੮. ਸਹਧਮ੍ਮਿਕਵਗ੍ਗੋ
੧. ਸਹਧਮ੍ਮਿਕਸਿਕ੍ਖਾਪਦਵਣ੍ਣਨਾ
ਸਹਧਮ੍ਮਿਕਵਗ੍ਗਸ੍ਸ ਪਠਮੇ ਸਹਧਮ੍ਮਿਕਂ ਵੁਚ੍ਚਮਾਨੋਤਿ ਇਮਸ੍ਸਤ੍ਥੋ ਦੁਬ੍ਬਚਸਿਕ੍ਖਾਪਦੇ ਵੁਤ੍ਤੋ. ਏਤਸ੍ਮਿਂ ਸਿਕ੍ਖਾਪਦੇਤਿ ਏਤਸ੍ਮਿਂ ਸਿਕ੍ਖਾਪਦੇ ਯਂ ਵੁਤ੍ਤਂ, ਤਂ ਨ ਤਾਵ ਸਿਕ੍ਖਿਸ੍ਸਾਮੀਤਿ ਅਤ੍ਥੋ. ਪਾਚਿਤ੍ਤਿਯਨ੍ਤਿ ਏਤ੍ਥ ਪਨ ਅਨਾਦਰਿਯਭਯਾ ਲੇਸੇਨ ਏਵਂ ਵਦਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਂ ਵੇਦਿਤਬ੍ਬਂ. ਸਿਕ੍ਖਮਾਨੇਨਾਤਿ ਓਵਾਦਂ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਸਿਕ੍ਖਿਤੁਕਾਮੇਨੇਵ ਹੁਤ੍ਵਾ. ਅਞ੍ਞਾਤਬ੍ਬਨ੍ਤਿ ਆਜਾਨਿਤਬ੍ਬਂ. ਪਰਿਪੁਚ੍ਛਿਤਬ੍ਬਨ੍ਤਿ ‘‘ਇਮਸ੍ਸ ਕੋ ਅਤ੍ਥੋ’’ਤਿ ਪਰਿਪੁਚ੍ਛਿਤਬ੍ਬਂ. ਪਰਿਪਞ੍ਹਿਤਬ੍ਬਨ੍ਤਿ ਚਿਨ੍ਤੇਤਬ੍ਬਂ ਤੁਲਯਿਤਬ੍ਬਂ.
ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਏਵਂ ਭਣਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਉਭੋਹਿਪਿ ‘‘ਇਦਂ ਨ ਸਲ੍ਲੇਖਾਯਾ’’ਤਿਆਦਿਨਾ (ਪਾਚਿ. ੪੩੬) ਨਯੇਨੇਵ ਅਪ੍ਪਞ੍ਞਤ੍ਤੇਨ ਵੁਚ੍ਚਮਾਨਸ੍ਸਾਪਿ ਏਵਂ ਵਦਤੋ ਦੁਕ੍ਕਟਮੇਵ. ‘‘ਜਾਨਿਸ੍ਸਾਮਿ ਸਿਕ੍ਖਿਸ੍ਸਾਮੀ’’ਤਿ ਭਣਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਸ੍ਸ ਪਞ੍ਞਤ੍ਤੇਨ ਵਚਨਂ, ਅਸਿਕ੍ਖਿਤੁਕਾਮਤਾਯ ਏਵਂ ਵਚਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਸਹਧਮ੍ਮਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਵਿਲੇਖਨਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਉਦ੍ਦਿਸ੍ਸਮਾਨੇਤਿ ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਵੁਚ੍ਚਮਾਨੇ ਵਾ ਸਜ੍ਝਾਯਵਸੇਨ ਪਰਿਵਤ੍ਤਿਯਮਾਨੇ ਵਾ. ਖੁਦ੍ਦਾਨੁਖੁਦ੍ਦਕੇਹੀਤਿ ਖੁਦ੍ਦਕੇਹਿ ਚ ਅਨੁਖੁਦ੍ਦਕੇਹਿ ਚ. ਯਾਵਦੇਵਾਤਿ ਤੇਸਂ ਸਂਵਤ੍ਤਨਮਰਿਯਾਦਪਰਿਚ੍ਛੇਦਵਚਨਂ. ਇਦਂ ਵੁਤ੍ਤਂ ਹੋਤਿ – ਏਤਾਨਿ ਹਿ ਯੇ ਉਦ੍ਦਿਸਨ੍ਤਿ ਵਾ ਉਦ੍ਦਿਸਾਪੇਨ੍ਤਿ ਵਾ ਸਜ੍ਝਾਯਨ੍ਤਿ ਵਾ, ਤੇਸਂ ਤਾਵ ਸਂਵਤ੍ਤਨ੍ਤਿ, ਯਾਵ ‘‘ਕਪ੍ਪਤਿ ਨੁ ਖੋ, ਨ ਕਪ੍ਪਤਿ ਨੁ ਖੋ’’ਤਿ ਕੁਕ੍ਕੁਚ੍ਚਵਿਪ੍ਪਟਿਸਾਰੋ, ਵਿਹੇਸਾ, ਵਿਚਿਕਿਚ੍ਛਾ ਮਨੋਵਿਲੇਖਾ ਚ ਉਪ੍ਪਜ੍ਜਨ੍ਤਿਯੇਵ. ਅਥ ਵਾ ਯਾਵਦੇਵਾਤਿ ਅਤਿਸਯਵਵਤ੍ਥਾਪਨਂ. ਤਸ੍ਸ ‘ਸਂਵਤ੍ਤਨ੍ਤੀ’ਤਿਇਮਿਨਾ ਸਮ੍ਬਨ੍ਧੋ, ਕੁਕ੍ਕੁਚ੍ਚਾਯ ਵਿਹੇਸਾਯ ਵਿਲੇਖਾਯ ਅਤਿਵਿਯ ਸਂਵਤ੍ਤਨ੍ਤਿਯੇਵਾਤਿ ਵੁਤ੍ਤਂ ਹੋਤਿ. ਸਿਕ੍ਖਾਪਦਵਿਵਣ੍ਣਕੇਤਿ ਏਵਂ ਸਿਕ੍ਖਾਪਦਾਨਂ ਵਿਵਣ੍ਣਕੇ ਗਰਹਣੇ ਪਾਚਿਤ੍ਤਿਯਂ ਹੋਤੀਤਿ ਅਤ੍ਥੋ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਵਿਨਯਵਿਵਣ੍ਣਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਸ੍ਸ ਵਿਵਣ੍ਣਨੇ ਤਿਕਦੁਕ੍ਕਟਂ, ਉਭਿਨ੍ਨਮ੍ਪਿ ਅਞ੍ਞਧਮ੍ਮਵਿਵਣ੍ਣਨੇ ਦੁਕ੍ਕਟਮੇਵ. ਨ ਵਿਵਣ੍ਣੇਤੁਕਾਮਸ੍ਸ, ‘‘ਇਙ੍ਘ ਤਾਵ ਸੁਤ੍ਤਨ੍ਤੇ ਵਾ ਗਾਥਾਯੋ ਵਾ ਅਭਿਧਮ੍ਮਂ ਵਾ ਪਰਿਯਾਪੁਣਸ੍ਸੁ, ਪਚ੍ਛਾਪਿ ਵਿਨਯਂ ਪਰਿਯਾਪੁਣਿਸ੍ਸਸੀ’’ਤਿ ਭਣਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਗਰਹਿਤੁਕਾਮਤਾ ਚ, ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਸਿਕ੍ਖਾਪਦਵਿਵਣ੍ਣਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਵਿਲੇਖਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਮੋਹਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਅਨ੍ਵਡ੍ਢਮਾਸਨ੍ਤਿ ਅਨੁਪਟਿਪਾਟਿਯਾ ਅਦ੍ਧਮਾਸੇ ਅਦ੍ਧਮਾਸੇ. ਉਦ੍ਦਿਸ੍ਸਮਾਨੇਤਿ ਉਪੋਸਥਵਸੇਨ ਉਦ੍ਦਿਸਿਯਮਾਨੇ. ਯਞ੍ਚ ਤਤ੍ਥ ਆਪਤ੍ਤਿਂ ਆਪਨ੍ਨੋਤਿ ਯਂ ਸੋ ਅਨਾਚਾਰਂ ਆਚਰਿਤ੍ਵਾ ਅਞ੍ਞਾਣਕੇਨ ਆਪਨ੍ਨਭਾਵਂ ਜਾਨਾਪੇਤੁਕਾਮੋ ਏਵਮਾਹ, ਤਸ੍ਮਿਂ ਅਨਾਚਾਰੇ ਯਂ ਆਪਤ੍ਤਿਂ ਆਪਨ੍ਨੋ. ਤਞ੍ਚ ਯਥਾਧਮ੍ਮੋ ਕਾਰੇਤਬ੍ਬੋਤਿ ਅਞ੍ਞਾਣਕੇਨ ਆਪਨ੍ਨਤ੍ਤਾ ਮੋਕ੍ਖੋ ਨਤ੍ਥਿ, ਯਥਾ ਪਨ ਧਮ੍ਮੋ ਚ ਵਿਨਯੋ ਚ ਠਿਤੋ, ਤਥਾ ਤਂ ਆਪਤ੍ਤਿਂ ਕਾਰੇਤਬ੍ਬੋ, ਦੇਸਨਾਗਾਮਿਨਿਯਾ ਦੇਸਾਪੇਤਬ੍ਬੋ, ਵੁਟ੍ਠਾਨਗਾਮਿਨਿਯਾ ਵੁਟ੍ਠਾਪੇਤਬ੍ਬੋਤਿ ਅਤ੍ਥੋ. ਉਤ੍ਤਰਿ ਚਸ੍ਸ ਮੋਹੋ ਆਰੋਪੇਤਬ੍ਬੋਤਿ ਯਥਾਧਮ੍ਮਕਰਣਤੋ ਚ ਉਤ੍ਤਰਿ ‘‘ਤਸ੍ਸ ਤੇ, ਆਵੁਸੋ’’ਤਿਆਦਿਵਚਨੇਹਿ ਨਿਨ੍ਦਿਤ੍ਵਾ ਤਸ੍ਸ ਪੁਗ੍ਗਲਸ੍ਸ ਞਤ੍ਤਿਦੁਤਿਯਕਮ੍ਮੇਨ ਮੋਹੋ ਆਰੋਪੇਤਬ੍ਬੋ. ਇਦਂ ਤਸ੍ਮਿਂ ਮੋਹਨਕੇ ਪਾਚਿਤ੍ਤਿਯਨ੍ਤਿ ਯੋ ਏਵਂ ਆਰੋਪਿਤੇ ਮੋਹੇ ਪੁਨ ਮੋਹੇਤਿ, ਤਸ੍ਮਿਂ ਮੋਹਨਕੇ ਪੁਗ੍ਗਲੇ ਇਦਂ ਪਾਚਿਤ੍ਤਿਯਂ ਵੇਦਿਤਬ੍ਬਂ, ਨ ਅਨਾਰੋਪਿਤੇ ਮੋਹੇਤਿ ਅਤ੍ਥੋ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਮੋਹਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਅਨਾਰੋਪਿਤੇ ਮੋਹੇ ਦੁਕ੍ਕਟਮੇਵ. ਯੇਨ ਨ ਵਿਤ੍ਥਾਰੇਨ ਸੁਤਂ, ਊਨਕਦ੍ਵਤ੍ਤਿਕ੍ਖਤ੍ਤੁਂ ਵਾ ਵਿਤ੍ਥਾਰੇਨ ਸੁਤਂ, ਯੇ ਚ ਨ ਮੋਹੇਤੁਕਾਮਾ ਤੇਸਂ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਮੋਹਾਰੋਪਨਂ, ਮੋਹੇਤੁਕਾਮਤਾ, ਵੁਤ੍ਤਨਯੇਨ ਸੁਤਭਾਵੋ, ਮੋਹਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਮੋਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਪਹਾਰਸਿਕ੍ਖਾਪਦਵਣ੍ਣਨਾ
