੧. ਲਸੁਣਵਗ੍ਗੋ

੧. ਲਸੁਣਸਿਕ੍ਖਾਪਦਵਣ੍ਣਨਾ

‘‘ਲਸੁਣ’’ਨ੍ਤਿ ਕਿਞ੍ਚਾਪਿ ਅਵਿਸੇਸੇਨ ਵੁਤ੍ਤਂ, ਤਥਾਪਿ ਮਗਧੇਸੁ ਜਾਤਂ ਲਸੁਣਮੇਵ ਇਧਾਧਿਪ੍ਪੇਤਂ, ਤਮ੍ਪਿ ਭਣ੍ਡਿਕਲਸੁਣਮੇਵਾਤਿ ਆਹ ਮਗਧਰਟ੍ਠੇ ਜਾਤ’’ਨ੍ਤਿਆਦਿ.

ਭਣ੍ਡਿਕਲਸੁਣਨ੍ਤਿ ਪੋਟ੍ਟਲਿਕਲਸੁਣਮੇਵ, ਸਮ੍ਪੁਣ੍ਣਮਿਞ੍ਜਾਨਮੇਤਂ ਅਧਿਵਚਨਂ. ਤੇਨਾਹ ‘‘ਨ ਏਕਦ੍ਵਿਤਿਮਿਞ੍ਜਕ’’ਨ੍ਤਿ. ਅਜ੍ਝੋਹਾਰੇ ਅਜ੍ਝੋਹਾਰੇਤਿ (ਪਾਚਿ. ਅਟ੍ਠ. ੭੯੫) ਏਤ੍ਥ ਸਚੇ ਦ੍ਵੇ ਤਯੋ ਭਣ੍ਡਿਕੇ ਏਕਤੋਯੇਵ ਸਙ੍ਖਾਦਿਤ੍ਵਾ ਅਜ੍ਝੋਹਰਤਿ, ਏਕਂ ਪਾਚਿਤ੍ਤਿਯਂ. ਭਞ੍ਜਿਤ੍ਵਾ ਏਕੇਕਮਿਞ੍ਜਕਂ ਖਾਦਨ੍ਤਿਯਾ ਪਨ ਪਯੋਗਗਣਨਾਯ ਪਾਚਿਤ੍ਤਿਯਾਨਿ.

