ਅਧਿਕਰਣਸਮਥਵਣ੍ਣਨਾ

ਗਣਨਪਰਿਚ੍ਛੇਦੋਤਿ ਸਙ੍ਖ੍ਯਾਪਰਿਚ੍ਛੇਦੋ. ਅਧਿਕਰੀਯਨ੍ਤਿ ਏਤ੍ਥਾਤਿ ਅਧਿਕਰਣਾਨਿ. ਕੇ ਅਧਿਕਰੀਯਨ੍ਤਿ? ਸਮਥਾ. ਕਥਂ ਅਧਿਕਰੀਯਨ੍ਤਿ? ਸਮਨਵਸੇਨ. ਤਸ੍ਮਾ ਤੇ ਤੇਸਂ ਸਮਨਵਸੇਨ ਪਵਤ੍ਤਨ੍ਤੀਤਿ ਆਹ ‘‘ਅਧਿਕਰਣਾਨਿ ਸਮੇਨ੍ਤੀ’’ਤਿਆਦਿ. ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਨ੍ਤਿ ਉਟ੍ਠਿਤਾਨਂ ਉਟ੍ਠਿਤਾਨਂ. ਕਿਞ੍ਚਾਪਿ ਅਧਿਕਰਣਟ੍ਠੇਨ ਏਕਵਿਧਂ, ਤਥਾਪਿ ਵਤ੍ਥੁਵਸੇਨ ਨਾਨਾ ਹੋਤੀਤਿ ‘‘ਅਧਿਕਰਣਾਨ’’ਨ੍ਤਿ ਬਹੁਵਚਨਂ ਕਤਂ. ਇਦਾਨਿ ਤਸ੍ਸ ਨਾਨਾਤ੍ਤਂ ਦਸ੍ਸੇਤ੍ਵਾ ਵਿਵਰਿਤੁਂ ‘‘ਵਿਵਾਦਾਧਿਕਰਣ’’ਨ੍ਤਿਆਦਿਮਾਹ. ਵਿਵਾਦੋਯੇਵ ਅਧਿਕਰਣਂ ਵਿਵਾਦਾਧਿਕਰਣਂ. ਏਸ ਨਯੋ ਸੇਸੇਸੁਪਿ. ਸਮਥਤ੍ਥਨ੍ਤਿ ਸਮਨਤ੍ਥਂ.

ਅਧਿਕਰਣਸ੍ਸ ਸਮ੍ਮੁਖਾ ਵਿਨਯਨਤੋ ਸਮ੍ਮੁਖਾਵਿਨਯੋ. ਦਬ੍ਬਮਲ੍ਲਪੁਤ੍ਤਤ੍ਥੇਰਸਦਿਸਸ੍ਸ ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਖੀਣਾਸਵਸ੍ਸੇਵ ਦਾਤਬ੍ਬੋ ਵਿਨਯੋ ਸਤਿਵਿਨਯੋ. ਸਮ੍ਮੂਲ਼੍ਹਸ੍ਸ ਗਗ੍ਗਭਿਕ੍ਖੁਸਦਿਸਸ੍ਸ ਉਮ੍ਮਤ੍ਤਕਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ. ਪਟਿਞ੍ਞਾਤੇਨ ਕਰਣਭੂਤੇਨ ਕਰਣਂ ਪਟਿਞ੍ਞਾਤਕਰਣਂ. ਅਥ ਵਾ ਪਟਿਞ੍ਞਾਤੇ ਆਪਨ੍ਨਭਾਵਾਦਿਕੇ ਕਰਣਂ ਕਿਰਿਯਾ, ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਪਰਿਵਾਸਦਾਨਾਦਿਵਸੇਨ ਚ ਪਵਤ੍ਤਂ ਵਚੀਕਮ੍ਮਂ ਪਟਿਞ੍ਞਾਤਕਰਣਂ. ਯਸ੍ਸਾ ਕਿਰਿਯਾਯ ਧਮ੍ਮਵਾਦਿਨੋ ਬਹੁਤਰਾ, ਏਸਾ ਯੇਭੁਯ੍ਯਸਿਕਾ ਨਾਮ. ਯੋ ਪਾਪੁਸ੍ਸਨ੍ਨਤਾਯ ਪਾਪਿਯੋ, ਪੁਗ੍ਗਲੋ, ਤਸ੍ਸ ਉਪਵਾਲ਼ਭਿਕ੍ਖੁਸਦਿਸਸ੍ਸ ਕਤ੍ਤਬ੍ਬਤੋ ਤਸ੍ਸਪਾਪਿਯਸਿਕਾ, ਅਲੁਤ੍ਤਸਮਾਸੋਯਂ. ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋ. ਯਥਾ (ਚੂਲ਼ਵ. ਅਟ੍ਠ. ੨੧੨) ਹਿ ਗੂਥਂ ਵਾ ਮੁਤ੍ਤਂ ਵਾ ਘਟ੍ਟਿਯਮਾਨਂ ਦੁਗ੍ਗਨ੍ਧਤਾਯ ਬਾਧਤਿ, ਤਿਣੇਹਿ ਅਵਤ੍ਥਰਿਤ੍ਵਾ ਸੁਪ੍ਪਟਿਚ੍ਛਾਦਿਤਸ੍ਸ ਪਨਸ੍ਸ ਗਨ੍ਧੋ ਨ ਬਾਧਤਿ, ਏਵਮੇਵ ਯਂ ਅਧਿਕਰਣਂ ਮੂਲਾਨੁਮੂਲਂ ਗਨ੍ਤ੍ਵਾ ਵੂਪਸਮਿਯਮਾਨਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤਤਿ, ਤਂ ਇਮਿਨਾ ਕਮ੍ਮੇਨ ਵੂਪਸਨ੍ਤਂ ਗੂਥਂ ਵਿਯ ਤਿਣਵਤ੍ਥਾਰਕੇਨ ਪਟਿਚ੍ਛਨ੍ਨਂ ਸੁਵੂਪਸਨ੍ਤਂ ਹੋਤਿ. ਤੇਨ ਵੁਤ੍ਤਂ ‘‘ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋ’’ਤਿ.

ਤਤ੍ਰਾਤਿ ਤੇਸੁ ਸਤ੍ਤਸੁ ਅਧਿਕਰਣਸਮਥੇਸੁ. ‘‘ਅਟ੍ਠਾਰਸਹਿ ਵਤ੍ਥੂਹੀ’’ਤਿ ਲਕ੍ਖਣਵਚਨਮੇਤਂ ‘‘ਯਦਿ ਮੇ ਬ੍ਯਾਧਿਕਾ ਭਵੇਯ੍ਯੁਂ, ਦਾਤਬ੍ਬਮਿਦਮੋਸਧ’’ਨ੍ਤਿਆਦਿਨਾ (ਸਂ. ਨਿ. ਟੀ. ੨.੩.੩੯-੪੨) ਵਿਯ. ਤਸ੍ਮਾ ਤੇਸੁ ਅਞ੍ਞਤਰੇਨ ਵਿਵਦਨ੍ਤਾ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤੀਤਿ ਵੁਚ੍ਚਤਿ. ਵਿਵਾਦੋਤਿ ਵਿਪਚ੍ਚਨੀਕਵਾਦੋ. ਉਪਵਦਨਾਤਿ ਅਕ੍ਕੋਸੋ. ਚੋਦਨਾਤਿ ਅਨੁਯੋਗੋ. ਦ੍ਵੇਤਿ ਥੁਲ੍ਲਚ੍ਚਯਦੁਬ੍ਭਾਸਿਤਾਪਤ੍ਤਿਯੋ ਦ੍ਵੇ. ਚਤੁਨ੍ਨਂ ਕਮ੍ਮਾਨਂ ਕਰਣਨ੍ਤਿ ਚਤੁਨ੍ਨਂ ਕਮ੍ਮਾਨਂ ਅਨ੍ਤਰੇ ਯਸ੍ਸ ਕਸ੍ਸਚਿ ਕਮ੍ਮਸ੍ਸ ਕਰਣਂ.

