ਸਙ੍ਘਾਦਿਸੇਸਕਣ੍ਡਂ

੧. ਉਸ੍ਸਯਵਾਦਿਕਾਸਿਕ੍ਖਾਪਦਵਣ੍ਣਨਾ

ਮਾਨੁਸ੍ਸਯਵਸੇਨ ਕੋਧੂਸ੍ਸਯਵਸੇਨਾਤਿ ਬਾਹੁਲ੍ਲਨਯੇਨ ਵੁਤ੍ਤਂ. ਤੇਨੇਵ ਵਕ੍ਖਤਿ ‘‘ਤਿਚਿਤ੍ਤਂ ਤਿਵੇਦਨ’’ਨ੍ਤਿ. ਅਡ੍ਡਕਰਣਤ੍ਥਾਯਾਤਿ ਏਤ੍ਥ ਅਡ੍ਡੋਤਿ ਵੋਹਾਰਿਕਵਿਨਿਚ੍ਛਯੋ ਵੁਚ੍ਚਤਿ. ਯਂ ਪਬ੍ਬਜਿਤਾ ‘‘ਅਧਿਕਰਣ’’ਨ੍ਤਿਪਿ ਵਦਨ੍ਤਿ, ਤਸ੍ਸ ਕਰਣਤ੍ਥਾਯ ਵੋਹਾਰਿਕਵਿਨਿਚ੍ਛਯਤ੍ਥਾਯਾਤਿ ਵੁਤ੍ਤਂ ਹੋਤਿ. ਵੀਤਿਕ੍ਕਮਕ੍ਖਣੇਯੇਵਾਤਿ ਵਤ੍ਥੁਜ੍ਝਾਚਾਰਕ੍ਖਣੇਯੇਵ, ਨ ਤਤਿਯਾਯ ਸਮਨੁਭਾਸਨਾਯਾਤਿ ਅਧਿਪ੍ਪਾਯੋ. ਭਿਕ੍ਖੁਨਿਂ ਸਙ੍ਘਤੋ ਨਿਸ੍ਸਾਰੇਤੀਤਿ ਆਪਨ੍ਨਂ ਭਿਕ੍ਖੁਨਿਂ ਭਿਕ੍ਖੁਨਿਸਙ੍ਘਮ੍ਹਾ ਨਿਸ੍ਸਾਰੇਤਿ. ਹੇਤੁਮ੍ਹਿ ਚਾਯਂ ਕਤ੍ਤੁਵੋਹਾਰੋ ‘‘ਨਿਸ੍ਸਾਰਣਹੇਤੁਭੂਤਧਮ੍ਮੋ ‘ਨਿਸ੍ਸਾਰਣੀਯੋ’ਤਿ ਵੁਤ੍ਤੋ’’ਤਿ ਕਤ੍ਵਾ.

ਯਤ੍ਥ ਠਿਤਾਯਾਤਿ ਉਪਸ੍ਸਯਭਿਕ੍ਖਾਚਾਰਮਗ੍ਗਾਦੀਸੁ ਯਸ੍ਮਿਂ ਠਾਨੇ ਠਿਤਾਯ. ਤਤੋ ਪਟ੍ਠਾਯ ਗਚ੍ਛਨ੍ਤਿਯਾਤਿ ਤਤੋ ਪਟ੍ਠਾਯ ਵੋਹਾਰਿਕਾਨਂ ਸਨ੍ਤਿਕਂ ਗਚ੍ਛਨ੍ਤਿਯਾ. ਦੁਤਿਯੇਤਿ ਦੁਤਿਯਾਰੋਚਨੇ. ਤੇਨਾਤਿ ਉਪਾਸਕੇਨ. ਏਵਂ ਵੁਤ੍ਤਾਯਾਤਿ ‘‘ਮਮ ਚ ਤਵ ਚ ਕਥਂ ਤ੍ਵਂਯੇਵ ਆਰੋਚੇਹੀ’’ਤਿ ਵੁਤ੍ਤਾਯ. ਅਞ੍ਞੇਨ ਕਥਾਪੇਤੀਤਿ ਕਪ੍ਪਿਯਕਾਰਕੇਨ ਕਥਾਪੇਤਿ. ਯਥਾ ਵਾ ਤਥਾ ਵਾ ਹਿ ਆਰੋਚਿਯਮਾਨੇਤਿ ਕਪ੍ਪਿਯਕਾਰਕੋ ਵਾ ਭਿਕ੍ਖੁਨਿਯਾ ਕਥਂ ਪਠਮਂ ਆਰੋਚੇਤੁ, ਇਤਰੋ ਵਾ ਅਤ੍ਤਨੋ ਕਥਂ (ਪਾਚਿ. ਅਟ੍ਠ. ੬੭੯). ਕਪ੍ਪਿਯਕਾਰਕੋ ਵਾ ਉਭਿਨ੍ਨਮ੍ਪਿ ਕਥਂ, ਇਤਰੋ ਵਾ ਉਭਿਨ੍ਨਮ੍ਪਿ ਕਥਂ ਆਰੋਚੇਤੂਤਿ ਏਵਂ ਯਥਾ ਤਥਾ ਆਰੋਚਿਯਮਾਨੇ. ਉਭਿਨ੍ਨਮ੍ਪਿ ਪਨ ਕਥਂ ਸੁਤ੍ਵਾਤਿ ਯਥਾ ਤਥਾ ਵਾ ਆਰੋਚਿਤਂ ਪਨ ਉਭਿਨ੍ਨਮ੍ਪਿ ਕਥਂ ਸੁਤ੍ਵਾ.

ਆਕਡ੍ਢਿਯਮਾਨਾ ਗਚ੍ਛਤੀਤਿ ਵੁਚ੍ਚਮਾਨਾ ਵੋਹਾਰਿਕਾਨਂ ਸਨ੍ਤਿਕਂ ਗਚ੍ਛਤਿ, ਇਮਸ੍ਸ ‘‘ਤਸ੍ਸਾ ਅਨਾਪਤ੍ਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਏਵਂ ਸੇਸੇਸੁਪਿ. ਰਕ੍ਖਂ ਯਾਚਤੀਤਿ ਧਮ੍ਮਿਕਂ ਰਕ੍ਖਂ ਯਾਚਤਿ. ਇਦਾਨਿ ਯਥਾ ਯਾਚਿਤਾ ਰਕ੍ਖਾ ਧਮ੍ਮਿਕਾ ਹੋਤਿ, ਤਂ ਦਸ੍ਸੇਤੁਂ ‘‘ਉਪਸ੍ਸਯੇ ਅਞ੍ਞੇਹਿ ਕਤਂ ਅਨਾਚਾਰਂ ਅਨੋਦਿਸ੍ਸ ਆਚਿਕ੍ਖਨ੍ਤੀ’’ਤਿ ਵੁਤ੍ਤਂ. ਤਤ੍ਥ ਅਤੀਤਂ ਆਰਬ੍ਭ ਅਤ੍ਥਿ ਓਦਿਸ੍ਸ ਆਚਿਕ੍ਖਨਾ (ਪਾਚਿ. ਅਟ੍ਠ. ੬੭੯), ਅਤ੍ਥਿ ਅਨੋਦਿਸ੍ਸ ਆਚਿਕ੍ਖਨਾ, ਅਨਾਗਤਂ ਆਰਬ੍ਭਾਪਿ ਅਤ੍ਥਿ ਓਦਿਸ੍ਸ ਆਚਿਕ੍ਖਨਾ, ਅਤ੍ਥਿ ਅਨੋਦਿਸ੍ਸ ਆਚਿਕ੍ਖਨਾ.

