ਸੇਖਿਯਕਣ੍ਡੋ

੧. ਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ

ਸੇਖਿਯੇਸੁ ਪਠਮੇ ਪਰਿਮਣ੍ਡਲਨ੍ਤਿ ਸਮਨ੍ਤਤੋ ਮਣ੍ਡਲਂ. ਸਿਕ੍ਖਾ ਕਰਣੀਯਾਤਿ ‘‘ਏਵਂ ਨਿਵਾਸੇਸ੍ਸਾਮੀ’’ਤਿ ਆਰਾਮੇਪਿ ਅਨ੍ਤਰਘਰੇਪਿ ਸਬ੍ਬਤ੍ਥ ਸਿਕ੍ਖਾ ਕਾਤਬ੍ਬਾ, ਏਤ੍ਥ ਚ ਯਸ੍ਮਾ ਵਤ੍ਤਕ੍ਖਨ੍ਧਕੇ ਵੁਤ੍ਤਵਤ੍ਤਾਨਿਪਿ ਸਿਕ੍ਖਿਤਬ੍ਬਤ੍ਤਾ ਸੇਖਿਯਾਨੇਵ ਹੋਨ੍ਤਿ, ਤਸ੍ਮਾ ਪਾਰਾਜਿਕਾਦੀਸੁ ਵਿਯ ਪਰਿਚ੍ਛੇਦੋ ਨ ਕਤੋ. ਚਾਰਿਤ੍ਤਵਿਨਯਦਸ੍ਸਨਤ੍ਥਞ੍ਚ ‘‘ਯੋ ਪਨ ਭਿਕ੍ਖੁ ਓਲਮ੍ਬੇਨ੍ਤੋ ਨਿਵਾਸੇਯ੍ਯ, ਦੁਕ੍ਕਟ’’ਨ੍ਤਿ ਏਵਂ ਆਪਤ੍ਤਿਨਾਮੇਨ ਅਵਤ੍ਵਾ ‘‘ਸਿਕ੍ਖਾ ਕਰਣੀਯਾ’’ਤਿ ਏਵਂ ਸਬ੍ਬਸਿਕ੍ਖਾਪਦੇਸੁ ਪਾਲ਼ਿ ਆਰੋਪਿਤਾ, ਪਦਭਾਜਨੇ (ਪਾਚਿ. ੫੭੬) ਪਨ ‘‘ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ ਸਬ੍ਬਤ੍ਥ ਅਨਾਦਰਿਯਕਰਣੇ ਦੁਕ੍ਕਟਂ ਵੇਦਿਤਬ੍ਬਂ.

ਇਦਾਨਿ ਪਰਿਮਣ੍ਡਲਨ੍ਤਿ ਏਤ੍ਥ ਨਾਭਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਜਾਣੁਮਣ੍ਡਲਸ੍ਸ ਹੇਟ੍ਠਾ ਜਙ੍ਘਟ੍ਠਿਕਤੋ ਪਟ੍ਠਾਯ ਅਟ੍ਠਙ੍ਗੁਲਮਤ੍ਤਂ ਨਿਵਾਸਨਂ ਓਤਾਰੇਤ੍ਵਾ ਨਿਵਾਸੇਨ੍ਤੇਨ ਪਰਿਮਣ੍ਡਲਂ ਨਿਵਤ੍ਥਂ ਨਾਮ ਹੋਤਿ, ਏਵਂ ਅਨਿਵਾਸੇਤ੍ਵਾ ਅਨਾਦਰਿਯੇਨ ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਨ੍ਤਸ੍ਸ ਦੁਕ੍ਕਟਂ. ਨ ਕੇਵਲਞ੍ਚ ਤਸ੍ਸੇਵ, ਯੇ ਚਞ੍ਞੇ ‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਗਿਹਿਨਿਵਤ੍ਥਂ ਨਿਵਾਸੇਨ੍ਤਿ, ਹਤ੍ਥਿਸੋਣ੍ਡਕਂ ਮਚ੍ਛਵਾਲਕਂ ਚਤੁਕ੍ਕਣ੍ਣਕਂ ਤਾਲਵਣ੍ਟਕਂ ਸਤਵਲਿਕਂ ਨਿਵਾਸੇਨ੍ਤਿ, ਸਂਵਲ੍ਲਿਯਂ ਨਿਵਾਸੇਨ੍ਤੀ’’ਤਿ ਖਨ੍ਧਕੇ (ਚੂਲ਼ਵ. ੨੮੦) ਨਿਵਾਸਨਦੋਸਾ ਵੁਤ੍ਤਾ, ਤਥਾ ਨਿਵਾਸੇਨ੍ਤਸ੍ਸਪਿ ਦੁਕ੍ਕਟਮੇਵ.

ਤਤ੍ਥ ਹਤ੍ਥਿਸੋਣ੍ਡਕਂ ਨਾਮ ਨਾਭਿਮੂਲਤੋ ਹਤ੍ਥਿਸੋਣ੍ਡਸਣ੍ਠਾਨਂ ਓਲਮ੍ਬਕਂ ਕਤ੍ਵਾ ਨਿਵਤ੍ਥਂ ਚੋਲ਼ਿਕਇਤ੍ਥੀਨਂ ਨਿਵਾਸਨਂ ਵਿਯ. ਮਚ੍ਛਵਾਲਕਂ ਨਾਮ ਏਕਤੋਦਸਨ੍ਤਂ ਏਕਤੋ ਪਾਸਨ੍ਤਂ ਓਲਮ੍ਬੇਤ੍ਵਾ ਨਿਵਤ੍ਥਂ. ਚਤੁਕ੍ਕਣ੍ਣਕਂ ਨਾਮ ਉਪਰਿ ਦ੍ਵੇ, ਹੇਟ੍ਠਤੋ ਦ੍ਵੇਤਿ ਏਵਂ ਚਤ੍ਤਾਰੋ ਕਣ੍ਣੇ ਦਸ੍ਸੇਤ੍ਵਾ ਨਿਵਤ੍ਥਂ. ਤਾਲਵਣ੍ਟਕਂ ਨਾਮ ਤਾਲਵਣ੍ਟਾਕਾਰੇਨ ਸਾਟਕਂ ਓਲਮ੍ਬੇਤ੍ਵਾ ਨਿਵਤ੍ਥਂ. ਸਤਵਲਿਕਂ ਨਾਮ ਦੀਘਸਾਟਕਂ ਅਨੇਕਕ੍ਖਤ੍ਤੁਂ ਓਭੁਜਿਤ੍ਵਾ ਓਵਟ੍ਟਿਕਂ ਕਰੋਨ੍ਤੇਨ ਨਿਵਤ੍ਥਂ, ਵਾਮਦਕ੍ਖਿਣਪਸ੍ਸੇਸੁ ਵਾ ਨਿਰਨ੍ਤਰਂ ਵਲਿਯੋ ਦਸ੍ਸੇਤ੍ਵਾ ਨਿਵਤ੍ਥਂ. ਸਚੇ ਪਨ ਜਾਣੁਤੋ ਪਟ੍ਠਾਯ ਏਕਾ ਵਾ ਦ੍ਵੇ ਵਾ ਵਲਿਯੋ ਪਞ੍ਞਾਯਨ੍ਤਿ, ਵਟ੍ਟਤਿ. ਸਂਵਲ੍ਲਿਯਨ੍ਤਿ ਮਲ੍ਲਕਮ੍ਮਕਾਰਾਦੀਹਿ ਵਿਯ ਕਚ੍ਛਂ ਬਨ੍ਧਿਤ੍ਵਾ ਨਿਵਤ੍ਥਂ. ਏਵਂ ਨਿਵਾਸੇਤੁਂ ਗਿਲਾਨਸ੍ਸਾਪਿ ਮਗ੍ਗਪ੍ਪਟਿਪਨ੍ਨਸ੍ਸਾਪਿ ਨ ਵਟ੍ਟਤਿ. ਯਮ੍ਪਿ ਮਗ੍ਗਂ ਗਚ੍ਛਨ੍ਤਾ ਏਕਂ ਵਾ ਦ੍ਵੇ ਵਾ ਕਣ੍ਣੇ ਉਕ੍ਖਿਪਿਤ੍ਵਾ ਅਨ੍ਤਰਵਾਸਕਸ੍ਸ ਉਪਰਿ ਲਗ੍ਗਨ੍ਤਿ, ਅਨ੍ਤੋ ਵਾ ਏਕਂ ਕਾਸਾਵਂ ਤਥਾ ਨਿਵਾਸੇਤ੍ਵਾ ਬਹਿ ਅਪਰਂ ਨਿਵਾਸੇਨ੍ਤਿ, ਸਬ੍ਬਂ ਨ ਵਟ੍ਟਤਿ.

ਗਿਲਾਨੋ ਪਨ ਅਨ੍ਤੋਕਾਸਾਵਸ੍ਸ ਓਵਟ੍ਟਿਕਂ ਦਸ੍ਸੇਤ੍ਵਾ ਅਪਰਂ ਉਪਰਿ ਨਿਵਾਸੇਤੁਂ ਲਭਤਿ, ਅਗਿਲਾਨੇਨ ਦ੍ਵੇ ਨਿਵਾਸੇਨ੍ਤੇਨ ਸਗੁਣਂ ਕਤ੍ਵਾ ਨਿਵਾਸੇਤਬ੍ਬਾਨਿ. ਇਤਿ ਇਮਂ ਖਨ੍ਧਕੇ ਪਟਿਕ੍ਖਿਤ੍ਤਞ੍ਚ ਓਲਮ੍ਬਕਞ੍ਚ ਸਬ੍ਬਂ ਵਿਵਜ੍ਜੇਤ੍ਵਾ ਵੁਤ੍ਤਲਕ੍ਖਣਸਮ੍ਪਨ੍ਨਂ ਨਿਬ੍ਬਿਕਾਰਂ ਪਰਿਮਣ੍ਡਲਂ ਨਿਵਾਸੇਤਬ੍ਬਂ, ਤਥਾ ਅਨਿਵਾਸੇਤ੍ਵਾ ਯਂਕਿਞ੍ਚਿ ਵਿਕਾਰਂ ਕਰੋਨ੍ਤਸ੍ਸ ਦੁਕ੍ਕਟਂ.

‘‘ਨਿਦਾਨਂ ਪੁਗ੍ਗਲਂ ਵਤ੍ਥੁ’’ਨ੍ਤਿਆਦਿਕੇ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ ) ਪਨ ਵਿਨਿਚ੍ਛਯੇ ਸੁਰੁਸੁਰੁਕਾਰਕਂ ਕੋਸਮ੍ਬਿਯਂ ਪਞ੍ਞਤ੍ਤਂ, ਸਾਮਿਸੇਨ ਹਤ੍ਥੇਨ ਪਾਨੀਯਥਾਲਕਸਸਿਤ੍ਥਕਪਤ੍ਤਧੋਵਨਪਟਿਸਂਯੁਤ੍ਤਦ੍ਵਯਂ ਭਗ੍ਗੇਸੁ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ, ਸੇਸਾਨਿ ਸਬ੍ਬਾਨੇਵ ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਓਲਮ੍ਬੇਤ੍ਵਾ ਨਿਵਾਸਨਾਦਿਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ. ਸੂਪੋਦਨਵਿਞ੍ਞਤ੍ਤਿਯਂ ਧਮ੍ਮਦੇਸਨਾਦੀਸੁ ਚ ਗਿਲਾਨਵਸੇਨ ਏਕਾ ਅਨੁਪਞ੍ਞਤ੍ਤਿ, ਸਬ੍ਬਾਨਿ ਸਾਧਾਰਣਪਞ੍ਞਤ੍ਤਿਯੋ, ਅਨਾਣਤ੍ਤਿਕਾਨਿ, ਸਬ੍ਬੇਸੁ ਦੁਕ੍ਕਟਮੇਵ, ਅਞ੍ਞੋ ਆਪਤ੍ਤਿਭੇਦੋ ਨਤ੍ਥਿ, ਵਿਪਤ੍ਤਿਵਿਚਾਰਣਾ ਵੁਤ੍ਤਾਯੇਵ, ਸਮੁਟ੍ਠਾਨਾਦੀਨਿ ਸਬ੍ਬੇਸਂ ਅਵਸਾਨੇ ਦਸ੍ਸਯਿਸ੍ਸਾਮ. ਅਨਾਪਤ੍ਤਿਮਤ੍ਤਂ ਪਨ ਅਙ੍ਗਞ੍ਚ ਸਬ੍ਬਤ੍ਥ ਵਤ੍ਤਬ੍ਬਂ, ਤਯਿਦਂ ਵੁਚ੍ਚਤਿ. ਇਮਸ੍ਮਿਂ ਤਾਵ ਸਿਕ੍ਖਾਪਦੇ ਅਸਞ੍ਚਿਚ੍ਚ, ਅਸ੍ਸਤਿਯਾ, ਅਜਾਨਨ੍ਤਸ੍ਸ, ਗਿਲਾਨਸ੍ਸ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ.

