੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

ਸਞ੍ਚਰਣਂ ਸਞ੍ਚਰੋ, ਸੋ ਏਤਸ੍ਸ ਅਤ੍ਥੀਤਿ ਸਞ੍ਚਰੀ, ਸਞ੍ਚਰਣਸੀਲੋਤਿ ਵਾ ਸਞ੍ਚਰੀ, ਤਸ੍ਸ ਭਾਵੋ ਸਞ੍ਚਰਿਤ੍ਤਂ, ਸਞ੍ਚਰਣਨ੍ਤਿ ਅਤ੍ਥੋ. ਤਞ੍ਚ ਪਰਤੋ ‘‘ਇਤ੍ਥਿਯਾ ਵਾ ਪੁਰਿਸਮਤਿ’’ਨ੍ਤਿਆਦਿਵਚਨਤੋ ਇਤ੍ਥਿਪੁਰਿਸਾਨਂ ਵੇਮਜ੍ਝੇਤਿ ਆਹ ‘‘ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਞ੍ਚਰਣਭਾਵ’’ਨ੍ਤਿ. ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਾਨੀਤਿ ਏਤ੍ਥ ਪਟਿਗ੍ਗਣ੍ਹਨਂ ਨਾਮ ਪੁਰਿਸੇਨ ਵਾ ਇਤ੍ਥਿਯਾ ਵਾ ਉਭਿਨ੍ਨਂ ਮਾਤਾਦੀਹਿ ਵਾ ‘‘ਭਨ੍ਤੇ, ਇਤ੍ਥਨ੍ਨਾਮਂ ਇਤ੍ਥਿਂ ਵਾ ਪੁਰਿਸਂ ਵਾ ਏਵਂ ਭਣਾਹੀ’’ਤਿ ਵੁਤ੍ਤੇ ਤੇਸਂ ਵਚਨਂ ‘‘ਸਾਧੂ’’ਤਿ ਵਾ ‘‘ਹੋਤੂ’’ਤਿ ਵਾ ‘‘ਭਣਾਮੀ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਵਚੀਭੇਦਂ ਕਤ੍ਵਾ, ਸੀਸਕਮ੍ਪਨਾਦੀਹਿ ਵਾ ਸਮ੍ਪਟਿਚ੍ਛਨਂ. ਵੀਮਂਸਨਂ ਨਾਮ ਵੁਤ੍ਤਪ੍ਪਕਾਰੇਨ ਸਾਸਨਂ ਗਹੇਤ੍ਵਾ ਤਸ੍ਸਾ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਤੇਸਂ ਅਵਸ੍ਸਂ ਆਰੋਚਨਕਾਨਂ ਮਾਤਾਪਿਤੁਭਾਤਾਭਗਿਨਿਆਦੀਨਂ ਵਾ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਸਾਸਨਸ੍ਸ ਆਰੋਚਨਂ. ਪਚ੍ਚਾਹਰਣਂ ਨਾਮ ਤੇਨ ਗਨ੍ਤ੍ਵਾ ਆਰੋਚਿਤੇ ਸਾ ਇਤ੍ਥੀ ਵਾ ਪੁਰਿਸੋ ਵਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਤੁ ਵਾ, ਮਾ ਵਾ, ਲਜ੍ਜਾਯ ਵਾ ਤੁਣ੍ਹੀ ਹੋਤੁ, ਪੁਨ ਆਗਨ੍ਤ੍ਵਾ ਤਸ੍ਸਾ ਇਤ੍ਥਿਯਾ ਵਾ ਪੁਰਿਸਸ੍ਸ ਵਾ ਤਸ੍ਸਾ ਪਵਤ੍ਤਿਯਾ ਆਰੋਚਨਂ. ਆਪਜ੍ਜੇਯ੍ਯਾਤਿ ਪਟਿਪਜ੍ਜੇਯ੍ਯ.