ਪਲਣ੍ਡੁਕਾਦੀਨਂ ਵਣ੍ਣੇਨ ਵਾ ਮਿਞ੍ਜਾਯ ਵਾ ਨਾਨਾਤ੍ਤਂ ਵੇਦਿਤਬ੍ਬਂ – ਵਣ੍ਣੇਨ ਤਾਵ ਪਲਣ੍ਡੁਕੋ ਨਾਮ ਪਣ੍ਡੁਵਣ੍ਣੋ ਹੋਤਿ, ਭਞ੍ਜਨਕੋ ਲੋਹਿਤਵਣ੍ਣੋ, ਹਰਿਤਕੋ ਹਰਿਤਪਣ੍ਣਵਣ੍ਣੋ. ਮਿਞ੍ਜਾਯ ਪਨ ਪਲਣ੍ਡੁਕਸ੍ਸ ਏਕਾ ਮਿਞ੍ਜਾ ਹੋਤਿ, ਭਞ੍ਜਨਕਸ੍ਸ ਦ੍ਵੇ, ਹਰਿਤਕਸ੍ਸ ਤਿਸ੍ਸੋ. ਚਾਪਲਸੁਣੋ ਅਮਿਞ੍ਜਕੋ. ਅਙ੍ਕੁਰਮਤ੍ਤਮੇਵ ਹਿ ਤਸ੍ਸ ਹੋਤਿ. ਮਹਾਪਚ੍ਚਰਿਯਾਦੀਸੁ ਪਨ ‘‘ਪਲਣ੍ਡੁਕਸ੍ਸ ਤੀਣਿ ਮਿਞ੍ਜਾਨਿ, ਭਞ੍ਜਨਕਸ੍ਸ ਦ੍ਵੇ, ਹਰਿਤਕਸ੍ਸ ਏਕ’’ਨ੍ਤਿ (ਪਾਚਿ. ਅਟ੍ਠ. ੭੯੭) ਵੁਤ੍ਤਂ. ਏਤੇ ਪਲਣ੍ਡੁਕਾਦਯੋ ਸਭਾਵੇਨੇਵ ਵਟ੍ਟਨ੍ਤਿ. ਸੂਪਸਮ੍ਪਾਕਾਦੀਸੁ ਪਨ ਮਾਗਧਕਮ੍ਪਿ ਵਟ੍ਟਤਿ. ਤਞ੍ਹਿ ਪਚ੍ਚਮਾਨੇਸੁ ਮੁਗ੍ਗਸੂਪਾਦੀਸੁ ਵਾ ਮਚ੍ਛਮਂਸਵਿਕਤਿਯਾ ਵਾ ਤੇਲੇ ਵਾ ਬਦਰਸਾਲ਼ਵਾਦੀਸੁ ਵਾ ਅਮ੍ਬਿਲਸਾਕਾਦੀਸੁ ਵਾ ਉਤ੍ਤਰਿਭਙ੍ਗੇਸੁ ਵਾ ਯਤ੍ਥ ਕਤ੍ਥਚਿ ਅਨ੍ਤਮਸੋ ਯਾਗੁਭਤ੍ਤੇਪਿ ਪਕ੍ਖਿਤ੍ਤਂ ਵਟ੍ਟਤਿ. ਬਦਰਸਾਲ਼ਵਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੭੯੩-੭੯੭) ਨਾਮ ਬਦਰਫਲਾਨਿ ਸੁਕ੍ਖਾਪੇਤ੍ਵਾ ਚੁਣ੍ਣੇਤ੍ਵਾ ਕਤ੍ਤਬ੍ਬਾ ਖਾਦਨੀਯਵਿਕਤਿ.

ਲਸੁਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ

‘‘ਪਟਿਚ੍ਛਨ੍ਨੋਕਾਸੇ’’ਤਿ ਏਤਸ੍ਸ ਵਿਭਾਗਦਸ੍ਸਨਤ੍ਥਂ ‘‘ਉਪਕਚ੍ਛਕੇਸੁ ਚ ਮੁਤ੍ਤਕਰਣੇ ਚਾਤਿ ਅਤ੍ਥੋ’’ਤਿ ਵੁਤ੍ਤਂ.

ਆਬਾਧਪਚ੍ਚਯਾਤਿ ਕਣ੍ਡੁਕਚ੍ਛੁਆਦਿਆਬਾਧਪਚ੍ਚਯਾ ਸਂਹਰਾਪੇਨ੍ਤਿਯਾ ਅਨਾਪਤ੍ਤਿ. ‘‘ਭਿਕ੍ਖੁਸ੍ਸ ਏਤ੍ਥ ਚ ਲਸੁਣੇ ਚ ਦੁਕ੍ਕਟ’’ਨ੍ਤਿ (ਵਜਿਰ. ਟੀ. ਪਾਚਿਤ੍ਤਿਯ ੮੦੦) ਪੋਰਾਣਾ.