ਤਤ੍ਥ ਅਸਞ੍ਚਿਚ੍ਚਾਤਿ ‘‘ਅਪਰਿਮਣ੍ਡਲਂ ਨਿਵਾਸੇਸ੍ਸਾਮੀ’’ਤਿ ਏਵਂ ਅਸਞ੍ਚਿਚ੍ਚ, ਅਥ ਖੋ ‘‘ਪਰਿਮਣ੍ਡਲਂਯੇਵ ਨਿਵਾਸੇਸ੍ਸਾਮੀ’’ਤਿ ਵਿਰਜ੍ਝਿਤ੍ਵਾ ਅਪਰਿਮਣ੍ਡਲਂ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਸ੍ਸਤਿਯਾਤਿ ਅਞ੍ਞਾਵਿਹਿਤਸ੍ਸਾਪਿ ਤਥਾ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਜਾਨਨ੍ਤਸ੍ਸਾਤਿ ਪਰਿਮਣ੍ਡਲਂ ਨਿਵਾਸੇਤੁਂ ਅਜਾਨਨ੍ਤਸ੍ਸ ਅਨਾਪਤ੍ਤਿ, ਅਪਿਚ ਨਿਵਾਸਨਵਤ੍ਤਂ ਉਗ੍ਗਹੇਤਬ੍ਬਂ. ਯੋ ਪਨ ਸੁਕ੍ਖਜਙ੍ਘੋ ਵਾ ਹੋਤਿ ਮਹਾਪਿਣ੍ਡਿਕਮਂਸੋ ਵਾ, ਤਸ੍ਸ ਸਾਰੁਪ੍ਪਤ੍ਥਾਯ ਅਟ੍ਠਙ੍ਗੁਲਾਧਿਕਮ੍ਪਿ ਓਤਾਰੇਤ੍ਵਾ ਨਿਵਾਸੇਤੁਂ ਵਟ੍ਟਤਿ. ਗਿਲਾਨਸ੍ਸਾਤਿ ਯਸ੍ਸ ਜਙ੍ਘਾਯ ਵਾ ਪਾਦੇ ਵਾ ਵਣੋ ਹੋਤਿ, ਤਸ੍ਸ ਉਕ੍ਖਿਪਿਤ੍ਵਾ ਵਾ ਓਤਾਰੇਤ੍ਵਾ ਵਾ ਨਿਵਾਸੇਤੁਂ ਵਟ੍ਟਤਿ. ਆਪਦਾਸੂਤਿ ਵਾਲ਼ਾ ਵਾ ਚੋਰਾ ਵਾ ਅਨੁਬਨ੍ਧਨ੍ਤਿ, ਏਵਰੂਪਾਸੁ ਆਪਦਾਸੁ ਅਨਾਪਤ੍ਤਿ. ਉਮ੍ਮਤ੍ਤਕਾਦਯੋ ਵੁਤ੍ਤਨਯਾ ਏਵ. ਅਨਾਦਰਿਯਂ, ਅਨਾਪਤ੍ਤਿਕਾਰਣਾਭਾਵੋ, ਅਪਰਿਮਣ੍ਡਲਨਿਵਾਸਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਯਥਾ ਚੇਤ੍ਥ, ਏਵਂ ਸਬ੍ਬਤ੍ਥ ਪੁਰਿਮਾਨਿ ਦ੍ਵੇ ਤਤ੍ਥ ਤਤ੍ਥ ਵੁਤ੍ਤਪ੍ਪਟਿਪਕ੍ਖਕਰਣਞ੍ਚਾਤਿ ਤੀਣਿਯੇਵ ਹੋਨ੍ਤਿ, ਤਸ੍ਮਾ ਇਤੋ ਪਰਂ ਤਾਨਿਪਿ ਅਵਤ੍ਵਾ ਅਨਾਪਤ੍ਤਿਮਤ੍ਤਮੇਵ ਵਕ੍ਖਾਮਾਤਿ.

੨. ਦੁਤਿਯਪਰਿਮਣ੍ਡਲਸਿਕ੍ਖਾਪਦਵਣ੍ਣਨਾ

ਦੁਤਿਯੇ ‘‘ਨ, ਭਿਕ੍ਖਵੇ, ਗਿਹਿਪਾਰੁਤਂ ਪਾਰੁਪਿਤਬ੍ਬ’’ਨ੍ਤਿ (ਚੂਲ਼ਵ. ੨੮੦) ਏਵਂ ਪਟਿਕ੍ਖਿਤ੍ਤਂ ਗਿਹਿਪਾਰੁਤਂ ਅਪਾਰੁਪਿਤ੍ਵਾ ਉਭੋ ਕਣ੍ਣੇ ਸਮਂ ਕਤ੍ਵਾ ਪਾਰੁਪਨਂ ਪਰਿਮਣ੍ਡਲਪਾਰੁਪਨਂ ਨਾਮ, ਤਤ੍ਥ ਯਂਕਿਞ੍ਚਿ ਸੇਤਪਟਪਾਰੁਤਂ ਪਰਿਬ੍ਬਾਜਕਪਾਰੁਤਂ ਏਕਸਾਟਕਪਾਰੁਤਂ ਸੁਰਾਸੋਣ੍ਡਪਾਰੁਤਂ ਅਨ੍ਤੇਪੁਰਿਕਪਾਰੁਤਂ ਮਹਾਜੇਟ੍ਠਪਾਰੁਤਂ ਕੁਟਿਪ੍ਪਵੇਸਕਪਾਰੁਤਂ ਬ੍ਰਾਹ੍ਮਣਪਾਰੁਤਂ ਪਾਲ਼ਿਕਾਰਕਪਾਰੁਤਨ੍ਤਿ ਏਵਮਾਦਿ ਪਰਿਮਣ੍ਡਲਲਕ੍ਖਣਤੋ ਅਞ੍ਞਥਾ ਪਾਰੁਤਂ, ਸਬ੍ਬਮੇਤਂ ਗਿਹਿਪਾਰੁਤਂ ਨਾਮ. ਤਸ੍ਮਾ ਯਥਾ ਸੇਤਪਟਾ ਅਡ੍ਢਪਾਲਕਨਿਗਣ੍ਠਾ ਪਾਰੁਪਨ੍ਤਿ, ਯਥਾ ਚ ਏਕਚ੍ਚੇ ਪਰਿਬ੍ਬਾਜਕਾ ਉਰਂ ਵਿਵਰਿਤ੍ਵਾ ਦ੍ਵੀਸੁ ਅਂਸਕੂਟੇਸੁ ਪਾਵੁਰਣਂ ਠਪੇਨ੍ਤਿ, ਯਥਾ ਚ ਏਕਸਾਟਕਾ ਮਨੁਸ੍ਸਾ ਨਿਵਤ੍ਥਸਾਟਕਸ੍ਸ ਏਕੇਨ ਅਨ੍ਤੇਨ ਪਿਟ੍ਠਿਂ ਪਾਰੁਪਿਤ੍ਵਾ ਉਭੋ ਕਣ੍ਣੇ ਉਭੋਸੁ ਅਂਸਕੂਟੇਸੁ ਠਪੇਨ੍ਤਿ, ਯਥਾ ਚ ਸੁਰਾਸੋਣ੍ਡਾਦਯੋ ਸਾਟਕੇਨ ਗੀਵਂ ਪਰਿਕ੍ਖਿਪਿਤ੍ਵਾ ਉਭੋ ਅਨ੍ਤੇ ਉਰੇ ਵਾ ਓਲਮ੍ਬੇਨ੍ਤਿ, ਪਿਟ੍ਠਿਯਂ ਵਾ ਖਿਪਨ੍ਤਿ, ਯਥਾ ਚ ਅਨ੍ਤੇਪੁਰਿਕਾਯੋ ਅਕ੍ਖਿਤਾਰਕਮਤ੍ਤਂ ਦਸ੍ਸੇਤ੍ਵਾ ਓਗੁਣ੍ਠਿਤਂ ਪਾਰੁਪਨ੍ਤਿ, ਯਥਾ ਚ ਮਹਾਜੇਟ੍ਠਾ ਦੀਘਸਾਟਕਂ ਨਿਵਾਸੇਤ੍ਵਾ ਤਸ੍ਸੇਵ ਏਕੇਨਨ੍ਤੇਨ ਸਕਲਸਰੀਰਂ ਪਾਰੁਪਨ੍ਤਿ, ਯਥਾ ਚ ਕਸ੍ਸਕਾ ਖੇਤ੍ਤਕੁਟਿਂ ਪਵਿਸਨ੍ਤਾ ਸਾਟਕਂ ਪਲਿਵੇਠੇਤ੍ਵਾ ਉਪਕਚ੍ਛਕੇ ਪਕ੍ਖਿਪਿਤ੍ਵਾ ਤਸ੍ਸੇਵ ਏਕੇਨਨ੍ਤੇਨ ਸਰੀਰਂ ਪਾਰੁਪਨ੍ਤਿ, ਯਥਾ ਚ ਬ੍ਰਾਹ੍ਮਣਾ ਉਭਿਨ੍ਨਂ ਉਪਕਚ੍ਛਕਾਨਂ ਅਨ੍ਤਰੇ ਸਾਟਕਂ ਪਵੇਸੇਤ੍ਵਾ ਅਂਸਕੂਟੇਸੁ ਪਕ੍ਖਿਪਨ੍ਤਿ, ਯਥਾ ਚ ਪਾਲ਼ਿਕਾਰਕੋ ਭਿਕ੍ਖੁ ਏਕਂਸਪਾਰੁਪਨੇਨ ਪਾਰੁਤਂ ਵਾਮਬਾਹੁਂ ਵਿਵਰਿਤ੍ਵਾ ਚੀਵਰਂ ਅਂਸਕੂਟੇ ਆਰੋਪੇਤਿ, ਏਵਂ ਅਪਾਰੁਪਿਤ੍ਵਾ ਸਬ੍ਬੇਪਿ ਏਤੇ, ਅਞ੍ਞੇ ਚ ਏਵਰੂਪੇ ਪਾਰੁਪਨਦੋਸੇ ਵਜ੍ਜੇਤ੍ਵਾ ਨਿਬ੍ਬਿਕਾਰਂ ਪਰਿਮਣ੍ਡਲਂ ਪਾਰੁਪਿਤਬ੍ਬਂ. ਤਥਾ ਅਪਾਰੁਪਿਤ੍ਵਾ ਆਰਾਮੇ ਵਾ ਅਨ੍ਤਰਘਰੇ ਵਾ ਅਨਾਦਰੇਨ ਯਂਕਿਞ੍ਚਿ ਵਿਕਾਰਂ ਕਰੋਨ੍ਤਸ੍ਸ ਦੁਕ੍ਕਟਂ, ਅਨਾਪਤ੍ਤਿ ਪੁਰਿਮਸਦਿਸਾਯੇਵ, ਯਥਾ ਚੇਤ੍ਥ, ਏਵਂ ਸਬ੍ਬਤ੍ਥ. ਯਤ੍ਥ ਪਨ ਵਿਸੇਸੋ ਭਵਿਸ੍ਸਤਿ, ਤਤ੍ਥ ਵਕ੍ਖਾਮਾਤਿ.

੩-੪. ਸੁਪ੍ਪਟਿਚ੍ਛਨ੍ਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਸੁਪ੍ਪਟਿਚ੍ਛਨ੍ਨੋਤਿ ਸੁਟ੍ਠੁ ਪਟਿਚ੍ਛਨ੍ਨੋ, ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਅਨੁਵਾਤਨ੍ਤੇਨ ਗੀਵਂ ਪਟਿਚ੍ਛਾਦੇਤ੍ਵਾ ਉਭੋ ਕਣ੍ਣੇ ਸਮਂ ਕਤ੍ਵਾ ਪਟਿਸਙ੍ਘਰਿਤ੍ਵਾ ਯਾਵ ਮਣਿਬਨ੍ਧਂ ਪਟਿਚ੍ਛਾਦੇਤ੍ਵਾ ਅਨ੍ਤਰਘਰੇ ਗਮਿਸ੍ਸਾਮੀਤਿ ਅਤ੍ਥੋ, ਤਥਾ ਅਕਤ੍ਵਾ ਪਨ ਜਾਣੁਂ ਵਾ ਉਰਂ ਵਾ ਵਿਵਰਿਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਂ.

ਚਤੁਤ੍ਥੇ ਗਲਵਾਟਕਤੋ ਪਟ੍ਠਾਯ ਸੀਸਂ, ਮਣਿਬਨ੍ਧਤੋ ਪਟ੍ਠਾਯ ਹਤ੍ਥੇ, ਪਿਣ੍ਡਿਕਮਂਸਤੋ ਪਟ੍ਠਾਯ ਪਾਦੇ ਵਿਵਰਿਤ੍ਵਾ ਸੇਸਂ ਛਾਦੇਤ੍ਵਾ ਨਿਸਿਨ੍ਨੋ ਸੁਪ੍ਪਟਿਚ੍ਛਨ੍ਨੋ ਨਾਮ ਹੋਤਿ, ਏਤ੍ਥ ਪਨ ਵਾਸੂਪਗਤਸ੍ਸ ਅਨਾਪਤ੍ਤਿ.

੫-੬. ਸੁਸਂਵੁਤਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਸੁਸਂਵੁਤੋਤਿ ਹਤ੍ਥਂ ਵਾ ਪਾਦਂ ਵਾ ਅਕੀਲ਼ਾਪੇਨ੍ਤੋ ਸੁਵਿਨੀਤੋਤਿ ਅਤ੍ਥੋ. ਛਟ੍ਠੇਪਿ ਏਸੇਵ ਨਯੋ.