ਚਤੁਤ੍ਥੇ ਪਹਾਰਂ ਦਦੇਯ੍ਯਾਤਿ ਏਤ੍ਥ ਪਹਰਿਤੁਕਾਮਤਾਯ ਪਹਾਰੇ ਦਿਨ੍ਨੇ ਸਚੇਪਿ ਮਰਤਿ, ਪਾਚਿਤ੍ਤਿਯਮੇਵ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਪਹਾਰਦਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਵਿਰੂਪਕਰਣਾਧਿਪ੍ਪਾਯੇਨ ਪਨ ਉਪਸਮ੍ਪਨ੍ਨਸ੍ਸਪਿ ਕਣ੍ਣਾਦਿਚ੍ਛੇਦਨੇ ਦੁਕ੍ਕਟਮੇਵ. ਕੇਨਚਿ ਵਿਹੇਠਿਯਮਾਨਸ੍ਸ ਪਨ ਮੋਕ੍ਖਾਧਿਪ੍ਪਾਯਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਕੁਪਿਤਤਾ, ਨ ਮੋਕ੍ਖਾਧਿਪ੍ਪਾਯਤਾ, ਉਪਸਮ੍ਪਨ੍ਨਸ੍ਸ ਪਹਾਰਦਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਪਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ
ਪਞ੍ਚਮੇ ਤਲਸਤ੍ਤਿਕਂ ਉਗ੍ਗਿਰੇਯ੍ਯਾਤਿ ਪਹਾਰਦਾਨਾਕਾਰਂ ਦਸ੍ਸੇਨ੍ਤੋ ਕਾਯਂ ਵਾ ਕਾਯਪ੍ਪਟਿਬਦ੍ਧਂ ਵਾ ਉਚ੍ਚਾਰੇਯ੍ਯ. ਏਤ੍ਥ ਚ ਉਗ੍ਗਿਰਣਪਚ੍ਚਯਾ ਪਾਚਿਤ੍ਤਿਯਂ. ਸਚੇ ਪਨ ਉਗ੍ਗਿਰਿਤ੍ਵਾ ਵਿਰਦ੍ਧੋ ਪਹਾਰਂ ਦੇਤਿ, ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਮੇਵ, ਤੇਨ ਪਹਾਰੇਨ ਹਤ੍ਥਾਦੀਸੁ ਯਂਕਿਞ੍ਚਿ ਭਿਜ੍ਜਤਿ, ਦੁਕ੍ਕਟਮੇਵ. ਸੇਸਮੇਤ੍ਥ ਸਬ੍ਬਂ ਪੁਰਿਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਤਲਸਤ੍ਤਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਅਮੂਲਕਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਅਮੂਲਕੇਨਾਤਿ ਦਿਟ੍ਠਾਦਿਮੂਲਵਿਰਹਿਤੇਨ. ਅਨੁਦ੍ਧਂਸੇਯ੍ਯਾਤਿ ਚੋਦੇਯ੍ਯ ਵਾ ਚੋਦਾਪੇਯ੍ਯ ਵਾ. ਪਾਚਿਤ੍ਤਿਯਨ੍ਤਿ ਸਚੇ ਚੁਦਿਤਕੋ ਤਙ੍ਖਣਞ੍ਞੇਵ ‘‘ਚੋਦੇਤਿ ਮ’’ਨ੍ਤਿ ਜਾਨਾਤਿ, ਚੋਦਕਸ੍ਸ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਆਚਾਰਵਿਪਤ੍ਤਿਯਾ ਵਾ ਦਿਟ੍ਠਿਵਿਪਤ੍ਤਿਯਾ ਵਾ ਅਨੁਦ੍ਧਂਸਨੇ ਦੁਕ੍ਕਟਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ. ਤਥਾਸਞ੍ਞਿਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਸਙ੍ਘਾਦਿਸੇਸਸ੍ਸ ਅਮੂਲਕਤਾ, ਅਨੁਦ੍ਧਂਸਨਾ, ਤਙ੍ਖਣਵਿਜਾਨਨਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਅਮੂਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਕੁਕ੍ਕੁਚ੍ਚਂ ਉਪਦਹੇਯ੍ਯਾਤਿ ‘‘ਊਨਵੀਸਤਿਵਸ੍ਸੋ ਤ੍ਵਂ ਮਞ੍ਞੇ’’ਤਿਆਦੀਨਿ (ਪਾਚਿ. ੪੬੬) ਭਣਨ੍ਤੋ ਉਪ੍ਪਾਦੇਯ੍ਯ. ਏਵਂ ਅਞ੍ਞਸ੍ਮਿਂ ਉਪ੍ਪਾਦਨਪਚ੍ਚਯੇ ਅਸਤਿ ਸਞ੍ਚਿਚ੍ਚ ਉਪ੍ਪਾਦੇਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਕੁਕ੍ਕੁਚ੍ਚਉਪ੍ਪਾਦਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ. ਨਉਪ੍ਪਾਦੇਤੁਕਾਮਸ੍ਸ, ਕੇਵਲਂ ਹਿਤੇਸਿਤਾਯ ਤਥਾ ਵਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਅਫਾਸੁਕਾਮਤਾ, ਕੁਕ੍ਕੁਚ੍ਚੁਪ੍ਪਾਦਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਨਨ੍ਤਰਸਦਿਸਾਨੇਵਾਤਿ.
ਸਞ੍ਚਿਚ੍ਚਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਵਿਵਾਦਾਪਨ੍ਨਾਨਨ੍ਤਿ ਭਣ੍ਡਨਕਲਹੇਹਿ ਵਿਵਡ੍ਢਿਤਂ ਵਿਵਾਦਾਧਿਕਰਣਂ ਆਪਨ੍ਨਾਨਂ. ਉਪਸ੍ਸੁਤਿਨ੍ਤਿ ਸੁਤਿਸਮੀਪਂ, ਯਤ੍ਥ ਠਤ੍ਵਾ ਸਕ੍ਕਾ ਹੋਤਿ ਤੇਸਂ ਵਚਨਂ ਸੋਤੁਂ, ਤਤ੍ਥ ਤਿਟ੍ਠੇਯ੍ਯਾਤਿ ਅਤ੍ਥੋ. ‘‘ਤਤ੍ਥ ਸੋਸ੍ਸਾਮੀ’’ਤਿ ਚੋਦੇਤੁਕਾਮਤਾਯ ਗਚ੍ਛਤੋ ਪਦੇ ਪਦੇ ਦੁਕ੍ਕਟਂ, ਤੁਰਿਤਗਮਨੇਪਿ ਓਹੀਯਮਾਨੇਪਿ ਏਸੇਵ ਨਯੋ. ਯਤ੍ਥ ਪਨ ਠਿਤੋ ਸੁਣਾਤਿ, ਤਤ੍ਥ ਠਿਤਸ੍ਸ ਪਾਚਿਤ੍ਤਿਯਂ, ਅਤ੍ਤਨੋ ਠਿਤੋਕਾਸਂ ਆਗਨ੍ਤ੍ਵਾ ਤੇਸੁ ਮਨ੍ਤਯਮਾਨੇਸੁਪਿ ਉਕ੍ਕਾਸਿਤ੍ਵਾ, ‘‘ਅਹਂ ਏਤ੍ਥਾ’’ਤਿ ਵਾ ਵਤ੍ਵਾ ਜਾਨਾਪੇਤਬ੍ਬਂ, ਏਵਂ ਅਕਰੋਨ੍ਤਸ੍ਸਾਪਿ ਸਵਨੇ ਪਾਚਿਤ੍ਤਿਯਮੇਵ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਉਪਸ੍ਸੁਤਿਟ੍ਠਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ‘‘ਇਮੇਸਂ ਸੁਤ੍ਵਾ ਓਰਮਿਸ੍ਸਾਮਿ ਵਿਰਮਿਸ੍ਸਾਮਿ ਵੂਪਸਮਿਸ੍ਸਾਮਿ ਅਤ੍ਤਾਨਂ ਪਰਿਮੋਚੇਸ੍ਸਾਮੀ’’ਤਿ (ਪਾਚਿ. ੪੭੩) ਗਚ੍ਛਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਚੋਦਨਾਧਿਪ੍ਪਾਯੋ, ਸਵਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਥੇਯ੍ਯਸਤ੍ਥਸਮੁਟ੍ਠਾਨਂ ਇਦਂ ਪਨ ਸਿਯਾ ਕਿਰਿਯਂ, ਸਿਯਾ ਅਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.
ਉਪਸ੍ਸੁਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਕਮ੍ਮਪ੍ਪਟਿਬਾਹਨਸਿਕ੍ਖਾਪਦਵਣ੍ਣਨਾ
ਨਵਮੇ ਧਮ੍ਮਿਕਾਨਂ ਕਮ੍ਮਾਨਨ੍ਤਿ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਕਤਾਨਂ ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਨ੍ਤਿ ਇਮੇਸਂ ਚਤੁਨ੍ਨਂ ਕਮ੍ਮਾਨਂ. ਤਤ੍ਰਾਯਂ ਸਙ੍ਖੇਪਤੋ ਕਮ੍ਮਵਿਨਿਚ੍ਛਯੋ – ਤਤ੍ਰ ਅਪਲੋਕਨਕਮ੍ਮਂ ਨਾਮ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਤਂ ਤਂ ਵਤ੍ਥੁਂ ਕਿਤ੍ਤੇਤ੍ਵਾ ‘‘ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਂ ਕਮ੍ਮਂ ਵੁਚ੍ਚਤਿ. ਸਮਗ੍ਗਸ੍ਸੇਵ ਪਨ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਕਤ੍ਤਬ੍ਬਂ ਕਮ੍ਮਂ ਞਤ੍ਤਿਕਮ੍ਮਂ ਨਾਮ. ਏਕਾਯ ਞਤ੍ਤਿਯਾ ਚੇਵ ਅਨੁਸ੍ਸਾਵਨਾਯ ਚ ਕਤ੍ਤਬ੍ਬਂ ਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਨਾਮ. ਏਕਾਯ ਪਨ ਞਤ੍ਤਿਯਾ ਤੀਹਿ ਚ ਅਨੁਸ੍ਸਾਵਨਾਹਿ ਕਤ੍ਤਬ੍ਬਂ ਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਂ ਨਾਮ.
