੩੦-੩੨. ਸਮਤਿਤ੍ਤਿਕਾਦਿਸਿਕ੍ਖਾਪਦਵਣ੍ਣਨਾ

ਸਮਤਿਤ੍ਤਿਕਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਸਮਤਿਤ੍ਤਿਕਂ ਕਤ੍ਵਾਤਿ ਅਤ੍ਥੋ. ਏਵਮਞ੍ਞੇਸੁਪਿ ਈਦਿਸੇਸੁ ਠਾਨੇਸੁ ਅਤ੍ਥੋ ਦਟ੍ਠਬ੍ਬੋ. ਸਮਪੁਣ੍ਣਨ੍ਤਿ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੬੦੫) ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਾਸਮਪੁਣ੍ਣਂ. ਸਮਭਰਿਤਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਤਞ੍ਚ ਖੋ ਅਧਿਟ੍ਠਾਨੁਪਗਪਤ੍ਤਸ੍ਸੇਵ, ਨੇਤਰਸ੍ਸ. ਤੇਨਾਹ ‘‘ਅਧਿਟ੍ਠਾਨੁਪਗਪਤ੍ਤਸ੍ਸਾ’’ਤਿਆਦਿ. ਰਚਿਤਨ੍ਤਿ ਕਤਂ, ਪਕ੍ਖਿਤ੍ਤਂ ਪੂਰਿਤਨ੍ਤਿ ਅਤ੍ਥੋ. ਯਂ ਕਿਞ੍ਚਿ ਯਾਵਕਾਲਿਕਨ੍ਤਿ ਯਾਗੁਭਤ੍ਤਫਲਾਫਲਾਦਿਂ ਯਂ ਕਿਞ੍ਚਿ ਆਮਿਸਜਾਤਿਕਂ. ਯਤ੍ਥ ਕਤ੍ਥਚੀਤਿ ਅਧਿਟ੍ਠਾਨੁਪਗੋ ਵਾ ਹੋਤੁ, ਅਨਧਿਟ੍ਠਾਨੁਪਗੋ ਵਾ ਯਤ੍ਥ ਕਤ੍ਥਚਿ ਪਤ੍ਤੇ. ਥੂਪੀਕਤਾਨੀਤਿ ਥੂਪਂ ਵਿਯ ਕਤਾਨਿ, ਅਧਿਟ੍ਠਾਨੁਪਗਸ੍ਸ ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਂ ਅਤਿਕ੍ਕਮਿਤ੍ਵਾ ਕਤਾਨੀਤਿ ਅਤ੍ਥੋ. ਇਦਞ੍ਚ ‘‘ਯਾਮਕਾਲਿਕਾਦੀਨੀ’’ਤਿ ਇਮਸ੍ਸ ਵਸੇਨ ਵੁਤ੍ਤਂ, ‘‘ਯਾਵਕਾਲਿਕ’’ਨ੍ਤਿ ਇਮਸ੍ਸ ਪਨ ਵਸੇਨ ਵਚਨਬ੍ਯਤ੍ਤਯਂ ਕਤ੍ਵਾ ‘‘ਥੂਪੀਕਤਮ੍ਪਿ ਵਟ੍ਟਤੀ’’ਤਿ ਯੋਜੇਤਬ੍ਬਂ. ਪਿ-ਸਦ੍ਦੇਨ ਅਥੂਪੀਕਤਾਨਿ ਵਟ੍ਟਨ੍ਤੀਤਿ ਏਤ੍ਥ ਕਥਾਵ ਨਤ੍ਥੀਤਿ ਦਸ੍ਸੇਤਿ. ਹੇਟ੍ਠਾ ਓਰੋਹਤੀਤਿ ਸਮਨ੍ਤਾ ਓਕਾਸਸਬ੍ਭਾਵਤੋ ਚਾਲਿਯਮਾਨਂ ਹੇਟ੍ਠਾ ਭਸ੍ਸਤਿ. ਤਕ੍ਕੋਲਵਟਂਸਕਾਦਯੋਤਿ ਏਤ੍ਥ ਮਤ੍ਥਕੇ ਠਪਿਤਤਕ੍ਕੋਲਮੇਵ ਵਟਂਸਕਸਦਿਸਤ੍ਤਾ ਤਕ੍ਕੋਲਵਟਂਸਕਂ. ਆਦਿਸਦ੍ਦੇਨ ਪੁਪ੍ਫਵਟਂਸਕਕਟੁਕਫਲਾਦਿਵਟਂਸਕਾਨਂ (ਪਾਚਿ. ਅਟ੍ਠ. ੬੦੫) ਗਹਣਂ, ਨ ਤਂ ਥੂਪੀਕਤਂ ਨਾਮ ਹੋਤਿ ਪਾਟੇਕ੍ਕਂ ਭਾਜਨਤ੍ਤਾ ਪਣ੍ਣਾਦੀਨਂ.

ਸਮਤਿਤ੍ਤਿਕਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.