆਣਤ੍ਤਿ ਚ ਥਾਵਰੋ ਚਾਤਿ ਦ੍ਵਨ੍ਦੋ. ਇਦ੍ਧਿ ਚ ਵਿਜ੍ਜਾ ਚ, ਤਾਸਮਿਮੇਤਿ ਇਦ੍ਧਿਵਿਜ੍ਜਾਮਯਾ, ਇਦ੍ਧਿਮਯੋ ਵਿਜ੍ਜਾਮਯੋਤਿ ਵੁਤ੍ਤਂ ਹੋਤਿ. ਪਯੋਗਾਤਿ ਇਮੇ ਛਪ੍ਪਯੋਗਾ ਨਾਮ ਹੋਨ੍ਤੀਤਿ ਅਤ੍ਥੋ. ਤਤ੍ਥ ਸਯਂ ਮਾਰੇਨ੍ਤਸ੍ਸ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਪਹਰਣਂ ਸਾਹਤ੍ਥਿਕੋ ਪਯੋਗੋ. ਦੂਰੇ ਠਿਤਂ ਮਾਰੇਤੁਕਾਮਸ੍ਸ ਕਾਯਾਦੀਹਿ ਉਸੁਸਤ੍ਤਿਆਦੀਨਂ ਨਿਸ੍ਸਜ੍ਜਨਂ ਨਿਸ੍ਸਗ੍ਗੋ. ‘‘ਅਸੁਕਂ ਨਾਮ ਮਾਰੇਹੀ’’ਤਿਆਦਿਨਾ ਆਣਾਪੇਨ੍ਤਸ੍ਸ ਆਣਾਪਨਂ ਆਣਤ੍ਤਿ, ਓਪਾਤਖਣਨਂ ਅਪਸ੍ਸੇਨਸਂਵਿਧਾਨਂ ਅਸਿਆਦੀਨਂ ਉਪਨਿਕ੍ਖਿਪਨਾਦਿ ਥਾਵਰੋ. ਮਾਰਣਤ੍ਥਂ ਕਮ੍ਮਵਿਪਾਕਜਾਯ ਇਦ੍ਧਿਯਾ ਪਯੋਜਨਂ ਇਦ੍ਧਿਮਯੋ. ਕਮ੍ਮਵਿਪਾਕਜਿਦ੍ਧਿ ਚ ਨਾਮੇਸਾ ਰਾਜਾਦੀਨਂ ਰਾਜਿਦ੍ਧਿਆਦਯੋ. ਤਤ੍ਥ ਪਿਤੁਰਞ੍ਞੋ ਸੀਹਲ਼ਿਨ੍ਦਸ੍ਸ ਦਾਠਾਕੋਟਨੇਨ ਚੂਲ਼ਸੁਮਨਕੁਟੁਮ੍ਬਿਯਮਾਰਣੇ ਰਾਜਿਦ੍ਧਿ ਦਟ੍ਠਬ੍ਬਾ, ਤਦਤ੍ਥਮੇਵ ਅਥਬ੍ਬਣਾਦਿਵਿਜ੍ਜਾਯ ਪਰਿਜਪ੍ਪਨਂ ਵਿਜ੍ਜਾਮਯੋ ਪਯੋਗੋ.

ਏਵਂ ਛਪ੍ਪਯੋਗੇ ਦਸ੍ਸੇਤ੍ਵਾ ਤੇਸੁ ਆਣਤ੍ਤਿਪ੍ਪਯੋਗਸ੍ਸ ਨਿਯਾਮਕੇ ਦਸ੍ਸੇਤੁਂ ‘‘ਕਾਲਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾਵੁਤ੍ਤਂ ਆਣਤ੍ਤਿਂ ਨਿਯਮੇਨ੍ਤਿ ਸਙ੍ਕੇਤਵਿਸਙ੍ਕੇਤਤਾਵਸੇਨ ਪਰਿਚ੍ਛਿਨ੍ਦਨ੍ਤੀਤਿ ਆਣਤ੍ਤਿਨਿਯਾਮਕਾ. ਤੇ ਪਨ ਕਾਲੋ ਚ ਵਤ੍ਥੁ ਚ ਆਵੁਧਞ੍ਚ ਇਰਿਯਾਪਥੋ ਚਾਤਿ ਚਤ੍ਤਾਰੋ, ਤਥਾ ਕਿਰਿਯਾਵਿਸੇਸੋ ਓਕਾਸੋਤਿ ਗਣਨਪਰਿਚ੍ਛੇਦਵਸੇਨ ਛ ਹੋਨ੍ਤੀਤਿ ਅਤ੍ਥੋ. ਤਤ੍ਥ ਕਾਲੋ ਪੁਬ੍ਬਣ੍ਹਾਦਿ ਯੋਬ੍ਬਨਾਦਿ ਚ. ਵਤ੍ਥੁ ਮਾਰੇਤਬ੍ਬੋ ਸਤ੍ਤੋ. ਆਵੁਧਂ ਅਸਿਆਦਿ. ਇਰਿਯਾਪਥੋ ਮਾਰੇਤਬ੍ਬਸ੍ਸ ਗਮਨਾਦਿ. ਕਿਰਿਯਾਵਿਸੇਸੋ ਵਿਜ੍ਝਨਾਦਿ. ਓਕਾਸੋ ਗਾਮਾਦਿ. ਯੋ ਹਿ ‘‘ਅਜ੍ਜ, ਸ੍ਵੇ’’ਤਿ ਅਨਿਯਮੇਤ੍ਵਾ ‘‘ਪੁਬ੍ਬਣ੍ਹੇ ਮਾਰੇਹੀ’’ਤਿ ਵੁਤ੍ਤੋ ਯਦਾ ਕਦਾਚਿ ਪੁਬ੍ਬਣ੍ਹੇ ਮਾਰੇਤਿ, ਨਤ੍ਥਿ ਵਿਸਙ੍ਕੇਤੋ. ਯੋ ਪਨ ‘‘ਪੁਬ੍ਬਣ੍ਹੇ’’ਤਿ ਵੁਤ੍ਤੋ ਮਜ੍ਝਨ੍ਹਾਦੀਸੁ ਮਾਰੇਤਿ, ਵਿਸਙ੍ਕੇਤੋ ਹੋਤਿ, ਆਣਾਪਕਸ੍ਸ ਅਨਾਪਤ੍ਤਿ. ਏਵਂ ਕਾਲਸ੍ਸ ਸਙ੍ਕੇਤਵਿਸਙ੍ਕੇਤਤਾਵਸੇਨ ਨਿਯਾਮਕਤਾ ਵੇਦਿਤਬ੍ਬਾ. ਇਮਿਨਾਵ ਨਯੇਨ ਵਤ੍ਥੁਆਦੀਸੁਪਿ ਵਿਨਿਚ੍ਛਯੋ ਵੇਦਿਤਬ੍ਬੋਤਿ.

