੪੪. ਉਪੋਸਥਨਿਦ੍ਦੇਸਵਣ੍ਣਨਾ

੪੧੧. ਸੁਤ੍ਤੁਦ੍ਦੇਸੋ ਸਙ੍ਘਸ੍ਸੇਵ. ਸੇਸਾਨਨ੍ਤਿ ਦ੍ਵਿਨ੍ਨਂ ਤਿਣ੍ਣਂ ਵਾ.

੪੧੨. ਪੁਬ੍ਬਕਰਣੇ ਪੁਬ੍ਬਕਿਚ੍ਚੇ, ਪਤ੍ਤਕਲ੍ਲੇ ਸਮਾਨਿਤੇਤਿ ਸਬ੍ਬਪਠਮਂ ਕਤ੍ਤਬ੍ਬਂ ਪੁਬ੍ਬਕਰਣਂ. ਤਦਨਨ੍ਤਰਂ ਕਤ੍ਤਬ੍ਬਂ ਪੁਬ੍ਬਕਿਚ੍ਚਂ ਨਾਮ. ਏਤ੍ਥ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਰਣਨ੍ਤਿ ਵੁਚ੍ਚਤਿ.

‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾ ਚ ਓਵਾਦੋ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤੀ’’ਤਿ –. (ਮਹਾਵ. ਅਟ੍ਠ. ੧੬੮);

ਏਵਂ ਅਟ੍ਠਕਥਾਯਂ ਵੁਤ੍ਤਨਯੇਨ ਪੁਬ੍ਬਕਰਣਞ੍ਚ ਪੁਬ੍ਬਕਿਚ੍ਚਞ੍ਚ ਵੇਦਿਤਬ੍ਬਂ.

‘‘ਉਪੋਸਥੋ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

ਪਤ੍ਤਕਲ੍ਲਨ੍ਤਿ ਵੁਚ੍ਚਤੀ’’ਤਿ –. (ਮਹਾਵ. ਅਟ੍ਠ. ੧੬੮);

ਵੁਤ੍ਤਵਸੇਨ ਪਤ੍ਤਕਲ੍ਲੇ ਸਮਾਨਿਤੇ, ਪਜ੍ਜਿਤੇਤਿ ਅਤ੍ਥੋ. ‘‘ਪਞ੍ਚਿਮੇ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਾ. ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਦੁਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਤਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਦ੍ਵੇ ਅਨਿਯਤੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਚਤੁਤ੍ਥੋ ਪਾਤਿਮੋਕ੍ਖੁਦ੍ਦੇਸੋ. ਵਿਤ੍ਥਾਰੇਨੇਵ ਪਞ੍ਚਮੋ. ਇਮੇ ਖੋ ਭਿਕ੍ਖਵੇ ਪਞ੍ਚ ਪਾਤਿਮੋਕ੍ਖੁਦ੍ਦੇਸਾ’’ਤਿ (ਮਹਾਵ. ੧੫੦) ਵੁਤ੍ਤਤ੍ਤਾ ਸੋ ਸੁਤ੍ਤੁਦ੍ਦੇਸੋ ਪਞ੍ਚਧਾ ਵਿਭਾਵਿਤੋਤਿ ਅਤ੍ਥੋ.