ਕਥਂ ਅਤੀਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ? ਭਿਕ੍ਖੁਨੁਪਸ੍ਸਯੇ ਗਾਮਦਾਰਕਾ, ਧੁਤ੍ਤਾਦਯੋ ਵਾ ਯੇ ਕੇਚਿ ਅਨਾਚਾਰਂ ਵਾ ਆਚਰਨ੍ਤਿ, ਰੁਕ੍ਖਂ ਵਾ ਛਿਨ੍ਦਨ੍ਤਿ, ਫਲਾਫਲਂ ਵਾ ਹਰਨ੍ਤਿ, ਪਰਿਕ੍ਖਾਰੇ ਵਾ ਅਚ੍ਛਿਨ੍ਦਨ੍ਤਿ. ਭਿਕ੍ਖੁਨੀ ਵੋਹਾਰਿਕੇ ਉਪਸਙ੍ਕਮਿਤ੍ਵਾ ‘‘ਅਮ੍ਹਾਕਂ ਉਪਸ੍ਸਯੇ ਇਦਂ ਨਾਮ ਕਤ’’ਨ੍ਤਿ ਵਦਤਿ. ‘‘ਕੇਨਾ’’ਤਿ ਵੁਤ੍ਤੇ ‘‘ਅਸੁਕੇਨ ਚ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਤੀਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ, ਸਾ ਨ ਵਟ੍ਟਤਿ. ਤਞ੍ਚੇ ਸੁਤ੍ਵਾ ਤੇ ਵੋਹਾਰਿਕਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਭਿਕ੍ਖੁਨਿਯਾ ਗੀਵਾ ਹੋਤਿ. ‘‘ਦਣ੍ਡਂ ਗਣ੍ਹਿਸ੍ਸਨ੍ਤੀ’’ਤਿ ਅਧਿਪ੍ਪਾਯੇਪਿ ਸਤਿ ਗੀਵਾਯੇਵ ਹੋਤਿ. ਸਚੇ ਪਨ ਤਸ੍ਸ ‘‘ਦਣ੍ਡਂ ਗਣ੍ਹਥਾ’’ਤਿ ਵਦਤਿ, ਪਞ੍ਚਮਾਸਕਮਤ੍ਤੇ ਗਹਿਤੇ ਪਾਰਾਜਿਕਂ ਹੋਤਿ.

ਤੇਹਿ ‘‘ਕੇਨਾ’’ਤਿ ਵੁਤ੍ਤੇ ਪਨ ‘‘ਅਸੁਕੇਨਾ’ਤਿ ਵਤ੍ਤੁਂ ਅਮ੍ਹਾਕਂ ਨ ਵਟ੍ਟਤਿ, ਤੁਮ੍ਹੇਯੇਵ ਜਾਨਿਸ੍ਸਥ. ਕੇਵਲਞ੍ਹਿ ਮਯਂ ਰਕ੍ਖਂ ਯਾਚਾਮ, ਤਂ ਨੋ ਦੇਥ, ਅਵਹਟਭਣ੍ਡਮ੍ਪਿ ਆਹਰਾਪੇਥਾ’’ਤਿ ਵਤ੍ਤਬ੍ਬਂ. ਏਵਂ ਅਨੋਦਿਸ੍ਸ ਆਚਿਕ੍ਖਨਾ ਹੋਤਿ, ਸਾ ਵਟ੍ਟਤਿ. ਏਵਂ ਵੁਤ੍ਤੇ ਸਚੇਪਿ ਤੇ ਵੋਹਾਰਿਕਾ ਤੇ ਕਾਰਕੇ ਗਵੇਸਿਤ੍ਵਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਸਾਪਤੇਯ੍ਯਮ੍ਪਿ ਗਹਿਤਂ, ਭਿਕ੍ਖੁਨਿਯਾ ਨੇਵ ਗੀਵਾ, ਨ ਆਪਤ੍ਤਿ.

ਪਰਿਕ੍ਖਾਰਂ ਹਰਨ੍ਤੇ ਦਿਸ੍ਵਾ ਤੇਸਂ ਅਨਤ੍ਥਕਾਮਤਾਯ ‘‘ਚੋਰੋ ਚੋਰੋ’’ਤਿ ਵਤ੍ਤੁਮ੍ਪਿ ਨ ਵਟ੍ਟਤਿ. ਏਵਂ ਵੁਤ੍ਤੇਪਿ ਹਿ ਯਂ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਭਿਕ੍ਖੁਨਿਯਾ ਗੀਵਾ ਹੋਤਿ. ਅਤ੍ਤਨੋ ਵਚਨਕਰਂ ਪਨ ‘‘ਇਮਿਨਾ ਮੇ ਪਰਿਕ੍ਖਾਰੋ ਗਹਿਤੋ, ਤਂ ਆਹਰਾਪੇਹਿ, ਮਾ ਚਸ੍ਸ ਦਣ੍ਡਂ ਕਰੋਥਾ’’ਤਿ ਵਤ੍ਤੁਂ ਵਟ੍ਟਤਿ. ਦਾਸਦਾਸਿਵਾਪਿਆਦੀਨਂ ਅਤ੍ਥਾਯ ਅਡ੍ਡਂ ਕਰੋਨ੍ਤਿ, ਅਯਂ ਅਕਪ੍ਪਿਯਅਡ੍ਡੋ ਨਾਮ, ਨ ਵਟ੍ਟਤਿ.

