੩੫. ਪਰਿਕ੍ਖਾਰਨਿਦ੍ਦੇਸੋ

ਪਰਿਕ੍ਖਾਰੋਤਿ –

੨੫੯. ਪਞ੍ਚਵਣ੍ਣੇਹਿ ਸੁਤ੍ਤੇਹਿ, ਅਨ੍ਤੋ ਬਹਿ ਚ ਸਿਬ੍ਬਿਤੁਂ;

ਗਿਰਿਕੂਟਡ੍ਢਚਨ੍ਦਾਦਿਂ, ਛਤ੍ਤੇ ਪਣ੍ਣੇ ਚ ਛਿਨ੍ਦਿਤੁਂ.

੨੬੦. ਘਟਕਂ ਵਾਲ਼ਰੂਪਂ ਵਾ, ਦਣ੍ਡੇ ਲੇਖਾ ਨ ਵਟ੍ਟਤਿ;

ਵਟ੍ਟਤੀ ਦਣ੍ਡਬੁਨ੍ਦਮ੍ਹਿ, ਅਹਿਚ੍ਛਤ੍ਤਕਸਾਦਿਸਂ.

੨੬੧. ਸਿਬ੍ਬਿਤੁਂ ਏਕਵਣ੍ਣੇਨ, ਪਞ੍ਜਰਂ ਵਾ ਵਿਨਨ੍ਧਿਤੁਂ;

ਥਿਰਤ੍ਥਂ ਵਟ੍ਟਤੀ ਛਤ੍ਤੇ, ਦਣ੍ਡੇ ਲੇਖਾਵ ਬਨ੍ਧਿਤੁਂ.

੨੬੨. ਅਨ੍ਤੇ ਪਟ੍ਟਮੁਖੇ ਵਾਪਿ, ਵੇਣਿ ਸਙ੍ਖਲਿਕਾਪਿ ਵਾ;

ਸੂਚਿਵਿਕਾਰਮਞ੍ਞਂ ਵਾ, ਚੀਵਰੇ ਨ ਚ ਕਪ੍ਪਤਿ;

ਕਪ੍ਪਬਿਨ੍ਦੁਵਿਕਾਰਮ੍ਪਿ, ਪਾਲ਼ਿਕਣ੍ਣਿਕਆਦਿਕਂ.

੨੬੩. ਗਣ੍ਠਿਪਾਸਕਪਟ੍ਟਾਪਿ, ਚਤੁਕ੍ਕੋਣਾਵ ਅਗ੍ਘਿਯਂ;

ਮੁਗ੍ਗਰੋ ਕਕ੍ਕਟਚ੍ਛਾਦਿ-ਵਿਕਾਰਂ ਨੇਤ੍ਥ ਵਟ੍ਟਤਿ.

੨੬੪. ਕੋਣਸੁਤ੍ਤਾ ਚ ਪੀਲ਼ਕਾ, ਦੁਵਿਞ੍ਞੇਯ੍ਯਾਵ ਕਪ੍ਪਰੇ;

ਗਨ੍ਧਂ ਤੇਲਂ ਵ ਲਾਖਂ ਵਾ, ਰਜਨੇ ਨ ਚ ਪਕ੍ਖਿਪੇ.

੨੬੫. ਰਤ੍ਤਂ ਸਙ੍ਖੇਨ ਮਣਿਨਾ, ਘਟ੍ਟੇਯ੍ਯਞ੍ਞੇਨ ਵਾ ਨ ਚ;

ਘਂਸੇਯ੍ਯ ਦੋਣਿਯਂ ਕਤ੍ਵਾ, ਪਹਾਰੇ ਨ ਚ ਮੁਟ੍ਠਿਨਾ.

੨੬੬. ਕਣ੍ਣਕੋਣਕਸੁਤ੍ਤਾਨਿ, ਰਤ੍ਤੇ ਛਿਨ੍ਦੇਯ੍ਯ ਚੀਵਰੇ;

ਲੇਖਾ ਨ ਵਟ੍ਟਤੀ ਧਮ੍ਮ-ਕਰਣੇ ਛਤ੍ਤਵਟ੍ਟਿਯਂ.

੨੬੭. ਲੇਖਂ ਠਪੇਤ੍ਵਾ ਮਣਿਕਾ, ਪੀਲ਼ਕਾ ਕੁਞ੍ਚਿਕਾਯ ਚ;

ਪਿਪ੍ਫਲੇ ਚ ਪਰਿਚ੍ਛੇਦ-ਲੇਖਾ ਦਣ੍ਡਮ੍ਹਿ ਵਟ੍ਟਤਿ.

੨੬੮. ਮਾਲਾਦ੍ਯਰਣਿਯਂ ਪਤ੍ਤ-ਮਣ੍ਡਲੇ ਭਿਤ੍ਤਿਕਮ੍ਮ ਚ;

ਹੇਟ੍ਠਾ ਲੇਖਾਦ੍ਵਯਂ ਉਦ੍ਧਂ, ਅਹਿਚ੍ਛਤ੍ਤਕਸਾਦਿਸਂ.

੨੬੯. ਹਿਤ੍ਵਾ ਕਤ੍ਤਰਯਟ੍ਠਿਮ੍ਹਿ, ਸੂਚਿਸਣ੍ਡਾਸਕੇਪਿ ਚ;

ਯਂ ਕਿਞ੍ਚਿ ਗਿਰਿਕੂਟਾਦਿ-ਵਣ੍ਣਮਟ੍ਠਂ ਨ ਵਟ੍ਟਤਿ.

੨੭੦. ਬਿਮ੍ਬੋਹਨੇ ਭਿਸਿਮਞ੍ਚ-ਪੀਠਾਦਿਸਯਨਾਸਨੇ;

ਸਮ੍ਮੁਞ੍ਜਨਿਮ੍ਹਿ ਸਙ੍ਕਾਰ-ਛਡ੍ਡਨੇ ਰਙ੍ਗਭਾਜਨੇ.

੨੭੧. ਪਾਨੀਯਭਾਜਨੇ ਪਾਦ-ਪੀਠੇ ਕਥਲਿਕਾਯ ਚ;

ਪਤ੍ਤਾਧਾਰਪਿਧਾਨੇਸੁ, ਤਾਲਵਣ੍ਟੇ ਚ ਬੀਜਨੇ;

ਯਂ ਕਿਞ੍ਚਿ ਮਾਲਾਕਮ੍ਮਾਦਿ-ਵਣ੍ਣਮਟ੍ਠਮਵਾਰਿਤਂ.

੨੭੨. ਸੇਨਾਸਨੇ ਪਨ ਦ੍ਵਾਰਕਵਾਟਾਦਿਪ੍ਪਭੇਦਨੇ;

ਸੋਵਣ੍ਣਮਯਨੁਞ੍ਞਾਤਂ, ਵਣ੍ਣਮਟ੍ਠਮ੍ਹਿ ਕਾ ਕਥਾ.

੨੭੩. ਵਿਸਾਣਨਾਲ਼ਿਲਾਬ੍ਵਾਦਿਪ੍ਪਭੇਦੇ ਤੇਲਭਾਜਨੇ;

ਪੁਮਿਤ੍ਥਿਰੂਪਰਹਿਤਂ, ਵਣ੍ਣਮਟ੍ਠਮਵਾਰਿਤਨ੍ਤਿ.