੧੦. ਸਙ੍ਘਭੇਦਸਿਕ੍ਖਾਪਦਵਣ੍ਣਨਾ

ਸਹਿਤਸ੍ਸਾਤਿ ਕਾਯਚਿਤ੍ਤੇਹਿ ਏਕੀਭੂਤਸ੍ਸ. ਤੇਨਾਹ ‘‘ਚਿਤ੍ਤੇਨ ਚ ਸਰੀਰੇਨ ਚ ਅਵਿਯੁਤ੍ਤਸ੍ਸਾਤਿ ਅਤ੍ਥੋ’’ਤਿ. ਅਸ੍ਸਾਤਿ ‘‘ਸਮਗ੍ਗਸ੍ਸਾ’’ਤਿ ਪਦਸ੍ਸ. ਸਮਾਨਸਂਵਾਸਕੋਤਿ ਸਮਾਨੋ ਏਕੂਪੋਸਥਾਦਿਭੇਦੋ ਸਂਵਾਸੋ ਅਸ੍ਸਾਤਿ ਸਮਾਨਸਂਵਾਸਕੋ, ਲਦ੍ਧਿਨਾਨਾਸਂਵਾਸਕੇਨ ਵਾ ਕਮ੍ਮਨਾਨਾਸਂਵਾਸਕੇਨ ਵਾ ਵਿਰਹਿਤੋ. ਕਾਯਸਾਮਗ੍ਗਿਦਾਨਤੋਤਿ ਕਾਯੇਨ, ਕਾਯਸ੍ਸ ਵਾ ਸਾਮਗ੍ਗਿਯਾ ਸਹਿਤਭਾਵਸ੍ਸ ਦਾਨਤੋ, ਤੇਸੁ ਤੇਸੁ ਸਙ੍ਘਕਮ੍ਮੇਸੁ ਹਤ੍ਥਪਾਸੂਪਗਮਨਤੋਤਿ ਵੁਤ੍ਤਂ ਹੋਤਿ. ਕਥਂ ਨਾਮਾਯਂ ਭਿਜ੍ਜੇਯ੍ਯਾਤਿ ਅਯਂ ਸਙ੍ਘੋ ਕੇਨ ਨੁ ਖੋ ਉਪਾਯੇਨ ਵਗ੍ਗੋ ਭਵੇਯ੍ਯ. ਵਾਯਾਮੇਯ੍ਯਾਤਿ ਉਸ੍ਸਾਹਂ ਕਰੇਯ੍ਯ, ਪਕ੍ਖਂ ਪਰਿਯੇਸੇਯ੍ਯ, ਗਣਂ ਬਨ੍ਧੇਯ੍ਯਾਤਿ ਵੁਤ੍ਤਂ ਹੋਤਿ. ਅਤ੍ਤਨੋ ਫਲਂ ਕਰੋਤੀਤਿ ਕਰਣਂ, ਯਂ ਕਿਞ੍ਚਿ ਕਾਰਣਂ, ਅਧਿਕਂ ਕਰਣਨ੍ਤਿ ਅਧਿਕਰਣਂ, ਵਿਸੇਸਕਾਰਣਂ, ਵਿਸੇਸਕਾਰਣਞ੍ਚ ਸਙ੍ਘਭੇਦਸ੍ਸਾਤਿ ਵੁਤ੍ਤਂ ‘‘ਭੇਦਨਸ੍ਸਾ’’ਤਿਆਦਿ. ਭੇਦਕਰਵਤ੍ਥੁਵਸੇਨ ਅਟ੍ਠਾਰਸਵਿਧਨ੍ਤਿ –