ਤੇਸੁ ਅਪਲੋਕਨਕਮ੍ਮਂ (ਪਰਿ. ੪੯੬; ਪਰਿ. ਅਟ੍ਠ. ੪੯੫-੪੯੬) ਪਞ੍ਚ ਠਾਨਾਨਿ ਗਚ੍ਛਤਿ ਓਸਾਰਣਂ ਨਿਸ੍ਸਾਰਣਂ ਭਣ੍ਡੁਕਮ੍ਮਂ ਬ੍ਰਹ੍ਮਦਣ੍ਡਂ ਕਮ੍ਮਲਕ੍ਖਣਨ੍ਤਿ. ਤਤ੍ਥ ਕਣ੍ਟਕਸਾਮਣੇਰਸ੍ਸ ਨਾਸਨਾ ਵਿਯ ਨਿਸ੍ਸਾਰਣਾ, ਤਾਦਿਸਂਯੇਵ ਸਮ੍ਮਾਵਤ੍ਤਨ੍ਤਂ ਦਿਸ੍ਵਾ ਪਵੇਸਨਾ ‘ਓਸਾਰਣਾ’ਤਿ ਵੇਦਿਤਬ੍ਬਾ. ਪਬ੍ਬਜ੍ਜਾਪੇਕ੍ਖਸ੍ਸ ਕੇਸਚ੍ਛੇਦਨਾਪੁਚ੍ਛਨਂ ਭਣ੍ਡੁਕਮ੍ਮਂ (ਮਹਾਵ. ੯੮) ਨਾਮ. ਮੁਖਰਸ੍ਸ ਭਿਕ੍ਖੁਨੋ ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤਸ੍ਸ ‘‘ਇਤ੍ਥਨ੍ਨਾਮੋ ਭਿਕ੍ਖੁ ਮੁਖਰੋ ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤੋ ਵਿਹਰਤਿ, ਸੋ ਭਿਕ੍ਖੁ ਯਂ ਇਚ੍ਛੇਯ੍ਯ, ਤਂ ਵਦੇਯ੍ਯ, ਭਿਕ੍ਖੂਹਿ ਇਤ੍ਥਨ੍ਨਾਮੋ ਭਿਕ੍ਖੁ ਨੇਵ ਵਤ੍ਤਬ੍ਬੋ, ਨ ਓਵਾਦਾਨੁਸਾਸਨਿਂ ਕਤ੍ਤਬ੍ਬੋ, ਨ ਓਵਦਿਤਬ੍ਬੋ’’ਤਿ ‘‘ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ ‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’ਤਿ, ਦੁਤਿਯਮ੍ਪਿ ਪੁਚ੍ਛਾਮਿ, ਤਤਿਯਮ੍ਪਿ ਪੁਚ੍ਛਾਮਿ ‘ਇਤ੍ਥਨ੍ਨਾਮਸ੍ਸ, ਭਨ੍ਤੇ, ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’’’ਤਿ ਏਵਂ ਕਤ੍ਤਬ੍ਬਂ ਕਮ੍ਮਂ ਬ੍ਰਹ੍ਮਦਣ੍ਡਂ (ਚੂਲ਼ਵ. ੪੪੫) ਨਾਮ. ਯਂ ਪਨ ਭਗਵਤਾ ਭਿਕ੍ਖੁਨੀਨਂ ਊਰੁਂ ਵਿਵਰਿਤ੍ਵਾ ਦਸ੍ਸਨਾਦਿਵਤ੍ਥੂਸੁ ‘‘ਅਵਨ੍ਦਿਯੋ ਸੋ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ (ਚੂਲ਼ਵ. ੪੧੧) ਏਵਂ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਂ, ਯਂ ਭਿਕ੍ਖੁਨੀਹਿ ‘‘ਅਯ੍ਯੇ, ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪ੍ਪਸਾਦਨੀਯਂ ਦਸ੍ਸੇਤਿ, ਏਤਸ੍ਸ ਅਯ੍ਯਸ੍ਸ ਅਵਨ੍ਦਿਯਕਰਣਂ ‘ਰੁਚ੍ਚਤਿ ਭਿਕ੍ਖੁਨਿਸਙ੍ਘਸ੍ਸਾ’’’ਤਿ ਏਵਂ ਉਪਸ੍ਸਯੇ ਨਿਸਿਨ੍ਨਾਹੇਵ ਭਿਕ੍ਖੁਨੀਹਿ ਕਤ੍ਤਬ੍ਬਂ, ਏਵਰੂਪਂ ਕਮ੍ਮਂ ਯਸ੍ਮਾ ਤਸ੍ਸ ਕਮ੍ਮਂਯੇਵ ਲਕ੍ਖਣਂ ਨ ਓਸਾਰਣਾਦੀਨਿ, ਤਸ੍ਮਾ ਕਮ੍ਮਲਕ੍ਖਣਨ੍ਤਿ ਵੁਚ੍ਚਤਿ. ਇਦਞ੍ਚ ਕਮ੍ਮਲਕ੍ਖਣਂ ਨਾਮ ਭਿਕ੍ਖੁਨਿਮੂਲਕਂ ਪਞ੍ਞਤ੍ਤਂ, ਅਪਿਚ ਭਿਕ੍ਖੂਨਮ੍ਪਿ ਲਬ੍ਭਤਿ, ਤਸ੍ਮਾ ਭਿਕ੍ਖੂਹਿਪਿ ਅਚ੍ਛਿਨ੍ਨਚੀਵਰਕਾਦੀਨਂ ਚੀਵਰਾਦੀਨਿ ਵਾ ਦੇਨ੍ਤੇਹਿ, ਪਰਿਭੁਞ੍ਜਿਤਬ੍ਬਾਨਿ ਅਪਨੇਤਬ੍ਬਾਨਿਪਿ ਵਤ੍ਥੂਨਿ ਪਰਿਭੁਞ੍ਜਨ੍ਤੇਹਿ ਵਾ, ਅਪਨੇਨ੍ਤੇਹਿ ਵਾ, ਤਥਾਰੂਪਂ ਵਾ ਧਮ੍ਮਿਕਂ ਕਤਿਕਂ ਕਰੋਨ੍ਤੇਹਿ ਤਿਕ੍ਖਤ੍ਤੁਂ ਸਾਵੇਤ੍ਵਾ ਅਪਲੋਕਨਕਮ੍ਮਂ ਕਾਤਬ੍ਬਂ, ਸਬ੍ਬਞ੍ਹੇਤਂ ਕਮ੍ਮਲਕ੍ਖਣਮੇਵ ਪਵਿਸਤਿ, ਇਤਿ ਅਪਲੋਕਨਕਮ੍ਮਂ ਪਞ੍ਚ ਠਾਨਾਨਿ ਗਚ੍ਛਤਿ.
ਞਤ੍ਤਿਕਮ੍ਮਂ ਪਨ ਨਵ ਠਾਨਾਨਿ ਗਚ੍ਛਤਿ ਓਸਾਰਣਂ ਨਿਸ੍ਸਾਰਣਂ ਉਪੋਸਥਂ ਪਵਾਰਣਂ ਸਮ੍ਮੁਤਿਂ ਦਾਨਂ ਪਟਿਗ੍ਗਹਂ ਪਚ੍ਚੁਕ੍ਕਡ੍ਢਨਂ ਕਮ੍ਮਲਕ੍ਖਣਨ੍ਤਿ. ਤਤ੍ਥ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਅਨੁਸਿਟ੍ਠੋ ਸੋ ਮਯਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਆਗਚ੍ਛੇਯ੍ਯ, ‘ਆਗਚ੍ਛਾਹੀ’ਤਿ ਵਤ੍ਤਬ੍ਬੋ’’ਤਿ (ਮਹਾਵ. ੧੨੬) ਏਵਂ ਉਪਸਮ੍ਪਦਾਪੇਕ੍ਖਸ੍ਸ ਓਸਾਰਣਾ ਓਸਾਰਣਾ ਨਾਮ. ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਧਮ੍ਮਕਥਿਕੋ, ਇਮਸ੍ਸ ਨੇਵ ਸੁਤ੍ਤਂ ਆਗਚ੍ਛਤਿ, ਨੋ ਸੁਤ੍ਤਵਿਭਙ੍ਗੋ, ਸੋ ਅਤ੍ਥਂ ਅਸਲ੍ਲਕ੍ਖੇਤ੍ਵਾ ਬ੍ਯਞ੍ਜਨਚ੍ਛਾਯਾਯ ਅਤ੍ਥਂ ਪਟਿਬਾਹਤਿ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਂ ਭਿਕ੍ਖੁਂ ਵੁਟ੍ਠਾਪੇਤ੍ਵਾ ਅਵਸੇਸਾ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ ਏਵਂ ਉਬ੍ਭਾਹਿਕਵਿਨਿਚ੍ਛਯੇ (ਚੂਲ਼ਵ. ੨੩੩) ਧਮ੍ਮਕਥਿਕਸ੍ਸ ਭਿਕ੍ਖੁਨੋ ਨਿਸ੍ਸਾਰਣਾ ਨਿਸ੍ਸਾਰਣਾ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜੁਪੋਸਥੋ…ਪੇ… ਉਪੋਸਥਂ ਕਰੇਯ੍ਯਾ’’ਤਿ ਏਵਂ ਉਪੋਸਥਕਮ੍ਮਵਸੇਨ ਠਪਿਤਾ ਞਤ੍ਤਿ ਉਪੋਸਥੋ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜ ਪਵਾਰਣਾ ਪਨ੍ਨਰਸੀ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ (ਮਹਾਵ. ੨੧੦) ਏਵਂ ਪਵਾਰਣਾਕਮ੍ਮਵਸੇਨ ਠਪਿਤਾ ਞਤ੍ਤਿ ਪਵਾਰਣਾ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਪੇਕ੍ਖੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’’ਨ੍ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’’ਤਿ (ਮਹਾਵ. ੧੨੬) ਏਵਂ ਅਤ੍ਤਾਨਂ ਵਾ ਪਰਂ ਵਾ ਸਮ੍ਮਨ੍ਨਿਤੁਂ ਠਪਿਤਾ ਞਤ੍ਤਿ ਸਮ੍ਮੁਤਿ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਙ੍ਘਸ੍ਸ ਨਿਸ੍ਸਟ੍ਠਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯਾ’’ਤਿ (ਪਾਰਾ. ੪੬੪) ਏਵਂ ਨਿਸ੍ਸਟ੍ਠਚੀਵਰਪਤ੍ਤਾਦੀਨਂ ਦਾਨਂ ਦਾਨਂ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ ਵਿਵਰਤਿ ਉਤ੍ਤਾਨਿਂ ਕਰੋਤਿ ਦੇਸੇਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’’ਨ੍ਤਿ, ਤੇਨ ਵਤ੍ਤਬ੍ਬੋ ‘ਪਸ੍ਸਸੀ’ਤਿ, ‘ਆਮ, ਪਸ੍ਸਾਮੀ’ਤਿ, ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ (ਚੂਲ਼ਵ. ੨੩੯) ਏਵਂ ਆਪਤ੍ਤਿਪ੍ਪਟਿਗ੍ਗਹੋ ਪਟਿਗ੍ਗਹੋ ਨਾਮ. ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ ਆਵਾਸਿਕਾ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਕਾਲੇ ਪਵਾਰੇਯ੍ਯਾਮਾ’’ਤਿ (ਮਹਾਵ. ੨੪੦) ਏਵਂ ਕਤਪ੍ਪਵਾਰਣਪ੍ਪਚ੍ਚੁਕ੍ਕਡ੍ਢਨਾ ਪਚ੍ਚੁਕ੍ਕਡ੍ਢਨਾ ਨਾਮ. ਤਿਣਵਤ੍ਤਾਰਕਸਮਥੇ (ਚੂਲ਼ਵ. ੨੧੨) ਸਬ੍ਬਸਙ੍ਗਾਹਿਕਞਤ੍ਤਿ, ਏਕੇਕਸ੍ਮਿਂ ਪਕ੍ਖੇ ਏਕੇਕਾ ਞਤ੍ਤਿ ਚਾਤਿ ਤਿਸ੍ਸੋਪਿ ਞਤ੍ਤਿਯੋ ਕਮ੍ਮਲਕ੍ਖਣਂ ਨਾਮ. ਇਤਿ ਞਤ੍ਤਿਕਮ੍ਮਂ ਨਵ ਠਾਨਾਨਿ ਗਚ੍ਛਤਿ.