ਤਤਿਯਂ.

੮-੯. ਇਦਾਨਿ ਚਤੁਤ੍ਥਂ ਦਸ੍ਸੇਤੁਂ ‘‘ਝਾਨਾਦਿਭੇਦ’’ਨ੍ਤਿਆਦਿਮਾਹ. ਤਤ੍ਥ ਅਤ੍ਤਨਿ ਨੋਸਨ੍ਤਂ ਅਤ੍ਤੁਪਨਾਯਿਕਞ੍ਚ ਪਚ੍ਚੁਪ੍ਪਨ੍ਨਭਵਸ੍ਸਿਤਞ੍ਚ ਅਞ੍ਞਾਪਦੇਸਰਹਿਤਞ੍ਚ ਝਾਨਾਦਿਭੇਦਂ ਕੋਟ੍ਠਾਸਂ ਕਤ੍ਵਾ ਵਾ ਏਕੇਕਂ ਕਤ੍ਵਾ ਵਾ ਕਾਯੇਨ ਵਾ ਵਾਚਾਯ ਵਾ ਵਿਞ੍ਞਤ੍ਤਿਪਥੇ ਦੀਪੇਨ੍ਤੋ ਨਾਧਿਮਾਨਿਕੋ ਞਾਤੇ ਚੁਤੋ ਭਵੇਤਿ ਸਮ੍ਬਨ੍ਧੋ. ਤਤ੍ਥ ਅਤ੍ਤਨਿ ਸਕਸਨ੍ਤਾਨੇ ਨੋਸਨ੍ਤਂ ਅਨੁਪ੍ਪਨ੍ਨਤ੍ਤਾਯੇਵ ਅਵਿਜ੍ਜਮਾਨਂ, ਏਤ੍ਥ ਨੋਸਨ੍ਤੋਤਿ ਅਤ੍ਥੇ ਤਪ੍ਪੁਰਿਸੋ. ਝਾਨਾਦਿਭੇਦਨ੍ਤਿ ਝਾਨਂ ਆਦਿ ਯਸ੍ਸ ‘‘ਵਿਮੋਕ੍ਖਸਮਾਧਿ ਸਮਾਪਤ੍ਤਿ ਞਾਣਦਸ੍ਸਨ ਮਗ੍ਗਭਾਵਨਾ ਫਲਸਚ੍ਛਿ ਕਿਰਿਯਾਕਿਲੇਸਪ੍ਪਹਾਨਵਿਨੀਵਰਣਤਾਚਿਤ੍ਤਸ੍ਸ ਸੁਞ੍ਞਾਗਾਰੇ ਅਭਿਰਤੀ’’ਤਿ (ਪਾਰਾ. ੧੯੮) ਵੁਤ੍ਤਸ੍ਸ ਸੋ ਝਾਨਾਦਿ, ਸੋਵ ਭੇਦੋ ਵਿਸੇਸੋਤਿ ਸਮਾਸੋ. ਤਂ ਝਾਨਾਦਿਭੇਦਂ ਉਤ੍ਤਰਿਮਨੁਸ੍ਸਧਮ੍ਮਂ. ਅਤ੍ਤੁਪਨਾਯਿਕਨ੍ਤਿ ‘‘ਅਯਂ ਮਯਿ ਅਤ੍ਥੀ’’ਤਿ ਆਰੋਚਨਵਸੇਨ ਅਤ੍ਤਨਿ ਉਪਨੀਯਤਿ, ‘‘ਅਹਂ ਵਾ ਏਤ੍ਥ ਸਨ੍ਦਿਸ੍ਸਾਮੀ’’ਤਿ ਅਤ੍ਤਾ ਉਪਨੀਯਤਿ ਏਤ੍ਥ ਧਮ੍ਮੇਤਿ ਵਾ ਅਤ੍ਤੁਪਨਾਯਿਕੋ, ਝਾਨਾਦਿਭੇਦੋ, ਤਂ. ਪਚ੍ਚੁਪ੍ਪਨ੍ਨਭਵਸ੍ਸਿਤਨ੍ਤਿ ਪਚ੍ਚੁਪ੍ਪਨ੍ਨਭਵੋ ਨਾਮ ਇਦਾਨਿ ਵਤ੍ਤਮਾਨੋ ਅਤ੍ਤਭਾਵੋ, ਤਨ੍ਨਿਸ੍ਸਿਤੋਤਿ ਸਮਾਸੋ, ਸੋ ਚ ਝਾਨਾਦਿਭੇਦੋਯੇਵ, ਤਂ.

