ਸੇਖਿਯਕਣ੍ਡਂ
੧. ਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ
‘‘ਅਨ੍ਤਰਘਰੇ’’ਤਿ ਵਿਸੇਸੇਤ੍ਵਾ ਨ ਵੁਤ੍ਤਤ੍ਤਾ ‘‘ਆਰਾਮੇਪਿ ਅਨ੍ਤਰਘਰੇਪਿ ਸਬ੍ਬਤ੍ਥਾ’’ਤਿ ਵੁਤ੍ਤਂ. ਆਰਾਮੇਪੀਤਿ ਬੁਦ੍ਧੂਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ. ਯਥਾ ‘‘ਤਤ੍ਰਿਮੇ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤੀ’’ਤਿਆਦਿਨਾ ਤਤ੍ਥ ਤਤ੍ਥ ਪਰਿਚ੍ਛੇਦੋ ਕਤੋ, ਏਵਮੇਤ੍ਥਾਪਿ ‘‘ਤਤ੍ਰਿਮੇ ਪਞ੍ਚਸਤ੍ਤਤਿ ਸੇਖਿਯਾ ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤੀ’’ਤਿ ਕਸ੍ਮਾ ਪਰਿਚ੍ਛੇਦੋ ਨ ਕਤੋਤਿ ਆਹ ‘‘ਏਤ੍ਥ ਚਾ’’ਤਿਆਦਿ. ਵਤ੍ਤਕ੍ਖਨ੍ਧਕੇ ਵੁਤ੍ਤਵਤ੍ਤਾਨਿਪੀਤਿ ਆਗਨ੍ਤੁਕਾਵਾਸਿਕਗਮਿਕਾਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਾਰਞ੍ਞਸੇਨਾਸਨਜਨ੍ਤਾਘਰਵਚ੍ਚਕੁਟਿਉਪਜ੍ਝਾਚਰਿਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਵਤ੍ਤਾਨਿ. ਇਦਞ੍ਚ ਨਿਦਸ੍ਸਨਮਤ੍ਤਂ ਅਞ੍ਞੇਸਮ੍ਪਿ ਖਨ੍ਧਕਵਤ੍ਤਾਨਂ ਏਤ੍ਥੇਵ ਸਙ੍ਗਹਸ੍ਸ ਇਚ੍ਛਿਤਬ੍ਬਤ੍ਤਾ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸੇਖਿਯਗ੍ਗਹਣੇਨ ਚੇਤ੍ਥ ਵਤ੍ਤਕ੍ਖਨ੍ਧਕਾਦੀਸੁ (ਚੂਲ਼ਵ. ੩੫੬ ਆਦਯੋ) ਆਗਤਵਤ੍ਤਾਦੀਨਮ੍ਪਿ ਗਹਣਂ. ਤੇਪਿ ਹਿ ਸਿਕ੍ਖਿਤਬ੍ਬਟ੍ਠੇਨ ‘‘ਸੇਖਿਯਾ’’ਤਿ ਇਚ੍ਛਿਤਾ. ਤਸ੍ਮਾ ਮਾਤਿਕਾਯਂ ਪਾਰਾਜਿਕਾਦੀਨਂ ਵਿਯ ਸੇਖਿਯਾਨਂ ਪਰਿਚ੍ਛੇਦੋ ਨ ਕਤੋਤਿ. ਨ ਕੇਵਲਂ ਵਤ੍ਤਕ੍ਖਨ੍ਧਕਾਦੀਸੁ (ਚੂਲ਼ਵ. ੩੫੬ ਆਦਯੋ) ਆਗਤਵਤ੍ਤਾਦੀਨਂ ਗਹਣਤ੍ਥਮੇਵਾਤਿ ਆਹ ‘‘ਚਾਰਿਤ੍ਤਵਿਨਯਦਸ੍ਸਨਤ੍ਥਞ੍ਚਾ’’ਤਿ. ਏਤ੍ਥਾਪਿ ਪਰਿਚ੍ਛੇਦੋ ਨ ਕਤੋਤਿ ਆਨੇਤ੍ਵਾ ਯੋਜੇਤਬ੍ਬਂ. ਮਾਤਿਕਾਯ ‘‘ਦੁਕ੍ਕਟ’’ਨ੍ਤਿ ਅਵੁਤ੍ਤੇ ਕਥਂ ਪਨੇਤ੍ਥ ਦੁਕ੍ਕਟਨ੍ਤਿ ਵੇਦਿਤਬ੍ਬਨ੍ਤਿ ਆਹ ‘‘ਯੋ ਪਨਾ’’ਤਿਆਦਿ.
ਅਟ੍ਠਙ੍ਗੁਲਮਤ੍ਤਨ੍ਤਿ ਪਕਤਙ੍ਗੁਲੇਨ ਅਟ੍ਠਙ੍ਗੁਲਮਤ੍ਤਂ. ਯੋ ਪਨ ਸੁਕ੍ਖਜਙ੍ਘੋ ਵਾ ਮਹਾਪਿਣ੍ਡਿਕਮਂਸੋ ਵਾ ਹੋਤਿ, ਤਸ੍ਸ ਸਾਰੁਪ੍ਪਤ੍ਥਾਯ ਅਟ੍ਠਙ੍ਗੁਲਾਧਿਕਮ੍ਪਿ ਓਤਾਰੇਤ੍ਵਾ ਨਿਵਾਸੇਤੁਂ ਵਟ੍ਟਤਿ.
ਪਾਸਨ੍ਤਨ੍ਤਿ ਪਾਸਸ੍ਸ ਅਨ੍ਤਂ, ਦਸਾਮੂਲਨ੍ਤਿ ਅਤ੍ਥੋ.
ਅਪਰਿਮਣ੍ਡਲਂ ਨਿਵਾਸੇਸ੍ਸਾਮੀਤਿ ‘‘ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਸ੍ਸਾਮੀ’’ਤਿ ਏਵਂ ਅਸਞ੍ਚਿਚ੍ਚ. ਕਿਞ੍ਚਾਪਿ ਪਰਿਮਣ੍ਡਲਂ ਨਿਵਾਸੇਤੁਂ ਅਜਾਨਨ੍ਤਸ੍ਸ ਅਨਾਪਤ੍ਤਿ, ਤਥਾਪਿ ਨਿਵਾਸਨਵਤ੍ਤਂ ਸਾਧੁਕਂ ਉਗ੍ਗਹੇਤਬ੍ਬਮੇਵ. ਸਞ੍ਚਿਚ੍ਚ ਅਨੁਗ੍ਗਹਣਞ੍ਹਿ ਅਨਾਦਰਿਯਂ ਸਿਯਾਤਿ ਆਹ ‘‘ਅਪਿਚ ਨਿਵਾਸਨਵਤ੍ਤਂ ਉਗ੍ਗਹੇਤਬ੍ਬ’’ਨ੍ਤਿ.
ਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ
ਪਟਿਕ੍ਖਿਤ੍ਤਂ ਗਿਹਿਪਾਰੁਤਨ੍ਤਿ ਖੁਦ੍ਦਕਵਤ੍ਥੁਖਨ੍ਧਕੇ ਪਟਿਕ੍ਖਿਤ੍ਤਂ ਗਿਹਿਪਾਰੁਤਂ. ਇਦਾਨਿ ‘‘ਨ, ਭਿਕ੍ਖਵੇ’’ਤਿਆਦਿਨਾ (ਚੂਲ਼ਵ. ੨੮੦-੨੮੧) ਸਙ੍ਖੇਪੇਨ ਵੁਤ੍ਤਮਤ੍ਥਮੇਵ ਵਿਤ੍ਥਾਰੇਤ੍ਵਾ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਯਂ ਕਿਞ੍ਚਿ ਅਞ੍ਞਥਾ ਪਾਰੁਤਨ੍ਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਸੇਤਪਟਪਾਰੁਤਾਦਿ ਗਿਹਿਪਾਰੁਤਂ ਨਾਮ, ਤਸ੍ਮਾ. ਸੇਤਪਟਾਤਿ ਏਤਸ੍ਸੇਵ ਵਿਵਰਣਂ. ਅਡ੍ਢਪਾਲਕਨਿਗਣ੍ਠਾਤਿ ਅਡ੍ਢਂ ਪਾਲੇਨ੍ਤੀਤਿ ਅਡ੍ਢਪਾਲਕਾ, ਅਡ੍ਢਪਾਲਕਾ ਚ ਤੇ ਨਿਗਣ੍ਠਾ ਚਾਤਿ ਅਡ੍ਢਪਾਲਕਨਿਗਣ੍ਠਾ. ਤੇ ਹਿ ਉਪਰਿ ਏਕਮੇਵ ਸੇਤਵਤ੍ਥਂ ਉਪਕਚ੍ਛਕੇ ਪਵੇਸੇਤ੍ਵਾ ਪਰਿਦਹਨ੍ਤਿ, ਹੇਟ੍ਠਾ ਨਗ੍ਗਾਪਿ ਅਡ੍ਢਮੇਵ ਪਾਲੇਨ੍ਤਿ. ਪਰਿਬ੍ਬਾਜਕਾਤਿ ਗਿਹਿਬਨ੍ਧਨਂ ਪਹਾਯ ਪਬ੍ਬਜ੍ਜੂਪਗਤਾ. ਉਰਂ ਵਿਵਰਿਤ੍ਵਾਤਿ ਹਦਯਮਜ੍ਝਂ ਵਿਵਰਿਤ੍ਵਾ. ਅਕ੍ਖਿਤਾਰਕਾਮਤ੍ਤਨ੍ਤਿ ਅਕ੍ਖਿਮਤ੍ਤਂ. ਆਰਾਮੇ ਵਾਤਿ ਬੁਦ੍ਧੂਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ. ਅਨ੍ਤਰਘਰੇ ਵਾਤਿ ਅਨ੍ਤਰੇ ਘਰਾਨਿ ਏਤ੍ਥ, ਏਤਸ੍ਸਾਤਿ ਵਾ ‘‘ਅਨ੍ਤਰਘਰ’’ਨ੍ਤਿ ਲਦ੍ਧਨਾਮੇ ਗਾਮੇ.
ਦੁਤਿਯਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩-੪. ਸੁਪ੍ਪਟਿਚ੍ਛਨ੍ਨਸਿਕ੍ਖਾਪਦਵਣ੍ਣਨਾ
ਸੁਟ੍ਠੁ ਪਟਿਚ੍ਛਨ੍ਨੋਤਿ ਜਤ੍ਤੁਮ੍ਪਿ ਉਰਮ੍ਪਿ ਅਵਿਵਰਿਤ੍ਵਾ ਪਟਿਚ੍ਛਾਦੇਤਬ੍ਬਟ੍ਠਾਨੇ ਪਟਿਚ੍ਛਾਦਨੇਨ ਪਟਿਚ੍ਛਨ੍ਨੋ, ਨ ਸੀਸਪਾਰੁਤੋ. ਤੇਨਾਹ ‘‘ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ’’ਤਿਆਦਿ. ਤਤ੍ਥ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾਤਿ ਗਣ੍ਠਿਕਂ ਪਾਸਕੇ ਪਟਿਮੁਞ੍ਚਿਤ੍ਵਾ. ਅਨ੍ਤਰਘਰੇ ਵਾਤਿ ਗੋਚਰਗਾਮੇ. ਏਕਦਿਵਸਮ੍ਪਿ ਵਾਸੂਪਗਤਸ੍ਸ ਸਨ੍ਤਿਕਂ ਯਥਾਸੁਖਂ ਗਨ੍ਤੁਂ ਵਟ੍ਟਤਿ, ਕੋ ਪਨ ਵਾਦੋ ਚਤੁਪ੍ਪਞ੍ਚਾਹਂ ਵਾਸਮਧਿਟ੍ਠਾਯ ਵਸਿਤਭਿਕ੍ਖੂਨਂ ਸਨ੍ਤਿਕਨ੍ਤਿ ਗਣ੍ਠਿਪਦੇ ਲਿਖਿਤਂ.
ਵਾਸੂਪਗਤਸ੍ਸਾਤਿ ਰਤ੍ਤਿਵਾਸਤ੍ਥਾਯ ਉਪਗਤਸ੍ਸ ਰਤ੍ਤਿਭਾਗੇ ਵਾ ਦਿਵਸਭਾਗੇ ਵਾ ਕਾਯਂ ਵਿਵਰਿਤ੍ਵਾ ਨਿਸੀਦਤੋ ਅਨਾਪਤ੍ਤਿ.
ਸੁਪ੍ਪਟਿਚ੍ਛਨ੍ਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫-੬. ਸੁਸਂਵੁਤਸਿਕ੍ਖਾਪਦਵਣ੍ਣਨਾ
ਸੁਸਂਵੁਤੋਤਿ ਸੁਸਂਯਤੋ. ਯਥਾ ਪਨੇਤ੍ਥ ਸੁਸਂਵੁਤੋ ਨਾਮ ਹੋਤਿ, ਤਂ ਦਸ੍ਸੇਤੁਂ ‘‘ਹਤ੍ਥਂ ਵਾ’’ਤਿਆਦਿ ਵੁਤ੍ਤਂ.
ਸੁਸਂਵੁਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭-੮. ਓਕ੍ਖਿਤ੍ਤਚਕ੍ਖੁਸਿਕ੍ਖਾਪਦਵਣ੍ਣਨਾ
ਕਿਤ੍ਤਕੇਨ ਪਨ ਓਕ੍ਖਿਤ੍ਤਚਕ੍ਖੁ ਹੋਤੀਤਿ ਆਹ ‘‘ਯੁਗਮਤ੍ਤਂ ਭੂਮਿਭਾਗਂ ਪੇਕ੍ਖਮਾਨੋ’’ਤਿ. ਯੁਗਯੁਤ੍ਤਕੋ ਹਿ ਦਨ੍ਤੋ ਆਜਾਨੇਯ੍ਯੋ ਯੁਗਮਤ੍ਤਂ ਪੇਕ੍ਖਤਿ, ਪੁਰਤੋ ਚਤੁਹਤ੍ਥਪ੍ਪਮਾਣਂ ਭੂਮਿਭਾਗਂ, ਇਮਿਨਾਪਿ ਏਤ੍ਤਕਂ ਪੇਕ੍ਖਨ੍ਤੇਨ ਗਨ੍ਤਬ੍ਬਂ. ਯੋ ਅਨਾਦਰਿਯਂ ਪਟਿਚ੍ਚ ਤਂ ਤਂ ਦਿਸਾਭਾਗਂ ਪਾਸਾਦਂ ਕੂਟਾਗਾਰਂ ਵੀਥਿਂ ਓਲੋਕੇਨ੍ਤੋ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਹਤ੍ਥਿਅਸ੍ਸਾਦਿਪਰਿਸ੍ਸਯਾਭਾਵਨ੍ਤਿ ਪਰਿਸ੍ਸਯਨਟ੍ਠੇਨ, ਅਭਿਭਵਨਟ੍ਠੇਨ, ਵਿਹੇਠਨਟ੍ਠੇਨ ਵਾ ਪਰਿਸ੍ਸਯੋ, ਹਤ੍ਥਿਅਸ੍ਸਾਦਿਯੇਵ ਪਰਿਸ੍ਸਯੋ ਹਤ੍ਥਿਅਸ੍ਸਾਦਿਪਰਿਸ੍ਸਯੋ, ਤਸ੍ਸਾਭਾਵਂ, ਹਤ੍ਥਿਅਸ੍ਸਾਦਿ ਉਪਦ੍ਦਵਾਭਾਵਨ੍ਤਿ ਅਤ੍ਥੋ. ‘‘ਯਥਾ ਚ ਏਕਸ੍ਮਿਂ ਠਾਨੇ ਠਤ੍ਵਾ, ਏਵਂ ਗਚ੍ਛਨ੍ਤੋਪਿ ਪਰਿਸ੍ਸਯਾਭਾਵਂ ਓਲੋਕੇਤੁਂ ਲਭਤਿਯੇਵ, ਤਥਾ ਗਾਮੇ ਪੂਜ’’ਨ੍ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੫੮੨) ਵਦਨ੍ਤਿ.
ਓਕ੍ਖਿਤ੍ਤਚਕ੍ਖੁਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯-੧੦. ਉਕ੍ਖਿਤ੍ਤਕਾਯਸਿਕ੍ਖਾਪਦਵਣ੍ਣਨਾ
ਅਨ੍ਤੋਇਨ੍ਦਖੀਲਤੋ ਪਟ੍ਠਾਯਾਤਿ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਅਨ੍ਤੋਉਮ੍ਮਾਰਤੋ ਪਟ੍ਠਾਯ, ਅਪਰਿਕ੍ਖਿਤ੍ਤਸ੍ਸ ਪਨ ਦੁਤਿਯਲੇਡ੍ਡੁਪਾਤਤੋ ਪਟ੍ਠਾਯ ਨ ਏਵਂ ਗਨ੍ਤਬ੍ਬਂ.
ਉਕ੍ਖਿਤ੍ਤਕਾਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੧-੧੨. ਉਜ੍ਜਗ੍ਘਿਕਸਿਕ੍ਖਾਪਦਵਣ੍ਣਨਾ
ਹਸਨੀਯਸ੍ਮਿਂ ਵਤ੍ਥੁਸ੍ਮਿਨ੍ਤਿ ਨਿਮਿਤ੍ਤਤ੍ਥੇ ਭੁਮ੍ਮਂ, ਹਸਿਤਬ੍ਬਵਤ੍ਥੁਕਾਰਣਾਤਿ ਅਤ੍ਥੋ.
ਉਜ੍ਜਗ੍ਘਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੩-੧੪. ਉਚ੍ਚਸਦ੍ਦਸਿਕ੍ਖਾਪਦਵਣ੍ਣਨਾ
ਕਿਤ੍ਤਾਵਤਾ ਅਪ੍ਪਸਦ੍ਦੋ ਹੋਤੀਤਿ ਆਹ ‘‘ਅਯਂ ਪਨੇਤ੍ਥਾ’’ਤਿਆਦਿ. ਸਦ੍ਦਮੇਵ ਸੁਣਾਤੀਤਿ ਅਪਰਿਬ੍ਯਤ੍ਤਕ੍ਖਰਂ ਸਦ੍ਦਮਤ੍ਤਮੇਵ ਸੁਣਾਤਿ. ਤੇਨਾਹ ‘‘ਕਥਂ ਨ ਵਵਤ੍ਥਪੇਤੀ’’ਤਿ.
ਉਚ੍ਚਸਦ੍ਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੫-੨੦. ਕਾਯਪ੍ਪਚਾਲਕਾਦਿਸਿਕ੍ਖਾਪਦਵਣ੍ਣਨਾ
‘‘ਕਾਯਾਦੀਨਿ ਪਗ੍ਗਹੇਤ੍ਵਾ’’ਤਿ ਏਤਸ੍ਸੇਵ ਵਿਵਰਣਂ ‘‘ਨਿਚ੍ਚਲਾਨਿ ਉਜੁਕਾਨਿ ਠਪੇਤ੍ਵਾ’’ਤਿ ਗਨ੍ਤਬ੍ਬਞ੍ਚੇਵ ਨਿਸੀਦਿਤਬ੍ਬਞ੍ਚਾਤਿ ਸਮੇਨ ਇਰਿਯਾਪਥੇਨ ਗਨ੍ਤਬ੍ਬਞ੍ਚੇਵ ਨਿਸੀਦਿਤਬ੍ਬਞ੍ਚ. ਕਾਯਪ੍ਪਚਾਲਕਾਦਿਯੁਤ੍ਤਂ ਛਕ੍ਕਂ.