‘‘ਇਧੁਪਾਲਿ ਭਿਕ੍ਖੂ ਅਧਮ੍ਮਂ ‘ਧਮ੍ਮੋ’ਤਿ ਦੀਪੇਨ੍ਤਿ, ਧਮ੍ਮਂ ‘ਅਧਮ੍ਮੋ’ਤਿ ਦੀਪੇਨ੍ਤਿ. ਅਵਿਨਯਂ ‘ਵਿਨਯੋ’ਤਿ ਦੀਪੇਨ੍ਤਿ, ਵਿਨਯਂ ‘ਅਵਿਨਯੋ’ਤਿ ਦੀਪੇਨ੍ਤਿ. ਅਭਾਸਿਤਂ ਅਲਪਿਤਂ ਤਥਾਗਤੇਨ ‘ਭਾਸਿਤਂ ਲਪਿਤਂ ਤਥਾਗਤੇਨਾ’ਤਿ ਦੀਪੇਨ੍ਤਿ, ਭਾਸਿਤਂ ਲਪਿਤਂ ਤਥਾਗਤੇਨ ‘ਅਭਾਸਿਤਂ ਅਲਪਿਤਂ ਤਥਾਗਤੇਨਾ’ਤਿ ਦੀਪੇਨ੍ਤਿ. ਅਨਾਚਿਣ੍ਣਂ ਤਥਾਗਤੇਨ ‘ਆਚਿਣ੍ਣਂ ਤਥਾਗਤੇਨਾ’ਤਿ ਦੀਪੇਨ੍ਤਿ, ਆਚਿਣ੍ਣਂ ਤਥਾਗਤੇਨ ‘ਅਨਾਚਿਣ੍ਣਂ ਤਥਾਗਤੇਨਾ’ਤਿ ਦੀਪੇਨ੍ਤਿ. ਅਪਞ੍ਞਤ੍ਤਂ ਤਥਾਗਤੇਨ ‘ਪਞ੍ਞਤ੍ਤਂ ਤਥਾਗਤੇਨਾ’ਤਿ ਦੀਪੇਨ੍ਤਿ, ਪਞ੍ਞਤ੍ਤਂ ਤਥਾਗਤੇਨ ‘ਅਪਞ੍ਞਤ੍ਤਂ ਤਥਾਗਤੇਨਾ’ਤਿ ਦੀਪੇਨ੍ਤਿ. ਅਨਾਪਤ੍ਤਿਂ ‘ਆਪਤ੍ਤੀ’ਤਿ ਦੀਪੇਨ੍ਤਿ, ਆਪਤ੍ਤਿਂ ‘ਅਨਾਪਤ੍ਤੀ’ਤਿ ਦੀਪੇਨ੍ਤਿ. ਲਹੁਕਂ ਆਪਤ੍ਤਿਂ ‘ਗਰੁਕਾ ਆਪਤ੍ਤੀ’ਤਿ ਦੀਪੇਨ੍ਤਿ, ਗਰੁਕਂ ਆਪਤ੍ਤਿਂ ‘ਲਹੁਕਾ ਆਪਤ੍ਤੀ’ਤਿ ਦੀਪੇਨ੍ਤਿ. ਸਾਵਸੇਸਂ ਆਪਤ੍ਤਿਂ ‘ਅਨਵਸੇਸਾ ਆਪਤ੍ਤੀ’ਤਿ ਦੀਪੇਨ੍ਤਿ, ਅਨਵਸੇਸਂ ਆਪਤ੍ਤਿਂ ‘ਸਾਵਸੇਸਾ ਆਪਤ੍ਤੀ’ਤਿ ਦੀਪੇਨ੍ਤਿ. ਦੁਟ੍ਠੁਲ੍ਲਂ ਆਪਤ੍ਤਿਂ ‘ਅਦੁਟ੍ਠੁਲ੍ਲਾ ਆਪਤ੍ਤੀ’ਤਿ ਦੀਪੇਨ੍ਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ‘ਦੁਟ੍ਠੁਲ੍ਲਾ ਆਪਤ੍ਤੀ’ਤਿ ਦੀਪੇਨ੍ਤੀ’’ਤਿ (ਚੂਲ਼ਵ. ੩੫੨) –

ਏਵਂ ਕਮ੍ਮਕ੍ਖਨ੍ਧਕੇ ਵੁਤ੍ਤਾਨਂ ਅਟ੍ਠਾਰਸਨ੍ਨਂ ਭੇਦਕਰਣਾਨਂ ਵਸੇਨ ਅਟ੍ਠਾਰਸਵਿਧਂ. ਕਾਰਣਞ੍ਹਿ ਤਦਾਯਤ੍ਤਵੁਤ੍ਤਿਤਾਯ ਫਲਂ ਏਤ੍ਥ ਵਸਤੀਤਿ ‘‘ਵਤ੍ਥੂ’’ਤਿ ਵੁਚ੍ਚਤਿ. ਹੋਨ੍ਤਿ ਚੇਤ੍ਥ –

‘‘ਧਮ੍ਮਵਿਨਯਭਾਸਿਤਾ-ਚਿਣ੍ਣਪਞ੍ਞਤ੍ਤਿਕਾ ਦੁਕਾ;

ਆਪਤ੍ਤਿਲਹੁਦੁਟ੍ਠੁਲ੍ਲ-ਸਾਵਸੇਸਦੁਕਾਨਿ ਚ.

