੧੩. ਕੁਲਦੂਸਕਸਿਕ੍ਖਾਪਦਵਣ੍ਣਨਾ

ਨਗਰਸ੍ਸਾਪਿ ਗਾਮਵਿਸੇਸਤ੍ਤਾ ਇਧ ਗਾਮਗ੍ਗਹਣੇਨੇਵ ਨਗਰਮ੍ਪਿ ਗਹਿਤਨ੍ਤਿ ਆਹ ‘‘ਨਗਰਮ੍ਪਿ ਗਾਮੇ ਅਨ੍ਤੋਗਧਮੇਵਾ’’ਤਿ, ਵਾ-ਸਦ੍ਦੇਨ ਵਾ ਅਨੁਤ੍ਤਵਿਕਪ੍ਪਤ੍ਥੇਨ ਗਹਣਨ੍ਤਿ ਏਵਂ ਵੁਤ੍ਤਂ. ਏਤ੍ਥ ਚ ਅਪਾਕਾਰਪਰਿਕ੍ਖੇਪੋ ਸਾਪਣੋ ਨਿਗਮੋ, ਸਪਾਕਾਰਾਪਣਂ ਨਗਰਂ, ਤਂਤਂਵਿਪਰੀਤੋ ਗਾਮੋਤਿ ਇਮੇਸਂ ਤਿਣ੍ਣਂ ਵਿਸੇਸੋ ਦਟ੍ਠਬ੍ਬੋ. ਕੁਲਾਨਿ ਦੂਸੇਤੀਤਿ ਖਤ੍ਤਿਯਬ੍ਰਾਹ੍ਮਣਵੇਸ੍ਸਸੁਦ੍ਦਵਸੇਨ ਚਤ੍ਤਾਰਿ ਕੁਲਾਨਿ ਵਿਕਾਰਂ ਆਪਾਦੇਤਿ. ਦੂਸੇਨ੍ਤੋ ਚ ਨ ਅਸੁਚਿਕਦ੍ਦਮਾਦੀਹਿ ਦੂਸੇਤਿ, ਅਥ ਖੋ ਅਤ੍ਤਨੋ ਦੁਪ੍ਪਟਿਪਤ੍ਤਿਯਾ ਤੇਸਂ ਪਸਾਦਂ ਵਿਨਾਸੇਤਿ. ਤੇਨਾਹ ‘‘ਪੁਪ੍ਫਦਾਨਾਦੀਹੀ’’ਤਿਆਦਿ. ਤਤ੍ਥ ਹਰਿਤ੍ਵਾ ਵਾ ਹਰਾਪੇਤ੍ਵਾ ਵਾ ਪਕ੍ਕੋਸਿਤ੍ਵਾ ਵਾ ਪਕ੍ਕੋਸਾਪੇਤ੍ਵਾ ਵਾ ਸਯਂ ਵਾ ਉਪਗਤਾਨਂ (ਪਾਰਾ. ਅਟ੍ਠ. ੨.੪੩੬-੪੩੭) ਯਸ੍ਸ ਕਸ੍ਸਚਿ ਅਤ੍ਤਨੋ ਸਨ੍ਤਕਸ੍ਸ ਪੁਪ੍ਫਸ੍ਸ ਕੁਲਸਙ੍ਗਹਤ੍ਥਾਯ ਦਾਨਂ ਪੁਪ੍ਫਦਾਨਂ, ਤਂ ਆਦਿ ਯੇਸਂ ਤੇ ਪੁਪ੍ਫਦਾਨਾਦਯੋ, ਤੇਹਿ ਪੁਪ੍ਫਦਾਨਾਦੀਹਿ. ਆਦਿਸਦ੍ਦੇਨ (ਪਾਰਾ. ੪੩੭) ਫਲਦਾਨਚੁਣ੍ਣਮਤ੍ਤਿਕਾਦਨ੍ਤਕਟ੍ਠਵੇਲ਼ੁਵੇਜ੍ਜਿਕਾਜਙ੍ਘਪੇਸਨਿਕਾਨਂ ਗਹਣਂ. ਸਦ੍ਧਂ ਵਿਨਾਸੇਨ੍ਤੋਤਿ ਤਥਾ ਅਕਰੋਨ੍ਤੇਸੁ ਅਞ੍ਞੇਸੁ ਪੇਸਲੇਸੁ ਭਿਕ੍ਖੂਸੁ ਅਪ੍ਪਸਾਦਂ ਅਦਸ੍ਸਨਂ ਗਮੇਨ੍ਤੋ. ਪੁਪ੍ਫਦਾਨਾਦੀਹਿ ਚ ਤੇਹਿ ਕਤਸਙ੍ਗਹੇਹਿ ਅਞ੍ਞੇ ਪੇਸਲੇ ਤਥਾ ਅਕਰੋਨ੍ਤੇ ਤੇ ਮਨੁਸ੍ਸਾ ਇਸ੍ਸਨ੍ਤਿ ਨ ਅਲ੍ਲੀਯਨ੍ਤੀਤਿ ਸੋ ਤੇਸਂ ਪਸਾਦਂ ਵਿਨਾਸੇਤਿ ਨਾਮਾਤਿ ਦਟ੍ਠਬ੍ਬਂ. ਪਾਪਕਾ ਸਮਾਚਾਰਾਤਿ ਬੁਦ੍ਧਪ੍ਪਟਿਕੁਟ੍ਠਤ੍ਤਾ ਲਾਮਕਾ ਸਮਾਚਾਰਾ. ਤੇ ਪਨ ਯਸ੍ਮਾ ਕੁਲਸਙ੍ਗਹਤ੍ਥਂ ਮਾਲਾਵਚ੍ਛਰੋਪਨਾਦਯੋ ਇਧ ਅਧਿਪ੍ਪੇਤਾ, ਤਸ੍ਮਾ ‘‘ਮਾਲਾਵਚ੍ਛਰੋਪਨਾਦਯੋ’’ਤਿ ਵੁਤ੍ਤਂ. ਆਰਾਮਾਦੀਨਮਤ੍ਥਾਯ ਪਨ ਕਪ੍ਪਿਯਵੋਹਾਰਾਦੀਹਿ ਰੋਪਾਪਨਾਦਿਕਂ ਵਟ੍ਟਤਿ. ਤਤ੍ਥ ਮਾਲਾਵਚ੍ਛਨ੍ਤਿ ਤਰੁਣਪੁਪ੍ਫਰੁਕ੍ਖਂ. ਤਰੁਣਕਾ ਹਿ ਪੁਪ੍ਫਰੁਕ੍ਖਾਪਿ ਪੁਪ੍ਫਗਚ੍ਛਾਪਿ ‘‘ਮਾਲਾਵਚ੍ਛਾ’’ਤ੍ਵੇਵ ਵੁਚ੍ਚਨ੍ਤਿ, ਤਸ੍ਸ ਰੋਪਨਂ ਮਾਲਾਵਚ੍ਛਰੋਪਨਂ, ਤਂ ਆਦਿ ਯੇਸਂ ਤੇ ਮਾਲਾਵਚ੍ਛਰੋਪਨਾਦਯੋ. ਆਦਿਸਦ੍ਦੇਨ ਚੇਤ੍ਥ ਰੋਪਾਪਨਸਿਞ੍ਚਨਸਿਞ੍ਚਾਪਨਓਚਿਨਨਓਚਿਨਾਪਨਗਨ੍ਥਨਗਨ੍ਥਾਪਨਾਨਂ ਗਹਣਂ.

ਮਾਤਿਕਾਯਂ ਦਿਸ੍ਸਨ੍ਤੀਤਿ ਯੇ ਪਚ੍ਚਕ੍ਖਤੋ ਪਸ੍ਸਨ੍ਤਿ, ਤੇਹਿ ਦਿਸ੍ਸਨ੍ਤਿ. ਸੁਯ੍ਯਨ੍ਤੀਤਿ ਯੇ ਪਰਤੋ ਸੁਣਨ੍ਤਿ, ਤੇਹਿ ਸੋਤਦ੍ਵਾਰੇਨ ਸੁਤ੍ਵਾ ਉਪਧਾਰੀਯਨ੍ਤਿ. ਦੁਟ੍ਠਾਨੀਤਿ ਦੂਸਿਤਾਨਿ. ਅਲਂ ਤੇ ਇਧ ਵਾਸੇਨਾਤਿ ਤਵ ਇਧ ਵਾਸੇਨ ਅਲਂ, ਮਾ ਇਧ ਤਵ ਵਾਸੋ ਹੋਤੂਤਿ ਅਤ੍ਥੋ. ਵਾਰਣਤ੍ਥੋ ਹਿ ਇਧ ਅਲਂ-ਸਦ੍ਦੋ. ਪਬ੍ਬਾਜਨੀਯਕਮ੍ਮਕਤੋਤਿ ਚੋਦੇਤ੍ਵਾ ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤ੍ਵਾ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਮੇ ਅਸ੍ਸਜਿਪੁਨਬ੍ਬਸੁਕਾ’’ਤਿਆਦਿਨਾ (ਪਾਰਾ. ੪੩੪) ਪਦਭਾਜਨੇ ਵੁਤ੍ਤਾਯ ਞਤ੍ਤਿਚਤੁਤ੍ਥਕਮ੍ਮਵਾਚਾਯ ਕਤਪਬ੍ਬਾਜਨੀਯਕਮ੍ਮੋ. ਯਸ੍ਮਿਞ੍ਚ ਵਿਹਾਰੇ ਵਸਤੀਤਿ ਗਾਮਤੋ ਬਹਿਵਿਹਾਰਮਾਹ. ਨੇਵ ਤਸ੍ਮਿਂ ਗਾਮੇ…ਪੇ… ਚਰਿਤੁਂ ਲਭਤੀਤਿ ਸਚੇਪਿ ਗਾਮੋ ਵਾ ਨਿਗਮੋ ਵਾ ਦ੍ਵਾਦਸਯੋਜਨਪਰਮੋ ਹੋਤਿ, ਤਿਯੋਜਨਪਰਮੋ ਚ ਵਿਹਾਰੋ ਹੋਤਿ, ਨੇਵ ਤਸ੍ਮਿਂ ਗਾਮੇ ਵਾ ਨਿਗਮੇ ਵਾ ਪਿਣ੍ਡਾਯ ਚਰਿਤੁਂ ਲਭਤਿ, ਨ ਵਿਹਾਰੇ ਵਸਿਤੁਂ. ਤਸ੍ਮਿਂ ਵਿਹਾਰੇ ਵਸਨ੍ਤੇਨ ਸਾਮਨ੍ਤਗਾਮੇਪਿ ਪਿਣ੍ਡਾਯ ਨ ਚਰਿਤਬ੍ਬਂ, ਸਾਮਨ੍ਤਵਿਹਾਰੇਪਿ ਵਸਨ੍ਤੇਨ ਤਸ੍ਮਿਂ ਗਾਮੇ ਪਿਣ੍ਡਾਯ ਨ ਚਰਿਤਬ੍ਬਂ. ਸਾਮਨ੍ਤਵਿਹਾਰੇ ਵਸਨ੍ਤੇਨ ਪਨ ਸਾਮਨ੍ਤਗਾਮੇ ਚਰਿਤੁਂ ਵਟ੍ਟਤਿ. ਆਪਜ੍ਜਿਤਬ੍ਬਾ ਆਪਤ੍ਤਿਯੋਤਿ ਕੁਲਸਙ੍ਗਹਤ੍ਥਂ ਅਤ੍ਤਨੋ ਸਨ੍ਤਕਦਾਨੇ ਦੁਕ੍ਕਟਂ, ਇਸ੍ਸਰਵਤਾਯ ਸਙ੍ਘਸਨ੍ਤਕਦਾਨੇ ਥੁਲ੍ਲਚ੍ਚਯਂ, ਪਸਯ੍ਹ ਦਾਨੇ ਪਾਰਾਜਿਕਨ੍ਤਿ ਇਮਾ ਆਪਤ੍ਤਿਯੋ. ਮਾਤਿਕਾਯਂ ‘‘ਪਕ੍ਕਮਤਾ ਯਸ੍ਮਾ’’ਤਿ ਪਬ੍ਬਾਜਨੀਯਕਮ੍ਮਕਤਸ੍ਸ ਵਤ੍ਤਵਸੇਨ ਵੁਤ੍ਤਂ. ਆਦਿਮ੍ਹਿ ਪਨ ਪਬ੍ਬਾਜਨੀਯਕਮ੍ਮਵਸੇਨ ਦਟ੍ਠਬ੍ਬਂ. ਅਸ੍ਸਜਿਪੁਨਬ੍ਬਸੁਕੇਤਿ ਅਸ੍ਸਜਿਞ੍ਚੇਵ ਪੁਨਬ੍ਬਸੁਕਞ੍ਚ.

ਕੁਲਦੂਸਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸਙ੍ਘਾਦਿਸੇਸਨਿਗਮਨਵਣ੍ਣਨਾ

ਪਠਮਾਪਤ੍ਤਿਕਾਤਿ ਅਵਯਵੇਨ ਵਿਗ੍ਗਹੋ ਸਮੁਦਾਯੋ ਸਮਾਸਤ੍ਥੋਤਿ ਆਹ ‘‘ਪਠਮਂ ਆਪਤ੍ਤਿ ਏਤੇਸਨ੍ਤਿ ਪਠਮਾਪਤ੍ਤਿਕਾ’’ਤਿ. ਵੀਤਿਕ੍ਕਮਨਕ੍ਖਣੇਯੇਵਾਤਿ ਵਤ੍ਥੁਵੀਤਿਕ੍ਕਮਨਕ੍ਖਣੇਯੇਵ. ਏਵ-ਕਾਰੇਨ ਸਮਨੁਭਾਸਨਕਮ੍ਮਕ੍ਖਣਂ ਪਟਿਕ੍ਖਿਪਤਿ. ਅਹਸ੍ਸ ਯਤ੍ਤਕੋ ਪਰਿਚ੍ਛੇਦੋ ਯਾਵਤੀਹਂ. ਤੇਨਾਹ ‘‘ਯਤ੍ਤਕਾਨਿ ਅਹਾਨੀ’’ਤਿ. ਅਹਾਨੀਤਿ ਚ ਦਿਵਸਾਨੀਤਿ ਅਤ੍ਥੋ.

ਵਤ੍ਥੁਵਸੇਨ ਵਾਤਿ ਅਸੁਚਿਮੋਚਨਾਦਿਵੀਤਿਕ੍ਕਮਮਤ੍ਤਵਸੇਨ ਵਾ. ਇਦਨ੍ਤਿ ਇਦਂ ਵੀਤਿਕ੍ਕਮਂ. ਨਾਮਮਤ੍ਤਵਸੇਨ ਵਾ ਅਯਂ ਇਤ੍ਥਨ੍ਨਾਮਾ ਆਪਤ੍ਤੀਤਿ ‘‘ਅਯਂ ਸਙ੍ਘਾਦਿਸੇਸੋ ਨਾਮ ਆਪਤ੍ਤੀ’’ਤਿ ਏਵਂ ਵਿਨਾ ਵਤ੍ਥੁਂ ਨਾਮਵਸੇਨ ਵਾ. ਮਤ੍ਤਸਦ੍ਦੇਨ ਚੇਤ੍ਥ ਵਤ੍ਥੁਂ ਪਟਿਕ੍ਖਿਪਤਿ. ਪੋਤ੍ਥਕੇਸੁ ਪਨ ਕਤ੍ਥਚਿ ‘‘ਨਾਮਗੋਤ੍ਤਵਸੇਨ ਵਾ’’ਤਿ ਲਿਖਨ੍ਤਿ, ਤਂ ਨ ਸੁਨ੍ਦਰਂ ‘‘ਅਯਂ ਇਤ੍ਥਨ੍ਨਾਮਾ ਆਪਤ੍ਤੀ’’ਤਿ ਵੁਤ੍ਤਤ੍ਤਾ. ਇਦਾਨਿ ਨਂ ਕਸ੍ਸਚਿ ਨ ਆਰੋਚੇਸ੍ਸਾਮੀਤਿ ਸਮ੍ਬਨ੍ਧੋ. ਧੁਰਂ ਨਿਕ੍ਖਿਪਿਤ੍ਵਾਤਿ ਆਰੋਚਨੇ ਉਸ੍ਸਾਹਂ ਠਪੇਤ੍ਵਾ. ਨ ਕੇਵਲਂ ਵਤ੍ਥੁਨਾਮਵਸੇਨੇਵ ਆਪਤ੍ਤਿਸਞ੍ਞੀ ਹੁਤ੍ਵਾ ਛਾਦੇਨ੍ਤਸ੍ਸੇਵ, ਅਥ ਖੋ ਯੋਪਿ ਏਵਂ ਅਜਾਨਨ੍ਤੋ ਕੇਵਲਂ ‘‘ਆਪਤ੍ਤਿਂ ਛਾਦੇਮੀ’’ਤਿ ਆਪਤ੍ਤਿਸਞ੍ਞਾਯ ਛਾਦੇਤਿ, ਤਸ੍ਸਪਿ ਛਨ੍ਨਾ ਹੋਤੀਤਿ ਵੇਦਿਤਬ੍ਬਂ. ਸਚੇ ਪਨੇਤ੍ਥ ਅਨਾਪਤ੍ਤਿਸਞ੍ਞੀ ਵਾ ਹੋਤਿ, ਅਞ੍ਞਾਪਤ੍ਤਿਕ੍ਖਨ੍ਧਸਞ੍ਞੀ ਵਾ ਵੇਮਤਿਕੋ ਵਾ ਹੁਤ੍ਵਾ ‘‘ਨ ਦਾਨਿ ਨਂ ਕਸ੍ਸਚਿ ਆਰੋਚੇਸ੍ਸਾਮੀ’’ਤਿ ਏਵਂ ਛਾਦੇਤੁਕਾਮੋਵ ਧੁਰਂ ਨਿਕ੍ਖਿਪਿਤ੍ਵਾ ਅਰੁਣਂ ਉਟ੍ਠਾਪੇਤਿ, ਅਚ੍ਛਨ੍ਨਾਵ ਹੋਤੀਤਿ ਆਨੇਤ੍ਵਾ ਯੋਜੇਤਬ੍ਬਂ. ਅਨਾਪਤ੍ਤਿ ਪਨ ਆਪਤ੍ਤਿਸਞ੍ਞਾਯਪਿ ਅਨਾਪਤ੍ਤਿਸਞ੍ਞਾਯਪਿ ਛਾਦੇਨ੍ਤੇਨ ਅਚ੍ਛਾਦਿਤਾਵ ਹੋਤਿ. ਲਹੁਕਂ ਵਾ ‘‘ਗਰੁਕਾ’’ਤਿ ਗਰੁਕਂ ਵਾ ‘‘ਲਹੁਕਾ’’ਤਿ ਛਾਦੇਤਿ, ਅਲਜ੍ਜਿਪਕ੍ਖੇ ਤਿਟ੍ਠਤਿ, ਆਪਤ੍ਤਿ ਪਨ ਅਚ੍ਛਨ੍ਨਾ ਹੋਤਿ. ਗਰੁਕਂ ‘‘ਲਹੁਕਾ’’ਤਿ ਮਞ੍ਞਮਾਨੋ ਦੇਸੇਤਿ, ਨੇਵ ਦੇਸਿਤਾ ਹੋਤਿ ਨਚ੍ਛਨ੍ਨਾ.

ਪਕਤੋ ਸਭਾਵਭੂਤੋ ਅਤ੍ਤਾ ਅਸ੍ਸਾਤਿ ਪਕਤਤ੍ਤੋ, ਨ ਕਮ੍ਮੇਹਿ ਵਿਕਤਤ੍ਤੋਤਿ ਅਤ੍ਥੋ. ਤੇਨਾਹ ‘‘ਅਨੁਕ੍ਖਿਤ੍ਤੋ ਸਮਾਨਸਂਵਾਸਕੋ’’ਤਿ. ਵੁਤ੍ਤਨਯੇਨੇਵਾਤਿ ‘‘ਨ ਦਾਨਿ ਨਂ ਕਸ੍ਸਚਿ ਆਰੋਚੇਸ੍ਸਾਮੀ’’ਤਿਆਦਿਨਾ ਵੁਤ੍ਤਨੇਵ ਨਯੇਨ. ਅਥ ‘‘ਮਯ੍ਹਂ ਸਙ੍ਘੇਨ ਕਮ੍ਮਂ ਕਤ’’ਨ੍ਤਿ (ਚੂਲ਼ਵ. ਅਟ੍ਠ. ੧੦੨) ਅਪਕਤਤ੍ਤਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾਵ ਹੋਤਿ. ਅਪਕਤਤ੍ਤੇਨ ਪਨ ਪਕਤਤ੍ਤਸਞ੍ਞਿਨਾ ਵਾ ਪਕਤਤ੍ਤੇਨ ਅਪਕਤਤ੍ਤਸਞ੍ਞਿਨਾ ਵਾ ਛਾਦਿਤਾਪਿ ਅਚ੍ਛਨ੍ਨਾਵ ਹੋਤਿ. ਵੁਤ੍ਤਮ੍ਪਿ ਚੇਤਂ –

‘‘ਆਪਜ੍ਜਤਿ ਗਰੁਕਂ ਸਾਵਸੇਸਂ;

ਛਾਦੇਤਿ ਅਨਾਦਰਿਯਂ ਪਟਿਚ੍ਚ;

ਨ ਭਿਕ੍ਖੁਨੀ ਨੋ ਚ ਫੁਸੇਯ੍ਯ ਵਜ੍ਜਂ;

ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

ਅਯਞ੍ਹਿ ਪਞ੍ਹੋ ਉਕ੍ਖਿਤ੍ਤਕੇਨ ਕਥਿਤੋ.

ਦਸਸੁ ਅਨ੍ਤਰਾਯੇਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਸਚੇ ਪਨ ਯੋ ਭੀਰੁਕਜਾਤਿਕਤਾਯ ਅਨ੍ਧਕਾਰੇ ਅਮਨੁਸ੍ਸਚਣ੍ਡਮਿਗਭਯੇਨ ਅਨ੍ਤਰਾਯਿਕਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾਵ ਹੋਤਿ. ਯਸ੍ਸਪਿ ਪਬ੍ਬਤਵਿਹਾਰੇ ਵਸਨ੍ਤਸ੍ਸ ਕਨ੍ਦਰਂ ਵਾ ਨਦਿਂ ਵਾ ਅਤਿਕ੍ਕਮਿਤ੍ਵਾ ਆਰੋਚੇਤਬ੍ਬਂ ਹੋਤਿ, ਅਨ੍ਤਰਾਮਗ੍ਗੇ ਚ ਚਣ੍ਡਵਾਲ਼ਅਮਨੁਸ੍ਸਾਦਿਭਯਂ ਅਤ੍ਥਿ, ਮਗ੍ਗੇ ਅਜਗਰਾ ਨਿਪਜ੍ਜਨ੍ਤਿ, ਨਦੀ ਪੂਰਾ ਹੋਤਿ, ਏਤਸ੍ਮਿਂ ਸਤਿਯੇਵ ਅਨ੍ਤਰਾਯੇ ਅਨ੍ਤਰਾਯਿਕਸਞ੍ਞੀ ਹੁਤ੍ਵਾ ਛਾਦੇਤਿ, ਅਚ੍ਛਨ੍ਨਾਵ ਹੋਤਿ. ਅਨ੍ਤਰਾਯਿਕਸ੍ਸ ਪਨ ਅਨ੍ਤਰਾਯਿਕਸਞ੍ਞਾਯ ਵਾ ਅਨਨ੍ਤਰਾਯਿਕਸਞ੍ਞਾਯ ਵਾ ਛਾਦਯਤੋ ਅਚ੍ਛਨ੍ਨਾਵ.