ਕਥਂ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ? ਵੁਤ੍ਤਨਯੇਨੇਵ ਪਰੇਹਿ ਅਨਾਚਾਰਾਦੀਸੁ ਕਤੇਸੁ ਭਿਕ੍ਖੁਨੀ ਵੋਹਾਰਿਕੇ ਏਵਂ ਵਦਤਿ ‘‘ਅਮ੍ਹਾਕਂ ਉਪਸ੍ਸਯੇ ਇਦਞ੍ਚਿਦਞ੍ਚ ਕਰੋਨ੍ਤਿ, ਰਕ੍ਖਂ ਨੋ ਦੇਥ ਆਯਤਿਂ ਅਕਰਣਤ੍ਥਾਯਾ’’ਤਿ. ‘‘ਕੇਨ ਏਵਂ ਕਤ’’ਨ੍ਤਿ ਵੁਤ੍ਤੇ ‘‘ਅਸੁਕੇਨ ਚ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ, ਸਾਪਿ ਨ ਵਟ੍ਟਤਿ. ਤੇਸਞ੍ਹਿ ਦਣ੍ਡੇ ਕਤੇ ਪੁਰਿਮਨਯੇਨੇਵ ਸਬ੍ਬਂ ਭਿਕ੍ਖੁਨਿਯਾ ਗੀਵਾ. ਸੇਸਂ ਪੁਰਿਮਸਦਿਸਮੇਵ.

ਸਚੇ ਪਨ ਵੋਹਾਰਿਕਾ ਭਿਕ੍ਖੁਨੁਪਸ੍ਸਯੇ ਏਵਰੂਪਂ ਅਨਾਚਾਰਂ ਕਰੋਨ੍ਤਾਨਂ ‘‘ਇਮਂ ਨਾਮ ਦਣ੍ਡਂ ਕਰੋਮਾ’’ਤਿ ਭੇਰਿਂ ਚਰਾਪੇਤ੍ਵਾ ਆਣਾਯ ਅਤਿਟ੍ਠਮਾਨੇ ਪਰਿਯੇਸਿਤ੍ਵਾ ਦਣ੍ਡਂ ਕਰੋਨ੍ਤਿ, ਭਿਕ੍ਖੁਨਿਯਾ ਨੇਵ ਗੀਵਾ, ਨ ਆਪਤ੍ਤਿ.

ਯੋ ਚਾਯਂ ਭਿਕ੍ਖੁਨੀਨਂ ਵੁਤ੍ਤੋ, ਭਿਕ੍ਖੂਨਮ੍ਪਿ ਏਸੇਵ ਨਯੋ. ਭਿਕ੍ਖੁਨੋਪਿ ਹਿ ਓਦਿਸ੍ਸ ਆਚਿਕ੍ਖਨਾ ਨ ਵਟ੍ਟਤਿ, ਯਂ ਤਥਾ ਆਚਿਕ੍ਖਿਤੇ ਤੇਸਂ ਦਣ੍ਡਂ ਕਰੋਨ੍ਤਿ, ਤਂ ਸਬ੍ਬਂ ਗੀਵਾ ਹੋਤਿ. ਵੁਤ੍ਤਨਯੇਨੇਵ ਦਣ੍ਡਂ ਗਣ੍ਹਾਪੇਨ੍ਤਸ੍ਸ ਪਾਰਾਜਿਕਂ. ਯੋ ਪਨ ‘‘ਦਣ੍ਡਂ ਕਰਿਸ੍ਸਨ੍ਤੀ’’ਤਿ ਜਾਨਨ੍ਤੋਪਿ ਅਨੋਦਿਸ੍ਸ ਕਥੇਤਿ, ਤੇ ਚ ਪਰਿਯੇਸਿਤ੍ਵਾ ਦਣ੍ਡਂ ਕਰੋਨ੍ਤਿਯੇਵ, ਨ ਦੋਸੋ. ਵਿਹਾਰਸੀਮਾਯ ਰੁਕ੍ਖਾਦੀਨਿ ਛਿਨ੍ਦਨ੍ਤਾਨਂ ਵਾਸਿਫਰਸੁਆਦੀਨਿ ਗਹੇਤ੍ਵਾ ਪਾਸਾਣੇ ਕੋਟ੍ਟੇਨ੍ਤਿ, ਨ ਵਟ੍ਟਤਿ. ਸਚੇ ਧਾਰਾ ਭਿਜ੍ਜਤਿ, ਕਾਰਾਪੇਤ੍ਵਾ ਦਾਤਬ੍ਬਾ. ਉਪਧਾਵਿਤ੍ਵਾ ਤੇਸਂ ਪਰਿਕ੍ਖਾਰੇ ਗਣ੍ਹਨ੍ਤਿ, ਤਮ੍ਪਿ ਨ ਕਾਤਬ੍ਬਂ. ਲਹੁਪਰਿਵਤ੍ਤਞ੍ਹਿ ਚਿਤ੍ਤਂ, ਥੇਯ੍ਯਚੇਤਨਾਯ ਉਪ੍ਪਨ੍ਨਾਯ ਮੂਲਚ੍ਛੇਜ੍ਜਮ੍ਪਿ ਗਚ੍ਛੇਯ੍ਯ.

ਉਸ੍ਸਯਵਾਦਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਚੋਰਿਵੁਟ੍ਠਾਪਿਕਾਸਿਕ੍ਖਾਪਦਵਣ੍ਣਨਾ

ਮਲ੍ਲਗਣਭਟਿਪੁਤ੍ਤਗਣਾਦਿਕਨ੍ਤਿਆਦੀਸੁ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੮੩) ਮਲ੍ਲਗਣੋ ਨਾਮ ਨਾਰਾਯਨਭਤ੍ਤਿਕੋ ਤਤ੍ਥ ਤਤ੍ਥ ਪਾਨੀਯਟ੍ਠਪਨਪੋਕ੍ਖਰਣਿਖਣਨਾਦਿਪੁਞ੍ਞਕਮ੍ਮਕਾਰਕੋ ਗਣੋ. ਭਟਿਪੁਤ੍ਤਗਣੋ ਨਾਮ ਕੁਮਾਰਭਤ੍ਤਿਕਗਣੋ. ਧਮ੍ਮਗਣੋਤਿ ਸਾਸਨਭਤ੍ਤਿਕੋ ਅਨੇਕਪ੍ਪਕਾਰਪੁਞ੍ਞਕਮ੍ਮਕਾਰਕੋ ਗਣੋ. ਗਨ੍ਧਿਕਸੇਣੀਤਿ ਅਨੇਕਪ੍ਪਕਾਰਸੁਗਨ੍ਧਿਵਿਕਤਿਕਾਰਕੋ ਗਣੋ. ਦੁਸ੍ਸਿਕਸੇਣੀਤਿ ਦੁਸ੍ਸਵਾਣਿਜਸਮੂਹੋ, ਪੇਸਕਾਰਗਣੋਤਿ ਅਤ੍ਥੋ.

