ਪਾਟਿਦੇਸਨੀਯਕਣ੍ਡੋ
੧. ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
ਪਾਟਿਦੇਸਨੀਯੇਸੁ ਪਠਮੇ ਅਨ੍ਤਰਘਰਂ ਪਵਿਟ੍ਠਾਯਾਤਿ ਵਚਨਤੋ ਸਚੇ ਤਸ੍ਸਾ ਅਨ੍ਤਰਾਰਾਮਾਦੀਸੁ ਠਤ੍ਵਾਪਿ ਦਦਮਾਨਾਯ ਹਤ੍ਥਤੋ ਸਯਂ ਰਥਿਯਾਬ੍ਯੂਹਸਿਙ੍ਘਾਟਕਘਰਾਨਂ ਅਞ੍ਞਤਰਸ੍ਮਿਂ ਠਿਤੋਪਿ ਗਣ੍ਹਾਤਿ, ਦੋਸੋ ਨਤ੍ਥਿ. ਤਸ੍ਸਾ ਪਨ ਰਥਿਯਾਦੀਸੁ ਠਤ੍ਵਾ ਦਦਮਾਨਾਯ, ਰਥਿਯਾਦੀਸੁ ਵਾ, ਅਨ੍ਤਰਾਰਾਮਾਦੀਸੁ ਵਾ ਠਤ੍ਵਾਪਿ ਯਂਕਿਞ੍ਚਿ ਆਮਿਸਂ ਅਜ੍ਝੋਹਰਣਤ੍ਥਾਯ ਗਣ੍ਹਤੋ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਟਿਦੇਸਨੀਯਂ. ਤਸ੍ਸ ਦੇਸੇਤਬ੍ਬਾਕਾਰੋ ਗਾਰਯ੍ਹਂ ਆਵੁਸੋਤਿਆਦਿਨਾ ਨਯੇਨ ਸਿਕ੍ਖਾਪਦੇ ਦਸ੍ਸਿਤੋਯੇਵ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਅਨ੍ਤਰਘਰਂ ਪਵਿਟ੍ਠਾਯ ਹਤ੍ਥਤੋ ਆਮਿਸਂ ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਯਥਾ ਚੇਤਂ, ਤਥਾ ਸੇਸਾਨਿਪਿ, ਤਿਕਪਾਟਿਦੇਸਨੀਯਂ, ਯਾਮਕਾਲਿਕਾਦੀਸੁ ਪਟਿਗ੍ਗਹਣੇਪਿ ਅਜ੍ਝੋਹਰਣੇਪਿ ਦੁਕ੍ਕਟਂ, ਏਕਤੋਉਪਸਮ੍ਪਨ੍ਨਾਯ ਯਾਵਕਾਲਿਕੇਪਿ ਤਥੇਵ, ਞਾਤਿਕਾਯ ਅਞ੍ਞਾਤਿਕਸਞ੍ਞਿਵੇਮਤਿਕਾਨਮ੍ਪਿ ਏਸੇਵ ਨਯੋ. ਞਾਤਿਕਸਞ੍ਞਿਨੋ ਪਨ, ਞਾਤਿਕਾਯ ਵਾ ਦਾਪੇਨ੍ਤਿਯਾ, ਉਪਨਿਕ੍ਖਿਪਿਤ੍ਵਾ ਵਾ ਦਦਮਾਨਾਯ, ਯਾ ਚ ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਪਟਿਕ੍ਕਮਨੇਸੁ ਠਤ੍ਵਾ ਗਾਮਤੋ ਬਹਿ ਨੀਹਰਿਤ੍ਵਾ, ਯਾਮਕਾਲਿਕਾਦੀਨਿ ਵਾ ‘‘ਸਤਿ ਪਚ੍ਚਯੇ ਪਰਿਭੁਞ੍ਜਾ’’ਤਿ ਦੇਤਿ, ਤਸ੍ਸ, ਸਿਕ੍ਖਮਾਨਸਾਮਣੇਰੀਨਞ੍ਚ ਹਤ੍ਥਤੋ ਗਹੇਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਰਿਪੁਣ੍ਣੂਪਸਮ੍ਪਨ੍ਨਤਾ, ਅਞ੍ਞਾਤਿਕਤਾ, ਅਨ੍ਤਰਘਰੇ ਠਿਤਾਯ ਹਤ੍ਥਤੋ ਸਹਤ੍ਥਾ ਪਟਿਗ੍ਗਹਣਂ, ਯਾਵਕਾਲਿਕਤਾ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਪਠਮਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਇਧ ਸੂਪਨ੍ਤਿਆਦਿ ਵੋਸਾਸਨਾਕਾਰਦਸ੍ਸਨਂ. ਅਪਸਕ੍ਕ ਤਾਵ ਭਗਿਨੀਤਿਆਦਿ ਅਪਸਾਦੇਤਬ੍ਬਾਕਾਰਦਸ੍ਸਨਂ. ਤਤ੍ਰਾਯਂ ਵਿਨਿਚ੍ਛਯੋ – ਏਕੇਨਾਪਿ ਭਿਕ੍ਖੁਨਾ ਅਨਪਸਾਦਿਤੇ ਅਜ੍ਝੋਹਰਣਤ੍ਥਾਯ ਆਮਿਸਂ ਗਣ੍ਹਨ੍ਤਾਨਂ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਟਿਦੇਸਨੀਯਨ੍ਤਿ.
ਰਾਜਗਹੇ ਛਬ੍ਬਗ੍ਗਿਯੇ ਆਰਬ੍ਭ ਭਿਕ੍ਖੁਨਿਯਾ ਵੋਸਾਸਨ੍ਤਿਯਾ ਨਨਿਵਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਟਿਦੇਸਨੀਯਂ, ਏਕਤੋਉਪਸਮ੍ਪਨ੍ਨਾਯ ਵੋਸਾਸਨ੍ਤਿਯਾ ਨਨਿਵਾਰੇਨ੍ਤਸ੍ਸ ਦੁਕ੍ਕਟਂ, ਤਥਾ ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਿਨੋ ਵੇਮਤਿਕਸ੍ਸ ਚ. ਅਨੁਪਸਮ੍ਪਨ੍ਨਸਞ੍ਞਿਨੋ, ਪਨ ਯੋ ਚ ਅਤ੍ਤਨੋ ਵਾ ਭਤ੍ਤਂ ਦਾਪੇਨ੍ਤਿਯਾ, ਅਞ੍ਞੇਸਂ ਵਾ ਭਤ੍ਤਂ ਦੇਨ੍ਤਿਯਾ, ਯਂ ਵਾ ਨ ਦਿਨ੍ਨਂ, ਤਂ ਦਾਪੇਨ੍ਤਿਯਾ, ਯਤ੍ਥ ਵਾ ਨ ਦਿਨ੍ਨਂ, ਤਤ੍ਥ, ਸਬ੍ਬੇਸਂ ਵਾ ਸਮਕਂ ਦਾਪੇਨ੍ਤਿਯਾ, ਸਿਕ੍ਖਮਾਨਾਯ ਵਾ ਸਾਮਣੇਰਿਯਾ ਵਾ ਵੋਸਾਸਨ੍ਤਿਯਾ ਪਟਿਗ੍ਗਹੇਤ੍ਵਾ ਭੁਞ੍ਜਤਿ, ਤਸ੍ਸ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਰਿਪੁਣ੍ਣੂਪਸਮ੍ਪਨ੍ਨਤਾ, ਪਞ੍ਚਭੋਜਨਤਾ, ਅਨ੍ਤਰਘਰੇ ਅਨੁਞ੍ਞਾਤਪਕਾਰਤੋ ਅਞ੍ਞਥਾ ਵੋਸਾਸਨਾ, ਅਨਿਵਾਰਣਾ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੀਤਿ.
ਦੁਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਤਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
ਤਤਿਯੇ ਸੇਕ੍ਖਸਮ੍ਮਤਾਨੀਤਿ ਲਦ੍ਧਸੇਕ੍ਖਸਮ੍ਮੁਤਿਕਾਨਿ. ਪੁਬ੍ਬੇ ਅਨਿਮਨ੍ਤਿਤੋਤਿ ਘਰੂਪਚਾਰੋਕ੍ਕਮਨਤੋ ਪਠਮਤਰਂ ਉਪਚਾਰਂ ਅਨੋਕ੍ਕਮਨ੍ਤੇਯੇਵ ਪੁਬ੍ਬੇ ਅਨਿਮਨ੍ਤਿਤੋ. ਅਗਿਲਾਨੋ ਨਾਮ ਯੋ ਸਕ੍ਕੋਤਿ ਪਿਣ੍ਡਾਯ ਚਰਿਤੁਂ. ਪਾਟਿਦੇਸਨੀਯਨ੍ਤਿ ਘਰੂਪਚਾਰਂ ਓਕ੍ਕਮਿਤ੍ਵਾ ਆਮਿਸਂ ਗਣ੍ਹਨ੍ਤਸ੍ਸ ਪਟਿਗ੍ਗਹਣੇ ਤਾਵ ਦੁਕ੍ਕਟਂ, ਤਂ ਗਹੇਤ੍ਵਾ ਯਤ੍ਥਕਤ੍ਥਚਿ ਭੁਞ੍ਜਨ੍ਤਸ੍ਸ ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਟਿਦੇਸਨੀਯਨ੍ਤਿ.
ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਨ ਮਤ੍ਤਂ ਜਾਨਿਤ੍ਵਾ ਪਟਿਗ੍ਗਹਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਪੁਬ੍ਬੇ ਅਨਿਮਨ੍ਤਿਤੋ, ਅਗਿਲਾਨੋ’’ਤਿ ਇਮਾ ਪਨੇਤ੍ਥ ਦ੍ਵੇ ਅਨੁਪਞ੍ਞਤ੍ਤਿਯੋ, ਤਿਕਪਾਟਿਦੇਸਨੀਯਂ, ਯਾਮਕਾਲਿਕਾਦੀਸੁ ਪਟਿਗ੍ਗਹਣੇਪਿ ਅਜ੍ਝੋਹਾਰੇਪਿ ਦੁਕ੍ਕਟਂ, ਤਥਾ ਅਸੇਕ੍ਖਸਮ੍ਮਤੇ ਸੇਕ੍ਖਸਮ੍ਮਤਸਞ੍ਞਿਨੋ ਵੇਮਤਿਕਸ੍ਸ ਚ. ਅਸੇਕ੍ਖਸਮ੍ਮਤਸਞ੍ਞਿਨੋ, ਪਨ ਯੋ ਚ ਪੁਬ੍ਬੇ ਨਿਮਨ੍ਤਿਤੋ ਵਾ ਗਿਲਾਨੋ ਵਾ ਅਞ੍ਞਸ੍ਸ ਵਾ ਤੇਸਂ ਘਰੇ ਪਞ੍ਞਤ੍ਤਂ ਭਿਕ੍ਖਂ ਗਣ੍ਹਾਤਿ, ਯਸ੍ਸ ਚ ਘਰਤੋ ਨੀਹਰਿਤ੍ਵਾ, ਆਸਨਸਾਲਾਦੀਸੁ ਵਾ ਭਿਕ੍ਖੁਂ ਅਦਿਸ੍ਵਾ ਪਠਮਂਯੇਵ ਨੀਹਰਿਤ੍ਵਾ, ਦ੍ਵਾਰਮੂਲੇ ਵਾ ਠਪਿਤਂ ਦੇਨ੍ਤਿ, ਤਸ੍ਸ ਤਂ ਭੁਞ੍ਜਨ੍ਤਸ੍ਸ, ਨਿਚ੍ਚਭਤ੍ਤਕੇ, ਸਲਾਕਭਤ੍ਤੇ, ਪਕ੍ਖਿਕੇ, ਉਪੋਸਥਿਕੇ, ਪਾਟਿਪਦਿਕੇ, ਯਾਮਕਾਲਿਕਾਦਿਂ ‘‘ਸਤਿ ਪਚ੍ਚਯੇ ਪਰਿਭੁਞ੍ਜਾ’’ਤਿ ਦਿਨ੍ਨਂ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੇਕ੍ਖਸਮ੍ਮਤਤਾ, ਪੁਬ੍ਬੇ ਅਨਿਮਨ੍ਤਿਤਤਾ, ਅਗਿਲਾਨਤਾ, ਘਰੂਪਚਾਰੋਕ੍ਕਮਨਂ, ਠਪੇਤ੍ਵਾ ਨਿਚ੍ਚਭਤ੍ਤਕਾਦੀਨਿ ਅਞ੍ਞਂ ਆਮਿਸਂ ਗਹੇਤ੍ਵਾ ਭੁਞ੍ਜਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਤਤਿਯਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨੀਤਿਆਦਿ ਚੀਵਰਵਿਪ੍ਪਵਾਸਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪੁਬ੍ਬੇ ਅਪ੍ਪਟਿਸਂਵਿਦਿਤਨ੍ਤਿ ਏਤ੍ਥ ਯਂ ਇਤ੍ਥਿਯਾ ਵਾ ਪੁਰਿਸੇਨ ਵਾ ਗਹਟ੍ਠੇਨ ਵਾ ਪਬ੍ਬਜਿਤੇਨ ਵਾ ਆਰਾਮਂ ਵਾ ਆਰਾਮੂਪਚਾਰਂ ਵਾ ਪਵਿਸਿਤ੍ਵਾ ‘‘ਇਤ੍ਥਨ੍ਨਾਮਸ੍ਸ, ਭਨ੍ਤੇ, ਕੁਲਸ੍ਸ ਖਾਦਨੀਯਂ ਵਾ ਭੋਜਨੀਯਂ ਵਾ ਆਹਰਿਯਿਸ੍ਸਤੀ’’ਤਿ (ਪਾਚਿ. ੫੭੩) ਆਰੋਚਿਤਂ, ਤਂ ਪਚ੍ਛਾ ਯਥਾਆਰੋਚਿਤਮੇਵ ਵਾ ਆਹਰਿਯਤੁ, ਤਸ੍ਸ ਪਰਿਵਾਰਂ ਕਤ੍ਵਾ ਅਞ੍ਞਂ ਵਾ ਤੇਨ ਸਦ੍ਧਿਂ ਬਹੁਕਮ੍ਪਿ, ‘‘ਇਤ੍ਥਨ੍ਨਾਮਂ ਕੁਲਂ ਪਟਿਸਂਵਿਦਿਤਂ ਕਤ੍ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਗਹੇਤ੍ਵਾ ਗਚ੍ਛਤੀ’’ਤਿ ਸੁਤ੍ਵਾ ਅਞ੍ਞਾਨਿ ਵਾ ਕੁਲਾਨਿ ਤੇਹਿ ਸਦ੍ਧਿਂ ਆਹਰਨ੍ਤੁ, ਤਂ ਸਬ੍ਬਂ ਪਟਿਸਂਵਿਦਿਤਂ ਨਾਮ. ਯਂ ਪਨ ਏਵਂ ਅਨਾਰੋਚਿਤਂ ਅਨਾਹਟਞ੍ਚ, ਤਂ ਅਪ੍ਪਟਿਸਂਵਿਦਿਤਂ ਨਾਮ. ਅਗਿਲਾਨੋ ਨਾਮ ਯੋ ਸਕ੍ਕੋਤਿ ਪਿਣ੍ਡਾਯ ਗਨ੍ਤੁਂ. ਪਾਟਿਦੇਸਨੀਯਨ੍ਤਿ ਏਵਰੂਪਂ ਅਨ੍ਤਮਸੋ ਆਰਾਮਮਜ੍ਝੇਨ ਗਚ੍ਛਨ੍ਤੇਹਿ ਅਦ੍ਧਿਕੇਹਿ ਦਿਨ੍ਨਮ੍ਪਿ ਆਰਾਮੇ ਵਾ ਆਰਾਮੂਪਚਾਰੇ ਵਾ ਪਟਿਗ੍ਗਹੇਤ੍ਵਾ ਅਜ੍ਝੋਹਰਨ੍ਤਸ੍ਸ ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਟਿਦੇਸਨੀਯਨ੍ਤਿ.