੪੧੩. ਵਿਨਾਨ੍ਤਰਾਯਨ੍ਤਿ (ਮਹਾਵ. ੧੫੦) ਰਾਜਨ੍ਤਰਾਯਾਦਿਦਸਵਿਧਂ ਅਨ੍ਤਰਾਯਂ ਵਿਨਾ ਸਙ੍ਖੇਪੇਨੁਦ੍ਦੇਸੋ ਵਿਨਿਵਾਰਿਤੋ ਪਟਿਕ੍ਖਿਤ੍ਤੋਤਿ ਅਤ੍ਥੋ. ਥੇਰੋਵਾਤਿ ਸਙ੍ਘਤ੍ਥੇਰੋਵ. ਏਤ੍ਥਾਤਿ ਪਞ੍ਚਸੁ ਉਦ੍ਦੇਸੇਸੁ. ‘‘ਦ੍ਵੀਸੁ ਵਾ ਤੀਸੁ ਵਾ ਵਿਸਦੇਸੁ ਥੇਰੋਵ ਇਸ੍ਸਰੋ’’ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਅਵਤ੍ਤਨ੍ਤੇਪਿ ਅਨ੍ਤਰਾਯੇ ਸਂਖਿਤ੍ਤੇਨ ਉਦ੍ਦਿਸਿਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਕਤ੍ਥ ਵੁਤ੍ਤਨ੍ਤਿ ਚੇ? ‘‘ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ, ਤਸ੍ਸਾਧੇਯ੍ਯ’’ਨ੍ਤਿ (ਮਹਾਵ. ੧੫੫) ਵੁਤ੍ਤਪਾਲ਼ਿਯਾ ਅਟ੍ਠਕਥਾਯਂ ‘‘ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋਤਿ ਏਤ੍ਥ ਕਿਞ੍ਚਾਪਿ ਦਹਰਸ੍ਸਾਪਿ ਬ੍ਯਤ੍ਤਸ੍ਸ ਪਾਤਿਮੋਕ੍ਖੋ ਅਨੁਞ੍ਞਾਤੋ, ਅਥ ਖੋ ਏਤ੍ਥ ਅਯਮਧਿਪ੍ਪਾਯੋ – ਸਚੇ ਸਙ੍ਘਤ੍ਥੇਰਸ੍ਸ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਪਾਤਿਮੋਕ੍ਖੁਦ੍ਦੇਸਾ ਨਾਗਚ੍ਛਨ੍ਤਿ, ਦ੍ਵੇ ਪਨ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ ਹੋਨ੍ਤਿ, ਥੇਰਾਯਤ੍ਤੋਵ ਪਾਤਿਮੋਕ੍ਖੋ. ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਤੋਵ ਹੋਤੀ’’ਤਿ ਅਤ੍ਥੋ ਵੁਤ੍ਤੋ. ਪਾਲ਼ਿਯਮ੍ਪਿ ਵੁਤ੍ਤਮੇਵ ‘‘ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ ‘ਗਚ੍ਛ, ਆਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾ ਆਗਚ੍ਛਾ’’’ਤਿ (ਮਹਾਵ. ੧੬੩).

੪੧੪. ਉਦ੍ਦਿਸਨ੍ਤੇ ਵਾਤਿ (ਮਹਾਵ. ੧੭੨) ਪਾਤਿਮੋਕ੍ਖੇ ਉਦ੍ਦਿਸਿਯਮਾਨੇ ਸਮਾ ਵਾ ਥੋਕਤਰਾ ਵਾ ਯਦਿ ਆਗਚ੍ਛੇਯ੍ਯੁਂ, ਉਦ੍ਦਿਟ੍ਠਂ ਸੁਉਦ੍ਦਿਟ੍ਠਂ, ਤੇਹਿ ਸਦ੍ਧਿਂ ਨਿਸੀਦਿਤ੍ਵਾ ਅਵਸੇਸਕਂ ਸੋਤਬ੍ਬਨ੍ਤਿ ਅਤ੍ਥੋ.

