ਪਾਚਿਤ੍ਤਿਯਕਣ੍ਡੋ

੧. ਮੁਸਾਵਾਦਵਗ੍ਗੋ

੧. ਮੁਸਾਵਾਦਸਿਕ੍ਖਾਪਦਵਣ੍ਣਨਾ

ਪਾਚਿਤ੍ਤਿਯੇਸੁ ਮੁਸਾਵਾਦਵਗ੍ਗਸ੍ਸ ਪਠਮੇ ਸਮ੍ਪਜਾਨਮੁਸਾਵਾਦੇਤਿ ਪੁਬ੍ਬੇਪਿ ਜਾਨਿਤ੍ਵਾ ਵਚਨਕ੍ਖਣੇਪਿ ਜਾਨਨ੍ਤਸ੍ਸੇਵ ਮੁਸਾਵਾਦਭਣਨੇ. ਭਣਨਞ੍ਚ ਨਾਮ ਇਧ ਅਭੂਤਸ੍ਸ ਵਾ ਭੂਤਤਂ, ਭੂਤਸ੍ਸ ਵਾ ਅਭੂਤਤਂ ਕਤ੍ਵਾ ਕਾਯੇਨ ਵਾ ਵਾਚਾਯ ਵਾ ਵਿਞ੍ਞਾਪਨਪ੍ਪਯੋਗੋ, ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਂ. ਤਸ੍ਮਾ ਯੋ ਸਮ੍ਪਜਾਨਮੁਸਾਵਾਦਂ ਵਦਤਿ, ਤਸ੍ਸ ਤਂਨਿਮਿਤ੍ਤਂ ਤਂਹੇਤੁ ਤਪ੍ਪਚ੍ਚਯਾ ਪਾਚਿਤ੍ਤਿਯਂ ਹੋਤੀਤਿ ਏਵਮੇਤ੍ਥ ਅਞ੍ਞੇਸੁ ਚ ਈਦਿਸੇਸੁ ਅਤ੍ਥੋ ਵੇਦਿਤਬ੍ਬੋ.

ਸਾਵਤ੍ਥਿਯਂ ਹਤ੍ਥਕਂ ਸਕ੍ਯਪੁਤ੍ਤਂ ਆਰਬ੍ਭ ਅਵਜਾਨਿਤ੍ਵਾ ਪਟਿਜਾਨਨਾਦਿਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਤ੍ਥਂ ਮੁਸਾ ਭਣਨ੍ਤਸ੍ਸ ਪਾਰਾਜਿਕਂ, ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਨਤ੍ਥਂ ਸਙ੍ਘਾਦਿਸੇਸੋ, ਸਙ੍ਘਾਦਿਸੇਸੇਨ ਅਨੁਦ੍ਧਂਸਨਤ੍ਥਂ ਪਾਚਿਤ੍ਤਿਯਂ, ਆਚਾਰਵਿਪਤ੍ਤਿਯਾ ਅਨੁਦ੍ਧਂਸਨਤ੍ਥਂ ਦੁਕ੍ਕਟਂ, ‘‘ਯੋ ਤੇ ਵਿਹਾਰੇ ਵਸੀ’’ਤਿਆਦਿਨਾ (ਪਾਰਾ. ੨੨੦) ਪਰਿਯਾਯੇਨ ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਤ੍ਥਂ ਪਟਿਵਿਜਾਨਨ੍ਤਸ੍ਸ ਮੁਸਾ ਭਣਿਤੇ ਥੁਲ੍ਲਚ੍ਚਯਂ, ਅਪ੍ਪਟਿਵਿਜਾਨਨ੍ਤਸ੍ਸ ਦੁਕ੍ਕਟਂ, ਕੇਵਲਂ ਮੁਸਾ ਭਣਨ੍ਤਸ੍ਸ ਇਧ ਪਾਚਿਤ੍ਤਿਯਂ. ਅਨੁਪਧਾਰੇਤ੍ਵਾ ਸਹਸਾ ਭਣਨ੍ਤਸ੍ਸ, ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵਿਸਂਵਾਦਨਪੁਰੇਕ੍ਖਾਰਤਾ, ਵਿਸਂਵਾਦਨਚਿਤ੍ਤੇਨ ਯਮਤ੍ਥਂ ਵਤ੍ਤੁਕਾਮੋ, ਤਸ੍ਸ ਪੁਗ੍ਗਲਸ੍ਸ ਵਿਞ੍ਞਾਪਨਪਯੋਗੋ ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.

ਮੁਸਾਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਓਮਸਵਾਦਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਓਮਸਵਾਦੇਤਿ ਓਵਿਜ੍ਝਨਵਚਨੇ, ਜਾਤਿਨਾਮਗੋਤ੍ਤਕਮ੍ਮਸਿਪ੍ਪਆਬਾਧਲਿਙ੍ਗਕਿਲੇਸਆਪਤ੍ਤਿਅਕ੍ਕੋਸੇਸੁ ਭੂਤੇਨ ਵਾ ਅਭੂਤੇਨ ਵਾ ਯੇਨ ਕੇਨਚਿ ਪਾਰਾਜਿਕਂ ਆਪਨ੍ਨਂ ਵਾ ਅਨਾਪਨ੍ਨਂ ਵਾ ਯਂਕਿਞ੍ਚਿ ਭਿਕ੍ਖੁਂ ਯਾਯ ਕਾਯਚਿ ਵਾਚਾਯ ਵਾ ਹਤ੍ਥਮੁਦ੍ਦਾਯ ਵਾ ਅਨਞ੍ਞਾਪਦੇਸੇਨ ਅਕ੍ਕੋਸਨਵਚਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਓਮਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤੇਹਿਯੇਵ ਦਸਹਿ ਅਕ੍ਕੋਸਵਤ੍ਥੂਹਿ ‘‘ਸਨ੍ਤਿ ਇਧੇਕਚ੍ਚੇ ਚਣ੍ਡਾਲਾ’’ਤਿਆਦਿਨਾ (ਪਾਚਿ. ੨੬) ਨਯੇਨ ਅਞ੍ਞਾਪਦੇਸਂ ਕਤ੍ਵਾ ਅਕ੍ਕੋਸਨ੍ਤਸ੍ਸ, ‘‘ਚੋਰੋਸਿ ਗਣ੍ਠਿਭੇਦਕੋਸੀ’’ਤਿਆਦੀਹਿ ਪਾਲ਼ਿਮੁਤ੍ਤਕਪਦੇਹਿ ਅਕ੍ਕੋਸਨ੍ਤਸ੍ਸ, ਯਥਾ ਤਥਾ ਵਾ ਅਨੁਪਸਮ੍ਪਨ੍ਨਂ ਅਕ੍ਕੋਸਨ੍ਤਸ੍ਸ ਚ ਦੁਕ੍ਕਟਂ. ਇਧ ਭਿਕ੍ਖੁਨੀਪਿ ਅਨੁਪਸਮ੍ਪਨ੍ਨਸਙ੍ਖ੍ਯਂ ਗਚ੍ਛਤਿ. ਅਨਕ੍ਕੋਸਿਤੁਕਾਮਸ੍ਸ ਕੇਵਲਂ ਦਵਕਮ੍ਯਤਾਯ ਵਦਤੋ ਸਬ੍ਬਤ੍ਥ ਦੁਬ੍ਭਾਸਿਤਂ. ਅਤ੍ਥਧਮ੍ਮਅਨੁਸਾਸਨਿਪੁਰੇਕ੍ਖਾਰਾਨਂ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਯਂ ਅਕ੍ਕੋਸਤਿ, ਤਸ੍ਸ ਉਪਸਮ੍ਪਨ੍ਨਤਾ, ਅਨਞ੍ਞਾਪਦੇਸੇਨ ਜਾਤਿਆਦੀਹਿ ਅਕ੍ਕੋਸਨਂ, ‘‘ਮਂ ਅਕ੍ਕੋਸਤੀ’’ਤਿ ਜਾਨਨਾ, ਅਤ੍ਥਪੁਰੇਕ੍ਖਾਰਤਾਦੀਨਂ ਅਭਾਵੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਵੇਦਨਾ ਪਨ ਇਧ ਦੁਕ੍ਖਾਤਿ.

ਓਮਸਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਪੇਸੁਞ੍ਞਸਿਕ੍ਖਾਪਦਵਣ੍ਣਨਾ

ਤਤਿਯੇ ਭਿਕ੍ਖੁਪੇਸੁਞ੍ਞੇਤਿ ਭਿਕ੍ਖੁਸ੍ਸ ਪੇਸੁਞ੍ਞੇ, ਜਾਤਿਆਦੀਹਿ ਅਕ੍ਕੋਸਵਤ੍ਥੂਹਿ ਭਿਕ੍ਖੂ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ਵਚਨਂ ਭਿਕ੍ਖੁਨੋ ਪਿਯਕਮ੍ਯਤਾਯ ਵਾ ਭੇਦਾਧਿਪ੍ਪਾਯੇਨ ਵਾ ਯੋ ਅਕ੍ਕੁਦ੍ਧੋ, ਤਸ੍ਸ ਭਿਕ੍ਖੁਸ੍ਸ ਕਾਯੇਨ ਵਾ ਵਾਚਾਯ ਵਾ ਉਪਸਂਹਟੇ ਤਸ੍ਮਿਂ ਪੇਸੁਞ੍ਞਕਰਣਵਚਨੇ ਪਾਚਿਤ੍ਤਿਯਨ੍ਤਿ ਅਤ੍ਥੋ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪੇਸੁਞ੍ਞਉਪਸਂਹਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਵੁਤ੍ਤਨਯੇਨੇਵ ਅਞ੍ਞਾਪਦੇਸੇਨ ਅਕ੍ਕੋਸਨ੍ਤਸ੍ਸ ਵਚਨੂਪਸਂਹਾਰੇ ਵਾ ਪਾਲ਼ਿਮੁਤ੍ਤਕਅਕ੍ਕੋਸੂਪਸਂਹਾਰੇ ਵਾ ਅਨੁਪਸਮ੍ਪਨ੍ਨਸ੍ਸ ਚ ਉਪਸਂਹਾਰੇ ਦੁਕ੍ਕਟਂ. ਇਧਾਪਿ ਭਿਕ੍ਖੁਨੀ ਅਨੁਪਸਮ੍ਪਨ੍ਨਟ੍ਠਾਨੇ ਠਿਤਾ. ਨ ਪਿਯਕਮ੍ਯਤਾਯ, ਨ ਭੇਦਾਧਿਪ੍ਪਾਯੇਨ ਕੇਵਲਂ ਪਾਪਗਰਹਿਤਾਯ ਵਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਜਾਤਿਆਦੀਹਿ ਅਨਞ੍ਞਾਪਦੇਸੇਨ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ਵਚਨਂ ਭਿਕ੍ਖੁਸ੍ਸ ਉਪਸਂਹਰਣਂ, ਪਿਯਕਮ੍ਯਤਾਭੇਦਾਧਿਪ੍ਪਾਯੇਸੁ ਅਞ੍ਞਤਰਤਾ, ਤਸ੍ਸ ਵਿਜਾਨਨਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੇਵਾਤਿ.

ਪੇਸੁਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪਦਸੋਧਮ੍ਮਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਪਦਸੋ ਧਮ੍ਮਂ ਵਾਚੇਯ੍ਯਾਤਿ ਸਙ੍ਗੀਤਿਤ੍ਤਯਂ ਅਨਾਰੁਲ਼੍ਹਮ੍ਪਿ ਰਾਜੋਵਾਦਤਿਕ੍ਖਿਨ੍ਦ੍ਰਿਯਚਤੁਪਰਿਵਤ੍ਤਨਨਨ੍ਦੋਪਨਨ੍ਦਕੁਲੁਮ੍ਪਸੁਤ੍ਤਮਗ੍ਗਕਥਾਦਿਧਮ੍ਮਞ੍ਚ ਸਙ੍ਗੀਤਿਤ੍ਤਯਮਾਰੁਲ਼੍ਹਂ ਤਿਪਿਟਕਧਮ੍ਮਞ੍ਚ ਪਦਂ ਪਦਂ ਵਾਚੇਯ੍ਯ, ਪਦਾਨੁਪਦਅਨ੍ਵਕ੍ਖਰਅਨੁਬ੍ਯਞ੍ਜਨੇਸੁ ਏਕੇਕਂ ਕੋਟ੍ਠਾਸਨ੍ਤਿ ਅਤ੍ਥੋ. ਪਾਚਿਤ੍ਤਿਯਨ੍ਤਿ ਏਤੇਸੁ ਪਦਾਦੀਸੁ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਯਂਕਞ੍ਚਿ ਕੋਟ੍ਠਾਸਂ ਅਵਸੇਸਪੁਗ੍ਗਲੇਹਿ ਸਦ੍ਧਿਂ ਏਕਤੋ ਭਣਨ੍ਤਸ੍ਸ ਪਦਾਦਿਗਣਨਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਦਸੋ ਧਮ੍ਮਵਾਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ. ਉਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਏਕਤੋ ਉਦ੍ਦੇਸਗ੍ਗਹਣੇ, ਸਜ੍ਝਾਯਕਰਣੇ, ਤਸ੍ਸ ਸਨ੍ਤਿਕੇ ਉਦ੍ਦੇਸਗ੍ਗਹਣੇ, ਯੇਭੁਯ੍ਯੇਨ ਪਗੁਣਗਨ੍ਥਂ ਭਣਨ੍ਤਸ੍ਸ, ਓਸਾਰੇਨ੍ਤਸ੍ਸ ਚ ਖਲਿਤਟ੍ਠਾਨੇ ‘‘ਏਵਂ ਭਣਾਹੀ’’ਤਿ ਵਚਨੇ ਚ ਏਕਤੋ ਭਣਨ੍ਤਸ੍ਸਾਪਿ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਨੁਪਸਮ੍ਪਨ੍ਨਤਾ, ਵੁਤ੍ਤਲਕ੍ਖਣਂ ਧਮ੍ਮਂ ਪਦਸੋ ਵਾਚਨਤਾ, ਏਕਤੋ ਓਸਾਪਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਪਦਸੋਧਮ੍ਮਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਦਸੋਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਠਮਸਹਸੇਯ੍ਯਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਅਨੁਪਸਮ੍ਪਨ੍ਨੇਨਾਤਿ ਭਿਕ੍ਖੁਂ ਠਪੇਤ੍ਵਾ ਅਨ੍ਤਮਸੋ ਪਾਰਾਜਿਕਵਤ੍ਥੁਭੂਤੇਨ ਤਿਰਚ੍ਛਾਨਗਤੇਨਾਪਿ. ਉਤ੍ਤਰਿਦਿਰਤ੍ਤਤਿਰਤ੍ਤਨ੍ਤਿ ਦ੍ਵਿਨ੍ਨਂ ਵਾ ਤਿਣ੍ਣਂ ਵਾ ਰਤ੍ਤੀਨਂ ਉਪਰਿ. ਸਹਸੇਯ੍ਯਨ੍ਤਿ ਸਬ੍ਬਚ੍ਛਨ੍ਨਪਰਿਚ੍ਛਨ੍ਨੇ ਯੇਭੁਯ੍ਯੇਨ ਛਨ੍ਨਪਰਿਚ੍ਛਨ੍ਨੇ ਵਾ ਸੇਨਾਸਨੇ ਪੁਬ੍ਬਾਪਰਿਯੇਨ ਵਾ ਏਕਕ੍ਖਣੇਨ ਵਾ ਏਕਤੋ ਨਿਪਜ੍ਜਨਂ. ਕਪ੍ਪੇਯ੍ਯਾਤਿ ਵਿਦਹੇਯ੍ਯ ਸਮ੍ਪਾਦੇਯ੍ਯ. ਤਤ੍ਥ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਚ੍ਛਿਨ੍ਨਮ੍ਪਿ ਸਬ੍ਬਪਰਿਚ੍ਛਨ੍ਨਮਿਚ੍ਚੇਵ ਵੇਦਿਤਬ੍ਬਂ, ਤਸ੍ਮਾ ਇਮਿਨਾ ਲਕ੍ਖਣੇਨ ਸਮਨ੍ਨਾਗਤੋ ਸਚੇਪਿ ਸਤ੍ਤਭੂਮਿਕੋ ਪਾਸਾਦੋ ਏਕੂਪਚਾਰੋ ਹੋਤਿ, ਸਤਗਬ੍ਭਂ ਵਾ ਚਤੁਸਾਲਂ, ਯੋ ਤਤ੍ਥ ਵਾ ਅਞ੍ਞਤ੍ਥ ਵਾ ਤਾਦਿਸੇ ਤੇਨ ਵਾ ਅਞ੍ਞੇਨ ਵਾ ਅਨੁਪਸਮ੍ਪਨ੍ਨੇਨ ਸਹ ਤਿਸ੍ਸੋ ਰਤ੍ਤਿਯੋ ਸਯਿਤ੍ਵਾ ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਗਬ੍ਭਦ੍ਵਾਰਂ ਪਿਧਾਯ ਵਾ ਅਪਿਧਾਯ ਵਾ ਨਿਪਜ੍ਜਤਿ, ਪਠਮਨਿਪਨ੍ਨੋ ਵਾ ਤਸ੍ਮਿਂ ਨਿਪਜ੍ਜਨ੍ਤੇ ਨ ਵੁਟ੍ਠਾਤਿ, ਤਸ੍ਸ ਉਭਿਨ੍ਨਂ ਉਟ੍ਠਹਿਤ੍ਵਾ ਨਿਪਜ੍ਜਨਪ੍ਪਯੋਗਗਣਨਾਯ ਅਨੁਪਸਮ੍ਪਨ੍ਨਗਣਨਾਯ ਚ ਪਾਚਿਤ੍ਤਿਯਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੫੧) ਸਬ੍ਬਪ੍ਪਕਾਰਤੋ ਵੁਤ੍ਤੋ.

ਆਲ਼ਵਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਪਸਮ੍ਪਨ੍ਨੇਨ ਸਹਸੇਯ੍ਯਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਉਤ੍ਤਰਿਦਿਰਤ੍ਤਤਿਰਤ੍ਤ’’ਨ੍ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਉਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞਿਨੋ ਵੇਮਤਿਕਸ੍ਸ ਵਾ ਉਪਦ੍ਧਚ੍ਛਨ੍ਨਪਰਿਚ੍ਛਨ੍ਨਾਦੀਸੁ ਚ ਦੁਕ੍ਕਟਂ. ਊਨਕਦਿਰਤ੍ਤਤਿਰਤ੍ਤਂ ਵਸਨ੍ਤਸ੍ਸ, ਤਤਿਯਾਯ ਰਤ੍ਤਿਯਾ ਪੁਰਾਰੁਣਾ ਨਿਕ੍ਖਮਿਤ੍ਵਾ ਪੁਨ ਵਸਨ੍ਤਸ੍ਸ, ਸਬ੍ਬਚ੍ਛਨ੍ਨਸਬ੍ਬਾਪਰਿਚ੍ਛਨ੍ਨਾਦੀਸੁ ਵਸਨ੍ਤਸ੍ਸ, ਇਤਰਸ੍ਮਿਂ ਨਿਸਿਨ੍ਨੇ ਨਿਪਜ੍ਜਨ੍ਤਸ੍ਸ, ਨਿਪਨ੍ਨੇ ਵਾ ਨਿਸੀਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਾਚਿਤ੍ਤਿਯਵਤ੍ਥੁਕਸੇਨਾਸਨਂ, ਤਤ੍ਥ ਅਨੁਪਸਮ੍ਪਨ੍ਨੇਨ ਸਹ ਨਿਪਜ੍ਜਨਂ, ਚਤੁਤ੍ਥਦਿਵਸੇ ਸੂਰਿਯਤ੍ਥਙ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.

ਪਠਮਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਮਾਤੁਗਾਮੇਨਾਤਿ ਅਨ੍ਤਮਸੋ ਤਦਹੁਜਾਤਾਯਪਿ ਮਨੁਸ੍ਸਿਤ੍ਥਿਯਾ. ਦਿਸ੍ਸਮਾਨਰੂਪਾ ਪਨ ਯਕ੍ਖਿਪੇਤਿਯੋ ਪਣ੍ਡਕੋ ਮੇਥੁਨਵਤ੍ਥੁਭੂਤਾ ਚ ਤਿਰਚ੍ਛਾਨਿਤ੍ਥਿਯੋ ਇਧ ਦੁਕ੍ਕਟਵਤ੍ਥੁਕਾ ਹੋਨ੍ਤਿ.

ਸਾਵਤ੍ਥਿਯਂ ਆਯਸ੍ਮਨ੍ਤਂ ਅਨੁਰੁਦ੍ਧਤ੍ਥੇਰਂ ਆਰਬ੍ਭ ਮਾਤੁਗਾਮੇਨ ਸਹਸੇਯ੍ਯਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਅਨਨ੍ਤਰਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ ਅਞ੍ਞਤ੍ਰ ਰਤ੍ਤਿਪਰਿਚ੍ਛੇਦਾ, ਤਤ੍ਰ ਹਿ ਚਤੁਤ੍ਥਦਿਵਸੇ ਆਪਤ੍ਤਿ, ਇਧ ਪਨ ਪਠਮਦਿਵਸੇਪੀਤਿ.

ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਧਮ੍ਮਦੇਸਨਾਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਉਤ੍ਤਰਿਛਪ੍ਪਞ੍ਚਵਾਚਾਹੀਤਿਏਤ੍ਥ ਏਕੋ ਗਾਥਾਪਾਦੋ ਏਕਾ ਵਾਚਾਤਿ ਏਵਂ ਸਬ੍ਬਤ੍ਥ ਵਾਚਾਪਮਾਣਂ ਵੇਦਿਤਬ੍ਬਂ. ਧਮ੍ਮਂ ਦੇਸੇਯ੍ਯਾਤਿ ਪਦਸੋਧਮ੍ਮਸਿਕ੍ਖਾਪਦੇ ਵੁਤ੍ਤਲਕ੍ਖਣਂ ਧਮ੍ਮਂ ਵਾ ਅਟ੍ਠਕਥਾਧਮ੍ਮਂ ਵਾ ਭਾਸੇਯ੍ਯ. ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨਾਤਿ ਵਿਨਾ ਵਿਞ੍ਞੁਨਾ ਪੁਰਿਸੇਨ. ਮਨੁਸ੍ਸਵਿਗ੍ਗਹਂ ਗਹੇਤ੍ਵਾ ਠਿਤੇਨ ਪਨ ਯਕ੍ਖੇਨ ਵਾ ਪੇਤੇਨ ਵਾ ਤਿਰਚ੍ਛਾਨੇਨ ਵਾ ਸਦ੍ਧਿਂ ਠਿਤਾਯਪਿ ਧਮ੍ਮਂ ਦੇਸੇਤੁਂ ਨ ਵਟ੍ਟਤਿ. ਪਾਚਿਤ੍ਤਿਯਨ੍ਤਿ ਦੁਤਿਯਾਨਿਯਤੇ ਵੁਤ੍ਤਲਕ੍ਖਣੇਨ ਮਨੁਸ੍ਸੇਨ ਵਿਨਾ ਵਿਞ੍ਞੁਮਨੁਸ੍ਸਿਤ੍ਥਿਯਾ ਛਨ੍ਨਂ ਵਾਚਾਨਂ ਉਪਰਿ ਪਦਾਦਿਵਸੇਨ ਧਮ੍ਮਂ ਦੇਸੇਨ੍ਤਸ੍ਸ ਪਦਾਦਿਗਣਨਾਯ, ਬਹੂਨਂ ਦੇਸਯਤੋ ਮਾਤੁਗਾਮਗਣਨਾਯ ਚ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਮਾਤੁਗਾਮਸ੍ਸ ਧਮ੍ਮਦੇਸਨਾਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਵਿਞ੍ਞੁਨਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਮਾਤੁਗਾਮੇ ਮਾਤੁਗਾਮਸਞ੍ਞਿਨੋ ਵੇਮਤਿਕਸ੍ਸ ਵਾ ਯਕ੍ਖਿਪੇਤਿਪਣ੍ਡਕਮਨੁਸ੍ਸਵਿਗ੍ਗਹਤਿਰਚ੍ਛਾਨਿਤ੍ਥੀਨਂ ਦੇਸੇਨ੍ਤਸ੍ਸ ਚ ਦੁਕ੍ਕਟਂ. ਛਹਿ ਵਾਚਾਹਿ, ਤਤੋ ਵਾ ਓਰਂ ਦੇਸੇਨ੍ਤਸ੍ਸ, ਵੁਤ੍ਤਲਕ੍ਖਣੇ ਵਾ ਪੁਰਿਸੇ ਸਤਿ, ਸਯਂ ਵਾ ਉਟ੍ਠਾਯ, ਪੁਨ ਨਿਸੀਦਿਤ੍ਵਾ ਮਾਤੁਗਾਮਸ੍ਸ ਵਾ ਉਟ੍ਠਹਿਤ੍ਵਾ ਪੁਨ ਨਿਸਿਨ੍ਨਸ੍ਸ, ਅਞ੍ਞਸ੍ਸ ਵਾ ਮਾਤੁਗਾਮਸ੍ਸ ਦੇਸਯਤੋ, ‘‘ਦੀਘਨਿਕਾਯੋ ਨਾਮ ਭਨ੍ਤੇ ਕਿਮਤ੍ਥਿਯੋ’’ਤਿ ਏਵਂ ਪਨ ਪੁਟ੍ਠੇ ਸਬ੍ਬਮ੍ਪਿ ਦੀਘਨਿਕਾਯਂ ਦੇਸੇਨ੍ਤਸ੍ਸ, ਅਞ੍ਞਸ੍ਸਤ੍ਥਾਯ ਵੁਚ੍ਚਮਾਨਂ ਮਾਤੁਗਾਮੇ ਸੁਣਨ੍ਤੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਲਕ੍ਖਣਸ੍ਸ ਧਮ੍ਮਸ੍ਸ ਛਨ੍ਨਂ ਵਾਚਾਨਂ ਉਪਰਿ ਦੇਸਨਾ, ਵੁਤ੍ਤਲਕ੍ਖਣੋ ਮਾਤੁਗਾਮੋ, ਇਰਿਯਾਪਥਪਰਿਵਤ੍ਤਾਭਾਵੋ, ਕਪ੍ਪਿਯਕਾਰਕਸ੍ਸਾਭਾਵੋ, ਅਪਞ੍ਹਾਵਿਸ੍ਸਜ੍ਜਨਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨੇਵ, ਕੇਵਲਂ ਇਧ ਕਿਰਿਯਾਕਿਰਿਯਂ ਹੋਤੀਤਿ.

