੩੩. ਕਾਯਬਨ੍ਧਨਨਿਦ੍ਦੇਸਵਣ੍ਣਨਾ
੨੩੫. ਅਕਾਯਬਨ੍ਧਨੋਤਿ ਕਾਯਬਨ੍ਧਨਂ ਅਬਨ੍ਧਿਤ੍ਵਾਤਿ ਅਤ੍ਥੋ. ਤਤੋ ਪਟ੍ਠਾਯ ਚੀਵਰਂ ਪਾਰੁਪਿਤਬ੍ਬਂ, ਤਤੋ ਪਟ੍ਠਾਯ ਏਵ ਕਾਯਬਨ੍ਧਨਂ ਬਨ੍ਧਿਤਬ੍ਬਂ. ‘‘ਨ ਭਿਕ੍ਖਵੇ ਅਕਾਯਬਨ੍ਧਨੇਨ ਗਾਮੋ ਪਵਿਸਿਤਬ੍ਬੋ. ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੭੮) ਹਿ ਵੁਤ੍ਤਂ. ਤਤ੍ਥੇਵਾਸਤਿਯਾ ਗਤੋਤਿ ਅਸਤਿਯਾ ਗਤੋ ਯਤ੍ਥ ਸਰਤਿ, ਤਤ੍ਥੇਵ ਬਨ੍ਧਿਤਬ੍ਬਂ. ਸਰਿਤ੍ਵਾ ਪਨ ਯਾਵ ਨ ਬਨ੍ਧਤਿ, ਤਾਵ ਪਿਣ੍ਡਾਯ ਚਰਿਤੁਂ ਨ ਵਟ੍ਟਤਿ. ਯਦਿ ਅਨ੍ਤੋਗਾਮੇ ਸਰਤਿ, ਕਾਯਬਨ੍ਧਨੇ ਸਤਿ ਏਕਮਨ੍ਤੇ ਠਤ੍ਵਾ ਬਨ੍ਧਿਤਬ੍ਬਂ, ਅਸਤਿ ਚੇ ਨਿਕ੍ਖਮਿਤ੍ਵਾ ਬਨ੍ਧਿਤ੍ਵਾ ਪੁਨ ਪਿਣ੍ਡਾਯ ਪਵਿਸਿਤਬ੍ਬਨ੍ਤਿ ਵਦਨ੍ਤਿ.
੨੩੬. ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਕਾਯਬਨ੍ਧਨਾਨਿ ਪਟ੍ਟਿਕਂ ਸੂਕਰਨ੍ਤਕ’’ਨ੍ਤਿ (ਚੂਲ਼ਵ. ੨੭੮) ਵੁਤ੍ਤਤ੍ਤਾ ‘‘ਦੁਵਿਧ’’ਨ੍ਤਿ ਵੁਤ੍ਤਂ. ਤਤ੍ਥ ਸੂਕਰਨ੍ਤਂ ਨਾਮ ਕੁਞ੍ਚਿਕਾਕੋਸਕਾ ਵਿਯ ਅਨ੍ਤੇ ਸੁਸਿਰਂ ਕਤ੍ਵਾ ਕੋਟ੍ਟਿਤਂ. ਰਜ੍ਜੁ ਚ ਏਕਾਤਿ ਏਕਵਟ੍ਟਾ ਰਜ੍ਜੁ ਚ. ਤਦਨੁਲੋਮਿਕਾਤਿ ਤੇਸਂ ਦ੍ਵਿਨ੍ਨਂ ਅਨੁਲੋਮਿਕਾ.
