ਪਾਟਿਦੇਸਨੀਯਕਣ੍ਡਂ

੧. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

ਅਨ੍ਤਰਘਰਂ ਪਵਿਟ੍ਠਾਯਾਤਿ ਰਥਿਕਂ ਬ੍ਯੂਹਂ ਸਿਙ੍ਘਾਟਕਂ ਘਰਂ ਪਵਿਟ੍ਠਾਯ. ਅਸਪ੍ਪਾਯਨ੍ਤਿ ਸਗ੍ਗਮੋਕ੍ਖਾਨਂ ਅਹਿਤਂ ਅਨਨੁਕੂਲਂ. ਭਿਕ੍ਖੁਨਿਯਾ ਅਨ੍ਤਰਘਰੇ ਠਤ੍ਵਾ ਦਦਮਾਨਾਯ ਵਸੇਨੇਤ੍ਥ ਆਪਤ੍ਤਿ ਵੇਦਿਤਬ੍ਬਾ, ਭਿਕ੍ਖੁਸ੍ਸ ਠਿਤਟ੍ਠਾਨਂ ਪਨ ਅਪ੍ਪਮਾਣਂ. ਤੇਨਾਹ ‘‘ਅਨ੍ਤਰਘਰਂ ਪਵਿਟ੍ਠਾਯਾਤਿ ਵਚਨਤੋ’’ਤਿਆਦਿ. ਅਨ੍ਤਰਾਰਾਮਾਦੀਸੂਤਿ ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਾਪਟਿਕ੍ਕਮਨੇਸੁ. ਰਥਿਯਾਬ੍ਯੂਹਸਿਙ੍ਘਾਟਕਘਰਾਨਨ੍ਤਿ ਏਤ੍ਥ ਰਥਿਯਾਤਿ ਰਚ੍ਛਾ. ਬ੍ਯੂਹਨ੍ਤਿ ਅਨਿਬ੍ਬਿਜ੍ਝਿਤ੍ਵਾ ਠਿਤਾ ਗਤਪਚ੍ਚਾਗਤਰਚ੍ਛਾ. ਸਿਙ੍ਘਾਟਕਨ੍ਤਿ ਚਤੁਕ੍ਕੋਣਂ ਵਾ ਤਿਕੋਣਂ ਵਾ ਮਗ੍ਗਸਮੋਧਾਨਟ੍ਠਾਨਂ. ਘਰਨ੍ਤਿ ਕੁਲਘਰਂ. ਯਥਾ ਚ ਰਥਿਯਾਦੀਸੁ ਠਤ੍ਵਾ ਦਦਮਾਨਾਯ ਗਣ੍ਹਤੋ ਆਪਤ੍ਤਿ, ਏਵਂ ਹਤ੍ਥਿਸਾਲਾਦੀਸੁਪਿ ਦਟ੍ਠਬ੍ਬਂ.

‘‘ਯਾਮਕਾਲਿਕਾਦੀਸੁ ਪਟਿਗ੍ਗਹਣੇਪਿ ਅਜ੍ਝੋਹਰਣੇਪਿ ਦੁਕ੍ਕਟ’’ਨ੍ਤਿ ਇਦਂ ਆਮਿਸੇਨ ਅਸਮ੍ਭਿਨ੍ਨਂ ਸਨ੍ਧਾਯ ਵੁਤ੍ਤਂ, ਸਮ੍ਭਿਨ੍ਨੇ ਪਨ ਏਕਰਸੇ ਪਾਟਿਦੇਸਨੀਯਮੇਵ. ਏਕਤੋ ਉਪਸਮ੍ਪਨ੍ਨਾਯਾਤਿ ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ, ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਪਨ ਯਥਾਵਤ੍ਥੁਕਮੇਵ.