ਏਵਂ ਅਧਿਕਰਣਾਨਿ ਦਸ੍ਸੇਤ੍ਵਾ ਇਦਾਨਿ ਤੇਸੁ ਇਦਂ ਅਧਿਕਰਣਂ ਏਤ੍ਤਕੇਹਿ ਸਮਥੇਹਿ ਸਮ੍ਮਤੀਤਿ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਂ, ਤਸ੍ਮਿਂਯੇਵ ਵਾ ਸਮ੍ਮਤੀਤਿ ਸਮ੍ਬਨ੍ਧੋ. ਏਵਂ ਸੇਸੇਸੁਪਿ. ਤਤ੍ਥ ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਨ੍ਤਿ ‘‘ਯਸ੍ਮਿਂ ਵਿਹਾਰੇ ਮਯ੍ਹਂ ਇਮਿਨਾ ਪਤ੍ਤੋ ਗਹਿਤੋ, ਚੀਵਰਂ ਗਹਿਤ’’ਨ੍ਤਿਆਦਿਨਾ (ਪਰਿ. ਅਟ੍ਠ. ੩੪੧) ਨਯੇਨ ਪਤ੍ਤਚੀਵਰਾਦੀਨਂ ਅਤ੍ਥਾਯ ਵਿਵਾਦਾਧਿਕਰਣਂ ਉਪ੍ਪਨ੍ਨਂ ਹੋਤਿ. ਤਸ੍ਮਿਂਯੇਵ ਵਾ ਸਮ੍ਮਤੀਤਿ ਤਸ੍ਮਿਂ ਵਿਹਾਰੇਯੇਵ ਆਵਾਸਿਕੇਹਿ ਸਨ੍ਨਿਪਤਿਤ੍ਵਾ ‘‘ਅਲਂ, ਆਵੁਸੋ’’ਤਿ ਅਤ੍ਥਪਚ੍ਚਤ੍ਥਿਕੇ ਸਞ੍ਞਾਪੇਤ੍ਵਾ ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵ ਵੂਪਸਮੇਨ੍ਤੇਹਿ ਸਮ੍ਮਤਿ. ਸਚੇ ਪਨ ਤਂ ਅਧਿਕਰਣਂ ਨੇਵਾਸਿਕਾ ਵੂਪਸਮੇਤੁਂ ਨ ਸਕ੍ਕੋਨ੍ਤਿ, ਅਥਞ੍ਞੋ ਵਿਨਯਧਰੋ ਆਗਨ੍ਤ੍ਵਾ ‘‘ਕਿਂ, ਆਵੁਸੋ, ਇਮਸ੍ਮਿਂ ਵਿਹਾਰੇ ਉਪੋਸਥੋ ਵਾ ਪਵਾਰਣਾ ਵਾ ਠਿਤਾ’’ਤਿ ਪੁਚ੍ਛਤਿ, ਤੇਹਿ ਚ ਤਸ੍ਮਿਂ ਕਾਰਣੇ ਕਥਿਤੇ ਤਂ ਅਧਿਕਰਣਂ ਖਨ੍ਧਕਤੋ ਚ ਪਰਿਵਾਰਤੋ ਚ ਸੁਤ੍ਤੇਨ ਵਿਨਿਚ੍ਛਿਨਿਤ੍ਵਾ ਵੂਪਸਮੇਤਿ. ਏਵਮ੍ਪਿ ਏਤਸ੍ਮਿਂਯੇਵ ਸਮ੍ਮਤੀਤਿ ਦਟ੍ਠਬ੍ਬਂ.

ਅਞ੍ਞਤ੍ਥ ਵੂਪਸਮੇਤੁਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ ਸਮ੍ਮਤੀਤਿ ‘‘ਨ ਮਯਂ ਏਤਸ੍ਸ ਵਿਨਿਚ੍ਛਯੇ ਤਿਟ੍ਠਾਮ, ਨਾਯਂ ਵਿਨਯੇ ਕੁਸਲੋ, ਅਮੁਕਸ੍ਮਿਂ ਨਾਮ ਗਾਮੇ ਵਿਨਯਧਰਾ ਥੇਰਾ ਵਸਨ੍ਤਿ, ਤਤ੍ਥ ਗਨ੍ਤ੍ਵਾ ਵਿਨਿਚ੍ਛਿਨਿਸ੍ਸਾਮਾ’’ਤਿ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ ਕਾਰਣਂ ਸਲ੍ਲਕ੍ਖੇਤ੍ਵਾ ਅਞ੍ਞਮਞ੍ਞਂ ਸਞ੍ਞਾਪੇਨ੍ਤੇਹਿ, ਅਞ੍ਞੇਹਿ ਵਾ ਤੇ ਭਿਕ੍ਖੂ ਨਿਜ੍ਝਾਪੇਨ੍ਤੇਹਿ ਸਮ੍ਮਤਿ. ਨ ਹੇਵ ਖੋ ਪਨ ਅਞ੍ਞਮਞ੍ਞਸਞ੍ਞਤ੍ਤਿਯਾ ਵਾ ਸਭਾਗਭਿਕ੍ਖੁਨਿਜ੍ਝਾਪਨੇਨ ਵਾ ਵੂਪਸਨ੍ਤਂ ਹੋਤਿ, ਅਪਿਚ ਖੋ ਪਟਿਪਥਂ ਆਗਚ੍ਛਨ੍ਤੋ ਏਕੋ ਵਿਨਯਧਰੋ ਦਿਸ੍ਵਾ ‘‘ਕਤ੍ਥਾਵੁਸੋ, ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਅਮੁਕਂ ਨਾਮ ਗਾਮਂ ਇਮਿਨਾ ਨਾਮ ਕਰਣੇਨਾ’’ਤਿ ਵੁਤ੍ਤੇ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਤਤ੍ਥੇਵ ਧਮ੍ਮੇਨ ਵਿਨਯੇਨ ਤਂ ਅਧਿਕਰਣਂ ਵੂਪਸਮੇਤਿ. ਏਵਮ੍ਪਿ ਅਨ੍ਤਰਾਮਗ੍ਗੇ ਵੂਪਸਮ੍ਮਤਿ ਨਾਮ.

