੬. ਸੁਰਾਪਾਨਵਗ੍ਗੋ

੧. ਸੁਰਾਪਾਨਸਿਕ੍ਖਾਪਦਵਣ੍ਣਨਾ

ਸੁਰਾਪਾਨਵਗ੍ਗਸ੍ਸ ਪਠਮੇ ਸੁਰਾਮੇਰਯਪਾਨੇਤਿ ਏਤ੍ਥ ਪਿਟ੍ਠਾਦੀਹਿ ਕਤਂ ਮਜ੍ਜਂ ਸੁਰਾ, ਪੁਪ੍ਫਾਦੀਹਿ ਕਤੋ ਆਸਵੋ ਮੇਰਯਂ, ਤਦੁਭਯਮ੍ਪਿ ਬੀਜਤੋ ਪਟ੍ਠਾਯ ਕੁਸਗ੍ਗੇਨਾਪਿ ਪਿਵਤੋ ਪਯੋਗੇ ਪਯੋਗੇ ਪਾਚਿਤ੍ਤਿਯਂ.

ਕੋਸਮ੍ਬਿਯਂ ਸਾਗਤਤ੍ਥੇਰਂ ਆਰਬ੍ਭ ਮਜ੍ਜਪਿਵਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਮਜ੍ਜੇ ਮਜ੍ਜਸਞ੍ਞਿਸ੍ਸ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਅਮਜ੍ਜਸਞ੍ਞਿਸ੍ਸ, ਅਮਜ੍ਜਂ ਮਜ੍ਜਵਣ੍ਣਗਨ੍ਧਰਸਂ ਲੋਣਸੋਵੀਰਕਂ ਵਾ ਸੁਤ੍ਤਂ ਵਾ ਪਿਵਤੋ, ਵਾਸਗ੍ਗਾਹਾਪਨਤ੍ਥਂ ਈਸਕਂ ਮਜ੍ਜਂ ਪਕ੍ਖਿਪਿਤ੍ਵਾ ਸੂਪਾਦੀਨਿ ਪਚਨ੍ਤਿ, ਤੇਸੁ ਸੂਪਸਮ੍ਪਾਕਾਦੀਸੁ, ਆਮਲਕਰਸਾਦੀਹਿ ਅਮਜ੍ਜਂ ਮਜ੍ਜਸਦਿਸਂ ਅਰਿਟ੍ਠਂ ਕਰੋਨ੍ਤਿ, ਤਂ ਪਿਵਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਮਜ੍ਜਭਾਵੋ, ਤਸ੍ਸ ਪਾਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਲੋਕਵਜ੍ਜਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਸੁਰਾਪਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਅਙ੍ਗੁਲਿਪਤੋਦਕੇਤਿ ਅਙ੍ਗੁਲੀਹਿ ਉਪਕਚ੍ਛਕਾਦਿਘਟ੍ਟਨਂ ਵੁਚ੍ਚਤਿ, ਅਪਿਚ ਯੇਨ ਕੇਨਚਿ ਸਰੀਰਾਵਯਵੇਨ ਹਸਾਧਿਪ੍ਪਾਯਸ੍ਸ ਉਪਸਮ੍ਪਨ੍ਨਂ ਫੁਸਤੋ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਙ੍ਗੁਲਿਪਤੋਦਕੇਨ ਹਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਇਧ ਪਨ ਭਿਕ੍ਖੁਨੀਪਿ ਭਿਕ੍ਖੁਸ੍ਸ, ਭਿਕ੍ਖੁ ਚ ਭਿਕ੍ਖੁਨਿਯਾ ਅਨੁਪਸਮ੍ਪਨ੍ਨੋ ਏਵ, ਕਾਯਪ੍ਪਟਿਬਦ੍ਧਾਦੀਸੁ ਸਬ੍ਬਤ੍ਥ ਦੁਕ੍ਕਟਮੇਵ. ਨ ਹਸਨਾਧਿਪ੍ਪਾਯਸ੍ਸ, ਸਤਿ ਕਰਣੀਯੇ ਆਮਸਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਹਸਾਧਿਪ੍ਪਾਯਤਾ, ਉਪਸਮ੍ਪਨ੍ਨਸ੍ਸ ਕਾਯੇਨ ਕਾਯਾਮਸਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੇਵਾਤਿ.

ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਹਸਧਮ੍ਮਸਿਕ੍ਖਾਪਦਵਣ੍ਣਨਾ

ਤਤਿਯੇ ਉਦਕੇ ਹਸਧਮ੍ਮੇਤਿ ਉਦਕਕੀਲ਼ਾ ਵੁਚ੍ਚਤਿ. ਤਸ੍ਮਾ ਯੋ ਭਿਕ੍ਖੁ ਉਪਰਿਗੋਪ੍ਫਕੇ ਉਦਕੇਯੇਵ ਗਚ੍ਛਨ੍ਤੋ ਹਸਾਧਿਪ੍ਪਾਯੋ ਨਿਮੁਜ੍ਜਤਿ ਵਾ ਉਮ੍ਮੁਜ੍ਜਤਿ ਵਾ, ਤਸ੍ਸ ਨਿਮੁਜ੍ਜਨਾਦੀਨਂ ਅਤ੍ਥਾਯ ਓਤਰਨ੍ਤਸ੍ਸ ਹਤ੍ਥਵਾਰੇ ਪਦਵਾਰੇ ਦੁਕ੍ਕਟਂ, ਨਿਮੁਜ੍ਜਨੁਮ੍ਮੁਜ੍ਜਨੇਸੁ ਪਯੋਗੇ ਪਯੋਗੇ ਪਾਚਿਤ੍ਤਿਯਂ, ਨਿਮੁਜ੍ਜਿਤ੍ਵਾ ਅਨ੍ਤੋਉਦਕੇਯੇਵ ਗਚ੍ਛਨ੍ਤਸ੍ਸ ਹਤ੍ਥਵਾਰਪਦਵਾਰੇਸੁ, ਤਰਨ੍ਤਸ੍ਸ ਵਾ ਯੇਨ ਯੇਨ ਅਙ੍ਗੇਨ ਤਰਤਿ, ਤਸ੍ਸ ਤਸ੍ਸ ਪਯੋਗੇ ਪਯੋਗੇ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਆਰਬ੍ਭ ਉਦਕੇ ਕੀਲ਼ਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਉਦਕੇ ਅਹਸਧਮ੍ਮੇ ਹਸਧਮ੍ਮਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ, ਤਥਾ ਨਾਵਾਯ ਕੀਲ਼ਤੋ ਹਤ੍ਥੇਨ ਵਾ ਪਾਦੇਨ ਵਾ ਕਟ੍ਠੇਨ ਵਾ ਕਥਲਾਯ ਵਾ ਉਦਕਂ ਪਹਰਤੋ, ਭਾਜਨਗਤਂ ਉਦਕਂ ਵਾ ਕਞ੍ਜਿਕਾਦੀਨਿ ਵਾ ਚਿਕ੍ਖਲ੍ਲਂ ਵਾ ਖਿਪਨਕੀਲ਼ਾਯ ਕੀਲ਼ਤੋ ਦੁਕ੍ਕਟਂ. ਅਤ੍ਥਜੋਤਕਂ ਪਨ ਅਕ੍ਖਰਂ ਛਿਨ੍ਦਿਤੁਂ ਵਟ੍ਟਤਿ. ਨ ਹਸਾਧਿਪ੍ਪਾਯਸ੍ਸ, ਸਤਿ ਕਰਣੀਯੇ ਓਤਰਿਤ੍ਵਾ ਨਿਮੁਜ੍ਜਨਾਦੀਨਿ ਕਰੋਨ੍ਤਸ੍ਸ, ਪਾਰਂ ਗਚ੍ਛਤੋ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਰਿਗੋਪ੍ਫਕਤਾ, ਹਸਾਧਿਪ੍ਪਾਯੇਨ ਕੀਲ਼ਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ.

ਹਸਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਅਨਾਦਰਿਯਸਿਕ੍ਖਾਪਦਵਣ੍ਣਨਾ

ਚਤੁਤ੍ਥੇ ਅਨਾਦਰਿਯੇਤਿ ਪੁਗ੍ਗਲਸ੍ਸ ਵਾ ਧਮ੍ਮਸ੍ਸ ਵਾ ਅਨਾਦਰਕਰਣੇ. ਤਸ੍ਮਾ ਯੋ ਭਿਕ੍ਖੁ ਉਪਸਮ੍ਪਨ੍ਨੇਨ ਪਞ੍ਞਤ੍ਤੇਨ ਵੁਚ੍ਚਮਾਨੋ ਤਸ੍ਸ ਵਾ ਵਚਨਂ ਅਕਤ੍ਤੁਕਾਮਤਾਯ, ਤਂ ਵਾ ਧਮ੍ਮਂ ਅਸਿਕ੍ਖਿਤੁਕਾਮਤਾਯ ਅਨਾਦਰਿਯਂ ਕਰੋਤਿ, ਤਸ੍ਸ ਤਸ੍ਮਿਂ ਅਨਾਦਰਿਯੇ ਪਾਚਿਤ੍ਤਿਯਂ.