ਞਾਤਿਕਾਯ ਵਾ ਦਾਪੇਨ੍ਤਿਯਾਤਿ ਸਯਂ ਅਦਤ੍ਵਾ ਯਾਯ ਕਾਯਚਿ ਞਾਤਿਕਾਯ ਦਾਪੇਨ੍ਤਿਯਾ, ਅਞ੍ਞਾਤਿਕਾਯਾਤਿ ਅਤ੍ਥੋ. ਉਪਨਿਕ੍ਖਿਪਿਤ੍ਵਾ ਵਾ ਦਦਮਾਨਾਯਾਤਿ ਭੂਮਿਯਂ ਠਪੇਤ੍ਵਾ ‘‘ਇਦਂ, ਅਯ੍ਯ, ਤੁਮ੍ਹਾਕਂ ਦਮ੍ਮੀ’’ਤਿ ਦਦਮਾਨਾਯ. ਏਵਂ ਦਿਨ੍ਨਂ ‘‘ਸਾਧੁ, ਭਗਿਨੀ’’ਤਿ ਸਮ੍ਪਟਿਚ੍ਛਿਤ੍ਵਾ ਤਾਯ ਏਵ ਵਾ ਭਿਕ੍ਖੁਨਿਯਾ, ਅਞ੍ਞੇਨ ਵਾ ਕੇਨਚਿ ਪਟਿਗ੍ਗਹਾਪੇਤ੍ਵਾ ਇਦਂ ਭੁਞ੍ਜਿਤੁਂ ਵਟ੍ਟਤਿ.

ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

ਯੋ ਚ ਪਟਿਗ੍ਗਹੇਤ੍ਵਾ ਭੁਞ੍ਜਤੀਤਿ ਸਮ੍ਬਨ੍ਧੋ. ਅਤ੍ਤਨੋ ਵਾ ਭਤ੍ਤਂ ਦਾਪੇਨ੍ਤਿਯਾਤਿ ਏਤ੍ਥ ਸਚੇਪਿ ਅਤ੍ਤਨੋ ਭਤ੍ਤਂ ਦੇਤਿ, ਇਮਿਨਾ ਸਿਕ੍ਖਾਪਦੇਨ ਅਨਾਪਤ੍ਤਿਯੇਵ, ਪੁਰਿਮਸਿਕ੍ਖਾਪਦੇਨ ਆਪਤ੍ਤਿ. ਅਞ੍ਞੇਸਂ ਵਾ ਭਤ੍ਤਂ ਦੇਨ੍ਤਿਯਾਤਿ ਏਤ੍ਥ ਪਨ ਸਚੇ ਦਾਪੇਯ੍ਯ, ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ ਭਵੇਯ੍ਯ, ਦੇਨ੍ਤਿਯਾ ਪਨ ਨੇਵ ਇਮਿਨਾ, ਨ ਪੁਰਿਮੇਨ ਆਪਤ੍ਤਿ.

ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

ਲਦ੍ਧਸੇਕ੍ਖਸਮ੍ਮੁਤਿਕਾਨੀਤਿ ਞਤ੍ਤਿਦੁਤਿਯੇਨ ਕਮ੍ਮੇਨ ਲਦ੍ਧਸੇਕ੍ਖਸਮ੍ਮੁਤਿਕਾਨਿ. ਯਞ੍ਹਿ ਕੁਲਂ ਸਦ੍ਧਾਯ ਵਡ੍ਢਤਿ, ਭੋਗੇਨ ਹਾਯਤਿ, ਏਵਰੂਪਸ੍ਸ ਕੁਲਸ੍ਸ ਞਤ੍ਤਿਦੁਤਿਯੇਨ ਕਮ੍ਮੇਨ ਸੇਕ੍ਖਸਮ੍ਮੁਤਿਂ ਦੇਨ੍ਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ.