੭-੮. ਓਕ੍ਖਿਤ੍ਤਚਕ੍ਖੁਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਓਕ੍ਖਿਤ੍ਤਚਕ੍ਖੂਤਿ ਹੇਟ੍ਠਾ ਖਿਤ੍ਤਚਕ੍ਖੁ ਹੁਤ੍ਵਾ ਪੁਰਤੋ ਯੁਗਮਤ੍ਤਂ ਭੂਮਿਭਾਗਂ ਪੇਕ੍ਖਮਾਨੋ, ਏਕਸ੍ਮਿਂ ਪਨ ਠਾਨੇ ਠਤ੍ਵਾ ਹਤ੍ਥਿਅਸ੍ਸਾਦਿਪਰਿਸ੍ਸਯਾਭਾਵਂ ਓਲੋਕੇਤੁਂ ਵਟ੍ਟਤਿ. ਅਟ੍ਠਮੇਪਿ ਏਸੇਵ ਨਯੋ.

੯-੧੦. ਉਕ੍ਖਿਤ੍ਤਕਸਿਕ੍ਖਾਪਦਵਣ੍ਣਨਾ

ਨਵਮੇ ਉਕ੍ਖਿਤ੍ਤਕਾਯਾਤਿ ਉਕ੍ਖੇਪੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ, ਏਕਤੋ ਵਾ ਉਭਤੋ ਵਾ ਉਕ੍ਖਿਤ੍ਤਚੀਵਰੋ ਹੁਤ੍ਵਾਤਿ ਅਤ੍ਥੋ, ਅਨ੍ਤੋ ਇਨ੍ਦਖੀਲਤੋ ਪਟ੍ਠਾਯ ਏਵਂ ਨ ਗਨ੍ਤਬ੍ਬਂ.

ਦਸਮੇ ਨਿਸਿਨ੍ਨਕਾਲੇ ਧਮਕਰਣਂ ਨੀਹਰਨ੍ਤੇਨਾਪਿ ਚੀਵਰਂ ਅਨੁਕ੍ਖਿਪਿਤ੍ਵਾਵ ਨੀਹਰਿਤਬ੍ਬਂ, ਵਾਸੂਪਗਤਸ੍ਸ ਪਨ ਅਨਾਪਤ੍ਤਿ.

੧੧-੧੨. ਉਜ੍ਜਗ੍ਘਿਕਸਿਕ੍ਖਾਪਦਵਣ੍ਣਨਾ

ਏਕਾਦਸਮੇ ਉਜ੍ਜਗ੍ਘਿਕਾਯਾਤਿ ਮਹਾਹਸਿਤਂ ਹਸਨ੍ਤੋਤਿ ਅਤ੍ਥੋ. ਇਧਾਪਿ ਹਿ ਇਤ੍ਥਮ੍ਭੂਤਲਕ੍ਖਣੇਯੇਵ ਕਰਣਵਚਨਂ.

ਦ੍ਵਾਦਸਮੇਪਿ ਏਸੇਵ ਨਯੋ. ਉਭਯਤ੍ਥ ਹਸਨੀਯਸ੍ਮਿਂ ਵਤ੍ਥੁਸ੍ਮਿਂ ਮਿਹਿਤਮਤ੍ਤਂ ਕਰੋਨ੍ਤਸ੍ਸ ਅਨਾਪਤ੍ਤਿ.

੧੩-੧੪. ਉਚ੍ਚਸਦ੍ਦਸਿਕ੍ਖਾਪਦਵਣ੍ਣਨਾ

ਤੇਰਸਮੇ ਅਪ੍ਪਸਦ੍ਦੋਤਿ ਨ ਉਚ੍ਚਾਸਦ੍ਦਮਹਾਸਦ੍ਦੋ ਹੁਤ੍ਵਾ. ਚੁਦ੍ਦਸਮੇਪਿ ਏਸੇਵ ਨਯੋ. ਅਯਂ ਪਨੇਤ੍ਥ ਅਪ੍ਪਸਦ੍ਦਤਾਪਰਿਚ੍ਛੇਦੋ – ਸਚੇ ਦ੍ਵਾਦਸਹਤ੍ਥੇ ਗੇਹੇ ਆਦਿਮ੍ਹਿ ਸਙ੍ਘਤ੍ਥੇਰੋ, ਮਜ੍ਝੇ ਦੁਤਿਯਤ੍ਥੇਰੋ, ਅਨ੍ਤੇ ਤਤਿਯਤ੍ਥੇਰੋਤਿ ਏਵਂ ਨਿਸਿਨ੍ਨੇਸੁ ਯਂ ਸਙ੍ਘਤ੍ਥੇਰੋ ਦੁਤਿਯਤ੍ਥੇਰੇਨ ਸਦ੍ਧਿਂ ਮਨ੍ਤੇਤਿ, ਦੁਤਿਯਤ੍ਥੇਰੋ ਚ ਤਸ੍ਸ ਸਦ੍ਦਂ ਸੁਣਾਤਿ, ਕਥਞ੍ਚ ਵਵਤ੍ਥਪੇਤਿ. ਤਤਿਯਤ੍ਥੇਰੋ ਪਨ ਸਦ੍ਦਮੇਵ ਸੁਣਾਤਿ, ਕਥਂ ਨ ਵਵਤ੍ਥਪੇਤਿ, ਏਤ੍ਤਾਵਤਾ ਅਪ੍ਪਸਦ੍ਦੋ ਹੋਤਿ. ਸਚੇ ਪਨ ਤਤਿਯਤ੍ਥੇਰੋ ਕਥਞ੍ਚ ਵਵਤ੍ਥਪੇਤਿ, ਮਹਾਸਦ੍ਦੋ ਨਾਮ ਹੋਤਿ.

੧੫…ਪੇ…੨੦. ਕਾਯਪ੍ਪਚਾਲਕਾਦਿਸਿਕ੍ਖਾਪਦਵਣ੍ਣਨਾ

ਇਤੋ ਪਰੇਸੁ ਛਸੁ ਕਾਯਪ੍ਪਚਾਲਕਨ੍ਤਿ ਕਾਯਂ ਚਾਲੇਤ੍ਵਾ ਚਾਲੇਤ੍ਵਾ, ਏਸ ਨਯੋ ਸਬ੍ਬਤ੍ਥ. ਤਸ੍ਮਾ ਕਾਯਾਦੀਨਿ ਪਗ੍ਗਹੇਤ੍ਵਾ ਨਿਚ੍ਚਲਾਨਿ ਉਜੁਕਾਨਿ ਠਪੇਤ੍ਵਾ ਗਨ੍ਤਬ੍ਬਞ੍ਚੇਵ ਨਿਸੀਦਿਤਬ੍ਬਞ੍ਚ, ਨਿਸੀਦਨਪ੍ਪਟਿਸਂਯੁਤ੍ਤੇਸੁ ਤੀਸੁ ਵਾਸੂਪਗਤਸ੍ਸ ਅਨਾਪਤ੍ਤਿ.

੨੧-੨੨. ਖਮ੍ਭਕਤਸਿਕ੍ਖਾਪਦਵਣ੍ਣਨਾ

ਏਕਵੀਸਦ੍ਵਾਵੀਸੇਸੁ ਖਮ੍ਭਕਤੋਤਿ ਕਟਿਯਂ ਹਤ੍ਥਂ ਠਪੇਤ੍ਵਾ ਕਤਖਮ੍ਭੋ.

੨੩-੨੪. ਓਗੁਣ੍ਠਿਤਸਿਕ੍ਖਾਪਦਵਣ੍ਣਨਾ

ਤੇਵੀਸਚਤੁਵੀਸੇਸੁ ਓਗੁਣ੍ਠਿਤੋਤਿ ਸਸੀਸਂ ਪਾਰੁਤੋ.

੨੫. ਉਕ੍ਕੁਟਿਕਸਿਕ੍ਖਾਪਦਵਣ੍ਣਨਾ

ਪਞ੍ਚਵੀਸੇ ਉਕ੍ਕੁਟਿਕਾ ਵੁਚ੍ਚਤਿ ਪਣ੍ਹਿਯੋ ਉਕ੍ਖਿਪਿਤ੍ਵਾ ਅਗ੍ਗਪਾਦੇਹੇਵ, ਅਗ੍ਗਪਾਦੇ ਵਾ ਉਕ੍ਖਿਪਿਤ੍ਵਾ ਪਣ੍ਹੀਹਿਯੇਵ ਭੂਮਿਯਂ ਫੁਸਨ੍ਤਸ੍ਸ ਗਮਨਂ, ਕਰਣਵਚਨਂ ਪਨੇਤ੍ਥ ਵੁਤ੍ਤਲਕ੍ਖਣਮੇਵ.

੨੬. ਪਲ੍ਲਤ੍ਥਿਕਸਿਕ੍ਖਾਪਦਵਣ੍ਣਨਾ

ਛਬ੍ਬੀਸੇ ਨ ਪਲ੍ਲਤ੍ਥਿਕਾਯਾਤਿ ਹਤ੍ਥਪਲ੍ਲਤ੍ਥਿਕਾਯ ਵਾ ਦੁਸ੍ਸਪਲ੍ਲਤ੍ਥਿਕਾਯ ਵਾ ਨ ਨਿਸੀਦਿਤਬ੍ਬਂ. ਅਨਾਦਰੇਨ ਨਿਸੀਦਨ੍ਤਸ੍ਸ ਦੁਕ੍ਕਟਂ, ਵਾਸੂਪਗਤਸ੍ਸ ਪਨ ਇਧਾਪਿ ਪੁਰਿਮੇਸੁ ਚ ਦ੍ਵਾਵੀਸਚਤੁਵੀਸੇਸੁ ਅਨਾਪਤ੍ਤਿ.

ਛਬ੍ਬੀਸਤਿਸਾਰੁਪ੍ਪਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੭. ਸਕ੍ਕਚ੍ਚਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

ਭੋਜਨਪ੍ਪਟਿਸਂਯੁਤ੍ਤੇਸੁ ਪਠਮੇ ਸਕ੍ਕਚ੍ਚਨ੍ਤਿ ਸਤਿਂ ਉਪਟ੍ਠਾਪੇਤ੍ਵਾ.

੨੮. ਪਤ੍ਤਸਞ੍ਞੀਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਪਤ੍ਤੇ ਸਞ੍ਞਾ ਪਤ੍ਤਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਪਤ੍ਤਸਞ੍ਞੀ, ਅਤ੍ਤਨੋ ਭਾਜਨੇ ਉਪਨਿਬਦ੍ਧਸਞ੍ਞੀ ਹੁਤ੍ਵਾਤਿ ਅਤ੍ਥੋ.

੨੯. ਸਮਸੂਪਕਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

ਤਤਿਯੇ ਸਮਸੂਪਕੋ ਨਾਮ ਯਤ੍ਥ ਮੁਗ੍ਗਮਾਸੇਹਿ ਵਾ ਕੁਲਤ੍ਥਾਦੀਹਿ ਵਾ ਕਤੋ ਹਤ੍ਥਹਾਰਿਯੋ ਸੂਪੋ ਭਤ੍ਤਸ੍ਸ ਚਤੁਤ੍ਥਭਾਗਪ੍ਪਮਾਣੋ ਹੋਤਿ, ਤਤੋ ਹਿ ਅਧਿਕਂ ਗਣ੍ਹਨ੍ਤਸ੍ਸ ਦੁਕ੍ਕਟਂ. ਠਪੇਤ੍ਵਾ ਪਨ ਸੂਪਂ ਅਵਸੇਸਾ ਸਬ੍ਬਾਪਿ ਸੂਪੇਯ੍ਯਬ੍ਯਞ੍ਜਨਵਿਕਤਿ ਰਸਰਸੋ ਨਾਮ ਹੋਤਿ, ਤਸ੍ਮਿਂ ਰਸਰਸੇ, ਞਾਤਕਾਨਂ ਵਾ ਪਵਾਰਿਤਾਨਂ ਵਾ ਅਞ੍ਞਸ੍ਸਤ੍ਥਾਯ ਵਾ ਅਤ੍ਤਨੋ ਧਨੇਨ ਵਾ ਇਧ ਅਨਾਪਤ੍ਤਿ.

