੭. ਪਵਾਰਣਾਨਿਦ੍ਦੇਸੋ
ਪਵਾਰਣਾਤਿ –
੭੩. ਯੇਨੀਰਿਯਾਪਥੇਨਾਯਂ, ਭੁਞ੍ਜਮਾਨੋ ਪਵਾਰਿਤੋ;
ਤਤੋ ਅਞ੍ਞੇਨ ਭੁਞ੍ਜੇਯ੍ਯ, ਪਾਚਿਤ੍ਤਿਨਤਿਰਿਤ੍ਤਕਂ.
੭੪. ਅਸਨਂ ਭੋਜਨਞ੍ਚੇਵ, ਅਭਿਹਾਰੋ ਸਮੀਪਤਾ;
ਕਾਯਵਾਚਾਪਟਿਕ੍ਖੇਪੋ, ਪਞ੍ਚਅਙ੍ਗਾ ਪਵਾਰਣਾ.
੭੫. ਓਦਨੋ ਸਤ੍ਤੁ ਕੁਮ੍ਮਾਸੋ, ਮਚ੍ਛੋ ਮਂਸਞ੍ਚ ਭੋਜਨਂ;
ਸਾਲਿ ਵੀਹਿ ਯਵੋ ਕਙ੍ਗੁ, ਕੁਦ੍ਰੂਸਵਰਗੋਧੁਮਾ;
ਸਤ੍ਤਨ੍ਨਮੇਸਂ ਧਞ੍ਞਾਨਂ, ਓਦਨੋ ਭੋਜ੍ਜਯਾਗੁ ਚ.
੭੬. ਸਾਮਾਕਾਦਿਤਿਣਂ ਕੁਦ੍ਰੂਸਕੇ ਵਰਕਚੋਰਕੋ;
ਵਰਕੇ ਸਾਲਿਯਞ੍ਚੇਵ, ਨੀਵਾਰੋ ਸਙ੍ਗਹਂ ਗਤੋ.
੭੭. ਭਟ੍ਠਧਞ੍ਞਮਯੋ ਸਤ੍ਤੁ, ਕੁਮ੍ਮਾਸੋ ਯਵਸਮ੍ਭਵੋ;
ਮਂਸੋ ਚ ਕਪ੍ਪਿਯੋ ਵੁਤ੍ਤੋ, ਮਚ੍ਛੋ ਉਦਕਸਮ੍ਭਵੋ.
੭੮. ਭੁਞ੍ਜਨ੍ਤੋ ਭੋਜਨਂ ਕਪ੍ਪ-ਮਕਪ੍ਪਂ ਵਾ ਨਿਸੇਧਯਂ;
ਪਵਾਰੇਯ੍ਯਾਭਿਹਟਂ ਕਪ੍ਪਂ, ਤਨ੍ਨਾਮੇਨ ਇਮਨ੍ਤਿ ਵਾ.
੭੯. ਲਾਜਾ ਤਂਸਤ੍ਤੁਭਤ੍ਤਾਨਿ, ਗੋਰਸੋ ਸੁਦ੍ਧਖਜ੍ਜਕੋ;
ਤਣ੍ਡੁਲਾ ਭਟ੍ਠਪਿਟ੍ਠਞ੍ਚ, ਪੁਥੁਕਾ ਵੇਲ਼ੁਆਦਿਨਂ.
੮੦. ਭਤ੍ਤਂ ਵੁਤ੍ਤਾਵਸੇਸਾਨਂ, ਰਸਯਾਗੁ ਰਸੋਪਿ ਚ;
ਸੁਦ੍ਧਯਾਗੁਫਲਾਦੀਨਿ, ਨ ਜਨੇਨ੍ਤਿ ਪਵਾਰਣਂ.
੮੧. ਪਵਾਰਿਤੇਨ ਵੁਟ੍ਠਾਯ, ਅਭੁਤ੍ਤੇਨ ਚ ਭੋਜਨਂ;
ਅਤਿਰਿਤ੍ਤਂ ਨ ਕਾਤਬ੍ਬਂ, ਯੇਨ ਯਂ ਵਾ ਪੁਰੇ ਕਤਂ.
੮੨. ਕਪ੍ਪਿਯਂ ਗਹਿਤਞ੍ਚੇਵੁ-ਚ੍ਚਾਰਿਤਂ ਹਤ੍ਥਪਾਸਗਂ;
ਅਤਿਰਿਤ੍ਤਂ ਕਰੋਨ੍ਤੇਵਂ, ‘‘ਅਲਮੇਤ’’ਨ੍ਤਿ ਭਾਸਤੁ.
੮੩. ਨ ਕਰੇਨੁਪਸਮ੍ਪਨ੍ਨ-ਹਤ੍ਥਗਂ ਪੇਸਯਿਤ੍ਵਾਪਿ;
ਕਾਰੇਤੁਂ ਲਬ੍ਭਤੇ ਸਬ੍ਬੋ, ਭੁਞ੍ਜਿਤੁਂ ਤਮਕਾਰਕੋਤਿ.