‘‘ਏਤਾਨਟ੍ਠਾਰਸ ‘ਭੇਦ-ਕਰਵਤ੍ਥੂ’ਤਿ ਵੁਚ੍ਚਰੇ;

ਵਿਪਲ੍ਲਾਸਗਹਿਤਾਨਿ, ਵਾਦਮੂਲੂਪਨਿਸ੍ਸਯਾ’’ਤਿ.

ਪਗ੍ਗਯ੍ਹਾਤਿ ਪਗ੍ਗਹਿਤਂ ਅਬ੍ਭੁਸ੍ਸਿਤਂ ਪਾਕਟਂ ਕਤ੍ਵਾ. ਤਿਟ੍ਠੇਯ੍ਯਾਤਿ ਯਥਾਸਮਾਦਿਨ੍ਨਂ, ਯਥਾਪਗ੍ਗਹਿਤਮੇਵ ਚ ਕਤ੍ਵਾ ਅਚ੍ਛੇਯ੍ਯ. ਯਸ੍ਮਾ ਪਨ ਏਵਂ ਪਗ੍ਗਣ੍ਹਤਾ, ਤਿਟ੍ਠਤਾ ਚ ਤਂ ਦੀਪਿਤਞ੍ਚੇਵ ਅਵਿਨਿਸ੍ਸਟ੍ਠਞ੍ਚ ਹੋਤਿ, ਤਸ੍ਮਾ ‘‘ਦੀਪੇਯ੍ਯ ਚੇਵ ਨਪ੍ਪਟਿਨਿਸ੍ਸਜ੍ਜੇਯ੍ਯ ਚਾ’’ਤਿ ਵੁਤ੍ਤਂ. ਕੀਵ ਦੂਰੇ ਸੁਤ੍ਵਾ ਗਨ੍ਤ੍ਵਾ ਅਵਦਨ੍ਤਾਨਂ ਦੁਕ੍ਕਟਨ੍ਤਿ ਆਹ ‘‘ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨਾ’’ਤਿਆਦਿ. ਪਿ-ਸਦ੍ਦੋ ਚੇਤ੍ਥ ਅਟ੍ਠਾਨਪ੍ਪਯੁਤ੍ਤੋ, ਤਸ੍ਸ ‘‘ਅਡ੍ਢਯੋਜਨਮਤ੍ਤ’’ਨ੍ਤਿ ਇਮਿਨਾ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ‘‘ਅਡ੍ਢਯੋਜਨਮਤ੍ਤ’’ਨ੍ਤਿ ਇਮਿਨਾ ਏਕਵਿਹਾਰੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦੀਪੇਤਿ. ‘‘ਗਨ੍ਤ੍ਵਾ’’ਤਿ ਇਮਿਨਾ ਦੂਤਂ ਵਾ ਪਣ੍ਣਂ ਵਾ ਪੇਸੇਤ੍ਵਾ ਵਦਤੋਪਿ ਆਪਤ੍ਤਿਮੋਕ੍ਖੋ ਨਤ੍ਥਿ, ਸਯਮੇਵ ਪਨ ਗਨ੍ਤ੍ਵਾ ‘‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ, ਮਾ ਸਙ੍ਘਭੇਦਾਯ ਪਰਕ੍ਕਮੀ’’ਤਿ (ਪਾਰਾ. ਅਟ੍ਠ. ੨.੪੧੧) ਨਿਵਾਰੇਤਬ੍ਬੋਤਿ ਦੀਪੇਤਿ.

