੩. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾਤਿ ਇਦਂ ਚਾਰਿਤ੍ਤੇ ਵੁਤ੍ਤਨਯਮੇਵ. ਵਿਕਾਲੇਤਿ ਮਜ੍ਝਨ੍ਹਿਕਾਤਿਕ੍ਕਮਤੋ ਪਟ੍ਠਾਯ ਅਨ੍ਤੋਅਰੁਣੇ, ਏਤਸ੍ਮਿਂ ਅਨ੍ਤਰੇ ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿ ਵਾ, ‘‘ਗਾਮਂ ਪਵਿਸਿਸ੍ਸਾਮੀ’’ਤਿ ਵਾ ਅਨਾਪੁਚ੍ਛਿਤ੍ਵਾ ਅਸਤਿ ਤਥਾਰੂਪੇ ਅਚ੍ਚਾਯਿਕੇ ਕਰਣੀਯੇ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ. ਸਚੇਪਿ ਸਮ੍ਬਹੁਲਾ ਕੇਨਚਿ ਕਮ੍ਮੇਨ ਗਾਮਂ ਪਵਿਸਨ੍ਤਿ, ਸਬ੍ਬੇਹਿ ਅਞ੍ਞਮਞ੍ਞਂ ਆਪੁਚ੍ਛਿਤਬ੍ਬਂ. ‘‘ਤਸ੍ਮਿਂ ਗਾਮੇ ਤਂ ਕਮ੍ਮਂ ਨ ਸਮ੍ਪਜ੍ਜਤੀ’’ਤਿ ਅਞ੍ਞਂ ਗਾਮਂ ਗਚ੍ਛਨ੍ਤਾਨਂ ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਪਨ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾ ਅਨ੍ਤਰਾ ਅਞ੍ਞਂ ਗਾਮਂ ਪਵਿਸਿਤੁਕਾਮਾ ਹੋਨ੍ਤਿ, ਆਪੁਚ੍ਛਿਤਬ੍ਬਮੇਵ. ਕੁਲਘਰੇ ਵਾ ਆਸਨਸਾਲਾਯਂ ਵਾ ਭਤ੍ਤਕਿਚ੍ਚਂ ਕਤ੍ਵਾ ਤੇਲਭਿਕ੍ਖਾਯ ਵਾ ਸਪ੍ਪਿਭਿਕ੍ਖਾਯ ਵਾ ਚਰਿਤੁਕਾਮੇਨ ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤਬ੍ਬੋ, ਅਸਨ੍ਤੇ ‘ਨਤ੍ਥੀ’ਤਿ ਗਨ੍ਤਬ੍ਬਂ. ਵੀਥਿਂ ਓਤਰਿਤ੍ਵਾ ਪਨ ਭਿਕ੍ਖੁਂ ਦਿਸ੍ਵਾਪਿ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਯੋ ਪਨ ਗਾਮਮਜ੍ਝੇਨ ਮਗ੍ਗੋ ਹੋਤਿ, ਸਚੇ ਤੇਨ ਗਚ੍ਛਨ੍ਤਸ੍ਸ ‘‘ਤੇਲਾਦੀਨਂ ਅਤ੍ਥਾਯ ਚਰਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਪਸ੍ਸੇ ਭਿਕ੍ਖੁਂ ਦਿਸ੍ਵਾ ਆਪੁਚ੍ਛਿਤਬ੍ਬਂ. ਮਗ੍ਗਾ ਅਨੋਕ੍ਕਮ੍ਮ ਚਰਨ੍ਤਸ੍ਸ ਪਨ ਆਪੁਚ੍ਛਨਕਿਚ੍ਚਂ ਨਤ੍ਥਿ, ਓਕ੍ਕਮਨ੍ਤਸ੍ਸ ਵੁਤ੍ਤਨਯੇਨੇਵ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਵਿਕਾਲੇ ਗਾਮਪ੍ਪਵੇਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਸਨ੍ਤਂ ਭਿਕ੍ਖੁ’’ਨ੍ਤਿ ਚ ‘‘ਅਨਾਪੁਚ੍ਛਾ’’ਤਿ ਚ ‘‘ਅਞ੍ਞਤ੍ਰ ਤਥਾਰੂਪਾ ਅਚ੍ਚਾਯਿਕਾ ਕਰਣੀਯਾ’’ਤਿ ਚ ਇਮਾ ਪਨੇਤ੍ਥ ਤਿਸ੍ਸੋ ਅਨੁਪਞ੍ਞਤ੍ਤਿਯੋ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਕਾਲੇ ਵਿਕਾਲਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਕਾਲਸਞ੍ਞਿਨੋ ਪਨ, ਯੋ ਚ ਅਚ੍ਚਾਯਿਕੇ ਵਾ ਕਰਣੀਯੇ, ਸਨ੍ਤਂ ਵਾ ਆਪੁਚ੍ਛਿਤ੍ਵਾ, ਅਸਨ੍ਤਂ ਵਾ ਅਨਾਪੁਚ੍ਛਿਤ੍ਵਾ ਪਵਿਸਤਿ, ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਪਟਿਕ੍ਕਮਨੇਸੁ ਵਾ ਅਞ੍ਞਤਰਂ ਗਚ੍ਛਤਿ, ਤਸ੍ਸ, ਗਾਮੇਨ ਮਗ੍ਗੋ ਹੋਤਿ, ਤੇਨ ਗਚ੍ਛਤੋ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਤਾ, ਅਨੁਞ੍ਞਾਤਕਾਰਣਾਭਾਵੋ, ਵਿਕਾਲੇ ਗਾਮਪ੍ਪਵਿਸਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.