ਯਤ੍ਥ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ਵਾਤਿ ਸਚੇ ਪਨ ‘‘ਅਲਂ, ਆਵੁਸੋ, ਕਿਂ ਤਤ੍ਥ ਗਤੇਨਾ’’ਤਿ ਵੁਚ੍ਚਮਾਨਾਪਿ ‘‘ਮਯਂ ਤਤ੍ਥੇਵ ਗਨ੍ਤ੍ਵਾ ਵਿਨਿਚ੍ਛਯਂ ਪਾਪੇਸ੍ਸਾਮਾ’’ਤਿ (ਪਰਿ. ਅਟ੍ਠ. ੩੪੧) ਵਿਨਯਧਰਸ੍ਸ ਵਚਨਂ ਅਨਾਦਿਯਿਤ੍ਵਾ ਯਤ੍ਥ ਗਨ੍ਤ੍ਵਾ ਸਭਾਗਭਿਕ੍ਖੁਸਙ੍ਘਸ੍ਸ ਅਧਿਕਰਣਂ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ‘‘ਅਲਂ, ਆਵੁਸੋ, ਸਙ੍ਘਸਨ੍ਨਿਪਾਤਂ ਨਾਮ ਗਰੁਕ’’ਨ੍ਤਿ ਤਤ੍ਥੇਵ ਨਿਸੀਦਿਤ੍ਵਾ ਵਿਨਿਚ੍ਛਿਤਂ ਸਮ੍ਮਤਿ. ਨ ਹੇਵ ਖੋ ਪਨ ਸਭਾਗਭਿਕ੍ਖੂਨਂ ਸਞ੍ਞਤ੍ਤਿਯਾ ਵੂਪਸਨ੍ਤਂ ਹੋਤਿ, ਅਪਿਚ ਖੋ ਸਙ੍ਘਂ ਸਨ੍ਨਿਪਾਤੇਤ੍ਵਾ ਆਰੋਚਿਤਂ ਸਙ੍ਘਮਜ੍ਝੇ ਵਿਨਯਧਰਾ ਵੂਪਸਮੇਨ੍ਤਿ. ਏਵਮ੍ਪਿ ਤਤ੍ਥ ਸਙ੍ਘੇਨ ਵਿਨਿਚ੍ਛਿਤਂ ਸਮ੍ਮਤਿ ਨਾਮ.

ਉਬ੍ਬਾਹਿਕਾਯ ਸਮ੍ਮਤਪੁਗ੍ਗਲੇਹਿ ਵਾ ਵਿਨਿਚ੍ਛਿਤਨ੍ਤਿ ਅਪਲੋਕੇਤ੍ਵਾ ਵਾ ਖਨ੍ਧਕੇ ਵੁਤ੍ਤਾਯ ਵਾ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਤੇਹਿ ਪੁਗ੍ਗਲੇਹਿ ਵਿਸੁਂ ਵਾ ਨਿਸੀਦਿਤ੍ਵਾ, ਤਸ੍ਸਾਯੇਵ ਵਾ ਪਰਿਸਾਯ ‘‘ਅਞ੍ਞੇਨ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੨੩੧) ਸਾਵੇਤ੍ਵਾ ਵਿਨਿਚ੍ਛਿਤਂ. ਅਯਨ੍ਤਿ ਅਯਂ ਯਥਾਵੁਤ੍ਤਾ ਚਤੁਬ੍ਬਿਧਾ ਸਮ੍ਮੁਖਤਾ.