ਕਾਯਪ੍ਪਚਾਲਕਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨੬. ਪਲ੍ਲਤ੍ਥਿਕਸਿਕ੍ਖਾਪਦਵਣ੍ਣਨਾ
ਦੁਸ੍ਸਪਲ੍ਲਤ੍ਥਿਕਾਯਾਤਿ ਏਤ੍ਥ ਆਯੋਗਪਲ੍ਲਤ੍ਥਿਕਾਪਿ ਦੁਸ੍ਸਪਲ੍ਲਤ੍ਥਿਕਾਯੇਵ.
ਪਲ੍ਲਤ੍ਥਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਛਬ੍ਬੀਸਤਿਸਾਰੁਪ੍ਪਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨੭. ਸਕ੍ਕਚ੍ਚਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ
ਸਤਿਂ ਉਪਟ੍ਠਾਪੇਤ੍ਵਾਤਿ ਛਡ੍ਡੇਤੁਕਾਮੋ ਵਿਯ ਅਹੁਤ੍ਵਾ ਪਿਣ੍ਡਪਾਤੇ ਸਤਿਂ ਉਪਟ੍ਠਾਪੇਤ੍ਵਾ, ‘‘ਪਿਣ੍ਡਪਾਤਂ ਗਣ੍ਹਿਸ੍ਸਾਮੀ’’ਤਿ ਸਤਿਂ ਉਪਟ੍ਠਾਪੇਤ੍ਵਾ.
ਸਕ੍ਕਚ੍ਚਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨੮. ਪਤ੍ਤਸਞ੍ਞੀਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ
ਉਪਨਿਬਦ੍ਧਸਞ੍ਞੀ ਹੁਤ੍ਵਾਤਿ ਪਿਣ੍ਡਪਾਤਂ ਦੇਨ੍ਤੇ ਅਨਾਦਰਿਯਂ ਪਟਿਚ੍ਚ ਤਹਂ ਤਹਂ ਅਨੋਲੋਕੇਤ੍ਵਾ ਪਤ੍ਤੇ ਆਭੋਗਸਞ੍ਞੀ ਹੁਤ੍ਵਾ.
ਪਤ੍ਤਸਞ੍ਞੀਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨੯. ਸਮਸੂਪਕਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ
ਸਮਸੂਪਕਨ੍ਤਿ ਪਮਾਣਯੁਤ੍ਤਂ ਸੂਪਵਨ੍ਤਂ ਕਤ੍ਵਾ, ਭਾਵਨਪੁਂਸਕਨਿਦ੍ਦੇਸੋ ਚਾਯਂ. ਬ੍ਯਞ੍ਜਨਂ ਪਨ ਅਨਾਦਿਯਿਤ੍ਵਾ ਅਤ੍ਥਮਤ੍ਤਮੇਵ ਦਸ੍ਸੇਤੁਂ ‘‘ਸਮਸੂਪਕੋ ਨਾਮਾ’’ਤਿਆਦਿ ਵੁਤ੍ਤਂ. ਸਬ੍ਬਾਪਿ ਸੂਪੇਯ੍ਯਬ੍ਯਞ੍ਜਨਵਿਕਤੀਤਿ ਓਲੋਣਿਸਾਕਸੂਪੇਯ੍ਯਮਚ੍ਛਮਂਸਰਸਾਦਿਕਾ ਸਬ੍ਬਾਪਿ ਸੂਪੇਯ੍ਯਬ੍ਯਞ੍ਜਨਵਿਕਤਿ.
ਸਮਸੂਪਕਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੦-੩੨. ਸਮਤਿਤ੍ਤਿਕਾਦਿਸਿਕ੍ਖਾਪਦਵਣ੍ਣਨਾ
ਸਮਤਿਤ੍ਤਿਕਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਸਮਤਿਤ੍ਤਿਕਂ ਕਤ੍ਵਾਤਿ ਅਤ੍ਥੋ. ਏਵਮਞ੍ਞੇਸੁਪਿ ਈਦਿਸੇਸੁ ਠਾਨੇਸੁ ਅਤ੍ਥੋ ਦਟ੍ਠਬ੍ਬੋ. ਸਮਪੁਣ੍ਣਨ੍ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੦੫) ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਾਸਮਪੁਣ੍ਣਂ. ਸਮਭਰਿਤਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਤਞ੍ਚ ਖੋ ਅਧਿਟ੍ਠਾਨੁਪਗਪਤ੍ਤਸ੍ਸੇਵ, ਨੇਤਰਸ੍ਸ. ਤੇਨਾਹ ‘‘ਅਧਿਟ੍ਠਾਨੁਪਗਪਤ੍ਤਸ੍ਸਾ’’ਤਿਆਦਿ. ਰਚਿਤਨ੍ਤਿ ਕਤਂ, ਪਕ੍ਖਿਤ੍ਤਂ ਪੂਰਿਤਨ੍ਤਿ ਅਤ੍ਥੋ. ਯਂ ਕਿਞ੍ਚਿ ਯਾਵਕਾਲਿਕਨ੍ਤਿ ਯਾਗੁਭਤ੍ਤਫਲਾਫਲਾਦਿਂ ਯਂ ਕਿਞ੍ਚਿ ਆਮਿਸਜਾਤਿਕਂ. ਯਤ੍ਥ ਕਤ੍ਥਚੀਤਿ ਅਧਿਟ੍ਠਾਨੁਪਗੋ ਵਾ ਹੋਤੁ, ਅਨਧਿਟ੍ਠਾਨੁਪਗੋ ਵਾ ਯਤ੍ਥ ਕਤ੍ਥਚਿ ਪਤ੍ਤੇ. ਥੂਪੀਕਤਾਨੀਤਿ ਥੂਪਂ ਵਿਯ ਕਤਾਨਿ, ਅਧਿਟ੍ਠਾਨੁਪਗਸ੍ਸ ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਂ ਅਤਿਕ੍ਕਮਿਤ੍ਵਾ ਕਤਾਨੀਤਿ ਅਤ੍ਥੋ. ਇਦਞ੍ਚ ‘‘ਯਾਮਕਾਲਿਕਾਦੀਨੀ’’ਤਿ ਇਮਸ੍ਸ ਵਸੇਨ ਵੁਤ੍ਤਂ, ‘‘ਯਾਵਕਾਲਿਕ’’ਨ੍ਤਿ ਇਮਸ੍ਸ ਪਨ ਵਸੇਨ ਵਚਨਬ੍ਯਤ੍ਤਯਂ ਕਤ੍ਵਾ ‘‘ਥੂਪੀਕਤਮ੍ਪਿ ਵਟ੍ਟਤੀ’’ਤਿ ਯੋਜੇਤਬ੍ਬਂ. ਪਿ-ਸਦ੍ਦੇਨ ਅਥੂਪੀਕਤਾਨਿ ਵਟ੍ਟਨ੍ਤੀਤਿ ਏਤ੍ਥ ਕਥਾਵ ਨਤ੍ਥੀਤਿ ਦਸ੍ਸੇਤਿ. ਹੇਟ੍ਠਾ ਓਰੋਹਤੀਤਿ ਸਮਨ੍ਤਾ ਓਕਾਸਸਬ੍ਭਾਵਤੋ ਚਾਲਿਯਮਾਨਂ ਹੇਟ੍ਠਾ ਭਸ੍ਸਤਿ. ਤਕ੍ਕੋਲਵਟਂਸਕਾਦਯੋਤਿ ਏਤ੍ਥ ਮਤ੍ਥਕੇ ਠਪਿਤਤਕ੍ਕੋਲਮੇਵ ਵਟਂਸਕਸਦਿਸਤ੍ਤਾ ਤਕ੍ਕੋਲਵਟਂਸਕਂ. ਆਦਿਸਦ੍ਦੇਨ ਪੁਪ੍ਫਵਟਂਸਕਕਟੁਕਫਲਾਦਿਵਟਂਸਕਾਨਂ (ਪਾਚਿ. ਅਟ੍ਠ. ੬੦੫) ਗਹਣਂ, ਨ ਤਂ ਥੂਪੀਕਤਂ ਨਾਮ ਹੋਤਿ ਪਾਟੇਕ੍ਕਂ ਭਾਜਨਤ੍ਤਾ ਪਣ੍ਣਾਦੀਨਂ.
ਸਮਤਿਤ੍ਤਿਕਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੩-੩੪. ਸਪਦਾਨਸਿਕ੍ਖਾਪਦਵਣ੍ਣਨਾ
ਸਪਦਾਨਨ੍ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੦੮) ਏਤ੍ਥ ਦਾਨਂ ਵੁਚ੍ਚਤਿ ਅਵਖਣ੍ਡਨਂ, ਅਪੇਤਂ ਦਾਨਤੋ ਅਪਦਾਨਂ, ਅਨਵਖਣ੍ਡਨ੍ਤਿ ਅਤ੍ਥੋ, ਸਹ ਅਪਦਾਨੇਨ ਸਪਦਾਨਂ, ਅਵਖਣ੍ਡਨਵਿਰਹਿਤਂ, ਅਨੁਪਟਿਪਾਟਿਯਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤਤ੍ਥ ਤਤ੍ਥ ਓਧਿਂ ਅਕਤ੍ਵਾ ਅਨੁਪਟਿਪਾਟਿਯਾ’’ਤਿ.
ਸਪਦਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੬. ਓਦਨਪ੍ਪਟਿਚ੍ਛਾਦਨਸਿਕ੍ਖਾਪਦਵਣ੍ਣਨਾ
ਮਾਘਾਤਸਮਯਾਦੀਸੂਤਿ ਏਤ੍ਥ ਯਸ੍ਮਿਂ ਸਮਯੇ ‘‘ਪਾਣੋ ਨ ਹਨ੍ਤਬ੍ਬੋ’’ਤਿ ਰਾਜਾਨੋ ਭੇਰਿਂ ਚਰਾਪੇਨ੍ਤਿ, ਅਯਂ ਮਾਘਾਤਸਮਯੋ ਨਾਮ. ਬ੍ਯਞ੍ਜਨਂ ਪਟਿਚ੍ਛਾਦੇਤ੍ਵਾ ਦੇਨ੍ਤੀਤਿ ਬ੍ਯਞ੍ਜਨਂ ਛਨ੍ਨਂ ਕਤ੍ਵਾ ਦੇਨ੍ਤਿ.