ਸਮਾਗਚ੍ਛਤੂਤਿ ਏਕੀਭਵਤੁ. ਏਕੀਭਾਵੋ ਚ ਸਮਾਨਲਦ੍ਧਿਵਸੇਨ ਹੋਤੀਤਿ ਆਹ ‘‘ਏਕਲਦ੍ਧਿਕੋ ਹੋਤੂ’’ਤਿ. ਏਕਾ ਲਦ੍ਧਿ ਗਹਣਂ ਅਸ੍ਸਾਤਿ ਏਕਲਦ੍ਧਿਕੋ, ਏਕਦਿਟ੍ਠਿਕੋਤਿ ਅਤ੍ਥੋ. ਅਞ੍ਞਮਞ੍ਞਸਮ੍ਪਤ੍ਤਿਯਾਤਿ ਅਞ੍ਞਮਞ੍ਞਸ੍ਸ ਸਮਾਨਦਿਟ੍ਠਿਚਿਤ੍ਤਤਾਸਙ੍ਖਾਤਾਯ ਸਮ੍ਪਤ੍ਤਿਯਾ. ‘‘ਅਞ੍ਞਮਞ੍ਞਸ੍ਸ ਗੁਣਲਾਭਾਦਿਕਾਯ ਸਮ੍ਪਤ੍ਤਿਯਾ’’ਤਿ ਕੇਚਿ. ਅਸਮਗ੍ਗੋ ਹਿ ਵਿਸੁਂ ਪਾਤਿਮੋਕ੍ਖਂ ਉਦ੍ਦਿਸਤਿ, ਬਹਿਸੀਮਾਯਂ ਵਾ ਅਨੁਪਰਿਵੇਣਿਯਂ ਵਾਤਿ ਨ ਏਕੁਦ੍ਦੇਸੋ. ਤੇਨਾਹ ‘‘ਏਕਤੋ ਪਵਤ੍ਤਪਾਤਿਮੋਕ੍ਖੁਦ੍ਦੇਸੋਤਿ ਅਤ੍ਥੋ’’ਤਿ. ਅਪ੍ਪਟਿਨਿਸ੍ਸਜ੍ਜਤੋ ਦੁਕ੍ਕਟਨ੍ਤਿ ਵਿਸੁਂ ਵਿਸੁਂ ਵਦਨ੍ਤਾਨਂ ਗਣਨਾਯ ਦੁਕ੍ਕਟਂ. ਸਮਨੁਭਾਸਨਕਮ੍ਮਂ ਕਾਤਬ੍ਬਨ੍ਤਿ ਯਾਵਤਤਿਯਂ ਸਮਨੁਭਾਸਨਕਮ੍ਮਂ ਕਾਤਬ੍ਬਂ, ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਮਗ੍ਗਸ੍ਸ ਸਙ੍ਘਸ੍ਸ ਭੇਦਾਯ ਪਰਕ੍ਕਮਤੀ’’ਤਿਆਦਿਨਾ (ਪਾਰਾ. ੪੧੩) ਪਦਭਾਜਨੇ ਵੁਤ੍ਤਾਹਿ ਞਤ੍ਤਿਚਤੁਤ੍ਥਾਹਿ ਤੀਹਿ ਸਮਨੁਭਾਸਨਕਮ੍ਮਵਾਚਾਹਿ ਕਮ੍ਮਂ ਕਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ‘‘ਭੇਦਾਯ ਪਰਕ੍ਕਮੇਯ੍ਯਾ’’ਤਿ ਵਿਸੁਂ ਵੁਤ੍ਤਤ੍ਤਾ ਭੇਦਨਸਂਵਤ੍ਤਨਿਕਸ੍ਸ ਅਧਿਕਰਣਸ੍ਸ ਸਮਾਦਾਯ ਪਗ੍ਗਣ੍ਹਨਤੋ ਪੁਬ੍ਬੇਪਿ ਪਕ੍ਖਪਰਿਯੇਸਨਾਦਿਵਸੇਨ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਸਮਨੁਭਾਸਨਕਮ੍ਮਂ ਕਾਤਬ੍ਬਨ੍ਤਿ ਵੇਦਿਤਬ੍ਬਂ. ਪਟਿਨਿਸ੍ਸਜ੍ਜਨ੍ਤਸ੍ਸ ਅਨਾਪਤ੍ਤਿਭਾਵਤੋ ‘‘ਸੋਤ੍ਥਿਭਾਵੋ ਤਸ੍ਸ ਭਿਕ੍ਖੁਨੋ’’ਤਿ ਵੁਤ੍ਤਂ.