ਕਾਰਕਸਙ੍ਘਸ੍ਸਾਤਿ ਵੂਪਸਮੇਤੁਂ ਸਨ੍ਨਿਪਤਿਤਸ੍ਸ ਕਾਰਕਸਙ੍ਘਸ੍ਸ. ਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋਤਿ ‘‘ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤੀ’’ਤਿ (ਚੂਲ਼ਵ. ੨੨੮) ਏਵਂ ਵੁਤ੍ਤਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ, ਏਤੇਨ ਯਥਾ ਤਥਾ ਪਧਾਨਕਾਰਕਪੁਗ੍ਗਲਾਨਂ ਸਮ੍ਮੁਖਤਾਮਤ੍ਤਂ ਸਙ੍ਘਸਮ੍ਮੁਖਤਾ ਨਾਮ ਨ ਹੋਤੀਤਿ ਦਸ੍ਸੇਤਿ. ਭੂਤਤਾਤਿ ਤਚ੍ਛਤਾ. ਸਚ੍ਚਪਰਿਯਾਯੋ ਹਿ ਇਧ ਧਮ੍ਮਸਦ੍ਦੋ ‘‘ਧਮ੍ਮਵਾਦੀ’’ਤਿਆਦੀਸੁ (ਦੀ. ਨਿ. ੧.੯, ੧੯੪) ਵਿਯ. ਵਿਨੇਤਿ ਏਤੇਨਾਤਿ ਵਿਨਯੋ, ਤਸ੍ਸ ਤਸ੍ਸ ਅਧਿਕਰਣਸ੍ਸ ਵੂਪਸਮਨਾਯ ਭਗਵਤਾ ਵੁਤ੍ਤਵਿਧਿ, ਤਸ੍ਸ ਵਿਨਯਸ੍ਸ ਸਮ੍ਮੁਖਤਾ ਵਿਨਯਸਮ੍ਮੁਖਤਾ. ਤੇਨਾਹ ‘‘ਯਥਾ ਤਂ…ਪੇ… ਵਿਨਯਸਮ੍ਮੁਖਤਾ’’ਤਿ. ਯੇਨਾਤਿ ਯੇਨ ਪੁਗ੍ਗਲੇਨ. ਅਤ੍ਥਪਚ੍ਚਤ੍ਥਿਕਾਨਨ੍ਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੨੮) ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾਨਂ. ਸਙ੍ਘਸਮ੍ਮੁਖਤਾ ਪਰਿਹਾਯਤਿ ਸਮ੍ਮਤਪੁਗ੍ਗਲੇਹੇਵ ਵੂਪਸਮਨਤੋ.

ਨਨ੍ਤਿ ਵਿਵਾਦਾਧਿਕਰਣਂ. ਪਞ੍ਚਙ੍ਗਸਮਨ੍ਨਾਗਤਨ੍ਤਿ (ਚੂਲ਼ਵ. ੨੩੪) ‘‘ਨ ਛਨ੍ਦਾਗਤਿਂ ਗਚ੍ਛਤਿ, ਨ ਦੋਸਾਗਤਿਂ ਗਚ੍ਛਤਿ, ਨ ਮੋਹਾਗਤਿਂ ਗਚ੍ਛਤਿ, ਨ ਭਯਾਗਤਿਂ ਗਚ੍ਛਤਿ, ਗਹਿਤਾਗਹਿਤਂ ਜਾਨਾਤੀ’’ਤਿ ਵੁਤ੍ਤੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ. ਗੂਲ਼੍ਹਕਵਿਵਟਕਸਕਣ੍ਣਜਪ੍ਪਕੇਸੁ ਤੀਸੁ ਸਲਾਕਗ੍ਗਾਹੇਸੂਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਤੇਸਂ ਭਿਕ੍ਖੂਨਂ ਸਞ੍ਞਤ੍ਤਿਯਾ ਤਯੋ ਸਲਾਕਗ੍ਗਾਹਕੇ ਗੂਲ਼੍ਹਕਂ, ਵਿਵਟਕਂ, ਸਕਣ੍ਣਜਪ੍ਪਕ’’ਨ੍ਤਿ (ਚੂਲ਼ਵ. ੨੩੫) ਸਮਥਕ੍ਖਨ੍ਧਕੇ ਵੁਤ੍ਤੇਸੁ ਤੀਸੁ ਸਲਾਕਗ੍ਗਾਹੇਸੁ. ਸਲਾਕਂ ਗਾਹੇਤ੍ਵਾਤਿ ਧਮ੍ਮਵਾਦੀਨਞ੍ਚ ਅਧਮ੍ਮਵਾਦੀਨਞ੍ਚ ਸਲਾਕਾਯੋ ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ ਚੀਵਰਭੋਗੇ ਕਤ੍ਵਾ ਸਮਥਕ੍ਖਨ੍ਧਕੇ ਵੁਤ੍ਤਨਯੇਨ ਗਾਹਾਪੇਤ੍ਵਾ. ਏਵਞ੍ਹਿ ਤਤ੍ਥ ਵੁਤ੍ਤਂ –

‘‘ਕਥਞ੍ਚ, ਭਿਕ੍ਖਵੇ, ਗੂਲ਼੍ਹਕੋ ਸਲਾਕਗ੍ਗਾਹੋ ਹੋਤਿ? ਤੇਨ ਸਲਾਕਗ੍ਗਾਹਾਪਕੇਨ ਭਿਕ੍ਖੁਨਾ ਸਲਾਕਾਯੋ ਵਣ੍ਣਾਵਣ੍ਣਾਯੋ ਕਤ੍ਵਾ ਏਕਮੇਕੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ ‘ਅਯਂ ਏਵਂਵਾਦਿਸ੍ਸ ਸਲਾਕਾ, ਅਯਂ ਏਵਂਵਾਦਿਸ੍ਸ ਸਲਾਕਾ, ਯਂ ਇਚ੍ਛਸਿ, ਤਂ ਗਣ੍ਹਾਹੀ’ਤਿ. ਗਹਿਤੇ ਵਤ੍ਤਬ੍ਬੋ ‘ਮਾ ਚ ਕਸ੍ਸਚਿ ਦਸ੍ਸੇਹੀ’ਤਿ. ਸਚੇ ਜਾਨਾਤਿ ‘ਅਧਮ੍ਮਵਾਦੀ ਬਹੁਤਰਾ’ਤਿ, ‘ਦੁਗ੍ਗਹੋ’ਤਿ ਪਚ੍ਚੁਕ੍ਕਡ੍ਢਿਤਬ੍ਬਂ. ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ‘ਸੁਗ੍ਗਹੋ’ਤਿ ਸਾਵੇਤਬ੍ਬਂ. ਏਵਂ ਖੋ, ਭਿਕ੍ਖਵੇ, ਗੂਲ਼੍ਹਕੋ ਸਲਾਕਗ੍ਗਾਹੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਵਿਵਟਕੋ ਸਲਾਕਗ੍ਗਾਹੋ ਹੋਤਿ? ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ਵਿਸ੍ਸਟ੍ਠੇਨੇਵ ਵਿਵਟੇਨ ਗਾਹੇਤਬ੍ਬੋ. ਏਵਂ ਖੋ, ਭਿਕ੍ਖਵੇ, ਵਿਵਟਕੋ ਸਲਾਕਗ੍ਗਾਹੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਸਕਣ੍ਣਜਪ੍ਪਕੋ ਸਲਾਕਗ੍ਗਾਹੋ ਹੋਤਿ? ਤੇਨ ਸਲਾਕਗ੍ਗਾਹਾਪਕੇਨ ਭਿਕ੍ਖੁਨਾ ਏਕਮੇਕਸ੍ਸ ਭਿਕ੍ਖੁਨੋ ਉਪਕਣ੍ਣਕੇ ਆਰੋਚੇਤਬ੍ਬਂ ‘ਅਯਂ ਏਵਂਵਾਦਿਸ੍ਸ ਸਲਾਕਾ, ਅਯਂ ਏਵਵਾਦਿਸ੍ਸ ਸਲਾਕਾ, ਯਂ ਇਚ੍ਛਸਿ, ਤਂ ਗਣ੍ਹਾਹੀ’ਤਿ. ਗਹਿਤੇ ਵਤ੍ਤਬ੍ਬੋ ‘ਮਾ ਚ ਕਸ੍ਸਚਿ ਆਰੋਚੇਹੀ’ਤਿ. ਸਚੇ ਜਾਨਾਤਿ ‘ਅਧਮ੍ਮਵਾਦੀ ਬਹੁਤਰਾ’ਤਿ, ‘ਦੁਗ੍ਗਹੋ’ਤਿ ਪਚ੍ਚੁਕ੍ਕਡ੍ਢਿਤਬ੍ਬਂ. ਸਚੇ ਜਾਨਾਤਿ ‘ਧਮ੍ਮਵਾਦੀ ਬਹੁਤਰਾ’ਤਿ, ‘ਸੁਗ੍ਗਹੋ’ਤਿ ਸਾਵੇਤਬ੍ਬਂ. ਏਵਂ ਖੋ, ਭਿਕ੍ਖਵੇ, ਸਕਣ੍ਣਜਪ੍ਪਕੋ ਸਲਾਕਗ੍ਗਾਹੋ ਹੋਤੀ’’ਤਿ.