ਸਕ੍ਕੇਸੁ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਆਰਾਮੇ ਚੋਰੇ ਪਟਿਵਸਨ੍ਤੇ ਅਨਾਰੋਚਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨੋ’’ਤਿ ਅਯਮੇਤ੍ਥ ਏਕਾ ਅਨੁਪਞ੍ਞਤ੍ਤਿ, ਤਿਕਪਾਟਿਦੇਸਨੀਯਂ, ਯਾਮਕਾਲਿਕਾਦੀਸੁ ਆਹਾਰਤ੍ਥਾਯ ਪਟਿਗ੍ਗਹਣੇਪਿ ਅਜ੍ਝੋਹਾਰੇਪਿ ਦੁਕ੍ਕਟਮੇਵ, ਤਥਾ ਪਟਿਸਂਵਿਦਿਤੇ ਅਪ੍ਪਟਿਸਂਵਿਦਿਤਸਞ੍ਞਿਨੋ ਵੇਮਤਿਕਸ੍ਸ ਚ, ਪਟਿਸਂਵਿਦਿਤਸਞ੍ਞਿਨੋ, ਪਨ ਗਿਲਾਨਸ੍ਸ, ਯੋ ਚ ਪਟਿਸਂਵਿਦਿਤਂ ਕਤ੍ਵਾ ਆਹਟਂ ਵਾ ਗਿਲਾਨਾਵਸੇਸਕਂ ਵਾ ਬਹਾਰਾਮੇ ਵਾ ਪਟਿਗ੍ਗਹਿਤਂ, ਤਤ੍ਥਜਾਤਕਮੇਵ ਵਾ ਮੂਲਫਲਾਦਿਂ, ਯਾਮਕਾਲਿਕਾਦੀਸੁ ਵਾ ਯਂਕਿਞ੍ਚਿ ‘‘ਸਤਿ ਪਚ੍ਚਯੇ ਪਰਿਭੁਞ੍ਜਾ’’ਤਿ ਲਦ੍ਧਂ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਯਥਾਵੁਤ੍ਤਆਰਞ੍ਞਕਸੇਨਾਸਨਤਾ, ਯਾਵਕਾਲਿਕਸ੍ਸ ਅਤਤ੍ਥਜਾਤਕਤਾ, ਅਗਿਲਾਨਤਾ, ਅਗਿਲਾਨਾਵਸੇਸਕਤਾ, ਅਪ੍ਪਟਿਸਂਵਿਦਿਤਤਾ, ਅਜ੍ਝਾਰਾਮੇ ਪਟਿਗ੍ਗਹਣਂ, ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਸਤ੍ਤ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਚਤੁਤ੍ਥਪਾਟਿਦੇਸਨੀਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ
ਪਾਟਿਦੇਸਨੀਯਵਣ੍ਣਨਾ ਨਿਟ੍ਠਿਤਾ.