੨੧. ਚਮ੍ਮਨਿਦ੍ਦੇਸਵਣ੍ਣਨਾ

੧੭੩. ਇਦਾਨਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਚਮ੍ਮਾਨਿ ਅਤ੍ਥਰਣਾਨਿ ਏਲ਼ਕਚਮ੍ਮਂ ਅਜਚਮ੍ਮਂ ਮਿਗਚਮ੍ਮ’’ਨ੍ਤਿ (ਮਹਾਵ. ੨੫੯) ਏਵਂ ਵੁਤ੍ਤਚਮ੍ਮਾਨਿ ਦਸ੍ਸੇਤੁਂ ‘‘ਮਿਗਾਜੇਲ਼ਕਚਮ੍ਮਾਨੀ’’ਤਿਆਦਿਮਾਹ. ਪਰਿਭੁਞ੍ਜਿਤੁਨ੍ਤਿ (ਮਹਾਵ. ਅਟ੍ਠ. ੨੬੨) ਮਞ੍ਚਾਦੀਸੁ ਯਤ੍ਥ ਕਤ੍ਥਚਿ ਅਤ੍ਥਰਿਤ੍ਵਾ ਨਿਪਜ੍ਜਿਤੁਂ ਵਾ ਨਿਸੀਦਿਤੁਂ ਵਾ ਵਟ੍ਟਨ੍ਤੀਤਿ ਅਤ੍ਥੋ. ਰੋਹਿਤੇਣੀਪਸਦਾ ਚ ਕੁਰੁਙ੍ਗਾ ਚ ਚ-ਸਦ੍ਦੇਨ ਅਞ੍ਞੇਪਿ ਵਾਲ਼ਮਿਗਾ ਮਿਗਮਾਤੁਕਾਦਯੋਪਿ ਮਿਗਜਾਤਿਕਾ ਏਵਾਤਿ ਅਧਿਪ੍ਪਾਯੋ.

੧੭੪. ਅਨੁਞ੍ਞਾਤਤ੍ਤਯਾ ਅਞ੍ਞਨ੍ਤਿ –

‘‘ਮਕ੍ਕਟੋ ਕਾਲ਼ਸੀਹੋ ਚ, ਸਰਭੋ ਕਦਲੀਮਿਗੋ;

ਯੇ ਚ ਵਾਲ਼ਮਿਗਾ ਕੇਚਿ, ਤੇਸਂ ਚਮ੍ਮਂ ਨ ਵਟ੍ਟਤੀ’’ਤਿ. –

ਏਤ੍ਥ ਵਾਲ਼ਮਿਗਗ੍ਗਹਣੇਨ ਵੁਤ੍ਤਾਵਸੇਸਾ ਅਨ੍ਤਮਸੋ ਗੋਮਹਿਂਸਾਦਯੋ ਗਹਿਤਾਤਿ ਵੇਦਿਤਬ੍ਬਾ. ਥਵਿਕਾਤਿ ਉਪਾਹਨਕੋਸਕਸਤ੍ਥਕੋਸਕਕੁਞ੍ਚਿਕਕੋਸਕਾਤਿ ਵੇਦਿਤਬ੍ਬਾ, ਨ ਪਤ੍ਤਤ੍ਥਵਿਕਾਦਯੋ. ਚਮ੍ਮਵਿਨਿਚ੍ਛਯੋ.

ਚਮ੍ਮਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.