੯. ਰਤਨਵਗ੍ਗੋ

੧. ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ

ਰਤਨਵਗ੍ਗਸ੍ਸ ਪਠਮੇ ਖਤ੍ਤਿਯਸ੍ਸਾਤਿ ਖਤ੍ਤਿਯਜਾਤਿਕਸ੍ਸ, ਮੁਦ੍ਧਾਭਿਸਿਤ੍ਤਸ੍ਸਾਤਿ ਖਤ੍ਤਿਯਾਭਿਸੇਕੇਨ ਮੁਦ੍ਧਨਿ ਅਭਿਸਿਤ੍ਤਸ੍ਸ. ਅਨਿਕ੍ਖਨ੍ਤੋ ਰਾਜਾ ਇਤੋਤਿ ਅਨਿਕ੍ਖਨ੍ਤਰਾਜਕਂ, ਤਸ੍ਮਿਂ ਅਨਿਕ੍ਖਨ੍ਤਰਾਜਕੇ, ਸਯਨਿਘਰੇਤਿ ਅਤ੍ਥੋ. ਰਤਨਂ ਵੁਚ੍ਚਤਿ ਮਹੇਸੀ, ਨਿਗ੍ਗਤਨ੍ਤਿ ਨਿਕ੍ਖਨ੍ਤਂ, ਅਨਿਗ੍ਗਤਂ ਰਤਨਂ ਇਤੋਤਿ ਅਨਿਗ੍ਗਤਰਤਨਕਂ, ਤਸ੍ਮਿਂ ਅਨਿਗ੍ਗਤਰਤਨਕੇ, ਸਯਨਿਘਰੇਤਿ ਅਤ੍ਥੋ. ਇਨ੍ਦਖੀਲਂ ਅਤਿਕ੍ਕਮੇਯ੍ਯਾਤਿ ਏਤ੍ਥ ਅਤ੍ਤਨੋ ਆਗਤਭਾਵਂ ਅਜਾਨਾਪੇਤ੍ਵਾ ਸਯਨਿਘਰਸ੍ਸ ਉਮ੍ਮਾਰਂ ਪਠਮਂ ਪਾਦਂ ਅਤਿਕ੍ਕਾਮੇਨ੍ਤਸ੍ਸ ਦੁਕ੍ਕਟਂ, ਦੁਤਿਯਂ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਰਞ੍ਞੋ ਅਨ੍ਤੇਪੁਰਪ੍ਪਵਿਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਪਟਿਸਂਵਿਦਿਤੇ ਅਪ੍ਪਟਿਸਂਵਿਦਿਤਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਪਟਿਸਂਵਿਦਿਤਸਞ੍ਞਿਸ੍ਸ, ਨ ਖਤ੍ਤਿਯਸ੍ਸ ਵਾ, ਨ ਖਤ੍ਤਿਯਾਭਿਸੇਕੇਨ ਅਭਿਸਿਤ੍ਤਸ੍ਸ ਵਾ, ਉਭੋਸੁ ਵਾ, ਉਭਿਨ੍ਨਂ ਵਾ ਅਞ੍ਞਤਰਸ੍ਮਿਂ ਨਿਕ੍ਖਨ੍ਤੇ ਸਯਨਿਘਰਂ ਪਵਿਸਨ੍ਤਸ੍ਸ, ਅਸਯਨਿਘਰੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਖਤ੍ਤਿਯਤਾ, ਅਭਿਸਿਤ੍ਤਤਾ, ਉਭਿਨ੍ਨਮ੍ਪਿ ਸਯਨਿਘਰਤੋ ਅਨਿਕ੍ਖਨ੍ਤਤਾ, ਅਪ੍ਪਟਿਸਂਵਿਦਿਤਤਾ, ਇਨ੍ਦਖੀਲਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਅਨ੍ਤੇਪੁਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਰਤਨਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਰਤਨਨ੍ਤਿ ਮੁਤ੍ਤਾਦਿਦਸਵਿਧਂ. ਰਤਨਸਮ੍ਮਤਨ੍ਤਿ ਯਂਕਿਞ੍ਚਿ ਮਨੁਸ੍ਸਾਨਂ ਉਪਭੋਗਪਰਿਭੋਗਂ. ਅਜ੍ਝਾਰਾਮੇ ਵਾਤਿ ਪਰਿਕ੍ਖਿਤ੍ਤਸ੍ਸ ਅਨ੍ਤੋਪਟਿਕ੍ਖੇਪੇ ਅਪਰਿਕ੍ਖਿਤ੍ਤਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤੋ. ਅਜ੍ਝਾਵਸਥੇਤਿ ਪਰਿਕ੍ਖਿਤ੍ਤਸ੍ਸ ਅਨ੍ਤੋਪਟਿਕ੍ਖੇਪੇ, ਅਪਰਿਕ੍ਖਿਤ੍ਤਸ੍ਸ ਮੁਸਲਪਾਤਬ੍ਭਨ੍ਤਰੇ. ਅਯਂ ਪਨੇਤ੍ਥ ਵਿਨਿਚ੍ਛਯੋ – ਜਾਤਰੂਪਰਜਤਂ ਅਤ੍ਤਨੋ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਵਾ ਉਗ੍ਗਣ੍ਹਾਪੇਨ੍ਤਸ੍ਸ ਵਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਙ੍ਘਗਣਪੁਗ੍ਗਲਚੇਤਿਯਨਵਕਮ੍ਮਾਨਂ ਅਤ੍ਥਾਯ ਦੁਕ੍ਕਟਂ, ਅਵਸੇਸੇ ਮੁਤ੍ਤਾਦਿਰਤਨੇ ਸਬ੍ਬੇਸਮ੍ਪਿ ਅਤ੍ਥਾਯ ਦੁਕ੍ਕਟਮੇਵ. ਕਪ੍ਪਿਯਵਤ੍ਥੁਂ ਵਾ ਅਕਪ੍ਪਿਯਵਤ੍ਥੁਂ ਵਾ ਅਨ੍ਤਮਸੋ ਮਾਤੁਸਨ੍ਤਕਮ੍ਪਿ ਭਣ੍ਡਾਗਾਰਿਕਸੀਸੇਨ ਪਟਿਸਾਮੇਨ੍ਤਸ੍ਸ ਪਾਚਿਤ੍ਤਿਯਂ, ਤਾਦਿਸਂ ਪਨ ਅਤ੍ਤਨੋ ਸਨ੍ਤਕਂ ਕਤ੍ਵਾ ਪਟਿਸਾਮੇਤੁਂ ਵਟ੍ਟਤਿ. ‘‘ਇਦਂ ਪਟਿਸਾਮੇਥਾ’’ਤਿ ਵੁਤ੍ਤੇ ਪਨ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ. ਸਚੇ ਕੁਪਿਤਾ ਪਾਤੇਤ੍ਵਾ ਗਚ੍ਛਨ੍ਤਿ, ਪਲਿਬੋਧੋ ਨਾਮ ਹੋਤਿ, ਪਟਿਸਾਮੇਤਬ੍ਬਂ. ਵਿਹਾਰੇ ਕਮ੍ਮਂ ਕਰੋਨ੍ਤਾ ਵਡ੍ਢਕੀਆਦਯੋ ਵਾ ਰਾਜਵਲ੍ਲਭਾ ਵਾ ‘‘ਯਂਕਿਞ੍ਚਿ ਉਪਕਰਣਂ ਵਾ ਸਯਨਭਣ੍ਡਂ ਵਾ ਪਟਿਸਾਮੇਤ੍ਵਾ ਦੇਥਾ’’ਤਿ ਵਦਨ੍ਤਿ, ਛਨ੍ਦੇਨਪਿ ਭਯੇਨਪਿ ਨ ਕਾਤਬ੍ਬਮੇਵ, ਗੁਤ੍ਤਟ੍ਠਾਨਂ ਪਨ ਦਸ੍ਸੇਤੁਂ ਵਟ੍ਟਤਿ.