ਓਦਨਪ੍ਪਟਿਚ੍ਛਾਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੭. ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ
ਏਕਾਦਸਮੇਤਿ ਸੂਪੋਦਨਵਿਞ੍ਞਤ੍ਤਿਯਂ. ਏਤ੍ਥ ਪਨ ਯਸ੍ਸ ਮੁਖੇ ਪਕ੍ਖਿਪਿਤ੍ਵਾ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਪੁਨ ਉਗ੍ਗਿਰਿਤੁਕਾਮਸ੍ਸਾਪਿ ਸਚੇ ਸਹਸਾ ਪਵਿਸਤਿ, ਅਯਂ ਅਸਞ੍ਚਿਚ੍ਚ ਪਰਿਭੁਞ੍ਜਤਿ ਨਾਮ. ਯੋ ਪਨ ਵਿਞ੍ਞਤ੍ਤਮ੍ਪਿ ਅਵਿਞ੍ਞਤ੍ਤਮ੍ਪਿ ਏਕਸ੍ਮਿਂ ਠਾਨੇ ਠਿਤਂ ਸਹਸਾ ਅਨੁਪਧਾਰੇਤ੍ਵਾ ਗਹੇਤ੍ਵਾ ਭੁਞ੍ਜਤਿ, ਅਯਂ ਅਸਤਿਯਾ ਭੁਞ੍ਜਤਿ ਨਾਮ.
ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੮. ਉਜ੍ਝਾਨਸਞ੍ਞੀਸਿਕ੍ਖਾਪਦਵਣ੍ਣਨਾ
ਉਜ੍ਝਾਯਤਿ ਏਤੇਨਾਤਿ ਉਜ੍ਝਾਨਂ, ਚਿਤ੍ਤਂ, ਤਸ੍ਮਿਂ ਸਞ੍ਞਾ ਉਜ੍ਝਾਨਸਞ੍ਞਾਤਿ ਆਹ ‘‘ਉਜ੍ਝਾਨਸਞ੍ਞੀ’’ਤਿਆਦਿ. ਓਲੋਕੇਨ੍ਤਸ੍ਸਾਤਿ ਪਰੇਸਂ ਪਤ੍ਤਂ ਓਲੋਕੇਨ੍ਤਸ੍ਸ.
ਉਜ੍ਝਾਨਸਞ੍ਞੀਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩੯. ਕਬਲ਼ਸਿਕ੍ਖਾਪਦਵਣ੍ਣਨਾ
‘‘ਮਯੂਰਣ੍ਡਂ ਅਤਿਮਹਨ੍ਤ’’ਨ੍ਤਿ ਵਚਨਤੋ ਮਯੂਰਣ੍ਡਪ੍ਪਮਾਣੋਪਿ ਕਬਲ਼ੋ ਨ ਵਟ੍ਟਤਿ. ਕੇਚਿ ਪਨ ‘‘ਮਯੂਰਣ੍ਡਤੋ ਮਹਨ੍ਤੋਵ ਨ ਵਟ੍ਟਤਿ, ਨ ਮਯੂਰਣ੍ਡਪ੍ਪਮਾਣੋ’’ਤਿਪਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਕੁਕ੍ਕੁਟਣ੍ਡਂ ਅਤਿਖੁਦ੍ਦਕਨ੍ਤਿ ਏਤ੍ਥਾਪਿ ਏਸੇਵ ਨਯੋ, ਗਿਲਾਨਸ੍ਸ ਪਨ ਅਤਿਖੁਦ੍ਦਕਂ ਕਬਲ਼ਂ ਕਰੋਤੋਪਿ ਅਨਾਪਤ੍ਤਿ.
ਕਬਲ਼ਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪੧-੪੨. ਅਨਾਹਟਸਿਕ੍ਖਾਪਦਵਣ੍ਣਨਾ
ਸਕਲਂ ਹਤ੍ਥਨ੍ਤਿ ਸਕਲਾ ਅਙ੍ਗੁਲਿਯੋ. ਹਤ੍ਥਸਦ੍ਦੋ ਚੇਤ੍ਥ ਤਦੇਕਦੇਸੇਸੁ ਅਙ੍ਗੁਲੀਸੁ ਦਟ੍ਠਬ੍ਬੋ ‘‘ਹਤ੍ਥਮੁਦ੍ਦਾ’’ਤਿਆਦੀਸੁ ਵਿਯ. ਏਵਞ੍ਚ ਕਤ੍ਵਾ ਸਬ੍ਬਗ੍ਗਹਣਂ ਸਮਤ੍ਥਿਤਂ ਹੋਤਿ. ਅਞ੍ਞਥਾ ਸਕਲਂ ਹਤ੍ਥਂ ਮੁਖੇ ਪਵੇਸੇਤੁਮਸਕ੍ਕੁਣੇਯ੍ਯਤ੍ਤਾ ਸਬ੍ਬਗ੍ਗਹਣਮਸਮਤ੍ਥਿਤਮੇਵ ਸਿਯਾ. ਸਮੁਦਾਯੇ ਪਵਤ੍ਤਸ੍ਸ ਚ ਵੋਹਾਰਸ੍ਸ ਅਵਯਵੇਪਿ ਪਵਤ੍ਤਨਤੋ ਏਕਙ੍ਗੁਲਿਮ੍ਪਿ ਤਤੋ ਏਕਦੇਸਮ੍ਪਿ ਮੁਖੇ ਪਕ੍ਖਿਪਿਤੁਂ ਨ ਵਟ੍ਟਤਿ.
ਅਨਾਹਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪੩. ਸਕਬਲ਼ਸਿਕ੍ਖਾਪਦਵਣ੍ਣਨਾ
ਤਤ੍ਤਕੇ ਸਤਿ ਵਟ੍ਟਤੀਤਿ ਤਤ੍ਤਕੇ ਮੁਖਮ੍ਹਿ ਸਤਿ ਕਥੇਤੁਂ ਵਟ੍ਟਤਿ.
ਸਕਬਲ਼ਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫੦-੫੧. ਚਪੁਚਪੁਕਾਰਕਸਿਕ੍ਖਾਪਦਵਣ੍ਣਨਾ
‘‘ਚਪੁ ਚਪੂ’’ਤਿ ਏਵਂ ਸਦ੍ਦਂ ਕਤ੍ਵਾਤਿ ‘‘ਚਪੁ ਚਪੂ’’ਤਿ ਏਵਂ ਅਨੁਕਰਣਸਦ੍ਦਂ ਕਤ੍ਵਾ. ‘‘ਪਞ੍ਚਵੀਸਤਿਮੇਪਿ ਏਸੇਵ ਨਯੋ’’ਤਿ ਇਮਿਨਾ ‘‘ਸੁਰੁਸੁਰੁਕਾਰਕਨ੍ਤਿ ‘ਸੁਰੂ ਸੁਰੂ’ਤਿ ਏਵਂ ਸਦ੍ਦਂ ਕਤ੍ਵਾ’’ਤਿ ਇਮਮਤ੍ਥਮਤਿਦਿਸਤਿ.
ਚਪੁਚਪੁਕਾਰਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਤਿਂਸਭੋਜਨਪ੍ਪਟਿਸਂਯੁਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫੭. ਛਤ੍ਤਪਾਣਿਸਿਕ੍ਖਾਪਦਵਣ੍ਣਨਾ
ਯਂ ਕਿਞ੍ਚਿ ਛਤ੍ਤਨ੍ਤਿ ਸੇਤਚ੍ਛਤ੍ਤਕਿਲਞ੍ਜਚ੍ਛਤ੍ਤਪਣ੍ਣਚ੍ਛਤ੍ਤੇਸੁ ਯਂ ਕਿਞ੍ਚਿ ਛਤ੍ਤਂ. ਯਮ੍ਪਿ ਤਤ੍ਥਜਾਤਕਦਣ੍ਡਕੇਨ ਕਤਂ ਏਕਪਣ੍ਣਚ੍ਛਤ੍ਤਂ ਹੋਤਿ, ਤਮ੍ਪਿ ਛਤ੍ਤਮੇਵ. ਯਤ੍ਥ ਕਤ੍ਥਚਿ ਸਰੀਰਾਵਯਵੇਤਿ ਅਂਸਊਰੁਆਦਿਕੇ ਯਤ੍ਥ ਕਤ੍ਥਚਿ ਸਰੀਰਾਵਯਵੇਤਿ.
ਛਤ੍ਤਪਾਣਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬੦. ਆਵੁਧਪਾਣਿਸਿਕ੍ਖਾਪਦਵਣ੍ਣਨਾ
ਸਬ੍ਬਾਪਿ ਧਨੁਵਿਕਤੀਤਿ ਚਾਪਕੋਦਣ੍ਡਾਦਿਭੇਦਾ ਸਬ੍ਬਾਪਿ ਧਨੁਵਿਕਤਿ. ਚਾਪੋਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੩੭) ਮਜ੍ਝੇ ਵਙ੍ਕਾ ਕਾਜਦਣ੍ਡਸਦਿਸਾ ਧਨੁਵਿਕਤਿ. ਕੋਦਣ੍ਡੋਤਿ ਵਟ੍ਟਲਦਣ੍ਡਾ ਧਨੁਵਿਕਤਿ. ਪਟਿਮੁਕ੍ਕਨ੍ਤਿ ਪਵੇਸਿਤਂ ਲਗ੍ਗਿਤਂ. ਯਾਵ ਨ ਗਣ੍ਹਾਤੀਤਿ ਯਾਵ ਹਤ੍ਥੇਨ ਨ ਗਣ੍ਹਾਤਿ, ਅਯਮੇਵ ਵਾ ਪਾਠੋ. ਤਾਵ ਵਟ੍ਟਤੀਤਿ ਤਾਵ ਧਮ੍ਮਂ ਦੇਸੇਤੁਂ ਵਟ੍ਟਤਿ.
ਆਵੁਧਪਾਣਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬੧-੬੨. ਪਾਦੁਕਸਿਕ੍ਖਾਪਦਵਣ੍ਣਨਾ
ਕੇਵਲਂ ਅਕ੍ਕਨ੍ਤਸ੍ਸਾਤਿ ਕੇਵਲਂ ਪਾਦੁਕਂ ਅਕ੍ਕਮਿਤ੍ਵਾ ਠਿਤਸ੍ਸ. ਪਟਿਮੁਕ੍ਕਸ੍ਸਾਤਿ ਪਟਿਮੁਞ੍ਚਿਤ੍ਵਾ ਠਿਤਸ੍ਸ. ਤੇਨਾਹ ‘‘ਪਵੇਸੇਤ੍ਵਾ ਠਾਨਵਸੇਨਾ’’ਤਿ.
ਪਾਦੁਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬੩. ਯਾਨਸਿਕ੍ਖਾਪਦਵਣ੍ਣਨਾ
ਯਾਨਗਤਸ੍ਸਾਤਿ ‘‘ਯਾਨਂ ਨਾਮ ਵਯ੍ਹਂ, ਰਥੋ, ਸਕਟਂ, ਸਨ੍ਧਮਾਨਿਕਾ, ਸਿਵਿਕਾ, ਪਾਟਙ੍ਕੀ’’ਤਿ (ਪਾਚਿ. ੬੪੦, ੧੧੮੭) ਵੁਤ੍ਤਂ ਯਾਨਂ ਉਪਾਦਾਯ ਅਨ੍ਤਮਸੋ ਹਤ੍ਥਸਙ੍ਘਾਟਮ੍ਹਿ ਗਤਸ੍ਸ. ਤੇਨਾਹ ‘‘ਸਚੇਪਿ ਦ੍ਵੀਹਿ ਜਨੇਹੀ’’ਤਿਆਦਿ. ਵਯ੍ਹਾਦਿਕੇਤਿ ਏਤ੍ਥ ਵਯ੍ਹਨ੍ਤਿ ਉਪਰਿ ਮਣ੍ਡਪਸਦਿਸਂ ਪਦਰਚ੍ਛਦਨਂ, ਸਬ੍ਬਪਾਲਿਗੁਣ੍ਠਿਮਂ ਵਾ ਛਾਦੇਤ੍ਵਾ ਕਤਂ ਸਕਟਵਿਸੇਸਂ ‘‘ਵਯ੍ਹ’’ਨ੍ਤਿ ਵਦਨ੍ਤਿ. ਆਦਿਸਦ੍ਦੇਨ ਰਥਾਦੀਨਂ ਗਹਣਂ.
ਯਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭੫. ਉਦਕੇਉਚ੍ਚਾਰਸਿਕ੍ਖਾਪਦਵਣ੍ਣਨਾ
ਪਕਿਣ੍ਣਕਨ੍ਤਿ ਵੋਮਿਸ੍ਸਕਨਯਂ. ਸਚਿਤ੍ਤਕਨ੍ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੫੭੬) ਵਤ੍ਥੁਵਿਜਾਨਨਚਿਤ੍ਤੇਨ, ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਚ ਸਚਿਤ੍ਤਕਂ. ‘‘ਅਨਾਦਰਿਯਂ ਪਟਿਚ੍ਚਾ’’ਤਿ (ਪਾਚਿ. ੬੫੪) ਵੁਤ੍ਤਤ੍ਤਾ ਯਸ੍ਮਾ ਅਨਾਦਰਿਯਵਸੇਨੇਵ ਆਪਜ੍ਜਿਤਬ੍ਬਤੋ ਇਦਂ ਸਬ੍ਬਂ ਕੇਵਲਂ ਅਕੁਸਲਮੇਵ, ਤਞ੍ਚ ਪਕਤਿਯਾ ਵਜ੍ਜਂ, ਸਞ੍ਚਿਚ੍ਚ ਵੀਤਿਕ੍ਕਮਨਞ੍ਚ ਦੋਮਨਸ੍ਸਿਕਸ੍ਸੇਵ ਹੋਤਿ, ਤਸ੍ਮਾ ‘‘ਲੋਕਵਜ੍ਜਂ ਅਕੁਸਲਚਿਤ੍ਤਂ ਦੁਕ੍ਖਵੇਦਨ’’ਨ੍ਤਿ ਵੁਤ੍ਤਂ. ਸੇਸੇਸੁਪਿ ਏਸੇਵ ਨਯੋ.
ਏਕੂਨਵੀਸਤਿਧਮ੍ਮਦੇਸਨਾਪਟਿਸਂਯੁਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ
ਸੇਖਿਯਵਣ੍ਣਨਾ ਨਿਟ੍ਠਿਤਾ.
ਅਧਿਕਰਣਸਮਥਵਣ੍ਣਨਾ
ਗਣਨਪਰਿਚ੍ਛੇਦੋਤਿ ਸਙ੍ਖ੍ਯਾਪਰਿਚ੍ਛੇਦੋ. ਅਧਿਕਰੀਯਨ੍ਤਿ ਏਤ੍ਥਾਤਿ ਅਧਿਕਰਣਾਨਿ. ਕੇ ਅਧਿਕਰੀਯਨ੍ਤਿ? ਸਮਥਾ. ਕਥਂ ਅਧਿਕਰੀਯਨ੍ਤਿ? ਸਮਨਵਸੇਨ. ਤਸ੍ਮਾ ਤੇ ਤੇਸਂ ਸਮਨਵਸੇਨ ਪਵਤ੍ਤਨ੍ਤੀਤਿ ਆਹ ‘‘ਅਧਿਕਰਣਾਨਿ ਸਮੇਨ੍ਤੀ’’ਤਿਆਦਿ. ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਨ੍ਤਿ ਉਟ੍ਠਿਤਾਨਂ ਉਟ੍ਠਿਤਾਨਂ. ਕਿਞ੍ਚਾਪਿ ਅਧਿਕਰਣਟ੍ਠੇਨ ਏਕਵਿਧਂ, ਤਥਾਪਿ ਵਤ੍ਥੁਵਸੇਨ ਨਾਨਾ ਹੋਤੀਤਿ ‘‘ਅਧਿਕਰਣਾਨ’’ਨ੍ਤਿ ਬਹੁਵਚਨਂ ਕਤਂ. ਇਦਾਨਿ ਤਸ੍ਸ ਨਾਨਾਤ੍ਤਂ ਦਸ੍ਸੇਤ੍ਵਾ ਵਿਵਰਿਤੁਂ ‘‘ਵਿਵਾਦਾਧਿਕਰਣ’’ਨ੍ਤਿਆਦਿਮਾਹ. ਵਿਵਾਦੋਯੇਵ ਅਧਿਕਰਣਂ ਵਿਵਾਦਾਧਿਕਰਣਂ. ਏਸ ਨਯੋ ਸੇਸੇਸੁਪਿ. ਸਮਥਤ੍ਥਨ੍ਤਿ ਸਮਨਤ੍ਥਂ.
ਅਧਿਕਰਣਸ੍ਸ ਸਮ੍ਮੁਖਾ ਵਿਨਯਨਤੋ ਸਮ੍ਮੁਖਾਵਿਨਯੋ. ਦਬ੍ਬਮਲ੍ਲਪੁਤ੍ਤਤ੍ਥੇਰਸਦਿਸਸ੍ਸ ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਖੀਣਾਸਵਸ੍ਸੇਵ ਦਾਤਬ੍ਬੋ ਵਿਨਯੋ ਸਤਿਵਿਨਯੋ. ਸਮ੍ਮੂਲ਼੍ਹਸ੍ਸ ਗਗ੍ਗਭਿਕ੍ਖੁਸਦਿਸਸ੍ਸ ਉਮ੍ਮਤ੍ਤਕਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ. ਪਟਿਞ੍ਞਾਤੇਨ ਕਰਣਭੂਤੇਨ ਕਰਣਂ ਪਟਿਞ੍ਞਾਤਕਰਣਂ. ਅਥ ਵਾ ਪਟਿਞ੍ਞਾਤੇ ਆਪਨ੍ਨਭਾਵਾਦਿਕੇ ਕਰਣਂ ਕਿਰਿਯਾ, ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਪਰਿਵਾਸਦਾਨਾਦਿਵਸੇਨ ਚ ਪਵਤ੍ਤਂ ਵਚੀਕਮ੍ਮਂ ਪਟਿਞ੍ਞਾਤਕਰਣਂ. ਯਸ੍ਸਾ ਕਿਰਿਯਾਯ ਧਮ੍ਮਵਾਦਿਨੋ ਬਹੁਤਰਾ, ਏਸਾ ਯੇਭੁਯ੍ਯਸਿਕਾ ਨਾਮ. ਯੋ ਪਾਪੁਸ੍ਸਨ੍ਨਤਾਯ ਪਾਪਿਯੋ, ਪੁਗ੍ਗਲੋ, ਤਸ੍ਸ ਉਪਵਾਲ਼ਭਿਕ੍ਖੁਸਦਿਸਸ੍ਸ ਕਤ੍ਤਬ੍ਬਤੋ ਤਸ੍ਸਪਾਪਿਯਸਿਕਾ, ਅਲੁਤ੍ਤਸਮਾਸੋਯਂ. ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋ. ਯਥਾ (ਚੂਲ਼ਵ. ਅਟ੍ਠ. ੨੧੨) ਹਿ ਗੂਥਂ ਵਾ ਮੁਤ੍ਤਂ ਵਾ ਘਟ੍ਟਿਯਮਾਨਂ ਦੁਗ੍ਗਨ੍ਧਤਾਯ ਬਾਧਤਿ, ਤਿਣੇਹਿ ਅਵਤ੍ਥਰਿਤ੍ਵਾ ਸੁਪ੍ਪਟਿਚ੍ਛਾਦਿਤਸ੍ਸ ਪਨਸ੍ਸ ਗਨ੍ਧੋ ਨ ਬਾਧਤਿ, ਏਵਮੇਵ ਯਂ ਅਧਿਕਰਣਂ ਮੂਲਾਨੁਮੂਲਂ ਗਨ੍ਤ੍ਵਾ ਵੂਪਸਮਿਯਮਾਨਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤਤਿ, ਤਂ ਇਮਿਨਾ ਕਮ੍ਮੇਨ ਵੂਪਸਨ੍ਤਂ ਗੂਥਂ ਵਿਯ ਤਿਣਵਤ੍ਥਾਰਕੇਨ ਪਟਿਚ੍ਛਨ੍ਨਂ ਸੁਵੂਪਸਨ੍ਤਂ ਹੋਤਿ. ਤੇਨ ਵੁਤ੍ਤਂ ‘‘ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋ’’ਤਿ.