ਵੁਟ੍ਠਾਪੇਨ੍ਤਿਯਾਤਿ ਉਪਸਮ੍ਪਾਦੇਨ੍ਤਿਯਾ. ਕੇਨਚਿ ਕਰਣੀਯੇਨ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਅਗਨ੍ਤ੍ਵਾ ਖਣ੍ਡਸੀਮਂ ਯਥਾਨਿਸਿਨ੍ਨਟ੍ਠਾਨੇਯੇਵ ਅਤ੍ਤਨੋ ਨਿਸ੍ਸਿਤਕਪਰਿਸਾਯ ਸਦ੍ਧਿਂ ਵੁਟ੍ਠਾਪੇਨ੍ਤਿਯਾ ਵਾਚਾਚਿਤ੍ਤਤੋ ਸਮੁਟ੍ਠਾਤਿ (ਪਾਚਿ. ਅਟ੍ਠ. ੬੮੩), ਅਞ੍ਞਂ ਸੀਮਂ ਵਾ ਨਦਿਂ ਵਾ ਗਨ੍ਤ੍ਵਾ ਵੁਟ੍ਠਾਪੇਨ੍ਤਿਯਾ ਕਾਯਵਾਚਾਚਿਤ੍ਤਤੋ ਸਮੁਟ੍ਠਾਤੀਤਿ ਆਹ ‘‘ਚੋਰਿਵੁਟ੍ਠਾਪਨਸਮੁਟ੍ਠਾਨ’’ਨ੍ਤਿ. ਅਨਾਪੁਚ੍ਛਾ ਵੁਟ੍ਠਾਪਨਵਸੇਨ ਕਿਰਿਯਾਕਿਰਿਯਂ. ਪਞ੍ਞਤ੍ਤਿਂ ਅਜਾਨਨ੍ਤਾ ਅਰਿਯਾਪਿ ਵੁਟ੍ਠਾਪੇਨ੍ਤੀਤਿ ਵਾ ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿਕ੍ਖਣੇ ਵਿਪਾਕਾਬ੍ਯਾਕਤਸਮਙ੍ਗਿਤਾਵਸੇਨ ਵਾ ਤਿਚਿਤ੍ਤਂ.

ਚੋਰਿਵੁਟ੍ਠਾਪਿਕਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਏਕਗਾਮਨ੍ਤਰਗਮਨਸਿਕ੍ਖਾਪਦਵਣ੍ਣਨਾ

ਅਞ੍ਞੋ ਗਾਮੋ ਗਾਮਨ੍ਤਰਂ. ਨਦਿਪਾਰਨ੍ਤਿ ਨਦਿਯਾ ਪਾਰਿਮਤੀਰਂ. ‘‘ਗਾਮਨ੍ਤਰਂ ਗਚ੍ਛੇਯ੍ਯਾ’’ਤਿ (ਪਾਚਿ. ੬੮੭, ੬੯੧) ਵੁਤ੍ਤਤ੍ਤਾ ਅਞ੍ਞਸ੍ਮਿਂ ਗਾਮੇਯੇਵ ਆਪਤ੍ਤਿ, ਨ ਸਕਗਾਮੇਤਿ ਆਹ ‘‘ਸਕਗਾਮਤੋ ਤਾਵਾ’’ਤਿਆਦਿ. ਪਰਿਕ੍ਖੇਪੇ ਵਾ ਉਪਚਾਰੇ ਵਾ ਅਤਿਕ੍ਕਨ੍ਤੇਤਿ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਾਰਹਟ੍ਠਾਨੇ ਵਾ ਅਤਿਕ੍ਕਨ੍ਤੇ. ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇਤਿ ਦੁਤਿਯੇਨ ਪਾਦੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਉਪਚਾਰੇ ਵਾ ਅਤਿਕ੍ਕਨ੍ਤਮਤ੍ਤੇ. ਯੇਸੁ ਪਨ ਪੋਤ੍ਥਕੇਸੁ ‘‘ਏਕੇਨ ਪਾਦੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਅਤਿਕ੍ਕਨ੍ਤੇ, ਉਪਚਾਰੇ ਵਾ ਓਕ੍ਕਨ੍ਤੇ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ, ਓਕ੍ਕਨ੍ਤਮਤ੍ਤੇ ਵਾ ਸਙ੍ਘਾਦਿਸੇਸੋ’’ਤਿ ਪਾਠੋ ਦਿਸ੍ਸਤਿ, ਤਤ੍ਥ ‘‘ਓਕ੍ਕਨ੍ਤੇ, ਓਕ੍ਕਨ੍ਤਮਤ੍ਤੇ ਵਾ’’ਤਿ ਏਤਾਨਿ ਦ੍ਵੇ ਪਦਾਨਿ ਪਾਲ਼ਿਯਾ ਵਿਰੁਜ੍ਝਨ੍ਤਿ. ‘‘ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਅਤਿਕ੍ਕਾਮੇਨ੍ਤਿਯਾ’’ਤਿ (ਪਾਚਿ. ੬੯੨) ਹਿ ਪਾਲ਼ਿ. ਤਥਾ ਸਮਨ੍ਤਪਾਸਾਦਿਕਾਯਪਿ ਵਿਰੁਜ੍ਝਨ੍ਤਿ. ਤਤ੍ਥ ਹਿ –

‘‘ਪਰਿਕ੍ਖੇਪਾਰਹਟ੍ਠਾਨਂ ਏਕੇਨ ਪਾਦੇਨ ਅਤਿਕ੍ਕਮਤਿ, ਥੁਲ੍ਲਚ੍ਚਯਂ. ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ. ਅਪਿਚੇਤ੍ਥ ਸਕਗਾਮਤੋ…ਪੇ… ਏਕੇਨ ਪਾਦੇਨ ਇਤਰਸ੍ਸ ਗਾਮਸ੍ਸ ਪਰਿਕ੍ਖੇਪੇ ਵਾ ਉਪਚਾਰੇਵਾ ਅਤਿਕ੍ਕਨ੍ਤਮਤ੍ਤੇ ਥੁਲ੍ਲਚ੍ਚਯਂ, ਦੁਤਿਯੇਨ ਅਤਿਕ੍ਕਨ੍ਤਮਤ੍ਤੇ ਸਙ੍ਘਾਦਿਸੇਸੋ’’ਤਿ –

ਵੁਤ੍ਤਂ. ‘‘ਪਠਮਂ ਪਾਦਂ ਅਤਿਕ੍ਕਾਮੇਨ੍ਤਿਯਾ’’ਤਿਆਦਿਵਚਨਤੋ (ਪਾਚਿ. ੬੯੨) ਪਦਸਾ ਗਮਨਮੇਵ ਇਧਾਧਿਪ੍ਪੇਤਨ੍ਤਿ ਆਹ ‘‘ਪਦਸਾ ਪਵਿਸਨ੍ਤਿਯਾ ਆਪਤ੍ਤੀ’’ਤਿ. ਇਮਿਨਾ ਸਚੇਪਿ ਹਤ੍ਥਿਪਿਟ੍ਠਿਆਦੀਹਿ ਵਾ ਇਦ੍ਧਿਯਾ ਵਾ ਪਵਿਸਤਿ, ਵਟ੍ਟਤਿਯੇਵਾਤਿ ਦਸ੍ਸੇਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯ (ਪਾਚਿ. ਅਟ੍ਠ. ੬੯੨) ਵੁਤ੍ਤੋਤਿ ਅਧਿਪ੍ਪਾਯੋ.