ਕਿਞ੍ਚਾਪਿ ਭਿਕ੍ਖੁਨੀ ਸਙ੍ਘਂ ਨ ਭਿਨ੍ਦਤਿ, ਅਪਿਚ ਖੋ ਭੇਦਾਯ ਪਰਕ੍ਕਮਤੀਤਿ ‘‘ਸਾਧਾਰਣਪਞ੍ਞਤ੍ਤੀ’’ਤਿ ਵੁਤ੍ਤਂ. ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤਸ੍ਸ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਚ ਪਟਿਪ੍ਪਸ੍ਸਮ੍ਭਨ੍ਤੀਤਿ ਆਹ ‘‘ਸਮਨੁਭਾਸਨਕਮ੍ਮੇ’’ਤਿਆਦਿ. ਤਞ੍ਚ ਦੁਕ੍ਕਟਂ ਤੇ ਚ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤੀਤਿ ਯਞ੍ਚ ਞਤ੍ਤਿਪਰਿਯੋਸਾਨੇ ਦੁਕ੍ਕਟਂ ਆਪਨ੍ਨੋ, ਯੇ ਚ ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯੇ, ਤਾ ਤਿਸ੍ਸੋਪਿ ਆਪਤ੍ਤਿਯੋ ਲਿਙ੍ਗਪਰਿਵਤ੍ਤੇਨ ਅਸਾਧਾਰਣਾਪਤ੍ਤਿਯੋ ਵਿਯ ਪਟਿਪ੍ਪਸ੍ਸਮ੍ਭਨ੍ਤਿ. ਸਚੇ ਪਨਸ੍ਸ ਞਤ੍ਤਿਪਰਿਯੋਸਾਨੇ ਲਜ੍ਜਿਧਮ੍ਮੋ ਓਕ੍ਕਮਤਿ, ਸਂਵਰੋ ਉਪ੍ਪਜ੍ਜਤਿ, ਤਂ ਪਟਿਨਿਸ੍ਸਜ੍ਜਤਿ, ਞਤ੍ਤਿਯਾ ਦੁਕ੍ਕਟਂ ਦੇਸੇਤ੍ਵਾ ਮੁਚ੍ਚਤਿ. ਅਥ ਤਂ ਨ ਪਟਿਨਿਸ੍ਸਜ੍ਜਤਿ, ਭੇਦਾਯ ਪਰਕ੍ਕਮਤਿ ਚੇਵ ਭੇਦਨਸਂਵਤ੍ਤਨਿਕਂ ਅਧਿਕਰਣਂ ਸਮਾਦਾਯ ਪਗ੍ਗਯ੍ਹ ਤਿਟ੍ਠਤਿ ਚ, ਞਤ੍ਤਿਦੁਕ੍ਕਟਂ ਪਟਿਪ੍ਪਸ੍ਸਮ੍ਭਤਿ, ਪਠਮਕਮ੍ਮਵਾਚਾਯ ਥੁਲ੍ਲਚ੍ਚਯੇ ਪਤਿਟ੍ਠਾਤਿ. ਏਸ ਨਯੋ ਇਤਰਕਮ੍ਮਵਾਚਾਯਮ੍ਪਿ. ਅਸਮਨੁਭਾਸਿਯਮਾਨਸ੍ਸ ਅਪ੍ਪਟਿਨਿਸ੍ਸਜ੍ਜਨ੍ਤਸ੍ਸਾਪਿ ਸਙ੍ਘਾਦਿਸੇਸੇਨ ਅਨਾਪਤ੍ਤਿ. ਪਟਿਨਿਸ੍ਸਜ੍ਜਨ੍ਤਸ੍ਸਾਪਿ ਞਤ੍ਤਿਤੋ ਪੁਬ੍ਬੇ ਵਾ ਞਤ੍ਤਿਕ੍ਖਣੇ ਵਾ ਞਤ੍ਤਿਪਰਿਯੋਸਾਨੇ ਵਾ ਪਠਮਾਯ ਵਾ ਅਨੁਸ੍ਸਾਵਨਾਯ ਦੁਤਿਯਾਯ ਵਾ ਤਤਿਯਾਯ ਵਾ ਯਾਵ ਯ੍ਯ-ਕਾਰਂ ਨ ਸਮ੍ਪਾਪੁਣਾਤਿ, ਤਾਵ ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੇਨ ਅਨਾਪਤ੍ਤਿ. ਤੇਨਾਹ ‘‘ਅਸਮਨੁਭਾਸਿਯਮਾਨਸ੍ਸ ਚਾ’’ਤਿਆਦਿ.