ਘਰਤੋ ਨੀਹਰਿਤ੍ਵਾਤਿ ਘਰਤੋ ਆਸਨਸਾਲਂ ਵਾ ਵਿਹਾਰਂ ਵਾ ਆਨੇਤ੍ਵਾ. ਤੇਨਾਹ ‘‘ਆਸਨਸਾਲਾਦੀਸੁ ਵਾ’’ਤਿ. ਇਮਸ੍ਸ ‘‘ਦੇਨ੍ਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਦ੍ਵਾਰਮੂਲੇ ਵਾ ਠਪਿਤਂ ਦੇਨ੍ਤੀਤਿ ਦ੍ਵਾਰਮੂਲੇ ਠਪਿਤਂ ਪਚ੍ਛਾ ਸਮ੍ਪਤ੍ਤਸ੍ਸ ਦੇਨ੍ਤਿ. ਭਿਕ੍ਖੁਂ ਪਨ ਦਿਸ੍ਵਾ ਅਨ੍ਤੋਗੇਹਤੋ ਨੀਹਰਿਤ੍ਵਾ ਦਿਯ੍ਯਮਾਨਂ ਨ ਵਟ੍ਟਤਿ. ਨਿਚ੍ਚਭਤ੍ਤਕੇਤਿ ਨਿਚ੍ਚਂ ਦਾਤਬ੍ਬਭਤ੍ਤਕੇ. ਸਲਾਕਭਤ੍ਤੇਤਿ ਰੁਕ੍ਖਸਾਰਮਯਾਯ ਸਲਾਕਾਯ ਵਾ ਵੇਲ਼ੁਵਿਲੀਵਤਾਲਪਣ੍ਣਾਦਿਮਯਾਯ ਪਟ੍ਟਿਕਾਯ ਵਾ ‘‘ਅਸੁਕਸ੍ਸ ਨਾਮ ਸਲਾਕਭਤ੍ਤ’’ਨ੍ਤਿ ਏਵਂ ਅਕ੍ਖਰਾਨਿ ਉਪਨਿਬਨ੍ਧਿਤ੍ਵਾ ਗਾਹਾਪੇਤ੍ਵਾ ਦਾਤਬ੍ਬਭਤ੍ਤੇ. ਪਕ੍ਖਿਕੇਤਿ ਏਕਸ੍ਮਿਂ ਪਕ੍ਖੇ ਏਕਦਿਵਸੇ ਦਾਤਬ੍ਬਭਤ੍ਤੇ. ਉਪੋਸਥਿਕੇਤਿ ਉਪੋਸਥੇ ਦਾਤਬ੍ਬਭਤ੍ਤੇ. ਪਾਟਿਪਦਿਕੇਤਿ ਪਾਟਿਪਦਦਿਵਸੇ ਦਾਤਬ੍ਬਭਤ੍ਤੇ.

ਤਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ

ਤਸ੍ਸ ਪਰਿਵਾਰਂ ਕਤ੍ਵਾ, ਅਞ੍ਞਂ ਵਾ ਤੇਨ ਸਦ੍ਧਿਂ ਬਹੁਕਮ੍ਪੀਤਿ ਯਾਗੁਯਾ ਪਟਿਸਂਵਿਦਿਤਂ ਕਤ੍ਵਾ ‘‘ਕਿਂ ਸੁਦ੍ਧਾਯ ਯਾਗੁਯਾ ਦਿਨ੍ਨਾਯ, ਪੂਵਭਤ੍ਤਾਦੀਨਿਪਿ ਏਤਿਸ੍ਸਾ ਯਾਗੁਯਾ ਪਰਿਵਾਰਂ ਕਤ੍ਵਾ, ਦਸ੍ਸਾਮਾ’’ਤਿਆਦਿਨਾ ਤਸ੍ਸ ਖਾਦਨੀਯਸ੍ਸ ਵਾ ਭੋਜਨੀਯਸ੍ਸ ਵਾ ਪਰਿਵਾਰਂ ਕਤ੍ਵਾ, ਅਞ੍ਞਂ ਵਾ ਯਂ ਕਿਞ੍ਚਿ ਤੇਨ ਸਦ੍ਧਿਂ ਬਹੁਕਮ੍ਪਿ ਆਹਰੀਯਤੁ. ਖਾਦਨੀਯਨ੍ਤਿ ਨਿਦਸ੍ਸਨਮਤ੍ਤਂ ‘‘ਭੋਜਨੀਯਂ ਵਾ’’ਤਿਪਿ ਇਚ੍ਛਿਤਬ੍ਬਤ੍ਤਾ. ਤੇਨ ਸਦ੍ਧਿਂ ਆਹਰਨ੍ਤੂਤਿ ਤੇਨ ਸਦ੍ਧਿਂ ਅਤ੍ਤਨੋ ਦੇਯ੍ਯਧਮ੍ਮਂ ਆਹਰਨ੍ਤੁ. ‘‘ਯਾਗੁਯਾ ਪਟਿਸਂਵਿਦਿਤਂ ਕਤ੍ਵਾ ਪੂਵਂ ਵਾ ਭਤ੍ਤਂ ਵਾ ਆਹਰਨ੍ਤਿ, ਏਤਮ੍ਪਿ ਵਟ੍ਟਤੀ’’ਤਿ (ਪਾਚਿ. ਅਟ੍ਠ. ੫੭੩) ਕੁਰੁਨ੍ਦਿਯਂ ਵੁਤ੍ਤਂ.