ਨਦਿਪਾਰਗਮਨੇ ਵੁਤ੍ਤਲਕ੍ਖਣਾਯ ਨਦਿਯਾਤਿ ‘‘ਨਦੀ ਨਾਮ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਅਨ੍ਤਰਵਾਸਕੋ ਤੇਮਿਯਤੀ’’ਤਿ (ਪਾਚਿ. ੬੯੨) ਨਦਿਪਾਰਗਮਨਵਿਭਙ੍ਗੇ ਵੁਤ੍ਤਲਕ੍ਖਣਾਯ ਨਦਿਯਾ. ਨਦਿਪਾਰਗਮਨਵਿਭਙ੍ਗੋ ਹਿ ਇਧ ਨਦਿਪਾਰਗਮਨਸਦ੍ਦੇਨ ਵੁਤ੍ਤੋ. ਪੁਨ ਓਰਿਮਤੀਰਮੇਵ ਪਚ੍ਚੁਤ੍ਤਰਨ੍ਤਿਯਾ ਵਾਤਿ ਪਰਤੀਰਂ ਗਨ੍ਤੁਕਾਮਤਾਯ ਓਤਿਣ੍ਣਤ੍ਤਾ ਵੁਤ੍ਤਂ. ਇਤਰਿਸ੍ਸਾ ਪਨ ਅਯਂ ਪਕ੍ਕਨ੍ਤਟ੍ਠਾਨੇ ਠਿਤਾ ਹੋਤਿ, ਤਸ੍ਮਾ ਪਰਤੀਰਂ ਗਚ੍ਛਨ੍ਤਿਯਾ ਅਨਾਪਤ੍ਤਿ. ਸਚੇ ਸਜ੍ਝਾਯਂ ਵਾ ਪਧਾਨਂ ਵਾ ਅਞ੍ਞਂ ਵਾ ਕਿਞ੍ਚਿ ਕਮ੍ਮਂ ਕੁਰੁਮਾਨਾ ‘‘ਪੁਰੇ ਅਰੁਣੇਯੇਵ ਦੁਤਿਯਿਕਾਯ ਸਨ੍ਤਿਕਂ ਗਮਿਸ੍ਸਾਮੀ’’ਤਿ (ਪਾਚਿ. ਅਟ੍ਠ. ੬੯੨) ਆਭੋਗਂ ਕਰੋਤਿ, ਅਜਾਨਨ੍ਤਿਯਾ ਏਵ ਤਸ੍ਸਾ ਅਰੁਣੋ ਉਗ੍ਗਚ੍ਛਤਿ, ਅਨਾਪਤ੍ਤੀਤਿ ਆਹ ‘‘ਪੁਰੇ ਅਰੁਣੇਯੇਵਾ’’ਤਿਆਦਿ. ਅਥ ਪਨ ‘‘ਯਾਵ ਅਰੁਣੁਗ੍ਗਮਨਾ ਇਧੇਵ ਭਵਿਸ੍ਸਾਮੀ’’ਤਿ ਵਾ ਅਨਾਭੋਗੇਨ ਵਾ ਵਿਹਾਰਸ੍ਸ ਏਕਦੇਸੇ ਅਚ੍ਛਤਿ, ਦੁਤਿਯਿਕਾਯ ਹਤ੍ਥਪਾਸਂ ਨ ਓਤਰਤਿ, ਅਰੁਣੁਗ੍ਗਮਨੇ ਸਙ੍ਘਾਦਿਸੇਸੋ. ਹਤ੍ਥਪਾਸੋਯੇਵ ਹਿ ਇਧ ਪਮਾਣਂ. ਹਤ੍ਥਪਾਸਾਤਿਕ੍ਕਮੇ ਏਕਗਬ੍ਭੋਪਿ ਨ ਰਕ੍ਖਤਿ. ਤੇਨਾਹ ‘‘ਏਕਗਬ੍ਭੇ…ਪੇ… ਆਪਤ੍ਤੀ’’ਤਿ.

ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾਤਿ ਏਤ੍ਥ ਦਸ੍ਸਨੂਪਚਾਰੋ ਨਾਮ ਯਤ੍ਥ ਠਿਤਂ ਦੁਤਿਯਿਕਾ ਪਸ੍ਸਤਿ. ਸਵਨੂਪਚਾਰੋ ਨਾਮ ਯਤ੍ਥ ਠਿਤਾ ਮਗ੍ਗਮੂਲ਼੍ਹਸਦ੍ਦੇਨ ਵਿਯ, ਧਮ੍ਮਸ੍ਸਵਨਾਰੋਚਨਸਦ੍ਦੇਨ ਵਿਯ ਚ ‘‘ਅਯ੍ਯੇ’’ਤਿ ਸਦ੍ਦਾਯਨ੍ਤਿਯਾ ਸਦ੍ਦਂ ਸੁਣਾਤਿ. ਤਸ੍ਮਾਤਿ ਯਸ੍ਮਾ ਓਹੀਯਨਂ ਨਾਮ ਦਸ੍ਸਨੂਪਚਾਰਸਵਨੂਪਚਾਰਾਨਮਞ੍ਞਤਰਸ੍ਸ ਵਿਜਹਨਂ, ਤਸ੍ਮਾ. ਅਨ੍ਤੋਗਾਮੇ ਪਨ ਓਹੀਯਨਂ ਵਟ੍ਟਤੀਤਿ ਆਹ ‘‘ਇਨ੍ਦਖੀਲਾਤਿਕ੍ਕਮਤੋ ਪਟ੍ਠਾਯਾ’’ਤਿ ਆਦਿ. ਤਤ੍ਥ ਇਨ੍ਦਖੀਲਾਤਿਕ੍ਕਮਤੋਤਿ ਉਮ੍ਮਾਰਾਤਿਕ੍ਕਮਤੋ. ਬਹਿਗਾਮੇਤਿ ਗਾਮਸ੍ਸ ਬਹਿਪਦੇਸੇ. ਮਗ੍ਗਮੂਲ਼੍ਹਾ ਉਚ੍ਚਾਸਦ੍ਦਂ ਕਰੋਨ੍ਤੀਤਿ ਆਹ ‘‘ਮਗ੍ਗਮੂਲ਼੍ਹਸਦ੍ਦੇਨ ਵਿਯਾ’’ਤਿ. ਮਗ੍ਗਮੂਲ਼੍ਹਂ ਅਵ੍ਹਾਯਨ੍ਤਸ੍ਸ ਸਦ੍ਦੇਨ ਵਿਯਾਤਿਪਿ ਵਦਨ੍ਤਿ. ਸਦ੍ਦਾਯਨ੍ਤਿਯਾਤਿ ਸਦ੍ਦਂ ਕਰੋਨ੍ਤਿਯਾ. ‘‘ਸਦ੍ਦਸ੍ਸਵਨਾਤਿਕ੍ਕਮੇ ਆਪਤ੍ਤਿਯੇਵਾ’’ਤਿ ਇਮਿਨਾ ਦਸ੍ਸਨੂਪਚਾਰੋ ਏਵਰੂਪੇ ਸਵਨੂਪਚਾਰੇ ਵਿਜਹਿਤੇ ਨ ਰਕ੍ਖਤਿ, ਜਹਿਤਮਤ੍ਤੇਵ ਆਪਤ੍ਤਿ ਸਙ੍ਘਾਦਿਸੇਸਸ੍ਸਾਤਿ ਦਸ੍ਸੇਤਿ.