੪੧੫. ਉਦ੍ਦਿਟ੍ਠਮਤ੍ਤੇ (ਮਹਾਵ. ੧੭੨) ਵਾ ਸਕਲਾਯ ਵਾ ਏਕਚ੍ਚਾਯ ਵਾ ਪਰਿਸਾਯ ਵੁਟ੍ਠਿਤਾਯ ਸਮਾ ਵਾ ਥੋਕਤਰਾ ਵਾ ਯਦਿ ਆਗਚ੍ਛੇਯ੍ਯੁਨ੍ਤਿ ਸਮ੍ਬਨ੍ਧੋ. ਪਾਰਿਸੁਦ੍ਧਿਨ੍ਤਿ ਪਾਰਿਸੁਦ੍ਧਿਉਪੋਸਥਂ. ਕਰੇਯ੍ਯੇਸਨ੍ਤਿ ਕਰੇਯ੍ਯ ਏਸਂ, ਏਤੇਸਂ ਸਨ੍ਤਿਕੇਤਿ ਅਤ੍ਥੋ. ਬਹੁਕਾਥ ਚੇਤਿ ਅਥ ਬਹੁਕਾ ਚੇ, ਪੁਨ ਆਗਤਾ ਬਹੁਕਾ ਚੇਤਿ ਅਤ੍ਥੋ,. ‘‘ਉਦ੍ਦਿਸ੍ਸਮਾਨੇ, ਉਦ੍ਦਿਟ੍ਠਮਤ੍ਤੇ ਏਕਚ੍ਚਾਯ ਵੁਟ੍ਠਿਤਾਯ ਸਕਲਾਯ ਵੁਟ੍ਠਿਤਾਯਾ’’ਤਿ (ਮਹਾਵ. ੧੭੨) ਆਗਤੇਸੁ ਸਬ੍ਬਵਿਕਪ੍ਪੇਸੁ ਪੁਬ੍ਬਕਿਚ੍ਚਂ ਕਤ੍ਵਾ ਪੁਨ ਆਦਿਤੋ ਪਟ੍ਠਾਯ ਪਾਤਿਮੋਕ੍ਖਂ ਉਦ੍ਦਿਸੇਤਿ ਅਤ੍ਥੋ.

੪੧੬. ਇਤਰਾਨਨ੍ਤਿ ਆਗਨ੍ਤੁਕਾਨਂ. ਸਚੇਤਰੋਤਿ ਸਚੇ ਚਾਤੁਦ੍ਦਸਿਕੋਤਿ ਅਤ੍ਥੋ. ਸਮਾਨੇਤਰੇਨੁਵਤ੍ਤਨ੍ਤੂਤਿ ਸਮਾ ਵਾ ਊਨਾ ਵਾ ਇਤਰੇ ਆਗਨ੍ਤੁਕਾ ਪੁਰਿਮਾਨਂ ਆਵਾਸਿਕਾਨਂ ਅਨੁਵਤ੍ਤਨ੍ਤੂਤਿ ਅਤ੍ਥੋ. ਸਚੇਧਿਕਾਤਿ ਆਗਨ੍ਤੁਕਾ ਸਚੇ ਅਧਿਕਾ, ਪੁਰਿਮਾ ਆਵਾਸਿਕਾ ਅਨੁਵਤ੍ਤਨ੍ਤੂਤਿ ਅਤ੍ਥੋ. ਸੇਸੇਪ੍ਯਯਂ ਨਯੋਤਿ ‘‘ਆਗਨ੍ਤੁਕਾਨਂ ਪਨ੍ਨਰਸੋ ਹੋਤਿ, ਆਵਾਸਿਕਾਨਂ ਚਾਤੁਦ੍ਦਸੋ’’ਤਿ ਇਤਰੇਪਿ ਸਮਥੋਕਾ ਆਗਨ੍ਤੁਕਾ ਆਵਾਸਿਕਾਨਂ ਅਨੁਵਤ੍ਤਨ੍ਤੂਤਿਆਦਿਨਾ ਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਅਤ੍ਥੋ.

੪੧੭. ਮੂਲਟ੍ਠਾਤਿ ਆਵਾਸਿਕਾ. ਸਮਥੋਕਾਨਂ ਆਗਨ੍ਤੁਕਾਨਂ. ਸਾਮਗ੍ਗਿਂ ਦੇਨ੍ਤੁ ਕਾਮਤੋਤਿ ਯਦਿ ਇਚ੍ਛਨ੍ਤਿ, ਦੇਨ੍ਤੂਤਿ ਅਤ੍ਥੋ.