ਕੋਸਮ੍ਬਿਯਂ ਛਨ੍ਨਤ੍ਥੇਰਂ ਆਰਬ੍ਭ ਅਨਾਦਰਿਯਕਰਣਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਉਪਸਮ੍ਪਨ੍ਨੇਨ ਵਾ ਅਨੁਪਸਮ੍ਪਨ੍ਨੇਨ ਵਾ ‘‘ਇਦਂ ਨ ਸਲ੍ਲੇਖਾਯ ਸਂਵਤ੍ਤਤੀ’’ਤਿਆਦਿਨਾ ਨਯੇਨ ਅਪਞ੍ਞਤ੍ਤੇਨ ਵੁਚ੍ਚਮਾਨਸ੍ਸ ਅਨਾਦਰਿਯੇਪਿ ਦੁਕ੍ਕਟਮੇਵ. ਪਵੇਣਿਆਗਤਂ ਪਨ ਉਗ੍ਗਹਂ ਗਹੇਤ੍ਵਾ ‘‘ਏਵਂ ਅਮ੍ਹਾਕਂ ਆਚਰਿਯਾਨਂ ਉਗ੍ਗਹੋ ਪਰਿਪੁਚ੍ਛਾ’’ਤਿ (ਪਾਚਿ. ੩੪੪) ਭਣਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਸ੍ਸ ਪਞ੍ਞਤ੍ਤੇਨ ਵਚਨਂ, ਅਨਾਦਰਿਯਕਰਣਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖਵੇਦਨਨ੍ਤਿ.

ਅਨਾਦਰਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਭਿਂਸਾਪਨਸਿਕ੍ਖਾਪਦਵਣ੍ਣਨਾ

ਪਞ੍ਚਮੇ ਭਿਂਸਾਪੇਯ੍ਯਾਤਿ ਭਿਂਸਾਪਨਤ੍ਥਂ ਰੂਪਾਦੀਨਿ ਉਪਸਂਹਰੇਯ੍ਯ, ਭਯਾਨਕਕਥਂ ਵਾ ਕਥੇਯ੍ਯ. ਸੋ ਪਨ ਭਾਯਤੁ ਵਾ, ਮਾ ਵਾ, ਇਤਰਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਭਿਂਸਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ. ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਨ ਭਿਂਸਾਪੇਤੁਕਾਮਸ੍ਸ ਤਥਾ ਕਰੋਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਤਾ, ਤਸ੍ਸ ਦਸ੍ਸਨਸਵਨਵਿਸਯੇ ਭਿਂਸਾਪੇਤੁਕਾਮਤਾਯ ਵਾਯਾਮਨਨ੍ਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਨਨ੍ਤਰਸਿਕ੍ਖਾਪਦਸਦਿਸਾਨੇਵਾਤਿ.

ਭਿਂਸਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਜੋਤਿਸਿਕ੍ਖਾਪਦਵਣ੍ਣਨਾ

ਛਟ੍ਠੇ ਵਿਸਿਬ੍ਬਨਾਪੇਕ੍ਖੋਤਿ ਤਪ੍ਪਿਤੁਕਾਮੋ. ਸਮਾਦਹੇਯ੍ਯਾਤਿ ਜਾਲੇਯ੍ਯ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾਤਿ ਪਦੀਪੁਜ੍ਜਾਲਨਂ ਵਾ ਪਤ੍ਤਪਚਨਾਦੀਸੁ ਜੋਤਿਕਰਣਂ ਵਾਤਿ ਏਵਰੂਪਂ ਪਚ੍ਚਯਂ ਵਿਨਾ. ਤਤ੍ਰਾਯਂ ਵਿਨਿਚ੍ਛਯੋ – ਸਯਂ ਸਮਾਦਹਨ੍ਤਸ੍ਸ ਅਰਣਿਸਣ੍ਠਾਪਨਤੋ ਪਟ੍ਠਾਯ ਯਾਵ ਜਾਲਾ ਨ ਉਟ੍ਠਹਤਿ, ਤਾਵ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਜਾਲੁਟ੍ਠਾਨੇ ਪਾਚਿਤ੍ਤਿਯਂ. ਸਮਾਦਹਾਪੇਨ੍ਤਸ੍ਸ ਆਣਤ੍ਤਿਯਾ ਦੁਕ੍ਕਟਂ, ਸਕਿਂ ਆਣਤ੍ਤੇਨ ਬਹੁਮ੍ਪਿ ਸਮਾਦਹਿਤੇ ਏਕਮੇਵ ਪਾਚਿਤ੍ਤਿਯਂ.

ਭਗ੍ਗੇਸੁ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਜੋਤਿਂ ਸਮਾਦਹਿਤ੍ਵਾ ਵਿਸਿਬ੍ਬਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਗਿਲਾਨੋ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ’’ਤਿ ਇਮਾਨੇਤ੍ਥ ਦ੍ਵੇ ਅਨੁਪਞ੍ਞਤ੍ਤਿਯੋ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਗਿਲਾਨਸ੍ਸ ਅਗਿਲਾਨਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ, ਤਥਾ ਪਟਿਲਾਤਂ ਉਕ੍ਖਿਪਨ੍ਤਸ੍ਸ, ਤਞ੍ਚ ਅਵਿਜ੍ਝਾਤਂ ਉਕ੍ਖਿਪਿਤ੍ਵਾ ਯਥਾਠਾਨੇ ਠਪੇਨ੍ਤਸ੍ਸ. ਵਿਜ੍ਝਾਤਂ ਪਨ ਜਾਲਯਤੋ ਪਾਚਿਤ੍ਤਿਯਮੇਵ. ਗਿਲਾਨਸ੍ਸ ਗਿਲਾਨਸਞ੍ਞਿਸ੍ਸ, ਅਞ੍ਞੇਨ ਕਤਂ ਵਾ ਵੀਤਚ੍ਚਿਤਙ੍ਗਾਰਂ ਵਾ ਵਿਸਿਬ੍ਬੇਨ੍ਤਸ੍ਸ, ਪਦੀਪਜੋਤਿਕਜਨ੍ਤਾਘਰਾਦਿਕੇ ਤਥਾਰੂਪਪ੍ਪਚ੍ਚਯੇ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਗਿਲਾਨਤਾ, ਅਨੁਞ੍ਞਾਤਕਾਰਣਾਭਾਵੋ, ਵਿਸਿਬ੍ਬੇਤੁਕਾਮਤਾ, ਸਮਾਦਹਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀਤਿ.

ਜੋਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਨਹਾਨਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਨਹਾਯੇਯ੍ਯਾਤਿ ਯੋ ਭਿਕ੍ਖੁ ਮਜ੍ਝਿਮਦੇਸੇ ਨਹਾਨਦਿਵਸਤੋ ਪਟ੍ਠਾਯ ਅਦ੍ਧਮਾਸੇ ਅਪੁਣ੍ਣੇ ਅਞ੍ਞਤ੍ਰ ਸਮਯਾ ‘‘ਨਹਾਯਿਸ੍ਸਾਮੀ’’ਤਿ ਚੁਣ੍ਣਂ ਵਾ ਮਤ੍ਤਿਕਂ ਵਾ ਅਭਿਸਙ੍ਖਰੋਤਿ, ਤਸ੍ਸ ਤਤੋ ਪਟ੍ਠਾਯ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਨਹਾਨਪਰਿਯੋਸਾਨੇ ਪਾਚਿਤ੍ਤਿਯਂ. ਸਮਯੇਸੁ ਪਰਿਵੇਣਸਮ੍ਮਜ੍ਜਨਮਤ੍ਤਮ੍ਪਿ ਕਮ੍ਮਸਮਯੋ, ਅਦ੍ਧਯੋਜਨਂ ਗਨ੍ਤੁਕਾਮਸ੍ਸ, ਗਚ੍ਛਤੋ, ਗਤਸ੍ਸ ਵਾ ਅਦ੍ਧਾਨਗਮਨਸਮਯੋ, ਸਰਜੇਨ ਵਾਤੇਨ ਓਕਿਣ੍ਣਸ੍ਸ ਦ੍ਵੀਸੁ ਵਾ ਤੀਸੁ ਵਾ ਉਦਕਫੁਸਿਤੇਸੁ ਕਾਯੇ ਪਤਿਤੇਸੁ ਵਾਤਵੁਟ੍ਠਿਸਮਯੋਤਿ ਵੇਦਿਤਬ੍ਬੋ. ਸੇਸਂ ਉਤ੍ਤਾਨਮੇਵ.

ਰਾਜਗਹੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਨ ਮਤ੍ਤਂ ਜਾਨਿਤ੍ਵਾ ਨਹਾਯਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਛਬ੍ਬਿਧਾ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਤਿਰੇਕਦ੍ਧਮਾਸੇ ਊਨਕਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਅਤਿਰੇਕਸਞ੍ਞਿਸ੍ਸ, ਸਮਯੇ ਵਾ ਨਹਾਯਨ੍ਤਸ੍ਸ, ਯੋ ਵਾ ਨਦੀਪਾਰਂ ਗਚ੍ਛਨ੍ਤੋ ਵਾਲੁਕਂ ਉਕ੍ਕਿਰਿਤ੍ਵਾ ਕਤਆਵਾਟੇਸੁਪਿ ਨਹਾਯਤਿ, ਤਸ੍ਸ, ਪਚ੍ਚਨ੍ਤਿਮੇ ਜਨਪਦੇ ਸਬ੍ਬੇਸਂ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਮਜ੍ਝਿਮਦੇਸੋ, ਊਨਕਦ੍ਧਮਾਸੇ ਨਹਾਨਂ, ਸਮਯਾਨਂ ਵਾ ਨਦੀਪਾਰਗਮਨਸ੍ਸ ਵਾ ਆਪਦਾਨਂ ਵਾ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.

ਨਹਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ

ਅਟ੍ਠਮੇ ਅਲਭੀਤਿ ਲਭੋ, ਲਭੋ ਏਵ ਲਾਭੋ, ਕਿਂ ਅਲਭਿ? ਚੀਵਰਂ, ਕੀਦਿਸਂ? ਨਵਂ, ਇਤਿ ‘‘ਨਵਚੀਵਰਲਾਭੇਨਾ’’ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪਂ ਅਕਤ੍ਵਾ ਨਵਂਚੀਵਰਲਾਭੇਨਾਤਿ ਵੁਤ੍ਤਂ, ਪਟਿਲਦ੍ਧਨਵਚੀਵਰੇਨਾਤਿ ਅਤ੍ਥੋ. ਮਜ੍ਝੇ ਠਿਤਪਦਦ੍ਵਯੇ ਪਨਾਤਿ ਨਿਪਾਤਮਤ੍ਤਂ. ਭਿਕ੍ਖੁਨਾਤਿ ਯੇਨ ਲਦ੍ਧਂ, ਤਸ੍ਸ ਨਿਦਸ੍ਸਨਂ, ਸੇਸਂ ਪਦਤ੍ਥਤੋ ਉਤ੍ਤਾਨਮੇਵ. ਅਯਂ ਪਨੇਤ੍ਥ ਵਿਨਿਚ੍ਛਯੋ – ਨਿਵਾਸਨਪਾਰੁਪਨੁਪਗਂ ਚੀਵਰਂ ਲਭਿਤ੍ਵਾ ਤਸ੍ਸ ਨਿਟ੍ਠਿਤਰਜਨਸ੍ਸ ਯਸ੍ਮਿਂ ਵਾ ਤਸ੍ਮਿਂ ਵਾ ਪਦੇਸੇ ਕਂਸਨੀਲੇਨ ਵਾ ਪਤ੍ਤਨੀਲੇਨ ਵਾ ਕਦ੍ਦਮੇਨ ਵਾ ਯੇਨ ਕੇਨਚਿ ਕਾਲ਼ਕੇਨ ਵਾ ਮੋਰਕ੍ਖਿਮਣ੍ਡਲਮਙ੍ਗੁਲਪਿਟ੍ਠੀਨਂ ਅਞ੍ਞਤਰਪ੍ਪਮਾਣਂ ਕਪ੍ਪਬਿਨ੍ਦੁਂ ਆਦਿਯਿਤ੍ਵਾ ਤਂ ਚੀਵਰਂ ਪਰਿਭੁਞ੍ਜਿਤਬ੍ਬਂ, ਅਨਾਦਿਯਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਤ੍ਤਨੋ ਚੀਵਰਅਜਾਨਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਆਦਿਨ੍ਨੇ ਅਨਾਦਿਨ੍ਨਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਆਦਿਨ੍ਨਸਞ੍ਞਿਸ੍ਸ, ਕਪ੍ਪੇ ਨਟ੍ਠੇ, ਕਪ੍ਪਕਤੋਕਾਸੇ ਜਿਣ੍ਣੇ, ਕਪ੍ਪਕਤੇਨ ਅਕਪ੍ਪਕਤੇ ਸਂਸਿਬ੍ਬਿਤੇ, ਪਚ੍ਛਾ ਆਰੋਪਿਤੇਸੁ ਅਗ੍ਗਲ਼ਅਨੁਵਾਤਪਰਿਭਣ੍ਡੇਸੁ ਤਂ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਵੁਤ੍ਤਪ੍ਪਕਾਰਸ੍ਸ ਚੀਵਰਸ੍ਸ ਅਕਤਕਪ੍ਪਕਤਾ, ਨ ਨਟ੍ਠਚੀਵਰਾਦਿਤਾ, ਨਿਵਾਸਨਂ ਵਾ ਪਾਰੁਪਨਂ ਵਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ

ਨਵਮੇ ਵਿਕਪ੍ਪੇਤ੍ਵਾਤਿ ਏਤ੍ਥ ਦ੍ਵੇ ਵਿਕਪ੍ਪਨਾ ਸਮ੍ਮੁਖਾਵਿਕਪ੍ਪਨਾ ਪਰਮ੍ਮੁਖਾਵਿਕਪ੍ਪਨਾ ਚ. ਕਥਂ ਸਮ੍ਮੁਖਾਵਿਕਪ੍ਪਨਾ ਹੋਤਿ? ਚੀਵਰਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’ਤਿ ਵਾ ਵਤ੍ਵਾ ‘ਤੁਯ੍ਹਂ ਵਿਕਪ੍ਪੇਮੀ’ਤਿ ਵਤ੍ਤਬ੍ਬਂ, ਅਯਮੇਕਾ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੁਞ੍ਜਿਤੁਂ ਪਨ ਵਿਸ੍ਸਜ੍ਜੇਤੁਂ ਵਾ ਅਧਿਟ੍ਠਾਤੁਂ ਵਾ ਨ ਵਟ੍ਟਤਿ. ‘‘ਮਯ੍ਹਂ ਸਨ੍ਤਕਂ, ਮਯ੍ਹਂ ਸਨ੍ਤਕਾਨਿ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਕਰੋਹੀ’’ਤਿ (ਪਾਚਿ. ੩੭੪) ਏਵਂ ਪਨ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ, ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ. ਅਪਰੋ ਨਯੋ, ਤਥੇਵ ਚੀਵਰਾਨਂ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ਤਸ੍ਸੇਵ ਭਿਕ੍ਖੁਨੋ ਸਨ੍ਤਿਕੇ ‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’ਤਿ ਵਾ ਵਤ੍ਵਾ ਪਞ੍ਚਸੁ ਸਹਧਮ੍ਮਿਕੇਸੁ ਅਞ੍ਞਤਰਸ੍ਸ ਅਤ੍ਤਨਾ ਅਭਿਰੁਚਿਤਸ੍ਸ ਯਸ੍ਸ ਕਸ੍ਸਚਿ ਨਾਮਂ ਗਹੇਤ੍ਵਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਵਿਕਪ੍ਪੇਮੀ’’ਤਿ ਵਾ ‘‘ਤਿਸ੍ਸਾਯ ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਸ੍ਸ, ਤਿਸ੍ਸਾਯ ਸਾਮਣੇਰਿਯਾ ਵਿਕਪ੍ਪੇਮੀ’’ਤਿ ਵਾ ਵਤ੍ਤਬ੍ਬਂ, ਅਯਂ ਅਪਰਾਪਿ ਸਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ…ਪੇ… ਤਿਸ੍ਸਾਯ ਸਾਮਣੇਰਿਯਾ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ, ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤਿ.