ਇਤ੍ਥਿਯਾ ਵਾ ਪੁਰਿਸਮਤਿਂ ਪੁਰਿਸਸ੍ਸ ਵਾ ਇਤ੍ਥਿਮਤਿਨ੍ਤਿ ਏਤ੍ਥ ‘‘ਆਰੋਚੇਯ੍ਯਾ’’ਤਿ ਪਾਠਸੇਸੋ ਦਟ੍ਠਬ੍ਬੋ. ਤੇਨੇਵਾਹ ‘‘ਤਤ੍ਥਾ’’ਤਿਆਦਿ. ਜਾਯਾਭਾਵੇਤਿ ਭਰਿਯਾਭਾਵੇ. ਜਾਰਭਾਵੇਤਿ ਪਤਿਭਾਵੇ, ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਂ. ਤਸ੍ਮਾ ਭਰਿਯਾਭਾਵਨਿਮਿਤ੍ਤਂ ਪਤਿਭਾਵਨਿਮਿਤ੍ਤਂ, ਭਰਿਯਾਭਾਵਹੇਤੁ ਪਤਿਭਾਵਹੇਤੁ, ਭਰਿਯਾਭਾਵਪਚ੍ਚਯਾ ਪਤਿਭਾਵਪਚ੍ਚਯਾ ਆਰੋਚੇਤੀਤਿ ਅਤ੍ਥੋ. ਏਸ ਨਯੋ ‘‘ਜਾਯਤ੍ਤਨੇ ਆਰੋਚੇਤੀ’’ਤਿਆਦੀਸੁਪਿ. ‘‘ਜਾਯਤ੍ਤਨੇ ਵਾ ਜਾਰਤ੍ਤਨੇ ਵਾ’’ਤਿ ਹਿ ਇਦਂ ਯਦਤ੍ਥਂ ਤਂ ਤੇਸਂ ਮਤਿਂ ਆਰੋਚੇਤਿ, ਤਂ ਦਸ੍ਸਨਤ੍ਥਂ ਵੁਤ੍ਤਂ. ਇਦਾਨਿ ਪਨ ਪਦਭਾਜਨਿਯਂ (ਪਾਰਾ. ੩੦੨) ਵੁਤ੍ਤਨਯੇਨਾਪਿ ਅਤ੍ਥਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿਮਾਹ. ਕਿਞ੍ਚਾਪਿ ਇਤ੍ਥਿਲਿਙ੍ਗਵਸੇਨ ਪਦਭਾਜਨਿਯਂ ਵੁਤ੍ਤਂ, ‘‘ਜਾਯਤ੍ਤਨੇ ਵਾ ਜਾਰਤ੍ਤਨੇ ਵਾ’’ਤਿ ਪਨ ਨਿਦ੍ਦੇਸਸ੍ਸ ਉਭਯਲਿਙ੍ਗਸਾਧਾਰਣਤ੍ਤਾ ਪੁਰਿਸਲਿਙ੍ਗਵਸੇਨਾਪਿ ਯੋਜੇਤ੍ਵਾ ਵਤ੍ਤਬ੍ਬਨ੍ਤਿ ਆਹ ‘‘ਏਤੇਨੇਵ ਉਪਾਯੇਨਾ’’ਤਿਆਦਿ. ਮੁਹੁਤ੍ਤਿਕਾਤਿ ਗਣਿਕਾ. ‘‘ਅਨ੍ਤਮਸੋ ਤਙ੍ਖਣਿਕਾਯਪੀ’’ਤਿ ਇਦਂ ਨਿਦਸ੍ਸਨਮਤ੍ਤਨ੍ਤਿ ਆਹ ‘‘ਏਤੇਨੇਵ ਉਪਾਯੇਨਾ’’ਤਿਆਦਿ.

