੮. ਕਾਲਿਕਨਿਦ੍ਦੇਸੋ

ਕਾਲਿਕਾ ਚਾਤਿ –

੮੪. ਪਟਿਗ੍ਗਹਿਤਾ ਚਤ੍ਤਾਰੋ, ਕਾਲਿਕਾ ਯਾਵਕਾਲਿਕਂ;

ਯਾਮਕਾਲਿਕਂ ਸਤ੍ਤਾਹ-ਕਾਲਿਕਂ ਯਾਵਜੀਵਿਕਂ.

੮੫. ਪਿਟ੍ਠਂ ਮੂਲਂ ਫਲਂ ਖਜ੍ਜਂ, ਗੋਰਸੋ ਧਞ੍ਞਭੋਜਨਂ;

ਯਾਗੁਸੂਪਪ੍ਪਭੁਤਯੋ, ਹੋਨ੍ਤੇਤੇ ਯਾਵਕਾਲਿਕਾ.

੮੬. ਮਧੁਮੁਦ੍ਦਿਕਸਾਲੂਕ-ਚੋਚਮੋਚਮ੍ਬਜਮ੍ਬੁਜਂ;

ਫਾਰੁਸਂ ਨਗ੍ਗਿਸਨ੍ਤਤ੍ਤਂ, ਪਾਨਕਂ ਯਾਮਕਾਲਿਕਂ.

੮੭. ਸਾਨੁਲੋਮਾਨਿ ਧਞ੍ਞਾਨਿ, ਠਪੇਤ੍ਵਾ ਫਲਜੋ ਰਸੋ;

ਮਧੂਕਪੁਪ੍ਫਮਞ੍ਞਤ੍ਰ, ਸਬ੍ਬੋ ਪੁਪ੍ਫਰਸੋਪਿ ਚ.

੮੮. ਸਬ੍ਬਪਤ੍ਤਰਸੋ ਚੇਵ, ਠਪੇਤ੍ਵਾ ਪਕ੍ਕਡਾਕਜਂ;

ਸੀਤੋਦਮਦ੍ਦਿਤੋਦਿਚ੍ਚ-ਪਾਕੋ ਵਾ ਯਾਮਕਾਲਿਕੋ.

੮੯. ਸਪ੍ਪਿਨੋਨੀਤਤੇਲਾਨਿ, ਮਧੁਫਾਣਿਤਮੇਵ ਚ;

ਸਤ੍ਤਾਹਕਾਲਿਕਾ ਸਪ੍ਪਿ, ਯੇਸਂ ਮਂਸਮਵਾਰਿਤਂ.

੯੦. ਤੇਲਂ ਤਿਲਵਸੇਰਣ੍ਡ-ਮਧੁਸਾਸਪਸਮ੍ਭਵਂ;

ਖੁਦ੍ਦਾਭਮਰਮਧੁਕਰਿ-ਮਕ੍ਖਿਕਾਹਿ ਕਤਂ ਮਧੁ;

ਰਸਾਦਿਉਚ੍ਛੁਵਿਕਤਿ, ਪਕ੍ਕਾਪਕ੍ਕਾ ਚ ਫਾਣਿਤਂ.

੯੧. ਸਵਤ੍ਥੁਪਕ੍ਕਾ ਸਾਮਂ ਵਾ, ਵਸਾ ਕਾਲੇ ਅਮਾਨੁਸਾ;

ਅਞ੍ਞੇਸਂ ਨ ਪਚੇ ਵਤ੍ਥੁਂ, ਯਾਵਕਾਲਿਕਵਤ੍ਥੁਨਂ.

੯੨. ਹਲਿਦ੍ਦਿਂ ਸਿਙ੍ਗਿਵੇਰਞ੍ਚ, ਵਚਤ੍ਤਂ ਲਸੁਣਂ ਵਚਾ;

ਉਸੀਰਂ ਭਦ੍ਦਮੁਤ੍ਤਞ੍ਚਾਤਿਵਿਸਾ ਕਟੁਰੋਹਿਣੀ;

ਪਞ੍ਚਮੂਲਾਦਿਕਞ੍ਚਾਪਿ, ਮੂਲਂ ਤਂ ਯਾਵਜੀਵਿਕਂ.

੯੩. ਬਿਲ਼ਙ੍ਗਂ ਮਰਿਚਂ ਗੋਟ੍ਠ-ਫਲਂ ਪਿਪ੍ਫਲਿ ਰਾਜਿਕਾ;

ਤਿਫਲੇਰਣ੍ਡਕਾਦੀਨਂ, ਫਲਂ ਤਂ ਯਾਵਜੀਵਿਕਂ.

੯੪. ਕਪ੍ਪਾਸਨਿਮ੍ਬਕੁਟਜਪਟੋਲਸੁਲਸਾਦਿਨਂ;

ਸੂਪੇਯ੍ਯਪਣ੍ਣਂ ਵਜ੍ਜੇਤ੍ਵਾ, ਪਣ੍ਣਂ ਤਂ ਯਾਵਜੀਵਿਕਂ.