ਮਗ੍ਗਂ ਗਚ੍ਛਨ੍ਤੀਤਿ ਏਕਮਗ੍ਗਂ ਗਚ੍ਛਨ੍ਤਿ. ਸਚੇ ਪੁਰਿਮਾਯੋ ਅਞ੍ਞੇਨ ਮਗ੍ਗੇਨ ਗਚ੍ਛਨ੍ਤਿ, ਪਕ੍ਕਨ੍ਤਾ ਨਾਮ ਹੋਨ੍ਤਿ, ਅਨਾਪਤ੍ਤਿਯੇਵ. ਦ੍ਵਿਨ੍ਨਂ ਗਚ੍ਛਨ੍ਤੀਨਂ ਏਕਾ ਅਨੁਬਨ੍ਧਿਤੁਂ ਅਸਕ੍ਕੋਨ੍ਤੀ ‘‘ਗਚ੍ਛਤੁ ਅਯ’’ਨ੍ਤਿ ਓਹੀਯਤਿ, ਇਤਰਾਪਿ ‘‘ਓਹੀਯਤੁ ਅਯ’’ਨ੍ਤਿ ਗਚ੍ਛਤਿ, ਦ੍ਵਿਨ੍ਨਮ੍ਪਿ ਆਪਤ੍ਤਿ. ਸਚੇ ਪਨ ਗਚ੍ਛਨ੍ਤੀਸੁ ਪੁਰਿਮਾਪਿ ਅਞ੍ਞਂ ਮਗ੍ਗਂ ਗਣ੍ਹਾਤਿ, ਪਚ੍ਛਿਮਾਪਿ ਅਞ੍ਞਂ, ਏਕਾ ਏਕਿਸ੍ਸਾ ਪਕ੍ਕਨ੍ਤਟ੍ਠਾਨੇ ਤਿਟ੍ਠਤਿ, ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ.

‘‘ਸਙ੍ਘਾਦਿਸੇਸਾ ਚਤੁਰੋ’’ਤਿ (ਪਰਿ. ਅਟ੍ਠ. ੪੭੯) ਅਯਂ ਪਞ੍ਹੋ ਅਰੁਣੁਗ੍ਗਮਨੇ ਗਾਮਨ੍ਤਰਪਰਿਯਾਪਨ੍ਨਂ ਨਦਿਪਾਰਂ ਓਕ੍ਕਨ੍ਤਭਿਕ੍ਖੁਨਿਂ ਸਨ੍ਧਾਯ ਵੁਤ੍ਤੋ. ਸਾ ਹਿ ਸਕਗਾਮਤੋ ਪਚ੍ਚੂਸਸਮਯੇ ਨਿਕ੍ਖਮਿਤ੍ਵਾ ਅਰੁਣੁਗ੍ਗਮਨਕਾਲੇ ਵੁਤ੍ਤਪ੍ਪਕਾਰਂ ਨਦਿਪਾਰਂ ਓਕ੍ਕਨ੍ਤਮਤ੍ਤਾਵ ਰਤ੍ਤਿਵਿਪ੍ਪਵਾਸਗਾਮਨ੍ਤਰਨਦਿਪਾਰਗਮਨਗਣਮ੍ਹਾਓਹੀਯਨਲਕ੍ਖਣੇ ਏਕਪ੍ਪਹਾਰੇਨੇਵ ਚਤੁਰੋ ਸਙ੍ਘਾਦਿਸੇਸੇ ਆਪਜ੍ਜਤਿ.

ਪਕ੍ਖਸਙ੍ਕਨ੍ਤਾਯ ਵਾਤਿ ਤਿਤ੍ਥਾਯਤਨਂ ਸਙ੍ਕਨ੍ਤਾਯ. ਅਨਨ੍ਤਰਾਯੇਨਾਤਿ ਹਤ੍ਥਿਮੋਚਨਾਦਿਅਨ੍ਤਰਾਯਂ ਵਿਨਾ.

ਏਕਗਾਮਨ੍ਤਰਗਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਉਕ੍ਖਿਤ੍ਤਕਓਸਾਰਣਸਿਕ੍ਖਾਪਦਵਣ੍ਣਨਾ

ਤਸ੍ਸੇਵ ਕਾਰਕਸਙ੍ਘਸ੍ਸਾਤਿ ਯੋ ਉਕ੍ਖੇਪਨੀਯਕਮ੍ਮਕਾਰਕੋ ਗਣੋ, ਤਸ੍ਸੇਵ ਕਾਰਕਸਙ੍ਘਸ੍ਸ. ਵਤ੍ਤੇ ਵਾ ਵਤ੍ਤਨ੍ਤਿਨ੍ਤਿ ਤੇਚਤ੍ਤਾਲੀਸਪ੍ਪਭੇਦੇ ਨੇਤ੍ਥਾਰਵਤ੍ਤੇ ਵਤ੍ਤਮਾਨਂ.

