੫. ਅਚੇਲਕਵਗ੍ਗੋ
੧. ਅਚੇਲਕਸਿਕ੍ਖਾਪਦਵਣ੍ਣਨਾ
ਅਚੇਲਕਵਗ੍ਗਸ੍ਸ ਪਠਮੇ ਏਤੇਸਂ ਅਚੇਲਕਾਦੀਨਂ ਅਞ੍ਞਤਿਤ੍ਥਿਯਾਨਂ ਯਂਕਿਞ੍ਚਿ ਆਮਿਸਂ ਏਕਪ੍ਪਯੋਗੇਨ ਦੇਨ੍ਤਸ੍ਸ ਏਕਂ ਪਾਚਿਤ੍ਤਿਯਂ, ਅਵਚ੍ਛਿਨ੍ਦਿਤ੍ਵਾ ਅਵਚ੍ਛਿਨ੍ਦਿਤ੍ਵਾ ਦੇਨ੍ਤਸ੍ਸ ਪਯੋਗੇ ਪਯੋਗੇ ਪਾਚਿਤ੍ਤਿਯਂ.
ਵੇਸਾਲਿਯਂ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਪਰਿਬ੍ਬਾਜਿਕਾਯ ਦ੍ਵੇ ਪੂਵੇ ਦਾਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਉਦਕਦਨ੍ਤਪੋਨਂ ਦੇਨ੍ਤਸ੍ਸ, ਅਤਿਤ੍ਥਿਯੇ ਤਿਤ੍ਥਿਯਸਞ੍ਞਿਸ੍ਸ, ਵੇਮਤਿਕਸ੍ਸ ਚ ਦੁਕ੍ਕਟਂ. ਅਤਿਤ੍ਥਿਯੇ ਅਤਿਤ੍ਥਿਯਸਞ੍ਞਿਸ੍ਸ, ਅਨੁਪਸਮ੍ਪਨ੍ਨੇਨ ਦਾਪੇਨ੍ਤਸ੍ਸ, ਤੇਸਂ ਸਨ੍ਤਿਕੇ ਭਾਜਨਂ ਨਿਕ੍ਖਿਪਿਤ੍ਵਾ ‘‘ਇਦਂ ਗਣ੍ਹਥਾ’’ਤਿ ਭਣਨ੍ਤਸ੍ਸ, ਤੇਸਂ ਵਾ ਨਿਕ੍ਖਿਤ੍ਤਭਾਜਨੇ ਦੇਨ੍ਤਸ੍ਸ, ਬਾਹਿਰਲੇਪਂ ਦੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਞ੍ਞਤਿਤ੍ਥਿਯਤਾ, ਅਨਨੁਞ੍ਞਾਤਤਾ, ਅਜ੍ਝੋਹਰਣੀਯਂ ਅਜ੍ਝੋਹਰਣਤ੍ਥਾਯ ਸਹਤ੍ਥਾ ਅਨਿਕ੍ਖਿਤ੍ਤਭਾਜਨੇ ਦਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੀਤਿ.
ਅਚੇਲਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ
ਦੁਤਿਯੇ ਦਾਪੇਤ੍ਵਾ ਵਾ ਅਦਾਪੇਤ੍ਵਾ ਵਾਤਿ ਯਂਕਿਞ੍ਚਿ ਆਮਿਸਂ ਦਾਪੇਤ੍ਵਾ ਵਾ ਨ ਦਾਪੇਤ੍ਵਾ ਵਾ. ਉਯ੍ਯੋਜੇਯ੍ਯਾਤਿ ਮਾਤੁਗਾਮੇਨ ਸਦ੍ਧਿਂ ਹਸਨਕੀਲ਼ਨਰਹੋਨਿਸਜ੍ਜਾਦੀਨਿ ਕਤ੍ਤੁਕਾਮੋ ‘ਗਚ੍ਛਾ’ਤਿਆਦੀਨਿ ਵਤ੍ਵਾ ਉਯ੍ਯੋਜੇਯ੍ਯ. ਏਤਦੇਵਾਤਿ ਏਤਂ ਅਨਾਚਾਰਮੇਵ ਪਚ੍ਚਯਂ ਕਰਿਤ੍ਵਾ, ਨ ਅਞ੍ਞਂ ਪਤਿਰੂਪਂ ਕਾਰਣਂ. ਪਾਚਿਤ੍ਤਿਯਨ੍ਤਿ ਉਯ੍ਯੋਜਨਮਤ੍ਤੇ ਤਾਵ ਦੁਕ੍ਕਟਂ, ਯਦਾ ਪਨਸ੍ਸ ਸੋ ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ ਏਕੇਨ ਪਾਦੇਨ ਵਿਜਹਤਿ, ਅਪਰਂ ਦੁਕ੍ਕਟਂ, ਦੁਤਿਯੇਨ ਵਿਜਹਿਤੇ ਪਾਚਿਤ੍ਤਿਯਂ. ਏਤ੍ਥ ਚ ਦਸ੍ਸਨੂਪਚਾਰਸ੍ਸ ਅਜ੍ਝੋਕਾਸੇ ਠਤ੍ਵਾ ਦ੍ਵਾਦਸਹਤ੍ਥਪ੍ਪਮਾਣਂ, ਤਥਾ ਸਵਨੂਪਚਾਰਸ੍ਸ. ਸਚੇ ਪਨ ਅਨ੍ਤਰਾ ਕੁਟ੍ਟਦ੍ਵਾਰਪਾਕਾਰਾਦਯੋ ਹੋਨ੍ਤਿ, ਤੇਹਿ ਅਨ੍ਤਰਿਤਭਾਵੋਯੇਵ ਉਪਚਾਰਾਤਿਕ੍ਕਮੋ.
ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਉਯ੍ਯੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਉਯ੍ਯੋਜਨਾਣਤ੍ਤਿਕਾਯ ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਉਭਿਨ੍ਨਮ੍ਪਿ ਕਲਿਸਾਸਨਾਰੋਪਨੇ ਦੁਕ੍ਕਟਮੇਵ, ‘‘ਉਭੋ ਏਕਤੋ ਨ ਯਾਪੇਸ੍ਸਾਮਾ’’ਤਿ ਏਵਮਾਦੀਹਿ ਪਤਿਰੂਪਕਾਰਣੇਹਿ ਉਯ੍ਯੋਜੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਨਾਚਾਰਂ ਆਚਰਿਤੁਕਾਮਤਾ, ਤਦਤ੍ਥਮੇਵ ਉਪਸਮ੍ਪਨ੍ਨਸ੍ਸ ਉਯ੍ਯੋਜਨਂ, ਏਵਂ ਉਯ੍ਯੋਜਿਤਸ੍ਸ ਉਪਚਾਰਾਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.
ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਸਭੋਜਨਸਿਕ੍ਖਾਪਦਵਣ੍ਣਨਾ
ਤਤਿਯੇ ਸਹ ਉਭੋਹਿ ਜਨੇਹੀਤਿ ਸਭੋਜਨਂ, ਤਸ੍ਮਿਂ ਸਭੋਜਨੇ. ਅਥ ਵਾ ਸਭੋਜਨੇਤਿ ਸਭੋਗੇ, ਰਾਗਪਰਿਯੁਟ੍ਠਿਤਪੁਰਿਸਸ੍ਸ ਹਿ ਇਤ੍ਥੀ ਭੋਗੋ, ਇਤ੍ਥਿਯਾ ਚ ਪੁਰਿਸੋ, ਤੇਨੇਵਸ੍ਸ ਪਦਭਾਜਨੇ ‘‘ਇਤ੍ਥੀ ਚੇਵ ਹੋਤਿ, ਪੁਰਿਸੋ ਚਾ’’ਤਿਆਦਿ (ਪਾਚਿ. ੨੮੧) ਵੁਤ੍ਤਂ. ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਯ੍ਯਾਤਿ ਅਨੁਪਵਿਸਿਤ੍ਵਾ ਨਿਸੀਦੇਯ੍ਯ, ਯਂ ਤਸ੍ਮਿਂ ਕੁਲੇ ਸਯਨਿਘਰਂ, ਤਸ੍ਸ ਮਹਾਚਤੁਸ੍ਸਾਲਾਦੀਸੁ ਕਤਸ੍ਸ ਮਹਲ੍ਲਕਸ੍ਸ ਪਿਟ੍ਠਸਙ੍ਘਾਟਤੋ ਹਤ੍ਥਪਾਸਂ ਵਿਜਹਿਤ੍ਵਾ ਅਨ੍ਤੋਸਯਨਸ੍ਸ ਆਸਨ੍ਨੇ ਠਾਨੇ, ਖੁਦ੍ਦਕਸ੍ਸ ਵਾ ਵੇਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸੀਦੇਯ੍ਯਾਤਿ ਅਤ੍ਥੋ, ਏਵਂ ਨਿਸਿਨ੍ਨਸ੍ਸ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਅਨੁਪਖਜ੍ਜ ਨਿਸਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਸਯਨਿਘਰੇ ਸਯਨਿਘਰਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਨਸਯਨਿਘਰਸਞ੍ਞਿਸ੍ਸ, ਵੁਤ੍ਤਲਕ੍ਖਣਂ ਪਦੇਸਂ ਅਨਤਿਕ੍ਕਮਿਤ੍ਵਾ ਨਿਸਿਨ੍ਨਸ੍ਸ, ਭਿਕ੍ਖੁਸ੍ਮਿਂ ਦੁਤਿਯਕੇ ਸਤਿ, ਉਭੋਸੁ ਨਿਕ੍ਖਨ੍ਤੇਸੁ ਵਾ, ਵੀਤਰਾਗੇਸੁ ਵਾ ਨਿਸੀਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਵੀਤਰਾਗਜਾਯਮ੍ਪਤਿਕਾਨਂ ਸਨ੍ਨਿਹਿਤਤਾ, ਸਯਨਿਘਰਤਾ, ਦੁਤਿਯਸ੍ਸ ਭਿਕ੍ਖੁਨੋ ਅਭਾਵੋ, ਅਨੁਪਖਜ੍ਜ ਨਿਸੀਦਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੀਤਿ.
ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪-੫. ਰਹੋਪਟਿਚ੍ਛਨ੍ਨ-ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ
ਚਤੁਤ੍ਥਪਞ੍ਚਮਾਨਿ ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਪਟਿਚ੍ਛਨ੍ਨਾਸਨੇ ਚ, ਰਹੋ ਚ ਨਿਸਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ, ਸਾਧਾਰਣਪਞ੍ਞਤ੍ਤਿਯੋ, ਏਤੇਸਮ੍ਪਿ ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੇਵ. ਸੇਸੋ ਕਥਾਨਯੋ ਅਨਿਯਤਦ੍ਵਯੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
ਰਹੋਪਟਿਚ੍ਛਨ੍ਨ-ਰਹੋਨਿਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ
ਛਟ੍ਠੇ ਨਿਮਨ੍ਤਿਤੋਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਿਤੋ. ਸਭਤ੍ਤੋ ਸਮਾਨੋਤਿ ਤੇਨੇਵ ਨਿਮਨ੍ਤਨਭਤ੍ਤੇਨ ਸਭਤ੍ਤੋ ਸਮਾਨੋ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾਤਿ ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਦਿਸ੍ਵਾ ਯਂ ਸਕ੍ਕਾ ਹੋਤਿ ਪਕਤਿਵਚਨੇਨ ਆਪੁਚ੍ਛਿਤੁਂ, ਤਾਦਿਸਂ ‘‘ਅਹਂ ਇਤ੍ਥਨ੍ਨਾਮਸ੍ਸ ਘਰਂ ਗਚ੍ਛਾਮੀ’’ਤਿ ਵਾ ‘‘ਚਾਰਿਤ੍ਤਂ ਆਪਜ੍ਜਾਮੀ’’ਤਿ ਵਾ ਈਦਿਸੇਨ ਵਚਨੇਨ ਅਨਾਪੁਚ੍ਛਿਤ੍ਵਾ. ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾਤਿ ਯੇਨ ਭਤ੍ਤੇਨ ਨਿਮਨ੍ਤਿਤੋ, ਤਸ੍ਮਿਂ ਭੁਤ੍ਤੇ ਵਾ ਅਭੁਤ੍ਤੇ ਵਾ. ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯਾਤਿ ਯਸ੍ਮਿਂ ਕੁਲੇ ਨਿਮਨ੍ਤਿਤੋ, ਤਤੋ ਅਞ੍ਞਾਨਿ ਕੁਲਾਨਿ ਪਵਿਸੇਯ੍ਯ. ਅਞ੍ਞਤ੍ਰ ਸਮਯਾ ਪਾਚਿਤ੍ਤਿਯਨ੍ਤਿ ਸਚੇ ਸੋ ਭਿਕ੍ਖੁ ਵੁਤ੍ਤਲਕ੍ਖਣਂ ਦੁਵਿਧਮ੍ਪਿ ਸਮਯਂ ਠਪੇਤ੍ਵਾ ਅਵੀਤਿਵਤ੍ਤੇ ਮਜ੍ਝਨ੍ਹਿਕੇ ਅਞ੍ਞਂ ਕੁਲਂ ਪਵਿਸਤਿ, ਅਥਸ੍ਸ ਘਰੂਪਚਾਰੋਕ੍ਕਮਨੇ ਦੁਕ੍ਕਟਂ, ਪਠਮਪਾਦੇਨ ਉਮ੍ਮਾਰਂ ਅਤਿਕ੍ਕਮਨ੍ਤਸ੍ਸ ਅਪਰਮ੍ਪਿ ਦੁਕ੍ਕਟਂ, ਦੁਤਿਯਪਾਦੇਨ ਅਤਿਕ੍ਕਮੇ ਪਾਚਿਤ੍ਤਿਯਂ.
