੧੩. ਸਮਣਕਪ੍ਪਨਿਦ੍ਦੇਸੋ

ਸਮਣਕਪ੍ਪਾਤਿ –

੧੨੫. ਭੂਤਗਾਮਸਮਾਰਮ੍ਭੇ, ਪਾਚਿਤ੍ਤਿ ਕਤਕਪ੍ਪਿਯਂ;

ਨਖੇਨ ਵਾਗ੍ਗਿਸਤ੍ਥੇਹਿ, ਭਵੇ ਸਮਣਕਪ੍ਪਿਯਂ.

੧੨੬. ਸ ਮੂਲਖਨ੍ਧਬੀਜਗ੍ਗ-ਫਲ਼ੁਬੀਜਪ੍ਪਭਾਵਿਤੋ;

ਆਰਮ੍ਭੇ ਦੁਕ੍ਕਟਂ ਬੀਜਂ, ਭੂਤਗਾਮਵਿਯੋਜਿਤਂ.

੧੨੭. ਨਿਬ੍ਬਟ੍ਟਬੀਜਂ ਨੋਬੀਜ-ਮਕਤਞ੍ਚਾਪਿ ਕਪ੍ਪਤਿ;

ਕਟਾਹਬਦ੍ਧਬੀਜਾਨਿ, ਬਹਿਦ੍ਧਾ ਵਾਪਿ ਕਾਰਯੇ.

੧੨੮. ਏਕਾਬਦ੍ਧੇਸੁ ਬੀਜੇਸੁ, ਭਾਜਨੇ ਵਾਪਿ ਭੂਮਿਯਂ;

ਕਤੇ ਚ ਕਪ੍ਪਿਯੇਕਸ੍ਮਿਂ, ਸਬ੍ਬੇਸ੍ਵੇਵ ਕਤਂ ਭਵੇ.

੧੨੯. ਨਿਕ੍ਖਿਤ੍ਤੇ ਕਪ੍ਪਿਯਂ ਕਤ੍ਵਾ, ਮੂਲਪਣ੍ਣਾਨਿ ਜਾਯਰੁਂ;

ਕਪ੍ਪਿਯਂ ਪੁਨ ਕਾਰੇਯ੍ਯ, ਭੂਤਗਾਮੋ ਹਿ ਸੋ ਤਦਾ.

੧੩੦. ਸਪਣ੍ਣੋ ਵਾ ਅਪਣ੍ਣੋ ਵਾ, ਸੇਵਾਲੋਦਕਸਮ੍ਭਵੋ;

ਚੇਤਿਯਾਦੀਸੁ ਸੇਵਾਲੋ, ਨਿਬ੍ਬਟ੍ਟਦ੍ਵਤ੍ਤਿਪਤ੍ਤਕੋ;

ਭੂਤਗਾਮੋਵ ਬੀਜਮ੍ਪਿ, ਮੂਲਪਣ੍ਣੇ ਵਿਨਿਗ੍ਗਤੇ.

੧੩੧. ਘਟਾਦਿਪਿਟ੍ਠੇ ਸੇਵਾਲੋ, ਮਕੁਲ਼ਂ ਅਹਿਛਤ੍ਤਕਂ;

ਦੁਕ੍ਕਟਸ੍ਸੇਵ ਵਤ੍ਥੂਨਿ, ਫੁਲ੍ਲਮਬ੍ਯਵਹਾਰਿਕਂ.

੧੩੨. ਲਾਖਾਨਿਯ੍ਯਾਸਛਤ੍ਤਾਨਿ, ਅਲ੍ਲਰੁਕ੍ਖੇ ਵਿਕੋਪਿਯ;

ਗਣ੍ਹਤੋ ਤਤ੍ਥ ਪਾਚਿਤ੍ਤਿ, ਛਿਨ੍ਦਤੋ ਵਾਪਿ ਅਕ੍ਖਰਂ.

੧੩੩. ਪੀਲ਼ੇਤੁਂ ਨਾਲ਼ਿਕੇਰਾਦਿਂ, ਦਾਰੁਮਕ੍ਕਟਕਾਦਿਨਾ;

ਛਿਨ੍ਦਿਤੁਂ ਗਣ੍ਠਿਕਂ ਕਾਤੁਂ, ਤਿਣਾਦਿਂ ਨ ਚ ਕਪ੍ਪਤਿ.

੧੩੪. ਭੂਤਗਾਮਂ ਵ ਬੀਜਂ ਵਾ, ਛਿਨ੍ਦ ਭਿਨ੍ਦੋਚਿਨਾਹਿ ਵਾ;

ਫਾਲੇਹਿ ਵਿਜ੍ਝ ਪਚ ਵਾ, ਨਿਯਮੇਤ੍ਵਾ ਨ ਭਾਸਯੇ.

੧੩੫. ਇਮਂ ਕਰੋਹਿ ਕਪ੍ਪਿਯਂ, ਇਮਂ ਗਣ੍ਹੇਦਮਾਹਰ;

ਇਮਂ ਦੇਹਿ ਇਮਂ ਸੋਧੇਹੇਵਂ ਵਟ੍ਟਤਿ ਭਾਸਿਤੁਨ੍ਤਿ.