ਅਞ੍ਞਾਪਦੇਸਰਹਿਤਨ੍ਤਿ ‘‘ਯੋ ਤੇ ਵਿਹਾਰੇ ਵਸਿ, ਸੋ ਭਿਕ੍ਖੁ ਪਠਮਂ ਝਾਨਂ ਸਮਾਪਜ੍ਜੀ’’ਤਿਆਦਿਨਾ (ਪਾਰਾ. ੨੨੦) ਨਯੇਨ ਅਞ੍ਞਸ੍ਸ ਅਪਦੇਸੋ, ਤੇਨ ਰਹਿਤੋ ਚਤ੍ਤੋਤਿ ਤਪ੍ਪੁਰਿਸਸਮਾਸੋ, ਸੋ ਰਹਿਤੋ ਤੇਨਾਤਿ ਵਾ ਬਹੁਬ੍ਬੀਹਿ, ਝਾਨਾਦਿਭੇਦੋਵ, ਤਂ. ਕੋਟ੍ਠਾਸਂ ਕਤ੍ਵਾ ਵਾਤਿ ‘‘ਪਠਮਂ ਝਾਨਂ ਦੁਤਿਯਂ ਝਾਨਂ ਸਮਾਪਜ੍ਜਿਂ, ਪਠਮਂ ਝਾਨਂ ਤਤਿਯਂ ਝਾਨਂ ਸਮਾਪਜ੍ਜਿ’’ਨ੍ਤਿਆਦਿਨਾ ਨਯੇਨ ਕੋਟ੍ਠਾਸਂ ਕਤ੍ਵਾ ਵਾ. ਏਕੇਕਂ ਕਤ੍ਵਾ ਵਾਤਿ ‘‘ਪਠਮਂ ਝਾਨਂ ਸਮਾਪਜ੍ਜਿਂ, ਦੁਤਿਯਂ ਝਾਨਂ ਸਮਾਪਜ੍ਜਿ’’ਨ੍ਤਿਆਦਿਨਾ ਨਯੇਨ ਏਕੇਕਂ ਕਤ੍ਵਾ ਵਾ. ਏਤ੍ਥ ਚ ਏਕਨ੍ਤਿ ਠਿਤੇ ਵਿਚ੍ਛਾਯਂ ਦ੍ਵਿਤ੍ਤਂ. ਏਤ੍ਥ ਪਨ ਕਤ੍ਵਾਤਿ ਕਰਣਕਿਰਿਯਾਯ ਏਕੇਕਵਸੇਨ ਭਿਨ੍ਨਸ੍ਸ ਝਾਨਾਦਿਨੋ ਅਤ੍ਥਸ੍ਸ ਸਮ੍ਬਨ੍ਧਨਿਚ੍ਛਾ ਵਿਚ੍ਛਾਤਿ ਵੇਦਿਤਬ੍ਬਾ. ਟੀਕਾਯਂ ਪਨ ‘‘ਕੋਟ੍ਠਾਸਂ ਵਾਤਿ ਏਤ੍ਥ ‘ਝਾਨਲਾਭੀ, ਵਿਮੋਕ੍ਖਲਾਭੀ, ਸਮਾਧਿਲਾਭੀ, ਸਮਾਪਤ੍ਤਿਲਾਭੀਮ੍ਹੀ’ਤਿ ਏਵਮਾਦਿਨਾ ਨਯੇਨ ਕੋਟ੍ਠਾਸਤੋ ਵਾਤਿ ਅਤ੍ਥੋ’’ਤਿ ਚ ‘‘ਏਕੇਕਂ ਵਾਤਿ ‘ਪਠਮਸ੍ਸ ਝਾਨਸ੍ਸ ਲਾਭੀ, ਦੁਤਿਯਸ੍ਸ ਝਾਨਸ੍ਸ ਲਾਭੀਮ੍ਹੀ’ਤਿ ਏਵਮਾਦਿਨਾ ਨਯੇਨ ਏਕੇਕਂ ਵਾਤਿ ਅਤ੍ਥੋ’’ਤਿ ਚ ਵੁਤ੍ਤਂ. ਸੋ ਪਾਲ਼ਿਯਂ ਅਟ੍ਠਕਥਾਯਞ੍ਚ ਅਵੁਤ੍ਤਕ੍ਕਮੋਤਿ ਵੇਦਿਤਬ੍ਬੋ. ਕਾਯੇਨ ਵਾਤਿ ਹਤ੍ਥਮੁਦ੍ਦਾਦਿਵਸੇਨ ਕਾਯੇਨ ਵਾ. ਵਾਚਾਤਿ ਏਤ੍ਥ ਯ-ਕਾਰੋ ਲੁਤ੍ਤਨਿਦ੍ਦਿਟ੍ਠੋ ‘‘ਅਲਜ੍ਜਿਤਾ’’ਤਿਆਦੀਸੁ ਵਿਯ. ਵਿਞ੍ਞਤ੍ਤਿਪਥੇਤਿ ਕਾਯਵਚੀਵਿਞ੍ਞਤ੍ਤੀਨਂ ਗਹਣਯੋਗ੍ਯੇ ਪਦੇਸੇ ਠਤ੍ਵਾਤਿ ਅਜ੍ਝਾਹਰਿਤਬ੍ਬਂ. ਦੀਪੇਨ੍ਤੋਤਿ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨ ਅਯਂ ਧਮ੍ਮੋ ਮਯਿ ਅਤ੍ਥੀ’’ਤਿ ਪਕਾਸੇਨ੍ਤੋ. ਨਾਧਿਮਾਨਿਕੋਤਿ ਅਪ੍ਪਤ੍ਤੇ ਪਤ੍ਤਸਞ੍ਞਿਤਾਸਙ੍ਖਾਤੋ ਅਧਿਕੋ ਮਾਨੋ, ਸੋ ਨਤ੍ਥਿ ਏਤਸ੍ਸਾਤਿ ਨਾਧਿਮਾਨਿਕੋ, ਭਿਕ੍ਖੁ. ਞਾਤੇਤਿ ਵਿਞ੍ਞੁਨਾ ਮਨੁਸ੍ਸਜਾਤਿਕੇਨ ਸਿਕ੍ਖਾਪਚ੍ਚਕ੍ਖਾਨੇ ਵੁਤ੍ਤਨਯੇਨ ਵਿਞ੍ਞਾਤੇ ਸਤਿ ਚੁਤੋ ਭਵੇ ਸਾਸਨਤੋਤਿ ਵਿਞ੍ਞਾਯਤਿ. ਅਞ੍ਞਾਪਦੇਸੇਨ ਦੀਪਯਤੋ ਪਨ ਥੁਲ੍ਲਚ੍ਚਯਂ. ਏਤ੍ਥ ਚ –

ਦੁਕ੍ਕਟਂ ਪਠਮਸ੍ਸੇਵ, ਸਾਮਨ੍ਤਮਿਤਿ ਵਣ੍ਣਿਤਂ;

ਸੇਸਾਨਂ ਪਨ ਤਿਣ੍ਣਮ੍ਪਿ, ਥੁਲ੍ਲਚ੍ਚਯਮੁਦੀਰਿਤਨ੍ਤਿ.