ਸਮ੍ਬਾਧਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਲਘਾਤਕਸਿਕ੍ਖਾਪਦਵਣ੍ਣਨਾ

ਤਲਘਾਤਕੇਤਿ ਮਤ੍ਥਕੇ ਪਹਾਰਦਾਨੇ, ਤਞ੍ਚ ਖੋ ਤਲਂ ‘‘ਮੁਤ੍ਤਕਰਣੇ ਪਹਾਰਂ ਦੇਤੀ’’ਤਿ (ਪਾਚਿ. ੮੦੪) ਪਦਭਾਜਨਿਯਂਵੁਤ੍ਤਤ੍ਤਾ ‘‘ਮੁਤ੍ਤਕਰਣਸ੍ਸਾ’’ਤਿ ਵਿਞ੍ਞਾਯਤੀਤਿ ਆਹ ‘‘ਮੁਤ੍ਤਕਰਣਸ੍ਸ ਤਲਘਾਤਨੇ’’ਤਿ. ਪੁਰਿਮਨਯੇਨੇਵ ਸਾਣਤ੍ਤਿਕਨ੍ਤਿ ਅਤ੍ਤਨੋ ਅਤ੍ਥਾਯ ਅਞ੍ਞਂ ਆਣਾਪੇਨ੍ਤਿਯਾ ਸਾਣਤ੍ਤਿਕਂ.

ਤਲਘਾਤਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ

ਵਤ੍ਥੁਵਸੇਨੇਤਂ ਵੁਤ੍ਤਨ੍ਤਿ ‘‘ਜਤੁਮਟ੍ਠਕੇ’’ਤਿ ਏਤਂ ਨਿਦਾਨਵਸੇਨ ਉਪ੍ਪਨ੍ਨਸ੍ਸ ਵਤ੍ਥੁਨੋ ਵਸੇਨੇਵ ਵੁਤ੍ਤਂ. ਯਂ ਕਿਞ੍ਚਿ ਪਨ ਦਣ੍ਡਕਂ ਪਵੇਸੇਨ੍ਤਿਯਾ ਆਪਤ੍ਤਿਯੇਵ. ਤੇਨਾਹ ‘‘ਕਾਮਰਾਗੇਨ ਪਨਾ’’ਤਿਆਦਿ.

ਜਤੁਮਟ੍ਠਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ

ਆਦਾਤਬ੍ਬਨ੍ਤਿ ਪਵੇਸੇਤਬ੍ਬਂ. ਅਗ੍ਗਪਬ੍ਬਨ੍ਤਿ ਕੇਸਗ੍ਗਮਤ੍ਤਮ੍ਪਿ ਅਗ੍ਗਪਬ੍ਬਂ. ਤਤਿਯਂ ਪਬ੍ਬਂ ਪਵੇਸੇਤੀਤਿ ਕੇਸਗ੍ਗਮਤ੍ਤਮ੍ਪਿ ਤਤਿਯਂ ਪਬ੍ਬਂ ਪਵੇਸੇਤਿ. ਵੁਤ੍ਤਞ੍ਹੇਤਂ ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੮੧੨) ‘‘ਗਮ੍ਭੀਰਤੋ ਦ੍ਵਿਨ੍ਨਂ ਪਬ੍ਬਾਨਂ ਉਪਰਿ ਕੇਸਗ੍ਗਮਤ੍ਤਮ੍ਪਿ ਪਵੇਸੇਨ੍ਤਿਯਾ ਪਾਚਿਤ੍ਤਿਯ’’ਨ੍ਤਿ.

ਅਤਿਗਮ੍ਭੀਰਂ ਉਦਕਸੁਦ੍ਧਿਕਂ ਆਦਿਯਨਵਤ੍ਥੁਸ੍ਮਿਨ੍ਤਿ ਅਤਿਅਨ੍ਤੋ ਪਵੇਸੇਤ੍ਵਾ ਉਦਕਧੋਵਨਕਰਣਵਤ੍ਥੁਸ੍ਮਿਂ. ਉਦਕਸੁਦ੍ਧਿਪਚ੍ਚਯੇਨ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੮੧੨) ਪਨ ਸਤਿਪਿ ਫਸ੍ਸਸ੍ਸਾਦਿਯਨੇ ਯਥਾਵੁਤ੍ਤਪਰਿਚ੍ਛੇਦੇ ਅਨਾਪਤ੍ਤਿ.