ਭਿਕ੍ਖੁਨੋਤਿ ਸਭਾਗਸ੍ਸ ਭਿਕ੍ਖੁਨੋ. ਸਚਸ੍ਸ ਮੁਖੇ ਅਪ੍ਪਮਤ੍ਤਕੋ ਗਣ੍ਡੋ ਵਾ ਹੋਤਿ, ਹਨੁਕਵਾਤੋ ਵਾ ਵਿਜ੍ਝਤਿ, ਦਨ੍ਤੋ ਵਾ ਰੁਜ੍ਜਤਿ, ਭਿਕ੍ਖਾ ਵਾ ਮਨ੍ਦਾ ਲਦ੍ਧਾ ਹੋਤਿ, ਤਾਵਤਕੇਨ ਪਨ ਨੇਵ ਵਤ੍ਤੁਂ ਨ ਸਕ੍ਕੋਤਿ, ਨ ਗਨ੍ਤੁਂ. ਅਪਿਚ ਖੋ ‘‘ਨ ਸਕ੍ਕੋਮੀ’’ਤਿ ਸਞ੍ਞੀ ਹੋਤਿ, ਅਯਂ ਪਹੁ ਹੁਤ੍ਵਾ ਅਪ੍ਪਹੁਸਞ੍ਞੀ ਨਾਮ. ਇਮਿਨਾ ਛਾਦਿਤਾਪਿ ਅਚ੍ਛਾਦਿਤਾ. ਅਪ੍ਪਹੁਨਾ ਪਨ ਵਤ੍ਤੁਂ ਵਾ ਗਨ੍ਤੁਂ ਵਾ ਅਸਮਤ੍ਥੇਨ ਪਹੁਸਞ੍ਞਿਨਾ ਵਾ ਅਪ੍ਪਹੁਸਞ੍ਞਿਨਾ ਵਾ ਛਾਦਿਤਾਪਿ ਅਚ੍ਛਾਦਿਤਾਵ.

ਇਦਂ ਉਤ੍ਤਾਨਮੇਵਾਤਿ ਇਦਂ ਅਙ੍ਗਦ੍ਵਯਂ ਉਤ੍ਤਾਨਤ੍ਥਮੇਵ. ਸਚੇ ਪਨ ‘‘ਛਾਦੇਸ੍ਸਾਮੀ’’ਤਿ ਧੁਰਨਿਕ੍ਖੇਪਂ ਕਤ੍ਵਾ ਪੁਰੇਭਤ੍ਤੇ ਵਾ ਪਚ੍ਛਾਭਤ੍ਤੇ ਵਾ ਪਠਮਯਾਮਾਦੀਸੁ ਵਾ ਲਜ੍ਜਿਧਮ੍ਮਂ ਓਕ੍ਕਮਤਿ, ਅਨ੍ਤੋਅਰੁਣੇਯੇਵ ਆਰੋਚੇਤਿ, ਅਯਂ ਛਾਦੇਤੁਕਾਮੋ ਨ ਛਾਦੇਤਿ ਨਾਮ.

ਯਸ੍ਸ ਪਨ ਅਭਿਕ੍ਖੁਕੇ ਠਾਨੇ ਵਸਨ੍ਤਸ੍ਸ ਆਪਤ੍ਤਿਂ ਆਪਜ੍ਜਿਤ੍ਵਾ ਸਭਾਗਸ੍ਸ ਭਿਕ੍ਖੁਨੋ ਆਗਮਨਂ ਆਗਮੇਨ੍ਤਸ੍ਸ ਵਾ, ਸਭਾਗਸ੍ਸ ਸਨ੍ਤਿਕਂ ਵਾ ਗਚ੍ਛਨ੍ਤਸ੍ਸ ਅਡ੍ਢਮਾਸੋਪਿ ਮਾਸੋਪਿ ਅਤਿਕ੍ਕਮਤਿ, ਅਯਂ ਨਚ੍ਛਾਦੇਤੁਕਾਮੋ ਛਾਦੇਤਿ ਨਾਮ. ਅਯਮ੍ਪਿ ਅਚ੍ਛਨ੍ਨਾਵ ਹੋਤਿ.

ਯੋ ਪਨ ਆਪਨ੍ਨਮਤ੍ਤੋਵ ਅਗ੍ਗਿਂ ਅਕ੍ਕਨ੍ਤਪੁਰਿਸੋ ਵਿਯ ਸਹਸਾ ਅਪਕ੍ਕਮਿਤ੍ਵਾ ਸਭਾਗਟ੍ਠਾਨਂ ਗਨ੍ਤ੍ਵਾ ਆਵਿ ਕਰੋਤਿ, ਅਯਂ ਨਚ੍ਛਾਦੇਤੁਕਾਮੋਵ ਨ ਛਾਦੇਤਿ ਨਾਮ. ਸਭਾਗਮਤ੍ਤਮੇਵ ਪਮਾਣਨ੍ਤਿ ਅਵੇਰਿਸਭਾਗਮਤ੍ਤਮੇਵ ਪਮਾਣਂ. ਅਵੇਰਿਸਭਾਗਸ੍ਸ ਹਿ ਸਨ੍ਤਿਕੇ ਆਰੋਚੇਤਬ੍ਬਂ. ਯੋ ਪਨ ਵਿਸਭਾਗੋ ਹੋਤਿ ਸੁਤ੍ਵਾ ਪਕਾਸੇਤੁਕਾਮੋ, ਏਵਰੂਪਸ੍ਸ ਉਪਜ੍ਝਾਯਸ੍ਸਪਿ ਸਨ੍ਤਿਕੇ ਨ ਆਰੋਚੇਤਬ੍ਬਾ. ਤਤ੍ਥ ਪੁਰੇਭਤ੍ਤਂ ਆਪਤ੍ਤਿਂ ਆਪਨ੍ਨੋ ਹੋਤੁ, ਪਚ੍ਛਾਭਤ੍ਤਂ ਵਾ ਦਿਵਾ ਵਾ ਰਤ੍ਤਿਂ ਵਾ, ਯਾਵ ਅਰੁਣਂ ਨ ਉਗ੍ਗਚ੍ਛਤਿ, ਤਾਵ ਆਰੋਚੇਤਬ੍ਬਂ. ਉਦ੍ਧਸ੍ਤੇ ਅਰੁਣੇ ਪਟਿਚ੍ਛਨ੍ਨਾ ਹੋਤਿ, ਪਟਿਚ੍ਛਾਦਨਪਚ੍ਚਯਾ ਚ ਦੁਕ੍ਕਟਂ ਆਪਜ੍ਜਤਿ. ਸਙ੍ਖੇਪਤੋਤਿ ਸਮਾਸਤੋ. ਵਿਤ੍ਥਾਰਤੋ ਪਨ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋਤਿ ਅਧਿਪ੍ਪਾਯੋ.

ਅਕਾਮਾ ਪਰਿਵਤ੍ਥਬ੍ਬਨ੍ਤਿ ਅਪ੍ਪਟਿਕਮ੍ਮਕਤਾਯ ਆਪਤ੍ਤਿਯਾ ਸਗ੍ਗਮੋਕ੍ਖਾਵਰਣਭਾਵਤੋ ਅਨਿਚ੍ਛਨ੍ਤੇਨਾਪਿ ਪਰਿਵਸਿਤਬ੍ਬਨ੍ਤਿ ਅਤ੍ਥੋ. ਤੇਨਾਹ ‘‘ਨ ਕਾਮੇਨਾ’’ਤਿਆਦਿ. ਪਰਿਵਾਸਂ ਸਮਾਦਾਯਾਤਿ ਪਰਿਵਾਸਵਤ੍ਤਂ ਸਙ੍ਘਮਜ੍ਝੇ ਸਮਾਦਿਯਿਤ੍ਵਾ. ਯਦਿਪਿ ਚਤੁਬ੍ਬਿਧੋ ਪਰਿਵਾਸੋ ਅਪ੍ਪਟਿਚ੍ਛਨ੍ਨਪਰਿਵਾਸੋ, ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ, ਸਮੋਧਾਨਪਰਿਵਾਸੋਤਿ, ਤਥਾਪਿ ਅਪ੍ਪਟਿਚ੍ਛਨ੍ਨਪਰਿਵਾਸੋ ਇਧ ਨ ਅਧਿਪ੍ਪੇਤੋਤਿ ਆਹ ‘‘ਤਤ੍ਥ ਪਟਿਚ੍ਛਨ੍ਨ…ਪੇ… ਤਿਵਿਧੋ ਪਰਿਵਾਸੋ’’ਤਿ. ਤਤ੍ਥਾਤਿ ਤਸ੍ਮਿਂ ਵਾਕ੍ਯੇ. ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਸਤਿ ਦਾਤਬ੍ਬੋ ਪਰਿਵਾਸੋ ਪਟਿਚ੍ਛਨ੍ਨਵਿਸਯਤਾਯ ਪਟਿਚ੍ਛਨ੍ਨਪਰਿਵਾਸੋ. ਸੁਦ੍ਧਨ੍ਤਤੋ ਪਟ੍ਠਾਯ ਦਾਤਬ੍ਬੋ ਪਰਿਵਾਸੋ ਸੁਦ੍ਧਨ੍ਤਪਰਿਵਾਸੋ. ਸਮੋਦਹਿਤ੍ਵਾ ਦਾਤਬ੍ਬੋ ਪਰਿਵਾਸੋ ਸਮੋਧਾਨਪਰਿਵਾਸੋ.

ਇਦਾਨਿ ਤੇ ਤਿਵਿਧੇਯੇਵ ਪਰਿਵਾਸੇ ਸਰੂਪਤੋ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਹੀਤਿ ਯਸ੍ਮਾ. ਏਕਾਹਂ ਪਟਿਚ੍ਛਨ੍ਨਾ ਏਕਾਹਪ੍ਪਟਿਚ੍ਛਨ੍ਨਾ. ਵੁਤ੍ਤਨਯੇਨਾਤਿ ‘‘ਆਪਤ੍ਤਿ ਚ ਹੋਤੀ’’ਤਿਆਦਿਨਾ ਵੁਤ੍ਤੇਨ ਨਯੇਨ. ਏਕਾਹਪ੍ਪਟਿਚ੍ਛਨ੍ਨਨ੍ਤਿ ਏਤ੍ਥ ਇਤਿਸਦ੍ਦੋ ‘‘ਇਤਿ ਵਾ, ਇਤਿ ਏਵਰੂਪਾ ਵਿਸੂਕਦਸ੍ਸਨਾ ਪਟਿਵਿਰਤੋ’’ਤਿਆਦੀਸੁ (ਦੀ. ਨਿ. ੧.੧੩, ੧੯੭) ਵਿਯ ਆਦਿਅਤ੍ਥੋ. ਤੇਨ ‘‘ਸੋਹਂ, ਭਨ੍ਤੇ, ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸਟ੍ਠਿਯਾ ਏਕਾਹਪ੍ਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਯਾਚਾਮੀ’’ਤਿ ਇਮਂ ਪਾਲ਼ਿਸੇਸਂ (ਚੂਲ਼ਵ. ੧੦੨) ਸਙ੍ਗਣ੍ਹਾਤਿ. ਏਵਂ ਪਰਿਵਾਸਂ ਯਾਚਾਪੇਤ੍ਵਾਤਿ ਏਵਂ ਯਾਵਤਤਿਯਂ ਯਾਚਾਪੇਤ੍ਵਾ. ਖਨ੍ਧਕੇ ਆਗਤਨਯੇਨਾਤਿ ਸਮੁਚ੍ਚਯਕ੍ਖਨ੍ਧਕੇ (ਚੂਲ਼ਵ. ੯੭ ਆਦਯੋ) ਆਗਤਨਯੇਨ. ਤਤੋਤਿ ਪਕ੍ਖਤੋ ਪਟ੍ਠਾਯ. ਅਤਿਰੇਕਪਕ੍ਖਪ੍ਪਟਿਚ੍ਛਨ੍ਨਨ੍ਤਿ ਪਕ੍ਖਸ੍ਸ ਅਤਿਰੇਕੋ ਅਤਿਰੇਕਪਕ੍ਖੋ, ਤਂ ਪਟਿਚ੍ਛਨ੍ਨਨ੍ਤਿ ਅਤ੍ਥੋ. ਤਤੋਤਿ ਤਿਂਸਤਿਮਦਿਵਸਤੋ ਪਟ੍ਠਾਯ. ਮਾਸਪ੍ਪਟਿਚ੍ਛਨ੍ਨਨ੍ਤਿ ਸਤ੍ਤਾਨਂ ਆਯੁਂ ਮਿਨਨ੍ਤੋ ਵਿਯ ਸਿਯਤਿ ਅਨ੍ਤਂ ਕਰੋਤੀਤਿ ਮਾਸੋ, ਤਿਂਸਰਤ੍ਤਿਨ੍ਦਿਵੋ, ਤਂ ਪਟਿਚ੍ਛਨ੍ਨਨ੍ਤਿ ਅਤ੍ਥੋ. ਸਂਵਚ੍ਛਰੇ ਪੁਣ੍ਣੇਤਿ ਤਂ ਤਂ ਸਤ੍ਤਂ, ਧਮ੍ਮਪ੍ਪਵਤ੍ਤਿਞ੍ਚ ਸਙ੍ਗਮ੍ਮ ਵਦਨ੍ਤੋ ਵਿਯ ਸਰਤਿ ਪਵਤ੍ਤਤੀਤਿ ਸਂਵਚ੍ਛਰੋ, ਦ੍ਵਾਦਸ ਮਾਸਾ, ਤਸ੍ਮਿਂ ਪਰਿਪੁਣ੍ਣੇ.