ਚਤੁਤ੍ਥਂ.

੧੦. ਇਦਾਨਿ ਚਤੁਨ੍ਨਮ੍ਪਿ ਚੇਤੇਸਮਸਂਵਾਸਤਂ ਅਭਬ੍ਬਤਞ੍ਚ ਦੀਪੇਤੁਂ ‘‘ਪਾਰਾਜਿਕੇਤੇ’’ਤਿਆਦਿ ਆਰਦ੍ਧਂ. ਏਤੇ ਚਤ੍ਤਾਰੋ ਪਾਰਾਜਿਕਾ ਪੁਗ੍ਗਲਾ ਯਥਾ ਪੁਰੇ ਪੁਬ੍ਬੇ ਗਿਹਿਕਾਲੇ, ਅਨੁਪਸਮ੍ਪਨ੍ਨਕਾਲੇ ਚ ਵਿਯ ਅਸਂਵਾਸਾਤਿ ਸਮ੍ਬਨ੍ਧੋ. ਸਹ ਵਸਨ੍ਤਿ ਯਸ੍ਮਾ ਸਬ੍ਬੇਪਿ ਲਜ੍ਜਿਨੋ ਏਤੇਸੁ ਕਮ੍ਮਾਦੀਸੁ ਨ ਏਕੋਪਿ ਤਤੋ ਬਹਿਦ੍ਧਾ ਸਨ੍ਦਿਸ੍ਸਤੀਤਿ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾਤਿ ਇਮੇ ਤਯੋ ਸਂਵਾਸਾ ਨਾਮ. ਤਤ੍ਥ ਅਪਲੋਕਨਾਦਿਕਂ ਚਤੁਬ੍ਬਿਧਮ੍ਪਿ ਸਙ੍ਘਕਮ੍ਮਂ ਸੀਮਾਪਰਿਚ੍ਛਿਨ੍ਨੇਹਿ ਪਕਤਤ੍ਤੇਹਿ ਭਿਕ੍ਖੂਹਿ ਏਕਤੋ ਕਤ੍ਤਬ੍ਬਤਾ ਏਕਕਮ੍ਮਂ ਨਾਮ. ਤਥਾ ਪਞ੍ਚਵਿਧੋਪਿ ਪਾਤਿਮੋਕ੍ਖੁਦ੍ਦੇਸੋ ਏਕਤੋ ਉਦ੍ਦਿਸਿਤਬ੍ਬਤ੍ਤਾ ਏਕੁਦ੍ਦੇਸੋ ਨਾਮ. ਪਞ੍ਞਤ੍ਤਂ ਪਨ ਸਿਕ੍ਖਾਪਦਂ ਸਬ੍ਬੇਹਿਪਿ ਲਜ੍ਜੀਪੁਗ੍ਗਲੇਹਿ ਸਮਂ ਸਿਕ੍ਖਿਤਬ੍ਬਭਾਵਤੋ ਸਮਸਿਕ੍ਖਤਾ ਨਾਮ. ਨਤ੍ਥਿ ਤੇ ਸਂਵਾਸਾ ਏਤੇਸਨ੍ਤਿ ਅਸਂਵਾਸਾ. ‘‘ਅਭਬ੍ਬਾ’’ਤਿਆਦੀਸੁ ਭਿਕ੍ਖੁਭਾਵਾਯਾਤਿ ਤੁਮਤ੍ਥੇ ਸਮ੍ਪਦਾਨਵਚਨਂ, ਤਸ੍ਮਾ ਯਥਾ ਸੀਸਚ੍ਛਿਨ੍ਨੋ ਜੀਵਿਤੁਂ ਅਭਬ੍ਬੋ, ਏਵਂ ਚਤ੍ਤਾਰੋਮੇ ਪੁਗ੍ਗਲਾ ਭਿਕ੍ਖੁਭਾਵਾਯ ਭਿਕ੍ਖੂ ਭਵਿਤੁਂ ਅਭਬ੍ਬਾਤਿ ਅਤ੍ਥੋ.

੧੧. ਇਦਾਨਿ ਪਰਿਯਾਯਾਣਤ੍ਤੀਹਿ ਸਮ੍ਭਵਨ੍ਤੇ ਦਸ੍ਸੇਤੁਂ ‘‘ਪਰਿਯਾਯੋ ਚਾ’’ਤਿਆਦਿਮਾਹ. ਪਰਿਯਾਯੋ ਚ ਆਣਤ੍ਤਿ ਚ ਤਤਿਯੇ ਮਨੁਸ੍ਸਵਿਗ੍ਗਹੇ ਲਬ੍ਭਤੀਤਿ ਸਮ੍ਬਨ੍ਧੋ. ਤਤ੍ਥ ਕਾਯਾਦੀਹਿ ਯਥਾਵੁਤ੍ਤੇਹਿ ‘‘ਯੋ ਏਵਂ ਮਰਤਿ, ਸੋ ਧਨਂ ਵਾ ਲਭਤੀ’’ਤਿ ਏਵਮਾਦਿਵਿਞ੍ਞਾਪਕੋ ਬ੍ਯਞ੍ਜਨਭੂਤੋ ਕਾਯਵਚੀਪਯੋਗੋ ਪਰਿਯਾਯੋ. ਇਮਿਨਾ ਇਦਂ ਦੀਪੇਤਿ – ਯਥਾ ਅਦਿਨ੍ਨਾਦਾਨੇ ‘‘ਆਦਿਯੇਯ੍ਯਾ’’ਤਿ (ਪਾਰਾ. ੯੨) ਵੁਤ੍ਤਤ੍ਤਾ ਪਾਰਿਯਾਯਕਥਾਯ ਮੁਚ੍ਚਤਿ, ਨ ਇਧ ਏਵਂ. ‘‘ਸਂਵਣ੍ਣੇਯ੍ਯਾ’’ਤਿ (ਪਾਰਾ. ੧੭੨) ਪਰਿਯਾਯਕਯਾਯਪਿ ਨ ਮੁਚ੍ਚਤੀਤਿ. ‘‘ਦੁਤਿਯੇ ਪਨਾ’’ਤਿਆਦੀਸੁ ਅਤ੍ਥੋ ਪਾਕਟੋਯੇਵ. ਏਵਮੁਪਰਿਪਿ ਪਾਕਟਮੁਪੇਕ੍ਖਿਸ੍ਸਾਮ.