ਪਟਿਸਂਵਿਦਿਤਗਿਲਾਨਾਵਸੇਸਕਂ ਵਾਤਿ ਪਟਿਸਂਵਿਦਿਤਞ੍ਚ ਗਿਲਾਨੋ ਚ ਪਟਿਸਂਵਿਦਿਤਗਿਲਾਨਾ, ਤੇਸਂ ਅਵਸੇਸਕਂ, ਪਟਿਸਂਵਿਦਿਤਸ੍ਸ ਚ ਗਿਲਾਨਸ੍ਸ ਚ ਸੇਸਕਨ੍ਤਿ ਅਤ੍ਥੋ. ਏਕਸ੍ਸਤ੍ਥਾਯ ਪਟਿਸਂਵਿਦਿਤਂ ਕਤ੍ਵਾ ਆਹਟਂ, ਤਸ੍ਸ ਸੇਸਕਂ ਅਞ੍ਞਸ੍ਸਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਚਤੁਨ੍ਨਂ ਵਾ ਪਞ੍ਚਨ੍ਨਂ ਵਾ ਪਟਿਸਂਵਿਦਿਤਂ ਕਤ੍ਵਾ ਬਹੂਨਂ ਆਹਟਂ ਹੋਤਿ, ਅਞ੍ਞੇਸਮ੍ਪਿ ਦਾਤੁਂ ਇਚ੍ਛਨ੍ਤਿ, ਏਤਮ੍ਪਿ ਪਟਿਸਂਵਿਦਿਤਸੇਸਕਮੇਵ, ਸਬ੍ਬੇਸਮ੍ਪਿ ਵਟ੍ਟਤਿ. ਅਥ ਅਧਿਕਮੇਵ ਹੋਤਿ, ਸਨ੍ਨਿਧਿਂ ਮੋਚੇਤ੍ਵਾ ਠਪਿਤਂ ਦੁਤਿਯਦਿਵਸੇਪਿ ਵਟ੍ਟਤਿ. ਗਿਲਾਨਸ੍ਸਾਹਟਾਵਸੇਸੇਪਿ ਏਸੇਵ ਨਯੋ. ਯਂ ਪਨ ਅਪ੍ਪਟਿਸਂਵਿਦਿਤਮੇਵ ਕਤ੍ਵਾ ਆਭਤਂ, ਤਂ ਬਹਿਆਰਾਮਂ ਪੇਸੇਤ੍ਵਾ ਪਟਿਸਂਵਿਦਿਤਂ ਕਾਰੇਤ੍ਵਾ ਆਹਰਾਪੇਤਬ੍ਬਂ, ਭਿਕ੍ਖੂਹਿ ਵਾ ਗਨ੍ਤ੍ਵਾ ਅਨ੍ਤਰਾਮਗ੍ਗੇ ਗਹੇਤਬ੍ਬਂ. ਯਮ੍ਪਿ ਵਿਹਾਰਮਜ੍ਝੇਨ ਗਚ੍ਛਨ੍ਤੋ ਵਾ ਵਨਚਰਕਾਦਯੋ ਵਾ ਵਨਤੋ ਆਹਰਿਤ੍ਵਾ ਦੇਨ੍ਤਿ, ਪੁਰਿਮਨਯੇਨੇਵ ਪਟਿਸਂਵਿਦਿਤਂ ਕਾਰੇਤਬ੍ਬਂ. ਕਤ੍ਥਚਿ ਪਨ ਪੋਤ੍ਥਕੇਸੁ ‘‘ਪਟਿਸਂਵਿਦਿਤਂ ਕਤ੍ਵਾ ਆਹਟਂ ਵਾ ਗਿਲਾਨਾਵਸੇਸਕਂ ਵਾ’’ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ. ਤਤ੍ਥਜਾਤਕਮੇਵ ਵਾਤਿ ਆਰਾਮੇ ਜਾਤਕਮੇਵ. ਮੂਲਫਲਾਦਿਨ੍ਤਿ ਮੂਲਫਲਤਚਪਤ੍ਤਾਦਿਂ ਅਞ੍ਞੇਨ ਕਪ੍ਪਿਯਂ ਕਤ੍ਵਾ ਦਿਨ੍ਨਂ ਪਰਿਭੁਞ੍ਜਤੋ ਅਨਾਪਤ੍ਤਿ. ਸਚੇ ਪਨ ਤਂ ਗਾਮਂ ਹਰਿਤ੍ਵਾ ਪਚਿਤ੍ਵਾ ਆਹਰਨ੍ਤਿ, ਨ ਵਟ੍ਟਤਿ. ਪਟਿਸਂਵਿਦਿਤਂ ਕਾਰੇਤਬ੍ਬਂ.

ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ

ਪਾਟਿਦੇਸਨੀਯਵਣ੍ਣਨਾ ਨਿਟ੍ਠਿਤਾ.