੩੦…ਪੇ…੩੨. ਸਮਤਿਤ੍ਤਿਕਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਸਮਤਿਤ੍ਤਿਕਨ੍ਤਿ ਸਮਪੁਣ੍ਣਂ ਸਮਭਰਿਤਂ ਅਧਿਟ੍ਠਾਨੁਪਗਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਂ ਅਨਤਿਕ੍ਕਮਿਤ੍ਵਾ ਰਚਿਤਂ. ਪਿਣ੍ਡਪਾਤਨ੍ਤਿ ਯਂਕਿਞ੍ਚਿ ਯਾਵਕਾਲਿਕਂ. ਅਨਧਿਟ੍ਠਾਨੁਪਗੇ ਪਨ ਯਾਵਕਾਲਿਕਂ ਯਾਮਕਾਲਿਕਾਦੀਨਿ ਚ ਯਤ੍ਥਕਤ੍ਥਚਿ ਥੂਪੀਕਤਾਨਿਪਿ ਵਟ੍ਟਨ੍ਤਿ, ਯਂ ਪਨ ਦ੍ਵੀਸੁ ਪਤ੍ਤੇਸੁ ਗਹੇਤ੍ਵਾ ਏਕਂ ਪੂਰੇਤ੍ਵਾ ਵਿਹਾਰਂ ਹਰਤਿ, ਯਂ ਵਾ ਪਕ੍ਖਿਪਿਯਮਾਨਂ ਪੂਵਉਚ੍ਛੁਕ੍ਖਣ੍ਡਫਲਾਫਲਾਦਿ ਹੇਟ੍ਠਾ ਓਰੋਹਤਿ, ਤਕ੍ਕੋਲਵਟਂਸਕਾਦਯੋ ਵਾ ਉਪਰਿ ਠਪੇਤ੍ਵਾ ਦਿਯ੍ਯਨ੍ਤਿ, ਯਞ੍ਚ ਪਣ੍ਣੇ ਵਾ ਥਾਲਕੇ ਵਾ ਪਕ੍ਖਿਪਿਤ੍ਵਾ ਪਤ੍ਤਮਤ੍ਥਕੇ ਠਪਿਤਂ ਹੋਤਿ, ਨ ਤਂ ਥੂਪੀਕਤਂ ਨਾਮ, ਤਸ੍ਮਾ ਤਂ ਸਬ੍ਬਂ ਵਟ੍ਟਤਿ. ਇਧ ਪਨ ਗਿਲਾਨਸ੍ਸਾਪਿ ਅਨਾਪਤ੍ਤਿ ਨਤ੍ਥਿ, ਤਸ੍ਮਾ ਤੇਨਪਿ ਸਮਤਿਤ੍ਤਿਕੋਯੇਵ ਗਹੇਤਬ੍ਬੋ. ਸਬ੍ਬਤ੍ਥ ਪਨ ਪਟਿਗ੍ਗਹੇਤੁਮੇਵ ਨ ਵਟ੍ਟਤਿ, ਪਟਿਗ੍ਗਹਿਤਂ ਪਨ ਸੁਪ੍ਪਟਿਗ੍ਗਹਿਤਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਪਞ੍ਚਮਛਟ੍ਠਾਨਿ ਵੁਤ੍ਤਨਯਾਨੇਵ.

੩੩-੩੪. ਸਪਦਾਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਸਪਦਾਨਨ੍ਤਿ ਤਤ੍ਥ ਤਤ੍ਥ ਓਧਿਂ ਅਕਤ੍ਵਾ ਅਨੁਪਟਿਪਾਟਿਯਾ. ਯੋ ਪਨ ਅਞ੍ਞੇਸਂ ਵਾ ਦੇਨ੍ਤੋ, ਅਞ੍ਞਭਾਜਨੇ ਵਾ ਆਕਿਰਨ੍ਤੋ ਤਤੋ ਤਤੋ ਓਮਸਤਿ, ਤਸ੍ਸ, ਉਤ੍ਤਰਿਭਙ੍ਗਞ੍ਚ ਉਪ੍ਪਟਿਪਾਟਿਯਾ ਗਣ੍ਹਨ੍ਤਸ੍ਸਾਪਿ ਇਧ ਅਨਾਪਤ੍ਤਿ. ਅਟ੍ਠਮਂ ਵੁਤ੍ਤਨਯਮੇਵ.

੩੫. ਥੂਪਕਤਸਿਕ੍ਖਾਪਦਵਣ੍ਣਨਾ

ਨਵਮੇ ਥੂਪਕਤੋਤਿ ਮਤ੍ਥਕਤੋ ਵੇਮਜ੍ਝਤੋਤਿ ਅਤ੍ਥੋ. ਯੋ ਪਨ ਪਰਿਤ੍ਤਕੇ ਸੇਸੇ ਏਕਤੋ ਸਙ੍ਕਡ੍ਢਿਤ੍ਵਾ ਓਮਦ੍ਦਿਤ੍ਵਾ ਭੁਞ੍ਜਤਿ, ਤਸ੍ਸਾਪਿ ਅਨਾਪਤ੍ਤਿ.

੩੬. ਓਦਨਪ੍ਪਟਿਚ੍ਛਾਦਨਸਿਕ੍ਖਾਪਦਵਣ੍ਣਨਾ

ਦਸਮੇ ਯਸ੍ਸ ਭਤ੍ਤਸਾਮਿਕਾ ਮਾਘਾਤਸਮਯਾਦੀਸੁ ਬ੍ਯਞ੍ਜਨਂ ਪਟਿਚ੍ਛਾਦੇਤ੍ਵਾ ਦੇਨ੍ਤਿ, ਯੋ ਚ ਨ ਭਿਯ੍ਯੋਕਮ੍ਯਤਾਯ ਪਟਿਚ੍ਛਾਦੇਤਿ, ਤੇਸਂ ਅਨਾਪਤ੍ਤਿ, ਗਿਲਾਨਸ੍ਸ ਪਨ ਅਨਾਗਤਤ੍ਤਾ ਆਪਤ੍ਤਿਯੇਵ.

੩੭. ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

ਏਕਾਦਸਮੇ ਞਾਤਕਾਨਂ ਵਾ ਪਵਾਰਿਤਾਨਂ ਵਾ ਅਞ੍ਞਸ੍ਸਤ੍ਥਾਯ ਅਤ੍ਤਨੋ ਧਨੇਨਾਤਿ ਇਦਂ ਅਨਾਪਤ੍ਤਿਯਂ ਅਧਿਕਂ.

੩੮. ਉਜ੍ਝਾਨਸਞ੍ਞੀਸਿਕ੍ਖਾਪਦਵਣ੍ਣਨਾ

ਦ੍ਵਾਦਸਮੇ ਉਜ੍ਝਾਨੇ ਸਞ੍ਞਾ ਉਜ੍ਝਾਨਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਉਜ੍ਝਾਨਸਞ੍ਞੀ. ਇਧਾਪਿ ਗਿਲਾਨੋ ਨ ਮੁਚ੍ਚਤਿ, ‘‘ਦਸ੍ਸਾਮੀ’’ਤਿ ਵਾ, ‘‘ਦਾਪੇਸ੍ਸਾਮੀ’’ਤਿ ਵਾ ਓਲੋਕੇਨ੍ਤਸ੍ਸ ਪਨ, ਨ ਉਜ੍ਝਾਨਸਞ੍ਞਿਸ੍ਸ ਚ ਅਨਾਪਤ੍ਤਿ.

੩੯. ਕਬਲ਼ਸਿਕ੍ਖਾਪਦਵਣ੍ਣਨਾ

ਤੇਰਸਮੇ ਨਾਤਿਮਹਨ੍ਤਨ੍ਤਿ ਮਯੂਰਣ੍ਡਂ ਅਤਿਮਹਨ੍ਤਂ, ਕੁਕ੍ਕੁਟਣ੍ਡਂ ਅਤਿਖੁਦ੍ਦਕਂ, ਤੇਸਂ ਵੇਮਜ੍ਝਪ੍ਪਮਾਣਂ. ਮੂਲਖਾਦਨੀਯਾਦਿਭੇਦੇ ਪਨ ਸਬ੍ਬਖਜ੍ਜਕੇ ਫਲਾਫਲੇ ਚ ਅਨਾਪਤ੍ਤਿ.

੪੦. ਆਲੋਪਸਿਕ੍ਖਾਪਦਵਣ੍ਣਨਾ

ਚੁਦ੍ਦਸਮੇ ਪਰਿਮਣ੍ਡਲਨ੍ਤਿ ਅਦੀਘਂ. ਇਧ ਪਨ ਖਜ੍ਜਕਫਲਾਫਲੇਹਿ ਸਦ੍ਧਿਂ ਉਤ੍ਤਰਿਭਙ੍ਗੇਪਿ ਅਨਾਪਤ੍ਤਿ.

੪੧-੪੨. ਅਨਾਹਟਸਿਕ੍ਖਾਪਦਵਣ੍ਣਨਾ

ਪਨ੍ਨਰਸਮੇ ਅਨਾਹਟੇਤਿ ਅਨਾਹਰਿਤੇ, ਮੁਖਦ੍ਵਾਰਂ ਅਸਮ੍ਪਤ੍ਤੇਤਿ ਅਤ੍ਥੋ. ਸੋਲ਼ਸਮੇ ਸਬ੍ਬਹਤ੍ਥਨ੍ਤਿ ਸਕਲਂ ਹਤ੍ਥਂ.

੪੩. ਸਕਬਲ਼ਸਿਕ੍ਖਾਪਦਵਣ੍ਣਨਾ

ਸਤ੍ਤਰਸਮੇ ਸਕਬਲ਼ੇਨਾਤਿ ਏਤ੍ਥ ਯਤ੍ਤਕੇਨ ਵਚਨਂ ਅਪਰਿਪੁਣ੍ਣਂ ਹੋਤਿ, ਤਤ੍ਤਕੇ ਸਤਿ ਕਥੇਨ੍ਤਸ੍ਸ ਆਪਤ੍ਤਿ. ਯੋ ਪਨ ਧਮ੍ਮਂ ਕਥੇਨ੍ਤੋ ਹਰਿਟਕਾਦੀਨਿ ਮੁਖੇ ਪਕ੍ਖਿਪਿਤ੍ਵਾ ਕਥੇਤਿ, ਯਤ੍ਤਕੇਨ ਵਚਨਂ ਅਪਰਿਪੁਣ੍ਣਂ ਨ ਹੋਤਿ, ਤਤ੍ਤਕੇ ਮੁਖਮ੍ਹਿ ਸਤਿ ਵਟ੍ਟਤਿ.

੪੪. ਪਿਣ੍ਡੁਕ੍ਖੇਪਕਸਿਕ੍ਖਾਪਦਵਣ੍ਣਨਾ

ਅਟ੍ਠਾਰਸਮੇ ਪਿਣ੍ਡੁਕ੍ਖੇਪਕਨ੍ਤਿ ਪਿਣ੍ਡਂ ਉਕ੍ਖਿਪਿਤ੍ਵਾ ਉਕ੍ਖਿਪਿਤ੍ਵਾ, ਇਧਾਪਿ ਖਜ੍ਜਕਫਲਾਫਲੇਸੁ ਅਨਾਪਤ੍ਤਿ.

੪੫. ਕਬਲ਼ਾਵਚ੍ਛੇਦਕਸਿਕ੍ਖਾਪਦਵਣ੍ਣਨਾ

ਏਕੂਨਵੀਸਤਿਮੇ ਕਬਲ਼ਾਵਚ੍ਛੇਦਕਨ੍ਤਿ ਕਬਲ਼ਂ ਅਵਚ੍ਛਿਨ੍ਦਿਤ੍ਵਾ ਅਵਚ੍ਛਿਨ੍ਦਿਤ੍ਵਾ, ਇਧ ਖਜ੍ਜਕਫਲਾਫਲੇਹਿ ਸਦ੍ਧਿਂ ਉਤ੍ਤਰਿਭਙ੍ਗੇਪਿ ਅਨਾਪਤ੍ਤਿ.

੪੬. ਅਵਗਣ੍ਡਕਾਰਕਸਿਕ੍ਖਾਪਦਵਣ੍ਣਨਾ

ਵੀਸਤਿਮੇ ਅਵਗਣ੍ਡਕਾਰਕਨ੍ਤਿ ਮਕ੍ਕਟੋ ਵਿਯ ਗਣ੍ਡੇ ਕਤ੍ਵਾ ਕਤ੍ਵਾ, ਇਧ ਫਲਾਫਲਮਤ੍ਤਕੇ ਅਨਾਪਤ੍ਤਿ.

੪੭. ਹਤ੍ਥਨਿਦ੍ਧੁਨਕਸਿਕ੍ਖਾਪਦਵਣ੍ਣਨਾ

ਏਕਵੀਸਤਿਮੇ ਹਤ੍ਥਨਿਦ੍ਧੁਨਕਨ੍ਤਿ ਹਤ੍ਥਂ ਨਿਦ੍ਧੁਨਿਤ੍ਵਾ ਨਿਦ੍ਧੁਨਿਤ੍ਵਾ, ਅਨਾਪਤ੍ਤਿਯਂ ਪਨੇਤ੍ਥ ‘‘ਕਚਵਰਂ ਛਡ੍ਡੇਨ੍ਤੋ ਹਤ੍ਥਂ ਨਿਦ੍ਧੁਨਾਤੀ’’ਤਿ (ਪਾਚਿ. ੬੨੩) ਇਦਂ ਅਧਿਕਂ.

੪੮. ਸਿਤ੍ਥਾਵਕਾਰਕਸਿਕ੍ਖਾਪਦਵਣ੍ਣਨਾ

ਦ੍ਵਾਵੀਸਤਿਮੇ ਸਿਤ੍ਥਾਵਕਾਰਕਨ੍ਤਿ ਸਿਤ੍ਥਾਨਿ ਅਵਕਿਰਿਤ੍ਵਾ ਅਵਕਿਰਿਤ੍ਵਾ, ਇਧਾਪਿ ‘‘ਕਚਵਰਂ ਛਡ੍ਡੇਨ੍ਤੋ ਸਿਤ੍ਥਂ ਛਡ੍ਡਯਤੀ’’ਤਿ (ਪਾਚਿ. ੬੨੩) ਇਦਂ ਅਨਾਪਤ੍ਤਿਯਂ ਅਧਿਕਂ.