ਵਤ੍ਥੁਕਿਤ੍ਤਨਵਸੇਨ ਵਾਤਿ ਨਾਮੇਨ ਸਹ ਵਤ੍ਥੁਕਿਤ੍ਤਨਵਸੇਨ ਵਾਤਿ ਅਤ੍ਥੋ. ਤੇਨੇਵ ਹਿ ਉਪਰਿ ‘‘ਨਾਮਮਤ੍ਤਵਸੇਨ ਵਾ’’ਤਿ ਮਤ੍ਤਗ੍ਗਹਣਂ ਕਤਨ੍ਤਿ ਦਟ੍ਠਬ੍ਬਂ. ਨਾਮਮਤ੍ਤਵਸੇਨਾਤਿ ਵਤ੍ਥੁਕਿਤ੍ਤਨਂ ਵਿਨਾ ਕੇਵਲਂ ਨਾਮਸ੍ਸੇਵ ਵਸੇਨ. ਤਸ੍ਮਾਤਿ ਯਸ੍ਮਾ ਦੁਵਿਧੇ ਨਾਮੇ ‘‘ਆਪਤ੍ਤੀ’’ਤਿ ਸਬ੍ਬਸਾਧਾਰਣਂ ਨਾਮਂ, ਤਸ੍ਮਾ. ਸੁਕ੍ਕਵਿਸ੍ਸਟ੍ਠੀਤਿ ਸੁਕ੍ਕਵਿਸ੍ਸਟ੍ਠਿ ਨਾਮਾਯਂ. ਇਤਿਸਦ੍ਦੋ ਹੇਤ੍ਥ ਵਚਨੀਯਤ੍ਥਂ ਨਿਦਸ੍ਸੇਤਿ. ਨਿਦਸ੍ਸਨਮਤ੍ਤਞ੍ਚੇਤਂ ‘‘ਸੁਕ੍ਕਵਿਸ੍ਸਟ੍ਠੀ’’ਤਿ ਕਾਯਸਂਸਗ੍ਗਾਦੀਨਮ੍ਪਿ ਵਤ੍ਥੁਆਦਿਭਾਵੇਨ ਇਚ੍ਛਿਤਬ੍ਬਤ੍ਤਾ. ਵਤ੍ਥੁ ਚੇਵ ਗੋਤ੍ਤਞ੍ਚਾਤਿ ਵੀਤਿਕ੍ਕਮਤ੍ਤਾ ਵਤ੍ਥੁ ਚੇਵ ਅਨਞ੍ਞਸਾਧਾਰਣਤ੍ਤਾ ਗੋਤ੍ਤਞ੍ਚ. ਗਂ ਤਾਯਤੀਤਿ ਗੋਤ੍ਤਂ, ਸਜਾਤਿਤੋ ਅਞ੍ਞਤ੍ਥ ਕਾਯਸਂਸਗ੍ਗਾਦੀਸੁ ਗਨ੍ਤੁਂ ਅਦਤ੍ਵਾ ਬੁਦ੍ਧਿਂ, ਵਚਨਞ੍ਚ ਰਕ੍ਖਤੀਤਿ ਅਤ੍ਥੋ. ਸਙ੍ਘਾਦਿਸੇਸੋਤਿ ਸਙ੍ਘਾਦਿਸੇਸੋ ਨਾਮਾਯਂ. ਏਤ੍ਥ ਪਨ ਇਤਿਸਦ੍ਦੋ ਵਚਨਵਚਨੀਯਸਮੁਦਾਯਂ ਨਿਦਸ੍ਸੇਤਿ. ਤੇਨਾਹ ‘‘ਨਾਮਞ੍ਚੇਵ ਆਪਤ੍ਤਿ ਚਾ’’ਤਿ, ਸਜਾਤਿਸਾਧਾਰਣਨਾਮਤ੍ਤਾ ਨਾਮਞ੍ਚੇਵ ਤੇਨ ਤੇਨ ਵੀਤਿਕ੍ਕਮੇਨਾਪਜ੍ਜਿਤਬ੍ਬਤ੍ਤਾ ਆਪਤ੍ਤਿ ਚਾਤਿ ਅਤ੍ਥੋ. ਇਦਮ੍ਪਿ ਨਿਦਸ੍ਸਨਮਤ੍ਤਮੇਵ ‘‘ਆਪਤ੍ਤਿਯੋ’’ਤਿ ਇਮਸ੍ਸਾਪਿ ਨਾਮਾਦਿਭਾਵੇਨ ਇਚ੍ਛਿਤਬ੍ਬਤ੍ਤਾ. ਇਤਿਸਦ੍ਦੋ ਵਾ ਆਦਿਅਤ੍ਥੋ. ਏਵਞ੍ਚ ਕਤ੍ਵਾ ‘‘ਕਾਯਸਂਸਗ੍ਗਨ੍ਤਿਆਦਿਵਚਨੇਨਾਪੀ’’ਤਿਆਦਿਕਮ੍ਪਿ ਸਮਤ੍ਥਿਤਂ ਹੋਤਿ.

ਤਯਿਦਂ ਕਮ੍ਮਵਾਚਾਯ ਕੇਨ ਵਚਨੇਨ ਗਹਿਤਨ੍ਤਿ ਅਨੁਯੋਗਂ ਸਨ੍ਧਾਯ ‘‘ਤਤ੍ਥਾ’’ਤਿਆਦਿਮਾਹ. ‘‘ਆਪਤ੍ਤੀ’’ਤਿ ਸਬ੍ਬਸਾਧਾਰਣਨਾਮਤ੍ਤਾ, ਵੀਤਿਕ੍ਕਮੇਨ ਆਪਜ੍ਜਿਤਬ੍ਬਤ੍ਤਾ ਚ ਨਾਮਞ੍ਚੇਵ ਆਪਤ੍ਤਿ ਚ ਹੋਤੀਤਿ ਆਹ ‘‘ਆਪਤ੍ਤਿਯੋਤਿ ਵਚਨੇਨਾਪੀ’’ਤਿ. ਤਸ੍ਮਾਤਿ ਯਸ੍ਮਾ ਇਦਂ ਪਰਿਵਾਸਾਦਿਵਿਨਯਕਮ੍ਮਂ ਵਤ੍ਥੁਵਸੇਨ, ਗੋਤ੍ਤਵਸੇਨ, ਨਾਮਵਸੇਨ, ਆਪਤ੍ਤਿਵਸੇਨ ਚ ਕਾਤੁਂ ਵਟ੍ਟਤਿਯੇਵ, ਤਸ੍ਮਾ. ਏਤੇਸੂਤਿ ਵਤ੍ਥੁਆਦੀਸੁ, ਸੁਕ੍ਕਵਿਸ੍ਸਟ੍ਠਿਆਦੀਸੁ ਵਾ. ਵਤ੍ਤਂ ਸਮਾਦਾਤਬ੍ਬਨ੍ਤਿ ਯਥਾਵੁਤ੍ਤੇਸੁ ਦ੍ਵੀਸੁ ਪਦੇਸੁ ਏਕੇਨਪਿ ਸਮਾਦਾਤਬ੍ਬਂ. ਦ੍ਵੀਹਿ ਪਨ ਸੁਸਮਾਦਿਨ੍ਨਂਯੇਵ. ਤੇਨੇਵ ਵਕ੍ਖਤਿ ‘‘ਸਮਾਦਾਨੇਪਿ ਏਸੇਵ ਨਯੋ’’ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ).

ਆਰੋਚੇਤ੍ਵਾਤਿ –

‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਏਕਾਹਪ੍ਪਟਿਚ੍ਛਨ੍ਨਂ, ਸੋਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪ੍ਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਏਕਾਹਪ੍ਪਟਿਚ੍ਛਨ੍ਨਾਯ ਏਕਾਹਪਰਿਵਾਸਂ ਅਦਾਸਿ, ਸੋਹਂ ਪਰਿਵਸਾਮਿ, ਵੇਦਯਾਮਹਂ, ਭਨ੍ਤੇ, ‘ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿ (ਚੂਲ਼ਵ. ਅਟ੍ਠ. ੧੦੨) –

ਏਵਮਾਦਿਨਾ ਤਂ ਤਂ ਯੋਜਨਾਨੁਰੂਪਂ ਆਰੋਚੇਤ੍ਵਾ. ਇਮਞ੍ਚ ਪਨਤ੍ਥਂ ਗਹੇਤ੍ਵਾ ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿਯੇਵ (ਚੂਲ਼ਵ. ਅਟ੍ਠ. ੧੦੨). ‘‘ਪੁਨ ਆਗਤਾਗਤਾਨਂ ਭਿਕ੍ਖੂਨਂ ਆਰੋਚੇਨ੍ਤੇਨਾ’’ਤਿ ਇਦਂ ਆਗਨ੍ਤੁਕਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਂ. ਏਤ੍ਥ ਚ ਏਕਸ੍ਸ ਆਰੋਚੇਨ੍ਤੇਨ ਅਵਸਾਨੇ ‘‘ਵੇਦਯਤੀਤਿ ਮਂ ਆਯਸ੍ਮਾ ਧਾਰੇਤੁ’’, ਦ੍ਵਿਨ੍ਨਂ ‘‘ਆਯਸ੍ਮਨ੍ਤਾ ਧਾਰੇਨ੍ਤੁ’’, ਤਿਣ੍ਣਂ ‘‘ਆਯਸ੍ਮਨ੍ਤੋ ਧਾਰੇਨ੍ਤੂ’’ਤਿ ਵਤ੍ਤਬ੍ਬਂ. ਵਤ੍ਤਭੇਦਞ੍ਚ ਰਤ੍ਤਿਚ੍ਛੇਦਞ੍ਚ ਅਕਤ੍ਵਾਤਿ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਾਦਿਤਬ੍ਬਂ ਪਕਤਤ੍ਤਾਨਂ ਭਿਕ੍ਖੂਨਂ ਅਭਿਵਾਦਨਂ ਪਚ੍ਚੁਪਟ੍ਠਾਨ’’ਨ੍ਤਿਆਦਿਨਾ (ਚੂਲ਼ਵ. ੭੫) ਪਾਰਿਵਾਸਿਕਕ੍ਖਨ੍ਧਕੇ ਯਾਨਿ ਚਤੁਨਵੁਤਿ ਵਤ੍ਤਾਨਿ ਵੁਤ੍ਤਾਨਿ, ਤੇਸਂ ਭੇਦਞ੍ਚ, ਯੋ ਚ ‘‘ਤਯੋ ਖੋ, ਉਪਾਲਿ, ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ ਸਹਵਾਸੋ ਵਿਪ੍ਪਵਾਸੋ ਅਨਾਰੋਚਨਾ’’ਤਿ (ਚੂਲ਼ਵ. ੮੩) ਰਤ੍ਤਿਚ੍ਛੇਦੋ ਵੁਤ੍ਤੋ, ਤਞ੍ਚ ਅਕਤ੍ਵਾ.