੪੧੮. ਨੋ ਚੇ ਦੇਨ੍ਤਿ, ਆਗਨ੍ਤੁਕੇਹਿ ਬਹਿ ਗਨ੍ਤ੍ਵਾਨ ਉਪੋਸਥੋ ਕਾਤਬ੍ਬੋਤਿ ਅਤ੍ਥੋ. ਅਨਿਚ੍ਛਾਯ ਸਾਮਗ੍ਗੀ ਦੇਯ੍ਯਾਤਿ ਸਮ੍ਬਨ੍ਧੋ.

੪੧੯. ‘‘ਨ ਭਿਕ੍ਖਵੇ ਪਾਤਿਮੋਕ੍ਖੁਦ੍ਦੇਸਕੇਨ ਸਞ੍ਚਿਚ੍ਚ ਨ ਸਾਵੇਤਬ੍ਬਂ. ਯੋ ਨ ਸਾਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਵੁਤ੍ਤਤ੍ਤਾ (ਮਹਾਵ. ੧੫੪) ‘‘ਸਾਵੇਯ੍ਯ ਸੁਤ੍ਤ’’ਨ੍ਤਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਕੇਨ ਵਾਯਮਿਤੁਂ ਕਥਂ ਸਾਵੇਯ੍ਯਨ੍ਤਿ, ਵਾਯਮਨ੍ਤਸ੍ਸ ਅਨਾਪਤ੍ਤੀ’’ਤਿ (ਮਹਾਵ. ੧੫੪) ਵੁਤ੍ਤਤ੍ਤਾ ‘‘ਸਞ੍ਚਿਚ੍ਚ ਅਸ੍ਸਾਵੇਨ੍ਤਸ੍ਸ ਦੁਕ੍ਕਟ’’ਨ੍ਤਿ ਵੁਤ੍ਤਂ.

੪੨੦. ਤਥਾਤਿ ਦੁਕ੍ਕਟਨ੍ਤਿ ਅਤ੍ਥੋ. ਕਲ੍ਲੋਤਿ ਅਗਿਲਾਨੋ. ਪੇਸਿਤੋਤਿ ਆਣਤ੍ਤੋ. ‘‘ਨ ਭਿਕ੍ਖਵੇ ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਸਮ੍ਮਜ੍ਜਿਤਬ੍ਬਂ. ਯੋ ਨ ਸਮ੍ਮਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿ (ਮਹਾਵ. ੧੫੯) ਵੁਤ੍ਤਂ.

੪੨੧-੩. ਇਦਾਨਿ ਪਾਰਿਸੁਦ੍ਧਿਉਪੋਸਥਂ ਦਸ੍ਸੇਤੁਂ ‘‘ਸਮ੍ਮਜ੍ਜਿਤ੍ਵਾ’’ਤਿਆਦਿ ਵੁਤ੍ਤਂ. ਅਞ੍ਜਲਿਂ (ਮਹਾਵ. ੧੬੮) ਪਗ੍ਗਯ੍ਹਾਤਿ ਸਮ੍ਬਨ੍ਧੋ. ਤੇਤਿ ਅਵਸੇਸਾ ਦ੍ਵੇ ਏਵਂ ਸਮੁਦੀਰਿਯਾ ਵਤ੍ਤਬ੍ਬਾਤਿ ਅਤ੍ਥੋ. ਏਕਂਸਂ ਉਤ੍ਤਰਾਸਙ੍ਗਾਦਿਕਰਣਵਸੇਨ ਸਮਤ੍ਤਪੁਬ੍ਬਾਰਮ੍ਭੇਨ ਤੇ ਦ੍ਵੇ ਭਿਕ੍ਖੂ ਨਵੇਨ ਏਵਮੀਰਿਯਾ ਵਤ੍ਤਬ੍ਬਾਤਿ ਅਤ੍ਥੋ.

੪੨੪-੫. ਇਦਾਨਿ ਦ੍ਵੀਹਿ ਕਤ੍ਤਬ੍ਬਂ ਦਸ੍ਸੇਤੁਂ ‘‘ਦ੍ਵੀਸੁ ਥੇਰੇਨਾ’’ਤਿ ਵੁਤ੍ਤਂ.

