੧੫. ਉਪਜ੍ਝਾਚਰਿਯਵਤ੍ਤਨਿਦ੍ਦੇਸੋ

ਉਪਜ੍ਝਾਚਰਿਯਵਤ੍ਤਾਨੀਤਿ –

੧੪੫. ਨਿਸ੍ਸਾਯੁਪਜ੍ਝਾਚਰਿਯੇ, ਵਸਮਾਨੋ ਸੁਪੇਸਲੋ;

ਦਨ੍ਤਕਟ੍ਠਾਸਨਂ ਤੋਯਂ, ਯਾਗੁਂ ਕਾਲੇ ਦਦੇ ਸਦਾ.

੧੪੬. ਪਤ੍ਤੇ ਵਤ੍ਤਂ ਚਰੇ ਗਾਮ-ਪ੍ਪਵੇਸੇ ਗਮਨਾਗਮੇ;

ਆਸਨੇ ਪਾਦਪੀਠੇ ਚ, ਕਥਲੋਪਾਹਨਚੀਵਰੇ.

੧੪੭. ਪਰਿਭੋਜਨੀਯਪਾਨੀਯ-ਵਚ੍ਚਪ੍ਪਸ੍ਸਾਵਠਾਨਿਸੁ;

ਵਿਹਾਰਸੋਧਨੇ ਵਤ੍ਤਂ, ਪੁਨ ਪਞ੍ਞਾਪਨੇ ਤਥਾ.

੧੪੮. ਨ ਪਪ੍ਫੋਟੇਯ੍ਯ ਸੋਧੇਨ੍ਤੋ, ਪਟਿਵਾਤੇ ਚ ਸਙ੍ਗਣੇ;

ਵਿਹਾਰਂ ਭਿਕ੍ਖੁ ਪਾਨੀਯ-ਸਾਮਨ੍ਤਾ ਸਯਨਾਸਨਂ.

੧੪੯. ਨ੍ਹਾਨੇ ਨ੍ਹਾਤਸ੍ਸ ਕਾਤਬ੍ਬੇ, ਰਙ੍ਗਪਾਕੇ ਚ ਧੋਵਨੇ;

ਸਿਬ੍ਬਨੇ ਚੀਵਰੇ ਥੇਵੇ, ਰਜਨ੍ਤੋ ਨ ਵਜੇ ਠਿਤੇ.

੧੫੦. ਏਕਚ੍ਚਸ੍ਸ ਅਨਾਪੁਚ੍ਛਾ, ਪਤ੍ਤਂ ਵਾ ਚੀਵਰਾਨਿ ਵਾ;

ਨ ਦਦੇਯ੍ਯ ਨ ਗਣ੍ਹੇਯ੍ਯ, ਪਰਿਕ੍ਖਾਰਞ੍ਚ ਕਿਞ੍ਚਨਂ.

੧੫੧. ਏਕਚ੍ਚਂ ਪਚ੍ਛਤੋ ਕਾਤੁਂ, ਗਨ੍ਤੁਂ ਵਾ ਤਸ੍ਸ ਪਚ੍ਛਤੋ;

ਪਿਣ੍ਡਪਾਤਞ੍ਚ ਨਿਨ੍ਨੇਤੁਂ, ਨੀਹਰਾਪੇਤੁਮਤ੍ਤਨੋ.

੧੫੨. ਕਿਚ੍ਚਯਂ ਪਰਿਕਮ੍ਮਂ ਵਾ, ਕੇਸਚ੍ਛੇਦਞ੍ਚ ਅਤ੍ਤਨੋ;

ਕਾਰਾਪੇਤੁਂ ਵ ਕਾਤੁਂ ਵਾ, ਅਨਾਪੁਚ੍ਛਾ ਨ ਵਟ੍ਟਤਿ.

੧੫੩. ਗਾਮਂ ਸੁਸਾਨਂ ਨਿਸ੍ਸੀਮਂ, ਦਿਸਂ ਵਾ ਗਨ੍ਤੁਮਿਚ੍ਛਤੋ;

ਅਤ੍ਤਨੋ ਕਿਚ੍ਚਯਂ ਵਾਪਿ, ਅਨਾਪੁਚ੍ਛਾ ਨ ਵਟ੍ਟਤਿ.

੧੫੪. ਉਪ੍ਪਨ੍ਨਂ ਅਰਤਿਂ ਦਿਟ੍ਠਿਂ, ਕੁਕ੍ਕੁਚ੍ਚਂ ਵਾ ਵਿਨੋਦਯੇ;

ਕਰੇਯ੍ਯ ਵਾਪਿ ਉਸ੍ਸੁਕ੍ਕਂ, ਸਙ੍ਘਾਯਤ੍ਤੇਸੁ ਕਮ੍ਮਸੁ.

੧੫੫. ਗਿਲਾਨੇਸੁ ਉਪਟ੍ਠੇਯ੍ਯ, ਵੁਟ੍ਠਾਨਂ ਨੇਸਮਾਗਮੇ;

ਵਤ੍ਤਭੇਦੇਨ ਸਬ੍ਬਤ੍ਥ, ਅਨਾਦਰੇਨ ਦੁਕ੍ਕਟਨ੍ਤਿ.