੧੯. ਨ੍ਹਾਨਕਪ੍ਪਨਿਦ੍ਦੇਸਵਣ੍ਣਨਾ

੧੬੮. ਪੁਰਤੋਤਿ (ਚੂਲ਼ਵ. ੩੭੨) ਥੇਰਾਨਂ ਪੁਰਤੋ ਉਪਰਿ ਵਾ ਨ ਚ ਨ੍ਹਾਯੇਯ੍ਯਾਤਿ ਅਤ੍ਥੋ.

੧੬੯-੧੭੧. ਕੁਟ੍ਟਤ੍ਥਮ੍ਭਤਰੁਟ੍ਟਾਨੇਤਿ ਏਤ੍ਥ (ਚੂਲ਼ਵ. ੨੪੩; ਚੂਲ਼ਵ. ਅਟ੍ਠ. ੨੪੩) ਕੁਟ੍ਟੇ ਵਾ ਥਮ੍ਭੇ ਵਾ ਤਰੁਮ੍ਹਿ ਵਾ ਅਟ੍ਟਾਨਫਲਕੇ ਵਾ ਕਾਯਂ ਨ ਘਂਸਯੇਤਿ ਅਤ੍ਥੋ. ਗਨ੍ਧਬ੍ਬਹਤ੍ਥੋ ਨਾਮ ਮਕ੍ਕਟਹਤ੍ਥਸਦਿਸੋ ਦਾਰੁਆਦਿਮਯੋ. ਕੁਰੁਵਿਨ੍ਦਕਸੁਤ੍ਤਿਯਾਤਿ ਕੁਰੁਵਿਨ੍ਦਸੁਤ੍ਤਿਯਾ. ਮਲ੍ਲਕੇਨ ਵਾ ਅਞ੍ਞਮਞ੍ਞਂ ਵਾ. ‘‘ਨ ਭਿਕ੍ਖਵੇ ਵਿਗ੍ਗਯ੍ਹ ਪਰਿਕਮ੍ਮਂ ਕਾਰਾਪੇਤਬ੍ਬਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੩) ਏਵਂ ਵੁਤ੍ਤਂ ਵਿਗ੍ਗਹਪਰਿਕਮ੍ਮਂ ਸਨ੍ਧਾਯ ‘‘ਅਞ੍ਞਮਞ੍ਞਂ ਵਾ’’ਤਿ ਵੁਤ੍ਤਂ.

ਇਦਾਨਿ ਕਪ੍ਪਿਯਾਨਿ ਦਸ੍ਸੇਤੁਂ ‘‘ਕਪਾਲਿਟ੍ਠਕਖਣ੍ਡਾਨੀ’’ਤਿਆਦਿਮਾਹ. ਸਬ੍ਬੇਸਂ ਵਟ੍ਟਤੀਤਿ ਸਮ੍ਬਨ੍ਧੋ. ਗਿਲਾਨਸ੍ਸਪਿ (ਚੂਲ਼ਵ. ਅਟ੍ਠ. ੨੪੩) ਅਗਿਲਾਨਸ੍ਸਪਿ ਇਮਾਨਿ ਕਪਾਲਿਟ੍ਠਕਖਣ੍ਡਾਦੀਨਿ ਕਾਯਘਂਸਨੇ ਵਟ੍ਟਨ੍ਤਿ. ਪੁਥੁਪਾਣੀਤਿ (ਚੂਲ਼ਵ. ੨੪੪) ਹਤ੍ਥਪਰਿਕਮ੍ਮਂ ਵੁਚ੍ਚਤਿ. ਤਸ੍ਮਾ ਸਬ੍ਬੇਸਂ ਹਤ੍ਥੇਨ ਪਿਟ੍ਠਿਪਰਿਕਮ੍ਮਂ ਕਾਤੁਂ ਵਟ੍ਟਤਿ. ਅਕਤਮਲ੍ਲਕਂ ਨਾਮ ਏਕਦਾਠਿਮਂ ਪਰਿਚ੍ਛਿਨ੍ਦਿਤ੍ਵਾ ਕਤਂ. ਪਾਸਾਣਾਦਯੋ ਪਾਦਘਂਸਨੇ ਏਵ ਕਪ੍ਪਿਯਾ. ਨ੍ਹਾਨਕਪ੍ਪਵਿਨਿਚ੍ਛਯੋ.

ਨ੍ਹਾਨਕਪ੍ਪਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.