੧੨. ਇਦਾਨਿ ਮੇਥੁਨਧਮ੍ਮਾਦੀਨਂ ਅਙ੍ਗਾਨਿ ਦਸ੍ਸੇਤੁਂ ‘‘ਸੇਵੇਤੂ’’ਤਿਆਦਿਮਾਹ. ਸੇਵੇਤੁਕਾਮਤਾਚਿਤ੍ਤਨ੍ਤਿ ਮੇਥੁਨਂ ਸੇਵੇਤੁਂ ਕਾਮੇਤੀਤਿ ਸੇਵੇਤੁਕਾਮੋ, ਤਸ੍ਸ ਭਾਵੋ ਨਾਮ ਤਣ੍ਹਾ, ਤਾਯ ਸੇਵੇਤੁਕਾਮਤਾਯ ਸਮ੍ਪਯੁਤ੍ਤਂ ਚਿਤ੍ਤਨ੍ਤਿ ਤਪ੍ਪੁਰਿਸੋ. ਮੇਥੁਨਧਮ੍ਮਸ੍ਸਾਤਿ ਮਿਥੁਨਾਨਂ ਇਤ੍ਥਿਪੁਰਿਸਾਨਂ ਇਦਨ੍ਤਿ ਮੇਥੁਨਂ, ਤਮੇਵ ਧਮ੍ਮੋਤਿ ਮੇਥੁਨਧਮ੍ਮੋ. ਇਧ ਪਨ ਉਪਚਾਰਵਸੇਨ ਪਾਰਾਜਿਕਾਪਤ੍ਤਿ ਮੇਥੁਨਧਮ੍ਮੋ ਨਾਮ. ਅਥ ਵਾ ਮੇਥੁਨੇਨ ਜਾਤੋ ਧਮ੍ਮੋ ਪਾਰਾਜਿਕਾਪਤ੍ਤਿ ਮੇਥੁਨਧਮ੍ਮੋ, ਤਸ੍ਸ ਮੇਥੁਨਧਮ੍ਮਸ੍ਸ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ. ਅਙ੍ਗਦ੍ਵਯਨ੍ਤਿ ਅਙ੍ਗਾਨਂ ਕਾਰਣਾਨਂ ਦ੍ਵਯਂ. ਬੁਧਾਤਿ ਵਿਨਯਧਰਾ ਵਿਞ੍ਞੁਨੋ.

੧੩. ਮਨੁਸ੍ਸਸਨ੍ਤਿ ਮਨੁਸ੍ਸਾਨਂ ਸਂ ਮਨੁਸ੍ਸਸਂ, ਤਦਾਯਤ੍ਤਵਤ੍ਥੁਕਾ ਚ. ਏਤੇਨ ਪੇਤਤਿਰਚ੍ਛਾਨਗਤਾਯਤ੍ਤਂ ਨਿਵਤ੍ਤੇਤਿ. ਤਥਾਸਞ੍ਞੀਤਿ ਤਥਾ ਤਾਦਿਸਾ ਸਞ੍ਞਾ ਤਥਾਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਤਥਾਸਞ੍ਞੀ. ਪਰਾਯਤ੍ਤਸਞ੍ਞਿਤਾ ਚਾਤਿ ਅਤ੍ਥੋ. ਭਾਵਪ੍ਪਧਾਨਾ ਇਮੇ ਨਿਦ੍ਦੇਸਾ, ਭਾਵਪਚ੍ਚਯਲੋਪੋ ਵਾ ‘‘ਬੁਦ੍ਧੇ ਰਤਨ’’ਨ੍ਤਿਆਦੀਸੁ (ਖੁ. ਪਾ. ੬.੩) ਵਿਯ. ਏਵਮੁਪਰਿਪਿ ਈਦਿਸੇਸੁ. ਥੇਯ੍ਯਚਿਤ੍ਤਨ੍ਤਿ ਥੇਨਭਾਵਸਙ੍ਖਾਤਂ ਚਿਤ੍ਤਞ੍ਚ. ਵਤ੍ਥੁਨੋ ਗਰੁਤਾਤਿ ਭਣ੍ਡਸ੍ਸ ਪਾਦਅਤਿਰੇਕਪਾਦਾਰਹਭਾਵੇਨ ਗਰੁਤਾ ਚ. ਊਨਪਞ੍ਚਮਾਸਕੇ ਵਾ ਅਤਿਰੇਕਮਾਸਕੇ ਵਾ ਥੁਲ੍ਲਚ੍ਚਯਂ. ਮਾਸਕੇ ਵਾ ਊਨਮਾਸਕੇ ਵਾ ਦੁਕ੍ਕਟਂ. ਅਵਹਾਰੋਤਿ ਪਞ੍ਚਵੀਸਤਿਯਾ ਅਵਹਾਰਾਨਂ ਅਞ੍ਞਤਰੇਨ ਅਵਹਰਣਞ੍ਚਾਤਿ ਇਮੇ ਪਞ੍ਚ ਅਦਿਨ੍ਨਾਦਾਨਹੇਤੁਯੋ ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿਯਾ ਅਙ੍ਗਾਨਿ.

