ਪਾਰਾਜਿਕਕਣ੍ਡਂ

ਨਾਥੋ ਭਿਕ੍ਖੁਨੀਨਂ ਹਿਤਤ੍ਥਾਯ ਯਂ ਪਾਤਿਮੋਕ੍ਖਂ ਪਕਾਸਯੀਤਿ ਸਮ੍ਬਨ੍ਧੋ. ਤਤ੍ਥ ਪਕਾਸਯੀਤਿ ਦੇਸਯਿ, ਪਞ੍ਞਾਪਯੀਤਿ ਅਤ੍ਥੋ.

ਸਾਧਾਰਣਪਾਰਾਜਿਕਂ

੧. ਮੇਥੁਨਧਮ੍ਮਸਿਕ੍ਖਾਪਦਵਣ੍ਣਨਾ

ਅਭਿਲਾਪਮਤ੍ਤਨ੍ਤਿ ਵਚਨਮਤ੍ਤਂ, ਨ ਅਤ੍ਥੋਤਿ ਅਧਿਪ੍ਪਾਯੋ. ਲਿਙ੍ਗਭੇਦਮਤ੍ਤਨ੍ਤਿ ਪੁਰਿਸਲਿਙ੍ਗਂ ਇਤ੍ਥਿਲਿਙ੍ਗਨ੍ਤਿ ਵਿਸੇਸਮਤ੍ਤਂ. ਵਿਸੇਸੋਤਿ ਨਾਨਾਤ੍ਤਂ. ਛਨ੍ਦੇਨ ਚੇਵਾਤਿ ਪੇਮੇਨ ਚੇਵ, ਸਿਨੇਹੇਨ ਚੇਵਾਤਿ ਅਤ੍ਥੋ. ਰੁਚਿਯਾ ਚਾਤਿ ਇਚ੍ਛਾਯ ਚ. ਪਧਂਸਿਤਾਯਾਤਿ ਦੂਸਿਤਾਯ. ਪਰਿਪੁਣ੍ਣਾ ਉਪਸਮ੍ਪਦਾ ਯਸ੍ਸਾ ਸਾ ਪਰਿਪੁਣ੍ਣੂਪਸਮ੍ਪਦਾ, ਉਭਤੋਸਙ੍ਘੇਨ ਉਪਸਮ੍ਪਨ੍ਨਾਤਿ ਅਤ੍ਥੋ.

ਮੇਥੁਨਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਅਸਾਧਾਰਣਪਾਰਾਜਿਕਂ

੫. ਉਬ੍ਭਜਾਣੁਮਣ੍ਡਲਸਿਕ੍ਖਾਪਦਵਣ੍ਣਨਾ

ਉਬ੍ਭਕਪ੍ਪਰਨ੍ਤਿ ਦੁਤਿਯਮਹਾਸਨ੍ਧਿਤੋ ਉਦ੍ਧਂ. ਇਤੋ ਚਿਤੋ ਚ ਸਞ੍ਚਰਣਨ੍ਤਿ ਹਤ੍ਥਸ੍ਸ ਵਾ ਕਾਯਸ੍ਸ ਵਾ ਤਿਰਿਯਂ ਇਤੋ ਚਿਤੋ ਚ ਸਞ੍ਚਰਣਂ.

ਏਕਤੋਅਵਸ੍ਸੁਤੇਤਿ (ਪਾਚਿ. ਅਟ੍ਠ. ੬੬੨) ਭਿਕ੍ਖੁਨਿਯਾ ਅਵਸ੍ਸਵੇ, ਭਿਕ੍ਖੁਨਿਯਾ ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਭਾਵੇ ਸਤੀਤਿ ਅਤ੍ਥੋ. ਭਿਕ੍ਖੁਨਿਯਾ ਵਸੇਨੇਵ ਚ ਏਕਤੋਅਵਸ੍ਸੁਤਭਾਵੋ ਗਹੇਤਬ੍ਬੋ. ਵੁਤ੍ਤਞ੍ਹੇਤਂ ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੬੬੨) –

‘‘ਏਕਤੋਅਵਸ੍ਸੁਤੇਤਿ ਏਤ੍ਥ ਕਿਞ੍ਚਾਪਿ ‘ਏਕਤੋ’ਤਿ ਅਵਿਸੇਸੇਨ ਵੁਤ੍ਤਂ, ਤਥਾਪਿ ਭਿਕ੍ਖੁਨਿਯਾ ਏਵ ਅਵਸ੍ਸੁਤੇ ਸਤਿ ਅਯਂ ਆਪਤ੍ਤਿਭੇਦੋ ਵੁਤ੍ਤੋਤਿ ਵੇਦਿਤਬ੍ਬੋ’’ਤਿ.