ਅਜ੍ਝਾਰਾਮਅਜ੍ਝਾਵਸਥੇਸੁਪਿ ਯਾਦਿਸੇ ਠਾਨੇ ‘‘ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਗਹਿਤਂ ਭਵਿਸ੍ਸਤੀ’’ਤਿ ਆਸਙ੍ਕਾ ਉਪ੍ਪਜ੍ਜਤਿ, ਤਾਦਿਸੇਯੇਵ ਠਾਨੇ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬਂ, ‘‘ਯਸ੍ਸ ਭਣ੍ਡਂ ਨਟ੍ਠਂ, ਸੋ ਆਗਚ੍ਛਤੂ’’ਤਿ ਚ ਆਚਿਕ੍ਖਿਤਬ੍ਬਂ. ਅਥ ਯੋ ਆਗਚ੍ਛਤਿ, ਸੋ ‘‘ਕੀਦਿਸਂ ਤੇ ਭਣ੍ਡਂ ਨਟ੍ਠ’’ਨ੍ਤਿ ਪੁਚ੍ਛਿਤਬ੍ਬੋ, ਸਚੇ ਸਞ੍ਞਾਣੇਨ ਸਮ੍ਪਾਦੇਤਿ, ਦਾਤਬ੍ਬਂ. ਨੋ ਚੇ, ‘ਵਿਚਿਨਾਹੀ’ਤਿ ਵਤ੍ਤਬ੍ਬੋ. ਤਮ੍ਹਾ ਆਵਾਸਾ ਪਕ੍ਕਮਨ੍ਤੇਨ ਪਤਿਰੂਪਾਨਂ ਭਿਕ੍ਖੂਨਂ ਹਤ੍ਥੇ, ਤੇਸੁ ਅਸਤਿ ਪਤਿਰੂਪਾਨਂ ਗਹਪਤਿਕਾਨਂ ਹਤ੍ਥੇ ਨਿਕ੍ਖਿਪਿਤ੍ਵਾ ਪਕ੍ਕਮਿਤਬ੍ਬਂ. ਯੋ ਪਨ ਨੇਵ ਪਕ੍ਕਮਤਿ, ਨ ਸਾਮਿਕਂ ਪਸ੍ਸਤਿ, ਤੇਨ ਥਾਵਰਂ ਸੇਨਾਸਨਂ ਵਾ ਚੇਤਿਯਂ ਵਾ ਪੋਕ੍ਖਰਣਿਂ ਵਾ ਕਾਰੇਤਬ੍ਬੋ. ਸਚੇ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਸਾਮਿਕੋ ਆਗਚ੍ਛਤਿ, ਤਂ ਦਸ੍ਸੇਤ੍ਵਾ ‘ਅਨੁਮੋਦਾਹੀ’ਤਿ ਵਤ੍ਤਬ੍ਬੋ. ਸਚੇ ਨਾਨੁਮੋਦਤਿ, ‘‘ਦੇਹਿ ਮੇ ਧਨ’’ਨ੍ਤਿ ਚੋਦੇਤਿ, ਸਮਾਦਪੇਤ੍ਵਾ ਦਾਤਬ੍ਬਂ.

ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਰਤਨਉਗ੍ਗਣ੍ਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਅਜ੍ਝਾਰਾਮਾ ਵਾ, ਅਜ੍ਝਾਵਸਥਾ ਵਾ’’ਤਿ ਅਯਮੇਤ੍ਥ ਦੁਵਿਧਾ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਅਨੁਞ੍ਞਾਤਟ੍ਠਾਨੇ ਅਨਾਦਰਿਯੇਨ ਉਗ੍ਗਹੇਤ੍ਵਾ ਅਨਿਕ੍ਖਿਪਨ੍ਤਸ੍ਸ ਦੁਕ੍ਕਟਂ. ਅਨੁਞ੍ਞਾਤਟ੍ਠਾਨੇ ਗਹੇਤ੍ਵਾ ਨਿਕ੍ਖਿਪਨ੍ਤਸ੍ਸ, ਯਂ ਹੋਤਿ ਆਮਾਸਂ ਰਤਨਸਮ੍ਮਤਂ, ਤਂ ਵਿਸ੍ਸਾਸਂ ਵਾ ਤਾਵਕਾਲਿਕਂ ਵਾ ਉਗ੍ਗਣ੍ਹਨ੍ਤਸ੍ਸ, ਪਂਸੁਕੂਲਸਞ੍ਞਾਯ ਗਣ੍ਹਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਨਨੁਞ੍ਞਾਤਕਰਣਂ, ਪਰਸਨ੍ਤਕਤਾ, ਵਿਸ੍ਸਾਸਗ੍ਗਾਹਪਂਸੁਕੂਲਸਞ੍ਞਾਨਂ ਅਭਾਵੋ, ਉਗ੍ਗਹਣਂ ਵਾ ਉਗ੍ਗਹਾਪਨਂ ਵਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.

ਰਤਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ

ਤਤਿਯੇ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾਤਿ ਇਦਂ ਚਾਰਿਤ੍ਤੇ ਵੁਤ੍ਤਨਯਮੇਵ. ਵਿਕਾਲੇਤਿ ਮਜ੍ਝਨ੍ਹਿਕਾਤਿਕ੍ਕਮਤੋ ਪਟ੍ਠਾਯ ਅਨ੍ਤੋਅਰੁਣੇ, ਏਤਸ੍ਮਿਂ ਅਨ੍ਤਰੇ ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿ ਵਾ, ‘‘ਗਾਮਂ ਪਵਿਸਿਸ੍ਸਾਮੀ’’ਤਿ ਵਾ ਅਨਾਪੁਚ੍ਛਿਤ੍ਵਾ ਅਸਤਿ ਤਥਾਰੂਪੇ ਅਚ੍ਚਾਯਿਕੇ ਕਰਣੀਯੇ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ. ਸਚੇਪਿ ਸਮ੍ਬਹੁਲਾ ਕੇਨਚਿ ਕਮ੍ਮੇਨ ਗਾਮਂ ਪਵਿਸਨ੍ਤਿ, ਸਬ੍ਬੇਹਿ ਅਞ੍ਞਮਞ੍ਞਂ ਆਪੁਚ੍ਛਿਤਬ੍ਬਂ. ‘‘ਤਸ੍ਮਿਂ ਗਾਮੇ ਤਂ ਕਮ੍ਮਂ ਨ ਸਮ੍ਪਜ੍ਜਤੀ’’ਤਿ ਅਞ੍ਞਂ ਗਾਮਂ ਗਚ੍ਛਨ੍ਤਾਨਂ ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਪਨ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾ ਅਨ੍ਤਰਾ ਅਞ੍ਞਂ ਗਾਮਂ ਪਵਿਸਿਤੁਕਾਮਾ ਹੋਨ੍ਤਿ, ਆਪੁਚ੍ਛਿਤਬ੍ਬਮੇਵ. ਕੁਲਘਰੇ ਵਾ ਆਸਨਸਾਲਾਯਂ ਵਾ ਭਤ੍ਤਕਿਚ੍ਚਂ ਕਤ੍ਵਾ ਤੇਲਭਿਕ੍ਖਾਯ ਵਾ ਸਪ੍ਪਿਭਿਕ੍ਖਾਯ ਵਾ ਚਰਿਤੁਕਾਮੇਨ ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤਬ੍ਬੋ, ਅਸਨ੍ਤੇ ‘ਨਤ੍ਥੀ’ਤਿ ਗਨ੍ਤਬ੍ਬਂ. ਵੀਥਿਂ ਓਤਰਿਤ੍ਵਾ ਪਨ ਭਿਕ੍ਖੁਂ ਦਿਸ੍ਵਾਪਿ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਯੋ ਪਨ ਗਾਮਮਜ੍ਝੇਨ ਮਗ੍ਗੋ ਹੋਤਿ, ਸਚੇ ਤੇਨ ਗਚ੍ਛਨ੍ਤਸ੍ਸ ‘‘ਤੇਲਾਦੀਨਂ ਅਤ੍ਥਾਯ ਚਰਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਤਿ, ਪਸ੍ਸੇ ਭਿਕ੍ਖੁਂ ਦਿਸ੍ਵਾ ਆਪੁਚ੍ਛਿਤਬ੍ਬਂ. ਮਗ੍ਗਾ ਅਨੋਕ੍ਕਮ੍ਮ ਚਰਨ੍ਤਸ੍ਸ ਪਨ ਆਪੁਚ੍ਛਨਕਿਚ੍ਚਂ ਨਤ੍ਥਿ, ਓਕ੍ਕਮਨ੍ਤਸ੍ਸ ਵੁਤ੍ਤਨਯੇਨੇਵ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਵਿਕਾਲੇ ਗਾਮਪ੍ਪਵੇਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਸਨ੍ਤਂ ਭਿਕ੍ਖੁ’’ਨ੍ਤਿ ਚ ‘‘ਅਨਾਪੁਚ੍ਛਾ’’ਤਿ ਚ ‘‘ਅਞ੍ਞਤ੍ਰ ਤਥਾਰੂਪਾ ਅਚ੍ਚਾਯਿਕਾ ਕਰਣੀਯਾ’’ਤਿ ਚ ਇਮਾ ਪਨੇਤ੍ਥ ਤਿਸ੍ਸੋ ਅਨੁਪਞ੍ਞਤ੍ਤਿਯੋ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਕਾਲੇ ਵਿਕਾਲਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਕਾਲਸਞ੍ਞਿਨੋ ਪਨ, ਯੋ ਚ ਅਚ੍ਚਾਯਿਕੇ ਵਾ ਕਰਣੀਯੇ, ਸਨ੍ਤਂ ਵਾ ਆਪੁਚ੍ਛਿਤ੍ਵਾ, ਅਸਨ੍ਤਂ ਵਾ ਅਨਾਪੁਚ੍ਛਿਤ੍ਵਾ ਪਵਿਸਤਿ, ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਪਟਿਕ੍ਕਮਨੇਸੁ ਵਾ ਅਞ੍ਞਤਰਂ ਗਚ੍ਛਤਿ, ਤਸ੍ਸ, ਗਾਮੇਨ ਮਗ੍ਗੋ ਹੋਤਿ, ਤੇਨ ਗਚ੍ਛਤੋ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਤਾ, ਅਨੁਞ੍ਞਾਤਕਾਰਣਾਭਾਵੋ, ਵਿਕਾਲੇ ਗਾਮਪ੍ਪਵਿਸਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਸੂਚਿਘਰਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਭੇਦਨਮੇਵ ਭੇਦਨਕਂ, ਤਂ ਅਸ੍ਸ ਅਤ੍ਥੀਤਿ ਭੇਦਨਕਂ. ਤਸ੍ਮਾ ਏਵਰੂਪੇ ਸੂਚਿਘਰੇ ਕਰਣਕਾਰਾਪਨੇਸੁ ਦੁਕ੍ਕਟਂ, ਪਟਿਲਾਭੇਨ ਪਨ ਤਂ ਭਿਨ੍ਦਿਤ੍ਵਾ ਪਾਚਿਤ੍ਤਿਯਂ ਦੇਸੇਤਬ੍ਬਂ.