ਏਤ੍ਥ ਪਨ (ਪਾਰਾ. ਅਟ੍ਠ. ੨.੪੧੬) ‘‘ਦੇਵਦਤ੍ਤੋ ਸਮਗ੍ਗਸ੍ਸ ਸਙ੍ਘਸ੍ਸ ਭੇਦਾਯ ਪਰਕ੍ਕਮਿ, ਤਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ (ਪਰਿ. ੧੭) ਪਰਿਵਾਰੇ ਆਗਤਤ੍ਤਾ ਦੇਵਦਤ੍ਤੋ ਆਦਿਕਮ੍ਮਿਕੋ, ਸੋ ਚ ਖੋ ਸਙ੍ਘਭੇਦਾਯ ਪਰਕ੍ਕਮਨਸ੍ਸੇਵ, ਨ ਅਪ੍ਪਟਿਨਿਸ੍ਸਜ੍ਜਨਸ੍ਸ. ਨ ਹਿ ਤਸ੍ਸ ਤਂ ਕਮ੍ਮਂ ਕਤਂ. ਕਥਮਿਦਂ ਜਾਨਿਤਬ੍ਬਨ੍ਤਿ ਚੇ? ਸੁਤ੍ਤਤੋ. ਤਥਾ ਹਿ ‘‘ਅਰਿਟ੍ਠੋ ਭਿਕ੍ਖੁ ਗਦ੍ਧਬਾਧਿਪੁਬ੍ਬੋ ਪਾਪਿਕਾਯ ਦਿਟ੍ਠਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਿ, ਤਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ ਪਰਿਵਾਰੇ ਆਗਤਤ੍ਤਾ ਅਰਿਟ੍ਠਸ੍ਸ ਕਮ੍ਮਂ ਕਤਨ੍ਤਿ ਪਞ੍ਞਾਯਤਿ, ਨ ਤਥਾ ਦੇਵਦਤ੍ਤਸ੍ਸ. ਅਥਾਪਿਸ੍ਸ ਕਤੇਨ ਭਵਿਤਬ੍ਬਨ੍ਤਿ ਕੋਚਿ ਅਤ੍ਤਨੋ ਰੁਚਿਮਤ੍ਤੇਨ ਵਦੇਯ੍ਯ, ਤਥਾਪਿ ਅਪ੍ਪਟਿਨਿਸ੍ਸਜ੍ਜਨੇ ਆਦਿਕਮ੍ਮਿਕਸ੍ਸ ਅਨਾਪਤ੍ਤਿ ਨਾਮ ਨਤ੍ਥਿ. ਨ ਹਿ ਪਞ੍ਞਤ੍ਤਂ ਸਿਕ੍ਖਾਪਦਂ ਵੀਤਿਕ੍ਕਮਨ੍ਤਸ੍ਸ ਅਞ੍ਞਤ੍ਰ ਓਦਿਸ੍ਸ ਅਨੁਞ੍ਞਾਤਤੋ ਅਨਾਪਤ੍ਤਿ ਨਾਮ ਦਿਸ੍ਸਤਿ. ਯਮ੍ਪਿ ਅਰਿਟ੍ਠਸਿਕ੍ਖਾਪਦਸ੍ਸ ਪਦਭਾਜਨੇ ਅਨਾਪਤ੍ਤਿਯਂ ‘‘ਆਦਿਕਮ੍ਮਿਕਸ੍ਸਾ’’ਤਿ ਪੋਤ੍ਥਕੇਸੁ ਲਿਖਿਤਂ, ਤਂ ਪਮਾਦਲਿਖਿਤਂ, ਪਮਾਦਲਿਖਿਤਭਾਵੋ ਚ ਤਸ੍ਸ ‘‘ਪਠਮਂ ਅਰਿਟ੍ਠੋ ਭਿਕ੍ਖੁ ਚੋਦੇਤਬ੍ਬੋ, ਚੋਦੇਤ੍ਵਾ ਸਾਰੇਤਬ੍ਬੋ, ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤਬ੍ਬੋ’’ਤਿ (ਚੂਲ਼ਵ. ੬੫) ਏਵਂ ਕਮ੍ਮਕ੍ਖਨ੍ਧਕੇ ਆਪਤ੍ਤਿਰੋਪਨਤੋ ਵੇਦਿਤਬ੍ਬੋ.