ਉਦਕਸੁਦ੍ਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ

ਤਕ੍ਕਾਦੀਸੁ ਵਾ ਅਞ੍ਞਤਰੇਨਾਤਿ ਤਕ੍ਕਦਧਿਮਤ੍ਥੁਰਸਖੀਰਾਦੀਸੁ ਅਞ੍ਞਤਰੇਨ. ਯਾਯ ਕਾਯਚਿ ਬੀਜਨਿਯਾਤਿ ਅਨ੍ਤਮਸੋ ਚੀਵਰਕਣ੍ਣਂ ਉਪਾਦਾਯ ਯਾਯ ਕਾਯਚਿ ਬੀਜਨਿਯਾ.

ਇਮਂ ਪਿਵਥਾਤਿ ਇਮਂ ਪਾਨੀਯਂ ਵਾ ਸੂਪਾਦਿਂ ਵਾ ਪਿਵਥ. ਇਮਿਨਾ ਬੀਜਥਾਤਿ ਇਮਿਨਾ ਤਾਲਵਣ੍ਟੇਨ ਬੀਜਥ. ਦਾਪੇਨ੍ਤਿਯਾਤਿ ਅਞ੍ਞੇਨ ਉਭਯਮ੍ਪਿ ਦਾਪੇਨ੍ਤਿਯਾ.

ਉਪਤਿਟ੍ਠਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ

ਤਸ੍ਮਾਤਿ ਯਸ੍ਮਾ ਵਿਞ੍ਞਤ੍ਤਿ ਚੇਵ ਭੋਜਨਞ੍ਚ ਪਮਾਣਂ, ਤਸ੍ਮਾ. ਨ ਕੇਵਲਞ੍ਚੇਤ੍ਥ ਪਟਿਗ੍ਗਹਣੇਯੇਵ ਦੁਕ੍ਕਟਂ ਹੋਤਿ, ਪਟਿਗ੍ਗਣ੍ਹਿਤ੍ਵਾ ਪਨ ਅਰਞ੍ਞਤੋ ਆਹਰਣੇਪਿ ਸੁਕ੍ਖਾਪਨੇਪਿ ਵਦ੍ਦਲਿਦਿਵਸੇ ਭਜ੍ਜਨਤ੍ਥਾਯ ਉਦ੍ਧਨਸਜ੍ਜਨੇਪਿ ਕਪਲ੍ਲਸਜ੍ਜਨੇਪਿ ਦਬ੍ਬਿਸਜ੍ਜਨੇਪਿ ਦਾਰੂਨਿ ਆਦਾਯ ਅਗ੍ਗਿਕਰਣੇਪਿ ਕਪਲ੍ਲਮ੍ਹਿ ਧਞ੍ਞਪਕ੍ਖਿਪਨੇਪਿ ਦਬ੍ਬਿਯਾ ਸਙ੍ਘਟ੍ਟਨੇਸੁਪਿ ਕੋਟ੍ਟਨਤ੍ਥਂ ਉਦੁਕ੍ਖਲਮੁਸਲਾਦਿਸਜ੍ਜਨੇਸੁਪਿ ਕੋਟ੍ਟਨਪਪ੍ਫੋਟਨਧੋਵਨਾਦੀਸੁਪਿ ਯਾਵ ਮੁਖੇ ਠਪੇਤ੍ਵਾ ਅਜ੍ਝੋਹਰਣਤ੍ਥਂ ਦਨ੍ਤੇਹਿ ਸਙ੍ਖਾਦਤਿ, ਤਾਵ ਸਬ੍ਬਪ੍ਪਯੋਗੇਸੁ ਦੁਕ੍ਕਟਾਨੀਤਿ ਆਹ ‘‘ਪਟਿਗ੍ਗਹਣਤੋ ਪਟ੍ਠਾਯ ਯਾਵ ਦਨ੍ਤੇਹਿ ਸਂਖਾਦਨਂ, ਤਾਵ ਪੁਬ੍ਬਪ੍ਪਯੋਗੇਸੁ ਦੁਕ੍ਕਟਾਨੀ’’ਤਿ.

ਆਮਕਧਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ

ਤਿਰੋਕੁਟ੍ਟੇਤਿ ਘਰਕੁਟ੍ਟਸ੍ਸ ਪਰਭਾਗੇ. ਤਿਰੋਪਾਕਾਰੇਤਿ ਪਰਿਕ੍ਖੇਪਪਾਕਾਰਸ੍ਸ ਤਿਰੋਭਾਗੇ, ਤੇ ਚ ਖੋ ਕੁਟ੍ਟਪਾਕਾਰਾ ਇਟ੍ਠਕਸਿਲਦਾਰੂਨਂ ਵਸੇਨ ਤਿਪ੍ਪਕਾਰਾਤਿ ਆਹ ‘‘ਯਸ੍ਸ ਕਸ੍ਸਚਿ ਕੁਟ੍ਟਸ੍ਸ ਵਾ ਪਾਕਾਰਸ੍ਸ ਵਾ ਪਰਤੋ’’ਤਿ. ਸਬ੍ਬਾਨਿਪੇਤਾਨਿ ਏਕਤੋ ਛਡ੍ਡੇਨ੍ਤਿਯਾਤਿ ਏਤਾਨਿ ਚਤ੍ਤਾਰਿਪਿ ਵਤ੍ਥੂਨਿ ਏਕਤੋ ਛਡ੍ਡੇਨ੍ਤਿਯਾ. ਪਾਟੇਕ੍ਕਂ ਪਨ ਛਡ੍ਡੇਨ੍ਤਿਯਾ ਵਤ੍ਥੁਗਣਨਾਯ ਆਪਤ੍ਤਿਯੋ. ਆਣਤ੍ਤਿਯਮ੍ਪਿ ਏਸੇਵ ਨਯੋ.

ਭਿਕ੍ਖੁਸ੍ਸ ਦੁਕ੍ਕਟਨ੍ਤਿ ਭਿਕ੍ਖੁਸ੍ਸ ਸਬ੍ਬਤ੍ਥ ਦੁਕ੍ਕਟਂ.

ਪਠਮਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ

ਭਿਕ੍ਖੁਨਿਯਾਪੀਤਿ ਪਿ-ਸਦ੍ਦੇਨ ਭਿਕ੍ਖੁਂ ਸਮੁਚ੍ਚਿਨੋਤਿ. ਅਨਿਕ੍ਖਿਤ੍ਤਬੀਜੇਸੁ (ਪਾਚਿ. ਅਟ੍ਠ. ੮੩੦) ਪਨ ਖੇਤ੍ਤੇਸੁ ਕੋਣਾਦੀਸੁ ਵਾ ਅਸਞ੍ਜਾਤਰੋਪਿਮੇਸੁ ਖੇਤ੍ਤਮਰਿਯਾਦਾਦੀਸੁ ਵਾ ਛਡ੍ਡੇਤੁਂ ਵਟ੍ਟਤਿ. ਮਨੁਸ੍ਸਾਨਂ ਕਚਵਰਛਡ੍ਡਨਟ੍ਠਾਨੇਪਿ ਵਟ੍ਟਤਿਯੇਵ. ਛਡ੍ਡਿਤਖੇਤ੍ਤੇਤਿ ਮਨੁਸ੍ਸੇਸੁ ਸਸ੍ਸਂ ਉਦ੍ਧਰਿਤ੍ਵਾ ਗਤੇਸੁ ਛਡ੍ਡਿਤਖੇਤ੍ਤਂ ਨਾਮ ਹੋਤਿ, ਤਤ੍ਥ ਵਟ੍ਟਤਿ. ਯਤ੍ਥ ਪਨ ‘‘ਲਾਯਿਤਮ੍ਪਿ ਪੁਬ੍ਬਣ੍ਣਾਦਿ ਪੁਨ ਉਟ੍ਠਹਿਸ੍ਸਤੀ’’ਤਿ ਰਕ੍ਖਨ੍ਤਿ, ਤਤ੍ਥ ਯਥਾਵਤ੍ਥੁਕਮੇਵ. ਸਾਮਿਕੇ ਅਪਲੋਕੇਤ੍ਵਾਤਿ ਏਤ੍ਥ ਖੇਤ੍ਤਪਾਲਕਾ, ਆਰਾਮਾਦਿਗੋਪਕਾ ਚ ਸਾਮਿਕਾਵ. ਇਮਿਨਾ ਚ ਸਙ੍ਘਸਨ੍ਤਕੇ ਭਿਕ੍ਖੁਸ੍ਸ ਛਡ੍ਡੇਤੁਂ ਵਟ੍ਟਤਿ ਸਙ੍ਘਪਰਿਯਾਪਨ੍ਨਤ੍ਤਾ, ਨ ਭਿਕ੍ਖੁਨੀਨਂ. ਭਿਕ੍ਖੁਨੀਨਂ ਪਨ ਅਤ੍ਤਨੋ ਸਨ੍ਤਕੇ ਭਿਕ੍ਖੁਸਨ੍ਤਕੇ ਵੁਤ੍ਤਨਯੇਨੇਵ ਵਟ੍ਟਤੀਤਿ ਦਸ੍ਸੇਤਿ, ਏਵਂ ਸਨ੍ਤੇਪਿ ਸਾਰੁਪ੍ਪਵਸੇਨ ਕਾਤਬ੍ਬਂ.