ਅਞ੍ਞਤ੍ਰ ਨਾਲਂਵਚਨੀਯਾਯਾਤਿ (ਸਾਰਤ੍ਥ. ਟੀ. ੨.੩੩੯-੩੪੦) ਦੇਸਚਾਰਿਤ੍ਤਵਸੇਨ ਪਣ੍ਣਦਾਨਾਦਿਨਾ ਅਪਰਿਚ੍ਚਤ੍ਤਂ ਠਪੇਤ੍ਵਾ. ਸਞ੍ਚਰਿਤ੍ਤਵਸੇਨ ਭਿਕ੍ਖੁਨਾ ਵਚਨੀਯਾ ਨ ਹੋਤੀਤਿ ਨਾਲਂਵਚਨੀਯਾ, ਤਂ ਠਪੇਤ੍ਵਾਤਿ ਕੇਚਿ. ਅਪ੍ਪੇਨ ਵਾ ਬਹੁਨਾ ਵਾ ਧਨੇਨ ਕੀਤਾ ਧਨਕ੍ਕੀਤਾ. ਯਸ੍ਮਾ ਪਨ ਸਾ ਨ ਕੀਤਮਤ੍ਤਾਯੇਵ ਭਰਿਯਾ, ਸਂਵਾਸਤ੍ਥਾਯ ਪਨ ਕੀਤਤ੍ਤਾ ਭਰਿਯਾ, ਤਸ੍ਮਾਸ੍ਸ ਨਿਦ੍ਦੇਸੇ ‘‘ਧਨੇਨ ਕਿਣਿਤ੍ਵਾ ਵਾਸੇਤੀ’’ਤਿ (ਪਾਰਾ. ੩੦੪) ਵੁਤ੍ਤਂ. ਛਨ੍ਦਵਾਸਿਨੀਤਿ ਛਨ੍ਦੇਨ ਅਤ੍ਤਨੋ ਰੁਚਿਯਾ ਵਸਤੀਤਿ ਛਨ੍ਦਵਾਸਿਨੀ. ਯਸ੍ਮਾ ਪਨ ਸਾ ਨ ਅਤ੍ਤਨੋ ਛਨ੍ਦਮਤ੍ਤੇਨੇਵ ਭਰਿਯਾ ਹੋਤਿ, ਪੁਰਿਸੇਨ ਪਨ ਸਮ੍ਪਟਿਚ੍ਛਿਤਤ੍ਤਾ, ਤਸ੍ਮਾਸ੍ਸ ਨਿਦ੍ਦੇਸੇ ‘‘ਪਿਯੋ ਪਿਯਂ ਵਾਸੇਤੀ’’ਤਿ (ਪਾਰਾ. ੩੦੪) ਵੁਤ੍ਤਂ. ਆਦਿਸਦ੍ਦੇਨ ‘‘ਭੋਗਵਾਸਿਨੀ, ਪਟਵਾਸਿਨੀ, ਓਦਪਤ੍ਤਕਿਨੀ, ਓਭਟਚੁਮ੍ਬਟਾ, ਦਾਸੀ ਚ ਭਰਿਯਾ ਚ, ਕਮ੍ਮਕਾਰੀ ਚ ਭਰਿਯਾ ਚ, ਧਜਾਹਟਾ, ਮੁਹੁਤ੍ਤਿਕਾ’’ਤਿ (ਪਾਰਾ. ੩੦੪) ਇਮੇਸਂ ਅਟ੍ਠਨ੍ਨਂ ਆਕਾਰਾਨਂ ਗਹਣਂ. ਯਥਾ ਚ ‘‘ਛਨ੍ਦਵਾਸਿਨੀ’’ਤਿਆਦੀਸੁ ਅਞ੍ਞਤਰਵਸੇਨ ਵਦਤੋ ਵਿਸਙ੍ਕੇਤੋ ਨਤ੍ਥਿ, ਏਵਂ ਪਾਲ਼ਿਯਂ ਅਵੁਤ੍ਤੇਸੁਪਿ ‘‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ, ਜਾਯਾ, ਪਜਾਪਤਿ, ਪੁਤ੍ਤਮਾਤਾ, ਘਰਣੀ, ਘਰਸਾਮਿਨੀ, ਭਤ੍ਤਰਨ੍ਧਿਕਾ, ਸੁਸ੍ਸੂਸਿਕਾ, ਪਰਿਚਾਰਿਕਾ’’ਤਿ (ਪਾਰਾ. ਅਟ੍ਠ. ੨.੩੦੫) ਏਵਮਾਦੀਸੁ ਸਂਵਾਸਪਰਿਦੀਪਕੇਸੁ ਵਚਨੇਸੁ ਅਞ੍ਞਤਰਵਸੇਨ ਵਦਨ੍ਤਸ੍ਸਾਪਿ ਵਿਸਙ੍ਕੇਤੋ ਨਤ੍ਥਿ, ਤਿਵਙ੍ਗਸਮ੍ਪਤ੍ਤਿਯਾ ਆਪਤ੍ਤਿਯੇਵ.

