੧. ਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ

‘‘ਅਨ੍ਤਰਘਰੇ’’ਤਿ ਵਿਸੇਸੇਤ੍ਵਾ ਨ ਵੁਤ੍ਤਤ੍ਤਾ ‘‘ਆਰਾਮੇਪਿ ਅਨ੍ਤਰਘਰੇਪਿ ਸਬ੍ਬਤ੍ਥਾ’’ਤਿ ਵੁਤ੍ਤਂ. ਆਰਾਮੇਪੀਤਿ ਬੁਦ੍ਧੂਪਟ੍ਠਾਨਾਦਿਕਾਲਂ ਸਨ੍ਧਾਯ ਵੁਤ੍ਤਂ. ਯਥਾ ‘‘ਤਤ੍ਰਿਮੇ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤੀ’’ਤਿਆਦਿਨਾ ਤਤ੍ਥ ਤਤ੍ਥ ਪਰਿਚ੍ਛੇਦੋ ਕਤੋ, ਏਵਮੇਤ੍ਥਾਪਿ ‘‘ਤਤ੍ਰਿਮੇ ਪਞ੍ਚਸਤ੍ਤਤਿ ਸੇਖਿਯਾ ਧਮ੍ਮਾ ਉਦ੍ਦੇਸਂ ਆਗਚ੍ਛਨ੍ਤੀ’’ਤਿ ਕਸ੍ਮਾ ਪਰਿਚ੍ਛੇਦੋ ਨ ਕਤੋਤਿ ਆਹ ‘‘ਏਤ੍ਥ ਚਾ’’ਤਿਆਦਿ. ਵਤ੍ਤਕ੍ਖਨ੍ਧਕੇ ਵੁਤ੍ਤਵਤ੍ਤਾਨਿਪੀਤਿ ਆਗਨ੍ਤੁਕਾਵਾਸਿਕਗਮਿਕਾਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਾਰਞ੍ਞਸੇਨਾਸਨਜਨ੍ਤਾਘਰਵਚ੍ਚਕੁਟਿਉਪਜ੍ਝਾਚਰਿਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਵਤ੍ਤਾਨਿ. ਇਦਞ੍ਚ ਨਿਦਸ੍ਸਨਮਤ੍ਤਂ ਅਞ੍ਞੇਸਮ੍ਪਿ ਖਨ੍ਧਕਵਤ੍ਤਾਨਂ ਏਤ੍ਥੇਵ ਸਙ੍ਗਹਸ੍ਸ ਇਚ੍ਛਿਤਬ੍ਬਤ੍ਤਾ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸੇਖਿਯਗ੍ਗਹਣੇਨ ਚੇਤ੍ਥ ਵਤ੍ਤਕ੍ਖਨ੍ਧਕਾਦੀਸੁ (ਚੂਲ਼ਵ. ੩੫੬ ਆਦਯੋ) ਆਗਤਵਤ੍ਤਾਦੀਨਮ੍ਪਿ ਗਹਣਂ. ਤੇਪਿ ਹਿ ਸਿਕ੍ਖਿਤਬ੍ਬਟ੍ਠੇਨ ‘‘ਸੇਖਿਯਾ’’ਤਿ ਇਚ੍ਛਿਤਾ. ਤਸ੍ਮਾ ਮਾਤਿਕਾਯਂ ਪਾਰਾਜਿਕਾਦੀਨਂ ਵਿਯ ਸੇਖਿਯਾਨਂ ਪਰਿਚ੍ਛੇਦੋ ਨ ਕਤੋਤਿ. ਨ ਕੇਵਲਂ ਵਤ੍ਤਕ੍ਖਨ੍ਧਕਾਦੀਸੁ (ਚੂਲ਼ਵ. ੩੫੬ ਆਦਯੋ) ਆਗਤਵਤ੍ਤਾਦੀਨਂ ਗਹਣਤ੍ਥਮੇਵਾਤਿ ਆਹ ‘‘ਚਾਰਿਤ੍ਤਵਿਨਯਦਸ੍ਸਨਤ੍ਥਞ੍ਚਾ’’ਤਿ. ਏਤ੍ਥਾਪਿ ਪਰਿਚ੍ਛੇਦੋ ਨ ਕਤੋਤਿ ਆਨੇਤ੍ਵਾ ਯੋਜੇਤਬ੍ਬਂ. ਮਾਤਿਕਾਯ ‘‘ਦੁਕ੍ਕਟ’’ਨ੍ਤਿ ਅਵੁਤ੍ਤੇ ਕਥਂ ਪਨੇਤ੍ਥ ਦੁਕ੍ਕਟਨ੍ਤਿ ਵੇਦਿਤਬ੍ਬਨ੍ਤਿ ਆਹ ‘‘ਯੋ ਪਨਾ’’ਤਿਆਦਿ.

ਅਟ੍ਠਙ੍ਗੁਲਮਤ੍ਤਨ੍ਤਿ ਪਕਤਙ੍ਗੁਲੇਨ ਅਟ੍ਠਙ੍ਗੁਲਮਤ੍ਤਂ. ਯੋ ਪਨ ਸੁਕ੍ਖਜਙ੍ਘੋ ਵਾ ਮਹਾਪਿਣ੍ਡਿਕਮਂਸੋ ਵਾ ਹੋਤਿ, ਤਸ੍ਸ ਸਾਰੁਪ੍ਪਤ੍ਥਾਯ ਅਟ੍ਠਙ੍ਗੁਲਾਧਿਕਮ੍ਪਿ ਓਤਾਰੇਤ੍ਵਾ ਨਿਵਾਸੇਤੁਂ ਵਟ੍ਟਤਿ.

ਪਾਸਨ੍ਤਨ੍ਤਿ ਪਾਸਸ੍ਸ ਅਨ੍ਤਂ, ਦਸਾਮੂਲਨ੍ਤਿ ਅਤ੍ਥੋ.

ਅਪਰਿਮਣ੍ਡਲਂ ਨਿਵਾਸੇਸ੍ਸਾਮੀਤਿ ‘‘ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਸ੍ਸਾਮੀ’’ਤਿ ਏਵਂ ਅਸਞ੍ਚਿਚ੍ਚ. ਕਿਞ੍ਚਾਪਿ ਪਰਿਮਣ੍ਡਲਂ ਨਿਵਾਸੇਤੁਂ ਅਜਾਨਨ੍ਤਸ੍ਸ ਅਨਾਪਤ੍ਤਿ, ਤਥਾਪਿ ਨਿਵਾਸਨਵਤ੍ਤਂ ਸਾਧੁਕਂ ਉਗ੍ਗਹੇਤਬ੍ਬਮੇਵ. ਸਞ੍ਚਿਚ੍ਚ ਅਨੁਗ੍ਗਹਣਞ੍ਹਿ ਅਨਾਦਰਿਯਂ ਸਿਯਾਤਿ ਆਹ ‘‘ਅਪਿਚ ਨਿਵਾਸਨਵਤ੍ਤਂ ਉਗ੍ਗਹੇਤਬ੍ਬ’’ਨ੍ਤਿ.

ਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.