੯. ਪਟਿਗ੍ਗਾਹਨਿਦ੍ਦੇਸੋ
ਪਟਿਗ੍ਗਾਹੋਤਿ –
੧੦੬. ਦਾਤੁਕਾਮਾਭਿਹਾਰੋ ਚ, ਹਤ੍ਥਪਾਸੇਰਣਕ੍ਖਮਂ;
ਤਿਧਾ ਦੇਨ੍ਤੇ ਦ੍ਵਿਧਾ ਗਾਹੋ, ਪਞ੍ਚਙ੍ਗੇਵਂ ਪਟਿਗ੍ਗਹੋ.
੧੦੭. ਅਸਂਹਾਰਿਯੇ ਤਤ੍ਥਜਾਤੇ, ਸੁਖੁਮੇ ਚਿਞ੍ਚਆਦਿਨਂ;
ਪਣ੍ਣੇ ਵਾਸਯ੍ਹਭਾਰੇ ਚ, ਪਟਿਗ੍ਗਾਹੋ ਨ ਰੂਹਤਿ.
੧੦੮. ਸਿਕ੍ਖਾਮਰਣਲਿਙ੍ਗੇਹਿ, ਅਨਪੇਕ੍ਖਵਿਸਗ੍ਗਤੋ;
ਅਚ੍ਛੇਦਾਨੁਪਸਮ੍ਪਨ੍ਨ-ਦਾਨਾ ਗਾਹੋਪਸਮ੍ਮਤਿ.
੧੦੯. ਅਪ੍ਪਟਿਗ੍ਗਹਿਤਂ ਸਬ੍ਬਂ, ਪਾਚਿਤ੍ਤਿ ਪਰਿਭੁਞ੍ਜਤੋ;
ਸੁਦ੍ਧਞ੍ਚ ਨਾਤਿਬਹਲਂ, ਕਪ੍ਪਤੇ ਉਦਕਂ ਤਥਾ.
੧੧੦. ਅਙ੍ਗਲਗ੍ਗਮਵਿਚ੍ਛਿਨ੍ਨਂ, ਦਨ੍ਤਕ੍ਖਿਕਣ੍ਣਗੂਥਕਂ;
ਲੋਣਸ੍ਸੁਖੇਲ਼ਸਿਙ੍ਘਾਣਿ-ਸੇਮ੍ਹਮੁਤ੍ਤਕਰੀਸਕਂ.
੧੧੧. ਗੂਥਮਤ੍ਤਿਕਮੁਤ੍ਤਾਨਿ, ਛਾਰਿਕਞ੍ਚ ਤਥਾਵਿਧੇ;
ਸਾਮਂ ਗਹੇਤ੍ਵਾ ਸੇਵੇਯ੍ਯ, ਅਸਨ੍ਤੇ ਕਪ੍ਪਕਾਰਕੇ.
੧੧੨. ਦੁਰੂਪਚਿਣ੍ਣੇ ਰਜੋਕਿਣ੍ਣੇ, ਅਥੁਗ੍ਗਹਪ੍ਪਟਿਗ੍ਗਹੇ;
ਅਨ੍ਤੋਵੁਤ੍ਥੇ ਸਯਂਪਕ੍ਕੇ, ਅਨ੍ਤੋਪਕ੍ਕੇ ਚ ਦੁਕ੍ਕਟਨ੍ਤਿ.