੯੫. ਠਪੇਤ੍ਵਾ ਉਚ੍ਛੁਨਿਯ੍ਯਾਸਂ,

ਸਰਸਂ ਉਚ੍ਛੁਜਂ ਤਚਂ;

ਨਿਯ੍ਯਾਸੋ ਚ ਤਚੋ ਸਬ੍ਬੋ,

ਲੋਣਂ ਲੋਹਂ ਸਿਲਾ ਤਥਾ.

੯੬. ਸੁਦ੍ਧਸਿਤ੍ਥਞ੍ਚ ਸੇਵਾਲੋ, ਯਞ੍ਚ ਕਿਞ੍ਚਿ ਸੁਝਾਪਿਤਂ;

ਵਿਕਟਾਦਿਪ੍ਪਭੇਦਞ੍ਚ, ਞਾਤਬ੍ਬਂ ਯਾਵਜੀਵਿਕਂ.

੯੭. ਮੂਲਂ ਸਾਰਂ ਤਚੋ ਫੇਗ੍ਗੁ, ਪਣ੍ਣਂ ਪੁਪ੍ਫਂ ਫਲਂ ਲਤਾ;

ਆਹਾਰਤ੍ਥ ਮਸਾਧੇਨ੍ਤਂ, ਸਬ੍ਬਂ ਤਂ ਯਾਵਜੀਵਿਕਂ.

੯੮. ਸਬ੍ਬਕਾਲਿਕਸਮ੍ਭੋਗੋ, ਕਾਲੇ ਸਬ੍ਬਸ੍ਸ ਕਪ੍ਪਤਿ;

ਸਤਿ ਪਚ੍ਚਯੇ ਵਿਕਾਲੇ, ਕਪ੍ਪਤੇ ਕਾਲਿਕਤ੍ਤਯਂ.

੯੯. ਕਾਲਯਾਮਮਤਿਕ੍ਕਨ੍ਤਾ, ਪਾਚਿਤ੍ਤਿਂ ਜਨਯਨ੍ਤੁਭੋ;

ਜਨਯਨ੍ਤਿ ਉਭੋਪੇਤੇ, ਅਨ੍ਤੋਵੁਤ੍ਥਞ੍ਚ ਸਨ੍ਨਿਧਿਂ.

੧੦੦. ਸਤ੍ਤਾਹਕਾਲਿਕੇ ਸਤ੍ਤ, ਅਹਾਨਿ ਅਤਿਨਾਮਿਤੇ;

ਪਾਚਿਤ੍ਤਿ ਪਾਲ਼ਿਨਾਰੁਲ਼੍ਹੇ, ਸਪ੍ਪਿਆਦਿਮ੍ਹਿ ਦੁਕ੍ਕਟਂ.

੧੦੧. ਨਿਸ੍ਸਟ੍ਠਲਦ੍ਧਂ ਮਕ੍ਖੇਯ੍ਯ, ਨਙ੍ਗਂ ਨਜ੍ਝੋਹਰੇਯ੍ਯ ਚ;

ਵਿਕਪ੍ਪੇਨ੍ਤਸ੍ਸ ਸਤ੍ਤਾਹੇ, ਸਾਮਣੇਰਸ੍ਸਧਿਟ੍ਠਤੋ;

ਮਕ੍ਖਨਾਦਿਞ੍ਚ ਨਾਪਤ੍ਤਿ, ਅਞ੍ਞਸ੍ਸ ਦਦਤੋਪਿ ਚ.

੧੦੨. ਯਾਵਕਾਲਿਕਆਦੀਨਿ, ਸਂਸਟ੍ਠਾਨਿ ਸਹਤ੍ਤਨਾ;

ਗਾਹਾਪਯਨ੍ਤਿ ਸਬ੍ਭਾਵਂ, ਤਸ੍ਮਾ ਏਵਮੁਦੀਰਿਤਂ.

੧੦੩. ਪੁਰੇ ਪਟਿਗ੍ਗਹਿਤਞ੍ਚ, ਸਤ੍ਤਾਹਂ ਯਾਵਜੀਵਿਕਂ;

ਸੇਸਕਾਲਿਕਸਮ੍ਮਿਸ੍ਸਂ, ਪਾਚਿਤ੍ਤਿ ਪਰਿਭੁਞ੍ਜਤੋ.

੧੦੪. ਯਾਵਕਾਲਿਕਸਮ੍ਮਿਸ੍ਸਂ, ਇਤਰਂ ਕਾਲਿਕਤ੍ਤਯਂ;

ਪਟਿਗ੍ਗਹਿਤਂ ਤਦਹੁ, ਤਦਹੇਵ ਚ ਭੁਞ੍ਜਯੇ.

੧੦੫. ਯਾਮਕਾਲਿਕਸਮ੍ਮਿਸ੍ਸਂ, ਸੇਸਮੇਵਂ ਵਿਜਾਨਿਯਂ;

ਸਤ੍ਤਾਹਕਾਲਿਕਮਿਸ੍ਸਞ੍ਚ, ਸਤ੍ਤਾਹਂ ਕਪ੍ਪਤੇਤਰਨ੍ਤਿ.