੩੧. ਵਿਕਪ੍ਪਨਾਨਿਦ੍ਦੇਸੋ

ਵਿਕਪ੍ਪਨਾ ਚੇਵਾਤਿ –

੨੨੧. ਸਮ੍ਮੁਖਾ ਪਰਮ੍ਮੁਖਾਤਿ, ਦੁਵੇ ਵੁਤ੍ਤਾ ਵਿਕਪ੍ਪਨਾ;

ਸਮ੍ਮੁਖਾਯ ਵਿਕਪ੍ਪੇਨ੍ਤੋ, ਬ੍ਯਤ੍ਤਸ੍ਸੇਕਸ੍ਸ ਸਨ੍ਤਿਕੇ;

‘‘ਇਮਂ ਚੀਵਰਂ ਤੁਯ੍ਹਂ, ਵਿਕਪ੍ਪੇਮੀ’’ਤਿ ਭਾਸਯੇ.

੨੨੨. ਏਤ੍ਤਾਵਤਾ ਨਿਧੇਤੁਂਵ, ਕਪ੍ਪਤੀ ਨ ਚ ਕਪ੍ਪਤਿ;

ਪਰਿਭੋਗਾਦਿਕਂ ਤੇਨ, ਅਪ੍ਪਚ੍ਚੁਦ੍ਧਟਭਾਵਤੋ.

੨੨੩. ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ –

ਤੇਨ ਪਚ੍ਚੁਦ੍ਧਟੇਯੇਵ, ਪਰਿਭੋਗਾਦਿ ਕਪ੍ਪਤਿ.

੨੨੪. ਅਪਰਾ ਸਮ੍ਮੁਖਾਵੇਕਾ, ਭਿਕ੍ਖੁਸ੍ਸੇਕਸ੍ਸ ਸਨ੍ਤਿਕੇ;

ਗਹੇਤ੍ਵਾ ਨਾਮਮੇਕਸ੍ਸ, ਪਞ੍ਚਨ੍ਨਂ ਸਹਧਮ੍ਮਿਨਂ.

੨੨੫. ‘‘ਇਮਂ ਚੀਵਰਂ ਤਿਸ੍ਸਸ੍ਸ ਭਿਕ੍ਖੁਨੋ, ਤਿਸ੍ਸਾਯ ਭਿਕ੍ਖੁਨਿਯਾ, ਤਿਸ੍ਸਸ੍ਸ ਸਾਮਣੇਰਸ੍ਸ, ਤਿਸ੍ਸਾਯ ਸਾਮਣੇਰਿਯਾ, ਤਿਸ੍ਸਾਯ ਸਿਕ੍ਖਮਾਨਾਯ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ.

ਤੇਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ, ਤਿਸ੍ਸਾਯ ਭਿਕ੍ਖੁਨਿਯਾ, ਤਿਸ੍ਸਸ੍ਸ ਸਾਮਣੇਰਸ੍ਸ, ਤਿਸ੍ਸਾਯ ਸਾਮਣੇਰਿਯਾ, ਤਿਸ੍ਸਾਯ ਸਿਕ੍ਖਮਾਨਾਯ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵਤ੍ਤਬ੍ਬਂ.

੨੨੬. ਪਰਮ੍ਮੁਖਾਵਿਕਪ੍ਪਨੇ-ਕਸ੍ਸਨ੍ਤਿਕੇਵਮੀਰਯੇ;

‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪਨਤ੍ਥਾਯ ਦਮ੍ਮੀ’’ਤਿ.

੨੨੭. ਤੇਨ ਵਤ੍ਤਬ੍ਬੋ ‘‘ਕੋ ਤੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ’’ਤਿ. ਇਤਰੇਨ ਚੇਵਂ ਵਤ੍ਤਬ੍ਬਂ ‘‘ਤਿਸ੍ਸੋ ਭਿਕ੍ਖੂ’’ਤਿ ਵਾ ‘‘ਤਿਸ੍ਸਾ ਭਿਕ੍ਖੁਨੀ’’ਤਿ ਵਾ ‘‘ਤਿਸ੍ਸੋ ਸਾਮਣੇਰੋ’’ਤਿ ਵਾ ‘‘ਤਿਸ੍ਸਾ ਸਾਮਣੇਰੀ’’ਤਿ ਵਾ ‘‘ਤਿਸ੍ਸਾ ਸਿਕ੍ਖਮਾਨਾ’’ਤਿ ਵਾ.

ਪੁਨ ਤੇਨ ‘‘ਅਹਂ ਤਿਸ੍ਸਸ੍ਸ ਤਿਸ੍ਸਾਯ ਵਾ ਦਮ੍ਮੀ’’ਤਿ ਵਿਕਪ੍ਪੇਤ੍ਵਾ ਤੇਨੇਵ ‘‘ਤਿਸ੍ਸਸ੍ਸ ਭਿਕ੍ਖੁਨੋ, ਤਿਸ੍ਸਾਯ ਭਿਕ੍ਖੁਨਿਯਾ, ਤਿਸ੍ਸਸ੍ਸ ਸਾਮਣੇਰਸ੍ਸ, ਤਿਸ੍ਸਾਯ ਸਾਮਣੇਰਿਯਾ, ਤਿਸ੍ਸਾਯ ਸਿਕ੍ਖਮਾਨਾਯ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਪਚ੍ਚੁਦ੍ਧਰਿਤਬ੍ਬਂ.

੨੨੮. ਦੂਰਸਨ੍ਤਿਕਤ੍ਤੇਕਤ੍ਤਬਹੁਭਾਵਂ ਵਿਜਾਨਿਯ;

‘‘ਏਤਂ ਇਮ’’ਨ੍ਤਿ ‘‘ਏਤਾਨਿ, ਇਮਾਨੀ’’ਤੇਤ੍ਥ ਯੋਜਯੇ.

੨੨੯. ਦਸਾਹਂ ਮਾਸਮੇਕਂ ਵਾ, ਪਞ੍ਚ ਵਾ ਕਥਿਨਤ੍ਥਤੇ;

ਪਾਰਿਪੂਰਤ੍ਥਮੂਨਸ੍ਸ, ਪਚ੍ਚਾਸਾ ਸਤਿ ਮਾਸਕਂ;

ਨੁਪ੍ਪਾਦਯਤਿ ਨਿਸ੍ਸਗ੍ਗਿਂ, ਨਾਧਿਟ੍ਠਿਤਵਿਕਪ੍ਪਿਤਨ੍ਤਿ.