੨. ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ

ਦੁਤਿਯੇ ਦਾਪੇਤ੍ਵਾ ਵਾ ਅਦਾਪੇਤ੍ਵਾ ਵਾਤਿ ਯਂਕਿਞ੍ਚਿ ਆਮਿਸਂ ਦਾਪੇਤ੍ਵਾ ਵਾ ਨ ਦਾਪੇਤ੍ਵਾ ਵਾ. ਉਯ੍ਯੋਜੇਯ੍ਯਾਤਿ ਮਾਤੁਗਾਮੇਨ ਸਦ੍ਧਿਂ ਹਸਨਕੀਲ਼ਨਰਹੋਨਿਸਜ੍ਜਾਦੀਨਿ ਕਤ੍ਤੁਕਾਮੋ ‘ਗਚ੍ਛਾ’ਤਿਆਦੀਨਿ ਵਤ੍ਵਾ ਉਯ੍ਯੋਜੇਯ੍ਯ. ਏਤਦੇਵਾਤਿ ਏਤਂ ਅਨਾਚਾਰਮੇਵ ਪਚ੍ਚਯਂ ਕਰਿਤ੍ਵਾ, ਨ ਅਞ੍ਞਂ ਪਤਿਰੂਪਂ ਕਾਰਣਂ. ਪਾਚਿਤ੍ਤਿਯਨ੍ਤਿ ਉਯ੍ਯੋਜਨਮਤ੍ਤੇ ਤਾਵ ਦੁਕ੍ਕਟਂ, ਯਦਾ ਪਨਸ੍ਸ ਸੋ ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ ਏਕੇਨ ਪਾਦੇਨ ਵਿਜਹਤਿ, ਅਪਰਂ ਦੁਕ੍ਕਟਂ, ਦੁਤਿਯੇਨ ਵਿਜਹਿਤੇ ਪਾਚਿਤ੍ਤਿਯਂ. ਏਤ੍ਥ ਚ ਦਸ੍ਸਨੂਪਚਾਰਸ੍ਸ ਅਜ੍ਝੋਕਾਸੇ ਠਤ੍ਵਾ ਦ੍ਵਾਦਸਹਤ੍ਥਪ੍ਪਮਾਣਂ, ਤਥਾ ਸਵਨੂਪਚਾਰਸ੍ਸ. ਸਚੇ ਪਨ ਅਨ੍ਤਰਾ ਕੁਟ੍ਟਦ੍ਵਾਰਪਾਕਾਰਾਦਯੋ ਹੋਨ੍ਤਿ, ਤੇਹਿ ਅਨ੍ਤਰਿਤਭਾਵੋਯੇਵ ਉਪਚਾਰਾਤਿਕ੍ਕਮੋ.

ਸਾਵਤ੍ਥਿਯਂ ਉਪਨਨ੍ਦਂ ਆਰਬ੍ਭ ਉਯ੍ਯੋਜਨਵਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਉਯ੍ਯੋਜਨਾਣਤ੍ਤਿਕਾਯ ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਂ, ਉਭਿਨ੍ਨਮ੍ਪਿ ਕਲਿਸਾਸਨਾਰੋਪਨੇ ਦੁਕ੍ਕਟਮੇਵ, ‘‘ਉਭੋ ਏਕਤੋ ਨ ਯਾਪੇਸ੍ਸਾਮਾ’’ਤਿ ਏਵਮਾਦੀਹਿ ਪਤਿਰੂਪਕਾਰਣੇਹਿ ਉਯ੍ਯੋਜੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ. ਅਨਾਚਾਰਂ ਆਚਰਿਤੁਕਾਮਤਾ, ਤਦਤ੍ਥਮੇਵ ਉਪਸਮ੍ਪਨ੍ਨਸ੍ਸ ਉਯ੍ਯੋਜਨਂ, ਏਵਂ ਉਯ੍ਯੋਜਿਤਸ੍ਸ ਉਪਚਾਰਾਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ.

ਉਯ੍ਯੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.