ਏਤ੍ਥ ਚ ਅਲਜ੍ਜੁਸ੍ਸਨ੍ਨਾਯ (ਚੂਲ਼ਵ. ਅਟ੍ਠ. ੨੩੫) ਪਰਿਸਾਯ ਗੂਲ਼੍ਹਕੋ ਸਲਾਕਗ੍ਗਾਹੋ ਕਾਤਬ੍ਬੋ, ਲਜ੍ਜੁਸ੍ਸਨ੍ਨਾਯ ਵਿਵਟਕੋ, ਬਾਲੁਸ੍ਸਨ੍ਨਾਯ ਸਕਣ੍ਣਜਪ੍ਪਕੋਤਿ ਵੇਦਿਤਬ੍ਬੋ. ਧਮ੍ਮਵਾਦੀਨਂ ਯੇਭੁਯ੍ਯਤਾਯਾਤਿ ਧਮ੍ਮਵਾਦੀਨਂ ਏਕੇਨਪਿ ਅਧਿਕਤਾਯ, ਕੋ ਪਨ ਵਾਦੋ ਦ੍ਵੀਹਿ ਤੀਹਿ.

‘‘ਚਤੂਹਿ ਸਮਥੇਹਿ ਸਮ੍ਮਤੀ’’ਤਿ ਇਦਂ ਸਬ੍ਬਸਙ੍ਗਾਹਕਵਸੇਨ ਵੁਤ੍ਤਂ, ਤਤ੍ਥ ਪਨ ਦ੍ਵੀਹਿ ਏਵ ਵੂਪਸਮਨਂ ਦਟ੍ਠਬ੍ਬਂ. ਏਵਂ ਵਿਨਿਚ੍ਛਿਤਨ੍ਤਿ ਸਚੇ ਆਪਤ੍ਤਿ ਨਤ੍ਥਿ, ਉਭੋ ਖਮਾਪੇਤ੍ਵਾ, ਅਥ ਅਤ੍ਥਿ, ਆਪਤ੍ਤਿਂ ਦਸ੍ਸੇਤ੍ਵਾ ਰੋਪਨਵਸੇਨ ਵਿਨਿਚ੍ਛਿਤਂ. ਪਟਿਕਮ੍ਮਂ ਪਨ ਆਪਤ੍ਤਾਧਿਕਰਣਸਮਥੇ ਪਰਤੋ ਆਗਮਿਸ੍ਸਤੀਤਿ. ਨ ਸਮਣਸਾਰੁਪ੍ਪਂ ਅਸ੍ਸਾਮਣਕਂ, ਸਮਣੇਹਿ ਅਕਤ੍ਤਬ੍ਬਂ, ਤਸ੍ਮਿਂ. ਅਜ੍ਝਾਚਾਰੇ ਵੀਤਿਕ੍ਕਮੇ ਸਤਿ.