ਦੁਤਿਯਉਚ੍ਚਾਰਛਡ੍ਡਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ

ਨਚ੍ਚਨ੍ਤਿ ਨਟਾਦਯੋ ਵਾ ਨਚ੍ਚਨ੍ਤੁ, ਸੋਣ੍ਡਾ ਵਾ ਅਨ੍ਤਮਸੋ ਮੋਰਸੁਵਮਕ੍ਕਟਾਦਯੋਪਿ, ਸਬ੍ਬਮੇਤਂ ਨਚ੍ਚਮੇਵ. ਤੇਨਾਹ ‘‘ਨਚ੍ਚਨ੍ਤਿ ਅਨ੍ਤਮਸੋ ਮੋਰਨਚ੍ਚਮ੍ਪੀ’’ਤਿ. ਗੀਤਨ੍ਤਿ ਨਟਾਦੀਨਂ ਵਾ ਗੀਤਂ ਹੋਤੁ, ਅਰਿਯਾਨਂ ਪਰਿਨਿਬ੍ਬਾਨਕਾਲੇ ਰਤਨਤ੍ਤਯਗੁਣੂਪਸਂਹਿਤਂ ਸਾਧੁਕੀਲ਼ਿਤਗੀਤਂ ਵਾ, ਅਨ੍ਤਮਸੋ ‘‘ਦਨ੍ਤਗੀਤਮ੍ਪਿ ਗਾਯਿਸ੍ਸਾਮਾ’’ਤਿ ਪੁਬ੍ਬਭਾਗੇ ਓਕੂਜਨ੍ਤਾ ਕਰੋਨ੍ਤਿ, ਸਬ੍ਬਮੇਤਂ ਗੀਤਮੇਵ. ਤੇਨਾਹ ‘‘ਗੀਤਨ੍ਤਿ ਅਨ੍ਤਮਸੋ ਧਮ੍ਮਭਾਣਕਗੀਤਮ੍ਪੀ’’ਤਿ. ਤਤ੍ਥ ਧਮ੍ਮਭਾਣਕਗੀਤਂ ਨਾਮ ਅਸਞ੍ਞਤਭਿਕ੍ਖੂਨਂ ਤਂ ਤਂ ਵਤ੍ਤਂ ਭਿਨ੍ਦਿਤ੍ਵਾ ਅਤਿਦੀਘਂ ਕਤ੍ਵਾ ਗੀਤਸ੍ਸਰੇਨ ਧਮ੍ਮਭਣਨਂ, ਤਮ੍ਪਿ ਨੇਵ ਭਿਕ੍ਖੁਨੋ, ਨ ਭਿਕ੍ਖੁਨੀਨਂ ਵਟ੍ਟਤਿ. ਤਥਾ ਹਿ ਵੁਤ੍ਤਂ ਪਰਮਤ੍ਥਜੋਤਿਕਾਯ ਖੁਦ੍ਦਕਟ੍ਠਕਥਾਯ (ਖੁ. ਪਾ. ਅਟ੍ਠ. ੨.