੪੨੬. ਏਤ੍ਤਾਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ (ਮਹਾਵ. ੧੬੮) ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਣ੍ਣਂ ਪਾਰਿਸੁਦ੍ਧਿਉਪੋਸਥਂ ਕਾਤੁ’’ਨ੍ਤਿ (ਮਹਾਵ. ੧੬੮) ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵਿਨ੍ਨਂ ਪਾਰਿਸੁਦ੍ਧਿਉਪੋਸਥਂ ਕਾਤੁ’’ਨ੍ਤਿ (ਮਹਾਵ. ੧੬੮) ਚ ਵੁਤ੍ਤਂ ਸਙ੍ਘੁਪੋਸਥਞ੍ਚ ਪਾਰਿਸੁਦ੍ਧਿਉਪੋਸਥਞ੍ਚ ਦਸ੍ਸੇਤ੍ਵਾ ਇਦਾਨਿ ਯਤ੍ਥ ਏਕੋ ਭਿਕ੍ਖੁ ਵਿਹਰਤਿ, ਤਸ੍ਸ ਅਨੁਞ੍ਞਾਤਂ ਅਧਿਟ੍ਠਾਨੁਪੋਸਥਂ ਦਸ੍ਸੇਤੁਂ ‘‘ਪੁਬ੍ਬਕਿਚ੍ਚ’’ਨ੍ਤਿਆਦਿਮਾਹ. ਏਤ੍ਥ ਚ ਪੁਬ੍ਬਕਿਚ੍ਚਂ ਨਾਮ ਸਮ੍ਮਜ੍ਜਨਾਦਿਕਂਯੇਵ.

੪੨੭. ਸਙ੍ਘੁਪੋਸਥਪਾਰਿਸੁਦ੍ਧਿਉਪੋਸਥਅਧਿਟ੍ਠਾਨਉਪੋਸਥਾਨਂ ਵਸੇਨ ਤਂ ਤਂ ਉਪੋਸਥਂ ਯਦਿ ਕਯਿਰੁਨ੍ਤਿ ਸਮ੍ਬਨ੍ਧੋ.

੪੨੮. ਵਗ੍ਗੇ (ਮਹਾਵ. ੧੭੩) ਚ ਸਮਗ੍ਗੇ ਚ ‘‘ਵਗ੍ਗੋ’’ਤਿ ਸਞ੍ਞਿਨੋ ਚ ‘‘ਵਗ੍ਗੋ ਨੁ ਖੋ, ਸਮਗ੍ਗੋ ਨੁ ਖੋ’’ਤਿ ਏਵਂ ਵਿਮਤਿਸ੍ਸ ਚ ਦੁਕ੍ਕਟਂ, ‘‘ਨਸ੍ਸਨ੍ਤੇਤੇ ਵਿਨਸ੍ਸਨ੍ਤੇਤੇ, ਕੋ ਤੇਹਿ ਅਤ੍ਥੋ’’ਤਿ ਏਵਂ ਅਨਾਗਤਾਨਂ ਭਿਕ੍ਖੂਨਂ ਅਤ੍ਥਿਭਾਵਂ ਞਤ੍ਵਾ ਭੇਦਾਧਿਪ੍ਪਾਯੇਨ ਉਪੋਸਥਂ ਕਰੋਤੋ ਥੁਲ੍ਲਚ੍ਚਯਂ ਹੋਤੀਤਿ ਅਤ੍ਥੋ. ਤਦੁਭਯੇਪਿ ‘‘ਸਮਗ੍ਗੋ’’ਤਿ ਸਞ੍ਞਿਨੋ ਅਨਾਪਤ੍ਤਿ.