ਞਤ੍ਤਿਦੁਤਿਯਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤਿ ਓਸਾਰਣਂ ਨਿਸ੍ਸਾਰਣਂ ਸਮ੍ਮੁਤਿਂ ਦਾਨਂ ਉਦ੍ਧਾਰਂ ਦੇਸਨਂ ਕਮ੍ਮਲਕ੍ਖਣਨ੍ਤਿ. ਤਤ੍ਥ ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਨਾਦਿਕੇਹਿ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਸਙ੍ਘੇਨ ਅਸਮ੍ਭੋਗਕਰਣਤ੍ਥਂ ਪਤ੍ਤਨਿਕ੍ਕੁਜ੍ਜਨਵਸੇਨ ਨਿਸ੍ਸਾਰਣਾ ਨਿਸ੍ਸਾਰਣਾ ਨਾਮ. ਤਸ੍ਸੇਵ ਸਮ੍ਮਾਵਤ੍ਤਨ੍ਤਸ੍ਸ ਪਤ੍ਤੁਕ੍ਕੁਜ੍ਜਨਵਸੇਨ ਓਸਾਰਣਾ ਚ ਵੇਦਿਤਬ੍ਬਾ, ਸਾ ਖੁਦ੍ਦਕਕ੍ਖਨ੍ਧਕੇ ਵਡ੍ਢਲਿਚ੍ਛਵਿਵਤ੍ਥੁਸ੍ਮਿਂ (ਚੂਲ਼ਵ. ੨੬੫-੨੬੬) ਵੁਤ੍ਤਾ. ਸੀਮਾਸਮ੍ਮੁਤਿ ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿਸਨ੍ਥਤਸਮ੍ਮੁਤਿਭਤ੍ਤੁਦ੍ਦੇਸਕਸੇਨਾਸਨਗ੍ਗਾਹਾਪਕਭਣ੍ਡਾਗਾਰਿਕਚੀਵਰਪ੍ਪਟਿਗ੍ਗਾਹਕਯਾਗੁਭਾਜਕਫਲਭਾਜਕਖਜ੍ਜਭਾਜਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਟਿਯਗ੍ਗਾਹਪਕਪਤ੍ਤਗ੍ਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਤਿ ਏਤਾਸਂ ਸਮ੍ਮੁਤੀਨਂ ਵਸੇਨ ਸਮ੍ਮੁਤਿ ਵੇਦਿਤਬ੍ਬਾ. ਕਥਿਨਚੀਵਰਮਤਕਚੀਵਰਦਾਨਵਸੇਨ ਦਾਨਂ ਵੇਦਿਤਬ੍ਬਂ. ਕਥਿਨੁਦ੍ਧਾਰਵਸੇਨ ਉਦ੍ਧਾਰੋ ਵੇਦਿਤਬ੍ਬੋ. ਕੁਟਿਵਤ੍ਥੁਵਿਹਾਰਵਤ੍ਥੁਦੇਸਨਾਵਸੇਨ ਦੇਸਨਾ ਵੇਦਿਤਬ੍ਬਾ. ਯਾ ਪਨ ਤਿਣਵਤ੍ਥਾਰਕਸਮਥੇ (ਚੂਲ਼ਵ. ੨੧੨ ਆਦਯੋ) ਏਕਸ੍ਮਿਂ ਪਕ੍ਖੇ ਏਕਾ, ਏਕਸ੍ਮਿਂ ਪਕ੍ਖੇ ਏਕਾਤਿ ਦ੍ਵੇ ਞਤ੍ਤਿਦੁਤਿਯਕਮ੍ਮਵਾਚਾ ਵੁਤ੍ਤਾ, ਯਾ ਚ ਮੋਹਾਰੋਪਨਾਦੀਸੁ ਕਮ੍ਮਵਾਚਾ (ਪਾਚਿ. ੪੪੬) ਵੁਤ੍ਤਾ, ਤਾਸਂ ਵਸੇਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ, ਇਤਿ ਞਤ੍ਤਿਦੁਤਿਯਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤਿ.
ਞਤ੍ਤਿਚਤੁਤ੍ਥਕਮ੍ਮਮ੍ਪਿ ਸਤ੍ਤੇਵ ਠਾਨਾਨਿ ਗਚ੍ਛਤਿ ਓਸਾਰਣਂ ਨਿਸ੍ਸਾਰਣਂ ਸਮ੍ਮੁਤਿਂ ਦਾਨਂ ਨਿਗ੍ਗਹਂ ਸਮਨੁਭਾਸਨਂ ਕਮ੍ਮਲਕ੍ਖਣਨ੍ਤਿ. ਤਤ੍ਥ ਤਜ੍ਜਨੀਯਕਮ੍ਮਾਦੀਨਂ (ਚੂਲ਼ਵ. ੧ ਆਦਯੋ) ਸਤ੍ਤਨ੍ਨਂ ਕਮ੍ਮਾਨਂ ਵਸੇਨ ਨਿਸ੍ਸਾਰਣਾ, ਤੇਸਂਯੇਵ ਕਮ੍ਮਾਨਂ ਪਟਿਪ੍ਪਸ੍ਸਮ੍ਭਨਵਸੇਨ ਓਸਾਰਣਾ ਚ ਵੇਦਿਤਬ੍ਬਾ, ਭਿਕ੍ਖੁਨੋਵਾਦਕਸਮ੍ਮੁਤਿਵਸੇਨ (ਪਾਚਿ. ੧੪੬-੧੪੭) ਸਮ੍ਮੁਤਿ, ਪਰਿਵਾਸਦਾਨ(ਚਊਲ਼ਵ. ੧੦੨) ਮਾਨਤ੍ਤਦਾਨਵਸੇਨ (ਚੂਲ਼ਵ. ੧੦੫) ਦਾਨਂ, ਮੂਲਾਯਪਟਿਕਸ੍ਸਨਵਸੇਨ (ਚੂਲ਼ਵ. ੧੧੦) ਨਿਗ੍ਗਹੋ, ਉਕ੍ਖਿਤ੍ਤਾਨੁਵਤ੍ਤਿਕਾ, ਅਟ੍ਠ ਯਾਵਤਤਿਯਕਾ, ਅਰਿਟ੍ਠੋ (ਪਾਚਿ. ੪੧੭), ਚਣ੍ਡਕਾਲ਼ੀ (ਪਾਚਿ. ੭੦੯) ਚਾਤਿ ਇਮੇ ਤੇ ਯਾਵਤਤਿਯਕਾਤਿ ਇਮਾਸਂ ਏਕਾਦਸਨ੍ਨਂ ਸਮਨੁਭਾਸਨਾਨਂ ਵਸੇਨ ਸਮਨੁਭਾਸਨਾ, ਉਪਸਮ੍ਪਦਾਕਮ੍ਮਅਬ੍ਭਾਨਕਮ੍ਮਵਸੇਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ. ਇਤਿ ਞਤ੍ਤਿਚਤੁਤ੍ਥਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤਿ.
