੭. ਮਹਾਨਾਮਸਿਕ੍ਖਾਪਦਵਣ੍ਣਨਾ

ਸਤ੍ਤਮੇ ਚਤੁਮਾਸਪ੍ਪਚ੍ਚਯਪਵਾਰਣਾਤਿ ਚਤ੍ਤਾਰੋ ਮਾਸੇ ਗਿਲਾਨਪ੍ਪਚ੍ਚਯਪਵਾਰਣਾ, ਸਬ੍ਬਞ੍ਚੇਤਂ ਵਤ੍ਥੁਵਸੇਨ ਵੁਤ੍ਤਂ. ਅਯਂ ਪਨੇਤ੍ਥ ਅਤ੍ਥੋ – ਚਤੁਮਾਸਪਵਾਰਣਾ ਵਾ ਹੋਤੁ, ਪੁਨਪਵਾਰਣਾ ਵਾ, ਨਿਚ੍ਚਪਵਾਰਣਾ ਵਾ, ਸਬ੍ਬਾਪਿ ਸਾਦਿਤਬ੍ਬਾ, ‘‘ਇਦਾਨਿ ਮਮ ਰੋਗੋ ਨਤ੍ਥੀ’’ਤਿ ਨ ਪਟਿਕ੍ਖਿਪਿਤਬ੍ਬਾ, ‘‘ਰੋਗੇ ਪਨ ਸਤਿ ਵਿਞ੍ਞਾਪੇਸ੍ਸਾਮੀ’’ਤਿ ਅਧਿਵਾਸੇਤਬ੍ਬਾਤਿ. ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾਤਿ ਏਤ੍ਥ ਸਚੇ ਤਤ੍ਥ ਰਤ੍ਤੀਹਿ ਵਾ ਭੇਸਜ੍ਜੇਹਿ ਵਾ ਪਰਿਚ੍ਛੇਦੋ ਕਤੋ ਹੋਤਿ ‘‘ਏਤ੍ਤਕਾਯੇਵ ਰਤ੍ਤਿਯੋ, ਏਤ੍ਤਕਾਨਿ ਵਾ ਭੇਸਜ੍ਜਾਨਿ ਵਿਞ੍ਞਾਪੇਤਬ੍ਬਾਨੀ’’ਤਿ, ਅਥ ਤਤੋ ਰਤ੍ਤਿਪਰਿਯਨ੍ਤਤੋ ਵਾ ਭੇਸਜ੍ਜਪਰਿਯਨ੍ਤਤੋ ਵਾ ਉਤ੍ਤਰਿ, ਨ ਭੇਸਜ੍ਜਕਰਣੀਯੇਨ ਵਾ ਭੇਸਜ੍ਜਂ, ਅਞ੍ਞਭੇਸਜ੍ਜਕਰਣੀਯੇਨ ਵਾ ਅਞ੍ਞਂ ਭੇਸਜ੍ਜਂ ਵਿਞ੍ਞਾਪੇਨ੍ਤਸ੍ਸ ਪਾਚਿਤ੍ਤਿਯਂ.

ਸਕ੍ਕੇਸੁ ਛਬ੍ਬਗ੍ਗਿਯੇ ਆਰਬ੍ਭ ਭੇਸਜ੍ਜਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਨਤਤੁਤ੍ਤਰਿ ਤਤੁਤ੍ਤਰਿਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਨਤਤੁਤ੍ਤਰਿ ਨਤਤੁਤ੍ਤਰਿਸਞ੍ਞਿਸ੍ਸ, ਯੇਹਿ ਭੇਸਜ੍ਜੇਹਿ ਪਵਾਰਿਤੋ, ਤਤੋ ਅਞ੍ਞੇਹਿ ਵਾ ਅਧਿਕਤਰੇਹਿ ਵਾ ਅਤ੍ਥੇ ਸਤਿ, ਯਾਸੁ ਚ ਰਤ੍ਤੀਸੁ ਪਵਾਰਿਤੋ, ਤਾ ਅਤਿਕ੍ਕਮਿਤ੍ਵਾਪਿ ਅਤ੍ਥੇ ਸਤਿ ਯਥਾਭੂਤਂ ਆਚਿਕ੍ਖਿਤ੍ਵਾ ਵਿਞ੍ਞਾਪੇਨ੍ਤਸ੍ਸ, ਯੇ ਚ ਞਾਤਕੇ ਵਾ ਪੁਗ੍ਗਲਿਕਪ੍ਪਵਾਰਣਾਯ ਪਵਾਰਿਤੇ ਵਾ ਅਪਰਿਯਨ੍ਤਪਵਾਰਣਾਯ ਵਾ ਪਵਾਰਿਤੇ, ਅਞ੍ਞਸ੍ਸ ਵਾ ਅਤ੍ਥਾਯ, ਅਤ੍ਤਨੋ ਵਾ ਧਨੇਨ ਵਿਞ੍ਞਾਪੇਨ੍ਤਿ, ਤੇਸਂ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘਪਵਾਰਣਤਾ, ਤਤੋ ਭੇਸਜ੍ਜਵਿਞ੍ਞਤ੍ਤਿ, ਅਗਿਲਾਨਤਾ, ਪਰਿਯਨ੍ਤਾਤਿਕ੍ਕਮੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.

ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.