੨੩੭. ਮਚ੍ਛਕਣ੍ਡਕਖਜ੍ਜੁਰੀ-ਪਤ੍ਤਾ ਮਟ੍ਠਾ ਚ ਪਟ੍ਟਿਕਾਤਿ ਏਤ੍ਥ (ਚੂਲ਼ਵ. ਅਟ੍ਠ. ੨੭੮) ਏਤੇ ਮਚ੍ਛਕਣ੍ਟਕਾਦਯੋ ਮਟ੍ਠਾ ਵਿਕਾਰਰਹਿਤਾ ਪਟ੍ਟਿਕਾ ਚ ਤਦਨ੍ਤੋਗਧਾਤਿ ਅਧਿਪ੍ਪਾਯੋ. ਲਬ੍ਭਾ ਦਸਾ ਚਤਸ੍ਸੋਤਿ ਏਕਾਯ ਵਾ ਦ੍ਵੀਸੁ ਵਾ ਤੀਸੁ ਵਾ ਕਥਾ ਏਵ ਨਤ੍ਥੀਤਿ ਅਧਿਪ੍ਪਾਯੋ, ਤਤੋ ਪਰਂ ਨ ਵਟ੍ਟਤਿ. ਅਨ੍ਤੇਸੂਤਿ ਉਭੋਸੁ ਅਨ੍ਤੇਸੁ. ਗੁਣਸੁਤ੍ਤਕਨ੍ਤਿ ਦਿਗੁਣਸੁਤ੍ਤਕਂ.
੨੩੯. ਮਕਰਮੁਖਾਦਿਨ੍ਤਿ ਆਦਿ-ਸਦ੍ਦੇਨ ਦੇਡ੍ਡੁਭਸੀਸਂ ਗਹਿਤਂ. ਉਭਨ੍ਤੇਤਿ ਉਭੋਸੁ ਅਨ੍ਤੇਸੁ. ਕਸ੍ਸਾਤਿ? ਵਿਧਸ੍ਸ. ਘਟਕਾਤਿ ਘਟਕਤੋ. ਲੇਖਾਤਿ ਲੇਖਾਯ. ਘਟਕਤੋ ਚ ਲੇਖਾਯ ਚ ਅਞ੍ਞਂ ਚਿਤ੍ਤਕਂ ਨ ਕਪ੍ਪਤੀਤਿ ਅਤ੍ਥੋ.
੨੪੦. ਦੇਡ੍ਡੁਭਕਨ੍ਤਿ (ਚੂਲ਼ਵ. ੨੭੮; ਚੂਲ਼ਵ. ਅਟ੍ਠ. ੨੭੮) ਉਦਕਸਪ੍ਪਸਿਰਸਦਿਸਂ. ਮੁਰਜਨ੍ਤਿ ਬਹੁਰਜ੍ਜੁਕੇ ਏਕਤੋ ਸਙ੍ਕਡ੍ਢਿਤ੍ਵਾ ਏਕਾਯ ਰਜ੍ਜੁਯਾ ਪਲਿਵੇਠੇਤ੍ਵਾ ਕਤਰਜ੍ਜੁ. ਮਦ੍ਦਵੀਣਨ੍ਤਿ ਪਾਮਙ੍ਗਸਦਿਸਂ. ਕਲਾਬੁਕਨ੍ਤਿ ਅਨੇਕਵਟ੍ਟਂ. ਏਤਾਨਿ ਪਨ ਸਬ੍ਬਾਨਿ ਨ ਕਪ੍ਪਨ੍ਤਿ. ਦਸਾਸੁ ਦ੍ਵੇ ਮਜ੍ਝਿਮਾਤਿ ਮੁਰਜਂ ਮਦ੍ਦਵੀਣਨ੍ਤਿ ਦ੍ਵੇ ਮਜ੍ਝਿਮਾ ਏਵ. ਕਪ੍ਪਰੇਤਿ ਕਪ੍ਪਨ੍ਤੀਤਿ ਅਤ੍ਥੋ.
੨੪੧. ਗਣ੍ਠਿਯੋ ਚਾਪੀਤਿ (ਚੂਲ਼ਵ. ੨੭੯) ਚੀਵਰਗਣ੍ਠਿਯੋਪਿ. ਵੇਲ਼ੁਆਦਿਮਯਾ ਕਪ੍ਪਨ੍ਤੀਤਿ ਪਸਙ੍ਗੇਨ ਵੁਤ੍ਤਂ. ਕਾਯਬਨ੍ਧਨਵਿਨਿਚ੍ਛਯੋ.
ਕਾਯਬਨ੍ਧਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਪਠਮਭਾਣਵਾਰਂ.