ਇਧ ਭੇਦਾਯ ਪਰਕ੍ਕਮਨੇ ਆਦਿਕਮ੍ਮਿਕਸ੍ਸ ਦੇਵਦਤ੍ਤਸ੍ਸ ਯਸ੍ਮਾ ਤਂ ਕਮ੍ਮਂ ਨ ਕਤਂ (ਪਾਰਾ. ਅਟ੍ਠ. ੨.੪੧੬), ਤਸ੍ਮਾਸ੍ਸ ਆਪਤ੍ਤਿਯੇਵ ਨ ਜਾਤਾ. ਸਿਕ੍ਖਾਪਦਂ ਪਨ ਤਂ ਆਰਬ੍ਭ ਪਞ੍ਞਤ੍ਤਨ੍ਤਿ ਕਤ੍ਵਾ ‘‘ਆਦਿਕਮ੍ਮਿਕੋ’’ਤਿ ਵੁਤ੍ਤੋ. ਇਤਿ ਆਪਤ੍ਤਿਯਾ ਅਭਾਵਤੋਯੇਵਸ੍ਸ ਅਨਾਪਤ੍ਤਿ ਵੁਤ੍ਤਾ. ਸਾ ਪਨੇਸਾ ਕਿਞ੍ਚਾਪਿ ‘‘ਅਸਮਨੁਭਾਸਿਯਮਾਨਸ੍ਸਾ’’ਤਿ ਇਮਿਨਾਵ ਸਿਦ੍ਧਾ. ਯਸ੍ਮਾ ਪਨ ਅਸਮਨੁਭਾਸਿਯਮਾਨੋ ਨਾਮ ਯਸ੍ਸ ਕੇਵਲਂ ਸਮਨੁਭਾਸਨਂ ਨ ਕਰੋਨ੍ਤਿ, ਸੋ ਵੁਚ੍ਚਤਿ, ਨ ਆਦਿਕਮ੍ਮਿਕੋ. ਅਯਞ੍ਚ ਦੇਵਦਤ੍ਤੋ ਆਦਿਕਮ੍ਮਿਕੋਯੇਵ. ਤਸ੍ਮਾ ‘‘ਆਦਿਕਮ੍ਮਿਕਸ੍ਸਾ’’ਤਿ (ਪਾਰਾ. ੪੧੬) ਵੁਤ੍ਤਂ. ਏਤੇਨੇਵ ਉਪਾਯੇਨ ਠਪੇਤ੍ਵਾ ਅਰਿਟ੍ਠਸਿਕ੍ਖਾਪਦਂ ਸਬ੍ਬਸਮਨੁਭਾਸਨਾਸੁ ਵਿਨਿਚ੍ਛਯੋ ਵੇਦਿਤਬ੍ਬੋ. ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਨਤੋ ਸਮਨੁਭਾਸਨਸਮੁਟ੍ਠਾਨਂ. ‘‘ਪਟਿਨਿਸ੍ਸਜ੍ਜਾਮੀ’’ਤਿ ਕਾਯਵਿਕਾਰਂ ਵਾ ਵਚੀਭੇਦਂ ਵਾ ਅਕਰੋਨ੍ਤਸ੍ਸੇਵ ਪਨ ਆਪਜ੍ਜਨਤੋ ਅਕਿਰਿਯਂ. ‘‘ਨਪ੍ਪਟਿਨਿਸ੍ਸਜ੍ਜਾਮੀ’’ਤਿ ਸਞ੍ਞਾਯ ਅਭਾਵੇਨ ਮੁਚ੍ਚਨਤੋ ਸਞ੍ਞਾਵਿਮੋਕ੍ਖਂ. ‘‘ਨਪ੍ਪਟਿਨਿਸ੍ਸਜ੍ਜਾਮੀ’’ਤਿ ਜਾਨਨਚਿਤ੍ਤੇਨੇਵ ਸਚਿਤ੍ਤਕਂ.

ਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.