੪੯. ਜਿਵ੍ਹਾਨਿਚ੍ਛਾਰਕਸਿਕ੍ਖਾਪਦਵਣ੍ਣਨਾ

ਤੇਵੀਸਤਿਮੇ ਜਿਵ੍ਹਾਨਿਚ੍ਛਾਰਕਨ੍ਤਿ ਜਿਵ੍ਹਂ ਨਿਚ੍ਛਾਰੇਤ੍ਵਾ ਨਿਚ੍ਛਾਰੇਤ੍ਵਾ.

੫੦-੫੧. ਚਪੁਚਪੁਕਾਰਕਸਿਕ੍ਖਾਪਦਵਣ੍ਣਨਾ

ਚਤੁਵੀਸਤਿਮੇ ਚਪੁਚਪੁਕਾਰਕਨ੍ਤਿ ਚਪੁ ਚਪੂਤਿ ਏਵਂ ਸਦ੍ਦਂ ਕਤ੍ਵਾ ਕਤ੍ਵਾ. ਪਞ੍ਚਵੀਸਤਿਮੇਪਿ ਏਸੇਵ ਨਯੋ.

੫੨…ਪੇ…੫੪. ਹਤ੍ਥਨਿਲ੍ਲੇਹਕਾਦਿਸਿਕ੍ਖਾਪਦਵਣ੍ਣਨਾ

ਛਬ੍ਬੀਸਤਿਮੇ ਹਤ੍ਥਨਿਲ੍ਲੇਹਕਨ੍ਤਿ ਹਤ੍ਥਂ ਨਿਲ੍ਲੇਹਿਤ੍ਵਾ ਨਿਲ੍ਲੇਹਿਤ੍ਵਾ. ਭੁਞ੍ਜਨ੍ਤੇਨ ਹਿ ਅਙ੍ਗੁਲਿਮਤ੍ਤਮ੍ਪਿ ਨਿਲ੍ਲੇਹਿਤੁਂ ਨ ਵਟ੍ਟਤਿ. ਘਨਯਾਗੁਫਾਣਿਤਪਾਯਾਸਾਦਿਕੇ ਪਨ ਅਙ੍ਗੁਲੀਹਿ ਗਹੇਤ੍ਵਾ ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ, ਸਤ੍ਤਵੀਸਤਿਮਅਟ੍ਠਵੀਸਤਿਮੇਸੁਪਿ ਏਸੇਵ ਨਯੋ. ਤਸ੍ਮਾ ਏਕਙ੍ਗੁਲਿਯਾਪਿ ਪਤ੍ਤੋ ਨ ਨਿਲ੍ਲੇਹਿਤਬ੍ਬੋ, ਏਕਓਟ੍ਠੋਪਿ ਚ ਜਿਵ੍ਹਾਯ ਨ ਨਿਲ੍ਲੇਹਿਤਬ੍ਬੋ, ਓਟ੍ਠਮਂਸੇਹਿ ਏਵ ਪਨ ਗਹੇਤ੍ਵਾ ਅਨ੍ਤੋ ਪਵੇਸੇਤੁਂ ਵਟ੍ਟਤਿ.

੫੫. ਸਾਮਿਸਸਿਕ੍ਖਾਪਦਵਣ੍ਣਨਾ

ਏਕੂਨਤਿਂਸਤਿਮੇ ਨ ਸਾਮਿਸੇਨਾਤਿ ਏਤਂ ਪਟਿਕੂਲਵਸੇਨ ਪਟਿਕ੍ਖਿਤ੍ਤਂ, ਤਸ੍ਮਾ ਸਙ੍ਘਿਕਮ੍ਪਿ ਪੁਗ੍ਗਲਿਕਮ੍ਪਿ ਗਿਹਿਸਨ੍ਤਕਮ੍ਪਿ ਅਤ੍ਤਨੋ ਸਨ੍ਤਕਮ੍ਪਿ ਸਙ੍ਖੋਪਿ ਸਰਾਵਕਮ੍ਪਿ ਥਾਲਕਮ੍ਪਿ ਨ ਗਹੇਤਬ੍ਬਮੇਵ, ਗਣ੍ਹਨ੍ਤਸ੍ਸ ਦੁਕ੍ਕਟਂ. ਸਚੇ ਪਨ ਹਤ੍ਥਸ੍ਸ ਏਕਦੇਸੋ ਆਮਿਸਮਕ੍ਖਿਤੋ ਨ ਹੋਤਿ, ਤੇਨ ਪਦੇਸੇਨ ਗਹੇਤੁਂ ਵਟ੍ਟਤਿ, ਇਧ ‘‘ਧੋਵਿਸ੍ਸਾਮੀਤਿ ਵਾ, ਧੋਵਾਪੇਸ੍ਸਾਮੀਤਿ ਵਾ ਪਟਿਗ੍ਗਣ੍ਹਾਤੀ’’ਤਿ (ਪਾਚਿ. ੬੩੧) ਇਦਂ ਅਨਾਪਤ੍ਤਿਯਂ ਅਧਿਕਂ.

੫੬. ਸਸਿਤ੍ਥਕਸਿਕ੍ਖਾਪਦਵਣ੍ਣਨਾ

ਤਿਂਸਤਿਮੇ ‘‘ਉਦ੍ਧਰਿਤ੍ਵਾ ਵਾ ਭਿਨ੍ਦਿਤ੍ਵਾ ਵਾ ਪਟਿਗ੍ਗਹੇ ਵਾ ਨੀਹਰਿਤ੍ਵਾ ਵਾ ਛਡ੍ਡੇਤੀ’’ਤਿ ਇਦਂ ਅਨਾਪਤ੍ਤਿਯਂ ਅਧਿਕਂ. ਤਤ੍ਥ ਉਦ੍ਧਰਿਤ੍ਵਾ ਵਾਤਿ ਸਿਤ੍ਥਾਨਿ ਉਦਕਤੋ ਉਦ੍ਧਰਿਤ੍ਵਾ, ਏਕਸ੍ਮਿਂ ਠਾਨੇ ਰਾਸਿਂ ਕਤ੍ਵਾ ਉਦਕਂ ਛਡ੍ਡੇਤਿ. ਭਿਨ੍ਦਿਤ੍ਵਾ ਵਾਤਿ ਸਿਤ੍ਥਾਨਿ ਭਿਨ੍ਦਿਤ੍ਵਾ ਉਦਕਗਤਿਕਾਨਿ ਕਤ੍ਵਾ ਛਡ੍ਡੇਤਿ. ਪਟਿਗ੍ਗਹੇ ਵਾਤਿ ਪਟਿਗ੍ਗਹੇਨ ਪਟਿਚ੍ਛਨ੍ਤਾਨਂ ਪਟਿਗ੍ਗਹੇ ਛਡ੍ਡੇਤਿ. ਨੀਹਰਿਤ੍ਵਾਤਿ ਬਹਿ ਨੀਹਰਿਤ੍ਵਾ ਛਡ੍ਡੇਤਿ, ਏਵਂ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ.

ਤਿਂਸਭੋਜਨਪ੍ਪਟਿਸਂਯੁਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੭. ਛਤ੍ਤਪਾਣਿਸਿਕ੍ਖਾਪਦਵਣ੍ਣਨਾ

ਧਮ੍ਮਦੇਸਨਾਪਟਿਸਂਯੁਤ੍ਤੇਸੁ ਪਠਮੇ ਯਂਕਿਞ੍ਚਿ ਛਤ੍ਤਂ ਪਾਣਿਮ੍ਹਿ ਅਸ੍ਸਾਤਿ ਛਤ੍ਤਪਾਣਿ. ਸੋ ਤਂ ਛਤ੍ਤਂ ਯਤ੍ਥਕਤ੍ਥਚਿ ਸਰੀਰਾਵਯਵੇ ਠਪੇਤ੍ਵਾਪਿ ਯਾਵ ਹਤ੍ਥੇਨ ਨ ਮੁਞ੍ਚਤਿ, ਤਾਵਸ੍ਸ ਧਮ੍ਮਂ ਦੇਸੇਤੁਂ ਨ ਵਟ੍ਟਤਿ. ਸਚੇ ਪਨਸ੍ਸ ਅਞ੍ਞੋ ਛਤ੍ਤਂ ਧਾਰੇਤਿ, ਪਸ੍ਸੇ ਵਾ ਠਿਤਂ ਹੋਤਿ, ਹਤ੍ਥਤੋ ਅਪਗਤਮਤ੍ਤੇ ਛਤ੍ਤਪਾਣਿ ਨਾਮ ਨ ਹੋਤਿ, ਤਸ੍ਸ ਦੇਸੇਤੁਂ ਵਟ੍ਟਤਿ. ਧਮ੍ਮਪਰਿਚ੍ਛੇਦੋ ਚੇਤ੍ਥ ਪਦਸੋਧਮ੍ਮੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

੫੮-੫੯. ਦਣ੍ਡਪਾਣਿਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਦਣ੍ਡੋ ਨਾਮ ਮਜ੍ਝਿਮਸ੍ਸ ਪੁਰਿਸਸ੍ਸ ਚਤੁਹਤ੍ਥਪ੍ਪਮਾਣੋ, ਦਣ੍ਡਪਾਣਿਭਾਵੋ ਪਨਸ੍ਸ ਛਤ੍ਤਪਾਣਿਮ੍ਹਿ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਤਤਿਯੇਪਿ ਏਸੇਵ ਨਯੋ. ਅਸਿਂ ਸਨ੍ਨਹਿਤ੍ਵਾ ਠਿਤੋਪਿ ਹਿ ਸਤ੍ਥਪਾਣਿਸਙ੍ਖ੍ਯਂ ਨ ਗਚ੍ਛਤਿ.

੬੦. ਆਵੁਧਪਾਣਿਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਸਬ੍ਬਾਪਿ ਧਨੁਵਿਕਤਿ ਸਦ੍ਧਿਂ ਸਰਵਿਕਤਿਯਾ ਆਵੁਧਨ੍ਤਿ ਵੇਦਿਤਬ੍ਬਾ, ਤਸ੍ਮਾ ਸਦ੍ਧਿਂ ਵਾ ਸਰੇਨ ਧਨੁਂ ਗਹੇਤ੍ਵਾ, ਸੁਦ੍ਧਧਨੁਂ ਵਾ ਸੁਦ੍ਧਸਰਂ ਵਾ ਸਜਿਯਧਨੁਂ ਵਾ ਨਿਜ੍ਜਿਯਧਨੁਂ ਵਾ ਗਹੇਤ੍ਵਾ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਧਮ੍ਮਂ ਦੇਸੇਤੁਂ ਨ ਵਟ੍ਟਤਿ. ਸਚੇ ਪਨਸ੍ਸ ਧਨੁ ਖਨ੍ਧੇਪਿ ਪਟਿਮੁਕ੍ਕਂ ਹੋਤਿ, ਯਾਵ ਨ ਗਣ੍ਹਾਤਿ, ਤਾਵ ਵਟ੍ਟਤਿ.

੬੧-੬੨. ਪਾਦੁਕਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਪਾਦੁਕਾਰੁਲ਼੍ਹਸ੍ਸਾਤਿ ਛਤ੍ਤਦਣ੍ਡਕੇ ਅਙ੍ਗੁਲਨ੍ਤਰਿਕਂ ਅਪ੍ਪਵੇਸੇਤ੍ਵਾ ਕੇਵਲਂ ਅਕ੍ਕਨ੍ਤਸ੍ਸ ਵਾ, ਪਵੇਸੇਤ੍ਵਾ ਠਾਨਵਸੇਨ ਪਟਿਮੁਕ੍ਕਸ੍ਸ ਵਾ. ਛਟ੍ਠੇਪਿ ਏਸੇਵ ਨਯੋ. ਇਧ ਪਨ ਯ੍ਵਾਯਂ ਪਣ੍ਹਿਕਬਨ੍ਧਂ ਓਮੁਞ੍ਚਿਤ੍ਵਾ ਠਾਨਵਸੇਨ ‘‘ਓਮੁਕ੍ਕੋ’’ਤਿ ਵੁਚ੍ਚਤਿ, ਤਸ੍ਸਾਪਿ ਨ ਵਟ੍ਟਤਿ.

੬੩. ਯਾਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਸਚੇਪਿ ਦ੍ਵੀਹਿ ਜਨੇਹਿ ਹਤ੍ਥਸਙ੍ਘਾਟੇਨ ਗਹਿਤੋ, ਸਾਟਕੇ ਵਾ ਠਪੇਤ੍ਵਾ ਵਂਸੇਨ ਵਯ੍ਹਤਿ, ਅਯੁਤ੍ਤੇ ਵਾ ਵਯ੍ਹਾਦਿਕੇ ਯਾਨੇ ਵਿਸਙ੍ਖਰਿਤ੍ਵਾ ਵਾ ਠਪਿਤੇ ਚਕ੍ਕਮਤ੍ਤੇਪਿ ਨਿਸਿਨ੍ਨੋ ਹੋਤਿ, ਯਾਨਗਤੋਤ੍ਵੇਵ ਸਙ੍ਖਂ ਗਚ੍ਛਤਿ. ਸਚੇ ਪਨ ਦ੍ਵੇਪਿ ਏਕਯਾਨੇ ਨਿਸਿਨ੍ਨਾ ਹੋਨ੍ਤਿ, ਵਟ੍ਟਤਿ. ਵਿਸੁਂ ਨਿਸਿਨ੍ਨੇਸੁਪਿ ਉਚ੍ਚੇ ਯਾਨੇ ਨਿਸਿਨ੍ਨੇਨ ਨੀਚੇ ਨਿਸਿਨ੍ਨਸ੍ਸ ਦੇਸੇਤੁਂ ਵਟ੍ਟਤਿ, ਸਮਪ੍ਪਮਾਣੇਪਿ ਵਟ੍ਟਤਿ, ਤਥਾ ਪੁਰਿਮੇ ਨਿਸਿਨ੍ਨੇਨ ਪਚ੍ਛਿਮੇ ਨਿਸਿਨ੍ਨਸ੍ਸ. ਪਚ੍ਛਿਮੇ ਪਨ ਉਚ੍ਚਤਰੇਪਿ ਨਿਸਿਨ੍ਨੇਨ ਦੇਸੇਤੁਂ ਨ ਵਟ੍ਟਤਿ.