ਉਕ੍ਖਿਤ੍ਤਕਓਸਾਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਭੋਜਨਪ੍ਪਟਿਗ੍ਗਹਣਪਠਮਸਿਕ੍ਖਾਪਦਵਣ੍ਣਨਾ

ਏਕਤੋਅਵਸ੍ਸੁਤੇਤਿ ਪੁਗ੍ਗਲਸ੍ਸ ਵਾ ਭਿਕ੍ਖੁਨਿਯਾ ਵਾ ਅਵਸ੍ਸੁਤੇ. ਮਹਾਪਚ੍ਚਰਿਯਂ ਪਨੇਤ੍ਥ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੇਤਿ ਦਟ੍ਠਬ੍ਬ’’ਨ੍ਤਿ (ਪਾਚਿ. ਅਟ੍ਠ. ੭੦੧) ਵੁਤ੍ਤਂ. ਤਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿ (ਪਾਚਿ. ੭੦੩) ਇਮਾਯ ਪਾਲ਼ਿਯਾ ਨ ਸਮੇਤਿ. ਯਦਿ ਹਿ ਪੁਗ੍ਗਲਸ੍ਸ ਅਵਸ੍ਸੁਤਭਾਵੋ ਨਪ੍ਪਮਾਣਂ, ਕਿਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ’’ਤਿ ਇਮਿਨਾ ਵਚਨੇਨ, ‘‘ਅਨਾਪਤ੍ਤਿ ਉਭਤੋਅਨਵਸ੍ਸੁਤਾ ਹੋਨ੍ਤਿ, ਅਨਵਸ੍ਸੁਤਾ ਪਟਿਗ੍ਗਣ੍ਹਾਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ ਸਿਯਾ. ਉਭੋਸੁ ਅਨਵਸ੍ਸੁਤੇਸੂਤਿ ਪੁਗ੍ਗਲੋ ਚੇਵ ਭਿਕ੍ਖੁਨੀ ਚਾਤਿ ਉਭੋਸੁ ਅਨਵਸ੍ਸੁਤੇਸੁ ਗਣ੍ਹਨ੍ਤਿਯਾ ਸਬ੍ਬਥਾਪਿ ਅਨਾਪਤ੍ਤਿ. ‘‘ਅਨਵਸ੍ਸੁਤੋ’’ਤਿ ਵਾ ਞਤ੍ਵਾ ਗਣ੍ਹਨ੍ਤਿਯਾਤਿ ਸਯਂ ਅਨਵਸ੍ਸੁਤਾ ਸਮਾਨਾ ਅਵਸ੍ਸੁਤੇਪਿ ‘‘ਅਨਵਸ੍ਸੁਤੋ ਅਯ’’ਨ੍ਤਿ ਸਞ੍ਞਾਯ ਤਸ੍ਸ ਹਤ੍ਥਤੋ ਪਟਿਗ੍ਗਣ੍ਹਨ੍ਤਿਯਾ. ਅਥ ਸਯਂ ਅਨਵਸ੍ਸੁਤਾਪਿ ਅਞ੍ਞਂ ਅਵਸ੍ਸੁਤਂ ਵਾ ਅਨਵਸ੍ਸੁਤਂ ਵਾ ‘‘ਅਵਸ੍ਸੁਤੋ’’ਤਿ ਞਤ੍ਵਾ ਪਟਿਗ੍ਗਣ੍ਹਾਤਿ, ਦੁਕ੍ਕਟਮੇਵ. ਵੁਤ੍ਤਞ੍ਹੇਤਂ ਅਨਨ੍ਤਰਸਿਕ੍ਖਾਪਦੇ ‘‘ਕਿਸ੍ਸ ਤ੍ਵਂ, ਅਯ੍ਯੇ, ਨ ਪਟਿਗ੍ਗਣ੍ਹਾਸੀਤਿ, ਅਵਸ੍ਸੁਤਾ, ਅਯ੍ਯੇਤਿ, ਤ੍ਵਂ ਪਨ, ਅਯ੍ਯੇ, ਅਵਸ੍ਸੁਤਾਤਿ, ਨਾਹਂ, ਅਯ੍ਯੇ, ਅਵਸ੍ਸੁਤਾ’’ਤਿ.

ਭੋਜਨਪ੍ਪਟਿਗ੍ਗਹਣਪਠਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਭੋਜਨਪ੍ਪਟਿਗ੍ਗਹਣਦੁਤਿਯਸਿਕ੍ਖਾਪਦਵਣ੍ਣਨਾ

ਦੁਕ੍ਕਟਾਦਿਕਾ ਸਙ੍ਘਾਦਿਸੇਸਪਰਿਯੋਸਾਨਾ ਆਪਤ੍ਤਿਯੋ ਇਮਿਨਾ ਸਿਕ੍ਖਾਪਦੇਨ ਉਯ੍ਯੋਜਿਕਾਯੇਵ, ਇਤਰਿਸ੍ਸਾ ਪਨ ਆਪਤ੍ਤਿਭੇਦੋ ਪਠਮਸਿਕ੍ਖਾਪਦੇਨਾਤਿ ਆਹ ‘‘ਸਾ ਏਵਂ ਉਯ੍ਯੋਜਨੇਨਾ’’ਤਿਆਦਿ.

ਕੁਲਾਨੁਦ੍ਦਯਤਾਯਾਤਿ ਕੁਲਾਨੁਕਮ੍ਪਕਤਾਯ.

ਭੋਜਨਪ੍ਪਟਿਗ੍ਗਹਣਦੁਤਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭-੧੩. ਸਞ੍ਚਰਿਤ੍ਤਾਦਿਸਿਕ੍ਖਾਪਦਵਣ੍ਣਨਾ

ਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨੇਵ.

ਸਞ੍ਚਰਿਤ੍ਤਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੪-੧੭. ਸਙ੍ਘਭੇਦਕਾਦਿਸਿਕ੍ਖਾਪਦਵਣ੍ਣਨਾ

ਭਿਕ੍ਖੁਨੀ ਸਙ੍ਘਂ ਨ ਭਿਨ੍ਦਤੀਤਿ ਕਮ੍ਮਂ, ਉਦ੍ਦੇਸੋ ਚਾਤਿ ਦ੍ਵੀਹਿ ਭੇਦੋ, ਸੋ ਤਾਯ ਸਦ੍ਧਿਂ ਨਤ੍ਥੀਤਿ ਭਿਕ੍ਖੁਨੀ ਸਙ੍ਘਂ ਨ ਭਿਨ੍ਦਤਿ. ਨ ਕੇਵਲਂ ਪਰਿਵਾਸਾਭਾਵੋਯੇਵਾਤਿ ਆਹ ‘‘ਛਾਦਨਪਚ੍ਚਯਾਪੀ’’ਤਿਆਦਿ. ਏਤ੍ਥ ਚ ‘‘ਛਾਦਨਪਚ੍ਚਯਾਪਿ ਨ ਦੁਕ੍ਕਟਂ ਆਪਜ੍ਜਤੀ’’ਤਿ ਪਾਠੋ ਦਟ੍ਠਬ੍ਬੋ, ਛਾਦਨਪਚ੍ਚਯਾਪਿ ਦੁਕ੍ਕਟਂ ਨ ਆਪਜ੍ਜਤੀਤਿ ਅਤ੍ਥੋ. ਏਵਞ੍ਚ ਕਤ੍ਵਾ –