ਅਯਂ ਹੇਤ੍ਥ ਵਿਨਿਚ੍ਛਯੋ – ਸਚੇ (ਚੂਲ਼ਵ. ਅਟ੍ਠ. ੭੬) ਆਗਨ੍ਤੁਕਾ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਵਾ ਅਵਿਸ੍ਸਮਿਤ੍ਵਾ ਏਵ ਵਾ ਵਿਹਾਰਮਜ੍ਝੇਨ ਗਚ੍ਛਨ੍ਤਿ, ਤੇਸਮ੍ਪਿ ਆਰੋਚੇਤਬ੍ਬਂ. ਸਚੇ ਤਸ੍ਸ ਅਜਾਨਨ੍ਤਸ੍ਸੇਵ ਗਚ੍ਛਨ੍ਤਿ, ਅਯਞ੍ਚ ਗਤਕਾਲੇ ਜਾਨਾਤਿ, ਗਨ੍ਤ੍ਵਾ ਆਰੋਚੇਤਬ੍ਬਂ. ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਯੇਪਿ ਅਨ੍ਤੋਵਿਹਾਰਂ ਅਪ੍ਪਵਿਸਿਤ੍ਵਾ ਉਪਚਾਰਸੀਮਂ ਓਕ੍ਕਮਿਤ੍ਵਾ ਗਚ੍ਛਨ੍ਤਿ, ਅਯਞ੍ਚ ਨੇਸਂ ਛਤ੍ਤਸਦ੍ਦਂ ਵਾ ਉਕ੍ਕਾਸਿਤਸਦ੍ਦਂ ਵਾ ਖਿਪਿਤਸਦ੍ਦਂ ਵਾ ਸੁਤ੍ਵਾਵ ਆਗਨ੍ਤੁਕਭਾਵਂ ਜਾਨਾਤਿ, ਗਨ੍ਤ੍ਵਾ ਆਰੋਚੇਤਬ੍ਬਂ. ਗਤਕਾਲੇ ਜਾਨਨ੍ਤੇਨਾਪਿ ਅਨੁਬਨ੍ਧਿਤ੍ਵਾ ਆਰੋਚੇਤਬ੍ਬਮੇਵ. ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਯੋਪਿ ਰਤ੍ਤਿਂਯੇਵ ਆਗਨ੍ਤ੍ਵਾ ਰਤ੍ਤਿਂਯੇਵ ਗਚ੍ਛਤਿ, ਸੋਪਿਸ੍ਸ ਰਤ੍ਤਿਚ੍ਛੇਦਂ ਕਰੋਤਿ. ਅਞ੍ਞਾਤਤ੍ਤਾ ਪਨ ਵਤ੍ਤਭੇਦਦੁਕ੍ਕਟਂ ਨਤ੍ਥਿ. ਸਚੇ ਅਜਾਨਿਤ੍ਵਾਵ ਅਬ੍ਭਾਨਂ ਕਰੋਤਿ, ਅਕਤਮੇਵ ਹੋਤੀਤਿ ਕੁਰੁਨ੍ਦਿਯਂ (ਚੂਲ਼ਵ. ਅਟ੍ਠ. ੭੬) ਵੁਤ੍ਤਂ. ਤਸ੍ਮਾ ਅਧਿਕਾ ਰਤ੍ਤਿਯੋ ਗਹੇਤ੍ਵਾ ਕਾਤਬ੍ਬਂ. ਅਯਂ ਅਪਣ੍ਣਕਪ੍ਪਟਿਪਦਾ.

ਨਦਿਆਦੀਸੁ ਨਾਵਾਯ ਗਚ੍ਛਨ੍ਤਮ੍ਪਿ ਪਰਤੀਰੇ ਠਿਤਮ੍ਪਿ ਆਕਾਸੇ ਗਚ੍ਛਨ੍ਤਮ੍ਪਿ ਪਬ੍ਬਤਤਲਅਰਞ੍ਞਾਦੀਸੁ ਦੂਰੇ ਠਿਤਮ੍ਪਿ ਭਿਕ੍ਖੁਂ ਦਿਸ੍ਵਾ ਸਚੇ ‘‘ਭਿਕ੍ਖੂ’’ਤਿ ਵਵਤ੍ਥਾਨਂ ਅਤ੍ਥਿ, ਨਾਵਾਦੀਹਿ ਵਾ ਗਨ੍ਤ੍ਵਾ, ਮਹਾਸਦ੍ਦਂ ਕਤ੍ਵਾ ਵਾ ਵੇਗੇਨ ਅਨੁਬਨ੍ਧਿਤ੍ਵਾ ਵਾ ਆਰੋਚੇਤਬ੍ਬਂ, ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇ ਵਾਯਮਨ੍ਤੋਪਿ ਸਮ੍ਪਾਪੁਣਿਤੁਂ ਵਾ ਸਾਵੇਤੁਂ ਵਾ ਨ ਸਕ੍ਕੋਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ.

ਅਞ੍ਞਂ ਕਞ੍ਚਿ ਵਿਹਾਰਂ ਗਤੇਨਪਿ ਭਿਕ੍ਖੂਨਂ ਆਰੋਚੇਤਬ੍ਬਮੇਵ (ਚੂਲ਼ਵ. ਅਟ੍ਠ. ੭੬). ਸਚੇ ਸਬ੍ਬੇ ਏਕਟ੍ਠਾਨੇ ਠਿਤੇ ਪਸ੍ਸਤਿ, ਏਕਟ੍ਠਾਨੇ ਠਿਤੇਨੇਵ ਆਰੋਚੇਤਬ੍ਬਂ. ਅਥ ਰੁਕ੍ਖਮੂਲਾਦੀਸੁ ਵਿਸੁਂ ਵਿਸੁਂ ਠਿਤਾ ਹੋਨ੍ਤਿ, ਤਤ੍ਥ ਤਤ੍ਥ ਗਨ੍ਤ੍ਵਾ ਆਰੋਚੇਤਬ੍ਬਂ. ਸਞ੍ਚਿਚ੍ਚ ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚ ਹੋਤਿ, ਵਤ੍ਤਭੇਦੇ ਚ ਦੁਕ੍ਕਟਂ. ਅਥ ਵਿਚਿਨਨ੍ਤੋ ਏਕਚ੍ਚੇ ਨ ਪਸ੍ਸਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਚ ਵਤ੍ਤਭੇਦਦੁਕ੍ਕਟਂ. ਸਞ੍ਚਿਚ੍ਚ ਅਨਾਰੋਚੇਨ੍ਤਸ੍ਸ ਪਨ ਰਤ੍ਤਿਚ੍ਛੇਦੋ ਚੇਵ ਹੋਤਿ, ਵਤ੍ਤਭੇਦੇ ਚ ਦੁਕ੍ਕਟਂ.

ਤਤ੍ਥੇਵਾਤਿ ਮਾਲ਼ਕਸੀਮਾਯਮੇਵ. ਮਾਲ਼ਕਤੋ ਪਨ ਭਿਕ੍ਖੂਸੁ ਨਿਕ੍ਖਨ੍ਤੇਸੁ ਏਕਸ੍ਸਪਿ ਸਨ੍ਤਿਕੇ ਨਿਕ੍ਖਿਪਿਤੁਂ ਵਟ੍ਟਤਿ (ਚੂਲ਼ਵ. ਅਟ੍ਠ. ੯੭). ਮਾਲ਼ਕਤੋ ਨਿਕ੍ਖਮਿਤ੍ਵਾ ਸਤਿਂ ਪਟਿਲਭਨ੍ਤੇਨ ਸਹ ਗਚ੍ਛਨ੍ਤਸ੍ਸ ਸਨ੍ਤਿਕੇ ਨਿਕ੍ਖਿਪਿਤਬ੍ਬਂ. ਤੇਨਾਹ ‘‘ਏਕਪੁਗ੍ਗਲਸ੍ਸ ਵਾ ਸਨ੍ਤਿਕੇ’’ਤਿ. ਸਚੇ ਸੋਪਿ ਪਕ੍ਕਨ੍ਤੋ, ਅਞ੍ਞਸ੍ਸ ਯਸ੍ਸ ਮਾਲ਼ਕੇ ਨਾਰੋਚਿਤਂ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਪਕਤਤ੍ਤਟ੍ਠਾਨੇਤਿ ਸਙ੍ਘਕਮ੍ਮਾਨਂ ਅਰਹਟ੍ਠਾਨੇ. ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੯੭) ਭਿਕ੍ਖੂਨਂ ਸਜ੍ਝਾਯਨਸਦ੍ਦਸਵਨੂਪਚਾਰਵਿਜਹਨਤ੍ਥਂ ਵੁਤ੍ਤਂ. ਮਹਾਮਗ੍ਗਤੋ ਓਕ੍ਕਮ੍ਮਾਤਿ ਮਗ੍ਗਪ੍ਪਟਿਪਨ੍ਨਭਿਕ੍ਖੂਨਂ ਉਪਚਾਰਵਿਜਹਨਤ੍ਥਂ ਵੁਤ੍ਤਂ. ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇਤਿ ਦਸ੍ਸਨੂਪਚਾਰਵਿਜਹਨਤ੍ਥਂ ਵੁਤ੍ਤਂ. ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਨ੍ਤਿ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ ਪਰਿਵਾਸੋ ਆਰੋਚੇਤਬ੍ਬੋ. ‘‘ਆਰੋਚੇਤਬ੍ਬ’’ਨ੍ਤਿ ਪਨ ਸਾਮਞ੍ਞੇਨ ਵੁਤ੍ਤਂ. ਆਰੋਚੇਨ੍ਤੇਨ ਚ ਸਚੇ ਨਵਕਤਰੋ ਹੋਤਿ, ‘‘ਆਵੁਸੋ’’ਤਿ ਵਤ੍ਤਬ੍ਬਂ. ਸਚੇ ਵੁਡ੍ਢਤਰੋ, ‘‘ਭਨ੍ਤੇ’’ਤਿ ਵਤ੍ਤਬ੍ਬਂ. ਸਚੇ ਅਞ੍ਞੋ ਕੋਚਿ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਤਂ ਠਾਨਂ ਆਗਚ੍ਛਤਿ. ਸਚੇ ਏਸ ਨਂ ਪਸ੍ਸਤਿ, ਸਦ੍ਦਂ ਵਾ ਤਸ੍ਸ ਸੁਣਾਤਿ, ਆਰੋਚੇਤਬ੍ਬਂ. ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦੋ ਚ. ਤੇਨਾਹ ‘‘ਯਮ੍ਪਿ ਅਞ੍ਞਂ ਭਿਕ੍ਖੁਂ ਪਸ੍ਸਤਿ, ਤਸ੍ਸਾਪਿ ਆਰੋਚੇਤਬ੍ਬਮੇਵਾ’’ਤਿ. ਅਥ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿਯੇਵ, ਵਤ੍ਤਭੇਦੋ ਪਨ ਨਤ੍ਥਿ. ਉਟ੍ਠਿਤੇਤਿ ਉਗ੍ਗਤੇ. ਯਂ ਸਬ੍ਬਪਠਮਂ ਭਿਕ੍ਖੁਨ੍ਤਿ ਵਿਹਾਰਤੋ ਨਿਕ੍ਖਮਨ੍ਤਂ ਵਾ ਆਗਨ੍ਤੁਕਂ ਵਾ ਸਬ੍ਬਪਠਮਂ ਯਂ ਅਞ੍ਞਂ ਭਿਕ੍ਖੁਂ ਪਸ੍ਸਤਿ. ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਅਨਾਰੋਚੇਨ੍ਤਸ੍ਸ ਦੁਕ੍ਕਟਂ ਸਿਯਾ, ਤਂ ਸਨ੍ਧਾਯ ਵੁਤ੍ਤਂ, ਨ ਤੁ ਰਤ੍ਤਿਚ੍ਛੇਦਂ ਸਨ੍ਧਾਯ. ਇਤਰਥਾ ਹਿ ‘‘ਵਿਹਾਰਸੀਮਾਪਰਿਯਾਪਨ੍ਨਾਨਂ ਸਬ੍ਬੇਸਂ ਆਰੋਚੇਤ੍ਵਾ’’ਤਿ ਵਦੇਯ੍ਯ. ਯਾਵ ਰਤ੍ਤਿਯੋ ਪੂਰੇਨ੍ਤੀਤਿ ਯਤ੍ਤਕਾ ਰਤ੍ਤਿਯੋ ਆਪਤ੍ਤਿ ਪਟਿਚ੍ਛਨ੍ਨਾ ਹੋਤਿ, ਤਤ੍ਤਕਾ ਰਤ੍ਤਿਯੋ ਯਾਵ ਪੂਰੇਨ੍ਤਿ, ਤਾਵ ਪਰਿਵਤ੍ਥਬ੍ਬਂ. ਸਮਨ੍ਤਪਾਸਾਦਿਕਾਯਂ ਪਨ ‘‘ਏਵਂ ਯਤ੍ਤਕਾਨਿ ਦਿਵਸਾਨਿ ਆਪਤ੍ਤਿ ਪਟਿਚ੍ਛਨ੍ਨਾ ਹੋਤਿ, ਤਤ੍ਤਕਾਨਿ, ਤਤੋ ਅਧਿਕਤਰਾਨਿ ਵਾ ਕੁਕ੍ਕੁਚ੍ਚਵਿਨੋਦਨਤ੍ਥਾਯ ਪਰਿਵਸਿਤ੍ਵਾ’’ਤਿ ਵੁਤ੍ਤਂ. ਵਿਤ੍ਥਾਰੋਤਿ ਪਪਞ੍ਚੋ.