ਕਥਂ ਪਰਮ੍ਮੁਖਾਵਿਕਪ੍ਪਨਾ ਹੋਤਿ? ਚੀਵਰਾਨਂ ਤਥੇਵ ਏਕਬਹੁਭਾਵਂ ਸਨ੍ਨਿਹਿਤਾਸਨ੍ਨਿਹਿਤਭਾਵਞ੍ਚ ਞਤ੍ਵਾ ‘ਇਮਂ ਚੀਵਰ’ਨ੍ਤਿ ਵਾ ‘ਇਮਾਨਿ ਚੀਵਰਾਨੀ’ਤਿ ਵਾ ‘ਏਤਂ ਚੀਵਰ’ਨ੍ਤਿ ਵਾ ‘ਏਤਾਨਿ ਚੀਵਰਾਨੀ’ਤਿ ਵਾ ਵਤ੍ਵਾ ‘‘ਤੁਯ੍ਹਂ ਵਿਕਪ੍ਪਨਤ੍ਥਾਯ ਦਮ੍ਮੀ’’ਤਿ ਵਤ੍ਤਬ੍ਬਂ. ਤੇਨ ਵਤ੍ਤਬ੍ਬੋ ‘‘ਕੋ ਤੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ’’ਤਿ. ਤਤੋ ਇਤਰੇਨ ਪੁਰਿਮਨਯੇਨੇਵ ‘ਤਿਸ੍ਸੋ ਭਿਕ੍ਖੂ’ਤਿ ਵਾ…ਪੇ… ‘ਤਿਸ੍ਸਾ ਸਾਮਣੇਰੀ’ਤਿ ਵਾ ਵਤ੍ਤਬ੍ਬਂ. ਪੁਨ ਤੇਨ ਭਿਕ੍ਖੁਨਾ ‘‘ਅਹਂ ਤਿਸ੍ਸਸ੍ਸ ਭਿਕ੍ਖੁਨੋ ਦਮ੍ਮੀ’’ਤਿ ਵਾ…ਪੇ… ‘‘ਤਿਸ੍ਸਾਯ ਸਾਮਣੇਰਿਯਾ ਦਮ੍ਮੀ’’ਤਿ ਵਾ ਵਤ੍ਤਬ੍ਬਂ, ਅਯਂ ਪਰਮ੍ਮੁਖਾਵਿਕਪ੍ਪਨਾ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤਿ, ਪਰਿਭੋਗਾਦੀਸੁ ਏਕਮ੍ਪਿ ਨ ਵਟ੍ਟਤਿ. ਤੇਨ ਪਨ ਭਿਕ੍ਖੁਨਾ ਦੁਤਿਯਸਮ੍ਮੁਖਾਵਿਕਪ੍ਪਨਾਯਂ ਵੁਤ੍ਤਨਯੇਨੇਵ ‘‘ਇਤ੍ਥਨ੍ਨਾਮਸ੍ਸ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ, ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤੀਤਿ. ਪਤ੍ਤਵਿਕਪ੍ਪਨਾਯਮ੍ਪਿ ਏਸੇਵ ਨਯੋ. ਇਤਿ ਇਮਾਸੁ ਦ੍ਵੀਸੁ ਵਿਕਪ੍ਪਨਾਸੁ ਯਾਯ ਕਾਯਚਿ ਵਿਕਪ੍ਪਨਾਯ ਪਞ੍ਚਸੁ ਸਹਧਮ੍ਮਿਕੇਸੁ ਯਸ੍ਸ ਕਸ੍ਸਚਿ ਚੀਵਰਂ ਵਿਕਪ੍ਪੇਤ੍ਵਾ ਵੁਤ੍ਤਨਯੇਨ ਅਕਤਪ੍ਪਚ੍ਚੁਦ੍ਧਾਰਂ ਵਾ ਯੇਨ ਵਿਨਯਕਮ੍ਮਂ ਕਤਂ, ਤਸ੍ਸ ਵਾ ਵਿਸ੍ਸਾਸੇਨ ਅਗ੍ਗਹੇਤ੍ਵਾ ਪਰਿਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਅਪ੍ਪਚ੍ਚੁਦ੍ਧਾਰਣਂ ਪਰਿਭੁਞ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਤਂ ਪਨ ਅਧਿਟ੍ਠਹਨ੍ਤਸ੍ਸ ਵਾ ਵਿਸ੍ਸਜ੍ਜੇਨ੍ਤਸ੍ਸ ਵਾ ਦੁਕ੍ਕਟਂ, ਤਥਾ ਪਚ੍ਚੁਦ੍ਧਾਰਣੇ ਅਪ੍ਪਚ੍ਚੁਦ੍ਧਾਰਣਸਞ੍ਞਿਸ੍ਸ ਵੇਮਤਿਕਸ੍ਸ ਵਾ. ਪਚ੍ਚੁਦ੍ਧਾਰਣਸਞ੍ਞਿਸ੍ਸ ਪਨ ਵਿਸ੍ਸਾਸੇਨ ਪਰਿਭੁਞ੍ਜਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਾਮਂ ਵਿਕਪ੍ਪਿਤਸ੍ਸ ਅਪ੍ਪਚ੍ਚੁਦ੍ਧਾਰੋ, ਵਿਕਪ੍ਪਨੁਪਗਚੀਵਰਤਾ, ਪਰਿਭੋਗੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.

ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਅਪਨਿਧਾਨਸਿਕ੍ਖਾਪਦਵਣ੍ਣਨਾ

ਦਸਮੇ ਪਤ੍ਤਨ੍ਤਿ ਅਧਿਟ੍ਠਾਨੁਪਗਂ. ਚੀਵਰਨ੍ਤਿ ਵਿਕਪ੍ਪਨੁਪਗਂ. ਨਿਸੀਦਨਂ ਨਾਮ ਸਦਸਂ ਵੁਚ੍ਚਤਿ. ਸੂਚਿਘਰਂ ਨਾਮ ਸਸੂਚਿਕਂ ਵਾ ਅਸੂਚਿਕਂ ਵਾ. ਕਾਯਬਨ੍ਧਨਂ ਨਾਮ ਪਟ੍ਟਿਕਾ ਵਾ ਸੂਕਰਨ੍ਤਕਂ ਵਾ. ਅਪਨਿਧੇਯ੍ਯਾਤਿ ਅਪਨੇਤ੍ਵਾ ਨਿਦਹੇਯ੍ਯ. ਹਸਾਪੇਕ੍ਖੋਤਿ ਹਸਾਧਿਪ੍ਪਾਯੋ. ਪਾਚਿਤ੍ਤਿਯਨ੍ਤਿ ਸਯਂ ਅਪਨਿਧੇਨ੍ਤਸ੍ਸ ਪਾਚਿਤ੍ਤਿਯਂ, ਅਞ੍ਞਂ ਆਣਾਪੇਨ੍ਤਸ੍ਸ ਆਣਤ੍ਤਿਯਾ ਦੁਕ੍ਕਟਂ, ਤੇਨ ਅਪਨਿਹਿਤੇ ਇਤਰਸ੍ਸ ਪਾਚਿਤ੍ਤਿਯਂ.

ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਪਨਿਧਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਵੁਤ੍ਤਪ੍ਪਕਾਰਾਨਿ ਪਨ ਪਤ੍ਤਾਦੀਨਿ ਠਪੇਤ੍ਵਾ ਅਞ੍ਞਂ ਪਰਿਕ੍ਖਾਰਂ ਉਪਸਮ੍ਪਨ੍ਨਸ੍ਸ ਵਾ ਅਨੁਪਸਮ੍ਪਨ੍ਨਸ੍ਸ ਵਾ ਸਨ੍ਤਕਂ ਅਪਨਿਧੇਨ੍ਤਸ੍ਸ ਦੁਕ੍ਕਟਮੇਵ. ਦੁਨ੍ਨਿਕ੍ਖਿਤ੍ਤਂ ਪਟਿਸਾਮੇਨ੍ਤਸ੍ਸ, ‘‘ਧਮ੍ਮਕਥਂ ਕਤ੍ਵਾ ਦਸ੍ਸਾਮੀ’’ਤਿ ਪਟਿਸਾਮੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਪਸਮ੍ਪਨ੍ਨਸ੍ਸ ਸਨ੍ਤਕਾਨਂ ਪਤ੍ਤਾਦੀਨਂ ਅਪਨਿਧਾਨਂ, ਵਿਹੇਸੇਤੁਕਾਮਤਾ ਵਾ ਹਸਾਧਿਪ੍ਪਾਯਤਾ ਵਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.

ਅਪਨਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਸੁਰਾਪਾਨਵਗ੍ਗੋ ਛਟ੍ਠੋ.