ਸਕ੍ਕੇਸੁ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਬਹੁਸੂਚਿਘਰਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਅਤ੍ਤਨਾ ਵਿਪ੍ਪਕਤਂ ਅਤ੍ਤਨਾ ਵਾ, ਪਰੇਹਿ ਵਾ, ਪਰੇਹਿ ਵਿਪ੍ਪਕਤਮ੍ਪਿ ਅਤ੍ਤਨਾ ਵਾ, ਪਰੇਹਿ ਵਾ ਪਰਿਯੋਸਾਪੇਤ੍ਵਾ ਲਭਨ੍ਤਸ੍ਸ ਚਤੁਕ੍ਕਪਾਚਿਤ੍ਤਿਯਂ. ਅਞ੍ਞਸ੍ਸਤ੍ਥਾਯ ਕਰਣਕਾਰਾਪਨੇਸੁ, ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਨੇ ਦੁਕ੍ਕਟਂ. ਗਣ੍ਠਿਕੇ ਅਰਣਿਕੇ ਵਿਧੇ ਅਞ੍ਜਨਿਯਾ ਅਞ੍ਜਨਿਸਲਾਕਾਯ ਵਾਸਿਜਟੇ ਉਦਕਪੁਞ੍ਛਨਿਯਾਤਿ ਏਤੇਸੁ ਯਂਕਿਞ੍ਚਿ ਅਟ੍ਠਿਆਦੀਹਿ ਕਰੋਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸੂਚਿਘਰਤਾ, ਅਟ੍ਠਿਮਯਾਦਿਤਾ, ਅਤ੍ਤਨੋ ਅਤ੍ਥਾਯ ਕਰਣਂ ਵਾ ਕਾਰਾਪੇਤ੍ਵਾ ਵਾ ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.

ਸੂਚਿਘਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਮਞ੍ਚਪੀਠਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਮਞ੍ਚਨ੍ਤਿ ਮਸਾਰਕਾਦੀਸੁ ਅਞ੍ਞਤਰਂ. ਪੀਠਮ੍ਪਿ ਤਾਦਿਸਮੇਵ, ਤਂ ਪਨ ਮਞ੍ਚੋ ਵਿਯ ਅਤਿਦੀਘਂ, ਆਸਨ੍ਦਿਕੋ ਵਿਯ ਚ ਸਮਂ ਚਤੁਰਸ੍ਸਂ ਨ ਹੋਤਿ. ਛੇਦਨਕਂ ਭੇਦਨਕਸਦਿਸਮੇਵ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਉਚ੍ਚੇ ਮਞ੍ਚੇ ਸਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਪਮਾਣਿਕਂ ਕਰੋਨ੍ਤਸ੍ਸ, ਪਮਾਣਾਤਿਕ੍ਕਨ੍ਤਂ ਲਭਿਤ੍ਵਾ ਛਿਨ੍ਦਿਤ੍ਵਾ ਯਥਾ ਪਮਾਣਮੇਵ ਉਪਰਿ ਦਿਸ੍ਸਤਿ, ਏਵਂ ਨਿਖਣਿਤ੍ਵਾ ਵਾ, ਉਤ੍ਤਾਨਂ ਵਾ ਕਤ੍ਵਾ, ਅਟ੍ਟਕਂ ਵਾ ਬਨ੍ਧਿਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਮਾਣਾਤਿਕ੍ਕਨ੍ਤਮਞ੍ਚਪੀਠਤਾ, ਅਤ੍ਤਨੋ ਅਤ੍ਥਾਯ ਕਰਣਂ ਵਾ ਕਾਰਾਪੇਤ੍ਵਾ ਵਾ ਪਟਿਲਾਭੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸੇਸਂ ਸਬ੍ਬਂ ਸੂਚਿਘਰਸਿਕ੍ਖਾਪਦਸਦਿਸਮੇਵਾਤਿ.