੧੪. ਪਾਣੋ ਮਾਨੁਸ੍ਸਕੋਤਿ ਮਨੁਸ੍ਸਜਾਤਿਸਮ੍ਬਨ੍ਧੋ ਪਾਣੋ ਚ, ਪਾਣੋਤਿ ਹਿ ਵੋਹਾਰਤੋ ਸਤ੍ਤੋ, ਪਰਮਤ੍ਥਤੋ ਪਨ ਜੀਵਿਤਿਨ੍ਦ੍ਰਿਯਂ ਵੁਚ੍ਚਤਿ. ਪਾਣਸਞ੍ਞਿਤਾਤਿ ਪਾਣੋਤਿ ਸਞ੍ਞਿਤਾ ਚ, ਘਾਤਨਂ ਘਾਤੋ, ਸੋ ਏਵ ਚੇਤਨਾ ਘਾਤਚੇਤਨਾ, ‘‘ਵਧਾਮਿ ਨ’’ਨ੍ਤਿ ਏਵਂ ਪਵਤ੍ਤਾ ਸਾ ਚ, ਤਂਸਮੁਟ੍ਠਿਤੋ ਸਾਹਤ੍ਥਿਕਾਦੀਨਂ ਛਨ੍ਨਮਞ੍ਞਤਰੋ ਪਯੋਗੋ ਚ, ਤੇਨ ਪਯੋਗੇਨ ਮਰਣਞ੍ਚਾਤਿ ਏਤੇ ਯਥਾਵੁਤ੍ਤਾ ਪਞ੍ਚ ਵਧਹੇਤੁਯੋ ਪਾਣਘਾਤਾਪਜ੍ਜਿਤਬ੍ਬਆਪਤ੍ਤਿਯਾ ਅਙ੍ਗਾਨੀਤਿ ਅਤ੍ਥੋ.

੧੫. ਅਤ੍ਤਨਿ ਅਸਨ੍ਤਤਾਤਿ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਸਨ੍ਤਾਨੇ ਅਵਿਜ੍ਜਮਾਨਤਾ ਚ. ਪਾਪਮਿਚ੍ਛਤਾਯਾਰੋਚਨਾਤਿ ਯਾ ਸਾ ‘‘ਇਧੇਕਚ੍ਚੋ ਦੁਸ੍ਸੀਲੋ ਸਮਾਨੋ ‘ਸੀਲਵਾਤਿ ਮਂ ਜਨੋ ਜਾਨਾਤੂ’’ਤਿਆਦਿਨਾ (ਵਿਭ. ੮੫੧) ਨਯੇਨ ਵੁਤ੍ਤਾ ਪਾਪਇਚ੍ਛਤਾਯ ਸਮਨ੍ਨਾਗਤਾ, ਤਾਯ ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਆਰੋਚਨਾ ਚ. ਤਸ੍ਸਾਤਿ ਯਸ੍ਸ ਆਰੋਚੇਤਿ, ਤਸ੍ਸ. ਮਨੁਸ੍ਸਜਾਤਿਤਾਤਿ ਮਨੁਸ੍ਸਾਨਂ ਜਾਤਿ ਯਸ੍ਸ, ਤਸ੍ਸ ਭਾਵੋ ਮਨੁਸ੍ਸਜਾਤਿਤਾ, ਸਾ ਚ, ਨਞ੍ਞਾਪਦੇਸੋਤਿ ਨ ਅਞ੍ਞਾਪਦੇਸੋ ਅਞ੍ਞਾਪਦੇਸਾਭਾਵੋ ਚ, ਤਦੇਵ ਜਾਨਨਨ੍ਤਿ ਤਙ੍ਖਣਂਯੇਵ ਵਿਜਾਨਨਞ੍ਚਾਤਿ ਇਮਾਨਿ ਪਞ੍ਚ ਏਤ੍ਥ ਅਸਨ੍ਤਦੀਪਨੇ ਅਸ੍ਮਿਂ ਸਨ੍ਤਾਨੇ ਅਵਿਜ੍ਜਮਾਨਉਤ੍ਤਰਿਮਨੁਸ੍ਸਧਮ੍ਮਪ੍ਪਕਾਸਨਨਿਮਿਤ੍ਤੇ ਪਾਰਾਜਿਕੇ ਅਙ੍ਗਾਨਿ ਹੇਤੁਯੋਤਿ ਅਤ੍ਥੋ.

੧੬. ਏਵਂ ਤੇਸਮਸਂਵਾਸਤਾਭਬ੍ਬਤਾਦੀਨਿ ਦਸ੍ਸੇਤ੍ਵਾ ਇਦਾਨਿ ਨ ਤੇ ਚਤ੍ਤਾਰੋਵ, ਅਥ ਖੋ ਸਨ੍ਤਞ੍ਞੇਪੀਤਿ ਤੇ ਸਬ੍ਬੇਪਿ ਸਮੋਧਾਨੇਤ੍ਵਾ ਦਸ੍ਸੇਨ੍ਤੋ ‘‘ਅਸਾਧਾਰਣਾ’’ਤਿਆਦਿਮਾਹ. ਤਤ੍ਥ ਅਸਾਧਾਰਣਾਤਿ ਪਾਰਾਜਿਕਾ ਧਮ੍ਮਾ ਅਧਿਪ੍ਪੇਤਾ. ਤੇਨੇਵ ਚੇਤ੍ਥ ਪੁਲ੍ਲਿਙ੍ਗਨਿਦ੍ਦੇਸੋ. ਤਸ੍ਮਾ ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾ ਪਾਰਾਜਿਕਾ ਧਮ੍ਮਾ ਚਤ੍ਤਾਰੋ ਚਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਉਪਚਾਰਵਸੇਨ ਤੁ ਉਬ੍ਭਜਾਣੁਮਣ੍ਡਲਿਕਾਦਿਕਾ ਪਾਰਾਜਿਕਾਪਨ੍ਨਾ ਪਰਿਗ੍ਗਯ੍ਹਨ੍ਤਿ. ਤਾਸੁ ਯਾ ਅਵਸ੍ਸੁਤਾ ਅਵਸ੍ਸੁਤਸ੍ਸ ਮਨੁਸ੍ਸਪੁਰਿਸਸ੍ਸ ਅਕ੍ਖਕਾਨਂ ਅਧੋ ਜਾਣੁਮਣ੍ਡਲਾਨਂ ਕਪ੍ਪਰਾਨਞ੍ਚ ਉਪਰਿ ਕਾਯਸਂਸਗ੍ਗਂ ਸਾਦਿਯਤਿ, ਅਯਂ ਉਬ੍ਭਜਾਣੁਮਣ੍ਡਲਿਕਾ. ਯਾ ਪਨ ਅਞ੍ਞਿਸ੍ਸਾ ਭਿਕ੍ਖੁਨਿਯਾ ਪਾਰਾਜਿਕਂ ਪਟਿਚ੍ਛਾਦੇਤਿ, ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਯਾ ਉਕ੍ਖਿਤ੍ਤਕਂ ਭਿਕ੍ਖੁਂ ਤਸ੍ਸਾ ਦਿਟ੍ਠਿਯਾ ਗਹਣਵਸੇਨ ਅਨੁਵਤ੍ਤਤਿ, ਸਾ ਉਕ੍ਖਿਤ੍ਤਾਨੁਵਤ੍ਤਿਕਾ. ਕਾਯਸਂਸਗ੍ਗਰਾਗੇਨ ਤਿਨ੍ਤਸ੍ਸ ਹਤ੍ਥਗ੍ਗਹਣਂ ਸਙ੍ਘਾਟਿਕਣ੍ਣਗ੍ਗਹਣਂ ਕਾਯਸਂਸਗ੍ਗਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਠਾਨਂ ਠਤ੍ਵਾ ਸਲ੍ਲਪਨਂ ਸਙ੍ਕੇਤਗਮਨਂ ਪੁਰਿਸਸ੍ਸਾਗਮਨਸਾਦਿਯਨਂ ਪਟਿਚ੍ਛਨ੍ਨੋਕਾਸਵਵਿਸਨਂ ਹਤ੍ਥਪਾਸੇ ਠਤ੍ਵਾ ਕਾਯੋਪਸਂਹਰਣਨ੍ਤਿ ਇਮਾਨਿ ਅਟ੍ਠ ਵਤ੍ਥੂਨਿ ਯਸ੍ਸਾ ਅਵਸ੍ਸੁਤਾਯ, ਸਾ ਅਟ੍ਠਵਤ੍ਥੁਕਾ ਨਾਮ.