ਤਤ੍ਰਾਤਿ ਤੇਸੁ ਸਤ੍ਤਸੁ ਅਧਿਕਰਣਸਮਥੇਸੁ. ‘‘ਅਟ੍ਠਾਰਸਹਿ ਵਤ੍ਥੂਹੀ’’ਤਿ ਲਕ੍ਖਣਵਚਨਮੇਤਂ ‘‘ਯਦਿ ਮੇ ਬ੍ਯਾਧਿਕਾ ਭਵੇਯ੍ਯੁਂ, ਦਾਤਬ੍ਬਮਿਦਮੋਸਧ’’ਨ੍ਤਿਆਦਿਨਾ (ਸਂ. ਨਿ. ਟੀ. ੨.੩.੩੯-੪੨) ਵਿਯ. ਤਸ੍ਮਾ ਤੇਸੁ ਅਞ੍ਞਤਰੇਨ ਵਿਵਦਨ੍ਤਾ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤੀਤਿ ਵੁਚ੍ਚਤਿ. ਵਿਵਾਦੋਤਿ ਵਿਪਚ੍ਚਨੀਕਵਾਦੋ. ਉਪਵਦਨਾਤਿ ਅਕ੍ਕੋਸੋ. ਚੋਦਨਾਤਿ ਅਨੁਯੋਗੋ. ਦ੍ਵੇਤਿ ਥੁਲ੍ਲਚ੍ਚਯਦੁਬ੍ਭਾਸਿਤਾਪਤ੍ਤਿਯੋ ਦ੍ਵੇ. ਚਤੁਨ੍ਨਂ ਕਮ੍ਮਾਨਂ ਕਰਣਨ੍ਤਿ ਚਤੁਨ੍ਨਂ ਕਮ੍ਮਾਨਂ ਅਨ੍ਤਰੇ ਯਸ੍ਸ ਕਸ੍ਸਚਿ ਕਮ੍ਮਸ੍ਸ ਕਰਣਂ.
ਏਵਂ ਅਧਿਕਰਣਾਨਿ ਦਸ੍ਸੇਤ੍ਵਾ ਇਦਾਨਿ ਤੇਸੁ ਇਦਂ ਅਧਿਕਰਣਂ ਏਤ੍ਤਕੇਹਿ ਸਮਥੇਹਿ ਸਮ੍ਮਤੀਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਂ, ਤਸ੍ਮਿਂਯੇਵ ਵਾ ਸਮ੍ਮਤੀਤਿ ਸਮ੍ਬਨ੍ਧੋ. ਏਵਂ ਸੇਸੇਸੁਪਿ. ਤਤ੍ਥ ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਨ੍ਤਿ ‘‘ਯਸ੍ਮਿਂ ਵਿਹਾਰੇ ਮਯ੍ਹਂ ਇਮਿਨਾ ਪਤ੍ਤੋ ਗਹਿਤੋ, ਚੀਵਰਂ ਗਹਿਤ’’ਨ੍ਤਿਆਦਿਨਾ (ਪਰਿ. ਅਟ੍ਠ. ੩੪੧) ਨਯੇਨ ਪਤ੍ਤਚੀਵਰਾਦੀਨਂ ਅਤ੍ਥਾਯ ਵਿਵਾਦਾਧਿਕਰਣਂ ਉਪ੍ਪਨ੍ਨਂ ਹੋਤਿ. ਤਸ੍ਮਿਂਯੇਵ ਵਾ ਸਮ੍ਮਤੀਤਿ ਤਸ੍ਮਿਂ ਵਿਹਾਰੇਯੇਵ ਆਵਾਸਿਕੇਹਿ ਸਨ੍ਨਿਪਤਿਤ੍ਵਾ ‘‘ਅਲਂ, ਆਵੁਸੋ’’ਤਿ ਅਤ੍ਥਪਚ੍ਚਤ੍ਥਿਕੇ ਸਞ੍ਞਾਪੇਤ੍ਵਾ ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵ ਵੂਪਸਮੇਨ੍ਤੇਹਿ ਸਮ੍ਮਤਿ. ਸਚੇ ਪਨ ਤਂ ਅਧਿਕਰਣਂ ਨੇਵਾਸਿਕਾ ਵੂਪਸਮੇਤੁਂ ਨ ਸਕ੍ਕੋਨ੍ਤਿ, ਅਥਞ੍ਞੋ ਵਿਨਯਧਰੋ ਆਗਨ੍ਤ੍ਵਾ ‘‘ਕਿਂ, ਆਵੁਸੋ, ਇਮਸ੍ਮਿਂ ਵਿਹਾਰੇ ਉਪੋਸਥੋ ਵਾ ਪਵਾਰਣਾ ਵਾ ਠਿਤਾ’’ਤਿ ਪੁਚ੍ਛਤਿ, ਤੇਹਿ ਚ ਤਸ੍ਮਿਂ ਕਾਰਣੇ ਕਥਿਤੇ ਤਂ ਅਧਿਕਰਣਂ ਖਨ੍ਧਕਤੋ ਚ ਪਰਿਵਾਰਤੋ ਚ ਸੁਤ੍ਤੇਨ ਵਿਨਿਚ੍ਛਿਨਿਤ੍ਵਾ ਵੂਪਸਮੇਤਿ. ਏਵਮ੍ਪਿ ਏਤਸ੍ਮਿਂਯੇਵ ਸਮ੍ਮਤੀਤਿ ਦਟ੍ਠਬ੍ਬਂ.
ਅਞ੍ਞਤ੍ਥ ਵੂਪਸਮੇਤੁਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ ਸਮ੍ਮਤੀਤਿ ‘‘ਨ ਮਯਂ ਏਤਸ੍ਸ ਵਿਨਿਚ੍ਛਯੇ ਤਿਟ੍ਠਾਮ, ਨਾਯਂ ਵਿਨਯੇ ਕੁਸਲੋ, ਅਮੁਕਸ੍ਮਿਂ ਨਾਮ ਗਾਮੇ ਵਿਨਯਧਰਾ ਥੇਰਾ ਵਸਨ੍ਤਿ, ਤਤ੍ਥ ਗਨ੍ਤ੍ਵਾ ਵਿਨਿਚ੍ਛਿਨਿਸ੍ਸਾਮਾ’’ਤਿ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ ਕਾਰਣਂ ਸਲ੍ਲਕ੍ਖੇਤ੍ਵਾ ਅਞ੍ਞਮਞ੍ਞਂ ਸਞ੍ਞਾਪੇਨ੍ਤੇਹਿ, ਅਞ੍ਞੇਹਿ ਵਾ ਤੇ ਭਿਕ੍ਖੂ ਨਿਜ੍ਝਾਪੇਨ੍ਤੇਹਿ ਸਮ੍ਮਤਿ. ਨ ਹੇਵ ਖੋ ਪਨ ਅਞ੍ਞਮਞ੍ਞਸਞ੍ਞਤ੍ਤਿਯਾ ਵਾ ਸਭਾਗਭਿਕ੍ਖੁਨਿਜ੍ਝਾਪਨੇਨ ਵਾ ਵੂਪਸਨ੍ਤਂ ਹੋਤਿ, ਅਪਿਚ ਖੋ ਪਟਿਪਥਂ ਆਗਚ੍ਛਨ੍ਤੋ ਏਕੋ ਵਿਨਯਧਰੋ ਦਿਸ੍ਵਾ ‘‘ਕਤ੍ਥਾਵੁਸੋ, ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਅਮੁਕਂ ਨਾਮ ਗਾਮਂ ਇਮਿਨਾ ਨਾਮ ਕਰਣੇਨਾ’’ਤਿ ਵੁਤ੍ਤੇ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਤਤ੍ਥੇਵ ਧਮ੍ਮੇਨ ਵਿਨਯੇਨ ਤਂ ਅਧਿਕਰਣਂ ਵੂਪਸਮੇਤਿ. ਏਵਮ੍ਪਿ ਅਨ੍ਤਰਾਮਗ੍ਗੇ ਵੂਪਸਮ੍ਮਤਿ ਨਾਮ.