ਪੁਰਿਸਸ੍ਸ ਕਾਯਨ੍ਤਿ ਪੁਰਿਸਸ੍ਸ ਯਂ ਕਞ੍ਚਿ ਕਾਯਂ. ਉਭਤੋਅਵਸ੍ਸੁਤੇਪੀਤਿ ਭਿਕ੍ਖੁਨਿਯਾ ਚੇਵ ਪੁਰਿਸਸ੍ਸ ਚ ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਭਾਵੇ ਸਤਿਪਿ. ਕਾਯੇਨਾਤਿ ਯਥਾਪਰਿਚ੍ਛਿਨ੍ਨੇਨ ਅਤ੍ਤਨੋ ਕਾਯੇਨ. ਕਾਯਪ੍ਪਟਿਬਦ੍ਧਨ੍ਤਿ ਪੁਰਿਸਸ੍ਸ ਕਾਯਪ੍ਪਟਿਬਦ੍ਧਂ. ਅਵਸੇਸਕਾਯੇਨ ਵਾਤਿ ਯਥਾਪਰਿਚ੍ਛਿਨ੍ਨਕਾਯਤੋ ਅਵਸੇਸੇਨ ਕਾਯੇਨ, ਉਬ੍ਭਕ੍ਖਕਅਧੋਜਾਣੁਮਣ੍ਡਲਅਧੋਕਪ੍ਪਰਸਙ੍ਖਾਤੇਨ ਕਾਯੇਨਾਤਿ ਵੁਤ੍ਤਂ ਹੋਤਿ. ਤਸ੍ਸ ਕਾਯਨ੍ਤਿ ਅਵਸ੍ਸੁਤਸ੍ਸ ਤਸ੍ਸ ਪੁਰਿਸਸ੍ਸ ਯਂ ਕਞ੍ਚਿ ਕਾਯਂ. ਯਥਾ ਚੇਤ੍ਥ ਸਯਂ ਆਮਸਨ੍ਤਿਯਾ ਥੁਲ੍ਲਚ੍ਚਯਂ, ਏਵਂ ਤਸ੍ਸ ਆਮਸਨਂ ਸਾਦਿਯਨ੍ਤਿਯਾਪੀਤਿ ਦਟ੍ਠਬ੍ਬਂ. ਪੁਰਿਸਸ੍ਸ ਕਾਯਸਂਸਗ੍ਗਰਾਗੋ ਨਤ੍ਥੀਤਿ ਪੁਰਿਸਸ੍ਸ ਮੇਥੁਨਰਾਗੋ, ਗੇਹਸਿਤਪੇਮਂ, ਸੁਦ੍ਧਚਿਤ੍ਤਂ ਵਾ. ਅਵਸੇਸੇਤਿ ਪਾਰਾਜਿਕਖੇਤ੍ਤਤੋ ਅਵਸੇਸੇ. ਕਾਯਪ੍ਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧਾਦਿਭੇਦੇਤਿ ‘‘ਕਾਯਪ੍ਪਟਿਬਦ੍ਧੇਨ ਕਾਯਪ੍ਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਕੇ (ਪਾਚਿ. ੬੫੯, ੬੬੨) ਸਬ੍ਬਵਾਰੇ. ‘‘ਅਸਞ੍ਚਿਚ੍ਚਾ’’ਤਿਆਦੀਸੁ ਵਿਰਜ੍ਝਿਤ੍ਵਾ ਵਾ ਆਮਸਨ੍ਤਿਯਾ, ਅਞ੍ਞਵਿਹਿਤਾਯ ਵਾ, ‘‘ਅਯਂ ਪੁਰਿਸੋ’’ਤਿ ਵਾ ‘‘ਇਤ੍ਥੀ’’ਤਿ ਵਾ ਅਜਾਨਨ੍ਤਿਯਾ ਵਾ, ਤੇਨ ਫੁਟ੍ਠਾਯਪਿ ਤਂ ਫਸ੍ਸਂ ਅਸ੍ਸਾਦਯਨ੍ਤਿਯਾ ਵਾ ਆਮਸਨੇਪਿ ਸਤਿ ਅਨਾਪਤ੍ਤਿ.