੬੪. ਸਯਨਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਸਯਨਗਤਸ੍ਸਾਤਿ ਅਨ੍ਤਮਸੋ ਕਟਸਾਰਕੇਪਿ ਪਕਤਿਭੂਮਿਯਮ੍ਪਿ ਨਿਪਨ੍ਨਸ੍ਸ ਉਚ੍ਚੇਪਿ ਮਞ੍ਚੇ ਵਾ ਪੀਠੇ ਵਾ ਭੂਮਿਪ੍ਪਦੇਸੇ ਵਾ ਠਿਤੇਨ ਨਿਸਿਨ੍ਨੇਨ ਵਾ ਦੇਸੇਤੁਂ ਨ ਵਟ੍ਟਤਿ. ਸਯਨਗਤੇਨ ਪਨ ਸਯਨਗਤਸ੍ਸ ਉਚ੍ਚਤਰੇ ਵਾ ਸਮਪ੍ਪਮਾਣੇ ਵਾ ਨਿਪਨ੍ਨੇਨ ਦੇਸੇਤੁਂ ਵਟ੍ਟਤਿ. ਨਿਪਨ੍ਨੇਨ ਪਨ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਨਿਪਨ੍ਨਸ੍ਸ ਵਾ, ਨਿਸਿਨ੍ਨੇਨ ਚ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ, ਠਿਤੇਨ ਠਿਤਸ੍ਸੇਵ ਵਟ੍ਟਤਿ.

੬੫. ਪਲ੍ਲਤ੍ਥਿਕਸਿਕ੍ਖਾਪਦਵਣ੍ਣਨਾ

ਨਵਮੇ ਹਤ੍ਥਪਲ੍ਲਤ੍ਥਿਕਾਦੀਸੁ ਯਾਯ ਕਾਯਚਿ ਨਿਸਿਨ੍ਨਸ੍ਸ ਦੇਸੇਤੁਂ ਨ ਵਟ੍ਟਤਿ.

੬੬. ਵੇਠਿਤਸਿਕ੍ਖਾਪਦਵਣ੍ਣਨਾ

ਦਸਮੇ ਵੇਠਿਤਸੀਸਸ੍ਸਾਤਿ ਦੁਸ੍ਸਵੇਠੇਨ ਵਾ ਮੋਲ਼ਿਆਦੀਹਿ ਵਾ ਯਥਾ ਕੇਸਨ੍ਤੋ ਨ ਦਿਸ੍ਸਤਿ, ਏਵਂ ਵੇਠਿਤਸੀਸਸ੍ਸ, ਤੇਨੇਵਸ੍ਸ ਅਨਾਪਤ੍ਤਿਯਂ ‘‘ਕੇਸਨ੍ਤਂ ਵਿਵਰਾਪੇਤ੍ਵਾ ਦੇਸੇਤੀ’’ਤਿ (ਪਾਚਿ. ੬੪੩) ਵੁਤ੍ਤਂ.

੬੭. ਓਗੁਣ੍ਠਿਤਸਿਕ੍ਖਾਪਦਵਣ੍ਣਨਾ

ਏਕਾਦਸਮੇ ਓਗੁਣ੍ਠਿਤਸੀਸਸ੍ਸਾਤਿ ਸਸੀਸਂ ਪਾਰੁਤਸ੍ਸ, ਅਨਾਪਤ੍ਤਿਯਂ ਪਨੇਤ੍ਥ ‘‘ਸੀਸਂ ਵਿਵਰਾਪੇਤ੍ਵਾ ਦੇਸੇਤੀ’’ਤਿ (ਪਾਚਿ. ੬੪੪) ਅਧਿਕਂ.

੬੮. ਛਮਾਸਿਕ੍ਖਾਪਦਵਣ੍ਣਨਾ

ਦ੍ਵਾਦਸਮੇ ਛਮਾਯਂ ਨਿਸੀਦਿਤ੍ਵਾਤਿ ਭੂਮਿਯਂ ਨਿਸੀਦਿਤ੍ਵਾ. ਆਸਨੇਤਿ ਅਨ੍ਤਮਸੋ ਵਤ੍ਥਮ੍ਪਿ ਤਿਣਾਨਿਪਿ ਸਨ੍ਥਰਿਤ੍ਵਾ ਨਿਸਿਨ੍ਨਸ੍ਸ.

੬੯. ਨੀਚਾਸਨਸਿਕ੍ਖਾਪਦਵਣ੍ਣਨਾ

ਤੇਰਸਮੇ ਉਚ੍ਚੇ ਆਸਨੇਤਿ ਅਨ੍ਤਮਸੋ ਭੂਮਿਪ੍ਪਦੇਸੇਪਿ ਉਨ੍ਨਤਪ੍ਪਦੇਸੇ ਨਿਸਿਨ੍ਨਸ੍ਸ.

੭੦. ਠਿਤਸਿਕ੍ਖਾਪਦਵਣ੍ਣਨਾ

ਚੁਦ੍ਦਸਮੇ ਨ ਠਿਤੋ ਨਿਸਿਨ੍ਨਸ੍ਸਾਤਿ ਸਚੇ ਥੇਰਸ੍ਸ ਉਪਟ੍ਠਾਨਂ ਗਨ੍ਤ੍ਵਾ ਠਿਤਂ ਦਹਰਂ ਆਸਨੇ ਨਿਸਿਨ੍ਨੋ ਮਹਾਥੇਰੋ ਪਞ੍ਹਂ ਪੁਚ੍ਛਤਿ, ਨ ਕਥੇਤਬ੍ਬਂ. ਗਾਰਵੇਨ ਪਨ ਥੇਰਂ ‘‘ਉਟ੍ਠਹਿਤ੍ਵਾ ਪੁਚ੍ਛਾ’’ਤਿ ਵਤ੍ਤੁਂ ਨ ਸਕ੍ਕਾ, ਤਸ੍ਮਾ ‘‘ਪਸ੍ਸੇ ਠਿਤਸ੍ਸ ਭਿਕ੍ਖੁਨੋ ਕਥੇਸ੍ਸਾਮੀ’’ਤਿ ਕਥੇਤੁਂ ਵਟ੍ਟਤਿ.

੭੧. ਪਚ੍ਛਤੋਗਮਨਸਿਕ੍ਖਾਪਦਵਣ੍ਣਨਾ

ਪਨ੍ਨਰਸਮੇ ਸਚੇ ਪੁਰਤੋ ਗਚ੍ਛਨ੍ਤੋ ਪਞ੍ਹਂ ਪੁਚ੍ਛਤਿ, ਤਸ੍ਸ ਤਂ ਅਕਥੇਤ੍ਵਾ ‘‘ਪਚ੍ਛਿਮਸ੍ਸ ਭਿਕ੍ਖੁਨੋ ਕਥੇਸ੍ਸਾਮੀ’’ਤਿ ਕਥੇਤਬ੍ਬਂ. ਸਦ੍ਧਿਂ ਉਗ੍ਗਹਿਤਧਮ੍ਮਂ ਪਨ ਸਜ੍ਝਾਯਿਤੁਂ, ਸਮਧੁਰੇਨ ਵਾ ਗਚ੍ਛਨ੍ਤਸ੍ਸ ਕਥੇਤੁਂ ਵਟ੍ਟਤਿ.

੭੨. ਉਪ੍ਪਥੇਨਗਮਨਸਿਕ੍ਖਾਪਦਵਣ੍ਣਨਾ

ਸੋਲ਼ਸਮੇ ਨ ਉਪ੍ਪਥੇਨਾਤਿ ਏਤ੍ਥ ਸਚੇ ਦ੍ਵੇਪਿ ਸਕਟਮਗ੍ਗਸ੍ਮਿਂ ਏਕੇਕਚਕ੍ਕਪਥੇਨ ਵਾ ਉਪ੍ਪਥੇਨ ਵਾ ਸਮਧੁਰਂ ਗਚ੍ਛਨ੍ਤਿ, ਵਟ੍ਟਤਿ.

੭੩. ਠਿਤੋਉਚ੍ਚਾਰਸਿਕ੍ਖਾਪਦਵਣ੍ਣਨਾ

ਸਤ੍ਤਰਸਮੇ ‘‘ਅਸਞ੍ਚਿਚ੍ਚਾ’’ਤਿ ਅਨਾਪਤ੍ਤਿਯਂ ਸਚੇ ਪਟਿਚ੍ਛਨ੍ਨਟ੍ਠਾਨਂ ਗਚ੍ਛਨ੍ਤਸ੍ਸ ਸਹਸਾ ਉਚ੍ਚਾਰੋ ਵਾ ਪਸ੍ਸਾਵੋ ਵਾ ਨਿਕ੍ਖਮਤਿ, ਅਸਞ੍ਚਿਚ੍ਚ ਕਤੋ ਨਾਮ ਹੋਤਿ.

੭੪. ਹਰਿਤੇਉਚ੍ਚਾਰਸਿਕ੍ਖਾਪਦਵਣ੍ਣਨਾ

ਅਟ੍ਠਾਰਸਮੇ ਯਮ੍ਪਿ ਜੀਵਮਾਨਰੁਕ੍ਖਸ੍ਸ ਮੂਲਂ ਪਥਵਿਯਂ ਦਿਸ੍ਸਮਾਨਂ ਗਚ੍ਛਤਿ, ਸਾਖਾ ਵਾ ਭੂਮਿਲਗ੍ਗਾ ਗਚ੍ਛਤਿ, ਸਬ੍ਬਂ ਹਰਿਤਸਙ੍ਖਾਤਮੇਵ. ਖਨ੍ਧੇ ਨਿਸੀਦਿਤ੍ਵਾ ਪਨ ਅਪ੍ਪਹਰਿਤਟ੍ਠਾਨੇ ਪਾਤੇਤੁਂ ਵਟ੍ਟਤਿ. ਸਚੇ ਅਪ੍ਪਹਰਿਤਟ੍ਠਾਨਂ ਓਲੋਕੇਨ੍ਤਸ੍ਸੇਵ ਸਹਸਾ ਨਿਕ੍ਖਮਤਿ, ਗਿਲਾਨਟ੍ਠਾਨੇ ਠਿਤੋ ਹੋਤਿ, ‘‘ਅਪ੍ਪਹਰਿਤੇ ਕਤੋ ਹਰਿਤਂ ਓਤ੍ਥਰਤੀ’’ਤਿ (ਪਾਚਿ. ੬੫੨) ਇਦਮੇਤ੍ਥ ਅਨਾਪਤ੍ਤਿਯਂ ਅਧਿਕਂ. ਤਤ੍ਥ ਸਚੇਪਿ ਅਪ੍ਪਹਰਿਤਂ ਅਲਭਨ੍ਤੇਨ ਤਿਣਣ੍ਡੁਪਕਂ ਵਾ ਪਲਲਣ੍ਡੁਪਕਂ ਵਾ ਠਪੇਤ੍ਵਾ ਕਤੋ ਪਚ੍ਛਾ ਹਰਿਤਂ ਓਤ੍ਥਰਤਿ, ਵਟ੍ਟਤਿਯੇਵ. ਖੇਲ਼ੇਨ ਚੇਤ੍ਥ ਸਿਙ੍ਘਾਣਿਕਾਪਿ ਸਙ੍ਗਹਿਤਾ.

੭੫. ਉਦਕੇਉਚ੍ਚਾਰਸਿਕ੍ਖਾਪਦਵਣ੍ਣਨਾ

ਏਕੂਨਵੀਸਤਿਮੇ ਨ ਉਦਕੇਤਿ ਏਤਂ ਪਰਿਭੋਗਉਦਕਮੇਵ ਸਨ੍ਧਾਯ ਵੁਤ੍ਤਂ, ਵਚ੍ਚਕੁਟਿਸਮੁਦ੍ਦਾਦਿਉਦਕੇਸੁ ਪਨ ਅਪਰਿਭੋਗੇਸੁ ਅਨਾਪਤ੍ਤਿ. ਦੇਵੇ ਵਸ੍ਸਨ੍ਤੇ ਸਮਨ੍ਤਤੋ ਉਦਕੋਘੇ ਜਾਤੇ ਅਨੁਦਕਟ੍ਠਾਨਂ ਅਲਭਨ੍ਤੇਨ ਉਦਕੇ ਕਾਤੁਂ ਵਟ੍ਟਤਿ, ਇਧਾਪਿ ‘‘ਥਲੇ ਕਤੋ ਉਦਕਂ ਓਤ੍ਥਰਤੀ’’ਤਿ (ਪਾਚਿ. ੬੫੪) ਇਦਂ ਅਨਾਪਤ੍ਤਿਯਂ ਅਧਿਕਂ, ਸੇਸਂ ਸਬ੍ਬਸਿਕ੍ਖਾਪਦੇਸੁ ਉਤ੍ਤਾਨਮੇਵ.