ਧਮ੍ਮਦੇਸਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਭੂਤਾਰੋਚਨਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਉਤ੍ਤਰਿਮਨੁਸ੍ਸਧਮ੍ਮਨ੍ਤਿ ਚਤੁਤ੍ਥਪਾਰਾਜਿਕੇ ਵੁਤ੍ਤਲਕ੍ਖਣਂ ਉਤ੍ਤਰਿਮਨੁਸ੍ਸਾਨਂ ਝਾਯੀਨਞ੍ਚੇਵ ਅਰਿਯਾਨਞ੍ਚ ਧਮ੍ਮਂ. ਭੂਤਸ੍ਮਿਂ ਪਾਚਿਤ੍ਤਿਯਨ੍ਤਿ ਅਤ੍ਤਨਿ ਝਾਨਾਦਿਧਮ੍ਮੇ ਸਤਿ ਤਂ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਅਞ੍ਞਸ੍ਸ ਆਰੋਚਯਤੋ ਪਾਚਿਤ੍ਤਿਯਂ.

ਵੇਸਾਲਿਯਂ ਵਗ੍ਗੁਮੁਦਾਤੀਰਿਯੇ ਭਿਕ੍ਖੂ ਆਰਬ੍ਭ ਤੇਸਂ ਭੂਤਾਰੋਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਨਿਪ੍ਪਰਿਯਾਯੇਨ ਅਤ੍ਤਨਿ ਵਿਜ੍ਜਮਾਨਂ ਝਾਨਾਦਿਧਮ੍ਮਂ ਆਰੋਚੇਨ੍ਤਸ੍ਸ ਸਚੇ ਯਸ੍ਸ ਆਰੋਚੇਤਿ, ਸੋ ਅਨਨ੍ਤਰਮੇਵ ‘‘ਅਯਂ ਝਾਨਲਾਭੀ’’ਤਿ ਵਾ ‘‘ਅਰਿਯੋ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਤਮਤ੍ਥਂ ਜਾਨਾਤਿ, ਪਾਚਿਤ੍ਤਿਯਂ. ਨੋ ਚੇ ਜਾਨਾਤਿ, ਦੁਕ੍ਕਟਂ. ਪਰਿਯਾਯੇਨ ਆਰੋਚਿਤਂ ਪਨ ਜਾਨਾਤੁ ਵਾ, ਮਾ ਵਾ, ਦੁਕ੍ਕਟਮੇਵ. ਤਥਾਰੂਪੇ ਕਾਰਣੇ ਸਤਿ ਉਪਸਮ੍ਪਨ੍ਨਸ੍ਸ ਆਰੋਚਯਤੋ, ਆਦਿਕਮ੍ਮਿਕਸ੍ਸ ਚ ਅਨਾਪਤ੍ਤਿ. ਯਸ੍ਮਾ ਪਨ ਅਰਿਯਾਨਂ ਉਮ੍ਮਤ੍ਤਕਾਦਿਭਾਵੋ ਨਤ੍ਥਿ, ਝਾਨਲਾਭਿਨੋ ਪਨ ਤਸ੍ਮਿਂ ਸਤਿ ਝਾਨਾ ਪਰਿਹਾਯਨ੍ਤਿ, ਤਸ੍ਮਾ ਤੇ ਇਧ ਨ ਗਹਿਤਾ. ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਭੂਤਤਾ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਤਙ੍ਖਣਵਿਜਾਨਨਾ, ਅਨਞ੍ਞਾਪਦੇਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਭੂਤਾਰੋਚਨਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਕੁਸਲਾਬ੍ਯਾਕਤਚਿਤ੍ਤੇਹਿ ਦ੍ਵਿਚਿਤ੍ਤਂ, ਸੁਖਮਜ੍ਝਤ੍ਤਵੇਦਨਾਹਿ ਦ੍ਵਿਵੇਦਨਨ੍ਤਿ.

ਭੂਤਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ

ਨਵਮੇ ਭਿਕ੍ਖੁਸ੍ਸਾਤਿ ਪਾਰਾਜਿਕਂ ਅਨਜ੍ਝਾਪਨ੍ਨਸ੍ਸ. ਦੁਟ੍ਠੁਲ੍ਲਨ੍ਤਿ ਕਿਞ੍ਚਾਪਿ ਦ੍ਵਿਨ੍ਨਂ ਆਪਤ੍ਤਿਕ੍ਖਨ੍ਧਾਨਮੇਤਂ ਅਧਿਵਚਨਂ, ਇਧ ਪਨ ਸਙ੍ਘਾਦਿਸੇਸਮੇਵ ਅਧਿਪ੍ਪੇਤਂ. ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਅਭਿਣ੍ਹਾਪਤ੍ਤਿਕਸ੍ਸ ਭਿਕ੍ਖੁਨੋ ਆਯਤਿਂ ਸਂਵਰਤ੍ਥਾਯ ਆਪਤ੍ਤੀਨਞ੍ਚ ਕੁਲਾਨਞ੍ਚ ਪਰਿਯਨ੍ਤਂ ਕਤ੍ਵਾ ਵਾ ਅਕਤ੍ਵਾ ਵਾ ਤਿਕ੍ਖਤ੍ਤੁਂ ਅਪਲੋਕੇਤ੍ਵਾ ਕਤਿਕਂ ਕਰੋਤਿ, ਤਂ ਠਪੇਤ੍ਵਾ, ਅਯਥਾਕਤਿਕਾਯ ‘‘ਅਯਂ ਅਸੁਚਿਂ ਮੋਚੇਤ੍ਵਾ ਸਙ੍ਘਾਦਿਸੇਸਂ ਆਪਨ੍ਨੋ’’ਤਿਆਦਿਨਾ ਨਯੇਨ ਵਤ੍ਥੁਨਾ ਸਦ੍ਧਿਂ ਆਪਤ੍ਤਿਂ ਘਟੇਤ੍ਵਾ ਆਰੋਚੇਨ੍ਤਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਦੁਟ੍ਠੁਲ੍ਲਾਪਤ੍ਤਿਆਰੋਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਦੁਟ੍ਠੁਲ੍ਲਾਯ ਦੁਟ੍ਠੁਲ੍ਲਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ, ਅਵਸੇਸੇ ਛ ਆਪਤ੍ਤਿਕ੍ਖਨ੍ਧੇ, ਅਨੁਪਸਮ੍ਪਨ੍ਨਸ੍ਸ ਪੁਰਿਮਪਞ੍ਚਸਿਕ੍ਖਾਪਦਵੀਤਿਕ੍ਕਮਸਙ੍ਖਾਤਂ ਦੁਟ੍ਠੁਲ੍ਲਂ ਵਾ ਇਤਰਂ ਅਦੁਟ੍ਠੁਲ੍ਲਂ ਵਾ ਅਜ੍ਝਾਚਾਰਂ ਆਰੋਚੇਨ੍ਤਸ੍ਸਾਪਿ ਦੁਕ੍ਕਟਮੇਵ. ਵਤ੍ਥੁਮਤ੍ਤਂ ਵਾ ਆਪਤ੍ਤਿਮਤ੍ਤਂ ਵਾ ਆਰੋਚੇਨ੍ਤਸ੍ਸ, ਭਿਕ੍ਖੁਸਮ੍ਮੁਤਿਪਰਿਚ੍ਛੇਦਂ ਅਨਤਿਕ੍ਕਮਿਤ੍ਵਾ ਆਰੋਚੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਲਕ੍ਖਣਸ੍ਸ ਭਿਕ੍ਖੁਨੋ ਸਵਤ੍ਥੁਕੋ ਸਙ੍ਘਾਦਿਸੇਸੋ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਭਿਕ੍ਖੁਸਮ੍ਮੁਤਿਯਾ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਵੇਦਨਾ ਪਨ ਇਧ ਦੁਕ੍ਖਾਯੇਵਾਤਿ.

ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਥਵੀਖਣਨਸਿਕ੍ਖਾਪਦਵਣ੍ਣਨਾ

ਦਸਮੇ ਪਥਵਿਨ੍ਤਿ ਦੁਵਿਧਾ ਪਥਵੀ ਜਾਤਪਥਵੀ ਅਜਾਤਪਥਵੀਤਿ. ਤਤ੍ਥ ਜਾਤਪਥਵੀ ਸੁਦ੍ਧਮਿਸ੍ਸਪੁਞ੍ਜਵਸੇਨ ਤਿਵਿਧਾ, ਤਤ੍ਥ ਸੁਦ੍ਧਪਥਵੀ ਨਾਮ ਪਕਤਿਯਾ ਸੁਦ੍ਧਪਂਸੁ ਵਾ ਸੁਦ੍ਧਮਤ੍ਤਿਕਾ ਵਾ. ਮਿਸ੍ਸਪਥਵੀ ਨਾਮ ਯਤ੍ਥ ਪਂਸੁਤੋ ਵਾ ਮਤ੍ਤਿਕਾਤੋ ਵਾ ਪਾਸਾਣਸਕ੍ਖਰਕਥਲਮਰੁਮ੍ਬਵਾਲੁਕਾਸੁ ਅਞ੍ਞਤਰਸ੍ਸ ਤਤਿਯਭਾਗੋ ਹੋਤਿ. ਪੁਞ੍ਜਪਥਵੀ ਨਾਮ ‘‘ਅਤਿਰੇਕਚਾਤੁਮਾਸਂ ਓਵਟ੍ਠੋ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ’’ਤਿ (ਪਾਚਿ. ੮੬) ਵੁਤ੍ਤਂ, ਵੁਤ੍ਤਲਕ੍ਖਣੇਨ ਪਨ ਮਿਸ੍ਸਕਪੁਞ੍ਜੋਪਿ ਪਿਟ੍ਠਿਪਾਸਾਣੇ ਠਿਤਸੁਖੁਮਰਜਮ੍ਪਿ ਚ ਦੇਵੇ ਫੁਸਾਯਨ੍ਤੇ ਸਕਿਂ ਤਿਨ੍ਤਂ ਚਤੁਮਾਸਚ੍ਚਯੇਨ ਤਿਨ੍ਤੋਕਾਸੋ ਪੁਞ੍ਜਪਥਵਿਸਙ੍ਖਮੇਵ ਗਚ੍ਛਤਿ. ਤਿਵਿਧਾਪਿ ਚੇਸਾ ਪਥਵੀ ਉਦ੍ਧਨਪਤ੍ਤਪਚਨਾਦਿਵਸੇਨ ਵਾ ਯਥਾ ਤਥਾ ਵਾ ਅਦਡ੍ਢਾ ‘ਜਾਤਪਥਵੀ’ਤਿ ਵੁਚ੍ਚਤਿ, ਦਡ੍ਢਾ ਪਨ ਵੁਤ੍ਤਪ੍ਪਮਾਣਤੋ ਅਧਿਕਤਰਪਾਸਾਣਾਦਿਮਿਸ੍ਸਾ ਵਾ ਅਜਾਤਪਥਵੀ ਨਾਮ ਹੋਤਿ, ਕੋ ਪਨ ਵਾਦੋ ਸੁਦ੍ਧਪਾਸਾਣਾਦਿਭੇਦਾਯ. ਤਤ੍ਥ ਯਾ ‘ਜਾਤਪਥਵੀ’ਤਿ ਵੁਤ੍ਤਾ, ਅਯਂ ਅਕਪ੍ਪਿਯਪਥਵੀ. ਯੋ ਭਿਕ੍ਖੁ ਤਂ ਏਵਰੂਪਂ ਪਥਵਿਂ ਸਯਂ ਖਣਤਿ, ਖਣਨਭੇਦਨਵਿਲੇਖਨਪਚਨਾਦੀਹਿ ਵਿਕੋਪੇਤਿ, ਤਸ੍ਸ ਪਯੋਗਗਣਨਾਯ ਪਾਚਿਤ੍ਤਿਯਂ. ਯੋ ਪਨ ਖਣਾਪੇਤਿ, ਵੁਤ੍ਤਨਯੇਨੇਵ ਵਿਕੋਪਾਪੇਤਿ, ਤਸ੍ਸ ‘‘ਇਮਂ ਪਦੇਸ’’ਨ੍ਤਿ ਵਾ ‘‘ਇਮਂ ਪਥਵਿ’’ਨ੍ਤਿ ਵਾ ਏਵਂ ਨਿਯਮੇਤ੍ਵਾ ‘‘ਖਣ, ਭਿਨ੍ਦਾ’’ਤਿਆਦਿਨਾ ਨਯੇਨ ਆਣਾਪੇਨ੍ਤਸ੍ਸ ਆਣਤ੍ਤਿਯਾ ਦੁਕ੍ਕਟਂ, ਸਕਿਂ ਆਣਤ੍ਤੇ ਦਿਵਸਮ੍ਪਿ ਖਣਨ੍ਤੇ ਆਣਾਪਕਸ੍ਸ ਏਕਮੇਵ ਪਾਚਿਤ੍ਤਿਯਂ, ਸਚੇ ਇਤਰੋ ਪੁਨਪ੍ਪੁਨਂ ਆਣਾਪੇਤਿ, ਵਾਚਾਯ ਵਾਚਾਯ ਪਾਚਿਤ੍ਤਿਯਂ.

ਆਲ਼ਵਿਯਂ ਆਲ਼ਵਕੇ ਭਿਕ੍ਖੂ ਆਰਬ੍ਭ ਪਥਵਿਖਣਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਪਥਵਿਯਾ ਵੇਮਤਿਕਸ੍ਸ, ਅਪਥਵਿਯਾ ਪਥਵਿਸਞ੍ਞਿਨੋ ਚੇਵ ਵੇਮਤਿਕਸ੍ਸ ਚ ਦੁਕ੍ਕਟਂ. ਓਕਾਸਂ ਅਨਿਯਮੇਤ੍ਵਾ ‘‘ਪੋਕ੍ਖਰਣਿਂ ਖਣ, ਆਵਾਟਂ ਖਣ, ਕਨ੍ਦਂ ਖਣਾ’’ਤਿਆਦੀਨਿ ਭਣਨ੍ਤਸ੍ਸ, ਆਤਪੇਨ ਸੁਸ੍ਸਿਤ੍ਵਾ ਫਲਿਤਕਦ੍ਦਮਂ ਵਾ ਗੋਕਣ੍ਟਕਂ ਵਾ ਹੇਟ੍ਠਾ ਪਥਵਿਯਾ ਅਸਮ੍ਬਦ੍ਧਂ ਭਿਜ੍ਜਿਤ੍ਵਾ ਪਤਿਤਨਦਿਤਟਂ ਵਾ ਮਹਨ੍ਤਮ੍ਪਿ ਨਙ੍ਗਲਚ੍ਛਿਨ੍ਨਮਤ੍ਤਿਕਾਪਿਣ੍ਡਨ੍ਤਿਏਵਮਾਦੀਨਿ ਸਬ੍ਬਞ੍ਚ ਅਜਾਤਪਥਵਿਂ ਵਿਕੋਪੇਨ੍ਤਸ੍ਸ, ‘‘ਇਮਸ੍ਸ ਥਮ੍ਭਸ੍ਸ ਆਵਾਟਂ ਜਾਨ, ਮਤ੍ਤਿਕਂ ਦੇਹਿ, ਮਤ੍ਤਿਕਂ ਆਹਰ, ਪਂਸੁਨਾ ਮੇ ਅਤ੍ਥੋ, ਮਤ੍ਤਿਕਂ ਕਪ੍ਪਿਯਂ ਕਰੋਹੀ’’ਤਿ ਭਣਨ੍ਤਸ੍ਸ, ਅਸਞ੍ਚਿਚ੍ਚ ਰੁਕ੍ਖਾਦਿਪਵਟ੍ਟਨੇਨ ਭਿਨ੍ਦਨ੍ਤਸ੍ਸ, ਅਸਤਿਯਾ ਪਾਦਙ੍ਗੁਟ੍ਠਕਾਦੀਹਿ ਵਿਲੇਖਨ੍ਤਸ੍ਸ, ਜਾਤਪਥਵਿਭਾਵਂ ਵਾ, ‘‘ਖਣਾਮਿ ਵਾ ਅਹ’’ਨ੍ਤਿ ਅਜਾਨਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਜਾਤਪਥਵੀ, ਪਥਵਿਸਞ੍ਞਿਤਾ, ਖਣਨਖਣਾਪਨਾਨਂ ਅਞ੍ਞਤਰਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਪਣ੍ਣਤ੍ਤਿਵਜ੍ਜਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਥਵੀਖਣਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਮੁਸਾਵਾਦਵਗ੍ਗੋ ਪਠਮੋ.

੨. ਭੂਤਗਾਮਵਗ੍ਗੋ

੧. ਭੂਤਗਾਮਸਿਕ੍ਖਾਪਦਵਣ੍ਣਨਾ

ਭੂਤਗਾਮਵਗ੍ਗਸ੍ਸ ਪਠਮੇ ਭੂਤਗਾਮਪਾਤਬ੍ਯਤਾਯਾਤਿ ਏਤ੍ਥ ਭਵਨ੍ਤਿ ਅਹੇਸੁਞ੍ਚਾਤਿ ਭੂਤਾ, ਜਾਯਨ੍ਤਿ ਵਡ੍ਢਨ੍ਤਿ ਜਾਤਾ ਵਡ੍ਢਿਤਾ ਚਾਤਿ ਅਤ੍ਥੋ. ਗਾਮੋਤਿ ਰਾਸਿ, ਭੂਤਾਨਂ ਗਾਮੋ, ਭੂਤਾ ਏਵ ਵਾ ਗਾਮੋਤਿ ਭੂਤਗਾਮੋ, ਪਤਿਟ੍ਠਿਤਹਰਿਤਤਿਣਰੁਕ੍ਖਾਦੀਨਮੇਤਂ ਅਧਿਵਚਨਂ. ਪਾਤਬ੍ਯਸ੍ਸ ਭਾਵੋ ਪਾਤਬ੍ਯਤਾ, ਛੇਦਨਭੇਦਨਾਦੀਹਿ ਯਥਾਰੁਚਿ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ, ਤਸ੍ਸਂ ਭੂਤਗਾਮਪਾਤਬ੍ਯਤਾਯ, ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਂ, ਭੂਤਗਾਮਪਾਤਬ੍ਯਤਾਹੇਤੁ ਭੂਤਗਾਮਸ੍ਸ ਛੇਦਨਾਦਿਪਚ੍ਚਯਾ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਤਸ੍ਮਾ ਯੋ ਭਿਕ੍ਖੁ ਪਥਵਿਉਦਕਪਾਕਾਰਾਦੀਸੁ ਯਤ੍ਥਕਤ੍ਥਚਿ ਜਾਤਂ ਅਸੁਕ੍ਖਂ ਅਨ੍ਤਮਸੋ ਅਤਿਸੁਖੁਮਤਿਣਮ੍ਪਿ ਸਾਸਪਬੀਜਕਸੇਵਾਲਮ੍ਪਿ ਉਦ੍ਧਰਣਚ੍ਛੇਦਨਵਿਜ੍ਝਨਾਦੀਹਿ ਵਿਕੋਪੇਤਿ ਵਾ ਪਥਵਿਖਣਨੇ ਵੁਤ੍ਤਨਯੇਨ ਵਿਕੋਪਾਪੇਤਿ ਵਾ ਪਾਚਿਤ੍ਤਿਯਂ ਆਪਜ੍ਜਤਿ.

ਆਲ਼ਵਿਯਂ ਆਲ਼ਵਕੇ ਭਿਕ੍ਖੂ ਆਰਬ੍ਭ ਰੁਕ੍ਖਛਿਨ੍ਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਭੂਤਗਾਮਤੋ ਵਿਯੋਜਿਤਮੂਲਬੀਜਖਨ੍ਧਬੀਜਫਲੁਬੀਜਅਗ੍ਗਬੀਜਬੀਜਬੀਜਾਨਂ ਅਞ੍ਞਤਰਂ ਭਾਜਨਗਤਂ ਵਾ ਰਾਸਿਕਤਂ ਵਾ ਭੂਮਿਯਂ ਰੋਪਿਤਮ੍ਪਿ ਨਿਕ੍ਖਨ੍ਤਮੂਲਮਤ੍ਤਂ ਵਾ ਨਿਕ੍ਖਨ੍ਤਅਙ੍ਕੁਰਮਤ੍ਤਂ ਵਾ ਸਚੇਪਿਸ੍ਸ ਵਿਦਤ੍ਥਿਮਤ੍ਤਾ ਪਤ੍ਤਵਟ੍ਟਿ ਨਿਗ੍ਗਚ੍ਛਤਿ, ਅਨਿਕ੍ਖਨ੍ਤੇ ਵਾ ਮੂਲੇ ਨਿਕ੍ਖਨ੍ਤੇ ਵਾ ਮੂਲੇ ਯਾਵ ਅਙ੍ਕੁਰੋ ਹਰਿਤੋ ਨ ਹੋਤਿ, ਤਾਵ ਤਂ ਵਿਕੋਪੇਨ੍ਤਸ੍ਸ ਦੁਕ੍ਕਟਂ, ਤਥਾ ਭੂਤਗਾਮਬੀਜਗਾਮੇ ਵੇਮਤਿਕਸ੍ਸ, ਅਭੂਤਗਾਮਬੀਜਗਾਮੇ ਭੂਤਗਾਮਬੀਜਗਾਮਸਞ੍ਞਿਨੋ ਚੇਵ ਵੇਮਤਿਕਸ੍ਸ ਚ. ਉਭਯਤ੍ਥ ਪਨ ਅਤਥਾਸਞ੍ਞਿਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ, ਅਸਞ੍ਚਿਚ੍ਚ ਅਸਤਿਯਾ ਅਜਾਨਿਤ੍ਵਾ ਵਾ ਵਿਕੋਪੇਨ੍ਤਸ੍ਸ, ‘ਇਮਂ ਰੁਕ੍ਖ’ਨ੍ਤਿ ਏਵਂ ਅਨਿਯਮੇਤ੍ਵਾ ‘‘ਰੁਕ੍ਖਂ ਛਿਨ੍ਦ, ਵਲ੍ਲਿਂ ਛਿਨ੍ਦਾ’’ਤਿਆਦੀਨਿ ਭਣਨ੍ਤਸ੍ਸ, ‘‘ਇਮਂ ਪੁਪ੍ਫਂ ਵਾ ਫਲਂ ਵਾ ਜਾਨ, ਇਮਂ ਦੇਹਿ, ਇਮਂ ਆਹਰ, ਇਮਿਨਾ ਮੇ ਅਤ੍ਥੋ, ਇਮਂ ਕਪ੍ਪਿਯਂ ਕਰੋਹੀ’’ਤਿ ਭਣਨ੍ਤਸ੍ਸ ਚ ਅਨਾਪਤ੍ਤਿ. ਏਵਂ ਕਪ੍ਪਿਯਵਚਨੇਨ ਭੂਤਗਾਮਤੋ ਵਿਯੋਜਿਤਂ ਪਨ ਬੀਜਜਾਤਂ ਪੁਨ ਪਿ ‘‘ਕਪ੍ਪਿਯਂ ਕਰੋਹੀ’’ਤਿ ਕਾਰੇਤ੍ਵਾਵ ਪਰਿਭੁਞ੍ਜਿਤਬ੍ਬਂ. ਏਵਞ੍ਹਿਸ੍ਸ ਬੀਜਗਾਮਪਰਿਮੋਚਨਮ੍ਪਿ ਕਤਂ ਹੋਤਿ.