ਇਮੇਸੁ ਪਨ ਚਤੂਸੁ ਕਮ੍ਮੇਸੁ ਅਪਲੋਕਨਕਮ੍ਮਂ ਅਪਲੋਕੇਤ੍ਵਾਵ ਕਾਤਬ੍ਬਂ, ਞਤ੍ਤਿਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਕਮ੍ਮਮ੍ਪਿ ਏਕਂ ਞਤ੍ਤਿਂ ਠਪੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਦੁਤਿਯਕਮ੍ਮਂ ਪਨ ਅਪਲੋਕੇਤ੍ਵਾ ਕਾਤਬ੍ਬਮ੍ਪਿ ਅਤ੍ਥਿ ਅਕਾਤਬ੍ਬਮ੍ਪਿ, ਤਤ੍ਥ ਸੀਮਾਸਮ੍ਮੁਤਿ ਸੀਮਾਸਮੂਹਨਨਂ (ਮਹਾਵ. ੧੩੯-੧੪੦, ੧੪੪ ਆਦਯੋ) ਕਥਿਨਚੀਵਰਦਾਨਂ ਕਥਿਨੁਦ੍ਧਾਰੋ ਕੁਟਿਵਤ੍ਥੁਦੇਸਨਾ ਵਿਹਾਰਵਤ੍ਥੁਦੇਸਨਾਤਿ ਇਮਾਨਿ ਛ ਕਮ੍ਮਾਨਿ ਗਰੁਕਾਨਿ ਅਪਲੋਕੇਤ੍ਵਾ ਕਾਤੁਂ ਨ ਵਟ੍ਟਨ੍ਤਿ, ਞਤ੍ਤਿਦੁਤਿਯਕਮ੍ਮਵਾਚਂ ਸਾਵੇਤ੍ਵਾਵ ਕਾਤਬ੍ਬਾਨਿ. ਅਵਸੇਸਾ ਤੇਰਸ ਸਮ੍ਮੁਤਿਯੋ ਸੇਨਾਸਨਗ੍ਗਾਹਾਪਕਮਤਕਚੀਵਰਦਾਨਸਮ੍ਮੁਤਿਯੋ ਚਾਤਿ ਏਤਾਨਿ ਲਹੁਕਮ੍ਮਾਨਿ ਅਪਲੋਕੇਤ੍ਵਾਪਿ ਕਾਤੁਂ ਵਟ੍ਟਨ੍ਤਿ, ਞਤ੍ਤਿਕਮ੍ਮਾਦਿਵਸੇਨ ਪਨ ਨ ਕਾਤਬ੍ਬਾਨੇਵ. ਞਤ੍ਤਿਚਤੁਤ੍ਥਕਮ੍ਮਮ੍ਪਿ ਸਕਲਕ੍ਖਣੇਨੇਵ ਕਾਤਬ੍ਬਂ, ਨ ਸੇਸਕਮ੍ਮਵਸੇਨ. ਏਵਂ ਅਤ੍ਤਨੋ ਅਤ੍ਤਨੋ ਲਕ੍ਖਣੇਨੇਵ ਵਤ੍ਥੁਞਤ੍ਤਿਅਨੁਸ੍ਸਾਵਨਾਸੀਮਾਪਰਿਸਾਸਮ੍ਪਤ੍ਤਿਯਾ ਕਤਾਨਿ ਏਤਾਨਿ ਕਮ੍ਮਾਨਿ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਕਤਤ੍ਤਾ ਧਮ੍ਮੋ ਏਤੇਸੁ ਅਤ੍ਥੀਤਿ ਧਮ੍ਮਿਕਾਨਿ ਨਾਮ ਹੋਨ੍ਤਿ, ਇਤਿ ਏਤੇਸਂ ਧਮ੍ਮਿਕਾਨਂ ਕਮ੍ਮਾਨਂ ਛਨ੍ਦਂ ਦਤ੍ਵਾ ਪਚ੍ਛਾ ਖੀਯਨਧਮ੍ਮਂ ਆਪਜ੍ਜਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਖੀਯਨਧਮ੍ਮਾਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਵੇਮਤਿਕਸ੍ਸ, ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਅਧਮ੍ਮਕਮ੍ਮਸਞ੍ਞਿਸ੍ਸ, ‘‘ਅਧਮ੍ਮੇਨ ਵਾ ਵਗ੍ਗੇਨ ਵਾ ਨਕਮ੍ਮਾਰਹਸ੍ਸ ਵਾ ਕਮ੍ਮਂ ਕਰੋਨ੍ਤੀ’’ਤਿ ਞਤ੍ਵਾ ਖੀਯਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਧਮ੍ਮਕਮ੍ਮਤਾ, ਧਮ੍ਮਕਮ੍ਮਸਞ੍ਞਿਤਾ, ਛਨ੍ਦਂ ਦਤ੍ਵਾ ਖੀਯਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੇਵ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਕਮ੍ਮਪ੍ਪਟਿਬਾਹਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਵਣ੍ਣਨਾ
ਦਸਮੇ ਵਿਨਿਚ੍ਛਯਕਥਾਯਾਤਿ ਯਾਵ ਆਰੋਚਿਤਂ ਵਤ੍ਥੁ ਅਵਿਨਿਚ੍ਛਿਕਂ, ਞਤ੍ਤਿਂ ਵਾ ਠਪੇਤ੍ਵਾ ਕਮ੍ਮਵਾਚਾ ਅਨਿਟ੍ਠਾਪਿਤਾ, ਤਾਵ ਵਿਨਿਚ੍ਛਯਕਥਾ ਵਤ੍ਤਮਾਨਾ ਨਾਮ ਹੋਤਿ. ਯੋ ਭਿਕ੍ਖੁ ਏਤਸ੍ਮਿਂ ਅਨ੍ਤਰੇ ਕਮ੍ਮਂ ਕੋਪੇਤੁਕਾਮਤਾਯ ਪਰਿਸਾਯ ਹਤ੍ਥਪਾਸਂ ਵਿਜਹਤਿ, ਤਸ੍ਸ ਵਿਜਹਨੇ ਦੁਕ੍ਕਟਂ, ਵਿਜਹਿਤੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਛਨ੍ਦਂ ਅਦਤ੍ਵਾ ਪਕ੍ਕਮਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਵੇਮਤਿਕਸ੍ਸ, ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਅਧਮ੍ਮਕਮ੍ਮਸਞ੍ਞਿਸ੍ਸ ਪਨ, ਯੋ ਚ ‘‘ਸਙ੍ਘਸ੍ਸ ਭਣ੍ਡਨਾਦੀਨਿ ਵਾ ਭਵਿਸ੍ਸਨ੍ਤਿ, ਅਧਮ੍ਮੇਨ ਵਾ ਵਗ੍ਗੇਨ ਵਾ ਨਕਮ੍ਮਾਰਹਸ੍ਸ ਵਾ ਕਮ੍ਮਂ ਕਰਿਸ੍ਸਨ੍ਤੀ’’ਤਿ (ਪਾਚਿ. ੪੮੩) ਞਤ੍ਵਾ, ਗਿਲਾਨੋ ਵਾ ਹੁਤ੍ਵਾ, ਗਿਲਾਨਸ੍ਸ ਵਾ ਕਰਣੀਯੇਨ, ਉਚ੍ਚਾਰਾਦੀਹਿ ਵਾ ਪੀਲ਼ਿਤੋ, ਨ ਚ ਕਮ੍ਮਂ ਕੋਪੇਤੁਕਾਮੋ ‘‘ਪੁਨ ਪਚ੍ਚਾਗਮਿਸ੍ਸਾਮੀ’’ਤਿ ਗਚ੍ਛਤਿ, ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵਿਨਿਚ੍ਛਯਕਥਾਯ ਵਤ੍ਤਮਾਨਤਾ, ਧਮ੍ਮਕਮ੍ਮਤਾ, ਧਮ੍ਮਕਮ੍ਮਸਞ੍ਞਿਤਾ, ਸਮਾਨਸੀਮਾਯਂ ਠਿਤਤਾ, ਸਮਾਨਸਂਵਾਸਕਤਾ, ਕੋਪੇਤੁਕਾਮਤਾਯ ਹਤ੍ਥਪਾਸਵਿਜਹਨਨ੍ਤਿ ਇਮਾਨੇਤ੍ਥ ਛ ਅਙ੍ਗਾਨਿ. ਸਮਨੁਭਾਸਨਸਮੁਟ੍ਠਾਨਂ, ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.
ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੧. ਦੁਬ੍ਬਲਸਿਕ੍ਖਾਪਦਵਣ੍ਣਨਾ
ਏਕਾਦਸਮੇ ਸਮਗ੍ਗੇਨ ਸਙ੍ਘੇਨਾਤਿ ਸਮਾਨਸਂਵਾਸਕੇਨ ਸਮਾਨਸੀਮਾਯਂ ਠਿਤੇਨ ਸਙ੍ਘੇਨ ਸਦ੍ਧਿਂ ਚੀਵਰਂ ਦਤ੍ਵਾ. ਯਥਾਸਨ੍ਥੁਤਨ੍ਤਿ ਯੋ ਯੋ ਮਿਤ੍ਤਸਨ੍ਦਿਟ੍ਠਸਮ੍ਭਤ੍ਤਵਸੇਨ ਸਨ੍ਥੁਤੋ, ਤਸ੍ਸ ਤਸ੍ਸਾਤਿ ਅਤ੍ਥੋ. ਪਾਚਿਤ੍ਤਿਯਨ੍ਤਿ ਏਵਂ ਸਙ੍ਘੇਨ ਸਦ੍ਧਿਂ ਸਯਮੇਵ ਸੇਨਾਸਨਪਞ੍ਞਾਪਨਾਦਿਵਸੇਨ ਸਮ੍ਮਤਸ੍ਸ ਭਿਕ੍ਖੁਨੋ ਚੀਵਰਂ ਦਤ੍ਵਾ ਪਚ੍ਛਾ ਖੀਯਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਂ.
ਰਾਜਗਹੇ ਛਬ੍ਬਗ੍ਗਿਯੇ ਆਰਬ੍ਭ ਚੀਵਰਂ ਦਤ੍ਵਾ ਪਚ੍ਛਾ ਖੀਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਚੀਵਰਂ ਠਪੇਤ੍ਵਾ ਅਞ੍ਞਂ ਵਿਸ੍ਸਜ੍ਜਿਯਵੇਭਙ੍ਗਿਯਂ ਪਰਿਕ੍ਖਾਰਂ ਦਤ੍ਵਾ ਪਚ੍ਛਾਖੀਯਨ੍ਤਸ੍ਸ ਦੁਕ੍ਕਟਂ, ਵਿਸ੍ਸਜ੍ਜਿਯਵੇਭਙ੍ਗਿਯੋ ਨਾਮ ਠਪੇਤ੍ਵਾ ਪਞ੍ਚ ਗਰੁਭਣ੍ਡਾਨਿ ਅਵਸੇਸੋ. ਰਾਸਿਵਸੇਨ ਹਿ ਪਞ੍ਚ ਗਰੁਭਣ੍ਡਾਨਿ ਵੁਤ੍ਤਾਨਿ, ਤਤ੍ਥ ਆਰਾਮੋ ਆਰਾਮਵਤ੍ਥੂਤਿ ਏਕਂ, ਵਿਹਾਰੋ ਵਿਹਾਰਵਤ੍ਥੂਤਿ ਦੁਤਿਯਂ, ਮਞ੍ਚੋ ਪੀਠਂ ਭਿਸਿ ਬਿਮ੍ਬੋਹਨਨ੍ਤਿ ਤਤਿਯਂ, ਲੋਹਕੁਮ੍ਭੀ ਲੋਹਭਾਣਕਂ ਲੋਹਵਾਰਕੋ ਲੋਹਕਟਾਹਂ ਵਾਸਿ ਪਰਸੁ ਕੁਠਾਰੀ ਕੁਦਾਲੋ ਨਿਖਾਦਨਨ੍ਤਿ ਚਤੁਤ੍ਥਂ, ਵਲ੍ਲਿ ਵੇਲ਼ੁ ਮੁਞ੍ਜਂ ਪਬ੍ਬਜਂ ਤਿਣਂ ਮਤ੍ਤਿਕਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਨ੍ਤਿ ਪਞ੍ਚਮਂ. ਏਤਾਨਿ ਹਿ ਪਞ੍ਚ ਸਙ੍ਘਸਨ੍ਤਕਾਨਿ ਨੇਵ ਸਙ੍ਘਸ੍ਸ, ਨ ਗਣਪੁਗ੍ਗਲਾਨਂ ਵਿਸ੍ਸਜ੍ਜੇਤੁਂ ਵਾ ਵਿਭਜਿਤੁਂ ਵਾ ਵਟ੍ਟਨ੍ਤਿ, ਵਿਸ੍ਸਜ੍ਜਿਤਵਿਭਤ੍ਤਾਨਿਪਿ ਸਙ੍ਘਿਕਾਨੇਵ ਹੋਨ੍ਤਿ. ਥਾਵਰੇਨ ਪਨ ਥਾਵਰਂ, ਇਤਰੇਨ ਚ ਅਕਪ੍ਪਿਯੇਨ ਮਹਗ੍ਘਕਪ੍ਪਿਯੇਨ ਵਾ ਇਤਰਂ ਸਙ੍ਘਸ੍ਸ ਉਪਕਾਰਂ ਸਲ੍ਲਕ੍ਖੇਤ੍ਵਾ ਕਪ੍ਪਿਯਪਰਿਵਤ੍ਤਨੇਨ ਪਰਿਵਤ੍ਤੇਤੁਂ ਵਟ੍ਟਤਿ, ਵਰਸੇਨਾਸਨਾਦੀਨਂ ਸਂਰਕ੍ਖਣਤ੍ਥਂ ਲਾਮਕਾਨਿ ਵਿਸ੍ਸਜ੍ਜੇਤੁਂ ਵਿਸ੍ਸਜ੍ਜੇਤ੍ਵਾ ਪਰਿਭੁਞ੍ਜਿਤੁਞ੍ਚ ਵਟ੍ਟਤਿ. ਏਤ੍ਥ ਚ ਪੁਰਿਮੇਸੁ ਤੀਸੁ ਰਾਸੀਸੁ ਅਗਰੁਭਣ੍ਡਂ ਨਾਮ ਕਿਞ੍ਚਿ ਨਤ੍ਥਿ, ਚਤੁਤ੍ਥੇ ਲੋਹਕੁਮ੍ਭੀ ਅਰਞ੍ਜਰਸਣ੍ਠਾਨਂ ਲੋਹਭਾਣਕਂ ਲੋਹਕਟਾਹਨ੍ਤਿ ਇਮਾਨਿ ਤੀਣਿ ਅਨ੍ਤਮਸੋ ਪਸਤਮਤ੍ਤਉਦਕਗ੍ਗਣ੍ਹਨਕਾਨਿਪਿ ਗਰੁਭਣ੍ਡਾਨਿ. ਲੋਹਵਾਰਕੋ ਪਨ ਕਾਲ਼ਲੋਹਤਮ੍ਬਲੋਹਕਂਸਲੋਹਵਟ੍ਟਲੋਹਾਨਂ ਯੇਨ ਕੇਨਚਿ ਕਤੋ ਸੀਹਲ਼ਦੀਪੇ ਪਾਦਗ੍ਗਣ੍ਹਨਕੋ ਭਾਜੇਤਬ੍ਬੋ, ਪਾਦੋ ਚ ਨਾਮ ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਂ ਗਣ੍ਹਾਤਿ, ਤਤੋ ਅਤਿਰੇਕਂ ਗਰੁਭਣ੍ਡਂ, ਇਮਾਨਿ ਤਾਵ ਪਾਲ਼ਿਯਂ ਆਗਤਾਨਿ ਲੋਹਭਾਜਨਾਨਿ.