੪੨੯-੪੩੦. ਸੇਸਸਹਧਮ੍ਮਿਕਾ ਨਾਮ ਭਿਕ੍ਖੁਂ ਠਪੇਤ੍ਵਾ ਅਵਸੇਸਾ ਚਤ੍ਤਾਰੋ. ਅਭਬ੍ਬਸ੍ਸਾਤਿ ਏਤ੍ਥ ਪਣ੍ਡਕਥੇਯ੍ਯਸਂਵਾਸਕ ਤਿਤ੍ਥਿਯਪਕ੍ਕਨ੍ਤਕ ਤਿਰਚ੍ਛਾਨਗਤ ਮਾਤੁਘਾਤਕ ਪਿਤੁਘਾਤਕ ਅਰਹਨ੍ਤਘਾਤਕ ਭਿਕ੍ਖੁਨਿਦੂਸਕ ਸਙ੍ਘਭੇਦਕ ਲੋਹਿਤੁਪ੍ਪਾਦਕਉਭਤੋਬ੍ਯਞ੍ਜਨਕਾ ਅਭਬ੍ਬਾ ਗਹਿਤਾ. ਏਤ੍ਥ ਪਨ ਨਾਗਮਾਣਵਕਾਦਯੋ ਤਿਰਚ੍ਛਾਨਗਤਪਕ੍ਖਿਕਾਤਿ ਵੇਦਿਤਬ੍ਬਾ. ਏਤੇਸਂ ਨਿਸਿਨ੍ਨਪਰਿਸਾਯਞ੍ਚ ਪਾਤਿਮੋਕ੍ਖਂ ਨ ਉਦ੍ਦਿਸੇਤਿ ਸਮ੍ਬਨ੍ਧੋ.

ਤਥਾਤਿ ਯੋ ਪਨ ਸਙ੍ਘੋ ਸਭਾਗਾਪਤ੍ਤਿਕੋ, ਸੋਪਿ ਨ ਉਦ੍ਦਿਸੇ, ਪਰਿਵੁਤ੍ਥੇਨ ਛਨ੍ਦੇਨਪਿ ਨ ਉਦ੍ਦਿਸੇਤਿ ਅਤ੍ਥੋ. ਏਤ੍ਥ ਪਨ ਚਤੁਬ੍ਬਿਧਂ ਪਾਰਿਵਾਸਿਯਂ ਪਰਿਸਪਾਰਿਵਾਸਿਯਂ ਰਤ੍ਤਿਪਾਰਿਵਾਸਿਯਂ ਛਨ੍ਦਪਾਰਿਵਾਸਿਯਂ ਅਜ੍ਝਾਸਯਪਾਰਿਵਾਸਿਯਨ੍ਤਿ.

ਏਤ੍ਥ ਪਨ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਮੇਘਾਦੀਹਿ ਉਪਦ੍ਦੁਤਾ ‘‘ਅਨੋਕਾਸਾ ਮਯਂ, ਅਞ੍ਞਤ੍ਰ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜੇਤ੍ਵਾਵ ਉਟ੍ਠਹਨ੍ਤਿ. ਇਦਂ ਪਰਿਸਪਾਰਿਵਾਸਿਯਂ. ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

ਪੁਨਪਿ ਭਿਕ੍ਖੂਨਂ ‘‘ਉਪੋਸਥਾਦੀਨਿ ਕਰਿਸ੍ਸਾਮਾ’’ਤਿ ਰਤ੍ਤਿਂ ਸਨ੍ਨਿਪਤਿਤ੍ਵਾ ਧਮ੍ਮਂ ਸੁਣਨ੍ਤਾਨਂਯੇਵ ਅਰੁਣੋ ਉਗ੍ਗਚ੍ਛਤਿ. ਸਚੇ ‘‘ਚਾਤੁਦ੍ਦਸਿਕਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ, ‘‘ਪਨ੍ਨਰਸੋ’’ਤਿ ਕਾਤੁਂ ਵਟ੍ਟਤਿ. ਸਚੇ ਪਨ੍ਨਰਸਿਕਂ ਕਾਤੁਂ ਨਿਸਿਨ੍ਨਾ, ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ, ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ. ਇਦਂ ਰਤ੍ਤਿਪਾਰਿਵਾਸਿਯਂ ਨਾਮ.