ਉਬ੍ਭਜਾਣੁਮਣ੍ਡਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਵਜ੍ਜਪ੍ਪਟਿਚ੍ਛਾਦਿਕਾਸਿਕ੍ਖਾਪਦਵਣ੍ਣਨਾ

ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਨ੍ਤਿ ਭਿਕ੍ਖੂਹਿ ਸਾਧਾਰਣਾਨਂ ਚਤੁਨ੍ਨਂ, ਅਸਾਧਾਰਣਾਨਂ ਚਤੁਨ੍ਨਞ੍ਚਾਤਿ ਅਟ੍ਠਨ੍ਨਮਞ੍ਞਤਰਂ ਅਜ੍ਝਾਪਨ੍ਨਂ. ਇਦਞ੍ਚ ਪਾਰਾਜਿਕਂ (ਪਾਚਿ. ਅਟ੍ਠ. ੬੬੬) ਪਚ੍ਛਾ ਪਞ੍ਞਤ੍ਤਂ, ਸਙ੍ਗੀਤਿਕਾਰਕਾਚਰਿਯੇਹਿ ਪਨ ਪੁਰਿਮੇਨ ਸਦ੍ਧਿਂ ਯੁਗਲ਼ਂ ਕਤ੍ਵਾ ਇਮਸ੍ਮਿਂ ਓਕਾਸੇ ਠਪਿਤਨ੍ਤਿ ਵੇਦਿਤਬ੍ਬਂ. ‘‘ਅਟ੍ਠਨ੍ਨਂ ਪਾਰਾਜਿਕਾਨਂ ਅਞ੍ਞਤਰ’’ਨ੍ਤਿ (ਪਾਚਿ. ੬੬੬) ਵਚਨਤੋ ਪਨ ਵਜ੍ਜਪ੍ਪਟਿਚ੍ਛਾਦਿਕਂ ਯਾ ਪਟਿਚ੍ਛਾਦੇਤਿ, ਸਾਪਿ ਵਜ੍ਜਪ੍ਪਟਿਚ੍ਛਾਦਿਕਾ ਏਵਾਤਿ ਦਟ੍ਠਬ੍ਬਂ. ਕਿਞ੍ਚਾਪਿ ਵਜ੍ਜਪ੍ਪਟਿਚ੍ਛਾਦਨਂ ਪੇਮਵਸੇਨ ਹੋਤਿ, ਤਥਾਪਿ ਸਿਕ੍ਖਾਪਦਵੀਤਿਕ੍ਕਮਚਿਤ੍ਤਂ ਦੋਮਨਸ੍ਸਮੇਵ ਹੋਤੀਤਿ ਕਤ੍ਵਾ ਦੁਕ੍ਖਵੇਦਨਂ ਹੋਤੀਤਿ ‘‘ਤਤ੍ਰ ਹਿ ਪਾਚਿਤ੍ਤਿਯਂ…ਪੇ… ਸੇਸਂ ਤਾਦਿਸਮੇਵਾ’’ਤਿ ਵੁਤ੍ਤਂ.