ਕਪ੍ਪਿਯਂ ਕਰੋਨ੍ਤੇਨ ਪਨ ਅਗ੍ਗਿਨਾ ਵਾ ਨਖੇਨ ਵਾ ਸਤ੍ਥੇਨ ਵਾ ਕਤ੍ਤਬ੍ਬਂ, ਅਗ੍ਗਿਨਾ ਕਰੋਨ੍ਤੇਨ ਚ ਯੇਨ ਕੇਨਚਿ ਅਗ੍ਗਿਨਾ ਏਕਦੇਸੇ ਫੁਸਨ੍ਤੇਨ ‘ਕਪ੍ਪਿਯ’ਨ੍ਤਿ ਵਤ੍ਵਾਵ ਕਾਤਬ੍ਬਂ. ਸਤ੍ਥੇਨ ਕਰੋਨ੍ਤੇਨ ਯਸ੍ਸ ਕਸ੍ਸਚਿ ਤਿਖਿਣਸਤ੍ਥਸ੍ਸ ਅਨ੍ਤਮਸੋ ਸੂਚਿਨਖਚ੍ਛੇਦਨਾਦੀਨਮ੍ਪਿ ਤੁਣ੍ਡੇਨ ਵਾ ਧਾਰਾਯ ਵਾ ਵੇਧਂ ਵਾ ਛੇਦਂ ਵਾ ਦਸ੍ਸੇਨ੍ਤੇਨ ਤਥੇਵ ਕਾਤਬ੍ਬਂ. ਨਖੇਨ ਕਰੋਨ੍ਤੇਨ ਠਪੇਤ੍ਵਾ ਗੋਮਹਿਂਸਾਦੀਨਂ ਖੁਰੇ ਯੇਨ ਕੇਨਚਿ ਅਪੂਤਿਨਾ ਮਨੁਸ੍ਸਾਨਂ ਵਾ ਤਿਰਚ੍ਛਾਨਾਨਂ ਵਾ ਨਖੇਨ ਅਨ੍ਤਮਸੋ ਛਿਨ੍ਦਿਤ੍ਵਾ ਆਹਟੇਨਾਪਿ ਸਤ੍ਥੇ ਵੁਤ੍ਤਨਯੇਨੇਵ ਕਾਤਬ੍ਬਂ. ਤਤ੍ਥ ਸਚੇਪਿ ਬੀਜਾਨਂ ਪਬ੍ਬਤਮਤ੍ਤੋ ਰਾਸਿ, ਰੁਕ੍ਖਸਹਸ੍ਸਂ ਵਾ ਛਿਨ੍ਦਿਤ੍ਵਾ ਏਕਾਬਦ੍ਧਂ, ਉਚ੍ਛੂਨਂ ਵਾ ਮਹਾਭਾਰੋ ਬਨ੍ਧਿਤ੍ਵਾ ਠਪਿਤੋ ਹੋਤਿ, ਏਕਸ੍ਮਿਂ ਬੀਜੇ ਵਾ ਰੁਕ੍ਖਸਾਖਾਯ ਵਾ ਉਚ੍ਛੁਮ੍ਹਿ ਵਾ ਕਪ੍ਪਿਯੇ ਕਤੇ ਸਬ੍ਬਂ ਕਤਂ ਹੋਤਿ. ਉਚ੍ਛੁਂ ‘‘ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਤੇਹਿ ਸਦ੍ਧਿਂ ਬਦ੍ਧਂ ਦਾਰੁਕਂ ਵਿਜ੍ਝਤਿ, ਵਟ੍ਟਤਿਯੇਵ. ਸਚੇ ਪਨ ਯਾਯ ਵਲ੍ਲਿਯਾ ਭਾਰੋ ਬਦ੍ਧੋ, ਤਂ ਵਿਜ੍ਝਤਿ, ਨ ਵਟ੍ਟਤਿ. ਮਰਿਚਪਕ੍ਕਾਦੀਹਿ ਮਿਸ੍ਸੇਤ੍ਵਾ ਭਤ੍ਤਂ ਆਹਰਨ੍ਤਿ, ‘‘ਕਪ੍ਪਿਯਂ ਕਰੋਹੀ’’ਤਿ ਵੁਤ੍ਤੇ ਸਚੇਪਿ ਭਤ੍ਤਸਿਤ੍ਥੇ ਵਿਜ੍ਝਤਿ, ਵਟ੍ਟਤਿਯੇਵ, ਤਿਲਤਣ੍ਡੁਲੇਸੁਪਿ ਏਸੇਵ ਨਯੋ. ਯਾਗੁਯਾ ਪਕ੍ਖਿਤ੍ਤਾਨਿ ਪਨ ਏਕਾਬਦ੍ਧਾਨਿ ਹੁਤ੍ਵਾ ਨ ਸਨ੍ਤਿਟ੍ਠਨ੍ਤਿ, ਤਤ੍ਥ ਏਕੇਕਂ ਵਿਜ੍ਝਿਤ੍ਵਾਵ ਕਾਤਬ੍ਬਂ. ਕਪਿਟ੍ਠਫਲਾਦੀਨਂ ਅਨ੍ਤੋ ਮਿਞ੍ਜਂ ਕਟਾਹਂ ਮੁਞ੍ਚਿਤ੍ਵਾ ਸਞ੍ਚਰਤਿ, ਭਿਨ੍ਦਾਪੇਤ੍ਵਾ ਕਪ੍ਪਿਯਂ ਕਾਰੇਤਬ੍ਬਂ. ਏਕਾਬਦ੍ਧਾ ਚੇ, ਕਟਾਹੇਪਿ ਕਾਤੁਂ ਵਟ੍ਟਤਿ. ਯਂ ਪਨ ਫਲਂ ਤਰੁਣਂ ਹੋਤਿ ਅਬੀਜਂ ਯਞ੍ਚ ਨਿਬ੍ਬਤ੍ਤਬੀਜਂ ਬੀਜਂ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਂ, ਤਤ੍ਥ ਕਪ੍ਪਿਯਕਰਣਕਿਚ੍ਚਂ ਨਤ੍ਥਿ. ਭੂਤਗਾਮੋ, ਭੂਤਗਾਮਸਞ੍ਞਿਤਾ, ਵਿਕੋਪਨਂ ਵਾ ਵਿਕੋਪਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਥਵਿਖਣਨਸਦਿਸਾਨੇਵਾਤਿ.

ਭੂਤਗਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਯਮਤ੍ਥਂ ਸਙ੍ਘਮਜ੍ਝੇ ਵਿਨਯਧਰੋ ਪੁਚ੍ਛਤਿ, ਤਤੋ ਅਞ੍ਞਂ ਵਦਤੀਤਿ ਅਞ੍ਞਵਾਦਕੋ, ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮਂ. ਵਿਹੇਸਤੀਤਿ ਵਿਹੇਸਕੋ, ਤੁਣ੍ਹੀਭਾਵਸ੍ਸੇਤਂ ਨਾਮਂ, ਤਸ੍ਮਿਂ ਅਞ੍ਞਵਾਦਕੇ ਵਿਹੇਸਕੇ. ਪਾਚਿਤ੍ਤਿਯਨ੍ਤਿ ਵਤ੍ਥੁਦ੍ਵਯੇ ਪਾਚਿਤ੍ਤਿਯਦ੍ਵਯਂ ਵੁਤ੍ਤਂ. ਤਸ੍ਮਾ ਯੋ ਭਿਕ੍ਖੁ ਸਾਵਸੇਸਂ ਆਪਤ੍ਤਿਂ ਆਪਨ੍ਨੋ ਸਙ੍ਘਮਜ੍ਝੇ ਅਨੁਯੁਞ੍ਜਿਯਮਾਨੋ ਤਂ ਨ ਕਥੇਤੁਕਾਮੋ ਅਞ੍ਞੇਨ ਵਚਨੇਨ ਅਞ੍ਞਂ ਛਾਦੇਨ੍ਤੋ ਤਥਾ ਤਥਾ ਵਿਕ੍ਖਿਪਤਿ, ਯੋ ਚ ਤੁਣ੍ਹੀਭਾਵੇਨ ਵਿਹੇਸੇਤਿ, ਤੇਸਂ ਯਂ ਭਗਵਤਾ ਅਞ੍ਞਵਾਦਕਕਮ੍ਮਞ੍ਚੇਵ ਵਿਹੇਸਕਕਮ੍ਮਞ੍ਚ ਅਨੁਞ੍ਞਾਤਂ, ਤਸ੍ਮਿਂ ਸਙ੍ਘੇਨ ਕਤੇ ਪੁਨ ਤਥਾ ਕਰੋਨ੍ਤਾਨਂ ਪਾਚਿਤ੍ਤਿਯਂ.

ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਅਞ੍ਞੇਨਞ੍ਞਂ ਪਟਿਚਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਅਨਾਰੋਪਿਤੇ ਪਨ ਅਞ੍ਞਵਾਦਕੇ ਵਾ ਵਿਹੇਸਕੇ ਵਾ ਤਥਾ ਕਰੋਨ੍ਤਸ੍ਸ ਦੁਕ੍ਕਟਮੇਵ. ਆਪਤ੍ਤਿਂ ਆਪਨ੍ਨਭਾਵਂ ਵਾ ਅਜਾਨਨ੍ਤਸ੍ਸ ‘‘ਕਿਂ ਤੁਮ੍ਹੇ ਭਣਥਾ’’ਤਿ ਪੁਚ੍ਛਤੋ, ਗੇਲਞ੍ਞੇਨ ਵਾ, ‘‘ਸਙ੍ਘਸ੍ਸ ਭਣ੍ਡਨਾਦੀਨਿ ਵਾ ਭਵਿਸ੍ਸਨ੍ਤਿ, ਅਧਮ੍ਮੇਨ ਵਾ ਵਗ੍ਗੇਨ ਵਾ ਨਕਮ੍ਮਾਰਹਸ੍ਸ ਵਾ ਕਮ੍ਮਂ ਕਰਿਸ੍ਸਨ੍ਤੀ’’ਤਿ ਇਮਿਨਾ ਅਧਿਪ੍ਪਾਯੇਨ ਨ ਕਥੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਧਮ੍ਮਕਮ੍ਮੇਨ ਆਰੋਪਿਤਤਾ, ਆਪਤ੍ਤਿਯਾ ਵਾ ਵਤ੍ਥੁਨਾ ਵਾ ਅਨੁਯੁਞ੍ਜਿਯਮਾਨਤਾ, ਛਾਦੇਤੁਕਾਮਤਾਯ ਅਞ੍ਞੇਨਞ੍ਞਂ ਪਟਿਚਰਣਂ ਵਾ ਤੁਣ੍ਹੀਭਾਵੋ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਸਿਯਾ ਕਿਰਿਯਂ, ਸਿਯਾ ਅਕਿਰਿਯਂ, ਦੁਕ੍ਖਵੇਦਨਞ੍ਚ ਹੋਤੀਤਿ.

ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ

ਤਤਿਯੇ ਯੇਨ ਵਚਨੇਨ ਉਜ੍ਝਾਪੇਨ੍ਤਿ ‘‘ਛਨ੍ਦਾਯ ਇਤ੍ਥਨ੍ਨਾਮੋ ਇਦਂ ਨਾਮ ਕਰੋਤੀ’’ਤਿਆਦੀਨਿ ਵਦਨ੍ਤਾ ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਸੇਨਾਸਨਪਞ੍ਞਾਪਕਾਦਿਭੇਦਂ ਤਸ੍ਸ ਅਯਸਕਾਮਾ ਹੁਤ੍ਵਾ ਭਿਕ੍ਖੂਹਿ ਅਵਜਾਨਾਪੇਨ੍ਤਿ, ਅਵਞ੍ਞਾਯ ਓਲੋਕਾਪੇਨ੍ਤਿ, ਲਾਮਕਤੋ ਵਾ ਚਿਨ੍ਤਾਪੇਨ੍ਤਿ, ਤਂ ਵਚਨਂ ਉਜ੍ਝਾਪਨਕਂ. ਯੇਨ ਚ ਤਥੇਵ ਵਦਨ੍ਤਾ ਖਿਯ੍ਯਨ੍ਤਿ, ਸਬ੍ਬਤ੍ਥ ਤਸ੍ਸ ਅਵਣ੍ਣਂ ਪਕਾਸੇਨ੍ਤਿ, ਤਂ ਖਿਯ੍ਯਨਕਂ, ਤਸ੍ਮਿਂ ਉਜ੍ਝਾਪਨਕੇ ਖਿਯ੍ਯਨਕੇ. ਪਾਚਿਤ੍ਤਿਯਨ੍ਤਿ ਵਤ੍ਥੁਦ੍ਵਯੇ ਪਾਚਿਤ੍ਤਿਯਦ੍ਵਯਂ ਵੁਤ੍ਤਂ. ਤਸ੍ਮਾ ਯੋ ਸਮ੍ਮਤਸ੍ਸ ਭਿਕ੍ਖੁਨੋ ਅਯਸਕਾਮਤਾਯ ਉਪਸਮ੍ਪਨ੍ਨਸ੍ਸ ਵਦਨ੍ਤੋ ਉਜ੍ਝਾਪੇਤਿ ਵਾ ਖਿਯ੍ਯਤਿ ਵਾ, ਤਸ੍ਸ ਪਾਚਿਤ੍ਤਿਯਂ ਹੋਤਿ.

ਰਾਜਗਹੇ ਮੇਤ੍ਤਿਯਭੂਮਜਕੇ ਭਿਕ੍ਖੂ ਆਰਬ੍ਭ ਉਜ੍ਝਾਪਨਖਿਯ੍ਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਯਂ ਤਸ੍ਸ ਉਪਸਮ੍ਪਨ੍ਨਸ੍ਸ ਸਮ੍ਮੁਤਿਕਮ੍ਮਂ ਕਤਂ, ਤਸ੍ਮਿਂ ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਅਨੁਪਸਮ੍ਪਨ੍ਨਸ੍ਸ ਪਨ ਸਨ੍ਤਿਕੇ ਤਥਾ ਭਣਨ੍ਤਸ੍ਸ, ਅਸਮ੍ਮਤਸ੍ਸ ਚ ਅਵਣ੍ਣਂ ਯਸ੍ਸ ਕਸ੍ਸਚਿ ਸਨ੍ਤਿਕੇ ਭਣਨ੍ਤਸ੍ਸ, ਅਨੁਪਸਮ੍ਪਨ੍ਨਸ੍ਸ ਪਨ ਸਮ੍ਮਤਸ੍ਸ ਵਾ ਅਸਮ੍ਮਤਸ੍ਸ ਵਾ ਅਵਣ੍ਣਂ ਯਸ੍ਸ ਕਸ੍ਸਚਿਦੇਵ ਸਨ੍ਤਿਕੇ ਭਣਨ੍ਤਸ੍ਸ ਚ ਦੁਕ੍ਕਟਮੇਵ. ਪਕਤਿਯਾਵ ਛਨ੍ਦਾਦਿਵਸੇਨ ਕਰੋਨ੍ਤਂ ਉਜ੍ਝਾਪੇਨ੍ਤਸ੍ਸ ਵਾ ਖਿਯ੍ਯਨ੍ਤਸ੍ਸ ਵਾ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਧਮ੍ਮਕਮ੍ਮੇਨ ਸਮ੍ਮਤਤਾ, ਉਪਸਮ੍ਪਨ੍ਨਤਾ, ਅਗਤਿਗਮਨਾਭਾਵੋ, ਤਸ੍ਸ ਅਵਣ੍ਣਕਾਮਤਾ, ਯਸ੍ਸ ਸਨ੍ਤਿਕੇ ਵਦਤਿ, ਤਸ੍ਸ ਉਪਸਮ੍ਪਨ੍ਨਤਾ, ਉਜ੍ਝਾਪਨਂ ਵਾ ਖਿਯ੍ਯਨਂ ਵਾਤਿ ਇਮਾਨੇਤ੍ਥ ਛ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਮੇਵਾਤਿ.

ਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪਠਮਸੇਨਾਸਨਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ. ਮਞ੍ਚਾਦੀਸੁ ਯੋਕੋਚਿ ਮਞ੍ਚਸਙ੍ਖੇਪੇਨ ਕਤੋ ਸਬ੍ਬੋਪਿ ਮਞ੍ਚੋਯੇਵ, ਪੀਠੇਪਿ ਏਸੇਵ ਨਯੋ. ਯੇਨ ਕੇਨਚਿ ਪਨ ਚੋਲ਼ੇਨ ਵਾ ਕਪ੍ਪਿਯਚਮ੍ਮੇਨ ਵਾ ਛਵਿਂ ਕਤ੍ਵਾ ਠਪੇਤ੍ਵਾ ਮਨੁਸ੍ਸਲੋਮਂ ਤਾਲੀਸਪਤ੍ਤਞ੍ਚ ਯੇਹਿ ਕੇਹਿਚਿ ਲੋਮਪਣ੍ਣਤਿਣਵਾਕਚੋਲ਼ੇਹਿ ਪੂਰੇਤ੍ਵਾ ਕਤਸੇਨਾਸਨਂ ਭਿਸੀਤਿ ਵੁਚ੍ਚਤਿ. ਤਤ੍ਥ ਨਿਸੀਦਿਤੁਮ੍ਪਿ ਨਿਪਜ੍ਜਿਤੁਮ੍ਪਿ ਵਟ੍ਟਤਿ, ਪਮਾਣਪਰਿਚ੍ਛੇਦੋਪਿ ਚੇਤ੍ਥ ਨਤ੍ਥਿ. ਕੋਚ੍ਛਂ ਪਨ ਵਾਕਉਸੀਰਮੁਞ੍ਜਪਬ੍ਬਜਾਦੀਨਂ ਅਞ੍ਞਤਰਮਯਂ ਅਨ੍ਤੋ ਸਂਵੇਲ੍ਲਿਤ੍ਵਾ ਬਦ੍ਧਂ ਹੇਟ੍ਠਾ ਚ ਉਪਰਿ ਚ ਵਿਤ੍ਥਤਂ ਪਣਵਸਣ੍ਠਾਨਂ ਮਜ੍ਝੇ ਸੀਹਚਮ੍ਮਾਦਿਪਰਿਕ੍ਖਿਤ੍ਤਂ ਹੋਤਿ, ਅਕਪ੍ਪਿਯਚਮ੍ਮਂ ਨਾਮੇਤ੍ਥ ਨਤ੍ਥਿ. ਸੇਨਾਸਨਞ੍ਹਿ ਸੋਵਣ੍ਣਮਯਮ੍ਪਿ ਵਟ੍ਟਤਿ. ਅਜ੍ਝੋਕਾਸੇਤਿ ਏਤ੍ਥ ਯੇ ਅਵਸ੍ਸਿਕਸਙ੍ਕੇਤਾ ਵਸ੍ਸਾਨਮਾਸਾਤਿ ਏਵਂ ਅਸਞ੍ਞਿਤਾ ਅਟ੍ਠ ਮਾਸਾ, ਤੇ ਠਪੇਤ੍ਵਾ ਇਤਰੇਸੁ ਚਤੂਸੁ ਮਾਸੇਸੁ ਸਚੇਪਿ ਦੇਵੋ ਨ ਵਸ੍ਸਤਿ. ਤਥਾਪਿ ਪਕਤਿਅਜ੍ਝੋਕਾਸੇ ਚ ਓਵਸ੍ਸਕਮਣ੍ਡਪੇ ਚ ਸਨ੍ਥਰਿਤੁਂ ਨ ਵਟ੍ਟਤਿ. ਯਤ੍ਥ ਪਨ ਹੇਮਨ੍ਤੇ ਵਸ੍ਸਤਿ, ਤਤ੍ਥ ਅਪਰੇਪਿ ਚਤ੍ਤਾਰੋ ਮਾਸੇ ਨ ਵਟ੍ਟਤਿ. ਗਿਮ੍ਹੇ ਪਨ ਸਬ੍ਬਤ੍ਥ ਵਿਗਤਵਲਾਹਕਂ ਵਿਸੁਦ੍ਧਂ ਨਭਂ ਹੋਤਿ, ਤਸ੍ਮਾ ਤਦਾ ਕੇਨਚਿਦੇਵ ਕਰਣੀਯੇਨ ਗਚ੍ਛਤਿ, ਵਟ੍ਟਤਿ. ਕਾਕਾਦੀਨਂ ਨਿਬਦ੍ਧਵਾਸਰੁਕ੍ਖਮੂਲੇ ਪਨ ਕਦਾਚਿਪਿ ਨ ਵਟ੍ਟਤਿ. ਇਤਿ ਯਤ੍ਥ ਚ ਯਦਾ ਚ ਸਨ੍ਥਰਿਤੁਂ ਨ ਵਟ੍ਟਤਿ, ਤਂ ਸਬ੍ਬਮਿਧ ਅਜ੍ਝੋਕਾਸਸਙ੍ਖਮੇਵ ਗਤਨ੍ਤਿ ਵੇਦਿਤਬ੍ਬਂ.