ਪਾਲ਼ਿਯਂ ਪਨ ਅਨਾਗਤਾਨਿਪਿ ਭਿਙ੍ਗਾਰਪਟਿਗ੍ਗਹਉਲ਼ੁਙ੍ਕਦਬ੍ਬਿਕਟਚ੍ਛੁਪਾਤਿ ਤਟ੍ਟਕਸਰਕਸਮੁਗ੍ਗਅਙ੍ਗਾਰਕਪਲ੍ਲਧੂਮਕਟਚ੍ਛੁਆਦੀਨਿ ਖੁਦ੍ਦਕਾਨਿਪਿ ਗਰੁਭਣ੍ਡਾਨੇਵ, ਅਯਪਤ੍ਤੋ ਅਯਥਾਲਕਂ ਤਮ੍ਬਲੋਹਥਾਲਕਨ੍ਤਿ ਇਮਾਨਿ ਪਨ ਭਾਜਨੀਯਾਨਿ, ਕਂਸਲੋਹਵਟ੍ਟਲੋਹਭਾਜਨਵਿਕਤਿ ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾ ਵਾ ਵਟ੍ਟਤਿ, ਪੁਗ੍ਗਲਿਕਪਰਿਭੋਗੇਨ ਨ ਵਟ੍ਟਤਿ. ਠਪੇਤ੍ਵਾ ਪਨ ਤਂ ਭਾਜਨਵਿਕਤਿਂ ਅਞ੍ਞਸ੍ਮਿਮ੍ਪਿ ਕਪ੍ਪਿਯਲੋਹਭਣ੍ਡੇ ਅਞ੍ਜਨੀ ਅਞ੍ਜਨਿਸਲਾਕਾ ਨਤ੍ਥੁਦਾਨਂ ਕਣ੍ਣਮਲਹਰਣੀ ਸੂਚਿ ਖੁਦ੍ਦਕੋ ਪਿਪ੍ਫਲਿਕੋ ਖੁਦ੍ਦਕਂ ਆਰਕਣ੍ਟਕਂ ਕੁਞ੍ਚਿਕਾ ਤਾਲ਼ਂ ਕਤ੍ਤਰਯਟ੍ਠਿ ਵੇਧਕੋ ਭਿਨ੍ਦਿਵਾਲਕੋ ਯਥਾਤਥਾਘਨਕਤਲੋਹਂਵਿਪ੍ਪਕਤਲੋਹਭਣ੍ਡਞ੍ਚ ਸਬ੍ਬਂ ਭਾਜਨੀਯਂ. ਧੂਮਨੇਤ੍ਤਫਾਲਦੀਪਰੁਕ੍ਖਦੀਪਕਪਲ੍ਲਿਕਓਲਮ੍ਬਕਦੀਪਇਤ੍ਥਿਪੁਰਿਸਤਿਰਚ੍ਛਾਨਰੂਪਕਾਨਿ ਪਨ ਅਞ੍ਞਾਨਿ ਵਾ ਭਿਤ੍ਤਿਚ੍ਛਦਨਕਵਾਟਾਦੀਸੁ ਉਪਨੇਤਬ੍ਬਾਨਿ, ਅਨ੍ਤਮਸੋ ਲੋਹਖਿਲਕਂ ਉਪਾਦਾਯ ਸਬ੍ਬਾਨਿਪਿ ਲੋਹਭਣ੍ਡਾਨਿ ਗਰੁਭਣ੍ਡਾਨਿਯੇਵ, ਅਤ੍ਤਨਾ ਲਦ੍ਧਾਨਿ ਪਰਿਹਰਿਤ੍ਵਾਪਿ ਪੁਗ੍ਗਲਿਕਪਰਿਭੋਗੇਨ ਨ ਪਰਿਭੁਞ੍ਜਿਤਬ੍ਬਾਨਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ, ਤਿਪੁਭਣ੍ਡੇਪਿ ਏਸੇਵ ਨਯੋ. ਖੀਰਪਾਸਾਣਮਯਾਨਿ ਤਟ੍ਟਕਸਰਕਾਦੀਨਿ ਗਰੁਭਣ੍ਡਾਨਿਯੇਵ.
ਘਟਕੋ ਪਨ ਤੇਲਭਾਜਨਂ ਵਾ ਪਾਦਗ੍ਗਣ੍ਹਨਕਤੋ ਅਤਿਰੇਕਮੇਵ ਗਰੁਭਣ੍ਡਂ, ਸੁਵਣ੍ਣਰਜਤਆਰਕੂਟਜਾਤਿਫਲਿਕਭਾਜਨਾਨਿ ਗਿਹਿਵਿਕਟਾਨਿਪਿ ਨ ਵਟ੍ਟਨ੍ਤਿ. ਸੇਨਾਸਨਪਰਿਭੋਗੇ ਪਨ ਆਮਾਸਮ੍ਪਿ ਅਨਾਮਾਸਮ੍ਪਿ ਸਬ੍ਬਂ ਵਟ੍ਟਤਿ.
ਵਾਸਿਯਾਦੀਸੁ ਪਨ ਯਾਯ ਵਾਸਿਯਾ ਦਨ੍ਤਕਟ੍ਠਚ੍ਛੇਦਨਉਚ੍ਛੁਤਚ੍ਛਨਮਤ੍ਤਤੋ ਅਞ੍ਞਂ ਮਹਾਕਮ੍ਮਂ ਕਾਤੁਂ ਨ ਸਕ੍ਕਾ, ਅਯਂ ਭਾਜਨੀਯਾ. ਸੇਸਾ ਯੇਨ ਕੇਨਚਿ ਆਕਾਰੇਨ ਕਤਾ ਗਰੁਭਣ੍ਡਂ, ਪਰਸੁ ਪਨ ਅਨ੍ਤਮਸੋ ਵੇਜ੍ਜਾਨਂ ਸਿਰਾਵੇਧਕੋਪਿ ਗਰੁਭਣ੍ਡਮੇਵ, ਤਥਾ ਕੁਠਾਰੀ. ਯਾ ਪਨ ਆਵੁਧਸਙ੍ਖੇਪੇਨ ਕਤਾ, ਅਯਂ ਅਨਾਮਾਸਾ, ਕੁਦਾਲੋ ਦਣ੍ਡਬਨ੍ਧਨਿਖਾਦਨਂ ਵਾ ਅਗਰੁਭਣ੍ਡਂ ਨਾਮ ਨਤ੍ਥਿ. ਸਮ੍ਮੁਞ੍ਜਨਿਦਣ੍ਡਖਣਨਕਂ ਪਨ ਅਦਣ੍ਡਕਂ ਫਲਮਤ੍ਤਕਮੇਵ, ਯਂ ਸਕ੍ਕਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤੁਂ, ਤਂ ਭਾਜਨੀਯਂ. ਸਿਖਰਮ੍ਪਿ ਨਿਖਾਦਨੇਨੇਵ ਸਙ੍ਗਹਿਤਂ, ਯੇਹਿ ਮਨੁਸ੍ਸੇਹਿ ਵਿਹਾਰੇ ਵਾਸਿਆਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਚੇ ਘਰੇ ਦਡ੍ਢੇ ਵਾ ਵਿਲੁਤ੍ਤੇ ਵਾ ‘‘ਦੇਥ ਨੋ, ਭਨ੍ਤੇ, ਉਪਕ੍ਖਰੇ, ਪੁਨ ਆਹਰਿਸ੍ਸਾਮਾ’’ਤਿ ਵਦਨ੍ਤਿ, ਦਾਤਬ੍ਬਾ. ਸਚੇ ਹਰਨ੍ਤਿ, ਨ ਵਾਰੇਤਬ੍ਬਾ, ਅਨਾਹਰਨ੍ਤਾਪਿ ਨ ਚੋਦੇਤਬ੍ਬਾ.
ਕਮ੍ਮਾਰਤਟ੍ਟਕਾਰਚੁਨ੍ਦਕਾਰਨਲ਼ਕਾਰਮਣਿਕਾਰਪਤ੍ਤਬਨ੍ਧਕਾਨਂ ਅਧਿਕਰਣਿਮੁਟ੍ਠਿਸਣ੍ਡਾਸਤੁਲਾਦੀਨਿ ਸਬ੍ਬਾਨਿ ਲੋਹਮਯਾਨਿ ਉਪਕਰਣਾਨਿ ਸਙ੍ਘੇ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਾਨਿ. ਤਿਪੁਕੋਟ੍ਟਕਸੁਵਣ੍ਣਕਾਰਚਮ੍ਮਕਾਰਉਪਕਰਣੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ, ਤਿਪੁਕੋਟ੍ਟਕਉਪਕਰਣੇਸੁ ਤਿਪੁਚ੍ਛੇਦਨਕਸਤ੍ਥਕਂ, ਸੁਵਣ੍ਣਕਾਰਉਪਕਰਣੇਸੁ ਸੁਵਣ੍ਣਚ੍ਛੇਦਨਕਸਤ੍ਥਕਂ, ਚਮ੍ਮਕਾਰਉਪਕਰਣੇਸੁ ਕਤਪਰਿਕਮ੍ਮਚਮ੍ਮਚ੍ਛੇਦਨਖੁਦ੍ਦਕਸਤ੍ਥਨ੍ਤਿ ਇਮਾਨਿ ਭਾਜਨੀਯਾਨਿ. ਨ੍ਹਾਪਿਤਤੁਨ੍ਨਕਾਰਉਪਕਰਣੇਸੁਪਿ ਠਪੇਤ੍ਵਾ ਮਹਾਕਤ੍ਤਰਿਂ ਮਹਾਸਣ੍ਡਾਸਂ ਮਹਾਪਿਪ੍ਫਲਿਕਞ੍ਚ ਸਬ੍ਬਂ ਵਟ੍ਟਤਿ, ਇਤਰਾਨਿ ਗਰੁਭਣ੍ਡਾਨਿ.