ਵਜ੍ਜਪ੍ਪਟਿਚ੍ਛਾਦਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਉਕ੍ਖਿਤ੍ਤਾਨੁਵਤ੍ਤਿਕਾਸਿਕ੍ਖਾਪਦਵਣ੍ਣਨਾ

ਸਤ੍ਥੁਸਾਸਨੇਨਾਤਿ ਞਤ੍ਤਿਸਮ੍ਪਦਾਯ ਚੇਵ ਅਨੁਸ੍ਸਾਵਨਸਮ੍ਪਦਾਯ ਚ. ਇਧ ਪਨ ਚੋਦਨਾਸਾਰਣਾਪੁਬ੍ਬਕਮੇਵ ਞਤ੍ਤਿਅਨੁਸ੍ਸਾਵਨਂ ਸਤ੍ਥੁਸਾਸਨਨ੍ਤਿ ਆਹ ‘‘ਇਧਾਪੀ’’ਤਿਆਦਿ. ਕਰਣਨ੍ਤਿ ਞਤ੍ਤਿਟ੍ਠਪਨਞ੍ਚੇਵ ਅਨੁਸ੍ਸਾਵਨਾਵਚਨਞ੍ਚ. ਅਨਾਦਰਨ੍ਤਿ ਪੁਗ੍ਗਲੇ ਚੇਵ ਧਮ੍ਮੇ ਚ ਆਦਰਵਿਰਹਿਤਂ. ਤੇਨਾਹ ‘‘ਯੇਨਾ’’ਤਿਆਦਿ. ਤਤ੍ਥ ਪਰਿਯਾਪਨ੍ਨਗਣੇ ਵਾਤਿ ਤਸ੍ਮਿਂ ਸਙ੍ਘੇ ਪਰਿਯਾਪਨ੍ਨੇ ਸਮ੍ਬਹੁਲਪੁਗ੍ਗਲਸਙ੍ਖਾਤੇ ਗਣੇ ਵਾ. ‘‘ਸਮ੍ਮਾਵਤ੍ਤਨਾਯ ਅਵਤ੍ਤਮਾਨਨ੍ਤਿ ਅਤ੍ਥੋ’’ਤਿ ਇਮਿਨਾ ਅਧਿਪ੍ਪਾਯਤ੍ਥੋ ਵੁਤ੍ਤੋ. ਏਕਕਮ੍ਮਾਦਿਕੇਤਿ ਏਕਕਮ੍ਮਏਕੁਦ੍ਦੇਸਸਮਸਿਕ੍ਖਾਤਾਯ. ਸਹ ਅਯਨਭਾਵੇਨਾਤਿ ਸਹ ਵਤ੍ਤਨਭਾਵੇਨ. ਸਮਾਨੋ ਸਂਵਾਸੋ ਏਤੇਸਨ੍ਤਿ ਸਮਾਨਸਂਵਾਸਕਾ.

ਇਦਾਨਿ ਯੇਨ ਸਂਵਾਸੇਨ ਤੇ ‘‘ਸਮਾਨਸਂਵਾਸਕਾ’’ਤਿ (ਪਾਚਿ. ਅਟ੍ਠ. ੬੬੯) ਵੁਤ੍ਤਾ, ਸੋ ਸਂਵਾਸੋ ਤਸ੍ਸ ਉਕ੍ਖਿਤ੍ਤਕਸ੍ਸ ਤੇਹਿ ਸਦ੍ਧਿਂ ਨਤ੍ਥਿ, ਯੇਹਿ ਚ ਸਦ੍ਧਿਂ ਤਸ੍ਸ ਸੋ ਸਂਵਾਸੋ ਨਤ੍ਥਿ, ਨ ਤੇਨ ਤੇ ਭਿਕ੍ਖੂ ਅਤ੍ਤਨੋ ਸਹਾਯਾ ਕਤਾ ਹੋਨ੍ਤਿ, ਤਸ੍ਮਾ ਸੋ ਅਕਤਸਹਾਯੋ ਨਾਮਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਯਸ੍ਸ ਪਨਾ’’ਤਿਆਦਿ ਵੁਤ੍ਤਂ. ਏਵਂ ਪਦਵਣ੍ਣਨਂ ਕਤ੍ਵਾ ਇਦਾਨਿ ਅਤ੍ਥਮਤ੍ਤਂ ਦਸ੍ਸੇਤੁਂ ‘‘ਸਮਾਨਸਂਵਾਸਕਭਾਵਂ ਅਨੁਪਗਤਨ੍ਤਿ ਅਤ੍ਥੋ’’ਤਿ ਵੁਤ੍ਤਂ. ਕਿਂ ਤਂ ਅਨੁਵਤ੍ਤਨਨ੍ਤਿ ਕਸ੍ਸਚਿ ਆਸਙ੍ਕਾ ਸਿਯਾਤਿ ਤਂ ਸਰੂਪਤੋ ਦਸ੍ਸੇਨ੍ਤੋ ‘‘ਯਂਦਿਟ੍ਠਿਕੋ ਸੋ ਹੋਤੀ’’ਤਿਆਦਿਮਾਹ. ਤਤ੍ਥ ਸੋਤਿ ਯੋ ਉਕ੍ਖਿਤ੍ਤਕੋ, ਸੋ.