ਸਨ੍ਥਰਿਤ੍ਵਾਤਿ ਤਥਾਰੂਪੇ ਠਾਨੇ ਅਤ੍ਤਨੋ ਵਾ ਪਰਸ੍ਸ ਵਾ ਅਤ੍ਥਾਯ ਸਨ੍ਥਰਿਤ੍ਵਾ. ਅਞ੍ਞਸ੍ਸਤ੍ਥਾਯ ਸਨ੍ਥਤਮ੍ਪਿ ਹਿ ਯਾਵ ਸੋ ਤਤ੍ਥ ਨ ਨਿਸੀਦਤਿ, ‘ਗਚ੍ਛ ਤ੍ਵ’ਨ੍ਤਿ ਵਾ ਨ ਭਣਤਿ, ਤਾਵ ਸਨ੍ਥਾਰਕਸ੍ਸੇਵ ਭਾਰੋ. ਸਨ੍ਥਰਾਪੇਤ੍ਵਾਤਿ ਅਨੁਪਸਮ੍ਪਨ੍ਨੇਨ ਸਨ੍ਥਰਾਪੇਤ੍ਵਾ. ਏਤਦੇਵ ਹਿ ਤਸ੍ਸ ਪਲਿਬੋਧੋ ਹੋਤਿ, ਉਪਸਮ੍ਪਨ੍ਨੇਨ ਸਨ੍ਥਤਂ ਸਨ੍ਥਾਰਕਸ੍ਸੇਵ ਭਾਰੋ, ਤਞ੍ਚ ਖੋ ਯਾਵ ਆਣਾਪਕੋ ਤਤ੍ਥ ਨ ਨਿਸੀਦਤਿ, ‘ਗਚ੍ਛ ਤ੍ਵ’ਨ੍ਤਿ ਵਾ ਨ ਭਣਤਿ. ਯਸ੍ਮਿਞ੍ਹਿ ਅਤ੍ਤਨਾ ਸਨ੍ਥਰਾਪਿਤੇ ਵਾ ਪਕਤਿਸਨ੍ਥਤੇ ਵਾ ਉਪਸਮ੍ਪਨ੍ਨੋ ਨਿਸੀਦਤਿ, ਸਬ੍ਬਂ ਤਂ ਨਿਸਿਨ੍ਨਸ੍ਸੇਵ ਭਾਰੋ, ਤਸ੍ਮਾ ਸਨ੍ਥਰਾਪਿਤਨ੍ਤ੍ਵੇਵ ਸਙ੍ਖਂ ਗਚ੍ਛਤਿ. ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰੇਯ੍ਯ, ਨ ਉਦ੍ਧਰਾਪੇਯ੍ਯਾਤਿ ਅਤ੍ਤਨਾ ਵਾ ਉਦ੍ਧਰਿਤ੍ਵਾ ਪਤਿਰੂਪੇ ਠਾਨੇ ਨ ਠਪੇਯ੍ਯ, ਪਰੇਨ ਵਾ ਤਥਾ ਨ ਕਾਰਾਪੇਯ੍ਯ. ਅਨਾਪੁਚ੍ਛਂ ਵਾ ਗਚ੍ਛੇਯ੍ਯਾਤਿ ਯੋ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਲਜ੍ਜੀ ਹੋਤਿ, ਅਤ੍ਤਨੋ ਪਲਿਬੋਧਂ ਵਿਯ ਮਞ੍ਞਤਿ, ਤਥਾਰੂਪਂ ਅਨਾਪੁਚ੍ਛਿਤ੍ਵਾ ਤਂ ਸੇਨਾਸਨਂ ਤਸ੍ਸ ਅਨਿਯ੍ਯਾਤੇਤ੍ਵਾ ਨਿਰਪੇਕ੍ਖੋ ਗਚ੍ਛਤਿ, ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਂ ਅਤਿਕ੍ਕਮੇਯ੍ਯ, ਤਸ੍ਸ ਏਕੇਨ ਪਾਦੇਨ ਲੇਡ੍ਡੁਪਾਤਾਤਿਕ੍ਕਮੇ ਦੁਕ੍ਕਟਂ, ਦੁਤਿਯਪਾਦਾਤਿਕ੍ਕਮੇ ਪਾਚਿਤ੍ਤਿਯਂ. ਭੋਜਨਸਾਲਾਯ ਠਿਤੋ ਪਨ ‘‘ਅਸੁਕਸ੍ਮਿਂ ਨਾਮ ਦਿਵਾਵਿਹਾਰਟ੍ਠਾਨੇ ਪਞ੍ਞਪੇਤ੍ਵਾ ਗਚ੍ਛਾਹੀ’’ਤਿ ਪੇਸੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਅਞ੍ਞਤ੍ਥ ਗਚ੍ਛਨ੍ਤੋ ਪਾਦੁਦ੍ਧਾਰੇਨ ਕਾਰੇਤਬ੍ਬੋ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਨ੍ਥਤਂ ਅਨੁਦ੍ਧਰਿਤ੍ਵਾ ਅਨਾਪੁਚ੍ਛਂ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪੁਗ੍ਗਲਿਕੇ ਤਿਕਦੁਕ੍ਕਟਂ, ਚਿਮਿਲਿਕਂ ਵਾ ਉਤ੍ਤਰਤ੍ਥਰਣਂ ਵਾ ਭੂਮਤ੍ਥਰਣਂ ਵਾ ਤਟ੍ਟਿਕਂ ਵਾ ਚਮ੍ਮਕ੍ਖਣ੍ਡਂ ਵਾ ਪਾਦਪੁਞ੍ਛਨਂ ਵਾ ਫਲਕਪੀਠਂ ਵਾ ਯਂ ਵਾ ਪਨਞ੍ਞਂ ਕਞ੍ਚਿ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਅਨ੍ਤਮਸੋ ਪਤ੍ਤਾਧਾਰਕਮ੍ਪਿ ਵੁਤ੍ਤਲਕ੍ਖਣੇ ਅਜ੍ਝੋਕਾਸੇ ਠਪੇਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਮੇਵ. ਆਰਞ੍ਞਕੇਨ ਪਨ ਅਸਤਿ ਅਨੋਵਸ੍ਸਕੇ ਸਬ੍ਬਂ ਰੁਕ੍ਖੇ ਲਗ੍ਗੇਤ੍ਵਾਪਿ ਯਥਾ ਵਾ ਉਪਚਿਕਾਹਿ ਨ ਖਜ੍ਜਤਿ, ਏਵਂ ਕਤ੍ਵਾਪਿ ਗਨ੍ਤੁਂ ਵਟ੍ਟਤਿ. ਅਬ੍ਭੋਕਾਸਿਕੇਨ ਪਨ ਚੀਵਰਕੁਟਿਕਂ ਕਤ੍ਵਾਪਿ ਰਕ੍ਖਿਤਬ੍ਬਂ. ਅਤ੍ਤਨੋ ਸਨ੍ਤਕੇ, ਵਿਸ੍ਸਾਸਿਕਪੁਗ੍ਗਲਿਕੇ, ਉਦ੍ਧਰਣਾਦੀਨਿ ਕਤ੍ਵਾ ਗਮਨੇ, ਓਤਾਪੇਨ੍ਤਸ੍ਸ, ‘‘ਆਗਨ੍ਤ੍ਵਾ ਉਦ੍ਧਰਿਸ੍ਸਾਮੀ’’ਤਿ ਗਚ੍ਛਤੋ, ਵੁਡ੍ਢਤਰਾ ਉਟ੍ਠਾਪੇਨ੍ਤਿ, ਅਮਨੁਸ੍ਸੋ ਤਤ੍ਥ ਨਿਸੀਦਤਿ, ਕੋਚਿ ਇਸ੍ਸਰੋ ਗਣ੍ਹਾਤਿ, ਸੀਹਾਦਯੋ ਤਂ ਠਾਨਂ ਆਗਨ੍ਤ੍ਵਾ ਤਿਟ੍ਠਨ੍ਤਿ, ਏਵਂ ਸੇਨਾਸਨਂ ਪਲਿਬੁਦ੍ਧਂ ਹੋਤਿ, ਤਥਾ ਪਲਿਬੁਦ੍ਧੇ ਵਾ ਸੇਨਾਸਨੇ, ਜੀਵਿਤਬ੍ਰਹ੍ਮਚਰਿਯਨ੍ਤਰਾਯਕਰਾਸੁ ਆਪਦਾਸੁ ਵਾ ਗਚ੍ਛਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਮਞ੍ਚਾਦੀਨਂ ਸਙ੍ਘਿਕਤਾ, ਵੁਤ੍ਤਲਕ੍ਖਣੇ ਦੇਸੇ ਸਨ੍ਥਰਣਂ ਵਾ ਸਨ੍ਥਰਾਪਨਂ ਵਾ, ਅਪਲਿਬੁਦ੍ਧਤਾ, ਆਪਦਾਯ ਅਭਾਵੋ, ਨਿਰਪੇਕ੍ਖਤਾ, ਲੇਡ੍ਡੁਪਾਤਾਤਿਕ੍ਕਮੋਤਿ ਇਮਾਨੇਤ੍ਥ ਛ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਪਠਮਸੇਨਾਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਵਿਹਾਰੇਤਿ ਗਬ੍ਭੇ ਵਾ ਅਞ੍ਞਤਰਸ੍ਮਿਂ ਵਾ ਸਬ੍ਬਪਰਿਚ੍ਛਨ੍ਨੇ ਵੁਤ੍ਤਸੇਨਾਸਨੇ. ਸੇਯ੍ਯਨ੍ਤਿ ਸੇਯ੍ਯਾ ਨਾਮ ਭਿਸੀ ਚਿਮਿਲਿਕਾ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਕ੍ਖਣ੍ਡੋ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ ਵੁਤ੍ਤਂ. ਤਤ੍ਥ ਚਿਮਿਲਿਕਾ ਨਾਮ ਪਰਿਕਮ੍ਮਕਤਾਯ ਭੂਮਿਯਾ ਵਣ੍ਣਾਨੁਰਕ੍ਖਣਤ੍ਥਂ ਕਤਾ. ਉਤ੍ਤਰਤ੍ਥਰਣਂ ਨਾਮ ਮਞ੍ਚਪੀਠਾਦੀਨਂ ਉਪਰਿ ਅਤ੍ਥਰਿਤਬ੍ਬਯੁਤ੍ਤਕਂ ਪਚ੍ਚਤ੍ਥਰਣਂ. ਭੂਮਤ੍ਥਰਣਂ ਨਾਮ ਚਿਮਿਲਿਕਾਯ ਸਤਿ ਤਸ੍ਸਾ ਉਪਰਿ, ਅਸਤਿ ਸੁਦ੍ਧਭੂਮਿਯਂ ਅਤ੍ਥਰਿਤਬ੍ਬਾ ਕਟਸਾਰਕਾਦਿ ਵਿਕਤਿ. ਤਟ੍ਟਿਕਾ ਨਾਮ ਤਾਲਪਣ੍ਣਾਦੀਹਿ ਕਤਤਟ੍ਟਿਕਾ. ਚਮ੍ਮਕ੍ਖਣ੍ਡੋ ਨਾਮ ਯਂਕਿਞ੍ਚਿ ਚਮ੍ਮਂ, ਸੀਹਚਮ੍ਮਾਦੀਨਞ੍ਹਿ ਪਰਿਹਰਣੇਯੇਵ ਪਰਿਕ੍ਖੇਪੋ, ਸੇਨਾਸਨਪਰਿਭੋਗੇ ਪਨ ਅਕਪ੍ਪਿਯਚਮ੍ਮਂ ਨਾਮ ਨਤ੍ਥਿ. ਪਚ੍ਚਤ੍ਥਰਣਂ ਨਾਮ ਪਾਵਾਰੋ ਕੋਜਵੋਤਿ ਏਤ੍ਤਕਮੇਵ, ਸੇਸਂ ਪਾਕਟਮੇਵ. ਇਤਿ ਇਮਾਸੁ ਦਸਸੁ ਸੇਯ੍ਯਾਸੁ ਏਕਮ੍ਪਿ ਸੇਯ੍ਯਂ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤ੍ਵਾ ਵੁਤ੍ਤਲਕ੍ਖਣੇ ਵਿਹਾਰੇ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਯੋ ਭਿਕ੍ਖੁ ਦਿਸਂਗਮਿਕੋ ਯਥਾ ਠਪਿਤਂ ਉਪਚਿਕਾਹਿ ਨ ਖਜ੍ਜਤਿ, ਤਥਾ ਠਪਨਵਸੇਨ ਨੇਵ ਉਦ੍ਧਰੇਯ੍ਯ, ਨ ਉਦ੍ਧਰਾਪੇਯ੍ਯ, ਪੁਰਿਮਸਿਕ੍ਖਾਪਦੇ ਵੁਤ੍ਤਨਯੇਨ ਅਨਾਪੁਚ੍ਛਂ ਵਾ ਗਚ੍ਛੇਯ੍ਯ, ਤਸ੍ਸ ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਅਤਿਕ੍ਕਮਨ੍ਤਸ੍ਸ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ. ਯਤ੍ਥ ਪਨ ਉਪਚਿਕਾਸਙ੍ਕਾ ਨਤ੍ਥਿ, ਤਤੋ ਅਨਾਪੁਚ੍ਛਾਪਿ ਗਨ੍ਤੁਂ ਵਟ੍ਟਤਿ, ਆਪੁਚ੍ਛਨਂ ਪਨ ਵਤ੍ਤਂ.

ਸਾਵਤ੍ਥਿਯਂ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਆਰਬ੍ਭ ਸਙ੍ਘਿਕੇ ਵਿਹਾਰੇ ਸੇਯ੍ਯਂ ਸਨ੍ਥਰਿਤ੍ਵਾ ਅਨੁਦ੍ਧਰਿਤ੍ਵਾ ਅਨਾਪੁਚ੍ਛਾ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪੁਗ੍ਗਲਿਕੇ ਤਿਕਦੁਕ੍ਕਟਂ, ਵੁਤ੍ਤਲਕ੍ਖਣਸ੍ਸ ਪਨ ਵਿਹਾਰਸ੍ਸ ਉਪਚਾਰੇ ਬਹਿ ਆਸਨ੍ਨੇ ਉਪਟ੍ਠਾਨਸਾਲਾਯ ਵਾ ਅਪਰਿਚ੍ਛਨ੍ਨਮਣ੍ਡਪੇ ਵਾ ਪਰਿਚ੍ਛਨ੍ਨੇ ਵਾਪਿ ਬਹੂਨਂ ਸਨ੍ਨਿਪਾਤਭੂਤੇ ਰੁਕ੍ਖਮੂਲੇ ਵਾ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ, ਮਞ੍ਚਪੀਠਞ੍ਚ ਵਿਹਾਰੇ ਵਾ ਵੁਤ੍ਤਪ੍ਪਕਾਰੇ ਵਿਹਾਰੂਪਚਾਰੇ ਵਾ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਉਦ੍ਧਰਣਾਦੀਨਿ ਅਕਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਮੇਵ. ਅਤ੍ਤਨੋ ਸਨ੍ਤਕੇ, ਵਿਸ੍ਸਾਸਿਕਪੁਗ੍ਗਲਿਕੇ, ਉਦ੍ਧਰਣਾਦੀਨਿ ਕਤ੍ਵਾ, ਪੁਰਿਮਨਯੇਨੇਵ ਪਲਿਬੁਦ੍ਧਂ ਛਡ੍ਡੇਤ੍ਵਾ ਗਮਨੇ, ਯੋ ਚ ‘‘ਅਜ੍ਜੇਵ ਆਗਨ੍ਤ੍ਵਾ ਪਟਿਜਗ੍ਗਿਸ੍ਸਾਮੀ’’ਤਿ ਏਵਂ ਸਾਪੇਕ੍ਖੋ ਨਦਿਪਾਰਂ ਵਾ ਗਾਮਨ੍ਤਰਂ ਵਾ ਗਨ੍ਤ੍ਵਾ ਯਤ੍ਥਸ੍ਸ ਗਮਨਚਿਤ੍ਤਂ ਉਪ੍ਪਨ੍ਨਂ, ਤਤ੍ਥੇਵ ਠਿਤੋ ਕਞ੍ਚਿ ਪੇਸੇਤ੍ਵਾ ਵਾ ਆਪੁਚ੍ਛਤਿ, ਨਦਿਪੂਰਰਾਜਚੋਰਾਦੀਸੁ ਵਾ ਕੇਨਚਿ ਪਲਿਬੁਦ੍ਧੋ ਨ ਸਕ੍ਕੋਤਿ ਪਚ੍ਚਾਗਨ੍ਤੁਂ, ਤਸ੍ਸ ਚ, ਆਪਦਾਸੁ ਚ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਲਕ੍ਖਣਸੇਯ੍ਯਾ, ਤਸ੍ਸਾ ਸਙ੍ਘਿਕਤਾ, ਵੁਤ੍ਤਲਕ੍ਖਣੇ ਵਿਹਾਰੇ ਸਨ੍ਥਰਣਂ ਵਾ ਸਨ੍ਥਰਾਪਨਂ ਵਾ, ਅਪਲਿਬੁਦ੍ਧਤਾ, ਆਪਦਾਯ ਅਭਾਵੋ, ਅਨਪੇਕ੍ਖਸ੍ਸ ਦਿਸਾਪਕ੍ਕਮਨਂ, ਉਪਚਾਰਸੀਮਾਤਿਕ੍ਕਮੋਤਿ ਇਮਾਨੇਤ੍ਥ ਸਤ੍ਤ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਨਨ੍ਤਰਸਿਕ੍ਖਾਪਦੇ ਵੁਤ੍ਤਨਯਾਨੇਵਾਤਿ.

ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਅਨੁਪਖਜ੍ਜਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਜਾਨਨ੍ਤਿ ‘‘ਅਨੁਟ੍ਠਾਪਨੀਯੋ ਅਯ’’ਨ੍ਤਿ ਜਾਨਨ੍ਤੋ, ਤੇਨੇਵਸ੍ਸ ਪਦਭਾਜਨੇ ‘‘ਵੁਡ੍ਢੋ’ਤਿ ਜਾਨਾਤਿ, ‘ਗਿਲਾਨੋ’ਤਿ ਜਾਨਾਤਿ, ‘ਸਙ੍ਘੇਨ ਦਿਨ੍ਨੋ’ਤਿ ਜਾਨਾਤੀ’’ਤਿ (ਪਾਚਿ. ੧੨੧) ਵੁਤ੍ਤਂ. ਵੁਡ੍ਢੋ ਹਿ ਅਤ੍ਤਨੋ ਵੁਡ੍ਢਤਾਯ ਅਨੁਟ੍ਠਾਪਨੀਯੋ, ਗਿਲਾਨੋ ਗਿਲਾਨਤਾਯ, ਸਙ੍ਘੋ ਪਨ ਭਣ੍ਡਾਗਾਰਿਕਸ੍ਸ ਵਾ ਧਮ੍ਮਕਥਿਕਵਿਨਯਧਰਗਣਵਾਚਕਾਚਰਿਯਾਨਂ ਵਾ ਬਹੂਪਕਾਰਤਂ ਗੁਣਵਿਸਿਟ੍ਠਤਞ੍ਚ ਸਲ੍ਲਕ੍ਖੇਤ੍ਵਾ ਧੁਵਵਾਸਤ੍ਥਾਯ ਵਿਹਾਰਂ ਸਲ੍ਲਕ੍ਖੇਤ੍ਵਾ ਸਮ੍ਮਨ੍ਨਿਤ੍ਵਾ ਦੇਤਿ, ਤਸ੍ਮਾ ਯਸ੍ਸ ਸਙ੍ਘੇਨ ਦਿਨ੍ਨੋ, ਸੋਪਿ ਅਨੁਟ੍ਠਾਪਨੀਯੋ. ਪੁਬ੍ਬੁਪਗਤਨ੍ਤਿ ਪੁਬ੍ਬਂ ਉਪਗਤਂ. ਅਨੁਪਖਜ੍ਜਾਤਿ ਮਞ੍ਚਪੀਠਾਨਂ ਵਾ ਤਸ੍ਸ ਵਾ ਭਿਕ੍ਖੁਨੋ ਪਵਿਸਨ੍ਤਸ੍ਸ ਵਾ ਨਿਕ੍ਖਮਨ੍ਤਸ੍ਸ ਵਾ ਉਪਚਾਰਂ ਅਨੁਪਵਿਸਿਤ੍ਵਾ. ਤਤ੍ਥ ਮਞ੍ਚਪੀਠਾਨਂ ਤਾਵ ਮਹਲ੍ਲਕੇ ਵਿਹਾਰੇ ਸਮਨ੍ਤਾ ਦਿਯਡ੍ਢੋ ਹਤ੍ਥੋ ਉਪਚਾਰੋ, ਖੁਦ੍ਦਕੇ ਯਤੋ ਪਹੋਤਿ, ਤਤੋ ਦਿਯਡ੍ਢੋ ਹਤ੍ਥੋ, ਤਸ੍ਸ ਪਨ ਪਵਿਸਨ੍ਤਸ੍ਸ ਪਾਦਧੋਵਨਪਾਸਾਣਤੋ ਯਾਵ ਮਞ੍ਚਪੀਠਂ, ਨਿਕ੍ਖਮਨ੍ਤਸ੍ਸ ਮਞ੍ਚਪੀਠਤੋ ਯਾਵ ਪਸ੍ਸਾਵਟ੍ਠਾਨਂ, ਤਾਵ ਉਪਚਾਰੋ. ਸੇਯ੍ਯਂ ਕਪ੍ਪੇਯ੍ਯਾਤਿ ਤਸ੍ਸ ਸਮ੍ਬਾਧਂ ਕਤ੍ਤੁਕਾਮਤਾਯ ਤਸ੍ਮਿਂ ਉਪਚਾਰੇ ਦਸਸੁ ਸੇਯ੍ਯਾਸੁ ਏਕਮ੍ਪਿ ਸਨ੍ਥਰਨ੍ਤਸ੍ਸ ਵਾ ਸਨ੍ਥਰਾਪੇਨ੍ਤਸ੍ਸ ਵਾ ਦੁਕ੍ਕਟਂ, ਤਤ੍ਥ ਨਿਸੀਦਨ੍ਤਸ੍ਸ ਵਾ ਨਿਪਜ੍ਜਨ੍ਤਸ੍ਸ ਵਾ ਪਾਚਿਤ੍ਤਿਯਂ, ਦ੍ਵੇਪਿ ਕਰੋਨ੍ਤਸ੍ਸ ਦ੍ਵੇ ਪਾਚਿਤ੍ਤਿਯਾਨਿ, ਪੁਨਪ੍ਪੁਨਂ ਕਰੋਨ੍ਤਸ੍ਸ ਪਯੋਗਗਣਨਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਅਨੁਪਖਜ੍ਜ ਸੇਯ੍ਯਕਪ੍ਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪੁਗ੍ਗਲਿਕੇ ਤਿਕਦੁਕ੍ਕਟਂ, ਵੁਤ੍ਤੂਪਚਾਰਤੋ ਵਾ ਬਹਿ, ਉਪਟ੍ਠਾਨਸਾਲਾਦਿਕੇ ਵਾ, ਵਿਹਾਰਸ੍ਸ ਉਪਚਾਰੇ ਵਾ, ਸਨ੍ਥਰਣਸਨ੍ਥਰਾਪਨੇਸੁਪਿ ਨਿਸਜ੍ਜਸਯਨੇਸੁਪਿ ਦੁਕ੍ਕਟਮੇਵ. ਅਤ੍ਤਨੋ ਵਾ, ਵਿਸ੍ਸਾਸਿਕਸ੍ਸ ਵਾ ਸਨ੍ਤਕੇ ਪਨ ਵਿਹਾਰੇ ਸਨ੍ਥਰਨ੍ਤਸ੍ਸ, ਯੋ ਚ ਗਿਲਾਨੋ ਵਾ ਸੀਤੁਣ੍ਹਪੀਲ਼ਿਤੋ ਵਾ ਪਵਿਸਤਿ, ਤਸ੍ਸ ਚ, ਆਪਦਾਸੁ ਚ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘਿਕਵਿਹਾਰਤਾ, ਅਨੁਟ੍ਠਾਪਨੀਯਭਾਵਜਾਨਨਂ, ਸਮ੍ਬਾਧੇਤੁਕਾਮਤਾ, ਉਪਚਾਰੇ ਨਿਸੀਦਨਂ ਵਾ ਨਿਪਜ੍ਜਨਂ ਵਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੇਵ, ਇਦਂ ਪਨ ਦੁਕ੍ਖਵੇਦਨਮੇਵਾਤਿ.

ਅਨੁਪਖਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਕੁਪਿਤੋਤਿ ਕੁਦ੍ਧੋ. ਅਨਤ੍ਤਮਨੋਤਿ ਅਤੁਟ੍ਠਚਿਤ੍ਤੋ. ਨਿਕ੍ਕਡ੍ਢੇਯ੍ਯ ਵਾ ਨਿਕ੍ਕਡ੍ਢਾਪੇਯ੍ਯ ਵਾ ਪਾਚਿਤ੍ਤਿਯਨ੍ਤਿ ਏਤ੍ਥ ਯੇ ਅਨੇਕਭੂਮਕਾ ਪਾਸਾਦਾ, ਅਨੇਕਕੋਟ੍ਠਕਾਨਿ ਵਾ ਚਤੁਸ੍ਸਾਲਾਨਿ, ਤਾਦਿਸੇਸੁ ਸੇਨਾਸਨੇਸੁ ਗਹੇਤ੍ਵਾ ਅਨ੍ਤਰਾ ਅਟ੍ਠਪੇਤ੍ਵਾ ਏਕੇਨੇਵ ਪਯੋਗੇਨ ਅਤਿਕ੍ਕਾਮੇਨ੍ਤਸ੍ਸ ਏਕਂ ਪਾਚਿਤ੍ਤਿਯਂ, ਠਪੇਤ੍ਵਾ ਠਪੇਤ੍ਵਾ ਨਾਨਾਪਯੋਗੇਹਿ ਅਤਿਕ੍ਕਾਮੇਨ੍ਤਸ੍ਸ ਦ੍ਵਾਰਗਣਨਾਯ ਪਾਚਿਤ੍ਤਿਯਾਨਿ, ਹਤ੍ਥੇਨ ਅਨਾਮਸਿਤ੍ਵਾ ‘ਨਿਕ੍ਖਮਾ’ਤਿ ਵਤ੍ਵਾ ਵਾਚਾਯ ਨਿਕ੍ਕਡ੍ਢਨ੍ਤਸ੍ਸਾਪਿ ਏਸੇਵ ਨਯੋ. ਨਿਕ੍ਕਡ੍ਢਾਪੇਨ੍ਤਸ੍ਸ ਪਨ ‘ਨਿਕ੍ਕਡ੍ਢਾ’ਤਿ ਆਣਤ੍ਤਮਤ੍ਤੇ ਦੁਕ੍ਕਟਂ, ਸਕਿਂ ਆਣਤ੍ਤੇ ਪਨ ਤਸ੍ਮਿਂ ਬਹੁਕੇਪਿ ਦ੍ਵਾਰੇ ਨਿਕ੍ਖਮਨ੍ਤੇ ਇਤਰਸ੍ਸ ਏਕਮੇਵ ਪਾਚਿਤ੍ਤਿਯਂ. ਸਚੇ ਪਨ ‘‘ਏਤ੍ਤਕਾਨਿ ਦ੍ਵਾਰਾਨਿ ਨਿਕ੍ਕਡ੍ਢਾਹੀ’’ਤਿ ਵਾ, ‘‘ਯਾਵ ਮਹਾਦ੍ਵਾਰਂ, ਤਾਵ ਨਿਕ੍ਕਡ੍ਢਾਹੀ’’ਤਿ ਵਾ ਏਵਂ ਨਿਯਮੇਤ੍ਵਾ ਆਣਤ੍ਤੋ ਹੋਤਿ, ਦ੍ਵਾਰਗਣਨਾਯ ਪਾਚਿਤ੍ਤਿਯਾਨਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਭਿਕ੍ਖੁਂ ਸਙ੍ਘਿਕਾ ਵਿਹਾਰਾ ਨਿਕ੍ਕਡ੍ਢਨਵਤ੍ਥੁਸ੍ਮਿਂ

ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪੁਗ੍ਗਲਿਕੇ ਤਿਕਦੁਕ੍ਕਟਂ, ਤਸ੍ਸ ਪਰਿਕ੍ਖਾਰਨਿਕ੍ਕਡ੍ਢਨੇ, ਉਪਟ੍ਠਾਨਸਾਲਾਦਿਕਾ ਵਿਹਾਰੂਪਚਾਰਾ ਤਸ੍ਸ ਵਾ ਤਸ੍ਸ ਪਰਿਕ੍ਖਾਰਸ੍ਸ ਵਾ ਨਿਕ੍ਕਡ੍ਢਨੇ, ਅਨੁਪਸਮ੍ਪਨ੍ਨਸ੍ਸ ਪਨ ਅਨੁਪਸਮ੍ਪਨ੍ਨਪਰਿਕ੍ਖਾਰਸ੍ਸ ਵਾ ਵਿਹਾਰਾ ਵਾ ਵਿਹਾਰੂਪਚਾਰਾ ਵਾ ਨਿਕ੍ਕਡ੍ਢਨੇ ਨਿਕ੍ਕਡ੍ਢਾਪਨੇ ਚ ਦੁਕ੍ਕਟਮੇਵ. ਤਞ੍ਚ ਖੋ ਅਸਮ੍ਬਦ੍ਧੇਸੁ ਪਰਿਕ੍ਖਾਰੇਸੁ ਪਰਿਕ੍ਖਾਰਗਣਨਾਯ ਵੇਦਿਤਬ੍ਬਂ. ਅਤ੍ਤਨੋ ਵਾ, ਵਿਸ੍ਸਾਸਿਕਸ੍ਸ ਵਾ ਸਨ੍ਤਕਾ ਵਿਹਾਰਾ ਨਿਕ੍ਕਡ੍ਢਨੇ, ਸਕਲਸਙ੍ਘਾਰਾਮਤੋਪਿ ਭਣ੍ਡਨਕਾਰਕਸ੍ਸ ਵਾ ਤਸ੍ਸ ਪਰਿਕ੍ਖਾਰਸ੍ਸ ਵਾ ਨਿਕ੍ਕਡ੍ਢਨੇ ਨਿਕ੍ਕਡ੍ਢਾਪਨੇ ਵਾ, ਅਤ੍ਤਨੋ ਵਸਨਟ੍ਠਾਨਤੋ ਅਲਜ੍ਜਿਸ੍ਸ, ਉਮ੍ਮਤ੍ਤਕਸ੍ਸ, ਨ ਸਮ੍ਮਾਵਤ੍ਤਨ੍ਤਾਨਂ ਅਨ੍ਤੇਵਾਸਿਕਸਅਵਿਹਾਰਿਕਾਨਂ, ਤੇਸਂ ਪਰਿਕ੍ਖਾਰਸ੍ਸ ਵਾ ਨਿਕ੍ਕਡ੍ਢਨੇ ਚ, ਸਯਂ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘਿਕਵਿਹਾਰੋ, ਉਪਸਮ੍ਪਨ੍ਨਸ੍ਸ ਭਣ੍ਡਨਕਾਰਕਭਾਵਾਦਿਵਿਨਿਮੁਤ੍ਤਤਾ, ਕੋਪੇਨ ਨਿਕ੍ਕਡ੍ਢਨਂ ਵਾ ਨਿਕ੍ਕਡ੍ਢਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਵੇਹਾਸਕੁਟਿਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਉਪਰਿਵੇਹਾਸਕੁਟਿਯਾਤਿ ਉਪਰਿ ਅਚ੍ਛਨ੍ਨਤਲਾਯ ਦ੍ਵਿਭੂਮਿਕਕੁਟਿਯਾ ਵਾ ਤਿਭੂਮਿਕਕੁਟਿਯਾ ਵਾ, ਪਦਭਾਜਨੇ ਪਨ ਇਧ ਅਧਿਪ੍ਪੇਤਂ ਕੁਟਿਂ ਦਸ੍ਸੇਤੁਂ ‘‘ਮਜ੍ਝਿਮਸ੍ਸ ਪੁਰਿਸਸ੍ਸ ਅਸੀਸਘਟ੍ਟਾ’’ਤਿ (ਪਾਚਿ. ੧੩੧) ਵੁਤ੍ਤਂ. ਆਹਚ੍ਚਪਾਦਕਨ੍ਤਿ ਅਙ੍ਗੇ ਵਿਜ੍ਝਿਤ੍ਵਾ ਪਵੇਸਿਤਪਾਦਕਂ. ਅਭਿਨਿਸੀਦੇਯ੍ਯਾਤਿ ਅਭਿਭਵਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਨਿਸੀਦੇਯ੍ਯ, ਭੁਮ੍ਮਤ੍ਥੇ ਵਾ ਏਤਂ ਉਪਯੋਗਵਚਨਂ, ਮਞ੍ਚੇ ਵਾ ਪੀਠੇ ਵਾ ਨਿਸੀਦੇਯ੍ਯ ਵਾ ਨਿਪਜ੍ਜੇਯ੍ਯ ਵਾਤਿ ਅਤ੍ਥੋ. ਅਭੀਤਿ ਇਦਂ ਪਨ ਪਦਸੋਭਣਤ੍ਥੇ ਉਪਸਗ੍ਗਮਤ੍ਤਮੇਵ, ਤਸ੍ਮਾ ਯੋ ਭਿਕ੍ਖੁ ਵੁਤ੍ਤਲਕ੍ਖਣਾਯ ਵੇਹਾਸਕੁਟਿਯਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯਾਵ ਪਮਾਣਮਜ੍ਝਿਮਸ੍ਸ ਪੁਰਿਸਸ੍ਸ ਸਬ੍ਬਸੋ ਹੇਟ੍ਠਿਮਾਹਿ ਤੁਲਾਹਿ ਸੀਸਂ ਨ ਘਟ੍ਟੇਤਿ, ਏਤ੍ਤਕਂ ਉਚ੍ਚਾਯ ਤੁਲਾਨਂ ਉਪਰਿ ਠਪਿਤੇ ਆਹਚ੍ਚਪਾਦਕੇ ਮਞ੍ਚੇ ਵਾ ਪੀਠੇ ਵਾ ਨਿਸੀਦਤਿ ਵਾ ਨਿਪਜ੍ਜਤਿ ਵਾ, ਤਸ੍ਸ ਅਨੁਪਖਜ੍ਜਸਿਕ੍ਖਾਪਦੇ ਵੁਤ੍ਤਨਯੇਨ ਪਯੋਗਗਣਨਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਉਪਰਿਵੇਹਾਸਕੁਟਿਯਾ ਆਹਚ੍ਚਪਾਦਕਂ ਮਞ੍ਚਂ ਪੀਠਂ ਸਹਸਾ ਅਭਿਨਿਸੀਦਨਅਭਿਨਿਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪੁਗ੍ਗਲਿਕੇ ਤਿਕਦੁਕ੍ਕਟਂ, ਅਤ੍ਤਨੋ ਵਾ, ਵਿਸ੍ਸਾਸਿਕਸ੍ਸ ਵਾ ਸਨ੍ਤਕੇ ਵਿਹਾਰੇ, ਅਵੇਹਾਸਕੁਟਿਯਾ, ਸੀਸਘਟ੍ਟਾਯ, ਯਸ੍ਸ ਵਾ ਹੇਟ੍ਠਾ ਦਬ੍ਬਸਮ੍ਭਾਰਾਦੀਨਂ ਨਿਕ੍ਖਿਤ੍ਤਤ੍ਤਾ ਅਪਰਿਭੋਗਂ ਹੋਤਿ, ਉਪਰਿਤਲਂ ਵਾ ਪਦਰਸਞ੍ਚਿਤਂ ਸੁਧਾਦਿਪਰਿਕਮ੍ਮਕਤਂ ਵਾ, ਤਤ੍ਥ ਆਹਚ੍ਚਪਾਦਕੇ ਨਿਸੀਦਨ੍ਤਸ੍ਸ, ਯੋ ਚੇ ਤਸ੍ਮਿਂ ਵੇਹਾਸਟ੍ਠੇਪਿ ਆਹਚ੍ਚਪਾਦਕੇ ਠਿਤੋ ਕਿਞ੍ਚਿ ਗਣ੍ਹਾਤਿ ਵਾ ਲਗ੍ਗਤਿ ਵਾ, ਯਸ੍ਸ ਚ ਪਟਾਣੀ ਦਿਨ੍ਨਾ ਹੋਤਿ, ਪਾਦਸੀਸਾਨਂ ਉਪਰਿ ਆਣੀ ਪਵੇਸਿਤਾ, ਤਤ੍ਥ ਨਿਸੀਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘਿਕੋ ਵਿਹਾਰੋ, ਅਸੀਸਘਟ੍ਟਾ ਵੇਹਾਸਕੁਟਿ, ਹੇਟ੍ਠਾ ਸਪਰਿਭੋਗਂ, ਅਪਟਾਣਿਦਿਨ੍ਨੇ ਆਹਚ੍ਚਪਾਦਕੇ ਨਿਸੀਦਨਂ ਵਾ ਨਿਪਜ੍ਜਨਂ ਵਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.

ਵੇਹਾਸਕੁਟਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ

ਨਵਮੇ ਮਹਲ੍ਲਕਨ੍ਤਿ ਸਸ੍ਸਾਮਿਕਂ. ਵਿਹਾਰਨ੍ਤਿ ਉਲ੍ਲਿਤ੍ਤਾਵਲ੍ਲਿਤ੍ਤਂ. ਯਾਵ ਦ੍ਵਾਰਕੋਸਾਤਿਏਤ੍ਥ ਦ੍ਵਾਰਕੋਸੋ ਨਾਮ ਉਕ੍ਕਟ੍ਠਪਰਿਚ੍ਛੇਦੇਨ ਪਿਟ੍ਠਸਙ੍ਘਾਟਸ੍ਸ ਸਾਮਨ੍ਤਾ ਅਡ੍ਢਤੇਯ੍ਯਹਤ੍ਥੋ ਪਦੇਸੋ. ਅਗ੍ਗਲ਼ਟ੍ਠਪਨਾਯਾਤਿ ਸਕਵਾਟਕਸ੍ਸ ਦ੍ਵਾਰਬਨ੍ਧਸ੍ਸ ਨਿਚ੍ਚਲਭਾਵਤ੍ਥਾਯ. ਕਵਾਟਞ੍ਹਿ ਲਹੁਪਰਿਵਤ੍ਤਕਂ ਵਿਵਰਣਕਾਲੇ ਭਿਤ੍ਤਿਂ ਆਹਨਤਿ, ਪਿਦਹਨਕਾਲੇ ਦ੍ਵਾਰਬਨ੍ਧਂ. ਤੇਨ ਆਹਨੇਨ ਭਿਤ੍ਤਿ ਕਮ੍ਪਤਿ, ਤਤੋ ਮਤ੍ਤਿਕਾ ਚਲਤਿ, ਚਲਿਤ੍ਵਾ ਸਿਥਿਲਾ ਵਾ ਹੋਤਿ ਪਤਤਿ ਵਾ, ਤੇਨਾਹ ਭਗਵਾ ‘‘ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯਾ’’ਤਿ. ਤਤ੍ਥ ਕਿਞ੍ਚਾਪਿ ‘‘ਇਦਂ ਨਾਮ ਕਤ੍ਤਬ੍ਬ’’ਨ੍ਤਿ ਨੇਵ ਮਾਤਿਕਾਯਂ, ਨ ਪਦਭਾਜਨੇ ਵੁਤ੍ਤਂ, ਅਟ੍ਠੁਪ੍ਪਤ੍ਤਿਯਂ ਪਨ ‘‘ਪੁਨਪ੍ਪੁਨਂ ਛਾਦਾਪੇਸਿ, ਪੁਨਪ੍ਪੁਨਂ ਲੇਪਾਪੇਸੀ’’ਤਿ (ਪਾਚਿ. ੧੩੪) ਅਧਿਕਾਰਤੋ ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯ ਪੁਨਪ੍ਪੁਨਂ ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾਤਿ ਏਵਮਤ੍ਥੋ ਦਟ੍ਠਬ੍ਬੋ. ਆਲੋਕਸਨ੍ਧਿਪਰਿਕਮ੍ਮਾਯਾਤਿਏਤ੍ਥ ਆਲੋਕਸਨ੍ਧੀਤਿ ਵਾਤਪਾਨਕਵਾਟਕਾ ਵੁਚ੍ਚਨ੍ਤਿ. ਤੇ ਵਿਵਰਣਕਾਲੇ ਵਿਦਤ੍ਥਿਮਤ੍ਤਮ੍ਪਿ ਅਤਿਰੇਕਮ੍ਪਿ ਭਿਤ੍ਤਿਪ੍ਪਦੇਸਂ ਪਹਰਨ੍ਤਿ, ਉਪਚਾਰੋ ਪਨੇਤ੍ਥ ਸਬ੍ਬਦਿਸਾਸੁ ਲਬ੍ਭਤਿ, ਤਸ੍ਮਾ ਸਬ੍ਬਦਿਸਾਸੁ ਕਵਾਟਵਿਤ੍ਥਾਰਪ੍ਪਮਾਣੋ ਓਕਾਸੋ ਆਲੋਕਸਨ੍ਧਿਪਰਿਕਮ੍ਮਤ੍ਥਾਯ ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾਤਿ ਅਯਮੇਤ੍ਥ ਅਧਿਪ੍ਪਾਯੋ.

ਏਵਂ ਲੇਪਕਮ੍ਮੇ ਯਂ ਕਤ੍ਤਬ੍ਬਂ, ਤਂ ਦਸ੍ਸੇਤ੍ਵਾ ਇਦਾਨਿ ਛਦਨੇ ਕਤ੍ਤਬ੍ਬਂ ਦਸ੍ਸੇਤੁਂ ਦ੍ਵਤ੍ਤਿਚ੍ਛਦਨਸ੍ਸਾਤਿਆਦਿਮਾਹ. ਤਤ੍ਥ ਦ੍ਵਤ੍ਤਿਚ੍ਛਦਨਸ੍ਸ ਪਰਿਯਾਯਨ੍ਤਿ ਛਦਨਸ੍ਸ ਦ੍ਵਤ੍ਤਿਪਰਿਯਾਯਂ, ਪਰਿਯਾਯਂ ਵੁਚ੍ਚਤਿ ਪਰਿਕ੍ਖੇਪੋ, ਪਰਿਕ੍ਖੇਪਦ੍ਵਯਂ ਵਾ ਪਰਿਕ੍ਖੇਪਤ੍ਤਯਂ ਵਾ ਅਧਿਟ੍ਠਾਤਬ੍ਬਨ੍ਤਿ ਅਤ੍ਥੋ. ਅਪ੍ਪਹਰਿਤੇ ਠਿਤੇਨਾਤਿ ਅਹਰਿਤੇ ਠਿਤੇਨ. ਹਰਿਤਨ੍ਤਿ ਚੇਤ੍ਥ ਸਤ੍ਤਧਞ੍ਞਾਦਿਭੇਦਂ ਪੁਬ੍ਬਣ੍ਣਂ, ਮੁਗ੍ਗਮਾਸਤਿਲਕੁਲਤ੍ਥਅਲਾਬੁਕੁਮ੍ਭਣ੍ਡਾਦਿਭੇਦਞ੍ਚ ਅਪਰਣ੍ਣਂ ਅਧਿਪ੍ਪੇਤਂ. ਯਂ ਤਸ੍ਮਿਂ ਖੇਤ੍ਤੇ ਵੁਤ੍ਤਂ ਨ ਤਾਵ ਸਮ੍ਪਜ੍ਜਤਿ, ਵਸ੍ਸੇ ਪਨ ਪਤਿਤੇ ਸਮ੍ਪਜ੍ਜਿਸ੍ਸਤਿ, ਤਮ੍ਪਿ ਹਰਿਤਸਙ੍ਖਮੇਵ ਗਚ੍ਛਤਿ. ਤਸ੍ਮਾ ਤਸ੍ਮਿਂ ਠਤ੍ਵਾ ਅਧਿਟ੍ਠਹਨ੍ਤੋ ਦੁਕ੍ਕਟਂ ਆਪਜ੍ਜਤਿ. ਅਪ੍ਪਹਰਿਤੇ ਠਤ੍ਵਾ ਅਧਿਟ੍ਠਹਨ੍ਤਸ੍ਸਾਪਿ ਅਯਂ ਪਰਿਚ੍ਛੇਦੋ, ਪਿਟ੍ਠਿਵਂਸਸ੍ਸ ਵਾ ਕੂਟਾਗਾਰਥੂਪਿਕਾਯ ਵਾ ਪਸ੍ਸੇ ਨਿਸਿਨ੍ਨੋ ਪੁਰਿਸੋ ਛਦਨਮੁਖਵਟ੍ਟਿਅਨ੍ਤੇਨ ਓਲੋਕੇਨ੍ਤੋ ਯਸ੍ਮਿਂ ਭੂਮਿਭਾਗੇ ਠਿਤਂ ਭਿਕ੍ਖੁਂ ਪਸ੍ਸਤਿ, ਯਸ੍ਮਿਞ੍ਚ ਠਿਤੋ ਤਂ ਉਪਰਿ ਨਿਸਿਨ੍ਨਕਂ ਤਥੇਵ ਉਲ੍ਲੋਕੇਨ੍ਤੋ ਪਸ੍ਸਤਿ, ਤਸ੍ਮਿਂ ਠਾਤਬ੍ਬਂ, ਤਸ੍ਸ ਅਨ੍ਤੋ ਅਹਰਿਤੇਪਿ ਠਾਤੁਂ ਨ ਲਭਤਿ. ਤਤੋ ਚੇ ਉਤ੍ਤਰੀਤਿ ਮਗ੍ਗੇਨ ਛਾਦਿਯਮਾਨੇ ਤਿਣ੍ਣਂ ਮਗ੍ਗਾਨਂ, ਪਰਿਯਾਯੇਨ ਛਾਦਿਯਮਾਨੇ ਤਿਣ੍ਣਂ ਪਰਿਯਾਯਾਨਂ ਉਪਰਿ ਇਟ੍ਠਕਸਿਲਾਸੁਧਾਹਿ ਛਾਦਿਯਮਾਨੇ ਇਟ੍ਠਕਸਿਲਾਸੁਧਾਪਿਣ੍ਡਗਣਨਾਯ, ਤਿਣਪਣ੍ਣੇਹਿ ਛਾਦਿਯਮਾਨੇ ਪਣ੍ਣਗਣਨਾਯ ਚੇਵ ਤਿਣਮੁਟ੍ਠਿਗਣਨਾਯ ਚ ਪਾਚਿਤ੍ਤਿਯਂ.

ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਪੁਨਪ੍ਪੁਨਂ ਛਾਦਾਪਨਲੇਪਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਦ੍ਵਤ੍ਤਿਪਰਿਯਾਯੇ ਅਤਿਰੇਕਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਸੇਤਵਣ੍ਣਾਦਿਕਰਣੇ, ਦ੍ਵਤ੍ਤਿਪਰਿਯਾਯੇ ਵਾ ਊਨਕਦ੍ਵਤ੍ਤਿਪਰਿਯਾਯੇ ਵਾ, ਲੇਣਗੁਹਾਤਿਣਕੁਟਿਕਾਦੀਸੁ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ ਕਾਰੇਨ੍ਤਸ੍ਸ, ਵਾਸਾਗਾਰਂ ਠਪੇਤ੍ਵਾ ਸੇਸਾਨਿ ਅਧਿਟ੍ਠਹਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਮਹਲ੍ਲਕਵਿਹਾਰਤਾ, ਅਤ੍ਤਨੋ ਵਾਸਾਗਾਰਤਾ, ਉਤ੍ਤਰਿ ਅਧਿਟ੍ਠਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤੇ ਵੁਤ੍ਤਨਯਾਨੇਵਾਤਿ.

ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ

ਦਸਮੇ ਜਾਨਂ ਸਪ੍ਪਾਣਕਨ੍ਤਿ ‘‘ਸਪ੍ਪਾਣਕਂ ਏਤ’’ਨ੍ਤਿ ਦਿਸ੍ਵਾ ਵਾ ਸੁਤ੍ਵਾ ਵਾ ਯੇਨ ਕੇਨਚਿ ਆਕਾਰੇਨ ਜਾਨਨ੍ਤੋ. ਸਿਞ੍ਚੇਯ੍ਯ ਵਾ ਸਿਞ੍ਚਾਪੇਯ੍ਯ ਵਾਤਿ ਤੇਨ ਉਦਕੇਨ ਸਯਂ ਵਾ ਸਿਞ੍ਚੇਯ੍ਯ, ਅਞ੍ਞਂ ਵਾ ਆਣਾਪੇਤ੍ਵਾ ਸਿਞ੍ਚਾਪੇਯ੍ਯ. ਤਤ੍ਥ ਧਾਰਂ ਅਵਿਚ੍ਛਿਨ੍ਦਿਤ੍ਵਾ ਸਿਞ੍ਚਨ੍ਤਸ੍ਸ ਏਕਸ੍ਮਿਂ ਘਟੇ ਏਕਾਵ ਆਪਤ੍ਤਿ, ਵਿਚ੍ਛਿਨ੍ਦਨ੍ਤਸ੍ਸ ਪਯੋਗਗਣਨਾਯ ਆਪਤ੍ਤਿਯੋ. ਮਾਤਿਕਂ ਪਮੁਖਂ ਕਰੋਤਿ, ਦਿਵਸਮ੍ਪਿ ਸਨ੍ਦਤੁ, ਏਕਾਵ ਆਪਤ੍ਤਿ. ਤਤ੍ਥ ਤਤ੍ਥ ਬਨ੍ਧਿਤ੍ਵਾ ਅਞ੍ਞਤੋ ਨੇਨ੍ਤਸ੍ਸ ਪਯੋਗਗਣਨਾਯ ਆਪਤ੍ਤਿਯੋ. ਬਹੁਕਮ੍ਪਿ ਤਿਣਪਣ੍ਣਸਾਖਾਦਿਂ ਏਕਪ੍ਪਯੋਗੇਨ ਉਦਕੇ ਪਕ੍ਖਿਪਨ੍ਤਸ੍ਸ ਏਕਾਵ ਆਪਤ੍ਤਿ, ਏਕੇਕਂ ਪਕ੍ਖਿਪਨ੍ਤਸ੍ਸ ਪਯੋਗਗਣਨਾਯ ਆਪਤ੍ਤਿਯੋ. ਇਦਞ੍ਚ ਯਂ ਏਵਂ ਪਕ੍ਖਿਪਿਯਮਾਨੇ ਪਰਿਯਾਦਾਨਂ ਗਚ੍ਛਤਿ, ਆਵਿਲਂ ਵਾ ਹੋਤਿ, ਯਥਾ ਪਾਣਕਾ ਮਰਨ੍ਤਿ, ਤਾਦਿਸਂ ਸਨ੍ਧਾਯ ਵੁਤ੍ਤਂ, ਨ ਮਹਾਉਦਕਂ. ਸਿਞ੍ਚਾਪਨੇ ਆਣਤ੍ਤਿਯਾ ਦੁਕ੍ਕਟਂ, ਏਕਾਣਤ੍ਤਿਯਾ ਬਹੁਕਮ੍ਪਿ ਸਿਞ੍ਚਤੁ, ਆਣਾਪਕਸ੍ਸ ਏਕਮੇਵ ਪਾਚਿਤ੍ਤਿਯਂ.