ਮਾਤੁਰਕ੍ਖਿਤਂ ਬ੍ਰੂਹੀਤਿ ਏਤ੍ਥ ਮਾਤੁਰਕ੍ਖਿਤਾ ਨਾਮ ਮਾਤਰਾ ਰਕ੍ਖਿਤਾ, ਯਥਾ ਪੁਰਿਸੇਨ ਸਹ ਸਂਵਾਸਂ ਨ ਕਪ੍ਪੇਤਿ, ਏਵਂ ਮਾਤਰਾ ਰਕ੍ਖਿਤਾਤਿ ਅਤ੍ਥੋ. ਤੇਨੇਵਸ੍ਸ ਪਦਭਾਜਨੇਪਿ ‘‘ਮਾਤਾ ਰਕ੍ਖਤਿ ਗੋਪੇਤਿ, ਇਸ੍ਸਰਿਯਂ ਕਾਰੇਤਿ, ਵਸਂ ਵਤ੍ਤੇਤੀ’’ਤਿ (ਪਾਰਾ. ੩੦੪) ਵੁਤ੍ਤਂ. ਪਿਤੁਰਕ੍ਖਿਤਾਦੀਸੂਤਿ ‘‘ਪਿਤੁਰਕ੍ਖਿਤਾ, ਮਾਤਾਪਿਤੁਰਕ੍ਖਿਤਾ, ਭਾਤੁਰਕ੍ਖਿਤਾ, ਭਗਿਨਿਰਕ੍ਖਿਤਾ, ਞਾਤਿਰਕ੍ਖਿਤਾ, ਗੋਤ੍ਤਰਕ੍ਖਿਤਾ, ਧਮ੍ਮਰਕ੍ਖਿਤਾ, ਸਾਰਕ੍ਖਾ, ਸਪਰਿਦਣ੍ਡਾ’’ਤਿ (ਪਾਰਾ. ੩੦੩) ਏਵਂ ਵੁਤ੍ਤੇਸੁ ਪਿਤੁਰਕ੍ਖਿਤਾਦੀਸੁ. ਯਥਾ ਚ ਏਤ੍ਥ, ਏਵਂ ‘‘ਪਿਤੁਰਕ੍ਖਿਤਂ ਬ੍ਰੂਹੀ’’ਤਿਆਦੀਸੁਪਿ ਨਯੋ ਵੇਦਿਤਬ੍ਬੋ.

ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਗਿਲਾਨਸ੍ਸ ਵਾ ਕਿਚ੍ਚੇਨ ਗਚ੍ਛਨ੍ਤਸ੍ਸਾਤਿ (ਪਾਰਾ. ਅਟ੍ਠ. ੨.੩੪੦) ਏਤ੍ਥ ਭਿਕ੍ਖੁਸਙ੍ਘਸ੍ਸ ਉਪੋਸਥਾਗਾਰਂ ਵਾ ਕਿਞ੍ਚਿ ਵਾ ਵਿਪ੍ਪਕਤਂ ਹੋਤਿ. ਤਤ੍ਥ ਕਾਰੁਕਾਨਂ ਭਤ੍ਤਵੇਤਨਤ੍ਥਾਯ ਉਪਾਸਕੋ ਵਾ ਉਪਾਸਿਕਾਯ ਸਨ੍ਤਿਕਂ ਭਿਕ੍ਖੁਂ ਪਹਿਣੇਯ੍ਯ, ਉਪਾਸਿਕਾ ਵਾ ਉਪਾਸਕਸ੍ਸ, ਏਵਰੂਪੇਨ ਸਙ੍ਘਕਿਚ੍ਚੇਨ ਗਚ੍ਛਨ੍ਤਸ੍ਸ ਅਨਾਪਤ੍ਤਿ. ਚੇਤਿਯਕਮ੍ਮੇ ਕਰਿਯਮਾਨੇਪਿ ਏਸੇਵ ਨਯੋ. ਗਿਲਾਨਸ੍ਸ ਭੇਸਜ੍ਜਤ੍ਥਾਯਪਿ ਉਪਾਸਕੇਨ ਵਾ ਉਪਾਸਿਕਾਯ ਸਨ੍ਤਿਕਂ, ਉਪਾਸਿਕਾਯ ਵਾ ਉਪਾਸਕਸ੍ਸ ਸਨ੍ਤਿਕਂ ਪਹਿਤਸ੍ਸ ਗਚ੍ਛਤੋ ਅਨਾਪਤ੍ਤਿ.