ਯਤ੍ਥ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ਵਾਤਿ ਸਚੇ ਪਨ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਵੁਚ੍ਚਮਾਨਾਪਿ ‘‘ਮਯਂ ਤਤ੍ਥੇਵ ਗਨ੍ਤ੍ਵਾ ਵਿਨਿਚ੍ਛਯਂ ਪਾਪੇਸ੍ਸਾਮਾ’’ਤਿ (ਪਰਿ. ਅਟ੍ਠ. ੩੪੧) ਵਿਨਯਧਰਸ੍ਸ ਵਚਨਂ ਅਨਾਦਿਯਿਤ੍ਵਾ ਯਤ੍ਥ ਗਨ੍ਤ੍ਵਾ ਸਭਾਗਭਿਕ੍ਖੁਸਙ੍ਘਸ੍ਸ ਅਧਿਕਰਣਂ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ‘‘ਅਲਂ, ਆਵੁਸੋ, ਸਙ੍ਘਸਨ੍ਨਿਪਾਤਂ ਨਾਮ ਗਰੁਕ’’ਨ੍ਤਿ ਤਤ੍ਥੇਵ ਨਿਸੀਦਿਤ੍ਵਾ ਵਿਨਿਚ੍ਛਿਤਂ ਸਮ੍ਮਤਿ. ਨ ਹੇਵ ਖੋ ਪਨ ਸਭਾਗਭਿਕ੍ਖੂਨਂ ਸਞ੍ਞਤ੍ਤਿਯਾ ਵੂਪਸਨ੍ਤਂ ਹੋਤਿ, ਅਪਿਚ ਖੋ ਸਙ੍ਘਂ ਸਨ੍ਨਿਪਾਤੇਤ੍ਵਾ ਆਰੋਚਿਤਂ ਸਙ੍ਘਮਜ੍ਝੇ ਵਿਨਯਧਰਾ ਵੂਪਸਮੇਨ੍ਤਿ. ਏਵਮ੍ਪਿ ਤਤ੍ਥ ਸਙ੍ਘੇਨ ਵਿਨਿਚ੍ਛਿਤਂ ਸਮ੍ਮਤਿ ਨਾਮ.
ਉਬ੍ਬਾਹਿਕਾਯ ਸਮ੍ਮਤਪੁਗ੍ਗਲੇਹਿ ਵਾ ਵਿਨਿਚ੍ਛਿਤਨ੍ਤਿ ਅਪਲੋਕੇਤ੍ਵਾ ਵਾ ਖਨ੍ਧਕੇ ਵੁਤ੍ਤਾਯ ਵਾ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਤੇਹਿ ਪੁਗ੍ਗਲੇਹਿ ਵਿਸੁਂ ਵਾ ਨਿਸੀਦਿਤ੍ਵਾ, ਤਸ੍ਸਾਯੇਵ ਵਾ ਪਰਿਸਾਯ ‘‘ਅਞ੍ਞੇਨ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੨੩੧) ਸਾਵੇਤ੍ਵਾ ਵਿਨਿਚ੍ਛਿਤਂ. ਅਯਨ੍ਤਿ ਅਯਂ ਯਥਾਵੁਤ੍ਤਾ ਚਤੁਬ੍ਬਿਧਾ ਸਮ੍ਮੁਖਤਾ.
ਕਾਰਕਸਙ੍ਘਸ੍ਸਾਤਿ ਵੂਪਸਮੇਤੁਂ ਸਨ੍ਨਿਪਤਿਤਸ੍ਸ ਕਾਰਕਸਙ੍ਘਸ੍ਸ. ਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋਤਿ ‘‘ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤੀ’’ਤਿ (ਚੂਲ਼ਵ. ੨੨੮) ਏਵਂ ਵੁਤ੍ਤਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ, ਏਤੇਨ ਯਥਾ ਤਥਾ ਪਧਾਨਕਾਰਕਪੁਗ੍ਗਲਾਨਂ ਸਮ੍ਮੁਖਤਾਮਤ੍ਤਂ ਸਙ੍ਘਸਮ੍ਮੁਖਤਾ ਨਾਮ ਨ ਹੋਤੀਤਿ ਦਸ੍ਸੇਤਿ. ਭੂਤਤਾਤਿ ਤਚ੍ਛਤਾ. ਸਚ੍ਚਪਰਿਯਾਯੋ ਹਿ ਇਧ ਧਮ੍ਮਸਦ੍ਦੋ ‘‘ਧਮ੍ਮਵਾਦੀ’’ਤਿਆਦੀਸੁ (ਦੀ. ਨਿ. ੧.੯, ੧੯੪) ਵਿਯ. ਵਿਨੇਤਿ ਏਤੇਨਾਤਿ ਵਿਨਯੋ, ਤਸ੍ਸ ਤਸ੍ਸ ਅਧਿਕਰਣਸ੍ਸ ਵੂਪਸਮਨਾਯ ਭਗਵਤਾ ਵੁਤ੍ਤਵਿਧਿ, ਤਸ੍ਸ ਵਿਨਯਸ੍ਸ ਸਮ੍ਮੁਖਤਾ ਵਿਨਯਸਮ੍ਮੁਖਤਾ. ਤੇਨਾਹ ‘‘ਯਥਾ ਤਂ…ਪੇ… ਵਿਨਯਸਮ੍ਮੁਖਤਾ’’ਤਿ. ਯੇਨਾਤਿ ਯੇਨ ਪੁਗ੍ਗਲੇਨ. ਅਤ੍ਥਪਚ੍ਚਤ੍ਥਿਕਾਨਨ੍ਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੨੮) ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾਨਂ. ਸਙ੍ਘਸਮ੍ਮੁਖਤਾ ਪਰਿਹਾਯਤਿ ਸਮ੍ਮਤਪੁਗ੍ਗਲੇਹੇਵ ਵੂਪਸਮਨਤੋ.
ਨਨ੍ਤਿ ਵਿਵਾਦਾਧਿਕਰਣਂ. ਪਞ੍ਚਙ੍ਗਸਮਨ੍ਨਾਗਤਨ੍ਤਿ (ਚੂਲ਼ਵ. ੨੩੪) ‘‘ਨ ਛਨ੍ਦਾਗਤਿਂ ਗਚ੍ਛਤਿ, ਨ ਦੋਸਾਗਤਿਂ ਗਚ੍ਛਤਿ, ਨ ਮੋਹਾਗਤਿਂ ਗਚ੍ਛਤਿ, ਨ ਭਯਾਗਤਿਂ ਗਚ੍ਛਤਿ, ਗਹਿਤਾਗਹਿਤਂ ਜਾਨਾਤੀ’’ਤਿ ਵੁਤ੍ਤੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ. ਗੂਲ਼੍ਹਕਵਿਵਟਕਸਕਣ੍ਣਜਪ੍ਪਕੇਸੁ ਤੀਸੁ ਸਲਾਕਗ੍ਗਾਹੇਸੂਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਤੇਸਂ ਭਿਕ੍ਖੂਨਂ ਸਞ੍ਞਤ੍ਤਿਯਾ ਤਯੋ ਸਲਾਕਗ੍ਗਾਹਕੇ ਗੂਲ਼੍ਹਕਂ, ਵਿਵਟਕਂ, ਸਕਣ੍ਣਜਪ੍ਪਕ’’ਨ੍ਤਿ (ਚੂਲ਼ਵ. ੨੩੫) ਸਮਥਕ੍ਖਨ੍ਧਕੇ ਵੁਤ੍ਤੇਸੁ ਤੀਸੁ ਸਲਾਕਗ੍ਗਾਹੇਸੁ. ਸਲਾਕਂ ਗਾਹੇਤ੍ਵਾਤਿ ਧਮ੍ਮਵਾਦੀਨਞ੍ਚ ਅਧਮ੍ਮਵਾਦੀਨਞ੍ਚ ਸਲਾਕਾਯੋ ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ ਚੀਵਰਭੋਗੇ ਕਤ੍ਵਾ ਸਮਥਕ੍ਖਨ੍ਧਕੇ ਵੁਤ੍ਤਨਯੇਨ ਗਾਹਾਪੇਤ੍ਵਾ. ਏਵਞ੍ਹਿ ਤਤ੍ਥ ਵੁਤ੍ਤਂ –
‘‘ਕਥਞ੍ਚ, ਭਿਕ੍ਖਵੇ, ਗੂਲ਼੍ਹਕੋ ਸਲਾਕਗ੍ਗਾਹੋ ਹੋਤਿ? ਤੇਨ ਸਲਾਕਗ੍ਗਾਹਾਪਕੇਨ ਭਿਕ੍ਖੁਨਾ ਸਲਾਕਾਯੋ ਵਣ੍ਣਾਵਣ੍ਣਾਯੋ ਕਤ੍ਵਾ ਏਕਮੇਕੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ ‘ਅਯਂ ਏਵਂਵਾਦਿਸ੍ਸ ਸਲਾਕਾ, ਅਯਂ ਏਵਂਵਾਦਿਸ੍ਸ ਸਲਾਕਾ, ਯਂ ਇਚ੍ਛਸਿ, ਤਂ ਗਣ੍ਹਾਹੀ’ਤਿ. ਗਹਿਤੇ ਵਤ੍ਤਬ੍ਬੋ ‘ਮਾ ਚ ਕਸ੍ਸਚਿ ਦਸ੍ਸੇਹੀ’ਤਿ. ਸਚੇ ਜਾਨਾਤਿ ‘ਅਧਮ੍ਮਵਾਦੀ ਬਹੁਤਰਾ’ਤਿ, ‘ਦੁਗ੍ਗਹੋ’ਤਿ ਪਚ੍ਚੁਕ੍ਕਡ੍ਢਿਤਬ੍ਬਂ. ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ‘ਸੁਗ੍ਗਹੋ’ਤਿ ਸਾਵੇਤਬ੍ਬਂ. ਏਵਂ ਖੋ, ਭਿਕ੍ਖਵੇ, ਗੂਲ਼੍ਹਕੋ ਸਲਾਕਗ੍ਗਾਹੋ ਹੋਤਿ.
‘‘ਕਥਞ੍ਚ, ਭਿਕ੍ਖਵੇ, ਵਿਵਟਕੋ ਸਲਾਕਗ੍ਗਾਹੋ ਹੋਤਿ? ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ਵਿਸ੍ਸਟ੍ਠੇਨੇਵ ਵਿਵਟੇਨ ਗਾਹੇਤਬ੍ਬੋ. ਏਵਂ ਖੋ, ਭਿਕ੍ਖਵੇ, ਵਿਵਟਕੋ ਸਲਾਕਗ੍ਗਾਹੋ ਹੋਤਿ.