ਪਚ੍ਛਿਮਪਞ੍ਚਸਿਕ੍ਖਾਪਦਵਣ੍ਣਨਾ) ‘‘ਧਮ੍ਮੂਪਸਂਹਿਤਂ ਗੀਤਂ ਵਟ੍ਟਤਿ, ਗੀਤੂਪਸਂਹਿਤੋ ਪਨ ਧਮ੍ਮੋ ਨ ਵਟ੍ਟਤੀ’’ਤਿ. ਤਸ੍ਮਾ ਧਮ੍ਮਂ ਭਣਨ੍ਤੇਨ ਜਾਤਕਵਤ੍ਤਾਦਿਂ ਤਂ ਤਂ ਵਤ੍ਤਂ ਅਵਿਨਾਸੇਤ੍ਵਾ ਚਤੁਰਸ੍ਸੇਨ (ਚੂਲ਼ਵ. ਅਟ੍ਠ. ੨੪੯) ਵਤ੍ਤੇਨ ਪਰਿਮਣ੍ਡਲਾਨਿ ਪਦਬ੍ਯਞ੍ਜਨਾਨਿ ਦਸ੍ਸੇਤਬ੍ਬਾਨਿ. ਵਾਦਿਤਨ੍ਤਿ ਤਨ੍ਤਿਬਦ੍ਧਾਦਿਵਾਦਨੀਯਭਣ੍ਡਵਾਦਿਤਂ ਵਾ ਹੋਤੁ, ਕੁਟਭੇਰਿਵਾਦਿਤਂ ਵਾ ਅਨ੍ਤਮਸੋ ਉਦਕਭੇਰਿਵਾਦਿਤਮ੍ਪਿ, ਸਬ੍ਬਮੇਵੇਤਂ ਵਾਦਿਤਮੇਵ. ਤੇਨਾਹ ‘‘ਵਾਦਿਤਨ੍ਤਿ ਅਨ੍ਤਮਸੋ ਉਦਕਭੇਰਿਵਾਦਿਤ’’ਨ੍ਤਿ. ਯਂ ਪਨ ਨਿਟ੍ਠੁਭਨ੍ਤੀ ਵਾ ਸਾਸਙ੍ਕੇ ਵਾ ਠਿਤਾ ਅਚ੍ਛਰਿਕਂ ਵਾ ਫੋਟੇਤਿ, ਪਾਣਿਂ ਵਾ ਪਹਰਤਿ, ਤਤ੍ਥ ਅਨਾਪਤ੍ਤਿ. ਦਸ੍ਸਨੇਨ ਚੇਤ੍ਥ ਸਵਨਮ੍ਪਿ ਸਙ੍ਗਹਿਤਂ ਵਿਰੂਪੇਕਸੇਸਨਯੇਨ. ਆਲੋਚਨਸਭਾਵਤਾਯ ਵਾ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਵਨਕਿਰਿਯਾਯਪਿ ਦਸ੍ਸਨਸਙ੍ਖੇਪਸਬ੍ਭਾਵਤੋ ‘‘ਦਸ੍ਸਨਾਯ’’ਇਚ੍ਚੇਵ ਵੁਤ੍ਤਨ੍ਤਿ ਆਹ ‘‘ਏਤੇਸੁ ਯਂ ਕਿਞ੍ਚਿ ਦਸ੍ਸਨਾਯ ਗਚ੍ਛਨ੍ਤਿਯਾ’’ਤਿ. ਯਤ੍ਥ ਠਿਤਾਤਿ ਏਵਂ ਗਨ੍ਤ੍ਵਾ ਯਸ੍ਮਿਂ ਪਦੇਸੇ ਠਿਤਾ.