ਉਕ੍ਖਿਤ੍ਤਾਨੁਵਤ੍ਤਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਅਟ੍ਠਵਤ੍ਥੁਕਾਸਿਕ੍ਖਾਪਦਵਣ੍ਣਨਾ

ਲੋਕਸ੍ਸਾਦਮਿਤ੍ਤਸਨ੍ਥਵਵਸੇਨਾਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੭੫) ਲੋਕਸ੍ਸਾਦਸਙ੍ਖਾਤਸ੍ਸ ਮਿਤ੍ਤਸਨ੍ਥਵਸ੍ਸ ਵਸੇਨ. ਕਿਂ ਤਨ੍ਤਿ ਆਹ ‘‘ਕਾਯਸਂਸਗ੍ਗਰਾਗੇਨਾ’’ਤਿ. ਕਾਯਸਂਸਗ੍ਗਰਾਗੇਨੇਵ ਤਿਨ੍ਤਾ ਇਧ ਅਵਸ੍ਸੁਤਾ ਨਾਮ, ਨ ਮੇਥੁਨਰਾਗੇਨਾਤਿ. ਕਥਮੇਤਂ ਵਿਞ੍ਞਾਯਤੀਤਿ ਆਹ ‘‘ਅਯਮੇਵ ਹੀ’’ਤਿਆਦਿ. ਕਿਂ ਪਨੇਤ੍ਥ ਕਾਰਣਨ੍ਤਿ ਆਹ ‘‘ਸਮਨ੍ਤਪਾਸਾਦਿਕਾਯਂ ਪਨਸ੍ਸ ਵਿਚਾਰਣਾ ਕਤਾ’’ਤਿ. ਤਤ੍ਥਾਯਂ ਵਿਚਾਰਣਾ – ਏਤ੍ਥ ਚ ਅਸਦ੍ਧਮ੍ਮੋਤਿ ਕਾਯਸਂਸਗ੍ਗੋਵ ਵੇਦਿਤਬ੍ਬੋ, ਨ ਮੇਥੁਨਧਮ੍ਮੋ. ਨ ਹਿ ਮੇਥੁਨਸ੍ਸ ਸਾਮਨ੍ਤਾ ਥੁਲ੍ਲਚ੍ਚਯਂ ਹੋਤਿ. ‘‘ਵਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁ’’ਨ੍ਤਿ (ਪਾਚਿ. ੬੭੬) ਵਚਨਮ੍ਪਿ ਚੇਤ੍ਥ ਸਾਧਕਨ੍ਤਿ. ਯਂ ਯੇਨ ਕਤਂ, ਤਂ ਤਸ੍ਸੇਵ ਹੋਤੀਤਿ. ਪੁਰਿਸਪੁਗ੍ਗਲਸ੍ਸਾਤਿ ਸਾਮਿਵਚਨਨ੍ਤਿ ਦਸ੍ਸੇਤੁਂ ‘‘ਯਂ ਪੁਰਿਸਪੁਗ੍ਗਲੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਹਤ੍ਥੋਤਿ ਅਤ੍ਤਨੋ ਹਤ੍ਥੋ. ਨ ਕੇਵਲਞ੍ਚੇਤ੍ਥ ਹਤ੍ਥਗ੍ਗਹਣਨ੍ਤਿ ‘‘ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯ ਯਾਵ ਅਗ੍ਗਨਖਾ’’ਤਿ (ਪਾਚਿ. ੬੭੬) ਵੁਤ੍ਤਸ੍ਸ ਹਤ੍ਥਸ੍ਸੇਵ ਗਹਣਂ, ਅਥ ਖੋ ਤਸ੍ਸ ਚ ਅਞ੍ਞਸ੍ਸਪਿ ਅਪਾਰਾਜਿਕਖੇਤ੍ਤਸ੍ਸ ਗਹਣਂ ਏਕਜ੍ਝਂ ਕਤ੍ਵਾ ‘‘ਹਤ੍ਥਗ੍ਗਹਣ’’ਨ੍ਤਿ ਵੁਤ੍ਤਂ. ਤਥਾ ਸਙ੍ਘਾਟਿਕਣ੍ਣਗ੍ਗਹਣਨ੍ਤਿ ਨ ਕੇਵਲਂ ਸਙ੍ਘਾਟਿਕਣ੍ਣਸ੍ਸੇਵ ਗਹਣਂ, ਅਥ ਖੋ ਤਸ੍ਸ ਚ ਅਞ੍ਞਸ੍ਸਪਿ ਯਸ੍ਸ ਕਸ੍ਸਚਿ ਚੀਵਰਪ੍ਪਦੇਸਸ੍ਸ ਗਹਣਂ ਵੁਤ੍ਤਨ੍ਤਿ ਦਸ੍ਸੇਤੁਂ ‘‘ਏਤ੍ਥ ਚ ਯਸ੍ਸ ਕਸ੍ਸਚੀ’’ਤਿਆਦਿ ਵੁਤ੍ਤਂ. ਇਤ੍ਥਨ੍ਨਾਮਂ ਠਾਨਨ੍ਤਿ ਏਵਂਨਾਮਕਂ ਠਾਨਂ. ‘‘ਪਟਿਪਾਟਿਯਾ ਵਾ ਉਪ੍ਪਟਿਪਾਟਿਯਾ ਵਾ ਪੂਰੇਤ੍ਵਾ’’ਤਿ ਇਦਂ ਨਿਦਸ੍ਸਨਮਤ੍ਤਂ. ਤਸ੍ਮਾ ਪਟਿਪਾਟਿਯਾ ਵਾ ਉਪ੍ਪਟਿਪਾਟਿਯਾ ਵਾ ਏਕਨ੍ਤਰਿਕਾਯ ਵਾ ਯੇਨ ਤੇਨ ਨਯੇਨ ਪੂਰੇਤ੍ਵਾਤਿ ਅਤ੍ਥੋ.