ਇਤਰੇਸੁ ਪਨ ਦ੍ਵੀਸੂਤਿ ਸੁਦ੍ਧਨ੍ਤਪਰਿਵਾਸੋ, ਸਮੋਧਾਨਪਰਿਵਾਸੋਤਿ ਦ੍ਵਿਨ੍ਨਂ ਮਜ੍ਝੇ. ਖਨ੍ਧਕੇਤਿ ਸਮੁਚ੍ਚਯਕ੍ਖਨ੍ਧਕੇ (ਚੂਲ਼ਵ. ੧੫੬ ਆਦਯੋ). ਚੂਲ਼ਸੁਦ੍ਧਨ੍ਤੋ ਮਹਾਸੁਦ੍ਧਨ੍ਤੋਤਿ ਏਤ੍ਥ ਯੋ ਉਪਸਮ੍ਪਦਤੋ (ਚੂਲ਼ਵ. ਅਟ੍ਠ. ੧੦੨; ਵਿ. ਸਙ੍ਗ. ਅਟ੍ਠ. ੨੪੨) ਪਟ੍ਠਾਯ ਅਨੁਲੋਮਕ੍ਕਮੇਨ ਵਾ ਆਰੋਚਿਤਦਿਵਸਤੋ ਪਟ੍ਠਾਯ ਪਟਿਲੋਮਕ੍ਕਮੇਨ ਵਾ ‘‘ਅਸੁਕਞ੍ਚ ਅਸੁਕਞ੍ਚ ਦਿਵਸਂ ਵਾ ਪਕ੍ਖਂ ਵਾ ਮਾਸਂ ਵਾ ਸਂਵਚ੍ਛਰਂ ਵਾ ਤਵ ਸੁਦ੍ਧਭਾਵਂ ਜਾਨਾਸੀ’’ਤਿ ਪੁਚ੍ਛਿਯਮਾਨੋ ‘‘ਆਮ, ਭਨ੍ਤੇ, ਜਾਨਾਮਿ, ਏਤ੍ਤਕਂ ਨਾਮ ਕਾਲਂ ਅਹਂ ਸੁਦ੍ਧੋ’’ਤਿ ਵਦਤਿ, ਤਸ੍ਸ ਦਿਨ੍ਨੋ ਸੁਦ੍ਧਨ੍ਤਪਰਿਵਾਸੋ ‘‘ਚੂਲ਼ਸੁਦ੍ਧਨ੍ਤੋ’’ਤਿ ਵੁਚ੍ਚਤਿ.

ਤਂ ਗਹੇਤ੍ਵਾ ਪਰਿਵਸਨ੍ਤੇਨ ਯਤ੍ਤਕਂ ਕਾਲਂ ਅਤ੍ਤਨੋ ਸੁਦ੍ਧਭਾਵਂ ਜਾਨਾਤਿ, ਤਤ੍ਤਕਂ ਅਪਨੇਤ੍ਵਾ ਅਵਸੇਸਂ ਮਾਸਂ ਵਾ ਦ੍ਵੇਮਾਸਂ ਵਾ ਪਰਿਵਸਿਤਬ੍ਬਂ. ਸਚੇ ‘‘ਮਾਸਮਤ੍ਤਂ ਅਸੁਦ੍ਧੋਮ੍ਹੀ’’ਤਿ ਸਲ੍ਲਕ੍ਖੇਤ੍ਵਾ ਪਰਿਵਾਸਂ ਅਗ੍ਗਹੇਸਿ, ਪਰਿਵਸਨ੍ਤੋ ਚ ਪੁਨ ਅਞ੍ਞਂ ਮਾਸਂ ਸਰਤਿ, ਤਮ੍ਪਿ ਮਾਸਂ ਪਰਿਵਸਿਤਬ੍ਬਮੇਵ, ਪੁਨ ਪਰਿਵਾਸਦਾਨਕਿਚ੍ਚਂ ਨਤ੍ਥਿ. ਅਥ ‘‘ਦ੍ਵੇਮਾਸਂ ਅਸੁਦ੍ਧੋਮ੍ਹੀ’’ਤਿ ਸਲ੍ਲਕ੍ਖੇਤ੍ਵਾ ਅਗ੍ਗਹੇਸਿ, ਪਰਿਵਸਨ੍ਤੋ ਚ ‘‘ਮਾਸਮਤ੍ਤਮੇਵਾਹਂ ਅਸੁਦ੍ਧੋਮ੍ਹੀ’’ਤਿ ਸਨ੍ਨਿਟ੍ਠਾਨਂ ਕਰੋਤਿ, ਮਾਸਮੇਵ ਪਰਿਵਸਿਤਬ੍ਬਂ, ਪੁਨ ਪਰਿਵਾਸਦਾਨਕਿਚ੍ਚਂ ਨਤ੍ਥਿ. ਅਯਞ੍ਹਿ ਸੁਦ੍ਧਨ੍ਤਪਰਿਵਾਸੋ ਉਦ੍ਧਮ੍ਪਿ ਆਰੋਹਤਿ, ਹੇਟ੍ਠਾਪਿ ਓਰੋਹਤਿ, ਇਦਮਸ੍ਸ ਲਕ੍ਖਣਂ.

ਯੋ ਪਨ ਯਥਾਵੁਤ੍ਤੇਨ ਅਨੁਲੋਮਪ੍ਪਟਿਲੋਮਵਸੇਨ ਪੁਚ੍ਛਿਯਮਾਨੋਪਿ ਰਤ੍ਤਿਪਰਿਯਨ੍ਤਂ (ਚੂਲ਼ਵ. ਅਟ੍ਠ. ੧੦੨) ਨ ਜਾਨਾਤਿ ਨਸ੍ਸਰਤਿ, ਰਤ੍ਤਿਪਰਿਯਨ੍ਤੇ ਵੇਮਤਿਕੋ ਵਾ ਹੋਤਿ, ਤਸ੍ਸ ਦਿਨ੍ਨੋ ਸੁਦ੍ਧਨ੍ਤਪਰਿਵਾਸੋ ‘‘ਮਹਾਸੁਦ੍ਧਨ੍ਤੋ’’ਤਿ ਵੁਚ੍ਚਤਿ. ਤਂ ਗਹੇਤ੍ਵਾ ਗਹਿਤਦਿਵਸਤੋ ਯਾਵ ਉਪਸਮ੍ਪਦਦਿਵਸੋ, ਤਾਵ ਰਤ੍ਤਿਯੋ ਗਣੇਤ੍ਵਾ ਪਰਿਵਸਿਤਬ੍ਬਂ. ਅਯਂ ਉਦ੍ਧਂ ਨਾਰੋਹਤਿ, ਹੇਟ੍ਠਾ ਪਨ ਓਰੋਹਤਿ. ਤਸ੍ਮਾ ਸਚੇ ਪਰਿਵਸਨ੍ਤੋ ਰਤ੍ਤਿਪਰਿਚ੍ਛੇਦੇ ਸਨ੍ਨਿਟ੍ਠਾਨਂ ਕਰੋਤਿ ‘‘ਮਾਸੋ ਵਾ ਸਂਵਚ੍ਛਰੋ ਵਾ ਮਯ੍ਹਂ ਆਪਨ੍ਨਸ੍ਸਾ’’ਤਿ, ਮਾਸਂ ਵਾ ਸਂਵਚ੍ਛਰਂ ਵਾ ਪਰਿਵਸਿਤਬ੍ਬਂ. ਏਤ੍ਥ ਚ ਕਿਞ੍ਚਾਪਿ ‘‘ਏਤ੍ਤਕਂ ਕਾਲਂ ਅਹਂ ਸੁਦ੍ਧੋ’’ਤਿ ਵਦਨ੍ਤਸ੍ਸ ਚੂਲ਼ਸੁਦ੍ਧਨ੍ਤੋ ਦੀਯਤਿ, ਤਥਾਪਿ ਨਿਯਮੇਨੇਵ ਜਾਨਨਾਭਾਵਾ ‘‘ਦੁਵਿਧੋਪਿ ਚੇਸ…ਪੇ… ਦਾਤਬ੍ਬੋ’’ਤਿ ਵੁਤ੍ਤਂ. ਤਸ੍ਸ ਦਾਨਵਿਧਿ ਖਨ੍ਧਕੇ ਆਗਤੋਤਿ ਤਸ੍ਸ ਦੁਵਿਧਸ੍ਸਾਪਿ ਸੁਦ੍ਧਨ੍ਤਸ੍ਸ ਦਾਨਵਿਧਿ ‘‘ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ…ਪੇ… ਏਵਮਸ੍ਸ ਵਚਨੀਯੋ’’ਤਿਆਦਿਨਾ ਸਮੁਚ੍ਚਯਕ੍ਖਨ੍ਧਕੇ (ਚੂਲ਼ਵ. ੧੫੬) ਆਗਤੋ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਧਿਪ੍ਪਾਯੋ. ਏਸ ਨਯੋ ਵਿਨਿਚ੍ਛਯਕਥਾ ਪਨ ਵਿਤ੍ਥਾਰਤੋ ਸਮਨ੍ਤਪਾਸਾਦਿਕਾਯਂ ਵੁਤ੍ਤਾਤਿ ਏਤ੍ਥਾਪਿ.