ਨਨੁ ਚ ਸਯਂਨਚ੍ਚਨਾਦੀਸੁ ਪਾਚਿਤ੍ਤਿਯਂ ਪਾਲ਼ਿਯਂ ਨ ਵੁਤ੍ਤਂ, ਅਥ ਕਥਂ ਗਹੇਤਬ੍ਬਨ੍ਤਿ ਆਹ ‘‘ਸਬ੍ਬਅਟ੍ਠਕਥਾਸੁ ਵੁਤ੍ਤ’’ਨ੍ਤਿ, ਇਮਿਨਾ ਪਾਲ਼ਿਯਂ ਅਵੁਤ੍ਤੇਪਿ ਅਟ੍ਠਕਥਾਪਮਾਣੇਨ ਗਹੇਤਬ੍ਬਨ੍ਤਿ ਦਸ੍ਸੇਤਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ ਪਨ ਮਾਤਿਕਾਗਤਪਾਚਿਤ੍ਤਿਯਸ੍ਸੇਵ ਵਸੇਨ ਵੁਤ੍ਤਂ, ਸਬ੍ਬੇਸਂ ਵਸੇਨ ਪਨ ਛਸਮੁਟ੍ਠਾਨਨ੍ਤਿ ਗਹੇਤਬ੍ਬਂ. ‘‘ਆਰਾਮੇ ਠਤ੍ਵਾ’’ਤਿ ਇਦਂ ਨਿਦਸ੍ਸਨਮਤ੍ਤਂ ਸੇਸਇਰਿਯਾਪਥੇਹਿ ਯੁਤ੍ਤਾਯ ਪਸ੍ਸਨ੍ਤਿਯਾ ਅਨਾਪਤ੍ਤਿਯਾ ਇਚ੍ਛਿਤਬ੍ਬਤ੍ਤਾ. ਇਤਰਥਾ ਹਿ ਨਿਸਿਨ੍ਨਾਪਿ ਪਸ੍ਸਿਤੁਂ ਨ ਲਭੇਯ੍ਯ. ‘‘ਪਸ੍ਸਿਸ੍ਸਾਮੀ’’ਤਿ ਵਿਹਾਰਤੋ ਵਿਹਾਰਂ ਗਚ੍ਛਨ੍ਤਿਯਾ ਆਪਤ੍ਤਿਯੇਵ. ਆਸਨਸਾਲਾਯ ਨਿਸਿਨ੍ਨਾ ਪਸ੍ਸਤਿ, ਅਨਾਪਤ੍ਤਿ, ‘‘ਪਸ੍ਸਿਸ੍ਸਾਮੀ’’ਤਿ ਉਟ੍ਠਹਿਤ੍ਵਾ ਗਚ੍ਛਨ੍ਤਿਯਾ ਆਪਤ੍ਤਿ. ਵੀਥਿਯਂ ਠਤ੍ਵਾ ਗੀਵਂ ਪਰਿਵਤ੍ਤੇਤ੍ਵਾ ਪਸ੍ਸਨ੍ਤਿਯਾਪਿ ਆਪਤ੍ਤਿਯੇਵ. ਭਿਕ੍ਖੁਸ੍ਸਾਪਿ ਏਸੇਵ ਨਯੋ, ਆਪਤ੍ਤਿਭੇਦੋਵ ਨਾਨਂ.

ਨਚ੍ਚਗੀਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਲਸੁਣਵਗ੍ਗੋ ਪਠਮੋ.