੩੦. ਵਤ੍ਤਨਿਦ੍ਦੇਸੋ

ਵਤ੍ਤਨ੍ਤਿ –

੨੧੩. ਆਗਨ੍ਤੁਕੋ ਨ ਆਰਾਮਂ, ਪਵਿਸੇ ਸਉਪਾਹਨੋ;

ਸਛਤ੍ਤੋਗੁਣ੍ਠਿਤੋ ਸੀਸੇ, ਕਰਿਤ੍ਵਾ ਵਾਪਿ ਚੀਵਰਂ.

੨੧੪. ਪਾਨੀਯੇਨ ਨ ਧੋਵੇਯ੍ਯ, ਪਾਦੇ ਵੁਡ੍ਢਤਰੇਪਿ ਚ;

ਆਵਾਸਿਕੇਭਿਵਾਦੇਯ੍ਯ, ਪੁਚ੍ਛੇਯ੍ਯ ਸਯਨਾਸਨਂ.

੨੧੫. ਗਮਿਕੋ ਪਟਿਸਾਮੇਤ੍ਵਾ, ਦਾਰੁਮਤ੍ਤਿਕਭਣ੍ਡਕਂ;

ਵਿਹਾਰਞ੍ਚ ਥਕੇਤ੍ਵਾਨ, ਆਪੁਚ੍ਛ ਸਯਨਾਸਨਂ.

੨੧੬. ਆਪੁਚ੍ਛਿਤਬ੍ਬੇ ਅਸਤਿ, ਸਂਗੋਪੇਤ੍ਵਾਨ ਸਾਧੁਕਂ;

ਪਕ੍ਕਮੇਯ੍ਯਞ੍ਞਥਾ ਤਸ੍ਸ, ਪਕ੍ਕਨ੍ਤੁਂ ਨ ਚ ਕਪ੍ਪਤਿ.

੨੧੭. ਆਵਾਸਿਕੋ ਪਞ੍ਞਾਪੇਯ੍ਯ, ਵੁਡ੍ਢਾਗਨ੍ਤੁਸ੍ਸ ਆਸਨਂ;

ਉਪਨਿਕ੍ਖਿਪੇ ਪਾਦੋਦ-ਪ੍ਪਭੁਤਿਂ ਪਤ੍ਤਚੀਵਰਂ.

੨੧੮. ਪਚ੍ਚੁਗ੍ਗਨ੍ਤ੍ਵਾਨ ਗਣ੍ਹੇਯ੍ਯ, ਪਾਨੀਯੇਨ ਚ ਪੁਚ੍ਛਯੇ;

ਆਗਨ੍ਤੁਕੇਭਿਵਾਦੇਯ੍ਯ, ਪਞ੍ਞਪੇ ਸਯਨਾਸਨਂ.

੨੧੯. ਅਜ੍ਝਾਵੁਤ੍ਥਮਵੁਤ੍ਥਂ ਵਾ, ਗੋਚਰਾਗੋਚਰਂ ਵਦੇ;

ਵਚ੍ਚਪਸ੍ਸਾਵਠਾਨਾਨਿ, ਕਤਿਕਂ ਸੇਕ੍ਖਸਮ੍ਮੁਤਿਂ.

੨੨੦. ਪਵੇਸਨਿਕ੍ਖਮੇ ਕਾਲਂ, ਪਰਿਭੋਜਿਯਪਾਨਿਯਂ;

ਨਿਸਿਨ੍ਨੋਵ ਨਵਕਸ੍ਸ, ਏਤਂ ਸਬ੍ਬਂ ਸਮੁਦ੍ਦਿਸੇਤਿ.