ਤਾ ਆਪਤ੍ਤਿਯੋਤਿ ਤਾ ਆਪਨ੍ਨਾ ਆਪਤ੍ਤਿਯੋ. ਯਥਾ ਚੇਕੇਕਸ੍ਮਿਂ ਵਤ੍ਥੁਸ੍ਮਿਂ ਏਵਂ ਵਿਸੁਂ ਵਿਸੁਂ ਸਤ੍ਤਸੁ ਵਤ੍ਥੂਸੁ ਸਤਕ੍ਖਤ੍ਤੁਮ੍ਪਿ ਵੀਤਿਕ੍ਕਨ੍ਤੇਸੁ ਤਾ ਆਪਤ੍ਤਿਯੋ ਦੇਸੇਤ੍ਵਾ ਮੁਚ੍ਚਤਿ. ਗਣਨੂਪਿਕਾਤਿ ਦੇਸਿਤਗਣਨਂ ਉਪਗਚ੍ਛਤਿ. ਧੁਰਨਿਕ੍ਖੇਪਂ ਕਤ੍ਵਾਤਿ ‘‘ਅਞ੍ਞਂ ਵਤ੍ਥੁਂ ਆਪਜ੍ਜਿਸ੍ਸਾਮੀ’’ਤਿ ਉਸ੍ਸਾਹਂ ਠਪੇਤ੍ਵਾ.

ਅਟ੍ਠਵਤ੍ਥੁਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ

ਭਿਕ੍ਖੁਨਿਪਾਤਿਮੋਕ੍ਖੇ ਪਾਰਾਜਿਕਵਣ੍ਣਨਾ ਨਿਟ੍ਠਿਤਾ.