ਕਿਞ੍ਚਾਪਿ ਏਤ੍ਥ ‘‘ਇਤ੍ਥੀ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ. ਪੁਰਿਸੋ ਨਾਮ ਮਨੁਸ੍ਸਪੁਰਿਸੋ, ਨ ਯਕ੍ਖੋ’’ਤਿਆਦਿ (ਸਾਰਤ੍ਥ. ਟੀ. ੨.੩੪੧) ਨਤ੍ਥਿ, ਤਥਾਪਿ ਮਨੁਸ੍ਸਜਾਤਿਕਾਵ ਇਤ੍ਥਿਪੁਰਿਸਾ ਇਧ ਅਧਿਪ੍ਪੇਤਾਤਿ ਆਹ ‘‘ਤੇਸਂ ਮਨੁਸ੍ਸਜਾਤਿਕਤਾ’’ਤਿ. ਨਨਾਲਂਵਚਨੀਯਤਾਤਿ ਯਥਾਵੁਤ੍ਤਨਯੇਨ ਪਰਿਚ੍ਚਤ੍ਤਾ ਅਲਂਵਚਨੀਯਾ. ਨਿਵਾਰਣਤ੍ਥੋ ਹਿ ਏਤ੍ਥ ਅਲਂ-ਸਦ੍ਦੋ. ਨ ਅਲਂਵਚਨੀਯਾ ਨਾਲਂਵਚਨੀਯਾ, ਨ ਨਾਲਂਵਚਨੀਯਾ, ਤਸ੍ਸਾ ਭਾਵੋ ਨਨਾਲਂਵਚਨੀਯਤਾ, ‘‘ਅਲਂਵਚਨੀਯਤਾ’’ਇਚ੍ਚੇਵ ਵੁਤ੍ਤਂ ਹੋਤਿ.

ਪਣ੍ਣਤ੍ਤਿਨ੍ਤਿ, ਇਮਂ ਸਿਕ੍ਖਾਪਦਂ. ਕਾਯਵਿਕਾਰੇਨਾਤਿ ਸੀਸੁਕ੍ਖਿਪਨਾਦਿਕਾਯਵਿਕਾਰੇਨ. ਤਥੇਵ ਵੀਮਂਸਿਤ੍ਵਾ ਤਥੇਵ ਪਚ੍ਚਾਹਰਨ੍ਤਸ੍ਸਾਤਿ ਹਤ੍ਥਮੁਦ੍ਦਾਦਿਨਾ ਕਾਯਵਿਕਾਰੇਨ ਵੀਮਂਸਿਤ੍ਵਾ ਪੁਨ ਆਗਨ੍ਤ੍ਵਾ ਤਥੇਵ ਆਰੋਚੇਨ੍ਤਸ੍ਸ. ਆਗਮਿਸ੍ਸਤੀਤਿ ਤਵ ਸਨ੍ਤਿਕੇ ਧਮ੍ਮਸ੍ਸਵਨਾਦਿਅਤ੍ਥਂ ਆਗਮਿਸ੍ਸਤਿ. ਕੇਨਚਿ ਵੁਤ੍ਤੇਤਿ ਆਸਨਸਾਲਾਦੀਸੁ ਨਿਸਿਨ੍ਨਸ੍ਸ ਕੇਨਚਿ ਪੁਰਿਸੇਨ ਵੁਤ੍ਤੇ. ਸਚੇ ਹਿ ਖੀਣਾਸਵਸ੍ਸ ਮਾਤਾਪਿਤਰੋ ਕੁਜ੍ਝਿਤ੍ਵਾ ਅਲਂਵਚਨੀਯਾ ਹੋਨ੍ਤਿ, ਤਞ੍ਚ ਭਿਕ੍ਖੁਂ ਘਰਂ ਉਪਗਤਂ ਪਿਤਾ ਵਦਤਿ ‘‘ਮਾਤਾ ਤੇ, ਤਾਤ, ਮਂ ਮਹਲ੍ਲਕਂ ਛਡ੍ਡੇਤ੍ਵਾ ਞਾਤਿਕੁਲਂ ਗਤਾ, ਗਚ੍ਛ ਨਂ ਮਂ ਉਪਟ੍ਠਾਤੁਂ ਪੇਸੇਹੀ’’ਤਿ. ਸੋ ਚੇ ਗਨ੍ਤ੍ਵਾ ਤਂ ਵਤ੍ਵਾ ਪੁਨ ਪਿਤੁਨੋ ਤਸ੍ਸਾ ਆਗਮਨਂ ਵਾ ਅਨਾਗਮਨਂ ਵਾ ਆਰੋਚੇਤਿ, ਏਵਂ ਆਰੋਚੇਨ੍ਤਸ੍ਸ ਤਸ੍ਸਪਿ ਕਾਯਵਾਚਤੋ ਸਮੁਟ੍ਠਾਤਿ. ਤੇਨਾਹ ‘‘ਪਣ੍ਣਤ੍ਤਿਂ ਅਜਾਨਨ੍ਤਸ੍ਸ ਪਨਾ’’ਤਿਆਦਿ. ਖੀਣਾਸਵਸ੍ਸਪੀਤਿ ਏਤ੍ਥ ਪਿ-ਸਦ੍ਦੇਨ ਸੇਕ੍ਖਪੁਥੁਜ੍ਜਨਾਨਂ ਵਤ੍ਤਬ੍ਬਮੇਵ ਨਤ੍ਥੀਤਿ ਦੀਪੇਤਿ. ਪਿਤੁਵਚਨੇਨਾਤਿ ਅਤ੍ਤਨੋ ਪਿਤੁਵਚਨੇਨ. ਗਨ੍ਤ੍ਵਾਤਿ ਤਸ੍ਸਾ ਸਮੀਪਂ ਗਨ੍ਤ੍ਵਾ. ਪਣ੍ਣਤ੍ਤਿਂ, ਅਲਂਵਚਨੀਯਭਾਵਞ੍ਚਾਤਿ ਉਭਯਂ ਅਜਾਨਨ੍ਤਸ੍ਸਪਿ ਕਾਯਵਾਚਤੋ ਸਮੁਟ੍ਠਾਤਿ. ਤਦੁਭਯਨ੍ਤਿ ਪਣ੍ਣਤ੍ਤਿਂ, ਅਲਂਵਚਨੀਯਭਾਵਞ੍ਚ. ਯਂ ਪਨ ਪਣ੍ਣਤ੍ਤਿਂ ਜਾਨਿਤ੍ਵਾ ਏਤੇਹੇਵ ਤੀਹਿ ਨਯੇਹਿ ਸਞ੍ਚਰਿਤ੍ਤਂ ਸਮਾਪਜ੍ਜਤੋ ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਇਮਾਨਿ ਤੀਣਿ ਪਣ੍ਣਤ੍ਤਿਜਾਨਨਚਿਤ੍ਤੇਨ ‘‘ਸਚਿਤ੍ਤਕਸਮੁਟ੍ਠਾਨਾਨੀ’’ਤਿ ਵੁਤ੍ਤਂ, ਤਂ ਅਯੁਤ੍ਤਂ. ਨ ਹਿ ਪਣ੍ਣਤ੍ਤਿਂ ਜਾਨਿਤ੍ਵਾਪਿ ‘‘ਨਾਲਂਵਚਨੀਯਾ’’ਤਿ ਮਞ੍ਞਮਾਨਸ੍ਸ ਸਚਿਤ੍ਤਕੇਹਿ ਸਮੁਟ੍ਠਾਨੇਹਿ ਆਪਤ੍ਤਿ ਸਮੁਟ੍ਠਾਤੀਤਿ ਵਤ੍ਤੁਂ ਯੁਜ੍ਜਤਿ ਵੀਤਿਕ੍ਕਮਚੇਤਨਾਯ ਅਸਮ੍ਭਵਤੋ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.