ਵਲ੍ਲਿਆਦੀਸੁ ਵੇਤ੍ਤਵਲ੍ਲਿਆਦਿਕਾ ਯਾ ਕਾਚਿ ਅਡ੍ਢਬਾਹੁਪ੍ਪਮਾਣਾ ਵਲ੍ਲਿ ਸਙ੍ਘਸ੍ਸ ਦਿਨ੍ਨਾ ਵਾ ਤਤ੍ਥਜਾਤਕਾ ਵਾ ਰਕ੍ਖਿਤਗੋਪਿਤਾਵ ਗਰੁਭਣ੍ਡਂ, ਸਾ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਸਚੇ ਅਤਿਰੇਕਾ ਹੋਤਿ, ਪੁਗ੍ਗਲਿਕਕਮ੍ਮੇਪਿ ਉਪਨੇਤੁਂ ਵਟ੍ਟਤਿ, ਸੁਤ੍ਤਮਕਚਿਵਾਕਨਾਲ਼ਿਕੇਰਹੀਰਚਮ੍ਮਮਯਾ ਰਜ੍ਜੁਕਾ ਵਾ ਯੋਤ੍ਤਾਨਿ ਵਾ ਵਾਕੇ ਚ ਨਾਲ਼ਿਕੇਰਹੀਰੇ ਚ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾ ਵਾ ਦ੍ਵਿਵਟ੍ਟਾ ਵਾ ਸਙ੍ਘਸ੍ਸ ਸਨ੍ਤਕਾ ਗਰੁਭਣ੍ਡਂ. ਸੁਤ੍ਤਂ ਪਨ ਅਵਟ੍ਟੇਤ੍ਵਾ ਦਿਨ੍ਨਂ ਮਕਚਿਵਾਕਨਾਲ਼ਿਕੇਰਹੀਰਾ ਚ ਭਾਜਨੀਯਾ. ਯੇਹਿ ਪਨੇਤਾਨਿ ਰਜ੍ਜੁਕਾਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਅਤ੍ਤਨੋ ਕਰਣੀਯੇਨ ਹਰਨ੍ਤਾ ਨ ਵਾਰੇਤਬ੍ਬਾ.
ਯੋ ਕੋਚਿ ਅਟ੍ਠਙ੍ਗੁਲਸੂਚਿਦਣ੍ਡਕਮਤ੍ਤੋਪਿ ਵੇਲ਼ੁ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ ਗਰੁਭਣ੍ਡਂ, ਸੋਪਿ ਸਙ੍ਘਸ੍ਸ ਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕੋ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਪਾਦਗ੍ਗਣ੍ਹਨਕਤੇਲਨਾਲ਼ਿ ਪਨ ਕਤ੍ਤਰਯਟ੍ਠਿ ਉਪਾਹਨਦਣ੍ਡਕੋ ਛਤ੍ਤਦਣ੍ਡੋ ਛਤ੍ਤਸਲਾਕਾਤਿ ਇਦਮੇਤ੍ਥ ਭਾਜਨੀਯਭਣ੍ਡਂ, ਦਡ੍ਢਗੇਹਮਨੁਸ੍ਸਾ ਗਣ੍ਹਿਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ.
ਮੁਞ੍ਜਞ੍ਚ ਪਬ੍ਬਜਞ੍ਚ ਅਵਸੇਸਞ੍ਚ ਛਦਨਤਿਣਂ ਮੁਟ੍ਠਿਪ੍ਪਮਾਣਮ੍ਪਿ ਛਦਨਤਿਣਸਙ੍ਖੇਪਗਤੇਸੁ ਤਾਲਪਣ੍ਣਾਦੀਸੁ ਯਂਕਿਞ੍ਚਿ ਏਕਪਣ੍ਣਮ੍ਪਿ ਸਙ੍ਘਸ੍ਸ ਦਿਨ੍ਨਂ ਵਾ ਤਤ੍ਥਜਾਤਕਂ ਵਾ ਬਹਿਆਰਾਮੇ ਸਙ੍ਘਿਕੇ ਤਿਣਵਤ੍ਥੁਸ੍ਮਿਂ ਜਾਤਕਂ ਵਾ ਰਕ੍ਖਿਤਗੋਪਿਤਂ ਗਰੁਭਣ੍ਡਂ, ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਦਡ੍ਢਗੇਹਮਨੁਸ੍ਸਾ ਗਹੇਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ, ਅਟ੍ਠਙ੍ਗੁਲਪ੍ਪਮਾਣੋਪਿ ਰਿਤ੍ਤਕਪੋਤ੍ਥਕੋ ਗਰੁਭਣ੍ਡਮੇਵ.
ਮਤ੍ਤਿਕਾ ਪਕਤਿਮਤ੍ਤਿਕਾ ਵਾ ਹੋਤੁ ਪਞ੍ਚਵਣ੍ਣਾ ਵਾ ਸੁਧਾ ਵਾ ਸਜ੍ਜੁਰਸਕਙ੍ਗੁਟ੍ਠਸਿਲੇਸਾਦੀਸੁ ਵਾ ਯਂਕਿਞ੍ਚਿ ਦੁਲ੍ਲਭਟ੍ਠਾਨੇ ਆਨੇਤ੍ਵਾ ਵਾ ਦਿਨ੍ਨਂ ਤਤ੍ਥਜਾਤਕਂ ਵਾ ਰਕ੍ਖਿਤਗੋਪਿਤਂ ਤਾਲਪਕ੍ਕਮਤ੍ਤਂ ਗਰੁਭਣ੍ਡਂ ਹੋਤਿ, ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਹਿਙ੍ਗੁਹਿਙ੍ਗੁਲਕਹਰਿਤਾਲਮਨੋਸਿਲਞ੍ਜਨਾਦੀਨਿ ਪਨ ਭਾਜਨੀਯਾਨਿ.
ਦਾਰੁਭਣ੍ਡੇ ਯੋ ਕੋਚਿ ਵੇਲ਼ੁਮ੍ਹਿ ਵੁਤ੍ਤਪ੍ਪਮਾਣੋ ਦਾਰੁਭਣ੍ਡਕੋ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ ਗਰੁਭਣ੍ਡਂ, ਅਪਿ ਚ ਸਬ੍ਬਾਪਿ ਦਾਰੁਵੇਲ਼ੁਚਮ੍ਮਪਾਸਾਣਾਦਿਵਿਕਤਿ ਦਾਰੁਭਣ੍ਡੇਨ ਸਙ੍ਗਹਿਤਾ, ਤਤ੍ਥ ਮਞ੍ਚਪੀਠੇਹਿ ਅਸਙ੍ਗਹਿਤਾਨਿ ਆਸਨ੍ਦਿਕਾਦੀਨਿ ਅਨ੍ਤਮਸੋ ਚੋਲ਼ੇਨ ਵਾ ਪਲਾਲੇਹਿ ਵਾ ਪਣ੍ਣੇਹਿ ਵਾ ਕਤਪੀਠਂ ਉਪਾਦਾਯ ਸਬ੍ਬਾਨਿ ਆਸਨਾਨਿ.
ਵਙ੍ਕਫਲਕਂ ਦੀਘਫਲਕਂ ਚੀਵਰਧੋਵਨਫਲਕਂ ਘਟ੍ਟਨਫਲਕਂ ਘਟ੍ਟਨਮੁਗ੍ਗਰੋ ਦਨ੍ਤਕਟ੍ਠਚ੍ਛੇਦਨਗਣ੍ਠਿਕਾ ਦਣ੍ਡਮੁਗ੍ਗਰੋ ਨਾਵਾ ਅਮ੍ਬਣਂ ਰਜਨਦੋਣਿ ਉਦਕਪਟਿਚ੍ਛਕੋ ਦਾਰੁਮਯੋ ਵਾ ਦਨ੍ਤਮਯੋ ਵਾ ਵੇਲ਼ੁਮਯੋ ਵਾ ਸਪਾਦਕੋਪਿ ਅਪਾਦਕੋਪਿ ਸਮੁਗ੍ਗੋ ਮਞ੍ਜੂਸਾ ਪਾਦਗ੍ਗਣ੍ਹਨਕਤੋ ਅਤਿਰੇਕਪ੍ਪਮਾਣੋ ਕਰਣ੍ਡੋ ਉਦਕਦੋਣਿ ਉਦਕਕਟਾਹਂ ਉਲ਼ੁਙ੍ਕੋ ਕਟਚ੍ਛੁਪਾਨੀਯਸਰਾਵਂ ਪਾਨੀਯਸਙ੍ਖੋਤਿ ਏਤੇਸੁ ਯਂਕਿਞ੍ਚਿ ਸਙ੍ਘੇ ਦਿਨ੍ਨਂ ਗਰੁਭਣ੍ਡਂ. ਸਙ੍ਖਥਾਲਕਂ ਪਨ ਭਾਜਨੀਯਂ, ਤਥਾ ਦਾਰੁਮਯੋ ਉਦਕਤੁਮ੍ਬੋ.
ਪਾਦਕਥਲਿਕਮਣ੍ਡਲਂ ਦਾਰੁਮਯਂ ਵਾ ਹੋਤੁ ਚੋਲ਼ਪਣ੍ਣਾਦਿਮਯਂ ਵਾ ਸਬ੍ਬਂ ਗਰੁਭਣ੍ਡਂ. ਆਧਾਰਕੋ ਪਤ੍ਤਪਿਧਾਨਂ ਤਾਲਵਣ੍ਟਂ ਬੀਜਨੀ ਚਙ੍ਕੋਟਕਂ ਪਚ੍ਛਿ ਯਟ੍ਠਿਸਮ੍ਮੁਞ੍ਜਨੀ ਮੁਟ੍ਠਿਸਮ੍ਮੁਞ੍ਜਨੀਤਿ ਏਤੇਸੁਪਿ ਯਂਕਿਞ੍ਚਿ ਖੁਦ੍ਦਕਂ ਵਾ ਮਹਨ੍ਤਂ ਵਾ ਦਾਰੁਵੇਲ਼ੁਪਣ੍ਣਚਮ੍ਮਾਦੀਸੁ ਯੇਨ ਕੇਨਚਿ ਕਤਂ ਗਰੁਭਣ੍ਡਮੇਵ.