‘‘ਆਪਜ੍ਜਤਿ ਗਰੁਕਂ ਸਾਵਸੇਸਂ;

ਛਾਦੇਤਿ ਅਨਾਦਰਿਯਂ ਪਟਿਚ੍ਚ;

ਨ ਭਿਕ੍ਖੁਨੀ ਨੋ ਚ ਫੁਸੇਯ੍ਯ ਵਜ੍ਜਂ;

ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧) –

ਏਤ੍ਥ ਭਿਕ੍ਖੁਨਿਨਿਸੇਧੋ ਉਪਪਨ੍ਨੋ ਹੋਤਿ. ਯੇਸੁ ਪਨ ਪੋਤ੍ਥਕੇਸੁ ‘‘ਛਾਦਨਪਚ੍ਚਯਾ ਪਨ ਦੁਕ੍ਕਟਂ ਆਪਜ੍ਜਤੀ’’ਤਿ ਵਿਨਾ ਨ-ਕਾਰਂ ਪਾਠੋ ਦਿਸ੍ਸਤਿ, ਸੋ ਪਮਾਦਲੇਖੋਤਿ ਦਟ੍ਠਬ੍ਬਂ. ਤਸ੍ਮਾਤਿ ਯਸ੍ਮਾ ਪਰਿਵਾਸੋ ਨਾਮ ਨਤ੍ਥਿ, ਤਸ੍ਮਾ. ਅਤ੍ਤਨੋ ਸੀਮਂ ਸੋਧੇਤ੍ਵਾ ਵਿਹਾਰਸੀਮਾਯ ਵਾਤਿ ਵਿਹਾਰੇ ਬਦ੍ਧਸੀਮਮੇਵ ਸਨ੍ਧਾਯ ਵੁਤ੍ਤਂ. ਸੋਧੇਤੁਂ ਅਸਕ੍ਕੋਨ੍ਤੀਹੀਤਿ ਵਿਹਾਰਸੀਮਂ ਸੋਧੇਤੁਂ ਅਸਕ੍ਕੋਨ੍ਤੀਹਿ.

ਮੁਖਮਤ੍ਤਨਿਦਸ੍ਸਨਨ੍ਤਿ ਪਵੇਸੋਪਾਯਮਤ੍ਤਨਿਦਸ੍ਸਨਂ. ਏਤ੍ਥਾਹ – ਅਥ ਕਸ੍ਮਾ ਯਥਾ ਭਿਕ੍ਖੁਮਾਨਤ੍ਤਕਥਾਯ ‘‘ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮਾ’’ਤਿ (ਕਙ੍ਖਾ. ਅਟ੍ਠ. ਨਿਗਮਨਵਣ੍ਣਨਾ) ਵੁਤ੍ਤਂ, ਏਵਮਵਤ੍ਵਾ ‘‘ਗਾਮੂਪਚਾਰਤੋ ਚ ਭਿਕ੍ਖੂਨਂ ਵਿਹਾਰੂਪਚਾਰਤੋ ਚ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਇਧ ਵੁਤ੍ਤਨ੍ਤਿ? ਤਤ੍ਰ ਚੇਕੇ ਵਦਨ੍ਤਿ ‘‘ਭਿਕ੍ਖੂਨਂ ਵੁਤ੍ਤਪ੍ਪਕਾਰਂ ਪਦੇਸਂ ਅਤਿਕ੍ਕਮਿਤ੍ਵਾ ਗਾਮੇਪਿ ਤਂ ਕਮ੍ਮਂ ਕਾਤੁਂ ਵਟ੍ਟਤਿ, ਭਿਕ੍ਖੁਨੀਨਂ ਪਨ ਗਾਮੇ ਨ ਵਟ੍ਟਤਿ, ਤਸ੍ਮਾ ਏਵਂ ਵੁਤ੍ਤ’’ਨ੍ਤਿ. ਅਪਰੇ ਪਨ ਭਣਨ੍ਤਿ ‘‘ਭਿਕ੍ਖੂਨਮ੍ਪਿ ਗਾਮੇ ਨ ਵਟ੍ਟਤਿ, ਭਿਕ੍ਖੁਵਿਹਾਰੋ ਨਾਮ ਪੁਬ੍ਬੇਯੇਵ ਗਾਮੂਪਚਾਰਂ ਅਤਿਕ੍ਕਮਿਤ੍ਵਾ ਤਿਟ੍ਠਤਿ, ਤਸ੍ਮਾ ਗਾਮਂ ਅਵਤ੍ਵਾ ਵਿਹਾਰੂਪਚਾਰਮੇਵ ਹੇਟ੍ਠਾ ਵੁਤ੍ਤਂ. ਭਿਕ੍ਖੁਨੀਨਂ ਪਨ ਵਿਹਾਰੋ ਗਾਮੇਯੇਵ, ਨ ਬਹਿ, ਤਸ੍ਮਾ ਗਾਮੂਪਚਾਰਞ੍ਚ ਵਿਹਾਰੂਪਚਾਰਞ੍ਚ ਉਭਯਮੇਵੇਤ੍ਥ ਦਸ੍ਸਿਤਂ. ਤਸ੍ਮਾ ਉਭਯਤ੍ਥਾਪਿ ਅਤ੍ਥਤੋ ਨਾਨਾਤ੍ਥਂ ਨਤ੍ਥੀ’’ਤਿ. ਵੀਮਂਸਿਤ੍ਵਾ ਯਞ੍ਚੇਤ੍ਥ ਯੁਜ੍ਜਤਿ, ਤਂ ਗਹੇਤਬ੍ਬਂ.

ਤਤੋ ਪਟ੍ਠਾਯਾਤਿ ਆਰੋਚਿਤਕਾਲਤੋ ਪਟ੍ਠਾਯ.

ਸਙ੍ਘਭੇਦਕਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ

ਭਿਕ੍ਖੁਨਿਪਾਤਿਮੋਕ੍ਖੇ ਸਙ੍ਘਾਦਿਸੇਸਵਣ੍ਣਨਾ ਨਿਟ੍ਠਿਤਾ.