ਆਲ਼ਵਿਯਂ ਆਲ਼ਵਕੇ ਭਿਕ੍ਖੂ ਆਰਬ੍ਭ ਸਿਞ੍ਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਅਪ੍ਪਾਣਕੇ ਸਪ੍ਪਾਣਕਸਞ੍ਞਿਨੋ, ਉਭੋਸੁ ਵੇਮਤਿਕਸ੍ਸ ਦੁਕ੍ਕਟਂ. ਅਪ੍ਪਾਣਕਸਞ੍ਞਿਨੋ, ਅਸਞ੍ਚਿਚ੍ਚ ਅਸ੍ਸਤਿਯਾ ਵਾ ਸਿਞ੍ਚਨ੍ਤਸ੍ਸ, ਅਜਾਨਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਦਕਸ੍ਸ ਸਪ੍ਪਾਣਕਤਾ, ‘‘ਸਿਞ੍ਚਨੇਨ ਪਾਣਕਾ ਮਰਿਸ੍ਸਨ੍ਤੀ’’ਤਿ ਜਾਨਨਂ, ਤਞ੍ਚ ਉਦਕਂ ਤਾਦਿਸਮੇਵ, ਵਿਨਾ ਵਧਕਚੇਤਨਾਯ ਯੇਨ ਕੇਨਚਿ ਕਰਣੀਯੇਨ ਤਿਣਾਦੀਨਂ ਸਿਞ੍ਚਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਪਣ੍ਣਤ੍ਤਿਵਜ੍ਜਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਭੂਤਗਾਮਵਗ੍ਗੋ ਦੁਤਿਯੋ.

੩. ਓਵਾਦਵਗ੍ਗੋ

੧. ਓਵਾਦਸਿਕ੍ਖਾਪਦਵਣ੍ਣਨਾ

ਓਵਾਦਵਗ੍ਗਸ੍ਸ ਪਠਮੇ ਅਸਮ੍ਮਤੋਤਿ ਯਾ ਅਟ੍ਠਙ੍ਗਸਮਨ੍ਨਾਗਤਸ੍ਸ ਭਿਕ੍ਖੁਨੋ ਭਗਵਤਾ ਞਤ੍ਤਿਚਤੁਤ੍ਥੇਨ ਕਮ੍ਮੇਨ (ਪਾਚਿ. ੧੪੬) ਭਿਕ੍ਖੁਨੋਵਾਦਕਸਮ੍ਮੁਤਿ ਅਨੁਞ੍ਞਾਤਾ, ਤਾਯ ਅਸਮ੍ਮਤੋ. ਓਵਦੇਯ੍ਯਾਤਿ ਭਿਕ੍ਖੁਨਿਸਙ੍ਘਂ ਵਾ ਸਮ੍ਬਹੁਲਾ ਵਾ ਏਕਂ ਭਿਕ੍ਖੁਨਿਂ ਵਾ ‘‘ਵਸ੍ਸਸਤੂਪਸਮ੍ਪਨ੍ਨਾਯ ਭਿਕ੍ਖੁਨਿਯਾ ਤਦਹੁਪਸਮ੍ਪਨ੍ਨਸ੍ਸ ਭਿਕ੍ਖੁਨੋ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬ’’ਨ੍ਤਿ ਆਦਿਕੇ (ਚੂਲ਼ਵ. ੪੦੩) ਅਟ੍ਠ ਗਰੁਧਮ੍ਮੇ ਓਵਾਦਵਸੇਨ ਓਸਾਰੇਨ੍ਤੋ ਓਵਦੇਯ੍ਯ. ਪਾਚਿਤ੍ਤਿਯਨ੍ਤਿ ਓਵਾਦਪਰਿਯੋਸਾਨੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਓਵਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਅਞ੍ਞੇਨ ਵਾ ਧਮ੍ਮੇਨ ਭਿਕ੍ਖੁਨੀਸੁ ਉਪਸਮ੍ਪਨ੍ਨਮਤ੍ਤਂ ਵਾ ਓਵਦਤੋ ਦੁਕ੍ਕਟਂ. ਸਮ੍ਮਤਸ੍ਸਾਪਿ ਤਞ੍ਚੇ ਸਮ੍ਮੁਤਿਕਮ੍ਮਂ ਅਧਮ੍ਮਕਮ੍ਮਂ ਹੋਤਿ, ਤਸ੍ਮਿਂ ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਿਨੋ ਵਗ੍ਗੇ ਭਿਕ੍ਖੁਨਿਸਙ੍ਘੇ ਓਵਦਤੋ ਤਿਕਪਾਚਿਤ੍ਤਿਯਂ, ਤਥਾ ਵੇਮਤਿਕਸ੍ਸ ਧਮ੍ਮਕਮ੍ਮਸਞ੍ਞਿਨੋ ਚਾਤਿ ਨਵ ਪਾਚਿਤ੍ਤਿਯਾਨਿ, ਸਮਗ੍ਗੇਪਿ ਭਿਕ੍ਖੁਨਿਸਙ੍ਘੇਨ ਵਾਤਿ ਅਧਮ੍ਮਕਮ੍ਮਵਸੇਨ ਅਟ੍ਠਾਰਸ. ਸਚੇ ਪਨ ਤਂ ਧਮ੍ਮਕਮ੍ਮਂ ਹੋਤਿ, ‘‘ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਸਮਗ੍ਗਂ ਭਿਕ੍ਖੁਨਿਸਙ੍ਘਂ ਸਮਗ੍ਗਸਞ੍ਞੀ ਓਵਦਤੀ’’ਤਿ (ਪਾਚਿ. ੧੫੧) ਇਦਂ ਅਵਸਾਨਪਦਂ ਠਪੇਤ੍ਵਾ ਤੇਨੇਵ ਨਯੇਨ ਸਤ੍ਤਰਸ ਦੁਕ੍ਕਟਾਨਿ, ‘‘ਸਮਗ੍ਗਮ੍ਹਾਯ੍ਯਾ’’ਤਿ ਚ ਵੁਤ੍ਤੇ ਅਞ੍ਞਂ ਧਮ੍ਮਂ, ‘‘ਵਗ੍ਗਮ੍ਹਾਯ੍ਯਾ’’ਤਿ ਚ ਵੁਤ੍ਤੇ ਅਟ੍ਠ ਗਰੁਧਮ੍ਮੇ ਭਣਨ੍ਤਸ੍ਸ, ਓਵਾਦਞ੍ਚ ਅਨਿਯ੍ਯਾਤੇਤ੍ਵਾ ਅਞ੍ਞਂ ਧਮ੍ਮਂ ਭਣਨ੍ਤਸ੍ਸ ਦੁਕ੍ਕਟਮੇਵ. ਯੋ ਪਨ ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਸਮਗ੍ਗਂ ਭਿਕ੍ਖੁਨਿਸਙ੍ਘਂ ਸਮਗ੍ਗਸਞ੍ਞੀ ਓਵਦਤਿ, ਗਰੁਧਮ੍ਮਪਾਲ਼ਿਂ ਉਦ੍ਦੇਸਂ ਦੇਤਿ, ਪਰਿਪੁਚ੍ਛਂ ਦੇਤਿ, ‘‘ਓਸਾਰੇਹਿ ਅਯ੍ਯਾ’’ਤਿ ਵੁਚ੍ਚਮਾਨੋ ਓਸਾਰੇਤਿ, ਪਞ੍ਹਂ ਪੁਟ੍ਠੋ ਕਥੇਤਿ, ਭਿਕ੍ਖੁਨੀਨਂ ਸੁਣਮਾਨਾਨਂ ਅਞ੍ਞਸ੍ਸਤ੍ਥਾਯ ਭਣਤਿ, ਸਿਕ੍ਖਮਾਨਾਯ ਵਾ ਸਾਮਣੇਰਿਯਾ ਵਾ ਭਣਤਿ, ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਸਮ੍ਮਤਤਾ, ਭਿਕ੍ਖੁਨਿਯਾ ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓਵਾਦਵਸੇਨ ਅਟ੍ਠਗਰੁਧਮ੍ਮਭਣਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨੇਵਾਤਿ.

ਓਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਤ੍ਥਙ੍ਗਤਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਓਵਦੇਯ੍ਯਾਤਿ ਅਟ੍ਠਗਰੁਧਮ੍ਮੇਹਿ ਵਾ ਅਞ੍ਞੇਨ ਵਾ ਧਮ੍ਮੇਨ ਓਵਦਨ੍ਤਸ੍ਸ ਸਮ੍ਮਤਸ੍ਸਾਪਿ ਪਾਚਿਤ੍ਤਿਯਮੇਵ.

ਸਾਵਤ੍ਥਿਯਂ ਆਯਸ੍ਮਨ੍ਤਂ ਚੂਲ਼ਪਨ੍ਥਕਂ ਆਰਬ੍ਭ ਅਤ੍ਥਙ੍ਗਤੇ ਸੂਰਿਯੇ ਓਵਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਸੂਰਿਯੇ ਅਤ੍ਥਙ੍ਗਤੇ ਅਤ੍ਥਙ੍ਗਤਸਞ੍ਞਿਨੋ ਵੇਮਤਿਕਸ੍ਸ ਵਾ, ਏਕਤੋਉਪਸਮ੍ਪਨ੍ਨਂ ਓਵਦਨ੍ਤਸ੍ਸ ਚ ਦੁਕ੍ਕਟਂ. ਪੁਰਿਮਸਿਕ੍ਖਾਪਦੇ ਵਿਯ ਉਦ੍ਦੇਸਾਦਿਨਯੇਨ ਅਨਾਪਤ੍ਤਿ. ਅਤ੍ਥਙ੍ਗਤਸੂਰਿਯਤਾ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓਵਦਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨੇਵਾਤਿ.

ਅਤ੍ਥਙ੍ਗਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ

ਤਤਿਯੇ ਭਿਕ੍ਖੁਨੁਪਸ੍ਸਯਨ੍ਤਿ ਭਿਕ੍ਖੁਨਿਯਾ ਏਕਰਤ੍ਤਂ ਵਸਨਟ੍ਠਾਨਮ੍ਪਿ. ਓਵਦੇਯ੍ਯਾਤਿ ਇਧ ਗਰੁਧਮ੍ਮੇਹਿ ਓਵਦਨ੍ਤਸ੍ਸੇਵ ਪਾਚਿਤ੍ਤਿਯਂ. ਸਚੇ ਪਨ ਅਸਮ੍ਮਤੋ ਹੋਤਿ, ਦ੍ਵੇ ਪਾਚਿਤ੍ਤਿਯਾਨਿ. ਸਚੇ ਪਨ ਸੂਰਿਯੇਪਿ ਅਤ੍ਥਙ੍ਗਤੇ ਓਵਦਤਿ, ਤੀਣਿ ਹੋਨ੍ਤਿ. ਸਮ੍ਮਤਸ੍ਸ ਪਨ ਰਤ੍ਤਿਂ ਓਵਦਨ੍ਤਸ੍ਸਪਿ ਦ੍ਵੇ ਏਵ ਹੋਨ੍ਤਿ. ਸਮ੍ਮਤਤ੍ਤਾ ਹਿ ਭਿਕ੍ਖੁਸ੍ਸ ਗਰੁਧਮ੍ਮੋਵਾਦਮੂਲਕਂ ਪਾਚਿਤ੍ਤਿਯਂ ਨਤ੍ਥਿ. ਗਿਲਾਨਾਤਿ ਨ ਸਕ੍ਕੋਤਿ ਓਵਾਦਾਯ ਵਾ ਸਂਵਾਸਾਯ ਵਾ ਗਨ੍ਤੁਂ.

ਸਕ੍ਕੇਸੁ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍ਵਾ ਓਵਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਿਨੋ ਵੇਮਤਿਕਸ੍ਸ ਵਾ, ਏਕਤੋਉਪਸਮ੍ਪਨ੍ਨਂ ਯੇਨ ਕੇਨਚਿ, ਇਤਰਂ ਅਞ੍ਞੇਨ ਧਮ੍ਮੇਨ ਓਵਦਨ੍ਤਸ੍ਸ ਚ ਦੁਕ੍ਕਟਂ. ਸਮਯੇ, ਅਨੁਪਸਮ੍ਪਨ੍ਨਾਯ, ਪੁਰਿਮਸਿਕ੍ਖਾਪਦੇ ਵਿਯ ਉਦ੍ਦੇਸਾਦਿਨਯੇਨ ਚ ਅਨਾਪਤ੍ਤਿ. ਉਪਸ੍ਸਯੂਪਗਮਨਂ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਸਮਯਾਭਾਵੋ, ਗਰੁਧਮ੍ਮੇਹਿ ਓਵਦਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਂ ਹੋਤੀਤਿ.

ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਆਮਿਸਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਆਮਿਸਹੇਤੂਤਿ ਚੀਵਰਾਦੀਨਂ ਅਞ੍ਞਤਰਹੇਤੁ. ਭਿਕ੍ਖੂਤਿ ਸਮ੍ਮਤਾ ਭਿਕ੍ਖੂ ਇਧਾਧਿਪ੍ਪੇਤਾ. ਪਾਚਿਤ੍ਤਿਯਨ੍ਤਿ ਏਵਰੂਪੇ ਭਿਕ੍ਖੂ ਅਵਣ੍ਣਕਾਮਤਾਯ ਏਵਂ ਭਣਨ੍ਤਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ‘‘ਆਮਿਸਹੇਤੁ ਓਵਦਨ੍ਤੀ’’ਤਿ ਭਣਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਅਸਮ੍ਮਤਂ ਉਪਸਮ੍ਪਨ੍ਨਞ੍ਚ, ਅਨੁਪਸਮ੍ਪਨ੍ਨਞ੍ਚ ਸਮ੍ਮਤਂ ਵਾ ਅਸਮ੍ਮਤਂ ਵਾ ਏਵਂ ਭਣਨ੍ਤਸ੍ਸ ਦੁਕ੍ਕਟਮੇਵ. ਤਤ੍ਥ ਯੋ ਭਿਕ੍ਖੁ ਕਾਲੇ ਸਮ੍ਮੁਤਿਂ ਲਭਿਤ੍ਵਾ ਸਾਮਣੇਰਭੂਮਿਯਂ ਸਣ੍ਠਿਤੋ, ਅਯਂ ਸਮ੍ਮਤੋ ਨਾਮ ਅਨੁਪਸਮ੍ਪਨ੍ਨੋ. ਪਕਤਿਯਾ ਚੀਵਰਾਦਿਹੇਤੁ ਓਵਦਨ੍ਤਂ ਪਨ ਏਵਂ ਭਣਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਧਮ੍ਮੇਨ ਲਦ੍ਧਸਮ੍ਮੁਤਿਤਾ, ਅਨਾਮਿਸਨ੍ਤਰਤਾ, ਅਵਣ੍ਣਕਾਮਤਾਯ ਏਵਂ ਭਣਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਮੇਵਾਤਿ.

ਆਮਿਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਦਾਨਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਚੀਵਰਦਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਕਥਾਮਗ੍ਗੋ ਪਨੇਤ੍ਥ ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਤਤ੍ਰ ਹਿ ਭਿਕ੍ਖੁ ਪਟਿਗ੍ਗਾਹਕੋ, ਇਧ ਭਿਕ੍ਖੁਨੀ, ਅਯਂ ਵਿਸੇਸੋ, ਸੇਸਂ ਤਾਦਿਸਮੇਵਾਤਿ.

ਚੀਵਰਦਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਚੀਵਰਨ੍ਤਿ ਨਿਵਾਸਨਪਾਰੁਪਨੁਪਗਂ. ਸਿਬ੍ਬੇਯ੍ਯ ਵਾ ਸਿਬ੍ਬਾਪੇਯ੍ਯਾ ਵਾਤਿ ਏਤ੍ਥ ਸਯਂ ਸਿਬ੍ਬਨ੍ਤਸ੍ਸ ਸੂਚਿਂ ਪਵੇਸੇਤ੍ਵਾ ਪਵੇਸੇਤ੍ਵਾ ਨੀਹਰਣੇ ਪਾਚਿਤ੍ਤਿਯਂ, ਸਤਕ੍ਖਤ੍ਤੁਮ੍ਪਿ ਵਿਜ੍ਝਿਤ੍ਵਾ ਸਕਿਂ ਨੀਹਰਨ੍ਤਸ੍ਸ ਏਕਮੇਵ ਪਾਚਿਤ੍ਤਿਯਂ. ‘ਸਿਬ੍ਬਾ’ਤਿ ਵੁਤ੍ਤੋ ਪਨ ਸਚੇਪਿ ਸਬ੍ਬਂ ਸੂਚਿਕਮ੍ਮਂ ਨਿਟ੍ਠਾਪੇਤਿ, ਆਣਾਪਕਸ੍ਸ ਏਕਮੇਵ ਪਾਚਿਤ੍ਤਿਯਂ. ਅਥ ‘‘ਯਂ ਏਤ੍ਥ ਚੀਵਰੇ ਕਤ੍ਤਬ੍ਬਂ, ਸਬ੍ਬਂ ਤਂ ਤਵ ਭਾਰੋ’’ਤਿ ਵੁਤ੍ਤੋ ਨਿਟ੍ਠਾਪੇਤਿ, ਤਸ੍ਸ ਆਰਾਪਥੇ ਆਰਾਪਥੇ ਪਾਚਿਤ੍ਤਿਯਂ. ਆਣਾਪਕਸ੍ਸ ਏਕਵਾਚਾਯ ਸਮ੍ਬਹੁਲਾਨਿਪਿ, ਪੁਨਪ੍ਪੁਨਂ ਆਣਤ੍ਤਿਯਂ ਪਨ ਵਤ੍ਤਬ੍ਬਮੇਵ ਨਤ੍ਥਿ.

ਸਾਵਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਚੀਵਰਸਿਬ੍ਬਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਿਕਾਯ ਅਞ੍ਞਾਤਿਕਸਞ੍ਞਿਨੋ ਵਾ ਵੇਮਤਿਕਸ੍ਸ ਵਾ, ਏਕਤੋਉਪਸਮ੍ਪਨ੍ਨਾਯ ਸਿਬ੍ਬਨ੍ਤਸ੍ਸ ਚ ਦੁਕ੍ਕਟਂ. ਅਞ੍ਞਂ ਥਵਿਕਾਦਿਪਰਿਕ੍ਖਾਰਂ ਸਿਬ੍ਬਨ੍ਤਸ੍ਸ, ਞਾਤਿਕਾਯ, ਸਿਕ੍ਖਮਾਨਸਾਮਣੇਰੀਨਞ੍ਚ ਚੀਵਰਮ੍ਪਿ ਸਿਬ੍ਬਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਸਨ੍ਤਕਤਾ, ਨਿਵਾਸਨਪਾਰੁਪਨੁਪਗਤਾ, ਵੁਤ੍ਤਲਕ੍ਖਣਂ ਸਿਬ੍ਬਨਂ ਵਾ ਸਿਬ੍ਬਾਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੇਵਾਤਿ.

