੫੦. ਵਿਪਸ੍ਸਨਾਨਿਦ੍ਦੇਸੋ

ਵਿਪਸ੍ਸਨਾਤਿ –

੪੭੧. ਨਾਮਰੂਪਂ ਪਰਿਗ੍ਗਯ੍ਹ, ਤਤੋ ਤਸ੍ਸ ਚ ਪਚ੍ਚਯਂ;

ਹੁਤ੍ਵਾ ਅਭਾਵਤੋਨਿਚ੍ਚਾ, ਉਦਯਬ੍ਬਯਪੀਲ਼ਨਾ.

੪੭੨. ਦੁਕ੍ਖਾ ਅਵਸਵਤ੍ਤਿਤ੍ਤਾ, ਅਨਤ੍ਤਾਤਿ ਤਿਲਕ੍ਖਣਂ;

ਆਰੋਪੇਤ੍ਵਾਨ ਸਙ੍ਖਾਰੇ, ਸਮ੍ਮਸਨ੍ਤੋ ਪੁਨਪ੍ਪੁਨਂ;

ਪਾਪੁਣੇਯ੍ਯਾਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯਨ੍ਤਿ.

ਨਿਗਮਨਕਥਾ

੪੭੩. ਅਧਿਸੀਲਾਧਿਚਿਤ੍ਤਾਨਂ, ਅਧਿਪਞ੍ਞਾਯ ਸਿਕ੍ਖਨਾ;

ਭਿਕ੍ਖੁਕਿਚ੍ਚਮਤੋ ਖੁਦ੍ਦਸਿਕ੍ਖਾਯਂ ਸਮੁਦਾਹਟਾ.

੪੭੪. ਮਹਤੋ ਕਿਤ੍ਤਿਸਦ੍ਦਸ੍ਸ, ਯਸ੍ਸ ਲੋਕਵਿਚਾਰਿਨੋ;

ਪਰਿਸ੍ਸਮੋ ਨ ਸਮ੍ਭੋਤਿ, ਮਾਲੁਤਸ੍ਸੇਵ ਨਿਚ੍ਚਸੋ.

੪੭੫. ਤੇਨ ਧਮ੍ਮਸਿਰੀਕੇਨ, ਤਮ੍ਬਪਣ੍ਣਿਯਕੇਤੁਨਾ;

ਥੇਰੇਨ ਰਚਿਤਾ ਧਮ੍ਮਵਿਨਯਞ੍ਞੁਪਸਂਸਿਤਾ.

੪੭੬. ਏਤ੍ਤਾਵਤਾਯਂ ਨਿਟ੍ਠਾਨਂ, ਖੁਦ੍ਦਸਿਕ੍ਖਾ ਉਪਾਗਤਾ;

ਪਞ੍ਚਮਤ੍ਤੇਹਿ ਗਾਥਾਨਂ, ਸਤੇਹਿ ਪਰਿਮਾਣਤੋਤਿ.

ਖੁਦ੍ਦਸਿਕ੍ਖਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