੧੪. ਭੂਮਿਨਿਦ੍ਦੇਸੋ

ਭੂਮਿਯੋਤਿ –

੧੩੬. ਸਮ੍ਮੁਤੁਸ੍ਸਾਵਨਨ੍ਤਾ ਚ, ਗੋਨਿਸਾਦੀ ਗਹਾਪਤਿ;

ਕਪ੍ਪਿਯਾ ਭੂਮਿਯੋ ਯਾਸੁ, ਵੁਤ੍ਥਂ ਪਕ੍ਕਞ੍ਚ ਕਪ੍ਪਤਿ.

੧੩੭. ਵਾਸਤ੍ਥਾਯ ਕਤੇ ਗੇਹੇ, ਸਙ੍ਘਿਕੇ ਵੇਕਸਨ੍ਤਕੇ;

ਕਪ੍ਪਿਯਾ ਕੁਟਿ ਲਦ੍ਧਬ੍ਬਾ, ਸਹਸੇਯ੍ਯਪ੍ਪਹੋਨਕੇ.

੧੩੮. ਗੇਹੇ ਸਙ੍ਘਸ੍ਸ ਵੇਕਸ੍ਸ, ਕਰਮਾਨੇਵਮੀਰਯਂ;

ਪਠਮਿਟ੍ਠਕਥਮ੍ਭਾਦਿਂ, ਠਪੇਯ੍ਯੁਸ੍ਸਾਵਨਨ੍ਤਿਕਾ;

‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ.

੧੩੯. ਯੇਭੁਯ੍ਯੇਨਾਪਰਿਕ੍ਖਿਤ੍ਤੋ, ਆਰਾਮੋ ਸਕਲੋਪਿ ਵਾ;

ਵੁਚ੍ਚਤੇ ‘‘ਗੋਨਿਸਾਦੀ’’ਤਿ, ਸਮ੍ਮੁਤੀ ਸਙ੍ਘਸਮ੍ਮਤਾ.

੧੪੦. ਭਿਕ੍ਖੁਂ ਠਪੇਤ੍ਵਾ ਅਞ੍ਞੇਹਿ, ਦਿਨ੍ਨੋ ਤੇਸਂਵ ਸਨ੍ਤਕੋ;

ਅਤ੍ਥਾਯ ਕਪ੍ਪਕੁਟਿਯਾ, ਗੇਹੋ ਗਹਪਤੀ ਮਤੋ.

੧੪੧. ਅਕਪ੍ਪਕੁਟਿਯਾ ਵੁਤ੍ਥਸਪ੍ਪਿਆਦੀਹਿ ਮਿਸ੍ਸਿਤਂ;

ਵਜੇਯ੍ਯ ਅਨ੍ਤੋਵੁਤ੍ਥਤ੍ਤਂ, ਪੁਰਿਮਂ ਕਾਲਿਕਦ੍ਵਯਂ.

੧੪੨. ਤੇਹੇਵ ਭਿਕ੍ਖੁਨਾ ਪਕ੍ਕਂ, ਕਪ੍ਪਤੇ ਯਾਵਜੀਵਿਕਂ;

ਨਿਰਾਮਿਸਂਵ ਸਤ੍ਤਾਹਂ, ਸਾਮਿਸੇ ਸਾਮਪਾਕਤਾ.

੧੪੩. ਉਸ੍ਸਾਵਨਨ੍ਤਿਕਾ ਯੇਹਿ, ਥਮ੍ਭਾਦੀਹਿ ਅਧਿਟ੍ਠਿਤਾ;

ਤੇਸੁਯੇਵਾਪਨੀਤੇਸੁ, ਤਦਞ੍ਞੇਸੁਪਿ ਤਿਟ੍ਠਤਿ.

੧੪੪. ਸਬ੍ਬੇਸੁ ਅਪਨੀਤੇਸੁ, ਭਵੇ ਜਹਿਤਵਤ੍ਥੁਕਾ;

ਗੋਨਿਸਾਦੀ ਪਰਿਕ੍ਖਿਤ੍ਤੇ, ਸੇਸਾ ਛਦਨਵਿਬ੍ਭਮਾਤਿ.