ਪਾਰਾਜਿਕਸਾਮਨ੍ਤੇਨ ਵਾਤਿ ਦੁਕ੍ਕਟੇਨ ਵਾ ਥੁਲ੍ਲਚ੍ਚਯੇਨ ਵਾ. ਮੇਥੁਨਧਮ੍ਮੇ ਹਿ ਪਾਰਾਜਿਕਸਾਮਨ੍ਤਾ ਨਾਮ ਦੁਕ੍ਕਟਂ ਹੋਤਿ, ਅਦਿਨ੍ਨਾਦਾਨਾਦੀਸੁ ਥੁਲ੍ਲਚ੍ਚਯਂ. ਪਟਿਚਰਤੋਤਿ ਪਟਿਚ੍ਛਾਦੇਨ੍ਤਸ੍ਸ. ਅਚ੍ਛਿਨ੍ਨਮੂਲੋ ਭਵਿਸ੍ਸਤੀਤਿ ਪਾਰਾਜਿਕਂ ਅਨਾਪਨ੍ਨੋ ਭਵਿਸ੍ਸਤਿ, ਸੀਲਵਾ ਭਵਿਸ੍ਸਤੀਤਿ ਵੁਤ੍ਤਂ ਹੋਤਿ. ਸਮ੍ਮਾ ਵਤ੍ਤਿਤ੍ਵਾਤਿ ਵਤ੍ਤਂ ਪੂਰੇਤ੍ਵਾ. ਓਸਾਰਣਂ ਲਭਿਸ੍ਸਤੀਤਿ ਕਮ੍ਮਪ੍ਪਟਿਪ੍ਪਸ੍ਸਦ੍ਧਿਂ ਲਭਿਸ੍ਸਤਿ.

ਤਸ੍ਸਾਤਿ ਆਪਤ੍ਤਾਧਿਕਰਣਸ੍ਸ. ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ ਪਟਿਞ੍ਞਾਯ, ਤਥਾਰੂਪਾਯ ਖਨ੍ਤਿਯਾ ਵਾ ਵਿਨਾ ਅਵੂਪਸਮਨਤੋ. ਯਾ ਪਨ ਪਟਿਞ੍ਞਾਤਿ ਸਮ੍ਬਨ੍ਧੋ.

ਏਤ੍ਥਾਤਿ ਆਪਤ੍ਤਿਦੇਸਨਾਯਂ. ਸਿਯਾਤਿ ਅਵਸ੍ਸਂ. ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯਾਤਿ ਕਕ੍ਖਲ਼ਭਾਵਾਯ ਚੇਵ ਵਾਲ਼ਭਾਵਾਯ ਚ. ਥੁਲ੍ਲਵਜ੍ਜਨ੍ਤਿ ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚ. ਗਿਹਿਪ੍ਪਟਿਸਂਯੁਤ੍ਤਨ੍ਤਿ ਗਿਹੀਨਂ ਹੀਨੇਨ ਖੁਂਸਨਵਮ੍ਭਨਧਮ੍ਮਿਕਪ੍ਪਟਿਸ੍ਸਵੇਸੁ ਆਪਨ੍ਨਂ ਆਪਤ੍ਤਿਂ.

ਯਥਾਨੁਰੂਪਨ੍ਤਿ ‘‘ਦ੍ਵੀਹਿ ਸਮਥੇਹਿ, ਤੀਹਿ, ਚਤੂਹਿ, ਏਕੇਨਾ’’ਤਿ ਏਵਂ ਵੁਤ੍ਤਨਯੇਨੇਵ ਯਥਾਨੁਰੂਪਂ. ਏਤ੍ਥਾਤਿ ਇਮਸ੍ਮਿਂ ਸਮਥਾਧਿਕਾਰੇ. ਵਿਨਿਚ੍ਛਯਨਯੋਤਿ ਵਿਨਿਚ੍ਛਯਨਯਮਤ੍ਤਂ. ਤੇਨਾਹ ‘‘ਵਿਤ੍ਥਾਰੋ ਪਨਾ’’ਤਿਆਦਿ. ਅਸ੍ਸਾਤਿ ਵਿਤ੍ਥਾਰਸ੍ਸ. ਸਮਨ੍ਤਪਾਸਾਦਿਕਾਯਂ ਵੁਤ੍ਤੋਤਿ ਸਮਨ੍ਤਪਾਸਾਦਿਕਾਯ ਨਾਮ ਵਿਨਯਟ੍ਠਕਥਾਯਂ ਵੁਤ੍ਤੋ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਧਿਪ੍ਪਾਯੋ.

ਏਤ੍ਤਕਨ੍ਤਿ ਏਤਂਪਰਮਂ, ਨ ਇਤੋ ਭਿਯ੍ਯੋ.

ਅਧਿਕਰਣਸਮਥਵਣ੍ਣਨਾ ਨਿਟ੍ਠਿਤਾ.

ਇਤਿ ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਵਿਨਯਤ੍ਥਮਞ੍ਜੂਸਾਯਂ ਲੀਨਤ੍ਥਪ੍ਪਕਾਸਨਿਯਂ

ਭਿਕ੍ਖੁਪਾਤਿਮੋਕ੍ਖਵਣ੍ਣਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