ਮਞ੍ਚਪੀਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਤੂਲਂ ਓਨਦ੍ਧਮੇਤ੍ਥਾਤਿ ਤੂਲੋਨਦ੍ਧਂ, ਚਿਮਿਲਿਕਂ ਪਤ੍ਥਰਿਤ੍ਵਾ ਤੂਲਂ ਪਕ੍ਖਿਪਿਤ੍ਵਾ ਉਪਰਿ ਚਿਮਿਲਿਕਾਯ ਓਨਦ੍ਧਨ੍ਤਿ ਵੁਤ੍ਤਂ ਹੋਤਿ. ਉਦ੍ਦਾਲਨਕਂ ਭੇਦਨਕਸਦਿਸਮੇਵ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਤੂਲੋਨਦ੍ਧਕਾਰਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਆਯੋਗੇ ਕਾਯਬਨ੍ਧਨੇ ਅਂਸਬਦ੍ਧਕੇ ਪਤ੍ਤਤ੍ਥਵਿਕਾਯ ਪਰਿਸ੍ਸਾਵਨੇ ਬਿਮ੍ਬੋਹਨੇ, ਅਞ੍ਞੇਨ ਕਤਂ ਤੂਲੋਨਦ੍ਧਂ ਪਟਿਲਭਿਤ੍ਵਾ ਉਦ੍ਦਾਲੇਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਬਿਮ੍ਬੋਹਨਞ੍ਚੇਤ੍ਥ ਸੀਸਪ੍ਪਮਾਣਮੇਵ ਵਟ੍ਟਤਿ, ਸੀਸਪ੍ਪਮਾਣਂ ਨਾਮ ਯਸ੍ਸ ਵਿਤ੍ਥਾਰਤੋ ਤੀਸੁ ਕੋਣੇਸੁ ਦ੍ਵਿਨ੍ਨਂ ਅਨ੍ਤਰਂ ਵਿਦਤ੍ਥਿਚਤੁਰਙ੍ਗੁਲਂ ਹੋਤਿ, ਮਜ੍ਝੇ ਮੁਟ੍ਠਿਰਤਨਂ, ਦੀਘਤੋ ਦਿਯਡ੍ਢਰਤਨਂ ਵਾ ਦ੍ਵਿਰਤਨਂ ਵਾ. ਤੂਲੋਨਦ੍ਧਮਞ੍ਚਪੀਠਤਾ, ਅਤ੍ਤਨੋ ਅਤ੍ਥਾਯ ਕਰਣਂ ਵਾ ਕਾਰਾਪੇਤ੍ਵਾ ਵਾ ਪਟਿਲਾਭੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਤੂਲੋਨਦ੍ਧਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਿਸੀਦਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਨਿਸੀਦਨਨ੍ਤਿ ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਪ੍ਪਮਾਣਂ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਕਤਾਹਿ ਤੀਹਿ ਦਸਾਹਿ ਯੁਤ੍ਤਸ੍ਸ ਪਰਿਕ੍ਖਾਰਸ੍ਸੇਤਂ ਨਾਮਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਪ੍ਪਮਾਣਿਕਾਨਿ ਨਿਸੀਦਨਾਨਿ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਦਸਾ ਵਿਦਤ੍ਥੀ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਪਮਾਣਿਕਂ ਵਾ ਊਨਕਂ ਵਾ ਕਰੋਨ੍ਤਸ੍ਸ, ਅਞ੍ਞੇਨ ਕਤਂ ਪਮਾਣਾਤਿਕ੍ਕਨ੍ਤਂ ਪਟਿਲਭਿਤ੍ਵਾ ਛਿਨ੍ਦਿਤ੍ਵਾ ਪਰਿਭੁਞ੍ਜਨ੍ਤਸ੍ਸ, ਵਿਤਾਨਾਦੀਸੁ ਯਂਕਿਞ੍ਚਿ ਕਰੋਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਨਿਸੀਦਨਸ੍ਸ ਪਮਾਣਾਤਿਕ੍ਕਨ੍ਤਤਾ, ਅਤ੍ਤਨੋ ਅਤ੍ਥਾਯ ਕਰਣਂ ਵਾ ਕਾਰਾਪੇਤ੍ਵਾ ਵਾ ਪਟਿਲਾਭੋਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਨਿਸੀਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਕਣ੍ਡੁਪ੍ਪਟਿਚ੍ਛਾਦਿਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਕਣ੍ਡੁਪ੍ਪਟਿਚ੍ਛਾਦਿਨ੍ਤਿ ਅਧੋਨਾਭਿਉਬ੍ਭਜਾਣੁਮਣ੍ਡਲਂ ਕਣ੍ਡੁਪੀਲ਼ਕਅਸ੍ਸਾਵਥੁਲ੍ਲਕਚ੍ਛਾਬਾਧਾਨਂ ਪਟਿਚ੍ਛਾਦਨਤ੍ਥਂ ਅਨੁਞ੍ਞਾਤਂ ਚੀਵਰਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਪ੍ਪਮਾਣਿਕਾਯੋ ਕਣ੍ਡੁਪ੍ਪਟਿਚ੍ਛਾਦਿਕਾਯੋ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸੇਸਂ ਨਿਸੀਦਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਕਣ੍ਡੁਪ੍ਪਟਿਚ੍ਛਾਦਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

ਨਵਮੇ ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਪ੍ਪਮਾਣਿਕਾਯੋ ਵਸ੍ਸਿਕਸਾਟਿਕਾਯੋ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਯਂ ਵਤ੍ਤਬ੍ਬਂ, ਤਂ ਨਿਸੀਦਨੇ ਵੁਤ੍ਤਨਯਮੇਵਾਤਿ.

ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਨਨ੍ਦਸਿਕ੍ਖਾਪਦਵਣ੍ਣਨਾ

ਦਸਮੇ ਸਾਵਤ੍ਥਿਯਂ ਆਯਸ੍ਮਨ੍ਤਂ ਨਨ੍ਦਂ ਆਰਬ੍ਭ ਸੁਗਤਚੀਵਰਪ੍ਪਮਾਣਂ ਚੀਵਰਂ ਧਾਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸੇਸਂ ਨਿਸੀਦਨੇ ਵੁਤ੍ਤਨਯਮੇਵਾਤਿ.

ਨਨ੍ਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਰਤਨਵਗ੍ਗੋ ਨਵਮੋ.

ਕਙ੍ਖਾਵਿਤਰਣਿਯਾ ਪਾਤਿਮੋਕ੍ਖਵਣ੍ਣਨਾਯ

ਸੁਦ੍ਧਪਾਚਿਤ੍ਤਿਯਵਣ੍ਣਨਾ ਨਿਟ੍ਠਿਤਾ.