ਸਮੁਟ੍ਠਾਨਾਦਿਦੀਪਨਤ੍ਥਾਯ ਪਨੇਤ੍ਥ ਇਦਂ ਪਕਿਣ੍ਣਕਂ – ਉਜ੍ਜਗ੍ਘਿਕਉਚ੍ਚਾਸਦ੍ਦਪ੍ਪਟਿਸਂਯੁਤ੍ਤਾਨਿ ਚਤ੍ਤਾਰਿ, ਸਕਬਲ਼ੇਨ ਮੁਖੇਨ ਬ੍ਯਾਹਰਣਂ ਏਕਂ, ਛਮਾਨੀਚਾਸਨਨਿਸਿਨ੍ਨਠਿਤਪਚ੍ਛਤੋਗਮਨਉਪ੍ਪਥਗਮਨਪ੍ਪਟਿਸਂਯੁਤ੍ਤਾਨਿ ਪਞ੍ਚਾਤਿ ਇਮਾਨਿ ਦਸ ਸਿਕ੍ਖਾਪਦਾਨਿ ਸਮਨੁਭਾਸਨਸਮੁਟ੍ਠਾਨਾਨਿ, ਏਕੇਕਮੇਤ੍ਥ ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਂ. ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਂ ਥੇਯ੍ਯਸਤ੍ਥਸਮੁਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਂ. ਛਤ੍ਤਪਾਣਿਦਣ੍ਡਪਾਣਿਸਤ੍ਥਪਾਣਿਆਵੁਧਪਾਣਿਪਾਦੁਕਾਉਪਾਹਨਯਾਨਸਯਨਪਲ੍ਲਤ੍ਥਿਕਵੇਠਿਤਓਗੁਣ੍ਠਿਤਨਾਮਕਾਨਿ ਏਕਾਦਸ ਧਮ੍ਮਦੇਸਨਾਸਮੁਟ੍ਠਾਨਾਨਿ, ਕਿਰਿਯਾਕਿਰਿਯਾਨਿ, ਸਞ੍ਞਾਵਿਮੋਕ੍ਖਾਨਿ, ਸਚਿਤ੍ਤਕਾਨਿ, ਲੋਕਵਜ੍ਜਾਨਿ, ਵਚੀਕਮ੍ਮਾਨਿ, ਅਕੁਸਲਚਿਤ੍ਤਾਨਿ, ਦੁਕ੍ਖਵੇਦਨਾਨਿ. ਸੇਸਾਨਿ ਤੇਪਣ੍ਣਾਸ ਪਠਮਪਾਰਾਜਿਕਸਮਉਟ੍ਠਾਨਾਦਿਭੇਦਾਨੀਤਿ.

ਏਕੂਨਵੀਸਤਿਧਮ੍ਮਦੇਸਨਾਪਟਿਸਂਯੁਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਸੇਖਿਯਵਣ੍ਣਨਾ ਨਿਟ੍ਠਿਤਾ.

ਅਧਿਕਰਣਸਮਥਵਣ੍ਣਨਾ

ਅਧਿਕਰਣਸਮਥੇਸੁ ਸਤ੍ਤਾਤਿ ਤੇਸਂ ਗਣਨਪਰਿਚ੍ਛੇਦੋ. ਅਧਿਕਰਣਾਨਿ ਸਮੇਨ੍ਤਿ ਵੂਪਸਮੇਨ੍ਤੀਤਿ ਅਧਿਕਰਣਸਮਥਾ. ਉਦ੍ਦੇਸਂ ਆਗਚ੍ਛਨ੍ਤੀਤਿ ਆਪਤ੍ਤਾਧਿਕਰਣਸਙ੍ਖਾਤਾਸੁ ਚ ਅਵਸੇਸਾਧਿਕਰਣਤ੍ਤਯਪਚ੍ਚਯਾਸੁ ਚ ਆਪਤ੍ਤੀਸੁ ਪਰਿਸੁਦ੍ਧਭਾਵਂ ਪੁਚ੍ਛਨਤ੍ਥਂ ਉਦ੍ਦਿਸਿਤਬ੍ਬਤਂ ਆਗਚ੍ਛਨ੍ਤਿ. ਉਪ੍ਪਨ੍ਨੁਪ੍ਪਨ੍ਨਾਨਨ੍ਤਿ ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਂ. ਅਧਿਕਰਣਾਨਨ੍ਤਿ ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਇਮੇਸਂ ਚਤੁਨ੍ਨਂ. ਸਮਥਾਯ ਵੂਪਸਮਾਯਾਤਿ ਸਮਨਤ੍ਥਞ੍ਚੇਵ ਵੂਪਸਮਨਤ੍ਥਞ੍ਚ ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋਤਿ ਇਮੇ ਸਤ੍ਤ ਸਮਥਾ ਦਾਤਬ੍ਬਾ. ਤਤ੍ਰਾਯਂ ਵਿਨਿਚ੍ਛਯੋ – ਅਧਿਕਰਣੇਸੁ ਤਾਵ ‘‘ਧਮ੍ਮੋ’’ਤਿ ਵਾ, ‘‘ਅਧਮ੍ਮੋ’’ਤਿ ਵਾ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤਾਨਂ ਭਿਕ੍ਖੂਨਂ ਯੋ ਵਿਵਾਦੋ, ਇਦਂ ਵਿਵਾਦਾਧਿਕਰਣਂ ਨਾਮ. ਸੀਲਵਿਪਤ੍ਤਿਯਾ ਵਾ ਆਚਾਰਦਿਟ੍ਠਿਆਜੀਵਵਿਪਤ੍ਤਿਯਾ ਵਾ ਅਨੁਵਦਨ੍ਤਾਨਂ ਯੋ ਅਨੁਵਾਦੋ ਉਪਵਦਨਾ ਚੇਵ ਚੋਦਨਾ ਚ, ਇਦਂ ਅਨੁਵਾਦਾਧਿਕਰਣਂ ਨਾਮ. ਮਾਤਿਕਾਯ ਆਗਤਾ ਪਞ੍ਚ, ਵਿਭਙ੍ਗੇ ਦ੍ਵੇਤਿ ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਨਾਮ. ਯਂ ਸਙ੍ਘਸ੍ਸ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ ਕਰਣਂ, ਇਦਂ ਕਿਚ੍ਚਾਧਿਕਰਣਂ ਨਾਮ.

ਤਤ੍ਥ ਵਿਵਾਦਾਧਿਕਰਣਂ (ਚੂਲ਼ਵ. ੨੨੮) ਦ੍ਵੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ, ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਂ, ਤਸ੍ਮਿਂਯੇਵ ਵਾ, ਅਞ੍ਞਤ੍ਥ ਵੂਪਸਮੇਤੁਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ, ਯਤ੍ਥ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ਵਾ ਵੂਪਸਮੇਤੁਂ ਅਸਕ੍ਕੋਨ੍ਤੇ ਤਤ੍ਥੇਵ ਉਬ੍ਬਾਹਿਕਾਯ ਸਮ੍ਮਤਪੁਗ੍ਗਲੇਹਿ ਵਾ ਵਿਨਿਚ੍ਛਿਤਂ ਸਮ੍ਮਤਿ, ਏਵਂ ਸਮ੍ਮਮਾਨੇ ਚ ਪਨ ਤਸ੍ਮਿਂ ਯਾ ਸਙ੍ਘਸਮ੍ਮੁਖਤਾ ਧਮ੍ਮਸਮ੍ਮੁਖਤਾ ਵਿਨਯਸਮ੍ਮੁਖਤਾ ਪੁਗ੍ਗਲਸਮ੍ਮੁਖਤਾ ਅਯਂ ਸਮ੍ਮੁਖਾਵਿਨਯੋ ਨਾਮ. ਤਤ੍ਥ ਚ ਕਾਰਕਸਙ੍ਘਸ੍ਸ ਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ ਸਙ੍ਘਸਮ੍ਮੁਖਤਾ, ਸਮੇਤਬ੍ਬਸ੍ਸ ਵਤ੍ਥੁਨੋ ਭੂਤਤਾ ਧਮ੍ਮਸਮ੍ਮੁਖਤਾ, ਯਥਾ ਤਂ ਸਮੇਤਬ੍ਬਂ, ਤਥੇਵਸ੍ਸ ਸਮਨਂ ਵਿਨਯਸਮ੍ਮੁਖਤਾ, ਯੋ ਚ ਵਿਵਦਤਿ, ਯੇਨ ਚ ਵਿਵਦਤਿ, ਤੇਸਂ ਉਭਿਨ੍ਨਂ ਅਤ੍ਥਪਚ੍ਚਤ੍ਥਿਕਾਨਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ. ਉਬ੍ਬਾਹਿਕਾਯ ਵੂਪਸਮਨੇ ਪਨੇਤ੍ਥ ਸਙ੍ਘਸਮ੍ਮੁਖਤਾ ਪਰਿਹਾਯਤਿ, ਏਵਂ ਤਾਵ ਸਮ੍ਮੁਖਾਵਿਨਯੇਨੇਵ ਸਮ੍ਮਤਿ.

ਸਚੇ ਪਨੇਵਮ੍ਪਿ ਨ ਸਮ੍ਮਤਿ, ਅਥ ਨਂ ਉਬ੍ਬਾਹਿਕਾਯ ਸਮ੍ਮਤਾ ਭਿਕ੍ਖੂ ‘‘ਨ ਮਯਂ ਸਕ੍ਕੋਮ ਵੂਪਸਮੇਤੁ’’ਨ੍ਤਿ ਸਙ੍ਘਸ੍ਸੇਵ ਨਿਯ੍ਯਾਤੇਨ੍ਤਿ, ਤਤੋ ਸਙ੍ਘੋ ਪਞ੍ਚਙ੍ਗਸਮਨ੍ਨਾਗਤਂ ਭਿਕ੍ਖੁਂ ਸਲਾਕਗ੍ਗਾਹਾਪਕਂ ਸਮ੍ਮਨ੍ਨਿਤ੍ਵਾ ਤੇਨ ਗੁਲ਼੍ਹਕਵਿਵਟ੍ਟਕਸਕਣ੍ਣਜਪ੍ਪਕੇਸੁ ਤੀਸੁ ਸਲਾਕਗ੍ਗਾਹੇਸੁ ਅਞ੍ਞਤਰਵਸੇਨ ਸਲਾਕਂ ਗਾਹੇਤ੍ਵਾ ਸਨ੍ਨਿਪਤਿਤਪਰਿਸਾਯ ਧਮ੍ਮਵਾਦੀਨਂ ਯੇਭੁਯ੍ਯਤਾਯ ਯਥਾ ਤੇ ਧਮ੍ਮਵਾਦਿਨੋ ਵਦਨ੍ਤਿ, ਏਵਂ ਵੂਪਸਨ੍ਤਂ ਅਧਿਕਰਣਂ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ ਵੂਪਸਨ੍ਤਂ ਹੋਤਿ. ਤਤ੍ਥ ਸਮ੍ਮੁਖਾਵਿਨਯੋ ਵੁਤ੍ਤਨਯੋ ਏਵ, ਯਂ ਪਨ ਯੇਭੁਯ੍ਯਸਿਕਕਮ੍ਮਸ੍ਸ ਕਰਣਂ. ਅਯਂ ਯੇਭੁਯ੍ਯਸਿਕਾ ਨਾਮ, ਏਵਂ ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ.