ਓਧੁਨਿਤ੍ਵਾ ਅਵਧੁਯ ਪਹਾਯ ਸਮੋਧਾਨੋ ਓਧਾਨਸਮੋਧਾਨੋ. ਚਿਰਪ੍ਪਟਿਚ੍ਛਨ੍ਨਾਨਂ ਅਗ੍ਘੇਨ ਸਮੋਧਾਨੋ ਅਗ੍ਘਸਮੋਧਾਨੋ. ਮਿਸ੍ਸਕਾਨਂ ਸਮੋਧਾਨੋ ਮਿਸ੍ਸਕਸਮੋਧਾਨੋ. ਇਦਾਨਿ ਤਂ ਤਿਵਿਧਮ੍ਪਿ ਸਮੋਧਾਨਪਰਿਵਾਸਂ ਸਙ੍ਖੇਪਤੋ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਅਨ੍ਤਰਾਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਾਦੇਨ੍ਤਸ੍ਸਾਤਿ ਯੋ ਪਰਿਵਾਸਂ ਗਹੇਤ੍ਵਾ ਅਨਿਕ੍ਖਿਤ੍ਤਵਤ੍ਤੋ ਹੁਤ੍ਵਾ ਪਰਿਵਸਨ੍ਤੋ ਅਪਰਿਨਿਟ੍ਠਿਤੇਯੇਵ ਪਰਿਵਾਸੇ ਅਨ੍ਤਰਾ ਵੇਮਜ੍ਝੇ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਾਦੇਤਿ, ਤਸ੍ਸ. ਪਰਿਵੁਤ੍ਥਦਿਵਸੇਤਿ ਲਕ੍ਖਣਵਚਨਮੇਤਂ, ਤੇਨ ‘‘ਮਾਨਤ੍ਤਚਿਣ੍ਣਦਿਵਸੇ ਚਾ’’ਤਿਪਿ ਵੁਤ੍ਤਮੇਵ ਹੋਤਿ. ਮਕ੍ਖੇਤ੍ਵਾਤਿ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਮੂਲਾਯ ਪਟਿਕਸ੍ਸਨਵਸੇਨ ਮਕ੍ਖੇਤ੍ਵਾ. ਸਮੋਦਹਿਤ੍ਵਾਤਿ ਮੂਲਾਪਤ੍ਤਿਟ੍ਠਾਨੇ ਠਪੇਤ੍ਵਾ, ਪਕ੍ਖਿਪਿਤ੍ਵਾਤਿ ਅਤ੍ਥੋ. ਦਾਤਬ੍ਬਪਰਿਵਾਸੋਤਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿਆਦਿਨਾ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਦਾਤਬ੍ਬਪਰਿਵਾਸੋ. ਇਦਂ ਵੁਤ੍ਤਂ ਹੋਤਿ – ਯੋ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਂ ਗਹੇਤ੍ਵਾ ਪਰਿਵਸਨ੍ਤੋ (ਚੂਲ਼ਵ. ਅਟ੍ਠ. ੧੦੨; ਵਿ. ਸਙ੍ਗ. ਅਟ੍ਠ. ੨੪੩) ਵਾ ਮਾਨਤ੍ਤਾਰਹੋ ਵਾ ਮਾਨਤ੍ਤਂ ਚਰਨ੍ਤੋ ਵਾ ਅਬ੍ਭਾਨਾਰਹੋ ਵਾ ਅਨਿਕ੍ਖਿਤ੍ਤਵਤ੍ਤੋ ਅਞ੍ਞਂ ਆਪਤ੍ਤਿਂ ਆਪਜ੍ਜਿਤ੍ਵਾ ਪੁਰਿਮਾਪਤ੍ਤਿਯਾ ਸਮਾ ਵਾ ਊਨਤਰਾ ਵਾ ਰਤ੍ਤਿਯੋ ਪਟਿਚ੍ਛਾਦੇਤਿ, ਤਸ੍ਸ ਮੂਲਾਯ ਪਟਿਕਸ੍ਸਨੇਨ ਤੇ ਪਰਿਵੁਤ੍ਥਦਿਵਸੇ ਚ ਮਾਨਤ੍ਤਚਿਣ੍ਣਦਿਵਸੇ ਚ ਸਬ੍ਬੇ ਓਧੁਨਿਤ੍ਵਾ ਅਦਿਵਸੇ ਕਤ੍ਵਾ ਪਚ੍ਛਾ ਆਪਨ੍ਨਾਪਤ੍ਤਿਂ ਮੂਲਾਪਤ੍ਤਿਯਂ ਸਮੋਧਾਯ ਪਰਿਵਾਸੋ ਦਾਤਬ੍ਬੋਤਿ.

ਸਚੇ ਪਨ ਅਨ੍ਤਰਾਪਤ੍ਤਿ ਮੂਲਾਪਤ੍ਤਿਤੋ ਅਤਿਰੇਕਪ੍ਪਟਿਚ੍ਛਨ੍ਨਾ ਹੋਤਿ (ਚੂਲ਼ਵ. ਅਟ੍ਠ. ੧੦੨), ਤਂ ਮੂਲਾਪਤ੍ਤਿਂ ਕਤ੍ਵਾ ਤਤ੍ਥ ਇਤਰਂ ਸਮੋਧਾਯ ਪਰਿਵਾਸੋ ਦਾਤਬ੍ਬੋ. ਸਚੇ ਪਨ ਅਨ੍ਤਰਾਪਤ੍ਤਿ ਅਪ੍ਪਟਿਚ੍ਛਨ੍ਨਾ ਹੋਤਿ, ਮੂਲਾਯ ਪਟਿਕਸ੍ਸਨਂ ਅਕਤ੍ਵਾ ਪੁਬ੍ਬੇ ਗਹਿਤਪਰਿਵਾਸੇਨੇਵ ਪਰਿਵਸਿਤਬ੍ਬਂ.

ਯਾ ਏਕਾ ਵਾ…ਪੇ… ਸਬ੍ਬਚਿਰਪ੍ਪਟਿਚ੍ਛਨ੍ਨਾਯੋਤਿ ਯਾ ਏਕਾ ਵਾ ਆਪਤ੍ਤਿ ਸਬ੍ਬਚਿਰਪ੍ਪਟਿਚ੍ਛਨ੍ਨਾ, ਯਾ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਆਪਤ੍ਤਿਯੋ ਸਬ੍ਬਚਿਰਪ੍ਪਟਿਚ੍ਛਨ੍ਨਾਯੋਤਿ ਅਤ੍ਥੋ. ਤਾਸਨ੍ਤਿ ਸਬ੍ਬਚਿਰਪ੍ਪਟਿਚ੍ਛਨ੍ਨਾਨਂ ਆਪਤ੍ਤੀਨਂ. ਦਾਨਵਿਧਿ ਪਨਸ੍ਸ ਖਨ੍ਧਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਯਸ੍ਸ ਪਨ ਸਤਂ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾ, ਅਪਰਮ੍ਪਿ ਸਤਂ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾ, ਅਪਰਮ੍ਪਿ ਸਤਂ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾਤਿ ਏਵਂ ਦਸਕ੍ਖਤ੍ਤੁਂ ਕਤ੍ਵਾ ਆਪਤ੍ਤਿਸਹਸ੍ਸਂ ਦਿਵਸਸਤਪਟਿਚ੍ਛਨ੍ਨਂ ਹੋਤਿ, ਤੇਨ ਕਿਂ ਕਾਤਬ੍ਬਨ੍ਤਿ? ਸਬ੍ਬਂ ਸਮੋਦਹਿਤ੍ਵਾ ਦਸ ਦਿਵਸੇ ਪਰਿਵਸਿਤਬ੍ਬਂ. ਏਵਂ ਏਕੇਨੇਵ ਦਸਾਹੇਨ ਦਿਵਸਸਤਮ੍ਪਿ ਪਰਿਵਸਿਤਮੇਵ ਹੋਤਿ. ਵੁਤ੍ਤਮ੍ਪਿ ਚੇਤਂ –

‘‘ਦਸਸਤਂ ਰਤ੍ਤਿਸਤਂ, ਆਪਤ੍ਤਿਯੋ ਛਾਦਯਿਤ੍ਵਾਨ;

ਦਸ ਰਤ੍ਤਿਯੋ ਵਸਿਤ੍ਵਾਨ, ਮੁਚ੍ਚੇਯ੍ਯ ਪਾਰਿਵਾਸਿਕੋ’’ਤਿ. (ਪਰਿ. ੪੭੭);

ਅਯਂ ਅਗ੍ਘਸਮੋਧਾਨੋ ਨਾਮ.

ਇਦਾਨਿ ਮਿਸ੍ਸਕਸਮੋਧਾਨਂ ਨਿਦ੍ਦਿਸਿਤੁਂ ‘‘ਮਿਸ੍ਸਕਸਮੋਧਾਨੋ ਨਾਮਾ’’ਤਿਆਦਿਮਾਹ. ਤਤ੍ਰਾਯਂ ਨਯੋ –

‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਂ ਸੁਕ੍ਕਵਿਸ੍ਸਟ੍ਠਿਂ, ਏਕਂ ਕਾਯਸਂਸਗ੍ਗਂ, ਏਕਂ ਦੁਟ੍ਠੁਲ੍ਲਵਾਚਂ, ਏਕਂ ਅਤ੍ਤਕਾਮਂ, ਏਕਂ ਸਞ੍ਚਰਿਤ੍ਤਂ, ਏਕਂ ਕੁਟਿਕਾਰਕਂ, ਏਕਂ ਵਿਹਾਰਕਾਰਕਂ, ਏਕਂ ਦੁਟ੍ਠਦੋਸਂ, ਏਕਂ ਅਞ੍ਞਭਾਗਿਯਂ, ਏਕਂ ਸਙ੍ਘਭੇਦਂ, ਏਕਂ ਭੇਦਾਨੁਵਤ੍ਤਕਂ, ਏਕਂ ਦੁਬ੍ਬਚਂ, ਏਕਂ ਕੁਲਦੂਸਕਂ, ਸੋਹਂ, ਭਨ੍ਤੇ, ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਾਮੀ’’ਤਿ –

ਤਿਕ੍ਖਤ੍ਤੁਂ ਯਾਚਾਪੇਤ੍ਵਾ ਤਦਨੁਰੂਪਾਯ ਕਮ੍ਮਵਾਚਾਯ ਪਰਿਵਾਸੋ ਦਾਤਬ੍ਬੋ. ਏਤ੍ਥ ਚ ‘‘ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋ’’ਤਿਪਿ ‘‘ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿ’’ਨ੍ਤਿਪਿ ਏਵਂ ਪੁਬ੍ਬੇ ਵੁਤ੍ਤਨਯੇਨ ਵਤ੍ਥੁਵਸੇਨਪਿ ਗੋਤ੍ਤਵਸੇਨਪਿ ਨਾਮਵਸੇਨਪਿ ਆਪਤ੍ਤਿਵਸੇਨਪਿ ਯੋਜੇਤ੍ਵਾ ਕਮ੍ਮਵਾਚਂ ਕਾਤੁਂ ਵਟ੍ਠਤਿਯੇਵਾਤਿ. ਅਯਂ ਮਿਸ੍ਸਕਸਮੋਧਾਨੋ. ਸਬ੍ਬਪਰਿਵਾਸਕਮ੍ਮਵਾਚਾਵਸਾਨੇ ਪਨ ਨਿਕ੍ਖਿਤ੍ਤਾਨਿਕ੍ਖਿਤ੍ਤਵਤ੍ਤਾਦਿਕਥਾ ਪੁਰਿਮਨਯੇਨੇਵ ਵੇਦਿਤਬ੍ਬਾ. ਤਿਵਿਧੇਪਿ ਸਮੋਧਾਨਪਰਿਵਾਸੇ ਅਤ੍ਥਮਤ੍ਤਸ੍ਸੇਵ ਵੁਤ੍ਤਤ੍ਤਾ, ਵਿਨਿਚ੍ਛਯਾਦੀਨਂ ਵਾ ਅਨਾਮਟ੍ਠਤ੍ਤਾ ‘‘ਅਯਂ ਤਿਵਿਧੇਪਿ ਸਮੋਧਾਨਪਰਿਵਾਸੇ ਸਙ੍ਖੇਪਕਥਾ’’ਤਿ ਵੁਤ੍ਤਂ. ਮਹਾਵਿਸਯਤ੍ਤਾ ਸਮੋਧਾਨਵਿਚਾਰਣਾਯ ਸਾ ਨਿਰਵਸੇਸਾ ਕੁਤੋ ਲਦ੍ਧਬ੍ਬਾਤਿ ਆਹ ‘‘ਵਿਤ੍ਥਾਰੋ’’ਤਿਆਦਿ.