ਚੀਵਰਸਿਬ੍ਬਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਸਂਵਿਧਾਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਸਂਵਿਧਾਯਾਤਿ ਸਂਵਿਦਹਿਤ੍ਵਾ, ਗਮਨਕਾਲੇ ਸਙ੍ਕੇਤਂ ਕਤ੍ਵਾਤਿ ਅਤ੍ਥੋ. ਏਕਦ੍ਧਾਨਮਗ੍ਗਨ੍ਤਿ ਏਕਂ ਅਦ੍ਧਾਨਸਙ੍ਖਾਤਂ ਮਗ੍ਗਂ, ਏਕਤੋ ਵਾ ਅਦ੍ਧਾਨਮਗ੍ਗਂ. ਸਤ੍ਥਗਮਨੀਯੋਤਿ ਸਤ੍ਥੇਨ ਸਦ੍ਧਿਂ ਗਨ੍ਤਬ੍ਬੋ, ਸੇਸਂ ਉਤ੍ਤਾਨਪਦਤ੍ਥਮੇਵ. ਅਯਂ ਪਨੇਤ੍ਥ ਵਿਨਿਚ੍ਛਯੋ – ਅਕਪ੍ਪਿਯਭੂਮਿਯਂ ਸਂਵਿਦਹਨ੍ਤਸ੍ਸ ਸਂਵਿਦਹਨਪਚ੍ਚਯਾ ਤਾਵ ਦੁਕ੍ਕਟਂ. ਤਤ੍ਥ ਠਪੇਤ੍ਵਾ ਭਿਕ੍ਖੁਨੁਪਸ੍ਸਯਂ ਅਨ੍ਤਰਾਰਾਮਂ ਆਸਨਸਾਲਂ ਤਿਤ੍ਥਿਯਸੇਯ੍ਯਞ੍ਚ ਸੇਸਾ ਅਕਪ੍ਪਿਯਭੂਮਿ, ਤਤ੍ਥ ਠਤ੍ਵਾ ਸਂਵਿਦਹਨ੍ਤਸ੍ਸਾਤਿ ਅਤ੍ਥੋ. ਸਂਵਿਦਹਿਤ੍ਵਾ ਪਨ ‘‘ਅਜ੍ਜ ਵਾ ਸ੍ਵੇ ਵਾ’’ਤਿ ਨਿਯਮਿਤਂ ਕਾਲਂ ਵਿਸਙ੍ਕੇਤਂ ਅਕਤ੍ਵਾ, ਦ੍ਵਾਰਵਿਸਙ੍ਕੇਤਂ ਪਨ ਮਗ੍ਗਵਿਸਙ੍ਕੇਤਂ ਵਾ ਕਤ੍ਵਾਪਿ ਭਿਕ੍ਖੁਨਿਯਾ ਸਦ੍ਧਿਂ ਗਚ੍ਛਨ੍ਤਸ੍ਸ ਯਾਵ ਆਸਨ੍ਨਸ੍ਸਾਪਿ ਅਞ੍ਞਸ੍ਸ ਗਾਮਸ੍ਸ ‘‘ਅਯਂ ਇਮਸ੍ਸ ਉਪਚਾਰੋ’’ਤਿ ਮਨੁਸ੍ਸੇਹਿ ਠਪਿਤਂ ਉਪਚਾਰਂ ਨ ਓਕ੍ਕਮਤਿ, ਤਾਵ ਅਨਾਪਤ੍ਤਿ. ਤਂ ਓਕ੍ਕਮਨ੍ਤਸ੍ਸ ਪਨ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ, ਇਤਿ ਗਾਮੂਪਚਾਰੋਕ੍ਕਮਨਗਣਨਾਯ ਪਾਚਿਤ੍ਤਿਯਾਨਿ. ਅਦ੍ਧਯੋਜਨਾਤਿਕ੍ਕਮੇ ਪਨ ਗਾਮੇ ਅਸਤਿ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਏਕਦ੍ਧਾਨਮਗ੍ਗਪ੍ਪਟਿਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਸਂਵਿਦਹਿਤੇ ਸਂਵਿਦਹਿਤਸਞ੍ਞਿਨੋ ਵੇਮਤਿਕਸ੍ਸ ਵਾ, ਯੋ ਚ ਭਿਕ੍ਖੁਨਿਯਾ ਅਸਂਵਿਦਹਨ੍ਤਿਯਾ ਕੇਵਲਂ ਅਤ੍ਤਨਾਵ ਸਂਵਿਦਹਤਿ, ਤਸ੍ਸ ਦੁਕ੍ਕਟਂ. ਸਮਯੇ ਸਂਵਿਦਹਿਤ੍ਵਾਪਿ ਗਚ੍ਛਨ੍ਤਸ੍ਸ, ਅਤ੍ਤਨਾ ਅਸਂਵਿਦਹਨ੍ਤਸ੍ਸ, ਵਿਸਙ੍ਕੇਤੇਨ ਵਾ, ਆਪਦਾਸੁ ਗਚ੍ਛਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਦ੍ਵਿਨ੍ਨਮ੍ਪਿ ਸਂਵਿਦਹਿਤ੍ਵਾ ਮਗ੍ਗਪ੍ਪਟਿਪਤ੍ਤਿ, ਅਵਿਸਙ੍ਕੇਤਤਾ, ਸਮਯਾਭਾਵੋ, ਅਨਾਪਦਾ, ਗਾਮਨ੍ਤਰੋਕ੍ਕਮਨਂ ਵਾ ਅਦ੍ਧਯੋਜਨਾਤਿਕ੍ਕਮੋ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਏਕਤੋਉਪਸਮ੍ਪਨ੍ਨਾਦੀਹਿ ਪਨ ਸਦ੍ਧਿਂ ਮਾਤੁਗਾਮਸਿਕ੍ਖਾਪਦੇਨ ਆਪਤ੍ਤਿ, ਅਦ੍ਧਾਨਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਸਂਵਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਨਾਵਾਭਿਰੁਹਨਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਸਂਵਿਧਾਯਾਤਿ ਕੀਲ਼ਾਪੁਰੇਕ੍ਖਾਰੋ ਸਂਵਿਦਹਿਤ੍ਵਾ, ਅਭਿਰੁਹਨਕਾਲੇ ਸਙ੍ਕੇਤਂ ਕਤ੍ਵਾਤਿ ਅਤ੍ਥੋ. ਉਦ੍ਧਂਗਾਮਿਨਿਨ੍ਤਿ ਕੀਲ਼ਾਵਸੇਨ ਉਦ੍ਧਂ ਨਦਿਯਾ ਪਟਿਸੋਤਂ ਗਚ੍ਛਨ੍ਤਿਂ. ਅਧੋਗਾਮਿਨਿਨ੍ਤਿ ਤਥੇਵ ਅਧੋ ਅਨੁਸੋਤਂ ਗਚ੍ਛਨ੍ਤਿਂ. ਯਂ ਪਨ ਤਿਤ੍ਥਪ੍ਪਟਿਪਾਦਨਤ੍ਥਂ ਉਦ੍ਧਂ ਵਾ ਅਧੋ ਵਾ ਹਰਨ੍ਤਿ, ਏਤ੍ਥ ਅਨਾਪਤ੍ਤਿ. ਅਞ੍ਞਤ੍ਰ ਤਿਰਿਯਂ ਤਰਣਾਯਾਤਿ ਉਪਯੋਗਤ੍ਥੇ ਨਿਸ੍ਸਕ੍ਕਵਚਨਂ, ਯਾ ਤਿਰਿਯਂ ਤਰਣਾ, ਤਂ ਠਪੇਤ੍ਵਾਤਿ ਅਤ੍ਥੋ. ਪਾਚਿਤ੍ਤਿਯਨ੍ਤਿ ਸਗਾਮਕਤੀਰਪਸ੍ਸੇਨ ਗਮਨਕਾਲੇ ਗਾਮਨ੍ਤਰਗਣਨਾਯ, ਅਗਾਮਕਤੀਰਪਸ੍ਸੇਨ ਵਾ ਯੋਜਨਵਿਤ੍ਥਤਾਯ ਨਦਿਯਾ ਮਜ੍ਝੇਨ ਵਾ ਗਮਨਕਾਲੇ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ, ਸਮੁਦ੍ਦੇ ਪਨ ਯਥਾਸੁਖਂ ਗਨ੍ਤੁਂ ਵਟ੍ਟਤਿ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਨਾਵਾਭਿਰੁਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਤਿਰਿਯਂ ਤਰਣਾਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸੇਸਂ ਅਨਨ੍ਤਰਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਨਾਵਾਭਿਰੁਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਪਰਿਪਾਚਿਤਸਿਕ੍ਖਾਪਦਵਣ੍ਣਨਾ

ਨਵਮੇ ਭਿਕ੍ਖੁਨਿਪਰਿਪਾਚਿਤਨ੍ਤਿ ਭਿਕ੍ਖੁਨਿਯਾ ਪਰਿਪਾਚਿਤਂ, ਨੇਵ ਤਸ੍ਸ ਨਾਤ੍ਤਨੋ ਞਾਤਕਪ੍ਪਵਾਰਿਤਾਨਂ ਗਿਹੀਨਂ ਸਨ੍ਤਿਕੇ ਭਿਕ੍ਖੁਸ੍ਸ ਗੁਣਂ ਪਕਾਸੇਤ੍ਵਾ ‘‘ਦੇਥ ਅਯ੍ਯਸ੍ਸ, ਕਰੋਥ ਅਯ੍ਯਸ੍ਸਾ’’ਤਿ ਏਵਂ ਨਿਪ੍ਫਾਦਿਤਂ ਲਦ੍ਧਬ੍ਬਂ ਕਤਨ੍ਤਿ ਅਤ੍ਥੋ. ਪੁਬ੍ਬੇ ਗਿਹਿਸਮਾਰਮ੍ਭਾਤਿ ਏਤ੍ਥ ਸਮਾਰਮ੍ਭੋਤਿ ਸਮਾਰਦ੍ਧਂ, ਪਟਿਯਾਦਿਤਸ੍ਸੇਤਂ ਨਾਮਂ. ਗਿਹੀਨਂ ਸਮਾਰਮ੍ਭੋ ਗਿਹਿਸਮਾਰਮ੍ਭੋ, ਭਿਕ੍ਖੁਨਿਯਾ ਪਰਿਪਾਚਨਤੋ ਪੁਬ੍ਬੇ ਪਠਮਤਰਂਯੇਵ ਯਂ ਭਿਕ੍ਖੂਨਂ ਅਤ੍ਥਾਯ ਗਿਹੀਨਂ ਪਟਿਯਾਦਿਤਭਤ੍ਤਂ, ਞਾਤਕਪ੍ਪਵਾਰਿਤਾਨਂ ਵਾ ਸਨ੍ਤਕਂ, ਤਂ ਠਪੇਤ੍ਵਾ ਅਞ੍ਞਂ ਜਾਨਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਤਞ੍ਚ ਖੋ ਅਜ੍ਝੋਹਰਣਗਣਨਾਯ, ਪਟਿਗ੍ਗਹਣੇ ਪਨਸ੍ਸ ਦੁਕ੍ਕਟਂ.

ਰਾਜਗਹੇ ਦੇਵਦਤ੍ਤਂ ਆਰਬ੍ਭ ਭਿਕ੍ਖੁਨਿਪਰਿਪਾਚਿਤਪਿਣ੍ਡਪਾਤਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਏਕਤੋਉਪਸਮ੍ਪਨ੍ਨਾਯ ਪਰਿਪਾਚਿਤਂ ਭੁਞ੍ਜਨ੍ਤਸ੍ਸ, ਅਪਰਿਪਾਚਿਤੇ ਪਰਿਪਾਚਿਤਸਞ੍ਞਿਨੋ, ਉਭਯਤ੍ਥ ਵੇਮਤਿਕਸ੍ਸ ਚ ਦੁਕ੍ਕਟਂ. ਉਭਯਤ੍ਥ ਅਪਰਿਪਾਚਿਤਸਞ੍ਞਿਨੋ, ਗਿਹਿਸਮਾਰਮ੍ਭੇ, ਸਿਕ੍ਖਮਾਨਸਾਮਣੇਰਾਦੀਹਿ ਪਰਿਪਾਚਿਤੇ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਅਵਸੇਸੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਭਿਕ੍ਖੁਨਿਯਾ ਪਰਿਪਾਚਿਤਤਾ, ਪਰਿਪਾਚਿਤਭਾਵਜਾਨਨਂ, ਗਿਹਿਸਮਾਰਮ੍ਭਾਭਾਵੋ, ਓਦਨਾਦੀਨਂ ਅਞ੍ਞਤਰਤਾ, ਤਸ੍ਸ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਅਸਾਨਿ, ਇਦਂ ਪਨ ਪਣ੍ਣਤ੍ਤਿਵਜ੍ਜਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਰਿਪਾਚਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ

ਦਸਮੇ ਸਬ੍ਬੋਪਿ ਕਥਾਮਗ੍ਗੋ ਦੁਤਿਯਅਨਿਯਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਇਦਞ੍ਹਿ ਸਿਕ੍ਖਾਪਦਂ ਦੁਤਿਯਅਨਿਯਤੇਨ ਚ ਉਪਰਿ ਉਪਨਨ੍ਦਸ੍ਸ ਚਤੁਤ੍ਥਸਿਕ੍ਖਾਪਦੇਨ ਚ ਏਕਪਰਿਚ੍ਛੇਦਂ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਵਿਸੁਂ ਪਞ੍ਞਤ੍ਤਨ੍ਤਿ.

ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਓਵਾਦਵਗ੍ਗੋ ਤਤਿਯੋ.

੪. ਭੋਜਨਵਗ੍ਗੋ

੧. ਆਵਸਥਸਿਕ੍ਖਾਪਦਵਣ੍ਣਨਾ

ਭੋਜਨਵਗ੍ਗਸ੍ਸ ਪਠਮੇ ਅਗਿਲਾਨੇਨਾਤਿ ਅਦ੍ਧਯੋਜਨਮ੍ਪਿ ਗਨ੍ਤੁਂ ਸਮਤ੍ਥੇਨ. ਏਕੋਤਿ ਏਕਦਿਵਸਿਕੋ. ਆਵਸਥਪਿਣ੍ਡੋਤਿ ‘‘ਇਮੇਸਂ ਵਾ ਏਤ੍ਤਕਾਨਂ ਵਾ’’ਤਿ ਏਕਂ ਪਾਸਣ੍ਡਂ ਵਾ, ‘‘ਏਤ੍ਤਕਮੇਵਾ’’ਤਿ ਏਵਂ ਭਤ੍ਤਂ ਵਾ ਅਨੋਦਿਸ੍ਸ ਸਾਲਾਦੀਸੁ ਯਤ੍ਥ ਕਤ੍ਥਚਿ ਪੁਞ੍ਞਕਾਮੇਹਿ ਪਞ੍ਞਤ੍ਤਂ ਭੋਜਨਂ. ਭੁਞ੍ਜਿਤਬ੍ਬੋਤਿ ਏਕਕੁਲੇਨ ਵਾ ਨਾਨਾਕੁਲੇਹਿ ਵਾ ਏਕਤੋ ਹੁਤ੍ਵਾ ਏਕਸ੍ਮਿਂ ਵਾ ਠਾਨੇ, ਨਾਨਾਠਾਨੇਸੁ ਵਾ ‘‘ਅਜ੍ਜ ਏਕਸ੍ਮਿਂ, ਸ੍ਵੇ ਏਕਸ੍ਮਿ’’ਨ੍ਤਿ ਏਵਂ ਅਨਿਯਤਟ੍ਠਾਨੇ ਵਾ ਪਞ੍ਞਤ੍ਤੋ ਏਕਸ੍ਮਿਂ ਠਾਨੇ ਏਕਦਿਵਸਮੇਵ ਭੁਞ੍ਜਿਤਬ੍ਬੋ. ਤਤੋ ਚੇ ਉਤ੍ਤਰੀਤਿ ਦੁਤਿਯਦਿਵਸਤੋ ਪਟ੍ਠਾਯ ਤਸ੍ਮਿਂ ਵਾ ਠਾਨੇ ਅਞ੍ਞਸ੍ਮਿਂ ਵਾ ਠਾਨੇ ਤੇਸਂ ਸਨ੍ਤਕਸ੍ਸ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਅਨੁਵਸਿਤ੍ਵਾ ਆਵਸਥਪਿਣ੍ਡਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨੇਨਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਗਿਲਾਨਸ੍ਸ ਅਗਿਲਾਨਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਗਿਲਾਨਸ੍ਸ ਗਿਲਾਨਸਞ੍ਞਿਨੋ, ਯੋ ਚ ਸਕਿਂ ਭੁਞ੍ਜਤਿ, ਗਚ੍ਛਨ੍ਤੋ ਵਾ ਅਨ੍ਤਰਾਮਗ੍ਗੇ ਏਕਦਿਵਸਂ, ਗਤਟ੍ਠਾਨੇ ਏਕਦਿਵਸਂ, ਪਚ੍ਚਾਗਨ੍ਤੋਪਿ ਅਨ੍ਤਰਾਮਗ੍ਗੇ ਏਕਦਿਵਸਂ, ਆਗਤਟ੍ਠਾਨੇ ਏਕਦਿਵਸਂ, ਗਮਿਸ੍ਸਾਮੀ’ਤਿ ਚ ਭੁਞ੍ਜਿਤ੍ਵਾ ਨਿਕ੍ਖਨ੍ਤੋ ਕੇਨਚਿ ਉਪਦ੍ਦਵੇਨ ਨਿਵਤ੍ਤਿਤ੍ਵਾ ਖੇਮਭਾਵਂ ਞਤ੍ਵਾ ਗਚ੍ਛਨ੍ਤੋ ਪੁਨ ਏਕਦਿਵਸਂ ਭੁਞ੍ਜਤਿ, ਯਸ੍ਸ ਵਾ ਸਾਮਿਕਾ ਨਿਮਨ੍ਤੇਤ੍ਵਾ ਦੇਨ੍ਤਿ, ਯੋ ਵਾ ਭਿਕ੍ਖੂਨਂਯੇਵ ਉਦ੍ਦਿਸ੍ਸ ਪਞ੍ਞਤ੍ਤਂ, ਨ ਯਾਵਦਤ੍ਥਂ ਪਞ੍ਞਤ੍ਤਂ, ਠਪੇਤ੍ਵਾ ਵਾ ਪਞ੍ਚ ਭੋਜਨਾਨਿ ਅਞ੍ਞਂ ਭੁਞ੍ਜਤਿ, ਤਸ੍ਸ ਚ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਆਵਸਥਪਿਣ੍ਡਤਾ, ਅਗਿਲਾਨਤਾ, ਅਨੁਵਸਿਤ੍ਵਾ ਪਰਿਭੋਜਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਿਕ੍ਖਾਪਦਸਦਿਸਾਨੀਤਿ.

ਆਵਸਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਗਣਭੋਜਨਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਗਣਭੋਜਨੇਤਿ ਗਣਸ੍ਸ ਭੋਜਨੇ. ਇਧ ਚ ਗਣੋਤਿ ਚਤ੍ਤਾਰੋ ਵਾ ਤਤੁਤ੍ਤਰਿ ਵਾ ਭਿਕ੍ਖੂ, ਤੇਸਂ ਨਿਮਨ੍ਤਨਤੋ ਵਾ ਵਿਞ੍ਞਤ੍ਤਿਤੋ ਵਾ ਲਦ੍ਧੇ ਓਦਨਾਦੀਨਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਭੋਜਨੇਤਿ ਅਤ੍ਥੋ. ਤਤ੍ਥਾਯਂ ਵਿਨਿਚ੍ਛਯੋ – ਸਚੇ ਹਿ ਕੋਚਿ ਚਤ੍ਤਾਰੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ਯੇਨ ਕੇਨਚਿ ਵੇਵਚਨੇਨ ਵਾ ਭਾਸਨ੍ਤਰੇਨ ਵਾ ਪਞ੍ਚਨ੍ਨਂ ਭੋਜਨਾਨਂ ਨਾਮਂ ਗਹੇਤ੍ਵਾ ‘‘ਓਦਨੇਨ ਨਿਮਨ੍ਤੇਮਿ, ਓਦਨਂ ਮੇ ਗਣ੍ਹਥਾ’’ਤਿਆਦਿਨਾ ਨਯੇਨ ਨਿਮਨ੍ਤੇਤਿ, ਤੇ ਚੇ ਏਵਂ ਏਕਤੋ ਵਾ ਨਾਨਾਤੋ ਵਾ ਨਿਮਨ੍ਤਿਤਾ ਏਕਤੋ ਵਾ ਨਾਨਾਤੋ ਵਾ ਗਨ੍ਤ੍ਵਾ ਏਕਤੋ ਗਣ੍ਹਨ੍ਤਿ, ਪਚ੍ਛਾ ਏਕਤੋ ਵਾ ਨਾਨਾਤੋ ਵਾ ਭੁਞ੍ਜਨ੍ਤਿ, ਗਣਭੋਜਨਂ ਹੋਤਿ. ਪਟਿਗ੍ਗਹਣਮੇਵ ਹੇਤ੍ਥ ਪਮਾਣਂ. ਸਚੇ ਓਦਨਾਦੀਨਂ ਨਾਮਂ ਗਹੇਤ੍ਵਾ ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਤ੍ਵਾ ਚ ਗਨ੍ਤ੍ਵਾ ਚ ਏਕਤੋ ਗਣ੍ਹਨ੍ਤਿ, ਏਵਮ੍ਪਿ ਗਣਭੋਜਨਮੇਵ. ਤਸ੍ਸ ਦੁਵਿਧਸ੍ਸਾਪਿ ਏਵਂ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ. ਗਿਲਾਨਸਮਯਾਦੀਸੁ ਯਦਾ ਪਾਦਾਨਮ੍ਪਿ ਫਲਿਤਤ੍ਤਾ ਨ ਸਕ੍ਕਾ ਪਿਣ੍ਡਾਯ ਚਰਿਤੁਂ, ਅਯਂ ਗਿਲਾਨਸਮਯੋ. ਅਤ੍ਥਤਕਥਿਨਾਨਂ ਪਞ੍ਚ ਮਾਸਾ, ਇਤਰੇਸਂ ਕਤ੍ਤਿਕਮਾਸੋਤਿ ਅਯਂ ਚੀਵਰਦਾਨਸਮਯੋ. ਯਦਾ ਯੋ ਚੀਵਰੇ ਕਰਿਯਮਾਨੇ ਕਿਞ੍ਚਿਦੇਵ ਚੀਵਰੇ ਕਤ੍ਤਬ੍ਬਂ ਕਮ੍ਮਂ ਕਰੋਤਿ, ਅਯਂ ਚੀਵਰਕਾਰਸਮਯੋ. ਯਦਾ ਅਦ੍ਧਯੋਜਨਮ੍ਪਿ ਗਨ੍ਤੁਕਾਮੋ ਵਾ ਹੋਤਿ ਗਚ੍ਛਤਿ ਵਾ ਗਤੋ ਵਾ, ਅਯਂ ਅਦ੍ਧਾਨਗਮਨਸਮਯੋ. ਨਾਵਾਭਿਰੁਹਨਸਮਯੇਪਿ ਏਸੇਵ ਨਯੋ. ਯਦਾ ਗੋਚਰਗਾਮੇ ਚਤ੍ਤਾਰੋ ਭਿਕ੍ਖੂ ਪਿਣ੍ਡਾਯ ਚਰਿਤ੍ਵਾ ਨ ਯਾਪੇਨ੍ਤਿ, ਅਯਂ ਮਹਾਸਮਯੋ. ਯਦਾ ਯੋਕੋਚਿ ਪਬ੍ਬਜਿਤੋ ਭਤ੍ਤੇਨ ਨਿਮਨ੍ਤੇਤਿ, ਅਯਂ ਸਮਣਭਤ੍ਤਸਮਯੋ, ਏਤੇਸੁ ਸਮਯੇਸੁ ਭੁਞ੍ਜਿਤੁਂ ਵਟ੍ਟਤਿ.

ਰਾਜਗਹੇ ਦੇਵਦਤ੍ਤਂ ਆਰਬ੍ਭ ਵਿਞ੍ਞਾਪੇਤ੍ਵਾ ਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਸਤ੍ਤਵਿਧਾ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਨਗਣਭੋਜਨੇ ਗਣਭੋਜਨਸਞ੍ਞਿਸ੍ਸ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਨਗਣਭੋਜਨਸਞ੍ਞਿਸ੍ਸ ਪਨ, ਯੇ ਚ ਦ੍ਵੇ ਤਯੋ ਏਕਤੋ ਗਣ੍ਹਨ੍ਤਿ, ਬਹੂਨਂ ਪਿਣ੍ਡਾਯ ਚਰਿਤ੍ਵਾ ਏਕਤੋ ਭੁਞ੍ਜਨ੍ਤਾਨਂ, ਨਿਚ੍ਚਭਤ੍ਤਿਕਾਦੀਸੁ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਗਣਭੋਜਨਤਾ, ਸਮਯਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.

ਗਣਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਪਰਮ੍ਪਰਭੋਜਨੇਤਿ ਗਣਭੋਜਨੇ ਵੁਤ੍ਤਨਯੇਨੇਵ ਪਞ੍ਚਹਿ ਭੋਜਨੇਹਿ ਨਿਮਨ੍ਤਿਤਸ੍ਸ ਯੇਨ ਯੇਨ ਪਠਮਂ ਨਿਮਨ੍ਤਿਤੋ, ਤਸ੍ਸ ਤਸ੍ਸ ਭੋਜਨਤੋ ਉਪ੍ਪਟਿਪਾਟਿਯਾ ਵਾ ਅਵਿਕਪ੍ਪੇਤ੍ਵਾ ਵਾ ਪਰਸ੍ਸ ਪਰਸ੍ਸ ਭੋਜਨੇ. ਤਸ੍ਮਾ ਯੋ ਭਿਕ੍ਖੁ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ‘‘ਮਯ੍ਹਂ ਭਤ੍ਤਪਚ੍ਚਾਸਂ ਤੁਯ੍ਹਂ ਦਮ੍ਮੀ’’ਤਿ ਵਾ ‘‘ਵਿਕਪ੍ਪੇਮੀ’’ਤਿ ਵਾ ਏਵਂ ਸਮ੍ਮੁਖਾ ਵਾ ‘‘ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ (ਪਾਚਿ. ੨੨੬) ਵਾ ‘‘ਵਿਕਪ੍ਪੇਮੀ’’ਤਿ ਵਾ ਏਵਂ ਪਰਮ੍ਮੁਖਾਵਾ ਪਠਮਨਿਮਨ੍ਤਨਂ ਅਵਿਕਪ੍ਪੇਤ੍ਵਾ ਪਚ੍ਛਾ ਨਿਮਨ੍ਤਿਤਕੁਲੇ ਲਦ੍ਧਭਿਕ੍ਖਤੋ ਏਕਸਿਤ੍ਥਮ੍ਪਿ ਅਜ੍ਝੋਹਰਤਿ, ਪਾਚਿਤ੍ਤਿਯਂ. ਸਮਯਾ ਵੁਤ੍ਤਨਯਾ ਏਵ.

ਵੇਸਾਲਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਞ੍ਞਤ੍ਰ ਨਿਮਨ੍ਤਿਤਭੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਤਿਵਿਧਾ ਅਨੁਪਞ੍ਞਤ੍ਤਿ, ਪਰਿਵਾਰੇ ਪਨ ਵਿਕਪ੍ਪਨਮ੍ਪਿ ਗਹੇਤ੍ਵਾ ‘‘ਚਤਸ੍ਸੋ ਅਨੁਪਞ੍ਞਤ੍ਤਿਯੋ’’ਤਿ (ਪਰਿ. ੮੬) ਵੁਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਨਪਰਮ੍ਪਰਭੋਜਨੇ ਪਰਮ੍ਪਰਭੋਜਨਸਞ੍ਞਿਨੋ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਨਪਰਮ੍ਪਰਭੋਜਨਸਞ੍ਞਿਸ੍ਸ ਪਨ, ਯੋ ਚ ਸਮਯੇ ਵਾ ਵਿਕਪ੍ਪੇਤ੍ਵਾ ਵਾ ਏਕਸਂਸਟ੍ਠਾਨਿ ਵਾ ਦ੍ਵੇ ਤੀਣਿ ਨਿਮਨ੍ਤਨਾਨਿ ਏਕਤੋ ਵਾ ਕਤ੍ਵਾ ਭੁਞ੍ਜਤਿ, ਨਿਮਨ੍ਤਨਪ੍ਪਟਿਪਾਟਿਯਾ ਭੁਞ੍ਜਤਿ, ਸਕਲੇਨ ਗਾਮੇਨ ਵਾ ਪੂਗੇਨ ਵਾ ਨਿਮਨ੍ਤਿਤੋ ਤੇਸੁ ਯਤ੍ਥਕਤ੍ਥਚਿ ਭੁਞ੍ਜਤਿ, ਨਿਮਨ੍ਤਿਯਮਾਨੋ ਵਾ ‘‘ਭਿਕ੍ਖਂ ਗਹੇਸ੍ਸਾਮੀ’’ਤਿ ਵਦਤਿ, ਤਸ੍ਸ, ਨਿਚ੍ਚਭਤ੍ਤਿਕਾਦੀਸੁ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਰਮ੍ਪਰਭੋਜਨਤਾ, ਸਮਯਾਭਾਵੋ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਪਰਮ੍ਪਰਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਕਾਣਮਾਤਾਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਪੂਵੇਹੀਤਿ ਪਹੇਣਕਤ੍ਥਾਯ ਪਟਿਯਤ੍ਤੇਹਿ ਅਤਿਰਸਕਮੋਦਕਸਕ੍ਖਲਿਕਾਦੀਹਿ ਯੇਹਿ ਕੇਹਿਚਿ ਖਜ੍ਜਕੇਹਿ. ਮਨ੍ਥੇਹੀਤਿ ਪਾਥੇਯ੍ਯਤ੍ਥਾਯ ਪਟਿਯਤ੍ਤੇਹਿ ਯੇਹਿ ਕੇਹਿਚਿ ਸਤ੍ਤੁਤਿਲਤਣ੍ਡੁਲਾਦੀਹਿ. ਦ੍ਵਤ੍ਤਿਪਤ੍ਤਪੂਰਾਤਿ ਮੁਖਵਟ੍ਟਿਯਾ ਹੇਟ੍ਠਿਮਲੇਖਂ ਅਨਤਿਕ੍ਕਨ੍ਤਾ ਦ੍ਵੇ ਵਾ ਤਯੋ ਵਾ ਪਤ੍ਤਪੂਰਾ. ਤਤੋ ਚੇ ਉਤ੍ਤਰੀਤਿ ਸਚੇਪਿ ਤਤਿਯਂ ਪਤ੍ਤਂ ਥੂਪੀਕਤਂ ਗਣ੍ਹਾਤਿ, ਮੁਖਵਟ੍ਟਿਯਾ ਹੇਟ੍ਠਿਮਲੇਖਤੋ ਉਪਰਿਟ੍ਠਿਤਪੂਵਗਣਨਾਯ ਪਾਚਿਤ੍ਤਿਯਂ. ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਹੇਤ੍ਵਾਤਿ ਏਤ੍ਥ ਯੇਨ ਦ੍ਵੇ ਗਹਿਤਾ ਹੋਨ੍ਤਿ, ਤੇਨ ਬਹਿ ਭਿਕ੍ਖੁਂ ਦਿਸ੍ਵਾ ‘‘ਏਤ੍ਥ ਮਯਾ ਦ੍ਵੇ ਪਤ੍ਤਪੂਰਾ ਗਹਿਤਾ, ਤ੍ਵਂ ਏਕਂ ਗਣ੍ਹੇਯ੍ਯਾਸੀ’’ਤਿ ਵਤ੍ਤਬ੍ਬਂ, ਤੇਨਾਪਿ ਅਞ੍ਞਂ ਪਸ੍ਸਿਤ੍ਵਾ ‘‘ਪਠਮਂ ਆਗਤੇਨ ਦ੍ਵੇ ਪਤ੍ਤਪੂਰਾ ਗਹਿਤਾ, ਮਯਾ ਏਕੋ ਗਹਿਤੋ, ਤ੍ਵਂ ਮਾ ਗਣ੍ਹੀ’’ਤਿ ਵਤ੍ਤਬ੍ਬਂ. ਯੇਨ ਪਠਮਂ ਏਕੋ ਗਹਿਤੋ, ਤਸ੍ਸਾਪਿ ਪਰਮ੍ਪਰਾਰੋਚਨੇ ਏਸੇਵ ਨਯੋ. ਯੇਨ ਪਨ ਸਯਮੇਵ ਤਯੋ ਗਹਿਤਾ, ਤੇਨ ਅਞ੍ਞਂ ਦਿਸ੍ਵਾ ‘‘ਮਾ ਖੋ ਤ੍ਵਂ ਏਤ੍ਥ ਪਟਿਗ੍ਗਣ੍ਹੀਤਿ ਵਤ੍ਤਬ੍ਬਂ, ਅਵਦਨ੍ਤਸ੍ਸ ਦੁਕ੍ਕਟਂ, ਤਂ ਸੁਤ੍ਵਾ ਗਣ੍ਹਨ੍ਤਸ੍ਸਾਪਿ ਦੁਕ੍ਕਟਮੇਵ. ਤਤੋ ਨੀਹਰਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਿਭਜਿਤਬ੍ਬਨ੍ਤਿ ਲਦ੍ਧਟ੍ਠਾਨਤੋ ਸਬ੍ਬਾਸਨ੍ਨਂ ਆਸਨਸਾਲਂ ਵਾ ਵਿਹਾਰਂ ਵਾ ਯਤ੍ਥ ਵਾ ਪਨ ਨਿਬਦ੍ਧਂ ਪਟਿਕ੍ਕਮਤਿ, ਤਤ੍ਥ ਗਨ੍ਤ੍ਵਾ ਏਕਂ ਪਤ੍ਤਪੂਰਂ ਅਤ੍ਤਨੋ ਠਪੇਤ੍ਵਾ ਸੇਸਂ ਭਿਕ੍ਖੁਸਙ੍ਘਸ੍ਸ ਦਾਤਬ੍ਬਂ. ਯਥਾਮਿਤ੍ਤਂ ਪਨ ਦਾਤੁਂ ਨ ਲਬ੍ਭਤਿ. ਯੇਨ ਏਕੋ ਗਹਿਤੋ, ਨ ਤੇਨ ਕਿਞ੍ਚਿ ਅਕਾਮਾ ਦਾਤਬ੍ਬਂ, ਯਥਾਰੁਚਿ ਕਾਤਬ੍ਬਂ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਨ ਮਤ੍ਤਂ ਜਾਨਿਤ੍ਵਾ ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕਦ੍ਵਤ੍ਤਿਪਤ੍ਤਪੂਰੇ ਅਤਿਰੇਕਸਞ੍ਞਿਸ੍ਸ ਵੇਮਤਿਕਸ੍ਸ ਵਾ ਦੁਕ੍ਕਟਂ. ਊਨਕਸਞ੍ਞਿਸ੍ਸ ਪਨ, ਨ ਪਹੇਣਕਤ੍ਥਾਯ ਨ ਪਾਥੇਯ੍ਯਤ੍ਥਾਯ ਵਾ ਪਟਿਯਤ੍ਤਂ, ਤਦਤ੍ਥਾਯ ਪਟਿਯਤ੍ਤਸੇਸਕਂ ਵਾ, ਗਮਨੇ ਵਾ ਪਟਿਪ੍ਪਸ੍ਸਦ੍ਧੇ, ਞਾਤਕਪ੍ਪਵਾਰਿਤਾਨਂ ਵਾ ਦੇਨ੍ਤਾਨਂ, ਅਤ੍ਤਨੋ ਧਨੇਨ ਗਣ੍ਹਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਲਕ੍ਖਣਪੂਵਮਨ੍ਥਤਾ, ਅਸੇਸਕਤਾ, ਅਪ੍ਪਟਿਪ੍ਪਸ੍ਸਦ੍ਧਗਮਨਤਾ, ਅਨਞ੍ਞਾਤਕਾਦਿਤਾ, ਅਤਿਰੇਕਪ੍ਪਟਿਗ੍ਗਹਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ, ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੇਵਾਤਿ.

ਕਾਣਮਾਤਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਠਮਪਵਾਰਣਾਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਭੁਤ੍ਤਾਵੀਤਿ ਭੁਤ੍ਤਵਾ, ਯੇਨ ਪਞ੍ਚਨ੍ਨਂ ਭੋਜਨਾਨਂ ਸਾਸਪਮਤ੍ਤਮ੍ਪਿ ਅਜ੍ਝੋਹਰਿਤਂ, ਸੋ ਏਵਂ ਵੁਚ੍ਚਤਿ. ਪਵਾਰਿਤੋਤਿ ‘‘ਅਸਨਂ ਪਞ੍ਞਾਯਤਿ, ਭੋਜਨਂ ਪਞ੍ਞਾਯਤਿ, ਹਤ੍ਥਪਾਸੇ ਠਿਤੋ ਅਭਿਹਰਤਿ, ਪਟਿਕ੍ਖੇਪੋ ਪਞ੍ਞਾਯਤੀ’’ਤਿ (ਪਾਚਿ. ੨੩੯) ਏਵਂ ਪਾਲ਼ਿਯਂ ਵੁਤ੍ਤਪਞ੍ਚਙ੍ਗਵਸੇਨ ਕਤਪ੍ਪਵਾਰਣੋ, ਕਤਪ੍ਪਟਿਕ੍ਖੇਪੋਤਿ ਅਤ੍ਥੋ. ਤਤ੍ਥ ਯਸ੍ਮਾ ‘‘ਅਸਨਂ ਪਞ੍ਞਾਯਤੀ’’ਤਿ ਇਮਿਨਾ ਵਿਪ੍ਪਕਤਭੋਜਨੋ ‘ਪਵਾਰਿਤੋ’ਤਿ ਵੁਤ੍ਤੋ. ਯੋ ਚ ਵਿਪ੍ਪਕਤਭੋਜਨੋ, ਤੇਨ ਕਿਞ੍ਚਿ ਭੁਤ੍ਤਂ, ਕਿਞ੍ਚਿ ਅਭੁਤ੍ਤਂ, ਯਞ੍ਚ ਭੁਤ੍ਤਂ, ਤਂ ਸਨ੍ਧਾਯ ‘ਭੁਤ੍ਤਾਵੀ’ਤਿਪਿ ਸਙ੍ਖਂ ਗਚ੍ਛਤਿ. ਤਸ੍ਮਾ ‘ਭੁਤ੍ਤਾਵੀ’ਤਿਵਚਨੇਨ ਵਿਸੁਂ ਕਿਞ੍ਚਿ ਅਤ੍ਥਸਿਦ੍ਧਿਂ ਨ ਪਸ੍ਸਾਮ, ‘‘ਦਿਰਤ੍ਤਤਿਰਤ੍ਤ’’ਨ੍ਤਿਆਦੀਸੁ (ਪਾਚਿ. ੫੨) ਪਨ ਦਿਰਤ੍ਤਾਦਿਵਚਨਂ ਵਿਯ ਪਵਾਰਿਤਪਦਸ੍ਸ ਪਰਿਵਾਰਭਾਵੇਨ ਬ੍ਯਞ੍ਜਨਸਿਲਿਟ੍ਠਤਾਯ ਚੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਪਵਾਰਣਙ੍ਗੇਸੁ ਪਨ ਅਸਨਂ ਪਞ੍ਞਾਯਤੀਤਿ ਵਿਪ੍ਪਕਤਭੋਜਨਂ ਦਿਸ੍ਸਤਿ, ਤਂ ਭੁਞ੍ਜਮਾਨੋ ਚੇਸ ਪੁਗ੍ਗਲੋ ਹੋਤੀਤਿ ਅਤ੍ਥੋ. ਭੋਜਨਂ ਪਞ੍ਞਾਯਤੀਤਿ ਪਵਾਰਣਪ੍ਪਹੋਨਕਂ ਭੋਜਨਂ ਦਿਸ੍ਸਤਿ, ਓਦਨਾਦੀਨਂ ਚੇ ਅਞ੍ਞਤਰਂ ਪਟਿਕ੍ਖਿਪਿਤਬ੍ਬਂ ਭੋਜਨਂ ਹੋਤੀਤਿ ਅਤ੍ਥੋ. ਹਤ੍ਥਪਾਸੇ ਠਿਤੋਤਿ ਪਵਾਰਣਪ੍ਪਹੋਨਕਂ ਚੇ ਭੋਜਨਂ ਗਣ੍ਹਿਤ੍ਵਾ ਦਾਯਕੋ ਅਡ੍ਢਤੇਯ੍ਯਹਤ੍ਥਪ੍ਪਮਾਣੇ ਓਕਾਸੇ ਠਿਤੋ ਹੋਤੀਤਿ ਅਤ੍ਥੋ. ਅਭਿਹਰਤੀਤਿ ਸੋ ਚੇ ਦਾਯਕੋ ਤਸ੍ਸ ਤਂ ਭੋਜਨਂ ਕਾਯੇਨ ਅਭਿਸਂਹਰਤੀਤਿ ਅਤ੍ਥੋ. ਪਟਿਕ੍ਖੇਪੋ ਪਞ੍ਞਾਯਤੀਤਿ ਪਟਿਕ੍ਖੇਪੋ ਦਿਸ੍ਸਤਿ, ਤਂ ਚੇ ਅਭਿਹਟਂ ਸੋ ਭਿਕ੍ਖੁ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖਿਪਤੀਤਿ ਅਤ੍ਥੋ. ਏਵਂ ਪਞ੍ਚਨ੍ਨਂ ਅਙ੍ਗਾਨਂ ਵਸੇਨ ਪਵਾਰਿਤੋ ਹੋਤਿ.

ਤਤ੍ਰਾਯਂ ਵਿਨਿਚ੍ਛਯੋ – ‘ਅਸਨ’ਨ੍ਤਿਆਦੀਸੁ ਤਾਵ ਯਞ੍ਚ ਅਸ੍ਨਾਤਿ, ਯਞ੍ਚ ਭੋਜਨਂ ਹਤ੍ਥਪਾਸੇ ਠਿਤੇਨ ਅਭਿਹਟਂ ਪਟਿਕ੍ਖਿਪਤਿ, ਤਂ ਓਦਨੋ ਕੁਮ੍ਮਾਸੋ ਸਤ੍ਤੁ ਮਚ੍ਛੋ ਮਂਸਨ੍ਤਿ ਇਮੇਸਂ ਅਞ੍ਞਤਰਮੇਵ ਵੇਦਿਤਬ੍ਬਂ. ਤਤ੍ਥ ਓਦਨੋ ਨਾਮ ਸਾਲਿ ਵੀਹਿ ਯਵੋ ਗੋਧੁਮੋ ਕਙ੍ਗੁ ਵਰਕੋ ਕੁਦ੍ਰੂਸਕੋਤਿ ਇਮੇਸਂ ਸਤ੍ਤਨ੍ਨਂ ਧਞ੍ਞਾਨਂ ਤਣ੍ਡੁਲੇ ਗਹੇਤ੍ਵਾ ‘‘ਭਤ੍ਤਂ ਪਚਾਮਾ’’ਤਿ ਵਾ ‘‘ਯਾਗੁਂ ਪਚਾਮਾ’’ਤਿ ਵਾ ਯਂਕਿਞ੍ਚਿ ਸਨ੍ਧਾਯ ਪਚਨ੍ਤੁ, ਸਚੇ ਉਣ੍ਹਂ ਵਾ ਸੀਤਲਂ ਵਾ ਭੁਞ੍ਜਨ੍ਤਾਨਂ ਭੋਜਨਕਾਲੇ ਗਹਿਤਗਹਿਤਟ੍ਠਾਨੇ ਓਧਿ ਪਞ੍ਞਾਯਤਿ, ਓਦਨੋ ਹੋਤਿ, ਪਵਾਰਣਂ ਜਨੇਤਿ. ਯੋ ਪਨ ਪਾਯਾਸੋ ਵਾ ਅਮ੍ਬਿਲਯਾਗੁ ਵਾ ਉਦ੍ਧਨਤੋ ਓਤਾਰਿਤਮਤ੍ਤਾ ਅਬ੍ਭੁਣ੍ਹਾ ਸਕ੍ਕਾ ਹੋਤਿ ਆਵਿਜ੍ਝਿਤ੍ਵਾ ਪਿਵਿਤੁਂ, ਸਾ ਯਸ੍ਸ ਹਤ੍ਥੇਨ ਗਹਿਤੋਕਾਸੇਪਿ ਓਧਿ ਨ ਪਞ੍ਞਾਯਤਿ, ਪਵਾਰਣਂ ਨ ਜਨੇਤਿ. ਸਚੇ ਪਨ ਉਸੁਮਾਯ ਵਿਗਤਾਯ ਘਨਭਾਵਂ ਗਚ੍ਛਤਿ, ਓਧਿਂ ਦਸ੍ਸੇਤਿ, ਪੁਨ ਪਵਾਰਣਂ ਜਨੇਤਿ, ਪੁਬ੍ਬੇ ਤਨੁਕਭਾਵੋ ਨ ਰਕ੍ਖਤਿ. ਸਚੇਪਿ ਬਹੂ ਪਣ੍ਣਫਲਕਲ਼ੀਰੇ ਪਕ੍ਖਿਪਿਤ੍ਵਾ ਮੁਟ੍ਠਿਮਤ੍ਤਾਪਿ ਤਣ੍ਡੁਲਾ ਪਕ੍ਖਿਤ੍ਤਾ ਹੋਨ੍ਤਿ, ਭੋਜਨਕਾਲੇ ਚੇ ਓਧਿ ਪਞ੍ਞਾਯਤਿ, ਪਵਾਰਣਂ ਜਨੇਤਿ. ਅਯਾਗੁਕੇ ਨਿਮਨ੍ਤਨੇ ‘‘ਯਾਗੁਂ ਦਸ੍ਸਾਮਾ’’ਤਿ ਭਤ੍ਤੇ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਦੇਨ੍ਤਿ, ਕਿਞ੍ਚਾਪਿ ਤਨੁਕਾ ਹੋਤਿ, ਪਵਾਰਣਂ ਜਨੇਤਿਯੇਵ. ਸਚੇ ਪਨ ਪਕ੍ਕੁਥਿਤੇਸੁ ਉਦਕਾਦੀਸੁ ਪਕ੍ਖਿਪਿਤ੍ਵਾ ਪਚਿਤ੍ਵਾ ਦੇਨ੍ਤਿ, ਯਾਗੁਸਙ੍ਗਹਮੇਵ ਗਚ੍ਛਤਿ. ਸਚੇ ਯਾਗੁਯਾਪਿ ਸਾਸਪਮਤ੍ਤਮ੍ਪਿ ਮਚ੍ਛਮਂਸਕ੍ਖਣ੍ਡਂ ਵਾ ਨ੍ਹਾਰੁ ਵਾ ਪਕ੍ਖਿਤ੍ਤਂ ਹੋਤਿ, ਪਵਾਰਣਂ ਜਨੇਤਿ. ਠਪੇਤ੍ਵਾ ਸਾਨੁਲੋਮਾਨਂ ਵੁਤ੍ਤਧਞ੍ਞਾਨਂ ਤਣ੍ਡੁਲੇ ਅਞ੍ਞੇਹਿ ਵੇਲ਼ੁਤਣ੍ਡੁਲਾਦੀਹਿ ਵਾ ਕਨ੍ਦਮੂਲਫਲੇਹਿ ਵਾ ਯੇਹਿ ਕੇਹਿਚਿ ਕਤਭਤ੍ਤਂ ਪਵਾਰਣਂ ਨ ਜਨੇਤਿ. ਕੁਮ੍ਮਾਸੋ ਨਾਮ ਯਵੇਹਿ ਕਤੋ. ਅਞ੍ਞੇਹਿ ਪਨ ਮੁਗ੍ਗਾਦੀਹਿ ਕਤਕੁਮ੍ਮਾਸੋ ਪਵਾਰਣਂ ਨ ਜਨੇਤਿ. ਸਤ੍ਤੁ ਨਾਮ ਸਤ੍ਤ ਧਞ੍ਞਾਨਿ ਭਜ੍ਜਿਤ੍ਵਾ ਕਤੋ. ਅਨ੍ਤਮਸੋ ਖਰਪਾਕਭਜ੍ਜਿਤਾਨਂ ਵੀਹੀਨਂ ਤਣ੍ਡੁਲੇ ਕੋਟ੍ਟੇਤ੍ਵਾ ਕਤਚੁਣ੍ਣਮ੍ਪਿ ਕੁਣ੍ਡਕਮ੍ਪਿ ਸਤ੍ਤੁਸਙ੍ਗਹਮੇਵ ਗਚ੍ਛਤਿ. ਸਮਪਾਕਭਜ੍ਜਿਤਾਨਂ ਪਨ ਆਤਪਸੁਕ੍ਖਾਨਂ ਕੁਣ੍ਡਕਂ ਵਾ, ਯੇ ਕੇਚਿ ਤਣ੍ਡੁਲਾ ਵਾ ਲਾਜਾ ਵਾ, ਲਾਜੇਹਿ ਕਤਭਤ੍ਤਸਤ੍ਤੁਆਦੀਨਿ ਵਾ ਨ ਪਵਾਰੇਨ੍ਤਿ. ਮਚ੍ਛਮਂਸੇਸੁ ਸਚੇ ਯਾਗੁਂ ਪਿਵਨ੍ਤਸ੍ਸ ਯਾਗੁਸਿਤ੍ਥਮਤ੍ਤਾਨੇਵ ਦ੍ਵੇ ਮਚ੍ਛਕ੍ਖਣ੍ਡਾਨਿ ਵਾ ਮਂਸਕ੍ਖਣ੍ਡਾਨਿ ਵਾ ਏਕਭਾਜਨੇ ਵਾ ਨਾਨਾਭਾਜਨੇ ਵਾ ਦੇਨ੍ਤਿ, ਤਾਨਿ ਚੇ ਅਖਾਦਨ੍ਤੋ ਅਞ੍ਞਂ ਪਵਾਰਣਪ੍ਪਹੋਨਕਂ ਯਂਕਿਞ੍ਚਿ ਪਟਿਕ੍ਖਿਪਤਿ, ਨ ਪਵਾਰੇਤਿ. ਤਤੋ ਏਕਂ ਖਾਦਿਤਂ, ਏਕਂ ਹਤ੍ਥੇ ਵਾ ਪਤ੍ਤੇ ਵਾ ਹੋਤਿ, ਸਚੇ ਅਞ੍ਞਂ ਪਟਿਕ੍ਖਿਪਤਿ ਪਵਾਰੇਤਿ. ਦ੍ਵੇਪਿ ਖਾਦਿਤਾਨਿ ਹੋਨ੍ਤਿ, ਮੁਖੇ ਸਾਸਪਮਤ੍ਤਮ੍ਪਿ ਅਵਸਿਟ੍ਠਂ ਨਤ੍ਥਿ, ਸਚੇਪਿ ਅਞ੍ਞਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਯੋ ਪਨ ਅਕਪ੍ਪਿਯਮਂਸਂ ਕੁਲਦੂਸਨਵੇਜ੍ਜਕਮ੍ਮਉਤ੍ਤਰਿਮਨੁਸ੍ਸਧਮ੍ਮਾਰੋਚਨਸਾਦਿਤਰੂਪਿਯਾਦੀਹਿ ਨਿਬ੍ਬਤ੍ਤਂ ਅਕਪ੍ਪਿਯਭੋਜਨਞ੍ਚ ਅਞ੍ਞਂ ਕਪ੍ਪਿਯਂ ਵਾ ਅਕਪ੍ਪਿਯਂ ਵਾ ਖਾਦਨ੍ਤੋ ਪਟਿਕ੍ਖਿਪਤਿ, ਨ ਪਵਾਰੇਤਿ.