ਥਮ੍ਭਤੁਲਾਸੋਪਾਨਫਲਕਾਦੀਸੁ ਯਂਕਿਞ੍ਚਿ ਦਾਰੁਮਯਂ ਵਾ ਪਾਸਾਣਮਯਂ ਵਾ ਗੇਹਸਮ੍ਭਾਰੂਪਗਂ ਯੋ ਕੋਚਿ ਕਟਸਾਰਕੋ ਯਂਕਿਞ੍ਚਿ ਭੂਮਤ੍ਥਰਣਂ ਯਂਕਿਞ੍ਚਿ ਅਕਪ੍ਪਿਯਚਮ੍ਮਂ, ਸਬ੍ਬਂ ਸਙ੍ਘਿਕਂ ਗਰੁਭਣ੍ਡਂ, ਭੂਮਤ੍ਥਰਣਂ ਕਾਤੁਂ ਵਟ੍ਟਤਿ. ਏਲ਼ਕਚਮ੍ਮਂ ਪਨ ਪਚ੍ਚਤ੍ਥਰਣਗਤਿਕਂ ਹੋਤਿ, ਤਮ੍ਪਿ ਗਰੁਭਣ੍ਡਮੇਵ, ਕਪ੍ਪਿਯਚਮ੍ਮਾਨਿ ਭਾਜਨੀਯਾਨਿ, ਕੁਰੁਨ੍ਦਿਯਂ ਪਨ ਸਬ੍ਬਂ ਮਞ੍ਚਪ੍ਪਮਾਣਂ ਚਮ੍ਮਂ ਗਰੁਭਣ੍ਡਨ੍ਤਿ ਵੁਤ੍ਤਂ.
ਉਦੁਕ੍ਖਲਂ ਮੁਸਲਂ ਸੁਪ੍ਪਂ ਨਿਸਦਂ ਨਿਸਦਪੋਤੋ ਪਾਸਾਣਦੋਣਿ ਪਾਸਾਣਕਟਾਹਂ ਸਬ੍ਬਂ ਕਸਿਭਣ੍ਡਮ੍ਪਿ ਗਰੁਭਣ੍ਡਂ, ਸਬ੍ਬਂ ਚਕ੍ਕਯੁਤ੍ਤਯਾਨਂ ਗਰੁਭਣ੍ਡਮੇਵ. ਮਞ੍ਚਪੀਠਾਨਂ ਪਾਦਾ ਚ ਅਟਨਿਯੋ ਚ ਵਾਸਿਪਰਸੁਆਦੀਨਂ ਦਣ੍ਡਾ ਚਾਤਿ ਏਤੇਸੁ ਯਂਕਿਞ੍ਚਿ ਅਨਿਟ੍ਠਿਤਂ ਭਾਜਨੀਯਂ, ਤਚ੍ਛਿਤਮਟ੍ਠਂ ਪਨ ਗਰੁਭਣ੍ਡਂ ਹੋਤਿ, ਅਨੁਞ੍ਞਾਤਵਾਸਿਯਾ ਦਣ੍ਡੋ ਛਤ੍ਤਂ ਮੁਟ੍ਠਿਪਣ੍ਣਂ ਕਤ੍ਤਰਯਟ੍ਠਿ ਉਪਾਹਨਾ ਅਰਣਿਸਹਿਤਂ ਧਮ੍ਮਕਰਣੋ ਪਾਦਗ੍ਗਣ੍ਹਨਕਤੋ ਅਨਤਿਰਿਤ੍ਤਂ ਆਮਲਕਤੁਮ੍ਬਂ ਆਮਲਕਘਟੋ ਲਾਬੁਕਤੁਮ੍ਬਂ ਲਾਬੁਕਘਟੋ ਵਿਸਾਣਤੁਮ੍ਬਨ੍ਤਿ ਸਬ੍ਬਮੇਤਂ ਭਾਜਨੀਯਂ, ਤਤੋ ਪਰਂ ਗਰੁਭਣ੍ਡਂ.
ਹਤ੍ਥਿਦਨ੍ਤੋ ਵਾ ਯਂਕਿਞ੍ਚਿ ਵਿਸਾਣਂ ਵਾ ਅਤਚ੍ਛਿਤਂ ਯਥਾਗਤਮੇਵ ਭਾਜਨੀਯਂ, ਤੇਹਿ ਕਤਮਞ੍ਚਪੀਠਪਾਦਾਦੀਸੁ ਪੁਰਿਮਸਦਿਸੋਵ ਵਿਨਿਚ੍ਛਯੋ. ਤਚ੍ਛਿਤਨਿਟ੍ਠਿਤੋਪਿ ਹਿਙ੍ਗੁਕਰਣ੍ਡਕੋ ਅਞ੍ਜਨਿਕਰਣ੍ਡਕੋ ਗਣ੍ਠਿਕਾ ਵਿਧੋ ਅਞ੍ਜਨੀ ਅਞ੍ਜਨਿਸਲਾਕਾ ਉਦਕਪੁਞ੍ਛਨੀਤਿ ਇਦਂ ਸਬ੍ਬਂ ਭਾਜਨੀਯਮੇਵ.
ਮਤ੍ਤਿਕਾਭਣ੍ਡੇ ਸਬ੍ਬਂ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਘਟਪਿਠਰਾਦਿਕੁਲਾਲਭਾਜਨਂ, ਪਤ੍ਤਕਟਾਹਂ ਅਙ੍ਗਾਰਕਟਾਹਂ ਧੂਮਦਾਨਕਂ ਦੀਪਰੁਕ੍ਖਕੋ ਦੀਪਕਪਲ੍ਲਿਕਾ ਚਯਨਿਟ੍ਠਕਾ ਛਦਨਿਟ੍ਠਕਾ ਥੁਪਿਕਾਤਿ ਸਬ੍ਬਂ ਗਰੁਭਣ੍ਡਂ, ਏਤੇਸੁ ਪਨ ਵੁਤ੍ਤਨਯੇਸੁ ਗਰੁਭਣ੍ਡੇਸੁ ਯਂਕਿਞ੍ਚਿ ਵੇਲ਼ੁਆਦਿਂ ਅਤ੍ਤਨੋ ਅਤ੍ਥਾਯ ਗਣ੍ਹਨ੍ਤੇਨ ਸਮਕਂ ਵਾ ਅਤਿਰੇਕਂ ਵਾ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬਂ. ਪਾਦਗ੍ਗਣ੍ਹਨਕਤੋ ਅਨਤਿਰਿਤ੍ਤਪ੍ਪਮਾਣੋ ਪਨ ਘਟਕੋ ਪਤ੍ਤੋ ਥਾਲਕਂ ਕਞ੍ਚਨਕੋ ਕੁਣ੍ਡਿਕਾਤਿ ਇਦਮੇਤ੍ਥ ਭਾਜਨੀਯਂ, ਯਥਾ ਚ ਮਤ੍ਤਿਕਾਭਣ੍ਡੇ ਏਵਂ ਲੋਹਭਣ੍ਡੇਪਿ ਕੁਣ੍ਡਿਕਾ ਭਾਜਨੀਯਕੋਟ੍ਠਾਸਮੇਵ ਭਜਤਿ. ਇਤਿ ਯਂ ਭਾਜਨੀਯਂ ਵਿਸ੍ਸਜ੍ਜਨੀਯਮ੍ਪਿ ਤਂ ਏਵਂ ਵਿਸ੍ਸਜ੍ਜਿਯਵੇਭਙ੍ਗਿਯਸਙ੍ਖਾਤਂ ਅਞ੍ਞਂ ਪਰਿਕ੍ਖਾਰਂ ਦਤ੍ਵਾ ਖੀਯਨ੍ਤਸ੍ਸ ਦੁਕ੍ਕਟਂ, ਇਤਰਂ ਪਨ ਦਾਤੁਮੇਵ ਨ ਵਟ੍ਟਤਿ. ਇਸ੍ਸਰਵਤਾਯ ਦੇਨ੍ਤੋ ਥੁਲ੍ਲਚ੍ਚਯਂ ਆਪਜ੍ਜਤਿ, ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋ. ਯਥਾ ਚ ਅਞ੍ਞਂ ਪਰਿਕ੍ਖਾਰਂ ਦਤ੍ਵਾ ਖੀਯਨ੍ਤਸ੍ਸ ਦੁਕ੍ਕਟਂ, ਤਥਾ ਸਙ੍ਘੇਨ ਅਸਮ੍ਮਤਸ੍ਸ ਚੀਵਰਂ ਵਾ ਅਞ੍ਞਂ ਵਾ ਪਰਿਕ੍ਖਾਰਂ ਦਤ੍ਵਾ ਖੀਯਨ੍ਤਸ੍ਸ ਦੁਕ੍ਕਟਮੇਵ, ਅਨੁਪਸਮ੍ਪਨ੍ਨੇ ਸਬ੍ਬਤ੍ਥ ਤਿਕਦੁਕ੍ਕਟਂ. ਪਕਤਿਯਾ ਪਨ ਛਨ੍ਦਾਦਿਵਸੇਨ (ਪਾਚਿ. ੪੮੮) ਕਰੋਨ੍ਤਂ ਦਿਸ੍ਵਾ ‘‘ਕੋ ਅਤ੍ਥੋ ਤਸ੍ਸ ਦਿਨ੍ਨੇਨ, ਲਦ੍ਧਾਪਿ ਵਿਨਿਪਾਤੇਸ੍ਸਤਿ, ਨ ਸਮ੍ਮਾ ਉਪਨੇਸ੍ਸਤੀ’’ਤਿ ਖੀਯਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਧਮ੍ਮੇਨ ਲਦ੍ਧਸਮ੍ਮੁਤਿਤਾ, ਸਙ੍ਘੇਨ ਸਦ੍ਧਿਂ ਵਿਕਪ੍ਪਨੁਪਗਚੀਵਰਦਾਨਂ, ਪਚ੍ਛਾ ਖੀਯਿਤੁਕਾਮਤਾਯ ਖੀਯਨਾਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.
ਦੁਬ੍ਬਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੨. ਪਰਿਣਾਮਨਸਿਕ੍ਖਾਪਦਵਣ੍ਣਨਾ
ਦ੍ਵਾਦਸਮੇ ਸਬ੍ਬਂ ਤਿਂਸਕਕਣ੍ਡੇ ਪਰਿਣਾਮਨਸਿਕ੍ਖਾਪਦੇ ਵੁਤ੍ਤਨਯਮੇਵ. ਅਯਮੇਵ ਹਿ ਵਿਸੇਸੋ, ਤਤ੍ਥ ਅਤ੍ਤਨੋ ਪਰਿਣਾਮਿਤਤ੍ਤਾ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਇਧ ਪੁਗ੍ਗਲਸ੍ਸ ਪਰਿਣਾਮਿਤਤ੍ਤਾ ਸੁਦ੍ਧਿਕਪਾਚਿਤ੍ਤਿਯਨ੍ਤਿ.
ਪਰਿਣਾਮਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਸਹਧਮ੍ਮਿਕਵਗ੍ਗੋ ਅਟ੍ਠਮੋ.