ਅਭਬ੍ਬਕਾ ਏਕਾਦਸ ਚਾਤਿ ਏਤ੍ਥ ਪਣ੍ਡਕੋ ਥੇਯ੍ਯਸਂਵਾਸਕੋ ਤਿਤ੍ਥਿਯਪਕ੍ਕਨ੍ਤਕੋ ਤਿਰਚ੍ਛਾਨਗਤੋ ਮਾਤੁਘਾਤਕੋ ਪਿਤੁਘਾਤਕੋ ਅਰਹਨ੍ਤਘਾਤਕੋ ਭਿਕ੍ਖੁਨਿਦੂਸਕੋ ਸਙ੍ਘਭੇਦਕੋ ਲੋਹਿਤੁਪ੍ਪਾਦਕੋ ਉਭਤੋਬ੍ਯਞ੍ਜਨਕੋਤਿ ਇਮੇ ਅਭਬ੍ਬਾ ਏਕਾਦਸ ਚ. ਤੇਸੁ ਪਣ੍ਡਕੋਤਿ ਓਪਕ੍ਕਮਿਕਨਪੁਂਸਕਪਣ੍ਡਕਾ ਚ ਪਣ੍ਡਕਭਾਵਪਕ੍ਖੇ ਪਕ੍ਖਪਣ੍ਡਕੋ ਚ ਇਧ ਅਧਿਪ੍ਪੇਤਾ. ਆਸਿਤ੍ਤਉਸੂਯਪਣ੍ਡਕਾਨਂ ਪਨ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਨ ਵਾਰਿਤਾ. ਥੇਯ੍ਯਸਂਵਾਸਕੋ ਪਨ ਲਿਙ੍ਗਤ੍ਥੇਨਕਾਦਿਵਸੇਨ ਤਿਵਿਧੋ. ਤਤ੍ਥ ਸਯਂ ਪਬ੍ਬਜਿਤਤ੍ਤਾ ਲਿਙ੍ਗਮਤ੍ਤਂ ਥੇਨੇਤੀਤਿ ਲਿਙ੍ਗਤ੍ਥੇਨਕੋ. ਭਿਕ੍ਖੁਵਸ੍ਸਗਣਨਾਦਿਕਂ ਸਂਵਾਸਂ ਥੇਨੇਤੀਤਿ ਸਂਵਾਸਤ੍ਥੇਨਕੋ. ਸਿਕ੍ਖਂ ਪਚ੍ਚਕ੍ਖਾਯ ਏਵਂ ਪਟਿਪਜ੍ਜਨ੍ਤੇਪਿ ਏਸੇਵ ਨਯੋ. ਯਥਾਵੁਤ੍ਤਮੁਭਯਂ ਥੇਨੇਤੀਤਿ ਉਭਯਤ੍ਥੇਨਕੋ. ਠਪੇਤ੍ਵਾ ਪਨ ਇਮਂ ਤਿਵਿਧਂ –

ਰਾਜਦੁਬ੍ਭਿਕ੍ਖਕਨ੍ਤਾਰ-ਰੋਗਵੇਰਿਭਯੇਨ ਵਾ;

ਚੀਵਰਾਹਰਣਤ੍ਥਂ ਵਾ, ਲਿਙ੍ਗਂ ਆਦਿਯਤੀਧ ਯੋ.

ਸਂਵਾਸਂ ਨਾਧਿਵਾਸੇਤਿ, ਯਾਵ ਸੋ ਸੁਦ੍ਧਮਾਨਸੋ;

ਥੇਯ੍ਯਸਂਵਾਸਕੋ ਨਾਮ, ਤਾਵ ਏਸ ਨ ਵੁਚ੍ਚਤੀਤਿ. (ਮਹਾਵ. ਅਟ੍ਠ. ੧੧੦; ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ);