ਰਾਜਗਹੇ ਉਪਨਨ੍ਦਂ ਆਰਬ੍ਭ ਚਾਰਿਤ੍ਤਾਪਜ੍ਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਸਨ੍ਤਂ ਭਿਕ੍ਖੁਂ, ਅਨਾਪੁਚ੍ਛਾ, ਪੁਰੇਭਤ੍ਤਂ ਪਚ੍ਛਾਭਤ੍ਤਂ, ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਚਤੁਬ੍ਬਿਧਾ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨਿਮਨ੍ਤਿਤੇ ਨਿਮਨ੍ਤਿਤਸਞ੍ਞਿਸ੍ਸ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਤਸ੍ਮਿਂ ਅਨਿਮਨ੍ਤਿਤਸਞ੍ਞਿਸ੍ਸ, ਸਮਯੇ ਸਨ੍ਤਂ ਭਿਕ੍ਖੁਂ ਆਪੁਚ੍ਛਿਤ੍ਵਾ, ਅਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਿਤ੍ਵਾ ਪਵਿਸਤੋ, ਅਞ੍ਞਸ੍ਸ ਘਰੇਨ ਵਾ ਘਰੂਪਚਾਰੇਨ ਵਾ ਮਗ੍ਗੋ ਹੋਤਿ, ਤੇਨ ਗਚ੍ਛਤੋ, ਅਨ੍ਤਰਾਰਾਮਭਿਕ੍ਖੁਨੁਪਸ੍ਸਯਤਿਤ੍ਥਿਯਸੇਯ੍ਯਪਟਿਕ੍ਕਮਨਭਤ੍ਤਿਯਘਰਾਨਿ ਗਚ੍ਛਤੋ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਨਸਾਦਿਯਨਂ, ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਨਾ, ਭਤ੍ਤਿਯਘਰਤੋ ਅਞ੍ਞਘਰਪ੍ਪਵਿਸਨਂ, ਮਜ੍ਝਨ੍ਹਿਕਾਨਤਿਕ੍ਕਮੋ, ਸਮਯਸ੍ਸ ਵਾ ਆਪਦਾਨਂ ਵਾ ਅਭਾਵੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇਵ, ਇਦਂ ਪਨ ਕਿਰਿਯਾਕਿਰਿਯਨ੍ਤਿ.
ਚਾਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਮਹਾਨਾਮਸਿਕ੍ਖਾਪਦਵਣ੍ਣਨਾ
ਸਤ੍ਤਮੇ ਚਤੁਮਾਸਪ੍ਪਚ੍ਚਯਪਵਾਰਣਾਤਿ ਚਤ੍ਤਾਰੋ ਮਾਸੇ ਗਿਲਾਨਪ੍ਪਚ੍ਚਯਪਵਾਰਣਾ, ਸਬ੍ਬਞ੍ਚੇਤਂ ਵਤ੍ਥੁਵਸੇਨ ਵੁਤ੍ਤਂ. ਅਯਂ ਪਨੇਤ੍ਥ ਅਤ੍ਥੋ – ਚਤੁਮਾਸਪਵਾਰਣਾ ਵਾ ਹੋਤੁ, ਪੁਨਪਵਾਰਣਾ ਵਾ, ਨਿਚ੍ਚਪਵਾਰਣਾ ਵਾ, ਸਬ੍ਬਾਪਿ ਸਾਦਿਤਬ੍ਬਾ, ‘‘ਇਦਾਨਿ ਮਮ ਰੋਗੋ ਨਤ੍ਥੀ’’ਤਿ ਨ ਪਟਿਕ੍ਖਿਪਿਤਬ੍ਬਾ, ‘‘ਰੋਗੇ ਪਨ ਸਤਿ ਵਿਞ੍ਞਾਪੇਸ੍ਸਾਮੀ’’ਤਿ ਅਧਿਵਾਸੇਤਬ੍ਬਾਤਿ. ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾਤਿ ਏਤ੍ਥ ਸਚੇ ਤਤ੍ਥ ਰਤ੍ਤੀਹਿ ਵਾ ਭੇਸਜ੍ਜੇਹਿ ਵਾ ਪਰਿਚ੍ਛੇਦੋ ਕਤੋ ਹੋਤਿ ‘‘ਏਤ੍ਤਕਾਯੇਵ ਰਤ੍ਤਿਯੋ, ਏਤ੍ਤਕਾਨਿ ਵਾ ਭੇਸਜ੍ਜਾਨਿ ਵਿਞ੍ਞਾਪੇਤਬ੍ਬਾਨੀ’’ਤਿ, ਅਥ ਤਤੋ ਰਤ੍ਤਿਪਰਿਯਨ੍ਤਤੋ ਵਾ ਭੇਸਜ੍ਜਪਰਿਯਨ੍ਤਤੋ ਵਾ ਉਤ੍ਤਰਿ, ਨ ਭੇਸਜ੍ਜਕਰਣੀਯੇਨ ਵਾ ਭੇਸਜ੍ਜਂ, ਅਞ੍ਞਭੇਸਜ੍ਜਕਰਣੀਯੇਨ ਵਾ ਅਞ੍ਞਂ ਭੇਸਜ੍ਜਂ ਵਿਞ੍ਞਾਪੇਨ੍ਤਸ੍ਸ ਪਾਚਿਤ੍ਤਿਯਂ.
ਸਕ੍ਕੇਸੁ ਛਬ੍ਬਗ੍ਗਿਯੇ ਆਰਬ੍ਭ ਭੇਸਜ੍ਜਵਿਞ੍ਞਾਪਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਨਤਤੁਤ੍ਤਰਿ ਤਤੁਤ੍ਤਰਿਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਨਤਤੁਤ੍ਤਰਿ ਨਤਤੁਤ੍ਤਰਿਸਞ੍ਞਿਸ੍ਸ, ਯੇਹਿ ਭੇਸਜ੍ਜੇਹਿ ਪਵਾਰਿਤੋ, ਤਤੋ ਅਞ੍ਞੇਹਿ ਵਾ ਅਧਿਕਤਰੇਹਿ ਵਾ ਅਤ੍ਥੇ ਸਤਿ, ਯਾਸੁ ਚ ਰਤ੍ਤੀਸੁ ਪਵਾਰਿਤੋ, ਤਾ ਅਤਿਕ੍ਕਮਿਤ੍ਵਾਪਿ ਅਤ੍ਥੇ ਸਤਿ ਯਥਾਭੂਤਂ ਆਚਿਕ੍ਖਿਤ੍ਵਾ ਵਿਞ੍ਞਾਪੇਨ੍ਤਸ੍ਸ, ਯੇ ਚ ਞਾਤਕੇ ਵਾ ਪੁਗ੍ਗਲਿਕਪ੍ਪਵਾਰਣਾਯ ਪਵਾਰਿਤੇ ਵਾ ਅਪਰਿਯਨ੍ਤਪਵਾਰਣਾਯ ਵਾ ਪਵਾਰਿਤੇ, ਅਞ੍ਞਸ੍ਸ ਵਾ ਅਤ੍ਥਾਯ, ਅਤ੍ਤਨੋ ਵਾ ਧਨੇਨ ਵਿਞ੍ਞਾਪੇਨ੍ਤਿ, ਤੇਸਂ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਸਙ੍ਘਪਵਾਰਣਤਾ, ਤਤੋ ਭੇਸਜ੍ਜਵਿਞ੍ਞਤ੍ਤਿ, ਅਗਿਲਾਨਤਾ, ਪਰਿਯਨ੍ਤਾਤਿਕ੍ਕਮੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ.
ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ
ਅਟ੍ਠਮੇ ਉਯ੍ਯੁਤ੍ਤਨ੍ਤਿ ਕਤਉਯ੍ਯੋਗਂ, ਗਾਮਤੋ ਨਿਕ੍ਖਨ੍ਤਨ੍ਤਿ ਅਤ੍ਥੋ. ਸੇਨਨ੍ਤਿ ਚਤੁਰਙ੍ਗਿਨਿਂ. ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾਤਿ ਤਥਾਰੂਪੇ ਕਾਰਣੇ ਅਸਤਿ ਕੇਵਲਂ ਸੇਨਂ ਦਸ੍ਸਨਤ੍ਥਾਯ ਗਚ੍ਛਤੋ ਪਦੇ ਪਦੇ ਦੁਕ੍ਕਟਂ, ਦਸ੍ਸਨੂਪਚਾਰੇ ਠਤ੍ਵਾ ਪਸ੍ਸਤੋ ਪਾਚਿਤ੍ਤਿਯਂ. ਦਸ੍ਸਨੂਪਚਾਰੋ ਨਾਮ ਯਤ੍ਥ ਠਿਤੋ ਪਸ੍ਸਤਿ, ਤਂ ਪਨ ਵਿਜਹਿਤ੍ਵਾ ਪੁਨਪ੍ਪੁਨਂ ਪਸ੍ਸਤੋ ਪਯੋਗੇ ਪਯੋਗੇ ਪਾਚਿਤ੍ਤਿਯਂ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਸੇਨਾਦਸ੍ਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਹਤ੍ਥਿਆਦੀਸੁ ਏਕਮੇਕਂ ਦਸ੍ਸਨਾਯ ਗਮਨੇ ਵੁਤ੍ਤਨਯੇਨੇਵ ਦੁਕ੍ਕਟਂ, ਤਥਾ ਅਨੁਯ੍ਯੁਤ੍ਤੇ ਉਯ੍ਯੁਤ੍ਤਸਞ੍ਞਿਨੋ, ਵੇਮਤਿਕਸ੍ਸ ਚ ਦੁਕ੍ਕਟਂ. ਅਨੁਯ੍ਯੁਤ੍ਤਸਞ੍ਞਿਨੋ ਪਨ, ਆਰਾਮੇ ਠਤ੍ਵਾ ਅਤ੍ਤਨੋ ਠਿਤੋਕਾਸਂ ਆਗਤਂ, ਪਟਿਪਥਂ ਆਗਚ੍ਛਨ੍ਤਞ੍ਚ ਪਸ੍ਸਤੋ, ਤਥਾਰੂਪਪ੍ਪਚ੍ਚਯੇ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਉਯ੍ਯੁਤ੍ਤਸੇਨਂ ਦਸ੍ਸਨਤ੍ਥਾਯ ਗਮਨਂ, ਅਨੁਞ੍ਞਾਤੋਕਾਸਤੋ ਅਞ੍ਞਤ੍ਰ ਦਸ੍ਸਨਂ, ਤਥਾਰੂਪਪ੍ਪਚ੍ਚਯਸ੍ਸ ਆਪਦਾਯ ਵਾ ਅਭਾਵੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨਿ, ਇਦਂ ਪਨ ਲੋਕਵਜ੍ਜਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਉਯ੍ਯੁਤ੍ਤਸੇਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਸੇਨਾਵਾਸਸਿਕ੍ਖਾਪਦਵਣ੍ਣਨਾ
ਨਵਮੇ ਤਤੋ ਚੇ ਉਤ੍ਤਰੀਤਿ ਤਿਰਤ੍ਤਤੋ ਉਤ੍ਤਰਿ ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਸੇਨਾਯ ਤਿਟ੍ਠਤੁ ਵਾ ਨਿਸੀਦਤੁ ਵਾ ਸਯਤੁ ਵਾ, ਸਚੇਪਿ ਆਕਾਸੇ ਇਦ੍ਧਿਯਾ ਕਞ੍ਚਿ ਇਰਿਯਾਪਥਂ ਕਪ੍ਪੇਤਿ, ਪਾਚਿਤ੍ਤਿਯਮੇਵ.
ਸਾਵਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਤਿਰੇਕਤਿਰਤ੍ਤਂ ਸੇਨਾਯ ਵਸਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕਤਿਰਤ੍ਤੇ ਅਤਿਰੇਕਸਞ੍ਞਿਨੋ, ਵੇਮਤਿਕਸ੍ਸ ਵਾ ਦੁਕ੍ਕਟਂ. ਊਨਕਸਞ੍ਞਿਸ੍ਸ, ਤਤਿਯਾਯ ਰਤ੍ਤਿਯਾ ਪੁਰਾਰੁਣਾ ਨਿਕ੍ਖਮਿਤ੍ਵਾ ਪੁਨ ਵਸਤੋ, ਗਿਲਾਨਸ੍ਸ ਵਾ ਗਿਲਾਨਕਰਣੀਯੇਨ ਵਾ ਵਸਤੋ, ਪਟਿਸੇਨਾਰੁਦ੍ਧਾਯ ਸੇਨਾਯ, ਕੇਨਚਿ ਪਲਿਬੁਦ੍ਧਸ੍ਸ, ਆਪਦਾਸੁ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਤਿਰਤ੍ਤਾਤਿਕ੍ਕਮੋ, ਸੇਨਾਯ ਸੂਰਿਯਸ੍ਸ ਅਤ੍ਥਙ੍ਗਮੋ, ਗਿਲਾਨਤਾਦੀਨਂ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਏਲ਼ਕਲੋਮਸਦਿਸਾਨੇਵਾਤਿ.
ਸੇਨਾਵਾਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ
ਦਸਮੇ ਉਗ੍ਗਨ੍ਤ੍ਵਾ ਉਗ੍ਗਨ੍ਤ੍ਵਾ ਏਤ੍ਥ ਯੁਜ੍ਝਨ੍ਤੀਤਿ ਉਯ੍ਯੋਧਿਕਂ, ਸਮ੍ਪਹਾਰਟ੍ਠਾਨਸ੍ਸੇਤਂ ਨਾਮਂ. ਬਲਸ੍ਸ ਅਗ੍ਗਂ ਜਾਨਨ੍ਤਿ ਏਤ੍ਥਾਤਿ ਬਲਗ੍ਗਂ, ਬਲਗਣਨਟ੍ਠਾਨਨ੍ਤਿ ਅਤ੍ਥੋ. ਸੇਨਾਯ ਵਿਯੂਹਂ ਸੇਨਾਬ੍ਯੂਹਂ, ਸੇਨਾਨਿਵੇਸਸ੍ਸੇਤਂ ਨਾਮਂ. ਅਨੀਕਸ੍ਸ ਦਸ੍ਸਨਂ ਅਨੀਕਦਸ੍ਸਨਂ. ਅਨੀਕਂ ਨਾਮ ‘‘ਦ੍ਵਾਦਸਪੁਰਿਸੋ ਹਤ੍ਥੀ, ਤਿਪੁਰਿਸੋ ਅਸ੍ਸੋ, ਚਤੁਪ੍ਪੁਰਿਸੋ ਰਥੋ’’ਤਿਇਮਿਨਾ (ਪਾਚਿ. ੩੧੪) ਲਕ੍ਖਣੇਨ ਤਯੋ ਹਤ੍ਥੀ ਪਚ੍ਛਿਮਕਂ ਹਤ੍ਥਾਨੀਕਂ, ਅਸ੍ਸਾਨੀਕਰਥਾਨੀਕੇਸੁਪਿ ਏਸੇਵ ਨਯੋ. ਚਤ੍ਤਾਰੋ ਪਨ ਆਵੁਧਹਤ੍ਥਾ ਪੁਰਿਸਾ ਪਚ੍ਛਿਮਕਂ ਪਤ੍ਤਾਨੀਕਂ. ਏਤੇਸੁ ਯਂਕਿਞ੍ਚਿ ਦਸ੍ਸਨਾਯ ਗਚ੍ਛਤੋ ਪਦੇ ਪਦੇ ਦੁਕ੍ਕਟਂ, ਦਸ੍ਸਨੂਪਚਾਰੇ ਠਤ੍ਵਾ ਪਸ੍ਸਤੋ ਪਾਚਿਤ੍ਤਿਯਂ, ਉਪਚਾਰਂ ਪਨ ਵਿਜਹਿਤ੍ਵਾ ਪੁਨਪ੍ਪੁਨਂ ਪਸ੍ਸਤੋ ਪਯੋਗੇ ਪਯੋਗੇ ਪਾਚਿਤ੍ਤਿਯਂ. ਸੇਸਂ ਉਯ੍ਯੁਤ੍ਤਸੇਨਾਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਆਪਤ੍ਤਿਭੇਦੋ ਪਨੇਤ੍ਥ ਨਤ੍ਥੇਵਾਤਿ.
ਉਯ੍ਯੋਧਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਅਚੇਲਕਵਗ੍ਗੋ ਪਞ੍ਚਮੋ.