ਪੁਨ ਭਿਕ੍ਖੂ ‘‘ਯਂਕਿਞ੍ਚਿਦੇਵ ਅਬ੍ਭਾਨਾਦਿਕਮ੍ਮਂ ਕਰਿਸ੍ਸਾਮਾ’’ਤਿ ਸਨ੍ਨਿਪਤਿਤਾ ਹੋਨ੍ਤਿ, ਤਤ੍ਰੇਕੋ ਨਕ੍ਖਤ੍ਤਪਾਠਕੋ ਏਵਂ ਵਦਤਿ ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣ’’ਨ੍ਤਿ, ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ. ਅਥਞ੍ਞੋ ਆਗਨ੍ਤ੍ਵਾ ‘‘ਕਿਂ ਨਕ੍ਖਤ੍ਤੇਨ, ਕਰੋਥਾ’’ਤਿ ਵਦਤਿ. ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਨੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਇਦਂ ਸਨ੍ਧਾਯ ‘‘ਛਨ੍ਦੇਨ ਪਰਿਵੁਤ੍ਥੇਨਾ’’ਤਿ ਵੁਤ੍ਤਂ.

੪੩੧. ਆਪਨ੍ਨਮਾਪਤ੍ਤਿਂ (ਮਹਾਵ. ੧੬੯; ਮਹਾਵ. ਅਟ੍ਠ. ੧੬੯) ਅਦੇਸਯਿਤ੍ਵਾਨ ਵਾ ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਵਿਮਤਿਂ ਅਨਾਵਿਕਤ੍ਵਾਨ ਵਾ ‘‘ਨ ਚ ਭਿਕ੍ਖਵੇ ਅਨੁਪੋਸਥੇ ਉਪੋਸਥੋ ਕਾਤਬ੍ਬੋ ਅਞ੍ਞਤ੍ਰ ਸਙ੍ਘਸਾਮਗ੍ਗਿਯਾ’’ਤਿ (ਮਹਾਵ. ੧੮੩) ਵੁਤ੍ਤਤ੍ਤਾ ਅਨੁਪੋਸਥੇਪਿ ਵਾ ਕਾਤੁਂ ਨ ਚ ਕਪ੍ਪਤੀਤਿ ਅਤ੍ਥੋ.

੪੩੨. ‘‘ਨ ਚ ਭਿਕ੍ਖਵੇ ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਵਾ ਅਨਾਵਾਸੋ ਵਾ ਗਨ੍ਤਬ੍ਬੋ ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ’’ਤਿ (ਮਹਾਵ. ੧੮੧) ਵੁਤ੍ਤਤ੍ਤਾ ‘‘ਅਟ੍ਠਿਤੋਪੋਸਥਾਵਾਸਾ’’ਤਿ (ਮਹਾਵ. ਅਟ੍ਠ. ੧੮੧) ਵੁਤ੍ਤਂ. ਨ ਵਜੇ ਨ ਗਚ੍ਛੇ. ਅਧਿਟ੍ਠਾਤੁਂ ਸੀਮਮੇਵ ਵਾਤਿ ਸਚੇ ਵਿਹਾਰੇ ਉਪੋਸਥਂ ਕਰੋਨ੍ਤਿ, ਉਪੋਸਥਾਧਿਟ੍ਠਾਨਤ੍ਥਂ ਸੀਮਾਪਿ ਨਦੀਪਿ ਨ ਗਨ੍ਤਬ੍ਬਾ. ਸਚੇ ਪਨੇਤ੍ਥ ਕੋਚਿ ਭਿਕ੍ਖੁ ਹੋਤਿ, ਤਸ੍ਸ ਸਨ੍ਤਿਕਂ ਗਨ੍ਤੁਂ ਵਟ੍ਟਤਿ. ਵਿਸ੍ਸਟ੍ਠਉਪੋਸਥਾਪਿ ਆਵਾਸਾ ਗਨ੍ਤੁਂ ਵਟ੍ਟਤਿ, ਏਵਂ ਗਤੋ ਅਧਿਟ੍ਠਾਤੁਮ੍ਪਿ ਲਭਤੀਤਿ. ਉਪੋਸਥਵਿਨਿਚ੍ਛਯੋ.

ਉਪੋਸਥਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.