‘‘ਕਥਞ੍ਚ, ਭਿਕ੍ਖਵੇ, ਸਕਣ੍ਣਜਪ੍ਪਕੋ ਸਲਾਕਗ੍ਗਾਹੋ ਹੋਤਿ? ਤੇਨ ਸਲਾਕਗ੍ਗਾਹਾਪਕੇਨ ਭਿਕ੍ਖੁਨਾ ਏਕਮੇਕਸ੍ਸ ਭਿਕ੍ਖੁਨੋ ਉਪਕਣ੍ਣਕੇ ਆਰੋਚੇਤਬ੍ਬਂ ‘ਅਯਂ ਏਵਂਵਾਦਿਸ੍ਸ ਸਲਾਕਾ, ਅਯਂ ਏਵਵਾਦਿਸ੍ਸ ਸਲਾਕਾ, ਯਂ ਇਚ੍ਛਸਿ, ਤਂ ਗਣ੍ਹਾਹੀ’ਤਿ. ਗਹਿਤੇ ਵਤ੍ਤਬ੍ਬੋ ‘ਮਾ ਚ ਕਸ੍ਸਚਿ ਆਰੋਚੇਹੀ’ਤਿ. ਸਚੇ ਜਾਨਾਤਿ ‘ਅਧਮ੍ਮਵਾਦੀ ਬਹੁਤਰਾ’ਤਿ, ‘ਦੁਗ੍ਗਹੋ’ਤਿ ਪਚ੍ਚੁਕ੍ਕਡ੍ਢਿਤਬ੍ਬਂ. ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ‘ਸੁਗ੍ਗਹੋ’ਤਿ ਸਾਵੇਤਬ੍ਬਂ. ਏਵਂ ਖੋ, ਭਿਕ੍ਖਵੇ, ਸਕਣ੍ਣਜਪ੍ਪਕੋ ਸਲਾਕਗ੍ਗਾਹੋ ਹੋਤੀ’’ਤਿ.
ਏਤ੍ਥ ਚ ਅਲਜ੍ਜੁਸ੍ਸਨ੍ਨਾਯ (ਚੂਲ਼ਵ. ਅਟ੍ਠ. ੨੩੫) ਪਰਿਸਾਯ ਗੂਲ਼੍ਹਕੋ ਸਲਾਕਗ੍ਗਾਹੋ ਕਾਤਬ੍ਬੋ, ਲਜ੍ਜੁਸ੍ਸਨ੍ਨਾਯ ਵਿਵਟਕੋ, ਬਾਲੁਸ੍ਸਨ੍ਨਾਯ ਸਕਣ੍ਣਜਪ੍ਪਕੋਤਿ ਵੇਦਿਤਬ੍ਬੋ. ਧਮ੍ਮਵਾਦੀਨਂ ਯੇਭੁਯ੍ਯਤਾਯਾਤਿ ਧਮ੍ਮਵਾਦੀਨਂ ਏਕੇਨਪਿ ਅਧਿਕਤਾਯ, ਕੋ ਪਨ ਵਾਦੋ ਦ੍ਵੀਹਿ ਤੀਹਿ.
‘‘ਚਤੂਹਿ ਸਮਥੇਹਿ ਸਮ੍ਮਤੀ’’ਤਿ ਇਦਂ ਸਬ੍ਬਸਙ੍ਗਾਹਕਵਸੇਨ ਵੁਤ੍ਤਂ, ਤਤ੍ਥ ਪਨ ਦ੍ਵੀਹਿ ਏਵ ਵੂਪਸਮਨਂ ਦਟ੍ਠਬ੍ਬਂ. ਏਵਂ ਵਿਨਿਚ੍ਛਿਤਨ੍ਤਿ ਸਚੇ ਆਪਤ੍ਤਿ ਨਤ੍ਥਿ, ਉਭੋ ਖਮਾਪੇਤ੍ਵਾ, ਅਥ ਅਤ੍ਥਿ, ਆਪਤ੍ਤਿਂ ਦਸ੍ਸੇਤ੍ਵਾ ਰੋਪਨਵਸੇਨ ਵਿਨਿਚ੍ਛਿਤਂ. ਪਟਿਕਮ੍ਮਂ ਪਨ ਆਪਤ੍ਤਾਧਿਕਰਣਸਮਥੇ ਪਰਤੋ ਆਗਮਿਸ੍ਸਤੀਤਿ. ਨ ਸਮਣਸਾਰੁਪ੍ਪਂ ਅਸ੍ਸਾਮਣਕਂ, ਸਮਣੇਹਿ ਅਕਤ੍ਤਬ੍ਬਂ, ਤਸ੍ਮਿਂ. ਅਜ੍ਝਾਚਾਰੇ ਵੀਤਿਕ੍ਕਮੇ ਸਤਿ.
ਪਾਰਾਜਿਕਸਾਮਨ੍ਤੇਨ ਵਾਤਿ ਦੁਕ੍ਕਟੇਨ ਵਾ ਥੁਲ੍ਲਚ੍ਚਯੇਨ ਵਾ. ਮੇਥੁਨਧਮ੍ਮੇ ਹਿ ਪਾਰਾਜਿਕਸਾਮਨ੍ਤਾ ਨਾਮ ਦੁਕ੍ਕਟਂ ਹੋਤਿ, ਅਦਿਨ੍ਨਾਦਾਨਾਦੀਸੁ ਥੁਲ੍ਲਚ੍ਚਯਂ. ਪਟਿਚਰਤੋਤਿ ਪਟਿਚ੍ਛਾਦੇਨ੍ਤਸ੍ਸ. ਅਚ੍ਛਿਨ੍ਨਮੂਲੋ ਭਵਿਸ੍ਸਤੀਤਿ ਪਾਰਾਜਿਕਂ ਅਨਾਪਨ੍ਨੋ ਭਵਿਸ੍ਸਤਿ, ਸੀਲਵਾ ਭਵਿਸ੍ਸਤੀਤਿ ਵੁਤ੍ਤਂ ਹੋਤਿ. ਸਮ੍ਮਾ ਵਤ੍ਤਿਤ੍ਵਾਤਿ ਵਤ੍ਤਂ ਪੂਰੇਤ੍ਵਾ. ਓਸਾਰਣਂ ਲਭਿਸ੍ਸਤੀਤਿ ਕਮ੍ਮਪ੍ਪਟਿਪ੍ਪਸ੍ਸਦ੍ਧਿਂ ਲਭਿਸ੍ਸਤਿ.
ਤਸ੍ਸਾਤਿ ਆਪਤ੍ਤਾਧਿਕਰਣਸ੍ਸ. ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ ਪਟਿਞ੍ਞਾਯ, ਤਥਾਰੂਪਾਯ ਖਨ੍ਤਿਯਾ ਵਾ ਵਿਨਾ ਅਵੂਪਸਮਨਤੋ. ਯਾ ਪਨ ਪਟਿਞ੍ਞਾਤਿ ਸਮ੍ਬਨ੍ਧੋ.
ਏਤ੍ਥਾਤਿ ਆਪਤ੍ਤਿਦੇਸਨਾਯਂ. ਸਿਯਾਤਿ ਅਵਸ੍ਸਂ. ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯਾਤਿ ਕਕ੍ਖਲ਼ਭਾਵਾਯ ਚੇਵ ਵਾਲ਼ਭਾਵਾਯ ਚ. ਥੁਲ੍ਲਵਜ੍ਜਨ੍ਤਿ ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚ. ਗਿਹਿਪ੍ਪਟਿਸਂਯੁਤ੍ਤਨ੍ਤਿ ਗਿਹੀਨਂ ਹੀਨੇਨ ਖੁਂਸਨਵਮ੍ਭਨਧਮ੍ਮਿਕਪ੍ਪਟਿਸ੍ਸਵੇਸੁ ਆਪਨ੍ਨਂ ਆਪਤ੍ਤਿਂ.
ਯਥਾਨੁਰੂਪਨ੍ਤਿ ‘‘ਦ੍ਵੀਹਿ ਸਮਥੇਹਿ, ਤੀਹਿ, ਚਤੂਹਿ, ਏਕੇਨਾ’’ਤਿ ਏਵਂ ਵੁਤ੍ਤਨਯੇਨੇਵ ਯਥਾਨੁਰੂਪਂ. ਏਤ੍ਥਾਤਿ ਇਮਸ੍ਮਿਂ ਸਮਥਾਧਿਕਾਰੇ. ਵਿਨਿਚ੍ਛਯਨਯੋਤਿ ਵਿਨਿਚ੍ਛਯਨਯਮਤ੍ਤਂ. ਤੇਨਾਹ ‘‘ਵਿਤ੍ਥਾਰੋ ਪਨਾ’’ਤਿਆਦਿ. ਅਸ੍ਸਾਤਿ ਵਿਤ੍ਥਾਰਸ੍ਸ. ਸਮਨ੍ਤਪਾਸਾਦਿਕਾਯਂ ਵੁਤ੍ਤੋਤਿ ਸਮਨ੍ਤਪਾਸਾਦਿਕਾਯ ਨਾਮ ਵਿਨਯਟ੍ਠਕਥਾਯਂ ਵੁਤ੍ਤੋ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਧਿਪ੍ਪਾਯੋ.
ਏਤ੍ਤਕਨ੍ਤਿ ਏਤਂਪਰਮਂ, ਨ ਇਤੋ ਭਿਯ੍ਯੋ.
ਅਧਿਕਰਣਸਮਥਵਣ੍ਣਨਾ ਨਿਟ੍ਠਿਤਾ.
ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ
ਭਿਕ੍ਖੁਪਾਤਿਮੋਕ੍ਖਵਣ੍ਣਨਾ ਨਿਟ੍ਠਿਤਾ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