ਤਿਤ੍ਥਿਯਪਕ੍ਕਨ੍ਤਕਾਦਯੋ ਤੁ ਤਂਤਂਵਚਨਤ੍ਥਾਨੁਸਾਰੇਨ ਵੇਦਿਤਬ੍ਬਾ. ਤਿਰਚ੍ਛਾਨਗਤੋ ਪਨ ਠਪੇਤ੍ਵਾ ਮਨੁਸ੍ਸਜਾਤਿਕਂ ਅਵਸੇਸੋ ਸਬ੍ਬੋ ਵੇਦਿਤਬ੍ਬੋ. ਇਮੇ ਏਕਾਦਸ ਪੁਗ੍ਗਲਾ ਭਿਕ੍ਖੁਭਾਵਾਯ ਅਭਬ੍ਬਤ੍ਤਾ ਪਾਰਾਜਿਕਾਪਨ੍ਨਸਦਿਸਤਾਯ ‘‘ਪਾਰਾਜਿਕਾ’’ਤਿ ਵੁਚ੍ਚਨ੍ਤਿ. ਵਿਬ੍ਭਨ੍ਤਾ ਭਿਕ੍ਖੁਨੀਤਿ ਗਿਹਿਨਿਵਾਸਨਨਿਵਤ੍ਥਾ ਭਿਕ੍ਖੁਨੀ ਚ. ਸਾ ਹਿ ਏਤ੍ਤਾਵਤਾ ਪਾਰਾਜਿਕਾ. ਮੁਦੁਕਾ ਪਿਟ੍ਠਿ ਯਸ੍ਸ, ਸੋ ਚ. ਸੋ ਹਿ ਅਨਭਿਰਤਿਯਾ ਪੀਲ਼ਿਤੋ ਯਦਾ ਅਤ੍ਤਨੋ ਅਙ੍ਗਜਾਤਂ ਅਤ੍ਤਨੋ ਵਚ੍ਚਮੁਖਮਗ੍ਗੇਸੁ ਪਵੇਸੇਤਿ, ਤਦਾ ਪਾਰਾਜਿਕੋ ਹੋਤਿ.

੧੭-੧੮. ਲਮ੍ਬਮਾਨਮਙ੍ਗਜਾਤਮੇਤਸ੍ਸਾਤਿ ਲਮ੍ਬੀ. ਸੋ ਯਥਾਵੁਤ੍ਤੇਸੁ ਪਵੇਸਿਤੋ ਪਾਰਾਜਿਕੋ. ਮੁਖੇਨ ਗਣ੍ਹਨ੍ਤੋ ਅਙ੍ਗਜਾਤਂ ਪਰਸ੍ਸ ਚਾਤਿ ਯੋ ਅਨਭਿਰਤਿਯਾ ਪੀਲ਼ਿਤੋ ਪਰਸ੍ਸ ਸੁਤ੍ਤਸ੍ਸ ਵਾ ਮਤਸ੍ਸ ਵਾ ਅਙ੍ਗਜਾਤਂ ਮੁਖੇਨ ਗਣ੍ਹਾਤਿ, ਸੋ ਪਰਸ੍ਸ ਅਙ੍ਗਜਾਤਂ ਮੁਖੇਨ ਗਣ੍ਹਨ੍ਤੋ ਚ. ਤਤ੍ਥੇਵਾਭਿਨਿਸੀਦਨ੍ਤੋਤਿ ਯੋ ਅਨਭਿਰਤਿਯਾ ਪੀਲ਼ਿਤੋ ਤਤ੍ਥੇਵ ਪਰਸ੍ਸ ਅਙ੍ਗਜਾਤੇ ਵਚ੍ਚਮਗ੍ਗੇਨ ਅਭਿਨਿਸੀਦਤਿ, ਸੋ ਚਾਤਿ ਏਤੇ ਦ੍ਵਯਂਦ੍ਵਯਸਮਾਪਤ੍ਤਿਯਾ ਅਭਾਵੇਪਿ ਮਗ੍ਗੇ ਮਗ੍ਗਪ੍ਪਵੇਸਨਹੇਤੁ ਮੇਥੁਨਸ੍ਸ ਅਨੁਲੋਮਿਕਾ ਚਤ੍ਤਾਰੋ ਚ. ਇਧਾਗਤਾ ਚਤ੍ਤਾਰੋਤਿ ਇਧ ਖੁਦ੍ਦਸਿਕ੍ਖਾਯਂ ਯਥਾਵੁਤ੍ਤਾ ਮੇਥੁਨਧਮ੍ਮਾ ਪਾਰਾਜਿਕਾਦਯੋ ਚਤ੍ਤਾਰੋ ਚਾਤਿ ਸਮੋਧਾਨਾ ਪਿਣ੍ਡੀਕਰਣਵਸੇਨ ਚਤੁਵੀਸਤਿ ਪਾਰਾਜਿਕਾ ਭਵਨ੍ਤੀਤਿ ਸੇਸੋ. ਏਤ੍ਥ ਚ ਗਾਥਾਬਨ੍ਧਵਸੇਨ ਰਸ੍ਸਂ ਕਤ੍ਵਾ ‘‘ਪਰਾਜਿਕਾ’’ਤਿ ਵੁਤ੍ਤਂ. ਏਤ੍ਥਾਹ – ਮਾਤੁਘਾਤਕਾਦਯੋ ਤਤਿਯਂ ਪਾਰਾਜਿਕਂ ਆਪਨ੍ਨਾ, ਭਿਕ੍ਖੁਨਿਦੂਸਕੋ, ਮੁਦੁਪਿਟ੍ਠਿਕਾਦਯੋ ਚਤ੍ਤਾਰੋ ਚ ਪਠਮਪਾਰਾਜਿਕਂ ਆਪਨ੍ਨਾ ਏਵਾਤਿ ਕੁਤੋ ਚਤੁਵੀਸਤੀਤਿ? ਵੁਚ੍ਚਤੇ – ਮਾਤੁਘਾਤਕਾਦਯੋ ਹਿ ਚਤ੍ਤਾਰੋ ਇਧ ਅਨੁਪਸਮ੍ਪਨ੍ਨਾ ਏਵ ਅਧਿਪ੍ਪੇਤਾ. ਮੁਦੁਪਿਟ੍ਠਿਕਾਦਯੋ ਚਤ੍ਤਾਰੋ ਕਿਞ੍ਚਾਪਿ ਪਠਮਪਾਰਾਜਿਕੇਨ ਸਙ੍ਗਹਿਤਾ, ਯਸ੍ਮਾ ਪਨ ਏਕੇਨ ਪਰਿਯਾਯੇਨ ਮੇਥੁਨਧਮ੍ਮਂ ਅਪ੍ਪਟਿਸੇਵਿਨੋ ਹੋਨ੍ਤਿ, ਤਸ੍ਮਾ ਵਿਸੁਂ ਵੁਤ੍ਤਾਤਿ.

ਪਾਰਾਜਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.