ਛਾਰਤ੍ਤਨ੍ਤਿ ਰਾ ਸਦ੍ਦੋ ਤੀਯਤਿ ਛਿਜ੍ਜਤਿ ਏਤ੍ਥਾਤਿ ਰਤ੍ਤਿ, ਸਤ੍ਤਾਨਂ ਸਦ੍ਦਸ੍ਸ ਵੂਪਸਮਨਕਾਲੋਤਿ ਅਤ੍ਥੋ, ਛ ਰਤ੍ਤਿਯੋ ਸਮਾਹਟਾ, ਛਨ੍ਨਂ ਰਤ੍ਤੀਨਂ ਵਾ ਸਮਾਹਾਰੋ ਛਰਤ੍ਤਂ, ਛਰਤ੍ਤਮੇਵ ਛਾਰਤ੍ਤਂ, ਅਵਯਵਬ੍ਯਤਿਰੇਕੇਨ ਸਮੁਦਾਯਸ੍ਸਾਭਾਵਤੋ ਛ ਰਤ੍ਤਿਯੋਤਿ ਅਤ੍ਥੋ ਵੁਤ੍ਤੋ.

ਪਰਿਵਾਸਂ ਅਦਤ੍ਵਾ ਮਾਨਤ੍ਤਮੇਵ ਦਾਤਬ੍ਬਨ੍ਤਿ ਯਸ੍ਮਾ ਆਪਤ੍ਤਿ ਅਪ੍ਪਟਿਚ੍ਛਨ੍ਨਾ, ਯਸ੍ਮਾ ਚ ਆਪਨ੍ਨਭਾਵੇਨੇਵ ਮਾਨਤ੍ਤਾਰਹੋ ਹੋਤਿ, ਤਸ੍ਮਾ ਪਰਿਵਾਸਂ ਅਦਤ੍ਵਾ ਕੇਵਲਂ ਮਾਨਤ੍ਤਮੇਵ ਦਾਤਬ੍ਬਂ. ਯਂ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵੁਤ੍ਥਪਰਿਵਾਸਸ੍ਸ ਦੀਯਤਿ, ਇਦਂ ਪਟਿਚ੍ਛਨ੍ਨਮਾਨਤ੍ਤਂ ਨਾਮਾਤਿ ਆਹ ‘‘ਯਸ੍ਸ ਪਟਿਚ੍ਛਨ੍ਨਾ ਹੋਤੀ’’ਤਿਆਦਿ. ਇਦਨ੍ਤਿ ਪਟਿਚ੍ਛਨ੍ਨਮਾਨਤ੍ਤਂ. ਇਧਾਤਿ ਇਮਸ੍ਮਿਂ ਵਾਕ੍ਯੇ. ਕਥਂ ਪਨ ਤੇਸਂ ਦ੍ਵਿਨ੍ਨਂ ਮਾਨਤ੍ਤਾਨਂ ਦਾਨਵਿਧਿ ਚ ਵਿਨਿਚ੍ਛਯਕਥਾ ਚ ਵੇਦਿਤਬ੍ਬਾਤਿ ਆਹ ‘‘ਉਭਿਨ੍ਨਮ੍ਪਿ ਪਨਾ’’ਤਿਆਦਿ.

ਅਯਨ੍ਤਿ ਵਕ੍ਖਮਾਨਂ ਸਨ੍ਧਾਯਾਹ. ਪਰਿਵਾਸੇ ਵੁਤ੍ਤਪ੍ਪਕਾਰਂ ਪਦੇਸਨ੍ਤਿ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਤੋ ਓਕ੍ਕਮ੍ਮ ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨਂ. ਸਮਾਦਿਯਿਤ੍ਵਾਤਿ ਅਨ੍ਤੋਅਰੁਣੇਯੇਵ ਸਮਾਦਿਯਿਤ੍ਵਾ. ਆਰੋਚੇਤ੍ਵਾਤਿ –

‘‘ਅਹਂ, ਭਨ੍ਤੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਸਞ੍ਚੇਤਨਿਕਂ ਸੁਕ੍ਕਵਿਸ੍ਸਟ੍ਠਿਂ ਅਪ੍ਪਟਿਚ੍ਛਨ੍ਨਂ, ਸੋਹਂ, ਭਨ੍ਤੇ, ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਅਪ੍ਪਟਿਚ੍ਛਨ੍ਨਾਯ ਛਾਰਤ੍ਤਂ ਮਾਨਤ੍ਤਂ ਯਾਚਿਂ, ਤਸ੍ਸ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਸਞ੍ਚੇਤਨਿਕਾਯ ਸੁਕ੍ਕਵਿਸ੍ਸਟ੍ਠਿਯਾ ਅਪ੍ਪਟਿਚ੍ਛਨ੍ਨਾਯ ਛਾਰਤ੍ਤਂ ਮਾਨਤ੍ਤਂ ਅਦਾਸਿ, ਸੋਹਂ ਮਾਨਤ੍ਤਂ ਚਰਾਮਿ, ਵੇਦਯਾਮਹਂ, ਭਨ੍ਤੇ, ਵੇਦਯਤੀ’ਤਿ ਮਂ ਸਙ੍ਘੋ ਧਾਰੇਤੂ’’ਤਿਆਦਿਨਾ (ਚੂਲ਼ਵ. ਅਟ੍ਠ. ੯੭) –

ਆਪਤ੍ਤਿਦਿਵਸਾਨੁਰੂਪਂ ਆਰੋਚੇਤ੍ਵਾ. ਇਮਞ੍ਚ ਪਨ ਅਤ੍ਥਂ ਗਹੇਤ੍ਵਾ (ਚੂਲ਼ਵ. ਅਟ੍ਠ. ੯੭) ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿਯੇਵ. ਆਰੋਚਿਤਕਾਲਤੋ ਪਟ੍ਠਾਯ ਚ ਏਕਂ ਭਿਕ੍ਖੁਂ ਠਪੇਤ੍ਵਾ ਸੇਸੇਹਿ ਸਤਿ ਕਰਣੀਯੇ ਗਨ੍ਤੁਮ੍ਪਿ ਵਟ੍ਟਤਿ. ਅਰੁਣੇ ਉਟ੍ਠਿਤੇ ਤਸ੍ਸ ਭਿਕ੍ਖੁਸ੍ਸ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਸੋਪਿ ਕੇਨਚਿ ਕਮ੍ਮੇਨ ਪੁਰੇ ਅਰੁਣੇਯੇਵ ਗਚ੍ਛਤਿ, ਅਞ੍ਞਂ ਵਿਹਾਰਤੋ ਨਿਕ੍ਖਨ੍ਤਂ ਵਾ ਆਗਨ੍ਤੁਕਂ ਵਾ ਯਂ ਪਠਮਂ ਪਸ੍ਸਤਿ, ਤਸ੍ਸ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਅਯਞ੍ਚ ਯਸ੍ਮਾ ਗਣਸ੍ਸ ਆਰੋਚੇਤ੍ਵਾ, ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਵ ਵਸਿ, ਤੇਨਸ੍ਸ ਊਨੇ ਗਣੇ ਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤਿ. ਸਚੇ ਪਨ ਕਞ੍ਚਿ ਨ ਪਸ੍ਸਤਿ, ਵਿਹਾਰਂ ਗਨ੍ਤ੍ਵਾ ਯਂ ਪਠਮਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਤੇਨਾਹ ‘‘ਤਤੋ ਤੇਸੁ ਗਤੇਸੁ ਵਾ ਅਗਤੇਸੁ ਵਾ ਪੁਰਿਮਨਯੇਨ ਪਟਿਪਜ੍ਜਿਤਬ੍ਬ’’ਨ੍ਤਿ.

ਯਤ੍ਥ ਸਿਯਾਤਿ ਯਸ੍ਸਂ ਸਮਾਨਸਂਵਾਸਕਸੀਮਾਯਂ ਵੀਸਤਿਗਣੋ ਭਿਕ੍ਖੁਸਙ੍ਘੋ ਅਤ੍ਥਿ. ਅਵ੍ਹਾਤਬ੍ਬੋਤਿ ਅਬ੍ਭਾਨਕਮ੍ਮਵਸੇਨ ਪਕ੍ਕੋਸਿਤਬ੍ਬੋ. ਅਬ੍ਭਾਨਕਮ੍ਮਂ ਪਨ ਕਥਨ੍ਤਿ ਆਹ ‘‘ਅਬ੍ਭਾਨਕਮ੍ਮਂ ਪਨਾ’’ਤਿਆਦਿ. ਪਾਲ਼ਿਵਸੇਨਾਤਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿਆਦਿਨਾ (ਚੂਲ਼ਵ. ੧੦੧) ਪਾਲ਼ਿਵਸੇਨ. ਵਿਨਿਚ੍ਛਯਵਸੇਨਾਤਿ ‘‘ਅਬ੍ਭਨ੍ਤੇਹਿ ਚ ਪਠਮਂ ਅਬ੍ਭਾਨਾਰਹੋ ਕਾਤਬ੍ਬੋ. ਅਯਞ੍ਹਿ ਨਿਕ੍ਖਿਤ੍ਤਵਤ੍ਤਤ੍ਤਾ ਪਕਤਤ੍ਤਟ੍ਠਾਨੇ ਠਿਤੋ, ਪਕਤਤ੍ਤਸ੍ਸ ਚ ਅਬ੍ਭਾਨਂ ਕਾਤੁਂ ਨ ਵਟ੍ਟਤਿ, ਤਸ੍ਮਾ ਵਤ੍ਤਂ ਸਮਾਦਪੇਤਬ੍ਬੋ. ਵਤ੍ਤੇ ਸਮਾਦਿਨ੍ਨੇ ਅਬ੍ਭਾਨਾਰਹੋ ਹੋਤਿ. ਤੇਨਾਪਿ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤ੍ਵਾ ਅਬ੍ਭਾਨਂ ਯਾਚਿਤਬ੍ਬਂ. ਅਨਿਕ੍ਖਿਤ੍ਤਵਤ੍ਤਸ੍ਸ ਪਨ ਵਤ੍ਤਸਮਾਨਕਿਚ੍ਚਂ ਨਤ੍ਥਿ. ਸੋ ਹਿ ਛਾਰਤ੍ਤਾਤਿਕ੍ਕਮੇਨੇਵ ਅਬ੍ਭਾਨਾਰਹੋ ਹੋਤੀ’’ਤਿਆਦਿਨਾ (ਚੂਲ਼ਵ. ਅਟ੍ਠ. ੯੭) ਵਿਨਿਚ੍ਛਯਵਸੇਨ. ਤਂ ਪਨੇਤਂ ਸਬ੍ਬਂ ਪਰਿਵਾਸਾਦਿਕਮ੍ਮਂ ਪਾਲ਼ਿਵਸੇਨ (ਚੂਲ਼ਵ. ੭੫) ਚ ਅਟ੍ਠਕਥਾਵਸੇਨ (ਚੂਲ਼ਵ. ਅਟ੍ਠ. ੭੫, ੯੭) ਚ ਸੁਵਿਞ੍ਞੇਯ੍ਯਤ੍ਤਾ ਅਤਿਵਿਤ੍ਥਾਰਭਯੇਨ ਨ ਵਿਤ੍ਥਾਰਯਿਮ੍ਹ, ਅਤ੍ਥਿਕੇਹਿ ਪਨ ਤਤੋਵ ਗਹੇਤਬ੍ਬਂ. ਇਮਸ੍ਸ ਪਨ ਕਮ੍ਮਸ੍ਸ ਵੀਸਤਿਵਗ੍ਗਕਰਣੀਯਤ੍ਤਾ ਤਤੋ ਊਨਤਰੇਨ ਕਤਂ ਕੁਪ੍ਪਤਿ. ਤੇਨਾਹ ‘‘ਏਕੇਨਾਪਿ ਚੇ…ਪੇ… ਅਨਬ੍ਭਿਤੋ’’ਤਿ. ਅਯਨ੍ਤਿ ਅਯਂ ਯਥਾਵੁਤ੍ਤਾ. ਸਾਮੀਚੀਤਿ ਵਤ੍ਤਂ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ

ਸਙ੍ਘਾਦਿਸੇਸਵਣ੍ਣਨਾ ਨਿਟ੍ਠਿਤਾ.