ਅਨੁਵਾਦਾਧਿਕਰਣਂ (ਚੂਲ਼ਵ. ੨੩੬) ਚਤੂਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ. ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯੋ ਚ ਅਨੁਵਦਤਿ, ਯਞ੍ਚ ਅਨੁਵਦਤਿ, ਤੇਸਂ ਵਚਨਂ ਸੁਤ੍ਵਾ ਸਚੇ ਕਾਚਿ ਆਪਤ੍ਤਿ ਨਤ੍ਥਿ, ਉਭੋ ਖਮਾਪੇਤ੍ਵਾ, ਸਚੇ ਅਤ੍ਥਿ, ‘‘ਅਯਂ ਨਾਮੇਤ੍ਥ ਆਪਤ੍ਤੀ’’ਤਿ ਏਵਂ ਵਿਨਿਚ੍ਛਿਤਂ ਵੂਪਸਮ੍ਮਤਿ, ਤਤ੍ਥ ਸਮ੍ਮੁਖਾਵਿਨਯਲਕ੍ਖਣਂ ਵੁਤ੍ਤਨਯਮੇਵ. ਯਦਾ ਪਨ ਖੀਣਾਸਵਸ੍ਸ ਭਿਕ੍ਖੁਨੋ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸਿਤਸ੍ਸ ਸਤਿਵਿਨਯਂ ਯਾਚਮਾਨਸ੍ਸ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਸਤਿਵਿਨਯਂ ਦੇਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਵੂਪਸਨ੍ਤਂ ਹੋਤਿ, ਦਿਨ੍ਨੇ ਪਨ ਸਤਿਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਅਨੁਵਾਦੋ ਨ ਰੁਹਤਿ. ਯਦਾ ਉਮ੍ਮਤ੍ਤਕੋ ਭਿਕ੍ਖੁ ਉਮ੍ਮਾਦਵਸੇਨ ਗਤੇ ਅਸ੍ਸਾਮਣਕੇ ਅਜ੍ਝਾਚਾਰੇ ‘‘ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿ’’ਨ੍ਤਿ ਭਿਕ੍ਖੂਹਿ ਚੋਦਿਯਮਾਨੋ ‘‘ਉਮ੍ਮਤ੍ਤਕੇਨ ਮੇ, ਆਵੁਸੋ, ਏਤਂ ਕਤਂ, ਨਾਹਂ ਤਂ ਸਰਾਮੀ’’ਤਿ ਭਣਨ੍ਤੋਪਿ ਭਿਕ੍ਖੂਹਿ ਚੋਦਿਯਮਾਨੋਵ ਪੁਨ ਅਚੋਦਨਤ੍ਥਾਯ ਅਮੂਲ਼੍ਹਵਿਨਯਂ ਯਾਚਤਿ, ਸਙ੍ਘੋ ਚਸ੍ਸ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਮੂਲ਼੍ਹਵਿਨਯਂ ਦੇਤਿ. ਤਦਾ ਸਮ੍ਮੁਖਾਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਵੂਪਸਨ੍ਤਂ ਹੋਤਿ, ਦਿਨ੍ਨੇ ਪਨ ਅਮੂਲ਼੍ਹਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਤਪ੍ਪਚ੍ਚਯਾ ਅਨੁਵਾਦੋ ਨ ਰੁਹਤਿ.

ਯਦਾ ਪਨ ਪਾਰਾਜਿਕੇਨ ਵਾ ਪਾਰਾਜਿਕਸਾਮਨ੍ਤੇਨ ਵਾ ਚੋਦਿਯਮਾਨਸ੍ਸ ਅਞ੍ਞੇਨਞ੍ਞਂ ਪਟਿਚਰਤੋ ਪਾਪੁਸ੍ਸਨ੍ਨਤਾਯ ਪਾਪਿਯਸ੍ਸ ਪੁਗ੍ਗਲਸ੍ਸ ‘‘ਸਚਾਯਂ ਅਚ੍ਛਿਨ੍ਨਮੂਲੋ ਭਵਿਸ੍ਸਤਿ, ਸਮ੍ਮਾ ਵਤ੍ਤਿਤ੍ਵਾ ਓਸਾਰਣਂ ਲਭਿਸ੍ਸਤਿ, ਸਚੇ ਛਿਨ੍ਨਮੂਲੋ, ਸਯਮੇਵਸ੍ਸ ਨਾਸਨਾ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਤਸ੍ਸਪਾਪਿਯਸਿਕਂ ਕਮ੍ਮਂ ਕਰੋਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ ਵੂਪਸਨ੍ਤਂ ਹੋਤਿ, ਏਵਂ ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ.

ਆਪਤ੍ਤਾਧਿਕਰਣਂ (ਚੂਲ਼ਵ. ੨੩੯) ਤੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਿਣਵਤ੍ਥਾਰਕੇਨ ਚ. ਤਸ੍ਸ ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ, ਯਦਾ ਪਨ ਏਕਸ੍ਸ ਵਾ ਭਿਕ੍ਖੁਨੋ, ਨਿਸ੍ਸਗ੍ਗਿਯਵਣ੍ਣਨਾਯਂ ਵੁਤ੍ਤਨਯੇਨ ਸਙ੍ਘਗਣਮਜ੍ਝੇਸੁ ਵਾ ਭਿਕ੍ਖੁ ਲਹੁਕਂ ਆਪਤ੍ਤਿਂ ਦੇਸੇਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਵੂਪਸਮ੍ਮਤਿ. ਤਤ੍ਥ ਸਮ੍ਮੁਖਾਵਿਨਯੇ ਤਾਵ ਯੋ ਚ ਦੇਸੇਤਿ, ਯਸ੍ਸ ਚ ਦੇਸੇਤਿ, ਤੇਸਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ, ਸੇਸਂ ਵੁਤ੍ਤਨਯਮੇਵ. ਪੁਗ੍ਗਲਸ੍ਸ ਚ ਗਣਸ੍ਸ ਚ ਦੇਸਨਾਕਾਲੇ ਸਙ੍ਘਸਮ੍ਮੁਖਤਾ ਪਰਿਹਾਯਤਿ.

ਯਾ ਪਨੇਤ੍ਥ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ’’ਤਿ ਚ, ‘‘ਪਸ੍ਸਸੀ’’ਤਿ, ‘‘ਆਮ ਪਸ੍ਸਾਮੀ’’ਤਿ ਚ ਪਟਿਞ੍ਞਾ, ਤਾਯ ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਕਰਣਂ ਪਟਿਞ੍ਞਾਤਕਰਣਂ ਨਾਮ. ਸਙ੍ਘਾਦਿਸੇਸੇ ਪਰਿਵਾਸਾਦਿਯਾਚਨਾ ਪਟਿਞ੍ਞਾ, ਪਰਿਵਾਸਾਦੀਨਂ ਦਾਨਂ ਪਟਿਞ੍ਞਾਤਕਰਣਂ ਨਾਮ. ਦ੍ਵੇਪਕ੍ਖਜਾਤਾ ਪਨ ਭਣ੍ਡਨਕਾਰਕਾ ਭਿਕ੍ਖੂ ਬਹੁਂ ਅਸ੍ਸਾਮਣਕਂ ਅਜ੍ਝਾਚਾਰਂ ਚਰਿਤ੍ਵਾ ਪੁਨ ਲਜ੍ਜਿਧਮ੍ਮੇ ਉਪ੍ਪਨ੍ਨੇ ‘‘ਸਚੇ ਮਯਂ ਇਮਾਹਿ ਆਪਤ੍ਤੀਹਿ ਅਞ੍ਞਮਞ੍ਞਂ ਕਰਿਸ੍ਸਾਮ, ਸਿਯਾਪਿ ਤਂ ਅਧਿਕਰਣਂ ਕਕ੍ਖਲ਼ਤ੍ਥਾਯ ਵਾਲ਼ਤ੍ਥਾਯ ਸਂਵਤ੍ਤੇਯ੍ਯਾ’’ਤਿ ਅਞ੍ਞਮਞ੍ਞਂ ਆਪਤ੍ਤਿਯਾ ਕਾਰਾਪਨੇ ਦੋਸਂ ਦਿਸ੍ਵਾ ਯਦਾ ਤਿਣਵਤ੍ਥਾਰਕਕਮ੍ਮਂ ਕਰੋਨ੍ਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ ਸਮ੍ਮਤਿ. ਤਤ੍ਰ ਹਿ ਯਤ੍ਤਕਾ ਹਤ੍ਥਪਾਸੂਪਗਤਾ ‘‘ਨ ਮੇਤਂ ਖਮਤੀ’’ਤਿ ਏਵਂ ਦਿਟ੍ਠਾਵਿਕਮ੍ਮਂ ਅਕਤ੍ਵਾ ਨਿਦ੍ਦਮ੍ਪਿ ਓਕ੍ਕਮਨ੍ਤਾ ਹੋਨ੍ਤਿ, ਸਬ੍ਬੇਸਂ ਠਪੇਤ੍ਵਾ ਥੁਲ੍ਲਵਜ੍ਜਞ੍ਚ ਗਿਹਿਪ੍ਪਟਿਸਂਯੁਤ੍ਤਞ੍ਚ ਸਬ੍ਬਾਪਤ੍ਤਿਯੋ ਵੁਟ੍ਠਹਨ੍ਤਿ, ਏਵਂ ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ.

ਕਿਚ੍ਚਾਧਿਕਰਣਂ (ਚੂਲ਼ਵ. ੨੪੨) ਏਕੇਨ ਸਮਥੇਨ ਸਮ੍ਮਤਿ ਸਮ੍ਮੁਖਾਵਿਨਯੇਨੇਵ. ਇਤਿ ਇਮਾਨਿ ਚਤ੍ਤਾਰਿ ਅਧਿਕਰਣਾਨਿ ਯਥਾਨੁਰੂਪਂ ਇਮੇਹਿ ਸਤ੍ਤਹਿ ਸਮਥੇਹਿ ਸਮ੍ਮਨ੍ਤਿ, ਤੇਨ ਵੁਤ੍ਤਂ ‘‘ਉਪ੍ਪਨ੍ਨੁਪ੍ਪਨ੍ਨਾਨਂ ਅਧਿਕਰਣਾਨਂ ਸਮਥਾਯ ਵੂਪਸਮਾਯ ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋ’’ਤਿ. ਅਯਮੇਤ੍ਥ ਵਿਨਿਚ੍ਛਯਨਯੋ, ਵਿਤ੍ਥਾਰੋ ਪਨ ਸਮਥਕ੍ਖਨ੍ਧਕੇ ਆਗਤੋਯੇਵ, ਵਿਨਿਚ੍ਛਯੋਪਿਸ੍ਸ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ.

ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ, ਕਚ੍ਚਿਤ੍ਥ ਪਰਿਸੁਦ੍ਧਾਤਿ ਤੇਸੁ ਸਤ੍ਤਸੁ ਅਧਿਕਰਣਸਮਥੇਸੁ ਕਚ੍ਚਿਤ੍ਥ ਪਰਿਸੁਦ੍ਧਾ, ਨਤ੍ਥਿ ਵੋ ਕਿਞ੍ਚਿ ਸਮਥੇਹਿ ਵੂਪਸਮੇਤਬ੍ਬਨ੍ਤਿ ਪੁਚ੍ਛਾਮਿ, ਏਤੇਨ ਸਬ੍ਬਾਪਤ੍ਤੀਹਿ ਪਰਿਸੁਦ੍ਧਭਾਵੋ ਪੁਚ੍ਛਿਤੋ ਹੋਤਿ.

ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਨ੍ਤਿਆਦਿ ਨਿਗਮਨਵਚਨਂ. ਤਤ੍ਥ ਏਤ੍ਤਕਨ੍ਤਿ ਏਤ੍ਤਕਂ ਸਿਕ੍ਖਾਪਦਂ. ਸੁਤ੍ਤਾਗਤਨ੍ਤਿ ਸੁਤ੍ਤੇ ਪਾਤਿਮੋਕ੍ਖੇ ਆਗਤਂ. ਸੁਤ੍ਤਪਰਿਯਾਪਨ੍ਨਨ੍ਤਿ ਤਤ੍ਥੇਵ ਅਨ੍ਤੋਗਧਂ. ਅਨ੍ਵਦ੍ਧਮਾਸਂ ਉਦ੍ਦੇਸਂ ਆਗਚ੍ਛਤੀਤਿ ਅਦ੍ਧਮਾਸੇ ਅਦ੍ਧਮਾਸੇ ਉਪੋਸਥਵਸੇਨ ਉਦ੍ਦਿਸਿਤਬ੍ਬਤਂ ਆਗਚ੍ਛਤਿ. ਸਮਗ੍ਗੇਹੀਤਿ ਕਾਯਸਾਮਗ੍ਗਿਵਸੇਨ ਸਮਗ੍ਗੇਹਿ. ਸਮ੍ਮੋਦਮਾਨੇਹੀਤਿ ਚਿਤ੍ਤਸਾਮਗ੍ਗਿਵਸੇਨ ਏਕਜ੍ਝਾਸਯਤਾਯ ਸੁਟ੍ਠੁ ਮੋਦਮਾਨੇਹਿ. ਅਵਿਵਦਮਾਨੇਹੀਤਿ ਅਟ੍ਠਾਰਸਸੁ ਵਿਵਾਦਵਤ੍ਥੂਸੁ ਅਞ੍ਞਤਰਵਸੇਨਾਪਿ ਅਵਿਵਦਮਾਨੇਹਿ. ਸਿਕ੍ਖਿਤਬ੍ਬਨ੍ਤਿ ਤਂ ਤਂ ਸਿਕ੍ਖਾਪਦਂ ਅਵੀਤਿਕ੍ਕਮਨ੍ਤੇਹਿ ਅਧਿਸੀਲਸਿਕ੍ਖਾ ਸਮ੍ਪਾਦੇਤਬ੍ਬਾ. ਅਨ੍ਤਰਨ੍ਤਰਾ ਪਨ ਯਂ ਨ ਵੁਤ੍ਤਂ, ਤਂ ਸਬ੍ਬਂ ਪੁਰਿਮੇ ਪੁਰਿਮੇ ਸਿਕ੍ਖਾਪਦੇ ਵੁਤ੍ਤਤ੍ਤਾ ਚੇਵ ਉਤ੍ਤਾਨਤ੍ਥਤ੍ਤਾ ਚਾਤਿ.

ਅਧਿਕਰਣਸਮਥਵਣ੍ਣਨਾ ਨਿਟ੍ਠਿਤਾ.

ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਭਿਕ੍ਖੁਪਾਤਿਮੋਕ੍ਖਵਣ੍ਣਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਸਮ੍ਬੁਦ੍ਧਸ੍ਸ